- All e-books and audiobooks on The New Life Mission website are free
- Explore multilingual sermons in global languages
- Two new revised editions in English have been released
- Check out our website translated into 27 languages
Ta tajore driaru ri `i 8: Endri Ole ri `i
[8-7] Ofu Loso pelere ndro badia Endri Ole ri kolu ‘ai ‘ba asi ri ‘i (Izaia 9:6-7 ojo)
(Izaia 9:6-7 ojo)
“Amani ‘bara’go otiru ra, amani ‘bara’go ehweru ra; lase cidru ri obaru ana olokodri ga. Ru driaru ri karungwe losondro ‘i, ma’di ‘ba asiti umwi’di ri ‘i, Rubanga oru nde’dia ri ‘i, Ata olu’di tadru ri ‘i, vua amba egbwe dri ‘i. Rinzaka ana lase dri ti ana eku tro hwa alusa eko ku, ka opi Davide dri ase suru ziti ri tro ana komwi ni dri ru, ka cara hwe ‘aini vua ka lamgba anda dri ri ‘a driba ni nze ‘aini anda si ri’jo saa nasi cajo ndi andraga, paka vuti ‘a eko’jo ri inga. Le Opi ni amba ta cidru dri ri ka ta di ide ni.”
“Amani ‘bara’go otiru ra, amani ‘bara’go ehweru ra; lase cidru ri obaru ana olokodri ga. Ru driaru ri karungwe losondro ‘i, ma’di ‘ba asiti umwi’di ri ‘i, Rubanga oru nde’dia ri ‘i, Ata olu’di tadru ri ‘i, vua amba egbwe dri ‘i. Rinzaka ana lase dri ti ana eku tro hwa alusa eko ku, ka opi Davide dri ase suru ziti ri tro ana komwi ni dri ru, ka cara hwe ‘aini vua ka lamgba anda dri ri ‘a driba ni nze ‘aini anda si ri’jo saa nasi cajo ndi andraga, paka vuti ‘a eko’jo ri inga. Le Opi ni amba ta cidru dri ri ka ta di ide ni.”
Ta badia Endri Ole ri kolu
‘ai ‘ba asiti rii adu?
Ofu loso pelere eyidri vua
Endri dri ri ‘i
Amani Endri Ole ri esu’jo, kolea duba ‘ai amadri ri kolu ofu loso eyidri vua Endri dri ri idri ‘aa. Ungwe Opi amadri ri ‘a ru ni losodro ‘i, ma’di ‘ba asiti umwi’di ri ‘i, vua Rubanga ni retu ri ‘i. Ama Opi onze ta driba ana dri ga ojo ani leti mu’jo ‘bu ‘a ri ‘i. Yesu Kristo ohwe ‘bacidru ni dride ofu loso pelere ndro di dri rii ra.
Amala, vu di idri, ‘ba draa dinisa oluka driso vumudi ‘a ani ekpadru. Kaki lea ‘ai kiparu vumudi di ‘a dri ga ‘i ki amala ‘aia ta nika ofu loso pelere ndro di ‘a dri ga ku si, kaki hwa alusa lipa esu ‘aia enzi di ‘a dri ga kpe. Ra rii kaki ow’i ‘aia lini ‘aia geni mbi di dri ri iga. Ki ovi si, ‘ba ta anda ri ndruka ri ‘bati le, kaki ofu loso pelerendro di esu ra, vua ‘aia lidri ni ‘a ru kaki olu lidri ga’di tutu Rubanga dri ri si ndru ri si. Mitiri ani tutu Rubanga dri tema ri ‘i anini bajoadru mani ‘ai ikonyijo ‘aini ofu loso pelere ndro di nijo ote ‘i vua bajoadru ‘aia enzi ni rujejo pelere ni ‘i.
Aini lebe ‘aia enzi dri ri esuka ni esuku kolu ta okpo rere ri ‘i kesu ‘jo kolu tutu Rubanga dri ri ‘i ku ‘i. Ki jo amesu Opi ni ra vua ako amesu Endri Ole ri isa ni karuni amesu tutu retugo rii ‘au. ‘Auka retu ri tro, laki amgbu kuraa risi tutu retugo Rubanga dri di enga ofu loso pelerendro di iga ku.
Tutu Rubanga dri rii ondiku kenga ofu loso pelerendro Yesu Kristo ‘a ehwele amani di iga, adusi ani Rubanga ‘a Ngwaapi ni alu tende ri ‘i. Yesu ni ma’di amani lari hwe’di ama enzi cidru vudri di ‘a ri ‘a dri ga si cidru ri ‘i vuasa tro ani ma’di ana tutu ni co’di ama ru ga ana le si ri ‘i. Ma’dizi hwa alusa ama ikonyi di anini lari hweka amani ama enzi si wa ani iyo kusa ma’dizi alusa enzi ama asiti ga ri ini’di wa ani iyo. Adi ka gba ani ari ana ngasi ana enzi ni dri ‘a si wa rii ru lo’u dra dri olu’di tadru di tro ni?
Rubanga ojo amani, “Leti ‘baa ndrele anda cuwi rii, zeleti ani keko dra” (Lejo ehwi 16:25). ‘Ba ka ‘ai ‘a dini ‘aia ngasi ri ‘a ti ni uba kaki ko kaki rizaka eji dra tro ‘aini ‘aia ngasi. Dini ‘ba amgbu o’du disi karecu ni kaki joa ‘ai ka ‘bani leti anda ‘aini lari esu’jo wa ri ite’de leti anda dri tro ki esu ojoru leti tete anda rii ofu loso eyidri vua Endri dri, ama Opi ‘a ehwele amani ri ‘i, ka te lari hwe amani ama enzi ni ‘a si cidru wa rii ni. Tete Yesu ni Aridipi enzi ‘ba ari’di ‘aia enzi ni ‘a wa ri ‘i rii ni.
Yoana 14:6, ga ama Opi ojo, “Ma leti, anda, vua lidri.” Ohwe ana ru ti ana ari tro ‘bacidru dribaka leti dra dri iga ri ‘bati ni. Vua onze ta driba ana dri ga ojo ani leti vujo lidri olure tadru anda ri iga ri ‘i. Rubanga ojo amani jo ma’di igeni Yesu ‘a ofu loso pelere dii kuru, kohwi Opi ‘Bu dri ri iga kpe.
Kole anyetro igeniki ofu loso eyidri vua Endri dri dii ‘au, esuki lebe ama enzi dri ri ni, vua kole igeniki ani ama Aridipi ‘i dru amani tojo Opi ‘Bu dri ri iga ra ‘i.
Andrani Isaraile ‘a eze!
“Dria lejo di ideru dini saa Ahazi ni ‘bara Jotani dri inga, ani ‘bara Uzia, ni amba Yuda ga ri dri ‘i, ca’jo ndi Rezini ni opi Siria dri ri inga vua Peka ni ‘bara Remalia dri inga, opi Israile dri, ri ‘bati ovuki o’ja ga ndi Yerusaleme ga, oko edi’ki o’ja okposi, sa hwa ezaki kuru” (Izaia 7:1).
Andrani eze Isaraile ni suru alu ri ‘i ki vule vule ni Isaraile emu anzuru eri ewo lile ri ‘i vua ewo oru ri ‘i. Jo ole Rubanga dri rii osiru Yerusaleme ga ewo liele Yudea dri iga, dii ewo Rehoboamu, ni ‘bara Solomone dri ri ‘a, asele ni ri ‘i. Ki vulega, Jeroboamu ni, tiluza Solomone dri ri ‘a alu, emu oba suru zi alu rii oru esi disidru oba suru Isaraile dri ri anzuru eri. Erijo saa nasi, mgbe ‘ai Rubanga dri ri ido e’ le ga. Oko ‘ai ‘a ‘e ka ga eji lidri dini mbi di dri o’du disi rii ni. Ledi oba Jeroboamu engwi ma’di lini mbi ri ‘a pa eture driaru ri ‘i. Idu ta cara Rubanga ‘a ubale ra ri ‘ia amgbu ‘ausini ani koludru komwi anidri ri idri ni si ‘i disidru, oko engwi ata ‘ba lini mbi ri inika ri ‘bati dri ‘i. Oba ana ngasi dini mgbi rii ana ‘ba Isaraile ‘a ri ‘bati ni ‘au, Dii suru oru esi ri ‘i ki oko obi cale paka Yudea, ni suru liele esi ri iga sa tro. Ki draa oji kinya 200 ni ra, sa olu unzi suru eri di ‘bati ‘a lofo ga ri ecoru kuru.
Amala, Rubanga ojo Izaia ni, “Amala Siria ti, Eferemu ni, ‘bara Remalia dri ri tro ‘aia o’ja dika nya ru ga, aia jokaa, ‘Anyiba ovuki o’ja edire Yudea ga edi oja ‘aii ru, vua ovu otoki abi ana jo dri ‘i lofo si, oko upe opi ‘ai asele ama ngasi, obaki Tabele ‘a ngwaapi ni ‘aini opi dru ‘au si.’ ─ Opi Rubanga ojo: ‘Opi ledii hwa alusa omba ku, vuasa hwa ideru ledi ani ku. Adusi dri Siria dri rii Damasiko ‘i, vua dri Damasiko dri rii Rezini ‘i. Ki kinya mudi azia- ‘a limbi tou ‘a vu ga suru Eferemu dri ri keya kunyo fufu, ‘ausini ziniga di ungwe ani ‘ba dru ku. Adusi dri Eferemu dri rii Samaria ‘i, vua dri Samaria dri rii ‘boronzi Remalia dri ri ‘bati ‘i. Jo anya ‘i dii ku hwa alusa anyimba okpo kpe’” (Izaia 7:5-9).
O’du nainga, Rubanga ojo ta Opi Ahazi dri ana profeta Izaia ni ebuka ‘au si, ki sa hwa opi oba ‘ai ta cidru ana jole ri idri kuru. Ahazi ni ori retu ri oko ci ana rakaa hwa draale ani ka o’ja nde mundara Siria dri ri ‘a ru ga kpe si ‘i, ki oce ani keri o’ja unzigo Siria ti ‘a dile Isaraile tro ‘aia lofo ga dii di, ori retu ri oko ani ni. Ki tiluza Rubanga dri, ungwele Izaia, emu ojo anini, “Rijo driadru dria oji kinya mudi azia ‘a-limbi tou ni ku, suru oru esi Isaraile dri ri kemu konyo mgbu. Vua urata unzi opi eri ledia ti ubale ledii hwa alusa ideru kendre ‘aia urakaa ledi ani ku adusi hwa ideru ku.”
Tiluza Rubanga dri ri ojo Opi Ahazi ni kozi nyuma cidru ana lele Rubanga kide ri ni. “Nyizi nyuma cidru nya lele OPI ni nya Rubanga kide ri ni; jo kolu tee vu iti kusa bu ‘a sa ‘i” (Izaia 7:11). “Draa nyeri, Oh’ jo Davide dri ri! Nyini orika ‘ba isa disi ni ta loso rere rii ku, draa ori ka nyi ko ma Rubanga si sa wa ya? Draa Opi ni ana ngasi ka nyini nyuma itede di: Kinya emu’di andraga risi, zaa ago ni’di ku ri keya ka ‘ba ko ‘a ga ra vua kotia ago, kaki evu kaki ani ungwe Emanuele ‘i” (Izaia 7:13-14). Dii lejo ana jole profeta ti si ri ‘i: Ojo lejo dii itedejoadru ani kemu ka ‘ba anidri ri ari ‘aia enzi ni ‘a si ra ‘i.
Rubanga ‘a o’jabazi ni adi ‘i ya?
O’jabazi ‘ba dri rii enzi ‘i vua enzi ni ana ngasi enga Sitani dri. Ki jodiniri Aridipi ama enzi dri rii adi ‘i? Aridipi ni hwa alusa ma’dizi ku ki Yesu Kristo ni, Ngwaapi Rubanga dri ri ‘i. Ta ‘ba ni dii mgbesa oti ani ru si sa awi ako disidru kolu hwa alusa enzi ideka ako ni kpe. Adusi Sitani ka ani ase ni. Draa dinisa ‘ba ayaka ‘ba andra loso eteka wa di ‘bati dri rii amgbu kaki bia olule lidri ‘ba di’a olu’jo ri si vua kaki ondi ta profetaa enzo di ‘a jole ‘aini kole kideki ri ide ‘au. Dii gbadru ta endre’di tau ite’de di ‘a ai lase Sitani dri ri iti ri ‘i.
Opi ohwe Izaia ni anda ana lari dri rii ra, ojo andraga zaangwa ago nidi ku ri keya ka ‘ba ko ‘a ga ra koti ‘a ago vua kaki evu kaki ani ungwe Emanuele ‘i. Ani ta Rubanga ‘a ti ubale ri ‘i anini Yesu ni eze’jo vudri di ‘a ru ‘ba enzi ‘ba di dri si ni ‘i vua ohwe ‘aini okpo enzi ‘ba ari’jo okpo Sitani dri ri ‘a dri ga. Kolu lejo profetaa jole ri si le, Yesu Kristo emu vudri di ‘a kendre ‘ba ani ru Viriko Maria dri si.
Ki kesu Yesu kemu amadri ku ri, ndi endru sa ama olu lumbe Sitani dri ri iti. Ki Yesu emu vudri di ‘a ra esu batisimu Yoana dri vua oko odra kuruce dri ‘ausi ohwe amani ofu loso pelere ama enzi ‘ba di ari’di ama enzi ni dri ‘a wa rii au. Disidru, laki amgbu ‘ai ofu loso ani pelere dii ni, esuki lebe ‘aia enzi dri rii ra vua oko engwiki ‘baciri Rubanga dri ‘i.
Tee odu disi sa, ‘ba amgbu ta laka Rubanga dri ri ‘bati kaki uzu ‘aia lofo ga di gba nosi Yesu Kristo kolu Rubanga ya kusa nosi di ‘ba nya ri ‘i ya si ‘i. Ki ‘ba anda lini Rubanga dri ri esuka anda si ri ‘bati kaki joa “Yesu ni Rubanga,” ki ‘ba ziti rikaa lini esuka Rubanga dri udiadru di ‘bati kaki joa Yesu ni ana ngasi ‘barangwa Yosefu dri ‘i. Ki gba ta ani di ‘a mbi ni ingoni amala dii ego rere!
‘Ba ziti rikaa lini esuka Rubanga dri udiadru ri ‘bati kojoa ‘aia lofo ga ‘aidri ai itiri Yesu ni mori aci’jo eyidri si wa isa iyo. Kaki joa, “Gba loku loku Yesu ti aci ana maju ti tro be dri si ra, ki ana maju ti ondreki ani lolu si, jo tee kaci eyidri si ra sa ‘i.” Odu dria-disi dakitaria ta inika ta cidru Rubanga ‘a bile di idri fonyi o’du disi lini hwe’jo Rubanga dri ri iga ri ‘bati ‘ai ‘aia ngasi ‘ba retu lini Rubanga dri ri iga ri ‘i ‘bati ‘i ku. Aia lofo ga ‘baziti ri igeni ta ‘aia ehwi erile Bugu Ole ri ‘ia tau rii ‘au.
Ovi zi hwejo, Bugu Ole ri ojo amani Yesu ohwe lonya ‘ba 5,000 lonya dii inyairu engajo ebi eri mugati tou tro ga. Ki sa ‘ba di oga nyuma ani rede’di dii mgbe. Kaki driba ani nze ovi di si. “Ba ka Yesu ‘a vu ni oko ‘aini dejo abiri si kpo. Disidru Yesu ojo ana maju ti ni kole kotraki lonya fufu rebe’di ri ‘a pa ni. Disidru yaigo angwa zi azi ana lonya saa azia dri rii ilili, ta di elo ‘ba amba ri ‘bati isa oko ‘aisa ohweki lonya ‘aidri rii pi. Ki oce kotraki lonya di ‘a pa ni kare alu ga vua onyaki di, esuru ta fufu pa trale ri emuru evu mudri ‘a limbi eri.” ‘ba ‘ai lini Rubanga dri ri inika ovi disi di ‘bati kaki bia lejo Rubanga dri ri inile kovidru ondi ‘aia urata ‘aidri konyi ako rii ‘au si
Anda Rubanga dri ri ‘aika ni gbadru ofu loso ana ehwele amani ri igeni ka ‘i. Ai ‘a ehwi ni ta zi igenika amala ehwi ani ka reri tau si vua tazi rii ehwi ani ka reri tau ku si ‘i ku. Jo tee eriki lejo driaru ‘a ehwini wa kusa kpe sa, kolea igeniki ani vua ‘aiki lejo driaru rii ondi kendre ana rusika ri ani.
Ta ce jole Yesu emu vudri di ‘a kendre Ngwaapi ‘Ba dri ani ‘a ehwini eze ani lari hwere ama cidru ni ama enzi si ‘i. Yesu ni, Rubanga ri, emu vudri di ‘a ama ari re. Izaia ojo lejo ana dri ga profeta ti si ra ojo kemu Ngwaapi ‘Ba dri ani, karuti ru Viriko Maria dri si.
Idoka 3:15 ga, Opi Rubanga ojo ini ni, “Ma o’ja ba anya lofo ga izi tro, vua ‘boronzi nyidri ‘i lofo ‘boronzi izi dri tro; kaki nyi tu dri ‘a, nyi ‘ai ga tele ‘a.” Di ‘a ehwini Rubanga uba tati anini Yesu ni eze’jo rii ra ‘i, ka ani eze ovi ‘ba dri si, ka ani eze Aridipi dru ani ‘bacidru anidri ri arire ‘aia enzi ni ‘a.
Bugu Ole ri ‘ia, osiru, “Dra, nya okpo ni ingo? Dra, nya okpo ‘ba fujo rii ingo ‘a? Dra ka ana okpo ni esu ‘ba fujo enzi si, vua enzi ka ana okpo ni esu cara ga” (ofu atijoadru Korinto ‘ba ni ri ‘i 15:55-56). Okpo dra dri ri kenga enzi dri. Jo ma’di ide enzi ni ri, dra koba kengwi ana opigo ‘i. Ki ama Opi ojo, “boronzi izi dri ri kevu ka nyi tu dri ‘a.” Di ‘a ehwini Yesu kemu ka okpo enzi dri Sitani ‘a ejile di ivolo ra ‘i.
Yesu emu vudri di ‘a, esu batisimu enzi cidru vudri ri dujo pi eparu kuruce dri vua esu lamgba laka ri isa cidru ra. Ohwe lari ‘ba cidru ofu loso pelere di ‘aika ri ‘bati ni ra. Nainga Adamu ti ide enzi Eva tro di, Rubanga uba ta ti ojo ani ka lari hwe ‘ba cidru ni ‘aia enzi si okpo Sitani dri ri ‘a dri ga ra. Draa vu zodi ra disi, o’jabazi Rubanga dri rii ‘ba ‘aidru ofu loso pelere Rubanga dri di igenika kuru ri ‘bati ‘i.
Oti Yesu ni vudri di ‘a adusi?
Rubanga ohwe amani cara ofu loso pelere ri tro ama arijo enzi dri ‘a ‘au. Cara Rubanga dri ri iti, ‘ba cidru engwi enzi ‘ba. Alua ri ani, cara ohweru rii ‘ausini ‘ba cidru konidru ‘aia enzi ni ote si. Ki jo ‘ba engwi opigo enzi dri ‘i cara dri tro ri, ama Opi emu vudri di ‘a ta anda cara ‘a lele ri ‘a lejo ni ikore.
Adusi Yesu otiru cara iti. Oti ani saa cara dri nasi.Ra ‘baa cara lejo ra rii ‘ausini ‘ai ka ‘aia enzi ni ni ote vua ‘ausini ‘ai ka lebe laka ri isa esu wa ‘i. ‘ba ka andi ‘aia bongu ni ru ri je pelere wa ni kesua kaki bongu di ndre andi ni kpa. Alua ri ani, ‘aini ‘aia enzi ni erajo, kole duba ‘ba koni cara Rubanga dri rii ote kpa. Ki kesu oli cara kolu iyo ri, ra zi kolu alusa ta ra’jo enzi dri ni iyo, vua esu sa kole Yesu kemu vudri di ‘a ku.
Ki jo ini cara Rubanga dri rii ote, nyini saa kolu ani esu’jo ‘aa. Ama ta nika cara dri ote ni wa si ta nika enzi dri isa kengwi amani ta adu rere ri ‘i. Kesu ‘a ama ta era ama enzi ni dri kpa adriko wio era Yesu Kristo eji ofu loso pelerego dii amani ‘aile ni ‘i. Kesu oli Rubanga kehwe amani cara ku ri, amolu hwa enzi ‘ba ku vua esu lamgba sa kolu iyo. Ledisidru, Rubanga ohwe amani cara anidri ri ni vua ohwe amani ana ofu loso pelendro dini ‘ba cidru arijo ‘aia enzi ni ‘a.
Cara kole duba kete’deru ta bidi tii lofo ana ta bile ri tro rii cara Rubanga ‘a lari dri ri ‘i. Dii cara Rubanga ‘a le dri ‘i. Rubanga ojo ‘ba ni, “Ki hwe ta anda ri ni jo ta ego ri tro ote ri le onya ku” (Idoka 2:17). Dii cara Rubanga ‘a ehwele amani ri ‘i, oko cara di engwi ovi Rubanga ‘a le dri ana ama enzi ‘ba ri arijo cidru ri ‘i. Cara lari dri ri etupa lebe enzi dri ri iga. Rubanga ojo amani ani ta bidi ‘i vua ta cidru obiru ana le si. Di ‘a ehwini Rubanga ni ma’di ce ri ‘i disidru kolea ‘ba kigeni ofu loso anda dii ondi kendre lejo laka ri ‘a ekoka ofu loso pelere di ‘ia ri ani.
Rubanga ni loku rii gbadru ani ma’di loso ri ‘i. Rubanga ‘a le vu di ni ri oba azi ana Ngwaapi ni alu tende rii ra, di oba engwi Aridipi enzi ‘ba cidru dri ri ‘i. Kesu oli Rubanga kobi ama ra ki koko kohwe amani ofu loso pelere ndro dii ama arijo ama enzi ‘a dri ga si kuru, ama luzu eji ana ru ga ra isa wa. Ki Rubanga ole ani kohwe amani lari ama rizaka ama ngasi ri ‘a dri ga disidru oko ohwe amani cara lari dri rii ‘au. Amala cara oba, ama ama enzi ni era wa vua oba ama ndrea mgbe anda anda, vua oba mgbe amido Yesu ‘a ofu loso pelerego di igeni ka. Ki jo aga lejo Rubanga dri rii mgbe, cara andra ama engwi ‘ba enzi ‘ba ri ani, ki diavu gas a ama enzi ‘ba ri kowo lai ‘aire Rubanga ‘a andraga ama enzi si ‘i.
Yesu Kristo otiru ru izi dri ri si oko emu vudri di ‘a enzi ‘ba cidru arire ‘aia enzi ni ‘a si. Yesu emu vudri di ‘a kendre ‘ba ani tati Rubanga ‘a ubale ra ri ‘a lejo ni ikojo ama lidri ni ga. Amigeni ana ofu loso pelere dii ra. Disidru, ama Opi ni ecu ‘ausi. ‘Baziti kuzu kaki joa, “Ki gba Rubanga oba made enzi ‘a emi emi vua oba ma ricandi enzi ‘a palanda dini adusi?” Ki Rubanga ole hwa alusa amesu icandi ni ku. Ole amesu icandi ni ra rii ama ofu loso Yesu dri ri ‘aika ku si. Rubanga ohwe amani icandi ti ana ofu loso ri tro kare alu ga ‘ausini mori ama esule rii kolu ondiku kendre ana ‘baciri ti dri ri ani. Dii tati ana ubale ri ‘i. Ki ori unzi ri kojoa, “Ledi ani ku! ledi ani ku! Rubanga ni ma’di lase ase’di bulu dru asiti unzi tro ri ‘i! Nyimu andraga nyolu nya lekaa ri ani. Nyiba nya dri kolu mgbo! Nyiba nya andra loso nya ngasi ri kendre ta nya idele nya ngasi ri si!” Ori unzi ri isa ana ngasi kobia ‘ba uje umbele ‘ausini kigeniki dru Rubanga ni ku si ‘i. Ki ‘ba lekaa ‘ai kolu Rubanga tro maraga ri ‘bati karuni ‘ai ana tati ubale lari ni ri tro o’jabazi. Yesu emu vudri di ‘a oko ozi ‘ba cidru oluka dri lase Sitani dri ri iti ri ‘bati ojo kolea kogaki ‘aia enzi ni cidru si mgbe. Kole oluki ama ama amangasi Rubanga ni ako ku.
‘Ba otiru enzidipi vua koya aci olure tadru ri ‘ia
Anda zi vudri di ‘a recodi kpe ani iyo. Ki ofu loso Yesu dri ri le ani anda hwa alusa reco’di kpe ri ‘i. Disidru, ‘ba ka ‘ai ba ‘aingasi anda ledi idri kakiko kaki layu esu okpo Sitani dri ledi ‘a dri ga ra. Laki cidru ‘oe enzi tro ni enzi ‘aia esule Adamu ti dri Eva tro ri si ki kolu ta Kristo ‘a idele ri si ku ri kaki vu aci olure tadru ri ‘ia. Ra rii, anzokiru ana ani azika si, tutu ocoru ‘ba cidru ru ‘aini engwijo ‘ba Rubanga dri rii dru, “Majo anyini hwa alusa anzo anzo kolu ma’di asi laza ‘a ri ni iyo” (Izaia 9:1). Rubanga eze ana ‘bara ni vu di idri oko ohwe layu ‘ba cdiru ana ofu loso layu dri di ‘aika ri ‘bati ni ra.
“Ba aninga ayaka vu mudi ‘a si ri ‘bati esuki ingwe retugo rii ra; ‘ba cidru oluka vumudi dra dri iga rii, ingwe retugo ri osu ‘aia dri ga ra” (Izaia 9:2). Endru, lejo di engwi nyini vua mani ce. Ama ofu loso pelere di igenika si, amesu tutu lidri olure tadru ri drii ra, ledii esu asiti egbwe hwa alusa ama esule vudri di ‘a kpe ri ‘i. Yesu Kristo ohwe lari ‘ba cidru vudri di ‘a ri ‘bati ni ra vua ohwe lari ‘ba ofu loso pelerendro di igenika ri ‘bati ni sa ra, ohwe ‘aini lidri olure tadru rii Opi Bu dri tro kare aluga.
Oba ingwe loso ofu loso pelere di dri ri ongwe ‘ba ra ako ri ‘bati ‘a dri ga
Ba ni, kendre lofu ani, kaki endre vudri di ‘a saa gaangwadru ri si kaki ko kaki egwe ‘di. Lidri ‘aidri rii oviru hwe kusa ayise ezo’di koko kegwe ri tro. Ayise ka ana lidri ni esu imba ubiku ‘a vu ga saa kinya ‘a ri si oko tati Rubanga ‘a ubale risi kegwe ‘di. Di kitedea ta cidru ama lidri ni ‘a ri isa ‘a ehwi ni iyo kendre ondiku ayise di ‘a ehwi ‘a oluka iyo di ani. Ki Rubanga ohwe ana ofu loso pelere dii endri amadri andeka to dii idri le ana anda si, di oba eco ama olule ana ‘boronzi ti ‘i dru. Ani dii kiza retu ri ‘i! Lidri amadri konyi ako ri engwi lidri olu’di tadru ri ‘i anzo kolu retu Rubanga ‘a le si adusi oco tutu ama ru ga ra oba amengwi anda olule ana ‘baciri tii dru.
Dia dii enzi ruka endri tutu esu’di kiza Rubanga dri ri si ra ri dri ‘i di ideru ana ofu loso pelere di igeni ka si.
“Oti ma familia ‘aaru ‘ba igeni Rubanga ku ri iga. Disidru, izo ma adri muraa ma endre ni ma tidi ri ni ilegi ka rubanga bu ‘a ri dri vua rubanga vudri ri dri inini cidru si eyi tro baseni ‘a ama familia ni ni ta cuwi ri ‘i. Ki driso ma zore zo rii, ani hwa alusa ma konyi ni ku vua ani ra ma olu’jo vudri di ‘a ri isa ku, adusi oba muraa ide ta ku jo tee molu lidri kusa madra ra sa ‘i. Adusi nainga ani ta ma konyi ni dri ku, molu nya dru.
Lidri di ani di oba mande ra disidru mgbe emiemi alu ladu ga. Lidri ma rudu’jo rii loso rere ri ‘i. Tazi hwa alusa mani lele iyo, disi abi olule ahwa lidri loso ri si. Naivu meya ati ‘barangwa ako ari mgbe le ndrele ma lidri ga ra. Ari ta mbimbi ma urale mangasi ri ga ka ki sa hwa ale amanzu lofo ‘ba joisi ma laga ga ire ri ‘bati tro ra ni ku.
Ledisidru, ako mido mgbe Rubanga ni undrule ‘au. Ma ma ikonyi mangasi kpe disidru, kole mesu gba ma’di anda rii kite’dedru le ‘ba ma lele ndro ri ‘bati ni ni. Ako mido ayaka ekelezia ‘a ki geni madri rii mgbimgbi ani ma endre ni ma ti’di ri dri tro nza adusi ana ilegire eyi baseni ‘a ri andra rii-ilegi madri rii caku caku vuasa tro ori retu ri tro urata unzi ri tro.
O’du zi si, aya lemu angwa zi ti ruba’di amadri ekelezia ga ri iga ki ma ilegire rii, mgbe midra ido ezoka ma mi ga. Ma dri ociru ra ako abi ma ngasi owoka di imbale ci, sa midra ma mi ga ri aci andraga ra ka tro ‘i. Laki amgbu traka ma laga ga ri ‘bati otiki ‘aia dri ni ma dri ga oko anzoki ma ma Endri Ole ri esuka si okposi. Ki sa ani aduta ka ride ni ya ni ku. Ani nainga lejo driaru ri ‘a ehwi isa anda anda kuru ma ‘ai saa nasi ri isa konyi ako, disidru mgbe masa ako migeni nosi ta ride’di di kolu Endri Ole ri ‘i. Ekelezia ma yare ga dii ‘aaru ‘ba ungwele Pentekositali-Asiti ecoka vua ofu onzeka dii ‘aa, ‘baziti taa ridere ‘aiiru madri di ani rii ‘aisa ‘ai na ‘a ‘aa ‘ba ziti na ‘a weli ubi rii paka ofu ta jo ti mgbimgbi ri si ‘i. O’du zi alu, aya lemu layu esujo ri iga lemu di ‘a ti ni leidipi ‘ba amgbu ‘a jole oga Endri Ole ri si ndru ri uba ni. Leidipi di oko otra ‘ba drile ekelezia ‘a ekpadru ojo ‘aini ani ka laza ma’di alu alu ‘a ihwi ni ‘a ri isa ija wa adusi mori laka endri si ri ohweru ana dri ga ra. Ki madri, ara risi laza ihwi dri dii tete mitikoli kijaa wa rii ni, disidru mgbe ale mani di esu Endri Ole rii ra ya ni okposi. Draa leidipi dii ide ta dii kendre wa ani di, ido mgbe recule ana ngasi ojo ani ka ta ete ma’di fonyi ga olu’di dri ca’di yunivasiti ‘a kuru rii jo kemu kohwi yunivasiti ‘a ni kamvu ingoni ya ni dri wa. Laki amgbu ecu ani ana mori disi ni kendre ‘ai Rubanga ani.
Ki hwa ama ta ana jole ri ‘a ehwi ni erile kpe. Majoa mori leidipi di dri dii, kolu mori Endri Ole ri dri ‘i ni kpe. Mitiri ani ta konyi nza tro rii ku jo tee kija ma’di zi ‘a bi ihwi ‘a rii kusa kojo ta ma’di zi kemu kamvu fonyi ga ra nidri ta wa sa ‘i. Disidru, ma ebu amgbu ana idele ledi du kendre ebu Endri Ole ri drii dru ni kpe.
Mori Rubanga dri ri ‘bati le Rubanga dri ma uje ni ‘a ri tro mgbimgbi ani ta ma ndrele di tro nza. Ra ledisidru, mebe mgbe ayaka ekelezia ‘a ra ako mebe ‘ba jokaa mori leidipi na dri nai ce ri ‘bati isa ‘a vu ni ra. Ledi ‘a vuga ako aya ekelezia ‘aaru ‘ba kolu ciri ri ‘ia, mupe ekelezia dii ‘au ni ma itirikaa kaki ondi ta lejo Rubanga dri ri ‘a lele ri ini ‘au si. Mini cara ra ‘aaru mesu ma ma’di anda ku ri ‘i. Rubanga engwi ta ma orile ri ‘i ako migeni mendre ana andraga anda si ku disidru ana Endri ido ma gale mgbe.
Izaia 59:1-2 ga osiru, “Opi ‘a, dri ni ali ku, ka ‘ba ari kpe ku; vua bi driaru rii nduru ku, ka ta eri kpe ku. Ki anyile enzi anyidri ri anzu anya lofo ni anya Rubanga tro ra; vua anya enzi ani ana andrati ni anyidri si ci,’ausini keridru ta anya jole rii ku si.” Di oba mgbe ma lejo omba di. Mani engwika ana ‘barangwa ‘i ti mani Endri Ole ri esuka tro engwi ta okpo rere ri ‘i adusiku ma ma’di enzidipi ri ‘i.
Manzo Rubanga ni okposi disidru o’du cidru si ma ilegi enzi rujo ri ilegi. Ma’di hwa alusa jodia mani mide ni ni ani iyo, ki madri ale mamba Rubanga ‘a andra ga eku retu ri tro. Adusi ku ma enzidipi, Di oba ma ilegi ezi rujo ri ilegi okposi. Ki sa ilegi di oma hwa ma enzi ni jele kpodru si pelere ni kpe. Ta amgbu ma idele rii ma itedekaa laka gba loku loku enzi ma asiti ga ri olu maru oma rujele pelere ni kpe ‘i. Erijo saa nasi, mido driluci ejile mgbe Rubanga ‘a ru ga. Ale oli molu ana andraga anda ki sa hwa molu ana andraga anda ni kpe, disidru luzu madri ri ‘bati ma enzi tro odroru andra andra.
Saa unzi driluci dri dini ‘a disi, ma ata ‘a ogu ‘oe lou.Icandiru odu ndindi 40 kare Operesoni dri iga vua mitikoli ‘a ‘i naivu wio odri ko dra. Ki sa draa milegi ma ata ni di ni kpe. Adusi ma enzidipi, disidru adri muraa jo milegi ma ata ni ni, ana laza karinza andra andra. Mesu icandi ma ‘ai ako disi okposi ale oli mako Rubanga ‘a vu ‘i ki sa hwa ama ana vu ni okole kpe, disidru mgbe mido uzuka ani ni ‘au ako sa mebe ani ra. Ma lidri dini dri ri eko ovi ani ledi ani. Mura jo migeni ani ni ri, Endri driaru ri kolu ma asiti ga ra vua ‘ausi koba ma egbwe esu ra, kisa hwa ideru kuru. Ta ledi ‘a vu ga, ma lidri engwi sa hwa konyi ako, vua mido olule ori si vua asiti egbwe ako si.
Ki sa hwa Rubanga oga ma kuru. Oba mesu ma’di Endri Ole ri esu’di lejo Rubanga dri ri si ra ri ‘i ‘au. Meri ma’di di dri si Rubanga odu enzi cidru ama idele rii batisimu Yesu ‘a esule Yoana dri ri si vua esu lamgba kuruce dri enzi ana dule disi. Disidru, enzi cidru vudri di ‘a rii, di oko enzi madri ri isa tro, kpodru ebe ‘ai ra. Ki ace meri dii di vua meya meri di ‘a ehwi ni di, ako andre enzi cidru madri ri oduru pi. Rubanga ohwe mani konyi mani lebe ma enzi dri ri esujo ra, ohwe mani tutu Endri Ole ri dri rii ra vua ohwe mani lidri olu’di egbwe tadru ri si rii ra. Ose ma dri ni cici, ohwe mani ta anda vua ta mbi ri ‘a ehwini erijo rii ra vua oko eduma okpo badia oli mengwi lubi dru vu di ‘a dri ga ri ‘a dri ga si pi. Eri ma ilegi ni ra oko oba molu lidri anda vua cuwi ri si. Gbadru manzo Rubanga ni ana mani Endri Ole ri hweka si okposi.”
Ama alu alu esu Opi ‘a tutu ana kiza dri rii ra vua ledi oba ama Endri Ole ri esu wa. Amanzo Opi ni ana amani ana ofu loso di hwka si okposi. Rubanga oco tutu ‘ba anda ri ‘bati ‘a ru ga ana ‘aini asi egbwe di hweka si anzo tro ra. Asiti ‘ba anda ri ‘bati dri rii anzo retu ri tro. Ama Opi ohwe amani anzo olu’di tadru rii ‘au. Ani draa Opi ‘a lari ni loso ani ingoni ya ni ote, amanzoru ana le si vua ana kiza si okposi. Rubanga ohwe amani asiti egbwe bu dri rii ana ofu loso pelere di dri ri si. Dii ta jele hwa alusa silingi si kpe ri ‘i. Rubanga ehwe amani Endri Ole rii kare aluga kendre ondi ana amani ofu loso ri ehweka ri ani ‘ausini kebedru amolu dru okpo vua ama mba dru okpo anda anda. Ofu loso ani pelere dii ta badia ama mba vua ama olu Rubanga ‘a andraga tutu retu ri tro ri ‘i. Opi ohwe amani ofu loso pelere dii ‘au vua asiti ani egbwe adusiku oni ote ‘ba tutu esuka ra ri ‘bati kaki olu lidri tutu ‘a rucore driaru ra ri si.
Kendre ondiku ana rusika Luka ga ri ani, Maria ojo, “ta Rubanga za’di wa ani iyo… Ma tiluza Opi dri ‘i! Kideru mani nya jokaa ri ani” (Luka 1:37-38). Saa Maria ‘a ofu loso pelere di Rubanga dri di ‘aijo ri si, kendre ondi malaika driaru ri ‘a jokaa ri ani, emu oko Yesu ni ‘a ga ra. Alua ri ani, ‘ai ‘aidri ri si, ‘ba ‘ai tro ri ‘bati isa esuki ofu loso pelere dii ‘aia ‘asiti ga ra.
“Adusiku inyo koli ‘aia unzile rii mgbu vua idu teri oto tro ‘ai ‘a olokodri ga rii sa pi, oto ‘ba lejo ejika anini ri ‘bati dri tro, dii ta ride’di saa ‘ba Midia ga ni dri si ri ‘i” (Izaia 9:4). Sitani ka tesa icandi inyai ‘au, laza tro, ka rerika ku eji ama lidri ni ‘a sa ama mori oca ana mi ni ndejo ku. Ki Rubanga ‘a ama leka ndro si odi oja Sitani ‘a ru ga oko oza ani ra.
“Amani ‘bara’go otiru ra, amani ‘bara’go ehweru ra; lase cidru ri obaru ana olokodri ga. Ru driaru ri karungwe losondro ‘i, ma’di ‘ba asiti umwi’di ri ‘i, Rubanga oru nde’dia ri ‘i, Ata olu’di tadru ri ‘i, vua amba egbwe dri ‘i. Rinzaka ana lase dri ti ana eku tro hwa alusa eko ku, ka opi Davide dri ase suru ziti ri tro ana komwi ni dri ru, ka cara hwe ‘aini vua ka lamgba anda dri ri ‘a driba ni nze ‘aini anda si ri’jo saa nasi cajo ndi andraga, paka vuti ‘a eko’jo ri inga. Le Opi ni amba ta cidru dri ri ka ta di ide ni” (Izaia 9:6-7).
Rubanga uba tati eku hwejo amani ofu loso pelere Yesu ‘a ejile disi. Oza Sitani ‘a mi ni ondiku ta ana ti ubale ra ri si oko ohwe amani layu mori Sitani dri ri ‘a dri ga ra.
Opi emu vudri di ‘a ana mori cidru ri tro ra oko uba tati enzi cidru vumudi dri di dujo pi. Disiru amasa ama Opi amadri ri ungwe, ma’di losondro rere ri ‘i. Adusi ide amani ta loso rere rii ekpadru. Rubanga ‘a tati ubale emujo vudri di ‘a kendre Ngwaapi ‘ba drii dru ani rii ta ‘aujo ri ‘i. “Nyemu dria eriru. Jo sa nya enzi ko ka ika ngali sa, kengwi ingwe si ani wa; jo tee nya enzi koka ika ngali nyali ani sa kengwi ingwe bue woro ani wa” (Izaia 1:18).
Opi uba tati amani lari hwe’jo ama enzi si disidru ohwe amani lebe enzi dri olu’di tadru rii ‘au. Ojo ta Yesu ni dri ojo ani losodro ‘i vua, sa tro, Ide amani ta nyuma dri rii ‘au. “Ru driaru ri karungwe ma’di ‘ba asiti umwi’di ri ‘i vua Rubanga retu ri ‘i.” Rubanga ni, kendre ma’di ama asiti ni umwi’di ri ani, uba tati ama lari dri rii ofu loso pelere ndro di si vua ide tati loso ana ubale dii amani lari hwejo ‘bobodru ama enzi si.
Lali Rubanga dri ri ciri si onde ‘ba dri rii ra. Yesu ‘a batisimu esuka Yoana dri ni ana ciri ‘i ide ta dii kare alu ga Yesu ‘a draka kuruce dri amani lari hwe’jo vua ana ama enzi ni duka cidru pi si. Dii gbadru ta ‘aujo ana idele amani ri ‘i, ki ta amani lari hwe’di ama enzi ni ‘a si rii cara le dri ‘i. Cara le dri rii ofu loso anda dri badia ama Endri Ole ri esu eyisi vua Endri si wa ri ‘i.
Opi ojo Izaia 53:10 ga, “Ki ani idraka ohwe OPI ni anzo ra; disi oba ani icandi retu ri ‘ia.” Yesu oba endri anidri rii azi dru ‘ausini ani kide dru Rubanga ‘a le ni wa si. Oba enzi cidru vudri rii ana ‘bara ni, Yesu Kristo ni ru, oko oba esu lamgba ani epajo kuruce dri ri ni ‘ausini kesudru lamgba laka ri ‘bati si ‘i. Dii ofu loso pelerendro ‘bacidru ni lari hwe’di ‘aia enzi ni ‘a si vu alu vua ate’di tri ri ‘i. Kristo azi ana lidri ni amani, uhwe musara enzi dri rii cidru ra, oko oco amaru tutu lari dri rii ra.
Ovi azi azi’jo Rubanga na’ndra ri ‘i
Enzi Yesu ‘a dule ana batisimu
esule Yoana dri ri si pi rii si?
Ajeni rii, endru rii, obu rii erijo saa
vua idojo ri inga paka ana
ekojo ri inga ri ‘i
Bugu Ole ri onze ta driba azi enzi ebejo ki ka enzi itu ‘a ‘a ni ‘a ri ebe ‘au ri idri. Kole ma’di enzidipi ri keji nyuhwa luzu ako rii koko koti ana dri ni nyuhwa di ‘a dri ga koko ka ana enzi ni cidru si ifu nyuhwa di ‘a ru ga. Koko kole ko’di nyuhwa dii kpo kohwe ari ani ‘ba ta azika Rubanga ni ri dri. Paderea di ‘bati kaki ari di du kaki ko kaki uba ‘a alitari dri dii alitari azi igwele igwe ri dri idri kaki ko kaki ari ziti ri uyi alitari ‘a pa ni ga.
Ovi disidru, ma’di di ka lebe ana enzi dri o’du nasi ri esu ra. Ovi dri tijo dri ‘a dii ovi ma’di ni ana enzi ni ifu’jo azi di ‘a dri ga ri ‘i. ‘Ba azi ‘aidri ri hweka ovi anda azi azijo ri si ri ‘bati ka lebe ‘aia enzi dri ri esu ra. Ovi azi azijo rii leti andrani ati ati ama ebule esu driso Yesu oca ama enzi ni dure kuku ri ‘i.
Rubanga ni ana ngasi upe o’du enzi ‘ebejo dii ‘ausini ‘ba Isaraile dri ri ‘bati ka lebe ‘aia enzi dri kinya ‘a ri esu ra si ‘i. Azi di ka kare du o’du mudrijoadru imba tuderi joa ri dri si. Rubanga upe Aroni ni, amba azi ole ri dri rii, olule ma’di enzi Isaraile ‘ba dri kinya ‘a ri ‘ba’di indri kulala ri idri rii dru ‘au. Itu ogboro dii tesa karide ondiku kendre Rubanga ‘a ti ani ubaka ri ani. Lebe enzi dri ri enga ana ciri ni ga vua ana le ‘ba cidru ni ri iga. Dii ana mori ‘i.
“Oju mbadi alitari azi ingwele igwe ri dri idri ri” omba “bugu lejo alijo ri ‘a kare ga” (Lete 20:12), dii kare enzi ‘bacidru ‘a idele ri ‘a rusire ga ri ‘i. Ra paderea di ‘a ari azi enzi ebejo di dri ri bajo oju alitari azi igwele igwe ri dri idri rii kini dru ru enzi tro ‘ba enzi ideka ri ‘bati dri usile Bugu Lali dri ri ‘ia rii pi si. Ari ni lidri iza dri ‘i. Azi azile di ka enzi cidru Isaraile ‘baa idele ri du vua indri kulala dile di ka musara enzi di dri ri uhwe. Rubanga koko ka nyuhwa azile ri ‘ai ‘aia enzi ni dujo. Dii ovi ana ciri dri rii ana le amani ri dri tro.
Yesu Kristo emu vudri di ‘a kendre azi enzi dri ri ani ‘ausini ani koba dru tati Rubanga ‘a ubale ri kengwi anda si. Yesu odu enzi cidru vudri rii ana razika si pi. Ki jo amandre lejo tati ruba’di di dri rii ni, ama ndrea, “Ki ani idraka ohwa OPI ni anzo ra; oba icandi ru asi laza tro” disi “Odu enzi cidru vudri rii pi.”
“Amani ‘bara’go otiru ra, amani ‘bara’go ehweru ra; lase cidru ri obaru ana olokodri ga. Ru driaru ri karungwe losondro ‘i, ma’di ‘ba asiti umwi’di ri ‘i, Rubanga oru nde’dia ri ‘i, Ata olu’di tadru ri ‘i, vua amba egbwe dri ‘i. Rinzaka ana lase dri ti ana eku tro hwa alusa eko ku, ka opi Davide dri ase suru ziti ri tro ana komwi ni dri ru, ka cara hwe ‘aini vua ka lamgba anda dri ri ‘a driba ni nze ‘aini anda si ri’jo saa nasi cajo ndi andraga, paka vuti ‘a eko’jo ri inga. Le Opi ni amba ta cidru dri ri ka ta di ide ni” (Izaia 9:6-7).
Ta gba okpo vua lau retu ri tro ti ruba’di ra rii Yesu keya ka tati Rubanga ubale ri ide ra ‘i ka ama ‘ai ‘ba di ‘bati ni egbwe hwe ana ama enzi cidru vudri rii duka pi si ra. Tati Rubanga ‘a ubale rii le dri ‘i, uba ta di ‘a ti ni egbwe e’jijo ‘ba cidru ni. Dii tati Rubanga ‘a ubale amani ra ri ‘i, vua dii ta ana idele ra ri ‘i.
Mateo 1:18 ga ojoru dini, “Draa oti ama Opi Yesu Kristo dri ideru dini: Esu Yosefu ka Yesu ‘a endre ni Maria ni ‘ijo, ki idoki oluka anetro alu ni kuru, esu ani ‘ba tro ‘a ga okpo Endri Ole ri dri si.” “Yesu” ehwi ani Aridipi ni, ‘ba anidri ri aridi ‘aia enzi ni ‘a ri ‘i. “Kristo” ehwi ani Opi ni trile ra ri ‘i, Opi ‘i. Yesu ni enzi ako, vua ana ama Opi ‘i vua ama Aridipi ‘i oti ani ru zaa ago ni di ku ri dri si anini lari hwe’jo ‘ba anidri ri ‘bati ni.
“‘Keya ka ‘bara’go ti ra, vua kole nyeya nyida ru ani YESU ‘i, adusikua keya ka ‘ba cidru ari ‘aia enzi ni ‘a ni.’ Dria ta di ideru lejo andrani Opi ‘a jole profeta ti si ri kide dru ru” (Mateo 1:21-22).
Yesu odu enzi cidru vudri rii ana batisimu si pi
Osiru Mateo 3:13-16 ga, “Yesu enga Galilea ga emu abu Jurudano ni ga batisimu kore Yoana dri. Ki Yoana ole tadi gaka mgbe, ojo, ‘batisimu ledi nyidri rii ma ‘i, ki nyidri iko nyemu madri ya?’ Ki Yesu ‘ai, ‘Nyebe ta dii kolu ‘bobodru dini, ama ta di ideka dini ni ama anda Rubanga ‘a lele ri ide ‘au.’ Disidru Yoana oko ‘ai ra. Yesu oko batisimu, oca saa zere kuru efu eyi ‘a si pi; mgbesa, ‘bu awiru mgbo, vua ondre Endri Rubanga dri endre’di amamu ani ri esi ana dri ga.”
Lejo di iga ojo ta Yoana ni Batisimu hwe’di ri idri. Kole Yesu kesu batisimu Yoana dri adusi? Kole Yesu kesu batisimu anini enzi cidru vudri di ‘a ri du ‘jo ‘i, vua gbadru odu enzi cidru vudri di ‘a rii tati Rubanga ‘a ubale risi pi.
“Lase cidru ri karuba ana olokodri ga” (Izaia 9:6). Di ‘a “lase dii” ehwi ani mori okpo tro ‘aa rii tete Yesu ni Amba bu dri ri iga ‘i, adusi ani Amba vu di dri ri ‘i. Dii cara hwele tete Yesu Kristo ni adite ri ‘i. Yesu ide ta loso rere rii ana enzi ‘ba cidru ri dri ri duka si ‘au. Ta loso ledii ana batisimu esuka Yoana dri ‘i. Ta Yesu ‘a jole rii ana jorea “Ama ta di ideka dini ni ama anda Rubanga ‘a lele ri ide ‘au rii” amala enzi cidru vudri di ‘a ri duka pi ni ani ta anda vua esi’di ca ri ‘i.
Roma 1:17 ojo, “Anda Rubanga dri ite’deru ‘ai ‘a rinzaka ana oluka ‘bo si.” Anda anda Rubanga dri ri ite’deru ofu loso ri ‘ia. Gba ofu loso eyidri vua Endri dri ri ‘bati ka anda anda Rubanga dri ri ite’de ‘au ya? Oo! Ofu Loso ce rii jodia Yesu Kristo odu enzi cidru vudri rii ana batisimu si vua ana repaka kuruce dri si ri ‘i. Ofu Loso eyidri vua Endri dri rii ani ofu loso anda anda Rubanga dri ri ‘a rite’de re ‘ausi ri ‘i. Yesu odu enzi cidru vudri rii pi ingoni si? Odu enzi cidru vudri rii Yoana ni Batisimu hwe’di ri ‘a batisimu hweka anini Abu Jurudano ‘a ni si.
“Anda anda ndutudru dii” Giriki ‘ba ti si ungwea “pasan kusa dikeosinin”. Di ‘a ehwi ni Yesu ni ana ngasi odu enzi cidru ‘ba dri rii ovi anda vua esidi ca ri si ‘i. Di ‘a ehwini Yesu ‘a enzi cidru duka pi vua ana ‘ai jeka pelere ni gbadru anda vua cuwi. Kole Yesu kesu batisimu Yoana dri kpa odri ko wio enzi cidru vudri ri du.
Rubanga oni batisimu Yesu dri rii gbadru ta okpo ruledi egbwe ejijo enzi ‘ba ni ri ‘i ni ote. Kuri esu Yesu kengwi ama Aridipi ‘i dru ni kpe, jo kesu batisimu Yoana dri ku vua ari ani kora kuruce dri ku ‘i. Yesu isa ide ebu kendre azi enzi du’di ri ani vu di idri ‘i.
Rubanga ojo Izaia 53:6 ga, “Ama kpodru kendre bilo kuka ego ri ani; ameco ‘bacidru, aba engwiki, leti ‘aidri ‘aiangasi ri si. Disidru OPI oba enzi amadri rii cidru ana dri ga.” Kole duba Yesu ka ‘i enzi cidru vudri ri ni ‘anini ta Rubanga ‘a ti ubale ri ide’jo ‘i. Ledii ra Yesu ‘a emu’jo vudri di ‘a kendre azi enzi ebe’jo ri ani ru ‘ba dri si vua ana batisimu esu’jo Yoana dri ri ‘i.
Kole duba Yesu ka ‘i enzi ‘ba cidru dri ri ni koko kesu lamgba ‘ausi anini ta Rubanga ‘a ti ubale ri ide’jo ‘i vua anini ana le dra’di kpe ri ite’de ‘jo ‘i. Yesu efu eyi ‘a si ana batisimu ni vu di, Rubanga ojo, “Nyi ma Ngwaapi ni ma lele ndro rii, ma le ni kpo nyiru” (Maeo 3:17).
‘Barago otiru amani ra
“Amani ‘bara’go otiru ra, amani ‘bara’go ehweru ra; lase cidru ri obaru ana olokodri ga. Ru driaru ri karungwe losondro ‘i, ma’di ‘ba asiti umwi’di ri ‘i, Rubanga oru nde’dia ri ‘i, Ata olu’di tadru ri ‘i, vua amba egbwe dri ‘i” (Izaia 9:6). Yesu ni Ngwaapi Rubanga dri ‘i. Yesu ni Rubanga ta ‘bi di ri ‘i adusiku obi ta cidru vudri rii ni. Ani tete Ngwaapi Rubanga oru nde’dia ri dri ‘i adite ku, ki ani ta ‘bi di ‘i vua Opi egbwe dri ‘i. Yesu ni Rubanga asiti egbwe hwe’di ‘bacidru ni ri ‘i.
Yesu ni Rubanga anda dri ‘i. Odu ama enzi ni cidru si pi, aria ma ra, vua ohwe amani egbwe ra. Jodiniri dri driasa enzi olu vudri di ‘a ‘aa ya? Iyo, hwa alusa enzi vudri di ‘a iyo. Ra ama jojoadru asiti okposi enzi draa vudri di ‘a iyo rii adusiku amigeni ofu loso pelere dii ra, dii ofu loso pelerendro jodia Yesu odu enzi cidru vudri rii ana batisimu si vua ana ari kuruce dri ri si ri ‘i. Yesu ojo hwa alusa amani enzo ‘au ku. Yesu uhwe musara cidru enzi dri rii ana batisimu si vua ana ari si. Oba ‘ba cidru di igenika ri ‘bati engwiki ana ‘baciri ti ‘i vua oko ohwe ‘aini cidru egbwe ra. Oba ama olu ana ‘baciri ecole ole ri ‘bati ani ‘ai si vua ru dru. Ma Opi ni ecu vua ma anzo hwe anini.
Dii! Biloangwa Rubanga dri enzi vudri ri du di ri ‘i!
Yoana 1:29 ojo, “Obu zi Yoana ondre Yesu kemu anidri, ojo, ‘Dii! Biloangwa Rubanga dri enzi vudri ri du’di ri i!’” Yesu Kristo ni ana batisimu ‘bacidru dri ri duka ‘a vuka eya ziniga ite’deru odu erijoadru ri si Yoana ni Batisimu hwe’di ri ‘a andraga di. Yoana Batisita ohwe sadini Yesu ni dri ojo, “Dii! Biloangwa Rubanga dri enzi vudri ri du’di ri i!” Vua ziniga ohwe sadini Yoana 1:35-36 ga ojo, “Obu zi, Yoana ti ziniga ‘ba eri ana inile ri tro. Ondre Yesu kemu ‘di, ojo, ‘Dii Biloangwa Rubanga dri enzi vudri ri du’di ri ‘i!’”
Yesu ni Aridipi eya’di kendre Biloangwa Rubanga dri ri ani ri ‘i, ondi kendre Rubanga ‘a ti ani ubaka Ofu Oku ‘a ri ani. Aridipi Yesu Kristo emu amadri kendre ma’di losondro ri ani, ma’di ‘ba asiti imba’di ri ani, vua Rubanga retu ri ani, oko esu batisimu amani lari hwe’jo ama enzi ni ‘a si. ‘Bara’go otiru amani ra. Ai enzi cidru vudri rii batisimu ana esule Yoana dri ri si ra, uhwe musara enzi di ‘bati dri ri ‘a ti ni ra, oko engwi amba eku dri ‘i ani ma’di egbwe hwe’di amani ama lebe ama enzi dri ri esuka si ri ‘i. “Dii! Biloangwa Rubanga dri enzi vudri ri du’di ri ‘i.”
Adusi esu ati risi ‘bani tazi idele wa ani iyo ra rii kolea duba kodraki enzi ‘aia idele ri si ‘i. Ta ‘ba ni dii obaru enzi ruladi kpe ri idele ‘adusi ‘ai tika ovi enzi dri tro si ‘i vua tati ‘a aserega gbadru adi ‘ai be aci olure tadru ri ‘ia. Adusiku kaki olu lidri unzi ri si; oba hwa alusa oluki kusa orobi sa ubi ‘ai Opi Rubanga dri ri si ku adusi ru ‘aidri rii ‘awi ako. Yesu Kristo ni, ani ama Rubanga ‘i, ai enzi cidru amadri rii saa ana batisimu esu’jo Yoana dri Abu Jurudano ‘a ri si ra oko eparu kuruce dri enzi cidru unzi ama idele disi. Saa ana drare rii, Kristo ojo, “Dria lejo oko ra” (Yoana 19:30). Dii owo ta ana jole risi ri ‘i kite’dea Yesu ari ‘bacidru ‘aia enzi ni ‘a si ra vua oko odra kuruce dri ra, vua gbadru ohwe layu ‘ba cidru ofu loso pelere di igenika ri ‘bati ni ra.
“Dii! Biloangwa Rubanga dri enzi vudri ri du’di ri ‘i.” Ini enzi cidru vudri rii ingo ya ni ote ya? Obakiru kpodrusi Yesu Kristo ni ru ku ya? Enzi cidru vudri rii ta ama rumu’jo vudri ri tro cidru obaru ingo? Ifukiru kpodru si Yesu Kristo ni ru. Enzi amadri rii cidru si ingo? Obaru kpodru si ma’di okpo retu ri ‘a rubare olokodri ‘a ru ri idri, obakiru Rubanga ni okpo tro ri iru.
Enzi rijo oti nga ri ‘bati paka drajo ri inga ri tro!
Ama enzi ide ama lidri ‘a ni ru. Ama enzi ide idojo paka saa ama tijo risi ca’jo ndi kinya 20. Ki draa enzi cidru ama idele dria kinya ji’di 20 di ‘bati ingo? Ifukiru kpodru si Yesu Kristo ni ru. Enzi cidru ama idele ama kinyaa olure 21 vua kinya 40 ri ‘bati cidru ifuru Yesu ni ru. Ide ta ku tee ma’di zi kolu ana lidri ni ga kinya si sa’i, adusi enzi cidru ana idele ana lidri ‘a idojo ri inga ri ‘bati enzi cidru ana idele tati ‘a ekore ga rii tro kpodru obaru Yesu Kristo ni ru. Amala enzi cidru ‘baa idele rii, idojo Adamu si ca’jo paka ma’di tati ‘a eya’jo asi’jo vudri di ‘a ri si, kpodru ifuru Yesu ni ru. Adusiku enzi cidru ama ‘baciri ‘a ‘baciri drii vua ‘baciri ‘aia evule utile ri ‘bati dri isa cidru ifuru Yesu ni ru tro. Enzi cidru vudri rii ifuru Yesu ni ru saa ana batisimu esu’jo ri si.
Ki draasa dri enzi olu vudri di ‘a ‘aa ya? Iyo. Alusa enzi eberu kuru. Enzi eberu hwa alusa vudri di ‘a kuru adusiku amigeni ofu loso pelere Yesu Kristo ‘a ehwele amani dii ra. Enzi olu dri nya asiti ga ‘aa ya? Iyo. Amen! Amigeni ofu loso pelere jodia Yesu Kristo odu ama enzi ni cidru si pi rii ‘au. Amanzo Yesu ni olu’di tadru rii ana ebu loso di ideka amani si okposi.
Kristo ingwi ama lidri egwe’di dii ama ru ga ra.Draa amigeni ofu loso pelere dii ‘au di oba ama olu Rubanga tro wa. Adusiku ‘bacidru o’jabazi Rubanga dri ‘i ri ‘bati isa-ai dii enzi ‘ba tazi ‘aini idele wa ani iyo rarii kolea kozuki ‘ai obo eci’di daku ri ‘ia ri ‘i-kaki draa lari esu ‘aia enzi ni ‘a si ‘aia ofu loso pelere di igenika si wa.
Ofu loso pelere di ka amani lini hwe kojoa Opi oje enzi cidru ama idele rii batisimu ana esule Yoana dri ri si pi, odra kuruce dri vua oko onzi lidri di. Amengwi ‘ba Rubanga dri enzi ako ri ‘bati ‘i rii ama ofu loso Yesu dri ri ‘aika si. Yesu azi ru anidri rii ana ngasi ama enzi si. Ani, Ngwaapi Rubanga oru nde’dia ri dri ‘i, ide hwa alusa enzi vudri di ‘a kuru, odu enzi cidru vudri rii pi oko ohwe lari ‘bacidru ani igenika ri ‘bati ni ra. Izaia 53:5 ga ojo, “Idra ani enzi amadri si, ohwe anini icandi ru lo’u tro ama enzi si.”
Yesu odu enzi cidru vudri rii pi, di oko enzi cidru ama tijo ‘au tro ri isa tro odu ‘ai cidru si ama ru ga pi ebe hwa alusa enzi zi ra ni kuru. Uhwe musara enzi cidru dri rii ana draka kuruce dri si diivu oko ohwe amani lari ama enzi cidru ri idri ‘a ra. Yesu oje enzi cidru vudri rii pelere ofu loso pelere disi. Amesu lidri udi rii Yesu si ra. Draa ‘ba cidru ofu loso pelere di igenika ri ‘bati hwa Endri si kpo ku. Amesu draa lidri udi rii lidri olu’di tadru ri tro ra, adusiku Yesu uhwe mori cidru ama enzi dri rii ra. Amengwi ‘baciri Rubanga dri ri ‘bati ‘i rii ama ofu loso pelere ndro Yesu Kristo dri di igenika si.
Nyigeni Yesu Kristo ni Ngwaapi Rubanga dri ‘i ni ra ya? Vua nyigeni ani nya Aridipi ‘i ni ra ya? Oo migeni ra. Yesu Kristo ni ama lidri ‘i. Ama lidri udi ri esu ani si. Adusi esu ama udra ama enzi si ama ta erika ku ti tro. Ki Yesu uhwe musara ama enzi dri rii cidru ana batisimu si vua ana dra kuruce dri ri si. Ohwe amani layu ama opigo enzi dri ri ‘a dri ga ra, ayu ama okpo dra dri ri ‘a dri ga sa ra, ayu ama lumbe Sitani dri ri ‘a dri ga mgbo.
Opi ni Rubanga amani lari hwe’di ama enzi ni ‘a si cidru ri dri ‘i engwi Aridipi ‘bacidru Yesu ni ‘aika ra ri ‘bati dri ‘i. Ki jo ondreki bugu Eberei dri 10:10-12, 14 ti 18 tro ni, ama ndrea Opi eco ama ole ‘ausini draa ra zi amani lebe esu’jo enzi dri ‘a ri kolu di iyo. Ama to Opi Rubanga dri ri iga ama Yesu ni igenika si. Esu aba dri drare ga ama enzi si vua ama dri okpo si, ki ama draale to Bu ‘a ri iga wa vua ama lidri olure tadru ri nya ama batisimu Yesu dri ri ‘aika ana ari tro si ra..
“Leidipi loso ri ka ana lidri ni azi ana bilo si” (Yoana 10:11). Ama Opi emu vudri di ‘a ‘ausini ani ka amani lari hwe ama enzi vudri di ‘a ri ‘a dri ga ana batisimu si, ana dra kuruce dri ri si vua ana onzika si wa si. Vua oko ohwe sa laku Endri Ole ri dri rii ‘ba cidru lebe ‘aia enzi dri ri esuka ‘aia anda di igenika si ri ‘bati ni ra. Anzo kolu nyini, Opi. Ofu loso nyidri rii ofu loso pelere ri ‘i, ani ofu loso ‘ai ‘ba ni laku Endri Ole ri dri ri hwe’di wa ri ‘i. Alleluya! Ecu Opi ni.
Copyright © 2021 by The New Life Mission
