- All e-books and audiobooks on The New Life Mission website are free
- Explore multilingual sermons in global languages
- Two new revised editions in English have been released
- Check out our website translated into 27 languages
Ta tajore driaru ri `i 8: Endri Ole ri `i
[8-5] ojo Ile anyemuru Endri Ole ri tro alu ni ra ya? (Ofu atijoadru Yoana ‘a sile rii 1:1-10)
(Ofu atijoadru Yoana ‘a sile rii 1:1-10)ojo
“Asi ofu dii lejo lidri dri eze vu ‘a i’dojo ri inga sa ‘aa ri idri, ameri ama bi si, andre ani ama mi gba ri si, ani ama ndrele rii, amelo ama dri si, Lejo dii idri lidri di obaru ndrea ─ ote, andre ra, ama lejo nze driaru ama lidri olure tadru ri nzeka anyini si, ani olure Ata tro ki evu oba ondre ani ote ─ ta ama ndrele vua ama erile ra rii ama ite’dea anyini, ‘ausini anyemuru ametro alu; kendre ama remuka Ata ti tro ana Ngwaapi ni Yesu Kristo ti tro alu ri ani. Asi ofu dii anyini asi egbwe amadri koludru nza si. Lejo ama nzele anyini rii ta ama erile driaru ri ‘i, Rubanga ni ingwe vumudi laka iyo. Jo oce emuru Rubanga tro alu, ki a’di olu vumudi ‘a ri, ama lejo amadri si vua e’bu amadri si enzo lejo anda rii ama asiti ga iyo. Ki jo adi olu ingwe ‘a kendre ana oluka ingwe ‘a ri ani, amuru alu, vua ari Yesu Rubanga ‘a Ngwaapi dri ka enzi amadri je pelere. Ki jo oce ama enzi ako ri, a’di runza ama ngasi, lejo anda rii ama asi ga iyo. Ki jo ‘ai enzi amadri ra, Rubanga ni anda vua igeni ‘a wa ka ama enzi ni ebera ka ama je ta cidru amadri unzi ri ‘ia pelere. Jo oce ide enzi ku ri, karuni o’ba Rubanga ni ma’di enzo ri ‘i, lejo driaru ama asi ga iyo.”
“Asi ofu dii lejo lidri dri eze vu ‘a i’dojo ri inga sa ‘aa ri idri, ameri ama bi si, andre ani ama mi gba ri si, ani ama ndrele rii, amelo ama dri si, Lejo dii idri lidri di obaru ndrea ─ ote, andre ra, ama lejo nze driaru ama lidri olure tadru ri nzeka anyini si, ani olure Ata tro ki evu oba ondre ani ote ─ ta ama ndrele vua ama erile ra rii ama ite’dea anyini, ‘ausini anyemuru ametro alu; kendre ama remuka Ata ti tro ana Ngwaapi ni Yesu Kristo ti tro alu ri ani. Asi ofu dii anyini asi egbwe amadri koludru nza si. Lejo ama nzele anyini rii ta ama erile driaru ri ‘i, Rubanga ni ingwe vumudi laka iyo. Jo oce emuru Rubanga tro alu, ki a’di olu vumudi ‘a ri, ama lejo amadri si vua e’bu amadri si enzo lejo anda rii ama asiti ga iyo. Ki jo adi olu ingwe ‘a kendre ana oluka ingwe ‘a ri ani, amuru alu, vua ari Yesu Rubanga ‘a Ngwaapi dri ka enzi amadri je pelere. Ki jo oce ama enzi ako ri, a’di runza ama ngasi, lejo anda rii ama asi ga iyo. Ki jo ‘ai enzi amadri ra, Rubanga ni anda vua igeni ‘a wa ka ama enzi ni ebera ka ama je ta cidru amadri unzi ri ‘ia pelere. Jo oce ide enzi ku ri, karuni o’ba Rubanga ni ma’di enzo ri ‘i, lejo driaru ama asi ga iyo.”
Ta ani gba okpo rere ruledi
ma’di ni olu alu Endri Ole ri dri ri
esu’jo ‘ausi wa rii adu?
Kole atijoadru rii igeniki ofu loso eyidri vua
Endri dri rii kpa oko ojekiru ama
enzi ni ‘a si ‘ai si.
Ki jo ile anyini ti leci kolu Endri Ole ri tro ‘aa ni ra, atijoadru rii, kole nyini cuwidru tee enzi angwa gaadru ri isa Opi ‘a andraga koba lemu na ani na kengwi okpo rere. Kolea duba nyirata, ‘Gba ta ‘ba ni di dri hwa enzi angwa gaadru sa kolu Opi ‘a andra ga iyo ni ingoni?’ Ki gbadru jo ile ti leci nya lidri ga Opi tro rii ra kole vumudi kolu nya asiti ga gaadru sa iyo. Disidru, ma’di ni ti leci anda ri esu’jo Opi tro, kole duba nyindre nyesu ofu loso layu dri rii ra vua ije nyi nya enzi ni ‘a si cidru ra.
Ki jo gba loku loku ile olu alu esule Endri Ole ri tro ra, kole atijoadru rii nyiba geni ofu loso eyidri vua Endri dri ri idri, vua nyiba nya enzi kojeru ‘ai si. Ki jo dri ini ofu loso eyidri vua Endri dri rii ku vuasa tro jo dri idu nya asiti ga kuru, kolea dasi orata sa ta nya olu alu Opi tro ri idri ku. Lemu Endri Ole ri tro ri esuka kengwi nyini adu rere ni kesua tete enzi nya asiti ga ri karuje pelere ofu loso eyidri vua Endri dri ri si kpa.
Enzi cidru karuje ‘ba ni uje ‘a si tete ofu loso anda eyidri vua Endri dri ri si. Opi ka tutu co nya ru ga Endri Ole ri si ra jo gba nyigeni ofu loso eyidri rii ofu loso Endri dri ri tro ra ‘i. Ki gba loku loku ile tileci kolu anyini opi tro vua Endri Ole ri tro ‘aa ni ra ya? Kole draa nyiri nya enzi ni urale nyiko nyigeni ofu loso anda dii ‘au nyini engwijo anda nya enzi ‘a dri ga ‘i. Ledia vu ga nyi gbadru ti leci loso ri esu Opi tro ra.
Ki jo ile ti leci anda ri esuka Opi tro, kole ati nyigeni batisimu Yesu ‘a esule Yoana dri Abu Jurudano ‘a rii kpa nyiko vuaru nyigeni ana ari kuruce dri ri ni. Ki jo gba loku loku ‘ba ole ti leci anda ri esule Endri Ole ri tro ni, kole atijoadru rii koniki di ma’di ungwele Endri Ole ni dii adi ‘i ya ni kpa. Endri Ole rii ani ta Ole ri ‘i. Disidru kolu tete asiti ‘ba ofu loso pelere di ‘aika ra ri ‘bati ‘a asiti ga.
Draa anyiba ondreki dri ta ma’di zi sadini hwe’di ana enzi ‘a rujeka pelere ana batisimu Yesu dri ana esule Yoana dri ri ‘aika ana ari tro ri idri, vua draa dini ana remuka Endri Ole ri tro alu ni dri.
“Ba drile mgbimgbi rii vudri di ‘a ekpadru vua ‘ai cidru kolu ta ‘aia urale ri ‘a vu si. Masa andrani ati ma ‘ai ani. Erijo ma lidri ‘boronzi si ri inga sa ma lidri ni nya, ma tesa ma endre a vu ni oko ekelezia ‘a tro tro vua Rubanga ni igeni ka isa mgbe enga ma asiti ga. Ma ata ni ana ngasi ma’di Rubanga igenidi kuru ri ‘i vua vu amgbu si ka ta jo ma geni bale Rubanga dri di ‘a dri ga unzi, ki ‘ba ziti amgbu ama dri familia ri le kaki aci ekelezia ‘a ‘i. Yaka ekelezia ‘a dii ta retugodru ma idele ma lidri ni ‘a ri ‘i.
Ki amala, saa ma olure julo ‘a ri si, ace madre gba ta ma ata ni ma ti’di ri ‘a idele rii di, vua mura ta dra dri vua lidri dri di, mgbe bu ti itederu ma mi ga aci olure tadru ri tro ra. ‘Ba amgbu ziti ri kojoa mani jo migeni ani ra maya bu ‘a ra vua mengwi ana ‘barangwa ‘i dru ra, ki sa hwa mitiri nai ce ku. Ani di gba mengwi ana ‘barangwa ‘i dru anda anda ra ya ni ku. Madri mura jo mide lejo loso rii vudri ‘dia ra ri mgbe lunza ako maya bu ‘a ra disidru abi ma mori ni ta loso ri ide’jo ‘ba ma konyi ni leka ri ‘bati ni ra.
Ki ewo zi alu ma asiti ga ri iga, ani mgbe minzi ra ni ote.
‘Ba ziti ri ‘a mi ga mendre kendre ma’di loso ri ani ki sa hwa tazi mani idele wa ani iyo ra rii enzi madri ri oba ma meri ma’di enzidipi ri ani. Saa nasi, meji tazi maru ga kole duba maya ekelezia ‘a vua milegi dini, ‘Ayi nyiba gbadru mengwi nya ‘barangwa ‘i. Ayi nyiba mani lejo anda rii ote.’ Ki ma ilegire rii, mgbe sa tazi mgbi ri kidoa rurale ma asiti ga ni. Ki tee jo meri ana lejo inile mani rii ni sa, ma anda laka ri ini vua sa tro mandrea anda ni kpe. Ma lidri engwi ta iyo ri ani, maruni kpo enzi, ma dra ute ‘au, vua tazi ti tro.
Ako mido ta urale ovi ani ledi ani, ‘Kole dasi matiru Endri si di. Jo mide ra hwa molu di ani di ku.’ Ki ta mgbu ma urale di tro sa mingwi ma gaadru draa mido ayale ekelezia ‘a vu alu alu paka kinya madri julo dri na ofu amvu kpa. Ale draa mesu oli ebu ki sa mura esukaa ni mani okpo. Ma dri ociru ra, hwa alusa ide ta kuru tee ma ‘bi mori si ani ingoni sa ‘i, hwa ci ka mani iyo. Andre ma mangasi ta zi alusa ma asiti ga anda ani iyo, oba asi laza retu ri oko ma ni. Mgbe saa nasi, ako meri ofu loso rii ma adrupi ni amba ri dri.
“Anyiru anya enzi ni anyiko anyengwi Rubanga dri, anya enzi kebe’ru dru ca, vua Opi kohwedru anyini saa asi egbwe dri ri ni” (Ebu majua idele rii 3:19). Dii gbadru ofu loso eyidri vua Endri dri ri ‘i. Ta amgbu andrani ma inile ekelezia ma ayare na ‘ia rii Yesu odra kuruce dri ma enzi si ‘i. Ki ofu loso ani di kojoa mani Yesu esu batisimu Yoana ni Batisimu hwe’di ri dri ‘ausi odu enzi cidru vudri rii pi vua esu lamgba ama enzi si kuruce dri ra. Maya ekelezia ‘a okposi ma lidri ‘a ru oli ale mengwidru ‘barangwa Rubanga dri ri ‘i sa ama kpe. Abi asiti cidru si lejo driaru ri ‘a ehwini erile ra sa hwa abi erilea kpe. Ki, ace meri vua migeni ofu loso eyidri rii ofu loso Endri dri ri tro di, enzi cidru ma ‘a rii, ta cidru joisi maa icandi hweka ri ‘bati tro cidru egwe di mgbe oba ma asiti engwi egbwe retu ri tro.
Adri muraa jo migeni Rubanga ni ra ri tee tazi kolu ma asiti ga ‘aa sa jo maya ekelezia ‘a vua ma ayaka ni be ri, koba ma ya bu ‘a ra. Ki Rubanga eze mani ofu loso eyidri rii ofu loso Endri dri ri tro ‘au oba odu ma enzi ni cidru si pi. Ohwe mani Endri Ole rii dride dru ‘au. Ma driso layu driaru ri esure kuru ri isa, ani hwa ta Endri Ole ri idri ku kusa ovi ta jojo ti mgbimgbi si ri idri sa ku. Gba madri mitiri jo molu ma ekelezia na ‘ia vua ma ebu cidru ide ekelezia na ni ri Rubanga ka tutu co ma ru ga ra. Ki vule vule ni meya mesu ma Endri Ole ri esu wa ni kesu tete enzi madri rii cidru ka rebe ra ofu loso eyidri ri si vua ofu loso Endri ri si kpa.
Lidri madri joisi ri ‘ia, adri olure enzi ‘a tee migeni Rubanga ni ra sa ‘i. Adri Olure lidri ta ndrujo ‘au ri si, ani hwa konyi Endri Ole ri dri ri isa ku. Ki ana tiluza si, ana ofu loso ri nzeka mani kendre ondi ana rusika Bugu Ole ri ‘ia ri ani si, ako migeni ra diiri mgbe mesu masa Endri Ole rii ma asiti ga ‘aa.
Ma layu esuka ni vu, atijoadru ri si ani di Endri Ole rii ma ‘a ‘aa ya kusa di iyo ya ni anda anda ku. Ki sa maci lejo driaru ri laka tro andraga ako meya masu vule vule ni kumbe ‘ai zi mgbi rii ka ta ide ma asiti ga ‘i oko oba sa mesu laku Endri Ole ri dri rii ra. Draale ta dii ce, ako hwa driluci ako mera mgbe Endri Ole rii kolu ma asiti ga ni ra! Ana enzi madri ri ebere cidru rii, mgbe mera tete ‘ba cidru enzi ako ri ‘bati kareco ‘baciri Rubanga dri rii dru wa vua kaki Endri Ole ri esu wa rii ni ni ra.
Meya mura sa mgbe ra ma lekaa molu ana andraga anda ti ta loso ma idele ana andraga ri tro hwa alusa koba ma Endri Ole ri esu kpe. Rubanga kemu tete ‘ba enzi ‘ba ki nikaa ‘ai kede adu ya ni ku ri ‘bati dri. Kemu tete ‘ba ani ndruka vua ani leka ri ‘bati dri.
Oba ani cuwidru Rubanga ni igenika lidri konyi ako ri tro kobaa hwa alusa ama to bu ‘a kpe disidru oba Yesu Kristo emu vudri di ‘a amani lari hwere amani ama enzi cidru ri ‘ia ofu loso eyidri vua Endri dri ri si. Ohwe mani Endri Ole rii olule ma ‘a bobo dru.
Manzo Opi ni ana ma ecoka ana ‘barangwa ‘i si vua ana mani laku Endri Ole ri dri ri hweka si okposi. Ki kesu oli kolu ta Opi ‘a idele ri si ku ri, dri draasa molu ma’di enzidipi ri ‘i vua enzi madri ri si adi lali ali ma dri ga ra vua adi ma ze mabusu go dru aci olure tadru ri ‘ia.
Alua ri ani, ma ‘i tete ari kuruce dri rii ‘au disi hwa alusa oba ma Endri Ole ri esu kpe tee male ra sa ‘i. Saa nasi, esu ma ‘i Yesu ni ra sa enzi ma asiti ga ri igoga ma mani Endri Ole ri esure ga ci. Adusiku ma’di enzidipi rii hwa alusa ka laku Endri Ole ri dri ri esu ana asiti ga kpe. Ki draasa, enzi ‘ba amgbu oleki Endri Ole ri esule ni tee jo dri enzi kolu ‘aia asiti ga ‘aa sa ‘i.
Ki ga jo ile Endri Ole ri esuka ni ra vua ile anyini ti leci kolu anetro ‘aa ni ra, kolea duba nyigeni ofu loso eyidri rii ofu loso Endri ri tro kpa nyiko nyesu laku sa nya enzi dri rii kpa. Jodiniri dri nyolu enzidipi ya? Jodiniri dria nyi ofu loso dii eri ‘ba ‘aidru laku Endri Ole ri dri ri esuka ra ri ‘bati dri si wa. ‘Ba lekaa ‘ai kesu tileci loso rii Endri Ole ri tro rii kolea duba abiri laka ri koza ‘ai koko kigeniki ofu loso eyidri rii ofu loso Endri dri ri tro ‘au.
Tete ‘ba anda ri ‘bati ka lejo Endri Ole ri dri ri eri ekelezia ‘a si wa rii ni. Kaki olu ‘aia lidri ni ‘a a’i si ‘aia ofu loso ri erika si ki enzi ‘ba le kaki olu ‘aia lidri alule ra ri si kaki dri sa aci olure tadru ri ‘ia ‘aini ofu loso eyidri vua Endri dri ri erika ako.
Disidru, kolea nyini ta ofu loso eyidri vua Endri dri ri idri nza. Kolea nyigeni ofu loso ani dii ‘au adusi? Koba nyi nyi enze cara dini dri ri ‘ia si angwe nya ‘ai baka ofu loso ce kendre Bugu Ole ri ‘a jokaa ri ani ri si wa. Yesu ‘a maju ti okoki ofu loso ani pelere di ‘a vu ni ‘au ki draale ohweru ‘ba Endri Ole ri esuka ra ri ‘bati ni. Ofu loso pelere eyidri vua Endri dri dii ondikusa ani ofu loso andrani eze ta idojo ri inga ekelezia eze na ‘ia maju saa igenile ra ri ‘i. Kolea Kristo ‘ba cidru kesuki Endri Ole rii ra. Jo ani ani kuri kaki engwi ‘baciri Rubanga dri rii dru kpe.
Ki dri draasa ‘ba ‘aidru ofu loso eyidri vua Endri dri ri igeni ka kuru rii ondreru pelere dri enzi olu ‘aia asiti ga ‘aa. Alusa kaki tileci esu Endri Ole ri tro kpe. ‘Aini ti leci esu’jo anetro wa, kole atijoadru rii kigeniki ofu loso eyidri vua Endri dri Rubanga ‘a ehwele ‘aini dini koko kesuki Endri Ole ri ni.
Bugu Ole ro ojo ta Endri Ole ri idri vu ubi
Laku Endri Ole ri dri ri ido onzika Yesu dri ri si. Draa dii saa lari dri vua saa dii ana kiza ndrendre dru lumbe ako ri dri ‘i. Ki gbadru ani ta andra unzi dri ‘i jo igeniki ofu loso eyidri rii ofu loso Endri dri ri tro kuru ‘i vua jo ama olu ti leci Endri Ole ri drii ako ‘i.
Anyini tileci Endri Ole ri tro ‘aa ya? Enzi nyidri ri oba hwa anyi ti eci Endri Ole ri tro kare aluga kpe ya? Draa jodiniri nyini ta nza ofu loso eyidri vua Endri dri Rubanga ‘a ehwele nyini di ‘a dri ga nyiko nyigeni ‘au. Ki jo nyigeni ofu loso eyidri rii ofu loso Endri dri ri tro ni, mgbe Endri Ole ri kehwi nya asiti ga ra vua koba anyi aci Endri Ole ri tro kare aluga. Endri Ole rii kolu tete asiti ‘ba ‘aidru ofu loso eyidri ri ‘aika ofu loso Endri dri ri tro ra ri ‘bati ‘a asiti ga. Endri Ole rii tesa ka ana le ni ite’de asiti ‘ba anda ri ‘bati dri iga. Paulo ‘a ebu idele Endri Ole ri tro rii ana ofu loso ri nzeka ‘i.
Ki jodiniri nyi ma’di laku Endri Ole ri dri ri esu’di ra ri ni ingoni? Ta ite’de di ‘a rii adu? Ta ite’de dia rii di igeni ofu loso eyidri vua Endri dri rii ra ya ‘i. Ki jo ma’di ‘a oni vua igeni ofu loso eyidri vua Endri dri rii ni, karuni ani ma’di laku Endri Ole ri dri ri esu’di ra ri ‘i.
Endri Ole rii hwa alusa olu asiti ‘ba anda di gaka mgbe ri ‘bati dri ri iga ku. Endri Ole rii kolu asiti ‘ba ‘aidru igenikaa enzi cidru vudri rii eberu batisimu Yesu ‘a esule Yoana dri ri ‘aika si ana ari kuruce dri ri tro ri ‘bati ‘a asiti ga.Ile anyini tileci kolu Endri Ole ri tro ‘aa ni ra ya?
Ini gba ofu loso kole nyigeni nyini laku Endri Ole ri dri ri esujo ‘ausi vua anyini tileci ‘a olujo anetro ‘aa rii ote ya? Ofu loso anda rii karesu tete ‘ai Yesu ‘a batisimu esule Yoana dri ri idri ri iga ana ari kuruce dri ri tro. Ki jo dri nyigeni ofu loso eyidri rii ofu loso Endri dri ri tro kuru, nya enzi ka rebe kpe vua sa tro hwa nyi laku Endri Ole ri dri ri esu kpe. Endri Ole ri ole ‘ba kigeni ofu loso eyidri rii ofu loso Endri dri ri tro ‘aini ani esu’jo ‘au.
Adusiku Endri Ole rii hwa alusa kolu asiti enzi ‘ba dri ri iga kpe. Ki jo ile Endri Ole ri esuka, kolea ati nyigeni ofu loso rii nyini rujejo nya enzi ni ‘a si pelere ni kpa. Vuasa tro, Jo ile nyesu tileci Endri Ole ri tro kare aluga ni ra, kolea nyolu ‘ai tro ofu loso pelerendro di nzere ga ‘i. Ki vua jo ile Endri Ole ri kodu nya dri ni ni, kolea tesa nyile ofu loso pelere dii ndro vua tesa kare nya yare ri ige nyile nzele ‘au. Endri Ole rii ani asiti ‘ba aidru ofu loso eyidri ri nzeka ofu loso Endri dri tro ri ‘bati ‘a asiti ga.
Adusiku laku Endri Ole ri dri rii tesa ka ruhwe ‘ba anda ri ‘bati ni, Ai dii ‘ba ofu loso pelere ndro di igeni ka ri ‘i. Ki tete ‘ba anda ri ‘bati ‘i, ‘ba ofu loso anda di igeni ka ra ri ‘bati, kaki ti leci esu Endri Ole ri tro wa rii ni. Ofu loso pelerendro Endri Ole ri ‘a ‘aile ra rii ofu loso lejo eko’di batisimu Yesu ‘a esule Yoana dri ri si vua ana ari si ri ‘i (ofu atijoadru Yoana ‘a sile rii 5:3-7). Petro isa igeni ofu loso ani dii ra adusiku ojo, “ovi zi dria dinisa anyi aridi rii ‘aa-ungwea batisimu (eyi dii batisimu anyi aridi andi rudri jeka si rii ku, ki cara icarale Rubanga ni ra anda ri hwe’di ri ‘i), Onzika Yesu Kristo dri si” (1 Peter 3:21). Bugu Ole ri ‘ia, “eyi ni” bebe ani omba batisimu Yesu ‘a esule Yoana Batisita dri ri ‘a kare ga.
‘Ba Endri Ole ri esuka wa ri ‘bati esuki layu ofu loso risi ra vua di oba engwiki enzi ako. ‘Ba cidru ofu loso pelere di ‘aika ra ri ‘bati kaki laru hwe ‘aia Ata ni endri si vua anda si kendre ondiku Endri Ole ri ‘a ‘aia dri ni duka ri ani (Yoana 4:23). Endri Ole ri ka konyi hwe ‘ba anda ri ‘bati ni ‘aini olujo ‘aia lidri ni ‘a lidri gadi Endri Ole ri si ndru ri si. ‘Ba laku Endri Ole ri dri ri esuka ra ri ‘bati kaki olu ru dru vua tesa kaki Opi ni ecu ‘au. Endri Ole ri koba mgbe driluci ako amengwi ‘baciri Rubanga dri ‘i. Ama olu ofu loso eyidri vua Endri di ‘ia laku Endri Ole ri dri tro ‘bobodru.
Endri Ole rii hwa alusa emuru’ba ‘ai unzaka ‘aia ngasi ri ‘bati tro ku
Endri Ole ri ojo enzi’ba ni ofu atijoadru Yoana ‘a sile 1:8 ga, “Ki jo oce ama enzi ako ri, a’di runza amangasi, le’jo anda rii ama asi ga iyo.” Endri Ole rii hwa alusa kolu asiti ‘ba ‘ai unzaka ‘aia ngasi ri ‘bati dri iga kpe. Endri Ole rii tesa ka lini hwe ‘ba enzi ‘ba ri ‘bati ni, kojoa, “Anyigeni ofu loso pelerendro lejo eko’di Yesu ‘a batisimu si vua ana ari si rii ku adu si?” Draa adiki ta ndre gaadru ma’di Kristo ‘ba dru tile Endri si di itiridia andrani ati nainga sa mgbe anidri ani esu Endri Ole rii ra anini ta nika batisimu Yesu dri ri idri ana ari tro ni ako ri idri. Ma’di ani dii draa dini igeni ofu loso eyidri rii Endri dri ri tro ra vua esu Endri Ole ri isa ra. Di ‘a, kolea obiki ndrelearu di Endri Ole ri kolu adi ni ru ya ‘i.
“Rubanga ido olusi ma asiti ga mura atijoadru ri si ra ma rutijo vudri di ‘a rii adu ya ni kpa. Andre ma ma ngasi di, mitiri ovi ma olujo vudri di ‘a rii cidru si sa ovi Rubanga ‘a lele molu ‘ausi ri ‘i. Mundru ta nza Rubanga ni dri kuru ki mgbe madri migeni ani ‘aa ni ra adusi adi ani ndre mi si kpe, kisa ani ‘aa. Ki amala azi ma mangasi, ‘Gbadru ani ‘aa ya?’ ki tee igenikaa nza kohwe mani ori nza sa migeni ani ma’di ta cidru bi di ri ‘i ni ra.
‘Ba cidru Rubanga gaka mgbe rii kaki endre ‘ba lali ri ani, ki ziti kaki endre mori si ondeki ma ra. Kaki endre nyiraa kaki ta cidru ide wa kusa kaki ta cidru ide aia ngasi wa ani kusa nyiraa ewo zisi mendre ‘aia andraga kendre ma’di lali vua aw’i ako ri ani. Ki amala geni madri ri ‘a oluka lidri dravu ri ‘a dri ga ‘aa si, mesu ma sa ta ndre Rubanga dri laru retu ri tro. Ki ma driso uraa di Bu ni kare ruba’di ama lekaa di ‘bati ni ri ‘i ya ‘i. Vua lazi ani ledi oba tesa ma ebu ide okposi ndrole ta lejo Bu dri ‘a lele ri ni ‘i kusa Paradizo ni ‘i.
‘Ba ma tika ri ‘bati kaki ‘aidri ‘ba dini tro ri ‘bati ndre ‘au vua sa tro ‘ba madri di ‘bati cidru kaki aci ekelezi ‘a sa lejo Rubanga dri ri laka ako. Odriki kaki uraa ma ilegi ekelezia ‘a rii oji saa para ku mgbe koko kodra ra si obiki ma imbale maya dru ekelezia ‘a ku ni kuru paka aca kati kati ma fonyi ‘baciri dri ri iga kpa. Mido acile ekelezia si ekelezia si mgbe naivu mido ayale ekelezia zi gaangwadru ama jo ni laga ire ri iga paka afu ca fonyi madri andraga ungwele Koleji ri iga ‘i.
Ra ma dujoadru kole da rii maya ekelezia di ‘ia rii adusiku ‘ba ‘aaru ri ‘bati obaki geni ta nze’jo ofu loso ri idri nza. Leidipi ekelezia na dri rii ani ma’di ofu onze’di ‘ba egweka di ri ingwi jo Opi dri vua laki ni rarijo ri ‘i saa nasi ojo ta unzi lejo Rubanga dri rii gajo mgbe rii kuru. Madri ra olu’jo vua mba’jo okpo ma lidri dini dri ri iga rii ‘aa, tee jo saa koca mani ma lini ti tro ku sa ‘i.
Ra ani jo ‘ba ka ‘ba ama olu ‘bazi ekelezia ‘a ri ‘bati ungwe ‘ba gale mgbe ri ‘i, mgbe muraa ekelezia madri rii anda vua ‘ausi maya bu ‘a ra. Ta ani ledii ondiku sa enga Bugu Ole ri ‘ia. Kaki joa enzi ‘ba koto sa joti bu dri ri si kpe ki ‘ba ziti ekelezia ziti ri ‘ia ri ‘bati isa kaki joa asiti ‘aidri ri oga enzi si. Masa nainga ma yare gbu ekelezia ‘a kuru rii, mitiri ta ta ani di idri nza ni kuru.
Ki ‘ba ‘aidru ungwele-ofu nzeka ‘bani asi ecojo di ‘bati ‘a ta nzele rii oviru ma andrani erile ati ra ri tro kuru. Kaki joa jo amigeni Yesu ni leti anda ri si ri, ama engwi enzi ako. Vua tete ‘ba enzi ako ri ‘bati kovu bu ‘a ra rii ni. Vuasa tro kaki joa Yesu ite’de amani anda kuruce dri si ‘au disidru draa ama enzi ‘ba ku ra rii ama ‘ba anda ri ‘bati ‘i. Ki sa ati ri si migeni dii kuru, ki meya mura ta ‘a driaru di, mgbe eriru ma uje ni ‘a anda vua ce. Molu driso ‘barangwa ako ara risi jo mani yajo bu ‘a, Rubanga kebea mgbe maya jo ma enzi ako ‘i, adusi Rubanga o’du enzi cidru rii pi.
Ekelezia dia geni ni mgbimgbi ani ekelezia ma engare ‘aa ru ri tro ‘aa vua ovi ‘aia ilegi jo eku hwejo Opi ni ri isa mgbimgbi laka ‘aa. Ki amala Bu ‘a oluka kare laka tete ‘ba anda ubiku upele ra ri ‘bati ‘a toka laka wa rii ni si, karura mani nyiraa ‘ba ekelezi di ‘ia di ‘bati ‘a geni dii ce ri ‘i. Adusi ekelezia di ka lini hwe Yesu ‘a ru ni dri ana ari tro okpo si, itu Rubanga cidru si ama mugati nya vua ama vino mvu ra. Adusiku ta ani di ojoru kideru dini ni Bugu Ole ri ‘ia ra, ako ma ‘i ra. Ki vule vule ni ako mesu ‘ba ziti ka lonya di nya ‘aini ehwi ani anda ri erika ako.
Mitiri Endri Ole rii kolu asiti ‘ai ‘ba dri iga vua kolu asiti ‘ba anda ri dri iga vuasa tro ka ‘aia ilegi ni eri. Disidru migeni Endri Ole ri kolu ma asiti ga. Ani mgbe ezesa amaci Rubanga tro ni cuwidru vua hwa alusa ma dri ociru ofu loso ma igenile ri si ku. Jo saa unzi ri keya keca mani ni sa, ma ta jo Rubanga dri kendre ma’di ridi ma laga ga ire ri ani. Mitiri ka ma ti ni eri ra jo ajo laka ta ma jole ma’di zi ni alusa kpe rii ni ‘i. Disidru migeni ani ‘au vua tesa molu anisi.
Madri ama ta ‘ba vuka lemu asiti eco’jo ri iga ri’a vujo na ‘a ‘ausi ‘ai kojo’dru ta ti mgbimgbi si ri ‘a ehwi ni erile kpe vua ma ‘ba vuka ilegi abiri tajo ri iga ri gugu. Ta ledi ani ledi ndreka si mgbe midoa urale, ‘Ki gba ‘ba di ka ‘aia saa ni ivolo nza ‘aii bijoadru Endri Ole rii esu’jo ‘i adusi? Endri Ole ri kesi ‘aia dri ga wa ni kesu ‘a ‘ai enzi ako jodiniri mgbe Endri Ole ri kolu ‘aietro ru. Karuni ‘ai ‘ba enzi ‘ba ri ‘i. Hwa eya ‘aia dri ga ku tee komaki mori cidru si ni sa ‘i.’ Kiza oko ma ‘aisi ci. Mura madri ‘ai lali. Ledi uraka uje ‘a si, meya mura ofu loso ma igenile rii tete ce rii ‘au vua ofu loso ‘baziti ri ‘a igenile rii mbi.
Ma lecuma ate tri palanda. Oji dria kinya 10 adri olure dini madri ma ngasi ri si. Ki draa saa disi lazi amvuka pi ri ido efule ma uje ga vua ma asiti ga. Muraa, ‘Ofu loso ana ari dri kuruce dri ri si ma enzi ako, ki ‘ba ziti ‘ai ‘ba ri isa kpodrusi ‘ai enzi ako ‘a? ‘Aisa igeniki ofu loso dii ra ya?’ Madri ani di mido lazi dii uzile adusi ya isa ku. Lazi dii mgbesa enga ma uje ga oba hwa alusa azi ‘ausi ma’dizi ‘au ku. Dii ta ma igenile ma ngasi ri ‘i disidru kole hwa ma’dizi kede ku. Vua kolu lazi anda ma’di zi zijo ana ra ni esujo ri ‘i.
Ki mido lazi di zile mani mangasi. Adusi ma olure koleji ‘a rii, mido ta ziti idele kendre ta lejo dini dri ‘a lele ku ri ani oko ma asiti engwi initiri oba geni madri ri isa kegwe egwe. Ani draa di ta ma igenile rii keya kolu ce ya isa ku. ‘Jodiniri ma ma ungwe ma ngasi ma’di anda ri ‘i ya? Gba Yesu oje ma enzi ni cidru si ra ya?’ Driluci amgbu di tro sa, mupi ma mori si ofu loso ana kuruce dri igenire ga ako aje ma ujea ‘a ni ‘ausi. Ki jo muri ma ma ngasi ingoni sa, ma egweka di koya andraga vua mgbe midoa ayale ekelezia ‘a be ku.
Ta ma idele rii tesa mebua ra ‘i jo. Driluci di ‘ia uzuza di tro sa, meya mesu ta anda rii ra. Meya meri ta ofu loso eyidri vua Endri dri ri idri ra oko eya madri kendre eyi lovi ‘a vu jika ri ani. Ta ani ideru gba okpo retu ri si ebe ma kendre mowo ani. Ki ofu loso ri erika si, ale draa majo pelere ta cidru andrani ma igenile na ‘bati ta ma igenile driaru di tro sa mbi.
Aba hwa alusa enzi madri rii Yesu ‘a ru ga kuru. Ara risi madri odu ma enzi ni cidru si pi ako ara risi mengwi ma’di anda ri ‘i, ki kumbe ta ledi ‘bati ce ku. Yesu emu vudri di ‘a oko esu batisimu konyi ani adu? Ana le ni ani kite’de amani ani anda enzi ako bilo angwa ani ‘i ya? Kusa kite’de amani ani emu ‘ba ani ‘i ya? Kusa kete’dru lejo profeta ti si ana dra ni dri ‘i ya? Orobi angwa sa gaadru sa ubi ma ta andrani ati batisimu dri ma igenile rii ta mbi rii ni kuru. Ta ce rii Yesu esu batisimu Yoana dri ‘i, adusi ani ma’di mba’di ‘ba cidru ni kare ga ri ‘i, vua batisimu nasi dru, enzi amadri rii cidru obaru ana ru ga.
‘Oh! Ledii ra Yesu ‘a engwijo Biloangwa Rubanga dri enzi ama dri rii cidru nzi’di ana ru ga ri ‘i ri ‘i!’ Draa ta cidru ‘aa rii anda. ‘Yesu esu lamgba kuruce dri ma enzi si. Ledii ta ma olu’jo ma asiti ga enzi ako ri ‘i.’ Saa mgbe gaadru ma ta nijo ofu loso eyidri (Yesu ‘a batisimu dri), ana ari dri (kuruce dri ri tro), vua Endri Ole ri tro (dii jodia Yesu ni Rubanga rii), enzi cidru ma itirile ma asiti ga rii ‘oe iyo.
Draa gbadru ma enzi ako vua ma ma’di anda ri ‘i vua tatia aserega Endri Ole ri kemu kolu ma asiti ga ra. Geni ati ati ma bale kuruce driaru ri idri ri ate ma jele pelere enzi madri cidru ma asiti ga ri ‘ia ni ku. Jo ini nya enzi obaru Yesu niru ovi ingonisi ya ni anda anda kuru, karuni nya enzi ka rebe kpe vuasa tro Endri Ole ri kolu nya asiti ga kpe. Manzo Opi ni ra. Adusiku oba mani Endri Ole ri esuka engwi ofu loso pelere disi adu.
Mori zi ebuka ako, mesu lebe ma enzi dri rii ofu loso eyidri vua Endri dri ri si vua rijo driadru oya andraga Endri Ole ri kolu ma asiti ga. Draa, lecuma retu ri tro ma ma ungwe ma ngasi enzi ako vua ma asiti kanzo okposi adusi Opi Bu dri ri ‘a oluka maa ‘i si. Ale madu draa saa dii Opi ni anzo jo ana mani tutu ani ledi ani ledi hweka laje ako si. Alleluya!”
‘Ba laku Endri Ole ri dri ri esuka ra ri ‘bati kaki joa Rubanga ‘a andra ga ‘ai enzi ako ni wa. Ide ta ku tee nyigeni Yesu ni okposi ani ingoni sa ‘i, jo nyigeni ofu loso Yesu ‘a ehwele ‘bani dii kuru, karuni dri enzi olu nya asiti ga ‘aa. ‘Ba ‘ai ledi ani ledi ‘bati kaki ‘ai unza ‘ai ngasi vua kaki Rubanga isa unza tro. Adusi ‘ba ‘aidi ‘bati esu Opi ni kuru. Ki jo ma’di enzidipi ri ole ani kesu tileci Endri Ole ri tro ni ra, kolea duba kebe ani unzaka ana ngasi ni ra, koko ka ‘i ani ide enzi ra. Kujri hwa kesi ca ofu loso eyidri vua Endri dri ri igenile kpe. ‘Ba cidru ofu loso pelere ndro di igeni ka ra ri ‘bati olure dubasi kesuki laku Endri Ole ri dri rii ra.
Ki jodiniri Endri Ole ri ka enzi ‘ba ni aduta jo? Ka ‘aini ra hwe ‘aini lebe esu’jo ‘aia enzi si ‘aia ofu loso pelere di ‘aika ‘ausi dii ofu loso lejo eko’di batisimu Yesu dri ri si vua ana ari kuruce dri ri si ri ‘i. Ki jo tee nya olure enzi tro diisa jo nyijo nyi dri enzi ako, kojoru hwa nyi Endri Ole ri esu kpe. ‘Ba cidru ofu loso pelere di ‘aika kuru ki jokaa ‘aidri ‘aia asiti ga enzi iyo ri ‘bati kaki ‘ai unza ‘aiangasi vua kaki raa ‘ai ka Rubanga isa unza tro. Kole enzi ‘ba cidru kesu ofu loso pelere ofu loso eyidri vua Endri dri dini diani di koba kaki laku Endri Ole ri dri ri esu ra. Jo te di ani ku ri kaki lipa esu lamgba Rubanga dri unzigo di ‘a dri ga kpe.
‘Ba anda ri ‘bati ka remu Endri Ole ri tro kare alu ga wa rii ‘aia ‘aia enzi ni ruka si
Ma ta jo ‘ba ofu loso eyidri ri ‘aika ofu loso Endri dri ri tro ra ri ‘bati dri kendre, ‘ba Endri Ole ri esuka ra ri ‘bati dri ani. Draa anyiba ondreki dri ta Rubanga ‘a jole ‘ba anda ri ‘bati ni ri ni. Ofu atijoadru Yoana ‘a sile 1:9, ga ojo, “Ki jo ‘ai enzi amadri ra, Rubanga ni anda vua igeni ‘a wa ka ama enzi ni ebera ka ama je ta cidru amadri unzi ri ‘ia pelere.” Lejo angwa di ‘a ta jole rii kolea amini ama ngasi ama enzi ni rujejo pelere ‘i ama ofu loso pelere ndro jodia Yesu odu ama enzi ni cidru ana batisimu si pi vua aku ‘ai ana draka kuruce dri si rii igenika si. ‘Ba anda ri ‘bati kolea duba kojoki ‘aia enzi ni Rubanga ‘a andra ga ra. Jo te ledi ani kuri kaki tileci esu Endri Ole ri tro kpe. ‘Ba anda ri ‘bati kole duba kai ki ‘aia enzi ni ra vua kaci ki andraga ofu loso ri igeni ka tro ‘i.
Andrani eze, ofu loso pelere ndro Yesu ‘a batisimu dri dii ofu loso ana ari dri ri tro oje ama enzi ni cidru pelere disidru, kole ‘ba ‘anda ri ‘bati cidru kigeniki ofu loso ani dii ‘au ‘ausini kaki lebe ‘aia enzi dri ri esu ra. Amala draa dinisa Opi ebe enzi cidru ‘aia idele rii ofu loso eyidri ri si vua ofu loso Endri dri ri si ra. Disidru kole ‘ba anda ri ‘bati kigeni ki ofu loso pelere dii ‘aini lebe esu’jo ‘aia enzi si wa ni ‘au. ‘Ba anda ri ‘bati kaki ‘ai asiti ni je pelere wa ni kesua tete kaki ofu loso eyidri vua Endri dri di ‘ai kpa vua di kesua kaki ‘aia enzi tema dii ga mgbe ni kpa. Ama Opi oje enzi ‘ba anda ri ‘bati dri rii eze ana batisimu si vua ana ari si. Disidru, ‘ba cidru ‘aikaa ra ri ‘bati engwiki ‘aia enzi ni ‘a si cidru kulala. Adusiku, kolea ‘ba anda ri ‘bati kojoki vua koruki ‘aia enzi ni Rubanga ‘a andraga ‘i. Vua kolea ‘ba anda ri ‘bati kengwiki ‘ai Yesu ‘a batisimu dri ri iga ana ari tro, adusiku dii ta badia ofu loso pelere di’a engwi’jo ndi ri ‘i, ta di ideru ‘aini layu hwe’jo ‘aia enzi ‘a dri ga si. Disidru, tesa kaki olu lidri adu ga’di Endri Ole ri si ndru ri si. ‘Ba cidru ta ndreka Opi dri bi baka ‘aia aw’i ako ni ga ku ri ‘bati kaki tileci loso ri esu Rubanga tro ra vua kaki evu kaki ranzo ofu loso eyidri vua Endri dri ri si ra.
Ama uje anda ti leci esu’jo Endri Ole ri tro ri esu ingoni?
‘Ba lekaa ‘ai kesu tileci Endri Ole ri tro ri ‘bati ‘a weli ni amgbu. Ki oniki hwa ‘ai koba ta di kengwi anda rii ingoni ya ni ku, jo tee kai ki Yesu ni ra sa ‘i. Ki ‘ba amgbu evu esuki Endri Ole rii ‘aia ofu loso eyidri ri ‘aika ofu loso Endri dri ri tro si vua idoki ‘aia tileci Endri Ole ri tro rii mgbe saa nasi.
Alua ri ani, leti tete aludi ma’di anda ri ni Endri Ole ri esu’jo wa rii kole duba koni vua ka ‘i ofu loso anda eyidri vua Endri dri dii ‘au. Adusiku tileci ‘ba anda ri ‘bati ‘a lofo ga Endri Ole ri tro rii hwa alusa ka resu ofu loso rii ako kpe. Ki tileci Endri Ole ri dri le? Dii tete adu rii anda ofu loso pelere di dri ri ‘aika si.
Rubanga ojo ta’ba ni di ka enzi ide ana lidri ‘a ni ru
Ofu atijoadru Yoana ‘a sile 1:10,ga ojoru, “Jo oce ide enzi ku ri, karuni o’ba Rubanga ni ma’di enzo ri ‘i, lejo driaru ama asi ga iyo.” Ma’di zi hwa alusa enzi ide’di Rubanga ‘a andraga kuru ani iyo. Adusi Bugu Ole ri isa ojo, “Vu dri di ‘a hwa alusa ma’di zi ta anda ri ide’di ‘au ki hwa enzi ide’di kuru ani iyo” (Ekeleziasitic 7:20). ‘Ba cidru ide enzi Rubanga ‘a andra ga ra. Ki jo ma’di kojo ani ide enzi kuru ri, karuni ani ma’di enzo ri ‘i. ‘Ba ka enzi ide ‘aia lidri ‘a ni ru paka saa ‘aia drajo ri si ledii ra Yesu ‘a batisimu esu’jo Yoana dri enzi cidru vudri ri du ‘jo pi ri ‘i. Ki jo amide enzi kuru ri, kole amigeni Rubanga ni amani Aridipi dru ku.
Adusi Opi ojo, “Lejo madri rii hwa alusa anya asiti ga iyo” rii ‘ba itirikaa ‘aia asiti ga enzi iyo ri ‘bati ni. Ki jo ‘ai ma’di dri rii ofu loso pelere ofu loso eyidri vua Endri dri di idri iyo, karuni ta ana lele rii rizaka. Ki jo ma’di anda rii kusa nosi ma’di enzidipi rii kojo ana asiti ga enzi Rubanga ‘a andraga iyo, karuni ani ni ofu loso pelere di igeni ka isa ta nya ri ‘i.
Oip ohwe ‘bacidru ni dride dru ofu loso pelere dii ‘au. Ajo enzi cidru amadri rii vua aru enzi di ‘bati rii amani lebe laka ri esujo ofu loso di si. Kolea amengwi ofu loso pelere Rubanga ‘a ehwele amani di ige amani lebe sujo ama enzi ni ‘a vua amni ‘ausi tileci esujo Edri Ole ri tro.Uje anda tileci esu’jo Endri Ole ri tro wa rii tete geni baka ofu loso eyidri ri idri ofu loso Endri dri ri tro, vua tete ‘ba ‘aidru ofu loso eyidri ri aika ofu loso Endri dri ri tro ra ri ‘bati kaki tileci esu Rubanga tro wa rii ni.
‘Bacidru anzu lofo Rubanga tro lolu enzi ‘aia esule Adamu ti dri Eva tro ri si ‘i. Ki draa amale, ama ehwi enzi dri ri esuka karezi ga ra si, kolea amada dri tileci esu’jo Rubanga tro di. Ki ledi idejo, kolea edakidri Yesu Kristo ‘a ofu loso eyidri vua Endri dri ri iga vua amoko amesu dru lebe ama enzi cidru ama lofo anzu’di Rubanga tro ri iga.
‘Ba ofu loso pelere di ‘iaka ri ‘bati kaki lebe ‘aia enzi dri ri esu wa rii ni vua Rubanga ka ‘ai iga Endri Ole ri si ra. ‘Ba anda ri ‘bati ka remu Rubanga tro kare alu ga, adusiku esuki Endri Ole rii ra. Disidru, ‘ba cidru esu ru lile Rubanga dri si pi ri ‘bati kolea kengwiki ofu loso pelere ofu loso eyidri vua Endri dri ri iga vua kole kigeni ki. Jo te di ani kuri kaki idoa tileci anda ri esule anitro kpe.
Laku Endri Ole ri dri ri kemu ‘ai bale ofu loso pelere di ‘a dri ga ri si. Kolea anyetro oniki ote rii laku Endri Ole ri dri ri kemu ama dri ga wa rii tete ama ofu loso eyidri vua Endi dri ri aika si. Ofu loso pelere di igeni ka ka amani leti udi ri awi Rubanga tro ‘au. Rubanga onyo abi ama lofo ni anzu’di anetro rii mgbu adusi ledii ta enzi ama tijo ‘autro ri ‘a idele ri ‘i, oko oba amesu tikleci anda rii Rubanga tro ama ‘ai baka ofu loso pelere ofu loso eyidri vua Endri dri di idri si.
Kolea obaki ama tileci ni Endri Ole ri tro kare aluga di. Tileci anda Endri Ole ri dri rii ma’di kesua ana lini esuka nza ofu loso eyidri ri idri ofu loso Endri dri ri tro si adusi ani ledii ta ‘ai ‘a pa eture ga ri ‘i. Ama tileci Endri Ole ri tro ri ka kare du kesu ‘a ama geni ba gba loku loku lebe ama enzi dri rii iga ama ofu loso ri igeni ka si kpa. Adusiku ‘ba lebe ‘aia enzi dri ri esuka kuru ri ‘bati kaki laku Endri Ole ri dri ri esu kpe. Ovi zi si, hwa alusa ma’di zi ka tileci esu Endri Ole ri tro kpe jo igeni ofu loso eyidri rii ofu loso Endri dri ri tro kuru ‘i.
Ki jo tileci esuka Endri Ole ri tro kolu nyini ta okpo ri ‘i ri, kolea ati nya ‘i rii hwa alusa nyigeni ofu loso eyidri rii ofu loso Endri dri ri tro kuru ‘i vuasa tro nya enzi eberu kuru ‘i. Jodiniri ile gba tileci esuka Endri Ole ri tro ni ra ya? Jodiniri nyigeni ofu loso lejo eko’di batisimu Yesu dri ri si vua ana ari si rii ‘au. Ta di koba nyi lebe nya enzi dri ri esu ra vua nyiko nyi Endri Ole ri isa esu nya asiti ga ra. Ofu loso ani pelere dii gbadru ka nyini tileci Endri Ole ri tro ri hwe ra.
Adusi Opi ojo, “Lejo madri rii hwa alusa anya asiti ga iyo” rii ‘ba itirikaa ‘aia asiti ga enzi iyo ri ‘bati ni. Ki jo ‘ai ma’di dri rii ofu loso pelere ofu loso eyidri vua Endri dri di idri iyo, karuni ta ana lele rii rizaka. Ki jo ma’di anda rii kusa nosi ma’di enzidipi rii kojo ana asiti ga enzi Rubanga ‘a andraga iyo, karuni ani ni ofu loso pelere di igeni ka isa ta nya ri ‘i.
Oip ohwe ‘bacidru ni dride dru ofu loso pelere dii ‘au. Ajo enzi cidru amadri rii vua aru enzi di ‘bati rii amani lebe laka ri esujo ofu loso di si. Kolea amengwi ofu loso pelere Rubanga ‘a ehwele amani di ige amani lebe sujo ama enzi ni ‘a vua amni ‘ausi tileci esujo Edri Ole ri tro.Uje anda tileci esu’jo Endri Ole ri tro wa rii tete geni baka ofu loso eyidri ri idri ofu loso Endri dri ri tro, vua tete ‘ba ‘aidru ofu loso eyidri ri aika ofu loso Endri dri ri tro ra ri ‘bati kaki tileci esu Rubanga tro wa rii ni.
‘Bacidru anzu lofo Rubanga tro lolu enzi ‘aia esule Adamu ti dri Eva tro ri si ‘i. Ki draa amale, ama ehwi enzi dri ri esuka karezi ga ra si, kolea amada dri tileci esu’jo Rubanga tro di. Ki ledi idejo, kolea edakidri Yesu Kristo ‘a ofu loso eyidri vua Endri dri ri iga vua amoko amesu dru lebe ama enzi cidru ama lofo anzu’di Rubanga tro ri iga.
‘Ba ofu loso pelere di ‘iaka ri ‘bati kaki lebe ‘aia enzi dri ri esu wa rii ni vua Rubanga ka ‘ai iga Endri Ole ri si ra. ‘Ba anda ri ‘bati ka remu Rubanga tro kare alu ga, adusiku esuki Endri Ole rii ra. Disidru, ‘ba cidru esu ru lile Rubanga dri si pi ri ‘bati kolea kengwiki ofu loso pelere ofu loso eyidri vua Endri dri ri iga vua kole kigeni ki. Jo te di ani kuri kaki idoa tileci anda ri esule anitro kpe.
Laku Endri Ole ri dri ri kemu ‘ai bale ofu loso pelere di ‘a dri ga ri si. Kolea anyetro oniki ote rii laku Endri Ole ri dri ri kemu ama dri ga wa rii tete ama ofu loso eyidri vua Endi dri ri aika si. Ofu loso pelere di igeni ka ka amani leti udi ri awi Rubanga tro ‘au. Rubanga onyo abi ama lofo ni anzu’di anetro rii mgbu adusi ledii ta enzi ama tijo ‘autro ri ‘a idele ri ‘i, oko oba amesu tikleci anda rii Rubanga tro ama ‘ai baka ofu loso pelere ofu loso eyidri vua Endri dri di idri si.
Kolea obaki ama tileci ni Endri Ole ri tro kare aluga di. Tileci anda Endri Ole ri dri rii ma’di kesua ana lini esuka nza ofu loso eyidri ri idri ofu loso Endri dri ri tro si adusi ani ledii ta ‘ai ‘a pa eture ga ri ‘i. Ama tileci Endri Ole ri tro ri ka kare du kesu ‘a ama geni ba gba loku loku lebe ama enzi dri rii iga ama ofu loso ri igeni ka si kpa. Adusiku ‘ba lebe ‘aia enzi dri ri esuka kuru ri ‘bati kaki laku Endri Ole ri dri ri esu kpe. Ovi zi si, hwa alusa ma’di zi ka tileci esu Endri Ole ri tro kpe jo igeni ofu loso eyidri rii ofu loso Endri dri ri tro kuru ‘i.
Ki jo tileci esuka Endri Ole ri tro kolu nyini ta okpo ri ‘i ri, kolea ati nya ‘i rii hwa alusa nyigeni ofu loso eyidri rii ofu loso Endri dri ri tro kuru ‘i vuasa tro nya enzi eberu kuru ‘i. Jodiniri ile gba tileci esuka Endri Ole ri tro ni ra ya? Jodiniri nyigeni ofu loso lejo eko’di batisimu Yesu dri ri si vua ana ari si rii ‘au. Ta di koba nyi lebe nya enzi dri ri esu ra vua nyiko nyi Endri Ole ri isa esu nya asiti ga ra. Ofu loso ani pelere dii gbadru ka nyini tileci Endri Ole ri tro ri hwe ra.
Copyright © 2021 by The New Life Mission
