• All e-books and audiobooks on The New Life Mission website are free
  • Explore multilingual sermons in global languages
  • Two new revised editions in English have been released
  • Check out our website translated into 27 languages
Search
English

Sermons

Ũndũ wa 3 : Ũhoro Ũrĩa Mwega Wa Maĩ Na Roho

[3-1] Ũhonokio Wa Tene Na Tene (Johana 8:1-12)

2021.04.10 207
(Johana 8:1-12)
“No rĩrĩ, Jesu we agĩthiĩ kĩrĩma-inĩ kĩa Mĩtamaiyũ. Ningĩ rũcinĩ tene agĩcoka hekarũ-inĩ, na andũ othe magĩthiĩ kũrĩ we; nake agĩikara thĩ, akĩgwata kũmaruta ũhoro. Nao andĩki-marua na Afarisai makĩrehe mũtumia wanyitĩtwo agĩtharia, na maarĩkia kũmũrũgamia gatagatĩ-inĩ makĩmwĩra atĩrĩrĩ, mũrutani, mũndũ mũka ũyũ aanyitwo o agĩtharia. Rĩu-rĩ, watho wa Musa atwĩrire tũhũre aka ta acio na mahiga nyuguto tũmorage: wee ũgũkiuga atĩa ũhoro wake? Na moigire ũguo mamũgerie, mone ũndũ wa kũmũthitangĩra. Nake Jesu akĩinamĩrĩra, akĩgwata kwandĩka thĩ na kĩara. Ningĩ maakĩrũmanĩrĩria kũmũũria, agĩĩtiira, akĩmera atĩrĩ, Inyuĩ ũrĩa ũtarĩ ehia-rĩ, nĩakĩambe amũikĩrie ihiga. Agĩcoka o kũinamĩrĩra, akĩandĩka thĩ na kĩara. Nao, maigua ũguo, makĩgwata kuuma ũmwe ũmwe, marutĩtie harĩ arĩa akũrũ, o nginya ũrĩa wa kũrigĩrĩria; Jesu agĩgĩtigwo wiki, na mũtumia arũngiĩ o hau gatagatĩ. Nake Jesu agĩĩtiira, akĩmũria atĩrĩ, me ha, mũtumia ũyũ? Anga gũtirĩ mũndũ wagũtuĩra? Nake akiuga, Gũtirĩ, mũthuri ũyũ. Nake Jesu akiuga atĩrĩ, Na niĩ ndigũgũtuĩra: thiĩ thutha ũyũ ndũkanacoke kwĩhia. Nake Jesu agĩcoka akĩarĩria andũ rĩngĩ, akiuga, Nĩ niĩ ũtheri wa thĩ; mũndũ aanũmĩrĩra ndarĩthiaga na nduma, ĩndĩ arĩgĩaga na muoyo.”
 
 
Nĩ mehia maigana
atĩ Jesu athambirie?
Mehia moothe ma kĩrĩndĩ
 
Jesu atũheire ũhonokio wa tene na tene. Gũtirĩ mũndũ o na ũmwe ũtangĩhonokio thĩ ĩno, angĩtĩkia Jesu ta mũhonokia. Atũhonokirie ithuothe. Mũndũ ũrĩa mwĩhia, na nĩ agiĩkaga na mehia, nĩ ũndũ ndoĩ ũrĩa Jesu amũhonoketie mehia-inĩ, na ũbatithio wake, na kwambwo mũtharaba-inĩ.
Nĩ twagĩrĩirwo nĩ kũmenya, na gwĩtĩkia, hitho ya ũhonokio. Jesu nĩ akuuire mehia maitũ mothe na ũbatithio wake, na akĩherithio, na agĩtuĩrwo ciira, na agĩkua mũtharaba-inĩ, nĩ ũndũ wa mehia maitũ.
Wagĩrĩirwo nĩ gwĩtĩkia ũhonokio wa maĩ na Roho; ũhonokio wa tene na tene, wa mehia moothe. Wĩtĩkie wendo wake mũnene, ũrĩa agũtuĩte mũthingu naguo. Ĩtĩkia, ũrĩa agwĩĩkĩire rũĩ-inĩ rwa Jorodani, na mũtharaba-inĩ, nĩguo akũhonokie.
Jesu nĩoĩ, mehia mothe, o nginya marĩa marĩ hitho-inĩ. Andũ amwe matitaũkĩirwo wega ũhoro wa mehia. Meciragia atĩ, mehia mamwe matingĩohanĩrwo. Jesu atũhonoketie mehia-inĩ mothe, na ndaatigire o na rĩmwe.
Gũtirĩ rĩhia o na rĩmwe atigire gũkũ thĩ. Na tondũ nĩatheririe mehia mothe ma thĩ, ũhoro wa ma nĩ atĩ gũtirĩ ehia rĩngĩ. Nĩũĩ atĩ, ũhoro-ũrĩa-mwega nĩũkũhonoketie mehia-inĩ maaku mothe, tene o na tene? Ĩtĩkia, ũhoro-ũrĩa-mwega ũkũhonokie, na ũtuĩke wa kũhe, Ngai nguumo na ũgooci.
 
 
Mũtumia Ũcio Wanyitĩtwo Agĩtharia.
 
Nĩ andũ aigana matharagia gũkũ thĩ?
Nĩ andũ oothe.
 
Thĩinĩ wa Ibuku rĩa Johana 8, hena rũgano rwa mũndũ mũka ũrĩa wanyitĩtwo agĩtharia, na ũrĩa Jesu, amũhonokirie. No twende kũgũatanĩra wega ũcio aheirwo o na ithuĩ. Ti ũndũ mũnene kuuga, atĩ, andũ othe nĩ matharagia hĩndĩ ĩmwe na ĩmwe thĩinĩ wa mĩtũrĩre-inĩ yao. Mũndũ o wothe nĩ atharagia.
Angĩkorwo ndũkuona taarĩguo-rĩ, nĩ ũndũ wa ũrĩa twĩkaga ũguo maita maingĩ, o nginya gũkonekana ta tũtekaga ũguo. Nĩ kĩĩ? Tũikaraga na ũtharia mũingĩ mũno, mũtũrĩre-inĩ witũ.
Ndarora mũtumia ũcio, Ibuku-inĩ rĩa Johana 8, nĩ ngwĩcũrania; hihi nĩ kũrĩ, mũndũ o na ũmwe witũ, ũtaarĩ watharia. Gũtirĩ mũndũ o na ũmwe ũtarĩ watharia, ta mũtumia ũcio wanyitĩtwo agĩtharia. Ithuĩ ithuothe, nĩ tũtharĩtie, no nĩ gwĩtua twĩtuaga ũrĩa tũtatharĩtie.
Ũgwĩciria atĩa, nĩ ndahĩtia? Aca. Rora wega. Mũndũ o wothe thĩ ĩno nĩ atharĩtie. Matharagia makĩrorera atumia njĩĩra-inĩ, meciria-inĩ mao, na o na cĩĩko ciao, mahinda mothe na handũ hothe.
Matimenyaga magĩĩka ũguo. Nĩ kũrĩ andũ aingĩ matamenyaga o nginya mũthenya ũrĩa magakua, atĩ nĩ matharĩtie mũno mĩtũrĩre-inĩ yao. Ti, o arĩa manyitĩtwo magĩtharia, no nĩ nginya ithuĩ tũtanyitĩtwo. Andũ othe nĩ mekaga ũguo, meciria-inĩ mao, na ciĩko ciao. Na hihi-rĩ, ũũ ti guo tũtũraga?
Nĩ warakara? Nĩ ũhoro wa ma. Nĩ kwĩhitha twĩhithaga nĩũndũ wa thoni. Ũhoro wa ma nĩ atĩ, andũ thikũ ici-rĩ, matharagia hingo ciothe, no matimenyaga magĩka ũũtharia.
Andũ nĩ matharagia ngoro-inĩ ciao. Ithuĩ ciũmbe cia Ngai-rĩ, tũikaraga thĩ ĩno, na tũtimenyaga atĩ nĩ tũtharagia kĩroho. Kũinamĩrĩra ngai ingĩ nĩ ũndũ ũmwe na gũtharia kĩroho, tondũ Mwathani nĩwe mũhikania wa andũ oothe.
Mũtumia ũcio wanyitĩtwo agĩtharia-rĩ, nĩ mũndũ o ta ithuĩ, na nĩ onire wega wa Ngai, o ta ũrĩa arĩa tũhonoketio, twawonire. No, na ũhinga wa Afarisai, makĩmũrũgamia mbere yao, mamuorotage na ciara ta atuanĩri cira, metereire mamũhũre na mahiga. Marĩ hakuhĩ kũmũrũnga na mamũtuĩre cira, magĩĩciria atĩ o nĩ athingu na matirĩ matharia.
Akristiano, endwa akwa, andũ arĩa meyũĩ, ũrĩa marĩ na ũingĩ wa mehia-rĩ, matituagĩra andũ arĩa angĩ cira mbere ya Ngai. Na moĩ atĩ o nĩ matharagia mĩtũrĩre-inĩ yao yothe, ũguo o monaga wega wa Ngai, ũrĩa ũtũhonoketie ithuothe. No arĩa mamenyete atĩ, nĩ ehia, na nĩ matharĩtie rĩngĩ na rĩngĩ-rĩ, acio nĩo mahonokaga mbere ya Ngai.
 
 
Nũũ Wamũkagĩra Wega Wa Ngai?
 
Nũũ wamũkagĩra wega wa Ngai?
Nĩ ũrĩa ũtarĩkĩene
 
Hihi-rĩ, nĩ mũndũ ũrĩkũ, wamũkagĩra wega wa Ngai, nĩ ũrĩa ũikaraga ũtagũtharia, kana nĩ ũrĩa ũtarĩ kĩene na nĩ etĩkĩrĩte atĩ, we nĩ mwĩhia mũno? Ũrĩa wamũkagĩra wega wa Ngai-rĩ, amũkagĩra wega mũnene wa ũhonokio. Arĩa matarĩ na ũhoti na amocu-rĩ, nĩo mahonokagio. Na acio-rĩ, nĩo marĩ wega-inĩ wake.
Arĩa meciragia atĩ, o matirĩ na mehia-rĩ acio matingĩhonokio. Mangĩkĩamũkĩra wega wa Ngai wa ũhonokio atĩa, na gũtikĩrĩ kĩndũ gĩa kũhonokerio?
Andĩki marũa na Afarisai makururirie mũtumia ũcio wanyitĩtwo agĩtharia, makĩmũrehe mbere ya Jesu, na makĩmũiga gatagatĩ, na makĩmũria, “mũrutani, mũndũ mũka ũyũ aanyitwo o agĩtharia, wee ũgũkiuga atĩa ũhoro wake?” Nĩkĩĩĩ gĩatũmire mamũrehe mbere yake na mamũgerie?
Onao nĩ matharĩtie mũno, no mageragia kũmũtuĩra cira na mamũrage, nĩguo makuruhanie Jesu na ũhoro ũcio.
Jesu nĩamenyaga kĩrĩa kĩrĩmeciria-inĩ mao, na nĩoĩ ũhoro wa mũtumia ũcio. Akĩmera atĩrĩ, “Inyuĩ ũrĩa ũtarĩ ehi-rĩ, nĩakĩambe amũikĩrie ihiga.” Nao aandĩki marũa na Afarisai, makĩgwata kuuma ũmwe ũmwe, marutĩtie harĩ arĩa marĩ akũrũ o nginya ũrĩa wa kũrigĩrĩria, magĩtiga Jesu wiki na mũtumia ũcio.
Acio mathire marĩ, aandĩki marũa na Afarisai, atongoria a ndini. O mendaga gũtuĩra mũtumia ũcio ciira, ta o matehagia.
No we Jesu atangathire wendo wake gũkũ thĩ. We aarĩ mwene thaayu. Akĩhe andũ irio, akĩriũkia arĩa akuũ, akĩriũkia mũrũ wa mũtumia wa ndigwaa, akĩriũkia Lazaro wa Bethanĩ, akĩhonia arĩa marĩ na mangũ, na akĩringĩra athĩni ciama, agĩthengia wĩhia wothe wa ehia, akĩmahe ũhonokio.
Jesu nĩ atwendete. Nĩwe mwene hinya wathĩ, na gũtirĩ ũndũ ũngĩmũrema, no Afarasia na aandĩki marũa meciragia Jesu nĩ thũũ yao. Nĩkĩo marehete mũtumia ũcio harĩwe nĩguo mamũgerie.
Makĩmũria atĩrĩ, “mũrutani, Musa atwĩrire tũhũre aka ta acio na mahiga nyuguto tũmorage: wee ũgũkiuga atĩa ũhoro wake?” Meciragia atĩ, akũmera mamũhũre na mahiga. Nĩ kĩ? Nĩ tondũ tũtuaga cira na ũrĩa wandĩkĩtwo watho-inĩ wa Ngai, atĩ mũndũ atharia-rĩ, agĩrĩirwo nĩ kũhũrwo na mahiga akue.
Othe magĩrĩirwo nĩ kũhũrwo na mahiga, makue na maikio iherero rĩa mwaki. Mũcara wa mehia nĩ gĩkuũ. No Jesu ndamerire mamũhũre na mahiga. No amerire, “Inyuĩ ũrĩa ũtarĩ ehia-rĩ, nĩakĩambe amũikĩrie ihiga.”
 
Nĩkĩĩ, gĩatũmire Ngai
atũhe icunjĩ 613 cia watho?
Nĩguo tũmenye o wega
atĩ nĩ twĩhagia
 
Watho-rĩ, umaaga marakara. Ngai nĩ mũtheru, na watho wake nĩ mũtheru o naguo. Watho ũyũ nĩ icunjĩ 613. Gĩtũmi kĩa Ngai atũhe watho nĩguo, tũmenye atĩ, tũrĩ ehia; atĩ tũtirĩ akinyanĩru. Watho ũgatũruta atĩ, no tũmathire wega wa Ngai nĩguo tũhonokio. Tũngĩaga kũmenya ũguo, twĩcirie o ũrĩa watho wandĩkĩtwo, tũngĩhũrwo na mahiga, o ta mũndũ mũka ũcio wanyitĩtwo agĩtharia.
Andĩki marũa na Afarisai, acio matoĩ ma ya watho wa Ngai, o meeciragia atĩ, no mahũre mũtumia ũcio na mahiga, na hihi ona ithuĩ nĩguo tũngĩekire. No nũũ ũngĩhota kũhũra mũtumia ũcio na mahiga na o nake no mwĩhia o take? O na gũtuĩka anyitĩtwo agĩtharia-rĩ, gũtirĩ mũndũ ũngĩahotire kũmũhũra na mahiga.
Korwo ithuĩ na mũtumia ũcio no tũtuĩrĩrwo ciira kũringana na watho-rĩ, ithuĩ, hamwe na mũtumia ũcio twagĩrĩirwo nĩ kũũragwo. No Jesu nĩatũhonokirie ithuĩ ehia, kuuma mehia-inĩ maitũ, na cira wa Ngai wa kĩhoto. Na mehia maitũ mothe-rĩ, watho wa Ngai ũngĩhũthĩka ta ũrĩa wandĩkĩtwo na kinyi-rĩ, nũũ hihi ũngĩtũũra muoyo? Ithuothe tũngĩkio o iherero rĩa mwaki.
No andĩki marua na Afarasai-rĩ, moĩ watho ũrĩa wandĩkĩtwo. Watho ũngĩatuĩkire wa kũhũthĩrwo ũrĩa ugĩĩte-rĩ, o nao magĩrĩirwo nĩ gũkua ta mũtumia ũcio matuĩrĩire gũkua. Ũhoro wa ma nĩ atĩ, Ngai aheire andũ watho nĩguo, mamenye mehia mao, no thĩna nĩ kũaga ũmenyo na kũhũthĩra watho mũgarũ.
Afarisai a matukũ maya-rĩ, o nao moĩ watho ũrĩa wandĩkĩtwo ta Afarisai acio a tene a Ibuku-inĩ Rĩa Ngai. Magĩrĩirwo nĩ kũmenya, wega wa Ngai, kĩhoto na ũmaa Wake. Magĩrĩirwo nĩ gũthomithio ũhoro-ũrĩa-mwega wa kũhonokania, nĩguo mahonokio.
Afarisai acio makiuga, “mũrutani, Musa atwĩrire tũhũre aka ta acio na mahiga nyuguto tũmorage: wee ũgũkiuga atĩa ũhoro wake?” Makĩmũria marĩ na mahiga na ũrũme mũnene. Meciragia Jesu ndakuona ũndũ wa gũcokia ũhoro-inĩ ũcio, ũguo metereire agũe mũtego-inĩ wao.
Korwo Jesu atuire cira kũringana na watho-rĩ, mangĩamũhũranĩirie na mũtumia ũcio na mahiga. Mendaga mamahũre eerĩ na mahiga. Korwo Jesu amerire matikamũhũre na mahiga-rĩ, mangĩamũtuĩrĩire kũagarara watho wa Ngai, na kũnyũrũria Ngai. Yarĩ njama njũrũ!
No Jesu akĩinama na akĩandĩka thĩ na kĩara, nao magĩthiĩ o na mbere kũmũria, “wee ũgũkiuga atĩa ũhoro wake? Nĩ kĩĩ ũrandĩka thĩ? Cokia ciũria citũ. Ũgũkiuga atĩa?” Magĩikara o makĩmũthĩnagia, maĩmuorotaga na ciara.
Nake Jesu akĩrũgama, akĩmera ũmwe wao ũrĩa ũtarĩ wehia, ambĩrĩre kũmũhũra na mahiga. Ningĩ akĩinamĩrĩra rĩngĩ na agĩthiĩ na mbere na kũandĩka thĩ. Maigua ũguo makĩhotwo nĩ cira thĩinĩ wa ngoro ciao, na magĩthiĩ mabĩrĩire na ũrĩa mũkũrũ nginya ũrĩa wa kũrigĩrĩria. Jesu agĩtigwo wiki na mũtumia ũcio arũngiĩ o hau gatagatĩ.
 
 
“Inyuĩ Ũrĩa Ũtarĩ Ehia-rĩ, Nĩakĩambe Amũikĩrie Ihiga.”
 
Mehia maandĩkagwo kũũ?
Maandĩkagwo ihengere- inĩ cia ngoro ciitũ, na Ibuku-inĩ rĩa ciĩko.
 
Jesu akĩmera atĩrĩ, “Inyuĩ ũrĩa ũtarĩ ehia-rĩ, nĩakĩambe amũikĩrie ihiga.” Na agĩthiĩ na mbere kwandĩka thĩ. Afarisai arĩa marĩ akũrũ, na marĩ na mehia maingĩ makĩambĩrĩria gũthiĩ, na o na arĩa marĩ akũrigĩrĩria o nao magĩthiĩ. Reke tuge atĩ, Jesu arũgamĩte gatagatĩ-inĩ gaitũ, na mũtumia ũcio o nake arĩ gatagatĩ gaitũ. Korwo Jesu nĩ ithuĩ erire ũguo-rĩ, nũũ, harĩ ithuĩ angĩambĩrĩire gũikia ihiga, wee-rĩ ũngĩekire atĩa?
Nĩ kĩĩ Jesu andĩkaga thĩ? Ngai ũrĩa watũmbire-rĩ, andĩkaga mehia maitũ kũndũ kwĩrĩ, mwanya.
Wambere andĩkaga mehia maitũ ihengere-inĩ cia ngoro ciitũ. “Atĩrĩrĩ, mehia ma Juda mandĩkĩtwo na karamu ga kĩgera, o na magakururwo na mũthia wa kahiga karĩa getagwo arimathi; ĩĩ ti-itheru makururĩtwo ihengere-inĩ ciao cia ngoro, o na magakururwo hĩa-inĩ cia igongona ciao.” (Jeremia 17:1).
Ngai aratwarĩria na Juda, Juda arĩ we ũtũrũgamĩrĩire. Mehia ma kĩrĩndĩ mandĩkagwo na karamu ga kĩgera, na mũthia mũũgĩ wa kahiga karĩa getagwo arimathi. Mandĩkagwo ihengere-inĩ cia ngoro ciitũ. Jesu akĩinamĩrĩra na akĩandĩka thĩ, andũ othe nĩ ehia.
Ngai nĩoĩ atĩ nĩtwĩhagia, na nĩ andĩkaga mehia maitũ ihengere-inĩ cia ngoro ciitũ. Wambere andĩkaga ciĩko ciitũ, mehia marĩa twĩkĩte, nĩũndũ ithuĩ-rĩ tũtirĩ hinya harĩ watho. Rĩrĩa mehia maitũ mandĩkwo ngoro-inĩ ciitũ, na twarora watho, tũkameya atĩ tũrĩ ehia. Na tondũ Ngai nĩandĩkĩte mehia maitũ ngoro-inĩ ciitũ, thamiri ciitũ citũĩraga atĩ, tũrĩ ehia mbere yake.
Na Jesu akĩinamĩrĩra rĩngĩ, akĩandĩka rĩngĩ thĩ. Mandĩko nĩ maratwĩra atĩ, mehia mothe mandĩkagwo Ibuku-inĩ rĩa ciĩko mbere ya Ngai. (Kũguũrĩrio 20:12). Rĩtwa rĩa mũndũ wothe, na mehia make mandĩkĩtwo Ibuku-inĩ rĩu. Na nĩ mandĩkĩtwo ihengere-inĩ cia ngoro ya o mũndũ. Mehia maitũ mandĩkĩtwo Ibuku-inĩ rĩa ciĩko, na ihengere-inĩ cia ngoro ciitũ.
Mũndũ arĩ mũkũrũ, o na kana arĩ mũnyinyi-rĩ, mehia make mandĩkagwo ihengere-inĩ cia ngoro yake. Nĩkĩo Afarisai magire ũndũ wa kuuga mbere ya Jesu. Meendaga kũhũra mũtumia ũcio na mahiga, nĩmaremirwo nĩ ũndũ wa ciugo icio cia Mwathani Jesu.
 
Nĩ-rĩ mehia macio maitũ
mandĩkĩtwo kũndũ kũu kwerĩ
mathambagio
Nĩ rĩrĩa twetĩkia ũhonokio wa
maĩ na thakame ya Jesu
ngoro-inĩ ciitũ.
 
No rĩrĩa twamũkĩra ũhonokio, mehia maitũ mothe marĩa mandĩkĩtwo Ibuku-inĩ rĩa maũndũ marĩa manekwo, magatherio mothe, na rĩtwa rĩaku rĩkandĩkwo Ibuku-inĩ rĩa muoyo. Andũ arĩa marĩtwa mao mandĩkĩtwo Ibuku-inĩ rĩa muoyo, nĩo makaingĩra Matu-inĩ. Wĩra mwega manaruta na maũndũ mothe maneka, nĩũndũ wa Ũthamaki wa Ngai na Ũthingu Wake, o na maũndũ macio mandĩkĩtwo Ibuku-inĩ rĩu rĩa muoyo. Na nĩmetĩkĩrĩtwo mũciĩ wa Matu-inĩ. Arĩa mahonoketio kuuma mehia-inĩ mao nĩo makaingĩra mũciĩ ũcio wa tene na tene.
Ririkana atĩ, mehia ma andũ mandĩkĩtwo kũndũ kwĩrĩ, ũguo gũtirĩ mũndũ ũngĩhenia Ngai. Gũtirĩ mũndũ o na ũmwe ũtarĩ wehia kana agatharia, ngoro-inĩ yake. Andũ othe nĩ mehagia na nĩahũthũ.
Arĩa matetĩkĩrĩte ũhonokio wa Jesu ngoro-inĩ ciao-rĩ, no mĩnyamaro ya mehia mao. Na o ene matiĩtĩkĩtie. Nĩ metigagĩra andũ na Ngai, nĩũndũ wa wĩhia wao. No, metĩkĩra ũhoro-ũrĩa-mwega wa ũhonokio wa maĩ na Roho, ngoro-inĩ cioa-rĩ, mehia marĩa mandĩkĩtwo ihengere-inĩ cia ngoro ciao, na Ibuku rĩa maũndũ marĩa manekwo-rĩ, magathario biũ. Makahonokio mehia-inĩ mao mothe.
Nĩ kũrĩ Ibuku rĩa Muoyo Matu-inĩ. Na marĩtwa ma arĩa metĩkĩtie ũhonokio wa maĩ na Roho-rĩ, mandĩkĩtwo Ibuku-inĩ rĩu rĩa muoyo, na nĩ ũndũ ũcio-rĩ, nĩ makaingĩra Matu-inĩ. Matikaingĩra Matu-inĩ tondũ matirĩ mehia, no nĩgũkorwo nĩ mahonoketio mehia-inĩ mao mothe, na wĩtĩkio wa maĩ na Roho. Nĩ rĩrĩ, “nĩ watho ũrĩa wa wĩtĩkio” (Aroma 3:27).
Endwa akwa Akristiano, andĩki marũa na Afarisai-rĩ, marĩehia o ta mũtumia ũcio wanyitĩtwo agĩtharia.
Ũũma nĩ atĩ, no gũkorwo nĩmehĩtie mũno, tondũ, mahenagia andũ, na mekehenia atĩ matirĩ mehia. Atongoria andini marĩ atunyani ahe marũa. Marĩ atunyani a mĩoyo, na rĩtwa rĩngĩ aici a muoyo. Megeragia kũrutana na gĩthũri, na o ene matiahonoketio.
Gũtirĩ mũndũ, o na ũmwe ũtarĩ mehia, kũringana na mandĩko ma watho. No-rĩ, mũndũ no atuĩke mũthingu, no ti atĩ ndarĩ ehia, no nĩũndũ nĩahonoketio kuuma mehia-inĩ make mothe. Rĩtwa rĩa mũndũ ũcio nĩ rĩandĩke Ibuku-inĩ, rĩa Muoyo. Ũndũ ũrĩa wa bata mũno, nĩ kũmenya kana hihi rĩtwa rĩa mũndũ nĩ rĩandĩke Ibuku-inĩ rĩa Muoyo.
Gwĩtĩkĩrĩka gwaku Matu-inĩ-rĩ, kũraringana na ũhoro ũrĩa wĩtĩkĩtie, kana hihi nĩ wa ma kana aca. Nĩguo wamũkĩre wega wa Ngai-rĩ, kũraringana kana hihi nĩ wĩtĩkĩrĩte ũhonokio wa Jesu. Kwahanĩkire atĩa kũrĩmũtumia ũrĩa wanyitĩtwo agĩtharia. Angĩaturirie maru, na ahinge maitho, etereire gũkua, tondũ oĩ nĩagũkua. No gũkorwo nĩ arĩraga ena guoya na kwĩrira mũno. Andũ matuĩkaga ehokeku rĩrĩa mehakuhĩ gũkua.
“Ũũi! Ngai nĩ wega ngue! Amũkĩra muoyo wakwa moko-inĩ maku na ũnjiguĩre tha. Ndakũhoya njiguĩra tha, Jesu.” Mũtumia ũcio ahoire Jesu amũhonokie nĩũndũ wa wendo wake. “We Ngai itua rĩaku nĩ rĩa kĩhoto harĩ niĩ, ũguo wauga ndirĩ na mehia, ndirĩ na mehia na mehia makwa nĩ magũthabio. No we wiki tu.” No kũhoteke mũtumia ũcio nĩoigaga maũndũ macio hĩndĩ ĩo. Na noakorwo nĩ aumbũrire maũndũ macio akĩmaneana harĩ Jesu.
Mũtumia ũcio warehetwo harĩ Jesu-rĩ, ndoigire, “nĩ njĩhĩtie, wenda njohera nĩ ũndũ wa ũthaaria wakwa.” Augire atĩ, “nĩ ũndũ wa kwenda gwaku honokia mehia-inĩ makwa mothe. Wahonokia, nĩ ngũhonoka. Wagakũhokia nĩ ngũthiĩ iherero-inĩ rĩa mwaki. Nĩ ngwenda ũhonokio waku. Nĩ ngwenda wendo wa Ngai, na tha ciake.” Mũtumia ũcio ahingĩte maitho hĩndĩo akiumbũra wĩhia wake wothe.
Nake Jesu akĩmũũria, “me ha mũtumia ũyũ? Anga gũtirĩ mũndũ wagũtuĩra?” nake akiuga “Gũtirĩ mũthuri.”
Nake Jesu akĩmwĩra atĩrĩ, “na niĩ ndigũgũtuĩra.” Jesu ndamũtuĩrĩire nĩũndũ nĩarĩkĩtie gũĩtĩkĩra mehia ma mũtumia ũcio mothe rĩrĩa abatithirio rũĩ-inĩ rwa Jorodani, nĩũndũ ũcio mũtumia ũcio nĩahonoketio. Na rĩu Jesu, nĩwe wagĩrĩirwo nĩ gũtuĩrwo, na ti mũtumia ũcio.
 
 
Akĩmwĩra, “Na Niĩ Ndigũgũtuĩra”
 
Mũtumia ũcio nĩ
atuĩrĩirwo nĩ Jesu?
Aca!
 
Mũtumia ũcio nĩ arathimirwo na kĩrathimo kĩa ũhonokio wa Jesu. Athabirio mehia make mothe biũ. Mwathani Jesu aratũĩra atĩa, nĩathabĩtie mehia maitũ mothe na akarĩkia gũtũtua athingu, ithuothe.
Nĩguo aratũĩra Ibuku-inĩ rĩa Ngai. Akuire mũtharaba-inĩ nĩguo arĩhe thirĩ wa mehia maitũ, marĩa akuire rĩrĩa abatithirio rũĩ-inĩ rwa Jorodani. Atwĩrĩte wega atĩ, nĩatheretie arĩa othe metĩkĩtie ũbatithio wake, na gũkua gwake mũtharaba-inĩ. Ithuĩ ithuothe-rĩ, nĩtũbatarĩtio nĩ kiugo kĩrĩa kĩandĩke kĩa Jesu, na tũtũre na kĩo. Na nĩ tũkũrathimwo na ũhonokio.
“Ngai, ndiirĩ wega ingĩrũgamia mbere Yaku. O na thĩinĩ wakwa gũtirĩ wega ũngĩoneka. Ndiirĩ kĩndũ ingĩonania, tiga o mehia makwa. No nĩ njĩtĩkĩtie Jesu, arĩ Mwathani wa ũhonokio. Akuuire mehia makwa mothe rũĩ-inĩ rwa Jorodani, na akĩmathambia mũtharaba-inĩ. Oire mehia makwa mothe na ũbatithio Wake na thakame Yake. Nĩngũĩtĩkĩtie Mwathani.”
Ũũ nĩguo ũhonokagio. Jesu ‘ndatũtuagĩra cira.’ Atũhotithagia gũtuĩka ciana cia Ngai. Andũ arĩa metĩkĩtie, ũhonokio wa maĩ na Roho-rĩ, nĩakuuire mehia mao mothe na akĩmatua athingu.
Endwa akwa! Mũtumia ũcio nĩ ahonokirio. Mũtumia ũcio wanyitĩtwo agĩtharia-rĩ, nĩ arathimirwo na ũbatithio wa Mwathani Jesu. O na ithuĩ-rĩ, no tũtuĩke akũrathimwo ũguo. Mũndũ ũrĩa ũĩ mehia make-rĩ, ahoyaga Ngai amũiguĩre tha, na agetĩkia ũhonokio wa maĩ na Roho wa Jesu, na nĩ arathimagwo na ũhonokio wa Ngai. Arĩa metĩkĩraga mehia mao, mbere ya Ngai-rĩ, nĩ mahonokagio, no arĩa magaga kuona mehia mao-rĩ, acio matingĩrathimwo na ũhonokio.
Jesu nĩ akuuire mehia ma kĩrĩndĩ (Johana 1:29). Mũndũ o wothe no ahonokio, angĩtĩkia Jesu. Jesu akĩĩra mũtumia ũcio atĩrĩ, “na niĩ ndigũgũtuĩra.” Amwĩrire ndakũmũtuĩra tondũ nĩ akuuire mehia ma mũtumia ũcio mothe, rĩrĩa abatithirio. Akuuire mehia maitũ mothe na agĩtuĩrwo nĩũndũ wa mo ithenya ritũ.
 
 
Nĩ Twagĩrĩirwo Nĩ kũhonokio Mbere Ya Jesu.
 
Nĩ kĩĩ kĩnene, nĩ wendo wa
Ngai kana nĩ cira wa Ngai?
Nĩ wendo wa Ngai
 
Afarisai maakuĩte mahiga na moko, o na atongoria a ndini ũmũthĩ mataũraga watho na ndemwa. Metĩkĩtie atĩ ũrĩa watho wandĩkĩtwo, ndũgatharie, ũrĩa watharia agĩrĩirwo nĩ kũũragwo na mahiga. Nao meroragĩra atumia marĩ na merirĩria, no magatua atĩ ũcio ti ũtharia. Ũguo matingĩkũũrwo, kana mahonokio. Afarisai na andĩki marũa marĩ andũ marĩ na mĩtugo mĩega mũno ya gũkũ thĩ. O ti o Jesu etire. Matiaiguire Jesu akiuga, “na niĩ ndigũgũtuĩra.”
No mũtumia ũcio wanyitĩtwo agĩtharia waiguire ciugo icio cia thayũ na kĩrĩgĩrĩro. O nawe ũngĩtuĩka mwĩhokeku mbere yake-rĩ, no ũrathimwo ta mũtumia ũcio. “Ngai, ndingĩhota kwaga gũtharia mũtũrĩre-inĩ ũyũ. Ndionaga tarĩ ũndũ nĩ tondũ wa kũmenyera. Njĩkaga mehia macio maita maingĩ o mũthenya.”
Rĩrĩa twetĩkia watho na ũma atĩ, tũrĩ ehia, na atĩ twagĩrĩirwo nĩ gũkua, twenyihia mbere ya Ngai, tũkiugaga, “Ngai ũũ nĩguo hana. Na wendo waku honokia.” Ngai nĩ agũtũrathima na ũhonokio wake.
Wendo wa Jesu, ũhoro-ũrĩa-mwega wa maĩ na Roho, nĩ ũhotanĩte igũrũ rĩa cira wa Ngai wa kĩhoto. “Na niĩ ndinagũtuĩra.” Mwathani witũ, Jesu Kristo nĩ Ngai ũrĩ tha. Aatũhonokirie mehia-inĩ ma kĩrĩndĩ.
Ngai witũ nĩ Ngai wa kĩhoto, na nĩ Ngai wa wendo. Wendo wa maĩ na Roho nĩ mũnene kũrĩ cira wake wa kĩhoto.
 
 
Wendo Wa Ngai Nĩ Mũnene Kũrĩ Itua Rĩake.
 
Nĩ kĩĩ gĩatũmire
atũhonokie ithuĩ, ithuothe?
Tondũ wendo wake nĩ mũnene
kũrĩ itua Rĩake.
 
Korwo Ngai ahũthagĩra hinya gũtũtuĩra cira wa kĩhoto gĩake-rĩ, angĩatũtuĩrĩire gũikio iherero rĩa mwaki ehia othe. No nĩ ũndũ wa wendo wa Jesu, ũrĩa ũtũhonoketie kuumana na itua rĩu-rĩ, nĩ mũnene, Ngai aatũmire mũrũ wake wa mũmwe, Jesu. Jesu akuuire mehia maitũ mothe, na agĩtuĩrwo nĩũndũ wa mehia maitũ. Rĩu, ũrĩa wothe wĩtĩkĩtie Jesu ta mũhonokia atuĩkaga mwana wake mũthingu. Na tondũ wendo wake nĩ mũnene kũrĩ kĩhoto gĩake-rĩ, atũhonoketie ithuothe.
Twagĩrĩirwo nĩ gũcokeria Ngai ngatho nĩ tondũ to cira wa kĩhoto atũtuagĩra. Rĩmwe Jesu erire andĩki marũa na Afarisai na arutwo ao atĩrĩrĩ, “thiĩi mũkerute gĩtũmi gĩa ciugo ici: ũrĩa nyendaga nĩ tha, tiga igongona; nĩgũkorwo ndiũkĩte gwĩta andũ arĩa athingu, no arĩa ehia” (Mathayo 9:13). Andũ amwe no makorwo makĩrutaga magongona ma ng’ombe na mbũri mbere ya Ngai o mũthenya, makahoya, “Ngai njohera mehia makwa ma o mũthenya,” Ngai ndarenda magongona maitũ, no nĩ wĩtĩkio witũ wa ũhonokio wa maĩ na Roho. Endaga tũhonokio na tũkũrwo. Enandaga gũtũhe wendo wake, na wĩtĩkio witũ wĩtĩkĩrĩke nĩwe. Inyuothe nĩmũkuona ũguo? Jesu atũhete ũhonokio wake mũkinyanĩru.
Jesu nĩ athũire mehia, no nĩendete andũ mũno, arĩa mobĩtwo na mũhanĩre wa Ngai. Nĩ aabangĩte mbere ya gũtũmba, gũtũtua ciana ciake, na gũtũthabia mehia maitũ mothe, na ũbatithio wake na thakame yake. Ngai aatũmbire, acooke atũhonokie na atũhumbe Jesu, na atũtue ciana ciake. Ũyũ nĩguo wendo ũrĩa atwendete naguo, ithuĩ ciũmbe ciake.
Korwo Ngai no atũtuĩre cira na watho wake wa kĩhoto, ithuĩ ehia-rĩ, ithuothe no tũkuire. No nĩ atũkũrĩte na ũbatithio na kwambwo kwa mũrũwe mũtharaba-inĩ. Wee-rĩ, nĩ wĩtĩkĩtie? Reke twĩkĩre ũira kuuma Kĩrĩkanĩro-inĩ Kĩrĩa Gĩa Tene.
 
 
Harũni Aaigagĩrĩra Moko Make Merĩ Mũtwe-inĩ Wa Thenge Ĩrĩa Ĩrĩ Muoyo
 
Nũũ, wanengeragĩrĩria mehia mothe ma ciana cia Isireali harĩ thenge ĩrĩa yarĩ muoyo arĩ mũrũgamĩrri wao?
Nĩ mũthĩnjĩri Ngai mũnene.
 
Wĩhia wothe wa kĩrĩndĩ, waninagwo na mũbango, ũrĩa wa Kĩrĩkanĩro Kĩrĩa Gĩa Tene, na ũbatithio wa Kĩrĩkanĩro Kĩrĩa Kĩerũ. Kĩrĩkanĩro-inĩ Kĩrĩa Gĩa Tene-rĩ, mehia ma mwaka ma ciana cia Isiraeli matheragio na kũigĩrĩrwo moko mũtwe wa thenge ĩrĩa ĩrĩ muoyo nĩ mũthĩnjĩri Ngai Mũnene, na ĩkorwo ĩrĩ ya mwĩrĩ ũmwe.
“Ningĩ harũni aigĩrĩre moko make merĩ mũtwe wa thenge ĩo ĩrĩ muoyo, acoke oimbũrĩre waganu wothe wa ciana cia Isiraeli hau ĩrĩ, o na ũhoro wacio wothe wa kwagarara watho, naguo ũguo nĩ ta kuuga mehia macio mothe, akĩmĩcokererie maũndũ macio o igũrũ rĩa mũtwe wayo, acoke amĩnengere mũndũ ũrĩa ũrũgamĩte ho ũrĩa ũthurĩirwo wĩra ũcio akĩrekie thenge ĩo kũu werũ-inĩ ĩĩthiĩre,” (Maũndũ ma Alawii 16:21).
Ũũ nĩguo wĩhia watheragio matukũ-inĩ ma Kĩrĩkanĩro Kĩrĩa Gĩa Tene. Nĩguo mũndũ oherwo mehia make ma o mũthenya, mũndũ arehaga mbũri ya mwĩrĩ ũmwe hema-inĩ-ya gũtũnganwo ĩrutwo kĩgongona-inĩ. Acoke aigĩrĩre moko mũtwe wa nyamũ ĩo ya ihaki rĩa njino, ĩcoke ĩthĩnjwo, nake mũthĩnjĩri Ngai oe thakame yayo aminjaminjĩrie igũrũ rĩa kĩgongona kĩrĩa kĩarĩ mũromo-inĩ wa hema-inĩ-ya gũtũnganwo.
 Kwarĩ na hĩa kona-inĩ inya, ciarĩ kĩgongona kĩrĩa kĩarĩ mũromo-inĩ. Hĩa icio cihananĩtio na Ibuku rĩa maũndũ marĩa manekwo, rĩrĩa rĩandĩkĩtwo thĩinĩ Kũguũrĩrio 20:12. Thakame ya ihaki ĩrĩa yatigaraga yaminjaminjagĩrio thĩ. Thĩ ĩrũgamĩrĩire ngoro ya mũndũ, tondũ mũndũ ombĩtwo na rũkũngũ. Ũũ nĩguo andũ mohagĩrwo mehia mao ma o mũthenya.
Na tondũ matingĩahotire kũrutaga magongona o mũthenya, Ngai akĩmetĩkĩria marutage igongona rĩa ũhorohia wa mehia harĩ mwaka rita rĩmwe. Ũndũ ũyũ wekagwo mũthenya wa ikũmi mweri-inĩ wa mũgwanja, nĩguo warĩ mũthenya wa kũhorohia. Mũthenya ũcio, mũthĩnjĩri Ngai ũrĩa mũnene aarũgamaga ithenya-inĩ rĩa ciana cia Isiraeli, agacoka agoka na thenge igĩrĩ, agacigĩrĩra moko mĩtwe agacinengereria mehia mothe ma andũ, na agacoka agacirutĩra Ngai cirĩ ihaki rĩa gũtheria andũ a Isiraeli.
“Ningĩ harũni aigĩrĩre moko make merĩ mũtwe wa thenge ĩo ĩrĩ muoyo, acoke oimbũrĩre waganu wothe wa ciana cia Isiraeli hau ĩrĩ, o na ũhoro wacio wothe wa kwagarara watho, naguo ũguo nĩ ta kuuga mehia macio mothe, akĩmĩcokererie maũndũ macio o igũrũ rĩa mũtwe wayo.”
Ngai nĩ aamũrĩte harũni, ta mũthĩnjĩri Ngai mũnene, wa andũ a Isiraeli, amarũgamĩrĩre. Handũ ha mũndũ o wothe kũigĩrĩra moko make harĩ mbũri ya ihaki we mwene, mũthĩnjĩri Ngai ũcio akamũrũgamĩrĩra, akaigĩrĩra moko make merĩ mũtwe wa thenge ĩo ĩrĩ muoyo nĩũndũ wa gũtheria mehia ma mwaka.
Akaumbũra waganu wothe wa ciana cia Isiraeli mbere ya Ngai, “ũi Ngai, ciana ciaku, Isiraeli nĩ ciĩhĩtie. Nĩ cinamĩrĩire mĩhianano, makagarara watho waku, makagweta rĩtwa rĩaku na itherũ, magethondekera mĩhianano na makamĩenda kũrĩ wee. Nĩ twagĩte kũiga mũthenya wa thabatũ ũrĩ mũtheru, tũkaga gũtĩa aciari, tũkoragana, tũgatharia na tũkaiya…. Tũkoragwo na rũitho na ngũĩ.”
Akaumbũra mehia mao mothe, “Ngai, ti ciana cia Isiraeli o kana niĩ tũhote kwaga kwagarara watho o na ũmwe waku. Nĩguo tũtherio mehia maitũ mothe, nĩ ndaigĩrĩra moko makwa merĩ mũtwe-inĩ wa thenge ĩno, njokererie mehia macio mothe harĩyo.” Mũthĩnjĩri Ngai aigĩrĩre moko make harĩ ihaki rĩu nĩũndũ wa mehia ma andũ othe, na akamĩnengereria maũndũ macio mothe mũtwe wa ihaki. Igongona o na kana kũigĩrĩrwo moko nĩũndũ ũmwe na kũigĩrĩra, kũnengereria. (Maũndũ ma Alawii 1:1-4, 16:20-21)
 
 
Nĩ ũndũ ũrĩkũ wekagwo
Kĩrĩkanĩro Kĩrĩa Gĩa Tene nĩũndũ
wa gũtheria mehia?
Nĩ kũigĩrĩrwo kwa moko
ihaki-inĩ rĩa mehia
 
Ngai nĩahete ciana cia Isiraeli mũbango wa kũruta magongona, na kũigĩrĩra mehia ihaki-inĩ, nĩguo matherio. Na nĩamerĩte atĩ, ihaki rĩa mehia rĩkorwo nĩ rĩa ũhiũ wa mwĩrĩ ũmwe, ũcoke ũragwo handũ-inĩ ha mũndũ. Ũguo nĩguo o mũndũ ahonokagio.
Mũthenya ũcio wa kũhorohio-rĩ, ihaki rĩa mehia rĩatthĩnjagwo, nayo thakame ĩkaingĩrio handũ hau hatheru, ĩkaminjaminjĩrio hau thĩ mbere ya gĩikaro-gĩa-tha maita mũgwanja. Nao andũ acio a Isiraeli maahorohagĩrio mehia rita rĩmwe harĩ mwaka, mweri-inĩ wa mũgwanja, mũthenya wa ikũmi.
Mũthĩnjĩri Ngai ũrĩa mũnene, akaingĩra handũ hau hatheru arĩ wiki, nĩguo arute igongona, nao andũ acio angĩ a Isiraeli matigwo hau njaa, mathikĩrĩirie ngengere cia thahabu iria ciarĩ runo-inĩ rwa nguo ya gaitani ya mũthĩnjĩri Ngai, nacio ngengere iciĩo ikarĩra
Maita mũgwanja. Thakame yaminjainjagĩrio gĩikaro-gĩa-tha maita mũgwanja, nacio ngengere icio cia thahabu cikarĩra o rita thakame yaminjĩrio hau. Nao andũ magakena mamenya atĩ, mehia mao nĩmahorohio. Mũgambo ũcio wa ngengere icio cia thahabu ũronania mũgambo wa ũhoro ũrĩa mwega wa gĩkeno.
Ti ũhoro wa ma atĩ Jesu acagũraga andũ amwe, na akahonokia o acio. No nĩ atĩ, Jesu akuuire mehia mothe ma kĩrĩndĩ, o rĩmwe, rĩrĩa abatithirio. Endaga gũtũkũra ithuothe o rĩmwe. Mehia matitheragio o mũthenya, matheririo mothe o rĩmwe.
Kĩrĩkanĩro-inĩ Kĩrĩa Gĩa Tene, ũhorohio wa mehia warutagwo na thakame ya ihaki rĩa mehia. Harũni aigĩrĩre moko make merĩ mũtwe-inĩ wa thenge ĩo ĩrĩ muoyo, mbere ya andũ othe acoke oimbũre waganu wothe wa ciana cia Isiraeli wa mwaka ũmwe. Akaigĩrĩra thenge ĩo mehia mothe ma ciana cia Isiraeli mbere yao. Mehia ma ciana cia Isiraeli-rĩ, maathiaga kũ thutha wa mũthĩnjĩri Ngai kũigĩrĩra moko make mũtwe wa thenge ĩo ĩrĩ muoyo? Maaigagĩrĩrwo harĩ thenge ĩo.
Ĩcoke thenge ĩo ĩrĩ muoyo ĩnengerwo mũndũ ũrĩa ũthurĩirwo wĩra ũcio. Thenge ĩo ĩkuuĩte mehia mothe ma ciana cia Isiraeli, amĩtware werũ-inĩ, amĩrekie kuo, kũrĩa gũtarĩ na maĩ o na kana nyeki. Thenge ĩo ĩcoke ĩkuĩre kũu werũ-inĩ ĩna mehia ma ciana cia Isiraeli.
Ũyũ nĩ wendo wa Ngai, wendo wa ũhonokio. Ũũ nĩguo mahorohagĩrio mehia mao ma mwaka hĩndĩ ĩo.
No ithuĩ tũraikara matũkũ maya ma Kĩrĩkanĩro-inĩ-Kĩrĩa-Kĩerũ. Na nĩ mĩaka 2,000 kuma rĩrĩa Jesu arĩ gũkũ thĩ. Agĩũka akĩhingia Kĩrĩkanĩro-inĩ-Kĩrĩa–Gĩa–Tene. Agĩtũthabia mehia maitũ mothe.
 
 
Gũtũhonokia Ithuĩ Ithuothe
 
Rĩĩtwa JESU nĩ kuuga atĩa?
Mũhonokia wa kũhonokia andũ
ake kuuma mehia-inĩ mao
 
Nĩ tũthome Mathayo 1:20-21. “Na hĩndĩ ĩrĩa eciragia maũndũ macio, atĩrĩrĩ, mũraika wa mwathani akĩmumĩrĩra kĩroto-inĩ, akĩmwĩra atĩrĩ, Jusufu mũrũ wa Daudi, ndũgetigĩre kũhikia Mariamu atuĩke mũtumia waku tondũ-rĩ, ihu rĩu arĩ na rĩo narĩo nĩ rĩa Roho Mũtheru. Nake nĩagũciara kahĩĩ, nako nĩ ũgagatua Jesu, nĩ ũndũ nĩwe ũkahonokia andũ ake kuma mehia-inĩ mao.” (Mathayo 1:20-21)
Ithe witũ wa matu-inĩ ahoire mwĩrĩ wa bikira Mariamu nĩguo atũme mũrũ wake gũkũ thĩ, oke athabie mehia ma kĩrĩndĩ. Agĩtũma Mũraika ere Mariamu atĩrĩ, “na atĩrĩ, nĩũkũgĩa ihu, ũciare kahĩĩ, nako nĩũgagatuua JESU.” Nĩ kuuga atĩ mũrũ wake agoka na njĩra ya Mariamu atuĩke mũhonokia. Rĩtwa rĩa Jesu Christo nĩ kuuga mũhonokia wa andũ ake kuma mehia-inĩ mao, na rĩtwa rĩngĩ nĩ mũhonokia.
Na Jesu atũhonketie atĩa kuma mehia-inĩ maitũ? Ũrĩa Jesu akuuire mehia mothe ma kĩrĩndĩ na kũbatithio gwake nĩ Johana rũĩ-inĩ rwa Jorodani. Rĩrĩa Johana Mũbatithania amũbatithirie, amũigĩrĩire mehia mothe ma kĩrĩndĩ. Nĩ tũthome Mathayo 3:13-17.
“Hĩndĩ ĩo Jesu nĩomire Galili, agĩthiĩ Jorodani kũrĩ Johana, akabatithio nĩwe. Nake Johana nĩendaga kũmũgiria, akĩmũria, Niĩ-rĩ nĩnjagĩrĩirwo nĩ kũbatithio nĩwe, nawe ũgũũka kũrĩ niĩ atĩa? Nake Jesu akĩmũcokeria akĩmwĩra atĩrĩ, njĩtĩkĩria rĩu, tondũ ũguo nĩguo twagĩrĩirwo nĩ kũhingia maũndũ mothe marĩa merekanĩrĩirio na ũthingu. Hĩndĩ ĩo akĩmwĩtĩkĩria. Nake Jesu aarĩkia kũbatithio akiumĩra o rĩmwe maĩ-inĩ, na atĩrĩrĩ, Igũrũ rĩkĩhingũka, akĩona Roho wa Ngai agĩikũrũka ta ndutura, akĩũmba igũrũ rĩake. Na atĩrĩrĩ mũgambo ũkiuma Igũrũ, ũkiuga, ũyũ nĩwe mũrũ wakwa nyendete mũno, nĩngenaga nĩ ũndũ wake.”
Jesu aathiire kũrĩ Johana Mũbatithania nĩguo atũhonokie ithuothe kuma mehia-inĩ maitũ. Agĩtonya maĩ-inĩ akĩinamia mũtwe wake mbere ya Johana. “Johana batithia rĩu, nĩ ũndũ, ũguo nĩguo twagĩrĩirwo nĩ gwĩka nĩguo tũhingie maũndũ marĩa mothe merekanĩrĩirio na ũthingu. Nĩ ũndũ nĩnjagĩrĩirwo nĩ gũkuua mehia mothe ma kĩrĩndĩ na honokie ehia othe, kuma mehia-inĩ mao, njagĩrĩirwo nĩ gũkuua mehia na kũbatithio. Batithia rĩu! Ĩtĩkĩra!”
Tondũ ũguo nĩguo twagĩrĩirwo nĩ kũhingia maũndũ mothe merekanĩrĩirio na ũthingu. Jesu abatithĩirio rũĩ-inĩ rwa Jorodani nĩ Johana Mũbatithania, na ihinda rĩu, maũndũ marĩa mothe merekanĩrĩirio na ũthingu wa Ngai-rĩ, makĩhingio, na ũguo nĩguo twahonokirio mehia-inĩ.
Ũũ nĩguo akuire mehia maitũ. Mehia mothe maku-rĩ o na mo Jesu agĩkuithio. Nĩũĩ ũguo?
Ĩtĩkia ũhonokio, wa ũbatithio wa Jesu na Roho na nĩ ũkũhonokio.
 
maũndũ mothe marĩa merekanĩrĩirio na ũthingu-
rĩ maahingirio atĩa?
Na ũbatithio wa Jesu
 
O kĩambĩrĩria-inĩ-rĩ, Ngai nĩ eerĩte ciana cia Isiraeli ũrĩa wĩhia wakĩrĩndĩ ũrĩhoruhagio, na kũigĩrĩrwo kwa moko na ihaki rĩa mehia rĩgacoka rĩgathĩnjwo. No gũtingĩahotekire atĩ, o mũndũ wothe aigĩrĩre moko make mũtwe-inĩ wa thenge, nĩ ũndũ ũcio-rĩ, Ngai nĩamũrĩte Harũni arĩ we mũthĩnjĩri Ngai, nĩguo akarutĩra andũ othe igongona. Ũguo akaigĩrĩra wĩhia wothe wa mwaka mũtwe-inĩ wa ihaki rĩa mehia o rĩmwe. Ũyũ warĩ ũũgĩ wa Ngai na hinya wa ũhonokio. Ngai nĩ mũgĩ, na nĩ wa magegania.
Aatũmire mũrũ wake wa mũmwe, Jesu, nĩguo ahonokie kĩrĩndĩ gĩothe. Ũguo ihaki rĩa mehia rĩrĩa aharĩirie. Na rĩu no nginya kũngĩagĩire na mũndũ wa wa kũrũgamĩrĩra andũ othe, arĩ we Johana Mũbatithania. Nĩ kwandĩkĩtwo Ibuku-inĩ Rĩa Ngai, atĩ Ngai nĩ atũmire mũndũ ũcio mũrũgamĩrĩri wa kĩrĩndĩ mbere ya Jesu.
Arĩ Johana Mũbatithania, mũthĩnjĩri Ngai wa mũico. Ta ũrĩa kwandĩkĩtwo thĩinĩ wa Mathayo 11:11, “kũrĩ arĩa maanaciarwo nĩ andũ-anja, gũtirĩ kwagĩa mũnene kũrĩ Johana Mũbatithania.” No we tu mũrũgamĩrĩri wa kĩrĩndĩ. Aatũmire Johana ta mũrũgamĩrĩri andũ othe nĩguo abatithie Jesu, amũigĩrĩre mehia mothe ma kĩrĩndĩ.
Korwo andũ billioni 6 a thĩ yothe no mathiĩ kũrĩ Jesu, na o mũndũ amũigĩrĩre moko, kũneana mehia mao-rĩ, mũtwe wake ũngĩhana atĩa? Korwo andũ makĩria ma billion 6 no maigĩrĩre moko mao harĩ Jesu, ũndũ ũcio ndũngĩkorwo ũrĩ mwega ũkĩonwo. Andũ aingĩ nĩũndũ wa kĩo, no mũhihinye mũtwe wake nginya mamũnye njuĩrĩ. Ũguo, Ngai akĩhũthĩra ũũgĩ wake agĩtũtũmĩra Johana Mũbatithania arĩ mũrũgamĩrĩri witũ, na akĩigĩrĩra mehia mothe ma kĩrĩndĩ harĩ Jesu, o rĩmwe nĩũndũ witũ ithuothe.
Nĩkwandĩkĩtwo Mathayo 3:13, “Hĩndĩ ĩo Jesu nĩomire Galili, agĩthiĩ Jorodani kũrĩ Johana, akabatithio nĩwe.” Haha nĩ rĩrĩa Jesu arĩ na mĩaka 30. Jesu aruithirio mũthenya wa 8, na kuma hau nĩ maũndũ manini ma mũtũrĩre wake mandĩkĩtwo o nginya rĩrĩa akinyirie mĩaka 30.
Gĩtũmi kĩa Jesu eterere akinyiie mĩaka 30 nĩguo atuĩke mũthĩnjĩri Ngai wa Matu-inĩ, na eke ũguo akĩhingia watho, ũrĩa ũrĩ Kĩrĩkanĩro-inĩ-Kĩrĩa–Gĩa–Tene. Thĩinĩ wa Ibuku rĩa Gũcokerithia Mathani, Ngai erire Musa, atĩ mũthĩnjĩri Ngai no nginya akinyie mĩaka nĩguo atuĩke wagũtungata ta mũthĩnjĩri Ngai. Jesu arĩ mũthĩnjĩri Ngai wa Matu-inĩ. Nĩwĩtĩkĩtie ũguo?
Kĩrĩkanĩro-inĩ-Kĩrĩa-Kĩerũ, Mathayo 3:13-14, ugĩte ũũ, “Hĩndĩ ĩo Jesu nĩomire Galili, agĩthiĩ Jorodani kũrĩ Johana, akabatithio nĩwe. Nake Johana nĩendaga kũmũgiria, akĩmũria, Niĩ-rĩ nĩnjagĩrĩirwo nĩ kũbatithio nĩwe, nawe ũgũũka kũrĩ niĩ atĩa?” Nũũ mũrũgamĩrĩri wa andũ? Nĩ Johana mũbatithania. Na nũũ mũthĩnjĩri Ngai wa Matu-inĩ? Nĩ Jesu Kristo. Arũgamĩrĩri erĩ magĩcemania. Na nũũ warĩ mũnene? Mũrũgamĩrĩri wa Matu-inĩ arĩ mũnene.
Na Johana mũbatithania, ũrĩa wanagĩrĩra na hinya akĩĩra atongoria a ndini a matukũ macio, “ciana ici cia nduĩra, mwĩrirei!” na thutha akĩĩnyihia mbere ya Jesu. “Niĩ-rĩ nĩnjagĩrĩirwo nĩ kũbatithio nĩwe, nawe ũgũũka kũrĩ niĩ atĩa?”
Hĩndĩo Jesu akĩmwĩra, atĩrĩ, “njĩtĩkĩria rĩu, tondũ ũguo nĩguo twagĩrĩirwo nĩ kũhingia maũndũ mothe marĩa merekanĩrĩirio na ũthingu.” Jesu okire gũkũ thĩ nĩguo ahingie maũndũ mothe marĩa merekanĩrĩirio na ũthingu wa Ngai, na ũkĩhingio hĩndĩo abatithirio nĩ Johana mũbatithania.
“Hĩndĩ ĩo akĩmwĩtĩkĩria. Nake Jesu aarĩkia kũbatithio akiumĩra o rĩmwe maĩ-inĩ, na atĩrĩrĩ, Igũrũ rĩkĩhingũka, akĩona Roho wa Ngai agĩikũrũka ta ndutura, akĩũmba igũrũ rĩake. Na atĩrĩrĩ mũgambo ũkiuma Igũrũ, ũkiuga, ũyũ nĩwe mũrũ wakwa nyendete mũno, nĩngenaga nĩ ũndũ wake.”
Ũũ nĩguo kwahanĩkire hĩndĩ ĩo abathirio. Iguru rĩkĩhingũka, rĩrĩa abatithirio nĩ Johana mũbatithania, na agĩthambia mehia mothe ma kĩrĩndĩ.
“Na gwata matuku ma Johana mũbatithania nginya rĩu, ũthamaki wa Igũrũ nĩũgiginyanagĩrwo, na arĩa agiginyani nĩo mawĩgwatagĩra na hinya.” (Mathayo 11:12)
Anabii othe na watho wa Ngai warathĩte nginya hĩndĩ ya Johana mũbatithania. “Na gwata matuku ma Johana mũbatithania nginya rĩu, ũthamaki wa Igũrũ nĩũgiginyanagĩrwo, na arĩa agiginyani nĩo mawĩgwatagĩra na hinya.” (Mathayo 11:12). Mũndũ o wothe angĩtĩkia ũbatithio wa Jesu, no atonye ũthamaki-inĩ wa Ngai hatarĩ nganja.
 
 
“O na Niĩ Ndinagũtuĩra”
 
Jesu ambirwo
mũtharaba-inĩ nĩũndũ wa kĩĩ?
Nĩũndũ nĩ akuuire mehia maitũ
ithuothe.
 
Jesu abatithirio nĩ Johana mũbatithania, na agĩkua mehia mothe ma kĩrĩndĩ. Na agĩcoka akĩĩra mũtumia ũcio wanyitĩtwo agĩtharia, “O na Niĩ ndinagũtuĩra.” Ndatuĩrĩire mũtumia ũcio nĩ tondũ we, nĩwe wakuuire mehia mothe ma kĩrĩndĩ, rĩrĩa abatithĩirio Jorodani, na nĩũndũ ũcio we no ti mũtumia nĩwe wagĩrĩirwo nĩ gũtuĩrwo nĩũndũ wa mehia macio.
Jesu athambirie mehia mothe ma kĩrĩndĩ. Nĩtũrona guoya ũrĩa aarĩ naguo nĩũndũ wa ruo rũrĩa arĩ omĩrĩrie mũtharaba-inĩ tondũ, ‘mũcara wa wĩhia nĩ gĩkuũ.’ Aahoire Ngai maita matatũ Kĩrĩma-inĩ kĩa Mĩtamaiyũ ehererio itua rĩa gĩkuũ gĩake.
O ta ũrĩa ihaki rĩathĩnjagwo rĩgaita thakame Kĩrĩkanĩro-inĩ-Kĩrĩa Gĩa Tene-rĩ, o nake no mũhaka angĩaitire thakame yake mũtharaba-inĩ. Nĩ akuuĩte mehia mothe ma kĩrĩndĩ na nĩ ũndũ ũcio, akĩruta muoyo wake nĩguo atũhonokie. Nĩ oĩ atĩ we nĩ akũũragwo mbere ya Ngai.
Jesu ndaarĩ na mehia ngoro-inĩ yake, no tondũ nĩ aigĩrĩirwo mehia mothe rĩrĩa abitithirio, Ngai no nginya angĩamũtuĩrĩire o na arĩ Mũrũ wake. Wambere kĩhoto kĩa Ngai gĩkĩhingio, na wakerĩ agĩtuonia wendo wa ũhonokio wake kũrĩ ithuĩ. Ũguo Jesu no mũhaka angĩakuire, na kwambwo mũtharaba-inĩ.
“O na niĩ ndinagũtuĩra kana gũgũcukĩra.” Mehia maitũ mothe, marĩa tũĩhagia tũkĩmenyaga, kana tũtakũmenya, marĩa tũĩ na tũtoĩ, mothe Ngai nĩ amatuĩrĩire.
No Ngai ndatũtuĩrĩire. Ngai atuĩrĩire Jesu, ũcio wakuuire wĩhia wothe, rĩrĩa abatithirio. Ngai ndendaga gũtuĩra ehia, nĩ tondũ wa wendo, na tha ciake. Ũbatithio, na thakame yake mũtharaba-inĩ, warĩ wendo wake wa ũhonokio. “Amu Ngai, tondũ wa ũrĩa endete kĩrĩndĩ gĩa gũkũ thĩ, nĩaarutire Mũrũ wake wa mũmwe, nĩ getha mũndũ o wothe ũmwĩhokete ndakore, no agĩe na muoyo wa tene na tene.” (Johana 3:16).
Ũũ nĩguo tũmenyagaa wendo wake. Jesu ndatuĩrĩire mũtumia ũcio wanyitĩtwo agĩtharia.
Mũtumia ũcio, nĩoĩ atĩ nĩ mwĩhia, nĩ tondũ anyitĩtwo agĩtharia. To ngoro yake ika yarĩ na mehia, no nĩ nginya ciĩko ciake cia mwĩrĩ. Ndangĩahotire gũkana mehia make. No tondũ nĩetĩkirie atĩ, Jesu nĩakuuire mehia make, nĩ ahonokirio. O na ithuĩ tũngĩtĩkia ũhonokio wa Jesu, nĩ tũkũhonokio. Wĩtĩkia! Nĩ wa gũtũteithia.
 
Nĩ a, arathime mũno?
Nĩ arĩa matarĩ na mehia
 
Andũ othe nĩ mehagia. Andũ othe nĩ matharagia. No ti andũ othe matuagĩrwo cira nĩ ũndũ wa mehia mao. Ithuothe nĩ tũĩhĩtie, no arĩa metĩkĩtie ũhonokio wa Jesu Kristo, acio matirĩ mehia ngoro-inĩ ciao. Ũrĩa wĩtĩkĩtie ũhonokio wa Jesu, ena gĩkeno mũno. Arĩa makũrĩtwo mehia-inĩ mao-rĩ, nĩo arathime kũna. Na rĩĩtwa rĩngĩ, rĩu nĩ athingu thĩinĩ wa Jesu.
Ngai nĩ atwĩrĩte ũhoro wa gĩkeno thĩinĩ wa Aroma 4:7, “akiuga atĩrĩ, Andũ gũkena, nĩ arĩa moheirwo mawaganu mao, mehia mao magakĩhumbĩrwo.” Ithuothe nĩ twĩhagia o nginya gũkua. Tũrĩ aganu na andũ matarĩ akinyanĩru mbere ya Ngai. Tũthiaga na mbere na kwĩhia o na rĩrĩa twamenya watho Wake. Tũrĩ amocu mũno.
No Ngai nĩatũkũũrĩte na ũbatithio, na thakame ya Mũrũ wake wa mũmwe, agatũĩra atĩ, tũtirĩ ehia rĩngĩ na rĩu tũrĩ athingu harĩ We. Aratwĩra atĩ tũrĩ ciana ciake.
Ũhoro-ũrĩa-mwega wa maĩ na Roho nĩguo ũhoro-ũrĩa-mwega wa ũhonokio wa tene na tene. Nĩ wĩtĩkĩtie ũguo? Arĩa metĩkĩtie ametaga athingu arĩa mahonoketio na nĩo ciana Ciake. Nũ, ũrĩ na gĩkeno mũno gũkũ thĩ? Nĩ ũrĩa wĩtĩkĩtie na agakũũrwo, nĩ ũndũ gwĩtĩkia ũhoro-ũrĩa-mwega wa ma. Wee-rĩ, ũrĩmũkũũre?
Na, hihi Jesu no akorwo nĩ ariganĩirwo nĩ gũkua mehia maku? Aca, Akuuire mehia maku mothe, rĩrĩa abatithirio. Ĩtĩkia ũguo. Ĩtĩkia na ũhonokio mehia maku mothe. Nĩ tũthome Johana 1:29.
 
 
O Ta Ũrĩa Hataga Na Kĩhato
 
Nĩ mehia maigana atĩa Jesu akuuire?
Mehia mothe ma kĩrĩndĩ
 
“Mũthenya ũyũ ũngĩ akĩona Jesu agĩũka kũrĩ we, akiuga atĩrĩ, Onei Gatũrũme ka Ngai, karĩa ga gũtwara mehia ma kĩrĩndĩ!” (Johana 1:29)
“Onei Gatũrũme ka Ngai, karĩa ga gũtwara mehia ma kĩrĩndĩ!”
Johana mũbatithania nĩwe waigĩrĩire Jesu mehia mothe ma kĩrĩndĩ rũĩ-inĩ rwa Jorodani. Mũthenya ũyũ ũngĩ, ona Jesu, akĩruta ũira akiuga atĩ nĩ gatũrũme ka Ngai, karĩa ga gũtwara mehia ma kĩrĩndĩ.
Mehia ma kĩrĩndĩ nĩ mehia marĩa andũ mekaga marĩ thĩ, kuma kĩambĩrĩria o nginya mũico. Ta hakuhĩ mĩaka 2,000 mĩhĩtũku, Jesu nĩ akuuire mehia mothe ma kĩrĩndĩ na agĩtũtheria. Arĩ ta Gatũrũme ka Ngai nĩ akuuire mehia mothe ma kĩrĩndĩ, na agĩtuĩrwo nĩũndũ witũ.
Rĩhia o rĩothe twĩhagia, nĩrĩaigĩrĩirwo harĩ Jesu. Agĩtuĩka Gatũrũme ka Ngai karĩa gatwaraga mehia ma kĩrĩndĩ.
Jesu okiire gũkũ thĩ ta mũndũ mũhoreri, arĩ ta mũhonokia ehia gũkũ thĩ. Twĩhagia nĩ tondũ wa ũmocu witũ, waganu witũ na kwaga ũmenyo, tondũ tũtirĩ ũgĩ na tũtirĩ akinyanĩru. Na ciugo ingĩ twĩhagia nĩ tondũ wa igai rĩa mehia kuma kũrĩ, Adamu. Mehia maya mothe, mahatirwo na makĩigĩrĩrwo mũtwe wa Jesu, rĩrĩa abatithĩirio rũĩ-inĩ rwa Jorodani. Akĩmanina mothe na gĩkuũ kĩa mwĩrĩ wake mũtharaba-inĩ. Agĩthikwo, no Ngai akĩmũriũkia kuma kũrĩ akuũ mũthenya wa gatatũ.
Ta Mũhonokia wa ehia othe, ta Mũtorania na ta Mũtuanĩri cira, rĩu aikaire guoko-inĩ kwa ũrĩo kwa Ngai. Ndarabatara atĩ, atũkũũre rĩngĩ na rĩngĩ. Ũrĩa twagĩrĩirwo nĩ gwĩka no kũmwĩtĩkia, atũhonokie. Muoyo wa tene na tene nĩ ũigĩirwo arĩa metĩkĩtie, na gĩkuũ kũrĩ arĩa matetĩkĩtie. Hatirĩ na ũndũ ũngĩ wa gũcagũra.
Jesu amũkũũrĩte inyuothe. Inyuĩ nĩ inyuĩ mwĩna gĩkeno mũno thĩ ĩno. No ũrĩhagia thutha-inĩ nĩ ũndũ wa ũhũthũ waku, no nĩ akuuire mehia macio mothe o na mo.
Nĩ kũrĩ rĩhia rĩtigarĩte ngoro-inĩ yaku? − Aca−
Hihi, Jesu nĩ akuuire mothe? – ĩĩ− Nĩ akuuire.
Andũ othe nĩ mahanaine. Gũtirĩ mũthingu kũrĩ, mũndũ ũrĩa ũngĩ wa itũra rĩake. No andũ aingĩ nĩ hinga, metĩkĩtie o ti ehia, no nĩ ehia o nao. Thĩ ĩno nĩ tuta ya gũkomereria mehia.
Atumia makiuma nyũmba mehakaga rangi mũtune mĩromo, makehaka bonda ũthio wao, magathondeka njuĩrĩ na makehumba nguo njega na iratũ cia mĩkanye…. Arũme nao makenjwo, magaikara wega, makehumba cati njega na tai ya goro na iratũ irahenia.
O na makorwo mahana ta ciana cia mũthamaki makĩonekana, thĩinĩ wao nĩ magigi.
Mbeca nĩitũmaga andũ makene? Ũgima wa mwĩrĩ nĩũtũmaga andũ makene? Aca. No ũhonokio wa tene na tene, kuoherwo kwa mehia kũngĩtũma andũ makene. Ona mũndũ angĩoneka arĩ mũkenu, thĩinĩ wa mũndũ ũcio, no mĩnyamaro akorwo arĩ na mehia ngoro-inĩ. Mũndũ ũcio aikaraga na guoya wa mũthĩ wa cira.
Mũndũ ũrĩa mũkũre arĩ ũrũme ta wa mũrũthi, ona kana arĩ na matangari. Ndarĩ na mehia ngoro-inĩ yake. “Nĩ wega Mwathani, nĩkũhonokia mũndũ mwĩhia ta niĩ. Wathambirie mehia makwa mothe. Nĩnjũĩ ndiagĩrĩirwo nĩ wendo waku, no nĩ ndakũgooca nĩũndũ wa kũhonokia. Nĩhonoketio tene na tene mehia makwa mothe. Ngai atũgĩrio!”
Mũndũ ũrĩa ũhonoketitio akoragwo na gĩkeno na ma. Mũndũ ũrĩa ũrathimĩtwo na wega Wake, ũcio nĩwe wĩna gĩkeno.
Nĩ tondũ, “gatũrũme ka Ngai, karĩa ga gũtwara mehia ma kĩrĩndĩ” akuuire mehia mothe, ũguo tũtirĩ mehia. “Arĩkirie” ũhonokio witũ mũtharaba-inĩ. Mehia mothe, makwa na maku me harĩ ‘mehia ma kĩrĩndĩ,’ na nĩũndũ ũcio atũhonoketie ithuothe.
 
 
Na Wendi Wa Ngai
 
Hihi, twĩna Jesu twĩna
mehia ngoro-inĩ ciitũ?
Aca, tũtirĩ.
 
Arata akwa, mũtumia ũcio wanyitĩtwo agĩtharia nĩetĩkirie ciugo cia Jesu na akĩhonokio. Rũgano rwake nĩ rwandĩkirwo Ibuku-inĩ Rĩa Ngai, tondũ nĩarathimirwo na ũhonokio wa tene na tene. No, hinga cia andĩki marua na Afarisai-rĩ, nĩkũũra morire makiuma harĩ Jesu.
Ũngĩkorwo, nĩ ũgwĩtĩkia Jesu, Matu-inĩ nĩ kuo wetereirwo, no warega Jesu, ũthiĩ iherero-inĩ rĩa mwaki. Wetĩkia ciĩko ciake njega nĩ ũndũ ũmwe na Matu-inĩ, na waga gwĩtĩkia wĩra Wake-rĩ, nĩ ũndũ ũmwe na iherero rĩa mwaki. Gũkũũrwo, ti wĩrutanĩria wa mũndũ, no nĩ ũhonokio wa Jesu.
Nĩ tũthome Ahibirania 10. “Rĩu-rĩ, tondũ watho ũrĩ o kĩĩruru kĩa maũndũ mega magoka, na ti mũhanĩre wa ma ũrĩa matariĩ-rĩ, ndũngĩhota o na rĩ gũtũma andũ arĩa makuhagĩrĩria maagĩrĩre kũna na ũndũ wa magongona o ro macio matũire marutagwo o mwaka o mwaka. Amu kũngĩkorwo ũguo tiguo-rĩ, kaĩ matangĩatigire kũrutagwo? Nĩ ũndũ andũ arĩa maarutagĩrwo mo maarĩkia gũthahũrwo rĩmwe makaigania, matingĩacokire kũigua ngoro-inĩ atĩ me na mehia. No rĩrĩ, magongona-inĩ macio nĩgũcokaga kũririkanwo mehia mwaka o mwaka. Tondũ gũtingĩhoteka mehia meherwo biũ nĩ thakame ya ndegwa na mbũri. Nĩkĩo Kristo, agĩũka gũkũ thĩ, ekuuga atĩrĩ:
Wee-rĩ, ti magongona na mahaki wendaga,
No nĩ mwĩrĩ ũ’thondekeire;
Mahaki ma gũcinwo, na ma kũrutwo nĩ ũndũ wa mehia –rĩ, timo ũkenagĩra.
Hĩndĩ ĩo ngĩkiuga atĩrĩ, Niĩ ũyũ! Ndĩ gũũka,
(thĩinĩ wa ibuku o rĩu rĩa gĩkũnjo, ũhoro wakwa nĩho wandĩkĩtwo)
Gwĩkaga o ũrĩa wendaga, wee Ngai.
Nake oiga hau mbere atĩ magongona na mahaki, mahaki ma gũcinwo, na marĩa makurutwo nĩ ũndũ wa mehia timo wendaga kana ũkamakenera-rĩ, (namo nĩmo marutagwo ta ũrĩa gwathanĩtwo watho-inĩ), agacoka akoiga, Atĩrĩ, ndĩ gũũka gwĩkaga o ũrĩa wendaga. Nĩ kweheria ekweheria ũhoro ũcio wa mbere, nĩ getha arũmie ũcio wa kerĩ. Nakuo kwenda kũu nĩkuo gũtũmaga tũtherio, nĩ ũndũ wa ũrĩa mwĩrĩ wa Jesu Kristo warutirwo o ihinda rĩmwe rĩa kũigana.” (Ahibirania 10:1-10).
“Kwa wendi wa Ngai” Jesu nĩarutire muoyo Wake nĩũndũ wa mehia maitũ o ihinda rĩmwe, na agĩtuĩrwo na akĩriũka.
Ũguo nĩ tũtheretio. ‘Gũtũmaga tũtherio (Ahibirania 10:10)’ kwandĩkĩtwo na ihinda ihĩtũku, na nĩrĩrathiĩ na mbere. Nĩ kuuga atĩ, ũhonokio nĩ warĩkirio biũ wothe, na ndũrabatara gũcokacokerwo rĩngĩ. Nĩ ũtheretio.
“Na rĩrĩ, mũthĩnjĩri-Ngai o wothe nĩarũgamaga o mũthenya o mũthenya agĩtungatĩra Ngai, na akĩrutaga magongona o ro macio kaingĩ, namo matingĩhota kweheria mehia o na rĩ. Ĩndĩ ũyũ-rĩ, aarĩkia kũruta igongona o rĩmwe rĩa kũigana nginya tene na tene, agĩikara thĩ guoko-inĩ kwa ũrĩo kwa Ngai, eterere o nginya rĩrĩa thũ ciake igatuwo gaturũa ka makinya make. Tondũ-rĩ, nĩ ũndũ wa kwĩruta o ihinda rĩmwe, nĩaatũmire andũ aamũre maagĩrĩre kũna o nginya tene.” (Ahibirania 10:11-14).
Inyuĩ inyuothe nĩ mũtheretio tene o na tene. Na, wehia mũthenya ũyũ ũngĩ, hihi ũtuĩkaga mwĩhia rĩngĩ? Hihi, Jesu nĩ akuire mehia macio o na mo? Nĩ akuuire. Akuuire mehia, nginya marĩa ma mahinda marĩa magoka, o na mo.
“O nake Roho Mũtheru nĩwe mũira witũ ũhoro-inĩ ũcio; tondũ arĩkia kuuga atĩrĩ:
Gĩkĩ nĩkĩo kĩrĩkanĩro kĩrĩa ngarĩkanĩra nao matukũ macio maathira, ũguo nĩguo Mwathani oiga;
Nĩngekĩra mawatho makwa ngoro-inĩ ciao,
Na ndĩmaandĩke meciria-inĩ mao,
agacoka akoiga atĩrĩ:
Namo mehia mao na mawaganu mao ndigacoka kũmaririkana o rĩ o rĩ. Na rĩrĩ, macio maarĩkia kũrekanĩrwo, gũtingĩcoka kũrutwo ihaki rĩa mehia.” (Ahibirania 10:15-18).
Mũhari ũyũ, ‘macio maarĩkia kũrekanĩrwo’ nĩ kuuga nĩ atheririe mehia mothe ma kĩrĩndĩ. Jesu nĩwe mũhonokia witũ, wakwa na waku. Gwĩtĩkia Jesu nĩ gũtũhonoketie. Ũyũ nĩ ũhonokio ũrĩa ũrĩ thĩinĩ wa Jesu, na wega mũingĩ ma, na nĩ kĩheo kĩa Ngai. Niĩ na we arĩa tũhonoketio mehia-inĩ mothe maitũ-rĩ, nĩ ithuĩ arathime mũno! 
LIST Download FREE eBook & AudioBook