- All e-books and audiobooks on The New Life Mission website are free
- Explore multilingual sermons in global languages
- Two new revised editions in English have been released
- Check out our website translated into 27 languages
Ũndũ wa 3 : Ũhoro Ũrĩa Mwega Wa Maĩ Na Roho
[3-8] Ũbatithio wa Jesu nĩ Ũndũ Ũtangĩthengeka Harĩ Ũhoro wa Ũhonokio (Mathayo 3:13-17)
(Mathayo 3:13-17)
“Hĩndĩ ĩo Jesu nĩoimire Galili, agĩthiĩ Jorodani kũrĩ Johana, akabatithio nĩwe. Nake Johana nĩendaga kũmũgiria, akĩmũũria, Niĩ-rĩ, njagĩrĩirũo nĩ kũbatithio nĩwe, nawe ũgũũka kũrĩ niĩ atĩa? Nake Jesu akĩmũcokeria akĩmwĩra atĩrĩ, Njĩtĩkĩria rĩu, tondũ ũguo nĩguo twagĩrĩirũo nĩ kũhingia maũndũ mothe marĩa merekanĩrĩirũo na ũthingu. Hĩndĩ ĩo akĩmwĩtĩkĩria. Nake Jesu arĩkia kũbatithio, akiumĩra o rĩmwe maĩ-inĩ, na atĩrĩrĩ, Igũrũ rĩkĩhingũka, akĩona Roho wa Ngai agĩikũrũka ta ndutura, akĩũmba igũrũ rĩake. Na rĩrĩ, mũgambo ũkiuma Igũrũ, ũkiuga, Ũyũ nĩwe Mũrũ wakwa nyendete mũno, nĩngenaga nĩ ũndũ wake.”
“Hĩndĩ ĩo Jesu nĩoimire Galili, agĩthiĩ Jorodani kũrĩ Johana, akabatithio nĩwe. Nake Johana nĩendaga kũmũgiria, akĩmũũria, Niĩ-rĩ, njagĩrĩirũo nĩ kũbatithio nĩwe, nawe ũgũũka kũrĩ niĩ atĩa? Nake Jesu akĩmũcokeria akĩmwĩra atĩrĩ, Njĩtĩkĩria rĩu, tondũ ũguo nĩguo twagĩrĩirũo nĩ kũhingia maũndũ mothe marĩa merekanĩrĩirũo na ũthingu. Hĩndĩ ĩo akĩmwĩtĩkĩria. Nake Jesu arĩkia kũbatithio, akiumĩra o rĩmwe maĩ-inĩ, na atĩrĩrĩ, Igũrũ rĩkĩhingũka, akĩona Roho wa Ngai agĩikũrũka ta ndutura, akĩũmba igũrũ rĩake. Na rĩrĩ, mũgambo ũkiuma Igũrũ, ũkiuga, Ũyũ nĩwe Mũrũ wakwa nyendete mũno, nĩngenaga nĩ ũndũ wake.”
ŨBATITHIO WA JOHANA MŨBATITHANIA
Kwĩrira nĩ atĩa?
Nĩ kũgarũrũka kuma mũtũrĩre wa
mehia na gwĩtĩkia Jesu nĩguo
mũndũ atherio.
Andũ aingĩ mũno gũkũ thĩ matiũĩ kĩrĩa gĩatũmire Jesu oke gũkũ thĩ ĩno, na abatithio nĩ Johana Mũbatithania. Na nĩ ũndũ ũcio-rĩ, reke tũarie ũhoro wa kĩrĩa gĩatũmire Jesu abatithio, na ũhoro wa Johana Mũbatithania ũcio wamũbatithirie.
Ũndũ wa mbere twagĩrĩirũo nĩ gwĩciria kĩrĩa gĩatũmire Johana Mũbatithania abatithie andũ rũĩ-inĩ rwa Jorodani. Ũhoro ũcio nĩ ũtarĩirũo thĩinĩ wa Mathayo 3:1-12, atĩ Johana Mũbatithania abatithagia andũ nĩguo macokerere Ngai kuma mehia na kumbuura mehia mao.
“Niĩ-rĩ, ndĩmũbatithagia na maĩ nĩguo mwĩrire” (mũraini 11), na “He mũgambo wa mũndũ ũkwanĩrĩra werũ-inĩ, akoiga, Thondekai kĩng’aratua kĩa Mwathani, Rũngaria njĩra ciake’” (mũraini 3). Nake Johana Mũbatithania we mwene ehumbaga nguo ya guoya wa ngamĩra, na anagĩrĩra werũ-inĩ, akĩhunjia ũbatithio wa kwĩrira nĩguo andũ moherũo mehia.
Anagĩrĩraga kũrĩ andũ, Mwĩrire, “Mũhonokia wa kĩrĩndĩ nĩaroka; thondekai kĩng’aratua Gĩake, rũngariai njĩra Yake ya ũhonokio. Tigai kũinamĩrĩra ngai cia ndũrĩrĩ na mwamũkĩre Mwathani ngoro-inĩ cianyu.”
Mũgarũrũke kuma kũrĩ kĩ? Kuma kũinamĩrĩra mĩhianano na maũndũ mothe mooru ma mĩtũũrĩre ĩihũrĩte mehia. Rũu-rĩ, twagĩrĩirũo nĩ gwĩĩka atĩa? No mũhaka tũbatithio thĩinĩ wa Jesu nĩguo tũtherio. Johana Mũbatithania anagĩrĩraga werũ-inĩ, “Ũkai ndĩmũbatithie. Mũthambio mehia manyu. Mũhonokia-rĩ, o we Mesia wanyu-rĩ, nĩarooka gũkũ thĩ ĩno. Na nĩagũthengia mehia mothe manyu o ta gatũrũme ka igongona ga Kĩrĩkanĩro Kĩrĩa Gĩa Tene na atherie mehia mothe manyu.”
Kĩrĩkanĩro-inĩ Kĩrĩa Gĩa Tene-rĩ, mehia ma o mũthenya maigagĩrĩrũo harĩ igongona rĩa mehia na njĩra ya kũigĩrĩrũo moko. Mehia mothe ma mwaka ma ciana cia Isiraeli maigagĩrĩrũo harĩ thenge nĩ mũthĩnjĩri-Ngai Mũthenya wa Ũhorohio, na nĩguo wakoragwo ũrĩ mũthenya wa ikũmi mweri-inĩ wa mũgwanja (Maũndũ ma Alawii 16:29-31).
O ta ũguo-rĩ, mehia ma kĩrĩndĩ no nginyagia mangĩaigĩrĩirũo harĩ Jesu na ũbatithio Wake o ihinda rĩmwe rĩa kũigana nĩguo matuĩke magotherio nĩwe. Na nĩ ũndũ ũcio-rĩ, Johana nĩ erire andũ mooke kũrĩ Jesu, na mabatithio nĩwe.
Gĩtũmi kĩnene kĩa ũbatithio ũrĩa Johana Mũbatithania abatithanagia nĩguo andũ merire, na nĩguo wacokagia andũ a Isiraeli kũrĩ Jesu, ũrĩa warĩ oke thutha-inĩ. Kwĩrira nĩ kũgarũrũka kuuma mũtũũrĩre-inĩ wa mehia na gwĩtĩkia Mesia nĩguo mũndũ oherũo mehia make mothe.
Andũ a Isiraeli nĩ mangĩakũũrirũo marĩ na mwĩhoko atĩ Mesia nĩagũcoka oke thutha-inĩ na atherie mehia mao. Na o ta ũguo-rĩ, rĩu nĩ tũkũũragwo nĩ ũndũ wa gwĩtĩkia Jesu, ũrĩa waikũrũkire kuma Matu-inĩ mĩaka 2000 mĩhĩtũku na agĩthambia mehia mothe ma kĩrĩndĩ. No ciana cia Isiraeli Kĩrĩkanĩro-inĩ Kĩrĩa Gĩa Tene nĩ matiganĩirie watho wa Ngai, na makaruta magongona marĩa matagĩrĩire o na makĩriganĩrũo nĩ ũhoro wa Mesia.
Na nĩ tondũ Johana Mũbatithania nĩabataranagia amaririkanie watho wa Ngai na Mesia ũcio warĩ oke thutha-inĩ-rĩ, nĩ ambĩrĩirie kũbatithia andũ na agĩcoka akĩbatithia Jesu rũĩ-inĩ rwa Jorodani.
Andũ aingĩ nĩ mokire kũrĩ Johana na makĩbatithio, makĩriraga nĩ ũndũ wa kũinamĩrĩra mĩhianano o na gũteyanĩria watho wa Ngai. Nĩ kũrĩ maũndũ matatũ matangĩtigĩka na matangĩamũkanio harĩ igongona rĩa wotho- nyamũ ĩrĩ muoyo, kũigĩrĩra kwa moko, na thakame yayo. Kĩrĩndĩ gĩothe gĩa thĩ kĩhonokagio nĩ gwĩtĩkia Jesu.
Na rĩrĩ, hĩndĩ ĩrĩa Afarisai na Asudukai mokire nĩguo mabatithiorĩ, Johana nĩanĩrĩire kũrĩ o, “Ciana ici cia nduĩra, nũ wamũkinyĩirie inyuĩ ũhoro atĩ mũũrĩre marakara marĩa magoka? Nĩ ũndũ ũcio ciarai maciaro maringanĩte na kwĩrira, na mũtikeĩrage ngoro-inĩ cianyu atĩ, Ithe witũ nĩ Iburahimu. Nĩ gũkorũo ngũmwĩra atĩ, Ngai aahota gũtũma ciana cia Iburahimu ciume mahiga-inĩ maya” (Mathayo 3:7-9).
Afarisai na Asudukai aya, nĩ ikundi cia ateti na ahooi mĩhianano, meciragia atĩ o nĩ andũ a Ngai, o na akorũmatietĩkĩtie kiugo kĩa Ngai. Metĩkĩtie ngai ingĩ na meciria mao.
Hĩndĩ ĩo mokagaa kũrĩ Johana Mũbatithania nĩguo mabatithio-rĩ, we nĩamerire, “Mwagĩrĩirũo nĩ gũtiga kũruta magongona macio matagĩrĩire, na mũgaarũrũke kuma mehia-inĩ na mwĩtĩkia mũtarĩ nan ganja atĩ Mesia nĩagũka na atherie mehia manyu. Mũagĩrĩirũo nĩ gwĩtĩkia ũguo ngoro-inĩ cianyu.”
Kwĩrira nĩ kũgarũrũka kuma njĩra ĩrĩa ĩtagĩrĩire. Kwĩrira kwa ma nĩ kũgarũrũka kuma mehia-inĩ na wĩtĩkio ũtarĩ wa ma, na gũcokerera Jesu. Nĩ gwĩtĩkia ũkũũri wa ũbatithio Wake na gũtuĩrũo kũrĩa atuĩrĩirũo Mũtharaba-inĩ.
Na nĩ ũndũ ũcio Johana Mũbatithania nĩanĩrĩire ciana cia Isiraeli, nĩ tondũ nĩ ciatiganĩirie watho wa Ngai na ũhoro wa kũruta magongona, na nĩguo amonithie macokerere Ngai. Warĩ wĩra wa Johana Mũbatithania wa gũcokia andũ kũrĩ Jesu nĩguo mamwĩtĩkie na mahonokio kuma mehia-inĩ mao.
NĨ WĨTĨKĨTIE ŨKŨŨRI WA ŨBATITHIO WA JESU?
Nĩkĩ andũ othe magĩĩrĩirũo nĩ
gwĩĩka mbere ya Jesu?
No mũhaka mamwĩtĩkie nĩguo mahonokio
kuma mehia-inĩ mao.
Ũndũ wa mbere ũrĩa Jesu ekire nĩguo ambĩrĩrie ũtungata kũrĩ mũingĩ nĩ kũbatithio nĩ Johana Mũbatithania. Mehia mothe ma kĩrĩndĩ makĩigĩrĩrũo harĩ Wee na njĩra ĩo.
Nĩ ũndũ ũcio-rĩ, ũbatithio wa Jesu nĩguo kĩambĩrĩria kĩa ũhonokio wa Ngai wa kĩrĩndĩ, o na ciĩko cia Jesu cia ũthingu iria cia thambirie mehia mothe ma kĩrĩndĩ. Ngai akũũraga andũ othe arĩa metĩkagia ũhoro wa ma atĩ Jesu nĩathengirie mehia mothe ma kĩrĩndĩ na ũbatithio Wake.
Hĩndĩ ĩrĩa Jesu okire gũkũ thĩ ĩno na akĩbatithio nĩ Johana Mũbatithania-rĩ, hau nĩ ho ũhoro-ũrĩa-mwega wa ũthamakia wa Matu-inĩ wambĩrĩirie. Iguru nĩ rĩahingũkire hĩndĩ ĩrĩa abatithirio na o ta ũrĩa gũtarĩirio Mathayo 3:15, nĩ ũndũ ũmwe na igongona rĩa ũhorohio rĩrĩa rĩtarĩirio thĩinĩ wa Maũndũ ma Alawii 1:1-5, 4:27-31 thĩinĩ wa Kĩrĩkanĩro Kĩrĩa Gĩa Tene.
Indo ciothe Kĩrĩkanĩro-inĩ Kĩrĩa Gĩa Tene ciĩ na mũiru Kĩrĩkanĩro-inĩ Kĩrĩa Kĩerũ na ũguo ũngĩ. “Atĩrĩrĩ, ta tuĩriai ũhoro wa ibuku rĩa Jehova, na mũthome; gũtirĩ nyamũ o na ĩmwe ĩkaaga ĩngĩ ya gũtwarana nayo, nĩ gũkorũo kanua gake nĩko gaathanĩte ũguo, naguo roho wake nĩguo ũgũcicokanĩrĩria” (Isaia 34:16).
KĨRĨKANĨRO KĨRĨA GĨA TENE O NA KĨRĨA KĨERŨ CIERĨ NĨ CIARĨTIE ŨHORO WA ŨHOROHIO WA MEHIA MA ANDŨ
Nĩtwagĩĩrĩrio nĩ kwĩrira
o mũthenya nĩ ũndũ wa mehia ma
o mũthenya?
Aca. Kwĩrira kwa ma nĩ mũndũ gwĩtĩkĩra mehia
make mothe na kũgaarũra meciria harĩ ũhoro
wa ũbatithio wa Jesu nĩguo
aamũkĩre ũkũũri.
Kĩrĩkanĩro-inĩ Kĩrĩa Gĩa Tene-rĩ, mehia maigagĩrĩrũo harĩ igongona rĩa mehia na kũigĩrĩrũo kwa moko. Nayo nyamũ ya igongona ĩcoke ĩitwo thakame, na ĩtuĩrũo handũ-inĩ ha mũndũ ũrĩa wĩhĩtie. Namo mehia marĩa macokanagĩrĩraga ma o mwaka o na mo maigagĩrĩragwo igongona-inĩ rĩa mehia na kũigĩrĩrũo kwa moko, nĩguo andũ othe moherũo mehia mao ma mwaka.
Kĩrĩkanĩro-inĩ Kĩrĩa Kĩerũ-rĩ, no o taguo nĩguo gwekirũo, Jesu Kristo agĩũka na akĩbatithĩrio rũĩ-inĩ rwa Jorodani nĩguo athengie mehia mothe ma kĩrĩndĩ. Nĩ ũndũ kiugo kĩa Ngai kĩrĩa kĩarathĩtwo Kĩrĩkanĩro-inĩ Kĩrĩa Gĩa Tene gĩkĩhingio.
Johana Mũbatithania ũcio wabatithirie Jesu, arĩ ndungata ya Ngai ya tũmĩtwo mĩeri 6 mbere ya Jesu. Nĩarutire ũira atĩ Jesu nĩathrngia mehia mothe ma kĩrĩndĩ na kuuga, thĩinĩ wa Johana 1:29. “Onei Gatũrũme ka Ngai, karĩa gathengagia mehia ma kĩrĩndĩ!”
Johana Mũbatithania aigĩrĩire mehia ma kĩrĩndĩ harĩ Jesu hĩndĩ ĩrĩa amũbatithirie kũu Jorodani. Na ũguo nĩguo Mwathani atheririe mehia mothe ma kĩrĩndĩ. Na ũrĩa twagĩrĩirũo nĩ gwĩĩka rĩu no gwĩtĩkia tu.
Mehia mothe ma kĩrĩndĩ nĩ maigĩrĩirũo harĩ Jesu. Arutwo a Jesu thĩinĩ wa Atũmwo 3:19, “Nĩ ũndũ ũcio-rĩ wĩrirei na mũgarũrũke, nĩ getha mehia manyu marihũrũo, na hacoke hagĩe mahinda ma kũrurumũkio moimĩte kwĩ Mwathani.”
Meendaga tũgĩe na ũmenyo wa gĩtũũmi kĩa Johana Mũbatithania kũbatithia Jesu, na kĩrĩa gĩatũmire eere andũ ma’mũrũmĩĩrĩre. Augire “Wĩrirei na mũgarũrũke. Ĩtĩkiai ũkũũri wa ũbatithio wa Jesu, na mũtherio mehia manyu.”
Mesia nĩ okire na agĩtheria mehia mothe maitũ o ihinda rĩmwe rĩrĩa abatithirio. Ũũ nĩguo mehia mothe ma kĩrĩndĩ maigĩrĩirũo harĩ Jesu. Na nĩ ũndũ ũcio-rĩ, Kĩrĩkanĩro kĩa Ngai nĩ kĩahingirio na ũbatithio wa Jesu, ta ũrĩa kwandĩkĩtwo thĩinĩ wa Mathayo 3:13-17.
“Hĩndĩ ĩo Jesu nĩoimire Galili, agĩthiĩ Jorodani kũrĩ Johana, akabatithio nĩwe. Nake Johana nĩendaga kũmũgiria, akĩmũũria, Niĩ-rĩ, njagĩrĩirũo nĩ kũbatithio nĩwe, nawe ũgũũka kũrĩ niĩ atĩa? Nake Jesu akĩmũcokeria akĩmwĩra atĩrĩ, Njĩtĩkĩria rĩu, tondũ ũguo nĩguo twagĩrĩirũo nĩ kũhingia maũndũ mothe marĩa merekanĩrĩirũo na ũthingu. Hĩndĩ ĩo akĩmwĩtĩkĩria. Nake Jesu arĩkia kũbatithio, akiumĩra o rĩmwe maĩ-inĩ, na atĩrĩrĩ, Igũrũ rĩkĩhingũka, akĩona Roho wa Ngai agĩikũrũka ta ndutura, akĩũmba igũrũ rĩake. Na rĩrĩ, mũgambo ũkiuma Igũrũ, ũkiuga, Ũyũ nĩwe Mũrũ wakwa nyendete mũno, nĩngenaga nĩ ũndũ wake.”
Nĩguo ũhonokio wa Ngai ũhingio, Jesu nĩathire kũrĩ Johana nĩguo abatithio nĩwe. Johana Mũbatithania arĩ ndungata ya mwanya ya Ngai. Luka mũrango wa 1 nĩĩtwĩrĩte atĩ Johana arĩ wa mũhĩĩrĩga wa Haruni, mũthĩnjĩri-Ngai wa mbere. Ngai athuurire Johana arĩ wa mũhĩĩrĩga wa Haruni, nĩ tondũ eendaga mũrũgamĩrĩri wa kĩrĩndĩ ahingie ũthingu wothe.
Nĩ ũndũ ũcio Ngai agũtũma Johana aciarũo nyũmba-inĩ ya mũthĩnjĩri-Ngai mĩeri 6 mbere ya Jesu aciarĩtwo. Johana Mũbatithania nĩaharĩrĩirie njĩra ya Jesu na kwanĩrĩra werũ-inĩ, “Wĩrirei Ciana ici cia nduĩra! Mwĩrirei na mũgarũrũke, Mesia nĩaroka. Mũgarũrũkĩrei, kana amũtemee na amũikie mwaki-inĩ. Ĩtĩkia ũbatithio Wake na thakame Yake Mũtharaba-inĩ. Mwĩrirei mũbatithio, na nĩ mũgũkũũrũo.”
Ũhoro-ũrĩa-mwega wa ũkũũri nĩ ũtarĩirio wega thĩinĩ wa Atũmwo 3:19. Hĩndĩ ĩo Johana Mũbatithania anagĩrĩraga ũhoro wa mehia ma kĩrĩndĩ andũ aingĩ nĩ magarũrũkire.
Na tondũ Johana nĩaigĩrĩire mehia ma kĩrĩndĩ harĩ Jesu-rĩ, mehia mothe ma kĩrĩndĩ nĩ matheririo o ihinda rĩmwe. Na nĩ tondũ Johana Mũbatithania nĩ arutire ũira atĩ Jesu nĩathengirie mehia mothe maitũ-rĩ, nĩtũũĩ atĩ no tũhonokio na ũndũ wa gwĩtĩkia ũhoro-ũrĩa-mwega wa ũkũũri, ũhoro-ũrĩa-mwega wa maĩ na thakame.
KĨRĨA GĨATŨMIRE JOHANA MŨBATHANIA OKE MBERE YA JESU
“Tondũ ũguo nĩguo”
nĩ kuuga atĩa?
(1) ũndũ ũrĩa mwega
(2) ũndũ ũrĩa mwagĩrĩru mũno
(3) kwagĩrĩire o na njĩĩra ĩno tu
(gũtirĩ njĩĩra ĩngĩ)
Andũ arĩa matheeretio mehia mao na gwĩtĩkia Jesu, arĩ Mũhonokia, no mekĩĩre ũira wa ũhonokio wao thĩinĩ wa Mathayo harĩ ũhoro-inĩ-ũrĩa-mwega wa ũbatithio wa Jesu. Thĩinĩ wa Mathayo 3:15-16, Jesu agĩũka kũrĩ Johana na akĩmwĩra atĩrĩ, “Batithia.” Nake Johana akĩmũũcokeria, “Niĩ-rĩ, njagĩrĩirũo nĩ kũbatithio nĩwe, nawe ũgũũka kũrĩ niĩ atĩa?”
Nĩ Johana Mũbatithania wabatithirie Jesu, na nĩamenyaga We nũ. Johana arĩ ndungata ya Ngai yareketio, nĩguo aigĩrĩre mehia mothe ma kĩrĩndĩ harĩ Jesu. Na nĩ tondũ Jesu okĩĩte arĩ ta Mũhonokia-rĩ, nĩguo ahingie ũrathii wa Kĩrĩkanĩro Kĩrĩa Gĩa Tene-rĩ, nĩathire Johana Mũbatithania amũbatithie nĩguo athengie mehia mothe ma kĩrĩndĩ na amakue na mũtwe Wake.
Nĩkĩ? Nĩ tondũ Jesu-rĩ, nĩ Mũrũ wa Ngai Mwene Hinya Wothe, Mũũmbi wa indo ciothe, na Mũhonokia. Na nĩokire gũkũ thĩ ĩno, nĩguo atherie mehia mothe maitũ. Nĩ ũndũ ũcio-rĩ, nĩguo ahonokie andũ othe-rĩ, no mũhaka angĩabatithirio.
“Tondũ ũguo nĩguo” Jesu abatithirio nĩ Johana Mũbatithania na agĩtheria mehia mothe maitũ. Na agĩtuĩrũo handũ haitũ Mũtharaba-inĩ. Ũbatithio wa Jesu warĩ ũira wa ũhonokio witũ. O ta ũrĩa Ngai aarĩkanĩire Kĩrĩkanĩro-inĩ Kĩrĩa Gĩa Tene, atĩ mehia mothe nĩ makaigĩrĩrũo harĩ Gatũme ka igongona-rĩ, Mũrũ wa Ngai agĩĩtuĩaka Gatũrũme, na akĩoya mehia mothe maitũ Wee Mwene.
Nĩ ũndũ ũcio-rĩ, kũigĩrĩra kwa moko Kĩrĩkanĩro-inĩ Kĩrĩa Gĩa Tene na ũbatithio wa Jesu Kĩrĩkanĩro-inĩ Kĩrĩa Kĩerũ-rĩ, nĩ ũhoro wa kũigĩrĩra mehia, na ũhonokio, na muoyo wa tene na tene ũkaheanwo kũrĩ andũ arĩa magwĩtĩkia ũhoro-ũrĩa-mwega wa maĩ na Roho.
ŨBATITHIO WA JESU NĨ WATHERIRIE MEHIA MOTHE MAITŨ
Tũũngĩhumba Kristo atĩa?
Nĩ na kũbatithio thĩinĩ
wa Kristo
Hĩndĩ ĩrĩa Jesu endagaa kũbatithio-rĩ, Johana Mũbatithania nĩagerie kũmũgiria, akiuga, “Niĩ-rĩ, njagĩrĩirũo nĩ kũbatithio nĩwe, nawe ũgũũka kũrĩ niĩ atĩa?”
No Jesu akĩmũcokeria na akĩmwĩĩra atĩrĩrĩ, “Njĩtĩkĩria rĩu, tondũ ũguo nĩguo twagĩrĩirũo nĩ kũhingia maũndũ mothe marĩa merekanĩrĩirũo na ũthingu.” Njĩtĩkĩria rĩu. Erire Johana, “no mũhaka ũnjigĩrĩre mehia mothe ma kĩrĩndĩ, nĩguo ngucĩrĩrĩrie andũ kũrĩ Niĩ, arĩa othe magwĩtĩkia ũhoro-ũrĩa-mwega wa maĩ ma ũkũũri. Na nĩngũcoka nduĩrũo nĩ ĩndĩ wa mehia mao mothe, nĩguo arĩa othe magwĩtĩkia ũbatithio Wakwa nĩ magakũũrũo kuuma mehia-inĩ mao mothe. Njigĩrĩra mehia ma kĩrĩndĩ na kũbatithia, nĩguo andũ arĩ angĩ othe magooka thutha-inĩ makũũrũo kuuma mehia-inĩ mao o ihinda rĩmwe. Nĩ ũndũ ũcio-rĩ, Njĩtĩkĩria rĩu.”
Jesu abatithirio nĩ Johana Mũbatithania na ũbatithio ũcio wa Jesu waringaine na watho wa ũthingu wa ũkũũri wa Ngai. Na nĩ tondũ mehia mothe nĩmaigĩrĩirũo harĩ Jesu hĩndĩ ĩrĩa abatithirio-rĩ, no tũkũũrũo o ihinda rĩmwe hĩndĩ ĩrĩa twetĩkia Jesu na twabatithio. Na nĩ tondũ nĩ athengirie mehia mothe matũ na kũigĩrĩrũo moko-rĩ, na nĩakuire Mũtharaba-inĩ nĩ ũndũ witũ, na rĩu aikaire thĩ guoko-inĩ kwa ũrĩo kwa Ngai, no tũhonokio nĩ gwĩtĩkia ũhoro wa ũkũũri wa maĩ na Roho.
Nĩ Jesu, ũcio watũhonokirie kuuma mehia-inĩ mothe ma kĩrĩndĩ. No tũhonokio twetĩkia atĩ Jesu nĩathengirie na agĩkua mehia mothe maitũ, na akĩĩrĩha thiirĩ wothe wa mehia maitũ Mũtharaba-inĩ. Ũbatithio wa Jesu nĩkio kĩambĩrĩria kĩa ũhoro-ũrĩa-mwega wa ũkũũri.
Ũbatithio wa ũkũũri nĩ ũgwetetwo kaingĩ Kĩrĩkanĩro-inĩ, na mũtũmwo Paulo nĩ augite thĩinĩ wa Agalatia atĩ nĩambanĩirio na Kristo tondũ we nĩabatithĩtio thĩinĩ wa Kristo na akĩhumba Kristo. Mũtũmwo Paulo nĩarĩtie ũhoro wa wĩtĩkio wake wa ũkũũri wa ũbatithio wa Jesu na thakame Yake Mũtharaba-inĩ.
“NJĨTĨKĨRIA RĨU”
Wĩra wa Johana
Mũbatithania warĩ ũrĩĩkũ?
Wĩra wake warĩ wakũigĩrĩra mehia mothe
ma kĩrĩndĩ harĩ Jesu ta mũthĩnjĩri-
Ngai wakĩrĩndĩ.
Jesu akiuga, “tondũ ũguo nĩguo twagĩrĩirũo nĩ kũhingia maũndũ mothe marĩa merekanĩrĩirũo na ũthingu.” Maũndũ mothe marĩa merekanĩrĩirũo na ũthingu nĩ ũhoro wa gũtheria mehia mothe na ũbatithio Wake na gũtũma andũ othe makorũo matarĩ na mehia ngoro-inĩ ciao. “Hĩndĩ ĩo akĩmwĩtĩkĩria.” Jesu abatithĩirio rũĩ-inĩ rwa Jorodani.
O ta ũrĩa mũthĩnjĩri-Ngai aigagĩrĩraga moko make mũtwe-inĩ wa thenge, noguo Johana Mũbatithania aigĩrĩire moko mũtwe-inĩ wa Jesu na akĩmũigĩrĩra mehia mothe ma kĩrĩndĩ. Johana Mũbatithania arĩ mũthĩnjĩri-Ngai, ũrĩa wĩra wake warĩ wa kũigĩrĩra mehia ma kĩrĩndĩ harĩ Jesu arĩ ta mũrũgamĩri wa andũ othe. “Ngai, nĩndaigĩrĩra mehia mothe ma kĩrĩndĩ harĩ Gatũrũme Gaku, Jesu.” Na nĩ ũndũ ũcio mehia mothe ma kĩrĩndĩ makĩigĩrĩrũo harĩ Jesu.
Johana Mũbatithania akĩigĩrĩra moko make mũtwe-inĩ wa Jesu, akĩmũrinda maĩ-inĩ, na agĩthengia moko make hĩndĩ ĩrĩa oumĩrire igũrũ rĩa maĩ. Ũbatithio wa Jesu wekirũo nĩ ũndũ wa ũhonokio mũthingu. Na nĩ ũndũ ũcio Jesu nĩahonokirie andũ othe arĩa magwĩtĩkia ũbatithio Wake.
IGŨRŨ RĨKĨHINGŨKA NA MŨGAMBO ŨKIUMA IGŨRŨ
Nĩ kuuma hĩndĩ ĩrĩkũ Igũrũ
rĩa hingũkire?
Gwata matũkũ-inĩ ma Johana
Mũbatithania (Mathayo 11:12)
“Nake Jesu arĩkia kũbatithio, akiumĩra o rĩmwe maĩ-inĩ, na atĩrĩrĩ, Igũrũ rĩkĩhingũka, akĩona Roho wa Ngai agĩikũrũka ta ndutura, akĩũmba igũrũ rĩake. Na rĩrĩ, mũgambo ũkiuma Igũrũ, ũkiuga, ‘Ũyũ nĩwe Mũrũ wakwa nyendete mũno, nĩngenaga nĩ ũndũ wake’” (Mathayo 3:16-17).
Hĩndĩ ĩrĩa Jesu oire mehia mothe ma kĩrĩndĩna ũbatithio Wake-rĩ, Igũrũ nĩrĩamũhingũkĩire. Nĩ ũndũ ũcio Kĩrĩkanĩro gĩkĩĩhingio na ũbatithio wa Jesu rũĩ-inĩ rwa Jorodani.
Na nĩ ũndũ ũcio-rĩ, Jesu, arĩ ta Gatũme ka Ngai-rĩ, nĩ ahonokirie andũ othe kuuma mehia-inĩ mothe mao. Mehia mothe ma kĩrĩndĩ nĩ maigĩrĩirũo harĩ Jesu na akĩhingia wendi wa Ngai.
Ũira nĩũrutĩtwo thĩinĩ wa Johana 1:29, “Onei Gatũrũme ka Ngai, karĩa ga gũtwara mehia ma kĩrĩndĩ!” Na nĩ tondũ mehia mothe nĩmaigĩrĩirũo harĩ Jesu, Gatũrũme ka Ngai, agĩgĩthiĩ erekeire Golgotha Mũtharaba-inĩ, thutha wa mĩaka itatũ atitikĩĩte mũrigoo ciande-inĩ Ciake. Na thutha wa gũkua mehia mothe na ũbatithio Wake, kũrĩa guothe athiaga, araga arĩa mamwamũkagĩra na wĩtĩkio atĩ mehia mao mothe nĩ moheirũo.
Thĩinĩ wa Johana 8:11, nĩerire mũtumia ũrĩa wanyitĩtwo agĩtharia, “Na Niĩ ndigũgũtuĩra.” Ndangĩamũtuĩrĩre tondũ Ũrĩa warĩ atuĩrũo nĩ Jesu Wee mwene, o ũcio warĩkĩtie gũkua mehia mothe. Nĩ ũndũ nĩerire andũ othe atĩ Nĩwe Mũhonokia wa ehia.
Na nĩ tondũ Wee, arĩ Mũrũ wa Ngai, nĩakuire mehia mothe maitũ, rĩu mwĩtĩkia wothe thĩinĩ wa thĩ no atherio. Igũrũ nĩrĩahingũkire hĩndĩ ĩrĩ a Jesu abatithirio. Ihingo cia ũthamaki-inĩ wa Igũrũ nĩ ciahingũkire na mũndũ o wothe ũgwĩtĩkia ũbatithio wa Jesu no atonye atarĩ na kĩndũ gĩkũmũgiria.
JESU AMBIRWO THUTHA WA GŨTHENGIA MEHIA MOTHE MA KĨRĨNDĨ NA ŨBATITHIO WAKE
Jesu amemendire
Shaitani mũtwe atĩa?
Na kũriũka kuuma kũrĩ akuũ thutha
wa gwĩkĩra itua nĩ ũndũ
wa mehia mothe maitũ
Na nĩ tondũ Jesu nĩaigĩrĩirũo mehia mothe mũtwe-inĩ Wake-rĩ, no angĩatuĩrĩirũo Mũtharaba-inĩ. Na nĩ arĩ na kĩeha kĩnene, na nĩanyamarĩkagaa mũno hĩndĩ ĩrĩa aririkana ruo rũrĩa arĩ acemanie naruo mũtharaba-inĩ. Ahoire nginya thithino Yake ĩgĩtuĩka ta matata manene ma thakame. Hĩndĩ ĩrĩa athire na arutwo Ake handũ harĩa hetagwo Gethisemane, nĩ anĩrĩire akiuga, “Awa, akorũo kwahoteka, gĩkombe gĩkĩ nĩgĩ’thengere” (Mathayo 26:39). “Nĩ ndabatithirio na ngĩthengia mehia mothe ma kĩrĩndĩ, no reke njaage kũmaakuĩra.” No Ngai ndacokirie.
Mũthenya wa Ũhorohio Kĩrĩkanĩro-inĩ Kĩrĩa Gĩa Tene-rĩ, nyamũ ya igongona rĩa mehia no mũhaka ĩngĩoragirũo nĩguo thakame yayo ĩcoke ĩminjaminjĩrio gĩikaro-inĩ gĩa tha nĩ mũthĩnjĩri-Ngai. O ta ũguo-rĩ, Jesu no mũhaka angĩambirwo, na Ngai nĩ atuĩte itua atĩ hatiarĩ na njĩra ĩngĩ.
Kĩgongona nĩ itua rĩa Ngai nayo thakame ya igongona rĩa mehia nĩo muoyo. Kũminjaminjĩria thakame maita mũgwanja, mbere na thutha wa gĩtĩ gĩa tha, nĩ kuuga itua rĩa cira nĩ rĩaigĩrĩrũo (Maũndũ ma Alawii 16:1-22).
Jesu ahoire Ngai arekee gĩkombe kĩu kĩmũthengere. No Ithe ndetĩkĩrie na Jesu akiuga rĩamũthia, “ĩndĩ ti ũrĩa ngwenda niĩ, no nĩ ũrĩa ũkwenda wee” (Mathayo 26:39). Akĩhoya Ngai eke ũrĩa ekwenda. Akĩrĩkia kũhoya na akĩrũmĩrĩra wendi wa Ithe.
Jesu agĩteyanĩria wendi Wake na agĩathĩkĩra Ithe. Nĩkĩ? Nĩ tondũ Wee hĩndĩ ĩo ndatuĩrĩirũo thutha wa gũthengia mehia ma kĩrĩndĩ, na ũhonokio ndũngĩakorirũo ũrĩ mũhingie. Ambirũo nĩ tondũ nĩathengetie mehia mothe ma kĩrĩndĩ na ũbatithio Wake. “Nĩ gũtuĩka mũcara wa wĩhia nĩ gĩkuũ, no kĩheo kĩrĩa Ngai aheanaga kiumanĩte na Wega wake nĩ muoyo wa tene na tene, ũrĩa ũrĩ thĩinĩ Kristo Jesu Mwathani witũ” (Aroma 6:23).
Ngai nĩ ahingirie Kĩrĩkanĩro kĩrĩa arĩkanĩire atĩ, nĩagatũma Mũhonokia, na ahonokie kĩrĩndĩ na kũigĩrĩrũo kwa moko, na nĩguo ũbatithio wa Jesu. Jesu athĩkĩire wendi wa Ngai na agĩtĩkĩra itua rĩa cira nĩ ũndũ witũ.
Na warĩ ũhoro wa ũrathi ũkĩhingio thĩinĩ wa Kĩambĩrĩria 3:15, “Na ningĩ nĩngatũma inyuĩ na mũndũ mũgĩe ũthũ, o na mbeũ yaku na yake igĩe ũthũ; mbeũ yake nĩĩgakũgũtha mũtwe, nawe nĩũkamũgũtha ndiira ya kũgũrũ.” Ngai nĩerĩire Adamu atĩ nĩ agatũma Mesia, mbeũ ya Hawa, na ahoote Shaitani hinya ũrĩa watũmire mũndũ atuĩke mwĩhia na athiĩ icua-inĩ.
Hĩndĩ ĩrĩa twamenya na twetĩkia ũbatithio wa Jesu na gĩkuũ Gĩake Mũtharaba-inĩ, mehia mothe maitũ nĩmatheragio na tũkahonokio kumana na itua rĩa cira.
No mũhaka tũgĩe na wĩtĩkio mũkinyanĩruo ngoro-inĩ ciitũ hĩndĩ ĩrĩa tũreecia ũhoro wa ũbatithio wa Jesu na thakame Yake Mũtharaba-inĩ. Ĩtĩkia ngoro-inĩ yaku na nĩ ũkũhonokio.
ŨBATITHIO WA JESU NĨGUO KĨAMBĨRĨRIA KĨA ŨHORO-ŨRĨA- MWEGA WA IGŨRŨ
Nĩ rĩathani rĩrĩkũ rĩa mwathani
mbere ya kũambata Igũrũ?
Athire arutwo ake mathiĩ magatũme andũ
a ndũrĩrĩ matuĩke arutwo ake makĩbatithagia
na rĩĩtwa rĩa Ithe, na rĩa Mũriũ na rĩa
Roho Mũtheru
Ũbatithio wa Jesu nĩguo kĩambĩrĩria kĩa ũhoro-ũrĩa-mwega, na nĩ ũndũ ũcio-rĩ, nĩahonokirie ehia othe na ũbatithio Wake na thakame Yake. Thĩinĩ wa Mathayo 28:19, nĩ kwandĩkĩtwo, “Nĩ ũndũ ũcio, thiĩi mũgatũme andũ a ndũrĩrĩ ciothe matuĩke arutwo akwa, mũkĩmabatithagia thĩinĩ wa rĩĩtwa rĩa Ithe witũ, na rĩa Mũriũ, na rĩa Roho Mũtheru.” Jesu erire arutwo ake moumbũre atĩ, Ithe witũ, na Mũriũ na Roho Mũtheru nĩ marĩkĩtie kũhonokia andũ othe kuuma mehia-inĩ mao na ũbatithio Wake na thakame Yake.
Jesu nĩamaheire hinya wa gũtũma andũ matuĩke arutwo ake kuma ndũrĩrĩ ciothe, na marute ũhoro wa ũbatithio wa Jesu, ũbatithio ũcio wa ũkũũri, ũbatithio ũrĩa watheririe mehia mothe ma kĩrĩndĩ.
Ta mĩaka 2000 mĩhĩtũku, Jesu nĩokire gũkũ thĩ na mwĩrĩ na akĩbatithio nĩ Johana Mũbatithania. Nĩ na ũbatithio wa Jesu, mehia mothe ma kĩrĩndĩ, hamwe na mehia maitũ, nĩ maigĩrĩirũo harĩ Jesu.
Nĩ mehia maigana atĩa maigĩrĩirũo harĩ Wee? Ĩĩ na mo mehia ma rũciũ? Atwĩrĩte atĩ o na mehia ma rũciũ nĩ maigĩrĩirũo harĩ Wee. Mehia ma ciana ciitũ, na ma njiaro ciothe, cia tene, cia ũmũthĩ ũyũ, na cia thutha-inĩ, o na ma Adamu nĩ maigĩrĩirũo harĩ Jesu.
Kũngĩĩkorũo atĩa, atĩ gũtirĩ mehia? Tũngĩaga mehia atĩa? Nĩ tondũ Jesu nĩ athengirie mehia maitũ mothe hamwe na mehia mothe ma kĩrĩndĩ na ũbatithio Wake, nĩguo etĩkia othe mohorũo kuma mehia-inĩ na mahote gũtoonya Ũthamaki-inĩ wa Igũrũ.
“Nake ũrĩa wĩkaga maũndũ marĩa ma ma nĩokaga ũtheri-inĩ, nĩguo ciĩko ciake cionekane, imenyeke atĩ ciĩkĩtwo me na Ngai” (Johana 3:21).
Jesu atheririe mehia maitũ mothe na ũbatithio Wake, thakame Yake Mũtharaba-inĩ, gĩkuũ Gĩake na kũriũka Gwake. Na nĩ ũndũ ũcio-rĩ, gwĩtĩkia ũbatithio Wake na gĩkuũ Gĩake Mũtharaba-inĩ nĩkuo kũhonokio kuuma mehia-inĩ mothe. Ũyũ nĩguo wĩtĩkio wa ũkũũri.
Hĩndĩ ĩrĩa twetĩkia ũbatithio na thakame ya Jesu-rĩ, nĩrĩo tũhonokagio. Hĩndĩ ĩrĩa twetĩkia Jesu ũrĩa kwagĩrĩire-rĩ, tũkoragwo tũrĩ athingu kana ehia? Tũkoragwo tũrĩ athingu. Hihi tũkoragwo tũtarĩ na mehia o na rĩrĩa twĩna wathe? Ĩĩ, tũtirĩ na mehia. Gwĩtĩkia ũbatithio wa Jesu na itua Rĩake Mũtharaba-inĩ, nĩkuo gũkorwo na wĩtĩkio ũrĩa mũkinyanĩru na mwega.
KŨBATITHIA NA KŨBATITHIO THĨINĨ WA RĨĨTWA RĨA JESU
Kĩambĩrĩria kĩa ũhoro-ũrĩa-
mwega wa Iguru nĩkĩ?
Nĩ ũbatithio wa Jesu
Nĩ tondũ tũrĩ andũ matarĩ akinyanĩru-rĩ, atungatĩri nĩ mabatithagia andũ arĩa metĩkĩtie ũbatithio wa Jesu na thakame Yake nĩguo mekĩre hinya wĩtĩkio wao. Arĩa aciare rĩngĩ mekĩraga hinya ũhonokio wao na ũbatithio wao o ta ũrĩa Jesu abatithirio arĩ ta ũira wa wa wĩtĩkio wao.
Mũtungatĩri aigĩrĩire moko make mũtwe wa mũndũ ũcio mũciare rĩngĩ, ambe ahoe, irathimo kuuma kũrĩ Ngai, nĩguo mũndũ ũcio atuĩke wa kũgoocaga Ngai wega nginyagia mũcio wa matukũ make. Acoke amũbatithie na rĩĩtwa rĩa Ithe, na rĩa Mũriũ, na rĩa Roho Mũtheru.
Tũbatithagio kũringana na mũthingi wa wĩtĩkio witũ thĩinĩ wa ũbatithio wa Jesu na thakame Yake. Ũbatithio nĩ kuonania atĩ mehia mothe nĩ maigĩrĩirũo harĩ Jesu, atĩ mũndũ ũrĩa ũrabatithio nĩakuire na Jesu na akĩriũka nake.
Kũbatithio nĩ kumbũra wĩtĩkio wa mũndũ wa kũigĩrĩra mehia harĩ Jesu na ũbatithio Wake, na gũtuĩrũo nĩ ũndũ wa mehia hamwe na Jesu na kũriũkio hamwe Nake. Nĩ kumbũra wĩtĩkio wa mũndũ mbere ya Ithe, na Mũriũ, na Roho Mũtheru, na Shaitani, na ariũ na arĩ a Ithe witũ. Nĩ kumbũra atĩ mũndũ nĩmũciare rĩngĩ na maĩ na Roho.
Arĩa metĩkĩtie Jesu na ũmenyo wa ma ũhoro wa ũbatithio wa Jesu na thakame Yake Mũtharaba-inĩ, nĩ mahonoketio kuma mehia mothe ma kĩrĩndĩ. Na nĩ ũndũ ũcio-rĩ, magakĩbatithio na rĩĩtwa rĩa Ithe na rĩa Mũriũ, na rĩa Roho Mũtheru.
“Maũndũ marĩa ma tene nĩmathirĩte; nĩ atĩrĩ, nĩmatuĩkĩte mangĩ merũ” (2 Akorintho 5:17). Maũndũ maitũ marĩa ma tene nĩmathirĩte na rĩu tũrĩaciare rĩngĩ ta andũ a wĩtĩkio. Nĩguo twĩkĩra hinya ũhoro ũyũ ngoro-inĩ ciitũ-rĩ, nĩ tũbatithagio. Tũbatithagio thĩinĩ wa Jesu na gwĩtĩkia ũbatithio wa Jesu.
MŨTŨŨRĨRE THUTHA WA GŨCIARŨO RĨNGĨ NA ŨBATITHIO WA JESU NA THAKAME YAKE MŨTHARABA-INĨ
Andũ arĩa aciare rĩngĩ
matũũraga nĩkĩ?
Matũũraga nĩ ũndũ wa ũthamaki wa Ngai
na Ũthingu Wake, makĩhunjagia
ũhoro-ũrĩa-mwega thĩ yothe.
Mũtũũre thutha wa gũkũũrũo na gũciarũo rĩngĩ no mũhaka ũtaranie na wĩtĩkio harĩ kiugo kĩa Ngai. Ndwagĩrĩirũo nĩ gũkorũo ũrĩ mũtũũrĩre wa wĩigui, ũrĩa mũndũ aikagaraga akĩriraga mehia o mũthenya. No rĩrĩ, wagĩrĩirũo nĩ gũkorũo ũrĩ mũtũũrĩre wa kwĩhokeka, na nĩguo twĩkĩragwo hinya naguo atĩ Jesu nĩathengirie mehia mothe maitũ na ũbatithio Wake.
Mehia mothe maitũ nĩ maigĩrĩirũo harĩ Jesu hĩndĩ ĩrĩa abatithirio. Na nĩ acokire agĩikara mĩaka ĩtatũ arĩ na mũrigo ũcio, o nginya agĩĩtĩkĩra gũtuĩrũo nĩ ũndũ wa mehia maitũ mothe na akĩambwo.
Na nĩ ũndũ ũcio-rĩ, ithuĩ andũ arĩa twĩtĩkĩtie twagĩrĩrũo nĩ gũkorũo na wĩtĩkio wa kiugo kĩa Ngai kĩrĩa kĩandĩkĩtwo, no ti ũhoro wa wĩigui. Na twaaga gwĩĩka ũguo-rĩ, tũgũũtũra o na kwĩmakĩra nĩ ũndũ wa mehia maitũ ma o mũthenya o na thutha wa gũkũũrũo na gũciarũo rĩngĩ.
No mũhaka tũteyanĩrie ũhoro ũrĩa wĩkĩrĩirũo wĩgie mehia na twĩtĩkia o ũhoro-ũrĩa-mwega wa maĩ na thakame tu. Ũyũ nĩguo mũtũũrĩre ũrĩa mũndũ ũrĩa mũkũũre agĩrĩirũo nĩ gũikara.
Nĩ atĩa Johana Mũbatithania ougire ũhoro wa Jesu? Ougire, “Onei Gatũrũme ka Ngai, karĩa ga gũtwara mehia ma kĩrĩndĩ!” (Johana 1:29). Aumbũrire atĩ Jesu nĩathengirie mehia ma ũmũthĩ, na rũcio na ira, o na nginya mehia ma kĩmerera.
Nĩ kuuga ndathengirie mehia mothe? Kana ti mehia mothe maigĩrĩirũo harĩ Jesu? Mehia ma kĩrĩndĩ nĩ hamwe na mehia mothe maitũ ma mahinda marĩa mahĩtũku, ma ũmũthĩ na ma thutha-inĩ. No mũhaka tũthuthurie ũhoro-ũrĩa-mwega wa ũkũũri na ũbatithio wa Jesu.
Andũ arĩa magwĩtĩkia ũhoro wa ma wa ũbatithio wa Jesu na thakame Yake nĩ makũhonokio. Mũndũ o wothe wĩtĩkĩtie ũbatithio wa Jesu ndarĩ mehia ngoro-inĩ yake.
No rĩrĩ, andũ aingĩ meciragia atĩ marĩ o na mehia ngoro-inĩ ciao nĩ tondũ matiũĩ atĩ mehia mothe mao nĩ maigĩrĩirũo harĩ Jesu na ũbatithio Wake. Mahenagio nĩ Shaitani. Shaitani amahehagĩrĩra meciria-inĩ mao ma kĩmwĩrĩ. “Wĩhagia o mũthenya. Ũngĩkorũo ũtarĩ na mehia atĩa?”
No metĩkirie o Ngai tu nĩguo makorũo matarĩ na mehia. No Shaitani amekagĩrĩra mũtego, mageciria atĩ o nĩ ehia tondũ maikaraga o makĩĩhagia. Gũtirĩ mũndũ wĩna mehia akorũo nĩ etĩkĩtie ũbatithio wa Jesu na thakame Yake Mũtharaba-inĩ.
Na nĩ tondũ tũikaraga gũkũ thĩ ĩno tũtarĩ akinyanĩru na tũrĩ amocu-rĩ, tũtingiuga atĩ tũrĩ athingu na ũndũ wa ciĩko ciitũ ciiki tu. No na wĩtĩkio no tuuge atĩ nĩ tũhonokete na ũhoro wa ma wa ũbatithio wa Jesu na thakame Yake Mũtharaba-inĩ, na ngoro ciitũ igatherio, tũgakĩgĩa na ũmenyo atĩ tũtirĩ na mehia.
“♪ Ndĩ mũkũũre. Nĩ ũkũũrĩtwo. Nĩ tũkũũrĩtwo ♪” Nĩ gĩkeno kĩnene o na kũigua wega gũikara na wendi wa kũhunjia ũhoro-ũrĩa-mwega kũrĩ andũ othe na kũmenya atĩ tĩtongoragio nĩ Roho.
Nĩ ũhoro wa ma atĩ ithuĩ twĩtĩkĩtie nĩ twĩhagia o mũthenya, no tũtirĩ mehia. Tũrĩ na ũbatithio wa Jesu na thakame Yake ngoro-inĩ ciitũ. Ngoro ciitũ ciatũraga ciihũrĩte mehia, no rĩu tondũ nĩ twĩtĩkĩtie ũbatithio wa Jesu-rĩ, tũngĩgĩkorũo twĩna mehia atĩa.
“Gĩkĩ nĩkĩo kĩrĩkanĩro kĩrĩa ngarĩkanĩra nao matukũ macio maathira, ũguo nĩguo Mwathani oiga; Nĩngekĩra mawatho makwa ngoro-inĩ ciao, Na ndĩmaandĩke meciria-inĩ mao” (Ahibirania 10:16).
Ngoro ciitũ nĩ ciohoretwo mehia-inĩ.Jesu nĩatũmire kũhooteke tũkũũrũo kaimana na ũbatithio Wake na gĩkuũ Gĩake Mũtharaba-inĩ. Ũhonokio wa kuma mehia-inĩ umanaga na wĩtĩkio wa kiugo kĩa Ngai.
MŨNDŨ O WOTHE WĨKĨTĨKĨTIE ŨBATITHIO WA JESU NA THAKAME YAKE MŨTHARABA-INĨ NDANGĨTUĨKA MWĨHIA RĨNGĨ
Nĩ tũtuĩkaga ehia twehia rĩngĩ?
Aca, tũtigatuĩka ehia rĩngĩ o na-rĩ.
Hĩndĩ ĩrĩa tũtetĩkĩtie ũbatithio wa Jesu na thakame Yake, o na tũngĩageririe kũhoya tũoherũo kaingĩ, kwarĩ o na mehia ngoro-inĩ ciitũ. No hĩndĩ ĩrĩa tweetĩkirie ũhoro-ũrĩa-mwega-rĩ, mehia mothe maitũ nĩ matheririo.
“Hĩ, nĩkĩ gĩtũũmĩte ũkorũo ũkengete na ũrĩ mũkenu mũno ũguo thikũ ici?”
“Nĩũĩ, ndirĩ mehia niĩ ngoro-inĩ yakwa rĩngĩ.”
“Nĩguo? Ngũĩciiria ũrĩhagia o ũrĩa ũkwenda rĩu?”
“Nĩũĩ mũndũ ndangĩgirĩrĩria kwaaga kwĩhia. Ũguo nĩguo mũndũ ahaana. No Jesu nĩathengirie mehia mothe na ũbatithio Wake na agĩtĩkĩra gũtuĩrũo nĩ ũndũ wa mo Mũtharaba-inĩ. Na ĩ ũndũ ũcio-rĩ, rĩu niĩ ndĩrutagĩra gũtungata ũhoro-ũrĩa-mwega kanitha-inĩ. Aroma mũrango 6 yugĩte atĩ ithuothe nĩguo twagĩrĩirũo nĩ gũikara. Na rĩu tondũ ndirĩ na mehia ngoro-inĩ yakwa-rĩ, nyendaga gwĩĩka maũndũ ma ũthingu. No mũhaka twĩtĩkie ũbatithio wa Jesu na thakame Yake Mũtharaba-inĩ na tũhunjie ũhoro-ũrĩa-mwega thĩ yothe! Hĩndĩ ĩrĩa twetĩkia Jesu, ũrĩa nĩwe Mwathi wa ũkũũri-rĩ, tũtingĩtuĩka ehia rĩngĩ. No mũhaka twĩtĩkie ũhonokio wa tene na tene, wa ũbatithio wa Jesu na thakame Yake Mũtharaba-inĩ. Niĩ ndĩna ngaatho nyingĩ mũno!”
NŨŨ WAMŨKAGĨRA ROHO?
Nĩkĩ Johana Mũbatithania oumbũrire
ũhoro wĩgie Jesu?
Oumbũrire atĩ Jesu arĩ Gatũrũme ka Ngai karĩa
ga gũtwara mehia ma kĩrĩndĩ, na nĩmo,
mehia ma mahinda mahĩtũku, ma ũmũthĩ,
na mathutha-inĩ, o na ma kĩmerera.
Mũndũ o wothe wĩtĩkagia ũbatithio wa Jesu na thakame Yake Mũtharaba-inĩ nĩahonokagio. Twaamũkagĩĩra Roho atĩa? Atũmwo 2:38-39 nĩ ĩtũheete macokio. “Nake Petero akĩmera atĩrĩ, ‘Mwĩrirei, mũcoke mũbatithio o mũndũ o mũndũ thĩinĩ wa rĩĩtwa rĩa Jesu Kristo, nĩguo muoherũo mehia manyu; na nĩmũkũheo kĩheo kĩa Roho Mũtheru. Nĩ gũkorũo nĩ inyuĩ na ciana cianyu mwĩrĩirũo kĩĩranĩro kĩu, o na arĩa othe marĩ kũraya, gwata arĩa othe Mwathani Ngai witũ ageta moke harĩ we.’”
Kũbatithio thĩinĩ wa rĩĩtwa rĩa Jesu Kristo nĩ kuuga, gwĩtĩkia ũbatithio wa Jesu na gũkũũrũo. Naguo Roho Mũtheru mũndũ aheo ta kĩheo kuma kũrĩ Ngai.
Kũbatithio thĩinĩ wa rĩĩtwa rĩa Jesu Kristo o na nĩ kuuga, gũtherio na gwĩtĩkia ũbatithio wa Kristo na thakame. Hĩndĩ ĩrĩa twahĩmbĩria Ũbatithio wa Jesu Nĩguo Ũndũ Ũrĩa Ũtangĩthengeka Harĩ Wĩkĩre wa Maũndũ ma Ũkũũri wĩtĩkio ũyũ-rĩ, tũkũragũo na tũgatuĩka athingu. Etĩkia matheraga o ta ira nĩ ũndũ wa ũbatithio wa Jesu na thakame Yake Mũtharaba-inĩ.
“Na nĩmũkũheo kĩheo kĩa Roho Mũtheru.” Hĩndĩ ĩrĩa twetĩkia na kinyi, atĩ mehia mothe maitũ nĩ maigĩrĩirũo harĩ Jesu na ũbatithio Wake na atĩ nĩatuĩrĩirũo nĩ ũndũ wa mon a gĩkuũ Gĩake Mũtharaba-inĩ, ngoro ciitũ nĩ itheragio. Mũtũũrĩre witũ ũrĩa mwerũ wambagĩrĩria hĩndĩ ĩrĩa twetĩkia ũbatithio wa Jesu na thakame Yake, na tũkamũkĩĩra kĩheo kĩa Roho Mũtheru, na tũgatuĩka ciana cia Ngai.
“Na nĩmũkanye ũhoro-ũrĩa-wa-ma, naguo ũhoro-ũrĩa-wa-ma ũmũkũũre ũkombo-inĩ” (Johana 8:32). Nĩ twagĩrĩirũo nĩ kũmenya ũhoro wa ma wa gũtuĩrũo kwa Mwathani Mũtharaba-inĩ. Ũhoro wa ma nĩ atĩ Jesu nĩatheririe mehia mothe maitũ na ũbatithio Wake na gĩkuũ Gĩake Mũtharaba-inĩ. Twamũkagĩra ũkũũri hĩndĩ ĩrĩa twetĩkia ũhoro-ũrĩa-wa-ma.
ŨBATITHIO WA JESU NĨGUO ŨTŨKŨŨRAGA
Nũ ũngĩamũkĩra Roho Mũtheru?
Nĩ ũkũũrĩtwo mehia-inĩ mothe na gwĩtĩkia
ũbatithio wa Jesu na thakame
Yake Mũtharaba-inĩ.
Ũhorohio wa mehia na ũhoro wa magongona Kĩrĩkanĩro-inĩ Kĩrĩa Gĩa Tene ũrũgamĩrĩire ũbatithio wa Jesu Kĩrĩkanĩro-inĩ Kĩrĩa Kĩerũ. Ũbatithio wa Jesu nĩko gatũũro ka ũrathi wothe Kĩrĩkanĩro-inĩ Kĩrĩa Gĩa Tene. Mũiru wa ũhoro wa kũigĩrĩra kwa moko Kĩrĩkanĩro-inĩ Kĩrĩa Gĩa Tene no wonekire thĩinĩ wa ũbatithio wa Jesu Kĩrĩkanĩro-inĩ Kĩrĩa Kĩerũ.
Mehia mothe ma kĩrĩndĩ nĩ maigĩrĩirũo harĩ Jesu hĩndĩ ĩrĩa abatithirio o ta ũrĩa mehia ma ciana cia Isiraeli maigagĩrĩragwo harĩ thenge ĩrĩa ya kũrekio na kũigĩrĩrũo kwa moko.
Hihi, no mũhaka twĩtĩkie ũbatithio wa Jesu nĩguo tũhonokio kuma mehia-inĩ mothe maitũ? Ĩĩ! No mũhaka! No nginyagia twĩtĩkĩre ũhoro wa ma atĩ Jesu nĩathengirie mehia mothe ma kĩrĩndĩ na ũbatithio Wake. Akorũo tũtigwĩtĩkia ũbatithio wa Jesu-rĩ, mehia maitũ namo matirĩ hĩndĩ marĩigĩrĩrũo harĩ We. No mũhaka twĩtĩkie nĩguo ũhonokio witũ ũkorũo ũrĩ mũkinyanĩru. Kũaga ũguo-rĩ, tũtingĩtuĩka athingu.
Jesu ahonokirie ehia othe a thĩ ĩno na njĩra ĩrĩa yagĩrĩire mũno na ya ũthingu na ũbatithio Wake. Ũndũ ũyũ ndũngĩkirũo na njĩra ĩngĩ njega. Ni tondũ ũbatithio wa Jesu warĩ mũbango wa kũmũigĩrĩra mehia mothe, na no mũhaka tũwĩtĩkie nĩguo ngoro ciitũ ituĩke ciagũtherio mehia-inĩ kaimana.
Na nĩ twagĩrĩirũo o na nĩgwĩtĩkie thakame ya Jesu nĩguo tũtonye ũthamaki-inĩ wa Igũrũ. Ũũ noguo tũngĩkũũrũo kuuma mehia-inĩ na tũũrĩre iherithia rĩa kĩhooto.
O na nĩ twagĩrĩirũo nĩ gwĩtĩkia atĩ thakame ya Jesu yarĩ ya itua rĩa cira wa mehia mothe maitũ. Na nĩ ũndũ ũcio, arĩa othe metĩkagia ũbatithio wa Jesu na thakame Yake Mũtharaba-inĩ nĩ mahonokagio kuuma mehia-inĩ.
No mũhaka twĩtĩkie ũbatithio wa Jesu nĩguo tũtonye ũthamaki-inĩ wa Matu-inĩ. Ĩno noyo njĩra ĩrĩa tũngĩhonokio kuuma mehia-inĩ mothe na tũrĩre itua rĩa kĩhooto.
Ũbatithio wa Jesu Kĩrĩkanĩro-inĩ Kĩrĩa Kĩerũ na kũigĩrĩra kwa moko Kĩrĩkanĩro-inĩ Kĩrĩa Gĩa Tene nĩ icicio ciroranĩte. Nĩcio inyitithanĩtie na ikohithania Kĩrĩkanĩro-inĩ Kĩrĩa Gĩa Tene na Kĩrĩa Kĩerũ.
Kĩrĩkanĩro-inĩ Kĩrĩa Kĩerũ, Johana Mũbatithania nĩ okire mĩeri 6 mbere ya Jesu. Hĩndĩ ĩrĩa Jesu abatithirio, nĩguo “Kĩambĩrĩria kĩa Ũhoro-ũrĩa-Mwega wa Jesu Kristo, Mũrũ wa Ngai” (Mariko 1:1). Ũhoro-ũrĩa-Mwega wambĩrĩirie hĩndĩ ĩrĩa Jesu athengirie mehia mothe ma kĩrĩndĩ na ũbatithio Wake.
Wĩra wa kũhonokia kĩrĩndĩ warutirũo na mĩtaratara ya maũndũ: gũciarũo kwa Jesu, ũbatithio Wake, gĩkuũ Gĩake Mũtharaba-inĩ, kũriũka Gwake, na kwambata Gwake Igũrũ. Hĩndĩ ĩrĩa twamenya na twetĩkia mũtaratara wa ũhonokio wa ũguo maũndũ marũmanĩrĩire-rĩ, nĩ tũhonokagio kuuma mehia-inĩ mothe maitũ. Ũbatithio wa Jesu nĩguo kĩambĩrĩria kĩa Ũhoro-ũrĩa-Mwega, nayo thakame Mũtharaba-inĩ nĩyo yaũrĩkĩrĩirie.
“Kĩambĩrĩria kĩa Ũhoro-ũrĩa-Mwega wa Jesu Kristo, Mũrũ wa Ngai” (Mariko 1:1). Tũtingĩrũgĩrĩra ũndũ o na ũmwe wa ciĩko Ciake cia ũthingu ̶ ũbatithio Wake, thakame Yake Mũtharabai-inĩ, kũriũka Gwake, kwambata Gwake na gũũka Gwake rĩa kerĩ ̶ harĩ ũhoro-ũrĩa-mwega wa Mũrũ wa Ngai.
Jesu okire gũkũ thĩ ĩno na mwĩrĩ na agĩtheria mehia mothe ma kĩrĩndĩ na ũbatithio Wake, na gĩkĩ nĩkĩo kĩambĩrĩria kĩa ũhoro-ũrĩa-mwega wa Igũrũ. Hangĩkorũo ũmwe wa macio ũtarĩho, ũhoro-ũrĩa-mwega wa Igũrũ ndũkĩkorũo ũrĩ mũkinyanĩru.
Nĩ ũndũ ũcio-rĩ, angĩkorũo mũndũ nĩagũciarũo rĩngĩ-rĩ, no mũhaka etĩkĩe ũbatithio wa Kristo na thakame Yake. Thikũ ici andũ aingĩ matiĩkĩĩtie ũhoro wa ma wa ũbatithio wa Jesu na thakame Yake. Meciragia atĩ ũbatithio wa Jesu atĩ no o mwĩkĩre wa wĩtĩkio. Ũyũ nĩ ũndũ wa mahĩtia na wa gũtũma gwĩthikĩrũo. Mũndũ o wothe wĩtĩkĩtie Jesu no mũhaka etĩkie ũbatithio Wake na thakame Yake.
Mehia maitũ mangĩtherio atĩa na o mahoya ma kũhoya mũhera? Mehia mothe nĩ maigĩrĩirũo harĩ Jesu hĩndĩ ĩrĩa abatithirio nĩ Johana Mũbatithania. Hatiarĩ na njĩra ĩngĩ angĩathengirie mehia ma kĩrĩndĩ nayo.
No mũhaka tũciarũo rĩngĩ na maĩ na Roho nĩguo tũtonye ũthamaki-inĩ wa Igũrũ. Gũtingĩkorũo na ũkũũri hatarĩ na maĩ ma ũbatithio, thakame Mũtharaba-inĩ, na Roho. No mũndũ ũrĩa mũciare rĩngũ tu ũngĩona Ngai, ta ũrĩa Jesu arire Nikodemo thĩinĩ wa Johana 3:5. Ũhonokio wa ma tũwonaga o rĩrĩa twetĩkia ũbatithio wa Jesu na thakame Yake.
HIHI NO TŨHONOKIO HATARĨ NA ŨBATITHIO WA JESU?
Jesu atuĩkire Mũhonokia atĩa?
Na gũthengia mehia mothe maitũ
na ũbatithio Wake
Tũngĩkorwo nĩ tũtigĩrĩ kuma harĩ ũtungata wa Jesu kũrĩ mũingĩ-inĩ, ũma wa atĩ Jesu nĩokire gũkũ thĩ ĩno na agĩthengie mehia mothe maitũ na ũbatithio Wake, o na kana twaage kuona ũthingu wa Jesu, ũrĩa waciarirũo nĩ Thingi Maria, kana tũtiganĩrie wĩtĩkio wa Mũtharaba wa Jesu-rĩ, Ũkristiano ũngĩgĩtuĩka o ta ũndini wa kĩrĩra gĩtarĩ kĩa ma, kĩrĩa gĩtongoragia etĩkia kwanĩrĩra “njohera, njohera, njohera” ta hekarũ-inĩ cia Abudha ũrĩa mekaga.
Kũrũgĩrĩra ũbatithio wa Jesu nĩ kuuga atĩ mehia maitũ matiaigĩrĩirũo harĩ Wee. Wĩtĩkio witũ ũngĩgĩkorũo ũrĩ wa tũhũ, na ũtarĩ na ngũũrani na mũndũ ũrĩa wĩna thiirĩ wene, na aroiga atĩ nĩ arĩhĩte thiirĩ wothe, no ũhoro wa ma nĩ atĩ gũtirĩ kĩndũ arĩhĩĩte. Ũndũ ũyũ ũngĩtũtua andũ a maheni. Hĩndĩ ĩrĩa mũndũ wĩna thiirĩ aroiga atĩ nĩarĩhĩte thiirĩ wothe, na ũhoro wa ma nĩ atĩ gũtirĩ ũndũ ekĩĩte-rĩ, ũhoro wa ma nĩ atĩ mũndũ ũcio arĩ o na thiirĩ nginyagia thamiri-inĩ yake.
Jesu atheririe andũ arĩa metĩkĩti na maĩ ma ũbatithio Wake magĩthera na akĩmatua ciana cia Ngai. Jesu athengirie mehia mothe ma kĩrĩndĩ kũgerera harĩ Johana Mũbatithania, nĩguo etĩkia othe matherio. Hĩndĩ ĩrĩa twemenya na twetĩkia, ngoro ciitũ itheragio tene o na tene.
Nĩ thengio kũrĩ Ngai nĩ ũndũ wa wega Wake. Luka 2:14 yugĩte, “Ngai arokumagio Igũrũ o Igũrũ, Naguo thayũ ũrogĩa gũkũ thĩ kũrĩ andũ arĩa akenagia!” wĩtĩkio witũ wa maĩ na thakame ya Jesu itũheaga ũhonokio mũkinyanĩru na igatũtua ciana Ngai. Ũbatithio wa Jesu na thakame Yake nĩciatũhonokirie na mũndũ ũrĩa wothe ũgwĩtĩkia indo ici cierĩ nĩakũhonokio.
Gũtirĩ kĩndũ kĩngĩtigĩrĩrũo harĩ wĩra Wake. Amwe metĩkĩtie o thakame, na kuuga atĩ mũtũmwo Paulo erahaga o na Mũtharaba. No ũbatithio wa Jesu ũrĩ hamwe na Mũtharaba Wake.
Nĩ tũrona thĩinĩ wa Aroma 6 Paulo abatithirio thĩinĩ wa Kristo na agĩkua na Kristo. O na Agalatia 2:20, “Nyambanĩirio na Kristo mũtĩ igũrũ, no ndĩ o muoyo; ĩndĩ rĩu niĩ ti niĩ ndũũraga muoyo, nĩ Kristo ũtũũraga muoyo thĩinĩ wakwa: naguo muoyo ũrĩ ndũũraga naguo no ũndũ wa gwĩtĩkia Mũrũ wa Ngai, o we wanyendire, agĩkĩĩruta nĩ wakwa.”
Na thĩinĩ wa Agalatia 3:27-29, “Tondũ-rĩ, andũ anyu o arĩa othe maabatithirio thĩinĩ wa Kristo nĩ kwĩhumba mehumbĩte Kristo. Gũtingĩcoka gũthuranio Mũyahundi kana Mũyunani, arĩa me ngombo kana arĩa matarĩ ngombo, andũ arũme kana andũ-a-nja: nĩ ũndũ-rĩ, inyuĩ inyuothe mũtuĩkĩte o ũmwe ki thĩinĩ wa Kristo Jesu. Na mũngĩkorũo mũrĩ a Kristo, mũkĩrĩ o a rũciaro rũa Iburahimu, na mũrĩ agai a kũgaya maũndũ marĩa meranĩirũo.”
Kũbatithio thĩinĩ wa Kristo nĩ gwĩtĩkia maũndũ mothe marĩa ekire arĩ gũkũ thĩ, ũbatithio Wake, na thakame Yake Mũtharaba-inĩ. Gwĩtĩkia wa Jesu na thakame Yake nĩ gwĩtĩkia ũhoro wa ma atĩ Jesu nĩarĩkirie gũtheria mehia mothe maitũ mĩaka 2000 mĩhĩtũku. Gũtirĩ na njĩra ĩngĩ ĩngĩtũhe ũhonokio.
TŨHONOKAGIO NĨ NGAI HĨNDĨ ĨRĨA TWETĨKIA ŨBATITHIO WA JESU NA THAKAME YAKE MŨTHARABA-INĨ
Hihi mehia maitũ no matherio
o na kũhoya tuoherũo?
Aca. Kuoherũo kwa mehia kũhotekaga o na wĩtĩkio
witũ wa atĩ mehia mothe maitũ nĩ maigĩrĩirũo harĩ
Jesu hĩndĩ ĩrĩa abatithirio nĩ
Johana Mũbatithania
“Nĩgũkorũo nĩ ngoro mũndũ etĩkagia nayo agagĩtuwo mũthingu, na nĩ kanua oimbũraga nako agakĩhonoka” (Aroma 10:10).
“Tondũ-rĩ, andũ anyu o arĩa othe maabatithirio thĩinĩ wa Kristo nĩ kwĩhumba mehumbĩte Kristo” (Agalatia 3:27). Wĩtĩkio witũ ũtũtongoragia kũbatithio thĩinĩ wa Kristo, tũkehumba Kristo, na tũgatuĩka ciana cia Ngai. Hĩndĩ ĩrĩa Jesu okire gũkũ thĩ ĩno na akĩbatithio-rĩ, mehia mothe maitũ na mehia ma kĩrĩndĩ nĩ maigĩrĩirũo harĩ Wee.
Wĩtĩkio witũ ũtũtuaga ũmwe na Kristo. Nĩ tũakuire rĩrĩa akuire. Nĩ twariũkirio rĩrĩa ariũkirio. Na rĩu tondũ nĩ twĩtĩkĩtie ũbatithio wa Jesu, thakame Yake, na kũriũka Gwake, kũambata Gwake, na gũũka Gwake rĩa kerĩ-rĩ, rĩu no tũtonye ũthamaki-inĩ wa Igũrũ na tũtũre kuo tene na tene.
Hĩndĩ ĩrĩa andũ makoragwo metĩkĩtie o thakame ya Jesu ĩrĩ o iki-rĩ makoragwo o na mĩnyamaro ngoro-inĩ nĩ ũndũ wa mehia marĩa marĩ o na mo. Nĩkĩ? Nĩ tondũ matiũĩ o na kana magetĩkĩra ũtaũri wa ũbatithio wa Jesu, ũrĩa wathengirie mehia mothe mao na ũgĩtheria mehia ma ngoro ciao, na gũcitua njerũ o ta ira tene na tene.
Hihi nĩwĩtĩkĩtie ũbatithio wa Jesu na thakame Yake iria ciakũhonokirie kuuma mehia-inĩ maku mothe? Wenda ĩtĩkia ũhoro ũyũ wa ma ĩtangĩcenjeka. Ũtarĩ na wĩtĩkio wa ũbatithio wa Jesu-rĩ, wĩtĩkio waku no wa tũhũ. Ũtarĩ na wĩtĩkio wa ũbatithio wa Jesu mehia maku matingĩkũũrũo; ũrĩ wendo-inĩ ũtarĩ macokio.
Arĩa metĩkĩtie o Mũtharaba wiki tu-rĩ, mougaga, “Jesu nĩ Mwathani na Mũhonokia wakwa, na nĩwe wanguĩrĩire. Nĩ ariũkire kuuma kũrĩ akuũ na akĩruta ũira wa kũriũka Gwake thikũ 40 mbere ya kũambata Igũrũ, na rĩu aikarĩte guoko-inĩ kwa ũrĩo kwa Ngai. Nĩ njĩtĩkĩtie atĩ nĩ agooka rĩa kerĩ atũcirithie na ndĩrahoya Jesu anjenjie biũ nĩguo ngamuona. Oo, Jesu mwendwa wakwa, Mwathani wakwa.”
Mahoyaga mahoya ma kũrekerũo mehia mao, marĩ na mwĩhoko atĩ nĩmagũkorũo matarĩ na mehia, no mehia makoragwo marĩ o ngoro-inĩ ciao. “Nĩnjĩtĩkĩtie Jesu, no ndĩ na mehia ngoro-inĩ yakwa. Nĩ nyendete Jesu no ndĩ o na mehia ngoro-inĩ yakwa. Ndingiuga kuuga, ‘Wenda ũka kũrĩ niĩ, we mũhikania’ nĩ tondũ ndĩ na mehia na ndirĩ na ũma na ũhonokio wakwa. Ũguo gwĩhoka Jesu nĩagoka hĩndĩ ĩrĩa ngokorũo ndĩharĩirie wega na nĩ thutha wa kũhoya mũno na kwĩrira mũno. Nĩ nyendete Jesu na ngoro yakwa yothe no ndingĩhota gũtũngana Nake nĩ tondũ ndĩ o na mehia ngoro-inĩ yakwa.”
Korwo Jesu no orie andũ ta acio, “Ũgwĩciria nĩkĩ gĩtũmĩte wege gũkorũo ũrĩ mũkinyanĩru?”
Mangĩcokia, “Mwathani, niĩ nĩ njũĩ ndirĩ mũthingu nĩ tondũ njĩhagia o mũthenya. Nĩ ũndũ ũcio-rĩ njĩĩta hĩndĩ ĩrĩa ũgwĩĩta andũ arĩa ehia.”
Matikoragwo moĩ atĩ Ngai, arĩ We Mũmbi, na Mũtuanĩri cira, gũtirĩ hĩndĩ agetĩkĩra andũ ehia o na kana amatue ciana Ciake.
Mũhikania nĩ okire na akĩnina mathĩna mothe ma mehia ma mũhiki, na nĩ tondũ mũhiki ndoĩ ũhoro ũhoro ũcio-rĩ, rĩu no kũnyamarĩka. Hĩndĩ ĩrĩa tũreciria atĩ tũrĩ ehia nĩ ũndũ wa kwĩhia na mwĩrĩ-rĩ, tokoragwo tũtetĩkĩtie Ngai. Hĩndĩ ĩrĩa tũkoragũo tũtoĩ o na kana tũkameya ũhoro wa ma wa kiugo kĩa Ngai-rĩ, mehia mathiaga o na mbere kuongereka ngoro-inĩ ciitũ.
Nĩkĩ gũtũmaga andũ matangĩke na mehia
marĩa marĩ o ngoro-inĩ ciao?
Nĩ tondũ matiũĩ o na kana magetĩkĩra ngoro-inĩ
ciao ũtaũri wa ũbatithio wa Jesu, ũrĩa
wathengirie mehia mothe. mao
Mũhikania athengirie mehia mothe ma kĩrĩndĩ. Kũ? Rũĩ-inĩ rwa Jorodani rĩrĩa abatithirio. Andũ arĩa matetĩkĩtie ũguo no ehia o na rĩu. O nĩ ahiki mena thahu.
Mũhikania oragia mũhiki, “Ũngĩhota kũnyenda atĩa na wee ndũrĩ mũhika Wakwa? Mbere ya ũnjĩĩte Mũhikania waku-rĩ mehia maku mothe no mũhaka mambe matherio.”
Hihi no tũkũũrũo hatarĩ na ũbatithio wa Jesu? Aca! Tuombirũo na mũnanĩre wa Ngai, na nĩ ũndũ ũcio-rĩ, tũgeragia gwetha kĩhooto ngoro-inĩ ciitũ, na thamiri ciitũ ikageria gũkorũo irĩ theru. No nĩ ũndũ ũrĩ hinya ithuĩ gwĩciria atĩ tũtirĩ na mehia akorũo tũtitheretio ngoro-inĩ ciitũ. No rĩrĩ, no hĩndĩ ĩrĩa twetĩkĩra na twetĩkia ũbatithio wa Jesu tu, tũngiuga na ma atĩ tũtirĩ na mehia na tũrĩ athingu.
Thamiri ciitũ gũtirĩ hĩndĩ ingĩthera akorũo no gwĩtua tũgwĩtua atĩ tũtirĩ na mehia, hĩndĩ ĩrĩa ũhoro wa ma nĩ atĩ tũrĩ na mehia ngoro-inĩ ciitũ. O na Ngai ndangĩtwĩtĩkĩra tũhaana ũguo. Ngai ndangĩhenania.
Ngai erire Musa atare andũ a Isiraeli na marĩĩhe gĩkũũri kĩa mĩoyo yao. Arĩa atongu matiagĩrĩirũo nĩ kũruta thĩ wa nuthu ya shekel na o na arĩa athĩĩni matiagĩrĩirũo nĩ kũruta nini. Mũndũ o wothe no nginya angĩarĩhire gĩkũũri.
Na nĩ ũndũ ũcio-rĩ, mũndũ angĩgĩtherio atĩa akorũo ndetĩkĩtie Jesu ũrĩa wamũrĩhĩire gĩkũũri kĩa muoyo wake? Mũndũ ta ũcio athiaga o na mbere gũikara na mehia ngoro-inĩ yake.
Hĩndĩ ĩrĩa tũkoragũo twĩtĩkĩtie o thakame ya Jesu ĩrĩ iki tu-rĩ, tũkoragũo o na mehia ngoro-inĩ ciitũ na no mũhaka tuumbũũre atĩ tũrĩ ehia. No hĩndĩ ĩrĩa twetĩkia ũhoro-ũrĩa-mwega wa ũbatithio wa Jesu na Mũtharaba irĩ hamwe-rĩ, no tuuge atĩ tũtirĩ na mehia. Ũhonokio na muoyo wa tene na tene cikoragũo cirĩ ciitũ.
KŨNYŨRŨRIA ROHO
Nĩ mehia ma mũthemba ũrĩkũ
matwaraga mũndũ iherero-inĩ?
Nĩ rĩhia rĩa kũregana na Roho, na ciugo ingĩ,
nĩ kũaga gwĩtĩkia ũbatithio wa Jesu.
Aroma 1:17 yugĩte, “Tondũ-rĩ, thĩinĩ waguo ũthingu wa Ngai nĩũguũrĩtio, ũrĩa ũgĩagwo naguo nĩ ũndũ wa gwĩtĩkia, na kuuma ũkoimaga o wĩtĩkio.” Ũthingu wa Ngai nĩũguũrĩtio thĩinĩ wa ũhoro-ũrĩa-mwega. Jesu Kristo nĩokire gũkũ thĩ ĩno na agĩtheria mehia mothe maitũ na ũbatithio Wake na gĩkuũ Gĩake Mũtharaba-inĩ. Ũbatithio wa Jesu na thakame Yake nĩguo hinya wa ũhoro-ũrĩa-mwega. Jesu athambirie mehia mothe maitũ o ihinda rĩmwe rĩa kũigana nginya tene.
Gwĩtĩkia nĩ kuuga ũhonokio na kuaga gwĩtĩkia nĩ iherero rĩa mwaki tene na tene. Ithe witũ ũrĩa ũrĩ Igũrũ nĩatũmire Mũrũ Wake wa mũmwe Jesu oke gũkũ thĩ ĩno na agĩtũma abatithio nĩguo mehia maitũ mahorohio. Na nĩ ũndũ ũcio-rĩ, mũndũ ũrĩa ũkũmwĩtĩkia no atherio mawĩhia make mothe.
Rĩhia rĩrĩa tu rĩtigaire gũkũ thĩ ĩno nĩ rĩhia rĩa kũaga gwĩtĩkia ũbatithio Wake na thakame. Kũaga gwĩtĩkia nĩ kũnyũrũria Roho na rĩhia rĩrĩ Ngai nĩ akarĩtuĩra, na aikie arĩa matetĩkĩtie iherero-inĩ rĩa mwaki. Mũndũ ũrĩa wanyu wĩhagia rĩhia rĩrĩ no mũhaka erire na akũũrũo na gwĩtĩkia ũbatithio wa Jesu. Akorũo ti ũguo nĩũkanyarirũo tene na tene.
Hihi nĩ ũhonoketio nĩ ũira wa ũkũũri wa ũbatithio wa Jesu na thakame? Nĩ wamũkĩire ũira wa Johana o ta ũrĩa wandĩkĩtwo thĩinĩ wa Johana 1:29, “Onei Gatũrũme ka Ngai, karĩa ga gũtwara mehia ma kĩrĩndĩ!” Nĩ wĩtĩkĩtie ũbatithio wa Jesu ta ũrĩa wandĩkĩtwo thĩinĩ wa Ahibirania 10:18, “Na rĩrĩ, macio marĩkia kũrekanĩrũo, gũtingĩcoka kũrutwo ihaki rĩa mehia.”
Ngai nĩahĩtũkagia andũ arĩa metĩkĩtie ũbatithio wa Jesu na thakame Yake ngoro-inĩ ciao. Ngai amatuuga ciana Ciake. Arĩa metĩkĩtie ũbatithio wa Jesu na thakame Yake nĩ akũũre na wendo wa ũthingu wa Jesu.
Ũrĩa wothe Ngai atũmaga aragia kiugo kĩa Ngai, no arĩa a thĩ, arĩa matatũmĩtwo nĩ Ngai-rĩ, acio mahunjagia kũringana na mecira mao. Nĩ kũrĩ na andũ aingĩ mũno thĩ ĩno mahunjagia kiugo kĩa Ngai, na arĩa matũmĩtwo nĩ Ngai maragia ũhoro wa ũbatithio wa Jesu na thakame Yake.
No arĩa mahunjagia ciugo ciao makoragũo o magĩtaarĩria mecia mao. Mougaga, “Nĩ tũkũũrĩtũo mehia ma kĩmerera, no mũndũ no mũhaka erire mehia ma o mũthenya.” Mougaga atĩ no nginyagia tũthiĩ na mbere o tũgĩtheragio.
No rĩrĩ, mũndũ no etherie wee mwene? Hihi no tũtherio nĩ hinya wa kwagĩrĩra gwitũ na ciĩko ciitũ kĩũmbe? Tũtheragio nĩ tondũ Ngai nĩathambirie mehia mothe maitũ, kana nĩ tondũ nĩ tũgeragia gũkũũrũo ithuĩ ene?
Wĩtĩkio wa ma nĩguo ũtũtheragia. Hihi no tũtherie ikara na kũrĩthambia maita ngiri ĩmwe? Gũtirĩ thabuni o na rangi ũigana o na atĩa ũngĩtheria mehia, naguo ũthingu witũ ũhana o ta nguo thũku mũno. Hihi tũtuĩkaga athingu nĩ ũndũ wa gwĩtĩkia ũbatithio wa Jesu na thakame Yake kana na gwĩtĩkia o thakame Mũtharaba-inĩ tu?
Wĩtĩkio wa ma ũmanaga na ũbatithio wa Jesu na thakame Yake Mũtharaba-inĩ. Ũhonokio nduonekaga nĩ ũndũ wa ciĩko ciitũ. No wĩtĩkio witũ wiki tu thĩinĩ wa ũbatithio wa Jesu na thakame Yake ingĩtuohora kuuma mehia-inĩ na itũtue athingu.
Ithe nĩaheyanĩte andũ othe moko-inĩ ma Mũrũwe, nao arĩa makũmwĩtĩkia magĩe na muoyo wa tene na tene. Gwĩtĩkia Mũrũwe nĩ gwĩtĩkia ũkũũri wa ũbatithio Wake na thakame. Arĩa magwĩtĩkia nĩ makũgĩa na muoyo wa tene na tene ta ciana cia Ngai. Arĩ mahonoketio matũũraga tene na tene marĩ guoko-inĩ kwa ũrĩo kwa Ngai.
Wĩtĩkio wa ũbatithio wa Jesu na Ũrũmwe Wake na Ngai o naguo nĩ wĩtĩkio wa Roho. Kiugo kĩama gĩtũmaga tũciarũo rĩngĩ. Tũhonokagio nĩgwĩtĩkia ũbatithio wa Jesu na thakame Yake.
Ĩtĩkia. Gwĩtĩkia ũbatithio wa Jesu na thakame nĩ gũkũũrũo. Ĩtĩkia ũhoro-ũrĩa-mwega na woherũo mehia.
Copyright © 2021 by The New Life Mission
