• All e-books and audiobooks on The New Life Mission website are free
  • Explore multilingual sermons in global languages
  • Two new revised editions in English have been released
  • Check out our website translated into 27 languages
Search
English
English

Sermons

Ta tajore driaru ri `i 3: Ofu loso Eyidrii Endri dri tro

[3-1] Lari oludi tadru ri `i (Yoana 8:1-12 ojo)

(Yoana 8:1-12 ojo)
“Bacidru ongwi baru di, Yesu le omu `Be Oliveti ni dri obuzi ininipwi oya jo Rubanga dri i`a. `Ba amgbu etraru lagaaru di ori ido mgbe `ba inika. Laponyia cara Mose dri inika rii Farazei `ba tro ejiki izi kole asa idere ga rii obaki omba ai andra. Ojoki Yesu ni Laponyi izi dii ako ondo asa iderega. Mose ojo cara amadri si uku kole dini dii owa oni si mgbe kpo. Ki nyile nyijoa ingoni? Ojoki ta dii Yesu a tini idolijo ausi ai kisiki dru ani, Ki Yesu owo mgbesa vuru osi ta dripidi si. Aia umbare naa ani uzire lazi si rii Yesu idu ani oru ojo aini anyi a ma`di enzi ako rii kido izi dii wale ati. Owo ziniga osi ta vuru di `ba di oce ai keri tadii di idoki runzele alu alu, `ba amba ri ido ni ebeki Yesu ti tete izi di tro ai ai eri. Yesu iduru oru, ojo izi dini ai ingwa? Ma`di alu sa eberu nya le`jo ni alile ku ya? Izi di ojo, Amba ma`di alu sa iyo. Yesu ojo jodini ri masa mali nya le`jo ni ku. Nyimu ki ide enzi zi di ku. Yesu angwi aini di, ma ingwe vudri `i ma`di ma vuni ekodi rii ka ingwe lidri dri esu ra vua aci vu mudi a si ku, rarii ka igwe lidri dri esu au.”

Enzi Yesu a dule pi
rii kate si ya?
Enzi cidru vu ndutu dri ri `i.

Yesu ohwe amani lari oludi tadru ri `i. Ma`di aludi sa vu dri dia Yesu ni a`idi Aridipi dru ki raridi ku rii iyo. Ari ama cidru. Jo ma`di alu ka ricandi ana enzi si ri ledii leti Yesu a ani arijo ana batisimu si vua ana dra si ria ehwi ni eri ka ku `i. Kole ama cidru rii koni ote vua kai zumadi lari dri dini Yesu odu enzi ama dri cidru ana batisimu si vua lamgba enzi drii odu pi ana draka kuruce dri si. 
Kole nya `i lari eyi si vua Endri si rini lari oludi tadru ama aridi enzi cidru a ri `i. Anya`i ana le retu anyi bajo anda rini. 
Kole anyigeni lari eyidri Endri tro rii au; dii layu loku esule enzi amadri risi ri `i. Anyigeni le driaru retu badia anyengwi anda rii au. Anyiba geni anyidri rii ta ana idele lari hwejo anyini A`bu Jurudano a vua Kuruce dri ri idri.
Nya`i ta ana idele nya lari esujo a`bu Jurudano ni `a vua kuruce dri ri `i. Amesu oni enzi ama dri ruzuka di rii sa cidru ote `baziti oma ta enzi ni dia ehwi ni erile kpe. Yesu ari ama enzi cidru a enzi alu alu si.
Enzi vudri dia alusa ana ebele ra ani iyo a`dusi Yesu odu enzi vudri rii cidru le`jo lokugo riisi disidru ma`dizi dria alusa enzidipi ani iyo. Nyasu ofu loso rii ari nyi enzi cidru rii a pi ni ra ya, enzi nya idele o`du andraga rii tro cidru `i? Nya`i ani vua nyariru ra, vua nyiko nyihwe eku na Rubanga ni.
 

Izi Kole Bate Idere Ga Ri `i
 
`Ba vu dri dia 
bate ideka rii si?
`Ba cidru.

Bugu Yoana dri iga ana joti nza rii aro ga ota odo izi kole bate iderega ri drii au vua amandrea Yesu ari ani ra ale amasa amesu kiza tutu mori ana esule rii tro. Anita unziri `iku jokana `ba cidru vudri rii ide bate aia lidri ni ga ra i. Ma`di alualu ide bate ana lidri niga ra. 
Kijo ama ra ideru kusa ama raa na ni rii adusi karide ama lidri ni ga be vua engwi ama lidri iri disi kendre ama mi gba ta unzi rii ideru ra ani ni kpe.
Jo amadu ama ndre izi bugu Yoana dri iga ana joti aro niga rii ni migenia `baziti ama lofo ga ide bate ra ni aa vua idekaa kuru na `bati isa kolu aa ni saa ziti si wa. Ma`di zi alusa bate idedi kuru na iyo, kendre izi di koka bate idere ga ri ani, ama cidru ide ta alua rii ra ki ama ride kendre amide enzi kuru ani.
Ira ma enzo ya, alusa ma enzo ku. Nyindre driso ta mi inisi nya laga ga. Ma`di alualu oludi vudi idri ra ri ide bate ra. Kaki bate ide aia ukunzi undrere leti a si, aia urata niga vua kare aia ta idere ri iga si ri `i di oko kare cidru aia vure rii sa tro.
Itiriki ai kidea ni ku. `Ba amgbu itiriki ku bi aia drajo ri inga adi joa aini nyide bate nya lidri ga karula kpe ni kpa. Te `ba kole cici ribati `i ku ki `ba kole kuru ri isa tro. `Ba cidru kidea aia urata ni ga vua aia ta idele rii iga sa tro. Ani ledii ewo ama lidri dri i` ku ya?
Angala oko nyici ya? Ani ta ce rii te ama asi kaza rii ama asi ivolokasi le`jo lokungo rii `ba o`du disi rii ka bate ide saa cidru si `i, ki itiriki ai kidea ni ku.
`Baka bate ide aia Endri nia sa `i. Ama` `ba Rubanga `a bile ni rii ama olu vudri dia itirikaa ama bate Endri si ri ide ni ako. Ta Rubanga a lele ku rii bate Endri si rii ideka a`dusi obi te ago rii alu `ba vudri ri `i lofo si sa `i.
Izi kole bate idere ga na isa `ba kendre ama oluka `ba rii ani vua oko esu kiza Rubanga drii ra kendre amasa ama rarika ra ri ani ki Farazei `ba dranga rii oba omba aia andraga vua kaki dri pidi ete anini kendre ai `ba le`jo alika ri `i ani oko oleki ani waka oni si kendre aile ai pelere ani vua ideki bate ku ani. 
Ma adrunzi ni Kristo `ba ri, jo oni ama sa ama enzi ni nza ni ote ali le`jo ama wadezi ti idri ku Rubanga ni andra `i. Rarii ama nikaa ote rii ani ama bate ide lidri amadri iga si amesu amasa kiza Rubanga dri ra ani kiza ama aridi cidru ri `i. `Ba te itirikaa ai enzi `ba vua ai ide bate ra aia lidri niga rii ka rari Rubanga ni adra wa rii ni.
 

Adi Esu Kiza Rubanga Dri ni?

Adi esu kiza Rubanga dri ni?
Ma`di konyi ako ri `i.

Ma`di oludi pelere bate idedi ku rii esu kiza ni, kusa noisi ma`di esidi ku rii esu kiza ni ana oluka enzi dipi si ya? ma`di ana kiza ni esudi rii ma`di kiza retu ama lari dri esudi ri `i. `Ba ai ikonyika aiangasi kpe, mori ako vua konyi ako rii esu lari ni. Ai dii `ba ana kiza ni `a ri `i.
`Ba rakaa ai enzi ako rii ka rari kpe kaki kiza ana lari dri esu ingoni, jo ta aia rarire aru si rii iyo `i?
Laponyi cara Mose dri inika rii Farazei `ba tro ojiki izi aia kole bate idere ga rii Yesu ni andra vua obaki omba aia andra ga, oko oziki ani “Laponyi, izi dii ako bate idereaga, Ako ka bate ide. Nyile nyi a`duta `jo?” ejiki izi dii ana andra vua ani ubijo a`dusi?
Aingasi sa ideki bate vu amgbu, ki kaki le`jo ali driaru vua oleki ani dika Yesu dri si ausini ai kojo Yesu ojo ni. 
Yesu a ta aia asiga rii nika ote vua ana izi di isa nika ote si ojo, “ma`di anyi lofo enzi ako rii, kido ani wale oni si ati.” Disidru mgbe laponyia cara drii ai Farazei `ba tro ido `ba amba riisi asi `baciri riisi onzeki ru ca ebeki Yesu ti izi di tro ai ai eri.
`Ba vuka pi dii laponyia cara drii Farazei `ba vua amba dini dri `i. Oleki le`jo alika izi aia kole bate idereaga di idri kendre ai le ai enzi `ba ku ani.
Yesu anzu ana le ni vudri dia, ani Rubanga le dii ohwe lonya `bani ri `i, inzi `ba drakara rii lidri ga di, ohwe lidri `barangwa awizi dri ni ra, inzi Lazero ni Betaniago rii ra, i`ja dobo `ba ra vua ide nyuma `ba ta ako rini ra. Odu enzi cidru `ba enzi tro ri drii pi vua oko ohwe aini lari au.
Yesu ole ama ndro. Ani ma`di retu ri `i, ka ta cidru ana lele rii ide wa ki loponyia cara drii Farazei `ba tro obaki ani aia oja bazi `i dru ledii ra aia izi di ejijo ana andraga ri `i.
Oziki ani, “laponyi Mose ojo cara ani dri iga ma`di di ani dii kole owa kpo. Nyile nyi a`duta jo?” Oraki kojoa aini ai kowa ani oni si kpo. A`dusi? Jo `ba kali le`jo le`jo rusidi cara Rubanga dri `ia riisi ma`di alu alu bate ide di ra rii kole owa oni si kpo ebekaa ako.
`Ba cidru rii koce owa ai kpo vua `ba cidru kovu aci oludi tadru ri `i a. Enzi a musara ni dra. Ki rusa Yesu ojo aini kowaki ani ni kuru. rarii ojo, “ma`di aia lofo ga enzi ako rii kido walea ati.” 

Rubanga ohwe ana cara 613
Ana bugu ni a rii a`dusi?
Ausini koba ama ni dru ama
enzi `ba ni ote.

Cara ka angala eji au. Rubanga ni ole diisi ana cara isa ole cara driaru eca amadri ewa mgbimgbi 613 si. Ra Rubanga `a cara mgbimgbi 613 dii hwejo amani rii ausini amani dru ama enzi `ba ni ote si; vua nijoadru ama ta ndutu ri `i ku. Ka ama ini ausi ama ndru dru kiza Rubanga dri lari ni rii au. Jo ama `i dii ku vua te ama ta sile cara a rii ra au, kole owa ama oni si kpo kendre izi kole ondo bate idere ga di ani.
Laponyia cara drii Farazei `ba tro anda cara dri nika ku rii oraki risi ai ka oni si izi di wa kpo vua ka ama sa ama wa tro ki adi kidoa oni waka ni izi di iru `i anisa ani enzi tro ni di `i. Jo oko ani ondo bate ni iderega sa ma`di alusa vu dri dia oni wa di ruaru ra ani kolu iyo.
Jo esu izi dii vua ama sa ali le`jo ama dri cara si rii izi di dri ani ama le`jo alika okpo rii esu au. Ki Yesu ari ama enzi `ba rii, enzi ama dri `ia si vua le`jo alika a si pi. Enzi ama dri ri ia si jo esu ebu le`jo cara a rii au ri ama ia ma`di oludi lidri naa kole tro na aa ya? Ama cidru rii zeletia keko aci oludi tadru ri ia.
Ki laponyia cara drii vua Farazei `ba tro oniki te cara ni ana ovi rusijo rii si. Jo esu cara ni keburu anda ri ka ai di idu kendre aia le`jo alika ri ani ki cara Rubanga drii ri ohweru anyini `ba konia ai enzi tro ni ote rere ki esuki di ai ka enzi di ide aduta si ya ni ku a`dusi eriki ehwi ani kuru vua kaki ebu `a leti ego si.
Farazei `ba o`du disi rii kendre Farazei `ba sile buga ole ri ia ri ani, oniki te cara ni ovi ana rusijo risi oniki ehwi ani ku. Kaki kiza `a ehwi ni eri, oluka anda si vua anda Rubanga dri ni kole ini ai ofu loso lari dri si ausini aini rari jo. 
Farazei `ba ojo, “cara ojo amani ma`di di ani dii kole owa oni si kpo. Nyile nyi aduta jo?” oziki lazi ni, asi okpo dru oni tro dri `a oraki Yesu ojo ta alusa mgbwi na ku kaki tea Yesu kohwe aini drimgbo ni izi dii wajo oni si. 
Jo esu Yesu kali le`jo ni cara si `i, kaki ani sa ani wa tro. Ra `ai dri ni `ai kowa izi diti Yesu tro eritruwa si. Jo esu Yesu kojo owa izi dii ku kaki joa Yesu ka cara Rubanga dri ede, vua kaki ani wa Rubanga udaka si ra, ani avoro unzi rere ri `i! 
Ki Yesu owo vuru vua ka ta si ana dri pidi si vuru inyaku `a, oko aciki ani zika tro andraga, “nyile nyi aduta `jo `au? Nyi aduta si vuru au ya? Nya `i te ama lazi ni au `di. Nyi aduta `jo?” Kaki aia dripidi ni etede Yesu ni andrati vua kakiji ani ni ta josi unzi.
Diivu, Yesu iduru oru ojo aini ma`di anyi lofo enzi ako rii kido izi dii wale oni si ati. Diivu oko owo vuru di ka ta si ana dripidi si `ba ana tajole rii erika ra rii oniki aisa `ai enzi tro ni ote di idoki runzele alu alu. Ido `ba amba amba risi, eko ba ciriciri risi. Ebe izi di `bati Yesu tro ai ai eri.
 

“Ma`di Anyi Lofo Enzi Ako Rii, Kido Izi Di Wale Oni Si Ati.”
 
Enzi osiru ci rii ingwa?
Osiru ondo asiti ama dri iga vua 
bugu e`bu dri ia.

Yesu ojo aini, “Ma`di anyi lofo enzi ako rii, kido ani wale ati,” vua aci adraga ta sika tro vuru `i `ba amba ruduka ra ri ido runzeka` Farazei `ba amba rii enzi ideka nza rii migeni idoki aci ni. `Ba gaga ri ti ase vule ni oraki driso omba ama andraa vua omba izi di `i laga. Jo esu Yesu kojo le`jo ana jole `badi ni rii `ba ni ri nyi a`duta ide `au?
Yesu ori a`duta sire au vuru naa `i? Rubanga ni ama bidi rii, osi enzi ama dri kare mgbimgbi eri ga. 
Atijoa rii, osi enzi ama drii asiti ama dri `ia. “Enzi Yuda dri ri osiru kalamu aya risi; vua aya mula dri akadi risi osu aia asiti ga, vua kidori ai dri `a dri ga” (Jeremia 17:1). 
Rubanga kata jo amani Yuda ni, ana bale mbadi ama kare ga risi. Enzi `ba vudri ridri osiru kalamu aya si vua mula akadi riisi. Osiru ama asiti ga. Yesu owo vuru osi `ba cidru rii inziki ra vua ai enzi `ba.
Rubanga oni ote ama enzi ide vua osi enzi ni ondo ama asiti ga. Atijoa rii, osi e`bu ama idele ri `i, enzi ama dri ama idele ri tro, a`dusi ama cara andra kendre enzi `ba ani. Kendre enzi `a rusika ama asiti ga ri ani, mgbesa ama eraa ama enzi `ba jo andre cara ni ana rusika ama enzi `ba ni ni sa `i.
Yesu owo vuru ziniga vu erijoa risi idi ta sire inyaku `a. Bugu ole riisa ojo enzi ama cidru drii osiru bugu ebu dri `ia Rubanga nandra (Lete 20:12). Enzi `ba cidru ru `ai dri osiru bugu a ci. Oko osiru ma`di alu alu a asi ga sa ci. Enzi amadri osiru bugu e`bu dri `ia vua ziniga ama asiti ga. 
Enzi osiru ma`di alu alu`a asi nia ra, ciriciri rii amba ri tro. Ledii aini ta oe jole iyo Yesu ni andra `i ni `ausi. Ai, leka izi di waka rii oe konyi ako le`jo ana jole tia risi `i.

Enzi amadri sile ewo eri si nidi 
Karudi pi ni a`dunga?
Saa ama lari eyi dri vua ari Yesu dri 
a`ijo ama asi `a ri inga.

Kijo, anyesu ana lari ni ra, enzi anyidri sile bugu ebu dri ia rii karudi pi vua adi anya ru ni si bugu lidri dri`ia. `Ba aia ru ni esu ka aa bugu lidri dri `ia rii kovu `bua. E`bu loso aia idele rii ta aia idele vudri Opi Bu dri ni rii `i. Vua anda aidri tro osiru bugu lidri dri ai `bu `a ra, `Ba ayule enzi aidri ia pi ri keto kare oludi tadru ri iga tete ni.
Kole nyera enzi ma`di alu alu dri osiru kare eriga, diisi ma`di ka Rubanga ni unza kpe. Ma`dizi alusa enzi idedi ku kusa bate idedi ku ana asi ga `i na iyo ama cidru rii enzi `ba vua pelere ku.
`Ba layu Yesu dri ri esuka aia asiti ga kuru ri `bati kori enzi aia asiti ga risi dria dini sa au. Ta aia idele ri iga anda hwa alusa iyo. Ori ka ai ko Rubanga si vua `ba si sa ko a`dusi enzi a oluka aia asiti ga aa si. Ki jo a`iki ofu loso layu dri ofu loso eyidri vua Endri dri rii aia asiti ga ni, enzi cidru aia idele rusidi aia asiti ga rii rusika bugu e`bu dri ri ia rii tro cidru karuje pelere. A`dusi esuki layu enzi cidru aia idele ria driga si ra. 
`Bu `a nale Bugu Lidri dri rii aa. Ru `ba le`jo anda dri layu ofu loso eyidri vua Endri dri ri igenika ri `bati dri rii osiru Bugu a ci, diani disi kaki to Bu a ra. Kaki to `Bu a rii aia enzi ideka vudri dia kuru si ku, ki aia layu esuka enzi aia idele ria driga si aia layu ofu loso eyidri vua Endri dri ridri ri igenika ra si. Ad`usi dii ‘cara a`i dri `i’ (Roma 3:27).
Ma adrunzi Kristo` ba ri, laponyia cara drii ai Farazei `ba tro enzi `ba, kendre izi aia kole ondo bate iderega rii ani.
Saa ziti si, ideki enzi nza isa wa amala kaki ai unza aiangasi Vua kaki etedea `ba ziti ni sa tro ausi ojo dru ai enzi ako. Amba dini drii ogu waraga tro. Ai `ba Endri oguka ri `i, ojo ni leti zi si, ogu lidri dri `i. Kaki `bazi ti ini cara si okpo si ki a`ile ariki ru hwa kuru. 
Cara si ma`dizi alusa enzi ako ani iyo ki madizi karuba anda wa rii ana enzi ideka ra si ku ki a`dusi ari ani enzi cidru ri `ia ra si. Ma`di diani di a ru osiru bugu lidri dri `ia ci. Ta okpo ndedia ri di madia ru osiru gba bugu lidri dri `ia ra ya `i. `Ba oluka enzi ideka ako ni kpe si kole ari ama lari oludi tadru ri `ia si ama ru ni rusijo bugu a `i.
Ma`di ni hwijo `bua wa kole ka`i ofu loso rii vua anini hwijo ku koga ofu loso rii mgbe. Nyini kiza Rubanga dri ri esujo kole nya `i lari Yesu dri rini. A`duta ideru izi kole bate ga ri iru ni? Kode vuru ka ana mi ti abu ana andrati tro ci a`dusi oni ote ani kodra ra `i. Migeni ori owore ori tro vua enzi ruka tro `ba ka ta ce ri jo au vua ide `a ni jo dra eca ni `i.
“Oo Rubanga ani ta anda ri `i mani draka ni `i. Nya`i ma Endri ni nya driga vua kiza koko nyi masi ayi Yesu kiza koko nyi masi. Ai Yesu ni le ana lari dri esu jo.” Rubanga jo nyali le`jo madri ra a`di le`jo ali madri ra vua jo i`jo ma enzi ako enzi madri karuje pelere. Ani nya ebu `i migeni ori ka ta di `bati jo au. Izi ejile Yesu ni andra rii ojo mide unzi nyebe mani bate ma idele rii ra ni kuru. 
Izi ejile Yesu a andraga ri ojo Yesu ni, “Mide unzi, nyebe mani enzi bate dri ma idele rii ra ni kuru.” Ra rii ojo, “Opi nyihwe mani lari enzi ma idele risi. A`dusi jo idu enzi ma idéle rii pi, ma lari esu ra. Jo di ani ku ri, maya aci olure tadru ri `ia. Disidru ale layu nyidri rii ra. Ale le Rubanga dri rii ra, vua ale kiza koko ani masi.” Disidru oji ana mi ni ci ido enzi anidri rii ruka.
Vua Yesu ozi ani, “ba nyi isikika rii ingwa? Ma`di zi eberu alusa nya le`jo ni alile ku ya?” A`i, “iyo Opi.”
Vua Yesu a`i ojo, “jodini ri masa mali nya le`jo ni ku.” Yesu ali le`jo driaru kuru a`dusi odu enzi driaru pi ana batisimu abu Jurudano `a risi vua oje ani ra driia ma`di le`jo alire driaru rii izi di i`ku ki Yesu `i.
 

Ojo Dini, “Masa Mali Nya Le`jo Ni Ku.”
 
Yesu ali le`jo driaru ra ya?
Ali kuru.
 
Izi di iru tutu ocoru ra lari ana esule Yesu ni `a risi i. Ayu ani enzi driaru cidru ri `ia ra. Ama Opi Yesu ojo ani uhwe ama enzi a tini cidru ra vua ama cidru anda ana andraga `i.
Ojo amani aniani Bugu Ole ri `ia sa `i, odra kuruce dri enzi ama dria ti uhwejo, dii enzi amadri ana dule pi batisimu anidri risi abu Jurudano ni `a ri `i. Ari `ba cidru ana lari batisimu dri si vua ana lamgba kuruce dri risi. Ama cidru ole le`jo Yesu dri sile ci rii ra vua kole amako le`jo dii okpo. Oko di koba ama tutu cidru lari dri ri esu ra.
“Rubanga mani ta idele cuwi na nyandraga iyo. Ta loso aludisa ma asiga iyo. Ta zi mani idele nyini wa ani iyo te ma enzi `i. Ki ma`i Yesu ni Opi ma lari dri `i odu enzi madrii abu Jurudano ni `a si pi vua uhwe ti ani kuruce dri. Odu enzi madrii cidru batisimu si vua ari si mai nyi ra Opi.”
Dii ovi nya rarijo ri `i. Yesu `aci le`jo amadri alika tro andraga ku.` Ohwe amani okpo recojo baciri Rubanga dri `i dru: `Ba lari ana batisimu eyi si vua Endri si ri a`ika ri ni, odu aia enzi ni cidru pi vua oba engwiki ana andraga anda.
Ma ozi! izi na ariru ra. Izi kole bate a rii tutu ocoru ruaru lari ama Opi Yesu dri si nyi sa tutu karuco nyiru na ani wa. Ma`di ana enzi ni nidi ote vua Rubanga ni a`idi Endri tro rii ka tutu lari Rubanga dri dri esu ra. `Ba aia enzi ni a`ika Rubanga ni andra rii ka lari esu ra ki `ba aia enzi ni a`ika ku Rubanga ni andra rii esuki tutu lari dri ku.
Yesu odu enzi vudri rii pi (Yoana 1:29) enzidipi vudri dia ri `bati cidru ka rari wa rii aia Yesu ni a`ika si. Yesu ojo izi dini, “Masa mali nya le`jo ni ku.” Ojo ani ali le`jo driaru ni ku a`dusi odu enzi amadrii cidru pi vua ali le`jo driaru ama enzi si omba ama kare ga.
 

Kole Amesu Lari Yesu Ni Andra
 
Nzagodru rii ingo `i, le Rubanga
Dri `i ya nosi le`jo alika Rubanga dri `i?
Le Rubanga dri` i.

Farazei `ba, oni aia kole dri `a rii tro, oviru amba dini dri o`du disi rii tro, kaki cara `a driba ni nze nukuta si nukuta si. Oraki cara `a jokaa kole ide bate ku si, mgbesa jo ma`di ide ra kole owa oni si kpo. Oriki kaki izi di ndre mi unzi si kendre aile ideki bate kuru ani. Ki aile aiangasi kaki layu esu kpe vua kaki sa rari kpe. Farazei `ba ai laponyia cara dri tro kendre `ba loso ri ani vudri dia `i. Ki hwa `ba di ‘eri ani ku, “Masa mali nya le`jo ni ku.” 
Te izi kole bate `a ri eri le`jo anzo hwe`di dii ni. Jo nyi ma`di ana enzi ni a`idi ra ri `i, nyisa nyi tutu esu driaru ani ra. “Rubanga, ma bate ide ma lidri ni ga saa cidru si`. Ta ma nijoa dru kuru rii ma idekaa saa cidru si si.”
Jo ama`i cara ni ra vua le`jo lokugo ama dra vua kole amesu lamgba Rubanga dri ni kole ma Rubanga ni di ma ovi `i ayi nyari ma, Rubanga ka tutu co ama ruga lari anidri si ra. 
Le Yesu dri `i ofu loso eyi dri i` vua Endri dri `i oza le`jo alika Rubanga dri ra. “Masa mali nya le`jo ni ku.” Ali le`jo ama dri ga ku. Ojo, “aje anyi ra.” ama Opi Yesu Kristo ni Rubanga kiza tro ri `i. Ayu ama enzi cidru vudri ri `ia ra. 
Ama Rubanga ni Rubanga anda dri vua Rubanga le dri `i. Le eyi dri vua Endri dri onde le`jo alika driaru ra.
 

Ana Le Onde Ana Le`jo Alika Ni Ra

Ana ta ama jejo cidru rii a`du?
Adusi ana le onde ana le`jo 
alika ni ra.

Jo esu Rubanga `a okpo ana le`jo alika dri anda ani ikojo, ka le`jo ali enzi `ba dri cidru vua ka ai ze aci oludi tadru rii a ki le Yesu ni ama aridi lamgba kusa le`jo alika driaru si ani retu eze ana Ngwaapi ni alu tende rii Yesu `i. Yesu odu enzi ama drii cidru ama driiga vua oko esu lamgba ama kare ga dria `ba cidru ani a`ika Aridipi dru vua Opi dru rii kengwi ana `bara `i vua anda ana le `a le`jo alika driaru ndeka ra si oje ama cidru tau pelere.
Kole amanzo Rubanga ana le`jo alika amadriga andasi adite ku si. O`du zi alu Yesu ojo laponyi cara dri ni Farazei `ba tro anyivu le`jo dia ehwi ni su si, “Ta ma lele rii kiza ta azika nyadru ku meya `ba anda rii ungwere enzi rure ku ki meya enzi `ba ungwere au” (Mateo 9:13). `Ba ziti ka dria sa ti ‘ei indri tro azile Rubanga andra o`du cidru si vua kaki ilegi Rubanga nye`be ama enzi ni ra Rubanga ole ama azi ni ku ki a`i ama bale lari eyi dri vua Endri dri iga rii Ole oje ama ra vua ani kari ama tro ole ani kohwe amani ama leti ni vua ani ka`i ama a`i ni. Anyi di ndre cidru wa ya? Yesu ohwe amani ana lari anda rii au.
Yesu ole enzi ku ki ana le ni `ba vudri rini retu, `ba bile Rubangaa ovi si ri`i. Odu ra ana `ba bajo ana baciri `i vu oca rubire kuku dru vua odu enzi amadri pi ana batisimu si vua ari si Rubanga obi ama ama jejo anini amaru ni abujo ci Yesu ni vua ama bajo ana baciri `i dru. Dii ana le ama ta ana bile rini ri `i.
Jo esu Rubanga kali le`jo amadri cara si ama enzi `ba rii kole kodra ki ari ama ana batisimu si vua ana Ngwaapi ni lamgba hweka kuruce dri ama kare ga si nya`i ra ya. Esuki ta dia loku ni Ofu Oku `a sa tro.
 

Aroni Ka dri ti Indri Enzi Ti Uhwejo Ri Idri

Adi ka enzi Isaraile `ba dri ba 
indri lidri di indri ni?
 Amba azi ole ridri `i.

Enzi cidru vudri dia rii icaru pi a`i baka le`jo bugu Ofu Oku `a ri idri si vua batisimu bugu Ofu Oku `a rii drisi vua batisimu bugu Ofu Oku `a rii drisi vua batisimu bugu Ofu Udi `a ri drisi bugu Ofu Oku `a ri `ia rii kinya cidru a enzi Isaraile `baa idele ri karebe amba azi ole ridri `a dri tika indri lindri enzi ako rii dri si.
“Vua Aroni koti ana drini eritrawa indri lidri dia driga kojo ta unzi cidru baciri Isaraile dria idele rii aia dri okpo tro vua aia enzi ti tro koba indri di idri vua koko koze indri dii hwesihwesi a ma`di zi alu loso rii koji ni” (Bugu Levitikasi dri dri `i 16:21). 
Dii ovi aia enzi `a rebejo Ofu Oku `a rii enzi o`du cidru si ria ti uhwejo ma`di alu alu ka bilo angwa kusa indri enzi ako rii eji `jo lemu dri iga adi azia kidori dri ka ana dri ni ba anyuhwa azile rii indri naivu enzi driaru karuba azi azile na indri adi anyuhwa ni li ra vua ari ani adibaa aju kidori dri ri iga.
Ofu a ewa nisu kidori dri iga ofu di itede bugu ebu dri sile bugu Lete dri iga rii au 20:12 vua anyuhwa azile ria ari asedi rii uyia vuru si inyaku `a. Inyaku naka asi itede au a`dusi obi `ba inyaku si `ba ka aia enzi o`du cidru si ria ti uhwe leti diisi.
Ki, kaki azi enzi dudi ri azi o`du cidru si ni kpe, diani disi Rubanga oba kaki layu esu kinya alu a vu alu enzi aia idele kinya a risi. Tadi karide o`du mudri imba tuderijoadru ridri si, dii O`du Layu dri `i. O`du nasi, Amba azi Ole ridri rii, ani ma`di mba`di `ba Isaraile dri ria kare ga ri, ka indri eji eri koko ka dri anidri ri ti idri dia driga enzi `ba Isaraile dri ria idele ri ifujo driaru koko kazia Rubanga ni layu ejijo `ba Isaraile dri rini enzi aia idele risi.
“Aroni ka indri eji eri ka ana dri ni ba ai idri vua ka enzi `baciri Isaraile dria idele rii ula ruaru ausi enzi Isaraile `ba drii cidru kobaru indri di idri.”
Rubanga upe Aroni ni olule amba azi ole ridri`i dru Isaraile a ausi komba dru Isaraile `ba karega. `Ba cidru `a dri baka anyuhwa azi dru ria azire `a karega ma`di amba azi ole ri dri kidea ni a`dusi omba aia karega.
Ka enzi Isaraile `ba dri ula cidru Rubanga ni andra Oo Rubanga `baciri Isaraile dri ide enzi ra. Aru ta Rubanga kurii ra, anyo cara nyidri ra, amungwe nyaru ni ilili, abi ta Rubanga ku rii ekpadru vua ale ai onde nyi ra. Amba sabato a tani ole ku, aru ama ata ti ku, ama `ba di, bate ide, ama ta ogu avi ka ama ko vua ama uja `ba tro `i.
Ula enzi ni cidru. “Rubanga `ba Isaraile dri`i nosi ma`isa amba cara nyidri `a tani kuru amani lari esujo wa kole ma `ba madri ni indri nidri vua enzi madri karebe cidru driaru.” Amba azi ole ridri ka dri ti azi nidri enzi cidru `ba di dri karebe azi ni dri. Dritika `a ehwi ni ta idri ka (Levitikasi 1:1-4, 16:20-21).

Enzi ti uhweka karide ca 
ni ingoni Ofu Oku nga `i?
Dritika azi enzi ti uhwejo 
ri idri si.

Rubanga ohwe cara azi azijo rii `ba Isaraile dri rini ausini kaki enzi aidri ri ifu azi azile ria ruga vua ausini kaki layu esu enzi aia idele risi ra. Ohwe cara ojo ma`di enzidipi rii kole duba keji azi azile ana enzi si rii kole kolu nyuhwa luzu ako ri `i odi kodra ma`di enzidipi ria kare ga. Layu ti rubadi ma`di alu alu enzidipi rini layu esujo ana enzi si rii karide ondiku sa ledi ani.
Lokudru, O`du Layu dri risi, azi enzi ebejo dii adi dia kpo a`diko adi ari ani ji uyile kare Ole ri iga vua jale kare egbwe a rijo ri iga vu tuderi. Diani disi, `ba Isaraile dri ri `bati ka layu esu enzi cidru aia idele kinya a ri `ia si o`du mudrijoadru imba tuderijoadru ridri si.
Amba Azi Ole ridri rii kohwi kare Ole ri iga azi azire a`dute, ki `ba laki dru ri `bati le karutra angwe esi kaki lungu i`le amba azi Ole ridri ria kanzu niti ria owoka ni ute. Ari azi di dri ri uyire kare egbwe a rijo ri idri rii lungu di isa kowo vu tuderi. Diivu `ba cidru kido anzoka enzi cidru aia idele ria rujeka pelere si. Lungu idele mula dia owoka si di ka ta driba nze u`duku Ofu Loso anzo hwe`di ridri ri idri. 
Ani ta loku ri `i ku jojoadru Yesu ole `bazi `bati manyiadru ri `i vua ohwe lari anidri riisa aini ni `i. Yesu odu enzi cidru `ba cidru a idele vudri dia rii pi batisimu ana esule risi. Ide tadii layu hwejo ama cidru ni enzi ama idele vudri dia risi. Enzi amadri rii kole kojeru pelere ni o`du cidru si ku, disidru enzi ama idele rii ojeru pelere vu alu a`dite ate tri. 
Ofu Oku ri `ia, layu karesu `ba trika si vua ari azi azile ridri risi. Aroni ka dri anidri ri ti indri lidri ria driga `ba amgbu andra si koko ka enzi cidru `baa idele kinya a ri ula koko kifua indri dia ruga. Ka enzi dii ifu indri diiru Isaraile `ba amgbu andra si. Enzi `ba cidru dri ri koya ingo jo Amba azi ole ridri ri oti dri anidri indri ebele kulala ria driga ni `i? Enzi dii cidru karifu indri dia ruga. 
Diivu, indri dii a`diko adi jia hwesihwesi a ‘dri ma`di anda ridri si.’ Indri dii, enzi `ba Isaraile dri ria idele rii cidru karifu ruaru, adi droa foru dri kare eyi ako vua ayise ako ri iga. Indri dii, diivu, kaci foru di idri itu aci ri idri paka kofu dra. Indri di kodra enzi `ba Isaraile dri ria idele risi.
Dii le Rubanga dri ri `i, dii le ana layu dri `i. Dii ovi `ba Isaraile dri ria layu esujo enzi cidru aia idele kinya a risi o`du nainga ri `i. Ki dria ama olu saa Ofu Udi ridri risi. Yesu emu vudri dia oji dria kinya 2000 ni ra. Emu vudri dia kendre tia `a rubaka ra ri ani bajoadru le`jo cidru driba nzele Ofu Oku a rini engwijo anda. Emu vudri dia vua ohwe amani laku enzi cidru ama idele risi ra. 
 

Ama Jejo Kusa Ama Arijo Cidru
 
YESU a ehwi ni a`du?
Aridipi ni `ba anidri aridi aia 
enzi ni` a ri `i.

Olaki bugu Mateo dri rii 1:20-21 tro. “Ora ana asi ga tadi ideka, ki malaika Opi dri itederu anini orobi si ojo `Yozefu, ori Davide, ori koko nyi Maria ni a`ika nyini izi dru si ku, a`dusi oko `ba aga dii okpo Endri Ole ridri si. Keya ka `barago ti ra vua kole nyida ru ani Yesu `i a`dusi kua keya ka `ba cidru ari aia enzi nia ni`” (Mateo 1:20-21). 
Ama ata ni `bu a rii airu zaa ago nidi ku Maria dri ana Ngwaapi ni ezejo vudri enzi cidru vudri rii dure pi eze malaika Maria dri ojo, “Ori ta ku Maria,nyeya nyi `ba ko aa ra vua nyemu nyi tia ago vua kole nyida ru ani YESU i.” Ehwi ani `barago Maria a tile nidii keya kolu Aridipi `i. Yesu Kristo a ehwi ni ma`di ka `ba cidru ari aia enzi nia ri `i, leti ali si, Aridipi `i.
Ki jodini ri, Yesu ari ama ama enzi nia si ingo ni? Leti ovi Yesu a enzi amadri dujo rii ana batisimu Jurudano a si ri `i. Yoana Batisita ohwe anini batisimu di, enzi vudri rii cidru obaru driaru. Anyiba olaki bugu Mateo dri 3:13-17.
“Yesu enga Galilea ga emu a`bu Jurudano ni ga batisimu kore Yoana dri. Yoana ole tadi gaka mgbe, ojo, batisimu le`di nyidri rii ma`i, ki nyiko nyemu madri ya? Ki Yesu a`i : ‘‘Nyebe tadii kolu bo`bo dru dini ama tadi ideka dini ni ama anda Rubanga a lele ri ide au.’’ Disidru Yoana oko a`i ra. Yesu oko batisimu, oca saa zere kuru, efu eyi a pi, mgbesa `bu awiru mgbo, vua ondre Endri Rubanga dri endre`di amamu ani rii esi ana dri ga. U`duku engare `bu `a rii ojo ‘‘Nyi ma Ngwaapi ma lele ndro ri `i, ma le ni kpo nyi ru.”
Yesu oya Yoana Batisita dri enzi ama dri `a ti ni uhwejo. Oya eyi nia vua ilu ana dri ni Yoana ni andra. “Ojo Yoana, nyihwe batisimu mani dria `i. Ide tadii dini ni anda anda Rubanga dri ri itede jo. Kendre ana enzi vudri ri duka cidru ani `i ri ani ojo ma enzi `ba ayuka ma`i enzi `a si, kole ma du ana enzi ni batisimu si. Nyihwe mani batisimu driadru! Nyiba ide!”
Nyiba ide ta dini bo`bo dru dini ama ta dii ideka dini ni ama anda Rubanga dri ide au. Yoana ohwe batisimu Yesu ni `abu Jurudano ni `a vua saa nasi anda Rubanga dri enzi dujopi rii inzaru ra.
Dii ovi ana ama enzi ni dujo pi rii enzi ama dri cidru obaru driaru nyeri dia ehwi ni ra ya? 
Nya`i layu batisimu dri vua Endri dri vua nyiko nyariru ra.

Anda anda ide ru ingoni
Kusa iko ru ingoni?
Batisimu Yesu dri si.

Rubanga icara ati Isaraile `ba ni enzi vudri rii ka rudu pi dritika vua azi azile enzi ti uhwejo rii si. Ki rusa ana oluka ta okpo rii `ba cidru ni dritika indri ni dri si Rubanga upe Aroni ni amba azi ole ridri `i dru ausi kazi azi ni `ba cidru ni karega dii si ka enzi `ba dia idele kinya a rii idri anyuhwa azile azi dru ria dri ga vu alu di. Dii ana ciri `i vua ana okpo lari dri `i. Rubanga ni ciri vua ta anzojo ri `i.
Eze ana Ngwaapi ni `ba vudri ndutu ri arire. Dii si azi enzi ti uhwejo rii baba aa dria kole ma`di mbadi `ba cidru ni karega rii kole kolu aa ma`di dritidi Yesu nidri ausi enzi vudri rii kari dru driaru ri `i. Ma`di ani dii Yoana ni batisimu hwe`di rii osiru bugu ole ri `ia ra Rubanga eze ma`di mbadi `ba cidru ni kare ga rii Yesu ni ati. 
Ani Yoana ni batisimu hwe`di amba azi ole riidru `ba dri `i. kendre ana rusika Mateo 11:11ga, “Ba cidru Ukunzi `a tile rii lofo ma`di alusa Yoana ni batisimu hwedi rii ndedi ra rii iyo ri ani.” Ani te ma`di mbadi `ba cidru kare ga ri `i. Eze Yoana ni mbadi `ba cidru ni karega rii ausi kohwe dru batisimu Yesu ni vua kidri dru enzi cidru vudri ri driaru.
Jo dria `ba bilioni azia kovuki cidru Yesu dri vua kotiki aia dri ni driaru ri nyitiri aduta ka ride ni? Jo `ba bilioni azia ni ndekara vudri ri ovu Yesu dri ni `ba ka aia ovi ni ndre kpe. `Ba ziti vico retu rii tro rii ka aia dri si dri ani ipi ausi dribi driaru isa kozo vuru pi dii si Rubanga ni ana ciri tro upe ma`di alu Yoana ni mbajo `ba cidru ni kara ga ausi kidri dru enzi `ba cidru dri Yesu ni dri vu aludi ate tri.
Osiru Mateo 3:13 ga “ Yesu enga Galilea ga emu a`bu Jurudano ni ga batisimu kore Yoana dri.” Di ideru esu Yesu `a kinya ni 30 oli Yesu a ru ni o`du 8 si ana oti nivu vua naivu ta osiru ana driga ndi kinyaa ni ate 30 kpa.
Ra Yesu a cajo ndi kinya 30 rii ausi kengwi amba azi ole dri `bu a esidi cara si ca ri `i kendre ana ruleka Ofu Oku a ri ani si `bugu cara erijoa ridri iga Rubanga ojo Mose ni ma`di mbadi amba azi ole ridri `i dru wa rii kole kinya ani kate 30 kpa odri ebu ta azijo rii ido idele `i. Yesu ni amba azi ole ridri `bua ri `i, nya`i dii ra ya?
Bugu Ofu Udi `a ri iga Mateo 3:13-14, ojo, “ Yesu enga Galilea ga emu a`bu Jurudano ni ga batisimu kore Yoana dri. Yoana ole tadi gaka mgbe, ojo, batisimu le`di nyidri rii ma`i.`” Ma`di mbadi `ba cidru ni karega rii adi `i ya? Yoana Batisita `i. Dria ma`di mbadi `bu ni karega rii adi `i? Yesu Kristo `i. `Ba mbaka dri dru rii esuki ru ni. Ki dria ndedia rii adi `i? Ledi le, amala ma`di mbadi `bu ni karega ri `i. 
Disidru Yoana Batisita ni, ori kowo `ba dini dri ndreka amba dru o`du nasi ri `bati ni, “Ini boro `a ngwanzi! Anyiru anya enzi ni! Disi oko omu ani Yesu nandra laru si. “Batisimu ledi nyidri rii ma `i, ki nyidri iko nyemu madri ya?” 
Saa nasi, Yesu ojo, “Nyebe tadii kolu bo`bo dru dini, ama ta di ideka dini ni ama anda Rubanga a lele ri ide au.” Yesu eya vudri dia anda Rubanga dri idere au, vua oko ideru ra Yoana ohwe batisimu laka ni.
“Disidru Yoana oko a`i ra. Yesu oko batisimu, oca saa zere kuru, efu eyi a pi, mgbesa `bu awiru mgbo, vua ondre Endri Rubanga dri endre`di amamu ani rii esi ana dri ga. U`duku engare `bu `a rii ojo ‘‘Nyi ma Ngwaapi ma lele ndro ri `i, ma le ni kpo nyi ru.”
Dii ta ridedi rii ohwe anini batisimu di `i. Joti `bu dri rii awiru mgbo Yoana Batisita ohwe batisimu laka di `i vua odu enzi cidru vudri rii pi.
“Engajo o`du Yoana ni batisimu hwe`di ri a eyajo risi, eca ndi endru, ‘ba ka opi bu dri afu okposi, vua `ba afukaa okposi ri kipaa ni” (Mateo 11:12). 
Profetaa cidru vua cara Rubanga dri tro onze ta driba paka Yoana ni batisimu hwe`di ri inga. “ Engajo o`du Yoana ni batisimu hwe`di ri a eyajo risi, eca ndi endru, ‘ba ka opi bu dri afu okposi, vua `ba afukaa okposi ri kipaa ni.” `Ba cidru batisimu anidri a`ika ra rii kohwi Opi `bu dri iga kala ako.
 

“Masa Mali Nya Le`jo Ni ku”

Ali le`jo Yesu nidri kuruce dri a`dusi?
Adusi odu enzi ama dri cidru pi.

Yoana Batisita ohwe batisimu Yesu ni ni vua odu enzi vudri rii cidru pi. Vulega, ojo izi kole bate iderega rini, “Masa mali nya le`jo ni ku.” Ali le`jo izi di idri kuru a`dusi odu enzi vudri rii cidru pi Jurudano `a vua anidru gba ni ali le`jo driaru au izi di iku enzi nasi `i. 
Yesu odu enzi cidru vudri rii pi ama ndrea wa ori ai kodi ana icandi esuka kuruce dri rii dii ingo pi yasi a`dusi `enzi `a musara ni dra`. Ilegi Rubanga dri vu ina ausi kodu dru lamgba dii pi si ta dii cidru ideru be oliveti nidri. Yesu ni ru ari tro kendre `ba cidru lidri rii ani diisi ana oluka ori icandi si `a ehwi ka reri wa Yesu `a ari ni kole kora anini lamgba na ikojo `i.
Kendre azi enzi ti uhwejo ofu oku `a ri ani kole ari `a kora aniru enzi ti uhwejo `i ri ani. Kolea kazi ru kuruce dri odu enzi vudri rii ndutudru ra dria `i vua dria kole kohwe ana lidri ni ama jejo `i, oni ote kole ali le`jo ani dri Rubanga ni andra ra `i.
Enzi Yesu ni asi iyo, ki enzi cidru ria ridrika driaru batisimu si si Rubanga kole kali le`jo ana Ngwaapi ni gba rii idri` atijoa rii ohwe ana le ni ama lari ni. Disidru kole ali le`jo Yesu nidri kuruce dri.
Masa mali le`jo nyidri ku enzi cidru amadri rii ama idele andidru kusa andidru ku rii, nile ote kusa nile ku rii kole Rubanga kali le`jo driaru ra.
Ki rusa Rubanga ali le`jo amadri ku Rubanga ali le`jo Yesu nidri, ani ma`di ama enzi ni dudi cidru batisimu si ri `i. Rubanga ole ani kali le`jo enzi `ba drii ra a`dusi ana le si, vua asi egbwe si. Ana batisimu si vua ana ari osudi kuruce dri riisi ana le ama jejo riisi. “Rubanga a `ba vudri rii leka ndro si eze ana Ngwaapi ni alu tende rii ausini `bacidru ani a`ikara rii kudra dru ku ki kesuki dru lidri tadru rii” (Yoana 3:16). 
Dii ovi ama ana le ni nijo ote ri`i. Yesu ali le`jo izi kole bate idere ga rii idri kuru.
Oni ote ani enzi tro oko ani ondo bate ni iderega. Enzi driaru te asi `a adite ku ki oji rua sa tro. Leti zi alusa ana enzi ni gajo mgbea ni iyo. Ki rusa ana a`ikaa Yesu o`du ana enzi cidru rii pi si, ariru ra. Jo ama `i laje Yesu a ama jejo rii ra, ama rari ra. Nya`i! Ani ta ondo nyi ikonyidi au ri `i.

`Ba tutu `a rucore ruaru 
nza rii ingo `ba `i?
`Ba enzi ako ri `i.

`Bacidru ide enzi ra `bacidru ide bate ra ki `bacidru ali le`jo ai idri aia enzi si ku ama cidru enzi`ba ki `ba laje Yesu kristo dri a`ika ra rii enzi ako aia asi ni ga `i ma`di alu sa lari Yesu dri a`idi ra ria asi ni egbwe rere. `Ba ayule aia enzi ni `a pi rii Yesu nia ai leti zi si ai `ba anda ri `i.
Rubanga ojo ana ta asi egbwe drii bugu Roma dri 4:7 ga, “Ba Rubanga a ta ego ego ai dri ebere rarii vua `ba ana enzi aidri ebere ria andra adu.” ama cidru ka enzi ide ndi ama drajo ri inga. Amba cara ta ndutudru ku Rubanga ni andra `i amani cara driaru ria ta jole rii ote sa amaci enzi ideka tro ama a`wi ako.
Ki Rubanga ayu ama batisimu si vua ari ana Ngwaapi ni alu tende ri dri si vua ojo amani nyi `i vua ma`i ama enzi `ba ku, vua ama `ba anda ri `i ana andraga `i ojo amani ama ana `baciri ti `i. 
Ofu loso eyi dri vua Endri dri rii ofu loso lari oludi tadru ridri `i. Nya `i ra ya? `Ba a`ika ra rii ungwe ai `ba anda ri `i, `ba jele rari`i, vua ana `baciri `i. Ma`di asi egbwe rere vudri dia rii adi `i? Ma`di a`idia rari `i vua ayule ana ofu loso ce rii a`ika si ri `i. Nya yu ru ra ya?
Yesu oga nya enzi ni duka mgbe ya? Alusa dini ku, odu nya enzi ni cidru ana batisimu si nya `i ani dii vua nyi `ba oje nyi enzi nyidri `ia pi. Olaki Yoana 1:29 ni au.
 

Kendre Nyiraa Wekaa Yuhwe Si Rii Ani.

Enzi Yesu `a dule pi rii si?
Enzi vudri rii cidru.

“Obu zi Yoana ondre Yesu keya anidri esi, vua ojo nyindre, `Biloangwa Rubanga dri enzi vu dri dudi ri `i!`” (Yoana 1:29)
“Nyi! biloangwa Rubanga dri enzi vu dri dudi ri `i!”
Yoana ni batisimu hwe`di rii idri enzi cidru vudri diarii Yesu ni biloangwa Rubanga dri enzi vudri dudi ri iru. Odu ana olokodri ga enzi vudri rii cidru si pi.
Enzi cidru vudri rii kata jo enzi cidru `ba oluka vudri ria idele rii indri, idojo o`du ta bijo riisi ndi ana ekojo rii inga kinya amvu 2000 dria `i Yesu odu enzi vudri rii cidru vua oje ama enzi dri `a ra, kendre biloangwa Rubanga dri ri ani odu enzi ama dri rii cidru pi vua ali le`jo driaru ama kare ga.
Enzi cidru` `baa idele rii oba Yesu nidri engwi biloangwa Rubanga dri enzi vudri dudi ri `i. 
Yesu eya vudri dia ma`di rumudi ci rii ani vua ma`di enzi `ba aridi cidru rii ani ama enzi ide a`dusi ama awi ako, unzi, anita ku vua a`dusi ama enzi`ba lali vua ndutudru ku ri ‘i’ lete zisi ama enzi ide a`dusi amesu enzi ama a`bi ni ru enzi dii cidru oweru pi vua obaru Yesu ni dri ana batisimu si abu Jurudano niga iko ana dra rusi rii si kuruce dri. Ose ani ra ki Rubanga inzi ani lidri di o`du inajoa riisi.
Kendre Aridipi enzi `ba dri oja ndedi ra ri ani kedre ma`di le`jo alidi rii ani, dria ori Rubanga `a dri nyare ri iga ani ni ta ama jejo idi idi ni iyo. Ta te amani idele rii ama ani a`ika amani rarijo `i. Lidri oludi tadru rii ka `ba a`ikaa ra ri te vua rivoloka ka` ba a`ikaa ku rii te. Tazi amaa upele di ni iyo.
Yesu ayu nyi ndutudru nyi ma`di asi egbwe rii vudri dia `i nyi dubasi enzi idere andraga `i nya awi ako si ki odu enzi ledi ti isa tro. 
Enzi olu dri nya asiti ga aa ya? —Iyo—
Iyo Yesu odu ai cidru ya? oo ide ani ani.
`Bacidru rii oviru vi ma`di zi na ndedi ra rii iyo ki kendre `ba amgbu `a oluka dranga ri ani, ziti koraa ai enzi `ba ku ki gba ta loku rii ai enzi `ba vudri dia `i kendre yuwe cuwi enzi izojo ri ani.
Jo ukunzi ebe aia ei ni ra kaki aia ti ni ifo ika,kaki adu tri aia andrati ga ci, kaki dribi iyi ra, kaki bongu pelere rii su au vua kaki mvuka ofu rii su au. Ago sa kovu `ba driga lika rii drii ausi oli aia dri bi ni ra si, kaki ai su cuwi cuwi sati pelere rii vua tayi esidi ca rii o`ika au si.
Kendreki pelere opi ani angwe esi sa a ga ai andi rere.
Silingi koba `ba asi kegwi egbwe wa ya? Ru egbwe koba `ba asi kegwi egbwe wa ya? iyo. Tete lari oludi tadru rii, lebe enzi cidru dri `i koba `ba asi kengwi egbwe rii ni. Jo sa ma`di `a asi kendre angwe esi egbwe sa ani ma`di kiza ri `i jo enzi asiaru aa `i ma`di di ani di kolu ori le`jo alika dri tro `i.
Ma`di jele ra ria asi ni okpo kedre ebi ani, josa angala `a sa `i. Enzi asiaru iyo manzora Opi nyari enzi dipi ma ani rii au si `i, idu ma enzi ni cidru pi ani ote mesi ku nya le ni esule `i ki ma nyi ecu nya ma arika si, oje ma enzi ni cidru rii tadru e`ku kolu Rubanga ni.
Ma`di jele ra rii loku asi egbwe ri `i ma`di tutu ana kiza laje dri esudi rii asi egbwe ri `i. 
Adusi Yesu ni, `Biloangwa Rubanga dri enzi vudri ri dudi ri `i,` odu ama enzi ni cidru, ama draa enzi ako. `Iko` lari ama drii kuruce dri si. Enzi amadrii cidru nya enzi `i vua ma enzi `i, cidru `obaru enzi vudri ri `ia tro,` disidru, ama cidru ari ru ra.
 

Rubanga A Le Si

Enzi kolu ama asi ga aa ya
Jo ama Yesu ni `a `i?
Aludi sa, ani ani ku.

Ma ozi, izi kole bate `a rii a`i le`jo Yesu dri ra vua ariru ra. Ana odo osiru Bugu Ole ria ci a`dusi tutu ocoru ruaru ana lari oludi tadru rii si ki rusa dranga `ba laponyi cara drii Farazei `ba tro ofeki pi Yesu ni andra si `i.
Jo nya `i Yesu ni ra `bu ka nyite ni ki jo nyebe Yesu ni ra nyi ya aci oludi tadru ri `ia. Jo nya`i ta anda ana idele rii ra naa kendre `bu ani ki `jo nya`i ana e`bu ni kuru naa kendre aci oludi tadru ri ani. Laje ana ama jejo rii ma`di alu alu ni ebu idejo anini ku ki lari Yesu dri ni.
Ola Eberei 10 ni. “Lokudru Cara ni ovi ta loso emu`di ri ite`de `di ri `i ; ani ovi ta loku ridri `i ku. Disidru azi alua azile di di kinya cidru si rii kate `ba Rubanga orika ri ecole esile ca ni kpe. Kesu kolu dini ku ri, azi alusa azi di ku, a`dusi `ba Rubanga orika rii kareco esile ca ni vu aludi kate tri, vua oraki ai enzi tro ni ku. Andirisi karide mgbi. Azi di bati kinya cidru si ka ai ikonyi enzi aidri erajo didi ; a`dusi ari moni dri indri dri tro ri ka enzi du kpe. Dii le`jo Kristo a eyajo vudri ri inga `jojoadru Rubanga ni-Ile ta azile rii ku, ki ibi mani ru ra. Anzo oko nyi azi cidru igwele igwe vua azi enzi ti uhwejo risi ku. Disidru ajo, ‘Rubanga, ma ta nyi a lele ri idere ga baba ; kendre ewo Bugu Ole ridri a joka madri ri ani.’ Ati Yesu ojo ‘Ile ta azile rii ku vua anzo oko nyi azi cidru si, azi igwele risi, vua azi enzi ti uhwejo risi ku, jo tadi ba kaziru Cara Mose dri a lekaa ri ani sa `i. Ziniga ojo ‘‘Rubanga ma ta nya lele ri idere ga baba,’’ ri `i. Kristo odu azi ati rii azi erijoadru rii `bajo. Yesu Kristo ide ta Rubanga a lele ani kide rii ra, vua azi ana ru ni vu alu ate tri ausi eco ama ole” (Eberei 10:1-10).
Le Rubanga dri si Yesu azi ana lidri ni enzi amadri dujo vu aludi ate tri vua ali le`jo driaru vu alu oko onzi draga ra. 
Disidru eco ama ole. (Eberei 10:10) osiru ti vu kendre ta koji ridesi ani risi ndutu dru `i. Ehwi ani laje ana ama jejo rii ideru ndutu dru ra vua razi amani erajoa dru didi ni iyo ausi eco anyi ole.
“Ba Yudei dri ta azika Rubanga ni ri cidru ka ebu ide o`du alu alu si, ka azi alua enzi dudi kpe rii angwa didi ki Yesu ni ta azi di Rubanga ni di azi anidri azi enzi ti uhwejo rii vu alu ate tri, kendre Bugu Ole ria joka ri ani, ori Rubanga `a dri nyare rii iga `dria ka ana o`ja`bazi ni baka ani pagada ni ute. Azi anidri aludi ana azile disi eco` ba ani dri esiki ca vua eco ai ole liri” (Eberei 10:11-14).
Eco anyi ole tadru jo nyide enzi o`bu ri nyengwi enzi dipi di ya? Yesu odu enzi ledii pi kuru ya? Odu pi odu enzi nya idele o`du andraga risi riisa tro. 
“Endri ole ri onze amani le`jo ra; ana driso ta di jore kuru rii, `Ojo dii cara ma eyale ma bale aitro o`du nabati `a vu ga ri `i, Opi okpo tro ri ojo ta dii ni: ma cara madri ba aia asiti ga, vua meya masia aia uje ni a.` oko inza ojo, `ta unzi aia idele rii cara ako aia idele rii tro meya mera ai di ku.` Kare ta di bati ebere ra ri iga azi zi enzi ti uhwejo ri oleru di ku” (Eberei 10:15-18). 
Le`jo ehwi `kare ta di bati ebere ra ri iga ni dia` ehwi ni ani odu enzi vudri rii cidru pi `i. Yesu ni ama Aridipi `i, ru eritruwasi ma Aridipi `i vua nyisa nya Aridipi `i. Yesu ni igeni ki ari ama ni. Dii layu retugodru Yesu si Rubanga a ti ubale ni ri `i. Nyi `i vua ma `i, ru layu esuka ama enzi nia ra dia andra ni kpodru adu! 
LIST Download FREE eBook & AudioBook