- All e-books and audiobooks on The New Life Mission website are free
- Explore multilingual sermons in global languages
- Two new revised editions in English have been released
- Check out our website translated into 27 languages
Ta tajore driaru ri `i 8: Endri Ole ri `i
[8-14] Enzi rule anda Endri Ole ri esujo rii ingo ‘i? (Ebu majua idele rii 2:38 ojo)
(Ebu majua idele rii 2:38 ojo)
“Petro ojo ‘aini, ‘Anyiru anya enzi ni, anyiko batisimu ru Yesu Kristo dri si ‘ausini anya enzi ni kebe dru ru ra; anyevu anyi hwe Rubanga dri Endri Ole rii esu ra.’”
“Petro ojo ‘aini, ‘Anyiru anya enzi ni, anyiko batisimu ru Yesu Kristo dri si ‘ausini anya enzi ni kebe dru ru ra; anyevu anyi hwe Rubanga dri Endri Ole rii esu ra.’”
Enzi ruka and ruledi
amani laku Endri Ole ri dri
ri esu jo rii ingo ‘i?
Dii ama ringwi ka ofu loso eyidri Endri
tro ri iga ‘i vua ama batisimu
Yesu dri rii ‘aika ana ari
kuruce dri ri tro ‘i.
Bugu Ole ri onze ta driba Ebu majua idele ri iga ana joti nza rii 2 ‘i ojoru lejo Petro ‘a nzele rii umwi ‘ba asiti okpo si vua oba ‘ba ubi oru ‘aia enzi ni ni. ‘Ba rutraka ri ‘bati ‘a asiti onyo mgbu oko ojoki Petro ni maju ziti ri tro, “Draa ama adu ta ide?” Petro ojo ‘aini, “Anyiru anya enzi ni, anyiko batisimu ru Yesu Kristo dri si ‘ausini anya enzi ni kebe dru ru ra; anyevu anyi hwe Rubanga dri Endri Ole rii esu ra” (Ebu majua idele rii 2:38).
Petro ‘a lejo nzele rii kitedea amani pelere ‘ai ofu loso pelere ndro ofu loso eyidri Endri tro ri idri rii ani ta ruledi amani Endri Ole rii esu jo ri ‘i vua tro sa ka amani enzi ruka leti anda si ni ingo ni ya isa ite’de.
Kole oni ki draa ama laku Endri Ole ri dri ri esu lebe ama enzi dri ri tro lejo Bugu Ole ri ‘ia ri ndre ka si vua ofu loso pelere ndro ofu loso eyidri Endri tro rii igeni ka si ni ote.
Ta atijoadru kole amani ote amani laku Endri si ri esu ‘jo wa rii enzi ruka leti Bugu Ole ri ‘a lele ri si ‘i. Amala, kolea ondre ki ca evu ungwe enzi ruka dii ta ona ama dru rii ku ri ‘i kusa ‘jojoadru adrani mani dini rii dru rii ku. Enzi ruka di ‘a dii ehwi ani geni baka Yesu Kristo ‘a dri ga. Adi ki gba ndrea Bugu Ole ri ‘ia ‘ba oga Yesu ‘a repaka kuruce dri ni mgbe. Oleki sa esu ‘ai kozi Petro ni di ‘ai ka aduta ide ya si ku, adusi esu driso Petro ‘a jorea ‘aini koru ki ‘aia enzi ni ni kuru ri isa eraki enzi ‘aidri rii ra. Ki adiki ndrea ovi Petro ‘a ta ‘jo’jo dia disi dru enzi ruka ana ta jore driaru rii enzi ‘a uraka oma ka draale mide unzi ‘i ku kusa nosi jokaa ma ‘i draale ra ‘i ku, ki ma’di ‘a Yesu Kristo ni ‘aika ana asiti ga Aridipi dru ‘au ‘i vua geni baka ofu loso pelere ndro ana hwele amani ri idri ‘i. Dii ovi enzi rujo leti anda si ri’i.
Le Yesu Kristo dri ri emu ama asiti ga esu saa na si ama asiti ga-ama ngasi urata enzi dri rii iyo. Dia ehwi ni Yesu odu enzi cidru ama idele rii saa ana batisimu esu ‘jo Abu Jurudano ‘a ri si, odra kuruce dri, vua oko onzi dra ga si lidri di. Leti ani disi, Oje ama ama enzi cidru ri ‘a dri ga ta unzi cidru ama idele rii tro pelere.
Enzi ruka leti anda si ri ‘a ehwi ni anda dii igeni ka ‘i. Jodiniri nyigeni ama enzi ni konga ru dru ni wa ‘a, ‘jo gba draasa amura ta ‘a ama enzi ni dri dini vua ama ‘i ru ama enzi si ‘ausini Opi keri si dini ‘i? Diani dii enzi ruka leti anda si rii ku. Enzi ruka leti anda si ri ‘a ehwi ni ofu loso pelere ndro Yesu ‘a batisimu dri rii ‘aika ‘i ana ari tro. Bugu Ole ri ojo amani ama lebe ama enzi dri ri esu ama enzi ruka si. Alua ri ani, kolea igeni ki ofu loso Yesu ‘a batisimu dri rii ana ari dri rii tro amani lebe ndutudru ama enzi dri rii esu ‘jo ‘i.
Petro onze ta driba batisimu “ru Yesu Kristo dri si ri idri” ‘ba ‘aidru Yesu ni ‘aika ra ri ‘bati ni. Yesu esu batisimu rii enzi cidru ‘baa idele rii du ‘jo. Ana batisimu ti ana dra kuruce dri ri tro ta ti iko ka ofu loso pelere ndro badia a’i ‘ba ka laku Endri Ole ri dri ri esu ‘ausi wa ri ‘i (Mateo 3:15-17). Enzi ‘ba cidru kengwi enzi ako wa rii ‘aia batisimu Yesu dri ri ‘ai ka si ana ari kuruce dri ri tro. Ojo aliadru ni ri, ‘ba lebe ‘aia enzi dri ri esuka ‘aia ofu loso pelere ndro di ‘aika si ri ‘bati esu ki Endri Ole ri isa ra.
Ilegi ka gba laku Endri Ole ri dri ri eji wa ya?
‘Ba ka aludisa lebe ‘aia enzi dri ri esu kpe vua tro sa kaki laku Endri Ole ri dri ri esu kpe ‘jo tee kilegi ki mori si na ingo ni sa ‘i. ‘Aini laku Endri Ole ri dri ri esu ‘jo, kolea dubasi kai ki ofu loso pelere ndro Yesu ‘a batisimu dri rii ana ari kuruce dri ri dri tro kpa. Adusi Endri Ole Rubanga dri rii karuhwe tete ‘ba ‘aidru enzi ‘aidri rii gbadru ojeru pelere ra ri ‘bati ni.
‘Ai ofu loso ri idri di ‘a ehwi ni Yesu Kristo ni ‘aika kendre Aridipi loku rii dru ‘au ‘i. Ebu majua idele rii 2:38 ojo, “Anyiru anya enzi ni, anyiko batisimu ru Yesu Kristo dri si ‘ausini anya enzi ni kebe dru ru ra; anyevu anyi hwe Rubanga dri Endri Ole rii esu ra.” Majugo Petro ojo laku Endri Ole ri dri rii tete adi hwe ‘a ‘ba lebe ‘aidri enzi dri ri esu ka anda si ‘aia enzi ruka leti anda si ri ‘bati ‘i. Lebe enzi dri ri esu ka ti laku Endri Ole ri dri ri esu ka tro tesa leju.
Bugu Ole ri ojo, “Anyiru anya enzi ni, anyiko batisimu ru Yesu Kristo dri si ‘ausini anya enzi ni kebe dru ru ra; anyevu anyi hwe Rubanga dri Endri Ole rii esu ra. Adusi Rubanga oba ana cara ni anyini anya ‘boronzi tro’ba cidru lolu, vua ‘ba ama Opi Rubanga ‘a eyale ungwele ani dri ri tro” (Ebu majua idele rii 2:38-39).
Ma’di ka tete laku Endri Ole ri dri ri esu wa rii leti aludi si kolea duba ana asiti kengwi ole enzi ako. Disidru, kolea igeni ki ofu loso Yesu Kristo ‘a hwele amani dii ‘au. Kolea engwi ki ole lebe esu ka ama enzi ni ‘a si ‘i dii ka ride wa rii tete ofu loso pelere ndro jodia Yesu Kristo esu batisimu dii ri mgbe oje enzi cidru vudri rii ra ri ‘ai ka si. Ama draa Endri Ole ri esu wa rii tete disi. Ani Rubanga ‘a le ‘i Endri Ole ri ni olu jo ‘bani asiti ga ‘i. “Ta Rubanga ‘a lele rii, kole anyolu cidru ole” (Ofu atijoadru Tesalonika ‘ba ni ri ‘i 4:3).
Enzi ebeka loku rii ideru mori ‘ba dri ri si ku, azi si ku, kusa limi ‘a oluka ma’di dri nza si ku, ki karide wa rii tete ofu loso pelere ndro ta Rubanga, alu ole peresu na tro, ria idele Yoana Batisita si rii igeni ka si. Rubanga, alu peresu na tro, di ohwe laku Endri Ole ri dri rii ‘ba ‘aidru lebe enzi dri esuka ‘aia ofu loso pelere dro di igeni ka si ri ‘bati ni.
Laki amgbu rutraka ri ‘bati ‘a asiti onyo mgbu oce ki ‘ai keri ta Petro ‘a jole nainga odu Endri Ole ri ‘a esi ‘jo maju ‘a dri ga na si rii di ‘i. Owoka tro ozi ki, “Jodini ri dria ama adu ide?” (Ebu majua idele rii 2:37) Di kite’dea draa ecoki ‘aia uje ni ra vua oko igeni ki Yesu ni ‘aini Aridipi dru ‘au. Vua trosa esuki lebe ‘aia enzi dri rii ra ‘aia enzi ruka lejo anda Petro ‘a nzele ri si si ‘i. Lebe enzi dri rii karuhwe ‘ba cidru ni konga ‘aia ovi ‘ai bajo ofu loso pelere ndro ta jodi Yesu ‘a batisimu ni dri ana ari kuruce dri ri tro ri iga.
Ra Yesu ‘a batisimu dri rii ti leci ‘aile anini enzi cidru vudri ri dujo ri ‘i. Ani di ‘aika ni ta ruledi ma’di ni laku Endri Ole ri dri esu ‘jo ri ‘i.
Rubanga ohwe okpo Endri Ole ri ‘a laku dri rii ‘ba ‘aidru ofu loso tajo’di Yesu ‘a batisimu ni dri ri ‘aika ra ri ‘bati ni. “Yesu oko batisimu, oca saa zere kuru efu eyi ‘a pi; mgbesa, ‘bu awi’ru mgbo, vua ondre Endri Rubanga dri endre’di amamu ani rii esi ana dri ga” (Mateo 3:16). Emuka Endri Ole ri dri andrani majua dri ga naa ta inile rii tema oviru ondiku ‘ai maju ‘a bale ofu loso pelere ndro di idri ri tro vi dii: batisimu Yesu dri ri ‘i, ana dra kuruce dri ri ‘i vua ana onzi ka ‘i.
Ebu majua idele ri iga ojoru ‘ba amgbu esu batisimu ru Yesu dri ri si ni vua oko esuki Endri Ole ri isa ra. Kolea anyetro oniki cuwidru laku Endri Ole ri dri ri esuka ni ani hwe tema engadi Rubanga dri ri ‘i. Disidru amani ni hwe Endri Ole ri dri ri esu ‘jo, kolea ama enzi ni cidru kojeru pelere ama ‘ai baka Yesu ‘a batisimu ni dri ana dra kuruce dri ri tro si.
Ebu majua idele ri iga ojoru, ‘ba cidru ta Petro ‘a nzele ri eri ka ri ‘bati, eriki ojo, “Anyari anyi lamgba eya’di ‘ba asi unzi ‘di ‘bati ni ri ‘ia” (Ebu majua idele rii 2:40), eriki ra ana hwele rii ra vua oko esuki batisimu ra. Ta ama nile Bugu Ole ri ‘ia rii maju andrani ekelezia eze ri ‘ia ri ‘bati esuki laku Endri Ole ri dri rii ‘aia ‘ai si ‘aia ‘ai baka batisimu Yesu Kristo dri ri idri ana ari kuruce dri ri tro si. Ani dii ondiku ta ruledi amani Endri Ole rii esu ‘jo ri ‘i. ‘Ai baka batisimu Yesu dri ri idri ana ari kuruce dri ri tro ni ta gba ruledi ma’di ni ri ‘i ‘jo ka lebe ana enzi dri rii undru ‘i.
‘Ai ama dri sedi amani Endri Ole ri esu ‘jo ama enzi ruka leti anda si ‘a vu ga ri ‘i
Anyiba ondreki dri Ebu majua idele 3:19 ni. “Anyiru anya enzi ni anyiko anyengwi Rubanga dri, anya enzi keberu dru ca, vua Opi kohwe dru anyini saa asi egbwe dri ni.” Ama enzi ruka ‘a driba ni nze ingo ni? Anyiba oraki dri ta driaru di.
Bugu Ole ri ‘ia, enzi ruka ‘a ehwi ni engwi ka ‘ai anda ri iga layu esu ka si. Odu nainga, ‘ba ka ebu ide kendre ‘aia lekaa ri ani vua kaki laru hwe ta Rubangaa bile ni ri ni. Ki oce kera ki Yesu ari ‘ai enzi cidru dri ‘a eyisi vua Ana ari si di, mgbe nainga ecoki asi ra. Dii enzi ruka kendre Bugu Ole ri ‘a lekaa ri ani ri ‘i. Enzi ruka anda rii dri eda ‘ka ofu loso pelere ndro ofu loso eyidri Endri tro di iga ‘i.
Enzi ruka anda ruledi amani laku Endri Ole ri dri ri esu ‘jo rii ingo ‘i? Dii batisimu Yesu dri ri ‘ai ka ana ari kuruce dri ri tro ‘i. “Vua Opi kohwe dru anyini saa asi egbwe dri ni.” ‘Jo ‘ai ‘ba dri rii di ‘i, kaki lebe ‘aia enzi dri ri esu ra vua kaki Endri Ole ri isa esu ra. Adusi ku Yesu eco enzi ‘ba cidru vudri rii engwiki ole enzi ako ana batisimu si vua ana ari kuruce dri ri si, kolea igeni ki ofu loso pelere ndro dii’au, esuki laku laka ri ni vua oko esuki Endri Ole ri ni.
Amani Yesu ni igeni ‘jo vua amani laku Endri Ole ri dri ri esu ‘jo, kolea ama alu alu ‘ a enzi ni kobaru Yesu ni ru ‘ai ana batisimu dri ri si vua ana dra kuruce dri ri dri si kpa. Kolea igeni ki Yesu odu ama enzi ni cidru si pi vua oko odra kuruce dri ‘ausini ani kesu dru lamgba ama enzi si ama kare ga si. Dii ‘ai anda ri ‘i vua enzi ruka leti anda ri si ri ‘i, dii ta badia ama laku Endri Ole ri dri ri esu wa ri ‘i.
Adusi Endri Ole rii kesi tete ‘ba ‘aidru lebe ‘aia enzi dri ri esu ka ndutu dru ri ‘bati ‘a dri ga. Nyitiri Rubanga ohwe Endri Ole rii dride dru ‘ba ‘aidru layu leka ri ‘bati ni adu lejo si? Adusi Endri Ole rii, ana oluka ole si, ole ani kolu ‘ai ‘a asiti ga vua ani kimba dru ‘aia asiti ni kendre ana ‘boronzi ‘i dru ani.
Adusi Endri Ole rii Rubanga. Ata ‘i, Ngwaapi ‘i, vua Endri Ole ri ‘bati kpodru si Rubanga alu ri ‘i.
‘Ai kpodru si ina, ki ‘ai ina truwasi Rubanga alua Yesu ni igeni ka ‘au ri ‘i. Ata ‘a le ni lari hwere amani ga ama enzi si ‘aa disidru Yesu ni Ngwaapi emu vu di ‘a dri ga, oko esu batisimu Yoana dri anini enzi cidru vudri rii du ‘jo pi ‘i, odra kuruce dri, oko onzi dra ga si di odu inajoadru ri si odri tu ‘bu ‘a ‘i. Endri Ole ri ka ama dri ni se sadini hwere ‘a ga ofu loso pelere ndro di ‘a dri ga sadini hwe ka batisimu Yesu dri ri idri ana ari kuruce dri ri tro si.
Rubanga ka ‘ba lari esuka Endri Ole si ri ‘bati tri ‘au. Opi ka Endri Ole ri hwe ‘ba ‘aidru ofu loso pelere ndro jodia Yesu odu enzi cidru vudri rii pi ri igeni ka ri ‘bati ni. Rubanga ka Endri Ole rii hwe ‘ba ‘ai di ni kendre dride ani ‘ai tri ‘jo ana ‘boronzi tii dru. Endri Ole rii ta ruledi tati ‘a asejo ama lari ni ga enzi dria si ama ofu loso pelere dro di ‘ai ka ‘a vu ga ri ‘i.
‘Ba Endri Ole ri ‘a olure asiti ‘a ru ‘aa ri ‘bati ‘ai ‘baciri Opi dri ‘i. ‘Ba laku Endri Ole ri dri ri esu ka ri ‘bati tesa kaki asi egbwe Endri dri ri esu ‘au. ‘Aia ‘ai lejo Rubanga dri ri idri ri omba okpo, ‘aia ‘ai Yesu ‘a batisimu ni dri ri bati ana ari kuruce dri ri tro kpodru omba okpo. ‘Aia asi ni gbadru egbwe. ‘Ba enzi ruka anda anda ri ‘bati ‘a asiti ga enzi iyo vua esu ki laku Endri Ole ri dri rii ra.
Bugu Ole ri ojo amani enzi ruka zi lebe ejidi ama enzi si rii ‘aa. Enzi ani ledi ani ledii nyisa iru gbu ra ‘a? ‘Jo iru nya enzi ni ra iko nyesu geni loku rii ra, nyi gba isa koko ka ofu loso pelere ndro di esu ra. Ale majo anyini kole anyiru anya enzi ni ‘ausidru anyi Endri Ole ri esu ra. Draa nyi ‘baba ya enzi rujo vua geni bajo ofu loso pelere ndro badia Endri Ole rii ka nyi aku di ‘ai ‘jo ‘i?
Copyright © 2021 by The New Life Mission
