• All e-books and audiobooks on The New Life Mission website are free
  • Explore multilingual sermons in global languages
  • Two new revised editions in English have been released
  • Check out our website translated into 27 languages
Search
English

Sermons

Ta tajore driaru ri `i 8: Endri Ole ri `i

[8-13] Ebu vua hwe Endri  Ole ri dri ‘i (Yoana 16:5-11 ojo)

2021.05.04 31
(Yoana 16:5-11 ojo)
“Ki dria maya ma’di ma eze’di ri dri, Ki anyi ‘a ma’dizi alusa zi’dia, ‘Nyiya ingole ya ni iyo?’ Dria a’jo anyini ta dii ra di, mgbesa oba anya asi kaza. Ki ma anyini ta loku ri jo ‘au. Anyini loso rii kole maya pi; a’dusi jo aya ku, ma’di anyi ikonyi’di ri eya anyidri ku; ki jo aya ra ri, maya ma ani eze anyini ra. Jo eya ra, keya ka ‘ba vudri ri ni ego ‘aidri ite’de, enzi ‘aidri iru vua lejo anda ri iru, lejo alika dri tro ra: ‘ai ‘a enzi ni, ‘aia ma ‘ai ka ku ‘i; lejo anda ri ite’dejo, maya ma Ata dri pi vua indre ma di ku; lejo alika, ite’dejo Sitani ni amba vu di ase’di ri ‘a lejo ni ali ra.”

Endri Ole ri ‘a
ebu ni adu?
Ka ‘ba vudri ri ni ego ‘aidri ite’de enzi
‘aidri iru, vua lejo anda ri iru
lejo alika dri tro ra.

Idoka 1:2 ga osiru, “Vu ni ovi ako, vua ilili; Vumu’di aku vu ‘a dri ni ni. Oko Endri Rubanga dri ri kaci eyi vuru ri idri si.” Lejo rusu’di di iga adiki ndrea Endri Ole rii hwa alusa olu asiti driluci tro kusa enzi tro ri iga ku, ki kolu tete asiti ‘ba ‘aidru ofu loso pelere di ‘aika ra ri ‘bati dri iga. Amala, o’du disi laki amgbu ozo lini ‘aidri ‘ai tro caku caku di ‘ia ni, kaki joa ‘ai ole ‘ai kesu laku Endri Ole ri dri ri ni vua diniri dri enzi olu ‘aia asiti ga ‘aa.
Endri esule lini mbi ri si rii Endri anda loso rii ku. Ebu Sitani dri rii ondikusa omba ebu ‘ai ‘ba mbaka mbi di ebuka ‘ausi, vua ‘ba lini mbi di inika ‘au dii ondiku sa ‘ba ana asele ana mori si ni ri ‘bati ‘i. Ki Endri Ole ri isa ani Rubanga okpo tro ri ‘i ka ta ra wa, vua ka ta ‘a ra wa vua tesa ra ana dule rii ce. Ka ebu ide Ata Rubanga tro vua ana Ngwaapi ni Yesu Kristo tro ana vu di bire ga sa ‘i. Draa ama ebu di Endri Ole ri ‘a idele vudri di ‘a rii ingoni ri ‘i ya ni ni tau.
 

Endri Ole ri ka vu enzi tro di ikonyi

Ebu atijoadru Endri Ole ri ‘a idele rii ingo ‘i ya? Ka vu enzi tro di ikonyi. ‘Ba ana ikonyile okposi rii ‘ba ‘aidru ofu loso pelere Yesu ‘a batisimu esule Yoana dri di ‘aika ku ri ‘bati ‘ba ana ari kuruce dri ri ga ka mgbe ri ‘bati tro. Ka enzi ‘ba ikonyi ‘ba cidru ofu loso eyidri vua Endri dri ri ‘aika kuru ri ‘bati tro.
 

Ka vu ni ikonyi ndutu Rubanga ‘a anda si

Ta erijoadru Endri Ole ri ‘a idele rii adu? Ka ta jo Rubanga ‘a anda ni dri vua ta Yesu ‘a idele enzi ‘ba cidru arijo ‘ia enzi ni ‘a ri tro. Yoana 16:10 ojo, “Lejo anda ri ite’de jo, maya ma Ata dri pi vua indre ma di ku.” Kole anyetro oniki di anda anda Rubanga dri Bugu Ole ri ‘ia ri ‘a ehwini adu ya ni ote. Dia ehwini lejo anda jole Yesu odu enzi cidru vudri rii batisimu ana esule Yoana dri ri si vua ma’di alu alu igeni di ‘a rii kengwi anda kiza Rubanga dri ri si ‘i.Yesu esu batisimu Yoana ni Batisimu hwe’di ri dri oko ‘ai lamgba cidru ama enzi dri ri isa ra, ari driaru ri ora kuruce dri, onzi drag a si di oko engwi Aridipi enzi ‘ba dri ‘i. Dii ofu loso pelere Rubanga ‘a ehwele amani ri ‘i. Yesu odu enzi cidru vudri rii eyisi vua ari si oko engwi tati Rubanga ‘a ubale ri si amba ama lidri dri ri ‘i.
Endri Ole ri ka konyi hwe ‘bacidru ni ‘aini ofu loso Yesu ‘a batisimu esule Yoana dri ri igenijo ana ari kuruce dri ri tro, dii ka ‘aini konyi hwe ‘aini lebe ‘aia enzi dri ri esu’jo. Kolea nyini ote ebu Rubanga dri ana peresu ina ri ‘ia rii eko ra. Endri Ole ri ka ebu ide ofu loso pelere ri ni, koba ‘ba ka le Rubanga dri ri igeni ‘au. Vuasa tro ka sadini hwe ofu loso eyidri vua Endri dri di idri anini engwijo anda.
 

Ka vu di ikonyi lamgba eya’di ri ‘a dri ga

Ebu inajoadru Endri Ole ri dri rii aduta? Ka ebu Sitani dri ri ivolo. Sitani ka koyo koyo jo bi ‘ba dri ri iga, kojoa, “Nyi Yesu ni igeni wa, ki kole nyigeni dini andrani eze dii ana dini ati Kristo ‘ba dri ri ‘i.” Sitani kobia ‘ba igoga le ‘ausini kigeniki dru batisimu Yesu dri rii ana ari kuruce dri ri tro ku si ‘ausini kesuki dru lebe ‘aia enzi dri rii ku tee ka ‘i ki Yesu ni ra sa ‘i ri si ‘i. Adusiku Sitani ingwi dini Kristo ‘ba dri dii oba engwi kendre dini “nya ri ani”, diani di oba ‘ba amgbu engwiki opigo Sitani dri ri bati ‘i adusi oduki Yesu ni igenika dii kendre ovi olu’jo loso ri ‘i ani. Amala, ra gba Yesu ni igenijo rii kolea ma’di kengwi gba ma’di anda ri ‘i ‘i.
Kolea ‘ai nyidri ri kengwi mbi ku. ‘Ai mbi ri koba hwa alusa nyengwi enzi ako ni kpe jo tee nyigeni Yesu ni ingoni sa ‘i. Jo ‘ai nyidri rii mbi, nyini ‘a sa kpe, enzo Sitani ‘a ejile ri si koba nyi Yesu ni ni kusa nyindrea kpe. Endri Ole ri kengwi ta okpo hwe’di ri ‘i ‘bacidru lebe ‘ai ‘a enzi dri ri esuka ‘aia ofu loso eyidri ri ‘aika ofu loso Endri dri ri tro ri ‘bati ni ‘i. ‘Ba geni baka ‘aia asiti ga ra ki dri enzi ‘a olure ‘aia asiti ga ri ‘bati ‘aia geni ni ta konyi ako ri ‘i. 
Endri Ole ri ka sadini hwe ofu loso pelere ri idri. Yesu esu batisimu enzi cidru vudri ri du’jo vua eparu kuruce dri mori enzi ledi ‘bati dri ri uhwejo cidru si. Endri Ole ri ohwe sadini ta ledi idri ni. Endri Ole ri kojoa ‘ba cidru ni kolea kesuki lebe ‘aia enzi dri rii ‘aia ofu loso di igeni ka ‘ausi. Amala kole, anyetro oniki ote Endri Ole ri ka lamga hwe vua ta jo ‘ba ‘aidru ofu loso pelere di igenika vua dukaa ‘aia asiti ga kuru ri ‘bati ni.
 

Kole ‘ai ma’di alu alu dri ri kolu ‘ai tutu ‘a rucore driaru ra ri ‘i

A’i tutu ‘a rucore driaru ra rii ingo ‘i? Dii ‘ai badia ama laku Endri Ole ri dri ri esu ama lebe ama enzi dri ri esuka si ri ‘i. Amala, ama ndrea Kristo ‘ba enzi ‘a olure ‘aia asiti ga ‘aa rii vu ndutu dri dere, jo tee ‘aia geni Yesu ni ru rii kolu para sa ‘i. Jo tee kigeniki Yesu ni para ani ingoni sa, ‘aia enzi koji rinzasi andra andra. Ta unzi ‘ai ‘a ru ga badia kaki hwa ta anda ri ni kpe vua kaki lebe ‘aia enzi dri ri esu ‘ausi kpe rii ta alu aia rajoadru ta joka ti mgbimgbi si ti ta ndreka orobi ‘a tro ta ete’de di ‘a nyesu laku Endri Ole ri dri rii ra si ‘i. Oniki ta Rubanga ‘a lamgba ‘aia enzi dri ri idri ku.
Odu disi ‘ba amgbu oluka vudri di ‘a di ‘bati kaki ebu Endri Ole ri dri ri ‘bati upe ebu Sitani dri ri tro kpe. Ebu Sitani dri ri koba ‘ba dri karuci uci ka driluci ‘aia lidri ni ‘a ana ‘aini geni mbi ri hweka ‘ausi koko ka ‘ai ‘a dri ni se rizaka ga. Dii ta cidru Sitani ‘a lele ani kide ri ‘i jo edu ‘ba Rubanga dri si pi ‘i. Sitani koba ‘ba ka geni ojo dri ri igeni ‘au koko koba kaki engwi ana opigo ti ‘i. Sitani koba kaki nyuma ta ‘aujo ri tro ri ‘a vu ni udro ‘au ‘adusiku koba kaki uraa ani ledi ani ledii ta okpo rere ri ‘i kaki di ide ‘aini geni baka laku Endri Ole ri dri resudi ofu loso pelere disi rii ako.
Adusiku Endri Ole ri koba ‘ba cidru ka vu di ndre lejo Rubanga dri ri si. Konyi Endri Ole ri dri si, evu oniki Rubanga obi ‘ba cidru ni ni ra, oniki Rubanga ole ‘ba ndro isa ra, vua oniki Rubanga ole ‘aini lari hweka ra isa ra. Tati ana ubale rii kole Yesu kohwe lari ‘ba cidru ni ofu loso eyidri ri si vua Endri dri ri si ‘i vua anini ‘ai ungwejo olujo ana andraga ana le ‘ai dri ri si.
Ofu atijoadru Petro ‘a sile 3:21 ojo, “Ovi zi dria dinisa ama aridi rii ‘aa  ungwea batisimu.” Vuasa tro, ofu atijoadru Petro ‘a sile 1:23 ojo, “Oti anyi di lidri oku dra’di wa ri si ku, ki dra’di kpe ri si, lejo Rubabanga dri olu’di tadru ri si.”
Ebu Endri Ole ri dri rii kohwedru lini ta anda ri idri enzi tro ‘i, ka lini hwe anda dri, lali emu’di ri ‘a dri ga, vua koba ‘ba cidru ka anda ‘ai ‘au. Endri Ole ri koba kaki lamgba Rubanga dri ri ni ote, vua koba kaki ni ‘a ote ‘ai ka layu esu ‘aia enzi ni dri ‘a wa rii ‘ai ‘a ofu loso pelere Yesu ‘a batisimu dri ri ‘aika si ana ari kuruce dri ri tro. Endri Ole ri kobaa kaki ni ‘a ote ani ‘aietro ‘i ka di ide ni kesu ‘a jo ‘aiki ofu loso eyidri rii ofu loso Endri dri ri tro ra ‘i.
Di oba draa andre ta Endri Ole ri ‘a idele rii ra. Draa ‘ba cidru vudri di ‘a ri ‘bati kaki laku Endri Ole ri dri ri esu ra vua kaki le Rubanga dri ri isa esu ra jo esuki lebe ‘aia enzi dri rii ‘aia ofu loso Yesu dri pelere eyidri vua Endri dri di ‘aika si ra ‘i.
 

Ovi Endri Ole ri dri ri ‘i

Endri Ole rii ana ngasi Rubanga oru nde’di a ri ‘i. Adusi anisa esu ta ruledi anini olu’jo Rubanga dru rii kpdru si sa ra, dii ndrole ta ungwele, urata, ritirika vua ra duka. Adusiku Endri Ole ri ‘a ta nika ote si, ka ta tee Rubanga dri ruzu’di ri ‘a iti isa undru wa (ofu atijoadru Korinto ‘ba ni rii 2:10) vua ka asiti ‘ba dri ri isa undru wa. 
Vua adusiku Endri Ole ri ka ta itiri wa, asiti ani egbwe rere ‘ba cidru lejo Rubanga dri ri igeni ka ri ‘bati ‘a ru ga ‘I, ki asiti ‘a kaza ‘ba ‘aikaa kuru ri ‘bati ni le okposi. Aluari ani, ‘ba anda ri ‘bati kaki le Rubanga dri ri esu Endri Ole ri ‘a ‘ai aku ka si ra.
Vua adi Endri Ole ri ungwe ziniga sa “ma’di ‘ba asiti imba’di ri ‘i.” Di ‘a ehwini Endri Ole ri ka konyi hwe ‘ba anda ri ‘bati ni saa lidri okpo dri si ‘i, koko ka ‘aini drimgbo hwe, ka o’ja di ‘aia o’jabazi ti ‘a ru ga. Adusiku ka ta ra wa, ka ta itiri wa, vua ka ra du wa kendre ondiku ‘ba saa ra duka wa ri ani, vua kolu asiti ‘ba ‘aidru ofu loso pelere eyidri vua Endri dri di ‘aika ra ri ‘bati ‘a asiti ga.
 

Ebu Endri Ole ri dri rii di ‘bati ‘i

Endri Ole ri koba ‘ba ka ta anda rujo’di lebe ‘aia enzi dri ri idri ri era vua koko kolu asiti ‘ba ‘ai ‘ba ri ‘bati dri iga. Ebu ana idele rii ta driba nzeka lejo ehwi anda dri jo’dia Yesu odu enzi cidru ‘ba dri rii ana batisimu si pi vua ana ari si ri idri ri ‘i (ofu atijoadru Yoana ‘a sile rii 5:6-8). Ka asiti limba hwe ‘bacidru ani ‘aika ra ri ‘bati ni ka ‘aini okpo hwe ‘ausini kombaki dru okpo di si ‘i. Ani gba ni ana ngasi ka driba nze ‘aini jo tee koniki ta ‘aini ilegi jo rii adu ya ni ku sa ‘i (Roma 8:26). Vua ka lovu hwe ‘ba anda ekelezia Rubanga dri ri ‘ia ri ‘bati ni vua koba kaki ga ana lejo si ndru (Longo 23).
 

Ebu Endri Ole ri ‘a idele rii ondiku kendre Bugu Ole ri ‘a jokaa ri ani

Endri Ole ri ka ‘ba anda ri ‘bati ‘a dri ni du vua koba kaki lejo anda dri ri ‘a ehwi ni eri ‘au koba kaki lejo anda ri du ‘aia asiti ga vua kaki sa nzea ‘baziti ri ni ‘au. “Bugu Ole rii cidru osiru okpo Endri Rubanga dri dri si, ‘aia konyi ni lejo anda rii ini’jo nza, ka ‘ba i’ja ta ego ri si, ka ba idu lejo unzi ri iga, vua ka lini hwe lidri olujo anda ri idri” (ofu erijoadru Timoteo ‘a sile rii 3:16).
“Nyindru bugu Opi dri ri ‘a ‘a ni, nyiko nyila: Tazi alusa egwe ‘aaru ku; vua ‘aaru ta ruvika vi ku ani iyo. Adusi ti madri ri ohwe cara ta di idri ni, vua Endri driaru ri ‘bati emu ta di ‘a pa ni alu rii ni” (Izaia 34:16).
“Kole anyera, ma’di zi alusa lejo Bugu Ole ri dri ‘a driba ni nze’di ana ngasi wa rii iyo, adusi lejo profetaa ‘a nzele rii onzeki okpo ‘aidri si ku, kaki lejo Rubanga dri ri nze okpo Endri Ole ri ‘a hwele ‘aini ri si ‘au” (ofu erijoadru Petro ‘a sile rii 1:20-21).
Endri Ole ri ohwe okpo tiluza Rubanga dri ri ‘bati ni ‘bajoadru ‘aini Bugu Ole ri si’jo ‘i ‘ausini ama cidru kola ‘a ra. Odu ‘ba cidru dri ofu loso eyidri vua Endri dri di iga vua oba ama nze ‘a vu ndutu dri. Disidru tee jo ‘ba anda ri ‘bati kicandikiru ‘aia lidri ni ‘a okposi sa, kaki lubi laka ri ‘a mi ni nde wa, anzo retu okpo Endri Ole ri ‘a hwele disi.
 

Hwe vua ‘oa Endri Ole ri dri ‘i

Hwe Endri Ole ri dri ri ‘a ehwini ana okpo hwele ‘ba Rubanga ‘a upele ra ri ‘bati ni ‘aini ofu loso pelere Rubanga dri di ica’jo angwe ‘baziti ri ni ri ‘i. Di oba ‘ai ‘ba cidru ohweki ‘ai ‘aiangasi ebu Rubanga dri ri idere ga hwe ana hwele ‘aini ri si, vua oba Endri Ole ri ka ‘aini konyi hwe ‘ausini kejiki dru eku Opi ni si ‘i. “Hwe Endri Ole ri dri ohweru ma’di alu alu ni e’bu loso ri ide’jo ‘bacidru ikonyi jo” (ofu atijoadru Korinto ‘ba ni rii 12:7).
Ra Endri Ole ri ‘a hwe hwe ‘jo ‘ba Rubanga ‘a upele ra ri ‘bati ni rii ‘ausini koba kombaki dru ‘aisi okpo angu mba’di ‘aia andra ga ri ikojo (Efeso 4:11-12). Endri Ole ri ka mori hwe okpo tro ‘ba cidru Rubanga ‘a upele ra ri ‘bati ni tiluza cidru driaru ri ‘bati tro ‘ausini kaki dru ofu loso ri ica wa. Ekelezia Rubanga dri rii ‘aaru laki Rubanga ‘a upele ra engwika ole enzi ako ‘aia Yesu Kristo ni ‘aika si ri ‘bati ‘i (ofu atijoadru Korinto ‘ba ni rii 1:2). 
Kristo ‘ba alu alu laku Endri Ole ri dri ri esu’di ra rii kole dubasi kide ebu ondi mori okpo tro ruhwe’di anini ra ri ‘a vu si, adusiku Kristo ni ana ngasi dri ekelezia dri ri ‘i. Endri Ole ri ka mori hwe okpo tro ‘ba cidru Rubanga ‘a upele ra ri ‘bati ni ‘ausini kaki ebu Opi Rubanga dri ri dri ide ‘au. Ka ta cidru ide amani rii ‘ausini eku ofu loso Rubanga ‘a ehwele amani di dri ri kendre si. Ojo, “Draa, ta anyi ‘a nyale rii, ta anyi ‘a mvule rii, ta cidru anya idele ri tro, anyide ‘ai eku Rubanga dri si” (ofu atijoadru Korinto ‘ba ni rii 10:31).
 

Hwe drile mgbimgbi Endri Ole ri dri ri ‘i 

Hwe drile mgbimgbi Endri Ole ri dri rii 12. Ama ndre ‘a Bugu Ole ri ‘ia hwe ‘ai dii ite’deru ‘ba drile mgbimgbi mgbimgbi ri ni saa mgbimgbi ri si. Hwe Endri dri dii cidru ta osiru driaru Roma 12:6-8 ga, ofu atijoadru Korinto ‘ba dri 12:8-10 ga, vua Efeso 4:11 ga. Liele ledii hwe dricalu Endri Ole ri dri ta jore driaru ofu atijoadru Korinto ‘ba dri ana joti nza 12 ni ga ri ‘i.
1) Ciri ta nze’jo rii: Di ka amani okpo hwe ta Endri dri ‘a iti ni undru’jo koba ama ofu loso eyidri vua Endri dri di ni ote vua ama nze ‘a ‘au. 
2) Ciri ta nze’jo lini si rii: Di koba ama lejo unzi cidru emu’di lidri ‘ba anda ri ‘bati dri ri ‘ia ri ‘a si ni igbwe lejo Rubanga dri anda rusi’di ra ri si.
3) Hwe a’i dri ‘i: Endri Ole ri ka ‘ai okpo ri hwe ‘ba cidru Rubanga ‘a upele ra ri ‘bati ni ‘au ‘ausini kaki nyuma ide endri ziti ri ni lari hwejo ‘aia enzi ni ‘a si mori Sitani dri tro. ‘Ba anda ri ‘bati enzi ‘ai dri rii cidru karebe ra vua Opi koko ka ‘ai ‘a endri anda ako dri ri i’ja ra ka di ide ‘ai ‘a ‘ai si. 
4) Hwe ‘ba ru igbwe’jo ri ‘i: Endri Ole ri ka mori li’ja dri ri hwa ‘ba anda ri ‘bati ni ‘ai ‘a geni baka lejo anda Rubanga dri ri idri si.
5) Hwe nyuma ide’jo ri ‘i: Ani dii dride la’u tro badi’a ‘ba Rubanga ‘a upele ra ri ‘bati ka ebu Rubanga dri ri ide ‘ai ‘a lejo Rubanga dri ri igeni ka si ri ‘i. Nyuma ni ta ride’di okpo retu ri tro ‘ai si ri ‘i, retu ana ridejo rii onde ta ‘baa nile rii lejo cidru cara dri ri tro ra. 
6) Hwe lejo Endri dri ini’jo vua nze’joadru profeta ti si ri ‘i: Saa disi, tete ‘ba lejo Rubanga dri ri ‘aika ra vua ebu laka ri ideka ri ‘bati kaki lejo Rubanga dri ri ‘a driba ni nze Endri si kendre ondiku ana rusika ra ri ani wa rii ni.Ki lejo ‘ba ani ‘aika kuru ri ‘bati dri rii tee kojoki profeta ti si ni sa kolu mbi rere adusiku kaki ta rusi’di Bugu Ole ri ‘ia kuru ri u’jo ‘au. Ki tiluza Rubanga dri ri ‘bati le, ‘aia laku Endri Ole ri dri ri esuka ra si, kaki lejo Rubanga dri ri nze, kaki eku eji Opi ni vua kaki ru driaru ri nze ekelezia driaru ri ‘ia, adusi ekelezia dii ru Rubanga dri ri ‘i. Endri Ole ri ka okpo di hwe tiluza Rubanga dri ri ‘bati ni ‘ba cidru Rubanga ‘a upele ra ri ‘bati tro ni. 
7) Hwe mgbimgbi Endri dri ri ni ‘jo ri ‘i: Dii okpo nijoadru di ma’di esu gba loku loku di lebe ana enzi dri rii ra ya ri ‘i. Sitani ni ama dri se ka ego ni adu rere jo hwe ani dii amadri iyo ‘i. Adusi Sitani ‘a vu di aseka ni si, ama te hwe di esu wa rii ofu loso pelere Rubanga ‘a ehwele amani di ‘aika si di koko koba ama lubi cidru emu’di di ‘a mi ni za ra, teri cidru anzi unzi vu di ‘a dri ga dii ama mi ani nde ra. Ma’di anda ri ka hwe ani di esu ana ofu loso ri igenika si. Jo esu hwe dii ni ri koko kojoa di ma’di zi esu lebe ana enzi dri rii ana asiti ga ra ya kusa kuru ya ni wa.
8) Hwe ta ‘jojo ti mgbimgbi si ri ‘i: Bugu Ole ri ohwe amani lini ta joka ti mgbimgbi si dri ra: “Ki ilegire ga Kristo ‘ba lofo ale ma’jo lejo ehwi tou alu ‘ai inijo, oza ta ma jole alifu mudri ti mgbimgbi si rii ra” (ofu atijoadru Korinto ‘ba ni rii 14:19). Kolea ‘ba cidru Rubanga ‘a upele ra ri ‘bati koniki ote lejo anda Rubanga dri ri ‘a ehwi ni erika oza ta ma’di ‘a jole ti mgbimgbi ekpadru ana ehwi erile ana ngasi sa ku ri si rii ra. Kole duba ma’di di ani di kebe ta joka ti mgbimgbi si ra.
9) Hwe ti mgbimgbi idri jo ri ‘i: Dii hwe ruhwe’di maju ni ‘aini ofu loso ri nzejo saa andrani eze ekelezia oku na dri si ri ‘i. Draa o’du disi Endri Ole ri ka ebu ide ofu loso ri ica’jo ti idrile ri si vua lejo rusi’di ra ri ecaka ti mgbimgbi ekpadru si si. Esu konyi ta idri’jo ri kolu iyo jo ma’di ofu loso ri nze’di ri kojo ti cidru wa ‘i. Ki amala, lejo ti dri ri eca ama cidru ni okpo, disi Rubanga ohwe amani ‘ba ti idrika rii ‘ausini amide dru ana ebu ni wa si ‘i. Rubanga ide hwa alusa ebu nyadru vua konyi ako ku. Endri Ole ri ka ebu ide ofu loso pelere di ‘ia sa ‘i oko oba ‘ba cidru Rubanga ‘a upelere ra ri ‘bati ka ofu loso di idri ti cidru si.
 

‘Oa Endri Ole ri dri rii ingo ri ‘bati ‘i?

Ki draa kolu jo hwe Endri Ole ri ‘a hwele ri idri, Bugu Ole ri ojo amani, “Ki ta Endri ‘a idele ama asi ga rii di ‘i le, anzo, asi egbwe, asi anyu, oluka egbwe, loso, a’i ta mbaka, lidri loso rii, vua ru ta-mbaka. Cara zi ta di ga’di mgbe ani iyo” (Galatia 5:22-23).
1) Le: Le loso rii ‘ba anda ri ‘bati ‘a endri enzi ‘ba cidru dri ri arika enzi dri ‘a ‘aia ‘aini ofu loso eyidri vua Endri dri ri nzeka si ‘i. Adusi ‘ba anda ri ‘bati esuki ofu loso anda Yesu ‘a le dri dii ra, di oba kaki ofu loso anda le dri di nze ‘au vua kaki le anda ri isa esu ‘baziti ri ni.
2) Anzo: Ani dii anzo retugodru efu’di asiti ‘ba dri ri iga jo oti ‘ai Endri si di ra ri ‘i. Ma’di gba anda lebe enzi dri ri esu’di ana asiti ga ra rii anzo retugodru rii ana asiti ga ‘aa (Filipi ‘ba 4:4). Adusiku asiti ‘ba anda ri dri iga anzo tesa ‘aa, ‘aidri mori ofu loso di amu’jo ‘baziti tro rii ‘aa.
3) Asi egbwe: Dii asiti asi egbwe dri hwele ma’di anda lebe enzi dri ri esu’di ana ‘ai baka ofu loso eyidri ri idkri ofu loso Endri dri ri tro ri ni ri ‘i. Adusiku Endri Ole ri ohwe mori ‘ba anda ri ‘bati ni oba kaki ofu loso egbwe dri di nze ‘au. ‘Bacidru ofu loso egbwe dri di erika ri ‘bati isa kaki laki ziti ri ‘bati ‘a dri ni se ‘aisa ‘aini enzi vu di ‘a dri ga ri ‘a mi ni ndejo wa, vu koba kaki urata okpo tro dride lari dri ri esu’jo ri esu wa. Ki ‘ba anda egbwe ejika laki lofo Rubanga tro ri ‘bati adi ai ungwe ‘boronzi Rubanga dri ‘i (Mateo 5:9) vua kaki ‘baziti ri ‘bati isa ‘a dri ni se ‘aini laku Endri Ole ri dri ri esu’jo ra (Lejo ehwi 12:20). Endri Ole ri koba ‘ba anda ri ‘bati kaki olu lidri anda ri si vua kaki tutu egbwe dri ri hwe ‘baziti ri ‘bati ni ‘aia ofu loso ri ica ka si ra. 
4) Asi anyu: Hwe asi anyu dri dii tete asiti ‘ba anda ri ‘bati dri iga, ‘ai dii ‘ba layu esuka ‘aia ofu loso ri igeni ka si ri ‘bati ‘i. Ama ‘oa ani di esu wa ni kesu ‘a ama tileci-olu’di tadru ri ko Endri Ole ri tro kare aluga kpa. Vudri di ‘a asiti asi anyu dri rii asiti olujo di vua anda si ri tro ‘aa.
5) Oluka egbwe: Ama olure driso enzi tro ri isa Rubanga ni kiza retu ri oko ani ama si ci oko ohwe amani layu batisimu Yesu dri ri si vua ana ari kuruce dri ri si. Draa amasa kiza retu rii le retu ri tro ka ama ko ama wadezi ti ‘a ru ga ra adusiku kiza oko Yesu isa amasi ra, di oba odu ama enzi ni cidru si pi, di oba amigeni ani ra vua amesu ana kiza retu rii ra. ‘Ba anda ri ‘bati ‘a asiti oga oluka egwe si ndru adusi ‘oa ofu loso di dri rii ‘aia asiti ga ‘aa.
6) Loso: Olu loso di ‘a di ‘a ehwi ni “anda.” ‘Ba anda rii tesa ‘ai loso vua ‘aia le Opi ‘a ru ga rii ‘aia asiti ga tesa nzuru. 
7) A’i ta mbaka: ‘Ai ta mbaka ‘a ehwini asiti tesa ‘ai retu ri tro Rubanga ‘a andraga ri ‘i. A’i ta mbaka lidri ‘ba Opi ‘a upele ra ri ‘bati dri ri ‘ia rii kenga ‘aia ta cidru Yesu ‘a jole ri ‘a vu ni okore ga. 
8) Lidri loso rii: Di ‘a ehwini kole amadri mori lejo ‘baziti ri dri ‘a ehwini erijo vua ta cidru ‘aia lele ri idejo ama lidri ni ‘a kendre ‘aia lekaa ri ani rii kole duba kolu ‘aa. Adusiku ‘ba anda ri ‘a asiti ga le tesa ‘aini ‘aia o’jabazi ti lejo rii ‘aa vua kaki tesa ilegi ‘ba ‘ai leka ku ri ‘bati ‘a layu si.
9) Ru ta-mbaka: Ru ta-mbaka ni cara ruba’di ma’di alu alu ni ani ni ana ru ana ngasi ri ‘a ta ni mba’jo ri ‘i, kole duba ma’di kolu lidri unzi ri si ku, komba ana-ru ‘a ta ni pelere vua tesa kolu lidri anda ri si.
 

Gaka Endri Ole ri si

Gaka Endri Ole ri si ‘a ta idele rii adu? Tutu ani di esuka koba ‘ba Rubanga ‘a upele ra ri ‘bati kaki olu kendre maju Yesu Kristo dri ri ani, kaki remu ekelezia Rubanga dri ri tro alu. Endri Ole ri ka ‘ba anda ri ‘bati ebu engwile drilahwa anda ri ‘bati ‘i dru vua koba ‘ba ‘ai di ‘bati kaki ‘ai hwe ndutudru ta Kristo ‘a lele ri idere ga. Ta ‘ba anda ri ‘bati ‘a lele rii ma’di igoga di ‘a rii Opi ‘i, di oba laki anidri di ‘bati ohweki ta cidru ‘ai dri rii mori cidru ‘ai dri ri tro ani ni. Endri Ole ri ohwe hwe ‘ba anda ri ‘bati ni oba kaki olu okpo vu ‘di ‘a mi nde’jo ri si adusi kaki ta ura te o’ja ndeka dri, asi egbwe dri, ta ce dri, oluka endrisi oce ku ni dri, kaki lea lejo cidru konde ‘ai ‘a mi ni ku vuasa tro lejo unzi ri kideru ‘aia ru ga ku (Roma ana joti nza 7 ‘i).
“Jo Endri Ole ri esi anyii dri ra anyevu anyi okpo esu ra; vua anyevu anyolu ma sadini ‘a ‘i te Yerusaleme ‘a adite ku, ki Yudea ‘a ndutu vua Samaria ‘a, ndi vu ‘a ti asere ga” (Ebu majua idele rii 1:8). Gaka Endri Ole ri si ndru ka ‘ba anda ri ‘bati ‘a dri ni se ‘aini ofu loso ri nzere ga. 
Opi ohwe urata mori tro rii ‘ai retu ri tro ‘ba cidru laku Endri Ole ri dri ri esuka ra ri ‘bati ni. Vua Rubanga ohwe okpo engwijo ‘baciri ani dri rii dru rii ‘ba lebe ‘aia enzi dri ri esuka ‘ai si ‘aia ofu loso Yesu dri di igeni ka si ri ‘bati ni (Yoana 1:12). ‘Ba cidru engwika ‘baciri Rubanga dri rii dru ‘ai si ri ‘bati ka draa ofu loso di nze vu ndutu dri wa. 
‘Ba anda ri ‘bati draa ‘aia ofu loso pelere lebe enzi dri di hwe’di di ‘aika ra si ‘aidri mori okpo tro okpo Sitani dri ri ‘a mi ni ndejo rii ‘aa. Vua ‘aidri okpo lija endri si ri hwejo ri isa ‘aa (Maruko16:18), kaki okpo Sitani dri ri ‘a mi ni nde tesa ra (Luka 10:19), vua kaki to Opi Bu dri ri iga ra (Lete 22:14). ‘Ba anda ri ‘bati ‘aisa kaki olu ondiku kendre opi ‘a oluka ri ani ‘aia lejo ta Rubanga ‘a ti ubale ri dri ‘aika si ‘i (ofu erijoadru Korinto ‘ba ni ri ‘i 6:17-18).
Endri Ole ri koba ‘ba anda ri ‘bati kaki ‘ai ‘a vico cidru unzi ta vudri di ‘a ri dri ri ga mgbe. Vuasa tro ka amadri se bajoadru amani ofu loso ri nzejo ‘au (Galatia 5:6).
Endri Ole ri koba ‘ba anda ri ‘bati kaki ofu loso ri la vua kaki ‘ai ‘a ‘au vua kaki ini ‘a ‘baziti ri ni (ofu atijoadru Temoteo ‘a sile rii 4:13).
Endri Ole ri ka ‘ba anda ri ‘bati ‘a pa ni utra o’du cidru si ekelezia Rubanga dri ri ‘ia (Eberei 10:25). 
Endri Ole ri koba ‘ba anda ri ‘bati kaki ‘ai ‘a enzi ni ru (ofu atijoadru Yoana ‘a sile rii 1:9) bajoadru ‘ai ‘a asiti ni su ‘jo ingwe anda dri si (Efeso 5:13).
Endri Ole ri ka ‘ba anda ri ‘bati ‘a dri ni du tesa ‘ai ‘a lidri ‘ni a leti anda ri si (Longo 23).
Endri Ole ri kojoa ‘ba anda ri ‘bati ni kolea saa cidru si sa kizi ki ana hwe hwele ‘aini rii ku (ofu atijoadru Tesalonika ‘ba ni ri ‘i 5:19).
Endri Ole ri ka ebu ide ofu loso pelere disi ‘au (Maruko 16:17-18).
Endri Ole ri ka ‘ba anda ri ‘bati ‘a dri ni du koba kaki olu Opi ‘a maju ti dri ani ana ‘ai emuka ekelezia Rubanga dri ri tro alu si. Ka ‘ba anda ri ‘bati ‘a dri ni du koba kaki olu lidri ga’di Endri si ndru ri si oba kaki ofu loso ri nze ‘ai ‘a gaka Endri Ole ri si ndru si ‘i. Dii ebu Endri Ole ri ‘a idele ana ofu loso pelere di ebuka ‘au si ri ‘i (ofu atijoadru Petro ‘a sile rii 2:9).
Endri Ole dii draa dini sa ka ebu ide ‘ba cidru Rubanga ‘a upele ra ri ‘bati ‘a asiti ga ‘i. Alleluya! 
LIST Download FREE eBook & AudioBook