- All e-books and audiobooks on The New Life Mission website are free
- Explore multilingual sermons in global languages
- Two new revised editions in English have been released
- Check out our website translated into 27 languages
A konglam 3: Thlarau le Ti thawngtha bia
[3-1] Zungzal Tlanhnak (Johan 8:1-12)
“Cun mi vialt kha an inn ah an tin cio i Jesuh cu Oliv tlang ah khan a hung kal. A thaizing zingkate ah biakinn ah cun a kal than. Mizapi nih an pumhhnawh i a cawnpiak hna. Phungbia cawnpiaktu saya hna le Farasi mi hna nih khan, minu pakhat va cung in pa aa duh lio i an tlaih mi kha an run luhpi i zapi hmai ahcun an dirter. Jesuh cu an thawh i, “Saya, hi nu hi pa aa duh lio hrimhrim ah an tlaih. Kan phung ah Moses nih nawl a kan pek mi cu, cu bantuk minu cu lung in thi lak in cheh hrimhrim awk a si lai, ti a si. nang, zeitindah na ruah?” an ti. Hiti in bia an hal cu amah kha hneksa i bia ngeihter khawh an duh caah a si. Sihmanhsehlaw Jesuh cu a kun i vawlei ah khan a kutdong in ca a tial. An hal chih lengmang caah ding tein a hung thu i, “Nan lak ah sualnak a tuah bal lo mi nih chep hmasa bik seh,” tiah a hun ti. Cun a kun i vawlei ah ca cu a tial than. Cu bia cu an theih tik ah pakhat hnu pakhat an i zukphiak dih, upa pawl kha an i zuk hmasa. Jesuh lawng cu a tang i a pawng ah cun minu kha a dirk o. Ding tein a hung thu i, “Minu, khuazei ah dah an si dih? Nangmah sual phawtu ding ah pakhat hmanh an tang kun lo maw?” tiah a it. Minu nih cun, “Bawipa, ahohmanh an tang lo,” tiah a leh. Cu tikah Jesuh nih, “Kei zong nih sual kan phaw ve lo. Va kal law a sual ve va sual ti hlah,” tiah a ti. Jesuh nih annih cu a thawh than hna i, “Keimah cu vawlei ceunak ka si. Keimah a ka zum mi paoh cu nunnak ceunak kha an ngei lai i mui lakah an vai lai lo,” tiah a ti.
Jesuh nih sualnak zeizat dah a hnawh?
Vawlei sualnak dihlak
Jesuh nih zungzal tlanhnak a kan pek. Jesuh kha a khamhtu le a Bawipa a zum mi paoh cu khamh khawh lo minung hi vawlei ah an um lo. Kan dihlak tein a kan tlanh dih. A sualnak kong ah lungrethei peng an um a si ahcun Jesuh nih tipil a innak le vailam cung thihnak a intuarnak hmang in a tlanh cang hna nak an hngalhfian lo caah a si.
Khamhnak biathli hi kan dihlak in kan hngalh i khamh kan co ding hi a biapi tuk. Jeush nih tipil a innak in kan sualnak vialte a lak dih cang i vailam cung ah kan sualnak ruang ah dantatnak a tuar cang.
Kan sualnak dihlak in tlanh kan si cang nak le Thlarau le ti in khamh kan si cang nak hi na zumh a hau. Midingfel ah an sertu a dawtnak lianngan khan a zumh a hau. Vailam cung le Jorda tiva ah na khamhnak an tuahpiak cang mi khan zum tuah.
Jesuh nih kan sualnak kan thuhnawh mi vialte a hngalh dih. Mi cheu nih sualnak kong ah a palh mi ruahnak an ngei. Sualnak cheu khat cu tlanh khawh a si lo tiah an ruah. Jesuh nih pakhat hmanh tang loin sualnak vialte a tlanh dih cang.
Hi vawlei cung sualnak pakhat hmanh a nganh ta mi a um lo. Hi vawlei cung sualnak vialte a hnawh dih cang caah biatak cu misualfa an um ti lo ti hi a si. Thawngthabia nih na sualnak vialte in an tlanh cang ti kha na zum maw? Pathian kha sunparnak pe dih ko.
Vacung Pa Aa Duh Lio ah An Tlaih mi Nu
Vawlei cung minung zeizat nih dah vacung pa an i duh?
An dihlak in
Johan 8 ah vacung pa aa duh minu le Jesuh nih a khamhnak kong kan hmuh. Minu nih a co mi vel kong hi chim ka duh mi a si. Vawlei cung minung vialte nih vacung in pa an i duh ti cu a har ngai mi thil a si. Asinain minung vialte nih an tuah dih mi a si.
Na zumh lo a si zong ah, kan tuah lengmang cang ah tuah lo bantuk ah na ruah cang caah a si lai. Zeiruang ah? Kan nunnak ah vacung pa duhnak tamtuk he a nung mi kan si.
Johan 8 nak i minung kong ka zoh tik ah, kan dihlak in vacung pa ai duh lo mi kan um hnga maw ti hi ka ruat. Vacung pa aa duh lio ah an tlaih minu bantuk in kan dihlak in vacung pa ai duh mi lawngte kan si. Kan dihlak in kan tuah dih ko nain a tuah lo bantuk tein kan i umter.
Ka palh tiah na ruat maw? Ka palh hrimhrim lo. A chung ah tha tein zoh hmanh. Vawlei cung minung vialte nih an tuah dih. Lamcung ah ai chawk mi nu an zoh tik ah an sual cang. An ruahnak le thinlung chung ah vacung in pa an i duh diam cang.
Kan tuah ko ti kha an hngal lo. Cheu khat le bang cu an thih tiang in vacung pa kai duh ti kha a ruah awk an hngal lo. Tlaih a tong mi zong kan um i tlaih a tong lo mi zong kan um ve. Minung dihlak nih an thinlung in an tuah dih, a cheu khat nih tuahsernak in an langhter. Cucu kan nunnak cheu bang a si ko lo maw?
Na lungdong maw? Cucu biatak a si. Ralring tein kan um i kan langhter sawhsawh i a si ko. Tuchun minung hna nih nifate vacung pa kan i duh ti kha a ruah awk an hngal lo.
Minung nih a thlarau zong in vacung pa ai duh. Pathian ser mi minung nih, hi vawlei ah thlarau lei in vacung pa kan i duh ti kha a ruah awk kan hngal tawn lo. Siasal dang biak zong kha thlarau lei vacung pa duh a si, zeicahtiah Bawipa lawnglawng hi kan va cu a si.
A sual lio ah an tlaih mi nu hi nangmah le keimah bantuk minung a si ve i nangmah le keimah tlanh kan si bantuk in vel a tingco ve mi a si. Asinain Farasi pawl nih mi hmai ah an dirter i an kutdong an sawh chih hnu ah lung in cheh an timh rih. Anmah cu zeiti hmanh ah vacung pa ai duh bal lo te bang le a thianghlim ngai bang in minu cu biaceih an timh.
Khrihfa sualnak tamtuk ka ngei ti ai hngal mi hna nih cun Pathian hmai ah midang kha bia an ceih bal hna lo. Cunak in, kanmah zong nih vacung in pa kan i duh ve ti kha an hngalh i Pathian vel kha an tinco. Misual ka si i vacung in pa ai duh mi ka si ti a hngal fiang mi lawng Pathian hmai ah khamhnak a tingco kho mi an si.
Ahodah Pathian Vel A Co?
Ahodah Pathian vel a co?
Ai tlak lo mi nih
Pathian hmai ah thianghlim tein a nung mi le vacung pa ai duh bal lo mi nih maw Pathian vel an co, Pathian hmai ah ka sual tuk, vacung zong in pa kai duh tiah a phuang mi nih dah Pathian vel an co? Vel a co mi cu a luangliam mi Pathian tlanhnak vel a co mi an si. Mah le mah ai chanhchuah kho ti lo mi, a derthawm mi nih tlanhnak an hmuh tawn. Cubantuk minung hna cu Pathian vel chung ah a um mi an si.
Sualpalhnak ka ngei lo tiah aa ruat mi hna nih tlanhnak an co kho lo. Tlanhnak ding lam a um lo ahcun zeitindah tlanh an si khawh a si lai?
Phungbia cawnpiaktu saya le Farasi hna nih vacung pa ai duh mi nu kha an tlaih i Jesuh hmai ah an vun chuahpi i, hitihin bia an hal, “Saya, hi minu hi a sual lio bak ah kan tlaih. Nang zeitindah na ruah?” tiah an ti. Zeiruang ah dah minu hi Jesuh hmai ah an chuahpi i an hneksak hnga?
Anmah hrimhrim zong nih voi tampi sualnak an tuah caah hi minu hi Jesuh hmang in thah an timh i Jesuh cung ah sualphawt an timh. Jesuh nih a ti mi hna cu, “Sualnak ka tuah bal lo a ti mi nih chep hmasa bik seh” tiah a ti. Cutikah Farasi le Phungbia cawnpiaktu saya hna cu upa lei in an i thawk i ngakchia bik tiang pakhat hnu pakhat an i zukphiak i a donghnak ah Jesuh le minu lawng an tang.
Ai zukphiak mi kha biaknak hruaitu Farasi le phungbia cawnpiaktu pawl an si. Anmah sualnak tuah bal lo bantuk in minu hna kha biaceih an timh.
Jesuh nih hi vawlei ah a dawtnak a langhter. Amah cu dawtnak vialte hrampi a si. Tirawl a pek hna, mithi a thawhter hna, nuhmei fapa a thawhter, Bethany khua ah Lazaruh a thawhter, thinghmui a damter hna, sifak caah khuaruahhar a tuahpiak hna. Misual vialte an sualnak a lakpiak hna i khamhnak a serpiak hna.
Jesuh nih a kan dawt. Amah cu zeizong vialte tuah khotu a si, nain Farasi le phungbia cawnpiaktu saya hna nih an ral zoh in an zoh. Hi ruang ah minu kha a hmai ah an chuahpi i an hneksak.
An ti mi cu, “Saya, Mosen nawlbia ahcun, hi minu hi lung in thilak in cheh ding a si, nang zeitindah na ruah?” tiah an ti. Lung in thilak in chep u a kan ti rua lai tiah an ruah. Zeiraung ah? Pathian nawlbia ning in biaceih ding a si ahcun vacung pa ai duh mi cu ahohmanh luatter loin lung in thilak in cheh ding an si.
Lung in thilak in cheh mi vialte cu hell kal ding an si. Sual man cu thihnak a si. Asinain Jesuh nih lung in chep u a ti hna lo. Cunak in, “sualnak ka tuah bal lo a ti mi nih chep hmasa bik seh” tiah a ti.
Zeiruang ah dah Pathian nih nawlbia 613 a kan pek?
Misual kan si ti hngalhnak caah
Nawlbia nih Pathian thinhunnak a rak pi. Pathian cu a thianghlim mi a si bantuk in a nawlbia zong an thianghlim. Cu a thianghlim mi nawlbia cu 613 in ai langh. Nawlbia 613 pek kan sinak a ruang cu misual kan si ti hngalhnak ding ca le mitling lo kan si hngalhnak ding caah a si. Tlanh kan sinak ding ah Pathian vel kan herh ko ti langhternak caah a si. Hi sullam kan hngalh lo in nawlbia chung ah ai tial mi lawng te kan ruah a si ahcun a sual lio an an tlaih minu bantuk in lung in thihlak in cheh ding lawngte kan si ko hnga.
Farasi le phungbia cawnpiaktu hna nih nawlbia sullam an hngalh lo caah minu cu lung in cheh ding ah an ruah i aho paoh zong sualnak an tuah ahcun lung in cheh ding tiah an ruah. Asinain sualnak a ngei mi minung nih zeitindah minu cung ah lung an thlak ngam lai? A sual lio ah tlaih sihmanh sehlaw ahohmanh nih lung in cheh ngam ding a si lo.
Minu siseh, kanmah cio si u sih, nawlbia hmang in biaceih ding kan si ahcun kan hmuh ding mi cu dantatnak lawng kha a si ko. Asinain cubantuk dantatnak a huah ding mi cu Jesuh nih a kan khamh. Kan sualnak pi he nawlbia hmai ah ahodah thiam a co kho in a dir kho lai? Kan dihlak in hell ah kan dong ko lai.
Asinain Farasi le phungbia cawnpiaktu saya hna nih cun nawlbia kha ai tial ning lawng in an hngalh. Nawlbia ning tein biaceih a si ahcun an tlaih minu bantuk in anmah zong sual phawt an si ko lai. Nawlbia cu kan sualnak hngalhnak ding caah pek kan si ko nain a sullam an rak pemh lo caah nawlbia nih harnak a rak pek hna.
Tuchan Farasi pawl zong nih, Baibal chan lio ah Farasi pawl bantuk in nawlbia hi ai tial ning lawng in an fiang. Pathian biatak, vel le dinfelnak kha an hngalhfian awk a si. Khamhnak biatak kha cawnpiak an hau.
Farasi pawl nih an ti mi cu, “Nawlbia nih cun lung in cheh ding a ti i, nang nih zeitindah na ruah?” tiah an hal. Mah cu bia cu an kutcung lung i put buin an hal. Jesuh nih zeihmanh chim ding a thei lai lo tiah an ruah. An sio rawl ah Jesuh ai awh ding kha an bawh.
Jesuh nih nawlbia ning in biakhiak sehawl amah zong lung in an cheh ve hnga. An i tinh mi cu, minu he Jesuh he thilak in lung in cheh ding kha a si. Jesuh nih chep hlah u ti hna sehlaw Pathian nawl na buar an ti lai i amah kha thilak in lung in an cheh hnga. A har ngaingai mi rap ah fawih an timh.
Asinain Jesuh cu a kun i vawlei ah a kutdong in ca a tial. Cu tik ah bia an hal chih, “zeitindah na ruah?” tiah an ti. Vawlei ahcun zeidah na tial? Kan biahalnak hi rak kan let? Zeitindah na ruah?” tiah an hal chih. An kutdong in an sawh chih i an hal chih.
Jesuh cu a hung tho i nan lak ah sualnak ka tuah bal lo a ti mi nih chep hmasa bik seh tiah a ti hna. Cun a kun than i ca cu a tial than. A bia a thei mi vialte cu, an chiatha thleidannnak nih sual a phawt hna i upa bik thawk in ngakchia bik tiang, pakhat hnu pakhat an zukphiak dih i a donghnak ah Jesuh le minu lawng an tang.
“Nan Lakah Sualnak A Tuah Bal Lo Mi Nih Chep Hmasa Bik Seh”
Sualnak cu khuazei ah dah tial a si?
Kan thinlung catlap le tuahsernak cauk chung ah
Jesuh nih “nan lak ah sualnak a tuah bal lo mi nih chep hmasa bik seh” tia a ti i “vawlei ah a kun i ca a tial than.” Cun upa lei kap kha an i zukphiak hmasa. Sualnak tam bik a tuahtu upa bik Farasi kha ai zukphiak hmasa bik. Cun mino deuh zong kha an i zukphiak ve. Jesuh kha kan pawng ah a dir i kannih zong minu pawng ah kan dir tiah ruat tuah u sih. Jesuh nih nan lakah sualnak ka tuah bal lo a ti mi nih chep hmasa bik seh tiah kan ti sehlaw, zeitindah na tuah ve hnga?
Jesuh nih vawlei ah zei ca dah a tial hnga? A kan sertu Pathian nih kan sualnak hi hmun hnih ah a tial.
Pakhatnak ah, kan sualnak kha kan thinlung catlap ah a tial. “Judah sualnak cu thir cafung in tial a si, an lungthin lungtlap cung ahcun daimon zum in khenh a si i an biaktheng ki hna ahcun anmah sual phawtu ding ah suai an si” (Jeremiah 17:1) tiah a ti.
Judah mi hi kan hmanthlak le kan aiawh an si. Minung sualnak cu thir cafung in tial a si i daimon zum in khenhchih a si. Kan thinlung catlap ah tial an si. Jesuh nih vawlei ah a kun i a tial mi cu minung hi an sual dih ti a si.
Pathian nih kan sual ti kha a hngalh caah kan sualnak cu kan thinlung catlap ah a tial. A pakhatnak ah, kan tuahsernak kha a tial, sualnak kan tuah mi vialte a tial dih, zeicahtiah nawlbia hmai ahcun a kekkuai mi lawngte kan si dih. Kan thinlung le kan chiatha thleidannak lungtlap ah a tial caah Pathian hmai ah misual kan ti kha kan hngalh dih.
Jesuh nih a voihnihnak a kun i vawlei ah ca a tial than. Baibal nih a chim bantuk in kan sualnak vialte cu Pathian hmai ah tuahsernak cauk chung ah tial dih an si tiah a ti (Biathlam 20:12). Cauk ahcun misual mi min vialte le an sualnak vialte cu tial a si dih. Kan sualnak cu cauk chung le kan thinlung ah tial a si.
Sualnak vialte cu, mino sualnak siseh, upa sualnak siseh, kan thinlung catlap ah tial dih a si. Hi ruang ah an sualnak kong ah Jesuh hmai ah zeihmanh chim ding an ngei lo. Minu lung in cheh a timtu hna cu Jesuh hmai ah bia kaa khat hmanh chim ding an ngei lo.
Zeitik ah dah hmun hnih ah tial mi kan sualnak cu hnawh a si?
Kan thinlung in thisen le ti khamhnak thawngtha kan zumh tik ah
Pathian khamhnak na tin co bak in tuahsernak cauk i na sualnak vialte kha hnawhpiak a si i nunnak cuak chung ah na min tial in a um. Nunnak cauk ah an min khumh a si mi vialte cu van kai ding an si. Vawlei ah thil tha an tuah mi le Pathian pennak ca rian an tuan mi vialte zong nunnak cauk chung ah tialchih an si. Cu vialte cu vancung khua ah cohlan an si. An sualnak in tlanh a si cang mi hna cu zungzal inn ah an um cang lai.
Minung sualnak vialte hi hmun hnih ah tial a si caah ahohmanh nih Pathian cu hlen khawh a si lo. A thinlung ah sualnak a tuah lo mi le vacung pa ai duh lo mi ahohmanh an um lo. Minung vialte hi misual kan si dih i a tling lo mi lawngte kan si.
Jesuh tlanhnak a co lo mi hna cu an sualnak ruang ah lungrethei in an um peng. Hnangamnak an ngei lo. An sualnak ruang ah minung le Pathian kha an tih. Asinain an thinlung in Thlarau le ti khamhnak thawngtha an zumh bak in, an lungthin catlap le tuahsernak cauk ah tial mi an sualnak vialte hnawhpiak an si. An sualnak vialte in khamh an si cang.
Vancung ah nunnak cauk a um. Thlarau le ti khamhnak thawngtha a zum mi paoh nunnak cauk ah an min tial a si i vancung kai ding cazin ah telh an si. Sualnak an tuah lo ruang ah vancung an kai si loin Thlarau le ti khamhnak thawngtha an zumh caah an sualnak in tlanh an si catu ah a si (Rom 3:27).
Khrihfa, phungbia cawnpiaktu le Farasi vialte zong misual an si, an sual lio ah an tlaih minu bantuk in sualnak an ngei dih ve.
Midang nakin hmanh sualnak tam deuh an tuah men ko lai nain anmah le mah kha an i hleng i sualnak ngei lo bantuk tein an i umter. Biaknak hruaitu pawl hi mifir lawngte an si. Thlarau le nunnak a firtu an si. Anmah nih khamhnak co tung loin midang kha hmualngei ngai in an cawnpiak hna.
Nawlbia ning in ti ahcun sualnak a ngei lo mi an um lo. Mi pakhat nih sualnak a tuah lo ruang ah khamhnak a co kho lo, a sualnak in tlanh a si ca tu ah khamhnak a co mi a si. Cubantuk minung cu nunnak cauk ah a min tial a si. A biapi mi cu kan min hi nunnak cauk ah tial a si maw si lo ti kha a si. Minung nih a nun chung sualnak tuah loin a um khawh lo caah, nunnak cauk an an min tialnak ding ah cun a zungzal ca tlanhnak an co a herh.
Vancung ah cohlan na si maw si lo ti cu thawngtha biatak na cohlang maw cohlang lo ti mi ah ai hngat mi a si. Pathian vel na co maw co lo ti cu Jesuh khamhnak na co maw co lo ti mi ai hngat. A sual lio ah an tlaih minu sin ah zeidah a cang? A khuk ai bil lai i a lu a khun lai i a mit ai chinh men lai zeicahtiah ka thi la ti kha a hngalh. Sualchirnak le tihnak in a tap thluahmah men lai. Minung nih thihnak a ton tik ah a sining vialte a thupnawk ti lo.
“Oh, Pathian, thi tlak ka si ko. Ka thlarau rak ka cohlang ko law ka zaangfah ko sawh. Ka zaangfah ko sawh, Jesuh.” Pathian tlanhnak co ding ah Jesuh a nawl. “Pathian, bia na ka ceih ahcun, dantat ka si lai, sualnak ngei lo na ka ti ahcun, ka sual cu hnawhpiak ka si lai. Nangmah nawl an si dih.” Hi vialte hi minu nih a chimphuan dih men ko lai. Zeizong vialte hi Jesuh kutcung ah a um tiah a ti ko lai.
Jesuh hmai an chuahpi minu nih “Ka palh tuk, vacung in pa ka duh sual” tiah a ti lo. A ti mi cu, “Ka sualnak in ka khamh ko sawh. Ka sualnak na ka tlanh ahcun khamh ka si lai. Pathian dawtnak ka herh i a zaangfahnak co ding ah Amah ka herh,” tiah a ti. A mit ai chinh i a sualnak a phuan dih.
Jesuh nih “Sual an phawtu an tang ti lo maw? Ahohmanh nih sual an in phaw lo maw?” tiah a ti. Minu nih, “Bawipa, ahohmanh an tang ti lo” tiah a ti.
Cun Jesuh nih a lehnak cu, “Keimah zong nih sual kan phaw ve lo.” Jesuh nih sual a phawt ve lonak a ruang cu a sualnak vialte kha Jorda tiva tipil a innak in a rak tawlpiak dih cang i a rak tlanh cang caah a si. Atu ahcun minu si loin, Jesuh tu kha biaceih ding cu a si.
Kei Zong Nih “Sual Kan Phaw Ve Lo” A Ti
Jesuh nih sual a phaw maw?
Phaw lo
Hi minu nih Jesuh khamhnak a co. A sualnak vialte in tlanh a si. Jesuh nih nan sualnak vialte in kan tlanh cang hna i nan thiang cang tiah a ti.
Cucu Baibal ca nih a kan chimh. Kan sualnak vialte a man pek ding ah vailam cung ah a thi i Jorda tiva tipil a innak nakin kan sualnak vialte a tawl dih. Tipil a innak le vailam cung dantat a tuarnak a zum mi vialte cu tlanh an si cang tiah a kan chimh. Jesuh chim mi bia ca in tial mi vialte hi kan herh i fek tein kan i tlaih peng ding a si. Cuticun khamhnak thluachuah kan co lai.
“Pathian, na hmai ah tlaknak ka ngei lo. Ka chung ah thatnak zeihmanh a um lo. Ka sualnak dah ti lo zeihmanh langh ding mi ka ngei lo. Asinain Jesuh cu ka tlanhnak Bawi a si tiah ka zumh. Jorda tiva ah ka sualnak vialte a tawl i vailam cung ah dantatnak a tuar. A thisen le tipil a innak nakin ka sualnak vialte a lak dih cang. Bawipa, atu cu kan zumh cang.”
Hihi khamh co kan ti mi cu a si. Jesuh nih sual a kan phaw lo. Pathian fa sinak tu a kan pek. Thlarau le ti khamhnak a zum mi paoh cu an sualnak a lakpiak dih hna i mithiang ah a ser hna.
Hawi dawt hna! Minu cu tlanh a si. Vacung pa ai duh lio ah an tlaih minu cu Jesuh tlanhnak thluachuah he luatter a si. A sualnak vialte a phuang mi le Jesuh tipil innak le Thlarau le ti khamhnak a zum mi paoh nih Pathian sin in a ra mi tlanhnak thluachuah an co. Pathian hmai ah an sualnak a phuan mi paoh tlanh an sinain a sualnak ai hngal lo in a phuang lo mi paoh nih tlanhnak chuah an hmu lo.
Jesuh nih vawlei sualnak a kalpi dih (Johan 1:29). Zeitluk misual zong nih Jesuh a zumh ahcun khamhnak a co lai. Jesuh nih minu cu “keimah zong nih sual kan phaw ve lo” tiah a ti. Sual kan phaw ve lo a tinak a ruang cu minu sualnak vialte kha Jordan tiva tipil a innak in a rak tawlpiak dih cang caah a si. Kan sualnak vialte kha a phurh i kanmah aiawh ah dantatnak a tuar.
Jesuh Hmai ah Tlanh mi Kan Si A Herh
Pathian dawt maw a ngan deuh a biaceihnak?
A dawtnak
An kut ah lungtum he a dir mi Farasi hna le tuchan biaknak hruaitu cheu khat nih nawlbia hi ai tial ning in a sullam an lak. Nawlbia nih vacung in pa i duh hlah a ti caah, cu sualnak an tuah ahcun lung in thilak in cheh ding tiah an ti. Anmah nih sualnak tuah bal lo bantuk tein minu cu an mitsir in an met. Anmah cu khamh zong an si kho lo i tlanh zong an si kho lo. Farasi le phungbia cawnpiaktu saya hna hi vawlei cung ziaza lei thiamsang hna an si. Jesuh nih a auh mi hna minung an si lo. Jesuh nih “kei zong nih sual kan phaw ve lo” a ti mi chung ah an i tel lo.
A sual lio ah an tlaih minu lawng nih lawmhnak bia le awka a theih. Pathian hmai ah na dinfel ahcun hi minu bantuk in thluachuahnak nah mu ko lai. “Pathian, ka tuah khawh mi cu ka nun chung sualnak tuah lawng hi a si. Atu le tu in ka tuah caah keimah hmanh ka hngal cawk lo. Nitinte sualnak tamtuk ka tuah lengmang.”
Nawlbia kan hngalh i Pathian hmai ah lungthiang tein misual kan si ti kan langhter i, “Bawipa, hihi ka si ko. Ka khamh ko sawh,” kan ti tik ah Pathian nih a tlanhnak thluachuah sunglawi a kan pek.
Jesuh dawtnak le Thlarau le ti thawngtha bia nih Pathian biaceihnak cu a tei. “Keimah zong nih sual kan phaw ve lo” ti kha a si. A ti mi cu, “tlanh na si cang” ti hi a si. Kan Bawipa Jesuh Khrih cu zaangfah hmang Pathian a si. Vawlei sualnak dihlak in a kan tlanh cang.
Kan Pathian cu a dingfel mi le dawtnak in a khat mi Pathian a si. Thlarau le ti in a kan dawtnak hi a biaceihnak nakin a ngan deuh.
A Dawtnak Hi A Dinfelnak Nakin A Ngan Deuh
Zeiruang ah a kan tlanh dih?
A dinfelnak nakin a dawtnak a ngan deuh ruang ah
Pathian nih a dinfelnak hmang in bia rak kan ceih sehlaw kan dihlak in hell ah a kan thlak dih ko hnga. Asinain Pathian dantatnak chung in a kan khamhtu Jesuh dawtnak in a lian ngan tuk, Pathian nih a fapa ngeih chun te kha a kan pek. Jesuh nih kan sualnak vialte kha a kan lakpiak i dantatnak a kan tuarpiak. Jesuh kha a khamhtu le a Bawipa ah a zum mi paoh cu a khamh hna i miding ah a cohlan hna. A dinfelnak nakin a dawtnak a ngan deuh caah kan dihlak in a kan tlanh.
Pathian nih a dinfelnak hmang in bia a kan ceih lo caah kan i lawmh awk a si. Voi khat cu Jesuh nih phungbia cawnpiaktu kha “Va kal u law, Saram thawinak si loin ka duh mi cu zaangfahnak lungthin kha a si, tiah Cathiang chungah aa tial mi kha a sullam va ruat tuah u. Miding mi pawl kawh awk ah ka rat tung lo, misual mi hna khawh awk ah pei ka rat ko cu” (Matthai 9:13) tiah a ti. Mi cheu nih cun saram kha that in Pathian hmai ah, “Pathian, nifate ka sualnak ka ngaithiam ko” tiah thla an cam ko men lai. Pathian nih kan raithawinak nakin Thlarau le ti khamhnak thawngtha zumh kha a duh deuh. Pathian nih khamhnak co hna seh ti a kan duh. A dawtnak kha pek i kan zumhnak kha hmuh a duh ve. Hi vialte hi na hmu kho maw? Jesuh nih a tlamtling mi khamhnak a kan pek.
Jesuh nih sualnak a huat nain minung, Pathian muisam keng in ser mi cung ah duhpiaknak ngan pi a ngei. Vawlei ser hlan kha a fa si ding ah a kan thim cang i Thlarau le ti thawngtha in khamhnak ding kha a rak timhlamh cang. Mah hihi ser hramthawk in kan caah a rak ngeih mi dawtnak cu a si.
Pathian nih a dingfel mi a nawlbia ning in bia kan ceih sehlaw, kannih misual vialte cu kan thi dih ko hnga. Asinain vailam cung dantatnak a tuarnak le tipi a innak hmang in a kan tlanh. Na zum ve maw? Biakam Hlun ah zoh ta hna u sih.
Aaron Nih Muheh Cung Ah A Kut A Chuan
Aho nih dah Israel mi sualnak cu muheh cung ah a chuan?
Tlangbawi ngan nih
Tlangbawi ngan nih
Vawlei sualnak vialte cu Biakam Hlun zumhnak le Biakam Thar tipil innak nih a hnawh dih. Biakam Hlun ahcun Israel mi hna kum khat chung an sualnak kha tlangbawi ngan nih dotla muheh cung ah kutchuan in sual thawinak a tuahpiak hna.
“Aaron nih a kut pahnih in meheh nung lu ahcun a chuan lai i Israel mi that lonak vialte, an phung buarnak vialte le an sualnak vialte cu a cung ahcun a phuan lai i meheh lucung ahcun a chiah lai, mipakhat timhcia in a um mi nih khan ramlak ah a kalpi lai” (Leveticus 16:21).
Mah hihi Biakam Hlun sualthawinak cu a si. Nifate an sualnak ngaihthiam halnak caah tuu asiloah meheh kha puanthlam ah an rak put i biatheng ah rai an thawi. Tlangbawi nih saram lucung ah a kut a chuan i a sualnak cu saram cung ah a chuanpiak. Cun saram cu a thah i a thisen cu biaktheng ki cung ah a thlet hnawh.
Biaktheng kil cung ah ki pali a um. Hi ki hna nih Biathlam 20:21 ah a lang mi tuahsernak cauk kha an langhter. Saram thisen a tang rih mi kha vawlei ah a thlet. Vawlei nih minung thinlung a langhter zeicahtiah ahcun minung cu vawlei in ser a si. Mi nih nitinte an sualnak cu hitihin sualthawinak an tuahpiak tawn.
Asinain nitinte sualthawinak an tuah cawk lo caah an dihlak sualnak kha kum khat voi khat sual ngaihthiam thawinak tuah ding ah Pathian nih caan a pek hna. Mah hihi Remdaihnak Ni ti mi, thla sarihnak thla a nihra nak ah tuah tawn a si. Hi ni ah tlanbawi ngan nih meheh pahnih kha a rak put i an cung ah kutchuan in Israel mi vialte kha a chuan i Pathian sin ah sualthawinak a tuah.
“Aaron nih a kut pahnih in meheh nung lu ahcun a chuan lai i Israel mi that lonak vialte, an phung buarnak vialte le an sualnak vialte cu a cung ahcun a phuan lai i meheh lucung ahcun a chiah lai, mipakhat timhcia in a um mi nih khan ramlak ah a kalpi lai” (Leveticus 16:21).
Pathian nih Israel mi vailte aiawhtu ding ah tlangbawi ngan Aaron kha a thim. Mizapi nih meheh cung kutchuan si loin aiawhtu tlangbawi ngan Aaron lawng nih a kut a chuan i kum khat chung Israel mi hna sualnak caah ngaihthiam halnak thawinak a tuahpiak hna.
Pathian hmai ah Israel mi hna sualnak kha a phuan, “Aw, Bawipa, na fale Israel mi an sual cang. Siasal kan biak, nawl kan buar, na min ningcang loin kan hman, siasal kan ser hna i nangmah nakin kan dawt deuh. Sabbath ni kan ul lo, nulepa kan upat hna lo, lai kan nawng, nulepa sualnak kan tuah, kan fir, mithil kan hngar i kan vel” tiah a phuan dih.
An sualnak vialte a phuan dih. “Pathian, keimah zong nih siseh, Israel mi hna zong nih si hna seh, na nawlbia kan zul kho lo. Kan sualnak vialte tlanhnak ding ah hi meheh cung ah ka kut ka chuan i kan sualnak vialte ka chuan dih” tiah a ti. Tlangbawi ngan nih mehe cung ah a kut a chuan i Israel mi vialte sualnak caah sual thawinak a tuahpiak hna. Kut chuan ti cu, “pek, chanh” tinak a si (Leveticus 1:1-4; 16:20-21).
Biakam Hlun ah sualthawinak zeitindah an tlamtlinh?
Saram lucung kutchuannak in
Israel mi hna tlanhnak ding ca le an sual ngaihthiamnak ding caah zulh ting mi phung le lam kha Pathian nih a pek hna. Saram kha dotla mi a si lai, cun thah a si lai. Pumpak pakhat cio sualnak thawinak cu hibantuk hin a si.
Asinain remdaihnak ni ahcun, saram kha an thah i a thisen kha hmun thiang chung ah an luhpi i zaangfahnak thutdam cung ah khan voi sarih an theh. Cu bantuk a thla sarih thla, a nihra nak khan an tuah tawn.
Hmun thiang chung ah raithawinak tuah ding ah tlangbawi ngan kha amah lawng a lut i mipi nih a lenglei in tlangbawi ngan puanki ah thlaih mi hna sui darkhing aw kha an ngaih. Zaangfahnak thutdan cung ah thisen thlet a si lio ah khan sui darkhing cu voi sarih a ring ve. Cun, mizapi nih kan sualnak ngaihthiam kan si cang ti kha an hngalh. Sui darkhing aw nih thawngtha bia aw a hmuhsak.
Jesuh nih mi cheu khat lawng a dawt hna i a tlanh hna ti hi a dik lo mi a si. Jesuh nih tipi a innak hmang in vawlei sualnak vialte kha a lak dih. Kan dihlak tein tlanh a kan duh. Nitinte kan sualnak ca thawinak tuah khawh a si lo caah voi khat ca zalak in a kan tlanh cang.
Biakam Hlun ahcun sualthawinak cu kut cung chuannak le thisen thletnak in rak tuah a si. Aaron nih zapi hmai ah a nung dotla mi mehe cung ah a kut a chuan i Israel mi hna kum khat chung an sualnak vialte kha a phuan dih. Israel mizapi hmai ah an sualnak kha mehe cung ah a chuan dih. Tlangbawi ngan nih an sualnak vialte cu meheh cung ah a chuan dih hnu ahcun khuazei ah dah an sualnak cu kal dih? Meheh cung ah a kal dih.
Cun meheh cu, timhcia tein a um mi pakhat nih khan a hruai i ti le ram a um lonak ramcar ah khan a kalpi. Mehe cu ramcar lak ah a vak lengmang lai i a donghnak ah a thi lai. Meheh cu Israel mi hna sualnak caah a thi.
Mah hihi Pathian dawtnak le tlanhnak cu a si. Cuticun Israel mi hna nih kum khat an sualnak kha an rak i tlanh. Asinain kannih cu Biakam Thar chan ah a nung mi kan si. Jesuh vawlei a ratnak hi kum 2000 reng lo a si cang. Biakam Hlun ah bia a kamh mi vialte tlinter ding ah a ra. Kan sualnak vialte chung in a kan tlanh cang.
Kan Dihlak Tlanh Ding Ah
JESUH sullam cu zeidah a si?
Mi vialte an sualnak in khamhtu
Matthai 1:20-21 rel hna u sih, “Cu kong a ruah lengmang lio ah khan, a mang ah Bawipa vancung mi pakhat kha a sin ah a lang i, “David tefa Joseph, Mary hi na nupi ca i lak awk ah tih hlah. Zeicahtiah fa a pawi mi hi Thiang Thlarau thawng in a si. Fapa a hrin lai i a min ah Jesuh na sak lai-zeicahtiah a mi kha an sualnak chung in a khamh hna lai” (Matthai 1:20-21) tiah ti.
Vacung khua a um mi kan Pathian nin kan sualnak vialte tawlpiak ding ah a fapa run thlah ding ah Mary paw kha ai hlan. Vacung mi kha a run thlah i Mary sin ah, “Ngai tuah, fa na pawi lai i fapa na hrin lai i a min ah Jesuh tiah na sak lai” a chimh. A sullam cu Mary paw chung in a rak chuak ding mi fapa cu mikhamhtu a si lai tinak asi. Jesuh Khrih sullam cu minung a khamhtu ding tinak a si.
Cuti asi ah, Jesuh nih zeitindah kan sualnak in a kan khamh? Jesuh nih vawlei sualnak a kalpinak cu Jorda tiva tipil a innak thawng in a si. Johan nih tipi a pek lio ah vawlei sualnak vialte a cung ah chuan a si. Matthai 3:13-17 rel hna u sih.
“Cu caan ahcun Jesuh cu Galilee ram in Jordan tiva ah khan Johan sin i tipil in awk ah a va kal. Sihmanhsehlaw Johan nih cun a rak al i, “Keimah pei nangmah nih tipil pek awk ka si cu, ka sin i nangmah lehtuk na rat,” tiah a rak ti. Sihmanhsehlaw Jesuh nih cun, “Atu cu hitihin si ko seh. Pathian nih tuah awk a si a ti mi paoh cu i tuah ko seh tiah a leh.” Tipi a in dih cangka cun Jesuh cu ti chung cun a chuak. Van kha aa hung i Pathian thlarau cu thuro bantuk in a rung zuang i a cung ah aa fut kha a hmuh. Cun vancung in aw pakhat a rung thang i, “Amah hi ka dawt mi ka Fapa a si, Amah cungah hin ka lung a tling” tiah a ti.
Jesuh cu kan sualnak vialte tlanh ding ah Johan sin ah a kal. Tichung ah a tum i Johan hmai ah a lu a khun. “Johan, tipil ka pe tuah. Dinfelnak vialte tlamtlinh a hau. Vawlei sualnak a kapitu ding le misual hna chanhchuahtu ding ka si bantuk in tipil innak in an sualnak ka tawlpiak hna a hau. Tipil le pe tuah,” tiah a ti.
Dinfelnak vialte tlamtlinh a hau. Jesuh cu Johan nih Jordan tiva ah tipilnak apek dih bak in Pathian dinfelnak nih kan sualnak vialte in a kan tlanh.
Cuticun kan sualnak vialte a lak dih. Na sualnak vialte kha Jesuh cung ah chuan a si dih cang. Mah cucu na hngal maw?
Jesuh tipil innak le tlanhnak kha zum law khamh na si lai.
Kan dinfelnak cu zeitindah tlamtlinter a si?
Jesuh tipil innak hmang in
Pathian nih vawlei sualnak vialte cu saram cung kutchuannak in tawlpiak an si lai tiah Israel mi kha bia a rak kamh cang hna. Mizapi nih an kut kha saram cung chuan khawh dih a si lo caah Pathian nih tlangbawi ngan Aaron kha a thim i amah nih zapi aiawh ah sualthawinak a tuah i saram cung ah khan a kut a chuan. Saram cung ah khan Israel mi hna sualnak vialte cu voi khat lo ah a chuan dih. Ma hihi Pathian fimnak le khuaruahhar tlanhnak cu a si.
A fapa Jesuh kha vawlei khamhtu ding ah a run thlah. Sual thawinak saram cu timhcia a si cang. Minung vialte aiawh in Jesuh cung ah a kut a chuang tu ding minung pakhat kan herh. Cu ai a kan awh tu cu Johan hi a si. Baibal ah ai tial mi cu Jesuh hlan ah Pathian ah mivialte aiawhtu ding vawlei ah a run thlah chung ti kha a si.
Tipil petu Johan hi minung fa ah a hnu bik tlangbawi ngan a si. Matthai 11:11 ah ai tial bantuk in, “Hihi i cicken hmanh u: nu chung in a chuak mi lak ah vawlei cung ah hin, Johan tluk in a ngan mi ahohmanh an um lo; Sihmanhsehlaw vancung pennak chung i a um mi a hme bik hmanh Johan nakin a ngan deuh” tiah a ti. Johan lawng hi minung vialte aiawhtu a si. Pathian nih Johan kha mi vialte aiawhtu ding le minung vialte sualnak Jesuh cung chuangtu ding ah a run thlah mi a si.
Atu vawlei cung minung billion 6 hi Jesuh sin ah va kal hna sehlaw an sualnak vialte phurtu ding ah a lu cung ah an kut va chuang cio hna sehlaw Jesuh lu zeitindah a um hnga? Bilion 6 reng lo nih Jesuh cung ah an kut chuang hna sehlaw cucu zoh dawh a si hnga lo. Ai biatak deuh mi cun fak piin a lu an nam hnga i a sam zong a pong dih hnga. Cucaah Pathian niha fimnak hmang in Johan kha a thim i kan dihlak aiawh in vawlei sualnak vialte Jesuh cung ah a chuan dih.
Matthai 3:13 ah, “Cu caan ahcun Jesuh cu Galilee ram in Jordan tiva ah khan Johan sin i tipil in awkah a va kal” tiah a ti. Hi lio caah Jesuh hi kum 30 si. Jesuh cu a chuah in niriat nak ah cuarpartan a si, cu thok cun kum 30 a tlin tiang a tuanbia hi tlawmte lawng hmuh khawh a si.
Jesuh nih kum 30 a si tiang hngah a herhnak a ruang cu Biakam Hlun phunglephai tlinnak ding caah a si. Deuteronomy ah Pathian nih Moses sin ah tlangbawi cu tlangbawi ngan rian a tuan khawhnak ding ah kum 30 tal a si lai tiah a rak ti. Jesuh cu vancung lei tlangbawi ngan a si. Cucu na zum maw?
Matthai 3:13-14 ah, “Cu caan ahcun Jesuh cu Galilee ram in Jordan tiva ah khan Johan sin i tipil in awkah a va kal. Sihmanhsehlaw Johan nih cun a rak al i, “Keimah pei nangmah nih tipil pek awk ka si cu, ka sin i nangmah lehtuk na rat” tiah a rak ti. Ahodah minung vialte aiawhtu a si? Tipil petu Johan a si. Cun ahohdah vancung aiawhtu a si? Jesuh Khrih a si. Aiawhtu veve an i tong. Cuti si ah ahodah a ngan deuh? Vancung aiawhtu kha a ngan deuh.
Tipil petu Johan cu miral tha le kha chan lio biaknak hruaitu kha “rul fale hna, nan sual i chir u” tiah a au ngamtu a si. Asinain Jesuh hmai ah ai toidor colh. “Nangmah nih pei tipil na ka pek awk a si cu, zeicahdah keimah sin ah cun na rat?” tiah a rak ti.
Jesuh nih a ti mi cu, “atu ahcun hitihin si ko seh, Pathian nih tuah awk a ti mi paoh cu tuah si ko seh” tiah a ti. Jesuh hi vawlei a ratnak cu Pathian nih tuah siseh a ti mi tlinter ding ah a si i cucu Johan nih Jordan tiva tipil a peknak ah a tling.
“Cun Johan cua hna a tla ve. Tipil a in dih cangka cun Jesuh cu ti chung cun a chuak. Van kha aa hung i Pathian thlarau cu thuro bantuk in a rung zuan i a cung i aa fut kha a hmuh. Cun vancung in aw pakhat a rung thang i, “Amah hi ka dawt mi ka fapa a si, Amah cung ah hi ka lung a tling” tia a ti.
Mah hihi Jesuh tipil a in lio ah a cang mi an si. Johan nih tipilnak a pek i vawlei sualnak a kalpi lio ah khan vancung innka an i hung.
“Johan nih a rat ri in nihin ni tiang Vancung pennak chung i a um mi hna lak i a hme bik hmanh Johan nakin a ngan deuh” (Matthai 11:12) tiah a ti.
Profet le Pathian nawlbia hna kha Johan tiang ca lawng an si. “Johan thawk in tuni tiang Pathian pennak cu dohkalh le namneh peng a si.” Jesuh tipil innak a zum mi paoh Pathian pennak chung ah an lut kho lai.
“Kei Zong Nih Sual Kan Phaw Ve Lo”
Jesuh cu zeiruang ah dah vailam cung ah biaceih a si?
Kan sualnak a phurh ruang ah
Jesuh cu Johan nih tipilnak a pek i cu dih cun vawlei sualnak vialte a kalpi dih. A hnu deuh, a sual lio ah an tlaih minu kha, “kei zong sual kan phaw ve lo” tiah a ti. Minu kha sual a phaw a ruang cu Jordan tiva tipil a innak in a sualnak vialte kha a rak kalpi dih cang caah atu cu minu si loin amah Jesuh kha biaceih ding a si cang caah a si.
Jesuh nih vawlei sualnak vialte a hnawh dih. Vailam cung dantatnak tuar ding kha zeitluk in a tih ve, zeicahtiah cun “Sual man cu thihnak a si” (Rom 6:23). Oliv tlang ah voi thum khengte ka pa hi hrai hi ka lakpiak ko tiah thla a cam. Jesuh cu minung dang bantuk in thi le sa in a nung ve mi a si caah vailam cung thihnak tuar kha a tih tuk ve. Dantatnak tlamtlinternak caah a thisen a luan a hau.
Biakam Hlun raithawinak saram zong a thisen chuahter a herh bantuk in Jesuh zong vailam cung ah dantatnak a tuar ve a herh. Vawlei sualnak vialte kha a kalpi dih cang caah atu cu kan tlanhnak caah a nunnak a pek a hau cang. Pathian hmai ah biaceih ka si lai ti zong a hngalh.
Jesuh nih amah pumpak sualnak pakhat hmanh a ngei lo nain tipil innak in kan sualnak vialte kha a cung ah a khin i Pathian nih a fapa kha bia a ceih. Cucaah a pakhatnak ah Pathian nih a dinfelnak kha a tlinter i a pahnihnak ah kan cung ah a dawtnak kha a kan toih. Cucaah Jesuh cu vailam cung ah dantatnak a tuar.
“Kei zong nih sual kan phaw ve lo, bia kan ceih ve lo.” Kan sualnak vialte, kan tuah sual mi siseh, kan tuah hram mi siseh, kan hngalh mi siseh, kan hngalh lo mi siseh, Pathian nih bia a ceih lai.
Asinain Pathian nih kanmah kha bia a kan ceih lo. A fapa Jesuh, kan sualnak vialte tipil innak in a cung ah a chuangtu kha bia a ceih. Pathian nih a dawtnak le a zaangfahnak ruang ah misual kha dantat a duh lo. Tipil innak le a thisen hi dawtnak a langhtertu khamhnak an si. “Pathian nih vawlei hi a dawt hringhran caah a fapa ngeih chun te kha a pek. Cucaah amah a zum mi paoh cu an thi ti lai lo, zungzal nunnak an ngei lai” (Johan 3:16) tiah a ti.
Hihi Pathian dawtnak kan hngalh khawhnak a si. A sual lio ah an tlaih minu kha Jesuh nih sual a phaw lo. A sual lio ah an tlaih mi a si caah misual ka si ti kha ai hngalh ko. A thinlung in a sual lawng si loin a tak in a tuah. A sualnak maimilh khawhnak lam a um lo. Asinain Jesuh nih ka sualnak vialte a kalpi cang ti kha a zumh caah khamhnak a co. Jesuh tlanhnak kan zumh ahcun khamh kan si lai. Zum tuah! Kanmah thatnak ca lawngte a si.
Mi zeidah thluachuak bik mi an si?
Sualnak a ngei lo mi
Minung hi kan sual dih. Mivialte nih vacung in pa kan i duh dih. Asinain ahohmanh a sual ruang ah biaceih a si lo. Kan dihlak in sualnak kan ngei dih ko nain Jesuh tlanhnak a zum mi paoh cu an thinlung ah sualnak ngei lo an si. Jeush khamhnak a tingco mi hna hi vawlei cung ah ai lawm bik mi an si. An sualnak in tlanh a si mi hna hi vawlei cung ah thluachuak bi cu an si. Phun dang in cun, Jesuh ah mithiang an si cang.
Rom 4:7 ah Pathian nih lawmhnak kong a kan chimh, “Pathian nih an that lonak a ngaihthiam i an sualnak a khuhpiak mi hna cu an vaa lawm dah!” tiah a ti. Kan thih ni tiang a sual mi kan si. Pathian hmai ah nawlbuar mi le a tling lo mi kan si. A nawlbia kan hngalh cang ko zong ah sualnak cu kan hrial kho lo. Kan derthawm ngaingai ko.
Asinain Pathian nih a fapa tipil innak le thisen hmang in a kan khamh i sualnak nan ngei ti lo, mithiang nan si cang tiah a kan ti. Ka fa nan si cang ti zong a kan chimh.
Thlarau le ti khamhnak thawngtha hi zungzal tlanhnak thawngtha cu a si. Na zum ve cang maw? A zum mi paoh cu miding fel, tlanh mi, le ka fa tiah auh an si. Vawlei cung ah ai lawm bik mi ahodah a si? Thawngtha dik a zum mi le tlanh a si cang mi hi ai lawm bik mi an si. Tlanh na si ve cang maw?
Jesuh nih na sualnak lakpiak a hrelh sual maw? Hrelh lo! Tipil a innak in na sualnak vialte a lak dih cang. Zum tuah! Zum law na sualnak vialte in tlanh na si lai. Johan 1:29 rel than hna u sih.
Hmunphiah Phiah Bantuk A Si
Jesuh nih sualnak zeizat dah a lak?
Vawlei sualnak dihlak
“A thaizing ah Johan nih cun Jesuh a sin i a rat kha a rak hmuh i, Zohhmanh u, Pathian tuufa, vawlei sualnak a kalpitu khi!” (Johan 1:29) tiah a ti.
Zohhmanh u, Pathian tuufa, vawlei sualnak a kalpitu khi!”
Tipil petu Johan nih vawlei sualnak vialte kha Jordan tiva ah Jesuh cung ah a chuan dih. A thaizing ah Jesuh kha vawlei sualnak a kalpi tu Pathian tuufa tiah a ti. Vawlei sualnak vialte kha a liang cung ah a khin dih.
Vawlei sualnak a ti mi hi ser hramthawk in vawlei caan dongh tiang minung sualnak kha a huap dih. Kum 2000 hrawng a liam cang mi ah khan Jesuh nih vawlei sualnak vialte a lak dih i a rak kan tlanh. Pathian tuufa a si bantuk in, kan sualnak vialte a lak dih i kan aiawh ah biaceihnak a tuar.
Minung nih kan tuah mi sualnak vialte Jesuh cung ah chuan a si dih. Cutin cun Pathian tuufa vawlei sualnak vialte a kalpitu ah a hung cang.
Jesuh cu hi vawlei ah tangdor te le vawlei sualnak kalpitu ding ah a ra. Sualnak kan tuah cu kan derthawm caah, kan that lo caah, kan puarthau caah, le kan tlamtlin lo caah a si. Phungdang in cun kan sualnak ruang cu kan pupa a si mi Adam sualnak ro kan co caah a si. Hi sualnak vialte cu Jordan tiva ah Jesuh cung ah chuan a si. Cu vialte cu vailam cung thihnak ah a donghter. Thlan ah an phum i Pathian nih nithum hnu ah a thawhter than.
Misual vialte khamhtu a si bantuk in le biaceihtu a si bantuk in, atu cu Pathian orhlei kam ah a thu cang. Atu le tu in tlanh kan hau ti lo. Kan tuahherh mi tu cu amah zumh kha a si. A zum mi paoh kha zungzal nunnak nih a hngah hna i a zum lo mi paoh kha zungzal rawknak nih a hngah ve hna. Duhthimnak dang a um ti lo.
Jesuh nih an tlanh dih hna. Nangmah cu vawlei cung ah ai lawm bik na si. A derthawm mi na si caah hmailei caan sualnak na tuah hrimhrim ko lai, asinain cu vialte zong cu Jesuh nih a lak dih cang.
Na thinlung ah sualnak a tang ti maw? -Tang ti lo-
Jesuh nih a la dih maw? -Aw, a lak dih-
Minung hi kan i lo dih. Ahohmanh a innpa nakin a thianghlim hlei lo. Minung tampi cu chungthulengnal an si caah misual kan si ti hi an pom kho lo. Mah cucu an chung ah sualnak a karhtertu thil a si.
Nu hna nih leng an chuah tikah, hmursensi an i thuk, powder an i thuk, an sam an kirter, thilthuam thatha an i hruk, kedan sang an i danh-pa zong nih an sammeh ah sammehnak dawr ah an kal, anmah tein an i tamh, angki thiang te an i hruk le hngawngorh an i orh i an butkedanh a tleu khah chung tleu in an hnawh.
An lenglei siangpahrang nu le siangpahrang pa an lawh lio ah an chunglei cu fihnung a rak si.
Phaisa nih a lawmhter hna maw? Ngandamnak nih a lawmhter hna maw? Lawmhter hlah! Zungzal tlanhnak le sual ngaihthiamnak lawng nih minung a lawmhter khawh. A lenglei cun zeitluk in ai lawm mi lawh ko zong ah, a thinlung cu tihnung le fihnung a si. Biaceih ka si sual lai maw tiah tihnak he a nung.
Tlanh a si cang mi hna cu chiandeih bantuk in an ral a tha. An thinlung ah sualnak a um ti lo. “Bawipa, kai lawm tuk, keimah bantuk misual hna na ka khamh i, ka sualnak vialte na hnawh dih cang. Na dawtnak cotlak ka si lo ti ka hngalh ko, nain zungzal ca in na ka tlanh caah kai lawm. Pathian nih sunparnak co ko seh” tia an ti.
Tlanhnak a co taktak mi cu an i lawm ko. Pathian tlanhnak vel a co taktak mi cu mi lunglawm an si.
A ruang cu, “Pathian tuufa, vawlei sualnak a kalpitu” nih an sualnak vialte a lak cang caah a si. Vailam cung ah khamhnak rian kha a lim. Na sualnak le ka sualnak vialte hi, vawlei sualnak a ti mi ah ai tel mi an si caah nangmah le keimah cu khamh mi kan si cang.
Pathian Duhnak In
Jesuh Khrih chung kan um tik ah sualnak kan ngei timaw?
Ngei ti lo
Hawi dawt hna, a sual lio ah an tlaih minu nih Jesuh bia a zumh caah khamhnak a co. Baibal nih a tuanbia a khumh, a ruang cu Pathian tlanhnak thluachuah a co caah a si. Asinain Farasi le phungbia cawnpiaktu nih cun an zam tak.
Jesuh na zumh ahcun vancung nih an hngah ko, na hlawt a si ahcun hell nih an hngah ve ko. A tuahsernak thianghlim na zumh ahcun vancung bantuk a si i na hlawt ahcun hell bantuk a si. Tlanhnak cu kanmah zuamnak thawng in a si lo, Jesuh khamhnak a si.
Hebru 10 ah, “a taktak le a ngaingai a si mi thil kha Judah phung nih hint ling ngaingai le hmaan ngaingai in a langhter kho lo. A ra ding mi thil tha muithlam ceo an rak si. An tuah tawn mi raithawinak kha kumfate in tuah lengmang a si ko. Cucaah cun zeitindah hi nawlbia nih hin, Pathian a bia mi hna cu, cu raithawinak an tuah mi thawng cun mithiang ah a ser khawh hna lai? Pathian a bia mi hna kha an sualnak thianhpiak rak si taktak hna sehlaw, kan sual tiah i phuhrunnak an ngei ti hnga lo i raithawinak vialte kha an rak ngol cang hnga. Sihmanhsehlaw raithawinak nih khan, an sualnaktu kha, kum fate in a hngalhter lengmang hna. Zeitintiah cawtum thi le meheh thi nih cun sualnak kha a hlo kho taktak bal lo. Cucaah Khrih nih vawlei i a rung tum lai ah khan Pathian cu a thawh i, “Raithawinak le pekchanh mi thil cu na duh mi an si lo, sihmanhsehlaw keimah caah taksa pum khan a ka timhpiak cang. Biaktheng cung ah pum ning in khangh mi si cu na lawmh mi a si lo, Sual thianhnak ca i thawi mi sa zong na lawmh mi a si lo. Cucaah kaa thawh i, “Nawlbia cauk chung ah aa tial bantuk in, Pathian, nangmah nih tuah seh ti na ka duh mi tuah awk ah ka ra, ka ti, tiah a ti. A hmasa bik ah, “Raithawinak siseh, pekchanh mi thil siseh, biaktheng cung ah khangh mi saram si hna seh, sual thianhnak caah tuah mi raithawinak si hna seh, na duh mi a si lo na lawmh mi zong a si lo’ tiah a ti. Hi raithawinak vialte hi nawlbia ning in tuah an si ko nain hitihin a ti. Cun aa thawh than i, “Pathian, nangmah nih tuah seh ti na ka duh mi tuah awk ah ka ra,” a ti. Cuticun Pathian nih raithawinak hlun vialte kha a hlawt hna i Khrih raithawinak kha a thlen hna. Jesuh Khrih nih Pathian duh mi kha a tuah caah, voi khat ah za lak in amah puma a pekchanhnak thawng khan kannih cu kan sualnak in a kan thianh cang” (Hebru 10:1-10) tiah a ti.
Pathian duhnak in Jesuh nih kan sualnak vialte kha voi khat ah a lak dih i dantatnak a tuar hnu ah thihnak in a thothan.
Cuticun kannih cun thianter kan si. “Thianter kan si cang” (Hebru 10:10) tiah ai tial mi hi atu caan kong chimnak le a tlamtling mi chimnak ah hman a si. A sullam cu kan tlanhnak hi a tlamtling khitkhet i nolh than lengmang a hau ti lo. Thianter na si cang tinak a si.
“Judah tlangbawi hna nih cun, dirhmun in nifate an rian kha an tuang lengmang i raithawinak an pekchanh tawn mi kha voi tampi an pekchanh tawn lengmang. Sihmanhsehlaw hi raithawinak nih hin sualnak kha a thianh kho taktak bal lo. Asinain Khrih nih cun raithawinak kha sualnak caah voi khat a ser i cucu zungzal ca in a za ko, cu hnu ah Pathian orh lei kam ah khan a thu. Cuka ahcun Pathian nih a ral kha a kelamh i a ser hna ding caan kha a hngak. Voi khat raithawinak in an sualnak thianhpiak a si mi hna cu zungzal cain a tling mi ah a ser hna” (Hebru 10:11-14) tiah a ti.
Zungzal ca in thianter na si cang. Thaizing ah sualnak tuah law misual na si than lai maw? Cu sualnak cu Jesuh nih a lak mi ah ai tel maw? Ai tel dih. Hmailei sualnak vialte zong Jesuh nih a lak mi ah an i tel dih.
“Cun Thiang Thlarau zong nih tehte a khannak kha a kan hngalhter. A hmasa bik ah, “hmailei caan ah annih he ka tuah lai mi biakamnak cu hihi a si: An lungchung ah ka nawlbia kha ka chiah hna lai i, an ruahnak chung ah ka tial hna lai,” a ti. Cun aa thawh than i, “an sualnak le an that lonak kha kaa cinken ti lai lo” a ti fawn. Cucaah annih cu ngaihthiam an si hnu ah cun an sualnak thianhnak ding ca i raithawinak kha a herh ti lo” (Hebru 10:15-18) tiah a ti.
‘Sualnak thlahnak’ ti a sullam cu vawlei sualnak vialte a hnawh dih cang tinak a si. Jesuh cu nangmah le keimah khamhtu a si. Jesuh zumhnak nih a kan khamh. Cucu Jesuh tlanhnak le a ngan bik mi Pathian vel le umpinak a si. Sualnak vialte chung in tlanh cang mi nangmah le keimah hi mi thluachuak bik cu kan si.
Copyright © 2021 by The New Life Mission
