All e-books and audiobooks on The New Life Mission website are free
Explore multilingual sermons in global languages
Two new revised editions in English have been released
Check out our website translated into 27 languages

English

Sermons

Sermons

Kota tënë 4: Kaingo kpale ti asiokpari ti lango oko oko

[4-1] Nzoni sango ti mbongo agbâ ti siokpari (Jean 13 : 1-17)

(Jean 13 : 1-17)

« Angba lango oko titene matanga ti Pake asi. Jezu ahinga so ngbonga ti lo ti zia dunia so ti kiri na Babâ alingbi awe. Azo ti lo so ayeke na dunia so, lo ye ala lakue, lo ye ala ngbii asi na ndani. So ala yeke te kobe ti lakui, Zabolo azia na be ti Judas, molenge ti Iskariote ti ka Jezu. Jezu ahinga so Babâ azia aye kue na maboko ti lo. Lo hinga nga so lo londo na Nzapa, lo ga si lo yeke kiri ande na Nzapa. Tongaso, lo londo na tere ti kobe ni, lo zi bongo ti lo ti ndö ni si lo mu mbeni bongo, lo kanga na ya ti lo. Na pekoni, lo tuku ngu na ya ti mbeni kota sembe, lo to nda ti sukula gere ti azo so amu peko ti lo si lo mbô ni na bongo so lo kanga na ya ti lo so. Lo si na Simon Pierre, me Simon Pierre atene na lo: Mve ti mbi, mo ye ti sukula gere ti mbi? Jezu akiri tënë na lo, atene: Mo lingbi ti hinga fadeso nda ti ye so mbi yeke sara so pepe, me mo yeke hinga nda ni ande. Jezu atene na lo: Tongana mbi sukula gere ti mo pepe, mbeni ye so mo lingbi ti ku na mbage ti mbi ayeke daa pepe. Simon Pierre atene na lo: Tongaso, Mve ti mbi, mo sukula gi gere ti mbi pepe, me mo sukula gere ti mbi, maboko ti mbi na li ti mbi kue! Jezu atene na lo: Zo so asukula tere ti lo awe, lo lingbi ti kiri ti sukula tere ti lo pepe, me gi gere ti lo; biani, tere ti lo avuru awe; Ti ala, tere ti ala avuru awe, me ala kue pepe. Lo ahinga zo so ayeke ka ande lo, ndani laa lo tene: Ala kue laa tere ti ala avuru pepe. So Jezu ahunzi sukulango gere ti ala awe, lo kiri lo yu bongo ti lo; lo kiri na tere ti kobe ni. Lo hunda ala, lo tene: Ala hinga nda ti ye so mbi sara na ala so? Ala yeke iri mbi Wafango-ye wala Mve ti dunia, so lege ni laa, ngbanga ti so mbi yeke Wafango-ye si mbi yeke nga Mve ti dunia biani. Mbi so mbi yeke Wafango-ye si mbi yeke nga Mve ti dunia, mbi sukula gere ti ala, alingbi ala nga, ala sukula gere ti ala na popo ti ala. Mbi sara so ti fa na ala tapande titene ala nga, ala sara ye so mbi sara na ala. Biani, mbi tene na ala taa-tënë: zo ti kua ayeke kota ahon makonzi ti lo pepe; zo ti tokua ayeke kota ahon zo so atokua lo pepe. Tongama ala hinga aye so, ti ala nzoni, ayeke gi titene ala sara ye alingbi na ni! »

Ndani nyen si Jezu asukula gere ti Pierre kozo si na ndo ahan ni matamga ti Pake asi ? Na sukulango gere ti lo ni, Jezu atene: « Mo yeke ma ya ni fade fadeso pepe, me mo yeke ma ya ni ande na lango ti peko » Simon Pierre ayeke taa nzoni wamungo peko ti Jezu. Lo ma na be lo tene Jezu ayeke Molenge ti Nzapa si nga lo fa kambisa ni atene Jezu ayeke Kriste ni. Na tongana Jezu asukula gere ti lo, ayeke ngbanga ti so ndani ayeke daa biani. Na ndembe so Pierre atene Jezu ayeke Kriste, so afa atene lo ma na be biani so Jezu ayeke Wasongo azo so fade asoo lo na ya ti asiokpari ti lo kue.

Ndani nyen si Jezu asukula gere ti awamungo peko ti Lo kozo si afâ Lo na ndö keke ti kulusu?

Ngbanga ti so Lo ye si awamungo peko ti Lo ama ya ti songo azo so ayeke taa na legeni.

Ndani nyen si Lo sukula gere ti Pierre? Jezu ahinga atene fade Pierre abere tënë ti lo fade dade so fani ota si nga fade lo sara gbâ ti asiokpari na ya ti alango so ayeke ga.

Na peko ti so Jezu ama na yayu, tongana fade Pierre ayeke na mbeni siokpari na ya ti be ti lo, lo lingbi fade ti sara beoko na Jezu pepe. Me Jezu ahinga wokongo ti awamungo peko ti lo kue, na Lo ye pepe si asiokpari aduti na popo ti lo na ala. Alingbi lo fa na ala so ambô asioni ti ala kue awe. Ayeke ndani so Lo sukula gere ti awamungo peko ti Lo ni laa. Jezu, kozo si lo kui lo zia ala, lo ye ti hinga biani so ala ma ya ti nzoni sango ti bateme ti lo ni nzoni na nga lo ye si ala hinga atene ambô asiokpari ti gigi ti ala kue kue.

Jean 13 asara tënë ti songo so Jezu asoo awamungo peko ti lo na taa legeni. Na sukulango gere ti ala, Jezu asara na ala tënë ti ndara ti nzoni sango ti bateme ti Lo so gi na lege ni si alingbi ti sukula asioni ti azo kue.

« Ala zia si zabolo ahanda ala na ya ti lango so ayeke ga pepe. Mbi zi asiokpari ti ala kue awe na lege ti bateme ti Mbi na ya ti ngu ti Jurden na fade Mbi yô ngbanga ti ala na ndö keke ti kulusu. Na pekoni fade mbi zingo na kuâ si fade songo ala so ayeke dungo ala ti fini ni abaa gigi. Ti fa na ala atene Mbi sukula asiokpari ti ala ti kekereke, ti fa na ala nzoni sango ti mbongo asiokpari so ayeke na gonda ni kâ, Mbi sukula gere ti ala kozo si afâ Mbi na ndö keke ti kulusu. So laa ayeke sekele ti nzoni sango ti dungo azo ti fini na ya ti yingo. Alingbi mo nga kue mo ma na be tongaso. »

Alingbi e kue e hinga ndani so Jezu asukula gere ti awamungo peko ti lo na e hinga ndani so Lo tene: « Ye so mbi yeke sara so, mo yeke ma ya ni pepe na ndembe so, me fade mo ma ya ni aninga pepe mo ma ya ni. » Ayeke gi na ndembe so laa fade e lingbi titene akiri adu taa e.

Lo tene na ya ti Jean 13

Kengo yanga ayeke nyen?

Ayeke asiokpari so e yeke sara ni na ya ti alango oko oko ngbanga ti so e woko.

Kozo si Jezu akui na ndö keke ti kulusu, Lo sara matanga ti Pake na awamungo peko ti Lo na Lo woko ala ti yeda na Nzoni Sango ti zingo tënë ti asiokpari ti ala na lege ti sukulango gere ti ala na maboko ti Lo wani.

« Jésus ahinga so Babâ azia aye kue na maboko ti lo. Lo hinga nga so lo londo na Nzapa, lo ga si lo yeke kiri ande na Nzapa. Na pekoni, lo tuku ngu na ya ti mbeni kota sembe, lo to nda ti sukula gere ti adisiple ti lo si lo mbô ni na bongo so lo kanga na ya ti lo so. ! Lo si na Simon Pierre, me Simon Pierre atene na lo: “Mve ti dunia, mo ye ti sukula gere ti mbi?” Jésus akiri tënë na lo, atene: Mo lingbi ti hinga fadeso nda ti ye so mbi yeke sara so pepe, me mo yeke hinga nda ni na peko. » (Jean 13 : 3-7).

Lo fa na awamungo peko ti Lo nzoni sango ti bateme nga na ti mbongo asiokpari na lege ti ngu ti bateme ti Lo.

Na ngoi ni so, teti so lo yeke be-ta-zo na Jésus, Pierre awara lege pëpe ti. ti hinga raison so Jésus asukula gere ti lo. Na pekoni so Jezu asara těně na Pierre, ngobo so lo ma na be na ni na Jezu agbian. Jezu aye ti fa na lo Nzoni Sango ti zingo asiokpari, so titene Nzoni Sango ti ngu ti bateme ti Lo.

Lo yeke gi be ti Lo na ndö ti Pierre so fade awara lege pepe ti ga na terê ti Lo ndali ti asiokpari ti lo ti kekereke, ahon kue asiokpari ti mi-terê. Jezu asukula gere ti awamungo peko ti Lo titene zabolo awara lege pepe ti zi mabe ti ala. Pierre ama ya ni gi na peko.

Jezu aleke lege titene zo kue so ama na be na ngu ti bateme ti Lo nga na mênë ti Lo, azi ala na ya ti asiokpari ti ala biani biani.

Na ya ti Jean 13 so, atënë so Lo tene na sukulango gere ti awamungo peko ti Lo so asu ni na mbeti. Ayeke akpengba tënë so gi azo so adu ala ti fini ni si alingbi ti ma taa ya ni.

Ndani so Jezu asukula gere ti awamungo peko ti lo ni kozo si matanga ti Pake asi, ayeke ti mu maboko na ala ti hinga atene Lo sukula asiokpari kue ti gigi ti ala. Jezu atene: « Ndani nyen si Mbi yeke sukula gere ti mo, fade mo ma ya ni ti na ndembe so pepe, me fade aninga pepe mo ma ya ni. » Atënë so Lo tene na Pierre so, taa-tënë ti dungo ti fini ni ayeke na ya ni.

Ayeke nzoni e kue e hinga tënë ni na e ma na be na bateme ti Jezu so asukula asiokpari ti e kue. Bateme ti Jezu na Jurden ayeke nzoni sango ti « hongo » ti asiokpari kue na lege ti ziango maboko. Ayeke nzoni e kue e ma na be na atënë ti Jezu. Lo zi asiokpari kue ti dunia na lege ti bateme ti Lo, Lo sara kua ti songo azo na kuâ ni kue ahunzi na lege ti ngbanga so afâ na li ti Lo si afâ Lo na ndö keke ti kulusu. Asara bateme na Jezu ti zi azo kue na ya ti asiokpari ti ala.

Mbongo Asiokpari ti Gigi ti e kue, Asara ni Lege ti Bateme nga na Mênë ti Jezu

Nyen laa ayeke « du » so zabolo azi titene azo ti mbirimbiri ati daa?

Zabolo agi ti handa azo ti mbirimbiri ti kiri ti ga awasiokpari

Jezu ahinga nzoni atene tongana afâ Lo na na ndö keke ti kulusu, si Lo zingo na kuâ, Lo ma na yayu awe, fade zabolo nga na azo ti sarango kua na mabe so ayeke na legeni pepe ayeke ga ti tara ti handa awamungo peko ti Lo. E lingbi ti baa ni na lege ti kambisa ti Pierre: « Mo yeke Kriste, Molenge ti Nzapa so angba lakue na fini », Pierre so ama na be na Jezu. Me Jezu aye ti dabe ti Pierre ti fani oko mbeni, ti bata na li ti lo nzoni sango ti mbongo asiokpari. Nzoni sango ni ayeke bateme ti Jezu so gi na lege ti bateme ni si Lo zi asiokpari kue ti dunia. Lo ye ti fa ni ti fani oko mbeni na Pierre na awamungo peko ti Lo nga na e so fade e ga na peko. « Ye so mbi yeke sara so, mo yeke ma ya ni pepe, me fade mo ma ya ni ande gi fade fadeso. »

Na ngoi kue so awamungo peko ti Jezu asara siokpari, zabolo agi ti fâ ngbanga na li ti ala atene: « Ala baa! Tongana ala ngba ti sara siokpari, ti so ni, fade ala lingbi ti tene siokpari ayeke na be ti ala pepe ni so tongana nyen? Asoo ala pepe. Ala yeke gi awasiokpari awe. » Ti kanga lege na ni, Jezu atene na ala kozoni atene, mango na be ti ala na bateme ti Lo, asukula asiokpari ti gigi ti ala kue awe, asiokpari ti ngoi so ahon, ti ndembe so nga na ti alango so ayeke ga.

« Ala hinga kue atene asara bateme na mbi! Nda ti bateme so asara na mbi na Jurden ayeke ti sukula asiokpari ti gigi ti ala kue nga na asiokpari so adu na azo ti dunia kue. Ala lingbi ti hinga fadeso ndani nyen si asara bateme na Mbi, ndani nyen si alingbi apika Mbi na keke ti kulusu si Mbi kui? » Jezu asukula gere ti awamungo peko ti Lo ti fa na ala atene, Lo zi asiokpari ti ala ti lango oko oko kue na lege ti bateme ti Lo si fade Lo yô ngbanga ti ala na li ti Lo na ndö keke ti kulusu.

Ti fadeso mo na mbi, asoo e na ya ti asiokpari ti e kue na lege ti mango na be na nzoni sango ti bateme nga na mêně ti Jezu, so ayeke mbongo asiokpari ti e kue. Asara bateme na Jezu si afâ Lo na ndö keke ti kulusu ndali ti e. Lo sukula asiokpari ti e kue na lege ti bateme ti Lo nga na mênë ti Lo. Zo kue so ahinga si ama na be na nzoni sango ti mbongo asiopkari, zo kue so ama na be na taa-tënë so, azi lo na ya ti asiokpari ti lo kue awe.

Tongaso, nyen laa ayeke nzoni e sara na peko ti songo e ni? Ayeke nzoni e hinga peko ti asiokpari ti e ti lango oko oko na e ma na be na songo azo na lege ti bateme nga na mênë ti Jezu, nzoni sango ti mbongo asiokpari kue ti azo. Ayeke nzoni e bata nzoni sango so na be ti e, nzoni sango so gi na lege ni si Jezu azi asiokpari kue na lege ti bateme nga na mênë ti Lo.

Me tongana e kiri e sara siokpari, fade e kiri ti ga awasiokpari mbeni lâ? Ên en. So e hinga e tene Jezu azi asiokpari ti e kue awe so, fade e kiri ti ga awasiokpari ni tongana nyen? Bateme ti Jezu na mênë ti Lo na ndö keke ti kulusu ayeke nzoni sango ti mbongo asiokpari ti e kue. Zo kue so ama na be na nzoni sango so ayeke na gonda ni ka, so titene mbongo asiokpari kue so, adu lo ti fini ni awe tongana na « zo ti mbirimbiri. »

Azo ti Mbirimbiri Alingbi Laoko Pepe ti Kiri ti Ga Awasiokpari

Ndani nyen si azo ti mbirimbiri alingbi laoko pepe ti kiri ti ga awasiokpari?

Ngbanga ti so Jezu ambô asiokpari ti gigi ti ala kue awe.

Tongana mo ma na be na nzoni sango ti mbongo asiokpari, so ayeke ti ngu na ti Yingo, me tongana mo ngba ti baa terê ti mo tongana wasiokpari ndali ti asiokpari ti lango oko oko, ayeke nzoni mo gue na Jurden na ndo so asara bateme na Jezu daa ti zi asiokpari ti mo kue. Tongana mo kiri mo ga wasiokpari na pekoni so mo ma na be na mbongo asiokpari awe, alingbi akiri asara bateme na Jezu? Ayeke nzoni mo zia mabe ti mo na ndö tënë ti mbongo asiokpari, na ndö nzoni sango ti bateme ti Jezu. Ayeke nzoni mo bata na li ti mo so Jezu azi asiokpari ti mo kue gi fani oko awe biani biani na lege ti bateme ti Lo so. Ayeke nzoni mo wara mabe so ayingi pepe na ndö ti Jezu-Kriste tongana Wasongo mo.

Mango na be na Jezu tongana Wasongo mo, ndani atene mo ma na be na bateme ti Jezu so azi asiokpari ti gigi ti mo kue awe. Tongana mo na be biani na bateme ti Jezu, keke ti kulusu, kui nga na zingongo ti Jezu na kuâ, fade mo kiri ti ga wasiokpari laoko pepe, ataa siokpari ti nyen laa mo sara. Asoo mo na ya ti asiokpari ti gigi ti mo kue awe na lege ti mabe ti mo.

Jezu-Kirste asukula nga asiokpari ti kekereke, ataa asiokpari so e yeke sara ni na lege ti wokongo ti e. Ngbanga ti so alingbi Jezu afa atene bateme ti Lo ayeke na ngere ngangu, Lo sukula gere ti awamungo peko ti Lo na ngu, ngu so afa nzoni sango ti mbongo asiokpari, so ayeke bateme ti Lo. Asara bateme na Jezu-Kriste, afâ Lo na ndö keke ti kulusu, Lo zingo na kuâ si Lo ma na yayu ti sara si jendo so Nzapa amu ti mbô asiokpari ti dunia kue gbâni gbâni nga na ti soo azo kue kue abaa gigi. Nilaa awamungo peko ti Lo awara ngangu ti vunga nzoni sango ti mbongo asiokpari, ti bateme ti Lo, ti keke ti kulusu nga na ti zingongo ti Lo na kuâ ngbii asi na kongo nda ti gigi ti ala.

Wokongo ti Mi-terê ti Pierre

Ngbanga ti nyen si Piere abere tënë ti Jezu?

Ngbanga ti so lo woko.

Mbeti ti Nzapa atene na e atene, na ndembe so Pierre aluti le na le na awakua ti Kaife so ayeke kota wayango-sandaga si abi tënë na li ti lo atene, lo yeke mbeni wamungo peko ti Jezu, lo bere, lo tene: « Ên en, mbi hinga koli so pepe. » Na pekoni lo tene mvene si lo deba yanga ti lo ti fani ota ni.

E diko tënë so ayeke na Matthieu 26:69, « Me Pierre ayeke duti na gigi na ya ti gbagba ni. Mbeni wali so ayeke sara kua kâ aga nduru na tere ti lo si atene na lo: Mo nga, mo yeke mu peko ti Jezu, zo ti Galile so! Me Pierre abere na le ti azo kue, lo tene: Mbi hinga tënë so mo ye ti tene so pepe! So Pierre amu lege ti gue na yanga ti gbagba, mbeni wali nde so ayeke sara kua kâ abaa lo si atene na azo so ayeke kâ, atene: Koli so ayeke mu nga peko ti Jezu, zo ti Nazaret! Pierre akiri abere; lo deba yanga ti lo, lo tene: Mbi hinga koli so oko pepe! Kete na pekoni, azo so ayeke kâ aga nduru na Pierre si ala tene na lo: Taa-tënë, mo nga, mo yeke mbeni zo ti Jésus! Sarango tënë ti mo aka mo awe! Pierre ato nda ti deba yanga ti lo, atene: Ayeke nzoni Nzapa afâ ngbanga na li ti mbi tongana mbi tene mvene! Mbi hinga koli so oko pepe! Gi na pekoni, koli-kondo atoto. Pierre adabe ti lo na tënë so Jezu atene lani na lo, atene: Kozo titene koli-kondo atoto, fade mo yeke bere tënë ti mbi fani ota. Lo sigigi si lo toto ngangu mingi. » (Matthieu 26 : 69-75).

Pierre ama taa na be na Jezu si lo mu peko ti Lo tongana be-taa-zo. Lo ma na be lo tene « Kriste ni ayeke Molenge ti Nzapa, Nzapa so angba na fini » Me na ndembe so ague na Jezu na ya ti gbägbä ti Kaife si aga ngangu na lo ti fa songo so ayeke na popo ti lo na Jezu, lo bere tënë ti Jezu si Lo deba na ndö ti lo wani na gbe le ti ala.

Pierre ahinga pepe atene fade lo yeke bere tënë ti Jezu. Me Jezu ahinga atene fade lo sara ni. Jezu ahinga wokongo ti Pierre pendere. Ndani laa Jezu asukula gere ti Pierre si nga Lo fa na lo nzoni sango ti songo azo tongana ti so asu na ya ti Jean 13: « Fade mo sara asiokpari na ya ti alango so ayeke ga, me mbi sukula asiokpari ti mo kue ti kekereke awe. »

Pierre abere tënë ti Jezu na ndembe so lo baa kuâ taa na le ti lo, me so ayeke gi wokongo ti mi-terê si apusu lo ti sara ni. Ndani laa, titene Jezu afa na awamungo peko ti lo atene Lo soo ala awe na ya ti asiokpari ti ala kue ti kekereke, Lo sukula gere ti ala kozo.

« Mbi soo ala na ya ti asiokpari ti ala ti kekereke nga awe. Alingbi afâ Mbi na ndö ti keke ti kulusu, ngbanaga ti so asara bateme na Mbi si mbi mu asiokpari ti ala kue, nilaa alingbi Mbi futa ngere ni titene mbi gaa taa Wasongo ala kue. Mbi yeke Nzapa ti ala, Wasongo ala. Fade Mbi futa ngere ndali asiokpari ti asiokpari ti ala kue, si nga fade Mbi ga wafango lege na ala na lege ti bateme ti Mbi nga na mênë ti Mbi. Mbi yeke wafango lege ti songo ala na kuâ. »

Titene taa-tënë so ali na be ti ala mbirimbiri, Jezu asukula gere ti ala kozo si matanga ti Pake asi. So laa ayeke taa-tënë ti nzoni sango.

Ngbanga ti so mi-terê ti e awoko, ataa na peko ni so adu e ti fini ni, fade e kiri ti sara siokpari. Taa-tënë, ayeke ti e ti sara siokpari mbeni pepe, me tongana ti Pierre so awara kota kpale ndali ti siokpari so be ti lo aye ti sara ni pepe so, e nga kue e lingbi ti sara siokpari so e ye biani ti sara ni pepe. Ngbanga ti so asara e na mi-terê, asiokpari ti e ayeke gue na e titene e futi. Fade mi-terê angba lakue ti sara siokpari, tongana e ngba na gigi ti ngu na ngu so, me Jezu azi tënë ti asiokpari ni kue awe na lege ti bateme ti Lo nga na mênë ti Lo na ndö keke ti kulusu.

So Jezu ayeke Wasongo e so, e bere ni pepe, me tongana e ngba na ndö ti gigi na ya ti mi-terê, e ngba lakue ti sara asiokpari so be ti Nzapa ake ni. Ayeke gi ngbanga ti so asara e na mi-terê.

Jezu ahinga nzoni mingi atene e yeke gi awasiokpari na ya ti mi-terê. Jezu akiri aga Wasongo e na futango ngere ti asiokpari kue ti e, na lege ti bateme ti Lo nga na mênë ti Lo. Lo zi asiokpari kue na terê ti e so e ama na be na songo so Lo soo e nga na zingongo ti Lo na kuâ.

Anzoni sango osio kue atondani na bateme so Jean-Batiste asara na Jezu. Nda ti gigi ti Lo na ndö ti sese so, ayeke ti sara titene nzoni sango ti dungo zo ti fini ni, nzoni sango ti songo zo na kuâ abaa gigi.

E yeke sara siokpari na ya ti mi-terê ngoi oke?

E yeke sara siokpari na gigi ti e ngbii e kui na ni.

Na ndembe so Pierre abere tënë ti Lo, gi fani oko pepe, fani use pepe, me fani ota kozo si koli-kondo atoto, ye ni so akungbi taa ngangu ti lo. Mara ti kamene so ahon ndö ti Lo! Lo deba yanga ti lo na gbe le ti Jezu lo tene lo yeke sigigi na nda ti Jezu laoko pepe. Lo sara siokpari na lege ti wokongo ti mi-terê ti lo, me mara ti mawa so asara lo na ndembe so na lege ti wokongo ti lo ni lo bere tënë ti Jezu gi fani oko pepe me fani ota so! Mara ti li ti lo so ane na ndembe so lo mu le ti lo lo baa Jezu ti fani oko mbeni so!

Me Jezu ahinga aye so kue na lo hinga ahon so. Ndani laa Lo tene: « Mbi hinga Mbi tene fade mo yeke kiri ti sara siokpari. Me Mbi zi asiokpari so kue awe na lege ti bateme ti Mbi, titene asiokpari ni asara si mo ti pepe, nga titene akiri asara si mo ga wasiokpari pepe, si nga titene akanga lege na mo ti kiri na Mbi pepe. Mbi kiri Mbi ga Wasongo zo so alingbi kue ndali ti mo, na lege ti bateme so asara na Mbi si afâ ngbanga na li ti mbi ndali ti asiokpari ti mo kue. Mbi kiri Mbi ga Nzapa ti mo, zo ti fango lege na mo. Ayeke nzoni mo ma gi na be na nzoni sango so ambô asiokpari ti mo kue so. Mbi ngba lakue ti ndoye mo, ataa mo sara asiokpari ti mi-terê. Mbi sukula asioni ti mo kue awe. Nzoni sango ti mbongo asiokpari ti mo kue ayeke ti kpo na kpo. Ndoye ti Mbi na mbage ti mo ayeke ti lakue lakue. »

Jezu atene na Pierre na awamungo peko ti Lo: « Tongana mbi sukula mo pepe, fade mbeni ye so abaa mo na mbage ti mbi ayeke daa oko pepe. » Ndani so laa Lo tene tënë ti nzoni sango so na Jean 13, ngbanga ti so dungo azo ti fini ni ti ngu na Yingo ayeke ye ti ngere ngangu mingi. Mo ma na be na ni?

Na ya ti sura 9-10: « Simon Pierre atene na lo: Mve ti mbi, gi gere ti mbi pepe, me amaboko ti mbi na li ti mbi nga. Jezu atene na lo: zo so asukula lo awe ahunda titene asukula gi gere ti lo si lo vuru tarara. »

Andeko ti mbi, fade mo sara asiokpari ti « mi-terê » na ya ti alango ti kekereke wala mo yeke sara ni pepe? Fade mo sara ni. Me Jezu atene, Lo sukula nga asiokpari ti kekereke, akengo yanga ti mi-terê na lege ti bateme nga na mênë ti Lo, si Lo fa ni avuru nzoni na awamungo peko ti Lo, tënë ti taa-tënë so ayeke nzoni sango ti mbongo asiokpari kozo si afâ Lo na ndö keke ti kulusu.

So si asara e na mi-terê na awokongo kue so ayeke na ya ni so, e yeke kai pepe ti sara siokpari. Jezu asukula asiokpari kue ti dunia na lege ti bateme ti Lo. Lo sukula gi be ti e na terê ti e pepe, Lo sukula nga gere ti e na asiokpari ti e ti kekereke kue. So laa ayeke nzoni sango ti dungo zo ti fini ni, ti bateme ti Jezu.

Na pekoni so asara bateme na Lo, Jean-Batiste atene: « Baa Kete taba ti Nzapa so ayeke zi asiokpari ti dunia. » (Jean 1 : 29) Ayeke nzoni e ma na be so ambô asiokpari kue ti dunia na lege ti tokuango ni kue awe na li ti Jezu na ndembe ti bateme ti Lo.

Na dutingo na gigi so, azo alingbi pepe ti gbanzi terê ti ala na siokpari. Ayeke nzoni e yeda na ni tongana mbeni ye so ayeke ndangba ni. Na ngoi kue so wokongo ti e akiri ayeke fa terê ti lo, ayeke nzoni e dabe ti e so Jezu ambô asiokpari ti e kue awe, Lo mbô nga asiokpari kue ti dunia na lege ti nzoni sango ti bateme si nga lo futa ni na mênë ti Lo. Ayeke nzoni e mu singila na Lo na be ti e kue. Ayeke nzoni e tene na mabe e tene Jezu ayeke Wasongo e nga Lo yeke Nzapa ti e. E gonda Mve ti dunia.

Azo kue na dunia so ayeke sara siokpari na mi-terê. Azo angba ti kui kuâ ti asiokpari ti mi-terê so ala sara ni na ya ti gigi ti ala kue. Azo angba ti sara siokpari na mi-terê ti ala.

Asioni Gbungo-Li na ya ti Be ti Azo

Nyen laa ayeke futi zo?

Amara ti asiokpari nde nde nga na asioni gbungo-li

Jezu atene na ya ti Matthieu 15:19-20. « Biani, aye tongana asioni tënë ti be ti zo, fango zo, gingo wali wala koli ti zo, sarango aye ti ndumba, nzi, tenengo mvene na le ti ngbanga na zongango ndo, alondo kue na be ti zo si asigigi Aye so laa asara si zo aga sioni. Me tengo kobe na maboko so a sukula ni pepe, so laa asara si zo aga sioni pepe. » Ayeke ngbanga ti so asiokpari nde nde so ayeke na ya ti be ti zo ayeke futi lo, nilaa lo ga ye ti sioni.

Ayeke Nzoni Zo wani Oko Oko Ahinga atene Lo yeke Gi Sioni

Nyen laa ayeke na be ti azo oko oko kue?

Mara ti asiokpari nde nde baleoko na use (Marc 7:21-23)

Alingbi e wara ngangu ti tene: « Asiokpari nde nde baleoko na use so ayeke na be ti azo. Mbi yeke na ni kue na ya ti be ti mbi. Mbi yeke na asiokpari nde nde baleoko na use so asu tënë ni na Mbeti ti Nzapa na ya ti be ti mbi. » Kozo si adu e ti fini ni ti ngu na Yingo, ayeke nzoni e yeda na asiokpari so ayeke na be ti e. Ayeke nzoni e hinga e tene e yeke awasiokpari na le ti Nzapa. Me e yeke sara ni lakue pepe. Gbâ ti azo na popo ti e awara ambeni tënë ti fa na nda ti asiokpari ti ala, ala yeke tene: « kozo, mbi yeke na asiokpari so na be ti pepe, mbi girisa lege gi na mbeni ngoi. »

Me nyen laa Jezu atene na ndö ti azo? Lo tene ni avuru tarara atene, ye so ayeke sigigi na be ti azo laa asara si « ala ga sioni. » Lo tene azo ayeke na asioni gbungo-li na be ti ala wani. Gbungo-li ti mo na ni ayeke tongana nyen? Mo yeke nzoni wala sioni? Mo hinga mo tene azo kue ayeke na sioni gbungo-li? Taa-tënë, gbungo-li ti azo ayeke sioni.

Aninga awe so kota da ti dengo buze ti Sampoong so ayeke na Sewul akungbi gi gbuur tongaso. Asewa so azo ti ala akui ayeke dema terê ti ala. Me ambeni zo mingi ague gi ti baa ti ala kota ye ti vundu so tongana ye ti ngia.

Ambeni ayeke hunda terê ti ala: « Azo akui oke? Ngbangbo use? Ên en, ayeke mingi pepe. Ngbangbo ota? Alingbi ti si tongaso? Nzoni, tongana fade gbâ ti azo laa akui ka anzere mingi na nga aduti ye ti ngia, tongana azo so akui wungo ti ala asi nduru na saki oko. » Be ti zo alingbi ti duti sioni tongaso. Ayeke nzoni e yeda na ni. Mara ti mungo nengo pepe na azo so akui tongaso! Mara ti vundu ti nyen si asi na asewa tongaso! Ambeni, nginza ti ala ahunzi kue.

Avuru tarara so ambeni zo so ague ti baa ye ni so, ala akangbi mawa na asewa ni so pepe. Ala tene: « Ye ni ayeke nzere mingi tongana azo akui fade gbâni! Fade aduti ye ti ngia. Ka tongana ye ni so asi fade na londo ti pikango ndembo so azo asi ya ni? Fade alu azo saki saki na gbe ti asese ti da so akungbi so, nilaa pepe? Ôo, nilaa! Fade anzere mingi ahon so. » Ambeni alingbi ti wara mara ti gbungo-li ti tongaso.

E hinga kue tongana nyen si azo alingbi ti duti sioni na ambeni ngoi. Bien sûr, ils ne diraient jamais de telles pensées à voix haute. Ala lingbi ti pika yanga ti ala ti fa atene ye ni aso be ti ala, me na gbemingo, na ya ti be ti ala, sambela ti ala ayeke titene ye ni aduti kota ye ti ngia. Ala ye ti baa gi aye ti ngangu so abi mbeto so si azo saki saki akui na ya ni, ngangu ye ni ayeke gi titene ye ni andu ala pepe. So ayeke kua so be ti azo ayeke sara laa. Gbâ ti azo na popo ti e, be ti ala ayeke tongaso kozo si adu ala ti fini ni.

Fango zo na ya ti Be ti Azo oko oko Kue

Ngbanga ti nyen si e yeke sara siokpari?

Ngbanga ti so e yeke na asioni gbungo-li na be ti e.

Nzapa atene na e atene, fango zo ayeke na be ti azo oko oko kue. Me fade azo mingi abere. « Mo tene tënë tongaso tongana na nyen? Mbi yeke na gbungo-li ti fango zo oko na be ti mbi pepe! Mo lingbi ti wara mara ti gbungo-li tongaso tongana nyen? » Ala yeda laoko pepe atene ala yeke na fango zo na be ti ala. Ala gbu li ti ala atene, azo ti fango zo ayeke gi ambeni mara.

« Zo ti fango zo ti ya ti mbeti-sango ti lani so, sioni zo so afâ azo si alu ala na gbe ti sese so, ayeke amara ti azo so laa ayeke na fango zo na be ti ala! Mara ti ala ayeke nde. Mbi lingbi ti ga tongana ala laoko pepe! Ayeke gi agodobe! Awafango zo! » Be ti ala aso si ala yeke dekongo atene: « Azo so ayeke asioni lengo tongaso, ayeke nzoni ahunzi na ala na ndö ti sese so! Ayeke nzoni afâ ngbanga ti kuâ na li ti ala! »

Me mawa ni, asioni gbungo-li ayeke na be ti azo ni so be ti ala aso so, legeoko tongana ti so ayeke na be ti azo ti fango zo na peko ti terê peko ti terê so. Nzapa ayeke tene na e atene, na ya ti be ti azo kue, fango zo ayeke daa. Ayeke nzoni e yeda na tënë ti Nzapa, Lo so Lo yeke baa ye so ahonde na ya ti gbungo-li ti e. Ayeke nzoni e yeda e tene: « Mbi yeke wasiokpari na fango zo na ya ti be ti mbi. »

Taa-tënë, Nzapa atene, asioni gbungo-li, fango zo ayeke na ya ti be ti azo kue. Ayeke nzoni e yeda na tënë ti Nzapa. Tongana awagame ayeke ga gi sioni asioni zo ti gue na ni, aye nde nde ti batango terê ti zo wani akiri aga ye ti fango na zo. So ayeke lengo ti fango zo so ayeke na be ti e. Mo lingbi ti fa zo tongana ngozo asara mo wala mbeto asara mo. Mbi yeke tene pepe azo kue ayeke azo ti fango zo, me e yeke na mara ti gbungo-li so na be ti e.

Ngbanga ti so adu e kue na agbungo-li ti sioni na be ti e, e yeke na ni kue na be ti e. Ambeni ahunzi biani gi na fango zo, ayeke pepe ngbanga ti so adu ala nde tongana azo ti fango zo, me ngbanga ti so e kue e lingbi ti ga azo ti fango zo. Nzapa atene na e atene, e yeke na sioni gbungo-li nga na fango zo na be ti e. Ayeke taa-tënë. Mbeni zo oko na popo ti e asigigi na ya ti taa-tënë so pepe.

Nilaa, lege so alingbi e mu, ayeke gi ti yeda na tënë ti Nzapa na ti sara kua na ni. E yeke sara siokpari na dunia so, ngbanga ti so e yeke na asioni gbungo-li.

Lango Sioni na Be ti e

Nzapa atene lango sioni ayeke na be ti azo oko oko kue. Mo yeda na ni? Mo yeda mo tene mo yeke na lango sioni na be ti mo ? Taa-tënë, lango sioni ayeke na be ti azo kue.

Ndani laa, sarango ndumba na ambeni sarango lisoro ti kubu na legeni pepe angba ti gue guengo na nduzu na popo ti azo. Ayeke mbeni lege ti warango nginza ti awagame kue so kite ayeke daa pepe. Atanga ti adengo buze alingbi ti wara kpale ti mosoro, me dengo buze ti senge senge so ayeke wara kpale pepe tongana ala, ngbanga ti so lango sioni asara kodro na ya ti be ti zo kue.

Lengo ti Awasiokpari Ayeke Siokpari

Nyen laa ahaka na azo?

Keke so adu lengo ti siokpari

Tongana ti so keke ti gozo ale gozo, keke ti mango ale mango, keke ti papaye ale papaye si nga keke ti mburu ale mburu so, e so adu e na amara ti asiokpari nde nde baleoko na use na be ti e, e yeke le nga alengo ti siokpari.

Jezu atene, ye so ayeke sigigi na be ti zo laa ayeke futi lo. Mo yeda na ni? E lingbi gi ti yeda na tënë ti Jezu si e tene: « Taa-tënë, e yeke gi amara ti a awasiokpari, azo ti sara sioni. Taa-tënë, mo yeke mbirimbiri, Mve ti e. » Taa-tënë, ayeke nzoni e yeda na sioni be ti e. Ayeke nzoni e yeda na taa-tënë so Nzapa atene na ndö ti e.

Legeoko tongana ti so Jezu-Kriste ama yanga ti Nzapa si lo sara ye so be ti Nzapa aye, ayeke nzoni e nga e yeda na tënë ti Nzapa si e ma yanga ti Lo. So laa ayeke gi oko lege titene asoo e na ya ti asiokpari ti e na lege ti ngu na Yingo. So ayeke amatabisi ti Nzapa.

Nzapa asara tufa na ndö sese ti mbi na apendere ngoi osio. Amara ti akeke nde nde ayeke du lengo ti ala gi tongana be ti angoi ni aye. Legeoko tongaso nga, asiokpari baleoko na use so ayeke na ya ti be ti e azia maboko na ndö ti e si ala yeke gue na e lakue ti sara siokpari. Laso alingbi ti duti gi fango zo laa azia maboko na ndö ti be ti e, kekereke alingbi ti duti lango sioni.

Si nga mbeni kekereke, alingbi ti duti asioni gbungo-li, na pekoni sarango ye ti kirikiri, mvene, tenengo kambisa ti mvene, na atangani ti gue na ni. Na e ngba ti sara siokpari na ya ti ngu oko kue, na ya ti anze oko oko kue, alango oko oko kue, angbonga oko oko kue. E yeke sara asiokpari na alango kue, mbeni lango oko ahon senge pepe. E ngba lakue ti deba yanga ti e, e tene e sara siokpari pepe, me e lingbi pepe ti gbanzi terê ti e na siokpari ni, ngbanga ti so adu e na ni gi tongaso.

Mo baa mbeni keke ti mango ake ti le mango ngbanga ti so lo ye ni pepe laoko awe? « Mbi ye ti le mango pepe! » Ataa lo leke na be ti lo ti le alengo ni pepe, lo lingbi ti le alengo ti amango ni pepe tongana nyen? Akongo ni ayeke sigigi na ngoi ti buru, ale ni ayeke kono si ayeke be nduru na ngoi ti ndo-wâ, si nga ale ni ayeke nduru titene afâ ni ate nduru na ngoi ti gbe ti ngu.

So ayeke mingongo ndia ti gigi, na gigi ti awasiokpari nga ayeke mu gi peko ti mingongo ndia ti gigi. Awasiokpari alingbi pepe ti ngbanzi terê ti ala ti du lengo ti siokpari.

Alingbi « Bateme na Keke ti Kulusu ti Jezu » Ambô Asiokpari ti es

Mbongo asiokpari aye ti tene nyen?

Ayeke futango ngere ti asiokpari na lege ti bateme ti Jezu (ziango maboko) nga na mênë ti Lo na ndö keke ti kulusu

E diko mbeni tënë ti Mbeti ti Nzapa ti baa lege so awasiokpari, azo ti sarango sioni so akpa para so kondo alango na ndö ni so, alingbi ti mbô asiokpari ti ala na ni na gbe le Nzapa si ala sara gigi ti ala na ya ti nzoni duti. So ayeke nzoni sango ti mbongo asiokpari ti azo.

Na ya ti Awayango-sandaga 4, atene: “Tongana mbeni senge zo ti kodro asara siokpari, me lo sara ni na mbana ti be ti lo pepe, tongana lo sara mbeni ye so ndia ti Mve ti dunia ake ni, tënë ayeke ga na li ti lo. Tongana a fa na lo siokpari ti lo ni, alingbi lo mu mama ti ngasa so mbeni mbage ti tere ti lo abuba pepe ndali ti siokpari ti lo ni. Lo yeke zia maboko ti lo na li ti nyama ni si lo yeke fâ go ti nyama ni na ndo so a yeke fâ ka go ti anyama ti asandaga so a yeke gbi ni kue na wâ daa. Wayango-sandaga ayeke yoro li ti maboko ti lo na ya ti mene ti nyama ni si lo yeke zia na tere ti adidi ti gbalaka so a yeke ya na ndö ni sandaga so a yeke gbi ni kue na wâ. Na pekoni, lo yeke tuku tanga ti mene ni na gere ti gbalaka ni. Lo yeke zi akasa so kue mafuta ayeke daa mingi tongana ti so a yeke sara ndali ti sandaga ti beoko. Wayango-sandaga ayeke zö aye ni so na ndö ti gbalaka titene fion ni anzere na Mve ti dunia. Tongana wayango-sandaga asara aye ni so kue na tere ti senge zo ti kodro ni titene Nzapa azi siokpari na li ti lo, Nzapa azi siokpari ni awe. » (Awayango-sandaga 4 : 27-31).

Na tango ti Ngbene Mbuki, azo ayeke mbô asiokpari ti ala tongana nyen? Ala zia maboko ti ala na li ti nyama ti mungo na sandaga ni si ala tokua asiokpari ti ala na li ti lo.

Asu na ya ti Awayango-sandaga. « Tongana mbeni zo na popo ti ala aye ti mu na Mve ti dunia sandaga ti nyama, lo lingbi ti mu bagara, taba wala ngasa. Tongana zo ni aye ti mu bagara na sandaga so a yeke gbi ni kue na wâ, alingbi lo mu koli-bagara so mbeni mbage ti tere ti lo abuba pepe. Zo ni ayeke gue na nyama ni na yanga ti da ti bongo so Mve ti dunia na azo ti lo ayeke wara tere daa, tongaso si Mve ti dunia ayamba lo nzoni. Zo ni ayeke zia maboko ti lo na li ti nyama ni. Tongaso Mve ti dunia ayeke yeda na sandaga ti zo ni si lo yeke zi siokpari na li ti lo. » (Ayango-sandaga 1:2-4).

Nzapa ahunda na ala ti lekere asandaga ndali ti asiokpari so fade amu ni ti mbô na asiokpari ti Israel. Lo tene na ala ti « zia maboko ti lo » na li ti nyama ti sandaga ni ti tokua asiokpari so ala sara ni na li ti nyama ni. Na ya ti gbägbä ti da ti bongo so Nzapa ayeke tingbi na azo daa, gbalaka ti gbingo asandaga ayeke daa. Ayeke mbeni sanduku so akono kete ahon ndo so awakua ti Nzapa ti laso ayeke luti daa ti fa tënë, adidi ayeke na adangoro ni osio kue. Azo ti Israel ayeke mbô asiokpari ti ala na lege ti tokuango ni na li ti nyama ti sandaga si ala gbi ni na ndö ti gbalaka ti gbingo asandaga ni.

Na ya ti buku ti Awayango-sandaga, Nzapa atene na azo ni « fade lo yeke ya sandaga ni na yanga da ti lingo na da ti bongo ni, na gbe le ti Mve ti dunia titene lo wara be-nzoni ti Lo. » Awasiokpari ayeke tokua asiokpari ti ala ni na li ti nyama ti sandaga ni, na pekoni ala fâ go ti nyama ni titene lo kui. Awayango-sandaga afi mênë ni na ndö ti gbalaka ti gbingo asandaga.

Na pekoni, asukula ya ti nyama ni si akasa ni so afa ni kete kete aga tongana mburu ti wâ na ndö ti gbalaka ti gbingo sandaga ni. Na pekoni, ayâ fion ti kasa ni na Nzapa ti mbô na siokpari ti ala. Ayeke tongaso ala yeke mbô na siokpari ti ala ti lango oko oko laa.

Na pekoni, asandaga ti mbongo na asiokpari ti ala ti ngu oko oko aga. Ti so ni ayeke nde na sandaga ti mbongo na asiokpari ti lango oko oko, ngbanga ti so kota wayango-sandaga laa azia maboko ti lo na li ti nyama ti sandaga ni na iri ti azo ti Israel kue, si lo fi mênë ti nyama ni na ndö ti yanga ti sanduku ni na mbage ti To fani mbarambara. Na ndoni nga, ziango maboko na li ti koli-ngasa so angba na fini ayeke sara ni na gbe le ti azo ti Israel ni na ngu oko oko, na lango baleoko ti nze mbarambara ni. (Awayango-sandaga 16:5-27).

Sandaga ti Ngbene Mbuki so afa zo wa?

Jezu-Kriste

Ti fade so, e baa lege so kode ti yango sandaga na ya ti Fini Mbuki agbian, si e baa nga lege so Ndia ti Nzapa angba lakue gi ni na ya ti angu kue.

Ngbanga ti nyen si alingbi Jezu akui na ndö keke ti kulusu? Nyen ti sioni laa Lo sara na ndö ti gigi si Nzapa azia Molenge ti Lo akui na ndö keke ti kulusu? Zo wa laa agbu lo na ngangu ti kui na ndö keke ti kulusu? Na ndembe so awasiokpari kue ti dunia, so titene e kue, e ti na ya ti siokpari, Jezu aga na sese so ti soo e.

Jean-Batiste asara bateme na Lo na Jurden si Lo wara pika ndali ti asiokpari na iri ti azo kue. Ngobo ti sarango bateme na Jezu nga na ngobo so Lo sa na mênë ti Lo na ndö keke ti kulusu ayeke legeoko na yango sandaga ti mbongo na siokpari ti Ngbene Mbuki, ziango maboko na ndö ti nyama ti mbongo na siokpari nga na fingo mênë.

Ayeke tongaso si ayeke sara ni na ya ti Ngbene Mbuki. Wasiokpari ni azia maboko ti lo na li ti nyama ni, lo fa peko ti asiokpari ti lo, lo tene: « Mve ti dunia, mbi sara siokpari. Mbi fâ zo si mbi sara nga lango sioni. » Atokua asiokpari ti lo ni na li ti nyama ti sandaga ni.

Tongana ti so wasiokpari ni ayeke fâ go ti nyama ti sandaga ni si lo yâ ni na Nzapa so, Jezu ayâ nga terë ti Lo gi tongaso nga ti mbô asiokpari ti e kue. Jésus awara batême na lo tuku mênë ti lo na ndo ti Croix ti zi e na ti zi asiokpari ti e kue na lege ti sandaga ti lo.

Ti baa ni, Jezu akui ndali ti e. Tongana e gbu li ti e na ni, yango anyama ni so mbeni ye ti terê ti ala abuba pepe so, ndani ayeke nyen? Anyama so kue ahinga ye so ayeke siokpari? Anyama ahinga siokpari. Ala lingbi pepe ti zi asiokpari ti azo kue.

Tongana anyama so ye ti sioni ayeke na terê ti ala pepe so, Jezu nga siokpari ayeke na ya ti Lo pepe. Lo yeke Nzapa so ayeke taa nzoni kue, Molenge ti Nzapa, Lo sara siokpari laoko pepe. Nilaa, Lo mu asiokpari ti e kue na lege ti bateme ti Lo na ngu ti Jurden na ndembe so Lo wara ngu baleota.

So kue ti zi asiokpari ti e, si Lo kui na ndö ti keke ti kulusu ndali ti asiokpari so Lo zi ni na li ti e. Ayeke kua ti Lo ti songo azo si asukula asiokpari kue ti azo. Asu ni na ya ti Matthieu 3.

Tongo nda ti Nzoni Sango ti Mbongo Asiokpari

Jean-Batiste asara bateme na Jezu na Jurden ngbanga ti nyen?

Ti sara ye ti mbirimbiri

E lingbi ti diko na Matthieu 3: « Tongaso Jezu alondo na Galile, lo ga na yanga ti ngu ti Jourdain na tere ti Jean titene Jean asara bateme na lo. Me Jean aye ti ke. Lo tene na Jezu: Mo laa mo lingbi fade ti sara bateme na mbi. Tongana nyen laa mo kiri, mo ga titene mbi sara bateme na mo so? Me Jezu akiri tënë na lo: Ti fadeso, ayeke nzoni e sara tongaso si e lingbi ti sara ye so kue ayeke mbirimbiri na le ti Nzapa. Na Jean ado sese na Lo mbeni pepe. » (Matthieu 3 : 13-15).

Ayeke nzoni e hinga ni na e ma ya ni, ndani nyen si asara bateme na Jezu na ndembe so Lo wara ngu baleota. Asara bateme na Lo titene Lo mbô asiokpari ti azo kue si nga ti sara ye ti mbirimbiri. Titene asoo azo kue na ya ti asiokpari ti ala, Jezu-Kriste Lo oko so mbeni ye ti sioni ayeke na terê ti Lo pepe, Jean-Batiste asara bateme na Lo wani.

Na ngobo so, Lo zi asiokpari kue ti dunia si Lo mu terë ti Lo, Lo wani ti mbô asiokpari ti azo kue. Titene asoo e na ya ti asiokpari ti e, ayeke nzoni e hinga taa-tënë ni si nga e ma na be na ni. Ayeke ti e ti ma na be na songo so Lo soo azo si asoo e.

Nda ti bateme ti Jezu ayeke nyen? Ayeke legeoko na ziango maboko ti Ngbene Mbuki. Na ya ti Ngbene Mbuki, atokua asiokpari ti azo na li ti nyama ti sandaga na lege ti ziango maboko na li ti nyama ni. Legeoko nga na ya na ti Fini Mbuki, Jezu azi asiokpari ti dunia na lege ti mungo terê ti Lo wani tongana sandaga ndali ti siokpari na lege ti bateme so Jean-Batiste asara na Lo.

Jean-Batiste ayeke kota mingi na popo ti azo, zo ti sarango kua na iri ti azo kue so Nzapa asoro lo. Tongana zo ti sarango kua na iri ti azo kue, kota wayango-sandaga ti azo kue azia maboko ti lo na li ti Jezu si Lo tokua asiokpari kue ti dunia na li ti Lo. « Bateme » ndani atene: « tokuango ye, titene alu mo zo nga na titene asukulango mo zo »

Fadeso mo hinga nda ti gango ti Jezu na ndö ti sese si Jean-Batiste asara bateme na Lo so awe? Mo ma na be na mo hinga nda ti bateme ti Jezu ni awe? Bateme ti Jezu ni ayeke ti zi asiokpari ti e kue, asiokpari so e, azo ti sarango sioni so e yeke sara ni na lege ti mi-terê na ya ti gigi ti e kue. Jean-Batiste asara bateme na Jezu titene nzoni sango ayeke na gonda ni kâ, so ayeke ti mbongo asiokpari ti e kue abaa gigi.

Na ya ti Matthieu 3:13-17, atene: « Ti ndembe so », tënë so abaa ngoi so asara na bateme na Jezu, na ngoi ni so asiokpari ti dunia kue atokua ni na li ti Lo.

« Ti ndembe so » Jezu ambô asiokpari kue ti azo, Lo kui na ndö keke ti kulusu si Lo zingo na kuâ lango ota na peko ni. Titene Lo sukula asiokpari kue ti dunia, asara bateme na Lo gi fani oko awe biani biani, Lo kui na keke ti kulusu gi fani oko awe biani biani si Lo zingo na kuâ gi fani oko awe biani biani. Ti azo so aye titene asoo ala na ya ti asiokpari ti ala na le ti Nzapa, Lo soo ala gi fani oko awe biani biani.

Ngbanga ti nyen si alingbi asara bateme na Jezu? Lo yu kpoto ti kii si nga afâ ngbanga na li ti Lo na gbe le ti Plilate tongana mbeni zo ti fango zo? Ngbanga ti nyen si ayeke nzoni apika Lo na keke ti kulusu si Lo sa mênë ti Lo ngbii Lo kui na ni? Nda ti aye so kue so, ayeke so Lo zi asiokpari kue ti dunia, asiokpari ti mo na mbi, Lo yô ni na li ti Lo wani na lege ti bateme ti Lo. Ndali ti asiokpari ti e ni, alingbi Lo kui.

Ayeke nzoni e ma na be na tënë ti songo e na ya ti siokpari so gi na lege ni si Nzapa asoo e, na ayeke nzoni e duti na be ti hinga na mbage ti Lo. Tongana bateme ti Jezu ayeke daa pepe, keke ti kulusu ayeke daa pepe si nga zingongo na kuâ ayeke daa pepe, songo e na ya ti siokpari ayeke nga daa pepe.

Na ndembe so Jean asara bateme na Jezu ti zi asiokpari kue ti dunia, Lo zi asiokpari ti e kue si Lo soo azo so ama na be na nzoni sango ti Lo ti songo azo na ya ti asiokpari. Ambeni azo ayeke tënë na be ti ala: « Me Lo zi gi siokpari so adu e na ni, nilaa pepe? » Andaa ala girisa lege.

Asu ni avuru tarara na ya ti Mbeti ti Nzapa atene, Jezu azi asiokpari ti dunia gi fani oko awe biani biani na ndembe so asara bateme na Lo. Asiokpari ti e kue, ti so adu e na ni kue ayeke na ya ni, asukula ni awe. Asu ni na ya ti Matthieu 3:15: « Ngbanga ti so alingbi e sara ye kue ti mbirimbiri tongaso. » Sarango ye kue ti mbirimbiri aye titene, asiokpari kue ambô ni awe, oko angba pepe.

Jezu azi nga asiokpari so e yeke sara ni na ya ti gigi ti e kue? Taa-tënë Lo zi ni. E gi ti wara « ye so afa ni » na ya ti Awayango-sandaga. Asara na e tënë ti kota wayango-sandaga nga na sandaga ti lango ti mbongo asiokpari.

Sandaga ti Mbongo Asiokpari ti Azo ti Israel kue na ya ti Ngu Oko Oko

Azo ti Israel alingbi ngba lakue na ndö ti sese so tongana azo so ayeke nzoni kue na lege ti sandaga ti zingo siokpari?

Laoko pepe

« Fade Aaron amu koli-bagara ni na sandaga ndali ti zingo siokpari na li ti lo wani nga na li ti azo ti ya ti da ti lo. Fade lo mu akoli-ngasa use lo gue na ala na gbe le ti Mve ti dunia, na yanga ti da ti bongo so Mve ti dunia na azo ti lo ayeke wara terê daa. Aaron ayeke bi mbeni ye ti baa na popo ti angasa use so, ngasa wa laa ayeke ti Mve ti dunia, ngasa wa laa ayeke ti Azazel. Ti ngasa so ye ni afa atene, lo yeke ti Azazel, Aaron ayeke zia lo na fini le ti lo na gbe le ti Mve ti dunia tongana sandaga ti zingo siokpari na li ti ala. Na pekoni, Aaron ayeke tumba ngasa ni na benyama. » (Awayabgo-sandaga 16 : 6-10). Ge so, Aaron ague na akoli-ngasa use na yanga ti da ti kota bongo ndali ti mbongo asiokpari ti amara ti Israel ti ngu oko.

« Fade Aaron abi mbeni ye tongana zeke nd̈ali ti akoli-ngasa use so. Lo yeke bi ni oko ndali ti Mve ti dunia si nga oko ndali ti Azazel. » Ngasa ti tokua ni ayeke na ngere ngangu mingi ndali ti mbongo asiokpari ni.

Nyama ti sandaga ayeke na ngere ngangu ndali ti mbongo asiokpari ti lango oko oko. Na ya ni, wasiokpari ni azia maboko ti lo na li ti nyama ni ti tokua siokpari ti lo na li ti nyama ni. Me ti asiokpari ti azo ti Isarael ni ti ngu oko oko, Kota wayango-sandaga ni, na iri ti azo ni kue, lo tokua asiokpari ti ngu oko ni na li ti nyama ti sandaga ni, na lango baleoko ni ti nze mbarambara ni ti ngu oko oko.

Na ya ti Awayango-sandaga 16:29-31, e lingbi ti diko: « So ayeke mbeni ndia so ayeke ngba kpu na kpu ndali ti ala: na lango baleoko ti nze mbarambara ni, fade ala yeke ke kobe ti sambela, ala yeke sara kua oko pepe, ataa ala azo ti Israel, ataa awande so aduti na popo ti ala. Biani, na lango ni so laa a yeke sara titene a zi siokpari na li ti ala si ala ga nzoni. Tongaso, ala yeke ga nzoni na le ti Mve ti dunia. Lango ni so ayeke lango ti wungo tere, lango so ala yeke wu tere ti ala si ala yeke ke kobe. Ndia so ayeke ngba kpo na kpo. » (Awayango-sandaga 16:29-31).

Na ya ti Ngbene Mbuki, mara ti Israel ayeke ga na sandaga ti mbongo na asiokpari ti lango oko oko si fade ala tokua asiokpari ti ala na li ti nyama ni, ala tene: « Mve ti dunia, mbi sara siokpari so, so, so. » Na pekoni, afâ go ti nyama ti mbongo na siokpari ni, ala mu mênë ni na wayango-sandaga si ala kiri na da ti ala yamba, ala hinga atene atondani na lango ni so, ambô asiokpari ti ala awe. Nyama ti sandaga ni akui ndali ti wasiokpari ni, na asiokpari na li ti lo. Afâ nyama ni si lo kui kuâ ti wasiokpari ni. Na ya ti Ngbene Mbuki, sandaga ni alingbi ti duti koli-ngasa, kete bagara, koli-bagara, anyama kue so ayeke nde so Nzapa kangbi popo ni.

Titene afâ fade wasiokpari ni ndali ti asiokpari ti lo, Nzapa na ya ti nzoni be ti Lo so maka ni ayeke daa pepe, amu lege titene ayâ fini ti mbeni nyama.

Ayeke tongaso laa, na ya ti Ngbene Mbuki, awasiokpari alingbi ti mbô asiokpari ti ala na lege ti sandaga ti mbongo siokpari so. Asioni ti awasiokpari ni, atokua ni na li ti nyama ti sandaga na lege ti ziango maboko si amu mênë ni na wayango-sandaga ti mbô na asiokpari ni.

Me lege ayeke daa pepe ti mbô asiokpari lakue lakue. Nilaa, Nzapa amu lege na kota wayango-sandaga ti sara kua ti mbongo asiokpari ti ya ti ngu oko, ngu na ngu kue, na lango baleoko ni ti nze mbarambara ni, na iri ti azo ti Isarael kue.

Kua ti kota wayango-sandaga na lango ti mbongo asiokpari ni ayeke nyen? Kozo ni kue, Aaron so ayeke kota wayang-sandaga azia maboko ti lo na li ti nyama ni si lo fa peko ti asiokpari ti azo ni, lo tene, « Mve ti dunia, amara ti Israel asara amara ti asiokpari so: fango zo, lango sioni, aye ti kirikiri, nzi, tenengo kambisa ti mvene, zongango iri ti mo… »

Na pekoni, lo fâ go ti nyama ti sandaga ni, lo mu mênë ti lo si lo fi ni fani mbarambara na ndö ti yanga ti sanduku so ayeke na ya ti da ti bongo so azo na Nzapa ayeke tingbi ka terê daa. (Na ya ti Mbeti ti Nzapa, hungo ti ye mbarambara abaa ni tongana ye so ayeke nzoni kue.)

Ayeke kua ti lo ti tokua asiokpari ti azo ti ya ti ngu ni na li ti nyama ti sandaga ni na iri ti azo ni kue, si nyama ni amu ndo ti ala na sandaga.

Ngbanga ti so Nzapa ayeke mbirimbiri, nilaa, titene lo soo azo ni kue na ya ti siokpari ti ala, lo mu lege titene nyama ti sandaga ni amu ndo ti ala si akui kuâ ti ala. Ngbanga ti so Nzapa ayeke taa Nzapa ti nzoni be, lo mu lege na azo ni ti yâ fini ti nyama na sandaga titene akui kuâ ti ala. Tongaso, kota wayango-sandaga atuku mênë na ndö ti yanga ti sanduku ni na mbage ti To, si na lege ni so, lo mbô asiokpari ti ngu so ahon na Lango ti Mbongo asiokpari, na lango baleoko ni ti nze mbarambara ni.

Zo wa laa ayeke kete taba ti sandaga na lege ti Ngbene Mbuki?

Jezu so sioni ye ayeke na terê ti lo pepe

Alingbi kota wayango-sandaga ni ayâ akoli-ngasa use na Lango ti Mbongo asiokpari ndali ti amara ti Israel. Oko ti akoli-ngasa ni airi lo watokua, ndani atene « ziango na gigi » Legeoko tongaso nga, ngasa ti Fini Mbuki ayeke Jezu-Kriste. « Biani, Nzapa aye azo ti dunia so mingi si lo mu gi oko Molenge ti lo titene zo so ama na be na lo alingbi ti kui pepe, me lo yeke na fini so angba lakue lakue » (Jean 3 : 16).

Nzapa amu na e Molenge ti lo ngengele oko tongana taba ti sandaga. Nilaa, tongana kete taba ti sandaga ndali ti azo kue, Jean-Batiste asara bateme na Lo si Lo ga Wasongo azo, Mesi ti dunia. Nda ti iri ti Jezu atene, « Wasongo azo » na nga Jezu-Kriste, ndani atene « Gbia so aga ti soo e ».

Nilaa, tongana ti so asiokpari ti azo ni na ya ti ngu oko, ambô ni na Lango ti Mbongo asiokpari na ya ti Ngbene Mbuki so, Jezu-Kriste nga, asara laso ngu saki use na ndoni awe, Lo ga na dunia si asara bateme na Lo, Lo sa mênë ti Lo ngbii Lo kui na ni na ndö keke ti kulusu ti sara si nzoni sango ti mbongo asiokpari ti e kue abaa gigi.

Fade so e diko mbeni tënë ti Awayango-sandaga. « Aaron ayeke zia maboko ti lo use kue na li ti koli-ngasa ni, lo yeke diko na li ti ngasa ni asioni so kue azo ti Israel asara, ngangu li ti ala kue nga na siokpari ti ala kue si lo yeke zia ni kue na li ti ngasa ni. Na pekoni, lo yeke tokua ngasa ni na benyama si mbeni koli so a soro lo ayeke mu lo ti gue na lo. Koli-ngasa ni ayeke mu asioni kue ti azo ti Israel na li ti lo si lo hon na ni na ndo so zo ayeke daa pepe. » (Awayango-sandaga 16:21-22).

Asu atene, asiokpari kue ti azo ni azia na li ti koli-ngasa ni tongana ti so atene na ya ti mbeti ti awayango-sandaga. « Akengo yanga ti ala kue » ndani atene asiokpari so ala sara na ya ti be ti ala, asiokpari kue so ala sara na mi-terë ti ala. So afa atene, « Akengo yanga ti ala kue » azia ni na li ti nyama ti sandaga ndali ti siokpari na lege ti ziango maboko.

Na lege ti Ndia ti Nzapa, Alingbi e Hinga Taa Asiokpari ti e Kue

Ngbanga ti nyen si Nzapa amu na e Ndia?

Titene e hinga asiokpari ti e

Ndia na amungo yanga ti Nzapa, asura 613 ayeke na ya ni. Biani, tongana e gbu li ti e na ni, e sara ye so Lo tene na e ti sara ni pepe, si nga e sara pepe ye so Lo tene na e ti sara ni.

E yeke gi awasiokpari. Asu na ya ti Mbeti ti Nzapa atene Nzapa amu na e andia so titene e hinga asiokpari ti e (Romains 3:20). So afa atene Lo mu na e Ndia ti Lo nga na amungo yanga ti Lo ti fa na e atene e yeke awasiokpari. Ayeke pepe ngbanga ti so na ya ti dutingo ti e, e lingbi ti bata Ndia ni so Lo mu na e, me ayeke ti sara si e hinga asiokpari ti e.

Lo mu na e Ndia ti Lo na amungo yanga ti Lo ni titene e bata ni pepe. E lingbi pepe ti ku titene gigi ti mbo aga tongana gigi ti zo. Legeoko nga, e lingbi pepe ti duti tongana ti so Ndia ti Lo afa ni, e lingbi gi ti hinga asiokpari ti e na lege ti Ndia ti Lo na amungo yanga ti Lo.

Nzapa amu ni na e, ngbanga ti so e hinga pepe e tene e yeke gi agbâ ti siokpari. « Ala yeke gi awafango zo, azo ti sarango ye ti ndumba, asioni zo. » Lo tene na e ti fâ zo pepe, me e yeke fâ zo na ya ti be ti e, ti mbeni e fâ zo ni nderere.

Me tongana ti so asu na ya ti Ndia atene, ayeke nzoni e fâ zo pepe so, e yeke awafango zo so ayeke tene « Ayoo! Mbi sara ye na legeni pepe. Mbi yeke wasiokpari, ngbanga ti so mbi sara ye so alingbi titene mbi sara ni pepe. Mbi sara siokpari. »

Tongaso, na ya ti Ngbene Mbuki, titene asoo mara ti Israel na ya ti siokpari, Nzapa amu lege na Aaron ti yâ sandaga ti mbongo siokpari, na ayeke gi Aaron si ayeke mbô asiokpari ti azo ni fani oko na ya ti ngu oko oko.

Na ya ti Ngbene Mbuki, ayeke nzoni ayâ asandaga use na Nzapa ndali ti siokpari na Lango ti Mbongo asiokpari. Oko ni ayâ ni na gbe le ti Nzapa, si mbage ti oko ni, atokua ni na yando na peko ti ziango maboko, si lo hon na asiokpari ti azo ni ti ngu oko. Kozo titene atokua ngasa ni na yando na lege ti mbeni koli so alingbi na ni, kota wayango-sandaga azia maboko ti lo na li ti ngasa ni so angba fini si lo fa peko ti asiokpari ti azo ti Israel. « Mve ti dunia, azo ni afâ zo, ala sara ndumba, ala voro ayanda… E sara siokpari. »

Yando ayeke mbeni sese ti mbutu so ayeke kuru ndo. Atokua ngasa ti tokua ni na yando so maka ni ayeke daa pepe si ngasa ni akui. Na ndembe so atokua lo, azo angba ti baa peko ti lo ngbii lo girisa yongoro, si ala ma na be atene asiokpari ti ala ahon na ngasa ti tokua ni awe. Azo ni awara siriri ti be si ngasa ni akui na yando ndali ti asiokpari ti azo ni kue ti ngu ni.

Si nga Nzapa ambô asiokpari ti e kue na lege ti kete taba ti Nzapa, Jezu-Kriste. Asiokpari ti e kue ambô ni kue na lege ti bateme ti Jezu nga na mênë ti Lo na ndö keke ti kulusu.

Jezu ayeke Nzapa nga na Wasongo e. Lo yeke Molenge ti Nzapa so aga ti soo azo kue ti sese na ya ti siokpari si nga Lo yeke Wasarango dunia so asara e na limo ti Lo. Lo zu na dunia so ti soo e na ya ti siokpari.

Gi asiokpari ti lango oko oko so e yeke sara na mi-terê ti e pepe, me Lo soo e na ya ti siokpari kue ti kekereke, asiokpari kue so ayeke na ya ti gbungo-li ti e na ti mi-terê kue, atokua ni na li ti Jezu. Tongaso, alingbi Jean-Batiste asara bateme na Lo ti sara ye ti mbirimbiri kue ti Nzapa, mbongo asiokpari kue kue ti dunia.

Ngu ota kozo titene afâ Jezu na ndö keke ti kulusu, na ndembe so Lo tonda ti kua ti Lo polele, Lo zi asiokpari kue ti dunia awe na lege ti bateme so Lo hunda na Jean-Batiste si asara ni na Lo na ngu ti Jurden. Songo azo ti Lo na lege ti mbongo asiokpari ti e kue atondani na bateme ti Lo.

Na ya ti ngu ti Jurden, na mbeni ndo so ngu ni ali alingbi ti si nduru na kate ti Jezu, Jean azia maboko ti lo na li ti Jezu si lo nduru Lo na ya ti ngu ni. Bateme so ayeke legeoko na ziango maboko ti ya ti Ngbene Mbuki si asara nga kua legeoko tongana tokuango asiokpari kue.

Titene anduru no zo na ngu afa kuingo ni, si sigingo na ya ni afa zingongo na kuâ. Tongaso, na sarango bateme so Jean-Batiste asara na Jezu, Jezu asara aye ota so si Lo fa ni na gigi: zingo asiokpari kue, fango Lo na keke ti kulusu nga na zingongo ti Lo na kuâ.

E lingbi titene asoo e gi na sarango ye alingbi na atënë so gi na lege ni si Jezu asoo e na ya ti siokpari. Nzapa amu yanga ti soo e na lege ti Jezu, tongaso si mbuki so Lo sara ni na ya ti Ngbene Mbuki abaa gigi. Na Jezu ague ngbii na Keke ti kulusu na asiokpari ti e na li ti Lo.

Kua ti nyen laa angba na e ti sara, so si Jezu ambô asiokpari ti e kue awe so?

Ye so ayeke titene e sara ni, ayeke gi ti zia mabe ti e na ndö atënë ti Nzapa

Na ya ti Jean 1:29, atene: « So ndo ahan, lo baa Jezu so ayeke ga na terë ti lo si lo tene: Baa kete taba ti Nzapa so ayeke zi asiokpari ti dunia laa. » Jean-Batiste afa kambisa ni atene: « Baa kete taba ti Nzapa so ayeke zi asiokpari ti dunia laa. » Asiokpari kue ti dunia, atokua ni na Jezu na ndembe so asara bateme na Lo na Jurden. Mo ma na be na ni! Tongaso fade mo wara tufa na lege ti mbongo asiokpari ti mo kue.

Ayeke nzoni e zia mabe ti e na ndö tënë ti Nzapa. Ayeke nzoni agbungo li ti e na angangu li ti e so, e zia ni na mbage, si e ma na be gi na taa-tënë so atene, Jezu azi asiokpari kue ti dunia, si nga ayeke nzoni e sara aye alingbi na tënë ti Nzapa so asu na mbeti.

Tenengo ni atene Jezu azi asiokpari ti dunia kue si nga tenengo ni atene lo sara ye ti mbirimbiri ti Nzapa na lege ti mbongo asiokpari, ayeke gi ye oko. Si nga « Ziango maboko » na « bateme » ayeke gi ye oko.

Ataa e tene, « kue », « kue kue » wala na « na ngbongboro ni », ndani ayeke gi oko. Nda ti tënë so, « ziango maboko » na ya ti Ngbene Mbuki ayeke gi legeoko na ti ya ti Fini Mbuki, me gi mbupa ti « bateme » laa amu ndo ti ziango maboko ni.

Na kongo ndani, asara bateme na Jezu si afâ ngbanga na li ti Lo na ndö keke ti kulusu ti mbô asiokpari ti e. Na asoo e tongana e ma na be na nzoni sango so ayeke na gonda ni so.

Tongana e tene Jezu azi « asiokpari kue ti dunia » (Jean 1:29), nda ti siokpari ti dunia ni so ayeke nyen? So aye ti tene, asiokpari so adu e na ni, na asioni gbungo-li, anzi, asarango ye ahon ndoni, sarango nzara ti ye ti zo, wokongo, bubango iri ti Nzapa, fandara nga na sarango ye na legeni pepe so ayeke na be ti e: so aye ti tene akengo ndia na asiokpari ti mi-terê nga na ti so ayeke na be ti e. So aye ti tene asiokpari na akengo yanga ti mi-terê na ti be kue.

« Biani, futa ti siokpari ayeke kuâ; me nzoni ye so Nzapa ayeke mu na zo senge senge ayeke fini so angba lakue lakue, na lege ti gango so e ga oko na Jezu Kriste, Mve ti e. » (Rome 6:23) « si nga tongana mênë atuku pepe, a lingbi ti zi siokpari na li ti azo pepe. » (Ahebro 9 : 22). Tongana ti so e diko na ya ti asura so, alingbi afuta asiokpari kue. Nilaa, Jezu-Kriste, titene Lo soo azo kue biani na ya ti siokpari, Lo yâ fini ti Lo wani si Lo futa ngere ti siokpari ndali ti e, gi fani oko awe biani biani.

Tongaso, ye so ayeke titene e sara si azi e yamba na ya ti asiokpari ti e, ayeke gi ti ma na be na bateme ti Jezu, na mênë ti Lo, titene e ma na be na nzoni sango so ayeke na gonda ni si nga e ma na be so Jezu ayeke daa, Lo yeke Nzapa ti e na Wasongo e.

Mbongo Asiokpari ti Kekereke

Ahunda titene e yâ sandaga ndali ti asiokpari ti e mbeni?

Laoko mbeni pepe

Asiokpari ti kekereke na ti mbeni kekereke nga na asiokpari kue so e yeke sara ni ngbii e kui na ni ayeke na ya ti « siokpari ti dunia », si nga asiokpari ti laso, ti biri nga na ti mbeni biri ayeke na ya ti « siokpari ti dunia ». Asiokpari ti azo, na dungo ala ti si na kuingo ti ala kue ayeke na ya ti « siokpari ti dunia » si asiokpari ti dunia ni atokua na li ti Jezu na lege ti bateme ti Lo. Nilaa, asiokpari kue so e sara ni ngbii asi na lango ti kuâ ti e, azi ni na li ti e awe.

Tongaso, ayeke gi ti ma na be na nzoni sango so ayeke na gonda ni, ti ma na be na tënë ti Nzapa so asu ni, ti sara na kua si asoo e. Ayeke nzoni e zia agbungo li ti e na mbage titene azi e na ya ti asiokpari ti e kue. Mo lingbi ti hunda terê ti mo: « Lo lingbi ti zi asiokpari so ade zo asara ni pepe tongana nyen? » Ti so ni fade mbi kiri mbi hunda mo: « Ayeke nzoni Jezu akiri aga na ndö ti dunia na ngoi kue so e sara siokpari ti sa mênë ti Lo lakue lakue? »

Na ya ti nzoni sango ti dungo zo ti fini ni, Ndia ti mbongo asiokpari ayeke daa. « Tongana mênë ayuru pepe, alingbi ti zi siokpari na li ti azo pepe. » (Ahebro 9:22). Tongana mbeni zo aye titene azi asiokpari ti lo na tango ti Ngbene Mbuki, alingbi lo tokua asiokpari ti lo ni na lege ti ziango maboko ti lo na li ti nyama ti sandaga ni si nga alingbi nyama ti sandaga ti siokpari ni a kui ndali ti asiokpari ti lo ni.

Legeoko nga Molenge ti Nzapa azu na sese so ti soo azo kue. Asara bateme na Lo ti zi asiokpari kue ti e, Lo sa mênë ti Lo na ndö keke ti kulusu ti futa ngere ti asiokpari ti e ni si na kuingo ni na ndö keke ti kulusu Lo tene: « Ye kue asara ni awe! » Lo zingo na kuâ na lango ota ni si Lo duti fade so na koti ti Nzapa. Lo ga Wasongo e ti lakue lakue.

Titene e wara zingo asiokpari ti e kue, ayeke nzoni e ke agbungo-li so e wara ni kozo na e zia mango na be ti ada-Nzapa so atene, alingbi azi e na ya ti asiokpari ti e ti lango oko oko lakue lakue. Titene ambô asiokpari ti azo kue, ayeke nzoni ayâ mbeni sandaga gi fani oko awe biani biani. Nzapa na yayu atokua asiokpari ti dunia kue na li ti Molenge ti Lo wani na lege ti bateme ti Lo, Lo sara si afâ Lo na keke ti kulusu ndali ti e. Na zingongo ti Lo na kuâ, songo e na kuâ abaa gigi.

« Andaa pasi ti e laa lo yô ni, kobela ti e laa lo yô na ndö ti lo. Ti e, e baa e tene, Nzapa laa apika lo, lo wara zaza ti Nzapa si abi buba na terê ti lo. Me ti lo, ndali ti sioni ti e laa lo wara kä, ndali ti siokpari ti e laa a nika lo. Me Mve ti dunia asara si asioni ti e kue ati na ndö ti lo. » Na ya ti Isai 53, atene, akengo yanga kue nga na asiokpari ti dunia, ti azo kue, atokua ni na li ti Jezu-Kriste awe.

Si nga na ya ti Fini Mbuki, na ya ti Efezien 1:4, asu atene: « Kozo si dunia abaa gigi, Nzapa asoro e titene e ga azo ti lo na lege ti gango so e ga oko na Kriste » So aye ti tene na e, Lo soro e na lege ti lo kozoni si Lo sara dunia. Kozo kue si Nzapa asara dunia, Lo soro ti amu yanga ti sara si e azo ti Lo e ga mbirimbiri, azo so mbeni sioni ye andu ala pepe na lege ti Kriste. Ataa nyen laa e gbu li ti e daa kozo, ayeke nzoni fadeso e ma na be si e sara ye alingbi na tënë ti Nzapa, tënë ti ngu, ti mênë na ti Yingo.

Nzapa atene kete taba ti Lo, Jezu-Kriste azi asiokpari ti dunia kue si Lo mbô ni. Na ya ti Hebro 10, asu atene: « Ti baa ni, Ndia ti Moize ayeke gi limo ti anzoni ye so ayeke ga, me afa taa ye ni pepe, gi na oko sandaga so ayeke yâ ni lakue lakue na ngu oko oko so, sandaga ni alingbi laoko pepe gi gue na azo ni titene ala ga zoni kue » (Ahebro 10:1).

Asu na ndo so atene, yango gi oko sandaga lakue ngu na ngu, alingbi pepe ti sara si e ga nzoni kue. Ndia ayeke gi limo ti anzoni ye so ayeke ga, me taa limo ti aye ni wani pepe. Jezu-Kriste, Mesi so alingbi Lo ga, asara si e ga nzoni kue gi fani oko awe biani biani (Legeoko tongana ti so ambô asiokpari ti Israel ti ngu oko oko gi fani oko awe biani) na lege ti bateme so asara na Lo nga na lege ti fango so afâ Lo na ndö keke ti kulusu ti mbô asiokpari ti e.

Ndani laa Jezu atene na ya ti Hebro 10: « Na pekoni, lo kiri lo tene: Mbi laa! Mbi ga ti sara ye so be ti mo aye. Ayeke gi na lege ti ye so be ti Nzapa aye so laa asukula e na lege ti sandaga ti terê ti Jezu-Kriste gi fani oko awe biani biani. Na ya ti lango oko oko, wayango-sandaga oko oko kue ayeke luti na nduzu ti sara kua ti lo. Gi oko mara ti asandaga si ala yeke mu, me asandaga so ala yeke mu so alingbi ti zi asiokpari ti azo pepe. Me ti Kriste, lo mu sandaga ni gi fani oko ti zi asiokpari ti azo si na pekoni, lo duti na tere ti Nzapa kpu na kpu, na mbage ti maboko ti lo ti koli. Fadeso, Kriste ayeke ku titene Nzapa azia awato ti lo tongana mbata ti gbe ti gere ti lo. Na lege ti oko sandaga so lo mu, Kriste asara si azo so lo sukula sioni ti ala, ala ga nzoni kue kpu na kpu. Yingo-Vuru atene nga na e tënë na ndö ni. Lo tene kozoni, lo tene: Mve ti dunia atene: Mbuki so mbi na ala e yeke sara ni na peko ti alango ni so ayeke so: mbi yeke mu andia ti mbi na ala, mbi yeke su ni na ndö ti be ti ala si mbi yeke su ni na ya ti li ti ala. Na pekoni, lo tene: Fade mbi yeke kiri ti dabe ti mbi na siokpari ti ala oko pepe. E hinga so, tongana Nzapa azi tënë na li ti zo awe, zo ni ayeke kiri ti mu sandaga ndali ti asiokpari ti lo pepe. » (Ahebro 10:9-18).

Na e ma na be so Jezu asoo e na ya ti asiokpari kue ti dunia na lege ti bateme ti Lo nga na mênë ti Lo na ndö keke ti kulusu.

Songo so Asoo e na Dungo e ti Fini ni na Lege ti Ngu na Yingo, Asu ni na ya ti Be ti e nga na ya ti Li ti e

E ga azo ti mbirimbiri gi ngbanga ti so e sara siokpari mbeni pepe?

Ên en. E ga azo ti mbirimbiri ngbanga ti so Jezu azi asiokpari ti e kue na e ma na be na Lo

Ala kue ama na be na songo so Lo soo e nzoni kue so? ― Amen. ― Atënë ti Nzapa so atene Jezu-Kriste Lo wani asara bateme na Lo si Lo sa mênë ti Lo na ndö keke ti kulusu ti soo e so, mo sara ye alingbi na ni na mabe? Ayeke nzoni e sara ye alingbi na ni na mabe si akiri adu e. Tongana e ma na be so Jezu-Kirste, na lege ti nzoni sango ti zingo siokpari asukula asiokpari ti e kue nga na asiokpari ti dunia kue, fade e lingbi titene asoo e.

E lingbi ti ga nzoni kue laoko pepe na lege ti batango Ndia ti Nzapa, me e lingbi ti ga nzoni kue na lege ti mango na be na kua so Jezu-Kriste asara. Jezu-Kriste azi asiokpari ti e kue na lege ti bateme ti Lo na ngu ti Jurden si Lo wara ngbanga nga na pika ndali ti asiokpari ti e na ndö keke ti kulusu. Na mango na be na nzoni sango ni na be ti e kue, e lingbi titene azi e na ya ti asiokpari ti e kue si e ga mbirimbiri. Mo ma na be na ni?

Bateme ti Jezu, fango Lo na ndö keke ti kulusu nga na zingongo ti Lo na kuâ ayeke ndali ti ndia ti zingo azo na kuâ, ndia so aluti na ndö ti ndoye ti Nzapa so maka ni ayeke daa pepe so azi asiokpari ti azo kue. Nzapa andoye e gi tongana ti so e yeke. Nilaa kozo kue, Lo sara si e ga mbirimbiri. Jezu asara si e ga azo ti mbirimbiri na munngo asiokpari ti e kue na li ti Lo na lege ti bateme ti Lo.

Titene Nzapa asukula asiokpari ti e ni, Lo tokua molenge ti Lo ngengele oko, Jezu, ndali ti e na dunia so. Lo mu yanga na Jezu ti mu asiokpari ti dunia so kue na li ti Lo na lege ti bateme ti Lo, na pekoni, Nzapa tokua ngbanga ti asiokpari ti e ni kue na li ti molenge ti Lo ni. Lo sara si e ga amolenge ti Lo, so ayeke azo ti mbirimbiri na lege ti songo e na ngu na mênë, so ayeke kota ndoye ti Nzapa.

Asu na Ahebro 10:16: « Fade mbi su ni na ndö ti be ti ala na fade mbi su ni na ya ti li ti ala. »

Na ya ti be ti e nga na gbungo-li ti e, e yeke awasiokpari wala azo ti mbirimbiri na le ti Nzapa? Tongana e zia mabe ti e na ndö tënë ti Nzapa, e ga azo ti mbirimbiri. Jezu-Kriste azi asiokpari ti e kue si afâ ngbanga na li ti lo ndali ti asiokpari ni. Jezu-Kriste ayeke Wasongo e. E lingbi ti gbu li ti e, e tene: « So e yeke sara siokpari lakue lakue so, e lingbi ti ga azo ti mbirimbiri tongana nyen? E yeke azo ti siokpari biani biani awe » Me tongana e ma na be na atënë ti Nzapa tongana ti so Jezu -Kriste ama yanga ti Babâ, e ga azo ti mbirimbiri.

Taa-tënë, tongana ti so mbi tene kozo, e yeke na siokpari na be ti e kozo si adu e ti fini ni. Na peko ti nzoni sango ti zingo tënë na li ti e so e kamata ni na be ti e, asoo e na ya ti asiokpari ti e kue awe. Na ndembe so ade e hinga nzoni sango ni pepe, e yeke lani awasiokpari. Me e ga azo ti mbirimbiri na ndembe so e ma na be na songo e so Jezu asoo e, na pekoni, e ga ambirimbiri molenge ti Nzapa. So laa ayeke mango na be na ye ti mbirimbiri so bazangele Paul asara tënë ni. Mango na be na nzoni sango ti zingo siokpari asara si e ga « azo ti mbirimbiri. »

Ataa bazangele Paul, ataa Abraham, ataa akotara ti mabe aga mbirimbiri na lege ti kua ti ala pepe, me gi na mango na be nga sarango ye alingbi na atënë ti Nzapa, atënë ti anzoni ye ti Lo.

Na ya ti Ahebro 10 :18 : « E hinga so, tongana Nzapa azi tënë na li ti zo awe, zo ni ayeke kiri ti mu sandaga ndali ti asiokpari ti lo pepe. » Tongana ti so asu atene, Nzapa asoo e titene e kui ndali ti asiokpari ti e pepe. Mo na be na ni ? ― Amen. ―

Filipien 2 : « Ayeke nzoni sarango ye na popo ti ala alingbi na ti azo so aga oko na Jezu-Kriste. Lo so lo yeke lakue lakue legeoko na Nzapa, na le ti lo, dutingo legeoko na Nzapa ayeke mbeni ye ti gbu na ngangu pepe. Me lo zia aye so kue lo yeke na ni, lo sara tere ti lo tongana zo ti kua, lo ga legeoko na azo kue; na bango lo, dutingo ti lo alingbi na ti zo. Lo sara terê ti lo kete, lo ga zo ti mango yanga ti Nzapa ngbii asi na kuâ, kuâ ti ndö ti keke ti kulusu. Ndani laa, Nzapa amu lo na nduzu, azia lo na kota ndo, amu na lo iri so ayeke kota ahon a-iri kue. Tongaso, ala so ayeke na yayu, ala so ayeke na sese, ala so ayeke na gbe ti sese akuku na likunu ti ala ti gonda iri ti Jezu si ala kue atene na yanga ti ala, atene: Jezu Kriste ayeke Mve ti dunia si ala gonda Nzapa Babâs. » (Filipen 2:5-11).

Jezu-Kriste aga na ndö ti sese na kota yango iri pepe. Titene lo gi fade yango iri, Lo sara tongaso pepe, Lo mu sarango ye ti zo ti kua si Lo ga tongana zo. Lo kiri na terê ti Lo kete si Lo ga zo ti mango yanga ngbii na kuâ titene Lo soo e.

Ndani laa e gonda Jezu, « Lo yeke Nzapa ti e, Wasongo e nga na Gbia. » Ndani so e yeke gonda Nzapa si nga e yeke yâ iri ti Jezu, ayeke ngbanga ti so Lo ma yanga ti sara ye so be ti Babâ ti Lo aye ngbii Lo si na ndani. Tongana Lo ma yanga fade pepe, ka fade e mu gonda na Molenge ti Nzapa tongana ti fadeso pepe. Me ngbanga ti so Molenge ti Nzapa ama yanga na ya ti ye so be ti Babâ ti Lo aye ngbii Lo kui na ni, nilaa, aye kue so Nzapa asara nga na amara nde nde ti sese kue ayeke gonda Lo na fade ala ngba lakue ti sara ni.

Jezu-Kriste akiri aga kete Taba ti Nzapa so azi asiokpari ti dunia, na asu nga atene, Lo zi ni na lege ti bateme ti Lo. Laso, ahon ngu saki use awe, ngbene ye so Lo zi siokpari ti dunia ni. So si mbi na mo e ngba ti duti na dunia so, ngbene ye so adu e, asiokpari ti e kue ayeke na popo ti siokpari ti dunia so.

Fade e kiri ti ga awasiokpari tongana e sara siokpari kekereke?

Ên en. Ngbanga ti so Jezu azi asiokpari ti e kue ti biri, ti laso nga na ti kekereke awe.

Tongana e bongbi siokpari so adu na e na akengo ndia ti e wani so e yeke sara ni lakue, ngbene ye so adu e so, e sara siokpari pepe?

Jezu ahinga atene fade e sara siokpari na lango so adu na e ti si na lango ti kuâ ti e, nilaa Lo mbô asiopkari ti e kue kozo. Mo baa ni fadeso? Tongana e ngba na gigi ngbii ngu balembarambara, fade asiokpari ti e awu alingbi ti si ya ti akutukutu tongana ngbangbo oko. Me Jezu azi asiokpari ni kue gi fani oko awe biani ndali ti azo kue na lege ti bateme ti Lo.

Tongana Jezu azi gi siokpari so adu na e, fade e kui kue na fade e gue na le ti wâ. Ataa so na bango ndo ti e, e tene Lo lingbi ti zi asiokpari ti e kue pepe, me so laa ayeke gbian ye oko pepe na ya ti mbongo so Jezu ambô asiokpari ti e ni.

Asiokpari oke laa e lingbi ti sara na ndö ti dunia so? Asiokpari kue so e yeke sara ayeke na popo ti asiokpari kue ti dunia.

Na ndembe so Jezu ahunda na Jean-Batiste ti sara bateme na Lo, ayeke taa gi ye so laa Lo ye ti tene. Jezu Lo wani afa kambisa ni atene Lo zi asiokpari ti e kue awe. Nzapa atokua wakua ti Lo kozo ti Jezu si Lo hunda na lo ti sara bateme na Jezu. Nilaa, so si Jean-Batiste so ayeke zo ti sarango kua na iri ti azo kue asara bateme na Lo, na kukungo li ti Lo na gbe ti Jean titene asara bateme na Lo so, Jezu azi asiokpari kue ti azo ti sese awe.

Fadeso asiokpari ti e kue ti ngu baleuse ti si na ngu baleota, ti ngu baleota ti si na ngu baleosio ti gue na ni, ataa asiokpari ti amolenge ti e ayeke na popo ti siokpari ti dunia so Jezu azi ni na lege ti bateme ti Lo so.

Zo wa laa alingbi ti tene siokpari angba na dunia so? Jezu-Krist azi asiokpari kue ti dunia so. E kue e lingbi titene asoo e tongana e ma na be na ye so Jezu asara ti mbô na asiokpari ti e na ya ti be ti e na kite pepe.

Mingi ti azo, dutingo ti ala na gigi ayengere, ala yeke li na ya ti gbungo-li ti ala wani si ala yeke tene tënë ti gigi ti ala baa mo tene gigi ti ala ni ayeke na ngere ngangu mingi. Me ala so gigi akpengba na ala ayeke gbâ ni. Azo mingi gigi ti ala ayengere. Mbi nga kue. Nzoni sango ti zingo siokpari ti bateme na ti mênë ti Jezu so, mo lingbi ti ma ya ni pepe wala ti yeda na ni pepe tongan na nyen?

Songo Awasiokpari Abaa Gigi Awe

Ngbanga ti nyen si Jezu asukula gere ti Pierre?

Ngbanga ti so Lo ye titene Pierre aduti na kota mabe na ndö sukulango so Jezu sukula asiokpari ti lo kue ti kekereke awe na lege ti bateme ti Lo.

E diko na Jean 19. « Jezu, Lo wani, lo yo keke ti kulusu ti lo, lo sigigi si lo gue na ndo so iri ni na yanga ti hebro Golgota. Kâ laa aturugu akanga Jezu na ndö ti keke ti kulusu. Ala kanga nga ambeni koli use na ndö ti akeke ti kulusu, oko na mbage, oko na mbage; Jezu ayeke na popo ti ala. Pilate amu yanga titene a su mbeti si a kanga na li ti keke ti kroa ni. Mbeti ni atene: Jezu ti nazaret, gbia ti azuife. Ndo so a kanga Jezu na ndö ti keke ti kulusu daa so ayo na gbata ni pepe, nilaa azuife mingi adiko mbeti ni. A su mbeti ni na yanga ti hebro, na greke nga na laten. » (Jean 19 : 17-20).

Andeko ti mbi, Jezu-Kriste azi asiokpari kue ti dunia awe si afâ Lo na ndö keke ti kulusu na gbe ti ngbanga ti Ponse Pilace. Fadeso e kue e gbu li ti e na ye so asi so.

Na sura 28: « Na pekoni, Jezu ahinga atene, fadeso ye kue ahunzi awe. Ti sara si tënë ti Mbeti ti Nzapa aga taa-tënë, lo tene: Nzara ti ngu asara mbi! » Jezu azi asiokpari ti e kue ti sara si Tënë ti Nzapa aga taa-tënë. Nilaa Lo tene: « Nzara ti ngu asara mbi! »

« Mbeni ta ayeke kâ so kpingo vin ayeke na ya ni Aturugu amu yanga ti bongo ayoro na ya ti kpingo vin ni, ala kanga na li ti mbeni kete keke ti izope, ala zia ni na yanga ti Jezu. Jésus anyon kpingo vin ni si na pekoni, lo tene: Ye kue ahunzi awe! Lo ba li ti lo na sese si lo kui. » (Jean 19 : 29-30).

Lango ota na pekoni, Lo zingo na kuâ na popo ti awakinga.

Bateme so Jean-Batiste asara na Jezu na kui ti Jezu na ndö ti keke ti kulusu ayeke aye so alingbi ti kangbi popo ni pepe. Tongana mbeni oko abaa gigi pepe, tanga ti oko ni alingbi nga ti baa gigi pepe. Nilaa, ayeke nzoni e gonda Mve ti dunia Jezu ngbanga ti so Lo soo e na nzoni sango ti zingo tënë ti asiokpari ti e na li ti e.

Mi-terê ti zo ayeke mu lakue gi peko ti nzara ti terê ti lo, na e lingbi pepe ti kai sarango siokpari na mi-terê ti e. Jezu-Kriste amu na e bateme ti Lo na mênë ti Lo titene Lo soo e na ya ti siokpari. Lo soo e na ya ti siokpari ti mi-terë na lege ti nzoni sango ti Lo.

Azo so azi tenë ti siokpari kue na li ti ala alingbi ti li na Kodro-gbia ti Yayu na lege ti mango na be na Jezu so adu Lo na Betelehem, asara bateme na Lo na Jurden, Lo kui na ndö keke ti kulusu si Lo zingo na kuâ na lango ota ni. Tongaso, e gonda Mve ti dunia si nga e ya iri ti Lo lakue lakue.

Na ya ti ndangba kota gere ti mbeti Jean so, Jezu ague na Galile na peko ti zingongo ti Lo na kuâ. Lo gue na da ti Pierre si Lo tene na lo: « Simon, molenge ti Jonas, mo ndoye mbi ahon ndoyengo so azo so andoye na mbi? » Lo kiri tene: « Nilaa, Mve ti mbi, mo hinga mo tene mbi ndoye mo. » Tongaso Jezu atene na lo: « Mo mu père na akete taba ti mbi ate. »

Pierre ama ya ti aye ni kue, nzoni sango ti bateme ti Jezu na ti mênë ti Lo nga na so si ambô asiokpari kue. So si fadeso lo ma na be na nzoni sango ti ngu na mênë na zingo tënë so ayeke zi siokpari si nga lo hinga ndani so Jezu asukula gere ti lo so, mabe ti lo na mbage ti Jezu akiri akpengba.

E kiri e diko Jean 21:15. « Na peko ti kobe ni, Jezu ahunda Simon Pierre, atene: Simon, molenge ti Jean, mo ndoye mbi ahon ala so? Simon akiri tënë: “Biani, Mve ti dunia, mo hinga so mbi ndoye mo. » Jezu atene na lo: Mu oere na akete taba ti mbi ate! Lo lingbi ti zia akete taba ti Lo na maboko ti Pierre, ngbanga ti so Pierre ayeke wamungo peko ti Lo, ngbanga ti so asoo Pierre biani biani si nga ngbanga ti so Pierre akiri aga mbeni wakua ti Nzapa so ayeke mbirimbiri si lo yeke nga nzoni kue.

Tongana Pierre aga wasiokpari ndali ti asiokpari ti lo ti lakue lakue, ka Jezu atene fade na lo pepe ti fa nzoni sango ti mbongo asiokpari, ngbanga ti so lo na tanga ti awamungo peko ti Jezu ni alingbi ti ngbanzi terê ti ala pepe na sarango siokpari lakue lakue na ya ti mi-terê. Me Jezu atene na ala ti fa nzoni sango so ambô asiokpari ti ala kue, ngbanga ti so ala ma na be na bateme ti Jezu nga na mênë ti Lo na ndö keke ti kulusu, nzoni sango ti zingo ti mbongo asiokpari.

« Mve ti Dunia, Mo Hinga Mo Tene Mbi Ndoye Mo »

Tongana mo kiri mo sara siokpari, fade mo kiri ti ga wasiokpari?

Ên en. Jezu azi asiokpari ti mo ti kekereke kue na jurden awe.

E gbu li ti e na ndö tënë so Jezu atene na Pierre. « Simon, molenge ti Jonas, mo ndoye mbi ahon ndoyengo so azo so andoye na mbi? » « Nilaa, Mve ti dunia, mo hinga mo tene mbi ndoye mo. » So lo tene lo ndoye Jezu so, ayeke taa-tënë, alondo na mango na be na nzoni sango ti zingo mbogo asiokpari ti azo kue.

Tongana Jezu afa pepe na Pierre na atanga ti awamungo peko ti Lo nzoni sango so ayeke mbô asiokpari na lege ti sukulango gere ti ala, ka ala fa ndoye ti ala tongaso pepe.

Titene ala sara fade tongaso, ala sara ni pepe, na ndembe so Jezu aga na mbage ti ala si ahunda ala atene: « Mo ndoye mbi ahon ndoyengo so ala so andoye mbi? » Pierre alingbi fade ti tene « Mve ti dunia, mbi lingbi kue pepe si nga mbi yeke wasiokpari. Mbi yeke wasiokpari so alingbi pepe ti ndoye mo ahon so. Mbi gbu gere ti mo, Mo hon na terê ti mbi kâ » Si nga Pierre alingbi fade ti kpe ti hunzi terê ti lo na Jezu.

Me e gbu li ti e na akiringo tënë ti Pierre. Lo wara tufa ti nzoni sango ti zingo ti mbongo asiokpari so ayeke ti bateme ti Jezu na mênë ti Lo so asoo azo kue.

Ndani laa lo kiri tënë « Biani, Mve ti dunia, mo hinga mo tene mbi ndoye mo. » Fango na gigi ndoye so alondo na mango na be ti lo na nzoni sango ti mbongo asiokpari so Jezu ambô ni. Pierre ama na be na taa nzoni sango ti zingo asiokpari so gi na lege ni si Jezu azi asiokpari kue ti dunia, ataa asiokpari so azo alingi gi ti sara ni kekereke ndali ti so ala yeke nzoni kue pepe na nga ndali ti wokongo ti mi-terê ti ala.

Ngbanga ti so Pierre ama na be ngangu na nzoni sango ti zingo asiokpari, si nga ngbanga ti so lo ma na be so Jezu ayeke kete taba ti Nzapa, lo wara ngangu ti kiri tënë na Mve ti dunia na gingo be pepe. Songo so Jezu asoo azo alondo na nzoni sango ti zingo asiokpari, nilaa asoo Pierre na ya ti asiokpari ti lo kue ti lango oko oko nga. Pierre ama na be na nzoni sango ti zingo asiokpari kue ti dunia.

Mo yeke nga tongana Pierre? Mo lingbi ti ndoye Jezu si mo zia be ti mo na ndö ti Lo, Lo so ambô asiokpari, so ti tene na lege ti bateme ti Lo nga na mênë ti Lo so? E lingbi ti ma na be na lo pepe nga ti ndoye lo pepe tongana nyen? Mbeni lege nde ayeke daa pepe.

Tongana Jezu asara gi kua ti zingo asiokpari ti biri wala ti laso si lo zia asiokpari ti kekereke, fade e lingbi ti gonda Lo tongana ti laso pepe. Na ndoni do kue, fade e gue na le ti wâ biani. Nilaa, ayeke nzoni e kue e sara kua ti tenengo ni na gigi polele e tene asoo e na lege ti mango na be na nzoni sango ti zingo asiokpari.

Mi-terê aye lakue gi ti sara siokpari, nilaa, e kai pepe ti sara siokpari. Par conséquent, nous devons confesser que nous avons été sauvés en croyant en l’évangile de l’abondante élimination des péchés que Jésus nous a donné, c’est-à-dire le baptême et le sang de Jésus. Ayeke nzoni e tene na gigi e tene asoo e na lege ti mango na be na nzoni sango ti zingo gbâ ti asiokpari, nzoni sango so Jezu amu na e, so ti tene bateme ti Lo na mênë ti Lo.

Tongana e ma na be pepe na nzoni sango ti zingo asiokpari, so ayeke bateme ti Jezu nga na mênë ti Jezu, fade asoo mbeni wamabe oko pepe na ya ti asiokpari ti gigi ti lo kue. Si nga tongana asoo e na ya ti asiokpari ti gigi ti e kue gi na lege ti fango pekoni nga na iango lege ti asiokpari ni na ngoi kue, fade e duti azo ti goigoi, e lingbi pepe ti ngba azo ti mbirimbiri na ngoi kue na fade siokpari angba lakue na ya ti be ti e.

Tongana ye ni ayeke tongaso, fade e yeke ngba lakue gi awasiokpari na fade e lingbi pepe ti ndoye Jezu wala ti ga nduru na Lo. Tongaso, e lingbi pepe ti ma na be na songo so Jezu asoo e si nga fade e lingbi pepe ti mu peko ti Lo ngbii asi na kongo nda ti gigi ti e.

Me Jezu amu na e nzoni sango ti zingo asiokpari si lo soo azo so ama na be na ni. Lo ga Wasongo e so ayeke nzoni kue si Lo sukula asioni ti e kue so e yeke sara ni lakue na ya ti gigi ti e titene e ndoye Lo biani.

Nilaa, e awamabe e lingbi pepe ti ngbanzi terê ti e na ndoyengo bateme na mênë ti Jezu so azi asiokpari ti e. Awamabe kue alingbi ti ndoye Jezu biani biani si ala ga angbaa ti ndoyengo songo so asoo ala na lege ti nzoni sango ti zingo asiokpari so Jezu amu na e.

Andeko ti mbi, tongana Jezu azia mbeni siokpari, ataa gi kete ni, fade mo lingbi ma na be na Jezu pepe, mo lingbi nga pepe ti ga wakambisa ti nzoni sango ti zingo asiokpari. Fade mo lingbi pepe ti sara kua tongana awakua ti Nzapa.

Me tongana mo ma na be na nzoni sango ti zingo asiokpari, mo lingbi titene asoo mo na ya ti asiokpari kue ti dunia. Amu lege na ala titene asoo ala na ya ti asiokpari ti ala tongana ala hinga taa nzoni sango ti zingo asiokpari so ayeke na ya ti atënë ti Jezu.

« Mo Ndoye Mbi Ahon Ndoyengo so Azo so Andoye Mbi? »

Nyen laa asara si e ndoye Jezu ahon atanga ti ye kue?

Ndoye ti Lo ndali ti e na lege ti bateme ti Lo so asukula asiokpari ti e kue, ataa ti kekereke

Nzapa azia akete taba ti Lo na maboko ti awakua so ama na be biani na nzoni sango ti zingo asiokpari. Jezu ahunda ndo fani ota: « Simon, molenge ti Jonas, mo ndoye mbi ahon ndoyengo so ala so andoye mbi? » na Pierre akiri tënë na ngoi kue: « Biani Mve ti dunia, mo hinga mo tene mbi ndoye mo. » Fadeso, e gbu li ti e na kiringo tënë ti Pierre. E lingbi ti baa so ayeke gi fango nzara ti be ti lo pepe, me ayeke fango mabe ti lo so lo zia na ndö ti nzoni sango ti zingo asiokpari.

Tongana e ndoye mbeni zo, si tongana ndoye ni alondo gi na nzara ti be ti e, ndoye ni alingbi ti woko tongana e woko. Me tongana ndoye ni aluti gi na ndö ti ngangu ti ndoye ni, fade ndoye ni angba lakue lakue. Ndoye ti Nzapa, so ayeke mbongo gbâ ti asiokpari ti e kue, songo azo ti ngu ti bateme ti Jezu nga na ti Yingo ayeke tpngaso.

Mabe ti e so e zia na ndö ti nzoni sango ti zingo asiokpari, alingbi aga gonda ti ndoyengo so Mve ti dunia andoye e. Tongana e ndoye Lo gi ndali ti nzara ti be ti e, fade e yeke pika gere ti ti si na fade e hunzi na bango terê ti wani sioni ndali ti asiokpari ti e. Jezu azi asiokpari ti e kue: siokpari so adu e na ni, asiokpari ti lango oko oko, ti biri, ti kekereke nga na asiokpari ti gigi ti e kue. Na songo azo so Lo soo na ndö ti sese so, lo zia mbeni zo oko pepe.

Ye so kue ayeke taa-tënë. Tongana ndoye ti e na mabe ti e aluti gi na ndö ti nzara ti be ti e, fade mabe ti e ati. Me ngbanga ti so ndoye ti e na mabe ti e aluti na ndö ti nzoni sango ti zingo asiokpari so Jezu amu na e, e ga amolenge ti Nzapa awe, e ga azo ti mbirimbiri. Ngbanga ti so e ma na be na songo azo na lege ti ngu na Yingo, e yeke na siokpari pepe.

Si nga ngbanga ti so songo e alondo gi na lege ti mabe ti e wani pepe, me alondo na lege ti ndoye ti Nzapa nga na lege ti ndia ti Lo ti taa songo zo ni azi asiokpari ti e, e ga azo ti mbirimbiri, ataa e lingbi kue pepe tongana nyen wala e woko wokongo na ya ti gigi ti e. Fade e gue na Kodro-gbia ti Yayu si na kongo ndani, e yeke gonda Nzapa lakue lakue, kpo na kpo. Mo ma na be na ni?

1 Jean 4:10 atene: « Ndoye ni so ayeke e laa e ndoye Nzapa pepe, me Nzapa laa andoye e si lo tokua Molenge ti lo ti mu tere ti lo na sandaga ti zi asiokpari ti e. » Jezu asoo e na lege ti ngu na Yingo, nilaa ayeke nzoni e ma na be na nzoni sango ti zingo asiokpari, e ma na be na bateme ti Jezu nga na Mênë ti Lo.

Tongana Nzapa asoo e pepe na lege ti nzoni sango ti zingo asiokpari, fade e lingbi pepe titene asoo e, ataa mabe ti e akpenga tongana nyen. Me Jezu asukula asiokpari so e yeke sara na ya ti be ti e nga na mi-terê ti e.

Titene e ma na be na Nzapa si e ga mbirimbiri, ayeke nzoni e hinga taa biani e tene asoo e na lege ti mango na be na ngu nga na Yingo, nzoni sango ti zingo asiokpari. Nzoni sango ti zingo asiokpari kue ti dunia so, ayeke ti ma na be na bateme ti Jezu nga na mênë ti Lo. Nzoni sango ti zingo asiokpari so ayeke taa mabe, taa gonda ti songo azo, kerere ti nzoni sango ti Nzapa.

Alingbi e Ke Mango na be na Nzara ti Be ti e wani

Taa mabe alondo na ndo wa?

Alondo na ndoye ti Mve ti dunia so asukula asiokpari ti e kue ti laso na ti kekereke

Mabe wala ndoye so alondo na nzara ti be ti e wani ayeke taa ndoye pepe, ayeke nga taa mabe pepe. Azo mingi na dunia so ama na be kozoni na Jezu na nzoni nzara ti be, kete na pekoni, ala do mabe ti ala ni azia biani ndali ti asiokpari so ayeke na be ti ala.

Ayeke nzoni e hinga e tene Jezu asukula asiokpari kue ti dunia awe, lo sukula pepe gi akengo yanga so ayeke senge ye, me Lo sukula nga akota siokpari so e yeke sara ni na hingango ye pepe.

Na ya ti Jean 13, titene Lo fa na awamungo peko ti Lo lege so songo azo ti Lo abaa azo kue, Jezu abongbi ala kozo si afâ Lo na ndö keke ti kulusu. Na ndembe so Lo yeke te kobe na ala, Lo sukula gere ti ala ti fa taa-tënë ti songo so Lo soo azo. Ayeke nzoni e kue e hinga na e ma na be na nzoni sango ti zingo asiokpari so Jezu afa na awamungo peko ti Lo na lege ti sukulango gere ti ala.

Me Pierre ake na kuru go titene Jezu asukula gere ti lo: « Fade mo sukula gere ti mbi laoko pepe! » So ayeke fango mabe so alondo na nzara ti be ti lo wani. Me Jezu atene na lo: « Ye so Mbi yeke sara so, mo yeke ma ya ni ti fadeso pepe, me aninga pepe fade mo yeke ma ya ni ande. »

Ti fadeso, na lege ti nzoni sango ti ngu na Yingo, e lingbi ti ma ya ti atene ti Jezu. Ayeke taa-tënë, nzoni sango ti ngu na Yingo, zingo asiokpari so amu lege na wasiokpari ti ga zo ti mbirimbiri na lege ti mango na be na be ti lo kue.

Pierre ague lani ti gi susu na awamungo peko ti Jezu. Ala yeke gi susu tongana ti so ala yeke sara ka lakue kozo si ala tingbi na Jezu. Na pekoni, Jezu asi na ala si lo iri ala. Jezu aleke kobe ti ndaperere na ala, si na ndembe so ala yeke te kobe ni, Pierre a hinga nda ti tënë so Jezu atene ni kozo so. Jezu akiri tënë na lo: « Ye so mbi yeke sara na ndembe so, mo yeke ma ya ni fade fadeso pepe, me fade aninga pepe mo yeke ma ya ni ande. » Na hunzingo ni, lo hinga nda ti ye so Jezu aye ti tene na lege ti sukulango gere ti lo so.

« Mve ti dunia asukula asiokpari ti mbi kue. » Asiokpari kue so mbi sara ni ndali ti wokongo ti mbi, asiokpari kue so fade mbi sara ni kekereke kue ayeke na popo ni. Tongaso, Pierre azia lege ti mabe so alondo na nzara ti be ti lo, si lo tonda ti ma na be na bateme nga na mênë ti Jezu, nzoni sango ti zingo asiokpari.

Na peko ti kobe ni, Jezu ahunda na Pierre: « Mo ndoye mbi ahon ndoyengo so ala so andoye na mbi? » Na warango ngangu na lege ti mabe ti ndoyengo Jezu, Pierre atene. « Biani, mo hinga mo tene mbi ndoye Mo. » Pierre awara ngangu titene ni ngbanga ti so lo ma ya ti tënë so Jezu aye ti tene na ndembe so lo tene: « Ye so mbi yeke sara so mo yeke ma ya ni na ndembe so pepe, me fade aninga pepe mo ma ya ni. » Pierre awara ngangu ti fa na gigi taa mabe ti lo, mango na be na bateme na mênë ti Jezu, nzoni sango so ayeke mbô siokpari kue kue.

Na Pekoni Lo Ga Taa Wakua ti Nzapa

Ndani laa, Pierre na atanga ni avunga nzoni sango ni ngbii asi na ndangba lango ti ala. Ataa Paul so kozo asara sana na awamabe, lo baa nga mawa ti ala pepe so, lo fa kambisa ti nzoni sango ni na ngoi ti Lengo gbia ti azo ti Rome so ayeke ngoi ti ngangu.

Zo alingbi ti ga taa wakua ti Nzapa tongana na nyen?

Na lege ti mango na be na mbongo asiokpari ti e so Lo mbô ni ti biani biani

Na popo ti awamungo peko ti Jezu, Judas aka Jezu si na pekoni lo fâ terê ti lo. Ayeke bazangele Paul laa amu ndo ti lo. Awamungo peko ti Jezu asoro Mathias na popo ti ala, me ayeke Paul laa Nzapa asoro lo si Paul aga bazangele ti Jezu, lo vunga nzoni sango ti zingo asiokpari na tanga ti awamungo peko ti Jezu ni.

Mingi ti awamngo peko ti Jezu akui ndali ti Jezu. Ataa so ayoro maboko na le ti ala ti fâ ala, ala ngba na lege ti vungango nzoni sango so ayeke na gonda ni kâ.

« Jezu-Kriste asukula asiokpari ti mi-terê ti mo na lege ti nzoni sango ti bateme nga na mênë ti Lo, so ti tene, na lege ti nzoni sango ti Lo ti zingo asiokpari. Jezu azi asiokpari ti mo na lege ti bateme ti Lo na Jurden si afâ ngbanga na li ti Lo na ndö keke ti kulusu ndali ti mo. Ayeke nzoni mo ma na be na nzoni sango ti bateme ti Jezu nga na mênë ti Lo na ndö keke ti kulusu si asoo mo. »

Azo mingi asoo ala na mango nzoni sango ni nga na mango na be na ni. So ayeke ngangu ti mango na be na bateme ti Jezu, ti mênë ti Lo nga na Yingo.

Awamungo peko ti Jezu avunga nzoni sango ti ngu na Yingo, atene « Jezu ayeke Nzapa nga na Wasongo azo. » Ayeke ngbanga ti so ala fa kambisa ti nzoni sango ti ngu na Yingo si mo na mbi, e lingbi fadeso ti ma nzoni sango ti bateme nga na ti mênë ti Jezu, nzoni sango ti songo azo si asoo e na ya ti siokpari. Gi na lege ti ndoye ti Nzapa so maka ni ayeke daa pepe nga na songo so Jezu azo kue kue, e kue e ga awamungo peko ti Jezu.

Mo ma na be na ni? Jezu andoye e mingi, nilaa Lo mbô asiokpari ti e kue kue si e ga ambirimbiri wamungo peko ti Jezu. Si nga ti fa taa nzoni sango ti zingo siokpari so, Jezu asukula gere ti awamungo peko ti Lo.

Jezu asukula gere ti awamungo peko ti Lo ti fa na ala, nga na e atene, asiokpari kue ti dunia, asiokpari kue so e yeke sara na gigi ti e, ambô ni kue awe na ndembe so asara bateme na Jezu si nga lo sa mênë ti Lo na ndö keke ti kulusu. Nilaa, e mu singila na Jezu ndali ti ndoye ti Lo nga ndali ti nzoni sango so azi saiokpari ti e.

Jezu afa na e ye use na lege ti sukulango gere ti awamungo peko ti Lo. Kozoni, ateke ti fa na ala ye tongana so Lo tene, « Ye so mbi yeke sara so, mo yeke ma ya ni na ndembe so pepe, me na ya ti kete ngoi, fade mo ma ya ni. » Ayeke nzoni e hinga so asukula asiokpari ti e kue na lege ti nzoni sango ti zingo asiokpari, bateme ti Jezu nga na mênë ti Lo.

Use fango ye ni ayeke so, legeoko tongana ti so Jezu asara terê ti Lo kete ti soo awasiokpari na ti sara si ala ga azo ti mbirimbiri so, e, azo so akiri adu e, ayeke nzoni e sara kua na amba ti e na lege ti vungango nzoni sango ti zingo asiokpari. Ayeke na legeni titene e so e yeke akozo zo, e sara kua ndali ti azo so ayeke ga na peko ti e.

Sukulango so Jezu asukula gere ti awamungo peko ti Lo na kozo si lango ti matanga ti Pake asi so, ndani ayeke use.

Wamungo peko ti Mve ti lo alingbi ti hon lo laoko pepe. Ndani laa, e yeke vunga nzoni sango na azo ti dunia si nga e yeke sara kua ndali ti azo ni baa mo tene e yeke sara kua ti Jezu. E so asoo e kozo so, ayeke nzoni e sara kua ti azo so ayeke ga na peko ti e. Titene Jezu afa ye so na e, Lo sukula gere ti awamungo peko ti Lo. Na ndoni kue, na sukulango gere ti Pierre, Lo fa na e atene Lo yeke taa nzoni Wasongo azo titene zabolo ahanda e laoko pepe.

Ala kue, alingbi ti soo ala na lege ti mango na be na nzoni sango ti zingo asiokpari, so titene nzoni sango ti ngu nga na ti Yingo so. Jezu asukula asiokpari ti e kue na lege ti bateme ti Lo, kuingo ti Lo na ndö ti keke ti kulusu nga na zingongo ti lo na kuâ, me gi azo so ama na be na nzoni sango ti Lo si alingbi ti soo ala biani biani na ya ti asiokpari ti dunia so.

Mango na be na Nzoni Sango so Asukula Asiokpari ti e ti Lango Oko Oko

E lingbi ti kai handa ti zabolo na lege ti mango na be na nzoni sango ti zingo asiokpari ti e, so titene na atënë ti ngu na Yingo. Zabolo ayeke handa azo hio mingi na zabolo ayeke tene tënë na gbe ti go lakue na mê ti e. So e hinga e tene mi-terë ti e kue na lege ti bateme ti Lo awe so, wamabe alingbi ti duti wasiokpari tongana nyen? Azo kue ayeke awasiokpari?

E hinga kiringo na tene ni. « So e hinga e tene Jezu azi asiokpari ti mi-terê ti e kue na lege ti bateme ti Lo awe so, wamabe alingbi ngba na siokpari tongana nyen? So si Jezu afuta ngere ti asiokpari ni kue awe so, siokpari ti nyen laa alingbi ti ngba titene e futa ni? »
Tongana e ma na be na nzoni sango ti ngu na mênë pepe, tënë ti zabalo so akpa tënë so ayeke na legeni. Me tongana e yeke na nzoni sango na terê ti e, e lingbi ti wara mabe so alingbi ti yingi pepe na lege ti taa-tënë ti Nzapa.

Ndani laa ayeke nzoni e zia mabe ti e na ndö nzoni sango ti dungo ti fini ni ti ngu na mênë. Taa mabe ayeke ti ma na be na bateme ti Jezu, ti ma na be na mênë ti Lo na ndö keke ti kulusu nga na zingongo ti Lo na kuâ.

Mo baa limo so afa da ti bongo so Nzapa ayeke tingbi na azo daa so awe? Ayeke gi mbeni kete da. Afâ ya ni use, mbage ni na gigi ayeke ndo so ayeke nzoni kue si mbage ni na ya ni ayeke ndo so ayeke taa nzoni kue so azia yanga ti sanduku ti mbele daa.

Akeke so ayô li ti da ni kue ayeke baleomene na terê ni na mbage ti gigi, si nga ndo so ayeke nzoni kue so amu amabaya baleosio. Ayeke nzoni e duti na limo ti da ti bongo so na be si e hinga nda ti atënë ti Nzapa.

Da ti Bongo so Nzapa Ayeke Tingbi na Azo daa so, Asara Yanga ti da ni na nyen?

Da ti bongo so Nzapa ayeke tingbi na azo daa so, asara yanga ni na mbage ti gigi na nyen?

Akpo ni kamba so nzoroko ni akpa le ti nduzu, nzoroko ti bengba na ti bengba so aza zango nga na len ti nzoni ni.

Ridoo ti yanga ti da ti bongo ni so, afa ni na ya ti Sigingo 27:16: « Na yanga ti gbägbä ni, ala yeke zia mbeni ridoo so ayo metere baleoko. Zo ti kpongo bongo na apendere nzoroko ayeke kpo nzoroko na tere ni na kamba ti len so akpengba kpengbango, ala bongbi ni na bongo so nzoroko ni akpa le ti nduzu, bongo so abe bengo na bengba bongo so ayeke za zango. Ala yeke kanga ridoo ni na terê ti angbongboro wen osio so aluti na ndö ti gere ni osio. » Ridoo ti yanga ti gbäbgä ti da ti bongo ni afu na kamba so nzoroko ni akpa le ti nduzu, ti bengba, ti so abe si aza gi zango nga na len ti nzoni ni so akpo ni kpongo. Afu ridoo ni na ngobo so zo ahinga li ti lo na ni pepe na anzoroko mingi nde nde.

Nzapa amu yanga na Moize ti fu ridoo ti yanga da ni na nzoroko so akpa le ti nduzu, ti bengba na so bengo ni aza gi zango si azo kue awara yanga-da ni hio. Ridoo ti yanga-da ni so akpo ni na kamba so nzoroko ni akpa le ti nduzu, ti bengba na ti so bengo ni aza gi zango nga na len ti nzoni ni so akpo ni kpongo so, akanga na terê ti akeke osio so aluti na yongoro ni na nduzu.

Aye osio so afa limo ti pialo ti Nzapa ti songo azo so si gi na lege ni laa fade Nzapa asoo azo kue so ama na be na Molenge ti Lo Jezu, na bateme ti Lo nga na mênë ti Lo, na ala ma na be so Jezu ayeke Nzapa.

Ye oko oko so amu asara na da ti bongo so ayeke nzoni kue so, ndani ayeke taa nde na afa tënë ti Nzapa nga na apialo ti songo azo kue na lege ti Jezu.

Aye nde nde oke laa amu ni asara na ridoo ti yanga ti gbägbä ti da ti bongo ni so? Kamba so nzoroko ni akpa le ti nduzu, ti bengba, ti so abe si aza gi zango na len ti nzoni ni so akpo ni kpongo. Si nga aye osio so ayeke na ngere ngangu ti mu maboko na e titene mabe ti e akpengba na ya Nzoni Sango ti dungo zo ti fini ni. Tongana aye ni so ayeke na ngere ngangu pepe, ka amu na e asango na ndö ni na ya ti Mbeti ti Nzapa na fango tënë na ndö ni oko oko tongaso pepe.

So si aye kue so amu aleke na ridoo ti yanga ti gbägbä ni nga na ridoo ti yanga da ni na gigi ayeke na ngere ngangu ndali ti songo e, ayeke nzoni asara aridoo ni na kamba so nzoroko ni akpa le ti nduzu, ti bengba, ti so abe si aza gi zango nga na len ti nzoni ni so akpo ni kpongo. Songo e so ambô asiokpari ti e ti lango oko oko, siokpari so adu na e nga na asiokpari ti kekereke. Nzapa afa aye so kue na Moize si Lo tene na lo ti sara ni gi tongana so Lo tene na lo.

Akamba so Nzoroko ni Akpa le ti Nduzu, ti Bengba nga na ti so abe si Aza Zango so, Ndani Ayeke Nyen?

Aye so amu asara na da ti bongo ni so afa nyen?

Songo azo so Jezu asoo ala na lege ti bateme na mênë ti Lo

Na ya ti da ti bongo abata ni nde so, akamba so nzoroko ni akpa le ti nduzu, ti bengba, ti so abe si aza zango nga na len ti nzoni ni so akpo ni kpongo, nilaa amu ni si asara na ridoo ti fango na ya ti da ni use: Ndo so ayeke nzoni kue na Ndo so ayeke taa nzoni kue. Gi aye ni so laa amu asara na kota bongo ti kota wayango-sandaga so ayeke sara kua na ya ti da ti bongo ni so.

Kamba so akpa le ti nduzu so afa bateme ti Jezu. Na ya ti 1 Pierre 3:21, e lingbi ti diko: « Ngu ni so ayeke limo ti bateme...so ayeke soo ala fadeso ». Bateme ti Jezu so gi na lege ni laa Lo mu asiokpari kue ti dunia so, Pierre akiri atene tënë ni na ya ti sura so tongana limo ti songo azo na lege ti mbongo asiokpari. Asiokpari ti e kue, asiokpari ti dunia kue atokua ni na li ti Jezu na lege ti bateme ti Lo. Nilaa, kamba so akpa le ti nduzu, bateme ti Jezu ayeke ye so ayeke na ngere ngangu mingi na ya ti tënë ti songo azo.

Kamba so abe si aza zango afa mênë ti Jezu nga ti si so abe bengo afa Lengo gbia — dutingo ti Jezu tongana Gbia nga na Nzapa Anzoroko ota ti kamba so ayeke na ngere ngangu ndali ti mango na be ti e na Jezu nga na songo so Lo soo e.

Pendere bongo so kota wayango-sandaga ayu, airi ni efode, si kota bongo ti efode ni, nzoroko ni akpa le ti nduzu. Kota wayango-sandaga ni akanga mbeni yanga ti bongo na li ti lo. Mbeni kpangbara so asara na lôro ti nzoni ni si asu mbeti daa ayeke na ndö ti yanga ti bongo ni so. Mbeti ni atene, « BATANGO TERÊ NDE AYEKE TI MVE TI DUNIA. ». Akanga kpangbara ni na terê ti yanga ti bongo ni so na mbeni kamba so nzoroko ni akpa le ti nduzu.

Taa-tënë so Kamba so Akpa Le ti Nduzu Afa ni

Kamba so nzoroko ni akpa le ti nduzu afa nyen?

Bateme ti Jezu

Mbi gi nda ti nzoroko so akpa le ti nduzu na ya ti Mbeti ti Nzapa. Nyen laa Mbeti ti Nzapa atene na ndö ti nzoroko so akpa le ti nduzu? Ayeke nzoni e hinga ye na ndö ti akamba so nzoroko ni akpa le ti nduzu na popo ti akamba so nzoroko ni akpa le ti nduzu, ti so akpa ngu ti karakanzi nga na ti so abe si aza zango.

Kamba so nzoroko ni akpa le ti nduzu afa bateme ti Jezu. Jean-Batiste asara bateme na Jezu-Kriste ti mu asiokpari kue ti dunia (Matthieu 3 : 15).

Tongana Jezu-Kriste azi asiokpari ti dunia kue na lege ti bateme ti Lo pepe, e lingbi pepe titene asukula e na le ti Nzapa. Nilaa, alingbi Jezu-Kriste aga na sese so si Jean-Batiste asara bateme na Lo na Jurden titene Lo zi asiokpari kue ti dunia so.

Ndani so alingbi kamba so nzoroko ni akpa le ti nduzu aduti na yanga ti gbägbä ti da ti bongo ni, ayeke so e lingbi titene asukula e gi na bateme ti Jezu.

Kamba ti bengba ni afa kuingo ti Jezu. Bengba kamba so akpa ngu ti karakanzi ni afa Yingo, so titene dutingo ti Jezu tongana « Lo so ayeke na ndö ti ye kue, gbia ti agbia na Mve ti amve ti azo » (1 Timote 6:15)

Kamba ti bengba ni afa mênë ti Kriste so ayuru na ndö keke ti kulusu ti futa ngere ti siokpari ti azo kue. Jezu-Kriste aga na sese so na ya ti mi-terê ti yô na li ti Lo asiokpari kue ti azo na lege ti bateme ti Lo, si Lo futa ngere kue ti siokpari na lege ti mungo terê ti Lo na sandaga na ndö keke ti kulusu ti siokpari kue kue. Bateme ti Jezu ayeke taa nzoni sango ti zingo asiokpari so afa ni kozo na lege ti anzoroko ti akamba so amu asara na da ti bongo so Nzapa ayeke tingbi na azo daa na ya ti Ngbene Mbuki.

Akeke so ayô li ti da ni, asara na keke ti akasia, agere ti akeke ni asara na bengba wen si agere ni asara na bengba wen so akpaka wen ti nginza na terê ni.

Alingbi afâ ngbanga na ndö ti awasiokpari kue ndali ti asiokpari ti ala, ngbanga ti so futa ti siokpari ayeke kui. Kozo titene mbeni zo awara tufa ti Nzapa titene akiri adu zo ni, ayeke nzoni lo hinga lo tene alingbi afâ ngbanga na li ti lo ndali ti asiokpari ti lo.

Nilaa, bateme ti Jezu ti Fini Mbuki so kamba ti nzoroko ti da ti bongo so abata ni nde Ngbene Mbuki afa ni amu asiokpari ti e kue na li ti lo. Jezu ayô asiokpari ti e na ndö keke ti kulusu ti sara si mênë ni ayuru na afâ gbanga na li ti Lo ndali ni. Na sarango ni, Lo soo azo so kue na popo ti e ama na be na nzoni sango ti zingo asiokpari. Lo yeke Gbia ti agbia na Nzapa so ayeke nzoni kue.

A-ita ti mbi so mbi ndoye ala mingi, bateme ti Jezu ayeke songo so Jezu asoo azo na lege ti zingo asiokpari ti e kue. Jezu so ayeke Nzapa azu na ndö ti sese na mi-terê, asara bateme na Lo ti mu asiokpari ti dunia, afâ lo na ndö keke ti kulusu, lo sa mênë ti lo na ndö keke ti kulusu ti yeda na yongo ngbanga ti e. Bateme ti Jezu afa na e na kite pepe so Lo ga taa Wasongo azo kue.

E lingbi ti baa ni nga na lege ti anzoroko so asara na ridoo ti yanga da ti bongo so Nzapa abata ni nde. Kamba ti len so ayeke ti nzoni ni afa so asoo e na ya ti asiokpari kue, mbeni oko angba pepe.

Fungo ridoo ti yanga ti da ni na nzoroko so akpa le ti nduzu, nzoroko ti bengba, nzoroko ti bengba so aza zango nga na len ti nzoni ni so akpo ni kpongo ayeke ti fa ni avuru tarara taa-tënë ti songo so Nzapa asoo e. So ayeke ngangu ye na ya ti songo azo na lege ti mbongo siokpari.

E lingbi ti baa nga na ya ti aye so amu asara na ridoo ti yanga ti da ti bongo so Nzapa ayeke nzoni kue so Jezu-Kriste asoo e gi tongaso pepe, pialo ni ayeke daa. Na sarango ye na lege ti pialo so Nzapa afa agere ni pendere, asara bateme na Lo si afâ Lo, si na pekoni Lo zingo na kuâ titene songo azo ti dunia abaa gigi. Na lege ti nzoroko so akpa le ti nduzu, ti bengba, ti so abe si aza gi zango, aye ti kua ti nzoni sango ti zingo tënë ti asiokpari so, Jezu asoo azo kue so ama na be na songo so Lo soo azo.

Kota Ta ti Bengba Wen ti Ngbene Mbuki so Ayeke Limo ti Bateme ti Fini Mbuki

Ngbanga ti nyen si awayango-sandaga ayeke sukula maboko ti ala nga na gere ti ala kozo si ala li na ndo so ayeke nzoni kue so?

Ngbanga ti so ayeke ti ala ti luti na gbe le ti Nzapa na siokpari pepe

Asara kota ta ti ngu so nga na wen ti bengba. Si nga kota ta ti ngu so afa tënë ti nzoni sango so atene na e atene asukula asiokpari ti e kue awe.

Afa na e tongana nyen si asukula asiokpari ti e. So ayeke limo ti taa-tënë so na lege ni si alingbi ti sukula asiokpari ti dunia kue na lege ti mango na be na bateme ti Jezu.

Gbalaka ti gbingo asandaga afa na e ngbanga. Ngu ti Jezu so ayeke nzoroko so akpa le ti nduzu ayeke nzoni sango ti mbongo sioḱpari, bateme so Jean-Batiste asara na Jezu. (Matthieu 3 : 15, 1 Jean 5 : 5-10). So ayeke tënë ti kambisa ti nzoni sango ti songo azo na lege ti mbongo asiokpari.

Na ya ti 1 Jean 5, e diko: « Na lege ti mabe laa e yeke hon ndö ti dunia so na ngangu. Ngbanga ti so aye ota ayeke fa atene, ye ni ayeke taa-tënë: Yingo-Vuru, ngu na mene; ala ota so, tënë ti yanga ti ala kue ayeke gue gi oko » Atene na e nga atene zo so ama na be na Molenge ti Nzapa, lo yeke na kambisa ti ngu, ti mênë nga na Yingo na be ti ala.

Nzapa amu lege na e titene asukula e na lege ti mango na be na nzoni sango ti mbongo siokpari si e li na ya da ti bongo so Nzapa ayeke nzoni kue. Nilaa, ti fadeso e lingbi ti duti na ya mabe, e lingbi ti bata terê ti e na lege ti tënë ti Nzapa, e lingbi titene lo sara tufa na dö ti e si nga dutingo ti e ayeke ti azo ti mbirimbiri. Ti ga zo ti Nzapa, ndani ayeke titene asoo mo na lege ti mango na be na nzoni sango ti mbongo siokpari si mo duti na ya ti da ti bongo so Nzapa so ayeke nzoni kue.

Mingi ti azo atene laso, alingbi ala ma gi na be, me ala gbuli pepe na nda ti nzoroko ti kamba so akpa le ti nduzu, ti bengba ni, nga na ti so abe si aza gi zango so asara na ridoo ti yanga ti da ti bongo so ayeke nzoni kue. Tongana mbeni zo ama na be na Jezu, me lo hinga aye so pepe, mabe ti lo ni ayeke taa mabe pepe, ngbanga ti so fade asiokpari angba lakue na be ti e. Zo ayeke ngba lakue na siokpari na be ti lo, tongana lo ma na be pepe na taa-tënë ti dungo zo ti fini ni na lege ti ngu, mênë nga na Yingo.

Tongana ahunda na mbeni zo ti fa bibe ti lo na ndö ti mbeni zo so lo hinga nga lo pepe, na ti zia ngia na be ti zo ni, lo tene: « Taa-tënë, mbi zia be ti mbi na ndö ti zo so. Mbi tingbi na lo laoko pepe, me mbi zia be ti mbi na bö ti lo gi tongaso. » Mo baa ti mo tene zo ni lo yeke tene tënë ti lo so, fade anzere na lo? Ambeni zo na popo ti ala, mara ti tënë tongaso alingbi ti nzere na be ti ala, me ayeke mara ti mabe tongaso laa Nzapa ayeke ku na mbage ti e pepe.

Nzapa aye si e ma na be na nzoni sango ti mbongo asiokpari, songo azo so Jezu asoo na lege ti nzoroko so akpa le ti nduzu (Bateme ti Jezu), nzoroko ti bengba (Lengo gbia ti Jezu), nga na nzoroko ti bengba so aza gi zango (Mênë ti Jezu). Ayeke nzoni e ma na be kozoni na Jezu na e hinga lege so Lo soo e na ni na ya ti siokpari.

Tongana e ma na be na Jezu, ayeke nzoni e hinga tongana nyen laa Lo soo e na ya ti asiokpari ti e ni na lege ti ngu (bateme ti Jezu), mênë (Kui ti Lo), nga na Yingo (Jezu ayeke Nzapa).

Tongana e hinga ni nzoni, e lingbi ti hinga taa mabe si nga e wara mabe so alingbi kue. Mabe ti e alingbi ti duti kue pepe, tongana e hinga taa-tënë so pepe. Taa mabe aga gi na lege ti mango ya ti kambisa ti songo azo so Jezu asoo ala, na lege ti nzoni sango ti mbongo asiokpari nga na so si Jezu ayeke taa Wasongo azo kue.

Tongaso, mabe so akpa hengo Jezu aga ayeke so wa? E asa ya ni e baa.

Mabe So Ayeke He Jezu Hengo

Nyen laa ayeke na ngere ngangu ndali ti mabe ti e?

Hingango bateme ti Jezu mbirimbiri

Ayeke nzoni mo hinga mo tene mango na be na Jezu gi tongaso, ayeke gi hengo Lo. Tongana mo gbu li ti mo, mo tene: « Ayeke ngangu na mbi ti ma na be na ni, me ngbanga ti so Lo yeke Nzapa si nga Lo yeke Molenge ti Nzapa, ayeke nzoni mbi ma na be na ni, » so ni, mo yeke he Jezu hengo laa. Ayeke nzoni mo ma na be na bateme nga na mênë ti Jezu so ayeke nzoni sango ti mbongo siokpari.

Tongana mo ma na be na Jezu, me mo hinga nzoni sango ti zingo siokpari pepe, so ayeke sioni mingo ahon titene mo ma na be pepe biani na Jezu. Vungango nzoni sango so ama na be gi na mênë ti Jezu, ayeke tongana sarango kua senge senge so taa-tênë ayeke na ya ni pepe.

Jezu aye pepe titene mbeni zo ama na be na Lo gi senge senge tangaso. Lo ye si e ma na be na Lo na hingango nzoni sango ti mbongo asiokpari.

Tongana e ma na be na Jezu, e hinga e tene nzoni sango ti mbongo siokpari ayeke bateme na mênë ti Jezu. Tongana e ma na be na Jezu, ayeke nzoni e ma ya ti nzoni sango ti mbongo siokpari ni na lege ti atënë ti Lo si e hinga mbirimbiri tongana nyen laa Lo zi asiokpari ti e ni.

Na nga ayeke nzoni e hinga ye so akamba so nzoroko ni akpa le ti nduzu, ti bengba nga ti so abe si aza zango afa ni. E lingbi ti wara taa mabe so fade angba lakue lakue.

Tongana E Ma na Be pepe na Jezu so ayeke Ngangu ti Nzoroko so Akpa Le ti Nduzu, ti Bengba nga na ti Bengba so Aza Zango, E Lingbi pepe titene Adu e ti Fini ni.

Nyen laa awayango-sandaga ayeke sara kozo si ala li na ndo so ayeke nzoni kue?

Ala yeke sukula maboko na gere ti ala na ngu ti kota ta ti bengba wen.

Mve ti e Jezu asoo e. Tongana e baa lege so Mve ti e asoo e nzoni kue na ni, e lingbi gi ti gonda Lo. Ayeke nzoni e baa da ti bongo so ayeke nzoni kue so. Lo mu na e atënë ti nzoni sango ti mbongo siokpari na lege ti nzoroko ti le ti nduzu, ti bengba ni nga na ti bengba ni so aza zango so asara na da ti bongo so si Lo soo e na ni. E mu singila na e gonda Mve ti dunia.

Awasiokpari alingbi pepe ti li na ndo so ayeke nzoni kue so. Zo so ayeke na siokpari na be ti lo alingbi ti li na ndo so ayeke nzoni kue tongana nyen? Lege ni ayeke daa pepe. Tongana mbeni zo ali na ya ni na siokpari, ayeke fa lo gi na le ni le ni. Fade aduti tufa pepe, me gbanga. Wasiokpari alingbi pepe ti li na ndo so ayeke nzoni kue wala lo lingbi pepe zia be ti lo ti ngba na fini.

Mve ti e asoo e na lege ti sekele so ahonde na ya ti ridoo ti yanga da ti bongo so ayeke nzoni kue. Lo soo e na lege ti kamba so nzoroko ni akpa le ti nduzu, ti bengba, ti bengba ni so aza zango nga na ti len ti nzoni ni. Ayeke gi na lege ti aye so si Lo fa na sekele ti songo so Lo soo e.

Mbi na mo asoo e tongaso? Tongana e ma na be pepe na tënë ti kamba so nzoroko ni akpa le ti nduzu, ti bengba ni nga na ti bengba ni so aza gi zango, songo e na lege ti nzoni sango ti mbongo asiokpari alingbi ti duti daa pepe. Nzoroko so akpa le ti nduzu afa Nzapa pepe, afa bateme ti Jezu. Afa bateme ti Jezu so azi asiokpari ti e kue.

Zo alingbi ti li ngbii ti si na gbalaka ti gbingo asandaga, me lo ma na be na kamba so nzoroko ni akpa le ti nduzu pepe. Me zo alingbi pepe ti li na ndo so ayeke taa nzoni kue so Nzapa aduti daa.

Nilaa, kozo ti hon yanga da ti bongo ni so ayeke nzoni kue, ayeke nzoni e ma na be na kamba so nzoroko ni akapa le ti nduzu (bateme ti Jezu), ti bengba ni (Mênë ti Jezu na ndö ti keke ti kulusu), nga na ti bengba ni so aza zango (Jezu ayeke Nzapa si Lo yeke nga Molenge ti Nzapa). Ayeke gi tongana e ma na be na ni si Nzapa ayeke yeda na e si lo mu na e lege ti li ti hon ridoo ti si na ndo so ayeke Taa nzoni kue so.

Ambeni zo ayeke li na ya ti gbägbä ti da ni, me ala baa atene ala yeke na ya ti da ti bongo ni awe. Me so ayeke songo kuâ ni laa pepe. Ndo wa laa ayeke nzoni e gue ngbii e si daa titene asoo e? Ayeke nzoni e wara ngangu ti li na Ndo so ayeke Taa nzoni kue so si.

Titene e li na Ndo so ayeke Taa nzoni kue so, ayeke nzoni e hon na kota ta ti ngu so asara na bengba wen so. Kota ta ti ngu so asara na bengba wen so afa bateme ti Jezu, na ayeke nzoni e sukula asiokpari ti e ti lango oko oko na lege ti bateme ti Jezu ni si asukula e titene e li na Ndo so ayeke nzoni kue so.

Na ya ti Ngbene Mbuki, ayeke nzoni awayango-sandaga asukula terê ti ala wani kozo si ala li, si nga na ya ti Fini Mbuki, Jezu asukula gere ti awamungo peko ti Lo. So afa sukulango asioni so ala sara na ya ti gigi ti ala kue.

Ndia ti Nzapa atene: « Biani, futa ti siokpari ayeke kuâ; me nzoni ye so Nzapa ayeke mu na zo senge senge ayeke fini so angba lakue lakue, na lege ti gango so e ga oko na Jezu Kriste, Mve ti e. » (Rome 6:23). Nzapa ayeke fâ ngbanga ti asiokpari ti azo, mbeni so angba ayeke daa pepe, me Lo tokua asiokpari ni kue na li ti Molenge ti Lo si Lo yô ngbanga ti e so Nzapa afâ na li ti Lo. So ayeke ndoye ti Nzapa, so ayeke songo so Lo soo e. Taa songo e, e yeke wara ni gi tongana e ma na be na nzoni sango ti mbongo siokpari, na bateme, mênë, kuingo na zingongo ti Jezu na kuâ.

Titene Adu E ti Fini ni, Ayeke Nzoni E Mbumbuse pepe Tënë ti Nzapa so Asu ni na Mbeti, Nzoni Sango so Ayeke zi Asiokpari

Ye oko so angba na e ti sara ayeke nyen?

Ayeke gi ti ma na be na tënë ti Nzapa so asu ni

Mbi mbumbuse tanga ti azo laoko pepe. Tongana mbeni zo atene na mbi tënë ti mbeni ye so mbi hinga ni pepe, mbi hunda na lo ti fa ni na mbi. Me tongana mbi gi ti hinga nda ti da ti bongo so Nzapa ayeke tingbi na azo daa so, zo oko alingbi pepe ti tene na mbi.

Tongaso, nyen laa mbi lingbi ti sara? Ayeke nzoni mbi kiri na ya ti Mbeti ti Nzapa. Si nga na ya ti Mbeti ti Nzapa, ndo wa laa tënë ti da ti bongo so ayeke daa? A asa tënë ni nzoni na ya ti buku ti Sigingo. Na tongana e diko mbeti so kpo, e lingbi ti hinga ndani na lege ti tënë ti Nzapa so asu ni.

Andeko ti mbi, ala lingbi pepe titene asoo ala gi na mango na be na Jezu tongana waziba. Ala lingbi pepe titene adu ala ti fini ni na lege ti guengo ni lakue na da-Nzapa. Mo hinga tënë so Jezu atene na Nikodeme. « Biani, mbi tene na mo taa-tënë: tongana a du zo na ngu na Yingo pepe, zo ni alingbi ti li na Kodro-gbia ti Nzapa pepe… Mo so azo ahinga mo tongana wafango-ye na Israel so, mo hinga aye so pepe? » (Jean 3 : 5, 10)

Azo kue so ama na be na Jezu, ayeke nzoni ala na be na kamba so nzoroko ni akpa le ti nduzu (asiokpari ti dunia kue atokua ni na li ti Jezu na ndembe ti bateme ti Lo) kamba ti bengba ni ( kui ti Jezu ndali ti asiokpari ti e kue) nga na kamba ti bengba so aza zango (Jezu ayeke Wasongo azo, lo yeke Nzapa nga na Molenge ti Nzapa).

Ayeke nzoni e ma na be so Jezu ayeke Wasongo awasiokpari kue ti dunia. Tongana mabe ni so ayeke daa pepe, lege titene adu e ti fini ni ayeke nga daa pepe wala lege ti li na Ndo so ayeke nzoni kue ti Kodro-gbia ti Nzapa ayeke daa pepe. Tongana so ni ayeke daa pepe, ataa titene e duti tongana abe-taa-zo na ndö ti dunia so, e yeke wara legeni pepe.

Ayeke ngangu pepe titene adu e ti fini ni gi na mango na be na Jezu pepe? ― Ayeke ngangu pepe ― « ♫ Asoo mo awe. Asoo mbi awe. E kue asoo e awe ♫ » Ayeke taa pendere ye. Me gbâ ti azo ayeke daa so ama na be na Jezu, me « adu taa ti fini ni » pepe.

Ayeke nzoni e hinga taa-tënë ti Mbeti ti Nzapa na e ma na be na Jezu nga. Ayeke nzoni e hinga nda ti kamba so nzoroko ni akpa le ti nduzu, ti bengba ni nga na ti bengba ni so aza gi zango, so ayeke nzoni sango ti zingo asiokpari so ayeke na ya ti Mbeti ti Nzapa si e li na da ti bongo so Nzapa ayeke tingbi na azo daa, ti duti na Nzapa na ya ti dunia ti mabe. Na ya ti da ti bongo ti mabe so, e lingbi ti duti na ngia ngbii asi na ngoi ti guengo na Kodro-gbia ti Yayu. Ayeke na ngere ngangu ti hinga nzoni ngobo ti mango na be na Jezu.

Nzoni Sango so Ayeke na Gonda ni Aga na batango Terê nde na Lege ti Kamba so Nzoroko ni Akpa Le ti Nduzu

Ye so ayeke na ngere ngangu ndali ti songo azo ayeke nyen?

Bateme ti Jezu

Na ambeni ngoi, zo agbu li ti lo atene lo lingbi ti duti na gigi na nzoni ngobo so ayeke mu lege na lo ti sara siokpari kete pepe. Andaa, tongana ala tara ti sara mbeni ye, ala baa so gi hio tongaso, ala wara kpale. Azo alingbi taa kue pepe, nilaa lege ti ala ti kpe siokpari ayeke daa pepe. Me ngbanga ti so Jezu asoo e na lege ti kamba so nzoroko ni akpa le ti nduzu, ti bengba nga na ti bengba so aza zango, nzoni sango ti mbongo siokpari, e lingbi titene asukula e si e li na Ndo ti Nzapa so ayeke nzoni kue.

Tongana Nzapa asoo e pepe na lege ti kamba so nzoroko ni akpa le ti nduzu, ti bengba nga na ti bengba so aza zango, fade e lingbi laoko pepe ti li e wani na Ndo so ayeke nzoni kue. Ndani ayeke nyen? Tongana gi azo so dutingo ti ala na gigi na ya mi-terê ayeke taa nzoni si alingbi ti li na Ndo ni so, fade zo oko alingbi ti li pepe. Tongana zo ama na be na Jezu, me lo ma na be na nzoni sango pepe, so ayeke tongana ziango ambeni siokpari na ndö ti ambeni so ayeke na ya ti be ti lo.

Jezu asoo e na lege ti songo e na kode so Lo zia gere ni na sese nzoni, na lege ti kamba so nzoroko ni akpa le ti nduzu, ti bengba, ti bengba so aza zango nga na ti len ti nzoni ni so akpo ni kpongo. Mo ma na be na ni? ― Nilaa ― Mo yeke na taa-tënë ti nzoni sango ti zingo asiokpari so na ya ti be ti mo? ― Nilaa ―

Ayeke gi na lege ti fango kambisa ti nzoni sango so si mo lingbi ti kanga na li ti mo yanga ti bongo so asu mbeti daa atene: « BATANGO TERÊ NDE AYEKE TI MVE TI DUNIA » na mo lingbi ti li na ya ti « bongbi ti awayango-sandaga ti gbia » (1 Pierre 2:9). Gi tongaso si mo lingbi ti fa terê ti mo na gbe le ti azo ti tene na ala so mo yeke wakua ti Nzapa so ayeke sara kua tongana kota wayango-sandaga.

Na ndö ti bongo ti kangango na li ti kota wayango-sandaga ni, mbeni kpangbara ti lôro ayeke daa so akpo ni kpongo na mbeni kamaba so nzoroko ni akpa le ti nduzu. Nzoroko ti le ti nduzu ndali ti nyen? Ndali ti so Jezu asoo e na lege ti nzoni sango ti mbongo asiokpari, ndali ti so Lo zi asiokpari ti e kue na Lo sara si asiokpari ti e ayeke daa mbeni pepe na lege ti bateme ti Lo (ziango maboko na ya ti Ngbene Mbuki, bateme na ya ti Fini Mbuki).

Ataa e ma na be na Jezu na ngobo so ayeke ngangu tongana nyen, fade e lingbi pepe ti kanga kpangbara so na li ti e, Kpangbara so asu mbeti daa atene: « BATANGO TERÊ NDE AYEKE TI MVE TI DUNIA » ni so.

E lingbi ti ga azo ti mbirimbiri tongana nyen? Asu ni na ya ti Matthieu 3:15: « Biani, alingbi na ni titene e sara ye kue so ayeke mbirimbiri tongaso. » Asara bateme na Jezu si Lo sukula asiokpari ti e kue ti dunia so. E ga azo ti mbirimbiri, e awamabe ngbanga ti so asara bateme na Lo si Lo mu asiokpari ti e kue.

Tongana e yeke na bateme ti Jezu na ya ti be ti e pepe, fade e lingbi ti tene e yeke na siokpari pepe tongana nyen? Ataa e ma na be na Jezu, ataa e dekongo na gbungo li ti e na tënë ti fango Lo na ndö keke ti kulusu, fade angu ti le ti dunia so kue alingbi pepe ti sukula asiokpari ti e kue. Ên en. Ataa e toto si e zia lege ti asiokpari ti e, fade asiokpari ti e angba na e.

« BATANGO TERÊ NDE AYEKE TI MVE TI DUNIA » Ngbanga ti so Lo zi asiokpari ti e kue na lege ti bateme ti Lo na mênë ti Lo, ngbanga ti so Mve ti duinia amu lege titene atokua asiokpari kue ti e awasiokpari na li ti Jezu, ngbanga ti so asu tënë ti songo azo na ya ti Mbeti ti Nzapa, nilaa e ga azo ti mbirimbiri na lege ti mabe ti e, ataa so e woko wokongo.

Tongaso e lingbi fadeso ti luti na gbe le ti Nzapa. Fadeso e lingbi ti duti tongana azo ti mbirimbiri si e vunga nzoni sango na azo ti dunia so. « ♪ Ôo, so si asoo mbi awe so! Asoo mo awe. E kue asoo e awe. ♪ » Asoo e awe na lege ti pialo ti Nzapa.

Tongana tënë ti mbongo siokpari ayeke na ya ti be ti mo pepe, lege titene asoo mo ayeke daa pepe, ataa mo gi lege ni na ngangu ti mo tongana nyen. Ayeke tongana bia ti azo ti Koree na ndö ndoye so ayeke mbage na mbage pepe, bia so azo ahinga ni mingi. « ♫ Ôo, be ti mbi ayeke pika hio hio, me mbi hinga ndani pepe tongana mbi baa lo, na ngoi kue so mbi ga nduru na lo. Ayeke gi so mbi ti lo. ♫ » Be ti mbi ayeke pika hio hio, me be ti lo apika pepe. Mawa ni ayeke so ndoye mbi ni, lo kiri na peko ni na mbi pepe.

Azo abaa ti ala atene songo azo ni ayeke ga na lege ti angobo nde nde ndali ti azo nde nde. Ala yeke hunda: « Ngbanga ti nyen si aga gi na lege ti nzoni sango ti bateme? » Tongana songo azo ni aga na lege ti nzoni sango ti bateme ti Jezu pepe, ayeke songo azo so ayeke taa kue pepe. So ayeke gi oko lege ti gango mbirimbiri na gbe le ti Nzapa laa, ngbanga ti so ayeke gi oko lege ti sukulango asiokpari ti e kue laa.

Songo Azo na Lege ti Kamba so Nzoroko ni Akpa Le ti Nduzu so Jezu Amu na e ayeke so wa?

Nyen laa asara si e ga azo ti mbirimbiri?

Nzoni sango ti kamba so nzoroko ni akpa le ti nduzu, ti bengba nga na ti bengba so aza zango

Songo azo na lege ti kamba so nzoroko ni akpa le ti nduzu, ti bengba nga na ti bengba so aza zango ayeke ye so Nzapa amu ni senge senge ndali ti azo kue. Si nga ye so amu senge senge so amu lege na e ti li na ya ti da ti bongo so Nzapa ayeke nzoni kue na ti duti na siriri. Asara si e ga azo ti mbirimbiri. Asara si e ga azo ti mbirimbiri si nga amu lege na e ti duti na ya ti bongbi ti azo ti Nzapa titene aleke e na lege ti anzoni tënë na ya ti bongbi ni.

Na ngoi kue so e gue na gbe le ti Nzapa ti sambela, nzoni sango ni ayeke mu na e nzoni ye so alondo na ndoye ti Lo. Ndani laa songo e ayeke ye ti ngere ngangu na le ti e. Jezu atene na e ti leke da na « ndö ti tênë ». Fade asoo e kue, fade e duti na gbe ti be-nzoni ti Lo tongana amolenge ti Nzapa, na pekoni, fade e gue na yayu ti duti kâ kpo na kpo.

Andeko ti mbi, na lege ti nzoni sango ti mbongo asiokpari, e lingbi ti li na da ti bongo so ayeke nzoni kue na mabe. Na lege ti mbongo asiokpari ti e kue (bateme ti Jezu) nga na fango ngbanga na li ti Lo na ndö keke ti kulusu, asoo e na lege ti mabe.

Mbongo agbâ ti siokpari kue ti e so, bateme nga na mênë ti Jezu ayeke nzoni sango so asukula asiokpari kue ti e. Mo ma na be na ni? Taa nzoni sango ayeke nzoni sango ti mbongo siokpari so alondo na yayu si asukula asiokpari ti e kue kue.

Adu e ti fini ni na lege ti mango na be na nzoni sango ti mbongo siokpari. Jezu amu na e nzoni sango ti mbongo siokpari so asukula asiokpari ti e ti lango oko oko, asiokpari ti e ti kekere keu asukula ni. E gonda Mve ti dunia. Aleluia! Singila na Mve ti dunia.

Nzoni sango ti ngu na Yingo (nzoni sango ti ngu na mêně) ayeke taa nzoni sango so Jezu-Kriste asara tënë ni. Asu buku so ti fa na gigi nzoni sango ti Jezu, nzoni sango ti ngu na Yingo.

Ngbanga ti so azo mingi ama na be na Jezu, me ala hinga taa-tënë kue pepe, ala yeke sara ye na lege ti teoloji ti mungo peko ti Kriste (so ala iri ni teoloji ti filozofi), ti tene ni nduru, ala yeke na ya ti bibe so ayeke na lege ni pepe so zo ahinga li ti lo na ni pepe. Nilaa ayeke nzoni e kiri na peko si e ma na be na taa nzoni sango. Ngoi ade ti hon mingi pepe.

Fade mbi asa nda ti aye mingi na ya ti buku ti use ni ndali ti azo so ayeke hunda terê ti ala na ndö ti nzoni sango ti dungo azo ti fini ni na lege ti ngu na Yingo so.

Nzoni sango ti kamba so nzoroko ni akpa le ti nduzu, ti bengba nga na ti bengba so aza zango

AKIRI ADU MO BIANI NA LEGE TI NGU NA YINGO AWE? [Fini lekengo]

LIST Download FREE eBook & AudioBook

English

Terms and Conditions Privacy Policy Cookie Policy Contact Us

Domain owner: The New Life Mission (Official Website: bjnewlife.org) | License: The New Life Mission operates this site to distribute free Christian books.