• All e-books and audiobooks on The New Life Mission website are free
  • Explore multilingual sermons in global languages
  • Two new revised editions in English have been released
  • Check out our website translated into 27 languages
Search
English
English

Sermons

Ta tajore driaru ri `i 3: Ofu loso Eyidrii Endri dri tro

[3-8] Batisimu Yesu dri rii  Tati Rubadi Amani  layu esujo ri ‘i (Mateo 3:13-17)

(Mateo 3:13-17)
“Yesu enga Galilea ga emu abu Jurudano ni ga batisimu kore Yoana dri. Yoana ole ta dii ga ka mgbe, ojo, ‘batisimu ledi nyidri rii ma ‘i, ki iko nyidri nyemu madri ya?’ Ki Yesu ‘ai ani ojo anini, ‘Nyebe ta dii kolu ‘bo’bo dru dini, ama ta di ide ka dini ni ama anda Rubanga ‘a lele ri ide au.’ Dii ri oko ai ra. Oko batisimu ni dii ri, Yesu efu eyi ‘a si oca saa zere kuru; mgbe, ondre bu awi ru mgbo, oko ondre Endri Rubanga dri endredi amamu ani ri esi ori ana dri ga. Uduku engare bu ‘a ri, ojo, ‘Nyi ma Ngwaapi ni ma lele ndro ri ‘i, ma le ni kpo nyi ru.’” 
 

BATISIMU YOANA NI BATISIMU HWEDI RI DRI ‘I

Enzi ru ka ni adu?
Ogu eco ka lidri enzi si ri iga vua 
Yesu ni igeni ka ‘au engwi 
‘jo ole enzi ako ‘i.

‘Ba amgbu vudri dia ri oni di ra Yesu ‘a em ujo vudri dia vua ana batisimu esu ‘jo Yoana Batisita dri rii adu ya ni ku Draa anyi ba ojo ki dri ta batisimu Yesu dri ri idri Yoana Batisita ni ma’di ani ni batisimu hwedi ri tro, vua tro sa oraki ta di adu ta oba Yoana Batisita ni batisimu hweka abu Jurudano ‘a ni ya ni dri sa tro. Driba ‘a onzeru Mateo 3:1-12 ga ojoru Yoana Batisita ka ‘ba cidru ingwi vule Rubanga dri ‘aia ‘aia enzi ni ru ka si. 
“Ma loku dru anyini batisimu hwe eyisi ogu eco ‘jo enzi dri ‘a” (ana ciri ciri 11 ojo ‘i), adusi “uduku uza di hwesihwesi ‘a ri ojo: ‘anyide leti Opi drii, anyi du anda’” (ana ciri ciri 3’i). Yoana Batisita ni, osu bongu idele naka naka bi si ri ‘i kaci onzi umbi tro, kuza hwesihwesi ‘a, ka batisimu enzi ru ‘jo ogu eco ka laka si rii nze.
Kuza laki rutraka ri bati ni, “Anyi ru anya enzi ni, Aridipi ‘ba cidru dri ri keya; anyide ana leti ni, anyide leti ana lari drii kolu anda. Anye be laru hweka rubanga kafiri ‘ba dri ri ni ra ki ra rii anyesu Opi ni anya asiti ga ‘au.”
Kole anyeda dri adu ga? Ta Rubanga ku rii rure ga vua ta unzi ziti lidri ‘a rii tro. Jo dini ri draa kolea amide adu? Kole amesu batisimu Yesu ni ‘a ‘ausi ni amengwi dru ole.Yoana Batisita odri kuza hwesihwesi ‘a, “Kojoa anyesu batisimu madri ni. ‘Ausi ni anyije dru ru anya enzi ni ga si pelere, Aridipi anyi dri rii, koya emu re vu di idri. Ka anya enzi du cidru pi kendre bilo angwa enzi du di ti rubadi Ofu Oku ‘a ri ani vua koko ka anya enzi ni ‘je cidru pelere.”
Ofu Oku ‘a, enzi idele odu cidru si rii ka rebe dri ti ka azi enzi ebejo ri idri si. Vua tro sa enzi cidru Isaraile ‘baa idele kinya ‘a rii ka ru ba idri ru dri ma’di amba azi di ri dri si odu enzi ebejo ri si, ani dii tesa kode odu mudri ‘joadru imba tuderi ‘joa ri dri si kinya cidru (Levitikasi 16:29-31).
Ovi alua disi, kole enzi ‘ba cidru dri isa kobaru Yesu ni ru ana batisimu si vu alu si ‘ausini ani si ka rebe ra. Disidru Yoana odri kojoa ‘bani kole kedaki dri Yesu dri koko kesu ki batisimu ani si.
Lejo ehwi okpo rere taa idojo ovi Yoana Batisita ‘a dri idri ri iga rii enzi ru ka, ondi ani di ingwi Isaraile ‘ba Yesu too keya keya ra ri iga ni. Enzi ru ka ‘a ehwi ni ogu eco ka ovi olujo enzi si di iga vua Aridipi ni ‘ai ka ‘au ‘ausi ni ama enzi ni cidru ka rebe ra.
‘Ba Isaraile dri rii kaki layu esu ‘aia ‘ai kaa Aridipi ni keya keya ra vua keya ka ‘aia enzi ni ‘je cidru pi si. Alua ri ani, amasa esu ki layu ama Yesu ni ‘ai ka si, out bu ‘a dria ate kinya 2000 ni ra vua oko oje enzi cidru vudri dia rii pi. Ki Isaraile ‘ba aninga ofu Oku ‘a rii oga ki cara Rubanga dri rii mgbe, kaki azi ego rii azi ‘au disidru igweki Aridipi ni dri ‘a ra. Amala Yoana Batisita ‘a lekaa ani kini ama ziniga cara Rubanga dri ri si di vua cara Aridipi ni keya keya ra dri idri ri si sa di si, ido mgbe batisimu hweka ‘ba ni vua tati ‘a ekore ga asu ani ohwe batisimu Yesu ni sa abu Jurudano ‘a tro.
‘Ba amgbu evu Yoana dri ni vua ‘aisa oko esu ki batisimu ra, oru ki ‘aia enzi ni ‘aia ta Rubanga ku rii ru ka si vua ‘aia cara Rubanga dri rii ga ka mgbe si. Esu amala ondreru ovi anda azi azi ‘jo rii ‘ai na― nyuhwa lidri rii,dri ti ka driaru ‘i, vua ana ari ‘i. ‘Ba cidru vudri rii esu lari ‘aia Yesu ni ‘ai ka si.
Ki Farazei ‘ba ‘ai Saducei ‘ba tro ‘aisa oce kevu ki batisimu ga di, Yoana ojo ‘ai ni, “Ini boro ‘a ngwanzi! Adi ojo anyini anyife lejo alika vule rii si pi ni ni ya? Kole anyi ‘a ‘oa enzi ru ka si ri ‘i, Vua unza anyi anya ngasi ku, ‘Tee nosi oma ama abi ni Abaramu ‘i’” (Mateo 3:7-9).
Farazei ‘ba dii ‘ai Saduce ‘ba tro, laki uje ebu ka ‘au ri ‘i vua ‘ai ‘ba laru hwe ka –ta Rubanga ku rii ru re ga ri ‘i, ki draasa dri olu ki ‘ba Rubanga dri ri ‘i tee kole ki lejo Rubanga dri rii ku sa ‘i. Kaki Rubanga zi igeni ‘au ura ta ‘aidri ‘aia ngasi rii tro.
Oce kevu ki batisimu ga Yoana Batisita dri di,ojo ‘ai ni, “Azi azi mbi rii ku ra rii anyeco ogu anya enzi ni ga si ra rii kole anya ‘i Aridipi ni keya keya ra vua keya ka anya enzi ni je ra ni ‘au. Kole anya ‘i dii anya asiti ga ‘au.”
Enzi ru ka ‘a ehwi ni ogu eco ka leti ego vua mbi ri iga ‘i. Enzi ru ka anda rii ogu eco ka enzi dri ‘a ‘ai ego ri tro vua engwi ka Yesu dri ‘i. Dii ana layu batisimu si rii ‘ai ka ana lamgba esule kuruce dri ri tro ‘i.
Disidru, Yoana Batisita odri kowo ‘ba Isaraile dri ri ni, ‘ai dii ‘ba cara Rubanga dri ri ga ka mgbe ovi azi azi ‘jo ri tro ri ‘i,’ausini adi ‘aini lejo nze engwi ‘jo Rubanga dri. ‘Ba ingwi ka Yesu dri dii Yoana Batisita ‘a ebu ‘i ‘ausi ni kaki ani ‘ai ‘au vua ‘ausini kaki lari esu ‘aia enzi ‘ni ‘a si cidru ra.
 

NYA ‘I LAYU BATISIMU YESU DRI SI RI ‘I YA?

Kole ‘ba cidru kide 
Yesu ni andra adu?
Kole ka ‘i ki ani ‘aini lari esu ‘jo 
‘aia enzi ni ‘a si ndutu dru ‘i.

Ta atijoadru Yesu ‘a idele ana ana ebu laki ni ri idore ri ‘inga rii batisimu ana esule Yoana Batisita dri ri ‘i. Vua enzi cidru vudri rii obaru ru ‘a ru ovi dii si.
Disidru batisimu Yesu dri rii ido ka Rubanga ‘a lari dri ‘ba cidru ni ri ‘i ani di oko ta anda Yesu ‘a idele enzi ‘ba cidru ‘a idele rii ‘je ‘jo ri isa tro. Rubanga ari ‘ba cidru anda Yesu ‘a enzi ‘ba cidru dri rii ‘jejo pelere ri ‘ai ka ana batisimu si rii vudri dia pelere. 
Yesu oce ani kemu vudri di ‘a di vua oce ani kesu batisimu Yoana Batisita dri di, mgbe ofu loso Opi bu dri dri ri ori. Bu ‘a t i awiru mgbo ana batisimu si vua kendre ana rete ka Mateo 3:15 ga ri ani,ovi ru ondi ku sa azi enzi ‘a rebe ‘jo dri ba nzele Levitika 1:1-5, 4:27-31ga Ofu Oku ‘a rii tro. 
Ta cidru Ofu Oku ‘a rii oviru ta Ofu Udi ‘a rii tro eritruwasi kaki ru vi. “Nyundru bugu Opi dri ria ‘a ni, vua nyi la: ta ‘ai dii alusa egwe ku; ‘aa ru alusa ana rezi ni igwe di ani kolu iyo” (Izaia 34:16). 
 

OFU UDI RI BATI OFU OKU RII TRO ERITRUWASI KAKI TA ‘JO LAYU ‘BA CIDRU ‘A ENZI DRI RI IDRI

Kole amaru ama enzi ama idele 
odu cidru si rii odu cidru si ‘a?
Ku. Enzi ru ka anda rii ma’di ‘a ana enzi ni 
‘jo ka vu alu si kpodru vua ma’di ni ana 
uje ni ingi ka batisimu Yesu 
dri ri iga layu esu jo ‘i.

Ofu Oku ri ‘ia, enzi itu ‘a ‘a ni a rii ka rebe azi enz i ebejo ri si ndrole dri ti ka driaru si. Disidru draa enzi dia ari ko ra enzidipi dia kare ga ana enzi ni rebejo. Vua trosa enzi robe di kinya ‘a a ni ‘a ri isa adi baa azi enzi ebejo ri idri dri ti ka driaru si, Di ka ride ‘ausini ‘ba cidru ka lebe ‘aia enzi cidru kinya ‘a ri dri esu ra si. 
Ofu Udi ri ‘ia, ondi ovi ani alua di ani, yesu emu vua oko esu batisimu Jurudano ‘a ‘ausini kodu dru enzi cidru ‘baa idele ri ni si. Ledii lejo Rubanga dri ani nga ricara di Ofu Oku ‘a profeta ti si ri ide ru ni.
Yoana Batisita ni, batisimu hwedi Yesu ni rii, ani tiluza Rubanga dri ezele amvu imba ndi ndi 6 odri ko wio vuaru Yesu ni eze ri ‘i. Ohwe sadini ojo yesu odu enzi cidru vudri rii pi, ojo dii Yoana 1:29 ga. “Dii! Biloangwa Rubanga dri enzi vudri ri du di ri ‘i!” 
Yoana Batisita oba enzi ‘ba cidru dri rii Yesu ni dri ana batisimu hweka laka abu Jurudano ‘a si. Ovi di si, Opi ide layu anda rii ‘ba cidru ‘a enzi ni ebejo ra. Draa ta kolea anye tro ide ki rii ‘ai ki ‘i. 
Enzi cidru vudri rii obaru Yesu ni ru. Maju Yesu dri ri ‘bati ojo Ebu maju ‘a idele 3:19 ni ga, “Anyiru anya enzi ni anyiko anyengwi Rubanga dri, ausini anya enzi ni cidru ka rebe ra, ausini saa anya lovu esu‘jo rii kenga Opi ‘a andra ga.” 
Odri ki kaki ta driba nze ama ni di ra Yoana Batisita ‘a batisimu hwejo Yesu ni ni rii adu ya ni dri, vua ra ana jojoa dru di ‘ba koko ana vu ni ‘au rii adu ya ‘i. Ojo, “Anyiru anya enzi ni anyiko anyengwi anda ga. Anyigeni la-yu batisimu Yesu dri si rii ‘au. Anyije ru anya enzi ni ‘a si pelere.”
Aridipi eya oko oje ama enzi ni cidru vu alu ate tri batisimu ana esule ri si. Adusi enzi cidru vudri rii obaru Yesu ni ru ovi dii si. Ledii ta ti Rubanga ‘a ubale lejo eko di batisimu Yesu dri ri si ri ‘i, kendre ondi ana rusi ka Mateo 3:13-17 ga ri ani. 
“Yesu enga Galilea ga emu abu Jurudano ni ga batisimu kore Yoana dri. Yoana ole ta dii ga ka mgbe, ojo, ‘batisimu ledi nyidri rii ma ‘i, ki iko nyidri nyemu madri ya?’ Ki Yesu a`i ani ojo anini, ‘Nyebe ta dii kolu ‘bo’bo dru dini, ama ta di ide ka dini ni ama anda Rubanga ‘a lele ri ide au.’ Dii ri oko a`i ra. Oko batisimu ni dii ri, Yesu efu eyi ‘a si oca saa zere kuru; mgbe, ondre bu awiru mgbo, oko ondre Endri Rubanga dri endredi amamu ani ri esi ori ana dri ga. Uduku engare bu ‘a ri, ojo, ‘Nyi ma Ngwaapi ni ma lele ndro ri ‘i, ma le ni kpo nyi ru.’”
Lari Rubanga dri ria lejo ni iko ‘jo, Yesu eya batisimu esure Yoana dri. Yoana Batisita ni Rubanga ‘a tiluza tema ri ‘i. Luka ana joti nza alu ojo Yoana enga suru Aroni dri ‘ia, Aroni ni amba azi ole ri dri ati ri ‘i. Rubanga upe Yoana ni, engadi suru Aroni dri ‘ia dii, adusi ole ma’di mbadi sadini dru enzi ‘ba cidru ni dii kiko lejo anda anda drii ni. 
Disidru, Rubanga oba oti Yoana ni ‘jo amba azi ole ri dri ri ‘ia amvu imba azia kpa odri ko wio Yesu ni ti. Yoana Batisita ide leti Yesu drii ana uza ka hwesihwesi ‘a si, “Anyi ru anya enzi ni, ini boro ‘a ngwanzi! Anyiru anya enzi ni anyiko anyengwi anda. Adusi Aridipi ni keya ra. Anyeco ogu driaru ‘ru, ku ‘i ri ka anyi re ra koko ka anyi yi aci olure tadru ri ‘ia. Anyigeni ana batisimu ti ana ari kuruce dri ri tro ‘au. Anyiru anya enzi ni anyi ko enyesu batisimu, anyiko anyi layu esu ra.” 
Ofu loso layu esu jo ria driba onzeru Ebu maju ‘a idele 3:19 ni ga pelere. Yoana Batisita ‘a ta nzere enzi ‘ba cidru dri ria dri ga rii, ‘ba amgbu esu ru ni. 
Amla Yoana ‘a enzi ‘ba cidru dri vudri rii ba ka Yesu ni ru si, enzi ‘ba cidru dri rii eberu mgbe vu alu si. Amla Yoana Batisita ‘a jokaa Yesu odu ama enzi ni cidru pi si, ama ni ‘a cuwi dru amesu lari ama ofu loso layu dri rii ‘ai ka si ni ote, dii ofu loso eyidri Endri tro ri ‘i.
 

RA BADIA KOLE YOANA BATISITA KEMU YESU NI ATI RI ‘I

Lejo ehwi 
“Jodini ri Kusa amala ni 
dia ehwi ni adu?”
① anda anda 
② ovi anda ri si
③ Tete ovi di si 
(ovi zi di iyo)

‘Ba enzi ‘aidria ruje ka ‘aia Yesu ni ‘ai ka, Aridipi dru si rii, kaki sadini ‘aia lari dri itiri sadini Mateo ‘a hwele ofu loso batisimu Yesu dri idri ri si. Mateo 3:15-16 ga, Yesu emu Yoana dri oko ojo, “Nyihwe ma ni batisimu.” Ki Yoana ‘ai ani ojo, “batisimu ledi nyidri rii ma ‘i, ki nyidri iko nyemu madri ya?”
Yoana Batisita ni batisimu hwedi Yesu ni ri, oni ani mgbe saa na si sa ote rii ni. Yoana ni tiluza Rubanga dri ezele enzi ‘ba cidru drii ba re Yesu ni ru ri ‘i. Ki Yesu ‘a emu ka kendre Aridipi ani lejo aninga jole ra Profeta ti si Ofu Oku ‘a ria lejo ni ikojo si, Ohwe cara Yoana Batisita ni batisimu hwejo ani ni ausini ka enzi cidru vudri rii du ana dri ga si. 
Adu si? Amala Yesu ni Ngwaapi Rubanga oru ndedia ri dri ‘i, ma’di ta cidru bi di ri ‘i, vua Aridipi ‘i. Emu ama dri rii ‘ausini koje dru ama enzi ni cidru pelere si. Disidru, ‘ba cidru ni lari hwe ‘jo, Kole kesu batisimu kpa.
Amala Yesu esu batisimu Yoana Batisita dri oko oje ama enzi ni cidru pelere. Oko esu lamgba kuruce dri ama kare ga. Batisimu Yesu dri rii sadini ama lari dri ri ‘i. Kendre Rubanga ‘a ti ani uba ka andrani eze Ofu Oku ‘a ra enzi cidru idele rii karuba biloangwa enzi du ‘jo ri iru ri ani, Ngwaapi Rubanga dri ri engwi biloangwa dii dru ni oko odu ama enzi ni aniru ana ngasi. 
Disidru ovi dri ti ‘jo azi enzi ebejo ri idri Ofu Oku ‘a rii ‘ai batisimu Yesu dri Ofu Udi ‘a ri tro kpodru ovi enzia rebejo ri ‘i, disidru lari lidri olure tadru rii tro ka ru hwe ‘ba ‘ai dru ofu loso eyidri Endri tro ri ‘ai ka ra ri ‘bati ni ra. 
 

BATISIMU YESU DRI RI OJE AMA ENZI NI CIDRU SI PELERE

Ama olu Kristo si ingo ni?
Ama batisimu esu ka 
Kristo ni ‘a si.

Yesu ole ani kesu batisimu di, Yoana Batisita ole ani koga laka mgbe, ojo, “Batisimu ledi nyidri rii ma ‘i, ki nyidri iko nyemu madri ya?”
Ki Yesu ‘ai ani ojo, “Nyebe ta dii kolu ‘bo’bo dru dini, ama ta di ideka dini ni ama anda Rubanga ‘a lele ri ide ‘au.” Nyebe ta dii kolu ‘bo’bo dru dini. Nyebe kolu. Ojo Yoana, “Kole nyebe enzi ‘ba cidru dri rii ma ru ga ‘ausini ma ‘bacidru layu ofu loso eyidri si ri ‘ai ka ra rii eji ma dri. Ma draa lamgba esu ‘aia kare ga ‘ausini ‘ba cidru batisimu madri ri ‘aika rii kaki lari esu ‘aia enzi ni ‘a ra. Nyiba enzi cidru vudri rii ma ru ga ‘ausini ‘ba cidru evu ka evu ka vule ri isa kaki lebe esu ‘aia enzi ni ‘a vu alu ri si. Disidru nyebe ta dii kolu ‘bo’bo dru di ni.”
Yesu ni Yoana Batisita ohwe batisimu ni vua batisimu Yesu dri rii ondi aso tati anda cara dru Rubanga ‘a ti ubale layu esu ‘jo rii tro. Amala Yesu ‘a batisimu esure rii enzi cidru ria rubaka ruaru si, amasa adi ki layu esu mgbe vu alu si kate tri saa alua ri si jo ‘aiki Yesu ni ra vua esu ki batisimu ra ‘i. Amala odu enzi cidru ama idele rii ovi dri ti ‘jo dria ri si, vua eparu kuruce dri ama kare ga draa dini ori dri nyare Rubanga dri ri iga, ama lari esu wa rii ama anda layu dri eyisi vua Endri si ri ‘aika si. 
Yesu gba ni, ama ari di enzi cidru vudi idri ri iga ri. Ojo ama lari esu wa rii ama ‘ai kaa Yesu odu ama enzi ni cidru si pi uhwe musara laka rii kuruce dri si ra si. Batisimu Yesu dri rii idoka ofu loso layu dri ri dri ri ‘i. 
Batisimu layu eji di dii ta ojoru driaru Bugu Ole ri ‘ia vu ekpadru si ovidru majugo Paulo ojo ana ofu Galatia ‘ba ni ri iga ani eparu kuruce dri Kristo tro adusi ani esu batismu ru Yesu dri ri si vua ani osu ru ‘a Kristo ni ‘au. Majugo Paulo ojo ta ana ‘ai layu dri ri idri ojo ani esu dii batisimu Yesu dri ri si vua ana dra kuruce dri ri si. 
 

“NYEBE TA DII KOLU ‘BO’BO DRU DI NI”

Yoana Batisita ‘a
ebu ni adu?
Ana ebu ni kendre amba azi ole ri dri 
‘ba cidru ni ri ani kole koba enzi 
‘ba cidru dri rii Yesu ‘a ru ga.

Yesu ojo, “Ama ta di ide ka di ni ni ama ta Rubanga ‘a lele ri ide ‘au.” Anda anda ndutudru ria ehwi ni enizi cidru ebeka ana batisimu si vua ‘ba cidru ri eco ka aia asiti ga enzi ako. “Diiri oko a`i ra.” Yesu esu batisimu abu Jurudano ‘a.
Kendre ondiku amba zi ole ri dri ria ana dri ni ti ka idri dri ri ani, Yoana Batisita isa oti ana dri ni Yesu ni dri oko oba enzi cidru vudri rii ana ru ga. Yoana Batisita ni kendre amba azi ole ri dri ‘ba cidru ni ri ani ebu driaru rii enzi cidru ‘baa idele rii baka Yesu ni ru ‘i. “Rubanga, Aba enzi cidru ‘ba nyidri ‘a idele rii nya Biloangwa ni, Yesu ni ru.” Ledii ovi enzi ‘ba cidru ‘a idele ria rubajo Yesu ni ru ri ‘i.
Yoana Batisita oti ana dri ni Yesu ‘a dri ga, osu ani eyi ‘a, vua odu ana dri ni pi rii saa Yesu ‘a efu jo eyi ‘a ri si. Batisimu Yesu dri ri uba tati anda lari dri rii ni. Dii anda Yesu ‘a enzi ‘ba cidru ari ‘jo ‘aia enzi ni ‘a ana batisimu si ri ‘i.
 

BU AWI RU MGBO UDUKU OKO ENGA BU ‘A

Joti Opi bu dri ri dri 
awi ru saa ingo si?
Saa Yoana Batisita dri na si
(Mateo 11:12)

“Saa ana batisimu esu ‘jo na si, Yesu efu eyi ‘a si oca saa zere kuku, mgbe ondre, joti bu dri awiru mgbo, oko ondre Endri Rubanga dri endredi amamu ani ri esi ori ana dri ga. Uduku engadi bu ‘a ri, ojo, ‘Nyi ma Ngwaapi ni ma lele ndro rii, ma le ni kpo nyi ru’” (Mateo 3:16-17).
Yesu ‘a enzi cidru vudri rii dure ana batisimu si rii, bu awi ru anini mgbo. Ani ledii cara Rubanga dri ti rubadi oku ki eyadi ridedi amvu kinya elifu kpa batisimu Yesu dri ri si abu Jurudano ‘a ri ‘i. 
Disidru Yesu ni, kendre Biloangwa Rubanga dri ri ani, ari ‘ba cidru vudri rii ‘aia enzi ni ‘a si ra. Adusi enzi cidru vudri rii obaru Yesu ni ru oko ‘ausi ide Rubanga ‘a le ni ra.
Ojoru Yoana John 1:29 ga, “Dii! Biloangwa Rubanga dri enzi vudri ri dudi ri ‘i!” Amala enzi cidru ria ruba ka Yesu ni, Biloangwa Rubanga dri ri iru si, Ani acire kare ungwele Gologota ni ga amvu nainga oca kinya ina ni ra teri ledii 
tro olokodri ‘a. ana ama enzi ni cidru du re ana batisimu si rii, kare cidru ana yare ri iga, kojoa ‘ba cidru ani ‘aika ra ri bati ni ‘aia enzi eberu ra. 
Yoana 8:11 ga, Ojo izi kole bate idere ga ri ni, “Masa mali nya lejo ni ku.” Ali izi dia lejo ni ku ni amala ma’di lejo ‘a ralire driaru rii Yesu ‘i, ani ma’di ama enzi ni ebe di kpodru dudia pi ri ‘i. Ledii ra ana ‘jojo ‘a dru ani Aridipi enzi ‘ba cidru dri ‘i ri ‘i. 
Amala ani, Ngwaapi Rubanga dri di, odu ama enzi ni ni, ausini ‘ba cidru vudri dia ‘aikaa ra rii kengwi ki dru ole enzi ako. Amala esu batisimu di iri mgbe bu awiru mgbo.Joti Opi bu dri ri drii awiru mgbo ‘ausini ma’di ledia ra kusa batisimu Yesu dri ri ‘ai di ra rii saa cidru si sa kohwi laka wa ilili.
 

YESU ODRA KURUCE DRI ESU ODU ENZI CIDRU VUDRI RII ANA BATISIMU SI KPA

Yesu otu Sitani 
‘a dri ni ingo ni?
Ana onzi ka dra ga si lidri ana lamgba 
ama enzi drii cidru ‘ai ka kpa si

Amla enzi cidru ria ruba ka ana dri ga si, Yesu ni kole kesu lamgba kuruce dri si. Icandi ru okposi rere ana ta urare ana icandi kuruce dri rii idri ama si ri ‘i. Ilegi okposi rere paka ori driaru ri ecoru koti vuru ari ani. Oce kovu ki ‘ba ana inile ri tro kare ungwele Gethasemeni ni ga di, Owo dini, “Ma Ata, jo ka ride wa si, nyidu kopo icandi dri dii ma dri ga pi” (Mateo 26:39). “Mesu batisimu dii ri adu enzi cidru vudri rii pi, ki draa oba ma dra ‘ausi ku.” Ki alusa Rubanga ‘ai ana ti ni ku ru. 
Odu enzi ebejo ri si Ofu Oku ‘a, azi enzi ebejo rii kole odi kpo ‘ausini adi ari ani ‘ja kare egbwe ‘a rire ri iga amba azi ole ri dri kata di ide ni. Ovi alua ri si, Yesu isa kole keparu kuruce dri ‘ausi Rubanga uba ani kide dru ta ovi zi si. 
Alitari ni lali Rubanga dri ri ‘i oko ari azi azile enzi ebejo di dri ria ehwi ni lidri. Ari di ja ka kare egbwe ‘a rire ri iga kusa andraa ru vu tuderi ‘a ehwi ni karu ni draa lamgba cidru rii oba ru ra ‘i (Levitika 16:1-22). 
Yesu ilegi Rubanga dri ‘ausini koba kopo dii kali dru ana dri ga pi si. Ki Ata ole laka ku tati ni asejo Yesu ojo, “Ma le ‘i ku ki, nyidri kide ru n” (Mateo 26:39). Ilegi Rubanga dri ‘ausini kideadru ovi ana ndrele anda ri si. Iko ilegi di oko ide ondi ta ana Ata ‘a lele rii ‘au. 
Yesu ebe ta cidru ana urale rii ra oko ide ana Ata ‘a le ni ‘au. Aduta si? Amala esu lamgba kohweru laka koca enzi cidru vudri rii dure kuru dru, lejo lari dri rii alusa keko kpe. Eparu kuruce dri rii ana enzi ‘ba cidru dri rii du ka pi ana batisimu si ‘si. “Adusi enzi ‘a musara ni dra, ki hwe Rubanga dri rii lidri olure tadru esule Kristo Yesu ama Opi si ri ‘i” (Roma 6:23).
Rubanga iko lejo ta andrani eze ana jole ani keya ka Aridipi eze ‘ba cidru ni ra keya ovi dri tijo dria ri si rii, odri ka ta ‘jo batisimu Yesu dri ri idri. Yesu eri Rubanga ‘a ti ni ra oko ‘ai lamgba lile ana dri ga ama si rii ra. 
Dii ondi ku lejo andrani ‘jole profeta ti si bugu Idoka dri 3:15 ga jodia, “Mako ma oja ba anya lofo ga izi tro, boronzi nyidri ‘i lofo boronzi izi dri tro; Kaki nyi tu dri ‘a ki nyile nyi ko nyi ‘ai ga tele ‘a ri ‘i.” Rubanga ojo Adamu ni ani ka Aridipi ni eze ra, Eva kotia ni, koko ka mori Sitani dri badia ‘ba kengwi enzi ‘ba vua kovu ki dru aci olure tadru ri ‘ia dia mi ni za ra.
‘Jo ani vua ama ‘i batisimu Yesu dri rii ana dra kuruce dri ri tro ni, enzi amadri rii cidru ka ruje pelere vua ama lari esu lamgba eyadi ria dri ga sa ra.
Kole asiti amadri ri iga ‘ai tau ri kolu ni ‘jo ama ‘i batisimu Yesu dri rii ana ari kuruce dri rii tro ra ‘i . Nya ‘i dii ny a asiti ga ‘au, vua nyiko nyi lari esu ra. 
 

BATISIMU YESU DRI RII IDOKA OFU LOSO BU ‘A RI DRI ‘I

Cara ama Opi dri tati ‘a ase ‘jo 
oca ture bu ‘a kuku rii ingo ‘i?
Ojo ana maju ni kolea kaca ki vu ndutu dri 
‘ba ini si kohweki ‘aini batisimu ru Ata 
dri si Ngwaapi dri si vua 
Endri Ole ri dri si.

Batisimu Yesu dri rii ido ka ofu loso ri dri ‘i, oko ari enzi ‘ba cidru ana batisimu si vua ana ari si. Mateo 28:19 ga, osi ru, “Anyaca vu ndutu dri ‘ba ini si, anyihwe ‘aini batisimu ru Ata dri si Ngwaapi dri tro vua Endri Ole ri dri si.” Yesu ojo ana maju ni konze ki ta Ata ni dri Ngwaapi ni dri vua Endri Ole ri idri dii ta ‘ba cidru jedi pelere ‘aia enzi ni ‘a si vua ‘ai ari di ana batisimu si vua ari si ri ‘i.
Yesu ohwe ‘aini mori acajo vu ndutu dri, ‘aini lini hwejo batismu Yesu dri ri idri, batismu layu dri ri idri, vua batisimu eniz cidru vudri rii jedi pelere ri idri. 
Oca draa kinya 2000 ni ra, Yesu emu vudri dia ru si oko esu batisimu Yoana Batisita dri. Batisimu Yesu dri di si, enzi cidru vudri rii, di oko ama enzi isa tro, kpodru obaru ruaru. 
Jodini ri enzi rubaka ruaru rii ingo pi? Ki enzi obu ri le? Ojo amani enzi obu ri isa oba ru ana ru ga tro. Enzi ama ‘baciri dri ‘i, ama abi dri ‘i, ajeni rii, endru rii vua obu rii, tee enzi cidru Adamu isa ‘a idele ri obaru Yesu ni ru tro.
Jodini ri enzi kolu naa iyo ni ingo ni? Ama olu enzi ako ni ingo ni? Amala Yesu odu enzi cidru ama dri rii enzi cidru vudri dia rii tro pi ana batisimu si ‘ausini ‘ba cidru vudri dia rii kengwidru enzi ako vua ‘ausidru kaki leti ‘aini tojo opi bu ‘dri iga rii esu ra. 
“Ki ma’di lejo anda ri idedi rii kemu ingwe dri, ‘ausini ingwe kitede dru ebu ana idele rii ide Rubanga ni” (Yoana 3:21). 
Yesu oje ama enzi ni cidru ana batisimu si, Ana ari kuruce dri ri si, Ana dra si, vua Ana onzi ka si. Disidru ana batisimu ti ‘aika ana ari kuruce dri ri tro ni ondi ovi ru arijo enzi cidru dri ‘a ri ‘i. Dii ‘ai layu esujo ri ‘i. 
‘Jo ama ‘i batisimu Kristo dri rii ana ari kuruce dri ri tro ni, ama lari esu ra. ‘Jo ama ‘i Yesu ni anda anda, ama rungwe ‘ba anda ri ‘i ‘a nosi enzi ‘ba? Ama engwi ‘ba anda ri ‘i. Ama olure ‘ba ndi ku ri ‘i ri isa ama enzi ako ‘a? Oo, ama enzi ako. Batisimu Yesu dri ri ‘ai ka lamgba ana esule kuruce dri ri tro ‘a ehwi ni ‘ai ndutudru ri esu ka ‘ai anda ri tro.
 

BATISIMU HWE KA KUSA BATISIMU ESU KA RU YESU DRI RI SI

Ofu loso bu dri ri
ido adu nga? 
Batisimu Yesu dri 
ri inga.

Amala ‘baa olu ka ndi ku si, ‘ba ‘ba dri ndre ka rii kaki batisimu hwe tete ‘ba batisimu Yesu dri ri ‘aika ra ana ari tro ri ‘bati ni ‘aia ‘ai ni itiri ‘jo. ‘Ba tile Endri si di ri bati isa ondiku alua ledi ani kaki bia batisimu esule ovi alua ledi si ‘aia ‘ai ni etede ‘jo. 
Ma’di ‘ba dri ndredi rii atijoadru rii kilegi ka ana dri ni ti ma’di rutidi Endri si di dia dri ga, Ka tutu Rubanga dri rii zi ma’di di ni ‘ausini ma’di di ka Rubanga ni ru paka saa ana odu ‘a ti asejo ri si. Koko ka ma’di di ni batisimu hwe ru Ata dri si Ngwaapi dri tro vua Endri Ole ri dri tro. 
Ama lari esu ovi ama ‘ai dri Yesu ‘a batisimu ni dri vua ana ari dri idri ri si. Batisimu dii ausini kitede enzi cidru rii obaru Yesu ni ru ‘i, vua ‘ausini kitede ma’di batisimu esu di rii karu ni odra ki kare aluga Yesu tro vua karuni onzi ki anietro kare alu ga. 
Batisimu esu ka dii itede kaa ma’di ‘a enzi ni cidru obaru Yesu ni ru ana batisimu si ‘i, lamgba oli ma’di ni esule ni rii Yesu ni esu kaa ni ‘i vua ‘ai ni onzi ka anietro kare alu ga ‘i. Dii ‘ai ma’di dri ri ete ka Ata ni andra, Ngwaapi ni andra, Endri Ole ri andra, Sitani ni andra, vua adrunzi andra amvonzi tro ‘i. Dii jokaa ma’di oti ru di eyisi vua Endri si ‘i. 
‘Ba cidru Yesu ni ‘ai ka ra rii, batisimu driaru ria ehwi ni ni ka ana ari kuruce dri ri tro ote rii, esu ki lari enzi cidru vudri ria dri ga ra. Disidru esu ki batisimu ru Ata dri si Ngwaapi dri tro vua Endri Ole ri dri si. 
“Ta oku rii dria ali; pi, udi ri eca ni” (2 Korinto 5:17). Ta amadri cidru oku ri ali pi draa atiru Endri si amengwi ‘ba udi ‘ai si ri ‘i. Ni ‘joadru cuwidru ama asi ni ‘a, amesu batisimu ra ‘i. Amesu batisimu Yesu ni ‘a ama batisimu Yesu dri ri ‘ai ka ra si. 
 

LIDRI OTI ENDRI SI BATISIMU YESU DRI SI RI IVU RII ANA ARI KURUCE DRI RI TRO
 
‘Ba tile Endri si di ri
kolu adu ni?
Kaki olu opi Rubanga dri ri ni 
ana anda tro, ofu loso rii 
nze ka vu ndutu dri si.

Lidri layu esu ka ‘a vu ga vua oti Endri si ria vu ga rii kole laka ‘ai lejo Rubanga dri si rii kolu ‘aa. Alusa kole kolu ovi ru itiri ‘jo saa cidru si kole ma’di koru ana enzi ni saa cidru si ri ‘i ku. Ra rii, kole kolu lidri ‘ai si jodia amani saa cidru si Yesu odu ama enzi ni ndutudru pi ana batisimu si ri ‘i. 
Yesu esu batisimu di enzi ama dri rii cidru obaru ruaru. Oko olu teri enzi di drii tro kinya ndi ndi ina paka ‘ai lamgba ama enzi si rii vua eparu kuruce dri kpa. 
Disidru ru anyetro ‘ai ‘ba dii kole badri ‘ai lejo sile ra ri idri rii kolu ‘aa, kolu tete ta itiri le itiri ri ‘i ku. ‘Jo omaki di idele kpe, ori ka ‘ba ko tesa ‘au enzi ‘baa idele odu cidru rii si ‘i tee esu ki layu ra vua oti ki ru Endri si di sa ‘i. 
Anyiba ebeki urata ta urajo enzi dri ledii ra rarii draa igeni ki ofu loso eyidri ari tro rii ‘au. Dii lidri kole ma’di layu esu di ra ri kolu ‘ausi ri ‘i. 
Yoana Batisita ojo Yesu ni dri adu? Ojo, “Dii, Biloangwa Rubanga dri enzi vudri ri dudi ri ‘i” (Yoana 1:29). Ohwe sadini ojo Yesu odu ama enzi endru rii, ajeni rii, vua enzi cidru ama ti ‘jo ‘au tro ri isa tro. 
Odu enzi na bati kpodru kuru ‘a? Enzi ‘ai nai kpodru obaru Yesu ni ru ku ru adu si? Enzi vu di idri ri oko ama enzi cidru amvu ka pi ri isa tro dii enzi ajeni rii, endru rii, vua druzi ri ‘i. Kole esu ki ofu loso layu dri rii batisimu Yesu dri ri si. 
Ma’di alu alu anda Yesu ‘a batisimu dri ‘aidi ana ari tro rii ka lari esu ra. Ma’di batisimu Yesu dri ri ‘aidi ra ria asiti ga enzi alusa iyo. 
Amala, ‘ba ziti draasa amgbu ‘aa kaki uraa dri enzi olu ‘aia asiti ga ‘aa amala oni ki ‘aia enzi ni cidru obaru Yesu ni ru ana batisimu si ni anda ku ru. Sitani unza ‘ai ra. Sitani ka koyo koyo ‘jo ‘aia bi ga urata ‘aia ru dri si. “Nyi enzi ide odu cidru si. Nyolu enzi ako ni ingo ni?” 
Kolea tete ka ‘i ki Rubanga ni ‘au ‘aini engwijo enzi ako ‘i. Ki sitani ka ‘ai inyo ri ba kaa kaki uraa dri ‘ai olu enzi ‘ba amala dri ‘ai olu enzi idere ga si ‘i. Ma’di alu di sa enzi tro na iyo ‘jo ‘ai batisimu Yesu dri rii ana ari kuruce dri rii tro ni ‘i. 
Amala ama olu vudri dia ama te ku ama ta ru si vua awi ako drii ‘ide au, amace amengwi anda rii ebu ama idele ri si ni kpe. Ki ama ‘joa ‘ai si amesu lari ama ‘ai anda dri Yesu ‘a batisimu ni dri ri si vua ana ari kuruce dri ri si ni wa. Ovi dru ‘jo ameri amesu ‘ai dii batisimu Yesu dri ri si vua ana ari si ni ra, asi amadri ri kengwi ole, ama nia lokudru ama dri enzi iyo ni ote. 
“♬ Mesu layu ra. Nyesu layu ra. Ru kpodru esu layu ra ♬” Ani dii gba ta olu ‘jo asi egbwe si vua anzo si ri ‘i itiri kaa ama olu vico ofu loso ri nzejo vu ndutu ni ri si si ‘i vua ama asiti kolu egbwe ‘jo amiti ri Endri Ole ri ka ama dri ni du ni ni ra ‘i. 
Amala ama ‘ba ‘ai ‘ba dii ka enzi ide odu cidru si ki ama dri enzi iyo. Amala ama asiti ga batisimu Yesu dri rii ana ari tro ‘aa. Ama asiti odri ga re enzi si, ki draa ama ‘i batisimu Yesu dri rii ‘au, draa ama olu enzi tro ni ingo ni. 
“Dii cara ma eyale ma bale ‘aitro odu na bati ‘a vu ga ri ‘i, Opi okpo tro ri ojo ta dii ni: Meya ma lejo madri ri si ‘aia uje ga” (Eberei 10:16).
Asi amadri iga enzi iyo. Yesu oba amani layu esu ka engwi adu ana batisimu si vua ana dra kuruce dri ri si. Lari enzi dria rii kenga ondi ‘ai lejo Rubanga dri iga ri iga.
 

MA’DI ALU ALU BATISIMU YESU DRI RI ‘AI DI ANA ARI KURUCE DRI RI TRO RII ALUSA KENGWI ENZIDIPI DRU DI NI KPE

Ama engwi enzi ‘ba dru di
ni wa ‘a ‘jo amide enzi ni ‘i?
Kpe, amengwi enzi 
‘ba dru di kpe.

‘Jo ‘ama ‘i batisimu Yesu dri rii ana ari tro ku, ide ta ku tee ama ilegi enzi ru ‘jo rii kole be ani ingo ni sa ‘i, adusi oniru enzi olu dri ama asiti ga ‘aa. Ki ‘jo amevu ama ‘i ofu loso ce rii ni, enzi amadrii cidru ka ruje pelere. 
“Heee, adu ta oba nyini endrejo cuwi vua pelere di ni odu disi ni?” 
“Indre ra wa, draa enzi ma asiti ga alu di sa iyo hwa alu sa iyo.” 
“Loku dru wa? Jodini ri mitiri draa nyaci andraga enzi ideka tro nya lekaa ri ani wa?” 
“Ini ra wa, ‘ba ka ‘ai ikonyi ‘aia ngasi kpe rarii kaki te enzi ide ‘au. Ledii ‘baa ovi ‘i. Ki Yesu odu enzi cidru rii ana batisimu si vua esu lamgba laka rii ama kare ga kuruce dri si ra. Ra ani di oba draa ahwe ma ma ngasi ebu ofu loso ri dri idere ga ekelezia ‘a. Bugu Roma dri ana joti nza 6 ojo kole ama cidru kolu ovi di si. Ki draa enzia olu ka ma asiti ga iyo si, ale mide ta anda rii ‘au. Kole ‘aiki batisimu Yesu dri rii ana ari kuruce dri rii tro amani ofu loso rii nzejo vu ndutu dri ‘au! Ki jo ‘ama ‘i Yesu ni, ama amba layu hwedi ri ‘i dru ‘au, amengwi alusa enzi ‘ba dru di kpe. Kole draa ‘aiki lari oludi tadru batisimu Yesu dri ri si vua ana ari kuruce dri ri si rii ‘au. Ma asiti oga gbadru anzo si ndru!”
 

ADI ESU ENDRI OLE RII NI?

Yoana Batisita odri ka sadini
hwe Yesu ni dri ingo ni?
Odri kojoa Yesu ni BiloangwaRubanga dri enzi 
vudri ri dudi ri ‘i, ojoni dru, enzi amvuka pi rii, 
enzi endru rii obu rii tro, vua enzi 
ama tijo ‘au tro ri isa ‘aa ru.

Ma’di batisimu Yesu dri ri ‘aidi ana ari kuruce dri ri tro ri esu lari ra. ‘Jodini ri ama Endri Ole rii esu ingo ni? Bugu Ebu Maju ‘a idele ri dri 2:38-39 ka amani lazi ledi ‘ai wa. “Ki Petro ojo ‘aini, ‘Anyiru anya enzi ni, anyiko batisimu ru Yesu Kristo dri si ‘ausini anya enzi ni kebe dru ru ra; anyevu anyi hwe Rubanga dri Endri Ole rii esu ra. Adusi Rubanga o’ba ana cara ni anyini anya ‘boronzi tro, ‘ba cidru lolu, vua ‘ba ama Opi Rubanga ‘a eyale ungwele anidri ri tro.’”
Batisimu esu ka ru Yesu Kristo dri ri si ‘a ehwi ni batisimu Yesu dri rii ‘ai ka vua layu esu ka. Rubanga koko ka Endri Ole rii hwe dride dru anyini ra. 
Vua ziniaga di batisimu esu ka ru Yesu Kristo dri ri si ‘a ehwi ni engwi ka enzi ako batisimu Kristo dri ri ‘ai ka si vua ana ari ni ‘ai ka si. ‘Jo amesu ‘ai dii ni, ama layu esu ra ama ko amengwi anda. ‘Ai ‘ba kengwi ingwe bue lofu ani wa rii batisimu Yesu dri ri si ana ari kuruce dri ri tro.
“Anyi ko anyi dride Endri Ole ridri esu ra.” ‘Jo gba loku loku ‘ai ki enzi amadri rii cidru obaru Yesu ni ru ana batisimu si ni ra vua ‘jo ‘ai ki esu lamgba ‘ausi kuruce dri si ni ra, ama asiti ka ru je pelere. Aci ama dri udi ri kido kesua ama idoa batisimu Yesu dri ri igeni ka ana ari tro ama ko ama hwe Endri ole ri dri esu ama ni engwi ‘jo ‘boronzi Rubanga dri ‘i dru ni kpa. 
“Anyiko anyi le`jo anda ri ni ote, vua le`jo anda di koba anyengwi kulala” (Yoana 8:32). Kole anyetro oni ki Opi ‘a lamgba kuruce dri ria ehwi ni ote. Ki tro sa lejo anda rii Yesu odu enzi cidru vudri rii ana batisimu si vua ana dra kuruce dri ri si ‘i. Anda ka ruhwe amani wa ni kesua ama anda ni ‘ai kpa.
 

BATISIMU YESU DRI RI AYU AMA NI

Adi esu Endri ole rii ni?
Ma’di layu esudi ana ‘ai Yesu ‘a batisimu 
nidri ana ari kuruce dri rii tro ri ‘i

Ovi layu esu ‘jo ovi azi azi ka si Ofu Oku ‘a rii omba batisimu Yesu dri ofu Udi ‘a ria kare ga. Batisimu Yesu dri rii lejo ehwi rujodi profeta ti si Ofu Oku ‘a ri ‘i. Eri jo dri ti ka dri Ofu Oku ‘a rii zi ani ka re su batisimu yesu dri ri si Ofu Udi ‘a. 
Enzi cidru vudri rii obaru Yesu ni ru ana batisimu si kendre ondi enzi Isaraile ‘ba dria rebeka indri enzi dudi ebele kaa dri ti ka driaru si ri ani. 
Kole gba ‘aiki batisimu Yesu dri rii ‘au ama enzi ni cidru rujejo pelere ‘i ‘a? Oo! Kole ‘ai ‘au! Kole ‘ama ‘i anda Yesu odu enzi cidru vu dri rii ana batisimu si ni. ‘Jo ama ‘i batisimu Yesu dri rii ku ru, alusa ama enzi ka ruba ruaru kpe. Kole ‘ama ‘i ama lari ni olu jo ce ‘i. Ku ri, alusa amengwi anda kpe. 
Yesu ari enzi ‘ba cidru vudri rii ovi esidi ca vua anda ana batisimu dri rii si. Disidru kolu alusa ovi zi si ni kpe. Amala batisimu Yesu dri rii tati cidru rubadi enzi cidru ni rubajo ana ru ga ri ‘i, kole ‘ai ki ‘ausini ama asiti ni rujejo enzi cidru dri ‘a pelere.
Vua tro sa kole ‘ai ki ari Yesu dri rii lamgba cidru ama enzi dri ‘i. Disidru, ‘ba cidru batisimu Yesu dri ri ‘ai ka ana ari kuruce dri ri tro ri ‘bati ka lari esu ‘aia enzi ni ‘a ra.
Kole igeni ki batisimu Yesu dri rii amani to ‘jo opi bu dri ri iga ‘au. Ani dii tete ovi alu di ama ni layu esu ‘jo enzi dria ‘ausi wa vua ripa ‘jo lamgba eya di ria dri ga wa ri ‘i. 
Batisimu Yesu dri Ofu Udi ‘a rii ‘ai dri uti le Ofu Oku ‘a rii tro ta alua ruvi ka vi ri ‘i. ‘Ai ta reci ka alu kendre iba ti ecile ri ani ofu Oku ri bati dri Ofu Udi ri tro ri ‘i. 
Ofu Udi ri ‘ia, Yoana Batisita emu amvu imba 6 Yesu ni ati. Ki Yesu esu batisimu di, Ojoru “Ofu loso Yesu ni, Rubangaa Ngwaapi dri ido dini” (Maruko 1:1). Ofu loso ri ido saa Yesu ‘a enzi cidru vudri ri du re ana batisimu si na si. 
Ebu lari dri ‘ba cidru ni ri ide ru ovi drile mgbmgbi ubi si: oti Yesu dri si, Ana batisimu si, Ana dra kuruce dri ri si, Ana onzi ka si, vua ana tu ka oru bu ‘a si. ‘Jo ani dii ni vua ‘jo ami do ehwi ani eri ka kusa ‘jo ama ‘i ovi lari dri ti rubadi diani dii ni, ama lari esu ama enzi ni ‘a si cidru ra. Batisimu Yesu dri rii idoka ofu loso ri dri ‘i vua ana ari kuruce dri rii ana eko ka ‘i. 
“Ofu loso Yesu ni, Rubangaa Ngwaapi dri ido dini” (Maruko 1:1). Ama alusa ta anda ana idele ria alu ni ebe ra ni kpe-ndrole ana batisimu ‘i, Ana ari kuruce dri ri ‘i, Ana onzi ka ‘i, Ana tu ka bu ‘a ‘i, vua ana engwika ‘i kendre ofu loso Ngwaapi Rubanga dri ri dri ani. 
Yesu emu vudri di ‘a ru si ki oko oje enzi cidru ‘baa idele rii ana batisimu si, dii ido ka ofu loso bu dri ri ‘i. Ovi dru tee ‘ai dia alu kolu iyo rii ni sa, ofu loso bu dri ri kolu ndi ku. 
Disidru, ma’di otiru Endri si di ku ru, kole ka ‘i batisimu Yesu dri rii ana ari tro ‘au. Odu disi, ‘ba amgbu ‘ai anda Yesu ‘a batisimu dri dii ana ari tro ku. Kaki ‘raa batisimu Yesu dri rii azi azi ka. Ani dii gbadru lejo ehwi erile mbi ri ‘i. Ma’di alu alu Yesu ni ‘ai di ra rii kole ka ‘i ana batisimu ti isa ana ari tro tro.
Kuri gba ama enzi ka ruje pelere tete ama ilegi enzi ru ‘jo ri ilegi ka ‘au si ingo ni? Enzi ama dri rii cidru obaru Yesu ni ru saa Yoana Batisita ‘a anini batisimu hwejo na si. Adusi ovi zi mgbi ki anini enzi cidru ‘baa idele rii du ‘jo rii iyo. 
Kole ta ‘ba ni dii kotiru di eyisi vua Endri si ani ni hwijo opi bu dri ri iga wa ‘i. Batisimu eyisi rii ako alusa alu iyo, vua ari ti Endri tro ni ako sa iyo. Amala tete ma’di tile Endri si di rii ka Rubanga ni ndre ote rii ni, kendre ondi ku Yesu ‘a jokaa Nikodemu ni Yoana 3:5 ga ri ani. Lari loku ri kemu ama dri kesua tete ama batisimu Yesu dri rii ‘ai ana ari tro kpa.
 

BATISIMU YESU DRI RII AKO AMA LARI ESU WAA?

Yesu engwi ama Aridipi
‘i ni ingoni si?
Ana ama enzi ni du ka cidru pi
ana batisimu si si

‘Jo nosi ale ama nze ta driba ebu Opi ‘a idele laki ni ri idri noisi Yesu ‘a emu ka vua ana enzi ‘ba cidru vudri ri drii du ka ana batisimu si ni dri, kusa nosi Yesu ‘a ole ole ni ome ka ni dri, noisi ‘ai kaa Viriko Maria oti ani ni ‘i, kusa ga kaa ana kuruce ni ‘ai ka ‘i, lini Kristo ‘ba dri kengwi gbadru dini mbi ri ‘i koba ‘ai ‘ba kengwi umu jokaa “nyebe ma ni, nyebe ma ni, nyebe ma ni” kendre ekelezia Buddhists dri a ide kaa kare ‘aia ilegi ‘jo ri iga ri ani. 
Batisimu Yesu dri ri ga ka kite’dea enzi ama dri rii obaru ana ru ga kuru. ‘Ai ama dri rii kengwi konyi ako, Koba ama mgbi mgbi kengwi ma’di mori dipi jodia ani uhwe ana mori ‘a ti ni hwicidru ki kumbe uhwe ta alusa ku ru ri tro iyo.Ko ba cidru ama engwi enzo. Ki ‘jo ma’di moridipi ri ojo ani uhwe ana mori ni cidru si ra ki oli vua uhwe ta alu sa ku ru, Kolu ani dri ma’di moridipi ri ‘i tee ru ga sa ‘i.
Yesu oje ‘ai ‘ba pelere eyi ana batisimu dri si vua oko eco ‘ai engwi ki ‘baciri Rubanga dri ‘i. Yesu odu enzi cidru vudri rii Yoana Batisita si, ‘ausini ka ‘ai ‘ba cidru eco ole enzi ako. ‘Jo ani dii ni vua ama ‘i ni, ama asiti kengwi tau ‘bo’bo dru. 
Anzo ki Rubanga ni ana kiza si ‘i. Luka 2:14 ojo, “Eku kolu oru Rubanga ni, egbwe vudri di ‘a, ‘ba asi loso ri ni!” Ama ‘ai eyi ari tro Yesu dri ri idri ri ka amani lari ndutudru ri eji ni vua ko ‘ba amengwi ‘baciri Rubanga dri ‘i. Batisimu Yesu dri rii ana ari tro ari ama ni vua ma’di ta ‘ai eri di ‘aidi rii karuni esu lari ra. 
Ebu ana idele ri iga alusa ta zi ka ru du pi ni kpe. ‘Baziti ri ‘ai tete ari ni ‘au, kaki ‘joa majugo Paulo ecu ru tazi si ku ki te kuruce si. Ki batisimu Yesu dri rii obaru ana kuruce ni ga na ‘a sa tro. 
Adi ki ndrea bugu Roma dri ana joti nza rii 6 ni ga Paulo esu batisimu Yesu tro vua odra sa Kristo tro. Vua ziniga Galatia 2:20 ga ojo, “Mepa ru kuruce dri Kristo tro; molu lidri madri si ku, ki Kristo kolu ma asi ga; ‘lidri madri dria rii ani lidri a`i dri ‘Bara Rubanga dri ri dri si, ani ma’di ma ledi vua ana lidri ni azi di ma’ni ri ‘i.”
Vua Galatia 3:27-29 ga ojo, “Anyi ‘ba batisimu esu ka ru Kristo dri si rii anyemuru Kristo ti tro alu anyesu lidri ani dri ‘i. Disidru mgbimgbi Yudei ‘ba lofo kafiri ‘tro iyo, opigo lofo ‘ba nya ri tro, ukunzi lofo ago tro sa iyo; Yesu Kristo si anyi kpodru alu. Ki jo anyi ‘ba Kristo dri ‘i, karuni anyi ‘boronzi Abaramu dri ‘i, anyi ta Rubanga ‘a icara le ri esu ra.”
Batisimu esu ka Kristo ni ‘a’a ehwi ni ta cidru ana idele vudri dia rii ‘ai ka, ana batisimu ti ana ari kuruce dri ri tro. Batisimu Yesu dri ribati ‘ai ka ana ari kuruce dri ri tro ‘a ehwi ni ‘ai kaa lokuloku Yesu odu ama enzi ni cidru si pi ate dria kinya 2000 ni dii ta ce ri ‘i. Adusi leti zi aludi sa zini ga di amani lari eji di wa ani iyo.
 

RUBANGA KA AMA ARI RA ‘JO AMA ‘I YESU ‘A BATISIMU NI ANA ARI KURUCE DRI RII TRO NI ‘I

Ama enzi ka gba ruje pelere ama 
ilegi ilegi le enzi rujo ri si wa’a?
Kpe. Enzi ebe ka kengwi amani adu rere rii ama 
igeni kaa enzi cidru ama idele vu dri rii obaru 
Yesuni ru saa Yoana Batisita ‘a batisimu 
hwejo ani ni na si si.
 
“Ama ‘i asi si anda esu ‘jo, ama ‘ai itede ama ti si lari esu ‘jo” (Roma 10:10).
“Anyi ‘ba batisimu esu ka ru Kristo dri si rii anyemuru Kristo ti tro alu anyesu lidri anidri ‘i” (Galatia 3:27). Ama ‘ai ka ama dri ni se batisimu esu ‘jo Kristo ni ‘a ni, ‘ausini ama remu Kristo ti tro alu, vua ‘ausini ama engwi ‘baciri Rubanga dri ‘i. Aninga Yesu emu vudri dia vua esu batisimu di, enzi cidru ama dri rii enzi vu di ‘a dri ga ri tro oba ru ru ‘a ru. 
‘Ai ama dri ri oba amemuru Kristo ti tro alu. Ana dra re rii ama sa adra tro. Vua ana onzi re rii amasa amonzi tro. Ki draa ama batisimu Yesu dri rii igeni ka ‘au si, ari driaru ri igeni ka ‘au si, Onzi ka driaru ri igeni ka ‘au si, tu ka bu ‘a driaru ri igeni ka ‘au si, vua engwi ka driaru ri igeni ka ‘au si, ama to opi bu dri ri iga ra vua amako ama olu ‘bo’bo dru. 
‘Jo ‘ba igeni ari Yesu dri rii tete aduto, kaki ta ma kpe ra rii tete kaki ricandi enzi asi di ‘aia asiti ga rii si’au. Adusi? Adusi oni ki kusa ‘ai ki lejo ehwi Yesu ‘a batisimu ni dri, ‘aia enzi ni dudi cidru pi vua enzi ‘aia asiti ga ri jedi ingwe- bue lofu ani ‘bo’bo dru dii ku ru. 
Nya ‘i batisimu Yesu dri ri ‘bati ana ari nyini lari hwedi nya enzi cidru ri ‘ia rii tro ra ‘a? Ayi nya ‘i nyi ni. ‘Ai Yesu ‘a batisimu ni dri rii ako, ‘ai nyidri rii nya. ‘Ai Yesu ‘a batisimu ni dri rii ako, nyi aludi sa layu esu nya enzi ni ‘a si kpe; isu nyi le ce ku ri ‘ia. 
‘Ba tete kuruce ni ‘aika ‘au ri kojoa, “Yesu ni ma Opi ‘i, ma Aridipi ni, dradi kuruce dri ma si ri ‘i. Onzi dra ga si lidri di ana dra ni vu ohwe sadini ana dra ni dri odu ndi ndi 40 odri ko tu bu ‘a ‘i draa dini ori dri nyare Rubanga dri ri iga. Migeni kengwi ziniga vu erijoa ri si di lejo alire ama idri vua milegi rii ‘ausini Yesu keco dru ma mgbe mgbele ‘ausi amesu dru ani. Oh, Yesu ni ma lele ndro ri, nyi ma Opi ‘i.” 
Kaki kiza zi ‘aia enzi si vua kaki lea ‘ai kolu enzi ako, ki dri draasa enzi olu ‘aia asiti ga ‘aa. “Migeni Yesu ni ra ki dri draasa enzi olu ma asiti ga ‘aa. Ale gba Yesu ni ndro ki dri draasa enzi olu ma asiti ga ‘aa. Majoa sa kpe, ‘Ayi nyemu ma ni, ma amu aru su dru di amala ma asiti ga enzi ‘aa disidru lari madri ri isa ma nia ce ya ni kpe. Disidru mitiri Yesu keya saa ma olujo ‘baba ri si ‘jo milegi okpo si okposi dini vua ‘jo maru ma enzi ni okposi dini ‘i. Ale gba Yesu ni ma asi cidru si ki alu sa ama olu ane tro kare alu ga ni kpe amala ma asiti oga enzi si ndru.” 
Ki esu Yesu kozi ‘ba, “Nyitiri nyi ndi ku adu si?” 
Kaki ‘ai ‘a, “Opi, Ani ote ma anda ku amala ma enzi ide odu cidru si. Disidru nyungwe ma saa nya enzi ‘ba ungwere ri ‘i.” 
Oni ki ku di Rubanga ni, ta bidi vua lejo la ka ri ali di rii, ka di enzi ‘ba ‘ai ingo ni ya ‘i kusa di ka ‘ai eco ana ‘baciri ‘i dru ni ingo ni ya ‘i. 
Izi dipi keya koko ka lejo cidru enzi dri ana lemuruzi dri ri iko ni, ki amala aru su dia ni kaa ku si, dri ani oci ru ra. Ki amura ama enzi ‘ba amala ama enzi ide ka ru si si, karuni ama ‘ai ni Rubanga ni ru iyo. ‘Jo gba ama ‘i kusa ameri lejo ehwi anda lejo Rubanga dri ri idri rii ku, enzi ama asiti ga rii kaci andra ga inyai ka tro ‘i. 

‘Ba ziti olu driso kaki ricandi enzi 
asedi ‘aia asiti ga risi ‘i adu si?
Adusi oni ki kusa ‘ai ki lejo ehwi Yesu ‘a batisimu 
dri, ‘aia enzi ni jedi pelere dii 
‘aia asiti ga ku ru.

Izi dipi odu enzi cidru vudri dia rii pi. Ingo si? Jurudano ‘a si saa ana batisimu esu re ri ‘si. ‘Ba cidru di ‘ai ka ku rii ‘ai enzi ‘ba. Kaki olu aru su ‘a enzi ‘ba ri ‘i dru ru.
Izi dipi ka ana izi ni zi, “Ki gba nyi ma le ingo ni ‘jo nyi ma lemuruzi ‘i ku ‘i? Oca driso ma ungwere nya yaigo ‘i dru ku, kolea nya enzi ni cidru koje ru pelere kpa.”
Ki ama gba layu esu batisimu Yesu dri rii ako wa ‘a? Kpe! Obi ama ovi Rubanga dri si, disidru ama anda undru ama asiti ga ‘au, vua urata ama dri ri kobia olule anda. Ki amani ura kaa ama enzi ako ni ta okpo rere ri ‘i ‘jo enzi oludi ama asiti ga rii driso ojeru ku ru di ni ‘i. Kesu tete ama batisimu Yesu dri ri ‘ai vua amigenia kpa ku ri ama aludi sa joa ama dri enzi iyo kusa ama anda ni kpe.
Ama ura ta kengwi aludi sa enzi ako ole ni kpe ‘jo amigeni ama ama ngasi enzi ako jo tee ta ce rii enzi kolu ama asiti ga ‘aa ‘i sa ‘i. Kusa Rubanga ka aludi sa ama ‘ai ta na di iti kpe. Rubanga onze aludi sa enzo ku. 
Rubanga ojo Mose ni kole kodu weli ‘ba Isaraile dri ri dri ni kosi ‘aia weli ni ci koko kazi anini ta ovi ‘ba dia olu ‘jo ri si. ‘Ba ta tro rii kole kohwe ki ta konde nusu sumoni drii ku vua ‘ba oce ta ako rii kole kohwe ki gaadru ku. Ma’di alu alu kole kohwe ta ani ayu ‘jo rii ni. 
Disidru, ma’di kengwi enzi ako ole ni ingo ni ‘jo ‘ai Yesu ni ana enzi uhwedi kpodru ana lidri ni ‘a dii kuru ‘i? Karuni enzi driaru ‘aa. 
‘Jo ama ‘i tete ari Yesu dri rii a’u, karu ni dri enzi olu ama asiti ga ‘aa disidru kole ‘aiki ama enzi ni vua ‘ai ki kiza ‘au si. Ki ‘jo ‘aiki ofu loso ana batisimu dri rii ana kuruce tro kare alu ga, adi ki ‘joa gba loku loku ama dri enzi iyo ni wa. Adusi lari ti lidri olure tadru ri tro ama ‘a ‘i. 
 

TA JOLE UNZI ENDRI OLE RI IRU RI ‘I

Enzi badia ma’di koya aci olure 
tadru ri ‘ia rii ingo ‘i?
Enzi idele Endri Ole ri iru ri ‘i, ovi zi si, 
batisimu Yesu dri ri ‘ai ka ku ‘i

Roma 1:17 ojo, “Adusi ‘aaru anda anda Rubanga dri ri itede ru ‘ai si ‘ai si.” Anda anda Rubanga dri ri itede ru ofu loso ri si. Yesu Kristo emu vudri dia oko oje ama enzi ni cidru ana batisimu si vua ana dra kuruce dri ri si. Batisimu Yesu dri rii ‘ai ana ari tro okpo ofu loso ri dri ‘i. Yesu oje enzi amadri rii vu alu ate tri. 
‘Ai kaa ehwi ni lari ki aci olure tadru ri ‘i ku. Ama Ata ni bu ‘a ri eze ana Ngwaapi ni alu tende ungwele Yesu ni vu dri di ‘a vua oba esu batisimu amani lari esu ‘jo ama enzi ni ‘a. Disidru, ma’di alu alu ‘aidia ra ri ka lebe esu ana enzi ni ‘a si cidru ra. 
Enzi tete rebedi vudri di ‘a ‘aa rii ana batisimu ti ana ari tro ‘ai ka ku ‘i. ‘Ai kaa ku ni Endri Ole ri ga ka vua ani ledii enzi Rubanga ka lamgba li ‘ausi ra ri ‘i, ka ‘ba ‘aidru ‘ai kaa ku-ri ze aci olure tadru ri ‘ia. ‘Ai dii kpodru enzi dra ‘jo ri ‘i. Anyi alu alu enzi di ‘bati di ani ri ide ka ra rii kole anyiru anya enzi ni vua anyiko anyesu layu anya batisimu Yesu dri ri ‘ai ka ‘au si. Jo ani ani ku ri, anyi icandi esu ru. 
Nyesu lari sadini ruhwedi ana batisimu ni dri ri si ana ari tro ‘a? Nyesu sadinni Yoana dri rii kendre ondi ana rusi ka Yoana 1:29 ga, “Dii!, Biloangwa Rubanga dri enzi vudri ri dudi ri ‘i” ri ani ‘a. Nya ‘i batisimu Yesu dri rii ana ari tro kendre ana rusi ka Eberei 10:18 ga, “Kare ta di bati ebe re ra ri iga, azi enzi ti uhwejo ri oleru di ku” ri ani ‘a.
Rubanga ka ‘ba batisimu Yesu dri ri ‘ai ka ‘aia asiti ga ana ari tro rii ba anda rii ‘au. Rubanga koba kaki engwi ana ‘baciri ti ‘i. ‘Ba cidru layu esu ka batisimu Yesu dri ri si ana ari tro rii engwi ki ole le Yesu ‘a anda dri si. 
Ma’di Rubanga ‘a zele rii ka lejo Rubanga dri ri jo ‘au, ki ma’di vu di idri rii, ma’di Rubanga ‘a zele ku ru dii, ka lejo nze ovi ana urajoa dru ana ngasi ri si. ‘Ba vudri dia lejo Rubanga dri rii nze ka rii amgbu, vua ziti Rubanga ‘a zele ta driba nzere Yesu ‘a batisimu ni dri ana ari tro ri ‘i. 
Ki ‘ba lejo ‘aidri ‘aia ngasi ri nze ka ‘au rii kaki bia urata ‘ai dri aia ngasi rii nzele ‘au. Kaki joa, “Amesu layu enzi ama uti ‘jo ‘autro ria dri ga ra, ki kole ma’di alu alu koru ana enzi odu cidru si ri ni.” Kaki joa kole enzi ama dri ri kebe ru odu cidru si. 
Ki gba ma’di ka layu hwe anini ana ngasi wa ‘a? Ama gba engwi ole urata loso ama dri ama ngasi ri si kusa nosi mori ama dri ama ngasi ri si wa ‘a? Amengwi ole enzi ako rii amala Rubanga ‘a ama enzi ni jeka pi si ‘a, kusa nosi ama makaa layu esu ka ama ngasi si ‘a? 
‘Ai ce rii ta layu eji di amani ri ‘i. Ama makaa je vu elifu anini engwi ‘jo ingwe ni wa ‘a? Ama eni ini rii eco anini engwi ‘jo ingwe adu ta jejo ri si wa ‘a? Sabuni weli ekpadru rii adu ta jejo weli ekpadru ri tro ka alusa ama enzi ni je kpe, vua anda ama dri ama ngasi rii kendre bongu liri andi ri ani. Ama engwi anda rii ama batisimu Yesu dri ri ‘ai ka ana ari tro si ‘a nosi tete ana ari kuruce dri ri ‘ai ka ‘au si? 
‘Ai ce rii kenga ondi ku sa eyi Yesu ‘a batisimu dri ri iga ana ari kuruce dri ri tro. Ta lari ni dii kemu ama dri mori ama dri ri si ku. Ki tete ama ‘ai Yesu ‘a batisimu ni dri ana ari tro amani layu hwedi enzi cidru dri ‘a vua ama eco di anda rii ‘ai ka si. 
Ata ohwe ‘ba ni ndutudru ana Ngwaapi ‘a dri ga, ‘ausini ‘ba cidru ani ‘ai ka rii kaki dru lidri olure tadru ri esu ra. Ngwaapi ni igeni ka ‘a ehwi ni layu ndutudru ana batisimu si vua ari si ri ‘ai ka. Ma’di ‘aidia ra rii kendre ‘barangwa Rubanga dri ri ani ka lidri olure tadru ri esu ra. Ma’di lari esu di ra rii kolu dri nyare Rubanga dri ri iga ‘bo’bo dru. 
‘Ai Yesu ‘a batisimu ni dri rii ana alu alu Rubanga tro ri idri ri tro ri isa ‘ai Endri Ole ri idri ri ‘i. Lejo anda dri ri koba ama ruti Endri si di. Amesu lari ama batisimu Yesu dri ri ‘ai ka ana ari tro si. 
Anya ‘ai kolu ‘aa. Adusi batisimu Yesu dri ri ‘ai ka ana ari tro ni layu tadru ri esu ka. Nyiba nya ‘ai ni ofu loso ce di iru nyiko nyesu lebe nya enzi dri ni. 
LIST Download FREE eBook & AudioBook