- All e-books and audiobooks on The New Life Mission website are free
- Explore multilingual sermons in global languages
- Two new revised editions in English have been released
- Check out our website translated into 27 languages
Due to COVID-19 and disruption to international mail service
we have temporally suspended our ‘Free Print Book service’.
In the light of this situation we are not able to mail you the books at this time.
Pray that this pandemic will end soon and the resumption of the postal service.
Pray that this pandemic will end soon and the resumption of the postal service.
Ta tajore driaru ri `i 3: Ofu loso Eyidrii Endri dri tro
[3-4] Batisimu Yesu Dri Ka Lari enzi `Ba Dria Ovi Ni Ete (1 Petro 3:20-22 ojo)
(1 Petro 3:20-22 ojo)
“Ai dii endri `ba andrani Rubanga orika ku o`du nainga Nue ni utere ana i`bo `dijo ri inga ri `i. `Ba rarika eyi si ra rii kpodru aro. (Eyi dii ovi batisimu anyi ari di (andi ru dri je ka si ri`i ku, ki Cara icara le Rubanga ni ra anda ri si ri itede`di ri `i. Onzika Yesu Kristo dri si), otu `bu a ori dri nyare Rubanga dri iga, ka malaika cidru ase vua ka amba bu a rii okpo `bu `a ri tro ase ni.”
“Ai dii endri `ba andrani Rubanga orika ku o`du nainga Nue ni utere ana i`bo `dijo ri inga ri `i. `Ba rarika eyi si ra rii kpodru aro. (Eyi dii ovi batisimu anyi ari di (andi ru dri je ka si ri`i ku, ki Cara icara le Rubanga ni ra anda ri si ri itede`di ri `i. Onzika Yesu Kristo dri si), otu `bu a ori dri nyare Rubanga dri iga, ka malaika cidru ase vua ka amba bu a rii okpo `bu `a ri tro ase ni.”
Amengwi anda rii a`du si?
amengwi anda rii kiza
Rubaga dri si
Rubanga oni ama oca ama tire vudri dia kuku sa ote. Oni a`di ama ti enzi `ba isa ote disi obi ama cidru a`i `ba ri ari le leti ana batisimu dri si, ani di odu enzi vudri rii cidru ni. Ari `ba a`ikaa ra rii cidru vua oba engwiki ana `ba `i.
`Dii ta cidru kiza Rubanga dri `a idele ri `i. Kendre ana ru si ka Bugu longo dri 8:4 ga ri ani, “Ba ni, aduta nya ana le`jo ni ra jo nza dini ri`i?” `Ba jele ra, rarika aia enzi nia pi rii ai `ba ana le tema ri esuka ra ri `bati `i.
Ai ana baciri `i. Ama `ba ingoni ri`i, ama `ba tete ana ari ni a`ika ana Endri tro aca recore `baciri Rubanga dri `i dru kuku ri`i, esu aca engwire anda ni kuku vua ama rarire ri`i,ohwe amani drimgbo ani ungwejo ata dru ra ya? Ama enzi`ba, enzi `ba tile oluka vu dri `dia kinya 70 kusa 80 jo ama ru ni pelere `i ri `i.
Saa esu ama je re enzi ama dri ia si kuru rii, vua ama driso a`i bare Ofu Loso Yesu a batisimu dri idri ana ari tro kuku rii, ama `ba anda ri` `i ku vua ani ote dubasi ama dra ra.
Majugo Paulo ojo,ana olujo dria sa dini rii kiza Rubanga dri`i. Ama ani anzo kiza driaru si. Ma`di ta bi`di enga `bua si esi vuru vudri dia oko ari ama ra, oba amengwi ana `baciri `i vua ana `ba `i. Ama ani anzo kiza si ana lari eyi si vua Endri si risi.
Ana ra ama a`ijo amoludru ana` baciri `i, `ba anidri anda ri`i rii a`du? Ani dii esu ama endreka pelere si ya? Ani dii esu ama esika ca si ya? Kusa loso ama dri si ya? Kole amara ta dri aru vua ohwe anzo ta ana idele risi.
Ra ni Rubanga obi ama olule ana `ba `i vua olule opi ani dri `bu dri `ia anetro. Rubanga oba amengwi ana `ba `i ausini amolu dru anetro tadru. Ledii ra te Rubanga a tutu co`jo amaru lidri olu`di tadru risi ri`i. Oba amengwi ana `ba `i rii ama endre ka pelere si ku, ama esika ca si ku kusa ama loso onde ta cidru rii ra si ku. Ra laka rii te ana ama le ka ndro si.
“Eyi dii ovi batisimu anyi ari di andi ru dri je ka si ri`i ku,” (1 Petro 3:21). Ai dii endri `ba andrani Rubanga orika ku o`du nainga Nue ni utere ana i`bo `dijo ri inga ri `i. `Ba rarika eyi si ra rii kpodru aro” (1 Petro 3:20).
`Ba ubi ku, te ganyi a ma`di alu, ei `a `ba eri ariru ni. Jo dini ri, ama cuwi si ande `ba ziti ra ya? Aludisa dini ku, ama `ba tema mgbi ri `i ku ki ama riru a`i si eyi si vua Endri si, ama rarika ra ni ta nyuma ri `i vua ani hwe hwele ilili ri`i vua tro sa ani tutu retu ri `i amani ani ungweka ama Ata `i kusa ama Opi `i ni `i. Ama `di ga alusa kpe. A`di ani ungwe ama Ata `i kusa ama Opi `i ni ingoni jo ama driso sa enzi `ba dini `i?
Jo ara ta le`jo ce ledi idri dria amariru ra `i ri, ama ni a Rubanga ole ama ama`a ta zi ideka ani ni ako si ni ote. `Disi amanzo ani ku ya? A`di esu ama ti vua ama dra lidri ama dri unzi ri `i a, oko lidri ama dri keko aci oludi tadru ri `i a, jo esu kolu ana le vua ana tutu `i ku `i. Ama Rubanga ni anzo idi idi ana tutu si vua le ana bajoadru ama engwijo ana mi ga ana `baciri `i konyi tro risi.
Lari Laje Oru Rere Hwele Amani Batisimu Yesu Dri Si Ri`i
`Ba andrani Nue
ninga ri` bati udra a`du si?
A`dusi a`iki eyi ni kuru
(Batisimu Yesu dri`i).
ninga ri` bati udra a`du si?
A`dusi a`iki eyi ni kuru
(Batisimu Yesu dri`i).
“Eyi dii ovi batisimu anyi ari di andi ru dri je ka si ri`i ku.” Osiru Petro atijoadru ri iga tete Endri aro rii ariru eyi elu di ri `ia si ni. `Ba weli koca si Nue ni nga `i? A`di `ba naa weli ni ni kpe ki driso o`du esu weli kolu Million alu. `Ba tete aro ei Nue dri `ia ri ariru ni `ba million alu di `ia `i.
Jo odu weli ledi `i ni karuvi `ba dri o`du disi rii tro ni wa. Amala ojoru, weli `ba dri o`du disi rii onde Billion azia ni ra. `Ba driadru dini rujeka pelere aia enzi ni a ri `bati kate `ba Yesu ni a`ika ra rii lofo weli si si? Jo odu ki ovi dru ganyi alu a`diki ndrea `ba aru ubi ku.
Ganyi ma olure ri `ia ire `ba 250,000, di `ia `ba jele aia enzi ni a ra rii si? Tete 200 le `i `ya? Jo esu eco kengwi mia dri si sa kolu ingoti? Ehwi ani `ba elifu ri`ia tete ma`di alu esu tutu laje dri rii ra rii ni.
Olaru esuru Kristo `ba weli Korea a rii Million 12 `dii katoli sa aru dru. `Dria di `bati i`a `ba tile eyi si vua Endri si di rii kpodru si? Kole oba anyetro uje a ci tete Nue ninga `ba weli vu dri amgbu di`ia sa tete `ba weli aro ariru ni. Kole oniki ote `ba Yesu ni a`ika ra rii enzi aidri ojeru pelere aia batisimu dria ru a`ika si, disidru odu enzi ai drii ndutu dru pi.
`Ba ubiku a`i Yesu oje `ba cidru ana batisimu si vua ana kuruce si ni ni. Nyindre driso eno Yesu a onzika dri ni, `Ba onzika anetro rii si? Nyindrea engaki Yerusaleme a esi kaki evu Yesu a dri ga vua a`wi ana dri ni mgbo ai ai`jo. Nyira dri so ta driaru nyitiri aaru na`a `ba vuka lini sukuru Rubanga dri iga ra rii si kusa e`bu ideka rii si.
O`du disi `ba vuka lini sukuru Rubanga ni nijo ri iga ra rii ekpadru, ki a`di esu `a ai `a `ba ubi kua ri oni vua a`i batisimu Yesu dri ri ka layu hwe wa ni ni. `Ba ziti vuka lini ta lajo Rubanga dri ri iga ri kojoa Yesu esu batisimu rii ana oluka ma`di anda ri `i si, ziti kojoa ohwe laka batisimu rii ausi ni kengwidru ama ani si, kengwi dru `ba si.
Ki osiru Bugu Ole ri`i a maju cidru dii, Petro ti Yoana tro aisa ara onzeki ta Yesu a batisimu nidri jokaa enzi ama dri rii kpodru obaru anidri si ni ra amasa ama `i ra.
Maju onze ta Bugu Ole ri`i a ojoki enzi ama dri rii cidru obaru Yesu ni dri ana batisimu si. Ani dii sadini a`ujo kiza Rubanga dri si amasa amani layu esujo a`ikaa si ri `i.
Tazi Aludi Sa Iyo `Nosi` Batisimu Layu Kusa Laje Dri `i ga `i
A`di esu Rubanga a le nza
godru rii ni?
Ma`di batisimu Yesu dri a`idi
ana ari tro ri`i.
godru rii ni?
Ma`di batisimu Yesu dri a`idi
ana ari tro ri`i.
`Ba amgbu koraa tete Yesu ni a`ika a`dite di ka ama ari ni. Dini amgbu dri lini ovi aia lari esujo rii aa, vua `ba amgbu koraa batisimu Yesu dri rii lini Kristo `ba ni zojo ri `i, ki ledi ce ku. Bugu elifu ubi ma lale ra ri `i lofo si, mesu bugu alusa mgbimgbi lari tii lofo laje kusa layu batisimu Yesu dri vua ari drii, lari Rubanga drii tro ria driba ni nze`di rii kuru. Tete `ba aro ariru ni Nue ninga `i.
Ani ku `di `ba si ka rari endru ni ya `i. Migeni kolu ubi ku. `Ba rarika ra na `i `ba batisimu Yesu dri a`ika ana ari tro ra ri`i. Ma acire ekelezia undre si rii, mesu ai lofo `ba ubiku ka ofu loso batisimu Yesu dri idri ri nze ni, `dii ofu loso anda dri`i.
Jo igeniki layu batisimu dri vua ari Yesu dri rii ku, amolu driso enzi`ba vua ama riru sa driso kuru, jo sa a`i ama dri aci`jo ekelezia a rii kolu ingoni sa`i. Amaci ekelezia a lidri ama dri iga ndi amafu dra ki rusa enzi kolu ama asiti ga aa vua amolu enzi `ba.
Jo amaci ekelezia a kinya 50, ki ru sa enzi olu ama asi ni `a `aa ri, a`i amadri kinya 50, dii konyi ako naa enzo ni ta. `Da rii nya a`i zi ce ri esuka o`du zi alu si `i. `Ba amgbu Yesu ni a`ika ra rii lofo, `ba a`i ce tro rii `ba batisimu Yesu dri ri a`ika ana ari tro ri `bati `i, `ba ai diani di `bati kohwi Opi bu dri `ia ra rii ni.
A`i ce rii nya ta anda rii a`ika Ngwaapi Rubanga dri esi vu dri di `a ra vua batisimu anidri si odu enzi vudri rii pi `i. A`i di ani di ka ama ji Opi `bu dri iga ni. Kole ama `i vua Yesu `a ari ora kuruce dri nyisi vua ma si. Kole amani dii ote amani ani anzojo wa vua e`ku hwejo ani ni wa`i.
Ama `ba ingoni ri`i? Ama `baciri ago/vua uku tro rarika ra batisimu Yesu dri si vua ana ari dri si ri `i. Ama ani anzo ku a`du si? Yesu ni ohwe batisimu A`bu Jurudano ni a esu ana kinya ni mudi ina di ideru ama ari jo. `Disi, odu enzi amadrii kpodru pi vua esu lamgba ama si kuruce dri.
Kesu jo tee amara ta driaru ni sa, tazi amani idele wa ani iyo rarii ama kiza retu ri tro anzo hwe anini `au. Kole anyetro cidru oniki ote ta cidru Yesu `a idele vudri di `a rii ide ama lari ni. Atijoadru rii, emu vudri di `a ra. Esu batisimu ra, eparu kuruce dri ra, onzi dra ga si o`du inajoadru risi ra, vua draa dini ori dri nyare Rubanga dri ri iga.
Lari Rubanga dri rii `ba cidru ni ma`di zi ebele ra ani alusa laka iyo. Lari Yesu dri rii cidru nyini vua ma ni. Ama Rubanga ni anzo ana le si vua tutu si.
Ani longo zi ofu loso ri ia ote, ka rungo dini. “♫Odo pelere rii a`a. ♫`Ba amgbu vudri ri `i lofo, ma ma`di ana le ni esu`di lari tro ra ri`i. ♫Ana le au`jo ri`i! ♫Ana le ma ni ri`i, Odo pelere rii a`a. ♫`Ba amgbu vu dri di a ri `i a, ama tete `ba rarika ra ri`i,engwiki `ba driaru `i rii ni. Ama `ba ana le ni esu ka ri`i. ♫O le Rubanga dri, kiza Rubanga dri tro. ♫O, ana le au`jo rii ingopi! Ana le mani ri`i. ♫”
Yesu esi vuru nyi arire vua ma arire, layu ana batisimu dri ri isa `ba ni, Ofu loso rii te ta sabi ri`i ku; Ki ani anda ama lidri ni nzudi ta unzi ri `ia si jidia Opi Rubanga dri ta pelere ri iga ri`i. Kole nyi `ba uje a ci rii a`i ni ta anya lofo ga Rubanga tro ri`i.
Esi vudri `di `a ama arire. Ohwe anini batisimu vua esu lamgba kuruce dri ama enzi ni `du jo pi.
Ani tutu ingoni ri`i jo `ba a`i tro ri ka Rubanga ni ungwe aia Ata `i `i! Ama Yesu ni a`i ama Aridipi `i dru vua ama rari ama enzi nia a`i si wa ni ingoni si? Le`di karide wa rii ana le nzagodru amani risi. Amariru ani si a`dusi ani ma`di ama le`di ati ri`i.
Yesu Oje Ama Enzi Ni Vu Alu Ate Tri
“Kristo ni anangasi odra anya enzi si vu aludi ate tri, ani ma`di loso rii, odra `ba unzi ri si, ausi ani koji dru ai Rubanga dri” (1 Petro 3:18). Ohwe Kristo ni batisimu ama layu si vua odra kuruce dri vu alu `di nyi arijo vua ma arijo, a`dusi ru `ba unzi ri`i.
Amariru vu alu ate tri
ya nosi ama rari be?
Vu alu ate tri.
Odra vu di idri vu alu di ama edujo lamgba Rubanga dri ri `i si pi. Ausini ama to dru Opi `bu dri `ia vua amolu dru Rubanga na`ndra tadru, esi vuru `dia ru ari tro si vua oje ama enzi ni cidru vu alu ana batisimu si, ana dra kuruce dri risi vua ana onzika si.
Nya `i Yesu Kristo ari ama ndutudru ana batisimu si vua ana ari si ni ra ya? Jo nya `i ofu loso ana batisimu dri`i ana ari drii tro kuru, nyi rari kpe. A`dusi ama mori ako, ama ruti `di ni kpe jo ama`i Yesu ka ama ari ndutudru vua ka ama enzi ni je vu alu`di batisimu anidri si vua ari si ni ku`i.
Ohwe batisimu anini ama enzi ni dujo pi vua ali le`jo ana dri ga kuruce dri ama si. Oje enzi cidru `ba enzi `ba ria idele rii vu alu `di layu ana batisimu dri si vua ari si.
Esu kolu ta okpo rere ri `i ama `ba rini layu kusa ama jeka `i jo kesu te oru enzi saa cidru si jo ide enzi ra sa `i. Alusa Opi ka `ba a`i anda ni kpe jo sa oluki cuwi saa ci ru si, olu ki egbwe vua aziki ta ekelezia a ingoni sa `i.
Disidru, a`i batisimu Yesu dri idri ri bati ana ari kuruce dri ri tro ta duba si ri `i amani lari loku ri esu jo `i. Kole dubasi ama `i eyi vua ari Yesu dri dini. Ta loso ri ideka, oluka loso a konyi ni iyo lari ama dri esujo `i, vua enzi ni rebe jo `i.
Lobu ovi ra laje oru ri jeka `ba ta ako rini ni ta idele nya lari tro iyo, josa o`du cidru si nyihwe leidipi nyidri ni lonya loso rere ri`i sa `i. Yesu ka te `ba ana batisimu ni a`ika ana ari tro ra rii ari au. Jo ama `i Rubanga ari ama batisimu Yesu dri si vua ana ari si vu alu ate tri ni ra, ama rari ra.
`Ba zi ti koraa jo Rubanga kojo ta Bugu Ole ri`i a ra sa kolea ai kora ta driaru nza kpa, naa amale ma`di `a ni, ama `le anyiba igeniki le`jo driaru rini kendre ondi Bugu Ole ria jokaa ri ani.
Eberei 10:1-10 Osiru dini, ari ama vu alu di ate tri. Ani ta ce ri `i Rubanga ka `ba batisimu Yesu dri a`ika ana ari tro ra ri ari au ni `i. Kole amasa ama `i ani ani. “♫odra vu alu di, ari ama cidru vu alu di, Oo ma adrunzi, anya `i vua anya yu ru. Anyi `ba teri anyi dri rii batisimu Yesu dri ri idri. ♫” Yesu ari ama lidri cidru unzi ri `ia vua enzi amadri ri `ia vu alu`di ate tri. Batisimu ana esule risi vua ana ari radi risi.
“Ma`di anda ri odra `ba unzi ri si” (1 Petro 3:18). Yesu ni Rubanga ani enzi ako vua ide hwa alusa enzi kuru. Esi vuru ama dri ru si `ba arire aia enzi ni `a. Ohwe anini batisimu vua odu ama enzi ni cidru pi. Ari ama enzi `a si vua anda ako a si pi.
Enzi cidru `ba drii idojo oti nga ndi dra nga rii oba Yesu nidri batisimu driaru ri inga vua `ba cidru ri ariru le`jo alika andraga ri `ia pi di ideru ana ari a raka vua ana draka kuruce dri si. Ohwe ani ni batisimu ama enzi si vua odra dra lou risi ama kare ga.
`Dii lari ana batisimu dri`i. Yesu ari ama cidru enzi `ba rii vu alu di ate tri. Amaci dru a`wi ako! Yesu oje ama enzi ni cidru idojo oti nga ndi o`du ama drajo ri inga esu lamgba laka rii kuruce dri ra. Ama `ba Yesu ni a`ika ra rii kole a`iki ari ama vu alu di ate tri batisimu anidri riisi vua ana ari si.
Ama mori ako, ki Yesu ni ani ani ku, amba a`i ta ku ki Yesu le komba `a. Rubanga ari ama vu alu ate tri. “Rubanga a `ba vudri rii le ka ndro si eze ana Ngwaapi ni alu tende rii ausini `ba cidru ani a`ika rii kudra dru ku, kesuki dru lidri olure tadru ri`i” (Yoana 3:16). Rubanga ehwe ana Ngwaapi alu tende rii oba ohwe ana Ngwaapi ni batisimu ausini enzi vu dri rii cidru oba dru dria aru, ausi kesu dru lamgba `ba vudri ri `a kare ga.
Lari au`jo dii ingo `i! Le au`jo dii ingo `i! Ama Rubanga ni anzo ana le si vua lari si. Rubanga ka `ba eyi ari tro Yesu dri a`ika ra ri ari au. Batisimu Yesu dri ana ari radi ri tro si, vua lejo ce Yesu ni Rubanga a Ngwaapi `i risi.
`Ba Yesu ni a`ika ra rii ai `ba batisimu Yesu dri a`ika ra ri`i disidru kaki lidri olure tadru ri esu ra kendre `ba bale anda ri ani. Kole ama cidru dubasi ka `i.
A`di ari ama ni? Rubanga ari ama ni ya? Nosi ta ana bi le ria alu ari ama ni? `Dii Yesu ni Rubanga rii, ari ama ni. Amari ru rii a`du si ama `i layu Rubanga dri rii ra vua ani dii layu lari dri`i.
Yesu ni Opi Lari Dri`i
Kristo a ehwi ni a`du?
Padere, Opi, Vua Profeta
Yesu Kristo ni Rubanga. Yesu a ehwi ni Aridipi `i. Vua Kristo a ehwi ni ma`di trile adu si ri `i. Kendre Samuele a Saulo ni trika adu si Ofu Oku a ri ani, Opi adi tria tri adu si, paderea sa adi tri `a adu si, vua profeta ni sa ana e`bu ni ide`jo kole otri ani adu si kpa.
Yesu esi vuru dia vua otriru e`bu ovi mgbimgbi ai ina si. Alu ni padere dru, Opi dru, vua Profeta dru kendre amba azi azidi `bu `a ri ani. Ohwe batisimu laka odu enzi ama drii cidru pi.
Ana laru hweka ta Ata a lele ri idere ga si azi ani azi enzi ti uhwejo ri `i dru Ata ni andra. “Ma leti, ma anda, vua ma lidri ma`di koya alusa ma ata dri kpe jo eya madri si ku `i.” Yesu ka `ba ani a`ika ra ri ari ana enzi aidri duka pi batisimu anidri si vua ana ari si si.
Adusi “lidri `aa rii tete ari ni a ya?” (Levitikasi 17:11). Yesu a ari ora ana batisimu nivu leti na si azi ana lidri ni Rubanga na`ndra musara enzi dri uhwejo ausini ama `ba a`i tro rii kari dru ru ra.
Onzi o`du inajoa ana dra nivu risi lidri idi vua onze ofu loso rii Endri mabusu a rii ni ra. `Ba ayule kuru rii kaki endre Endri si kendre mabusu a ani a`dusi aia enzi si umbekiru ci. Yesu ojo ofu loso rii di`i, ofu loso eyi dri vua ari dri ri `i. Rubanga ohwe amani ofu loso eyi dri vua Endri dri rii ama ari le au. Ma`di a`idia ra rii ka ru ti `di.
Batisimu Yesu Drii ana Ari tro ka enzi `ba ari ni
Ama urata loso ri esu Rubanga
na`ndra ingoni?
A`i `baka batisimu Yesu dri
idri ana ari tro si.
Yesu Kristo ni ama Aridipi `i, vua ojoru 1 Petro 3:21 ga, “Eyi dii ovi batisimu anyi ari di (andi ru dri je ka si ri`i ku, ki Cara icarale Rubanga ni ra anda risi ri`i”. Onzika Yesu Kristo dri rii ta duba si ri `i lari enzi `ba dri ni `i.
Yesu oje enzi enzi `ba drii ndutudru pi ana bakaa ani dri batisimu nga si. Nya `i batisimu Yesu drii ra ya? Nya `i enzi ama asi ri ojeru pelere rii ana batisimu si ni ra ya? Ama asi oje ru enzi cidru a pelere, ki ama ru le ka driso enzi ide.
Ma`di a ru tika di a ehwi ni ka enzi ide kpe `i ku. Ama `ba tile di ri isa ka enzi ide ki ama asi kolu pelere a`dusi a`i amadri batisimu ru rii si. `Disidru le`jo sile oru ledi ojo, “Andi ru dri jeka si ri `i ku, ki Cara icarale Rubanga ni ra anda ri si ri`i” (1 Petro 3:21).
Yesu a enzi ma dri jeka pi vua Rubanga a le`jo alika laka ri a`ika ra si ma ani i ku a`dusi. Ama riru Rubanga na`ndra vua ama ra engwi pelere. Urata amadri ri ka ruje pelere ni ingo ni? Urata amadri karuje pelere jo ama `i batisimu Yesu drii ana ari tro ra`i. Ari ma batisimu anidri si vua ana ari si, ma ani a`i ku adu si? Ama riru Rubanga na`ndra vua ama urata engwi pelere.
Amajoa driasa Rubanga andra Yesu oje ama enzi ni kuru ni kpe. Kendre ama jokaa Rubanga ole ama ku ni kpe ri ani. Ama urata engwi pelere vua tesa enzi itiri reaga emi, jo amide tazi ego mgbesa ama nia ote. Ani ledii te leti amani ama urata a ta mbajo pelere wa ri `i.
Jo urata amadri kande ama si ra ehwi ani ta zi ego rii a`a. Eyi Yesu a batisimu dri ri ka andi cidru enzi dri ri je pelere. Yesu odu enzi amadrii cidru ana batisimu si vua oje ama pelere oje ama urata isa tro. Jo ama `i dii ra lokudru ama urata isa kolu pelere. Ama urata kolu pelere ni ingoni si? Nya batisimu vua ari tro Yesu dri ri a`ika si. Ma`di alu alu dri urata unzi vua andi rii a`a ido`jo ndi ani tijo ri inga ki jo ama `i enzi amadri rii obaru Yesu nidri ni ra ta ledii cidru dua pi.
Anidii a`i `ba tile Endri si di ri dri `i. Ani ta au`jo ri `i ku ki ta kole nya `i ri `i. Nya urata ni pelere a? Kolu pelere ni nya oluka lidri loso risi si ya? Kusa kolu pelere rii nyaa enzi a ru baka Yesu nidri vua nya ani a`ika ra si ya? Ani dii tete a`i nyi ni urata loso ri esujo ri `i.
Le`jo ziti lidri tro rii aa ki le`jo ziti dri le lidri iyo. `Ba cidru ria urata ka ruje pelere rii ingoni? Leti te ce amani engwi jo anda vua urata pelere ri esujo rii kole ama `i lari Yesu dri ndutu ri `i.
Jo ama`i batisimu driaru ni ka ama eco ole ni ra ehwi ani ka andi ama ru ga ri du pi `i ku. Ki koba urata amadri Rubanga ni andra ri kolu pelere. Ledisidru ojoru, kole amani ote ohwe Yesu ni batisimu, odra kuruce dri vua onzi draga si ra, dria di ni ori dri nyare Rubanga dri iga.
Jo saa eca ra keya kengwi vudri dia di “Disidru Kristo isa azi ani enzi `ba amgbu dri dule vu alu`di; kemu ka rite`de vu erijo ri si ra, le`jo enzi dri si ku, ki kemu lari ejire `ba ani ute ka ri ni” (Eberei 9:28). Ama `i kengwi ama jire, ndrole ama `ba ani uteka asi cidru si ri`i, vua amengwi enzi ako rii ama batisimu driaru ri a`ika ana ari tro si.
E`bu Ovi A`i Loku Ri Itiri Jo Rii
Ama rari batisimu Yesu
dri rii ako wa ya?
Ka ride kpe.
Abi ovi a`i itiri jo lidri a di idele esu amuba ti ani ca kuru ekelezia amadri Daejeoni niga.
Rev. Park ni ekelezia Daejeoni dri `i a ri ojo `ba ruduka ra eri rini enzi alu disa vudri dia batisimu dria ehwi ni ako rii iyo. Izi dia ago ori odu okore au saa lini nzejo ekelezia ziti na ia ri si `i a`dusi lei`ba ziti ri kaki ofu loso ri nze ki kaki layu esule batisimu Yesu dri si ri ebe ci disi oba ago di ka enzi ru o`du cidru si.
Ki ama ri dia ekelezia Taejoni niga ka ta eri mi tri mgbo dru. A`dusi ojo anini enzi driaru rii ndutu dru obaru Yesu ni dri. Oba engwi ta adu ri`i izi dini ani itajo ausi ai kovu dru ekelezia a `i ni `i.
O`du zi alu, ori ekelezia a vua eri bugu Roma dri 8:1 ni a ojoru, “Disidru `ba remuka Yesu Kristo ti tro ri idri le`jo alika iyo.” `Disidru mgbe saa nasi ora ta a, `ojo kumbe gba jo ma`di a`i Yesu ni ra ri ani enzi ako. Masa ma Yesu ni a`ika ra si madri enzi iyo.`
Disidru mgbe oze eri ana lotu dri vua ana ozi tidri sa alu alu dere ojo, “Enzi anya asiti ga aa ya? Jo `aa ehwi ani a`i anyi drii ce ku”. Le`jo di oba Rev. Park igwe ana oku ni ra. Ago oni driso ta batisimu Yesu dri idri ku ki ojo asi okpo dru ani enzi ako.
`Diiri `ba rudu ka ra di ido le`jo esuka lidri okpo tro. Izi odri olure ma`di dini dri `i ki rusa enzi asi a ru aa vua dini ri ago ojo ani enzi ako, ago aci ekelezia a vu amgbu kuru ki mgbesa oni ani enzi ako ni ote.
Izi oni cuwidru ai eritruwa si aidri enzi aa ni `i. Idoki ta iroka driaru. Ago isa oya andraga jokaa ani enzi ako tro `i. Adusi Bugu Ole ri ojo, `Disidru `ba remuka Kristo ti tro alu ri idri le`jo alika iyo.` Ki izi di le kaci andraga jokaa ani dri ana asiti ga enzi aa tro `i.
`Disi o`du zi alu izi dia oluka ma`di ta radi palanda ri `i si odu ra yajo Rev. Park dri ani zijo di ta ana jole ria ehwi ni a`du ya `i ndrole ana jorea enzi ama drii ndutu obaru Yesu niru ri `i.
O`du zi alu, undrwelaga lecu hweka Rubanga ni `a vu ga izi di oze ana ago ni baru ati ati ki ani le oko asi vule lazi di zi re leidipi Park ni. Ojo leidipi ni, “ani ote iri ama ni ta driba nzere au ki tro sa ani ote tazi okpo rere ruzudi di rii `aa. Ale nyi nze mani ta `driaru.” `Disidru Rev. Park onze anini ta driba ru tika di eyi si vua Endri si nidri.
`Dii ri mgbe sa era le`jo rusidi bugu Roma dri 8:1 ga rii ra “Disidru `ba remuka Yesu Kristo ti tro alu ri idri le`jo alika iyo.” `Diiri mgbe izi di odu ra a`ijoadru ra vua ariru ra. Era vule vule ni kumbe enzi anidri rii obaru Yesu niru ana batisimu si `i.
Ido le`jo rusidi ci ria ehwi ni erika. vule ga oko esu kifunga layu dri rii batisimu Yesu ri si vua ana engwika anda anda layu ana batisimu dri dri `i si.
Loku, ago omu ega kuru ki ka ani te angwe esi. Eri ta driba nzele oma enzi cidru ana idele rii ojeru pelere ni di, ozi lazi asi egbwe si, “Jodiniri, dria nyesu layu ra ya?”
Ki anisa eri ta leidipi a jole rii di dria ociru ra a`dusi eri ta zi ti leidipi a jole Ofu loso batisimu Yesu dri idri dii au a`dusi esu eri eze sa kuru. `Disidru oni dri `a cuwidru ote enzi hwa ana asi ga batisimu Yesu dri risi iyo ni `i.
Vua ago ti izi tro engwiki ta irore oko izi oya ozi ana ago ni para `di enzi asi a ru aa ya si? Oko ojo ago ni nyolu enzi ako ni ingoni batisimu Yesu dri ako `i. Vua a`i ani kondre dru ta ce ana a`i ni ga rini si. Ki ago oce kondre ta li ana urata niga di ojo anini enzi ana asi ga `aa.
`Diiri oko ongwi Rev. Park dri enzi ruka tro. Oko ozi ani `ba andrani oku ri `a dri bare Indri enzi ti uhwejo ri ri idri rii a`di `baa kesua indri dii lidri ya kusa `dia kpo kpa ya?” Ana ta erika gbu sa ofu loso eyi dri idri endri drii tro kuru si, lazi zile di oba dria ociru andraga rere.
Ledii ovi Endri dri ama itirile ri `i Yesu ni kole ohwe batisimu a`dusi adi enzi vudri cidru ri `ba driaru. Oko kole kodra kuruce dri a`dusi enzi a musara ni dra.
“Kaki aia dri ni `ba azi ni dri, lidri dru a kusa ko dra kpo kpa `a, ozi `i?” A`dusi dri `a ociru le`jo dri tijo batisimu Yesu dri idri risi ra. `Diiri, Rev. Park onze anini ta le`jo ehwi layu dri batisimu Yesu dri si ri idri azo.
O`du nasi nai, ago a ofu loso eyi dri vua Endri dri ri erika vu atijoa ri`i diiri mgbe oko ariru ra. Eri vu alu `di ki mgbesa esu layu ausi ra.
Ledii ta ama esule batisimu Yesu dri iga ri`i. Amajoa dria ama dri enzi iyo ki rusa ama dri enzi aa urata ama dri batisimu Yesu dri ri ako ri `ia `i. `Ba amgbu kojoa Yesu oje ama enzi ni pelere ana draka kuruce dri si ki tete `ba batisimu Yesu dri a`i ka ana ari tro ridri enzi Rubanga na`ndra iyo rii ni.
Rev. Park `a lini hwele `ba eri dini vua ovi aia ehwi ani erijo risi kitedea `ba ka layu ndutudru ri esu kpe jo `ba oba a`i layu batisimu Yesu dri idri ku `i. Ani dii ovi lari ama esule ri dri `i `dii a`i batisimu Yesu dri `i a ri.
Ovi Lari Dri`i: Batisimu Yesu Dri`i
Ta ama ndrele o`du disi
`ba aridi rii a`duta?
Batisimu Yesu dri`i.
“Batisimu dii ovi anyi aridi andi ru dri jeka si ri `i ku.” Yesu eya vuru vu ama dri di idri ama enzi cinya ani ri jere ausi ni ama urata kengwi pelere lofu ani. Ojeru ama enzi nia cidru a`dusi Yesu odu enzi ama drii cidru oba ani dri batisimu nga. Ka ama ari ana batisimu si vua ari si. `Disidru tacidru bile bi rii kole kowo andraaru. Yesu ni a`ika ka `ba ari wa rii ni. Amengwi `baciri Rubanga dri `i vua ama vu `bu a ama Yesu ni a`ika si ra. Ama ana `ba ta azika anini ri`i. Ama Rubanga ni ungwe ama ata `i, ama olu vudi idri ki ama Opi. Nya `i gba lokudru Rubanga ka `ba layu eyi dri vua Endri dri ri a`ika ra ri ari ra ni ra ya? Layu ama dri kolu ndutu ni kpe batisimu Yesu drii ako `i. A`i ama a`ijoadru Rubanga ti Yesu tro ce rii a`i ama batisimu Yesu dri a`ijo ri`i, ana kuruce `i vua Endri ari driaru tro ka ama ari ndutudru wa`i ani dii tete a`i alu ce ri `i. Ama enzi ojeru pelere Yesu a batisimu si vua enzi amadri a ti uhwe ru ra ana ari radi kuruce dri risi. Kristo Yesu ka ama ari eyi si vua Endri si. Oo! Ama `i ra!
