• All e-books and audiobooks on The New Life Mission website are free
  • Explore multilingual sermons in global languages
  • Two new revised editions in English have been released
  • Check out our website translated into 27 languages
Search
English
English

Sermons

Ta tajore driaru ri `i 1: Enzi

[1-2] `Ba Cidru Otiru Enzi Tro (Maruko 7:20-23 ojo)

(Maruko 7:20-23 ojo)
“Oko ojo, `Ta ma`di inzi di rii ani ta engadi ma`di a ri` i, adusi ta unzi rii, ra ego ri tro kenga ondoto `bani asi ga amala ta ini ri ideka, ta oguka, `ba `dika, uku ba zi dri duka, momo, asi unzi, bate, avi, ru ivoloka, dri okpo, lali ideka tro. Ta unzi `dii cidru kenga ba`a vua ka `ba inzi ni.”`
 

Ta Baa Urale Kideru aia Urakaa Ri ani risi aia Dri Ociru Ra
 
Ma`di arile ire
wa rii adi `i?
Ani uradi anangasi
enzidipi ri `i

Atijoadru rii ale mazi nyini lazi alu, indre nyi nyangasi ingoni? Nyura nyi cuwi `a nosi unzi? Ira adu? 
`Ba ekpadru kaki olu ori tro. Nyolu unzi nya rakaa na ani ku, kusa loso nya rakaa na ani ku. 
Nyura adi ka lidri pelere Endri dri ri ase ni? Kolu ma`di ago kusa/izi uradia anangasi ani loso ri `i ya? Kusa ago/kusa izi uradia anangasi ani unzi ri `i ya?
Dii le`jo tatia asejo ri `i. Ale mazi anyini lazi zi au. A`di ka layu esu enzi ana idele risi ni—ma`di enzi idedi nza ri `i ya nosi ma`di enzi idedi ga ri `i? Ma`di ago/kusa izi igenidia ani ide enzi weli karula kpe rii ka layu esu enzi ana idele risi ni a`dusiku igeni ani ma`di enzidipi ri `i ni ra. Ma`di ani diani di ka Le`jo layu dri Yesu a ti ubale anini rii a`i ra.
Ma`di ledi ani ledi ka layu losogo Yesu a ti ubale anini ra ri esu ra rii ni. `Ba ni a`du? `Ama `ba enzi ideka ti lika ako ri`i`. Izaia 59 ojo, enzi cidru drile mgbimgbi `ba asi si aa. `Disidru, ete`deru pelere `ba cidru ai `ba enzi ideka ri`i. Esu jo enzeki ta dri`ba ta `ba nidii enzidipi nidri ni sa, `ba amgbu kogaa mgbe. Ki, `Ama alu alu tete `ori ta unzi ri dri `i` nidii ta dri `ba ru nze`di ce ri`i. Jo esu ondreki ama amangasi anda anda `i ri, ama gba `ba unzi ri `i. `Ba itirikaa ai aiangasi anda ri `bati isa kole tati `a okorega kobaki asi le`jo di idri. 
Ki, ondreru `ba amgbu oleki jokaa ai `ba enzi ideka ri`i ni ku. Ai amgbu kolu asi egbwe tro amala kaki itiria ai enzi ako. Ki ama oluka `ba ta unzi ri ideka ri`i si, aba mberembere `a enzi dri di ka vu mbe kare cidru ga. Esu kolu ta ce ri `i ku dini ri, drinza ka ama ko enzi si ci rere. Amala esuru ama amgbu drinza oko hwa alusa ku jo te amide ta unzi rii ingo ni sa `i. 
Alusa, aia urata isa oni ku. Ma`di alu alu ago nosi/izi, dri urata itede`dia “ta dii drinza rii `aa.” Adamu ti Eva tro oce kide ki enzi `di ofeki mgbe aniki `ai hwe lofo. O`du disi, enzi ba amgbu ka rani ama a`bi ebe ni unzi di iru—A`bi ebe ni enzi ide jo ri`i. Kaki rani aia enzi `ba `bazi ni ogu ausini `ai kesu dru lamgba Rubanga drii ku si. 
`Ba a dri ociru ta aia rale kideru aia lekaa ri ani risi ra. Kaki uraa aiangasi `ai oza `ba ziti ra. Disidru, jo eriki ofu ta unzi ridri ni, kaki owo ere kilikili kaki joa. “Ba ka ta unzi diani di ide ingoni? Ma`di ka di ide gba ingoni? Barangwa ka ta di ide `ba ani tika rini ingoni?” Kaki itiria aile aiangasi `ai ide ta na ani nai ku. 
Ma ozi, ani ta okpo rere ri`i nyini nikaa nyi adi `i ya ni ote `i. Amani ama nijo amangasi ote, kole atijoa rii amesu lebe enzi drii kpa. Ka saa du nza ama ni ama nijo amangasi anda anda `i, ki ama ziti amgbu `aa ama di asu alu sa kpe paka o`du ama dra jo ri inga. 
 

Nyini Nyi Nyangasi Ote

`Ba `ai nika aiangasi
ku ri `bati kolu ingoni?
Kaki olu dranga `a oluka ri ani.

Saa ziti si amevu amesu a `ba amgbu ziti oniki aiangasi `ai ku. Socrates ojo, “Nyini nyi nyangasi ote.” Amala, ru amgbu ziti onita asi `a rii aduta ya ni ku: `ba dika, Ogu, `ba zi leka asi a, a`wi ako, asiti unzi, ti enzo, vua a`wi ako mi drii tro kpo dru…. 
Ma`di ago kusa/izi ani nidi anangasi ku ria ti ga ‘jo `ini drii aa ki ana tisi le ka le`jo pelere ri jo au. Ra di dri ni amala ma`di di ani di oni oti ani enzidipi undedia enzi si ri `i ni ku. 
`Ba ziti amgbu vu dri dia `aa oniki di gba aia ovi tema ri kendre ingoni ya ni ku. Unzaki `ai aiangasi ra disi esuki aia zeleti eko enzoenzo aia ujole ri iga. Oniki `aika ai `be enzo ai dri aiangasi ri-si aci olure tadru ri `ia ni ku. 
 

`Ba Ka Enzi Ide Andra Andra Aia Lidri a Ru

Kaki mu aci a adu si?
Aia `ai nika aiangasi ku si.

Anyi` ba ondreki dri Maruko 7:21-23 ni. “Adusi ta unzi rii ra ego rii tro kenga ondoto `ba ni asi ga, amala, ta ini ri ideka, ta oguka, `ba dika, uku `ba zi dri duka, momo, asi unzi, ti enzo, bate, avi, ru ivoloka, dri opko, lali ideka tro. Ta unzi dii kenga `ba a vua ka `ba inzi ni.” Asi `ba dri oga urata si erijo o`du `ai kojo a`a ri inga. 
Anyiba orakidri kendre asi ni ide gilasi si ani oko iga a`a ni ta eyi eyi ngudi unzi risi ndru cubinyi, ungwea ama enzi `i. Aduta karide ni jo ma`di di karingwi vulega kusa andra ga `i? Ta eyieyi andi (enzi) nidii amala kora kare cidru ga. Jo ma`di di kizeru ogogo, enzi di isa kaca kare cidru ga ogogo. 
Ru, enzi `ba dii, adiki olu `ba lidri tro ladi ani. Adiki enzi ide kare cidru vure ri iga. Adiki enzi ide `ba lidri `a ru adusi ru `ba enzi ideka ri `i. 
Le`jo ni, oniki ru `ba enzi ideka ri `i ni ku, kusa ovi zi si, ru ehwi enzi dri `i ni ku. Ru `ba enzi ideka ri`i adusi enzi ehwi ama asi ga idojo mgbe o`du ama tijo risi. 
Enzi ama idele `dini acaka ni adu, ki alusa, `ba ole a`ikaa `ai ka enzi ide ni ku, ku `i ri esu ai enzi `ba. Kaki uraa `ba zi oba `aini enzi idejo ni disidru, `ai aiangasi `ba unzi ri`i ku.
Jo kendreki enzi idere sa, `ba koraa ta te ruledi aia enzi ni ru jejo pelere di rii enzi a oluka `i. `Disidru kaki ai itiri mgbi saa cidru si jo ideki enzi ra `i, kaki joa aiangasi dii aia enzi `i ku. `Dii amala ama ama ra pelere rii amangasi si, `dia ehwi ni acika andraga enzi ideka tro ni loso `i ya? Anyiba aciki andra ga imbaka na tro. 
Jo gilasi a`a oga enzi si, kengwi andi. Ru ani angwe esi ri jeka au ni konyi ako. Ide ta ku di adiki ana ru angwe asi ri je ta loso ama idele risi be ani ingoni ya `i, alusa konyi ani iyo, jo gilasi dia `a oga enzi si `i. 
Oti ama enzi amgbu tro asi a vua enzi di ka alu sa ama asi `aa ni ebe kulala ni kpe; ide ta ku jo te enzi ama izole leti `a si ri kolu ingo ti sa `i. Amala, ama enzi ide ama lidri `a ru. 
Jo ma`dizi ago kusa/izi oni ani ma`di enzi ide`di ri `i ni ku, ma`di dii ago kusa/ izi dii kaci andraga ana ovi unzi enzi dri di uzuka tro. Enzi ni ta `ba cidru asi ri `i disidru konga `ba asi a si tete ta angwa gaadru ri leka tau si kpe. Jo ideki enzi angwa ni, adiki lea bongu si vua jo ole zini ga `di, adi angwaa bongu liri si… adi lea tawulo si adiko adi `i`wia… adiki raa jo aciki andraga enzi ama dri dii leka tro dia ni, koko kengwi pelere, kitee ide diani sa enzi di kaci ti ka tro andra andra. 
Nyitiri `di koya ndi koca ingo pi? `Di koya andraga ndi o`du ma`dia `a drajo ri inga. `Ba ka ta ide enzi dru paka o`du aia drajo risi. `Dii ta `badia amigeni Yesu ni au amani layu esu jo `i ri `i. Amani layu esujo, Kole amani ama amangasi ote. 

Adi ka Yesu `a le ni
esu asi cidru si ni?
Enzi `ba a`ikaa `ai ide ta unzi 
rii ka rula kpe ri `bati`i

Anyiba ojoki dri nosi ago eri obi `ai gilasi eri gadi ta eyi eyi andi risi ndru risi di tro. Gilasi dii eri truwasi a`a oga enzi si. Ma`dizi ri ondre ani anangasi oko ojo, “Wooo, ma ma`di enzidipi na ani ri `i.” `Disidru, mgbe aziru ra vua oya ma`di ani ikonyidi wa rii undrusi. 
Ki zijo rile ura ani gbadru enzi ako. Ka ta unzi anangasi ani ru ri ndre kpe disidru kitiria ani enzidipi ku. Ana lidri a`a ni ru, kaci andraga enzi di leka tro, ka ewo alu ri i`wi draa mgbe ka ewo zijo ri rii iko… mgbe emiemi kolu ewo zijo ri iga….
`Ba oluka aia lidri nia loso rii ekpadru, kaki maa ai kide dru enzi ga kebe dru ta i`wi ka di ani be dii kolu dru iyo. Ki enzi `a olu ka aia asi ga tesa aa si, ta loso aia idele rii adu? Olu ka loso oji `ai alusa care bua ga ku. `Oluka loso ka `ai ji ra rii leti ya jo aci a ri iga. 
Ma ozi ma lele ndro ri, `oluka loso` ka tete `ba ji aci a. anyi`ba okoki lini `dii asi a. Jo `ba kolu loso aia enzi olu alu sa palanda ku, ki tro sa kaki olu enzi `ba. 
Ta asi `ba dri `ia rii adu? Enzi a? Asa a? Oo! Urata unzi ri `i ya? Oo! Ogu naa `aa ya? Oo! Lecuma naa aa ya? Oo! 
Adiki ikonyia kpe ki rarii kole a`iki ru `ba enzi ideka ri `i, jo ndrole ondreki `ba ngasi adi ta ide enzi ani kusa aw`i ako ani `i, oca joa amani amide isa jo ku. 
`Dii lete ta aninga ama idele `boronzi si ridri `i ku. Ki dria le, ama `e re amba di le? Jo avu fonyi oru ri iga ni, koleji, ziti tro ri iga ni, adiki ido erakaa ta cidru `ba a rii enzi. `Dii ce ku ya? Onze gba ta ce rii, enzi ama asiti ri uzuka ni ta okpo rere ri `i. Ani ani ku ya? Ama ikonyia kpe ki rarii amaci andraga enzi ideka tro `i. Ki adi evu adi eraa ra, adiki joa “Andrani mani di ni ri mide tadii ku.” Amala, adi esua ecokaa ni kolu okpo. `Dii ce ni adu si? Adusi ama cidru otiru `ba enzi ideka ri `i. 
Ama engwi tau rii tete ama oluka loso si kpe. Ta kole oni ote rii oti ama `ba enzi ideka ri `i rii ausini amesudru layu wa si. Enzi `ba cidru layu Yesu `a ti ubale ri a`ika ri `bati ka tete lari esu ra rii ni. 
`Ba urakaa, “Mide ta ego rii nzakuru kusa mide enzi ku ru” rii `ba a`ikaa Yesu odu ama enzi ni ndutudru vua jo a`i ai ku ai kovu aci a ri `i. Kole ru cidru koni ote ovi enzi idejo dii ru cidru a ruga aa adusi oti ama `au tro. 
Jo ma`dia ura, “Mide ta unzi rii nza kuru jo kesu oli mesu layu enzi angwa di si wa sa `i”. Mgbe nyitiri ma`di ago kusa/izi dii kolu enzi dria kulala ya? Alusa ka ride dini ni kpe. 
Ma`di ago kusa/izi layu esu`di wa rii ma`di nidia ani ma`di enzidipi ri `i ni ote ri`i. Ago di `i kusa/izi dii a`i Yesu odu enzi ama dri rii ana batisimu Abu Jurudano `a risi vua uhwe musara enzi drii saa ana drajo kuruce dri risi ni ra rii ni. 
Jo esu tee layu ra nosi kuru sa, ru ba`ba olu le urata ori dri tro. Ama `ba enzi ideka ri `i. Ledii ta ama `au ri`i. Adiki te layu esu wa rii kesua adiki Yesu odu ama enzi ni ndutudru si pi ni a`i kpa.
 

Rubanga Ayu `Ba `Enzi Angwa` Tro rii Ku
 
Adi ka Opi ni unza ni?
Ma`di lebe enzi dri zidi 
o`du cidru si ri`i.

Rubanga ayu `ba `enzi ciri` tro ri `i ku. Rubanga oba bi sa `ba jokaa “Rubanga, nyindre gba enzi ma`drii gaangwa dru di” ri iga ku.`Ba ana kiza etere au tro rii `ba jokaa, “Rubanga, ma enzidipi ri `i. Jokaa ma ya aci a rii, vua jokaa ayi nyari mani ma ri `i.” Enzi `ba gba jokaa, “Rubanga, jo nyi hwe mani lari ra lokudru ma rari ra ri`i. Draa hwa azi ilegi enzi rujo rii ku a`dusi ani ote ma ta zi ide kpe ki rarii maci andraga enzi ideka tro `i. Ayi nyari mani ma.” 
Rubanga ka lari hwe `ba asi `baka anisi rini. Ma mangasi masa adri ma ilegi enzi ru jo o`du cidru si ledii ilegi, ki alusa ilegi enzi ru jo ledi ayu ma enzi dri `a kuru. `Disidru meya awo Rubanga na`ndra ako milegi, “Rubanga, Kiza koko nyi masi vua nyari ma ma enzi ni `a si cidru.” Ma`di ilegi di diani ri ka rari ra. Kaki evu kaki layu Rubanga dri a`i ra vua kaki batisimu Yesu a esule Yoana Batisita dri ri isa a`i ra. Vua kaki rari ra. 
Rubanga ka layu hwe te `ba nikaa ai `ba ta unzi ri ideka ri `i ni ote ri `bati ni, baciri ta unzi ri dri `i. Jokaa, “Mide te enzi angwa dii au ri `i.Ayi nyebe mani ausi ra ri `i,” `ba oluka driso enzi `ba rii vua Rubanga ari `ai ku. Rubanga ka tete `ba jokaa aiangasi `ai enzi `ba ri `i ari au. 
Osiru Izaia 59:1-2 ga, “Majo anyini Opi a dri ni ali ku, ka `ba ari kpe ku; vua ana bi ni ta erire ga anzi ku, bi driaru ka ta eri kpe ku. Ki anyini ote enzi anyidri anzu anyi anya Rubanga tro ra; Vua enzi nyidri eco adrati driaru ni nyidri si pi, ausini keri dru ta unzi nya idele rii ku si.”
Amala ama rutika `ba enzi `ba rii si, Rubanga ka ama ndre kiza si kpe. `Dii amala ana dri ni ali si ku, ana bi ni anzi, ka ta eri ama enzi ni ebejo kpe si ku. 
Rubanga ojo ama ni, “Enzi anyi dri anzu anya lofo ni ma tro ra; vua anya enzi ani ma andrati ni anyi eri re a ga ci, ausi ni meri dru anyi ku si.” Amala enzi a oluka ama asi ga amgbu si, ama to `bu `a kpe, jo tee joti kawiru mgbo ani ingoti sa `i. 
Jo ama, `ba ta zi ideka kpe ki te enzi ideka wa rii au ri, kozi kiza saa cidru ama enzi idejo risi ni, kole esu Rubanga isa ko`di ana Ngwaapi ni o`du cidru si. Ki Rubanga ole tadii idele ku. Ojo, “Eya madri anya enzi tro o`du cidru si ku. Aze ma Ngwaapi ni anyi ayure anya enzi cidru ri ia ra. Ta te kole anyira rii odu di nya enzi ni ingoni ya `i vua nyiko nya `i dii ta ce ri`i.`Diivu, nyi ngo nyigeni Ofu loso eyi dri Endri tro rii nyini lari esu jo au. `Dii le retu ma hwele anyi ta, ma bile ri ni ri`i.”
`Dii ta ana jole amani ri`i, “Anyigeni ma Ngwaapi ni vua anyesu lebe anya enzi dri rini. Ma, anya Rubanga, eze ana Ngwaapi ni anyi ayure anya enzi ni `a cidru. Anyigeni ma Ngwaapi ni anyiko anyesu lari.” 
`Ba nikaa aiangasi ai `ba enzi ideka ri `i ni ku rii kaki ana kiza ni zi enzi ciri ciri cidru aia idele risi. Kaki vu andraaru enzi unzi kanya aia idele ria anzi ni nika ako rarii mgbe kaki ilegi. “Ayi nye`be enzi angwa dii ra. Mide di ku`i.” 
Kaki bia ani unzale ilegi ovi ledi ani ledisi. Adiki enzi ide te vu alu ku, ki adiki idea saa cidru si paka adi fu udra. Kole oziki kiza enzi drii paka saa driso `baa olujo lidri disi `i, adusi adiki enzi ideka imba kpe ru `ba dri ka Cara enzi dria ta ni mba au paka adifu udra. 
Lebe esuka enzi angwa tilea idele risi iko le`jo enzi drii ku amala o`du alualu si adi enzi ide karula kpe. Disi, leti te ama ni engwijo kulala enzi dri `a wa rii ama enzi ama dri baka ndutu dru si Yesu niru `i. 

Ovi ba dri kendre ingoni?
Enzi dipi.

Bugu ole ri ka enzi `ba lidri drii la ovi ani di ni: “Adusi anya dri esu enzi ana ari si,vua anya dri za esu enzi au si; anya ti ojo enzo ra, anya ti ka ta `ba dijo ri ujo au, ma`di alusa anda ungwedi ana iyo, vua trosa ma`di uludi anda ndrusi ana iyo. Kaki le`jo iyo ri igeni au vua tesa kaki enzo nze au; Kaki enzo ti au vua dride aia esule laka rii enzi. Kaki ele ini dri uga, kaki ko kaki a`a ru mani mani voi esu au; ma`di aia ele ni nyadi ri mgesa kodra ra, adusi esu ele ugadi na `ia ini kefu ni. voi aia idele ri `ia alusa bongu efu ku, kusa kaki `ai aku ebu aia idele ri si kpe; adusi e`bu aidri `i e`bu enzi dri `i,vua aia dri ga rii tesa `ba dika. Aia pa ka `ai ji tesa ta unzi ri idere ga, vua kaki tesa ta ti uba ari ma`di enzi ako ridri sure ga; urata aidrii urata enzi dri `i; aia leti ni leti rizajo ri bati leti rivolojo ri tro. Adusi oniki leti egbwe esujo rii ku, vua leti aia kole ri iga alusa anda iyo; engwiki aiangasi leti dagadaga tro ri ani; adusi ma`di leti na ani na dudi au ri esu hwa alusa egbe ku” (Izaia 59:3-8). 
`Dri `ba dri ondiru enzi si vua kaki aci andraga enzi ideka tro `i paka aia lidri a ni `a ndutu.Ta aia idele rii cidru unzi. Vua ama ti `Ojo enzo ra.` Adusi tacidru engadi ama ti ga rii enzi. 
“Jo sitani ka enzo nze, nai ka e`bu anidri gba ri ide au” (Yoana 8:44). `Ba tile Endri si di kuru ri `bati oleki jokaa, “Ma nyini gba ta ce…. Majole nyini ri jo au ni ku. Ta majole dii ta ce ri `i….” Ki, tacidru aia jole rii alusa ora ku amala kpodru enzo. Amala kendre ondo ana rusika ra ri ani. “Jo sitani ka enzo nze, nai ka e`bu anidri gba ri ide au.” 
`Ba ka geni aidri ri `ba le`jo iyo ri iga vua kaki enzo onze au. Ta unzi ri koti `ba ru koko ka enzi eji. Kaki ele ini dri uga kakiko kaki manimani voi be ausi, Rubanga ojo, “Ma`di aia ele ni nyadi rii gbadru kodra ra, vua aia ele edradi ri `ia ini ke fu ni.” Ojo anya asiti ga ele ini drii `aa. Ledii ra kolea amariru dru ofu loso eyi dri Endri dri tro risi ri `i. 
Jo mari ta jole Rubanga dri ni, `ba ziti ledia aa mgbe kaki ido jolea, “Ayi, `ba di! Ojo mani ta Rubanga dri ku. Saa cidru malejoadru mide ta risi, enzi kozo maru ni. Kodi mgbe sa pia. Ma alusa saa ji enzi ideka kare cidru ga ni ako kpe. Mikonyia kpe. Enzi oga ma `a ndru. Mengwi ra ako. `Disi ale ojo sa ma ni ta Rubanga ni ole ri idri ku.”
Ma`di ago kusa/izi di oni mgbe sa ani ma`di enzi ide`di ri`i ni ote, ki rarii ago kusa /izi di oni Rubanga ari ani ofu loso ana le dri si ni ku. `Ba te nikaa ai `ba enzi ideka ri `i ni ote ri ka lari esu wa rii ni. 
Amala, `ba kpodru ledi ani. `Ba cidru ago kusa/ izi rii ka enzi ide kare cidru ana yare ri iga tro. Enzi ka ca kare cidru ga amala `ba cidru ai `ba enzi ideka ri `i. Leti tete alu amani ru ari jo ta endre di ledi iga wa rii mori Rubanga dri `i. `Dii nyitiri gba ta au`jo ri `i ku ya? `Ba enzi ideka saa aia olujo `a lemi tro rii, asi egbwe tro rii, kusa olu loso tro ri ka rari Yesu Kristo ni a`ika si ra rii ni. Adusi Yesu eya ama arire. 
Odu gbadru nya enzi ni ndutudru pi. Nya `i nyangasi nyi enzidipi nyiko nyesu lari. 
LIST Download FREE eBook & AudioBook