• All e-books and audiobooks on The New Life Mission website are free
  • Explore multilingual sermons in global languages
  • Two new revised editions in English have been released
  • Check out our website translated into 27 languages
Search
English
English

Sermons

Ta tajore driaru ri `i 8: Endri Ole ri `i

[8-2] Ma’di ka gba Endri Ole ri  je ana mori ana ngasi  ri si wa ‘a? (Ebu majua idele rii 8:14-24 ojo)

(Ebu majua idele rii 8:14-24 ojo)
“Maju Yeruseleme ‘a ri oce ‘ai keri ‘ba Samaria ‘a rii eriki lejo Rubanga dri ra di, ozeki Petro ti Yoana tro ‘aidri, ecaki di, ilegiki ‘ba Samaria dri rini ‘ausi kesukidru Endri Ole ri ni. Adusi esu driso Endri Ole ri esi ‘aia dri ga kuru. Ra rii esuki te batisimu ru Opi Yesu dri si. Petro ti Yoana tro utiki ‘aia dri ni ai dri, oko esuki Endri Ole rii ra. Simone ondre majua dri utika si Endri Ole ri ohweru ‘aini ra di, ohwe silingi Petro ti ni Yoana tro, ojo ‘aini, ‘Anyehwe masa mani okpo dii ‘aa, ‘ausini ma’di ma dri tire driaru ri isa kesu dru Endri Ole ri ni.’ Ki Petro ojo ani ni, ‘Nya ra kaa adi hwe Rubanga dri di je silingi si wa si, disile anyivu nya silingi ti tro aci ‘a! Nyidri ewo alusa ama ebu ni ga iyo, a’dusi nya asi ni Rubanga andra pelere ku. Nyiru nya enzi ra ego di dri ni, nyilegi Opi ni ka ra nyidri unzi dini di ebera. A’dusi andre nyi avi retu ri tro vua enzi nyidri umbe nyi ci.’ Simone ojo Petro ti ni Yoana tro, ‘Ayi anyilegi mani Opi ni, ‘ausini ta anyia jole di kideru dru ma ru ku.’”

Ma’di ka gba Endri Ole ri esu dri
tika ana dri ga si wa ‘a?
Kpe. Kole duba kigeni ofu loso rii ‘au Dii 
ofu loso eyidri vua Endri dri ri ‘i.
Kendre ondiku lejo ledia jokaa ri ani, ale draa manze dri 

‘anyini ta driba ite’de joadru di “ma’di ka gba laku Endri Ole ri dri esu ana mori ana ngasi ri si wa ya ‘i.” Maju di ‘bati cidru saa ekelezia oku na dri si esuki okpo enga’di Rubanga dri rii ra vua Rubanga oko uze ‘ai kare cidru ga vu ndutu dri. Ta ride’di okpo ‘ba dri si ku rii Bugu Ebu majua idele ri dri ‘ia ekpadru, ta ani di ‘a lau ni o’du Endri Ole ri ‘a esijo ‘ai ‘ba dri saa majua ‘aia dri ni tijo ‘aia dri ga ri si na ‘i. Bugu Ole ri ojo, “Maju oce ‘ai koti ‘aia dri ni ‘ai ‘ba esu ati ati ‘aiki Yesu ni ra ki esuki Endri Ole rii kuru ri ‘bati ‘a dri ga di mgbe saa nasi esuki Endri Ole rii ra.” Ki jodiniri esuki Endri Ole rii ovi dri tijo dri ‘a disi ingoni? Esu saa nasi sa lejo Rubanga dri ri osiru ra ki ebu laka ri ideru kuru, disidru Rubanga ohwe maju ni mori tema rii ‘au ta ana lele di ide’jo ‘i. Ani tesa olure maju di ‘bati tro kare alu ga vua ide nyuma ta ‘aujo ri tro ekpadru ana’ai ebuka ‘ausi ‘i. Ani dii saa tema ri ‘i, saa disi Rubanga ide nyuma ta ‘aujo ri tro ‘bani ndrele ‘aia mi si ote ni ekpadru vua bajoadru ‘ba ni ‘aijoadru Yesu ni Ngwaapi Rubanga dri rii ama Aridipi ‘i ‘i. Ta Rubanga ni ledi idejo rii ‘aa, emuru maju tro kare alu ga, okpo retu ri tro ebu Endri Ole ri dri ite’dejo ‘ausini kite’dea Yesu Kristo ni ana ngasi Rubanga vuasa tro ani Ngwaapi Rubanga dri ‘i, vua Aridipi ‘i. Kesu oli Endri Ole ri kide ebu nyuma si vua ta ‘aujo ri si ku saa ekelezia oku na dri si, ma’dizi alusa igeni di ‘a Yesu ni Aridipi ‘i na kolu iyo.Amala, amani Endri Ole ri esuka nyuma kusa ta ‘aujo ama ndrele ama mi si ote ri si ni o’du disi ta okpo rere ri ‘i, Adusi draa lejo Bugu Ole ri dri eko ra. Ra rii, draa laku Endri Ole ri dri ri kolu ‘ai si. Ovi zi si, kolu ama ofu loso anda dri ri ‘aika si. Rubanga ka tete laku Endri Ole ri dri ri hwe ‘ba aidru ofu loso anda dri ri ‘aika Rubanga ‘a andraga ‘ai si ri ‘bati ni. Laku Endri Ole ri dri rii kolu tete ‘aa wa rii ‘ba ‘aidru lejo Rubanga dri ri ‘aika ‘aia asiti ga ra ri ‘bati dri, kendre ondi ana rideka Yesu ‘a emuka vudri di ‘a si ana batisimu si vua ana ari si ri ani.
O’du disi, lei’ba inika ‘ai ‘ba ni ovi nyuma ride’di ndrele mi si tau ote rii laku Endri Ole ri dri ‘i rii amgbu. Ta ledi oba kaki ‘ba ‘aikaa ri ‘bati isa ‘a dri ni se ‘aini Endri Ole ri esu’jo ovi alua ledi si. Kaki ‘ba unza ‘aia ‘aini lini mbi ri hweka ‘ausi, ovidru inikaa ‘aini ta joka ti mgbimgbi si ni ta ite’de di ‘a esuki laku Endri Ole ri dri rii ra ri ‘i. Lei’ba di ‘bati kaki ‘ai itiri ‘aia ngasi kendre maju nyuma ta ‘aujo ri tro ideka ekpadru ri ‘i ani, di oba kaki laki eku ‘aia ru ga okposi ndrole ‘ba ziti lekaa ‘ai koni Rubanga ni ovi ‘aia ‘ai itiri jo ri si ri ‘bati ‘i. 
Lini ovi di aca Kristo ‘ba lofo vu ndutu dri, oba ‘ba amgbu ka ta ‘aia inile ri ‘a vu ni oko ni ledisi oba esuki endri unzi rii ‘aia ru ga ovi nile ku ri si ekpadru. Draa dini sa, ‘ba amgbu ziti lejo dini dri ‘a dri dule ni ri isa kaki raa ‘ai kobaa ‘baziti ri ni laku Endri Ole ri dri esu’jo wa jo ‘ai koti ‘aia dri ni ‘ba di ‘a dri ga ni ‘i.
Amala, ‘aia rondika ci kendre Simone dri na ani si, ovi ‘aidri rii kendre ondi ojogo kendre ta esire driaru oru esi ledi dri ani. Androki ‘aia itirikaa-aia ate ‘aia ngasi aini tri si ra adusi lidri ‘aidrii momo dri ‘i, amala ta cidru ‘aia idele rii tesa ka driluci eji laki lofo ‘au. Lini ani ovi inile mbi di ani di enzuru leti ovi ce lejo Rubanga dri ‘ia jole ma’di ni laku Endri Ole ri dri esu’jo Rubanga ‘a andra ga ri iga si pi.
Tee endru sa, profetaa enzo ebu Sitani dri ri ideka ‘aia ta ‘aia dini ‘a lele ri dri ideka si rii amgbu, kaki ‘ai ba kendre ‘ai ka ebu Endri Ole ri dri ide ‘au ani. Kristo ‘ba loku rii kole dubasi kenzuki lejo Rubanga dri ri iru, koni ki te ani ‘au adusi ani ledii tete leti amani Endri Ole ri esu’jo wa ri ‘i. ‘Ba zi-ungwele Pentekositali di ‘bati, obaki geni ‘aidri rii nza nza ani ovi Endri Ole ri esu’jo mgbe ‘ba sa kondrea ote ri ‘a dri ga, kole duba kebeki ‘aia geni mbi di ni, kengwiki lejo Rubanga dri ri iga, vua kigeniki lejo anda rii ‘au, adusi di ani di ka ‘aini laku Endri Ole ri dri ri hwa ra.
Simone ni ojogo nile nainga Samaria ‘a ca ri ‘i. Ki oce ani kondre ‘ba Yesu ‘a vu okoka ri ‘bati obaki ‘ba ka Endri Ole ri esu ‘di, oza mgbe ere ole ani koje Endri Ole rii silingi si. Ki gbadru ‘ba ‘ai ovi ani ledi ani ledi tro ri gbadru kaki engwi opido Sitani dri ‘i, koko ka ‘ai ebu anidri ri ide’jo. Simone ole ani kesu Endri Ole ri ni ki ta ana asiti ga rii tete momo tazi iyo. Adiki ndrea ‘ai ani ovi di ani dii gbadru ‘ai-anda ruledi ma’di ni Endri Ole ri esu’jo rii ku. 
Simone obi Endri Ole ri jele silingi si ra ni amala ana ngaka lidri anidri unzi ri iga mori unzi ri tro para si. Tiluza Rubanga dri ubi ija ani ni, ledii ra Petro ‘a ani ija jo ri ‘i. Ki tee ojo Simone ‘ai Yesu ni ra sa, alusa ani ma’di Endri Ole ri esu’di lebe ana enzi dri ri si ra rii ku. Ovi zi si, ora ani ka laku Endri Ole ri dri ri esu wa rii ana ta vudri di ‘a ri hweka Rubanga ni si. 
Ki amala tee ana ovi angwe esi ri kite’de ani ma’di ‘ai dipi ri ‘i Yesu ‘a andraga ‘i sa, ovi driaru ‘a ga esi rii hwa aludisa oviru lejo Yesu ‘a jole ri tro kuru. Ra rii, ‘a ani oga momo si. Petro ni, ana urata Simone dri ri nika ote si, ija ani okposi ana lekaa ani koje Endri Ole Rubanga ‘a hwele dride dru ilili dii silingi si si ‘i.
O’du disi sa, profetaa enzo endri unzi ria icale ra ri ‘bati kaki ‘ba undru unzale kaki ba ‘ba di koraa nyuma amgbu ta ‘aujo ri tro rideka o’du disi dii ebu Endri Ole ri ‘a idele ni ri ‘i. Ama ndrea vu amgbu si ‘ba ka mori ovi ani di ani di undru ‘au vua sa tro kaki ilegi asiti cidru si ‘ausini ‘ai kesu dru Endri Ole ri ni si. Amala, kole oniki ama uje ni ‘a ci rii hwa alusa ma’di ka laku Endri Ole ri dri ri esu ilegi ana ilegile ana vico momo vudri di idri di si kpe.
Andra unzi dru ‘ba zi asiti ecoka eco dii nya laga ga ire ‘aa ‘a? ‘Ba ‘ai di ani dii kole nyindre cuwi. Adusi ku kaki ‘baziti ri isa ire ‘aia lini mbi mbi ri si ‘i. Kaki joa ‘ai ka ori unzi rii udro wa vuasa tro ‘ai kobaa ‘ba ziti rini Endri Ole ri esule wa jo ‘ai koti dri ‘aii dri ni ‘i.Amala, mori ‘aia esule rii enga Endri Ole ri dri ku, ki enga endri unzi ri dri. ‘Ba aidru jokaa ‘aia ngasi ‘ai esu Endri Ole rii ovi dri ti jo ‘aia dri ga ri si ri ‘bati ka ‘aia dri se ‘aia ngasi vua kaki ‘ba ziti ri isaa dri se ‘aini endri unzi ri esujo tro.
Laku anda Endri Ole ri dri rii kemu wa rii tete ‘ba anda lejo eyidri ri ‘aika ra ri ‘bati ‘a dri ga ‘ba lejo Endri dri ri ‘aika ri tro (ofu atijoadru Yoana ‘a sile rii 5:3-7). Ki tee ofu loso eyidri Endri tro rii kosiru Bugu Ole ri ‘ia pelere sa, enzi ‘a oluka laki amgbu ri ‘bati ‘a asiti ga ‘aa si, kaki lea ‘ai koca Rubanga ‘a andra ga mori ovi ziti mgbimgbi ri si ta ziti ‘aia nile ote ri tro ovidru mori si, kusa ta joka ti mgbimgbi si si, ruduka oru si vua ori unzi ri droka si. Ledii ra ana olujo profetaa enzo ri ni adu rere ‘aini laki amgbu dri se’jo ‘aini ‘ai ‘aijo mori engadi ori unzi dri ehwi’di Kristo ‘ba lofo ri ‘aika si ‘i.
Petro ija Simone ni ojo; ‘‘Nya ra kaa adi hwe Rubanga dri di je silingi si wa si, disile anyivu nya silingi ti tro aci ‘a! Nyidri ewo alusa ama ebu ni ga iyo, a’dusi nya asi ni Rubanga andra pelere ku. Nyiru nya enzi ra ego di dri ni, nyilegi Opi ni ka ra nyidri unzi dini di ebera. A’dusi andre nyi avi retu ri tro vua enzi nyidri umbe nyi ci. Nyi ‘barangwa ori unzi ri dri ‘i.” ‘Ba ‘a kemi rumuka tro gaadru sa jokaa amba Kristo ‘ba dri ‘i lofo sa o’du disi ‘ba di ani dii ‘aa si ku. ‘Ai lofo ‘ba amgbu ani ecoki asi eco. Kaki tesa silingi le bilo ‘aidri ri ‘bati dri ‘au. Kole ama lofo kolu ‘ai ani ovi di ani di tro lolu ra rii esuki laku Endri Ole ri dri rii ama ofu loso eyidri ri ‘aika ofu loso Endri dri ri tro ‘au si ‘au (Mateo 3:15, ofu atijoadru Petro ‘a sile rii 3:21, Yoana 1:29, Yoana 19:21-23).
 

‘Ba asi ecoka eco ri ‘bati kaki ebu dri uti’jo ‘ba dri ri ide ‘au!

Kolea ebeki ‘ai ovi ani ledi ani ledii ra. ‘Ba amgbu ziti o’du disi di ‘bati lini ‘aia geni dri rii mbi kaki uraa ‘ai ka Endri Ole rii esu wa ni kesu ‘a ma’di mori esu’di ra rii ka ana dri ni ti ‘aia dri ga kpa. Kaki uraa amala Bugu Ole ri ‘a jokaa ‘ba amgbu rii maju ‘a dri tika ‘aia dri ga si esuki Endri Ole rii ra si, ‘aisa ‘ai kidea ledi ani wa. ‘Ba ziti ‘ai baka ‘aia ngasi ri ‘bati isa ondi ‘aia ‘ai ni mbi ledi ani kaki ‘ai ba ‘aia ngasi kaki ko kaki joa ‘ai ka Endri Ole ri hwe ‘baziti ni wa ‘jo ‘ai oti aia dri ni ‘ba di ‘a dri ga ni ‘i. Kolea anyiba oniki ‘ba ovi di ani dii ‘aa ni ote. 
Amala, kolea anyetro oniki cuwidru rii ‘aia ‘ai ni mgimgbi ani maju dri andrani ekelezia oku na ‘ia na tro nza. O’du ani disi ta unzi rere Kristo ‘ba amgbu dri rii hwa alusa oniki ta anda ofu loso eyidri di idri rii ofu loso Endri dri ri tro ku vua ‘aia ‘ai isa laka iyo. Ki ‘aia ti si le kaki joa ‘ai igeni Rubanga ra, ki hwa ohweki anini laru ku ra rii kaki ‘ai unza ‘aia ngasi vua kaki ‘ba ziti isa unza tro. Amala, ma’di enzidipi rii hwa alusa ka laku Endri Ole ri dri esu kpe vua kobaa ‘ba ziti rini sa esulea kpea. Ki jo ma’di kojo Endri Ole rii kesi enzi ‘ba dri sa wa ri, Endri ani dii gbadru kolu Endri Ole rii ku; ki nosi kolu endri Sitani dri ri ‘i ka ani ba ana ngasi olule kendre endri anda ri ani ru ni. 
Maju andrani ekelezia bero na ‘ia na ‘bati ai ‘ba Yesu ni nika ote vua Yesu ni igeni ka aini Aridipi dru ra ri ‘bati ‘i, igeniki Yesu odu enzi cidru ‘ba cidru dri vudri di ‘a dii batisimu ana esule Yoana dri ri si vua ana dra kuruce dri ri si. 
Kaki laku Endri Ole ri dri ri esu wa ‘adusi igeni ki anda Yesu a batisimu dri rii ana ari kuruce dri ri tro ra. Vua onzeki ofu loso eyidri vua Endri dri dii ‘ba ziti ri ni ra, dii ‘ai ikonyi jo ‘aini laku Endri Ole ri dri esu’jo. 
Ki o’du disi le, Kristo ‘ba amgbu ‘a geni ni gba rere mbi. Ki kuri gba o’du disi sa ani gba ta ce ri ‘i a ma’di enzidipi ri ni laku Endri Ole ri dri esujo ma’di zi enzidipi ri ‘a dri ti ka ana dri ga si ‘i? ‘Ai dii cidru ta ra ako dri ‘i. ‘Ba ziti jokaa tee ‘aia asiti ga enzi kolu driso ‘aa sa, ‘ai esu laku Endri Ole ri dri rii ra rii ‘aa. Ki jo ma’di kendre laki kusa bilo anidri ri andra kendre leidipi loso ri ani sa, hwa alusa kobaa ma’di zi ni Endri Ole ri esule ni kpe jo dri enzi olu ana asiti ga ‘aa ‘i. 
Amala ku ‘a si, ‘ba ‘ai ovi ani mbi di ani di tro rii amgbu. Ledii ra profetaa enzo ri ‘a ‘ba amgbu ni dri sejo aci olure tadru ri ‘ia ri ‘i. Kolea nyini ta anda rii cuwidru amala ‘ba cidru lini mbi ledi ani ledi inika ‘au rii ‘ai profetaa enzo ri ‘i. Ai dii ‘ba eze sa ori unzi ri ‘a ipale pi ri ‘i.
Ki jo ma’di ‘a asiti ga enzi ‘aa, gba Endri Ole ri kolu ana asiti ga wa ‘a? Ai ani kolu kpe ‘i. Ki jodiniri gba ma’di zi enzi ‘a olure driso asiti ‘a ru ‘aa rii kobaa ‘ba ziti ri ni laku Endri Ole ri dri esu’jo wa ‘a? Ziniga di, ‘ai ani kpe ‘i. Ki jodiniri aduta oba ‘ba amgbu o’du disi asi ecoka eco di ‘bati ni nyuma ide’jo ta aujo ri tro Kristo ‘ba lofo di ani ni, Jo dri enzi kolu ‘aia asiti ga ‘aa di ani ‘i? Endri unzi ri ka ta di ide ni. Endri anda rii hwa alusa olu enzi ‘ba asiti ku. Ki kolu tete ‘ba ‘ai tro ofu loso eyidri ri idri ofu loso Endri tro ri ‘bati ‘a asiti ga. Jodiniri ini gba cuwidru endri olu’di nyiru rii Endri Ole ri ‘i ‘a?
Yoana 3:5 ga, Yesu ojo, “Jo ma’di oti di eyisi vua Endri si ku ri ka Opi Rubanga dri ndre kpe.” Ledi oba, tete ovi Endri Ole ri esu’jo rii ka ride wa rii ofu loso ce ofu loso eyidri vua Endri dri ri ‘aika ‘au si. Ta gbadru mbi o’du disi Kristo ‘ba amgbu ni driluci eji’di rii kaki igeni ‘a ma’di ka laku Endri Ole ri dri ri esu wa rii ma’di amba Kristo ‘ba dri ndre’di ki enzidipi ri ‘a dri tika ana dri ga si. Ani dii gbadru luna nzagodru ri ‘i. O’du disi, Kristo ‘ba amgbu amba Kristo ‘ba dri ndreka rii amgbu tro ta ‘aia igenile rii mbi rere kaki uraa laku Endri Ole ri dri ri ka resu wa rii tete ovi dri ti’jo dri ‘a ri si.
 

Olu loso enzi ebele leti anda si ri ‘bati dri ovi dri ti jo ‘ba dri ri tro ri ‘i

“Dritika dri ‘a dii” ovi ma’di ‘a enzi ana ru ga ri bajo tazi dri ri ‘i. Nyira driso ta driaru ovi disi: Jo ajo ta maikorofoni si ni, ta ama jole rii kolu mgbe aci iba usule ri ‘ia si komu ambilifaya ‘a koko koyi sipika ere ri ‘ia ‘ausini ‘ba cidru keri ‘a ni. Alua ri ani, Ofu Oku ‘a sa, jo ma’di enzidipi ri oti ana dri ni azi enzi ebe’jo ri ‘a dri ga ni, enzi driaru rii kpodru ka ruba azi enzi ebe’jo ri idri koko ka lebe ana enzi dri ri esu ra. Ovi alua ri si, mori Rubanga dri ri isa ka rifu ‘ba ni dri ga ‘jo tiluza Rubanga dri ri ‘bati koti ‘aia dri ni ‘ai dri ga ni ‘i. Ovi disi, ovi dri tijo dri ‘a di ‘a ewhi ni “ta ifuka tazi ru, kusa ta ecoka.”
‘Ki ‘ba asi ecoka eco ri ‘bati le kaki baa ma’di ni laku Endri Ole ri dri esule ovi ‘aia dri utijo ‘ba dri ri si kpe, Ra rii kaki baa ‘ba di ka laku endri unzi ri dri esu ‘au. Kolea nyini cuwidru ma’di mori ori unzi ri dri rii ruaru ‘aa rii anisa edu mori dii ma’di zi dri ovi dri tijo ana dri ga ri si. Jo ma’di ori unzi-ria icale ra ri oti ana dri ni ma’di zi dri ni, ori ‘unzi ana ru ga rii mgbesa kala ako koto ma’di zikajo na iru sa ra, adusi Sitani ka ebu ide enzi ‘ba ru si. Ra disi dru, kole ‘ba alu alu kigeniki ofu loso eyidri rii ofu loso Endri dri ri tro ‘au jo oleki gba asi cidru si laku Endri Ole ri dri esuka ra ‘i. 
Sitani ni ana ngasi tesa ka lase hwe ‘ba cidru oluka driso enzi ‘a ri ‘bati ni, jo tee kigeniki Yesu ni ra sa, jo esuki lebe ‘aia enzi dri rii kuru ‘i. 
Ki jo ma’di esu ovi dri tijo dri ‘a rii ma’di ori -unzi ri ‘a icale ra ri dri ni, ori unzi di koko koto anisa ana ru ga koko kidoa mgbe nyuma mbi mbi idele. Kole anyetro oniki cuwidru ori unzi ri esuki ‘aia rukusa olujo ‘ba ziti ri iru rii ovi dri tijo ‘aia dri ga ri si, disidru laku Endri Ole ri dri esuka engwi adu rere rii geni baka ofu loso eyidri ri idri ofu loso Endri dri ri tro si. 
Ovi dri tijo dri ‘a dii ovi Rubanga ‘a ba le ni oku ta bajo tazi dri ri ‘i. Ki Sitani oba ‘ba amgbu ka endri unzi ri esu ovi dri tijo ‘aia dri ga ri si ni. Ra gba ovisi o’du disi ‘ba amgbu ‘a lejoadru ‘ai koje Endri Ole rii silingi si ni di engwi sa lejo nza rere ri ‘i.
 

Kristo ‘ba amgbu eriki lejo ehwi anda ovi 
Endri Ole ri ‘a laku dri rii mbi

Jo ozi ‘ba ovi Endri Ole ri esu’jo ri si ni, ‘ba amgbu ka ‘i a kaki joa kolu adu rere rii ilegi enzi rujo ri si vua ilegi abiri ta jo ri si. Ki dii ce ku. Kuri gba Endri Ole ri kesi nya dri ga ni kesu ‘a nyi ilegi tema ri ilegi Rubanga ‘a andra ga kpa ya? Hwa ledini ku. Laku Endri Ole ri dri rii kemu tete ra rii ‘ba ‘aidru ofu loso eyidri ri ‘aika ofu loso Endri dri tro ra ri ‘bati ‘a dri ga. 
Amala Rubanga ‘a oluka anda si, ohwe cara ma’di ni Endri Ole ri esu’jo rii ci. Endri Ole ri kolu ma’di asiti ‘a ru enzi ‘aa ri ‘a asiti ga wa ya? ‘Ai ani gbadru kolu kpe ‘i. Adusi ma’di ka hwa aludisa laku Endri Ole ri dri ri esu dri tika ana dri ga si kpe. Jo tee ma’di koya ilegi layu eji’di ri iga kusa koya ilegi ziti laki amgbu tro ri iga ‘ausini ani kesudru Endri Ole ri dri ri ni si sa, Endri Ole rii hwa emu ma’di di ‘a lidri ga ku. Adusi enzi ‘ba ka hwa alusa laku Endri Ole ri dri esu kpe. 
Enzi ‘ba ka gba loku loku laku Endri Ole ri dri ri esu kendre dride ani, jo esuki lebe ‘aia enzi dri rii ‘aia ofu loso eyidri vu Endri dri ri igeni ka si ra ‘i. 
Amala ma’di ofu loso eyidri ri ni di ofu loso Endri dri ri tro kuru rii ka laku Endri Ole ri dri ri esu kpe. Draa o’du disi ofu loso eyidri vua Endri dri dii kaca vu ndutu dri emi emi karatasi manyi manyi rusidi Kristo ‘ba ni ri si, Intaneti si, vua ovi ziti amgbu ebule bugu usijo aci si vudri di ‘a ndutu ri tro. Disidru, ma’di ofu loso anda ri ndru’di ri ka ‘i ‘a ra vuaru koko ka laku Endri Ole ri dri esu ra. Ki jo driso nyesu laku Endri Ole ri dri rii kuru, kole nyera idejoadru nya ‘i nyini ofu loso eyidri rii ofu loso Endri dri rii tro au.
 

Ovi a’i mbi ri dri ‘i!

Ki jo o’du disi ondreki ovi ‘ba endri unzi ri ‘a tore ‘ai ru ri ‘bati ‘a ta idele rii ni mgbe gbadru adiki ndre ‘a ori unzi rii ‘aa ni ra. “Lemu trale layu esujo vua Endri Ole ri esujo ri ‘i” dii gba lemu trale ‘ba lekaa laku Endri Ole ri dri esuka ri ‘bati ‘a lele asiti cidru si ri ‘i. Lemu di iga ama ndrea ‘ba ka ‘aia dri ni di vua kaki ilegi enzi rujo ri jo vua kaki ji owosi abiri taka tro. Ma’di ofu nze’di ri koko kojoa ‘aini kolea kilegi ki okposi jodini ku ri Endri Ole ri esi ‘aia dri ga ku paka kaki fu di ide kpa. Mgbe ‘ba koria owoka, “Opi!” mgbe kaki ‘aia ilegi didiro na ri. 
Ki gba ‘ba ‘ai di ani ilegi doro di tro di ‘bati gba kaki laku Endri Ole ri dri ri esu ovi ledi si ra ‘a? Hwa esuki ku. Nyindre ‘a ‘ba kidoa uzaka kaki ko kaki zo ogu ogu ni, mgbe kaki idoa uduku ingwika, uduku ‘aidri rii lemu na koba ka reco mgbi. Zi ‘bati rii kozo vuru vua kaki ido ‘a ulile inyaku ‘a si kare alu ga vua kare ziti iga si, mgbe ga dini amandre ‘a kaki idoa uzale vua kaki ido ‘a ta jole ti mgbimgbi ri si. ‘Aii lofo ziti rii kuza paka lemu kofu eko koba ta ana idele ri si laki rutraka ri ‘bati kanzo anisi retu. Ziti ri kidoa aci ka, kaki vu acolo kpo kaki uza kaki ta jo ti mgbimgbi ri si. Ta di oba ‘ba kojoa ovi dii ta itede’dia nainga Endri Ole ri esi ‘aia dri ga ra ri ‘i. Ki kole anyera jo ori unzi ri ka ana ebu ni ide ri aduta karide ni ya? Ni ci kuri gba dii ebu Endri Ole ri dri ‘i ‘a? Dii hwa ‘au ku.
 

Sitani ka Kristo ‘ba amgbu unza ‘au

Odu disi, Kristo ‘ba amgbu kaki olu ondiku lidri Sitani ‘a lele ri si. Sitani ka ‘ba unza jokaa ‘aini kolea kesuki dri tika dria dii ‘ba okpo tro lejo Rubanga dri ri nzeka ri ‘bati dri ‘aini laku Endri Ole ri dri esu ‘jo ra. Kristo ‘ba amgbu oba ta dii kaki igeni ‘a kendre gba lini anda atijoadru ri ‘i ani. Sitani noko asa zianiga sa geni mbi rii uje ‘ba dri rii ‘ia ojo jo oleki laku Endri Ole ri dri ri esuka ri kaki idea wa rii ‘aia ilegi ka palanda si. Sitani obi ovi ‘ba ‘ai di ani di tro ri dri ri esule koca kati kati eri ti dri na tro ri iga ra. 
Ki sa ‘ba amgbu oni ku, vua obaki sa bi ta nijo ofu loso eyidri Endri tro ri idri ku. Anyiba ebeki urata Sitani ‘a bale ama uje ga dii ra anyiba omaki ama ngasi ofu loso eyidri rii igeni ka ofu loso Endri dri ri tro ‘au. Adusi laku Endri Ole ri dri rii tete kemu ‘ba ‘aidru ofu loso eyidri ri ‘aika ofu loso Endri dri ri tro ra ri ‘bati ‘a dri ga. Kole nyisa nya ‘i dii ‘au.
 

Kristo ‘baa ta ehwi erile mbi ovi Endri Ole ri ‘a laku hwe’jo ri dri ri ‘i

Atijoadru rii, ta ehwi erile mbi rii geni mbi ri tro Kristo ‘ba asi ecoka udiangwa dru di ‘bati ‘a asiti ga nza. Kaki bia laku Endri Ole ri dri ri esule ‘aia enzi ti tro asiti ‘a. 
Luna nza ri tro kaki uraa tee dri enzi kolu ‘aia asiti ga ‘aa sa, ‘ai kobia laku Endri Ole ri dri ri esule wa. Adusiki, ma’di alu alu ‘ai ako ofu loso eyidri vua Endri dri ledi idri rii ka hwa Endri Ole ri esu kate tri ni kpe vua gaadru sa kesu ‘a kpe.
Erijoadru rii, ojoru lecuma ‘bani ru ga ri ohwe aini goga Endri Ole ri esu’jo ku ni ni. Jodiniri di ‘a ehwini jo ma’di ka ebu ide kusa ka ana lidri ni ase lecuma ru ku ri ka laku Endri Ole ri dri ri esu wa ‘a? Ma’di zi vudri di ‘a ahwa lecuma driaru rii ga ni ‘aa ya? Ma’di lecuma daku hwa Rubanga ‘a ebere ‘a laka ku rii ma’di urata anidri ri ‘a ta mba’di lejo Rubanga dri ri tro kare alu ga ri ‘i. ‘Ba amgbu ziti kobia laku Endri Ole ri dri ri esule ‘aia gbeti tema ri si, kaki ofu loso eyidri di ga ofu loso Endri dri ri tro mgbe. Ki sa, laku Endri Ole ri dri rii kemu wa rii tet ‘ba ‘aidru ofu loso eyidri ri ‘aika ofu loso Endri dri ri tro ri ‘bati ‘a dri ga.
Inajoadru rii, ojoru laku Endri Ole ri dri rii kesi ma’di dri ni kesu ‘a mgbe dri nza ako ka ana enzi ni ana ego ti tro ‘ai ‘a Rubanga ‘a andra ga kpa. Disidru ojo ‘aini ‘jo oleki laku Endri Ole ri dri esuka kolea mgbe koruki ‘aia enzi ni. Ki kole nyera ci rii hwa alusa Endri Ole ri esi ma’di dri rii ana ana enzi ni ruka si ku. Kristo ‘ba odu disi amgbu ole ki laku Endri Ole ri dri esuka ni asiti cidru si ni ki sa hwa kaki esu ‘a kpe adusi dri enzi olu ‘aia asiti ga ‘aa. Ma’di ovi ani ledi ani ledii ori unzi ri ni ani ko ka ni adu rere.
Isujoa dru rii , ‘ba ziti kojoa Endri Ole rii kohwi olure ma’di asiti ga wa ni kesua ma’di ka Rubanga ni uri kohwe anini tutu dru morisi. Ki adi Endri di esu aludi sa Rubanga urika amani si ni kpe. Ta urale dia ni dii ra ego rii. Tou joa rii,’ba ziti ka Endri Ole ria olu ka ‘ma’di a ni obia endri unzi ria ‘ma’di koka ndi ana lidri ani aseka ni ri tro. Ta joka ti mbgimbgi si ni ta ‘ba amgbu ‘a dule aijoa dru ma’di dri laku Endri Ole ri dri ‘a’a ri ‘i. Ki Endri Ole rii olu ma’di asiti ni ana ori unzi rii droka ru Yesu drisi wasi ku vua ana ta joka ti mgbimgbi si sa wa si ku. Enzi ‘a dipi ni Sitani ‘i. Ma’di enzi dipi oludi enzi tro asiti’a rii kojoa ani esu laku Endri Ole ri dri ra ya ovidru jo driaru okpo zi mgbi rii a’a kovu Endri Ole ridri ra ‘i? Mangwa’a zianiga di, dii ciri endri unzi ri dri ‘i. Ofu loso eyidri Endri tro Yesu ‘a ehwele amani dii ani ofu loso pelere ndro badia ama alu alu ka laku Endri Ole ri dri esu ‘ausi wa ri ‘i. Ki jo draasa nyidri nyitiri nyi laku Endri Ole ri dri ri esu ovi nya enzi ‘a rebejo ri dri si kusa nosi ovi ziti si, karuni ra mbi ri ondi ta nya ti ni koli koli. Ma urale rii kole da si nya yu nyi nya ngasi nya urata mbi di ‘a dri ga ‘ausini nyemu nyesudru urata endri dri rii ‘ausi vua ‘ausini nyi ‘ai mbadi okpo ri esu ‘au.
Ani ta ujole ledema ebu si rii ku ovidru jokaa Kristo ‘ba amgbu odu disi rii ori unzi ri ica ‘ai ra ni ‘i. Kristo ‘ba amgbu vu nndutudri odu disi ri ‘bati kaki asu ‘a ai lase mori tro ori unzi ri dri ‘a iti nig a adusi ku oleki ‘ai kesu laku Endri Ole ri dri ri ni lemu layu esujo laki amgbu ‘a vure laka ni ri si vua dri tika ‘aia dri ga si. Kaki mgbe dri ba ‘ba zi tema ri dri saa ilegi dri ri si dii ‘ba ‘aia ndrel kilegi jo lemu dri ri ‘ia okposi ri ‘bati ‘i di oko ndrole, leidipi ‘a gaga ni amba rii, ma’di konyi hwe’di ‘ba edeka lari vu ra ri ‘bati ni ri ‘i, kusa nosi leidipi adusi adijoa ‘ba ai ledi ‘bati esuki laku Endri Ole ri dri rii ra. Kaki vu ‘ba ‘bati dri ni ‘aia urakaa nosi ‘ai ka ‘aini Endri Ole ri esu ovi dri tijo ‘aia dri ga ri si ra si. Ki, sa hwa ma’di laku Endri Ole ri dri esu’di ‘ai ovi ledi ani ledi si wa ani iyo, ide ta ku tee ‘aia razika asi cidru si Yesu ni igenire ga ni kolu ingoni sa ‘i. Ovi zi si, ma’di zi alu’di sa laku Endri Ole ri dri hwele ‘Iiki tete Rubanga ni adite. Ondi kendre Simone ani, ‘ba amgbu odu disi rii kaki bi ‘a Endri Ole ri jele silingi si. Kaki bi ‘a Endri Ole ri esule ‘aia ta vudri ri igenika ‘au si, kovu dri ofu loso rii ra. 
Kristo ‘ba amgbu vu ndutu dri ri ‘bati ‘a dri ociru urata-disi ra. Endri Ole ri kemu tete ‘ba aidru dri lahwa anini emujo ‘aia dri ga wa ri esuka ra ri ‘bati ‘a dri ga. Ki leti tete alu ma’di ni laku Endri Ole ri dri ri esu’jo ‘ausi wa rii kolea dubasi ka ‘i ofu loso eyidri vua Endri dri rii ‘au vua ‘ai ta anda ri dri isa ka resu wa rii disi (Ebu majua idele rii 2:38).
Endri Ole ri esuka ovi dri tijo dri ‘a ri si ni saa andrani ekelezia bero na dri ri si ta ‘bobo dru saa angwa jidi gaadru ri ‘i saa ekelezia eze na dri ri si ri ‘i. Ki saa alu ‘a ri si laku Endri Ole ri dri ri emu esi ‘aia dri ga ra oce ki ‘ai ka ‘i ofu loso eyidri rii ofu loso Endri dri ri tro di iri ‘i. Disidru, kovu driso Endri Ole ri ‘a ebu ideka aia lidri ni ‘a ‘aia ‘ai lejo Rubanga dri ri idri ri si ni ra dru, ebu joisi amgbu ‘aia idele rii ebu ori unzi ri dri ‘i. Rubanga ojo amani ori unzi rii ‘ai tiluza Sitani dri ri ‘i, vua draa oji ahwa saa para ni ra Sitani ide ebu ovi ani ledi ani kebedru laki amgbu kesudru lebe ‘aia enzi dri rii ku si vua sa kai ki dru Yesu ni ku si. Sitani ka enzo nze ana laki unza ka si kojoa ‘aini ani ka ‘aini laku Endri Ole ri dri ri hwe ra jo aiki Yesu ni ovi dri tijo ‘aia dri ga ri si ra ‘i. Ta di oba Sitani ica leci ana lunza dri dii vu ndutu dri ana oguma ovi ledi ani ledi ebuka ‘au si.
Ledi oba ama ovi ‘ba ori unzi ri ‘a icale ra ri ‘bati dri rii kendre ingoni ya isa ndre wa. Atijoadru rii, jo ondreki ovi ori unzi ri ‘a ‘ba icajo rii ovi andra loso ete’jo ri si ni kusa ilonyi hweka si ni, adiki ndre rumwika laka nza, laka ru dika vua drilewi tro nza. Ti ‘aidri rii ka rupi ego ti ki ‘a koji abi si kaki ko kaki ta ‘aia lele ri jo. Kaki ta jo ti erile kpe ri si. 
Ki ‘ba ojo ri le ‘ai Kristo ‘ba ori unzi ri ‘a icale ovi dri ti jo ‘aia dri ga ri si ri ‘bati tro emukiru kpodru si alu ta ani di ani di iga ‘i. Ki jo ma’di ana asiti ni eco’di vua ofu nzedi ri koko ani maikorofoni ni dri ‘a vua koza kojo, “Aci si, aci si, aci si,” Laki rutraka ri ‘bati ‘a asiti kengwi egbwe koba kaki bi ‘a ‘ai igogale ‘aia ngasi kpe. Mgbe koba ‘ba lekaa ‘ai kesu dri tika ‘aia dri ga rii driaru ri ‘bati kevu mbare andra ‘a ru. Ru ‘aidri ri kidoa dile kaki bi sa imbalea kpe vuaru mgbe kaki idoa ta joka ti mgbi mgbi erile ku ri si. Ta ‘ai di ani dii ebu ori unzi ani badi ana ngasi kendre ana ka ebu Endri Ole ri dri ri ide ‘au ri dri ‘i.
Ki ‘ba endri unzi ri ‘a icale ra ri ‘bati, ‘ai ‘ba andra loso eteka vua ‘ba andra adu tro ri ‘bati tro oko ki ‘ba amgbu dini dri rii ci, oba engwiki kendre Kristo ‘ba ori unzi ri ‘a icale ovi dri ti jo ‘aia dri ga si ri ‘bati ani. Amala, laki amgbu eri di ‘a ehwi ni ku, te jo ta ce ride’di di kolu ‘aa sa ‘i. Kristo ‘ba ai ledi ani ledi ‘bati osu ki ‘ai driluci retu ri ‘ia adusiku ‘aia ‘ai itirika ledi ani si ‘aia dri ociru ra oraki risi ‘ai esu laku Endri Ole ri dri rii ra.
 

Sitani ka ebu ide Kristo ‘ba lofo kendre ma’di andra loso ete’de di ri ani 

Sitani koba ‘ba ‘aidru ori-unzi ri ‘a icale ra ri ‘bati kaki ilegi jo profeta ti si. Kaki ta jo profeta ti si kaki joa, “Nyemu nyolu amba loso ri ‘i. weli bilo ubi dri kevu konya nya andra ga ni. Odu vule ri si Rubanga keya ka nyini lini hwe ra ‘ausi koba nyengwi amba loso rere ri ‘i.” Ki ‘ba ziti ri ni le kaki lejo ehwi unzi rii jo ‘au kaki joa, “Nyemu nyengwi tiluza retu Rubanga dri ri ‘i. Nya ovi tiluza dru Rubanga ‘a andra ga rii kemu kolu retu,” kaki ‘ba dri se ovi ledi ani ledi si ‘aia vu kojo vua ‘aini engwijo tiluza ori unzi ri dri ‘i ‘ai lidri ‘a ni ru dru.
‘Ba amgbu andra loso eteka ri ‘bati isa kaki bia andra loso etele lidri ‘ba ziti ri dri andra ga ri idri kaki joa. “Anyindre lejo ehwi eyidri andra ga rii anda.” “anyi silingi esu nza.” “Ma’di limi amgbu tro ri keya kefu ewo itu ‘a efure ri iga vua ka anyi ni konyi hwe okposi.” Dii ondi ovi ta ‘aia ujole ri dri ‘i. Ki ovi atijoadru ruete’de di lidri ma’di ori-unzi ri ‘a icale ra ri dri ‘ia rii tesa kaki ta jo lejo profeta dri idri. 
Vua diivu kaki ta jo ti mgbimgbi ‘aisa ‘aia erile ‘aiangasi kpe ri si. Kaki esua ‘aia dri ka ruci okposi vua ‘aia lidri isa kolu anda si ku. Ki jo nyesu ma’di andra loso ete’de di rii ma’di andra adu ri tro ni, gba nyijoa ‘aia ovi endrejo rii anda ni wa ya? Tesa ‘aia lidri ni ga kaki ta jo ‘ba ‘ai ndeka amba si ra ri idri angala si.
Amala, ‘ba laku Endri Ole ri dri ri esuka ‘aia lidri ga ra ri ‘bati esuki Endri dii ‘aia lejo ehwi anda Bugu Ole ri dri igeni ka si dii anda jodia Yesu oje enzi cidru vudri rii pelere ana batisimu si vua ana ari kuruce dri ri si ri ‘i. ‘Ba ‘ai di ani di ‘bati ka konyi hwe ‘ba ziti ri ni ‘aisa ‘ai ‘i geni bajo ofu loso eyidri vua Endri dri ri iru, vua di koba kaki lebe ‘aia enzi dri ri isa esu ra vua kaki laku Endri Ole ri dri isa esu ra. Aile aia ngasi kaki bia olule lidri anda ri si, lidri ‘aidri rii gba pelere vua esi sa ca ‘baziti ‘a dri du jo anda Rubanga ‘a tutu co jo ri iga ‘i vua bajoadru ‘ba di ni olujo lidri anda Rubanga ‘a lele ri si ‘i. Disidru draa Rubanga ka rize ‘aia laga ga ‘ausini ani keco dru ‘ai ole si jo gbadru ‘aia uje ole engwika vu di idri ni ra ‘i. 
Ki ‘ba anda lebe ‘aia enzi dri ri esuka ra ri ‘bati le ‘aia ovi endrejo ri ‘a mgbi mgbi ni ‘ba ziti endri unzi ri ‘a ivolo le ra ri tro nza. Ki ovi anda ma’di ‘a ru ga rii ziniga kengwi lidri di jo kemu kesu lebe ana enzi dri rii ra ‘i vua jo niavu kemu kesu laku Endri Ole ri dri rii ra ‘i. Inzajoadru, ‘ba anda ri ‘bati ori retu ri oko ‘ai ‘ba ziti oluka lidri-unzi ri si ri si ci, dii ndrole ta gba anda ‘aia lele lejo Rubanga dri ri iga ri si ‘i, ilegi ka ‘aini layu esu’jo ‘i, vuasa tro razika ama-ngasi ai ikonyi ‘jo ‘i.
Ovi zi si, ama ndrea gba lidri ‘ba ori-unzi ria icale ra ri ‘bati dri rii engwi izaru ra. Sitani ka lase hwe ‘aini ni eco ‘ai oba engwi ki ego urakaa nosi ta amgbu ‘aia idele nosi uzaka ilegi ‘a ti ‘aia ta joka ti mgbimgbi si tro hwe Endri Ole ri dri ‘i si. Ki amala, ta ride’di dii hwa hwe Endri Ole ri dri ‘i ku.
Ondreni dru amba Kristo ‘ba dri ndreka rii amgbu ‘aa ziti ‘aaru ka recu mori anidri ri ‘a oluka ta jojo profeta ti si ru Rubanga dri ri ebuka ‘au si ‘aa si, ana nyuma ideka amgbu ta ‘aujo ri tro wa vua ana ti mgbimgbi ri joka wa si ‘i. Ki jo dri enzi kolu ‘aia asiti ga ‘aa ri, ka rundre mgbe pelere ta ‘aia idele rii enga okpo ori unzi ri ‘a ‘ai -icajo ri iga. Disidru, kaki laku Endri Ole ri dri ri hwe ‘ba ziti ri ni kpe, ra rii kaki te ori unzi ri dri hwe ‘au. Ki, amala Sitani ‘a oluka ma’di enzo rii si, nyuma ‘aia idele rii kolu saa angwa ga ‘a ri si koko kegwe di.
Mgbimgbi ebu Endri Ole ri dri ri ‘i lofo rii ebu ori unzi ri dri tro kendre tau. Tee jo kondreru ebu Endri Ole ri dri rii kohwe ta zi amani nile rii tema kuru kusa ana ido jo ri inga kohwe amani dride kuru sa, saa ‘a muka andraga si, mori Rubanga dri ri kozo ‘asiti ‘ba anda ri ‘bati dri iga andeka ako kendre ondiku itu ‘a efuka inini ri ani.
 

Kristo ‘ba –ori unzi tro ri ‘i

Ki draa odu disi ori unzi
rii kehwi ‘ba ru tee kobiki laku
Endri Ole ri dri ri esuka ra sa
‘i adusi?
Adusi esuki ori unzi rii profetaa
enzo dri tika ‘aia dri ga ri
‘bati dri ra. 

La’u retu ri tro, ama ndrea ‘ai ‘ba amgbu Yesu ni ‘a ri ‘bati ru ‘ai dri rii endri ‘aidri ri tro kovu icandi retu ri ‘ia adusi esuki ori unzi rii ovi profetaa enzo ri ‘a dri tijo ‘aia dri ga ri si ra. ‘Ba ‘ai dini ta zi idele Rubanga tro iyo adusi ‘ai ‘aidri ri olu lejo Bugu Ole ri ‘a jole ri si ku. Otraki asi mori ‘aidri ri ebure ga okposi adusi oniki ebu amgbu ‘aia idele rii ka laki amgbu eco olule tiluza Sitani dri ‘i ni ku. Ki kaki gba ebu ide okposi ‘aia lidri Kristo ‘ba dri ri ‘ia ‘i adusi? Adusiku mori ani-jole ledii hwa oji saa para ku tee kebuki ku sa keya kegwe ra. Ledii ta ebu ‘a olujo aini anzi rere ri ‘i. 
Andeka ako kolea kilegi ki vua kaciki andraga nyuma ideka ta ‘aujo ri tro ‘aia ru Yesu dri ri ebuka ‘ausi. Ai ‘ba jokaa, “Mesu dride ofu loso ri nzejo rii ra,” disidru andeka ako kolea manze ofu loso ri ni ri ‘i amala jo ideki ledi ni ku, ‘aia anzo –mbi ledii hwa ojo saa para ku mgbe kegwe di. Ki kesu ‘ba ‘aidii kesuki ori unzi ri ‘a dride ‘aini ta jojo ti mgbimgbi si rii kuru, lija hwejo rii kuru, ta jojo profeta ti si rii kuru, kusa ovi zi si, kesu kideki ebu Sitani dri rii anda anda ku, Sitani koba mgbe ra ako dru kaki engwi avu. Ondiku kendre ma’di andra loso etedi ri ‘bati ma’di andra adu dri ojo si ri tro ri ‘bati ‘a e ka avu jo oleki ebu Sitani dri ri ideka kendre ana tiluza tii dru ku ri ani. Ledii ra ‘aia lejoadru ai kebu ‘aia dride esule Sitani dri rii anda anda ‘ausini evu oga dru ‘ai ‘aii driluci asi laza retu tro esu’jo ‘aia mori ‘aidri ‘aia ngasi si ri ebuka ‘au si ku. 
Masa vu alu si meya ani ‘ai ‘bago zi alu kendre gba nyiraa ma’di anda Yesu Kristo ni ‘a ri ani vuasa tro kendre nyiraa esu mori okpo tro Rubanga dri rii ra ani. Ka ra hwe ‘baziti ri ni kojoa kolea koga ki Endri Ole ri si ndru ka lemu layu esu’jo ri ‘a ti uba ‘aaru ka ori unzi ri udro ana dri utika ‘ba dri si ‘i, vuasa tro ka ta ‘aujo ri ‘bati ide ndrole ta joka ti mgbimgbi si ti lija ziti ri tro si. 
Engwi ana ngasi ta lele asi ‘a ri ‘i vua ebu la’u dri ana idele ri si esu laru okposi. Weli ‘ai ‘ba dri elifu ri oko ana vu ni ni. Ki mgbe, gaadru dini ido Yesu ni ga ka kojoa, “Yesu Kristo ni ta iyo ri ‘i. Ani Ngwaapi Rubanga dri ‘i ku.” Ido mgbe Yesu Kristo ni alu ka vua ojo ani ana ngasi Rubanga ‘i. Ta tia aserega emu odi Yesu Kristo ni ana asiti ga si kpo vua oba ru Yesu Kristo dri ri isa odra Kristo ‘ba amgbu asiti ga ra.
‘Ba ‘ai di ani di ‘bati kaki ofu loso eyidri ri ga ofu loso Endri dri ri tro mgbe adusi ma’di goga hwe’di ‘aini rii Sitani ‘i. Ai aidri ati luna tro ri emu ehwi ni adusi oraki ri si ‘aisa ‘ai esu okpo alua maju dri ri ani rii ‘au, mori ‘aidri ndrejo, bajoadru ‘ba ni ta jojo ti mgbimgbi ri si vua ‘aini ori unzi ri drojo ovi ‘aia dri tijo ‘ba dri ri si. ‘Aia geni omba okpo rere itiriki ‘ai esu laku Endri Ole ri dri rii ra. 
Kaki ‘ba ziti ri ini ovi ruledi ‘aini Endri Ole ri esu’jo ri si, kaki raa risi Endri Ole ri esuka kolu ma’di adu rere rii ana ilegi enzi rujo ri ilegi ka si. Adusiku, ovi Endri Ole di esu’jo dii oviru lejo Rubanga dri ri tro ku. Kovu dri dii ra dru, kaki ce jo ma’di ka ta jo ti mgbimgbi ri si wa vua ka ta jo profeta ti si sa wa, dii mgbe karuni ka Endri Ole ri ‘a emuka ma’di di idri ni ite’de. Ki amala laki amgbu oni ta laku Endri Ole ri dri ri idri ku si, kaki ‘aia ‘aisa ‘ai kevu ka laku Endri Ole ri dri ri esu ‘aia lini profetaa enzo di dri ri ‘aika si vua idekaa si ra. Ledii ta ana engwijo Sitani adu rere anini dini Kristo ‘ba dri ri igajo endri ori unzi ri dri si wa ri ‘i vua anini lase ejijo ‘ba di ‘a dri ga wa ri ‘i. Ta aidii kpodru si matego Sitani dri ‘i.
‘Ba mgbu rii Sitani ica ‘ai ni ‘aia lini mbi rii erika profetaa enzo ri dri si ‘i. ‘Ai ‘ba gba nya ri ‘bati kolu lini dini dri ‘u di daku ri si, ki ‘ba endri unzi ri ‘a icale-ra ri ‘bati kaki bia olule lini ondi dini dri ‘a vu si. Mori ‘aia ebule rii ingoni ri ‘i ya? Mori ‘aidri li’ja hwejo rii ‘aa, vua ‘aidri okpo ta ‘jojo ti mgbimgbi ri si ‘bajoadru ori unzi ri ni laki icaj’o ovi ‘aia dri ti jo ‘aia dri ga ri si rii sa ‘aa. Kolea anyetro oniki ote ovi ta bajo tazi dri rii ondi ka ride ovi dri tijo driaru ri si oko ondi ovi ani ledi si Sitani ica opi ani dri rii ‘i.
 

Endri Unzi ri ka ebu ide momo ‘ba dri ri ‘a vu si!

Sitani ni ondiku ka ebu ide ‘baziti ri iru sa kendre ana ebu ideka Simone ni ru ana rusika lejo drilega ledi iga ri ani. ‘Ba di kojoa ‘ai ka laku Endri Ole ri dri ri esu wa rii dri tika ‘aia dri ga si, kovu ‘aia geni ofu loso eyidri ri idri ofu loso Endri tro ri idri ri tro rii ra. Odu disi ‘ba Sitani ‘a unzale ri ‘bati ‘a weli oji rinzasi, disi oba kaki bia laku Endri Ole ri dri ri esuka ilegi enzi rujo ri si, abiri taka si, ‘aia razika-’aia ngasi si, kusa dri tika ‘aia dri ga si. Adusiku, ori unzi ri ica ‘ai ra vua kaki olu lidri alule ra ri si. Kolea anyetro oniki cuwidru rii Kristo ‘ba ka ori unzi ri ‘a aga ni ikonyi ‘aini ebu ide’jo endri ‘baziti ri dri ‘ia ovi dri utijo ‘ba zi ‘a dri ga disi.’ Disidru ‘ba ‘ai ovi alua ruvidi Simone dri ledi tro rii Rubanga ‘a andraga profetaa enzo ri ‘i. Ki amala ‘ai ‘ba Yesu ni ‘a ri ‘bati isa, jo dri enzi kolu ‘aia asiti ga ‘aa, ori unzi ri kohwi ‘aia ru ga wa. ‘Ba ‘ai di ‘bati kaki nyuma ide wa rii ‘aia ebu ori unzi ri dri ideka ‘ausi. Sitani ka laki amgbu dri se ovi ‘aini dri tika ‘aidri ri esujo ‘ausini vu ndutudri kaki engwi ana tiluza ti ‘i ‘aini ana opi ni sijo ‘i ri si. Odu disi, ekelezia  2Pentekositali-Asi ecoka ra vuka andraga lejo nzeka tro Di ‘bati dri rii erijo eze sa adi ndrea kendre dini Kristo ‘ba dri eridi vua aca’di vu ndutudri di ‘a ati ri ani.
 
2Kristo ‘ba itu ‘a dere ga esi ri ‘bati ido ufele limi vu udro si ilonyi ndruka tro di odu kinya eze ati 20th ri ‘a nusu ni ndutudru, diani di oba, Kristo ‘ba amgbu ‘aia aci tri tri vujo Yesu tro ri ndruka ri ‘bati esuki ta ‘aia ndrule ri engwi okpo rere vu ‘ow’i aini to ndrole ekelezia ‘aidri ati ri ‘ia ‘i. Zi’bati dri ta ‘oe aludisa iyo, vua ziti ri dri le ‘ai zojo endri ‘a ri ido zoka cici, ki zi’bati ri ni le ‘aia le ‘ai tro Yesu ni ru ri ‘a driba nzeka oko engwi okpo.Disidru ta ani-ungwele aci Pentekositali-asi ecoka eco vuka andraga ofu nzesi di dri ri eri ondiku ovi ani ledi ani ledi si. ‘Ba aninga saa disi ri ‘bati esu ta drile mgbi mgbi ‘aia ru ga ekpadru ndrole ta joka ti mgbimgbi si, ta joka profeta ti si, nyuma ideka ta ‘aujo ri tro vua ta ati andrani ride’di odu Endri ‘a emujo maju dri nainga na le ka asi cidru si si. Ta amgbu ‘aia nile ri iga, obaki ‘ai ‘aia ngasi ungwele-’ai ‘ba okpo Endri Ole ri dri iga ri ‘bati ‘i dru, Ki mgbe ojo ra sa da adusiku ta amgbu ‘aia inile rii hwa alusa enga Bugu Ole ri ‘ia ku. 
Vu ziti zoka ra ri iga le, lejo di ozo nza rere ondi ta ‘aia lele ri ‘a vu si. Amba vu di iga ri ‘bati ‘aiki Kristo ‘ba vu driso zoka ri ‘bati ‘a dri ga rii yotedru jokaa ‘aini andraga kaki evu kaki limi esu ru egbwe tro lidri ‘aidri Kristo ‘ba dri ri ‘ia ra si ‘i. Disidru naingasi ojoru ‘ba zi andrani eze ‘aa ungwele aci ‘aidri ofu nzejo ri iga Neo-Pentecostalism ni di ‘bati ojoru lini ‘aidri rii ta ‘aia idele ri tro oviru odu di ‘ia ri tro vi.
 
Ki draa ire vu di ‘a ti keko. Jo ale amatiru ta ti ‘a asere ga Endri si di ni ra, kolea amani di ori unzi ri ide ebu vua ebu driaru ri omba okpo ovi ledisi ni ingoni ya ni ote kpa. Vuasa tro kole amesu lari ama enzi dri rii vu alu vua kate tri vua kole amesu laku Endri Ole ri dri rii ama ofu loso eyidri ri ‘aika ofu loso Endri dri ri tro si. Kolea odaki dri anda ga nikaa di Endri Rubanga dri anda ri kesi ama dri ga ingoni ya si. 
Kendre ondiku Rubanga ‘a jokaa, “‘Ba madri kudra ‘aia ta nika ku si ri ani” (Hozea 4:6), odu disi sa ‘ba ta anda ri ndruka ri ‘bati izakiru ra, ‘aia ta nika ku si, adusi ‘ba asi ecoka kpoku udiadru di onza ‘ai ni. ‘Ba amgbu ziti ri kojoa ekelezia ‘ba ‘aidru andrani ungwele vuka ofu nzesi Pentekositali dri dii osiru vu a’wi eyi ako ri iga, vua laki ka rutra na ‘a. Di kolu ce ni adusi? ‘Ba asi ecoka eco ri ‘bati kaki ekelezia ‘aidri ri ica driluci ejika ‘bani ‘aia mori ilegi mbi mbi ri dri ri si, kaki ba laki di ‘bati kengwi ‘ba ori unzi ri ‘a icale ra ri ‘bati ‘i aia ‘aia dri ni tika ‘badi ‘bati ‘a dri ga si ‘i. Ta zi alu ‘aia enire laka ra rii jo ori unzi ri ica ma’di zi ovi dri ti jo ana dri ga ri si ni, mgbe koba ma’di di engwi loso vua ce olule lini dini dri ri si ‘i.
Tazi alu endredi ‘ba asiti ecoka eco ladi ‘bati ‘a ru ga tau rii kaki silingi hwe ekelezia ‘aia usale ri ni okposi vua koba ‘ba di ‘bati kaki ta ra nza nza ani okolongo dri kaki engwi ‘ai ba ta si ri ‘i. Amala ondreru odu didi Kristo acika andraga ofu loso ri nzeka tro ki kaki mori ori unzi ri dri ebu ‘au rii ekpadru, ki draa eberu gaadru ‘ba aidi ‘bati kevu kovu aci ‘a adusi oniki kare ‘aia dri bare rii ku. ‘Ba ‘ai di ‘bati, kaki mori Sitani dri ri igeni ‘aia lari ‘a anda ni etede jo ‘au, kaki uraa ‘ai kovu bu ‘a dri uci ka ako. Ki ta li rii enzi olu ‘aia asiti ga ‘aa ‘i vua kaki riza ra ‘i.
Jo ozi ‘aini lazi ledi ‘bati ni, “Enzi olu dri nya asiti ga ‘aa ya, nya Rubanga ni igeni ka ra ‘a vu ga sa ‘i?” kaki ‘ai laka ri hwe kaki joa oluka enzi ‘a dii ta tema tema sa rubadi ‘aia lidri ga ra ri ‘i. Kaki uraa ta enzi ni di ni oluka ma’di asiti iyo ni ta okpo rere ri ‘i, jo tee ka ‘iYesu ni ra sa ‘i.
‘Ba koraa kole dubasi ‘ai koto Opi bu dri iga, jo tee dri enzi kolu ‘aia asiti ga ‘aa sa ‘i, amala kaki itiria ‘aia Yesu ni igeni ka ra si mori zi -mbi rii ‘aia ru ga ‘aa. 
Geni gba ani ovi mbi ledi ani ledii ingoni ri ‘i! Ra ‘ai ‘aidri ri ‘a mbajo okpo rii adusiku esuki mori zi okpo tro rii ra si. Esuki ‘aia ngasi ‘ai ka ta jo ti mgbimgbi ri si wa, kaki ndre orobi ‘a sa wa vua kaki lija hwe ‘ba avu ri ni sa wa vua asiti anyu tro vua geni retu ti tro igeni ki ta ani di ani kolu laku Endri Ole ri dri ri ‘i. Disidru mgbe driluci ako kaki uraa ‘ai esu layu laku Endri Ole ri dri tro ra ‘aia ta di igeni ka si ‘i. 
Ki amala ‘ba di ‘a ai geni tro lari dri rii ana oluka ce ku si, ‘aini okpo lari ‘aidri ri ‘ia iyo jo tazi endredi tau ri endre ‘aia ta idele ri ‘ia ku ‘i. Disidru, ‘ba ‘aidi ‘bati kobia asiti cidru si ta eted’e di ‘a ai esu lari ra ri idele ki ta ti ‘a ekore ga kaki asua Sitani ka ‘ai ebu ni vua ‘ai ka ebu driaru ide ‘au. Amala ‘ba di ‘a lekaa ‘ai kesu ‘ai Rubanga dri rii ilegi enzi rujo ri si si kusa razika-aia ngasi kofu ofu loso eyidri Endri tro rii ra si, gbadru Endri Ole ri esuka ‘au ‘a kare ga kaki endri unzi ri esu ‘au.
Sitani ka sikia eji ‘ba ru ana ta joka ‘aia bi ga si kojoa, “Nyide enzi ra, enzo ‘a?” koko koba ‘ba di ‘a ego ka ‘ai itede ego ni ‘aia ngasi. Ma’di zi alu ma nile gba alusa esu lebe ana enzi dri rii laku Endri Ole ri dri ri tro kuru rii ‘aa. Dii ta ride’di ani ni esu driso ana rutire Endri si di kuru ri ‘i, esu ani ma’di cuwi ri ‘i sa Yesu ni ‘a ani ‘ai si engwi ma’di ta ide’di ata ri ‘i. Ma’di ani di ka ta jo ti mgbimgbi si sa wa vua ide nyuma ekpadru. Ki tee kowo vua kilegi ilegi enzi rujo rii ini ‘a ru, ana igeni Yesu ‘a ru ga ri si sa, enzi ana asiti ga ri kaci ani icandi ka tro andraga. Diivu mgbe koyo koyo Sitani dri ri kido. “Nyide enzi ra, disi da rii nya oluka lidri si nyidra ra.” Sitani kemu driaru be koko ka sikia eji ana ru ga, ka icandi hwe laka koko tesa ka ta jo laka ana enzi ni dri. Sitani koba ka ana enzi ni era ana ngasi vusa tro ka lali li ana dri ga ana -ngasi. Amala, ta cidru ana idele wa rii kolea duba koru ana enzi ni ana asiti ga ‘i. Kemu ka ani ayu ana ngasi sikia Sitani dri ri ‘a dri ga wa ni kesua tete ka ofu loso pelere ndro di eri kpa vua kigeni ‘a kpa.
Kolea nyini ote rii ‘ba ofu loso eyidri ri ‘aika ofu loso Endri dri ri tro kuru ri ‘bati kaki engwi drilahwa Sitani dri ri ‘i. Ira nya ngasi ta ma’di lebe ana enzi dri ri esu’di kuru ria okpo Sitani dri ga ka ‘a dri ga ta ra ya? Ma’di alu alu okpo ofu loso eyidri di dri ri ko’di ofu loso Endri dri ri tro kuru rii Sitani kokoa pi vua kicandi ‘a okposi. Rubanga ‘a ofu loso eyidri vua Endri dri dii gbadru ta okpo vua rule’di Sitani ni dro’jo pi ni wa ri ‘i. Disidru, ma’di alu alu Yesu ni ‘aidi rii kole dubasi ka ‘i ofu loso eyidri rii ofu loso Endri dri ri tro ra, vuasa tro kolea konze ‘bacidru ni vu ndutu dri. ‘Ba ta di erika ra rii kole duba kohweki laru laka vua kigeni ki.
 

Okpo cara ako dri rii ndi endru sa olu ka ebu ide vudri ‘i!

Vu a dri ni ndutudru si akuru ebu ori unzi ri dri si. Ki jo anyetro oleki ofu loso ‘ba dri se’di ‘aini laku Endri Ole ri dri ri esujo ri nzeka ra, kole odu ki geni mbi ehwi erile ku ovi Endri Ole ri ‘a laku hwe’jo ledi ‘a dri ga rii pi. 
Kolea atijoadru rii ite’deki pelere tau jokaa Endri Ole ri kemu ‘ba dri dri tika ‘aia dri ga si ni ledii ta enzo ri ‘i. Kolea mgbe ojoki pelere ta amgbu ziti rideka ovisi “ta joka ti ziti mgbimgbi ri si dri tika dri ‘a vu ga rii, tazi erika aci ani enzi ruka si kusa abiri taka si kusa ta erika mgbe engajo Yesu dri si” ‘ai kpodru si ebu ori unzi ri dri ‘i. ‘Ba ka tete ripa lunza Sitani dri ri ‘a dri ga wa rii ‘aia ofu loso eyidri vua Endri dri ri igeni ka si. Ama tete lari esu enzi dri ‘a wa rii ‘ai ofu loso eyidri vua Endri dri di idri ri si. 
Kolea anyetro ondeki endri unzi ri ‘a mi ni, “adusi ani ata ‘ba enzo ri dri ‘i” ofu loso eyidri vua Endri dri ri kojoa ‘i. Sitani umbe ‘ba cidru vu ndutu dri rii lumbe ‘aia ego ‘a rite’de jo- ‘aia ngasi ri si, disidru kolea ingwi ki ‘ba dii anda ga oba keraki ta ‘amgbu ‘aia idele ledii ta ‘aia nile ote ledi tro ani ta teke dru Sitani ‘a bale ni ri ‘i. 
Odu disi, ‘ba ziti rii ondi kendre Simone ni Samaria go ri ani, kaki lea ‘ai koje Endri Ole rii okolongo si, amba di ani dii draasa ekelezia dri ndrerega ‘aa. ‘Ai ‘ba mi ako ‘ba ni ako zi aseka ri ‘i. Kaki ‘ba zi ni leti anda lari ce ri dri ri ite’de kpe adusiku ‘aisa ‘aingasi oniki ta ofu loso eyidri vua Endri dri ri idri ku, vuasa tro dri enzi olu ‘aia asiti ga ‘aa. Disidru kaki baa Sitani kehwi kolu ‘ba ‘aia olu ‘bazi ri ‘bati ‘a asiti ga ‘aia ilegi ungwele-vua ilegi’jo inia ru ri si ‘i, vua ilegi enzi rujo ri ungweka ‘aaru adi evu adi dri uti ‘ba dri ri si ‘i. 
‘Ba dii gbadru ori unzi ri ica ai ra, ki jo oleki ‘ba di kengwi lejo Rubanga dri ri iga, kolea ivoloki ebu Sitani dri rii ofu loso anda vua ce ofu loso eyidri vua Endri dri di nzeka ‘aini ‘au si. Ki jo ‘ba koni ta ta Sitani ‘a ti ubale ri idri ku, tazi ‘aini idele wa ani kolu iyo ra rii kaki ricandi ra ako ‘aidri ri ‘ia. 
Kendre ondiku ma jokaa ra ri ani, nyuma amgbu ide ka ovidru ta joka ti mgbimgbi si vua lejo profeta dri joka dritika nya dri ga ‘a vuga ni kpodru si sa ebu ori unzi ri dri ‘i.Ovi zi si, ebu ‘ba asi eco di ‘bati dri rii kpodru si sa ka rite’de kendre ebu ori unzi ri dri ri ani. Disidru kolea ohweki ‘aini lini. “Karuni ma’di ebu ide’di nyi ‘a rii endri unzi ri ‘i jo dri enzi olu nya asiti ga ‘aa ‘i. Ki jo nyitiri Endri Ole rii kolu nya asiti ga, tee jo dri enzi kolu nya asiti ga ‘aa sa ‘i, karuni mgbe unza nyi ra.” 
Ai maju dri rii vua ‘ba dri tire ‘aia dri ga esile oru esi Ebu majua idele 8 ni ga nai oba ‘ai kare aluga ovikiru vi, adusi ‘ai eritruwasi oni ta Yesu Kristo ‘a ofu loso eyidri vua Endri dri ri idri ote. Ki ‘ai maju dri rii mgbimgbi ani Kristo ‘ba agbu ziti odu disi igenikaa ‘ai ka laku Endri Ole ri dri ri esu ovi dri tijo ‘aia dri ga ri si ri tro ‘aa. 
Ki gba ma’di ka laku Endri Ole ri dri ri esu ma’di lebe ana enzi dri ri esu’di ra ri ‘a dri ti ka ana dri ga si wa ya? Hwa ka ride kpe. Bugu Ole ri ojo Endri Rubanga dri ri kaci eyi dri si (Idoka 1:2). Di ‘a ehwi ni ma’di ni lebe ana enzi dri ri esu’jo laku Endri Ole ri dri tro, kolea keri vua kai ofu loso eyidri vua Endri dri rii kpa. Adusiku Rubanga eze Endri Ole rii Kristo ‘ba-tile Endri si di ‘aia ofu loso eyidri vua Endri dri ri ‘aika si ri ‘bati ni dride dru. 
Kolea anyetro oraki ujea ci rii kengwi kendre ofu loso eyidri vua Endri dri ri ga ka, adusi ledii esu ta Rubanga ‘a ti ubale lari hwe’jo amani ‘ausi ama enzi ni ‘a ri ‘i,
jo ama’jo kole ‘ba kondru dri tika ‘aia dri ga ni ‘aini laku Endri Ole ri dri ri esu ‘au ‘i. Rakaa asi si ma’di zi ri ka laku Endri Ole ri dri ri hwe ma’di zi ni wa ni oviru ta joka Rubanga ‘a ru ga unzi tro vi, vua ‘ba ‘ai ani ovi di ani di tro ri ‘bati kode matego Sitani dri ri isi emira alu. Kole hwa ‘aiki ta di ani di kideru amaru ku. 
Enzi ama idele rii cidru ka rebe ra jo amigeni ofu loso eyidri rii ofu loso Endri dri ri tro ni ‘i, adusi Endri Ole ri ka sadini ta di ‘a dri ga ri hwe ni. Ma’di alu alu ofu loso eyidri ri ‘aidi ofu loso Endri dri ri tro rii hwa alusa enzi ana asiti ga iyo. Di ka ride adusi ide enzi kuru si ku, ki amala ana mori ofu loso eyidri vua Endri dri ri aika ‘au si. Ofu loso eyidri vua Endri dri ri ka sadini hwe ko’joa hwa alusa asiti ‘a ru enzi iyo, Endri Ole ri isa koko ka sadini hwe ta ledi ‘a dri ga di. Hwa alusa ma’di ka Yesu ni ungwe ana Aridipi ‘i ni kpe jo Endri Ole Rubanga dri rii ana ru ga iyo ‘i.
Ki ‘ba ori unzi ri ‘a icale ra ri ‘bati le oniki ta ofu loso eyidri vua Endri dri ri idri ku, vuasa tro hwa izuki ta driaru ku. Oniki sa ta ofu loso eyidri vua Endri dri ri idri ku, vuasa tro oniki lejo ehwi anda dri ri esuka ku. Kaki joa Endri Ole ri kesi tete ‘aia dri ga wa rii dri tika ‘aia dri ga ra si. Ki ondreni, Endri Ole ri esi hwa ma’di dri ovi dri ti’jo ana dri ga ri si ku. Kolea nyera ci rii ebu Sitani ‘a idele rii aca draa dini ‘ba ekelezia ‘a ri ‘bati ‘i lofo vu ndutu dri ana bakaa kaki lini enzo dru ri nze ‘au si. Ra disi dru, laku Endri Ole ri dri ri esuka ofu loso eyidri ri si vua ofu loso Endri dri ri si ni ta ce rere ri ‘i. 
LIST Download FREE eBook & AudioBook