- All e-books and audiobooks on The New Life Mission website are free
- Explore multilingual sermons in global languages
- Two new revised editions in English have been released
- Check out our website translated into 27 languages
Kota tënë 1: Siokpari
[1-2] Ayeke du Azo gi Awasiokpari (Marc 7 : 20-23)
(Marc 7 : 20-23)
« Lo kiri lo tene: Ye so ayeke sigigi na ya ti zo laa asara si lo ga sioni. Biani, alondo na ya ni, ayeke na ya ti be ti azo si asioni gbungo-li alondo daa, asarango ye ti ndumba, nzi, fango zo, gingo wali wala koli ti zo, sarango nzara ti ye ti zo, sioni be, handango zo, sarango ye ti kirikiri, kota be, tenengo sioni tënë na iri ti zo, sarango baba nga na sarango ye ti gbogbolinda. Asioni ye so kue alondo gi na be ti zo si asara titene lo ga sioni. »
Azo Ahinga li ti ala na ye so ala Lingbi ti Sara pepe Si ala yeke Duti na Handango Terê ti ala
| Zo so alingbi ti soo lo ayeke zo wa? |
| Zo so abaa terê ti lo tongana kota wasiokpari ahon azo kue ti dunia |
Kozo si mbi gue daa, mbi ye ti hunda na mo mbeni tënë oko. Gbungo li ti mo na ndö ti mo wani ayeke tongana nyen? Mo baa mo wani tongana nzoni zo wala sioni zo? Gbungo li ti mo daa ayeke nyen?
Azo kue ayeke duti na lege ti handango terê ti ala wani. Ti baa nzoni, mo yeke taa sioni pepe wala taa nzoni pepe tongana so mo yeke gbu li ti mo na ni.
Na mo wani, zo so fade duti ti lo na lege ti mabe ayeke nzoni mingi ayeke zo wa? Ayeke azo so abaa terê ti ala tongana anzoni zo wala azo so abaa terê ti ala tongana asioni zo?
Ayeke azo so abaa terê ti ala tongana asioni zo. Tongaso, azo so ayeke na pasa mingi titene azi ala na ya ti asiokpari aye azo wa? Azo so asara siokpari mingi wala azo so asara gi ambeni siokpari? Azo so asara siokpari mingi ayeke na pasa titene azi ala na ya ti asiokpari ti ala, ngbanga ti so ala hinga atene ala yeke awasiokpari. Ala lingbi ti yeda nzoni mingi na tënë ti zingo ala na ya ti asiokpari so Jezu leke gere ni.
Tongana e baa terê ti e biani, e lingbi baa so e yeke gi agbâ ti siokpari. Azo ayeke nyen? Azo ayeke gi « mbeni mara ti asioni zo. » Na ya mbeti ti Isai 59, atene amara ti sioni nde nde kue ayeke na be ti azo. Nilaa, azo ayeke mbeni gbâ ti siokpari. Me tongana e baa azo kue tongana mbeni gbâ ti siokpari, fade azo mingi ayeda na ni pepe. Bango zo tongana « mbeni mara ti asioni zo » ayeke taa na lege ni. Tongana e baa taa terê ti e nzoni, fade e yeke tene ande e yeke sioni. Azo so ayeke handa terê ti ala pepe ayeke tene zo ayeke sioni mara biani.
Me ti baa ni, azo so ayeda atene, azo ayeke gi mbeni gbâ ti siokpari biani, azo ni ayeke mingi pepe. Mingi ti azo ayeke duti pendere ngbanga ti so ala baa terê ti ala tongana awasiokpari pepe. Ndali ti so e yeke azo ti sioni, e leke mbeni ngobo ti dutingo ni na ya ti siokpari. Tongana azo mingi so ayeke na nzoni gbungo-li ahinga dutingo ti ala ti awasiokpari, fade kamene ti sarango siokpari ahon ndö ti ala. Me ngbanga ti so azo so ayeke na nzoni gbungo-li pepe ti hinga dutingo ti ala ti awasiokpari ni ayeke gbâ ni, nilaa kamene ti asiokpari ti ala asara ala pepe.
Me na be ti ala, ala hinga ni. Zo oko oko ayeke na mbeni gbungo-li so ayeke tene na lo: « So ye ti kamene laa. » Adam na Eve, ala honde terê ti ala na ya ti akeke na peko ti siokpari so ala sara. Laso nga, azo mingi ayeke honde terê ti ala na peko ti angobo ti sarango ye ti e so ayeke gi ye ti senge ― angobo ti sarango ye so ayeke ti siokpari. Ala yeke honde terê ti ala na peko ti amba ti ala awasiokpari ti kpe na fango ngbanga ti Nzapa.
Azo ahanda terê ti ala na lege ti gbungo-li ti ala wani. Ala baa terê ti ala nzoni kue ahon azo kue. Ala yeke dekongo na ngozo atene: « Zo alingbi ti sara mara ti ye tongaso tongana nyen? Wamabe alingbi ti sara ye tongaso tongana na nyen? Molenge alingbi ti sara mara ti ye tongaso na azo ti dungo lo tongana nyen? » Ala wani, ala baa atene ala lingbi ti sara mara ti ye tongaso pepe.
Andeko ti mbi, ayeke ngangu ti hinga zo na dutingo ti lo ti zo. Tongana e ye titene azi e na ya ti asiokpari biani, ayeke nzoni e wani e hinga terê ti e kozo tongana ti so e yeke biani. Ayeke mbeni kapa so amu ngoi mingi, na azo mingi na popo ti e fade ahinga ni laoko pepe ngbii lango ti kuâ ti ala asi.
Ayeke nzoni Mo wani mo Hinga Terê Ti Mo
| Azo so ahinga terê ti ala wani pepe, dutingo ti ala ayeke tongana nyen? |
| Ala gi lege ti honde terê ti ala na ya ti dutingo ti ala |
Na ambeni ngoi, e yeke tingbi na ambeni zo so ahinga taa terê ti ala wani pepe. Socrate atene: « Hinga terê ti mo, mo wani. » Me ambeni azo mingi na popo ti e, e hinga pepe ye so ayeke na be ti e: fango zo, nzi, sarango nzara ti ye ti zo, sioni be, sarango ye ti mini mini, sarango ye ti kirikiri, bango ndo na sioni le, na atangani ti gue na ni.
Sioni ngu ti yanga ti ngbo ayeke na be ti ala, me ala yeke sara tënë ti nzoni be. Ayeke ngbanga ti so ala hinga pepe atene adu ala awasiokpari.
Azo mingi na gigi so ahinga ti baa terê ti ala wani pepe. Ala yeke handa terê ti ala wani si ala yeke sara gigi ti handango terê ti ala ni tongana na mbeni ye so ahonde na ya ti bozo. Ala yeke bi terê ti ala na le ti wâ. Fade ala gue na le ti wâ ndali ti handango terê ti ala wani.
Azo angba ti Tuku Siokpari na ya ti Gigi ti ala kue
| Ala yeke gue na le ti wâ ngbanga ti nyen? |
| Ngbanga ti so ala hinga terê ti ala wani pepe |
E asa Marc 7:21-23. « Ngbanga ti ye so ayeke sigigi na ya ti zo laa asara si lo ga sioni. Biani, asioni tënë ti be alondo na ya ti zo, na be ti lo si afa na lo lege ti sarango asioni ye: sarango ye ti ndumba, nzi, fango zo, gingo wali wala koli ti zo, sarango nzara ti ye ti zo, sioni be, handango zo, sarango ye ti kirikiri, kota be, tenengo sioni tënë na iri ti zo, sarango baba nga na sarango ye ti gbogbolinda. Asioni ye so kue alondo gi na be ti zo si asara titene lo ga sioni. » Be ti azo asi singo na asioni gbungo-li gi na ngoi so amu ngo ti ala.
E gbu li ti e gi na limo ti be ti mbeni zo so ayeke tongana mbeni kopo so sioni ngu asi ya ni, so afa asiokpari ti e. Nyen laa alingbi ti si tongana zo ni ayengere terê ti lo na peko na dawa? Biani, sioni ngu ni so (siokpari ni) ayeke tuku na ndo kue. Na ngoi kue so lo yeke hon kâ, lo yeke hon ge, fade siokpari ni ayeke ngba ti tuku ti mu ndo.
E so e yeke gi gbâ ti siokpari so, dutingo ti e ayeke tongaso. E yeke tuku asiokpari na ndo kue so e yeke gue daa. Fade e sara siokpari na ya ti gigi ti e kue, ngbanga ti so e yeke gi mbeni gbâ ti siokpari.
Kpale ni, ayeke so e hinga pepe e tene e yeke mbeni gbâ ti siokpari si nga e yeke tongana angoangoa ti siokpari. E yeke agbâ ti siokpari, e yeke na siokpari na ya ti be ti e. So laa ayeke ye so azo ayeke ni biani.
Agbâ ti asiokpari ni ayeke gi nduru ti tuku. Kota siokpari ti azo ayeke so ala ma na be pepe so ala yeke gi awasiokpari, ala baa atene gi ambeni zo laa ayeke gue na ala ti sara siokpari, so ti tene, ayeke pepe gi ala wani si asara sioni biani.
Nilaa, ataa tongana ala sara siokpari, ala baa atene tongana ala kiri asukula terê ti ala avuru, so alingbi awe ti mbô asiokpari ti ala ni. Ala ngba lakue ti mbô terê ti ala na peko ti siokpari oko oko kue so ala sara, ala yeke tene biani ala laa ayeke na gonda ni siokpari ni pepe. Gi so si e mbô ni awe so, fade e kiri ti tuku ni pepe? Ayeke ti e ti ngba lakue ti mbô ni na ti kiri ti mbô ni lakue lakue.
Tongana kopo asisingo na siokpari lo yeke ngba lakue ti tuku siokpari ni. Ataa e mbô terê ti kopo ni na gigi asara ye oko pepe. Ataa e mbô terê ti kopo ni lege oke na lege ti nzoni gbungo-li ti e, so asara ye oko pepe tongana e kue siokpari asi ya ti kopo ti e ni.
Adu e na gbâ ti asiokpari na asara si fade ya ti be ti e akiri ti duti senge senge pepe, ataa e tuku asiokpari ni na ndö ti lege tongana nyen. Nilaa, e ngba ti sara asiokpari na ya ti gigi ti e kue.
Tongana zo ahinga pepe atene lo yeke gi mbeni gbâ ti siokpari, lo ngba ti gi lege ti honde terê ti lo. Siokpari ayeke na be ti azo kue, ayeke gi na sukulango ni na gigi senge si ayeke hon pepe. Tongana e tuku siokpari ni kete, e mbô ni na mbeni yanga ti bongo, tongana e kiri e tuku mbeni siokpari ni, e mbô ni na mbeni serviete, mbeni serpiere, na pekoni e mbô ni na tapi. E ngba lakue ti gbu li ti e tene, tongana e ngba ti mbô ni ti fani oko mbeni, fade akiri ti vuru. Me ye ni ayeke tuku gi tukungo lakue lakue ti gue na ni.
Na gbungo-li ti mo, ye ni so ayeke mu ngoi oke? Ye ni ayeke ngba ngbii lango ti kuâ ti e. Zo ayeke sara siokpari na ya ti gigi ti lo ngbii lo kui na ni. Ndani laa alingbi e ma na be na Jezu titene azi e na ya ti asiokpari ti e. Na nga titene azi e na ya ti asiokpari ti e, ayeke nzoni e hinga terê ti e, e wani.
| Zo wa laa alingbi ti kamata Jezu na mungo singila? |
| Awasiokpari so ahinga atene ala sara sioni mingi |
Zia si e tene tënë ti azo use so ahaka ala na kopo so sioni ngu asi ya ni. Kopo ni use kue asisingo na siokpari. Mbeni oko abaa terê ti lo si lo tene, « Aai, mbi yeke taa-wasiokpari! » Tongaso, lo zia lege ti siokpari ni na lo gue lo gi peko ti mbeni zo so alingbi ti mu maboko na lo.
Me mbeni so abaa terê ti lo atene lo yeke nga sioni pepe. Lo lingbi pepe ti baa gbâ ti siokpari na terê ti lo na lo baa ti lo atene lo wani lo yeke nga na sioni mingi pepe. Lo ngba lakue ti mbô sioni ngu so angba ti tuku. Lo mbô ngu ni na mbage kâ, na pekoni lo mbô ni mbage ge, na pekoni lo kiri hio na mbeni mbage ni.
Azo mingi ayeke sara hange na ya ti dutingo ti ala na gigi na batango asiokpari na ya ti be ti ala titene ala zia ni atuku pepe. Me ka so si ala yeke na siokpari na be ti ala so, ayeke asara nyen? Dutingo na lege ti sarango hange alingbi ti gue na mo nduru mingi na yayu pepe. « Dutingo na hange », ayeke zia mo na lege ti guengo na le ti wâ.
Andeko ti mbi, « dutingo na hange » ayeke gue na mo gi na le ti wâ. Tongana azo aduti na hange, siokpari ti ala alingbi ti hon ndoni pepe. Me ala angba lakue awasiokpari so ahonde terê ti ala.
Nyen laa ayeke na be ti azo? Siokpari? Sarango ndumba? Ayeke daa! Asioni gbungo-li? Ayeke daa! Nzi ayeke daa? Ayeke daa! Sioni yanga? Ayeke daa!
E hinga e tene e yeke agbâ ti siokpari tongana e baa si asarango ye ti e ayeke ti siokpari, ayeke ti sioni-be so si mbeni zo laa afa ni na e pepe. E lingbi ti baa aye ni so pepe na ngoi so e ngba maseka.
Me na ngoi so e yeke ga mbakoro, ye ni ayeke tongana nyen? Na ngoi so e yeke gue na kota da-mbeti, na sendagi, ti gue na ni, e hinga e tene ye so ayeke na ya ti e ayeke siokpari. Ayeke taa-tënë pepe? Asi na maka ni so, lege ti hondengo ni ayeke daa pepe. Nilaa pepe? E ngba lakue ti tuku ni. Na pekoni e fa pekoni na Nzapa. « Ayeke ti mbi ti sara ye so pepe » Me e baa so lege ti e ti gbian ni biani ayeke daa pepe. Ngbanga ti nyen si ye ni ayeke tongaso? Ngbanga ti so adu zo oko oko na popo ti e tongana mbeni gbâ ti siokpari.
E ga nzoni kue gi na lege ti dutingo na hange pepe. Ye so alingbi e hinga, ayeke so adu e na gbâ ti siokpari titene azi e na ya ni biani. Gi awasiokpari so ayeda na mungo singila ndali ti zingo ala na ya ti siokpari so Jezu aleke ni si alingbi ti soo ala.
Ala so agbu li ti ala atene « Mbi sara kota ye ti sioni mingi pepe na mbi sara nga siokpari mingi pepe » ala ma na be pepe so Jezu a azi asiokpari ti ala kue, ndo ti ala ayeke le ti wâ. Ayeke nzoni e hinga e tene e ayeke na gbâ ti siokpari so na ya ti e. Adu e kue na ni.
Tongana mbeni zo gbu li ti lo atene: « Mbi sara sioni mingi pepe, tongana alingbi ti zi mbi na ya ti kete siokpari so », fade azi lo yamba na ya ti siokpari so na pekoni? Alingbi ti duti tongaso laoko pepe.
Zo so alingbi ti zi lo na ya ti asiokpari ayeke zo so ahinga atene lo yeke na gbâ ti siokpari. Lo ma na be biani so Jezu amu asiokpari ti lo kue na lege ti bateme so asara na Lo na ngu ti Jurden si Lo zi asiokpari ni kue na kuingo ti lo na ndö keke ti Kulusu.
Ataa azi e na ya ti asiokpari ti e wala azi e pepe pepe, e kue e duti na lege ti handango terê ti e. E yeke agbâ ti siokpari. E yeke gi tongaso. E lingbi titene azi e na ya ti asiokpari ti e gi tongana na e ma na be so Jezu azi asiokpari ti e kue awe.
Azo so Ayeke na « Kete siokpari » Nzapa Azi ala na Ya ni pepe
| Zo wa laa ayeke handa Mve ti dunia? |
| Zo so ayeke hunda Nzapa lakue ti mbô asiokpari ti lo. |
Nzapa ayeke zi azo so ayeke gi na « kete siokpari pepe. » Nzapa ayeke bi nga le ti lo pepe na ndö ti azo so ayeke tene: « Nzapa, mbi yeke gi na kete siokpari so. » Azo so Nzapa ayeke bi le na ndö ti ala ayeke ala so atene: « Nzapa ti mbi, mbi yeke mbeni gbâ ti siokpari. Mbi yeke gue na le ti wâ. Mbi voro mo, mo soo mbi. » Ataa wasiokpari ayeke tene: « Nzapa fade asoo mbi gi tongana Mo soo mbi. Mbi lingbi mbeni pepe ti sara sambela ti fango peko ti asiokpari ti mbi, ngbanga ti so mbi yeke kiri ti sara mbeni siokpari ni. Mo soo mbi, mbi voro mo. »
Nzapa ayeke soo azo so azia be ti ala kue gi na ndö ti Lo. Mbi nga kue mbi tara sambela ti fango peko ti asiokpari lakue lakue. Me asambela ti fango asiokpari ti e azi e pepe na ya ti asiokparis. « Nzapa, mo baa mawa ti mbi na Mo soo mbi na ya ti asiokpari ti mbi. » Azo so asambela tongaso, fade asoo ala. Ala ma na be so Nzapa azi ala na ya ri asiokpari, ala ma na be na bateme so Jean Batiste asara na Jezu. Fade asoo ala.
Nzapa ayeke soo gi ala so ahinga atene ala yeke agbâ ti siokpari, ala so adu ala na ya ti siokpari. Ala so ayeke tene: « Mbi sara gi kete siokpari so. Mbi voro Mo, Mo zi tënë ni na li ti mbi » ala ngba lakue gi awasiokpari, Nzapa alingbi ti soo ala pepe. Nzapa ayeke soo gi ala so ahinga atene ala yeke taa agbâ ti siokpari biani.
Na ya ti Isaï 59:1-2, atene: « Ala baa atene, maboko ti Mve ti dunia ayeke nduru ti soo ala? Mê ti lo akanga ti ma ala? Sioni ti ala laa akangbi popo ti ala na Nzapa ti ala; siokpari ti ala laa asara si lo bi le ti lo yongoro si lo lingbi ti ma ala pepe. »
Ngbanga ti so adu e tongana mbeni gbâ ti siokpari, Nzapa alingbi pepe ti baa e na nzoni le. Ayeke pepe ngbanga ti so maboko ti lo ayeke nduru wala mê ti lo akanga si lo lingbi pepe ti ma e tongana na e hunda na Lo ti zi siokpari ti e.
Nzapa ayeke tene na e: « Ayeke gi asioni ti e si ayeke kangbi popo ti e na Nzapa; Ayeke gi asikpari ti e si ayeke honde le ti Lo na e na akanga lege na Lo ti ma e. » Ngbanga ti so e yeke na gbâ ti siokpari na be ti e, e lingbi pepe ti li na yayu, ataa so yanga ni azi kota.
Tongana e so so e yeke mbeni gbâ ti siokpari so, e hunda na Nzapa ti zi tënë na li ti e na ngoi kue so e sara siokpari, alingbi Nzapa afâ Molenge ti Lo fani mingi. Nzapa aye ti sara so pepe. Nilaa Lo tene: « Ala ga na Mbi lakue na asiokpari ti ala pepe. Mbi tokua na ala Molenge ti Mbi titene azi ala na ya ti asiokpari ti ala kue. Ye so ala lingbi ti sara, ayeke ti hinga tongana nyen si Jezu azi asiokpari ti ala ni na ti baa ni wala ayeke taa-tene. Na pekoni, ayeke nzoni ala ma na be na nzoni sango ti zingo azo na ya ti asiokpari si asoo ala. So ayeke kota ndoye so Mbi yeke na ni na mbage ti ala, ala zo so Mbi sara ala. »
Ayeke ye so laa Nzapa ayeke tene na e. « Ala ma na be na Molenge ti Mbi si asoo ala. Mbi Nzapa ti ala, Mbi tokua Molenge ti Mbi ti mbô asiokpari ti ala na agirisango lege ti ala. Ayeke nzoni ala ma na be na Molenge ti Mbi si asoo ala. »
Azo so ahinga pepe atene ala yeke agbâ ti siokpari ayeke hunda gi na Nzapa ti zi akete siokpari ti ala. Ala ga gbe le ti Lo, ala hinga pepe atene ala yeke na agbâ ti siokpari na nengo ti asiokpari ni si ala yeke sambela atene: « Mbi voro Mo, Mo zi kete siokpari ti mbi so. Fade mbi kiri ti sara mara ti ye tongaso laoko pepe. »
Ala tara nga ti handa Lo. E yeke sara siokpari gi fani oko senge pepe, me e yeke sara siokpari lakue ngbii e kui na ni. Ayeke nzoni e ngba lakue ti hunda na Lo ti zi asiokpari ti e ngbii asi na ndangba lango ti fini ti e.
Titene azi tënë na li ti e ndali ti mbeni kete siokpari alingbi ti kai kpale ni kete pepe, ngbanga ti so e yeke sara asiokpari lakue na ya ti gigi ti e ngbii e kui na ni. Oko lege titene azi e na ya ti siokpari ti e, ayeke gi ti mu asiokpari ni kue na Jezu.
| Zo ayeke tongana nyen? |
| Mbeni gbâ ti asiokpari |
Mbeti ti Nzapa afa peko ti asiokpari ti azo. Na ya ti Isai 59:3-8 « Biani, ya ti maboko ti ala asi singo na mênë, ali ti maboko ti ala aga sioni ndali ti sioni ti ala; yanga ti ala ayeke tene atënë ti mvene, menga ti ala ayeke diko atënë ti kirikiri. Tënë so ala gue na ni na le ti ngbanga, ayeke na legeni pepe; ala yeke gbu koko ti azo na lege ti taa-tënë pepe. Ala yeke luti na ndö ti ye so ayeke ye oko pepe, ala yeke tene atënë ti mvene; ala yeke mu ngo ti ye ti sioni si ala yeke du ye ti kirikiri. Sarango ye ti ala ayeke sioni tongana para ti sioni ngbo. Tongana zo ate para ni, lo yeke kui; tongana a fâ ya ni, sioni ngbo laa ayeke sigigi daa. Akamba so ala yeke leke akpa akamba so mbeni tere aleke ti sara na gbanda ti lo; zo alingbi ti sara ni na bongo pepe,wala ti yu ni pepe. Ala yeke mu loro ti sara sioni, ala yeke kpe ti gue ti tuku mênë ti zo so asara sioni pepe. Gbungo-li ti ala ayeke gi ti sara sioni; na ndö ti alege so kue ala yeke hon daa, gi sarango ngangu na zo nga na bubango ye. Ala hinga lege ti dutingo na siriri pepe; na ndö ti lege so ala hon daa, sarango ye ti mbirimbiri ayeke daa pepe. Ala sara si alege ti ala aba bango, zo so kue atambula na ndö ti lege ni, lo yeke duti na siriri pepe » (Isaï 59:3-8).
Ali ti amaboko ti azo aga sioni na lege ti akengo yanga na ala yeke sara kua gi ndali ti sioni na ya ti gigi ti ala kue. Ye kue so ala yeke sara ayeke sioni. Na ayanga ti e ayeke tene gi « atënë ti mvene. » Ye kue so ayeke sigigi na yanga ti e, ayeke gi mvene.
« Tongana lo (zabolo) lo yeke tene mvene, lo yeke tene gi atënë ti be ti lo wani. » (Jean 8 : 44). Azo so ade adu ala ti fini ni pepe, ala ye mingi ti tene: « Mbi yeke tene na ala taa-tënë. Gi ni laa mbi tene na ala so. Tënë so mbi yeke tene so ayeke taa-tënë. » Andaa ye kue so ala yeke tene ayeke taa gi mvene. Ayeke tongana ti so asu ni. « Tongana lo (zabolo) lo yeke tene mvene, lo yeke tene gi atënë ti be ti lo wani. »
Azo ayeke zia be ti ala gi na ndö ti asenge tënë na ala yeke tene mvene. Nzara ayeke mu ngo ti sioni, nilaa, ala yeke du asioni. Ala yeke zi apara ti ngbo na ala yeke sara agbanda ti tere. Nzapa atene: « Zo so ate para ti ala, lo yeke kui; Na tongana afä mbeni para ni, mbeni ngbo ayeke sigigi daa. » Lo tene apara ti ngbo ayeke na ya ti mo. Apara ti ngbo! Sioni ayeke na be ti mo. Zia si azi mo na ya ti asiokpari na lege ti mango na be na nzoni sango ti ngu na mênë.
Na ngoi kue so mbi tonda ti fa tënë ti Nzapa, ambeni zo ayeke tene: « Aai Nzapa ti mbi. Mo tene na mbi tënë ti Nzapa pepe, mbi gbu gere ti mo. Na ngoi kue, tongana mbi tara ti sara mbeni ye, asiokpari ayeke sigigi na ya ti mbi atuku. Ayeke tuku gi tukungo. Mbi lingbi ti bi gere senge pepe, mbi yeke tuku asiokpari na ndo kue. Mbeni ye nde ti sarango ni ayeke daa pepe. Asiokpari asisingo na ya ti mbi. Tongaso, mbi ye si mo tene nga tënë ti Nzapa na mbi pepe. »
Zo tongaso ahinga biani atene, lo yeke gi mbeni gbâ ti siokpari, me hingango ni laa lo hinga pepe so mbeni nzoni sango ayeke daa so alingbi ti soo lo. Azo so ahinga atene ala yeke agbâ ti siokpari alingbi ti soo ala.
Ti baa nzoni, azo kue ayeke gi tongaso. Azo kue ayeke tuku asiokpari lakue na ndo kue so ala yeke gue daa. Siokpari ni ayeke tuku ngbanga ti so azo kue ayeke gi agbâ ti siokpari. Lege ti soo mara ti zo tongaso, ayeke gi na mgangu ti Nzapa. Ayeke ye so ahon gbungo-li pepe? Azo so ayeke tuku asiokpari ti ala na ngoi so ala wara vundu, terê ti ala anzere wala ala duti nzoni, gi Mve ti dunia Jezu laa alingbi ti soo ala, Jezu aga ti soo amara ti azo so.
Lo mbô asiokpari ti mo kue kue kue. Ayeke nzoni mo baa terê ti mo tongana mbeni gbâ ti siokpari si asoo mo.
Tënë ti fango so ayeke nga na lege ti ebook. Zi na ndo ti foto ti mbeti so na gbe.
![AKIRI ADU MO BIANI NA LEGE TI NGU NA YINGO AWE? [Fini lekengo]](../../upload/book/AkiriadumobianinalegetingunaYingoaweD.jpg)
Copyright © 2021 by The New Life Mission
