- All e-books and audiobooks on The New Life Mission website are free
- Explore multilingual sermons in global languages
- Two new revised editions in English have been released
- Check out our website translated into 27 languages
Ta tajore driaru ri `i 3: Ofu loso Eyidrii Endri dri tro
[3-9] Anyiba Ideki Ata ‘a Ebu ni A`i si (Mateo 7:21-23)
(Mateo 7:21-23)
“Ba aidru jokaa mani ti si, ‘Opi, Opi,’ ri oto Opi `bu dri iga ku, ki ma’di ta ma Ata ni `bu ‘a ri ‘a lele ri idedi ri keya kohwi ni. Jo o`du na keca ni ‘ba amgbu kojoa mani, ‘Opi, Opi, aninga amini ta nya ru si kuru ya, adro ori unzi rii nya ru si kuru ya, amide nyuma ta au’jo rii tro nya ru si kuru ya?’ Ki ma joa aini kperi, ‘Ani anyi ku; anyi ‘ba dranga di, konga ma laga pi!’”
“Ba aidru jokaa mani ti si, ‘Opi, Opi,’ ri oto Opi `bu dri iga ku, ki ma’di ta ma Ata ni `bu ‘a ri ‘a lele ri idedi ri keya kohwi ni. Jo o`du na keca ni ‘ba amgbu kojoa mani, ‘Opi, Opi, aninga amini ta nya ru si kuru ya, adro ori unzi rii nya ru si kuru ya, amide nyuma ta au’jo rii tro nya ru si kuru ya?’ Ki ma joa aini kperi, ‘Ani anyi ku; anyi ‘ba dranga di, konga ma laga pi!’”
NOSI KOLU MA ‘I...
‘Ba cidru jokaa ti si ‘Opi, Opi’
ri koto Opi `bu dri iga ra ya?
Hwa. Tete ‘ba le Rubanga
dri ideka ri koto ni
Yesu Kristo ojo, “’Ba aidru jokaa mani ti si, ‘Opi, Opi,’ ri oto Opi` bu dri iga ku, ki ma’di ta ma Ata ni `bu ‘a ri ‘a lele ri ide di ri keya kohwi ni.” Le`jo ani di eji ori Kristo ‘ba amgbu asi, oba kaki asi tra Opi ‘a e`bu ni idere ga okpo si.
Kristo ‘ba amgbu kuraa ta aini idele okpo rii aini Yesu ni a`ika tojo Opi `bu dri ia ‘i, ki Bugu Mateo dri 7:21 ojo amani ‘bacidru jokaa laka, ‘Opi, Opi,’ ri oto Opi `bu dri iga ku.
‘Ba cidru le`jo di laka rii mgbesa kaki ido ‘a auka kaki jo ‘a “Nosi kolu ma ‘i.” kaki bia ai igogale aiangasi, “Ku, ki ta Yesu ‘a jole rii nosi kolu ai ‘ba ku `i.” Ki urata di dri olu dri ‘aia asiti ga vua kaki aci andraga e`bu laka ri ideka tro.
Disidru, kaki ai ba aiangasi ewo angwa le`jo rusi di ri dri ruladi, “ki ma’di ta ma Ata ni `bu ‘a ri ‘a lele ri idedi ri ‘i.” Mgbe kaki enzu le`jo ehwi, “le`jo ma Ata ni ‘bu ‘a ri ‘a lele ri ‘i” ni ledi idri kaki uraa ai ka ledi ide wa rii aia alu mudri dri ri hweka asi cidru si si, ilegika kili kili si, ofu nzeka si, e`bu loso ri ideka si, vu a hwa enzi ideka ku si... kakiko kaki di ma okposi. Oba ma ma eri kiza ‘a ma ai ndreka si `i.
‘Ba amgbu ziti ri ka enzi ide rii a`dusi aia le`jo anidru rusidi di ‘a ehwi ni erika ku si. Disidru ale manze driso le`jo ani di ‘a ehwi ni anda anda ausini ru cidru ka Rubanga ‘a le ni ni ote vua adiko adi olu ausi.
Atijoa rii, kole oniki ote le Rubanga dri rii ana Ngwaapi ‘a enzi ‘ba cidru dri du ka ndutudru ‘i vua ani ledii ovi ana ama ebe ‘jo kulala enzi dri ‘a ri ‘i.
Osiru Efeso 1:5, ga, “Rubanga ole ama upeka ana `boronzi ‘i dru Yesu Kristo si, dii ta ana lele ri ‘i vua ana e`bu ‘i.”
Ovi zi si, ta Ana lele rii ama cidru koni ofu loso anda Yesu Kristo oje ama enzi ni cidru si pelere ni ote ‘i, ledi si oba ati ru Endri si di. Ta ana lele rii ama ti ru di eyi si vua Endri si enzi amadri cidru baka ana Ngwaapi ni, Yesu ni ru si ‘i. Dii Rubanga ‘a le ‘i.
TETE JOKAA TI SI, “OPI! OPI!”
Ta kolea dubasi ama ni ‘jo
ama ‘i Yesu ni ni rii a`du?
Le Ata dri ‘i
“’Ba aidru jokaa mani ti si, ‘Opi, Opi,’ ri oto Opi `bu dri iga ku, ki ma’di ta ma Ata ni `bu ‘a ri ‘a lele ri idedi ri keya kohwi ni” (Mateo 7:21).
Kole duba eriki Ata ‘a le ni ewo eri si. Atijo ‘a rii, ani le driaru ri ‘i amani lebe enzi dri esu jo vua amani engwi jo rutijo di eyi si vua Endri si ‘i. Erijoa rii, kole ideki e`bu anda ani ledi ‘a ovi si.
Ani le driaru ri ‘i anini enzi ‘ba cidru vudri ri dri ebe ‘jo ‘i. Sitani oba ama a`bi ni Adamu ni ede ‘jo enzi si ni. Ki ama ata ‘a le ni ‘bacidru ebeka aia enzi ni ‘a si kulala ‘i. Kole eriki ehwi ani ca ani ama Ata ‘a le ‘i ku amani alu mudri dri ri azi ka o`du cidru si ‘i kusa ilegika kilikili ‘i, ki ta ana lele rii ama ari ka enzi cidru dri ‘a ‘i. Ani le driaru ri ‘i ‘ba cidru ari ka de ‘jo meri retugodru enzi dri ‘ia ku ‘i.
Bugu Ole ri ojo ‘ba cidru jokaa mani ‘Opi, Opi’ ri oto Opi `bu dri iga ku. Di ‘a ehwi ni tete Yesu ni a`ika au ‘i ku, ki kole oniki ta ama Ata ‘a lele amadri ri ‘i. Ani le driaru ‘i ama ari ‘jo enzi dri ‘a lamgba aci olure tadru ridri tro ‘i, nikaa cuwidru ta Adamu ti ‘a idele Eva tro ri ‘a ehwi ni ama ama ‘ikonyi ama ngasi kpe ki rarii ama aci andraga enzi ideka tro ‘i.
LE RUBANGA DRI ‘I
Le Rubanga drii ingo ‘i?
Ama eco ka ana ‘baciri ‘i ti ana
ama ayuka ama enzi ni ‘a tro
Mateo 3:15 ojo, “Ama tadi ideka dini ni ama anda Rubanga ‘a lele ri ide au.” Dii kiko dru ta Rubanga ‘a ti ubale amani Yesu emu vudri di ‘a ama arijo enzi cidru dri ‘a ‘i. Le Rubanga dri itederu tau saa Yoana Batisita ‘a batisimu hwejo Yesu ni risi.
Ole ani kari ama vua ani keco dru ama ana ‘baciri ‘i. ledi ide ‘jo, kole Ngwaapi driaru ri kodu ama enzi ni cidru pi. Ani le driaru ‘i anini ama eco ‘jo ana `baciri ‘i. Disidru eze ana Ngwaapi ni alu tende rii enzi ‘ba cidru dri rii du re ai dii ‘ba zoka matego Sitani dri ‘ia ri ‘i. Ani le driaru ‘i ana Ngwaapi ni alu tende rini razi ‘jo ausini ‘ba cidru ni engwi ‘jo ana ‘baciri ‘i.
Yesu esu batisimu vua oko odra kuruce dri, disidru Rubanga ‘a le oko ideru ra vua tro sa ani le driaru ri ‘i igeni joadru enzi amadri rii cidru obaru Yesu niru saa ana batisimu esujo risi ‘i vua oko esu lamgba enzi cidru ama idele ridri ni kuruce dri si ra ‘i.
“Rubanga ‘a ‘ba vudri rii le ka ndro si eze ana Ngwaapi ni alu tende rii” (Yoana 3:16). Rubanga ari ‘ba cidru ani dri rii enzi dri ‘a ra. Ideru dini, ta atijoa Yesu ‘a idele ana e`bu anidri laki ni ri idere rii ana batisimu esuka Yoana Batisita dri ‘i.
“Ki Yesu a`i ani ojo, ‘Nyebe ta dii kolu ‘bo’bo dru di ni, ama ta di ideka dini ni ama anda Rubanga ‘a lele ri ide au.’ Disidru oko a`i ra” (Mateo 3:15). Yesu ‘a emuka vudri di ‘a ni Rubanga ‘a le ‘i, odu enzi cidru vudri dia rii ana batisimu si, odra kuruce dri, oko onzi lidri-di.
Kole oniki di ‘a ehwi ni anda anda. ‘Ba amgbu ka bugu Mateo dri 7:21 ni la kakiko kaki uraa ani le driaru ‘i ama ni e`bu idejo Opi ni ‘i, tee koca ndi saa dra dri iga sa ‘i, nosi dri lahwa cidru ama esule rii izaka ekelezi ‘a sire ga sa ‘i.
Kristo ‘ba ‘bazi, ru ‘ba Yesu ni a`ika ra rii kole ati oniki Rubanga ‘a le ni vua oko a`iki. Ani ta loso rere ri ‘i ku nyini nyi hwe ‘jo ekelezi ‘a ni ana le ‘a ehwi ni erika ako `i.
‘Ba ka ai zi aiangasi tazi aini idele wa rii a`du tete oluka aia a`i ni ‘a lini aia igenile anda aia ekelezi ‘a ni ‘a risi ‘i. Ki ma mangasi mini ta dini Calivini dri idri ekelezia Prebyteria dri ‘ia vua ma’di ma izodi rii ma endre ni endredi kendre dini dipi ani kendre leidipi ani ridri. Mesu lini ekelezia ungwele-anda ledi bati idri ra.
Majugo Paulo ojo ani kanzo okposi rere rii ana engaka suru Binyamino dri ‘ia si vua ana le`jo cara dri inika laponyi Gamaliele ni iti si, a`dusi ani laponyi okpo rere saa na si ri ‘i. Paulo ‘a driso rutire Endri si di kuru rii, esu ori ka ‘ba Yesu ‘a vu okoka rii oko cici. Ki oko esu a`i Yesu ni ‘a dii ana yare leti Damasiko dri si ri ‘i oko engwi ma’di anda ri ‘i tutu ofu loso eyi dri Endri tro risi.
KOLE ONIKI RUBANGA ‘A LE NI ATI ATI OCA DRI IDEREA KUKU
Ta okpo rere rii ingo ‘i amaca
dri Yeu ni a`ire kuru sa ‘i?
Kole ati oni ana le ni ote ‘i.
Layu amadri enzi dria rii Rubanga ‘a le ‘i. “a`du si dii Rubang ‘a le, anyi ni engwi ‘jo ole enzi ako ri ‘i: ausini anyebe bate ra” (1 Tesalonika 4:3). Ani cuwidru ani le Rubanga dri ‘i amani gbadru engwijo ole eyi si vua Endri si vua olujo a`i ‘a ama lidri ‘a ru ‘i.
Jo noisi ma’di zi alu ‘aa ana Yesu ni a`ika avu ga sa olu dri enzi tro asi ‘a ‘i ri, karuni kolu Rubanga ‘a lekaa ri ani ku. Le driaru ri‘a vu ni okojo kole amesu lari engwijo ole Yesu si ri ‘i. Di nika ni le Rubanga dri ideka.
Jo mazi anyi, “Draasa anya Yesu ni a`ika ‘a vu ga sa enzi olu dri anya asiti ga ‘aa ya?” Anya a`i kolu mgbe oo ‘i, kitede ‘a pelere ini driso le Rubanga dri rii kuru. Ani le Rubanga dri ‘i amani engwijo ole vua rarijo ra enzi cidru ‘a a`i ofu loso eyi dri Endri tro risi `i.
O`du zi si ma’di zi dri `boronzi ta ehwi eri ka wa rii aa. O`du zi alu si ungwe amba amba rii, ani dii ana `barangwa ni ta ehwi eridi okposi ri ‘i, oko ojo laka, “Ngwaago, nyeya nyi ya ega ra ki nyali amvu ‘a si...”
Ki oca ta ana jole ri ikore kuru, ngwaapi ojo, “Iye, baba” oko loku oya ra. Ote nijoadru jo ani oya ni ani komu ani ka a`du ide au ya ni kuru. Ki mgbe anidri oya.
Ki ata oko ungwe ani vule ojo, “Ngwaago, nyini, ma ru ka ta ma lele ri ideka si ni ta loso rere ri ‘i ki ati kole nyini ta ma lele nyide rii a`du ya ni kpa.”
Ki ngwaapi a`i, “ledi isa cuwi, baba. Ma nyi ru ra. Ma’di laru hwedi ma zadi ra rii a`di ‘i?”
Ki amala engwi dri-dri ni. Oni ta ana ata ‘a lele ani kide rii a`du ya ni ku. Ki ra rii ide cuwi oke laru ana ata ni ra.
Amasa jo ani Yesu ni ku ama olu ana ani. ‘Ba amgbu ka ai ke aiangasi, lini Rubanga di ria vu ni okore ga, kaki alu mudri drii hwe asi cidru si, kaki ilegi ini ‘a ru, kaki abiri ta... kpodru sa le Rubanga dri ri nika ako.
Jo tee kodraki enzi si aia asiti ga ra sa, joti `bu dri iga adi ai eco olile a`di ai edro pi. Rubanga ‘a e`bu ni idere ga ai tesa baba ki alusa oniki ta Rubanga ‘a lele aini idele rii ku.
Cara ako eteka ‘a ehwi ni a`du?
Yesu ni a`ika enzi dipi ani ofu loso
Eyi dri Endri tro ri nika ako ‘i
“Jo o`du na keca ni ‘ba amgbu kojoa mani, ‘Opi, Opi, ani nga amini ta nya ru si kuru ya, adro ori unzi rii nya ru si kuru ya, amide nyuma ta au’jo rii tro nya ru si kuru ya?’ Ki ma joa aini kperi, ‘Ani anyi ku; anyi ‘ba dranga di, konga ma laga pi!’” (Mateo 7:22-23)
Ta ziti Rubanga ‘a lele amide rii aa vua ‘ai ziti ana lele amadri ri isa ‘a’a. Ana lele rii ama ‘i Yesu odu ama enzi ni cidru pi ‘i. ‘Ba lini andraga ri eteka profetaa dru ri `bati ka ori unzi rii udro, vua kaki ta au ‘jo rii ide ana ru si anda ofu loso eyi dri Endri tro ridri nika ako.
Ta aujo aia idele rii ekelezia usi ka ekpadru, limi ‘baziti ri azi ka siti laka anzu ‘jo ekelezia ni, vua lidri ma’di zi dri ri azi ka Opi ni, di oko drilahwa aidri ri bati isa tro.
Le`jo profeta tisi ri joka ana ru si ‘a ehwi ni oluka amba. ‘Ba ai ledi ani ledi oviru Farazei’ ‘ba tro a`dusi kaki recu aia cara ta mbaka si vua oko ogaki Yesu ni mgbe. Ani di oko ‘ba esu kole koluki –Kristo ‘ba anda riidru ri ‘isa tro.
Ori unzi ri droka ni mori itede ka. Dii kpodru si cara okpo aia a`i niga ri ‘i, ki Opi kojoa aini odu tati ‘a asejo risi ani oni ai ku. Kojoa aini kaki anini ote ni ingoni jo ani koni ai ku ‘i.
Opi ojo, “Mako majoa aini kperi, ‘Ani anyi ku; anyi ‘ba- unzi di konga mandra pi!’” O`du nasi, laki amgbu kowo dri ‘aru kaki joa, “Opi, Ma ‘i ra. Ma ‘i ra ma ‘i nyi ma Aridipi ‘i.” Kaki joa ai a`i ani ra ki ai oni ani aia asiti ga ku. Opi ojo ‘ba ai dii ‘ba asi traka cara ta mbaka ku ga ri ‘i (enzi ‘ba layu esuka kuru ri ‘i) koko kojoa aini kongaki ana andraga pi. O`du na si, ‘ba draka esu driso oca ai tire Endri si di kuru rii kevu kowo Yesu nandra ra. “Ma ta jo profeta ti si, anyusi ekelezia anyingo anyize e`bu ‘ba lini Opi dri ji ka rii nya ru si kate 50.”
Ki Yesu keya kojoa enzi ‘ba na ni, “Ani anyi ku; anyi ‘ba- unzi di konga mandra pi!”
“Ta nya jole ri ‘a ehwi ni a`du? Ini ma ta jo profeta tisi nya ru si ni kuru ya? Mide e`bu ekelezia ‘a kinya ubi... Mini ‘ba ziti rii aini nya ‘i jo ma ‘i. Nyijoa mani ini ma ku ni ingoni?”
Ki koko ka ‘ai `a, “Ani anyi ku. Anyi ‘ba jokaa ai oni ma ote ki dri enzi olu aia asiti ga ri, anyinga mandra pi!”
Ma’di ni oluka Rubanga nandra enzi ana asiti ga ri tro ni cara ako kusa oluka ama asi ‘ni ‘a cara ana lari dri a`ika ako ni enzi. Le driaru ri nika ku isa enzi. Ani gba cara ako rere le dri ‘a ru ideka ni kaa ako ‘i kusa tutu oti eyi si vua Endri si ridri ni jo ku ‘i. Vua ziniga di ani ta enzi rere ri ‘i ana vu kojo ana le ni erika ako ‘i. Cara ako ni enzi.
RUBANGA ‘A LE BUGU OLE RI ‘IA RI ‘I
`Baciri Rubanga dri
rii a`di ti ‘i?
‘Ba anda enzi ako
ri `bati ‘i
Ani gba le driaru ‘i amani ana ofu loso rutijo di Endri si ofu loso eyi dri Endri tro rii a`i ‘jo ‘i. Ofu loso ce ri ka tajo ama oti udi ri idri. Vua tro sa ani le driaru ‘i amani olujo ofu loso ri si kendre ana `baciri ti ani ‘i. Kole oniki Rubanga ‘a le ni ote, ki gbadru ‘ba amgbu oni ofu loso rutijo di eyi si vua Endri si dii ku rii ni.
Jo mazi ‘ba amgbu ziti rii di a`iki Yesu ni a`du le`jo si ya ni ni ri, amgbu ri `bati kaki a`i ‘a ai a`i Yesu ni ausini ai ka lari esu enzi dria ra si.
Ako azi, “Jodiniri, karuni enzi olu dri nya asiti ga ‘aa ya?”
Oko ojoki, “Oo gbadru, Amide ‘a.”
“Jodiniri, anyari ru ra ‘a nosi kuru?”
“Oo gbadru amari ru ra.”
“Jodiniri enzidipi gba driso enzi ‘a olure asi ‘a ru ‘aa di kohwi Opi `bu dri iga wa ya?”
“Hwa, kohwi kpe.”
“Jodiniri, nyi ya Opi `bu dri ‘ia ya nosi aci olure tadru ri ‘ia?”
Kaki joa amavu Opi `bu dri iga, ki gba kaki vu wa ya? Kaki vu aci olure tadru ri ‘ia.
‘Ba ziti kuraa draa aia Yesu ni a`ika ra si, ai koto Opi `bu dri iga ra tee enzi kolu driso aia asiti ga ‘aa sa ‘i a`dusi ani Rubanga ‘a le ‘i aini ta ledi ‘bati idejo ‘i. Ki Rubanga a`i alu sa enzi ‘ba Opi `bu dri iga ku.
Jodini ri Rubanga ‘a le ni a`du? Ojoru Bugu Ole ri ‘ia Rubanga ‘a le amani rii kole ama ‘i ana Ngwaapi ni ‘i, Tutu ama layu dri esule Yesu ‘a batisimu si vua ana ari kuruce dri ri si ri ‘i.
‘Ba tutu rutijo di ofu loso eyi dri si vua Endri dri si ri a`i ka rii kaki engwi ana ‘baciri ti ‘i. Eku amadri rii ama engwika ana `baciri ‘i ‘i. ‘baciri driaru ri `bati anda.
Jo Rubanga ungwe ‘ba anda rii ni, koko ka Kristo ‘ba-enzi tro ri isa ungwe anda ya? Rubanga ojo alu sa enzo ku. Disidru andraaru, nyolu ma’di enzidipi ri ‘i kusa ma’di anda ri ‘i ni wa. Ki oluka enzi tro le alusa a`i ru ku ‘kole ‘ba kolu enzi ako.’ Ungwe tete ‘ba ofu loso eyi dri Endri tro ri a`i ka ra rii engwile ole enzi ako ‘au.
A`diki engwi ‘baciri Rubanga
dri ‘i dru ingoni?
Ofu loso eyi dri Endri tro
ri a`ika si
Amala Rubanga ‘a enzi ‘ba cidru dri rii baka ana Ngwaapi niru si, kole gba ana Ngwaapi nidri lamgba koliru kuruce dri si ‘i. Rubanga onze alusa enzo ku. Ojo, “Enzi ‘a musara ni dra” (Roma 6:23). Ngwaapi odra di, vu mudi obe vu di ‘a dri ni saa ndi ndi ina.
“Yesu oko owo uduku si ere, ojo, ‘Eloi, Eloi, lama sabakitani?’ ehwi ani, ‘Rubanga madri, Rubanga madri, nyebe ma ra a`du si” (Mateo 27:46).
Yesu odu enzi cidru vudri rii ana batisimu si ‘ba cidru ari ‘jo aia enzi ni ‘a si. Odu enzi ‘ba drii, oni ote kole epa ani kuruce dri vua Rubanga ni, ana Ata kebe ani ra ni kpa. Disidru Rubanga ali le`jo ana `bara ni gba ri idri enzi ana dule Jurudano ‘a risi oko ebe ana Ngwaapi ni gba rii ra saa ndi ndi ina.
“Ki ziti le a`iki ani ra, disidru ohwe a`ini okpo reco ‘jo ‘boronzi Rubanga dri ‘i” (Yoana 1:12).
Nyi Rubanga ‘a Ngwaapi ‘i ya? Ama ‘ba tile Endri si di ri ‘i adusi ama ‘i ofu loso rutijo di eyi si vua Endri si rii ra. ‘Ba tile di eyi si vua Endri si rii a`i ‘ba anda ri ‘i.
“Ki jo Rubanga ni ame tro ri, adi ka ama za wa rii ni?” (Roma 8:31) Jo ma’di anda ri ungwe ani Rubanga nandra kusa ‘ba andra anda, mgbe ‘ba driso layu esuka kuru di kole ‘a ‘ai kali le`jo driaru. Disidru majugo Paulo ojo, “A`di ka ‘ba Rubanga ‘a upele ra rii isiki wa rii ni? Te Rubanga ni ‘ba a`i di ana ndra anda ri ‘i” (Roma 8:33). Rubanga ebe ama enzi ni cidru Yesu si oko ungwe ama ‘ba enzi ako ri ‘i, ‘ba anda ri ‘i, vua ana `baciri ti ‘i. Ohwe amani cara engwijo `baciri Rubanga dri eku tro ri ‘i. A`dusi ‘ba tile di eyi si vua Endri si rii ana ‘baciri ti ‘i. Kaki olu anetro ‘bo’bodru. Ai draa tete ta tile vudri di ‘a ri ‘i ku ki ai ‘baciri Rubanga dri ‘bu ni ri ‘i.
Draa aia oluka ‘baciri Rubanga dri anda ri ‘i si, ma’di zi alusa sikia ejidi aia ru ga wa ani iyo, ta alidi aidri, ku sa ai anzu di Rubanga tro ani iyo.
Anyiba kole oniki ofu loso eyi dri Endri tro rii amani Yesu ni a`ijo au ‘i. Vua kole oniki Bugu Ole rii cuwidru. Ani gba ta esidi ca ri ‘i amani Rubanga ‘a le ni igenijo ausi amani ide ‘joadru au ‘i.
ANI LE RUBANGA DRI ‘I ENZI ‘BA NI SA RUTI ‘JO DI EYI SI VUA ENDRI SI ‘I
Rubanga eze ana Ngwaapi ni
ovi ‘ba enzi ‘ba ridri si a`du si?
Ausidru enzi vudri rii koba
ru dru ruaru si
Ani le Rubanga dri ‘i ausini amengwi ‘ba layu esuka ra ri ‘i vua ausini ama ruti di eyi si vua Endri si. “Ta Rubanga ‘a lele rii, kole anyolu cidru ole” (1 Tesalonika 4:3).
Ani le Rubanga dri ‘i anini ana Ngwaapi ni ezejo vudri dia ausini enzi cidru vudri rii karuba dru ‘ruaru vua ausini ka dru ama ari ra. Dii cara Endri dri ‘badia ama ruti di eyi si vua Endri si ri ‘i. Ebe ama enzi cidru dri ‘a kulala.
Draa ama enzi ako. Draa kopdru si anyi le Rubanga dri ri ndre wa ya? Ani le driaru ana ama ayujo ndutudru ri ‘i. Ole ama rerika kolu vu di tro ni ku rarii te ama ‘i le`jo anidri rii au vua amaru ani au a`dite.
Vuatro sa ani le Rubanga dri ‘i ausini ‘ba tile Endri si di rii kaki sadini hwe ofu loso ri idri vua ausini kakiko kaki olu ekelezia ‘a, kaki ai hwe dru aiangasi ndutu e`bu Endri ziti ri ingwijo Rubanga dri ri ga.
Ama enzi ide rii ama lekaa si ku, ki rarii ama oluka a`wi ako si. Ki Yesu odu enzi ledi bati kpodru pi. Rubanga oba enzi cidru vudri rii Yesu niru Yoana Batisita si. Oko eze ana Ngwaapi ni ra ledi si oba esu batisimu Yoana dri. Amesu lari ama di a`i ka si. Dii Rubanga ‘a le ‘i.
Ani le Rubanga dri ‘i anini ana Ngwaapi ni ezejo vudri dia ausini enzi cidru vudri rii karuba dru ‘ruaru vua ausini ka dru ama ari ra. Dii cara Endri dri ‘badia ama ruti di eyi si vua Endri si ri ‘i. Ebe ama enzi cidru dri ‘a kulala.
Draa ama enzi ako. Draa kopdru si anyi le Rubanga dri ri ndre wa ya? Ani le driaru ana ama ayujo ndutudru ri ‘i. Ole ama rerika kolu vu di tro ni ku rarii te ama ‘i le`jo anidri rii au vua amaru ani au a`dite.
Vuatro sa ani le Rubanga dri ‘i ausini ‘ba tile Endri si di rii kaki sadini hwe ofu loso ri idri vua ausini kakiko kaki olu ekelezia ‘a, kaki ai hwe dru aiangasi ndutu e`bu Endri ziti ri ingwijo Rubanga dri ri ga.
Ama enzi ide rii ama lekaa si ku, ki rarii ama oluka a`wi ako si. Ki Yesu odu enzi ledi bati kpodru pi. Rubanga oba enzi cidru vudri rii Yesu niru Yoana Batisita si. Oko eze ana Ngwaapi ni ra ledi si oba esu batisimu Yoana dri. Amesu lari ama di a`i ka si. Dii Rubanga ‘a le ‘i.
ANI LE RUBANGA DRI ‘I AMANI YESU NI, ANA EZELE RI A`I ‘JO ‘I
Yesu emu ovi
enzi ‘ba dri si a`du si?
Ausini kodu dru enzi cidru
‘baa idele rini si
Bugu Ole ri ojo le Rubanga dri rii ma’di ana ezele ri a`ika ‘i. “Disidru oziki ani, ‘Kole amide a`du amani ta Rubanga ‘a lele ri ide ‘jo ‘au ‘i?’ Yesu ‘a`i, ‘Ta Rubanga ‘a lele anyide rii di ‘i, anya ‘i ma’di ana ezele rini.’ ‘Ba di a`i, ‘Nyuma nya idele amani, itedejoadru ama ‘i nyi rii ingo ‘i? Nyi a`du ta ide au? Ama a`bi ti onya umbi hwesihwesi ‘a; kendre ana rusika ri ani, ‘Ohwe aini lonya engadi `bu ‘a rii nyale au’” (Yoana 6:28-31).
Laki rutraka ri ojo Yesu ni Rubanga etede Mose ni ovi ana yare leti Kanaani dri si rii, ani keya ka mana engadi `bu ‘a rii hwe Isaraile ‘ba ni ra, ta di oba laki di a`i Rubanga ni ra (Yoana 6:32-39). Disidru oziki Yesu ni, “Kole amide a`du, amani ta Rubanga ‘a lele ri ide ‘jo ‘au ‘i?”
Yesu a`i ‘ai ojo kole ‘a kaiki ani aini e`bu Rubanga dri ide ‘jo au ‘i. Jo amani e`bu Rubanga dri ide jo au, kole ama ‘i e`bu Yesu Kristo dri kpa. Ani le Rubanga dri ‘i tete amani ani a`i ‘jo vua ana ru ni nze ‘jo au ‘i ku ki olu ‘jo ausi sa tro.
Rubanga ohwe amani cara ojo, “Disidru anyivu ‘ba ini si kare cidru ga, anyihwe aini batisimu ru Ata dri si Ngwaapi dri tro vua Endri Ole ridri tro, anyini ‘aini kombaki ta cidru ma inile anyini ria ta ni” (Mateo 28:19-20).
Yesu ojo gbadru amani anda anda kole amahwe ‘ba ziti ni batisimu ru Ata dri si Ngwaapi dri tro vua Endri Ole ridri tro. Ta cidru ana idele ana Ata ni vua Endri Ole rini ria le`jo oko ana batisimu si ra. Jo ameri ledi ‘a ehwi ni ni, ama Rubanga ni ‘a`i ra vua amako ama ta cidru Yesu ‘a idele vudri di’a ri isa ndre ra ovi Endri ‘a sadini hwe ‘jo driaru ri tro.
Yesu ni Rubanga eze ni kemu dru sadini hwere ofu loso eyi dri Endri tro ri idri si. Diani disi dru ama a`i le`jo Rubanga dri ri idri ana tiluza dri ri idri ri tro rii ka ama ari wa rii ni.
E`BU RUBANGA DRI IDEKA
Ra amadri olu dri a`duta?
Le Rubanga dri ri ideka ofu loso
ri icaka vu ndutu dri si
Jo amani e`bu Rubanga dri idejo, kole ati ama ‘i ofu loso Yesu ‘a batisimu drii ana dra kuruce dri rii tro kpa. Ani e`bu Rubanga dri ‘i amani ma’di ana ezele ri a`i jo ‘i. Amani Yesu ni a`i ‘jo, kole ati a`iki ari ama eyi si vua ari si.
Le Rubanga dri ama ‘a ri ka ride cajo ama ‘i Yesu ni ra vua ama ofu loso ri nze ‘i. Ovi disi ama e`bu Rubanga dri ide au. Ojo amani tete ‘ba tutu ofu loso rutijo di eyi si vua Endri si ridri a`ika ra ri ko to Opi `bu dri iga ni.
Anyiba kpodru oduki ama kare Opi `bu dri iga rii ta nika nza le Rubanga dri loku di idri si, nikaa vua a`ikaa enzi ama drii cidru obaru Yesu niru ana batisimu si si, vua olu ka ana Opi ni rinza ‘jo si, vua ofu loso ri nzeka ndi saa ama udrajo risi si.
Kristo ‘ba ‘bazi! ‘Ba ofu loso eyi dri Endri drii tro rii a`i ka ra rii ka e`bu Rubanga dri ri ide rii ni. Ani e`bu Rubanga dri ‘i amani ma’di ana ezele ri ‘a`i ‘jo ‘i. Ani e`bu driaru ‘i amani ma’di Rubanga ‘a ezele enzi cidru ‘a rubare driaru Yesu Kristo ni ‘a`ijo ‘i ani ama Aridipi ‘i.
E`bu enzi ‘ba cidru ayudi enzi dria ria le`jo oko batisimu Yesu ‘a esule Jurudano ‘a risi vua ana dra kuruce dri risi. Ewo zi eri ‘joa Rubanga ‘a e`bu drii ma’di ana ezele ri ‘a`ika ‘i, Aridipi ni enzi vudri rii dudi ri ‘a`ika ‘i, vua ofu loso rii nzeka vu ndutu dri ‘i.
Draa ama ‘ba cidru tile Endri si di rii kole anyiba onzeki ofu loso rii ndi vu ti ‘a asere ga.
‘Ba cidru Yesu ni
‘a`i ka le Rubanga dri nika ako
rii kovu ingwa?
Kaki vu aci olure tadru ri ‘ia.
“Jo o`du na keca ni ‘ba amgbu kojoa mani, ‘Opi, Opi, ani nga amini ta nya ru si kuru ya, adro ori unzi rii nya ru si kuru ya, amide nyuma ta au’jo rii tro nya ru si kuru ya?’ Ki ma joa aini kperi, ‘Ani anyi ku; anyi ‘ba dranga di, konga ma laga pi!’” (Mateo 7:22-23). Le`jo ehwi ani di kitedea amani pelere di enzi ‘ba Rubanga ‘a andra ga rii a`di ti ‘i ya ‘i vua ‘ba cara ako etedeka rii a`di ti ‘i ya ‘i.
‘Ba draa dini sa rutika Endri si di kuru rii amgbu ‘ba jokaa ‘Opi, Opi ri ‘i lofo sa ‘i.’ Ta ka ai za dasa ku a`dusi driso enzi olu aia asiti ga ‘aa. Disidru kaki owo Rubanga dri kaki, joa, ‘Opi, Opi,’ uzuka angwa tro.
Kaki uraa ta aia urale ri karide ra ‘jo ai owo ilegi si ni ‘i, ki kolu ta okpo rere ri ‘i a`dusi dri enzi olu aia asiti ga ‘aa. Kaki ilegi be ‘a si, kaki owo kilikili ere, kendre nyiraa Rubanga ni lolu ani. Jo lokudru gba a`i amadri oca ku, a`diki idoa ta ungwele ‘Opi, Opi’ saa cidru si.
Ekelezia ziti laki ‘aaru rii driso otiki ru Endri si di kuru rii, kaki ilegi mori si koba laki rutraka ri kozo paka vuru tro. Ki a`diki ndrea Bugu Ole ri ‘ia ‘ba cidru jokaa ‘Opi, Opi,’ ri oto Opi `bu dri iga ku.
Tete ‘ba ofu loso eyi dri Endri tro ri a`ika ra ri esu a`i aia dri sedi Rubanga ‘a le ni idere ga rii ra rii ni.
Bugu Ole ri ojo amani ru driaru ri ungweka enzi tro asi ‘a ni cara ako. Jodini ri iya gbu ilegi be ‘a ri iga ra ya? Ukunzi eze padere ‘a gaga dru rii kaki owo kaki owo, kaki ru driaru ri ungwe a`dusi esuki Yesu ni anda si kuru, vuatro sa a`iki Endri dii ‘aia asiti ga kuru, kusa nosi aini rutile di eyi si kusa Endri si isa ideru kuru. Kaki ru driaru ri ungwe gboro dru a`dusi kaki ori aia vu ka aci olure tadru ri ‘ia si ori.
Ovi dru nosi ma’di ani hwedi ndutudru ana lidri ni ‘a e`bu ide ‘jo ekelezia ni kendre ma’di ofu loso ri jidi angwe ri ‘i dru ani kusa nosi leidipi dru oko vulega Opi keya koga ani mgbe. Kusa nosi ‘ba ani tika rini ani gaka nosi izi ana ago ni gaka ate ma’di ‘a asi ni nyo ‘jo ra, ki ‘jo Rubanga ni, Opi opi cidru dri ri oga ani ni, ma’di endri cidru ni le`jo alidi rii, ma’di di koko ka dri ba ingo?
Mitiri di ideru anyi ru ku. Anyibi ofu loso eyi dri Endri tro ri erile vua a`i le au. Ani le Rubanga dri ‘i amani ruti ‘jo Endri si di ‘i vua amani olu ‘jo ofu loso eyi dri Endri tro ri ‘ia ‘i.
Ama Kristo ‘ba dii ole ama ‘i ofu loso eyi dri Endri tro rii au amani dru mori esu ‘jo anda Bugu Ole ri ‘ia ri iga. Jodini ku ri ama lari esu lamgba Rubanga dri ria dri ga kpe.
Copyright © 2021 by The New Life Mission
