- All e-books and audiobooks on The New Life Mission website are free
- Explore multilingual sermons in global languages
- Two new revised editions in English have been released
- Check out our website translated into 27 languages
Due to COVID-19 and disruption to international mail service
we have temporally suspended our ‘Free Print Book service’.
In the light of this situation we are not able to mail you the books at this time.
Pray that this pandemic will end soon and the resumption of the postal service.
Pray that this pandemic will end soon and the resumption of the postal service.
Ta tajore driaru ri `i 8: Endri Ole ri `i
[8-6] Nya ‘i ausini Endri Ole ri kolu nya ru ga (Mateo 25:1-12 ojo)
(Mateo 25:1-12 ojo)
“Opi ‘bu dri kendre dini, inzonzi mudri ojiki ‘aia tara ni tro ovuki izi’dipi ‘a dri ni a’ure. Tou ‘ai ‘a rii lali, vua tou ri ‘bati ciri. Lali ri ‘bati o’jiki ‘aia tara ni tro ki o’jiki adu kuru, andirisi ciri ri le o’jiki ‘aia tara ni ‘a adu tro. Izi’dipi ‘a ecaka oro si, o’du i’do ‘ai ulika oko odeki o’du ga. Ki ini ‘a di uduku eriru: ‘Izi’dipi, eca ra; anyoyi angwe ana dri ni ‘aure!’ Ta di erika si izonzi di ‘ba cidru opiki mi ra oko ideki ‘aia tara ni baba. Vua lali rii ojoki ciri ri ni, ‘Anyehwe amani anya adu ni ‘aa, ama tara kozi ozi.’ Ki ‘ai, ki, ‘Nosi, oca amani anyetro ku; cuwi si anyivu anyidri ejere ‘ba tara adu azika ri dri.’ Aia vure ejere ‘a rii, izi’dipi eca ra, ‘ba esule baba na ‘bati oto jo laje dri ‘i ‘a, koti ni oko abu ci. Izonzi na ‘ba eca vule, ojoki, ‘Opi, Opi, nyawi amani koti!’ Ki Opi ‘ai, ‘A’jo, anyini loku loku, Ani anyi ku.’”
“Opi ‘bu dri kendre dini, inzonzi mudri ojiki ‘aia tara ni tro ovuki izi’dipi ‘a dri ni a’ure. Tou ‘ai ‘a rii lali, vua tou ri ‘bati ciri. Lali ri ‘bati o’jiki ‘aia tara ni tro ki o’jiki adu kuru, andirisi ciri ri le o’jiki ‘aia tara ni ‘a adu tro. Izi’dipi ‘a ecaka oro si, o’du i’do ‘ai ulika oko odeki o’du ga. Ki ini ‘a di uduku eriru: ‘Izi’dipi, eca ra; anyoyi angwe ana dri ni ‘aure!’ Ta di erika si izonzi di ‘ba cidru opiki mi ra oko ideki ‘aia tara ni baba. Vua lali rii ojoki ciri ri ni, ‘Anyehwe amani anya adu ni ‘aa, ama tara kozi ozi.’ Ki ‘ai, ki, ‘Nosi, oca amani anyetro ku; cuwi si anyivu anyidri ejere ‘ba tara adu azika ri dri.’ Aia vure ejere ‘a rii, izi’dipi eca ra, ‘ba esule baba na ‘bati oto jo laje dri ‘i ‘a, koti ni oko abu ci. Izonzi na ‘ba eca vule, ojoki, ‘Opi, Opi, nyawi amani koti!’ Ki Opi ‘ai, ‘A’jo, anyini loku loku, Ani anyi ku.’”
Endri Ole ri emu adi ni?
Emu ‘ba lebe esuka ‘aia enzi ni ‘a si ‘aia
batisimu Yesu dri ri ‘aika ana
ari tro ri ‘bati ni.
‘Ba izonzi mudri laku Endri Ole ri dri di esuka ra ri ‘bati ‘a vile rii adi ti ‘i?
Lejo rusi’di oru ledi iga, ojoru izonzi ciri rii tou vua izonzi lali ri isa tou. Tou lali di ‘bati oziki tou ciri di ‘bati ‘ai kamu dru ‘aia adu ni ‘aietro su. Ki ciri di ‘bati ‘aiki lali di ‘bati ojoki, “Nosi, oca amani anyetro ku; cuwi si anyivu anyidri ejere ‘ba tara adu azika ri dri.” Disidru, izonzi lali di ‘bati ‘a vure adu di ejere pi rii, izonzi tou ciri ‘aidri adu ‘aia tara ni ‘a ‘aa di ‘bati ovuki mgbe otoki jo laje dri ri ‘ia pi. Ki jodiniri dria ama adu ide Opi ‘a dri ni ‘aujo ingoni? Ta te adu amani idele wa rii kole amute ani lebe enzi dri ama asiti ga ri tro.
Ama ‘ai drile esu ‘ba lofo eri. Alu rii ‘ai ofu loso enzi cidru ‘a rebejo ri idri ri ‘i. Di koba ma’di ka Endri Ole ri esu wa rii ni. Zikajo rii oluka ‘ai tro ovi ma’di alu alu ‘a dini dri iga-laka mgbimgbi alusa nijoadru di Opi ebe ma’dizi ‘a enzi ni ra ya ni iyo.
Ki ‘ba mbaka driso ‘aia geni dini dri ‘aia ngasi ri idri okpo ri ‘bati, lejo ofu loso pelere di dri ri kolu ‘aini teri anzi ri ani. Kendre ondiku inzonzi tou lali ri ‘a vuka adu ejere saa izi’dipi ‘a eya’jo ri si ri ani, ‘ba cidru rifuka ekelezia ‘a si ayaka ata ‘ausi ‘ai kesudru Endri Ole ri ni si ri ‘bati kaki hwa alusa ma’di zi unza ‘au ku ki kaki ai unza ‘aia ngasi. ‘Ba ‘ai ledi ani ledi ‘bati oni ta ce ‘aini rajoadru odu vulega lejo alijo ri kendre ecare sa kesu ‘ai kesu ofu loso pelere dii ‘aia asiti ga ri ni dri ku. Kaki lea ‘ai kesu Endri Ole rii ‘aia ‘aia ta mika ni ite’deka Rubanga ‘a andraga si. Draa anyiba ondreki dri enzi ruka leidipi ekezia dri ri ‘a gaga dri ana ‘jojoadru esu ani ole ani kesu Endri Ole rii ausi ri ni. Enzi ruka ani di kolu nyini konyi retu ri tro.
“Mide ta cidru rule’di mani Endri Ole ri esu’jo rii ra.
Ara risi jo madri ahwe ma mangasi dini madri ri ‘a vu ni okore ga ‘ai si, ma Endri Ole ri esu ra disi dru mido rifule ekelezia ‘a si di ‘a na ‘a. Ekelezia di bati ‘a alu ni ma’di zi na ‘a ‘aa ani dri ka oro’do aci si ri pa leri tro anisa kendre ana ebu lemu na iga ri ani ‘au. Ki ma’di lei’dipi dru lemu na iga rii ka ‘ba lekaa ‘ai kesu Endri Ole ri ni ri ‘bati ungwe alu alu, ka mgbe ma’di ledi ‘a ra vua mba’di ana andra ga ri di drilaga ‘a, koko kido ta jole ti mgbimgbi ri si. Kulu Maikorofoni tro dri ‘a kido ‘a owoka kojoa “Nyesu aci, nyesu aci” koko ka ana dri ni ti ‘ba dri, koba ‘ba ziti ri ‘a ru kido dile vua mikia kido nile ‘aia dri kidoa ‘ai ewile.Ako mido urakaa gba di di kolu leti anda ma’di ni laku Endri Ole ri dri ri esu’jo ri ‘i ya ‘i ki sa unzidru masa ma lemu ni ga ‘aa. Ki ta amgbu di ‘bati tro sa, Afu hwa Endri Ole ri esu si kuru.
Ki ta ledi ivu, aya ndi be dri mowo ako hwe dri ‘a ci mowo inia si ra. Abi mangasi ilegile uji ‘a sa ra ki sa hwe tazi ideru kuru. Ki na ivu, abi ilegile iniasi ra paka odu 40 ki sa hwa ama Endri Ole ri esule kpe. Ki oko o’du zi alu ungwe ma lini ta nijo Endri Ole ri idri ri iga. Lini dii sabiti ‘a karide vu alu, ki ka sabiti du tuderi.
Lini dii hwea Rubanga ‘a le ni dri, kuruce dri, onzika Yesu dri ri idri, dritika dri a dri, ‘oa Endri dri ri idri, vua ozo Endri si ri idri. Ki saa nasi ire kendre saa lini koba ekojo ri si, laponyi zi lini hwe’di lemu naiga ri emu oko oti ana dri ni ma dri ga ilegi ‘ausini mesu dru Endri Ole ri ni si, ako mide ta cidru kendre ana jokaa mani mide ri ani. Ta omva ma vuru ako movu gaadru andi nga oru mgbe mido owoka uduku si ere majoa “la-la-la-la” mangwa ‘a di di, Ki ma owore “la-la-la-la,” rii mgbe mido ta joka ti mgbimgbi reri’di tau ri si. ‘Ba amgbu ohwe mani anzo ma Endri Ole ri esuka si ni. Ki jo ma ega aduto, mgbe ori retu ri ka ma ko ni. Disidru, ako mido ebu idele lemu na iga mangasi ilili. Mitiri mangasi kole mide ebu ilili dii kendre okposi kendre ma bikaa wa ri ani disidru mgbe mido ma ebu di icale vu ndutu dri. Ki jo ati ma dri ni ‘ba avu ri ‘bati ‘a dri ga ni, kendre ‘aia ru koja ani, tee jo gaadru keya kengwi di sa ‘i. Ki ako andre ta orobi ‘a ma mi si ra ako mido lejo onzeka profeta ti si. Lau retu rii, ta cidru ma jole profeta ti si ri ‘bati cidru karide. Disidru erijo saa nasi, ungwe ma kare ubi ga oko adi ma ndre kendre ma’di retu itu ogboro ide’di ri ani. Ki ori oko ma ci. Ki o’du zi alusi, meri u’duku zi ojo, “Oya aya si kare si kare si dini ku, ra rii nyimu nya familia ti ikonyire ‘ausini ‘aisa kesukidru lari ra.” Amala, Esu ani ta ungwele lari dii aduya ni ku. Ani te ote rii ta ‘baziti ri ‘a jole mani ri ‘i-adusi ojoki mani jo mebu dride Endri Ole ri dri dii ku, Opi kodua ma dri ga si pi. Saa ziti si, Ma ma mori mangasi ri ebuka si ori, kisa midea mebu dru ku ni kpe.
Odu zi alu, meri izi zi ‘ojo ole ana lidri ni hweka Yesu dri disi mungwe ma ozi ti kare aluga. Ahwe ani ni ofu ati ati ama vu ani endrere ni kuru. Sa mgbe amesu ‘ojo’zi di ori andidri ketumi ga ka ama te oko ojo amani, “Ani anyi evu madri di ‘a ‘i ni ote .” Disidru mgbe ido eyi usule ama ‘iru kojoa, “ojo enga ka itu ‘a efure ga ri ‘bati ‘a mgbimgbi ni ‘ojo itu ‘a dere ga ri tro iyo!” Izi di ka ama ungwe “Ojo Yesu dri ‘i,” ka dri ‘ja amai mi kojoa, “‘Ma’di ani zi di le ‘ai tro, ki zikajo nale ‘ai ako.” Ta ‘ojozi di ‘a jole dii eriru ma uje ni ‘a kendre odi ma dri mgburu si ani. Ako mido uralea ta joisi ma idele di ‘a mgbimgbi ni ta ‘ojozi di ‘a idele ri tro iyo. Ta cidru ma idele ri si mesu Endri Ole rii kuru adusiku enzi olu dri ma asiti ga ‘aa.”
Enzi di ruka si, mitiri anyetro adiki ndrea Endri Ole ri esuka ni ta ama mori ‘a care kpe ri ‘i ni ote. Adusi ‘ai ani ovi ledi ani ledii hwa alusa enga lejo Rubanga dri ri iga ku, ‘ba cidru oluka lidri dini dri diani di si ri ‘bati hwa alusa esuki adu ‘aia tara ni ‘a ku.
Tara Bugu Ole ri ‘ia ri ka ta jo ekelezia dri vua adu le ka ta jo Endri Ole ri idri. Bugu Ole ri kojoa ‘ba cidru ayaka ekelezia ‘a be ri ‘bati, jo ekelezia ‘aia acire rii kolu ekelezia Rubanga dri ri ‘i kusa ‘au ku sa, jo ‘ba ‘aaru rii esuki Endri Ole rii kuru karuni ‘ai ‘ba lali ri ‘i.
‘Ba lali rii tesa lejo ‘aia dini dri ri ka ‘aia asiti ni za ni kaka asiti imba tesa okpo odu cidru si lini ‘aia dini dri ‘a vu ni okore ga. Mgbimgbi ani, ‘ba lali ri ‘bati ‘a asiti kogwe ‘aia ta lele mi ako dru Rubanga ‘a dri ga ri si. Ki jo tee ama’jo ama ama itirika ama ngasi di kodu nosi cm 20 karuni ka o’du du ndi anini tete cm 1 isa igwe’jo kpo ni ‘i, disidru karuni ka o’du ndi ndi du 20 anini ama ama itirika ama ngasi di gwe’jo aci si kpo ‘i. Aia ‘ai itirika ‘aingasi ri ka mori esu ‘aia ru ga aia ‘ai ilegi-inini ri dri si, vua ilegi ini ‘a ru ri si, ilegi abiri taka tro ri si, vua ayaka ilegi leco eji’di ri iga si, ki sa tro ‘aia ‘ai itirika di kaci ‘aia ru ga ‘aia lidri ‘a ni ru. ‘Aia ta idele ‘aia ‘ai itirika si dii hwa alusa egwe ‘aia lidri ni ‘a ku ra rii kaci ‘aia lidri ‘a ni ‘a ru kogwe.
Ki ama ama itirika cuwi ama ngasi dii emu ogwe ndui pi rii ru Yesu dri si. Kaki aci ekelezia ‘a kaki ‘aia ‘ai itirika ‘aia ngasi di igwe kongadru pi si sa ‘aia asiti ora ta ku disi idoki mgbe tazi ndrule ‘au. Ra ta di dri rii ‘adusiku ta cidru andrani ‘aia nile ote ri isa enga tema aidri ‘aianga si; disidru, kolea kobaki asi okpo ta dii idure ga ‘ausini ingwe anda di kegwedru ‘aia asiti ga ku. Adusiki, kaki Endri Ole ri esu ‘ai ovi di ani disi kpe. Ta ‘aia asiti ga ria gweka ‘aia asiti ga ni ni ose hwa ‘aia drini ‘aini Endri Ole ri esu’jo ku.
Kole ama cidru kuba ‘ai ti anda anda rii amani Endri Ole ri esu’jo Rubanga ‘a andraga ‘au. Te ledi si vua ‘ausi adite ama Endri Ole ri esu wa rii ‘i. Ama ki gba ‘ai badia ama laku Endri Ole ri dri ri esu wa ri esu ingoni? Anda lokugo rii esua ofu loso pelerego lejo eko’di Yesu ‘a batisimu Jurudano ‘a ri si vua ana ari radi kuruce dri ri si ri ‘i ‘a.
Rubanga ojo ama “Ngwanzi ‘ba ta unzi ideka ri dri ‘i” (Izaia 1:4). Kole amasa ‘aiki dii ama ngasi ‘i. Ta ‘ba ni dii mgbe ati ati sa oti ani enzi drile mgbimgbi mgbimgb 12 tro (Maruko 7:21-23). ‘Ba ka ‘ai ikonyi aingasi ‘ausi ‘ai kide enziku ni kpe adusi kaki idoa enzi idele saa ‘ai tijo risi paka kaki fu udra.
Yoana 1:6-7, ga osiru, “Rubanga eze ma’di ana ofu ni eji’di rii, ru ani Yoana ‘i, emu ‘ba ni ingwe ite’de re, emu ite’de’a ‘aini ‘ausini ‘ba cidru keri lejo anidri ni vua ka ‘i ki dru ani.” Yoana ni batisimu hwe’di ri ohwe Yesu ni batisimu ni vua oko oba enzi cidru vudri rii ana ru ga, ojo, “Dii! Biloangwa Rubanga dri enzi vudri ri du’di ri ‘i” (Yoana 1:29). Amesu lari ama enzi ni ‘a si cidru ra anzo kolu Yoana ‘a batisimu hweka Yesu Kristo ni si. Ki kesu oli Yoana kohwe Yesu ni batisimu ku vua esu kojo Yesu ni Biloangwa Rubanga dri enzi vudri rid u’di ri ‘i ni ku, ama ni ‘a Yesu odu ama enzi ni cidru si pi ana ari kuruce dri ri si ‘i ni kpe. Vuatrosa esu ama leti adu amani Endri Ole ri esu’jo ri ni kpe. Ki anzo kolu retu sadini Yoana ‘a hwele ri si.
‘Ai ovi disi, amengwi arusua baba engwika Yesu dri ri ute’ka ri ‘i, adusi ani izidipi ‘i. Ama izonzi Yesu ni igenika ra ri ‘i vua ama baba Endri Ole ri esule ‘i.
Jodiniri nyigeni ofu loso eyidri vua Endri dri rii nya asiti cidru si ra ya? Nya ‘i Yesu Kristo odu enzi nyidri rii cidru batisimu ana esule Yoana dri ri si ni ra ya? Bugu Ole ri ojo, “Ai kenga lejo nzele ri erika ni ga, vua nzele rii lejo Rubanga dri ‘i” (Roma 10:17). Amani Endri Ole ri esujo kole amigeni Yesu esu batisimu Yoana dri vua oko odra kuruce dri. Kole anyetro oniki ote rii ma’di ni ‘ai Endri Ole ri esu’jo wa ri esu’jo kole duba ka ‘i Yesu emu vudri di ‘a ‘ba ani, esu batisimu Yoana dri, odra kuruce dri vuaru oko onzi lidri di.
Tee endru sa, ‘ai ‘baa drile ni eri, kendre ondi izonzi mudri odo oru ledi iga ri ‘bati ‘a drile ‘a oluka eri ri ani. Nyidri nyi ewo ingo ri iga? Kole nyesu Endri Ole rii nya eyi ti ‘aika Endri tro si. Nya ya ekelezia ‘a’i, ki dri nyolu nyi Endri Ole ri ‘a emuka nya dri ga ni ute ‘a? Draa kole nyini leti anda ma’di ni Endri Ole ri esu’jo rii ote.
Ama Endri Ole ri esu wa rii ‘ai ovi ingoni ri si? Nyi gba Endri Ole ri esu ovi ojo dri si kusa nyuma ori unzi dri si wa ‘a? Nyi gba Endri Ole ri esu saa nya dra dri si wa ya? Nyi ggba Endri Ole ri esu nya dini caku caku di igeni ka si wa ya? Kole nyilegi Rubanga dri nya enzini rebe’jo o’du cidru si ya? Bugu Ole ri ojo amani Yesu esu batisimu vua efu eyi ‘a si angwe di, Endri Rubanga dri endre’di amamu ani ri esi ana dri ga. Esu batisimu enzi amadri rii cidru du’jo, vua kite’de dru amani musara enzi cidru dri si ani kemu ka repa kuruce dri ra ‘i.
Yesu esu batisimu Yoana dri ‘ausi odu enzi cidru vudri rii pi oko odra kuruce dri oba ‘ausi amesu lari ra vua draa ama Endri Ole ri isa esu ra. Dii lejo anda dri ‘i. Yesu esu batisimu Yoana dri, esu lamgba kuruce dri ama kare ga vuaru oko onzi lidri di. Kolea igeniki Yesu ‘a batisimu esule Yoana dri ri ‘bati ana ari kuruce dri ri tro ‘i ‘ausini adiki lebe ama enzi dri ri esu ra. Adiki ndrea Yesu ‘a batisimu ni nga (Mateo 3:13-15) Endri Ole ri esi egbwe retu ri tro kendre amamu ani ‘ba ‘aidru batisimu driaru ri igenika ra ri ‘bati ‘a dri ga ‘i.
Ma’di ni Endri Ole ri esu’jo, ka rule ma’di ni kole dubasi kigeni Yesu ‘a batisimu esule Yoana dri ri ‘bati ana ari kuruce dri ri tro kpa. Endri Ole ri kesi ma’di dri egbwe rere kendre amamu ani jo kigeni lebe ana enzi dri rii ra ‘i. Ki ‘ba ‘aidru draa dinisa lebe ‘aia enzi dri ri esuka ra ri ‘bati le kolea koniki ote ta dii engwi ‘aini adu rii ‘ai ‘aia igenijoadru ‘ai esu lebe ‘aia enzi dri rii ra ri si. Endri Ole ri kesi ‘ba ‘aidru igenikaa ‘ai esu lebe ‘aia enzi dri rii ‘aia asiti ga ra ri ‘bati ‘a dri ga.
Yesu Kristo emu vudri di ‘a kendre mugati vua vino lidri olu’di tadru ri hwe’di ri ani (Mateo 26:26-28, Yoan 6:53-56). Ki Yesu oce ani kefu eyi ‘a si ana batisimu esuka nivu ‘i di, uduku zi enga ‘bu ‘a, ojo, “Nyi ma Ngwaapi ni ma lele ndro ri ‘i, ma le ni kpo nyi ru” (Maeo 3:17).
Rubanga ni igenika ana peresu ina ri tro ni ta adu ri ‘i. Rubanga ni Ata Yesu dri ‘i vua Yesu ni ana Ngwaapi ‘i. Endri Ole ri isa Rubanga, Ta dii natruwasi emikiru alu kaki rungwe Rubanga alu ri ‘i.
Kolea nyini ote nyi hwa Endri Ole ri esu nya kuruce driaru ri igenika ‘adute si kpe vua kusa nya makaa ebu loso ri ideka si kpe. Nyi Endri Ole ri esu wa ni kesua tete nyai ‘a Yesu esu batisimu Yoana dri enzi cidru vudri ri dujo ni kpa vua kole nyigeni ama enzi ni cidru si obaru ana ru ga, kole nyigeni epa ani kuruce dri rii ama enzi ni cidru ebe’jo. Indre anda di ‘a ehwi ni tau vua pelere ani ingoni! Lebe enzi dri ri esuka ti laku Endri Ole ri dri ri tro okpo ku.
Rubanga ka ta jo amadri lejo ehwi epe ri si, ma’di nya ri ‘a IQ ni rijo 110 paka koca 120. Ofu Loso anidri ri ‘a ehwi ni erika ni ‘ba nya ri ‘bati ni sa adu. Tee ‘baciri driso kinya oluka 4 tia lofo 5 tro ri ‘bati ni sa ‘i, ofu loso pelere go di ‘a ehwini erika ni hwa ‘aini ta okpo rii ku. Ki kesu Rubanga kojo ta amadri ovi amani Endri Ole ri esu’jo ri idri ovi mgbi ri si ri, tee dini gba ama ehwi ani eri wa ‘a? Rubanga ebe ama enzi ni cidru si anda si oko ohwe Endri Ole rii dride dru ‘bacidru lejo anidri ri ‘aika ra ri ‘bati ni.
Rubanga ojo amani hwa alusa ama Endri Ole ri esu dri tika ama dri ga si kpe vua ilegi enzi rujo ri si sa ama Endri Ole ri esu kpe. Endri Ole ri esi ama dri ga ama abiri taka si ku ama lejo driaru ri laka si ku ilegi ilegi le iniasi ra be dri ri si ku. Ki ‘ai anda badia ama laku Endri Ole ri dri ri esu ama ngasi wa rii ingo ri ‘i? Ledii ‘ai ce jojoadru lokuloku Yesu emu vudri di ‘a ra ri ‘i, esu batisimu enzi cidru amadri vudri di ‘a ri dujo ra, odra kuruce dri, vua oko onzi lidri di.
Kole gba amigeni dini ya?
Kolea amesu lebe ama enzi dri ri ni vuaru amako amesu Endri Ole ri ni adusi? Amani olu’jo laki Opi Rubanga dri ri dri ‘i dru, ama Endri driaru ri le ra. Disidru, amani Endri Ole ri esu’jo, kole amigeni Yesu ni Aridipi dru, ana batisimu si vua ana ari si, vua tati ni eko’jo, kole amesu lebe ama enzi dri rii ra.
Ki Rubanga ka Endri Ole ri hwe ‘ba lebe ‘aia enzi dri ri esuka ra ri ‘bati ni ‘adusi? Ra ani ‘ausini ani koba dru alama ‘aia ru ga ungwejoadru ‘ai ‘ba anidri ri ‘i ‘i. Kubi dru ‘ba cidru Yesu ni ‘aika ra ri ‘bati lejo Rubanga dri si, ohwe ‘aini Endri Ole rii ta tema okpo riidru ‘au.
Adusi esuru ‘ba amgbu kolu ‘ia mbi risi ni. Ki batisimu Yesu dri ri igenika vua Endri Ole ri esuka isa adu rere. Ani ta adu rere ri ‘i ama ‘ba driadinisa Endri Ole ri esuka ra ri ‘bati ni ‘i, ki kolu ‘ba lebe aia enzi dri ri esuka kuru ri ‘bati ni okpo rere. Oniki hwa alusa anda ku disidru kaki bi ‘a Endri Ole ri esule leti ziti mgbi ri si, dii ovidru nosi ‘aia ‘ai ipaka lidri dini dri ‘ia ra ziti mbi mbi ri tro si. Oniki hwa alusa ori Sitani ‘a sale ri oba ‘aia dri ociru ra ni ku, disidru esuki kpodru ‘ai ozo dini ori unzi ri ‘a dri dule ni ri ‘ia.
Endri Ole ri kolu ‘ba ‘aidru batisimu Yesu dri ri ‘aika ana ari tro vua ‘ba lebe ‘aia enzi dri ri esuka ra ri ‘bati ‘a dri ga. Ki tete ‘ba Rubanga ‘a lari ni igenika ra ri ‘bati ka enzi ru jokaa, “Madri enzi iyo si ni wa rii ni.” Adusiku jo ma’di igeni ofu loso eyidri rii ofu loso Endri dri ri tro kuru, kaki joa hwa draa ‘aidri enzi iyo ni kpe. Alua ri ani, Rubanga isa ohwe Endri Ole rii dride dru tete ‘ba ‘aidru batisimu Yesu dri ri ‘aika ana ari kuruce dri ri tro ri ‘bati ni adusi ‘ai dii ‘ba lebe ‘aia enzi dri ri esuka ra ri ‘bati ‘i.
Adi ohwe sadini jokaa batisimu Yesu dri ri ‘bati ana ari tro odu ama enzi ni cidru si pi ni ni? Yesu ti, ana maju ti tro, vua Endri Ole ri ti tro ohwe sadini tadia dri ga rii ni. Adi uba tati ‘ba cidru ni lari hwe’jo ‘aia enzi ni ‘a si rii ni? Ata Ole ri uba ta ledia ti ni ni. Adi oko ide ta ana ti ubale dii ni? Yesu Kristo ide ni. Tati ‘a asere ga adi ojo draa ta Rubanga ‘a ti ubale dii cidru ideru ra ni ni? Endri Ole ri ojo ni.
Rubanga ole ama ecole ana ‘ba ti ‘i dru disidru oba ama maraga oko ohwe amani lari enzi amadri cidru ri ‘ia si batisimu Yesu dri ri si vua ana ari si. Disidru, ana peresu ina okpo tro ri ohwe sadini ama lari ni dri lebe ama enzi dri ri tro cidru ra.
Mateo 3:17, ga osiru, “Nyi ma Ngwaapi ni ma lele ndro ri ‘i, ma le ni kpo nyi ru.” ‘Ba cidru Endri Ole Rubanga dri rii ‘aidri ‘aa rii ‘ai ‘ba Rubanga dri ‘i. ‘Ai ana ‘baciri ti ‘i. “Nyi ma Ngwaapi ni ma lele ndro ri ‘i, ma le ni kpo nyi ru.” Yesu ni mgbe tema tema sa Rubanga. Ama Ata Rubanga kojoa amani, “Ki jo ile lebe nya enzi dri ri esuka, kole duba nyigeni enzi cidru ‘ba dri rii Yesu odu ‘bobo dru adusi ojo, Ma Ngwaapi ni alu tende ri, nyesu Endri Ole ri ni, nyiko nyengwi ma ‘barangwa ‘i.” ‘Ba cidru ta ‘di ‘abti ni igeni ka ribati kaki lebe ‘aia enzi dri ri esu ra kaki ko kaki engwi Rubanga ‘a ‘boronzi ti ‘i vua Rubanga ‘a izonzi ti ‘i. Ohwe ‘aini Endri Ole rii ‘ai ibi jo ana ‘boronzi tii dru. Ama lebe ama enzi dri ri esu wa ni kesua ama batisimu Yesu dri ri ‘ai ana ari tro kare aluga kpa.
Ki jo ‘ba kebe ta ‘aia asiti ga rii koko kigeniki ofu loso enzi cidru ‘a rebejo rii ku, kaki igenia enzi ‘ai tijo ‘autro rii driadinisa eberu ra rii ni disidru draa kole ‘ai kilegi andeka ako ilegi enzi rujo ri si ‘ausini ‘ai kesudru lebe aia enzi tematema ri dri ni si ‘i. Ki jo koluki icandi ‘ba ta di ani di uraka ri ‘i, Bugu ole ri kengwi ta ce rii ku vuasa tro ka ‘aia dri ni uci uci. Disidru, evu esuki geni mgbi rii kovu dri maju dri rii ra.
‘Bazitiri kojoa Endri Ole ri kemu ‘aia dri ga “ilegi si.” Ki ani ledii ta Bugu Ole ri ‘a jole ri si ce ku. Ani dii ka reri ta adu rii ku, ki Bugu Ole ri ojo Yesu efu eyi ‘a si ana batisimu esuka Yoana dri ‘a vuga di, mgbe Endri Ole ri esi ana dri ga amamu ani. Ta di ‘a jole ria ehwini jo ma’di ole laku Endri Ole ri dri esule, kole amigeni ati rii Yesu emu vudri di ‘a ra, oko esu batisimu Yoana dri enzi cidru vudri ri ‘dujo, esu lamgba kuruce dri vua oko onzi dra ga si lidri di di oba engwi ama Aridipi ‘i.
Rubanga ka amadri aduta jo jo amigeni anda dii ni ‘i vua jo amesu Endri Ole rii ni ‘i? Kojoa amani, “Nyi ma ‘bara ‘i. Nyi ‘bara ni ma lele ndro r ri ‘i, ma le ni kpo nyiru.” Rubanga kojoa ‘ba ‘aidru Yesu ni ‘aika vua lebe ‘aia enzi dri ri esuka ra ri ‘bati ni sa o’du andraga ri si alua ledi ani. Anda dii ta Rubanga ‘a ti ubale ama eco’jo ana ‘boronzi tii dru ri ‘i.
Ki draasa ‘baziti kuraa leti zi mgbi rii ‘aini Endri Ole ri esujo ‘aa. Ki nyitiri gba Endri Ole ri kemu nya dri ga nya owoka si kusa nosi mori nyidri nya ebule vudri ri si wa ya? Lejo Rubanga dri ri ‘a driba onzeru tete ana le si oko ohwe Endri Ole rii tete ‘ba lebe ‘aia enzi dri esuka ra ri ‘bati ni. Ojo, “Aba ma ‘bara esu batisimu ‘ausini ka anya enzi ni du cidru si pi vua aba eparu kuruce dri enzi di ‘bati si cidru. Mupe ma ‘bara ni anyini Aridipi dru. Ki jo nya ‘i lebe enzi dri ma ‘bara ‘a lejo ikole ni dii ra, gbadru mako ma anyini Endri Ole ri eze ra.”
Ama Ata kidea ondi kendre ana lekaa ri ani. Ki jo tee ma’di kolu ana aja ni dri iniaga cidru kowo tee ana lobou koba dria ire fejo sa, Rubanga eze hwa anini Endri Ole rii ku. Ki tete ka ani ija , kojoa, “Nyesu driso ta anda ri ‘a ehwini kuru nyenzu dria dini sa ta mbi ri ‘a ru ga. Endri Ole ri isa hwa emu nya dri ga ku jo iga ‘ai anda rii mgbe ‘i.”
Lejo di iga, ra ‘ba dri ri ka reco ovi si ovi si ki cara Rubanga ‘a ehwele ‘ai ni lebe ‘aia enzi dri dujo ri ‘bati cara Endri Ole ri dri esujo ri tro kpodru karula kpe. Ki jo nyisa nyi nyangasi ta mbi ri ‘ia geni mbi ri tro, nyini leti ce ri esuka ni kengwi ta okpo rere ri ‘i. Bugu Ole ri ojo Yesu ni ana ngasi oni pa rejo ri ‘i ‘ba cidru laru ako drimgbo ejika ana ru ga ri ‘bati ni ‘i (ofu atijoadru Petro ‘a sile rii 2:8).
‘Ba Yesu ni ‘aika ra ki driso nikaa ra di Yesu ‘a batisimu esujo rii aduya ni ku rii karuni ‘aiki ofu loso layudri rii nusu disidru kaki zo aci olure tadru ri ‘ia ra. Disidru, jo ati nyigeni Yesu ni ni, kole nyini ta ana batisimu ti idri ana ari tro ote, adusi dii ta ofu loso lebe enzi dri ri hwe’di ri eji’di ri ‘i. Ki jo nyesu lebe enzi dri rii ra le, nyi Endri Ole ri isa esu ra.
Anyiba dri orakita Yesu ‘a lidri vudri di ‘a ri idri. Yesu ecoru ‘ba oko odu enzi cidru vudri di ‘a rii ana batisismu si pi. Vuasatro odra kuruce dri esu lamgba ama kare ga ‘ausidru ka amani lari hwe aci olure tadru ri ‘a dri ga wa si ‘i. ‘Ba cidru ani ‘aika ri ‘bati kaki Endri Ole ri esu ‘aini dride dru ra.
Disidru, kole ru cidru koko leti anda rii amani Endri Ole ri esu’jo ‘au. Ta rule’di di’a rii kole ondiku oraki ta lejo anda dri ri ‘a lekaa ri ani ‘i. Amala jo amide dii ni ri, Yesu ka nya ta ni mba ra vua ka tutu co nya ru ga ra. ‘Ba cidru ‘aia asiti ni ayuka vua lejo driaru ri ‘aika ri ‘bati kaki olu anda si ra vua kaki lebe ‘aia enzi dri isa esu ra, vua Endri Ole ri ka ‘ai ‘a dri du ra. Adusiku, konyi Endri Ole ri dri si kaki ‘baziti ri isa ‘a dri ni du leti anda ri iga ra. Nyigeni anda layu dri lejo eko’di Yesu ‘a batisimu si vua ana ari si dii ‘au. Jo tee di ani ri ama ana vu ni oko ‘ai si wa vua ama tutu ama enzi ‘a rebe’jo ri isa esu ra, ama lidri olure tadru ri esu laku Endri Ole ri dri tro ra. Yesu ni Opi enzi ebe’di ri ‘i, odu enzi cidru vudri rii batisimu anidri ri si vua ana dra kuruce dri ri si. Yesu o’je ama enzi ni cidru si pelere vua ohwe Endri Ole rii ‘ba cidru ofu loso anda di ‘aika ra ri ‘bati ni ra. ‘Ai anda ri esuka si nyisa nyi laku Endri Ole ri dri ri esu ra.
