- All e-books and audiobooks on The New Life Mission website are free
- Explore multilingual sermons in global languages
- Two new revised editions in English have been released
- Check out our website translated into 27 languages
Due to COVID-19 and disruption to international mail service
we have temporally suspended our ‘Free Print Book service’.
In the light of this situation we are not able to mail you the books at this time.
Pray that this pandemic will end soon and the resumption of the postal service.
Pray that this pandemic will end soon and the resumption of the postal service.
A konglam 3: Thlarau le Ti thawngtha bia
[3-3] Jesuh Khrih Cu Ti, Thisen Le Thlarau In A Ra (1 Johan 5:1-12)
“Jesuh cu Pathian Messiah a si tiah a zum mi paoh cu Pathian fa an si, pa a daw mi paoh nih cun a fa zong kha an dawt tawn. Pathian fa kan dawt hna ti kan hngalhnak cu hihi a si: Pathian kha dawt i a nawl zulh kha a si. Zeicahtiah, Pathian kan dawt ti cu a nawl kan zulh tinak a si ko. Cun a nawlbia cu kan caah har tuk lo, zeicahtiah Pathian fa a si mi paoh nih cun vawlei kha a tei khawh. Vawlei kan tei khawhnak cu kan zumhnak hin a si. Vawlei cu ahodah a tei kho? Jesuh cu Pathian Fapa a si tiah a zum mi lawng nih an tei khawh. A ra mi cu Jesuh Khrih hi a si, tipil a innak ti le a thihnak thi he a ra mi a si. Ti he lawng a ra lo, ti he thi he a ra. Cun cucu biatak a si ti kha Thlarau hrimhrim nih tehte a khan, zeicahtiah biatak cu Thlarau kha a si. Tehte a khaangtu pathum an um: cu hna Thlarau le ti le thi kha an si i an pathum tein an bia aa khat. Minung nih tehte an khaan mi kha kan zumh tawn, Pathian nih tehte a khaan mi cu cu nakcun tam piin a ngan deuh i Pathian nih a Fapa kong ah tehte a khaan mi cu atu i kan chim mi hi a si. Cucaah Pathian Fapa a zum mi paoh nih cun a lung chung ah Pathian i tehte a khaannak bia kha a ngei, sihmanhsehlaw Pathian a zum lomi nih cun Pathian kha lihchim ah a canter i cucu zeicahdah a si tiah cun, Pathian nih a fapa kong i tehte a khaan mi kha a zumh lo caah a si. Cun tehte cu hihi a si: Pathian nih zungzal nunnak a kan pek cang i cu nunnak cu a Fapa chung ah a um. Pathian Fapa a ngei mi paoh nih cun nunnak cu an ngeih i Pathian Fapa a ngei lo mi paoh nih cun cu nunnak cu an ngei lo.”
Jesuh cu zei in dah a rat?
Ti, Thi le Thlarau in
Jesuh cu ti in a ra maw? A ra. Tipil innak in a ra. Ti nih a hmuhsak mi cu Johan nih Jordan tiva ah Jesuh tipil a peknak kha a si. Cucu tlanhnak tipil innak, vawlei sualnak vialte a kalpitu cu a si.
Jesuh cu thi in a ra maw? A ra. Taksa in a ra in vawlei sualnak kalpi ding ah tipilnak a in hnu ah sualnak thihnak leiba cham ding ah vailam cung ah thisen a luanter. Jesuh cu thisen in a ra.
Jesuh cu Thlarau in a ra maw? A ra. Jesuh cu Pathian asinain taksa in vawlei misual khamhtu ah a vun i cang.
Minung tampi nih Jesuh hi ti, thisen le Thlarau in a ra ti hi an zum lo. Mitlawm te lawng nih Jesuh cu Siangpahrang Pathian fapa a si tiah an zumh. Minung tampi nih “Jesuh hi Pathian fa maw a si minung fa dah?” tiah an khuaruah a har peng rih. Baibal thiamsang telh in minung tampi nih Jesuh cu Pathian fapa, mikhamhtu a si tinak in minung fa a si tiah an zumh deuh.
Asinain Pathian nih Jesuh cu Siangpahrang lak i Siangpahrang fapa a si ti a zum mi le mi khamhtu a si tiah a zum mi lawng nih hrinthannak an co lai tiah a ti. Pathian a daw mi paoh nih Jesuh an dawt i Pathian a zum taktak mi nih cun Jesuh zong an zumh taktak.
Minung nih hrinthannak a co lo ahcun vawlei a tei kho lo. Lamkaltu Johan nih Khrihfa dik tak lawng nih vawlei an tei khawh tiah a kan chimh. Khrihfa dik tak nih vawlei an tei khawhnak a ruang cu ti, thisen le Thlarau an zumh caah a si. Vawlei tei khawhnak cu minung duhnak le zuamnak in a chuak kho mi a si lo.
“Minung holh phunphun in ka hei holh kho ko hnga i van mi holh hmanh ka hei thiam ko hnga, sihmanhsehlaw dawtnak ka ngeih lo ahcun ka holh cu darkhuang hnachet thawng le sumsel tum thawng bantuk men a si ko. Phungchim thiamnak laksaawng ka hei ngei ko hnga i hngalhnak phun tling ka hei ngei ko hnga i biathuk vialte ka hei hngalh dih ko hna hnga, sihmanhsehlaw dawtnak ka ngeih lo ahcun zeihmanh ka si lo. Ka ngeih mi thil vialte mi ka hei thenh dih ko hna hnga, cun ka pum hmanh khangh awk ah ka hei pek ko hnga, sihmanhsehlaw dawtnak ka ngeih lo ahcun ka caah thathnemnak zeihmanh a um lo” (1 Korin 13:1-3) tiah a ti.
Hika i dawtnak a ti mi hi Jesuh cu ti, thisen le Thlarau ti sullam a ngei. Baibal ah dawtnak nih ti mi nih a ngeih zungzal mi sullam cu “biatak dawt” (2 Thesalon 2:10) kha a si zungzal. Cun Pathian dawtnak cu a fapa ngeih chung Jesuh ah a lang (1 Johan 4:9).
Ti le Thisen A Zum mi Lawng Nih Vawlei An Tei Khawh
Ahodah vawlei a tei kho?
Jesuh nih thisen le Thlarau in tipilnak a tiah a zum mi paoh
1 Johan 5:5-6 ah, “Vawlei cu a hodah a tei kho? Jesuh cu Pathian fa a si tiah a zumm mi lawng nih an tei khawh. A ra mi cu Jesuh Khrih hi a si, tipil a innak ti le a thihnak thi he a ra mi a si. Ti he lawng a ra lo, ti he thi he a ra. Cun cucu biatak a si tiah Thlarau hrimhrim nih tehte a khaan, zeicahtiah biatak cu Thlarau kha a si.”
Hawi dawt Khrihfa hna, vawlei le Satan a tei cu Jesuh Khrih kha a si. Ti, thisen le Thlarau a zum mi paoh nih vawlei cu an tei khawh. Jesuh ni zeitindah vawlei a tei? Ti, thisen le Thlarau in tlanhnak hmang in.
Baibal ah ‘ti’ nih Jesuh tipil innak kha a hmuhsak (1 Peter 3:21). Jesuh cu hi vawlei ah taksa in a ra. Vawlei misual mi khamh awk ah a ra, vawlei sualnak vialte lak awkah tipil a in i sualnak ruang ah vailam cung ah a thi.
Vailam cung a thisen a luang mi nih a hmuhsak mi cu Jesuh cu hi vawlei ah taksa in a ra ko ti kha a si. Minung sualnak vialte tlanh awk ah minung mui a vun i lak i tipilnak a in. Cucaah Jesuh kan sin a rat ning cu ti le thisen in a si. Phungdang in cun Jesuh nih vawlei sualnak vialte a kalpinak cu ti in tipil a innak le thisen he a thihnak thawng in a si.
Satan nih zeitindah vawlei a uk? Satan nih minung thinlung ah Pathian lunghrinh ding le nawlngai lo ding in thlaici a tuh. Satan nih minung kha Pathian nawlngai loin amah sal ah ser a timh hna.
Sihmanhsehlaw Jesuh nih vawlei sualnak vialte cu tipil innak le vailam cung thisen luanternak in a hnawh dih cang. Satan kha a tei cang i vawlei sualnak vialte kha a hnawh dih cang.
Hi a cannak cu Jesuh cu misual hna khamhtu a si caah a si. Kan khamhtu a sinak cu ti le thisen a rat caah a si.
Jesuh Nih Tlanhnak Tipil A Innak Thawng In Vawlei Sualnak Vialte A Lak Dih
Jesuh nih vawlei a tei ti sullam cu zeidah a si?
Vawlei sualnak vialte a lak dih cang tinak a si
Vawlei sualnak vialte a lak dih cang tinak a si
Jesuh cu vawlei sualnak vialte la ding le hnawhpiak ding ah tipilnak a in caah kan sualnak vialte in a kan tlanh cang. Tipil petu Johan nih Jordan tiva ah tipilnak a pek ruang ah vawlei sualnak vialte cu a cung ah chuan a si. Jesuh sual man thihnak caah vailam cung ah a nunnak a pek. Vailam cung a thihnak le a thawhthannak nih Satan a tei. Jesuh nih a thihnak in sual man leiba vialte a kan champiak cang.
Jesuh Cu Misual Hna Sin Ah Tipil Innak Le Vailam Cung Thisen Luanternak In A Ra
Jesuh nih zeitindah Satan thawnnak a tei?
Tipil innak, thisen le Thlarau in
Lamkaltu Johan nih kan khamhnak cu ti lawng si loin ti he thisen a ra tiah a ti. Cucaah Jesuh kan sualnak vialte a lak dih cang caah, misual vialte nih a bia zumhnak le amah ah zumhawktlak te umnak hmang in khamhnak kan co khawh.
Jesuh nih vawlei a rat tikah kan sualnak vialte a lak dih lawng si loin vailam cung ah a thisen in kan leiba vialte zong a cham dih. Jordan tiva ah tipil innak in kan sualnak vialt a lak i vailam cung a thisen luanternak in sualman thihnak leiba vialte a kan champiak dih cang. Cucaah “Sualman cu thihnak a si” tiah Pathian bia nih a ti mi cu a tlinter (Rom 6:23).
Jesuh nih vawlei a tei ti sullam cu zeidah a si? Vawlei a tei khotu zumhnak cu Jesuh nih ti le thisen in khamhnak a kan serpiak cang ti zumhnak kha a si. Taksa pum in a ra i tipil innak le vailam cung thisen luanternak in khamhnak lam a kan serpiak.
Jesuh nih vawlei a tei cang tiah a ti mi cu Satan kha a si. Khrihfa hmasa zultu hna nih Rom cozah zong a sung pe duh lo le vawlei tukforhnak tlu lo tein hi thawngtha biatak hi an rak dirpi.
Mah hi ti an um khawhnak cu Jesuh cu ti in tipilnak a ing (kan sualnak vialte lak ding ah tipil a ing) ti le a thisen in vailam cung ah (sualnak thihnak leiba a cham) ah a kan tlanh cang ti an zumhnak theipar a si.
Jesuh cu Thlarau (minung taksa in a ra) a ra i tipil innak le vailam cung thisen luanternak in kan sualnak vialte a lak dih cang caah khamhnak a tingco mi paoh nih vawlei an tei khawh.
Jesuh Thawhthannak Le Tipil Innak Nih A Kan Khamhmah Hmanthlak A rak Um <1 Peter 3:21>
Khamhnak hmanthlak cu zeidah a si?
Jesuh tipil innak
1 Peter 3:21 ah, “cucu atu i nanmah an khamhtu hna tipil innak a rak sawhtu hi a si. Tipi innak cu pum hnawm kholh hi a si lo, chiatha thleidannak thiang nih Pathian sin i biakamnak a tuah mi tu hi a si. Tipil innak nih cun Jesuh Khrih thihnak in a thawhthannak thawng in an khamh hna.”
A donghnak ah Jesuh cu ti le thisen a ra ti kha kan zumh awk a si. Jesuh tipil innak cu kan khamhnak hmanthlak a rak si. Lamkaltu Peter nih kan khamhnak caah um lo awk tha lo cu, ti, thisen le Thlarau hi an si tiah a ti.
Jesuh zultu ahohmanh nih vailam cung a thihnak kha tipil a innak zumh chih loin an zum bal lo. A thisen lawng zumh cu biatak cheu bang lawng zumh he ai khat. Biatak cheubang lawng zumh cu caan sin ah a lotlau thai tawn. Asinain ti, thisen le Thlarau thawngtha bia a zum mi hna cu an thawng chin lengmang lai.
Asinain tuchun vawlei ah a thisen lawng a phuangtu thawngtha chim kan karh chin lengmang. Zeiruang ah dah a si hnga? Minung nih Pathian biatak an hngal lo, ti le thisen khamhnak kha an hngalh lo caah an hrinthan kho lo.
Voikhat cu nitlak lei Khrihfabu pakhat cu khuahrum biaknak ah a tlu. Caan zeimawzat chung cu an hlawhtling ngai mi a lo nain Satan nih biatak in khuahrum biaknak lei ah a hruai hna.
Khuahrum biaknak kan ti mi cu catlap cung ah vailamtah hmanthlak na suai ahcun Satan a zam lai asiloah Jesuh thisen ka zumh ko tiah na phuan ahcun Satan a zam lai ti cawnpiaknak kha a si. Cuticun Satan nih minung kha Jesuh thisen lawng zum ding in a dehhlen hna. Satan nih Jesuh thisen a tih bantuk tein ai umter i Jesuh nih nan caah a tuah mi cu vailam cung ah a thisen luanter lawng kha a si tiah a dehhlen hna.
Asinain Peter le lamkaltu dang hna nih ti le thisen thawngthabia a biapitnak kong an phuannak kan hmuh. Asinain tuchan Khrihfa pawl nih teh zeidah an phuan? Jesuh thisen kong lawng an phuan.
Baibal ah ai tial mi Pathian bia hi kan zumh awk a si i Thlarau khamhnak, Jesuh tipil innak le a thisen kan zumh awk a si. Jesuh tipil innak hnulei chit riangmang i a thisen kong lawng chim cu khamhnak tlamtling kan hmu kho lai lo.
Pathian Nih Ti Khamhnak Kong ah Tehteh A Khan Mi
Pathian khamhnak langhtertu cu zeidah a si?
Ti, thisen le Thlarau
1 Johan 5:8 ah, “cu hna cu Thlarau le ti le thi kha an si i an pathum tein an bia aa khat” tiah a ti. A pakhatnak cu Thlarau a si, a pahnihnak cu Jesuh tipil innak a si i a pathumnak cu vailam cung a thisen a si. An pathum in pakhat an si. Jesuh cu hi vawlei ah kan sualnak vialte tlanh ding ah a ra. Hi thil pathum hna hmang in Jesuh amah lawng nih a tuah.
“Tehte a khaangtu pathum an um.” Pathian nih a kan khamh ko ti langhtertu thil pathum an um. Cu hna cu Jesuh tipil innak, a thisen le Thlarau an si. Hi thil pathum hna hi Jesuh cu kan caah vawlei ah a tuah mi an si.
Hi thil pathum lakah pakhat kan nganh ta ahcun kan khamhnak a tlamtling ti lo. Hi vawlei ah tehte a khaangtu thil pathum an um: Thlarau, ti le thisen an si.
Taksa in a ra mi Jesuh Khrih hi Pathian, Thlarau le Fapa a si. Hi vawlei ah minung thlarau in a ra i tipilnak a in hnu ah vawlei sualnak vialte a kalpi dih. Kan sualnak vialte kha a taksa pum cung ah a chuan i vailam cung ah a kan thihpiak. Sual man thihnak leiba cu a dihlak in a kan champiak. Cucu a tlamtling mi, ti, thi le Thlarau khamhnak cu a si.
Hi pathum ah pakhat khat kan nganhta a si ahcun Pathian khamhnak kan cohlan bantuk a si cang. Tuchan Khrihfa tampi ruahnak kan i hrawm ahcun tehte a khaangtu pahnih lawng an um kan ti ve hnga i, cucu thisen le Thlarau an si.
Asinain lamkaltu Johan nih tehte a khaangtu thil pathum an um tiah a ti i cu hna cu: Jesuh tipil innak ti, vailam cung a thisen le Thlarau an si. Lamkaltu Johan hi tehte a khannak ah a fianghlang taktak.
Misual mi a khamhtu zumhnak cu Thlarau, ti le thisen zumhnak hi a si. Zeibantuk khamhnak nih dah vawlei a kan teiter? Cubantuk zumhnak cu khuazei ah dah kan hmuh khawh? Cucu Baibal ah a um ko. Cucu Jesuh cu Thlarau, ti le thisen in a ra ti zumh kha a si. Cu hna cu zum law khamhnak co ve cang tuah.
Jesuh tipil innak um lo Pathian khamhnak hi a tling maw?
Tling lo
Caan saupi lio, ka hrinthan hlan ahcun kei zong Jesuh vailam cung thisen le Thlarau lawng a rak zum mi ka si ve. Thlarau in a ra i vailam cung ah ka sualnak caah a thisen a luanter ti kha ka rak zumh. Hi pahnih lawng hi ka zumh hna i midang sinah ka chimphuan.
Hi thil pahnih lawng ka zumh chung i ka thinlung ah sualnak a tang peng. Cu a theipar cu, vawlei tei khawh lo kha a si. Thlaru le thisen lawng ka zumh lio ah ka thinlung ah sualnak a tang peng.
Jesuh ka zumh hnu zong ah ka thinlung ah sualnak a tan pengnak a ruang cu Jesuh tipil innak ka rak zumh lo caah a si. Thlarau, ti le thisen khamhnak ka zumh hlan lo cu ka zumhnak kha a tlamtling mi zumhnak a rak bal lo.
Ka taksa sualnak ka tei khawh lonak a ruang cu Jesuh tipil innak sullam ka rak fian lo caah a si. Atu zong ah minung tampi nih Jesuh an zumh ko nain sualnak an tei kho lo. An thinlung ah sualnak a um peng caah zeitindah a hlan lio i Jesuh ka rak dawt bantuk khan ka dawt khawh rih lai tiah an i zuam peng.
Asinain cu an i zuamnak cu zeitik hmanh ah an hmu kho bal lo, zeicahtiah an sualnak vialte kha Jesuh tipil innak nih a tawlpiak bal hna lo. Jesuh nih tipil a innak in kan sualnak vialte a tawl dih cang ti kha an hngalh lo caah an zumhnak kha an thawnter kho lo.
Hihi nan sin ah fianter ka duh ngaingai. Jesuh kan zumh tik le zumhnak in kar kan hlan tikah vawlei kan tei khawh. Zeitluk tlamtling lo mi le sualnak tuah lengmang mi si ko hmanh u sihlaw, Jesuh nih tipil a innak in kan sualnak vialt a tawl dih cang i a thisen a luanter cang ti kan zumh ahcun vawlei kan tei khawh.
Asinain tipil a innak zum loin Jesuh kan zumh ahcun khamhnak tlamtling kan hmu kho lai lo. Lamkaltu Johan nih a kan chimh mi cu vawlei a teitu zumhnak cu Jesuh cu Thlarau, ti le thisen in a ra ti zumhnak hi a si tiah a ti.
Pathian nih a fapa a run thlahnak a ruang cu tipil a innak le a thisen a zum mi vialte khamh ding ah a si. Jesuh nih tipil innak in sualnak vialte a tawl dih cang. Pathian fapa ngeihchun Jesuh cu Thlarau in a ra. Vailam cung ah a thisen a luanter i sual leiba vialte a cham dih. Cucaah Jesuh nih minung vialte a kan tlanh cang.
Vawlei a tei khotu zumhnak cu Jesuh cu Thlarau, ti le thisen a ra ti zumhnak kha a si i cu nih cun sualnak chung in a kan luatter.
Jesuh tipil innak ti le vailam cung thisen um hlah sehlaw a dik mi khamhnak a um kho lai lo. Hi thil pathum chung ah pakhat a bau tikah a dik mi khamhnak a um ti lo. A dik mi khamhnak cu Thlarau, ti le thisen um loin hmuh khawh a si lo. Cucaah Thlarau, ti le thisen kan zumh a hau. Mah hihi hngal law a dik mi zumhnak na ngei lai.
Ti, Thisen Le Thlarau Tehte Khannak Um Lo Cun A Dik Mi Khmahnak A Si Lo Tiah Kan Ti Hna
Khamhnak caah tehte a khaangtu thil pathum cu zeidah an si?
Ti, Thisen le Thlarau
A cunglei biahalnak kong ah mi pakhat hitin a ruah khawh men. “Jesuh cu ka khamhtu ah ka zumh. Vailam cung thisen cu ka zumh i martar in thih ka duh. Ka thinlung ah sualnak a um nain Jesuh cu ka zumh. Fak piin sualchirnak ka ngei i nifate nuncan ziaza dawh in nun kai zuam. Ka nunnak le ka ngeihchiah vialte kan pek dih. Nupi pasal zong na ngei lo. Zeitindah Pathian nih cun hngal loin a ka um lai? Jesuh cu keimah caah vailam cung ah a thi. Kan Pathian thianghlim cu vawlei ah a ra i ka sualnak caah vailam cung ah a thi. Nangmah cu kan zumh, na caah ka pum kan pek, zumhawktlak tein na caah rian ka tuan. Keimah tlintlak lonak le thinlung ah sualnak ngei hmanh ning law, cu ruang ah cun Jesuh nih hell ah a ka thla hnga maw? A ka thla lai lo.”
Hi bantuk minung hi an tamtuk. Annih cu Jesuh nih vawlei sualnak vialte tipil a innak in a tawl dih cang ti a zum lomi an si. Hibantuk Khrihfa hi khuazei ah dah an kal? Hell ah an kal lai. Misualfa an si.
Kanmah kan ruah ning bantuk in Pathian zong nih a ruah ve ko lai tiah a zum mi hna cu hell ah an kal lai. Cheu khat nih, Jesuh nih vawlei sualnak vialte a lak cang caah vawlei ah sualnak a um ti lo tiah an ti. Cubantuk cu ti tel loin, Thlarau le thisen kong lawng a chim mi an si. Cubantuk zumhnak nih cun a khamh kho taktak hna lo.
Jesuh nih kan sualnak vialte tawl dih cang, vailam cung ah biaceih a tuar i nithum hnu ah a thothan ti kha kan zumh awk a si.
Cubantuk zumhnak lo cun khamhnak tling kan hmu kho lo. Jesuh cu tipil a ing, vailam cung ah a thi i nithum hnu ah a thothan. Jesuh cu ti, thisen le Thlarau in a ra. Vawlei sualnak vialte a tawl dih.
Hi vawlei ah khamhnak caah tehte a khaangtu thil pathum an um: Thlarau le ti le thisen an si.
A pakhatnak ah Thiang Thlarau nih Jesuh cu Pathian a si i minung mui in vawlei ah a ra tiah tehte a khan.
A pahnihnak tehte khaangtu cu ti a si. Johan nih Jordan tiva ah Jesuh tipil a peknak in kan sualnak vialte tawlpiak kan si. Kan sualnak vialte cu Jesuh cung chuan a si cu tipil a innak ah khan a si (Matthai 3:15).
A pathumnak tehte a khaangtu cu kanmah aiawh ah sual biaceihnak le dantatnak tuar in vailam cung ah a luang mi Jesuh thisen a si. Jesuh kanmah caah vailam cung ah a thi i kanmah caah Pathian dantatnak kha tuar i nunnak thar kan hmuh nakhnga nithum hnu ah a thothan.
Jesuh tipil innak le thisen a zum mi hna thinlung ah Pathian nih a Thlarau kha a pek hna.
Hrinthannak a co taktak mi cu an thinlung ah Pathian bia a nung i vawlei an tei khawh. Tlanh mi nih cun Satan an tei, profet deu le dong loin vawlei tukforhnak a um mi kha an tei khawh. Hi kan tei khawhnak a ruang cu tehte pathum kan thinlung ah an um caah a si: Ti le Thisen le Thlarau.
Zeitindah vawlei kan tei khawh?
Tehte pathum zumhnak in
Vawlei kan tei khawhnak a ruang cu Thlarau le ti le thisen kan thinlung ah a um caah a si. Jesuh tipil innak le thisen a zum mi paoh nih profet deu hlenthawinak kha an tei khawh. Kan tei khawhnak cu hrampi cu ti le thisen le Thlarau zumhnak ah khan a si. Cucu na zum maw?
Jesuh cu Pathian fapa le khamhtu a si ti le Thlarau le ti le thisen in a ra ti na zumh lo ahcun hrinthannak zong na co kho lo i vawlei zong na tei kho lo. Cubantuk zumhnak cu na ngei maw?
Na thinlung ah Thlarau le ti a um maw? Jesuh cung ah na sualnak vialte chuan a si cang ti na zum maw? Na thinlung ah vailam cung Jesuh thisen a um maw?
Na thinlung ah Jesuh thisen le tipil innak le keimah caah dantatnak le vailam cung thihnak a tuar ti zumhnak a um ahcun vawlei na tei khawh lai.
Lamkaltu Johan nih vawlei a tei khawhnak cu hi tehte a khaangtu thil pathum an thinlung ah an um caah a si. Cun harsatnak le hremnak a ingtuar mi a unau hna khamhnak kong zong kha a chim. A ti mi cu, “Hitihin vawlei nan tei khawh lai. Jesuh Thlarau le ti le thi in a ra. Amah nih vawlei a tei khawh bantuk in zumhawktlak mi hna nih cun an tei khawh ve lai. Hi lawng hi zumhawktlak mi hna nih vawlei tei khawhnak lam cu a si.”
1 Johan 5:8 ah, “cu hna cu Thlarau le ti le thi kha an si i an pathum tein an bia aa khat” tiah a ti. Minung tampi nih thisen le Thlarau kong cu an chim nain Jesuh tipil innak cu an nganhta. Ti kha an nganta ahcun Satan ta an si peng rih tinak a si. Mah le mah hlennak khan an chuah i an sual an i chir hnu ah Jesuh tipil innak kha an zumh i hrinthannak an co awk a si.
Jesuh thisen le tipil innak zum loin ahohmanh nih vawlei an tei kho lo. Ka nolh than la. Ahohmanh nih an tei kho lo. Jesuh thisen le tipil innak hi hriamnam ah kan hman a hau. Abia cu vainam le ceunak a si.
Kan sualnak vialte a kalpitu Jesuh tipil innak a zum rih lo mi tamtuk an um rih. Tehte pahnih lawng a zum mi an tamtuk rih. Cutikah Jesuh nih “Tho u law ceu u” a ti hna tikah an ceu kho ti lo. An thinlung ah sualnak a um peng. Jesuh an zumh ko nain hell an dong lai.
Midang Nih An Theih, An Zumh I Khamh An Si Khawh Nakhnga Jesuh Thisen Le Tipil Innak Hi Tehte Khan A Hau
Jesuh tipil innak zumh hi mah tangkahuih a si maw?
A si lo, biatak tanh a si.
Thawngthabia tehte kan khan tikah a fianghlang mi le a tlamtling mi a si awk a si. Jesuh Khrih cu Thlarau le Tipil innak (kan sualnak vialte a tawl) le Thisen (kan sual leiba a cham) in a ra. Hi pathum hi kan zumh a herh.
Cuti a si lo ahcun thawngtha bia chim loin biaknak kong kan chim tinak a si. Minung tampi tuchan Khrihfa sinak hi biaknak sawhsawh ah an ruah nain Khrihfa sinak hi biaknak a si lo. Khrihfa sinak cu Pathian zumhnak le khamhnak biatak i hrambunh kha a si. Biaknak sawhsawh a si kho lo.
Biaknak cu minung nih an ser mi a si i zumhnak cu Pathian nih a kan pek mi a si. Cucu an i dannak a si. Hi biatak na hngalh duh lo a si ahcun Khrihfa sinak hi biaknak sawhsawh bantuk ah na ruah tinak a si.
Jesuh nih biaknak dirh ding ah hi vawlei ah a ra lo. Khrihfa biaknak a dir bal lo. Zeiruang ah dah Khrihfa sinak hi biaknak ah na ruah? An i khah dih ko a si ahcun zeiruang ah dah Buddhist biaknak ah na um ko lo? Hiti ka chim hi ka palh tiah na ruat maw?
Cheu khat nih cun Jesuh hi biaknak mit in an zoh i “vancung, paradise le Nirvana” cu zeidah ai dang?” tiah an ti. An i khat dih ko, an min lawng ai dang i si tiah an ti. Kan donghnak cu ai khat dih ko lai tiah an ti.
Khrifa hawidawt hna, biatak ah fek tein kan dir awk a si. Cun “kan thawh i kan ceu” awk a si. Hmaikhah lonak zeihmanh um loin biatak kan chimphuan ngam ding a si.
Mi dang nih “hi lam lawng hi vancung kainak a si lo” an in ti tikah, “a si ko, hi lawng hi vancung kainak lam a si” tiah na ti ngam awk a si. Thlaru le ti le thisen a ra mi Jesuh Khrih na zumh lawng ah vancung khua na kai lai tiah kan ti ngam awk a si. Midang thinlung ah na ceu lawng ah hrinthan an co khawh lai i van an kai kho lai.
Zumhnak Dik Ngei: Jesuh Tipilnak Le Thisen Tlanhnak Hngal Lo Buin Jesuh A Daw mi Hna Cu An Rawk Lai
Jesuh zumh buin ai rawk ding mi hote dah an si?
Jesuh tipil innak a zum lo mi
Mah duh ning paoh Jesuh a zum mi cu biaknak minung ah i chuahnak a si.
Pacific rili ah tinbaw a pil i minung tlawmte lawng an tang. SOS an thlah nain tilet nih a kham hna caah an sin an phan kho lo. Cucaah helicopter an thlah i cunglei in hri a thlakpiak hna. Mi pakhat nih hri cu a tai ah tem loin a kut in ai tlaih ahcun cubantuk cu khel khat lei lawng in Jesuh a daw mi he an i lo, amah duh ning in Pathian a dawt tinak a si. Khamh a si rih lo nain “aw, ka zumh cang, ka khamh tuah. Ka zumh caah khamh ka si ko lai” tiah a ti.
Jesuh tipil innak le thisen khamhnak a zum lo mi cu amah tein hri ai tlaih mi bantuk an si i anmah ruahnak lawng ah khamhnak a co mi an si.
Cunglei ah cawi a si lai i hri ai tlaih mi cu a thlah ko lai. Amah thawnnak in hri ai tlaih mi a si. A dongh tiang hri tlaih peng ding cu a fawi lo. A tha a dih tikah hri a thlah lai i rili ah a tla than ko lai.
Jesuh khel khat lei lawng in dawt cu hibantuk hi a si. Minung tampi nih Jesuh le Pathian cu kan dawt an ti ko nain Thlarau in a ratnak lawng kha an zumh. Thawngtha bia tlamtling chung ah an pil khawh lo caah anmah le mah kha ka zumh cang tiah an i ti lengmang.
Zumh le zumh i zuam hi ai khat mi a si lo. A dongh tiang Jesuh ka zulh lai an ti ko nain a donghnak ahcun an thinlung sualnak ruang ah hell ah thlak an si lai. Jesuh cu ti le thlarau le thisen a ra ti hngal loin an zumh caah a si. Jesuh thisen ruang lawng ah Jesuh an zumh ahcun hell ah an kal ko lai.
Na thlarau kha a dik mi thawngtha bia hri in tem, cucu ti le thisen thawngtha bia a si. Jesuh nih khamhnak hri a kan thlak tik ah ti le thlarau le thisen in a rak tem mi lawng khamh an si lai.
Helicopter in a ra mi chanhchuahtu hna nih loudspeaker in, “hrin kan thlak tik ah nang tang in tem u law cawl lo tein um u, hri kha nan kut in tlai hlah u, nan tang ah khan tem u law hnangam tein um u, cun khamh nan si lai” tiah an au.
A pakhatnak minung nih an chim bantuk tein a tuah i hri in a tang tang in ai tem caah khamh a si. Asinain mi pakhat nih cun, “nan thinphang hlah u, ka thawng tuk ko. Ngandamnak zung zong ah rian ka tuan bal lo. Zoh tuah u! Ka titsa hi nan hmu maw? A meng in kai thlai kho lai” tiah a ti. Cu tikah cunglei hri an vun dawh tikah a kut in ai tlaih.
An pahnih tein a hramthawk ahcun cunglei ah cawi an si. Nain ai dannak a um. A pakhatnak pa, an chimh ning tein a tuahtu pa cu harsatnak zeihmanh um lo tein cunglei ah cawi a si.
Amah thawnnak ai bochan mi pa cu a donghnak ah a tha a dih. Chimh ning in a tuah lo caah a donghank ahcun a thi.
A tlamtling mi khamhnak conak ding ahcun mi pakhat nih Jesuh nih tipil innak in vawlei sualnak vialte a kalpi dih cang ti le vailam cung ah a thisen a luanter ti kha a zumh a herh. “Johan nih tipil a ka peknak hmang in nan sualnak vialte kan tawlpiak dih cang i vailam cung ah ka thisen ka luanter cang” ti sawmnak aw a thei i a zum mi paoh cu khamh an si lai.
A thisen lawng a zum mi nih cun, “na thinphang hlah, ka zumh ko. Ka nunnak dongh tikah Jesuh thisen ruang ah lawmhnak bia ka chim te lai. Jesuh cu a dongh tiang ka zulh lai i a thisen ka zumh mi hi vawlei teinak caah le ka nun chung sual teinak caah a za ko” tiah an ti.
Asinain mah hihi a za mi a si lo. Pathian nih a mi ah a pom hna cu tehte pathum: Jesuh cu Thlarau in a ra, Tipilnak a in (Jordan tiva tipil a innak in kan sualnak vialte te a lak dih) i, sual leiba champiak ding ah vailam cung ah a thisen a luanter i nithum hnu ah a thothan ti a zum mi kha an si.
Hi tehte pathum a zum mi hna sin lawng ah Thlarau a phan. “Aw, keimah cu an khamhtu ka si. Thisen le ti in kan khamh. Keimah cu na Pathian ka si” tiah a ti hna.
Asinain hi tehte pathum a zum lo mi hna cu Pathian nih khamhnak a pe hna lo. Pakhat kan hrelh sual zong ah Pathian nih, “A si kho lo, khamhnak na co lo” tiah a ti hna. Jesuh zultu vialte nih a pathum ning in an zumh dih. Jesuh nih tipil a innak cu kan khamhnak hmanthlak a si i a thisen cu biaceihnak a si tiah a ti.
Lamkaltu Paul Le Peter Zong Nih Tipil Innak Le Jesuh Thisen Tehte An Khan Ve
Jesuh zultu nih zei tehte dah an khan?
Jesuh tipil innak le thisen
Lamkaltu Paul nih Jesuh tipil innak kong a chim maw? Voi zeizat dah a chim ti zoh tuah hna u sih. Rom 6:3 ah, “Khrih Jesuh he pehtlaihnak chung i tipil kan in ah khan a thihnak he i pehtlaihnak chung ah kan i hnim ti kha nan philh dara” tiah a ti. Cun 6:5 ah, “A thihnak amah he kan thih ti ahcun thawhter a sinak ah kannih zong thawh titer kan si ve lai” tiah a ti.
Kalati 3:27 ah, “Khrih chung ah tipil nan ing i Khrih nunnak in nan i thuam.” Jesuh lamkaltu hna zong nih Jesuh tipil innak hi tehte an khan. “Cucu atu i nanmah an khamhtu hna tipil innak a sawhtu hi a rak si. Tipil innak cu pum hnawm kholh hi a si lo, chiatha thleidannak thiang nih Pathian sin ah biakamnak a tuah mi tu hi a si. Tipil innak nih cun Jesuh Khrih thihnak in a thawhthannak thawng in an khamh hna” (1 Peter 3:21) tiah a ti.
Bawipa Khamhnak Le Tlanhnak Cu Ti le Thisen In A Ra
Pathian nih mi zeidah mithiang a ti hna?
Thinlung ah sualnak a ngei lo mi
Thinlung ah sualnak a ngei lo mi
Jesuh nih minung sin ah a kan pek mi khamhnak cu tipil innak le vailam cung thisen luanternak in a ra mi a si. Cu khamhnak hmang cun kan tho lai i kan ceu lai. Zeitin? Thil pathum kong tehte khannak hmang in.
“Tho tuah, Jerusalem, ni bantuk in tlang tuah, Bawipa sunparnak cu na cung ah a tlang!” (Isaiah 60:1) tiah a ti. Pathian nih a ceunak a kan pek cang i cu ceunak hmang cun kannih zong ceu a kan fial ve.
Kan thawnnak in thawngtha bia kan chimphuan. Asinain minung tampi nih an ngai duh lo. Jesuh zum law khamh na si lai. Miding fel na si lai. Na thinlung ah sualnak a um peng rih ahcun miding fel an si rih lo tinak a si. Vawlei sualnak na tei rih lo tinak a si.
Jesuh tipil innak na zumh lo ahcun na thinlung sualnak zeitik hmanh ah na tei kho lai lo. Jesuh thisen na zumh lo ahcun zeihmanh ah biaceihnak in na luat kho lai lo. Thlarau in a ra mi Jesuh na zumh lo ahcun zeitik hmanh khamh na si bal lai lo. Hi tehte pathum na zumh lo ahcun zeitik hmanh ah midingfel na si kho lai lo.
A tlamtling lo mi dinfelnak nih cun a deu lawng a chuahter. Mipakhat nih ka dingfel cang a ti i a thinlung ah sualnak a um peng ahcun Jesuh chung ah a um rih lo tinak a si. Mi cheu khat nih cun khamhnak kha anmah dinfelnak in co an i tim.
Kan thinlung ah sualnak a um bu in Pathian nih midingfel tiah a kan ti maw? A kan ti lo. A hmuh ning tein a auh ko. A lianngan mi Pathian a sinain zeitik hmanh ah lih a chim kho lo. Minung tampi nih dinfelnak ti mi sullam taktak hi an fiang kho lo. Thil pakhat cu a thian taktak lawng ah thil thiang tiah kan ti. Sualnak a um peng rih ahcun a thiang tiah ti khawh a si lo.
Na thinlung ah sualnak a um peng ko bu ah Jesuh nih mithiang tiah a ka ti rua na ti men lai. Cucu a dik lo mi a si.
Jesuh cu Thlarau le ti (kan sualnak vialte a tawl dih) le thisen (titsa in a ra i kan caah a thi) in a ra ti a zum mi lawng ah Jesuh nih mithiang tiah a ti hna.
Khrihfa hawi dawt hna, kanmah tein mithiang kan ti mi cu ti le thisen he zeihmanh pehtlaihnak a ngei lo. Minung nih serchom mi thianhlimnak a tam tuk. Na thinlung ah sualnak a um ko bu ah Pathian nih mithiang tiah an ti maw? Zeitluk hmanh in Jesuh cu zum ko law na thinlung ah sualnak a um pen ahcun Pathian nih mithiang tiah an ti lo. Jesuh nih lih a chim kho lo.
Cuti a si ah, mi pakhat thinlung ah sualnak a um peng ko bu ah Jesuh nih mithiang a ti lai tiah na ruat maw? Mah cucu Pathian ruahnak si loin minung ruahnak a si. Pathian nih lihchim a huat. Thlarau le thisen na zumh ruang ah mithiang tiah Pathian an ti lai maw? Zeitik hmanh ah an ti lai lo.
Pathian nih mithiang tiah a ti mi cu phun khat lawng a um. Cu hna cu an thinlung ah sualnak a ngei loi mi an si. Tehte pathum a zum mi lawng Pathian nih a hngalh hna, cucu: Pathian a si mi Jesuh cu hi vawlei ah minung taksa ai lak i a ra, Jordan tiva ah tipil a ing ti le vailam cung ah kan sualnak a phurh i a thisen a luanter ti zumh kha a si.
Thawngtha biatak a zum mi lawnglawng Pathian nih mithiang tiah a ti hna. Cu hna cu dik tein thawngtha bia a zum mi an si. Pathian nih kan caah a tuah mi vialte a zum dih mi an si. Jesuh nih tipil innak kan sualnak vialte a tawl dih, vailam cung thihnak in biaceihnak a kan tuarpiak ti le thihnak in a thothan ti zumh kha a si.
Hi thil vialte hi Pathian nih dawtnak in a kan tuahpiak mi a si. Jesuh cu van in a ra i, “Re a thei mi le thil a rit mi vialte hna ka sin ah ra tuah u, dinhnak kan pek hna lai” (Matthai 11:28) tiah a ti. Cucu kan sualnak laknak hmang in a tuah.
Jesuh thisen lawng a zum mi cu Pathian nih a hngal hna lo. Jesuh thisen lawng a zum mi cu an thinlung ah sualnak an ngei peng. Jesuh nih ahodah tlanh a si cang tiah a ti mi cu an si?
Jesuh tipil innak, a thisen le amah cu Pathian a si tiah a zum mi. Hi vialte hi na khamhnak caah a biapi dih. “Hi vawlei ka rat ah khan nan sualnak vialte ka lak dih i Johan nih tipilnak a ka pek. Vawlei sualnak vialte cu ka cung ah chuan a si cang tiah tehte ka khan. Vailam cung ah sual man ka pek cang. Kan khamh cang” tiah a ti.
Hi thil pathum a zum mi lawng Jesuh nih, “Aw, kan khamh cang. Nangmah cu an thiang cang i Pathian fa na si cang” tiah a ti hna. Nangmah zong Jesuh tipil innak, thisen le Thlarau na zumh ahcun khamh na si ve lai. Thlarau le thisen lawng a zum mi cu an thinlung ah sualnak a um peng.
Pathian pennak chung ah cun biatak pakhat lawng a um. Dinfelnak, thianhlimnak le dawtnak an si. Hlenthawinak a pelte zong a um lo. Vancung ahcun lihchim a um lo.
Nawlbuar mi cu hodah a si?
Jesuh tipil innak a zum lo mi
“Cu ni cu a phak tikah mi tampi nih keimah cu, ‘Bawipa, Bawipa! Na min in Pathian bia kha kan chim i na min in khuachia tampi kan thawl hna i khuaruahharnak tampi kan tuah hna” an ti lai (Matthai 7:22) tiah a ti.
Pathian nih minung tuahsernak hi a pennak chung ah a cohlang bal lo. “Khi tikah annih cu ka thawh hna lai i, ‘nan nih cu a ho nan si kha kan hngal bal hna lo. Kal ko u, that lonak a tuahtu hna,’” tiah ka ti hna lai (Matthai 7:23) tiah a ti.
“Na caah inn pahnih ka pek. Ka nunnak zong ka pek. Mah hihi na ko lo maw Bawipa? Ka nunnak thaw a donghnak voi khat hmanh kan hlaw bal lo. Cucu na hngalh ko lai Bawipa?”
“Cu ti si ah na thinlung ah sualnak na ngei maw?”
“Aw, Bawipa, tlawmte ka ngei.”
“Cuti asi ahcun ka sin in kal ko u. Sualnak a ngei mi ahohmanh kan sin ah cohlan an si lo.”
“Bawipa, asinain nangmah kan zumhnak ruang ah martar in ka thi!”
“Martar thih na ti mi cu zei sullam dah a si?” Na lungkhonnak in pei na thih ko kha. Ka tipil innak le ka thisen na hngal maw? Nan thinlung chung ah ka mi nan si cang tiah tehte ka khang ko lo maw? Tipil ka innak na zum bal lo i ka mi na si tiah kan ti bal lo, nangmah zumhnak te ah na thi ve ko. Zeitik ah dah nangmah caah tehte ka khan bal? Nangmah tein nai hruai. Nangmah tein khamh nai tim. Cucu na hngal maw? Atu cu, na lam kha zawh ko tiah a ti hna.
Jesuh nih tho u law ceu tuah u tiah a kan ti. Tlanh a si cang mi tampi cu profet deu le Khrihfa sawhsawh hmai ah an ceu kho lo men lai. Asinain meitil fate nih ram a kangh khawh ko. Minung pakhat nih raltha tein a dir i biatak kha tehte a khan ahcun vawlei dih lak a ceu ko lai.
Isaiah 60:1-2 ah, “Tho tuah, Jerusalem, ni bantuk in talng tuah, Bawipa sunparnak cu na cung ah a tlang! Miphun dang cu muihnak nih a huh hna lai, sihmanhsehlaw nang cung ahcun Bawipa ceunak cu a ceu lai; a sunparnak liannganhnak cu na sin ah a um lai” tiah a ti.
Thawngtha deu le profe deu nih vawlei a khuh caah Pathian nih tho u law ceu tuah tiah a kan ti. Jesuh a zum mi lawng nih Pathian an dawt khawh. Tlanh a si lo mi nih cun Jesuh an daw kho lo. Zeitindah an dawt khawh lai? Dawtnak kong lawng an chim lai i biatak dihlak an zumh lo ahcun zeitik hmanh ah an daw kho lo.
Misual Mi Hna Khamhnak Caah Tehte A Khaangtu Thil Pathum An Um
Kan thinlung ah khamhnak tehte khangtu cu zeidah a si?
Jesuh tipil innak
“Cun vawlei ah tehte a khaangtu pathum an um: Thlarau, ti le thisen an si i an pathum in an bia ai khat.” Jesuh cu hi vawlei ah a ra i thisen le ti in a rian a tuan. Cucu a tuah i a kan khamh.
“Minung nih tehte an khaan mi kha kan zumh tawn; Pathian nih tehte a khaan mi cu cu nak cun tampi a ngan deuh i Pathian nih a Fapa kong ah tehte a khaan mi cu atu i kan chim mi hi a si. Cucaah Pathian fapa a zum mi paoh nih cun a lung chung ah Pathian i tehte a khannak bia kha a ngei; sihmanhsehlaw Pathian a zum lo mi nih cun Pathian kha lichim ah a canter i cucu zeicahdah a si tiah cun, Pathian nih a fapa kong i tehte a khaan mi kha a zumh lo caah a si. Cu tehte cu hihi a si: Pathian nih zungzal nunnak a kan pek cang i cu nunnak cu a Fapa chung ah a um. Pathian Fapa a ngei mi paoh nih cun nunnak cu an ngeih i Pathian Fapa a ngei lo mi paoh nih cun nunnak cu an ngei lo” (1 Johan 5:9-12) tiah a ti.
Hrinthan mi nih minung tehte khannak an hmuh tawn. Kannih cu mithiang tiah cohlan kan si. Hrinthannak a co mi nih khamhnak kong tehte an khaan tikah minung nih an al kho hna lo. An cohlan tawn. Dik tein kan zumh caah kan zumhnak a fek tiah an ti. Khamhnak kan sinak kong tehte kan khaan tikah ahohmanh nih an kal al kho lo. Na dik ko tiah an kan ti i minung nih tehte an kan khaanpiak.
“Pathian tehte khaannak cua ngan dueh i hihi cu Pathian tehte khaannak a si” tiah a ti. Pathian tehte cu a fapa a si tiah a ti. A dik ko lo maw? A fapa tehte cu zeidah a si? Cucu Jesuh cu Thlaru le ti le thisen in a ra ti kha a si. Cuticun kannih zong nih khamhnak kan rak co ve.
“Pathian fapa a zum mi paoh nih cun a lung chung ah Pathian i tehte a khaannak bia kha a ngei, sihmanhsehlaw Pathian a zum lo mi nih cun Pathian kha lichim ah a canter i cucu zeidah a si ti ahcun Pathian nih a fapa kong i tehte a khaan mi kha a zumh lo caah a si.”
Hika caang nih fiang tein ahodah khamhnak a co mi cu a si tiah a kan chimh. Pathian fapa a zum paoh nih cun a chung ah tehte khaannak a ngei tiah a ti. Na thinlung ah tehte khannak a um maw? Na chung ah a um i ka chung ah a um ve. Pathian cu kanmah caah vawlei ah a ra (Mary pum ai hlan i Thlarau thawnnak in kan sinah minung taksa a vun i lak). Kum 30 a si ah kan sualnak vialte phur ding in tipilnak a ing. Kan sualnak vialte he vailam cung ah biaceihna a si. Zungzal nunnak kan hmuh khawh nakhnga thihnak in nithum hnu ah a thothan. Cuticun Jesuh nih a kan khamh.
Thihnak in thothan hlah sehlaw zeidah a cang hnga? Zeitindah thlan chung cun ka caah tehte a khaan khawh lai? Hi ruang ah hin amah cu ka khamhtu a si. Hi ruang ah hin amah cu kan zumh.
Tipil innak le a thisen kan khamh hna tiah a kan chimh. Cucu kan zumh caah nangmah le keimah cu khamh kan si. Tehte khannak cu na thinlung le ka thinlung ah a um. Khamhnak a co mi nih cun tipil a innak hi hnulei chit awk a tha lo. Kan khamhnak caah a tuah mi hi philh le hrelh awk a tha lo.
“Sihmanhsehlaw Jesuh nih cun, atu cu hitihin si ko seh. Pathian nih tuah awk a si a timi paoh cu i tuah ko seh,” tiah a leh. Cucaah Johan cu a hna a tla ve” (Matthai 3:15). Johan nih Jordan tiva ah a peknak in kan sualnak vialte a tawl dih ti kha kan al bal lo. Khamh a si cang mi nih Jesuh tipil innak hi an hlaw bal lo.
Zum I Tlanh A Si Lo Mi Nih A Dongh Tiang Jesuh Tipil Innak An Hlawt
Aho nih dah Pathian lih a chimter?
Jesuh tipil innak a zum lo mi nih
“A zum lo mi nih Pathian kha lihchim ah an canter” tiah lamkaltu Johan nih fiang tein a chim. Lamkaltu Johan hi atu nung sehlaw, tuchan Khrihfa hi zeitindah a kan ti hnga? Jesuh nih tipil a in ah khan vawlei sualnak vialte a tawl dih maw dih lo tiah a kan hal hnga.
Tipil petu Johan zong nih Jesuh nih tipil a innak in a kan tlanh cang tiah tehte a khaang ko lo maw? “Jesuh tipil ka pek ah khan a lu cung na sualnak vialte kha chuan in a keng in an phurh piak ko lo maw?” tiah a kan hal ve hnga. Jesuh tipil a innak cu kan dihlak in a kan khamhnak ding caah a si tiah fiang tein tehte a khaan (Johan 1:29, 1 Johan 5:4-8).
Pathian a zum lo mi paoh nih, phundang in, Pathian nih kan caah a tuah mi a zum lo mi paoh nih Pathian kha lichim ah an canter. Jesuh nih tipil a innak in kan sualnak vialte a tawl dih cang kan ti tik ah, “Oh! Ka hawi! Zeitindah cucu a si khawh lai? Kan sualnak vialte a tawl kho dih lai lo” tiah an ti. Sual hramthawknak lawng a lak i nitinte kan sualnak cu a tang peng ko tiah an ti.
Cucaah tlanh an sinak ding ah nitinte an sualnak caah sualchir thlacamnak tuah peng a hau tiah an zumh. Cucu na zum ve maw? Jesuh nih vawlei sualnak vialte tipil a innak a tawl dih cang ti a zum lo mi nih Pathian cu lihcim ah an canter.
Jesuh Nih Vailam Cung A Thisen A Luanternak e Tipil A Innak In Voi Khat Ca Zalak In A Kan lanh Cang
Ahodah lihchim a si?
Jesuh tipil innak a zum lo mi
Jesuh cu tipilnak pek a si i voi khat ca zalak in kan sualnak a tawl dih. Pathian nih Jeush tipil innak le a thisen a zum mi paoh kha a khamh hna i a zum lo mi paoh kha a hlawt hna. Hell ah an kal lai. Cucaah khamh kan si maw si lo ti cu Jesuh nih vawlei sualnak a tawl dih maw tawl dih lo ti kan zumhnak ah ai hngat mi a si. Jesuh ni vawlei sualnak vialte a tawl dih. A zum mi paoh cu khamhnak an si i a zum lo mi paoh cu hlawt an si, zeicahtiah Pathian kha lihchim ah an canter.
Minung hi an sual ruang ah hell ah an kal lo, zumhnak an ngeih lo caah tu ah an kal. “Cucaah Pathian fapa a zum mi paoh nih cun a lungchung ah Pathian i tehte a khaannak bia kha a ngei, sihmanhsehlaw Pathian a zum lo mi nih cun Pathian kha lihchim an an canter cucu zeicahdah a si ti ahcun, Pathian nih a Fapa kong i tehte a khaan mi kha a zumh lo caah a si” (1 Johan 5:10). Jesuh nih ka sualnak vialte a tawl dih cang ti a zum lo mi cu an thinlung ah sualnak a um peng. Sualna ka ngei lo tiah an chim kho lo.
Voi khat cu Khrihfa upa pakhat ka ton i bia ka hal, “Upa, Jesuh na zumh ah khan na sualnak vialte a tlau dih maw?” tiah ka ti.
“Aw, a tlau dih ko” tiah a ti.
“Cuti si ah, Jesuh nih vawlei sualnak vialte a lak dih cang i ‘aa lim cang’ tiah a ti caah khamh kan si cang, cucu a dik ko lo maw?’ tiah ka hal than.
“Aw si, khamh ka si cang” tiah a ka lehthan.
“Cutisiah, sualnak lo in na um la cu?” tiah ka hal than.
“Aw si” tiah a ka lehthan.
“Na sual than ahcun zeidah cang lai?” tiah ka hal than.
“Minung pei kan si cu, zeitindah sual lo cun kan um khawh lai? Cucaah kan i chir lai i sualchiarnak ca nitinte thla kan cam ko lai” tiah a ka ti.
Hi Khrihfa upa hi a thinlung ah sualnak a um peng, zeicahtiah cun khamhnak tlamtling a hngal lo.
Hi bantuk minung hna nih Pathian kha zeiah an rel lo i lihchim ah an canter. Pathian a si mi, Jesuh nih sualnak lak a hrelh ta mi a um maw? Ngaihchia ngai a si. Jesuh nih a hrelhta mi sualnak a um ahcun zeitindah khamhnak Bawi cu a si khawh lai? Zeitindah rak ka zum u tiah a ti khawh lai? Lihchim ah na canter ve lai maw? Ruahnak cheuh kan duh mi cu, cuticun tuah hlah ti hi a si.
Lamkaltu Johan nih fiang tein khamhnak tlamtling kong a kan chimh. Minung tampi nih Pathian nih kan caah a tuah mi hi zumh an duh lo-cucu Jesuh cu Thlarau le ti le thi in a ra ti hi a si.
Hika ah Khrihfa phu hnih kan um: Babal nih a chim mi zum lo in, “keimah cu misual” ka ti ah ai phuang mi le Baibal a chim mi le Pathian nih kan caah a tuah mi vialte zum in, “keimah mithiang ka si” tiah ai phuang mi an si. Khuazei phu hi dah biatak a chim mi phu an si hnga?
Pathian nih a tuah mi vialte a zum lo mi, phun dang in, Ti le Thlarau le Thisen khamhnak thawngtha bia a zum lo mi kha lihchim mi an si. Zumhnak deu an ngei. A zum lo mi nih Pathian kha lihchim ah an canter.
Pathian cu lihchim ah canter hlah. Jesuh cu Jordan tiva ah a ra i Pathian nih tuah siseh a ti mi vialte a tlinter dih.
Zumlotu Nih Jeush Tipil Innak Le Thianhlimnak An Hlawt
Satan le Khuachia nih zeidah an hlawt?
Jesuh tipil innak
A fapa a zum mi hna cu an chung ah tehte khaangtu a um. A hrinthan mi nih cun Jesuh nih kan sualnak vialte a tawl dih cang i ti le thisen in khamh kan si ti kha an zumh. Jesuh hi vawlei ah ngaknu thiang Mary pum in a chuak i vailam cung a thih hlan ah Jordan tiva ah tipilnak a in ti le thihnak in a thothan ti kha an zumh.
Mithiang mi nih an thinlung ah tehte khaannak an ngeih. Khamh kan si ko ti langhternak cu Thlarau le ti le thi in a ra mi Jesuh kan zumhnak ah hin a si. Tehte khannak cu na chung ah a um. Na chung ah tehte khaangtu um ve seh ti kha ruahnak cheuh kan duh. Na chung ah tehte khaangtu a um lo ahcun khamhnak na co rih lo tinak a si.
Lamkaltu Johan nih, “Pathian Fapa a zum mi paoh cu an chung ah tehte khaangtu a um” (1 Johan 5:10) tiah a ti. Mah cucu vailam cung thisen zumhnak lawng a si maw? Asiloah thisen tel loin ti lawng zumhnak teh a si maw? Pathian cohlan mi na sinak ding ahcun a pathum in na zumh a hau.
Cu hnu lawng ah Jesuh nih khamhnak na si cang tiah tehte an khanpiak lai. Pathum si loin pahnih lawng na zumh ah teh tehte khaangtu a um lai maw? Cucu nangmah duhnak lam lawng in Pathian zumh a si hnga. Nang le mah lawng tehte nai khaang ko hnga.
Hi bantuk minung hi an tamtuk hringhran. Vawlei cung ah pathum si loin pahnih lawng a zum mi an tamtuk. Khamh kan si cang tiah an ti i anmah thinlung chuak paoh in cauk hna an chuah. Anmah le mah, “Evangelical” ka si tiah an i ti. “Evangelical” ti lawng an i za lo i ‘biaknak minung’ tiah an i ti rih. Ti khamhnak kha an zum lo nain an i uangthlar. Asinain an thinlung ah Pathian tehte khaannak a um lo. Anmah hlathlainak sawhsawh lawng a si.
Cucu zeitindah khamhnak na ti khawh lai? Thlarau le ti le thisen a ra mi Jesuh a zum mi lawng nih Jesuh an zumh khawh.
Lamkaltu Paul nih, “Thawngtha kha nan sin kan phakpi tikah bia lawnglawng in si loin, thawnnak le Thiang Thlarau le biatak a si fiang tein kan hngalhnak he khan a si” (1 Thesalon 1:5) tiah a ti. Minung nih Jesuh thisen lawng an zum tik ah Satan ai lawm. “Aw, mihrut hna, kan hlen khawh hna” tiah a ti hna. Minung tampi nih Jesuh thisen kan thangthat tikah Satan a zam lai tiah an ruah. Satan nih vailamtah a tih lai tian an ruah. Asinain Satan nih a lenglei lawng in tih bantuk tein ai umter. Cucu kan zumh awk a si lo.
Minung chung ah khuachia ai hrawlh tik ah a hmur le kaa ah buanbara a tawh men lai. Satan caah a har mi a si lo. Satan nih minung hi zeizong vialte a tuahter khawh thlu dengmang. Khuachia nih a thluak tlawmpal lawng hman a herh. Pathian nih Satan hi thah khawhnak nawl dah ti lo thawnnak phun tling a pek dih. Satan nih minung hi hnah bantuk in a choih khawh hna i an kaa in buanbara zong a tawhter khawh.
Cu thil a can tikah, zumtu hna nih, “Jesuh min in chuak” tiah an thawl. A van that in mah khakha Jesuh thisen thawnnak thawng in a si tiah an ti. Asinain mah khakha Jesuh thisen thawnnak a si lo. Satan nih ai titer mi lawngte a si. Satan nih cun Jesuh tinih tipil a innak in kan saulnak vialte a tawl dih cang ti a zum mi le kan sualnak aiawh ah vailam cung ah biaceih a tuar i a thisen a luanter hnu ah nithum hnu ah thihnak in a thothan ti a zum mi lawng a tih hna. Satan cu Jesuh tipil innak le a thisen kam hrawnghrang ah a um kho lo.
A caan ah Roma Catholic tlangbawi nih camhaih an hman tawn. Video chung zong ah kan hmuh tawn ko. “The Omen” ti mi video ah tlangbawi pakhat nih thing in ser mi vailamtah kha ai put i a thin len nain a thi diam ko. Hrinthannak a co taktak mi hna cu kha bantuk an si awk a si lo.
A hrinthan mi zumtu nih cun raltha tein ti le thisen kong kha an chim ngam. Satan nih doh a timh tik ah, “Na hngal maw? Jesuh nih ka sualnak vialte a tawl dih cang” tiah an rak ti. Cutikah Satan cu a zam. Hrinthan mi hna pawng ah Satan um a huam lo. Hrinthan mi zumtu pakhat khika a thut ahcun Satan cu ai phetchem cang. A zum lo mi nih Pathian kha lihchim ah an canter. A fapa tehte khannak, ti le thisen tehte khannak kha an zum lo.
Pathian fapa tehte khannak cu zeidah a si?
Tipil innak, a thisen le Thlarau
Pathian fapa tehte khaannak cu zeidah a si? Thlarau in a ra i ti in kan sualnak a tawl dih ti kha a si. Vawlei sualnak vialte kha a cung ah a chuan dih i vailam cung ah kan caah a thisen a luanter. Cucu ti le thisen le Thlarau khamhnak cu a si ko lo maw?
Minung tampi nih Pathian hmai ah lih an chim, a ruang cu khamhnak taktak a si mi, thisen le ti khamhnak thawngtha kha an zum lo. Hi a silo mi thawngtha dang paoh cu a deu an si. An zumhnak kha a deu i thawngtha deu an phuan.
1 Johan 5:11 ah, “Cu tehte cu hihi a si: Pathian nih zungzal nunnak a kan pek cang i cu nunnak cu a fapa chung ah a um” tiah a ti. Pathian nih zungzal nunnak a kan pek cang i cu nunnak cu a co mi nunnak chung ah a um tiah a ti. Cun cu nunak cu a Fapa chung zong ah a um.
Khamhnak a co mi cu Jesuh thisen le tipil innak a zum mi kha an si. Khamh a si mi nih cun zungzal nunnak an co. Zungzal nunnak na co cang maw?
Caang 12nak ah, “Pathian fapa a ngei mi paoh nih cun nunnak cu an ngeih i Pathian fapa a ngei lo mi paoh nih cun nunnak cu an ngei lo” tiah a ti. Phun dang in cun, Fapa nih a tuah mi a zum mi paoh cu zungzal nunnak an ngei. Asinain pakhat te a hrelh sual mi zong nih zungzal nunnak an ngei lo.
Pathian Fapa Jesuh tuahsernak an zumhnak cung ah zohchih in lamkaltu Johan nih minung a then hna: ti, thisen le Thlarau. Hi nih an chung ah Pathian bia a um maw um lo ti kha a fianter. Jesuh tipil innak, a thisen le Thlarau an zumhnak zoh khan minung phu a then hna.
A Hrinthan Lo Mi Nih Tuu Le Meheh An Thleidang Kho Lo
Tlanh mi le tlanh lo mi cu aho nih dah a thleidan khawh?
A hrinthan mi nih
Lamkaltu Johan nih ahodah khamh mi cu a si tiah fiang tein a langhter. Lamkaltu Paul zong nih a fianter ve. Zeitindah Pathian sal le hna nih tuu le mehe kan thleidan thiam lai? Zeitindah Pathian dal taktak le a deu kan thleidan khawh lai? Jesuh thisen le ti khamhnak a co mi nih cun thleidan khawhnak thawnnak an ngei.
Pastor an si ah, evangelist an si ah, Khrihfa upa an si ah, tuu le meh an thleidan thiam lo i khamh mi le khamh lo mi an thleidan thiam lo ahcun hrinthannak an co rih lo i an chung ah zungzal nunnak a um lo tinak a si. Hrinthannak a co taktak mi nih cun thleidan khawhnak an ngei. An chung ah zungzal nunnak a um lo mi nih cun an thleidang kho lo.
Mui lakah muici kan thleidan khawh lo bantuk khi a si. A hring cu a hring a si ko i a rang cu a rang a si ko. Asinain na mit nai chinh ahcun na thleidang kho hna lai lo.
Asinain a mit ai au mi nih cun thleidannak fate a um mi zong an hmuh khawh. Khuazei dah a rang i khuazei dah a hring ti kha an thleidan khawh. Cubantuk in khamh mi le khamh lo mi hna cu thleidan khawh an si.
Khamhnak thawngtha, ti khamhnak thawngtha, thisen khamhnak thawngtha le Thlarau khamhnak thawngtha hi kan chimphuan ding a si. Kan thawh i kan ceu awk a si. Kan pawngkam thawngtha bia ngai ding in midang kan sawm hna tik ah minung bia kan chim lo. 1 Johan 5 ah a sullam a langhter. A buathlak sualnak hnga lo a dot tete in kan chim lai.
Kan chim cuahmah ti le thisen le Thlarau thawngtha hi khamhnak le ceunak petu a si. Jesuh tipil innak midang chimh hi kan ceunak cu a si. Jesuh thisen kong midang chimh hi kan ceunak cu a si. Hi biatak hi fiang tein kan chim lai i minung vialte nih a fiang lo mi an um nakhnga lo.
A hrinthan mi nih kan thawh i kan ceu lo ahcun minung tampi nih khamhnak co loin an thih lai caah Pathian ai lawm lai lo. Pathian nih sal thathu tiah a kan ti sual lai. Jesuh thisen le ti khamhnak thawngtha hi kan karhter ding a si.
Hi kong ka nolh lengmang nak hi Jesuh tipil innak hi kan khamhnak caah a biapit tuk caah a si. Kan fale sin ah bia kan chim tikah kan nolh than lengmang a hau, zeicahtiah kan nolh than lengmang lawng ah an lung a fiang kho.
Cathiam lo mi ca kan chimh hna ah cun ABC cafang in thawk a hau hnga. Cun duhsah in cafang tial kan chimh khawh lai. Cun biafang pawl hmuh khat ah a chiah khawh tikah a sullam kha kan chimh lai. Hihi Jesuh kong zong minung tampi nih an fian khawh nakhnga kan tuah ding a si.
Jesuh tipil innak kha fiang tein kan chim ding a si. He vawlei ah ti le thi le Thlarau in a ra. Jesuh cu na khamhtu ah na cohlan i hrinthannak na co nakhnga thla kan campiak.
Ti le Thlarau khamhnak cu Jesuh cu Pathian a si ti zumh le vailam cung ah a thisen a luanter i kan sualnak vialte tipil a innak in a kan tawlpiak dih cang ti zumhnak in a chuak mi a si.
