- All e-books and audiobooks on The New Life Mission website are free
- Explore multilingual sermons in global languages
- Two new revised editions in English have been released
- Check out our website translated into 27 languages
Ta tajore driaru ri `i 8: Endri Ole ri `i
[8-8] Eyi Endri Ole ri dri oludi tadru ri kodi adi si? (Yoana 7:37-38 ojo)
(Yoana 7:37-38 ojo)
“O’du itu ogboro ‘a ekojo rii, o’du ndedia ri ‘i, Yesu omba pasi, ojo ta ere, ‘Ma’di eyivi ‘a zale lo rii, kemu madri, ma’di ma ‘ai’di rii kemu mvua, kendre Bugu Ole ri ‘a jokaa ri ani, ma’di lejo ma’dri ‘ai’di rii eyi lidri dri keti asi ‘a ru ra.’”
“O’du itu ogboro ‘a ekojo rii, o’du ndedia ri ‘i, Yesu omba pasi, ojo ta ere, ‘Ma’di eyivi ‘a zale lo rii, kemu madri, ma’di ma ‘ai’di rii kemu mvua, kendre Bugu Ole ri ‘a jokaa ri ani, ma’di lejo ma’dri ‘ai’di rii eyi lidri dri keti asi ‘a ru ra.’”
Adi ka eyi Endri Ole ri dri
olu’di tadru ri mvu ni?
‘Ba ofu loso pelere Yesu ‘a batisimu
dri ri ‘aika ana ari kuruce dri
ri tro ri ‘bati komvu ‘a ni
Eyi Endri Ole ri dri oludi tadru ri kodi lidri ‘ba cidru ofu loso pelere di ‘ika ra ri ‘bati dri ‘ia si. Yoana 7:38 ojo, “Ma’di lejo madri ri ‘aidi rii, eyi lidri dri keti asi ‘a ru ra.” Di ‘a ehwini lebe enzi dri anda rii lari loku rii tro ‘bacidru ofu loso pelere Rubanga ‘a ehwele di ‘aika ra ri ‘bati ni ‘aa.
Laku Endri Ole ri dri ri ka kare du ingoni? Laku Endri Ole ri dri ri ka kare du ni kesu ma’di igeni vua ‘ai ofu loso anda dii kpa, dii ofu loso jodia Yesu odu enzi cidru vudri rii batisimu ana esule Yoana dri ri si ri ‘i. Jo ledi ani ri gba ma’di ‘a ka gba eyi Endri Ole ri dri olu’di tadru ri mvu ra. Adusiku ‘ba cidru ofu loso pelere ndro di ‘aika ri ‘bati dri laku Endri Ole ri dri rii ‘aa, kaki ko kaki eyi ole Endri Ole ri dri di di ‘ai ‘a si aia asiti ow’i di to ri ingwidi ri esu ra jo tee odu cidru si kendreki lejo Rubanga dri ri nzere sa ‘i.
Eyi oludi tadru Endri Ole ri dri ri kodi lidri ‘ba cidru ofu loso eyidri ri ‘iaka ofu loso Endri dri ri tro ra ri ‘bati ‘a lidri ni ‘a, adusi dii ofu loso jodia Opi emu vudri di ‘a lari hwere enzi ‘ba cidru ni ri ‘i. Endri Ole rii anda ranzudi hwa alusa ofu loso eyidri ri tro vua ofu loso Endri dri ri tro kpe ri ‘i, adusiku kolu tesa asiti ‘bacidru lejo Rubanga dri ri ‘aika ra ri ‘bati ‘a asiti ga.
Ma’di alu alu ledia ani komvu eyi oludi tadru Endri Ole ri dri ri ni rii kole ati kesu lebe ana enzi dri rii kpa vua kole kigeni ofu loso Yesu ‘a batisimu dri rii ana ari kuruce dri ri tro kpa. Eyi Endri Ole ri dri oludi tadru di kolu tete ‘aa ri asiti ‘ba ‘aidru lejo Rubanga dri ri igeni ka ra ri ‘bati dri iga. ‘Bacidru ofu loso eyidri ri igenika ofu loso Endri dri ri tro ra ri ‘bati dri eyi Endri Ole ri dri oludi tadru rii ‘aa, kodi ‘aia asiti ga kendre meri ani, kodi koko kati ‘aia asiti ga. Tee saa disi sa, eyi ole Endri Ole ri dri ri kodi vua kati lidri ‘ba lebe ‘aia enzi dri ri esuka ra ri ‘bati dri iga adusi ‘ai ‘ba lebe ‘aia enzi dri ri esuka ‘aia ofu loso pelere ndro Yesu Kristo ‘a batisimu dri ri ‘aika ana ari kuruce dri ri tro si.
Ki, eyi angwa Endri Ole ri dri rii tileangwadru sa asiti ‘ba ‘aidru ofu loso pelere ndro di igeni kuru ri ‘bati ‘a asiti ga iyo. Ki masa tete meya mai vu migeni ofu loso eyidri vua Endri dri dii kpa, kuri esu hwa ma asiti ga eyi olu’di tadru Endri dri di ‘di rii iyo. Saa nasi, ma ‘i Yesu Kristo ni ra sa, ani konyi eyi olu’di tadru Endri Ole ri dri ri ‘a konyi ni ku adusiku esu sa Endri Ole rii ma asiti ga iyo. Ki draale, mesu ofu loso pelere eyidri vua Endri dri dii ra, di oba draa eyi Endri Ole ri dri oludi tadru ri kodi asiti madri ri iga. Draa eyi oludi tadru Endri Ole ri dri ri kodi ma asiti ga, vua kodi asiti ‘ba cidru ofu loso Rubanga dri ri erika vua ‘aikaa ri ‘bati dri iga. Kendre ondiku Yesu ‘a jokaa ri ani, “Ma’di eyivi ‘a zale lo rii, kemu madri ,” eyi oludi tadru Endri Ole ri dri ri kodi ‘ba ‘ai ‘ba Kristo ‘ba tile di ‘aia ofu loso eyidri vua Endri dri ri ‘aika si ri ‘bati si. Eyi oludi tadru Endri Ole ri dri di kodi masa ma asiti ga kare aluga ma ofu loso eyidri vua Endri dri di ‘aika si tee saa angwa disi sa ‘i, ka konyi hwe laki ziti ri ni sa mvujoadru. Rubanga ohwe mani okpo ‘ausi oba eyi ole Endri Ole ri dri ri kodi lidri madri ri ‘ia kendre abu olu’di tadru ri ani. Ta dii karide be rii tete ‘ba laku Endri Ole ri dri ri esuka ra ri ‘bati ni.
Kendre ondiku ana rusika Lete ga tete ma’di esu’di ‘a ri koni ‘a wa rii ni, ki hwa ma’di zi alusa koni ‘a kpe ri ani, laku Endri Ole ri dri rii isa ta ridedi eyi oludi tadru Endri Ole ri dri ri si ri ‘i ani zumadi tete ‘ba laku Endri Ole ri dri ri esuka ‘ai ‘a ofu loso eyidri ri ni ka ofu loso Endri dri ri tro ri si ri ‘i. Disidru kole duba nyini Endri Ole ri kolu adi niru ya ni ote. Vua kole nyini ote tete laku Endri Ole ri dri rii adi hwea ‘ba ‘aidru ofu loso pelere Yesu dri ri igeni ka ri ‘bati ni.
Andrani eze ati ati sa madri migeni tete ari Yesu dri kuruce dri rii ‘au
Ki tee migeni ari Yesu dri kuruce dri rii konde draa kinya mudri ni ra sa, enzi olu dri ma asiti ga ‘aa. Adusiku saa nasi, adri muraa enzi madri rii cidru karebe wa rii ari Yesu dri ri si. Di oba, hwa alusa ma laku enzi dri anda ri esu laku Endri Ole ri dri ri tro ‘ai ovi ani ledi ani ledi si kpe, disidru mesu driluci ehwi ma lidri ni ‘a vua ma asiti ga sa lejo anda rii hwa alusa iyo. Ta zi aludi itede di ‘a migeni Yesu ni ra rii ma ayaka ekelezia ‘a ‘i.
Ledii midoa ma geni ni dri ta uraka ‘i. ‘Azi ma ngasi gbadru mesu Endri Ole rii ra ya?’ Saa andrani ati ma Yesu ni ‘aijo nasi, ale gba ani asiti cidru si vua saa nasi madri hwe ti mgbimgbi dri ri isa ‘aa. Ki aduta eya efu ma ru ga ni? Meya mido uralea ta ma itirile gwe’di ma asiti gad ii hwa alusa ta itede’dia mesu Endri Ole rii ra rii ku, di oba hwa alusa mesu laku Endri Ole ri dri rii kuru. Migeni Yesu ni ra ki hwa alusa Endri Ole rii eyi endri Ole ri dri olu’di tadru ri tro asiti madri ri iga iyo.
Ani gba ta nikaa ni okpo ri ‘i di nainga asiti madri rii aci ya kusa egbwe ya isa ‘i, adusi nainga geni madri rii kpodru sa omba dini 4Kalivini. A dri dule ni ri idri.Lazi mani ‘aile rii ledi ‘bati ‘i:
(1) Endri Ole ri kolu ma asiti ga ya? ─Iyo. Ani ta driaru di ani ma asiti ga ya ni dri anda ku.─
(2) Jodiniri enzi ma asiti ga ‘aa ya? ─Oo, enzi ‘aa.─ Gbadru oo ma asiti ga enzi olu dri ‘aa, tee migeni Yesu ‘a ari kuruce dri rii ra sa ‘i. Enzi olu dri ma asiti ga ‘aa, di oba ma ilegi enzi rujo ri ilegi odu cidru si. Enzi ma asiti gar ii hwa alusa iniru pi ni kuru tee abi mori sin a ingoni sa ‘i.
| 4Dii ovi ta inile Kristo ‘ba ni ri ‘a driba ni nze’jo Yoana Kalivini ‘a idole ni ri ‘i. O’jo ta ogu ecoka enzi dri ti ‘a dri ga lari tro. Ewo tou Kalivini ‘a dini dri rii onze ta driaru oviru ondiku dini Aminia ‘ba dri tro. Dini Kalivini dri ri kinia: 1) Icandi retu rii: ojoru enzi elo ewo ‘baa ru dri rii kpodru si: ana ru ‘i, endri ‘i, uje ‘i, vua urata ‘i, 2) Kiza tasi ku ri ‘i: ojoru Rubanga ‘a kiza ‘ba cidru ni rii ideru ilili Rubanga ‘a le ana ngasi ri si ‘ba ni tazi jole laka iyo. Gbadru ‘ba ide ta laka kuru, 3) Enzi ebela manyi ‘a dru ri ‘i: ojoru Kristo odu enzi ‘ba cidru dri rii ku, ki ra rii odu tete enzi ‘ba upele lari esule ri ‘bati dri ‘i, 4) Kiza ruga’di kpe ri ‘i: ojoru Rubanga ‘a ma’di zi ungweka lari ga ka ruga kpe, 5) Ta mika ‘ba Opi ‘a upele ra ri ‘bati dri ‘i: ma’di zi ‘a lari ni egweka anini ‘e ka iyo ni ta okpo ri ‘i. Ki nyi ta ana inile ri ‘a mgbi ni ni di ce ya ni nya ovikaa ofu loso eyidri vua Endri dri ri tro si, ovidru geni ‘ia bale enzi ebela manyi ‘a dru di idri ri si. |
‘Ki jodiniri ma laku Endri Ole ri dri ri esu ingoni?’ ‘Ma gba enzi ma asiti ga ri je ingoni?’ Ai ledii lejo unzi okpo eri ma urale ma uje ga ri ‘i, vua diniri esu ma ‘i Yesu ni ra. Nainga esu ati ati ajo ta sa ti mgbimgbi ri si ra kpa meya migeni Yesu ni ra vua migeni enzi madri ri isa cidru ojeru pelere manzo ma ma ‘ai Yesu ‘a ari ni dri ri si okpo si.
Amala, saa oce koya andraga di, enzi ido zoka ma lidri ni ga andra andra. Aga enzi si ndru. Ilegi enzi rujo ri ‘bati ilegi abiri tajo ri tro kpodru sis a oje ma enzi ni pelere ni kuru adusi esu ma ‘i tete ari Yesu dri rii ‘au. Ori oko ma ma enzi anda anda ri si kinya ekpadru. Ori ‘a ma koka nza si, oba ma lejo Yesu dri ri isa nze ‘ba ziti ri ni mbimbi. Maya ekelezia ‘a be vua ahwe ma ma ngasi ebu ide jo Yesu ni, migeni ari driaru rii ‘au.
Adusiku, saa oce komwiru andraga gaadru di, enzi ma asiti ga ri oba mani goga ‘ai anda ri esure ga ci. Mani Yesu ni igeni ka engwi kendre ati ri ani okpo. Ama asiti cidru si geni madri ri bale ari Yesu dri ri idri ako aba Rubanga isa oni ta ma igenile dii ote. Ki sa, awi ako engwi ma lidri ni ‘a palanda ta ‘oe ma asiti ga alu’di sa iyo. Ai ovi ani ledi ani ledi ebe ma asiti ni ilili oba ma ta ra tesa misa mbi ri idri, oko eco ma oba mengwi Kristo ‘bago dranga, ta radi tete ana obo angwe esi ri idri ri ani. Ara ta ma ngasi madri ga di, ‘Mura Yesu ni igeni ka ni ‘bacidru ni ledi ani, disidru tete igeni di ‘a dini rii ma adute ku!’ Aga ‘aikaa ma geni ni mbi ni mgbe. Ki amala, ilegi madri enzi rujo ri ‘bati ari Yesu dri ri tro kpodru sa obi enzi madri gbadru ri jele pelere ni kpe.
Ki jodiniri dria gba geni ma enzi tema tema di ‘a rujejo pelere ni wa rii ingo ri ‘i? Enzi madri anda anda ri karuje pelere wa rii ma ‘ai kaa enzi cidru ma idele rii ojeru pelere obaru Yesu ni ru saa ana batisimu esu’jo Abu Jurudano ‘a ri si si. Dii ta rusidi Mateo 3:13-17 ga ri ‘i. Ki jodiniri ari Yesu dri ri oje ma enzi ma tijo ‘autro rii kuru adusi? Ani vua migeni ofu loso, ta jodi batisimu Yoana ‘a hwele Yesu ni di idri rii kuru.
Jodiniri di ‘a ehwi ni enzi cidru vudri ri ojeru pelere batisimu Yesu dri ri si ‘i ya? Oo, ledii ce. Bugu Ole ri ohwe sadini ledi idri ojo “Jo ma’di oti di eyisi vua Endri si ku ri ka Opi Rubanga dri ri ndre kpe” (Yoana 3:3-5). Yesu emu vudri di ‘a vua oko ‘ai enzi cidru vudri di ‘a rii batisimu ana esule Yoana dri ri si ra.
Ki sa ma ‘i dii ce ni kuru disi kole mandru Ofu Oku ri ‘a ‘a ni Ofu Odi ri trot a di ‘a anda ni ni jo. Ki mundru di ako mesu gbadru lejo laka rii ce. Enzi cidru vudri rii Yesu esu batisimu di obaru Yesu ‘a ru ga, vua enzi madri ri isa cidru obaru ana ru ga saa nasi tro. Mengwi anda enzi ako ma lejo di igenika si. Meya masu dii lejo anda dri ri ‘i kendre ondiku ana rusika Bugu Ole ri ‘ia ri ani vua ani dii ofu loso pelere ndro vu di idri ri ‘i.
Inzajoadru, meya mera ma ‘ai Yesu ‘a ari ni dri ri ohwe mani lari kuru ni adusi ya ni ote. Lejo ni amala hwa alusa ma enzi madri ri ba Yesu ni ru kpe adusiku migeni batisimu Yesu dri Abu Jurudano ‘a rii kuru. Ki vule vule ni meya mesu anda ra. Ako meya migeni Yesu eya vudri di ‘ masi ni ra, vua meya migeni odu enzi cidru vudri rii ana batisimu si, vuaru eya odra kuruce dri layu hwejo amani ama enzi cidru vudri ri si. Vua ziniga di meya mera batisimu driaru ri ‘bati ana ari kuruce dri ri tro kpodru si sa obaru enzi cidru vudri ri du ‘jo. Draa ma ma’di anda ri ‘i anzo retu ofu loso pelere Yesu ‘a ehwele amani disi, adusi enzi madri rii cidru eberu ra.
Lini ekelezia dri ri oje ma enzi ni pelere rii ni ku, ki batisimu Yesu dri rii ana ari kuruce dri ri tro oje ma enzi ni pelere rii ni. Anda dii esu ‘a ofu loso pelere ri ‘ia. Mesu lari ma enzi ni dri ‘a cidru ra ki di ideru ma geni ari Yesu dri ri idri adute risi ku, ki draa ma batisimu Yesu dri ri igeni ka ana ari tro ohwe mani lari ni.
Ta ziniga alu ma lerea mahwe anzo ‘ausi tro rii ma ofu loso di igenika si Endri Ole Rubanga dri ri esi ma dri ga ra. Draa Endri Ole ri kolu ma asiti ga kare aluga lejo ehwi Yesu ‘a batisimu esule Yoana dri ri si ana ari kuruce dri ri tro.
Manzo Opi ni ana mani ofu loso pelere di hweka si vua ana bakaa ma ‘ai loso di nze kendre ondiku maju Yesu dri ri ‘bati ‘a nzekaa ri ani si. Rubanga ohwe mani Endri Ole rii kendre dride ani ra, tee jo ta ma idele ri kolu ma ofu loso ri igenika ‘i adute sa ‘i. Ma draa ofu loso di nze ‘baziti ni laru retu ri tro vua ka ka konyi hwe ‘bacidru vudri ri ‘bati ni nza. Majoa ‘aini gbo ‘ia ‘a ari Yesu dri ri igenika ‘adute odu hwa alusa enzi ‘aidri rii cidru si pi ni ku!
Ki majoa ‘aini ‘aia enzi ni cidru si ka ruje pelere wa rii kesu kaki ofu loso pelere di igeni kpa, dii ofu loso ta jodi batisimu Yesu ‘a esule Yoana dri ri idri ana ari kuruce dri ri tro ri ‘i. Draa madri drinza gaadru sa Rubanga ‘a andraga iyo ma ebu ni draa ofu loso di nze ka. Ma draa ofu loso ruti’jo di eyisi vua Endri si di nze ‘bacidu vudri di ‘a ri ‘bati ni ori angwa sa ako.Ahwe anzo Opi ni okposi. Manzo Opi ni okposi ana bakaa ma eyi lidri dri Endri Ole ri dri di mvu ana mani ofu loso eyidri vua Endri dri ri hwaka si si ‘i.
Amala, saa oce koya andraga di, enzi ido zoka ma lidri ni ga andra andra. Aga enzi si ndru. Ilegi enzi rujo ri ‘bati ilegi abiri tajo ri tro kpodru sis a oje ma enzi ni pelere ni kuru adusi esu ma ‘i tete ari Yesu dri rii ‘au. Ori oko ma ma enzi anda anda ri si kinya ekpadru. Ori ‘a ma koka nza si, oba ma lejo Yesu dri ri isa nze ‘ba ziti ri ni mbimbi. Maya ekelezia ‘a be vua ahwe ma ma ngasi ebu ide jo Yesu ni, migeni ari driaru rii ‘au.
Adusiku, saa oce komwiru andraga gaadru di, enzi ma asiti ga ri oba mani goga ‘ai anda ri esure ga ci. Mani Yesu ni igeni ka engwi kendre ati ri ani okpo. Ama asiti cidru si geni madri ri bale ari Yesu dri ri idri ako aba Rubanga isa oni ta ma igenile dii ote. Ki sa, awi ako engwi ma lidri ni ‘a palanda ta ‘oe ma asiti ga alu’di sa iyo. Ai ovi ani ledi ani ledi ebe ma asiti ni ilili oba ma ta ra tesa misa mbi ri idri, oko eco ma oba mengwi Kristo ‘bago dranga, ta radi tete ana obo angwe esi ri idri ri ani. Ara ta ma ngasi madri ga di, ‘Mura Yesu ni igeni ka ni ‘bacidru ni ledi ani, disidru tete igeni di ‘a dini rii ma adute ku!’ Aga ‘aikaa ma geni ni mbi ni mgbe. Ki amala, ilegi madri enzi rujo ri ‘bati ari Yesu dri ri tro kpodru sa obi enzi madri gbadru ri jele pelere ni kpe.
Ki jodiniri dria gba geni ma enzi tema tema di ‘a rujejo pelere ni wa rii ingo ri ‘i? Enzi madri anda anda ri karuje pelere wa rii ma ‘ai kaa enzi cidru ma idele rii ojeru pelere obaru Yesu ni ru saa ana batisimu esu’jo Abu Jurudano ‘a ri si si. Dii ta rusidi Mateo 3:13-17 ga ri ‘i. Ki jodiniri ari Yesu dri ri oje ma enzi ma tijo ‘autro rii kuru adusi? Ani vua migeni ofu loso, ta jodi batisimu Yoana ‘a hwele Yesu ni di idri rii kuru.
Jodiniri di ‘a ehwi ni enzi cidru vudri ri ojeru pelere batisimu Yesu dri ri si ‘i ya? Oo, ledii ce. Bugu Ole ri ohwe sadini ledi idri ojo “Jo ma’di oti di eyisi vua Endri si ku ri ka Opi Rubanga dri ri ndre kpe” (Yoana 3:3-5). Yesu emu vudri di ‘a vua oko ‘ai enzi cidru vudri di ‘a rii batisimu ana esule Yoana dri ri si ra.
Ki sa ma ‘i dii ce ni kuru disi kole mandru Ofu Oku ri ‘a ‘a ni Ofu Odi ri trot a di ‘a anda ni ni jo. Ki mundru di ako mesu gbadru lejo laka rii ce. Enzi cidru vudri rii Yesu esu batisimu di obaru Yesu ‘a ru ga, vua enzi madri ri isa cidru obaru ana ru ga saa nasi tro. Mengwi anda enzi ako ma lejo di igenika si. Meya masu dii lejo anda dri ri ‘i kendre ondiku ana rusika Bugu Ole ri ‘ia ri ani vua ani dii ofu loso pelere ndro vu di idri ri ‘i.
Inzajoadru, meya mera ma ‘ai Yesu ‘a ari ni dri ri ohwe mani lari kuru ni adusi ya ni ote. Lejo ni amala hwa alusa ma enzi madri ri ba Yesu ni ru kpe adusiku migeni batisimu Yesu dri Abu Jurudano ‘a rii kuru. Ki vule vule ni meya mesu anda ra. Ako meya migeni Yesu eya vudri di ‘ masi ni ra, vua meya migeni odu enzi cidru vudri rii ana batisimu si, vuaru eya odra kuruce dri layu hwejo amani ama enzi cidru vudri ri si. Vua ziniga di meya mera batisimu driaru ri ‘bati ana ari kuruce dri ri tro kpodru si sa obaru enzi cidru vudri ri du ‘jo. Draa ma ma’di anda ri ‘i anzo retu ofu loso pelere Yesu ‘a ehwele amani disi, adusi enzi madri rii cidru eberu ra.
Lini ekelezia dri ri oje ma enzi ni pelere rii ni ku, ki batisimu Yesu dri rii ana ari kuruce dri ri tro oje ma enzi ni pelere rii ni. Anda dii esu ‘a ofu loso pelere ri ‘ia. Mesu lari ma enzi ni dri ‘a cidru ra ki di ideru ma geni ari Yesu dri ri idri adute risi ku, ki draa ma batisimu Yesu dri ri igeni ka ana ari tro ohwe mani lari ni.
Ta ziniga alu ma lerea mahwe anzo ‘ausi tro rii ma ofu loso di igenika si Endri Ole Rubanga dri ri esi ma dri ga ra. Draa Endri Ole ri kolu ma asiti ga kare aluga lejo ehwi Yesu ‘a batisimu esule Yoana dri ri si ana ari kuruce dri ri tro.
Manzo Opi ni ana mani ofu loso pelere di hweka si vua ana bakaa ma ‘ai loso di nze kendre ondiku maju Yesu dri ri ‘bati ‘a nzekaa ri ani si. Rubanga ohwe mani Endri Ole rii kendre dride ani ra, tee jo ta ma idele ri kolu ma ofu loso ri igenika ‘i adute sa ‘i. Ma draa ofu loso di nze ‘baziti ni laru retu ri tro vua ka ka konyi hwe ‘bacidru vudri ri ‘bati ni nza. Majoa ‘aini gbo ‘ia ‘a ari Yesu dri ri igenika ‘adute odu hwa alusa enzi ‘aidri rii cidru si pi ni ku!
Ki majoa ‘aini ‘aia enzi ni cidru si ka ruje pelere wa rii kesu kaki ofu loso pelere di igeni kpa, dii ofu loso ta jodi batisimu Yesu ‘a esule Yoana dri ri idri ana ari kuruce dri ri tro ri ‘i. Draa madri drinza gaadru sa Rubanga ‘a andraga iyo ma ebu ni draa ofu loso di nze ka. Ma draa ofu loso ruti’jo di eyisi vua Endri si di nze ‘bacidu vudri di ‘a ri ‘bati ni ori angwa sa ako.Ahwe anzo Opi ni okposi. Manzo Opi ni okposi ana bakaa ma eyi lidri dri Endri Ole ri dri di mvu ana mani ofu loso eyidri vua Endri dri ri hwaka si si ‘i.
Leti anda ta ipima jo nijoadru di ofu loso eyidri vua Endri dri rii ofu loso ce ri ‘i ya ri ‘i
Gbadru nyesu lebe nya enzi dri rii laku Endri Ole ri dri tro ra ya? Nyijoa ofu loso ani dii ce ri ‘i ni ingoni si? O’duzi alu si abi ‘ai ‘ba ire kaki ‘bi ‘a ofu loso pelere Yesu ‘a ehwele amani di igenika ri ‘bati dri rii ra. Ma’di alu ri ni mini tete ta ari Yesu dri kuruce dri ri idri. Vua ajo laka kole enzi kolu alusa Yesu Kristo ni ‘a di ‘a iyo. Zikajo ri ni ahwe lini ofu loso Yesu dri pelere ana batisimu esule Yoana dri ri idri ana ari kuruce dri ri tro. Ki ta efu’di ‘aaru rii ma’di ani lari esu’di ana ari Yesu dri ri ‘aika si adite rii ojo kolea anidri ana kaci andraga lebe ana enzi idele odu cidru si ri ‘a lebe ni zika tro ‘i. Ki ma’di zikajo ani ofu loso pelere Yesu ‘a batisimu dri ri ‘ai’di ana ari tro ri le, ojo draa ani engwi ma’di anda vua hwa enzi angwa sa ako ri ‘i.
Ojo hwa draa ana asiti ga enzi angwa sa iyo adusi ku ani igeni anda jodia Yesu odu enzi cidru vudri rii pi vua esu lamgba ‘ausi sa ra rii ‘au. Ma’di ani di ani di ka draa laku Endri Ole ri dri Rubanga ‘a hwele ri esu wa adusiku igeni ofu loso rii ra, dii ofu loso jodia batisimu esule Yesu dri ri si enzi cidru vudri ri ojeru pelere ri ‘i.
Ra ma’di ani di ‘a jojoadru draa hwa enzi alusa ana asiti ga iyo rii adusi esu Endri Ole rii ana asiti ga ra di ideru ana ofu loso pelere di igenika si. Endri Ole ri ohwe ‘aini okpo dii jojoadru draa hwa enzi angwa sa ‘aia asiti ga iyo ni ni. Rubanga ohwe laku Endri Ole ri dri rii ‘ba cidru batisimu Yesu ‘a esule Yoana dri ri ‘aika ra ri ‘bati ni ‘ba ana ari kuruce dri ri ‘aika ri tro. Jodiniri Endri Ole ri kolu adi ni ru? Endri Ole rii ohweru dride dru ‘ba cidru ofu loso Yesu ‘a batisimu esule Yoana dri ri ‘aika ana ari kuruce dri ri tro ri ‘bati ni.
Ki amala ta andrani ridedi saa Endri Ole naa emujo maju ‘a dri ga na oba ‘ba amgbu eri ta anda laku Endri Ole ri dri ri ‘a ehwini kuru adusi obaki ofu loso rii maraga. ‘Ba kuraa jo gba ‘ai ka ilegi okposi ‘ai ‘a Endri Ole ri ndruka si, ‘ai koko ka gbadru laku Endri Ole ri dri ri esu ra. Oji draa ahwa saa ra, Kristo ‘ba cidru vu njdutu dri ri dri hwa alusa urata ta anda ri idri iyo, anda ani dii lejo rujo’di ma’di ka tete laku Endri Ole ri dri ri esu wa rii ana ofu loso Yesu ‘a batisimu dri ri ‘ai ka si ana ari tro. Adusiki, draa tiluza amgbu Rubanga dri ri ‘bati, ndrole ‘ba laku Endri Ole ri dri ri esuka ‘ia a ofu loso eyidri ri igenika ofu loso Endri dri ri tro ri ‘bati ‘i, onzeki ofu loso dii konyi Endri Ole ri dri ri si okposi. Di ani di oba, ‘ba amgbu vu ndutu dri ri evu oni anda ofu loso ani pelere di igenijo rii ra vua oko esuki laku endri Ole ri dri rii ra.
Rubanga oba ‘ba cidru ofu loso ani di ‘aika ri ‘bati esuki laku Endri Ole ri dri rii ra. Ojoru Bugu Ole ri ‘ia, “Dii ta ma eyale ma idele o’du eya’di vule ri si ri ‘i, Rubanga ojo, ma ma endri ni eze ‘ba cidru ni” (Ebu majua idele rii 2:17). Adusiku, kole ma’di alu alu koni cuwidru makaa laku Endri Ole ri dri esuka ta nika ofu loso pelere ri idri ni ako rii luna retu ri ‘i. Tazi mgbi ma’di ni laku Endri Ole ri dri ri esujo kovu ofu loso tajodi Yesu ‘a batisimu esule Yoana dri ri ‘bati ana ari kuruce dri ri tro ra ani iyo.
Ki amala Rubanga ‘a aninga ati sa jokaa ma’di kphwi tete Opi Bu dri ri iga wa rii kesu oti ani di esi si vua Endri si si, vua tete ama tile Endri si di ri ‘bati ‘a hwe di esuka ni si, draa ra zi iyo nosi driluci nza ri tro jojoadru kole ma’di kondru laku Endri Ole ri dri rii anini hwijo Opi Bu dri rii ga ‘i ni i. Nyi ki gba ta ra laku Endri Ole ri dri ri esuka ni dri kusa hwika Opi Bu dri ri iga ni dri ingoni jo nyigeni ofu loso eyidri vua Endri dri rii kuru ‘i? Leti zi mgbi vujo ‘Bu ‘a kovu ofu loso pelere di igenika ni ra ani iyo. Nyi tete Endri Ole ri esu wa rii nya geni baka ofu loso Yesu ‘a batisimu dri ri idri si ana ari tro. Kendre ondiku jo ale ta jeka ama silingi hwe ri ani, ama laku endri Ole ri dri ri isa esuka ni kesu a ama ofu loso ri igeni kpa.
Ale majo nyini jo ile laku endri Ole ri dri ri esuka, kole ati nyini vua nyigeni ofu loso eyidri vua Endri dri rii kpa. Di ani di koba nyi ta ni laku Endri Ole ri dri ri esuka ni dri ote. Nyi tete laku Endri Ole ri dri ri esu wa rii nya geni baka ofu loso eyidri ri idri ofu loso Endri dri ri tro si. Rubanga uba tati laku Endri Ole ri dri ri hwejo nyini ra.
Migeni ofu loso pelere dii ra, saa oce ani koya andraga di mitiri ma okpo rere ako migeni ofu loso pelere Rubanga ‘a ehwele mani di onde ta cidru vudri di ‘a rii pelere si ra. Mitiri ‘a mangasi manzo Rubanga ni okposi. Nyisa nyi nyi itiri ovi alua risi ya? Amasu ama ‘ba laku Rubanga dri Endri Ole ri dri ri esuka ra ri ‘bati amesu tutu Rubanga dri rii retu.
Ma draa anyini lini hwe di anyi laku Endri Ole ri dri ri esu anya ofu loso pelere di igenika si ingo ni ya ‘i. ‘Ba ka ‘ai ba ‘ai ‘a ngasi esile ca ‘aini laku Endri Ole ri dri ri esu’jo wa rii tete ‘ai a ofu loso pelere rutijo di esyisi vua Endri si di igeni ka si.
Yoana 7:38 ga, Yesu ojo, “Ma’di lejo madri ‘aidi rii, eyi lidri dri keti asi ‘a ru.” Di ‘a ehwini ‘ba lebe ‘ai ‘a enzi dri ri esuka ‘ai ‘a ofu loso pelere Yesu Kristo ‘a hwele ‘aini ri igenika si ri ‘bati esuki laku endri Ole ri dri rii ra. Eyi oludi tadru Endri Ole ri dri rii kodi ‘ai ‘a asiti ga kendre abu ani ru dru. ‘Ba cidru ofu loso ani pelere di igenika ri ‘bati kaki eyi Endri Ole ri dri di di ‘aia lidri nig a ri asu ra.
Ki tee andrani ma rutire Endri si di ofu loso eyidri ri si vua Endri dri ri si kuru si Yesu ‘a ma ga ka mgbe si, nainga hwa eyi Endri Ole ri dri olu’di tadru rii odi lidri madri ri ‘ia kuru. Ki, naivu ako meya migeni ofu loso eyidri vua Endri dri rii ‘au, mgbe eyi Endri Ole ri dri ri ido di le lidri madri ri ‘ia driluci ako kendre ondiku ana rusika Bugu Ole ri ‘ia ri ani. Ki tee saa disi sa, eyi Endri Ole ri dri ri kodi lidri madri ri ‘ia ofu loso eyidri vua Endri dri Rubanga ‘a ehwele mani ri tro kare aluga. Eyi Endri Ole ri dri rii kodi ma asiti ga weli nza ri si kinya cidru sa ‘i. di oba mgbe mido lejo ofu nzejo rii ‘au, ma ofu loso pelere di nze, ta dii kpodru ideru ma laku Endri Ole ri dri esuka ni vu.
Ma enzi ruka ma ofu loso pelere di ‘ai ka si ti ma laku Endri Ole ri dri esuka tro
Ta ani ledii ideru ire ma kinyaa cara mudi eri ri ‘i. Urata madri ri oba gbadru maraa meya madra ra. Ma ma lidri kinya nainga ri era driluci si, tazi alusa ma asiti ga anda ani iyo, vua ma enzi ma asiti ga ri si asiti madri ri engwi mudi. Maya kare mbi ri iga, ani hwa mako leti ingo ri ‘i ya ni ku. Ma ru ido mazaka vua ta koji ‘e si ma asiti ga iyo.
Ki amala enzi madri ri si, asi laza retu ri ehwi mani ni, oko anisa gba di aduta ka ta di id elidri madri ri ‘ia ni ni anda anda ku. Tazi hwa alusa mani idele wa ani iyo ra rii draa ma lamgba Rubanga dri ri ute ma lidri ‘a ti ‘a ekore ga ‘au disidru ma la ‘i ‘ai lebe ma enzi dri si. “Oh Opi, Ale mesu lebe ma enzi dri rii nya andraga ma ‘ai nya ru ga ri si maca drare kuku. Ziniga, nyija mani laza ma ru ga dini!” milegi vua milegi di di.
Naivu mgbe, masu draa urata mgbi ri ido ezole ma asiti aza’di di iga ni. Ma asiti ido azale vua Rubanga ni undrule, oko kemi ma asiti ga kendre aci ani kongwe ma asti ga kendre mopira bele aci ‘a ri ani. Draa ma asi laza omba di, draa ani urata mgbi ri ‘i ido gwele ma asiti ga kendre aci obo ‘a ri ani ni. Ani ni erijo o’du nasi mido ani ‘aile ma asiti ga lidri udi dini dri si, amala adri muraa Yesu odra kuruce dri mani lari hwejo ma enzi si.
Ki naivu oji saa para ni kuru, mgbe masu ani ta joka ti mgbimgbi si ote. Vulega mido ilegile owoka tro ma Yesu ‘a ari ra’di kuruce dri ri era. Manzo ani okposi ana ari ‘a raka kuruce dri masi si ‘i.
Ta ledi ‘a rideka nivu oba aga ma lidri ati ati na’i mgbe mesu ebu udi badi ‘a maya ilegi ga itu Rubanga ole ri si wa rii ‘au. Saa nasi, ma asiti ole Yesu ni ndro, asiti egbwe retu rii tesa ka ma ko ni jo gba mera Yesu ‘a ari ra’di kuruce dri mani ma enzi si mani lebe hwejo rii ni ‘i. Ma endri dini si ri ido zo ka, ki geni madri rii kpodru si sa ari Yesu dri kuruce dri ri idri.
Amala, saa oce koya andra ga di, ma lidri dini dri ri engwi mani icandi adusiku enzi ‘a oluka ma asiti ga awi ako tro ‘aa si ‘i. Enzi ma asiti gar ii gbadru ojeru pelere ni kuru adusi geni madri rii tete Yesu ‘a ari kuruce dri ri idri adute. Abi enzi cidru ma asiti ga ri jele ilegi enzi rujo ri si. Ki, ilegi cidru ma ilegile rii milegi ‘a rii ma lekaa mesu lebe ma enzi dri rii Rubanga ‘a andra ga ‘i si ki sa hwa oma ma enzi ni jele pelere ni kpe. Di ideru kpe ni amala ma cara Rubanga dri ri ‘a ta ni mbaka kpe si. Di oba enzi ma idele ri ido gale ma asiti ga palanda.
Ki tee jo enzi madri rii cidru kojeru pelere ma ilegi enzi rujo risi kuru sa, tazi mani idele wa ani iyo ra rii madri maci andraga ilegi enzi rujo di joka tro. Migeni saa cidru ma enzi ide’jo ri si, ma enzi madri ri je pelere wa rii ilegi enzi rujo ri si ma ta ra Yesu ‘a ari kuruce dri ri idri. Jo maci ma lidri dini dri di tro andraga ni, awi ako madri ri koba enzi madri ri kido zoka andra andra. Icandi madri rii tesa kozo andra andra adusi ma enzi di ide ka si.
Mengwi draa Kristo ‘bago Farazei go ri ani, saa oya andraga di evu upe ma leidipi ‘a gaga ‘i vuaru ma enzi ‘a rinzaka ti tro sa evu upe ma ma’di ofu loso ri nze’di ri ‘i. Aya angwe ofu loso ri nze si ma teri anzi enzi dri di itirika ma asiti ga ti tro sa ‘i, muraa ma yaka ofu nzesi dii leti tete alu mani ma endri ni jejo enzi dri ‘a pelere ni wa ri ‘i. Ki sa hwa enzi madri ri ojeru ‘ai ovi ani di ani disi vua ma ma azika-ma ngasi si kuru.
O’du zi alu masu Sitani oko sa ma ra. Mitiri ma ma’di enzidipi rere ri ‘i enzi ma asiti ga ri si ‘i vua esu ojo mani kole madra draa ma enzi si ra sa ma ‘ai ‘a ra. “Nyide enzi ra, enzo ‘a?” Sitani kaci andra ga ma enzi ni alika tro vua icandi hweka mani tro.
Ai madri rii emu onyo ra. Maya mura ta ‘a hwa alusa ma enzi madri loku loku di je ari Yesu dri ri si ma ilegi enzi rujo ri tro kpe ni dri di, ako mesu ma mnagasi gba icandi retu ri ‘i ‘a.
Ma ta laka fonyi Kalivini dri Seminari ‘a ri iga si, ale ma ta nika batisimu Yesu ‘a esule Yoana dri ri idri si kpo. Muzi laponyi gboro lini hweka kare nai ga ri ‘bati lazi di ra Yoana ‘a batisimu hwejo Yesu Kristo ni Abu Jurudano ‘a rii adu ya ni di dri ri si okposi. Ki sa ‘ai ‘ai ‘a hwele rii mgbi rere, kaki jo ‘a batisimu driaru rii kitededru ana ovi ni ‘i kusa konze dru ta driba ani Ngwaapi Rubanga dri ri ‘i ‘i. Ki sa, ‘ai ‘ai ‘a hwele di ate mani ku.
Batisimu Anda Yesu ‘a esule Yoana dri di oba mgbe mera ofu loso pelere dii ra
Ma enga ka Seminari ‘a na ‘a nivu, sa hwa ma enzi ni ojeru pelere kuru, adusi mori ta ‘ai ‘a inile ri dri ri oba mesu icandi onde nza rere si andrani ati rii ra. Oko o’du zi alu meya mera ra Yesu ‘a batisimu esu’jo Yoana dri rii ra ako mera ra Yesu ‘a jojoadru ta di ‘a rideka dini ni ‘ai ka ta Rubanga ‘a lele ri ide ‘au ni di isa ra. Ani dii ofu loso pelere jodia enzi madri rii cidru obaru Yesu ni ru batisimu ana esule Abu Jurudano ‘a ri si ri ‘i. Rubanga oba mera anda dii ana lejo rusi’di ra ri si.
Ma lejo Rubanga dri ri laka vua ma lakaa di ni vu, mesu kare ofu loso pelere di ‘a rusire ga rii ra, vule vule ni meya masu kumbe enzi madri rii cidru ifuru Yesu ni ru batisimu ana esule Yoana dri ri si oko esu lamgba laka rii ana repaka kuruce dri si.
Dii esu mera gbadru draa laku Endri Ole ri dri ri esi ma dri ga ra ni kpa. Loku loku enzi cidru ma asiti ga rii ma ofu loso pelere di igenika ‘au si ojekiru pelere vua ebekiru ra. Enzi cidru aninga badia ma asiti kaza vua mengwi ori rii kpodru mori ofu loso pelere di dri si ojekiru pelere. Enzi ‘ai andrani oku rumadi rujele ma ilegi enzi rujo ri si vua ma ma azika-mangasi si sa kpe nai kpodru si udra ma asiti si ra ta di ideru mgbe vu alu. Gbadru manzo Opi ni okposi.
Ma gbadru ta ili ri jo ‘au jo tee majo enzi cidru vudri rii karebe tete ari Yesu dri kuruce dri ri si adite kpe sa ‘i. Adusiku batisimu Yesu ‘a esule Yoana dri ri isa ka ma dri ni se amani lebe enzi dri esure ga. Draa kole ma’di alu alu koni vua ka ‘i enzi anidri rii ojeru pelere koko kohwe anzo ofu loso eyidri vua Endri dri ri si.Endri Ole rii gbadru mitiri ‘a ma asiti ga pia pia adusiku migeni ofu loso eyidri vua Endri dri rii ra, adusiku lejo Rubanga dri ri ka sadini hwe lejo ledi ‘a dri ga ni, dii lejo ana jole ana Ngwaapi si ri ‘i, lejo di ‘bati ate enzi cidru ma asiti ga ri drole tri. Mesu Endri Ole rii ma dri ga amamu ani ma ofu loso pelere di igenika si ‘i.
Anini rijo saa nasi, Endri Ole ri ido ebu idele ma asiti ga, oba ma ebu endri si ri ide ‘au, ovi zi si, koba ma ofu loso pelere di nze ‘au. Draa hwa enzi ma asiti ga gaadru sa iyo. Yesu ‘a batisimu esule Yoana dri ri ‘bati ana ari kuruce dri ri tro ohwe sadini ta di ‘a dri ga ni vu oba mesu laku Endri Ole ri dri ri isa ma asiti ga ra. Alleluya! Ma Opi ‘a ru ni ecu. Endri Ole ri esi ma dri ga kendre amamu ani erijo mgbe o’du ma ofu loso eyidri na ‘aijo ofu loso Endri dri na tro ri si. Ido ebu ideka ma asiti ga zaa ziti si kendre amamu ‘a ebu ideka ri ani, vua saa ziti si kendre aci ledra gwe’di ri ani.
Draa saa disi nyisa nyi laku Endri Ole ri dri ri esu wa jo nyigeni vua nya ‘i ofu loso eyidri vua Endri dri dii ni ‘i. Ile gba nyesu laku Endri Ole ri dri ri ni nya ofu loso pelere eyidri vua Endri dri di ‘ai ka si nyiko nyecu Opi ni metro kare aluga ni ku ya? Ile nyide ebu ofu loso pelere ofu loso eyidri vua Endri dri di icajo vu ndutu dri dii metro kare alu ga ni ku ya? Ofu loso eyidri vua Endri dri di koba nyengwi ole vua ka nyini laku Endri Ole ri dri ri isa hwe ra. Anda Rubanga dri ri karite’de ofu loso ri ‘ia a’i si a’i si. Ledii ra laku loso Endri Ole ri dri ri ‘a ruhwejo tete ‘ai ‘a ‘ai ofu loso eyidri vua Endri dri ledisi ri ‘i.
Ta loso ndro Endri Ole ri ‘a idele ma lidri ga ri ‘i
Ki ma laku Endri Ole ri dri ri esuka ni vu, mido mgbe ebu ideka ekelezia udi ri ‘ia ‘ausini ma dru ofu loso pelere ri nze wa si ‘i. Endri Ole ri ohwe mani mori nza oba ma ofu loso ri nze mori retu ri tro.
Disidru ta amgbu ledi ‘bati odu kare saa ledi si. Ganyi ma olure na iga, ma’di zi carani ugbwi’di rii ‘aa ka ide ide ‘ba engaka juru ga ta je ka jile azile vu zi dri ri tro. Ma’di ani dii ekelezia ‘a ka ebu ide gaga leidipi drii dru. O’du zi si alu omba kare linya unyajo ganyi naiga ri iga ka ide azi ma’di zi ni oko ondre ta ama sile rii ibi na ‘a, ta ama sile ‘ba ungwejo di ese ana dri ni emure ga amadri. Disi oko obi mori ma undru ‘jo. Esu ma di ojo mani dria ani olu enzi tro asi ‘a para. Ma naini asi limba hweka ta driba nzeka tro ofu loso eyidri ri idri ofu loso Endri dri tro ri a vu ga ire deika tou danga, mgbe oni ta ce ovi enzi ‘a rebejo ri idri rii ra. Disi oko otiru Endri si di, vua oko esu laku Endri Ole ri dri ri isa saa nasi ra.
Dii draa odo zi ride’di esu aya ekelezia sile ra ri endrere ri ‘i. Mesu jo osiru omba anda vua pelere. Ki saa nasi okolongo oca mani hwele jo na uke jo ‘ausini kengwidru amani kare ilegi jo rii dru ni ku. Endre mani ma okolongo ebuka nza vua diniri okolongo ni iyo ni dii ta adu rere rii ku. Ki, Endri Ole ri ojo mani, “Nyimba okpo nyiko nyolu di.” La ‘u retu ri tro meya masu jo ilegi jo rii ra ako ma ebu driaru ri ide laka manzo Endri Ole rii ebu ana idele ri si okposi. Endri Ole ri oba erijo saa nasi eca’jo ndi endru ma ofu loso eyidri vua Endri dri ri nze ‘au. Endri Ole olu’di ma ru ga rii tee saa disi sa ani ma asiti ga, ka mani okpo hwe ofu loso ri nzejo ‘baziti ri ni. Vua andre ‘ba cidru ofu loso ani di igeni ka vua ‘ai kaa ri ‘bati kaki laku Endri Ole ri dri ri esu.
Manzo Endri Ole okpo hwedi mani ofu loso pelere di nzejo rii okposi. Mitiri saa ma lidri ni ‘a ri isa ate mani ta Endri Ole ri ‘a idele mani ri usijo kpo dru ni ku. Endri Ole ri ohwe mani okpo olujo icandi ako eyi ole Endri Ole ri dri di di ma asiti ga di si. Ahwe anzo ma’di olu’di ma ru ga ri ni okposi.
Endri Ole ri ka ekelezia aya’di anietro ofu loso eyidri ri si vua ofu loso Endri dri ri si ri usa ‘au
O’du zi alu aya hwesi hwesi ‘a ofu loso ri enzesi. Saa nasi, Rubanga ose ma dri ni ganyi angwa zi tileadru ga mesu laki angwa zi manyiadru kaki Rubanga ni ndru. Rubanga oba anze ofu loso pelere dii ‘aini, ofu loso ma nzele ‘aini di oba esuki laku Endri Ole ri dri rii ra. Esuki Endri Ole rii ‘ai ‘a ofu loso ma nzele di erika vua ‘ai ‘a igeni kaa si. Endri Ole ri oba engwiki ‘ba-ebu ideka metro ri ‘bati ‘i, oko mengwi ma’di ofu loso di nze’di ‘aietro kare aluga vu ndutu dri erijo saa nasi ndi endru ri ‘i. Saa nasi ‘ai ‘a weli ni gbadru gaadru, ‘aidri dini tema sa iyo. Oleki ‘ai kolu lejo Rubanga dri ri ‘a lekaa ri ani, Ki odriki kaki owo Rubanga dri lebe ‘ai ‘a enzi dri ri si okpo si adusi esu ‘ai ‘a enzi olu dri bo engwiki opigo enzi dri ‘i. Endri Ole ri ose ma dri ni ‘ba di ‘bati dri oko oba anze ofu loso rii ‘aini. Ma ndrea Endri Ole ri uba tati amani resu’jo ‘ba di ‘bati tro ni. Rubanga odu ma dri ni ofu loso pelere eyidri vua Endri dri di nzere ga ovi razijo ri si kendre ondiku ana rusika Levitika ga ri ani, oko oba ‘ba esu laku Endri Ole ri dri rii ‘ai ‘a geni ofu loso pelere di idri ri si ra.
Rubanga oba ekelezia Endri Ole ri dri rii ‘ai ‘ba gaadru ofu loso pelere na ‘aika ra na ‘bati si. Endri Ole ri upe ‘ai engwijo maju Yesu dri ri ‘bati ‘i dru ‘ai ‘a ofu loso pelere di ‘ai ka si. Draa o’du disi bilo ubi ido Endri Ole ri esuka ni vua kaki eto ekelezia ‘a ni.
Endri Ole ri ohwe mani okpo fonyi Misioni dri idojo ako ma maju izo laka si. Ka mani konyi hwe lejo Rubanga dri ri inijo ‘ba ziti ri ni vua oba ‘ba di ka ‘ai ma ite’dele ‘aini ri ‘a ta ni mba vua kaki ebu ide ‘ausi ‘ba Opi dri ri ‘i lofo ‘i engwiki ebu ‘ba Rubanga dri ri ‘i. Oba ebu ofu loso ri dri rii kaca kare cidru ana care ra ri iga, vua Rubanga ka ekelezia anidri ri usa ofu loso di ebuka ‘ausi. Endri Ole ri ka tiluza anidri ri ‘bati ‘a dri ni du bakaa ‘ai ‘a ofu loso eyidri vua Endri dri ri nzeka ‘au si. Endri Ole ri ka ‘ba anda, laku Endri Ole ri dri ri esuka ra ri ‘bati ‘a dri ni du, ‘aini remujo ekelezia tro vua ‘aini olujo lidri anda vua tutu ‘a rucore driaru vudri di ‘a ra ri si.
Sitani ido laki unzale erijo paka saa erale kpe ri si vua kaci laki unzaka tro andraga. Sitani kojoa laki ni kaki Endri Ole ri esu wa rii ilegi enzi rujo ri si, abiri taka si, vua dri tika dri ‘a si. Ki dii hwa ta ce rii ku. ‘Ba ka hwa alusa laku Endri Ole ri dri ri esu ilegi ‘ai ‘a ilegile enzi rujo ri si kusa dri tile ‘ai ‘a dri ga ri si kpe. Kaki tete laku Endri Ole ri dri ri esu wa rii kesua kaki lebe ‘ai ‘a enzi dri ri esu ‘ai ‘a ofu loso eyidri ri ‘aika ofu loso Endri dri ri tro si kpa, adusi dii ofu loso Rubanga ‘a ehwele amani ri ‘i. Dii lejo anda rujo’di ovi Endri Ole ri ‘a laku hweka ni dri ri ‘i. Ki Endri Ole ri kaci andraga maju Yesu Kristo dri ri ‘bati ebu ka tro ‘i ‘ausini kaki ofu loso eyidri vua Endri dri di nze vu ndutu dri ‘baziti ri ikonyijo ‘ausini ‘aisa kaki dru laku Endri Ole ri dri ri esu ra.
Endri Ole ri oba ama ebu lejo ama nzele ri usi’jo ri ica vu ndutu dri
Kendre ondiku Paulo ‘a lejo ofu loso ri dri ri ebeka ana ofu loso usile ri ‘ia ri ani, Endri Ole oludi ma asiti ga di isa ohwe mani okpo ra ‘ausini masa ma ofu loso di ica vu ndutu dri ovi ama usijoadru waraga dri ri si ‘i. Ledii ra ama ofu loso pelere Kristo ‘ba ikonyi di di usijo, ofu loso di koba ‘ai ‘ba amgbu ka laku Endri Ole ri dri ri esu ra. Aninga ati amido ta ama usile laki ni lale rii waraga bi ubikua ri si, ki olu mgbe para ku ofu loso pelere amadri rii ido acale vu ndutu dri luzu ako.
Endri Ole olu’di ma ru ga ri oba b’a weli ubi tere tere ri keto ekelezia ‘a ni ‘ai ‘a lebe ‘ai ‘a enzi dri ri esuka ‘a vu ga kaki laku Endri Ole ri dri esu ‘ai ‘a bugu loso ma sile di laka ‘a vu ga ‘i bugu di oba obaki ‘ai ‘a geni ni ofu loso pelere vua ce ri idri. Inzajoadru, Endri Ole ri oba ama ofu loso pelere vu ace di nze ti drile mgbimgbi juru dri si. Ohwe amani okpo ofu loso ce di nzejo vu nndutu dri kare mgbimgbi mgbimgbi 150 ga, paka cajo mundru vu dri kare Suru Remuka alu ri dri ungwele USA ni ga.
Endri Ole ri ka lini hwe ekelezia ni ilegijo Misioni vu ndutudri ri si vua ohwe amani mori ofu loso ce di nzejo ti mgbi mgbi si vu ndutu dri usikaa waraga dri si ‘ausini suru cidru vudri ri ‘bati kaki eri ‘a ra vua kaki dru igeni ‘a ra. Endri Ole ri ohwe mani mori ebu ide’jo maju ziti oluka dri udi vu ziti iga ri ‘bati tro oba ma ofu loso ce di nze ‘aietro kare ‘ai laka na iga ama remuka ‘aietro alu si. Manzo Endri Ole rii okposi.
Endri Ole ri otri ma okposi manzedru ofu loso rii Rasia ‘a si ‘i. Endri Ole ri odu ama dri ni ohwa amani andra loso saa tro ilegijo ako avu ‘ba anda-ndruka Rasia ‘a ri bati dri amesu ‘aii lofo ‘ba ofu loso ri onzeka ri ‘bati ako anze ofu loso pelere dii ‘aini ra. Ledii saa ati ‘ai ‘a ofu loso pelere di erijo ri ‘i. ‘Aisa nainga esuki Endri Ole rii kendre ondi andrani amasa ama esukaa ri ani ra, di ideru ‘ai ‘a ofu loso eyidri ri erika ofu loso Endri dri ri tro ri ‘a vu ga.
‘Ai ‘i lofo, laponyi zi alu ‘aa ani laponyi Yunivasiti Mesiko ‘a ri iga ri ‘i, eya oru ana enzi ni ana ta dri ba nzeka mani si ana ofu loso pelere ofu loso eyidri vua Endri dri di erika ni vu ‘i ojo.
“Migeni Rubanga ni ate dria kinya 6 ni ra, ki ma ‘i ani ana ehwi ni adu ya ni erika ako. Ki draa, ma ta erika ofu loso eyidri ri idri ofu loso Endri dri ri tro ra si, ma ‘ai omba draa okpo vua ma asiti oga anzo retu ri si. Gbadru manzo Opi ni ra. Mini ta vua adri olure dini si paka draa saa anda mani ‘ai anda ri esu’jo ri ofu eca di. Ma lidri dini dri ri iga ma geni ni tete ari Yesu dri ri idri adute, ani ma’di dra’di enzi amadri si ri ‘i. Adusi esu, ani gba Rubanga oje enzi amadri rii cidru pelere ni ku.
Meya mesu leidipi zi ruti’di Endri si di rii ako meri ta ofu loso pelere Rubanga ‘a ehwele amani di idri, ako meri jodiniri dri karuni ma lidri andrani ati nasi molu enzidipi. Abi mori okposi ta zele ndrujo di ofu loso pelere di ‘a ehwi ni adu ya vua oluka anda si ‘a ehwini adu ya ni dri ‘i. Meya masu kumbe Yesu ‘a batisimu esuka si enzi cidru ma idele rii ifuru ru ‘a ru. Vua ledii ofu loso pelere ri ‘a ehwi ‘i. Meya mera tete enzi ma tijo ‘autro rii odu pi rii ‘au ku ki enzi ma idele o’du cidru si ri ‘bati enzi cidru ma eyale ma idele andraga ri tro saa ana batisimu esu’jo nasi ifuru ana ru ga. Mesu anzo retu rii ‘au ma rutika Endri si di vua ma ofu loso anda dri di erika si ‘i.”
Rasia ‘ba amgbu, laponyi go dii sa ‘aaru, esuki laku Endri Ole ri dri rii ‘ai ‘a ofu loso ce eyidri vua Endri dri ri erika vua ‘ai ‘a aikaa si ‘i. Draa ekelezia Endri Ole ri dri ri osaru na ‘a ra, vua laki weli ubi rii konyi Endri Ole ri dri ri si evu igeniki ofu loso ce dii ra. Ta dii cidru Rubanga ide ni, disidru ahwe gba anzo tema rii Endri Ole ri ni ‘au.
Endri Ole olu’di ma ru ga ri eco ma oba mengwi Kristo ‘ba tile-tile Endri si di ri ‘i, kendre ondiku ‘baziti andrani eze ‘aisa ofu loso eyidri ri igenika ofu loso Endri dri ri tro ri ani, draa oba ma ofu loso ce di nze vu ndutu dri. Oba bugu loso ama usile ofu loso ri idri rii kaca draa ti mgbimgbi si te mundru ti si ku, ki kaca vu ndutu dri ti drile mgbimgbi si. Oba ama ofu loso ce di nze vu ndutu dri. Manzo Endri Ole rii okposi. Draa nyi gba isa ka laku Endri Ole ri dri ri esu ra. Adusi Rubanga ole nyesu laku Endri Ole ri dri rii ra.
‘Ba amgbu ziti ri komaa Endri Ole ri esuka ‘ai ‘a ani ungweka si kusa ‘ai ‘a ilegi ka Rubanga dri kilikili si. Adusiku, kaki bia laku Endri Ole ri dri ri esule ‘aini geni baka ofu loso eyidri ri idri ofu loso Endri dri rii tro ako, ofu loso pelere Yesu ‘a ehwele amani di igenika ku ni, luna retu ri ‘i. Jokaa ma’di ka laku Endri Ole ri dri ri esu anini ofu loso eyidri ri ‘aika ofu loso Endri dri ri ako wa ni lini mbi rere ri ‘i.
Maju Yesu dri ri ‘bati esuki laku Endri Ole ri dri rii ‘aini ofu loso Yesu ‘a ehwele ‘aini ri igeni ka ako ya? Iyo, hwa ani ani ku. Kole draa nyini ote o’du disi Endri Ole ri kolu ‘ba ‘aidru ofu loso eyidri ri ‘aika ofu loso Endri dri ri tro ra ri ‘bati ‘a asiti ga, di koba eyi oludi tadru Endri Ole ri dri ri kodi ‘ai ‘a asiti ga. Gba tee driadru sa, eyi oludi tadru Endri Ole ri dri rii kodi ma asiti ga ofu loso pelere ce di tro kare alu ga. Alleluya, Manzo Opi ni ra.
Copyright © 2021 by The New Life Mission
