All e-books and audiobooks on The New Life Mission website are free
Explore multilingual sermons in global languages
Two new revised editions in English have been released
Check out our website translated into 27 languages

English

Sermons

Sermons

A konglam 7: Khaukhih le thimchung nak kong ah a palh mi ruahnak

[7-1] Thleidannak Le Khaukhihnak Chung Ah Ai Thup mi Palhnak (Rom 8:28-30)

(Rom 8:28-30)
“Pathian nih hin, amah a daw mi hna caah le amah nih aa tinh mi ning in a kawh mi hna caah cun, zeizong vialte hi a tha lei ah a serpiak ko hna ti kha kan hngalh. Pathian nih a thim cia mi hna cu a Fapa bantuk kha an si naklai, a dang tein a thleidan hna, cucu unau rual tampi lakah a Fapa cu an upa bik a si nakhnga caah a si. Cucaah a thleidan mi hna cu Pathian nih a kawh hna i a kawh mi hna cu Amah he a remter hna, cun amah he a remter mi hna cu a sunparnak zong kha a hrawmh hna.

Pathian nih mi cheu khat lawng a thim hna maw?
Thim lo. Jesuh Khrih ah kan dihlak in a kan thim.

Thleidannak le khuakhihnak zumhnak tlaihtleng Khrihfa biaknak chung ah a um mi nih Jesuh zumh a duh mi minung tampi Pathian bia in a pialter hna. Hi zumhnak dik lo nih minung tampi a buaiter hna.
Hi zumhnak nih a ti mi cu Pathian nih a dawt mi cheu khat kha a thim hna i a dawt lo mi kha sual a phawt hna tiah an ti. A sullam cu thim mi cu Thlarau le ti in hrinthannak a co mi le vancung kai ding an si i a dang thim lo mi cu hell kal ding an si tiah an ti.
Pathian nih mi cheu khat lawng thim hna sehlaw, kan tuah khawh bik ding mi biahalnak, “Khamh ding ah keimah hi thim ka si maw?” ti hal lawng hi a si ko hnga. Thim kan si lo ahcun Jesuh kan zumh mi zong hi santlai lo a si hnga. Hi ruahnak nih minung tampi kha Pathian nih ka zumhnak ruang ah a ka thim hnga maw tiah a buaiter hna.
Hihi kan zumh ahcun zeitindah lungawtawmnak in kan luat khawh lai i Pathian lawng kan zumh khawh lai? Zeitindah Pathian nih a kan thim bak ko tiah kan fian khawh lai? “Pathian cu Judah mi hna Pathian lawng maw a si? Jentail mi hna Pathian tah a si ve lo maw? Si hen ta!” (Rom 3:29) a ti ko bu ah, Pathian cu thim mi hna Pathian lawng a si tinak a si hnga.
Minung tampi nih thleidannak le thimchungnak hi a ruah an i palh caah, Jesuh an zumh ko bu ah rawhralnak kan phan lai tiah tihphannak an ngei.
Efesa 1:3-5 ah, “Kan Bawipa Jesuh Khrih i a Pa le a Pathian cu lawm ko u sih. Zeicahtiah Khrih he kan i pehtlaihnak thawng in kannih cu vancung ram ah hin thlarau laksawng phun kip kha a kan pek. Vawlei a ser hlan in Pathian nih kannih cu Khrih chung i amah ta si ding in a kan thim cang, cucaah a hmai ah a thiang mi le soi awk um lo mi kan si awk a si. Pathian nih cun kannih cu Jesuh Khrih thawng in a fa i cohlan awk kha a rak timh cang mi le a duh mi a si” tiah a ti.
Cucaah, thleidannak le thimchungnak hi kan ruah than a hau mi a si. A pakhatnak ah Baibal nih thleidannak le thimchungnak kong ah zeidah a chim ti kha kan hngalhfian hmasa i Thlarau le ti khamhnak kan zumhnak kha thawnter a hau.
Rom cakuat nih zeidah a kan chimh? Cheu khat Baibal thiamsang hna nih “khelkhat lei thimnak” tiah ruahnak an chuahpi. Theology hi Pathian a si maw? Theology cu Pathian a si lo.
Vawlei a ser hlan in Pathian nih Khrih chung ah amah ta si ding le mithiang si ding ah a kan thim diam cang. Jesuh nih khelkhat lei dawtnak in a kan dawt. Pathian hi thleidan hmang Pathian ah ser hlah. Zumhlotu nih cun anmah ruahnak ah an zumhnak an bunh i zumtu nih cun Pathian bia ah kan zumhnak kan bunh ve.

BIAKAM HLUN AH PATHIAN KHAUKHIHNAK

Khelkhat lei thimnak hi a dik maw?
A dik lo. Kan Bawipa hi ruahnak bi mi Pathian a si lo. Pathian nih misual vialte Jesuh ah a kan thim dih. Judah mi lawng a si lo.

Genesis 25:21-26 ah Isak fapa le pahnih Esau le Jacob kong kan hmuh. An pahnih in a nupaw chung an um lio ah Pathian nih Jacob cu a thim.
Pathian nih a hngalfiang lo mi nih hika zawn hi khelkhel lei thimnak a hrampi ah an hman. Hihi vawlei mi hna zumhnak le Khrihfa zumhnak cawhpawlh bantuk a si.
Pathian nih Jesuh Khrih ah si loin amah khelkhat lei duhnak in a kan thim tiah kan zumh ahcun cucu siasal biak he ai khat mi a si. Pathian cu vawlei mi hna pathian bantuk a si lo. Vawlei mi hna pathian kan biak ahcun Pathian nung duhnak kan hlawt tinak a si i Satan rap ah kan i foih ko lai.
Minung nih Pathian duhnak a hlawt ahcun amah cu a rawkral colh ding saram bantuk men a si ko. Zumtu cu saram kan si lo caah, Pathian bia ai tial mi a reltu le a hngalfiang tu kan si awk a si. Pathian bia ai tial mi rel lo le pakhatnak chiah lo cu mah le mah Satan sin i pek bantuk khi a si ko.
Zumhnak dik ngeihnak ding ah, Baibal biatak hi a pakhatnak ah kan zumh i Khrih ah hrinthannak a co mi hna keneh kan zumh ding a si.
Calvin cawnpiannak a zul mi hna nih cun khamhnak hi ri a ngei an ti. A sullam cu Pathian dawtnak le khamhnak hi mi cheu khat ca ahcun a si lo tinak a si. Cucu a dik kho hnga maw?
Baibal nih, “Mi vialte nih khamhnak hmu hna seh ti hi Pathian duhnak a si” (1 Timote 2:4) tiah a ti. Khamhnak thluachuahnak hi mi cheu khat ca lawng ah a si ahcun minung tami nih Jesuh zumhnak hi an ngol hnga. Cun ruahnak a bi tuk mi Pathian cu aho nih dah a zumh duh hnga?
Pathian cu ruahnak bi mi Pathian a si lo ti kan fian ding a si. Pathian cu dinfelnak, dawtnak le biatak Pathian a si. Jesuh kan zumh i Thlarau le ti hrinthannak thawngtha kha zumh hnu ah kan sualnak vialte in khamhnak kan co ding a si. Jesuh cu Thlarau le ti in hrinthannak a co mi vialte Khamhtu a si.
Calvin cawnpiaknak ahcun, minung pahra ahcun an um ahcun a cheu khat cu khamh an si lai i a cheu khat cu hell mei ah kalter an si lai. Cucu a dik lo mi a si.
Pathian nih mi cheu a dawt hna i mi cheu a huat hna ti cu sullam ngei lo mi a si. Pathian hi tuchun ah kan sin ah a um tiah ruat hmanh u, a orhlei ah a um mi kha a thim hna i a kehlei ah a um mi kha a nganhta hna ahcun Pathian ah kan ruat kho hnga maw?
Nganhtak a si mi hna nih an awchuah in Pathian cu a vuivai hnawh hnga lo maw? Ser mi vialte nih, “Pathian cu a dingfel lo” tiah an au lai. Khelkhat lei thimnak hi a dik lo mi a si, zeicahtiah Pathian nih Khrih chung ah kan dihlak in a kan thim.
Cucaah Pathian nih Khrih chung ah a thim mi paoh cu khaukhih mi an si ko. Cuti si ah Pathian nih ahodah a thim? Misual mi kha a thim hna, miding mi a thim hna lo. Mah le mah ka dingfel a ti mi cu Pathian nih a thim hna lo.
Pathian khamhnak thluachuahnak cu misual mi le hell ah a kal ding mi hna caah a si.

PATHIAN CU A DINGFEL

Pathian nih thim mi tlawmte lawng maw a dawt hna?
Daw lo. Pathian cu ruahnak bi mi a si lo. A dingfel mi a si.

Pathian cu a dingfel mi a si. Khelkhat lei thim mi cheu khat lawng a dawtu hna Pathian a si lo. Misual mi kha Khrih chung ah a thim hna. Jesuh Khrih khamhnak le sual ngaihthiamnak um lo cun, zeitindah Pathian dawtnak le khamhnak kan hngalh khawh lai? A dingfel lo mi Pathian ah ser hlah.
Efesa 1:3-5 na rel tikah zeidah hrelh mi a si ti kha kawl tuah. “Kan Bawipa Jesuh Khrih i a Pa le a Pathian cu lawm ko u sih. Zeicahtiah Khrih he kan i pehtlaihnak thawng in kannih cu vancung ram ah hin thlarau laksawng phun kip kha a kan pek. Vawlei a ser hlan in Pathian nih kannih cu Khrih chung i amah ta si ding in a kan thim cang, cucaah a hmai ah a thiang mi le soi awk um lo mi kan si awk a si. Pathian nih cun kannih cu Jesuh Khrih thawng in a fa i cohlan awk kha a rak timh cang mi le a duh mi a si.” Zeidah a bau? A bau mi biafang cu, “Jesuh Khrih cung ah” ti a si.
Calvin cawnpiaknak bantuk in khelkhat lei Pathian thimnak hi Baibal cawnpiaknak he a kalti mi a si lo. Baibal nih cun, “Vawlei ser hlan in Jesuh Khrih chung ah kan thim cang hna” tiah a ti.
Pathian nih Khrih chung ah Thlarau le ti in hrinthan ding in a kan thim. Sual in hrin i sualnak tuah tilo, zeihmanh a tuah kho lo mi kha a kan khamh i a fa ah a kan ser. Jesuh Khrih chung ah thim ding ah le khamh ding ah minung vialte a kan khumh dih.
Khelkhat lei thimnak a zum mi Baibal thiamsang tampi nih mi cheu khat lawng thim an si tiah an cawnpiak caah, minung tampi an zumhnak a vaivuan i ai rawk. Baibal thiamsang deu cheu khat nih Pathian nih mi cheu khat a thim hna i mi cheu khat a hlawt hna tiah an ti nain Baibal biatak cu Pathian nih Khrih Jesuh chung ah kan dihlak in a kan thim ti hi a si. Minung tampi cu zumhnak dik lo le khuahrum biaknak ah an tla.
Pathian nih Jesuh Khrih chung ah kan dihlak in khamh ding ah a kan thim ti kan hngalhfian ahcun sual ngaihthiamnak cu Jesuh a zum mi vialte caah a si lai. Cuticun, kan sualnak chung in khamh kan si lai, Pathian fa kan si lai, mithiang kan si lai, zungzal nunnak kan ngei lai i Pathian cu a ding tiah kan hngalh lai.

JACOB LE ESAU TUANBIA AH PATHIAN THIMNAK

Pathian nih ahodah khaukhih? Thim mi lawng maw?
Si lo. Pathian nih minung vialte Khrih chung ah a kan thim. Jesuh a zum mi vialte le tipil a innak in sualnak a ngei lo mi vialte kha khaukhih mi an si.

Genesis 25:19-28 ah Jacob le Esau cu an nu Rebekah pawchung an um lio ah an i pai. Genesis 25:23 ah Pathian nih, “Na chung ah hin miphun pahnih an um. Aa ral mi miphun phun hnih na hrin hna lai. pakhat cu a thawng deuh lai i a upa deuh nih a ngakchia deuh kha a rianh lai” tiah a ti.
Misual mi nih hi bia hi thleidannak le cunglei thimnak zumhnak ah an hman i Jesuh a zum mi tampi kha thim kan si maw si lo tiah an buaiter hna. Anmah le mah kha thim mi kan si tiah an i ruah caah, Thlarau le ti hrinthannak thawngtha kha an duh ti lo.
Khelkhat lei zoh thimnak nih minung tampi kha Jesuh khamhnak le tlanhnak an zumhnak in a pialter hna i hell ah a kuat hna. Hi nih Pathian kha a dingfel lo mi ah a ser.
Baibal thiamsang tampi nih anmah ruahnak men a dik lo mi kha an cawnpiak hna caah Jesuh a zum mi tampi kha an zumhnak le an khamhnak kong ah thim kan si hnga maw silo tiah a buaiter hna.
Jacob le Esau ah ahodah Pathian nih a thim? Jacob kha Jesuh Khrih chung ah a thim. Rom 9:10-11 ah, Pathian nih an nupaw chung in an chuah i zeihmanh thatnak le chiatnak an tuah hlan ah Jacob cu a thim tiah a langhter.
Pathian nih Jacob a thimnak cu amah tuahsernak ruang ah si loin Amah duhthimnak ruang ah a si. Baibal zong nih Jesuh cu misual mi hna khamh ding a ra, miding mi hna kawh ding a si lo tiah a ti.
Minung vialte Adam hrinsor kan si bantuk in misual kan si dih. David nih ka nu paw chung in sual in pawi ka si i sual in hrin ka si tiah a ti. “Sual cia in hrin ka si, ka nu nih a ka pawi ah khan misual ka si cang” (Salm 51:5) tiah a ti.
Minung vialte hi sual in hrin kan si zeicahtiah cun kan pipu chan in misual kan si cang. Cucaah hi vawlei ah hrin a si mi vialte cu misual in hrin kan si, sual kan tuah i sual thei kan tlai.
Ngakchia chuakka zei sualnak hmanh a tuah rih lo mi zong khi misual a si, zeicahtiah sual ci in hrin mi a si. Ruahnak tha lo a ngei, nulepa sualnak duhnak, lainawnnak le fir duhnak a thinlung ah a um. An pi le pu sualnak he hrin a si. Minung vialte hi kan chuah hlan in misual kan si cang.
Pathian nih hiti a kan sernak a ruang cu a tanglei ruang ah hin a si. Minung cu Pathian ser mi kan si, asinain Bawipa nih kan sualnak in khamh ding kha a timhlamh mi a si. Hi ruang ah Pathian nih Adam kha sual ding ah a sianhnak a si.
A donghnak i misual kan hung si tikah, Pathian nih a fapa Jesuh cu hi vawlei ah a vun thlah i tipil innak in vawlei sualnak vialte kha a tawl dih.
Pathian nih ai tinh mi cu a fapa Jesuh tipil innak in vawlei sualnak lak dih le vailam cung a thisen sual leiba champiak dih hnu ah amah a zum mi paoh a fa sinak nawl pek kha a si. Adam sual a sianh cu a fapa Jesuh Khrih in sualnak vialte tawl a timh caah a si.
Zumhnak dik lo a zum mi misualfa hna nih cun, “Jacob le Esau kha zoh hna u. Pakhat kha a thim i pakhat kha a hlawt ko” tiah an ti. Pathian nih khel khat lei lawng in a kan thim lo, Jesuh Khrih chung ah a kan thim. Baibal ca lawng kan zoh a herh mi a si. Rom 9:10-12 ah, “Cun cu lawng cu a si lo. Rebekah fapa pahnih hna zong nih khan pa pakhat lawng an ngei ko, a hringtu hna Isak kha an pa cu a si ko. Sihmanhsehlaw pakhat u a thim kha Pathian tinh ning lawnglawng in a si nakhnga caah Pathian nih Rebekah cu, “A u nih a nau kha a rianh lai,” tiah a chim. Hi bia a chim hi an chuah hlan ah a si, a tha siseh, a chia siseh, zeihmanh an tuah hlan ah a si, cucaah Pathian nih pakhat a thim cu anmah an tuah mi ruang ah khan a si lo, amah nih a kawh ruang tu ah khan a si ko” tiah a ti.
Pathian nih Jacob cu Jesuh ah a thim. Jacob hi misual mitlamtling lo le mah dinfelnak ruang ah a ngaihchia mi hna hmanthlak a si. Efesa 1:4 ah Pathian nih Amah chung ah a kan thim tiah a ti.
Pathian nih ahodah a kawh? Pathian nih Jacob a kawh, zeicahtiah Jacob nih misual ka si i Pathian hmai ah tling lo ka si ti kha a hngalh caah Pathian kha ai bochan. Jacob cu a fapa Jesuh Khrih chung ah a thim i ti le Thlarau thawngtha in a khamh hnu ah a fa ah a ser. Cucaah, Pathian nih Jacob cu a kawh i khamhnak thluachuah a pek.
Pathian nih misual mi kha a kawh hna i Jesuh khamhnak hmang in miding ah a ser hna. Cucu Pathian tinh mi a si.

KHEL KHAT LEI THIMNAK KONG AH ZUMHNAK DEU

Zeiruang ah dah Pathian nih Jacob a dawt?
Jacob nih a dinfel lonak a hngalh caah

Tunai te ah khan khel khat lei thimnak kong cauk ka rel. Mino pakhat nih mang a manh. A mang ahcun nutar pakhat a sin ah a rak lang i hmunhma pakhat ah kal ding in a fial i a kal. Cu hnu ah nutar nih cun Pathian nih an thim tiah a chimh.
Cutikah Pathian hmanh kan zumh tung lo, zeitindah Pathian nih a ka thim khawh tiah a hal. Cutikah minu nih Pathian nih na zumhnak zoh loin khel khat lei zoh lawng in an thim tiah a ti.
Cucu a dik lo mi a si. Zetindah Pathian nih ruat setsai loin mi cheu khat a thim hna i mi cheu khat a hlawt khawh hna lai? Pathian nih kan dihlak in Jesuh ah a kan thim.
Khel khat lei thimnak kong cawnnak ah Jesuh a telh lo mi cu a dik lo mi cawnpiaknak a si. Cucu a dik lo mi a si. Asinain Baibal thiamsang tampi nih Pathian nih mi cheu khat lawng a thim hna tiah an ti peng. Jesuh nih Thlarau le ti in a kan khamhnak a zum lo mi lawng nih khamhnak an co lai lo.
Pathian nih a fapa ah Jesuh ah minun vialte hi khamh ding ah a kan thim dih i vawlei a ser hlan in a fale si awk ah timhlamhnak a ngei cang. Vawlei minung vialte hi an sualnak in Jesuh hmang in khamh ding ah a timhlamh cang. Mah hihi Baibal ah ai tial mi biatak a si.
Jesuh ah hrinthannak a co mi miding mi hna cu thim mi an si. Asinain Baibal thiamsang tampi nih mi cheu khat lawng Pathian nih a kan thim tiah an ti peng. Tahchunhnak, Buddhist phungki pawl hna khi thim lo mi an si tiah an ti. Asinain anmah zong khi Jesuh ah thim an si ve.
Pathian nih Jesuh tel loin mi cheu khat lawng khel khat lei zoh in a thim hna ahcun, thawngtha bia chim a herh hnga lo. Pathian nih Jesuh tel loin mi cheu khat a thim hna ahcun, misual mi nih Jesuh zumh a herh hnga lo. Cutikah zeitindah a dawtnak, biatak a sinak le a khamhnak cu a tlamtlin khawh lai?
Pathian sal le hna nih hi vawlei ah thawngtha bia chimnak ding a ruang a um ti hnga maw? Pathian nih mi cheu khat cu khel khat lei lawng zoh in a thim cang hna i mi cheu khat a hlawt cang hna ti cu sullam a ngei maw?
Pathian nih Jesuh ah Jacob a thimnak le an chuah hlan in Jacob ka dawt i Esau ka huat a tinak a ruang ah Jacob nih a ka zumh te lai i Esau nih a ka zum duh lai lo ti kha a hngalh cang caah a si.
Hi vawlei ah Jesuh a zum mi misual tampi an um. Mi cheu khat cu Jacob bantuk an si i mi cheu khat cu Esau bantuk an si ve.
Zeiruang ah dah Pathian nih Jacob a dawt? Jacob cu mi dingfel lo a si i a dinfel lonak kha ai hngalh. Cucaah Pathian hmai ah misual ka si ti kha a phuan i Pathian vel kha a kawl. Hi ruang ah Pathian nih Jacob cu a khamh.
Asinain Esau cu Bawipa nakin amah le mah ai bochan deuh i Pathian vel kha a kawl lo. Hi ruang ah Pathian nih Jacob ka dawt i Esau ka huat tiah a ti. Hihi biatak a si.
Pathian nih Jesuh Khrih chung ah khamh ding ah kan dihlak in a kan thim. Misual mi vialte nih kan tuah ding mi cu Jesuh zumh kha a si. Cu tikah Pathian dawtnak le biatak cu kan thinlung ah khua a sa lai. Misual mi hna nih kan thinlung dihlak in Jesuh zumh i khamhnak co dah lo kan tuah khawh mi zeihmanh a um lo. Kan tuah a herh mi cu khamhnak ding ah Jesuh zumh hi a si.

DUHSAH TEIN THIANHLIMNAK KONG AH ZUMHNAK DEU

Misual mi hi duhsah tein miding kan si kho tihi a dik maw?
A dik lo. A si kho lo mi a si. Jesuh tipil innak le vailam cung a thisen thawng in Pathian nih misual kha voi khat ca zalak in miding ah a ser.

Satan nih misual mi kha duhsah tein miding si khawh a si ko tiah a hlen hna i an sualnak in khamh an si kho lo. Duhsah te miding si ti cu Jesuh zumh hnu ah duhsah tein miding ah kan i ser tinak a si.
Hi ruahnak cu hitin a kal ning a si. Misual mi kha voi khat lo ah miding a si kho lo, Jesuh a zumh ah khan Adam sualnak lawng in khamh a si. Nitinte sualnak cu sual ngaihchihnak le sualchiar thlacamnak lawng nih a thianh khawh i cu hnu lawng ah duhsah tein miding si khawh a si tiah an ti.
Hi ruahnak a muru cu duhsah te miding can kha a si. Mi pakhat nih Jesuh a zumh hnu ah duhsah tein miding ah ai chuah ti cu a ngaih nuam mi a lo. Hi ruahnak dik lo nih mitampi a hlen hna nih kan him rua tiah an ruah. Hi ruang ah hin Khrihfa biaknak chung ah nangmah nakin keimah ka thiang deuh ti ruahnak a chuahnak a si.
Ni khatkhat cu kan i thleng te lai i sualnak ngei lo kan si ko lai tiah an ruah. Asinain misual bantuk in an nun caah an thih hlan ah Pathian nih bia a ceih te hna lai.
Baibal ah biatak kha rel u. Rom 8:30 ah, “Cucaah a thleidan mi hna cu Pathian nih a kawh hna i a kawh mi hna cu Amah he a remter hna, cun amah a remter mi hna cu a sunparnak zong kha a hrawmh hna” tiah a ti.
Caang 29 nak ah, “Pathian nih a thim cia mi hna cu a Fapa bantuk kha an si naklai, a dang tein a thleidan hna, cucu unau rual tampi lakah a Fapa cu an upa bik a si nakhnga caah a si” tiah a ti. Zohduak ahcun miding sinak ding ah a dotdot a um mi a lo. Asinain Pathian bia nih dinfelnak cu voi khat lo ah pek kan si tiah a ti.
“A thleidan mi hna cu a kawh hna.” Jesuh nih misual kha a kawh hna i Jordan tiva tipil a innak le vailam cung a thihnak ah khan a khamh hna.
Cucaah Jesuh khamhnak a zum mi paoh cu sunparnak in a khat mi Pathian fa an si. Misual mi khamh le a min in a sunparnak hrawmh cu Pathian vel thawng in a si.
Hihi Pathian nih a kan chimh mi a si. Asinain Khrihfa cheu khat nih Rom 8:30 kha zoh u tiah an kan ti. “Miding sinak ding ah a dot tete a um. Cucaah duhsah tein miding kan si tinak a si ko lo maw? tiah an ti. Cuticun mi an hlen hna. Hmailei caan ah miding nan si te ko lai tiah mi kha an chimh hna.
Asinain Baibal nih hmailei caan in a chim lo, a tling cang mi caan in a chim i nan dingfel cang tiah a ti. Hmailei caan le a tlingcang mi caan cu ai dang mi a si.
Baibal hi tling tein kan zumh awk a si. Baibal ah ai tial ning te ahcun, voi khat lo ah miding le Pathian fa kan si kho ti hi a si. Hihi duhsah tein miding kan si ti ruahnak he cun ai dang tuk mi a si.
Dusah tein miding kan si ti ruahnak nih cun Jesuh kan zumh tikah Adam sualnak lawng in khamh kan si tiah an ti. Nitinte sualnak cu sualngaihchihnak le sualchir thlacamnak in Pathian hmai ah kan i ngaihchih lai i duhsah tein miding kan si lai tiah an ti.
Hi ruahnak hi minung tampi nih an zumh caah Jesuh an zumh hnu zong ah misualfa dirhmun in an dir peng. Hi ruang ah duhsah te miding kan si ti ruahnak a dik lonak a si.
Baibal nih fiang tein a kan chimh mi cu zumhnak thawng in miding le Pathian fa kan si ti hi a si. Ngakchia vawlei ah a chuah bantuk in Jesuh khamhnak le tlanhnak kan zumh bak in Pathian fa kan si ve. Duhsah te miding fel kan si ti ruahnak le zumhank cu lih in a rak chuak mi a si.

SUALNAK VIALTE CHUNG IN KHAMHNAK TLAMTLING

Miding sinak ding ah zeidah kan tuah lai?
Thlarau le ti khamhnak kan zumh lai

Rom 8:1-2 ah, “Atu cu Khrih Jesuh he i pehtlai in a nung mi hna caah cun sualphawtnak a um ti lo. Zeicahtiah Khrih Jesuh he aa pehtlai mi nunnak a kan petu Thlarau phung nih cun sualnak le thihnak phung chung khan a kan luatter cang.” Hi Baiba caang nih a kan chimh mi cu nawlbia le thihnak in Jesuh sin ah a ra i a zum mi vialte cu Pathian nih a khamh hna i miding ah a ser hna ti kha a si.
Hebru 9:12 nih a tlamtling mi khamhnak kong a kan chimh. “Khrih nih thlam chung khan a va kal i voi khat ah zungzal ca za ding in Hmun Thiang bik chung ah a va luh tikah, raithawinak i pekchanh awk ah, cawfa thi siseh, meheh thi siseh, aa put lo, amah thi thengte kha aa put i khamhnak kha a kan serpiak” tiah a ti. A sullam cu Jesuh a zum mi vialte cu khamh an si i vancung an kai lai tinak a si.
Jesuh Khrih thawng in Thlarau le ti khamhnak thawngtha kan theih i kan sualnak vialte ngaihthiam kan si. Asinain Adam sualnak lawng in khamh kan si tiah a zum mi misual mi hna cu khamh an si lai lo. Jesuh an zumh hnu ah an tuah mi sualnak cu nitinte sualchir thlacamnak le sual ngaihchihnak lawng in ngaihthiam kan si lai tiah an ruah.
An zumhnak dik lo nih hell ah a hruai hna. An zumhnak dik lo nih nitinte sualchir thlacamnak le ngaihchihnak a hruai hna. Hihi hell chung in a kan khamhtu zumhnak a si lo.
Jesuh an zumh i voi khat ca zalak in khamh an si ahcun miding le Pathian fa an si lai. A dik mi khamhnak nih cun zumtu kha miding ah a ser hna i voi khat ca zalak in a fa ah a ser hna.
Zumtu cu hi vawlei sualnak in khamh an si cang ko nain, an taksa cu an thih tiang ai thleng lo. Asinain an thinlung cu Pathian dinfelnak nih a uk. Hi biatak hi kan hngalhsual lo ding a si.
Baibal nih a kan chimh mi cu thawngtha kan zumh bak in thianter kan si i miding ah ser kan si ti hi a si.
Hebru 10:9-14 ah, “Cun aa thawh than i, “Pathian, nangmah nih tuah seh ti na ka duh mi tuah awkah ka ra,” a ti. Cuticun Pathian nih raithawinak hlun vialte kha a hlawt hna i Khrih raithawinak khan a thlen hna. Jesuh Khrih nih Pathian duh mi kha a tuah caah, voi khat ah za lak in amah a pum aa pekchanhnak thawng khan kannih cu kan sualnak in a kan thianh cang. Judah tlangbawi hna nih cun, dirhmun in an rian kha ni fate an tuan lengmang i raithawinak an pekchanh tawn mi kha voi tampi an pekchanh lengmang. Sihmanhsehlaw hi raithawinak nih hin sualnak kha a thianh kho taktak bal lo. Asinain Khrih nih cun raithawinak kha sualnak caah voi khat a ser i cucu zungzal ca in a za ko, cu hnu ah Pathian orhlei kam ah khan a thu. Cuka ahcun Pathian nih a ral kha a kelamh i a ser hna ding caan kha a hngak. Voi khat raithawinak in an sualnak thianhpiak a si mi hna cu zungzal ca in a tling mi ah ser an si.”
“Jesuh Khrih nih Pathian duh mi kha a tuah caah, voi khat ah za lak in amah a pum aa pekchanhnak thawng khan kannih cu kan sualnak in a kan thianh cang.” Hika zawn hi hmailei caan kong in a chim lo i a luancia caan kong in a chim ti hi kan hngalh ding a si.
Tlamtling tein thianh sinak ding ah, Jesuh nih a kan pek mi Thlarau le ti khamhnak thawngtha kan zumh ding a si.

JESUH NIH VOI KHAT CA ZALAK IN ZUNGZAL KHAMHNAK A KAN PEK

Zeiruang ah dah a zungzal in i lawm u tiah a ti? (1 Thesalon 5:16)
Jesuh nih sualnak vialte a lak dih cang caah a hmai ah toidor te in m I a vel ruang ah lawmhbia chim ding lawng a tan caah.

Jesuh zungzal tlanhnak kan zumh ahcun voi khat ah za lak in miding kan si. Baibal nih “A zungzal in i lawm u, a zungzal in thlacam u, zeizong kong ah Pathian sin ah lawmhbia chim u” (1 Thesalon 5:16-18) tiah a ti.
A zungzal in i lawm u. Zeitindah a zungzal in kan i lawmh khawh lai? Zungzal khamhank voi khat ca zalak in a co mi hna cu an sualnak in an luat cang caah a zungzal in an i lawm kho. Jesuh nih Jordan tiva ah an sualnak vialte a tawl dih cang ti hngalhnak nih a khamh hna. Pathian hmai ah toidor tein an um i a vel ruang ah Pathian sinah lawmhbia an chim i a zungzal in an i lawm kho.
“Pathian nih an that lonak a ngaihthiam i an sualnak a khuhpiak mi hna cu an vaa lawm dah!” (Rom 4:7). A sullam cu kan sualnak vialte khuhpiak kan si i kan thinlung sualnak zong khuhpiak kan si tinak a si. Kan thinlung cu thianhpiak kan si. Jesuh nih kan sualnak vialte cu a tawl dih cikcek i voi khat ca zalak in a kan khamh cang.
Biakam Thar ah zungzal khamhnak hi a lang lengmang. Jesuh nih tipilnak a in lio ah, “Atu cu hitihin si ko seh. Pathian nih tuah u a ti mi paoh cu i tuah ko seh” (Matthai 3:15) tiah a ti.
Biakam Hlun ah meheh le tuu nih minung sualnak an cung an chuan hnu ah an kalpi bantuk in, Jesuh nih vawlei sualnak vialte kha Pathian duh ning tein a thianh i a tawl dih ve.
“Pathian nih tuah u a ti mi paoh cu i tuah ko seh” tiah Jesuh nih a ti. Jesuh nih Pathian duh ning tein tipil a innak ah vawlei vialte kha a cung ah a khin dih i cuticun a kan khamh.
Matthai 3:15 ah, Jesuh nih vawlei sualnak vialte a kalpi dih tiah a ti. Pathian dinfelnak cu a tlamtling. Hi zungzal tlanhnak hi lungfian kan i timh ding a si lo. A bia ning tein khamhnak a si tiah kan cohlan awk a si ko. “A sualnak ngaihthiam a si i a palhnak maimilh a si mi cu a lung aa lawm” (Salm 32:1).
Minung thinlung le taksa sualnak vialte tipil petu Johan nih Jordan tiva ah Jesuh tipilnak a pek ah khan tawlpiak dih kan si. Hi a rawk mi vawlei ah kan tuah mi that lonak le sualnak vialte caah Jesuh cu biaceih a si. Kan sualnak vialte a lak dih hnu ah vailam cung ah a thi.
Hi sualnak tlanhnak thawngtha a zum mi paoh cu zungzal ca miding le sualnak ngei lo an
si. Jesuh cu a zungzal in a nun caah amah a zum mi paoh cu miding an si peng.
Atu cu Bawipa hmai ah zeihmanh thinphannak um lo tein kan dir kho i, “Bawipa, na dam maw? Na fapa ngeihchun Jesuh ka zumh. Na fa ah na ka cohlan caah kai lawm. Mah hihi ka tuahsernak ruang ah si loin Jesuh nih Thlarau le ti in a kan khamhnak thawngtha ruang ah a si. Hi vawlei sualnak vialte in na ka khamh. “Pathian nih tuah u a timi paoh cu tuah si ko seh” (Matthai 3:15) na ti mi hi ka zumh. Jesuh tipil innak le a vailamtah thawng in na fa ka si. Hi ruang ah na cung ah kai lawm” tiah kan ti khawh.
Jesuh cung ah na sualnak vialte na khing cang maw? Jesuh nih na sualnak vialte a la dih cang maw? Baibal nih Jesuh tipil innak le a vailamtah ruang ah Bawipa cu lawm u, zeicahtiah amah zumhnak thawng in misual cu thianter a si tiah a ti.

JESUH TIPIL INNAK LE TLANHNAK AN I PEHTLAIHNAK

Jesuh tipil innak le tlanhnak zeitindah ai pehtlaih?
Jesuh tipil innak cu khamhnak hmanthlak, Biakam Hlun kutcung chuannak nih a rak langhter chung mi a si.

Jesuh a zumh hnu ah misual bantuk a um peng i Pathian sin ah “Bawipa, kan hnuzarh sualnak ka tuah mi ruang ah ka ngaithiam ko. A luancia nithum ah ka tuah mi sualnak kha ka ngaithiam ko. Bawipa, tuni ka sualnak zong ka ngaithiam ko. Jesuh cu ka zumh” tiah a thlacam mi kong hei ruat hmanh.
Nitinte a sualnak kha a thlacamnak ruang ah ngaihthiam a si tiah hei ti ko u sih. Cu hnu ah nitinte sualnak a tuah than hnga. Cutikah misual a si than ko lai.
Jesuh cu Pathian tuufa, vawlei sualnak vialte a kalpitu a si bantuk in tipil a innak le vailamcung a thihnak in misual mi vialte a kan tlanh. Khamhnak ding caah, misual mi nih a tanglei bantuk in a zumh a herh.
Jesuh nih Pathian duh ning bantuk tein Jordan tiva tipi a innak in vawlei sualnak vialte ka a lak dih. Vawlei sualnak vialte cu tawl dih a si. Hi biatak a zum mi paoh cu khamh an si. Matthai 3:13-17 ah ai tial bantuk in, Jesuh cu tipil petu Johan nih tipilnak a pek i zumtu vialte khamhtu a si.
Thawngtha biatak nih cun Jesuh nih vawlei sualnak vialte kha voi khat ca zalak in a lak dih tiah a kan chimh. Asinain zumhnak dik lo nih cun nitinte khamh kan si tiah an ti. Zei hi dah kan zumh lai? Voi khat ca zalak in khamh kan si maw kan zumh lai asiloah nitinte khamh kan si ti hi dah?
A fiang mi cu Jesuh nih voi khat ca zalak in a kan khamh ti hi a si. Thlarau le ti thawngtha nih voi khat ca zalak in a kan kham ti zumh hi a dik mi zumhnak a si. Nitinte khamh kan si ti a zum mi hna cu zeitik hmanh ah khamh an si lo.
A dik mi tlanhnak cu Jesuh tipil innak le vailam cung a thihnak nih a chuahpi ti hi kan hngalh ding a si. Kan tuah ding mi Pathian sin ah lawmhbia chim law a dik mi thawngtha hi zum ko.
Asinain zumhnak kal sual pawl nih cun Adam sualnak lawng in khamh kan si i nitinte kan sualnak in khamh kan hau rih, cu hnu lawng ah “duhsah tein” miding kan si lai tiah an ti. Cucu a dik lo mi a si.
Jesuh tipil innak le vailamcung thihnak nih voikhat ca za lak in khamhnak kha a tlamtlinh. Hihi biatak a si. Kanmah khamhnak ding caah kan sualnak cu Johan nih Jesuh cung ah tipil innak in a khin i vailam cung ah a thi.
Sualnak kan tuah hnu ah “ka ngaithiam ko” ti chim cu Pathian duhnak he ai kalh mi a si. Pathian nawlbia nih cun sual man cu thihnak a si tiah a ti. Pathian cu a ding mi le a thiang mi a si ti hi kan hngalh ding a si.
Pathian sin ah thla a cam i, “ka palh tuk, ka ngaithiam” tiah sualnak an tuah hnu ah a ti mi cu Pathian duhnak a hngal lo tinak a si. Ngaihthiam halnak ca thla an cam nain cucu anmah diriam men lawng a si. Mi pakhat nih nitinte a sual i a chiathathleidannak diriamnak men ah a sual ai chir peng mi hi a dik maw? Sualnak in tlanh lam pakhat lawng a si mi cu Jesu tipil innak le vailam cung a thisen lawng a si. Cucu kan thinlung in kan zumh ding a si. Hi lam lawng hi Pathian dantatnak in luatnak lam a si.
Sualnak in tlanhnak kong hi ruat deuh hna hmanh u sih. Hebru 9:22 ah, “Nawlbia ning ahcun zei paohpaoh hi thisen in thianh a si i sualnak hi thisen luanh lawnglawng in ngaihthiam a si”tiah a ti.
Pathian dinfelnak ning in cun, sualnak hi thisen luanh a hau i thisen luanh lo cun sual ngaihthiamnak a um lo. Cucu a ding mi Pathian nawlbia a si. Sual man pek lo cun, sual ngaihthiamnak a um lo.
Pathian nawlbia cu a ding. Jesuh cu Johan nih tipilnak apek i misual tlanhnak caah vailam cung ah a thisen a luanter. Kan sualnak vialte cu tipil a innak in a lak dih i sual dantatnak cu vailam cung ah a tuar. Cuticun sual man leiba cu a cham.

Tlanhnak cu voi khat ca ah maw a si nintinte?
Voi khat ca zalak. Jesuh nih tipil a innak in vawlei sualnak vialte a lak dih.

Matthai 3:15 ah Jesuh cu Pathian duh ning tein tipil a ing i cu tipil a innak in vawlei sualnak vialte kha a lak dih i kanmah tlanhnak caah vailam cung ah thihnak a tuar.
Nitinte sual ngaihthiam hal thlacam cu Jesuh kha vawlei sualnak vialt kan lakpiak rih law vailam cung ah kan thihpiak rih ko ti he ai khat. Pathian nawlbia dik hi kan hngalhfian a herh. Kan sualnak in tlanhnak ding ah Jesuh hi atu le tu thih a herh ti lo.
Jesuh zumh hnu nitinte sualnak kong ah ngaihthiam hal thlacam peng hi Pathian nih zei ah an ka rel lo tiah a ruah. “Hihi hrurh le zeirel lo a si! Ka Fapa Jesuh cu tipil ing than ding le vailam cung thi than ding ah an hal! Jesuh tlanhnak cu an zumh nain anmah le mah misual ka si tiah an i ti peng! A ding mi ka nawlbia in bia ka ceih hna lai i an dihlak in hell mei alh ah ka thlak hna lai. Na ngeihchun na fapa kha voi hnih thah na siang hnga maw? Na sualnak ruang ah ka Fapa thah na ka fial than. Vawlei sualnak vialte chung in khamh ding ah ka Fapa ka thah diam cang. Cucaah nitinte na sualnak ngaihthiam halnak in ka thinhunnak thawhter tim hlah. Thlarau le ti khamhnak thawngtha kha zum ko” tiah Pathian nih a ti.
Misual ka si tiah ai ruat peng mi hna kha a dik mi thawngtha bia chimnak Khrihfabu ah hruai hna law, an zumhnak dik lo an hlawt hnu ah zumhnak dik he khamhnak co ve hna seh.
Atu cu na thinlung in na zumh i khamhnak na co caan a si ve cang. Na zum maw?

BIATAK SI LOIN TUAHSERNAK ZUMH RUANG AH A CHUAK MI THEIPAR

Zeiruang ah dah Khrihfa tampi zumhnaktlak tein an nun khawh lo?
An tuahsernak an i bochan caah.

Jesuh a zum mi misual, khamhnak a co tung lo mi hmanh khi kum 3-5 kar hrawng cu an ceu kho ve ko. A hramthawk ahcun an i biatak ngaingai, asinain caan sin ah an zumhnak a lotlau ve. Na tuahsernak in Jesuh na zumh ahcun naa biatak cu a rauh hlan ah a tlau ko lai.
Mitcaw mi nih khua an hmuh lo caah midang bochan in hngalhnak kha an kawl. An mitthli a tlak tikah cucu sualnak ngaihthiamnak hmelchunhnak ah an ruah. A dik mi sual ngaihthiamnak cu cubantuk a si lo.
Thlarau lei mitcaw hna zong nih Pathian an rak duhnak kha revival meeting i teltum nakin kawl than an timhnak nain an hmu kho ti lo. Cubantuk lam in sual ngaihthiamnak zong co khawh a si lo. A hramthawk tein dik tein rak zum hna sehlaw, ni le caan a rauh bantuk in sual ngaihthiamnak le Pathian vel cu an cung ah fak piin a tlang ko hnga.
Asinain a dik lo mi sual ngaihthiamnak cu a hramthawk lawng a ceu i a hnu ahcun a tlau than. Thlarau lei mitcaw hna cu a hramthawk tein thawngtha biatak kha an rak ngaih bal lo caah caan a rau i an duhnak kha a tlau than tawn.
Chungthulengnal Farasi le phungbia cawnpiaktu hna nih an zaktang ah Baibal an i ceh, Bawipa Thlacamnak le Lamkaltu hna cawnpiaknak kha zoh loin an thiam i thla an cam peng. Biakinn ah thangthat le cawithlir an tong i an lung a tho ngaingai. Asinain an sualnak cu ai khong i a donghnak ah Pathian nih a hlawt hna. A lenglei cun biaknak nih vaara ngai in a tuam hna nain an chunglei cu sualnak in a thu. Hihi biatak ah siloin tuahsernak ah a hrambunh mi zumhnak theipar a si.

ZUMHNAK IN MIDING KAN SI

Vawlei sualnak vialte tlanhnak rian hi a tlamtling cang maw?
Tling cang. Jesuh tipil innak le vailam cung a thihnak ah a tling cang.

Atu cu Hebru 10:16-18 tiang rel hna u sih, “Hmailei caan ah annih he ka tuah lai mi biakamnak cu hihi a si; An lung chungah ka nawlbia kha ka chiah hna lai i an ruahnak chung ah ka tial hna lai,” a ti. Cun aa thawhthan i, “An sualnak le an that lonak kha kaa cinken ti lai lo,” a ti fawn. Cucaah annih cu ngaihthiam an si hnu ahcun an sualnak thianhnak ding ca i raithawinak kha a herh ti lo” tiah a ti.
Atu ahcun Jesuh tipil innak ti le vailam cung a thisen nih a kan tlanh cang caah kan sualnak ca ngaihthiam hal a herh ti lo. Mah hihi na theih ka ahcun na khuaruah zong a har men lai, asinain Baibal cawnpiaknak he a kalti mi a si. Mah hihi minung bia an si maw? Baibal hi zeizong vialte tahnak fung a si.
“An lung chungah ka nawlbia kha ka chiah hna lai i an ruahnak chung ah ka tial hna lai” (Hebru 10:16). Tlanh na si hnu ah zeitindah na khuaruahnak a um? Na thinlung cu sualnak in a luat maw, a nuam deuh ko maw. Miding fel na si cang i ceunak ah na nung kho cang.
Cun Bawipa nih Hebru 10:17 ah, “An sualnak le an that lonak kha kaa cinken ti lai lo,” tiah a ti. Tlanh mi sualnak le nawlbuarnak cu kaa cinken ti lai lo tiah a ti. Zeiruang ah? Jesuh nih Pathian duhnak tein tipilnak a in caah. Sualnak vialte a cung a khin dih hnu ah, amah a zum mi vialte aiawh ah biaceihnak a tuar.
Atu ahcun kan sualnak vialte caah man a pek cang caah kan sualnak ruang ah phuhrun ding a um ti lo. Kan sualnak ruang ah kanmah thih a herh ti lo zeicahtiah Jesuh nih tipil innak le vailamcung a thisen in a kan khamh cang.
HEbru 10:18 ah, “Cucaah annih cu ngaihthiam an si hnu ahcun an sualnak thianhnak ding ca i raithawinak kha a herh ti lo” tiah a ti. A sullam cu vawlei sualnak vialte a hnawh dih cang tinak a si. Cun Jesuh a zum cang mi hna caah cun sual thawinak a herh ti lonak zong a si fawn.
“Aw, Pathian, ka ngaithiam. Jesuh ka zumh buin sualnak ah ka um peng mi hi tlanh ka si rih lo caah a si. Khrihfa cu ka si ko nain ka ruahnak cu sualnak in a khat.” Hibantuk in thlacam a herh ti lo.
Misual mi hna nih sualnak a si ti hngalh lo buin sualnak an tuah. Sualnak a si ti an hngal lo zeicatiah Pathian nawlbia tak kha an hngal lo. An chiatha thleidannak lawng sualnak tuah ding a si lo ti kha an hngalh i, Pathian hmai ah zeidah sualnak a si ti kha an hngal lo. Pathian nih Jesuh zumh lo cu sual a si tiah a kan chimh.
Johan 16:9 ah Pathian hmai ah sualnak cu zeidah a si tiah a kan chimh. “Keimah an ka zumh lo caah sualnak kong ah hin an palh” tiah a ti. Johan 16:10 ah zeidah dinfelnak cu a si tiah a chim. “Ka pa sin ah ka kal lai i nan ka hmuh ti lai lo caah hin, zeidah a ding mi a si ti kong ah an palh” tiah a ti. Phun dang in cun, Jesuh nih hi vawlei sualnak in a kan tlanh cang caah a voi hnihnak tipil in le vailam cung thih a hau ti lo.
A tlanhnak a zum mi paoh cu a thianter hna i miding ah a ser hna. Hi vawlei tlanhnak rian cu tipil a innak le vailam cung a thisen in a tlinter. Misual mi hna tlanhnak ah lam dang a um ti lo.
“Zeicahtiah vawlei cung dihlak ah hin a kan khamh khotu ding min dang zeihmanh a um lo” (Lamkaltu 4:12) tiah a ti. Jesuh cu hi vawlei ah a ra i Johan nih tipilnak apek hnu ah misual mi tlanh ding ah vailam cung ah a thi. Na thinlung in zum law khamh na si lai. Jesuh Thlarau le ti in an thianter cang.
Jesuh nih Thalrau le ti in kan taksa sualnak vialte a tawl dih cang. Zumhnak in khamh kan si. Hi biatak kan zumh ahcuh, Jesuh khamhnak thawngtha kan zumh ahcun, voi khat ca zalak in miding kan si. Jesuh tipil innak le vailam cung a thihnak nih biatak an ser chuah.

MISUAL HNA NIH DORNAK AH AN HMANG MI BAIBAL CAANG

Sualphuannak nih a kan khamh taktak ko maw asiloah khamh kan si cang dah?
Pathian nih voi khat ca za lak in a kan khamh cang.

1 Johan 1:9 ah, “Sihmanhsehlaw Pathian sin ah kan sual kan phuan hna ahcun, a ding mi le zumhawktlak mi a si caah, a biakam kha let loin kan sualnak kha a kan ngaihthiam lai i kan palhnak vialte kha a kan thianhpiak dih lai” tiah a ti.
Ngaihthiamnak caah sualphuan lawng herh sehlaw a tha tuk hnga. Hi ruahnak he Baibal thiamsang cheu khat nih zumhnak hrampi an chuahpi. Mi pakhat nih sualnak a tuah fatinte ngaihthiam hal in thla a cam ahcun a sualnak ngaihthiam a si lai. Cucu na siarem ko maw? Asinain Jesuh nih Pathian sin ah sual ngaihthiam nan hal ahcun nan sualnak ngaihthiam nan si lai tiah a ti bal lo.
Sualphuannak ruang ah sual ngaihthiam ka si taktak maw asiloah ngaihthiam kan si cang dah? Hi cawnpiaknak a zum mi paoh nih sualnak an tuah fate ngaihthiamhal in thla an cam nain an thinlung ah sualnak a tang peng, zeicahtiah tlanhnak biatak an hngalh lo caah a si. Jesuh a zum cang mi hna nih sualnak an tuah fate sualngaihthiam an hal tikah ngaihthiam an si ti cu sullam ngei lo a si.
Hi ruang ah Pathian bia kha tein kan ngaih i zeibantuk in cawnpiak kan si ko hmanh ah biatak le a deu kha kan thleidan thiam a hau.
Misual mi hna nih 1 Johan 1:9 hi a lak an i palh. Hi caangn nih nitinte sual ngaihthiamnak kong a chim rua tiah an ruah. Tha tein rel than hna u sih, “Sihmanhsehlaw Pathian sin ah kan sual kan phuan hna ahcun, a ding mi le zumhawktlak mi a si caah, a biakam kha let loin kan sualnak kha a kan ngaihthiam lai i kan palhnak vialte kha a kan thianhpiak dih lai” tiah a ti. Adam sualnak lawng in khamh kan si i nitinte kan sualnak cu sualchir thlacamnak le ngaihthiamhalnak in khamh kan si tiah maw na ruah? Hihi cu a dik lo mi ruahnak le zumhnak minung taksa duhnak in a rak chuak mi a si.
Hi cawnpiaknak a dik lo ti cu Jesuh tipil innak le thisen kan zumh tikah kan hngalhfian. A luancia kum tampi ah khan Jesuh tipil innak le vailam cung a thisen nih vawlei sualnak vialte a rak tawl dih cang.
Thlarau cawnpiak ning in zumh le a dik lo mi ruahnak zumh cu ai dang tuk mi a si. Anmah ruahnak a zum mi hna nih cun nitinte sualnak ca ngaihthiam hal thlacamnak a herh peng tiah an ruah i Jesuh tipil innak le vailam cung a thisen a zum mi hna nih cun an sualnak vialte kha tawlpiak dih kan si cang tiah an zumh.
Nitinte sualnak ca ngaihthiam hal thlacamnak kan ngeih peng ding a si tiah a zum mi han nih cun Jesuh tipil innak le vailam cung thisen zumh lonak sualnak ah an tlu.
Jesuh tipil innak le vailam cung thisen nih na sualnak vialte voi khat ca za lak in an tawlpiak cang maw? Tlanh a si rih lo mi nih cun an sualnak kha nitinte phuannak thawngin khamhnak hmuh an i tim. Hi nih hmailei ah zeibantuk sualnak dah an tuah te lai i zeitindah ngaihthiamhalnak an tuah te lai ti mi kong ah buainak a chuahpi.
Hmailei an tuah rih lo mi sualnak zong an phuan lai i ngaihthiam an hal chung men lai. Cuti tuahnak in Jesuh an zumh lonak kha an langhter. Hibantuk minung hna cu tlanhnak kong thawngtha ah a mit a caw mi an si. Jesuh nih tipil a innak le vailam cung a thisen luanternak in dantatnak vialte a tuar dih cang i a kan khamh cang.
Hmailei na sual te lai mi ca zong ah ngaihthiamnak hal a hau tiah na ruah ahcun Thlarau le ti khamhnak thawngtha a hngal lo mi zumlotu he nan i dannak a um lo tinak a si. Misual mi hna nih sualphuannak in khamhnak an co kho lo.
Cucaah, hmaan tein, “khamhnak a co rih lo mi misual ka si” tiah na phuan i Jesuh tipil innak le vailam cung a thisen na zumh ahcun Pathian nih na sualnak vialte chug in an khamh lai.
Asinain khamhnak thawngtha na zumh lo i nitinte sualchir thlacamnak lawng nai bochan ahcun Jesuh Khrih hi vawlei ah biaceihtu in a rat tikah biaceihnak fak na tuar te lai.
Thlarau le ti khamhnak thawngtha a zum lo mi paoh cu biaceih an si lai. An sualphuannak phen ah an i thuh ahcun, biaceihnak an tuar lai. Cucaah biaceihnak ni hngak hlah. Atu bak ah Thlarau le ti khamhnak thawngtha kha zum ve cang.

A DIK MI PHUANNAK LE ZUMHNAK

Misual mi hna caah a dik mi phuannak cu zeidah a si?
A dik mi thawngtha a zumh lo ahcun sualnak a ngeih peng caah hell ka lai ti phuan

Pathian nih voi khat ca zalak in a kan khamh. Chim ka duh mi langhternak caah hika ah tahchunhnak tha a um. Chak Korea mingiatu kha Thlang Korea ah a ra tiah hei ruat u sih. Zeitluk in dah kan thancho ti kha an rak hlen i a hmuh, cucaah a sung pek a timh.
Cutikah a nai bik mi Palik sakhan ah a kal i hitihin sualphuannak a tuah, “Keimah cu Chak Korea in mingiatu ka si,” asiloah, “Thlang Korea ah cubantuk khabantuk minung thah ding ka ra i hi vialte hi ka tuah cang, asinain cu a sung ka pek cang. Mingiatu ka si ti lo” tiah a ti.
Cucu a dik mi phuannak a si maw? Sualphuan a duh taktak a si ahcun, “keimah cu mingiatu ka si” ti sehlaw cunih zeizong te a huap dih ko: misual a si i biaceih a hau ti zong a langhter ko. Hibantuk in fawite in suaphuannak a tuah mi cung ah le zeibantuk riantuan dah an fial ti zoh loin ngaihthiam a si ko lai.
Cubantuk in misual mi hna Pathian hmai ah, “keimah cu khamhnak a co rih lo mi misual ka si. Hell kal ding le biaceih ding ka si. Ka khamh ko sawh” a ti i Jesuh a zumh ahcun khamh a si ko lai. Jesuh cu tipilnak pek a si i kan caah a thisen a luanter, cucaah kan tuah ding a tang mi cu a kan khamhnak zumhnak i khamhnak co kha a si.
Biathlam 2:17 ah, “Cun lungrang zong pakhat cio ka pek hna lai i cu lung cung ahcun a cotu cio lawng nih a sullam an hngalh mi min thar kha an i tial cio,” tiah a ti. Baibal nih a dik mi thawngtha a zum mi lawng nih Jesuh an hngalh tiah a ti. Voi khat ca za lak in khamhnak a co mi lawng nih miding sinak biathli an hngalh.
A hngal lo mi cu nitinte sualchir thlacamnak an tuah ko zong ah misualfa an si peng ko lai. Sual phuan ti cu nitinte sualchir thlacam tinak a si lo. Mi pakhat cu kum hra chung zong Khrihfa a si cang ko lai nain, nitinte sualchir thlacamnak a tuah peng ahcun misualfa a si peng ko lai. Pathian fa a si rih lo tinak a si.
Khamh an sinak ding ah an sualnak an phuan i Jesuh tlanhnak an zumh a herh. Cucu a dikmi zumhnak a si.

SUALNAK LANGHTER THLUAHMAH KHA 1 JOHAN 1:9 A KAN CAWNPIAK MI SUALPHUANNAK A SI LO

Khamhnak ding ca’h nitinte sualphuannak tuah a herh maw asiloah voi khat lawng phuan dah?
Voi khat lawng phuan

Mifir le lainawng nih an tuahsernak phuang in khamhnak an co kho maw? Misual mi nih sual phuannak in khamhnak an co kho lo. Jesuh Khrih chung ah Thlarau le ti khamhnak thawngtha hmang lawng in khamhnak co khawh a si.
Cheu khat kalsual Khrihfa hna nih hitihin suaphuannak an tuah tawn. “Pathian, nihin ah mi pakhat he kan i si. Sualnak ka tuah. Mi ka hlen. Mi thil ka fir” tiah an ti.
Cuti an chim peng ko ahcun Pathian nih, “dai cang, misualfa! Zeidah na duh?” tiah a ti te hna lai.
“Ka bia hi ka ngaihpiak hram ko. Pathain, nan sualnak phuang u tiah na kan ti. Na zaangfahnak kan nawl.”
Hibantuk thlacamnak hi Pathian nih ngaih a duh mi a si lo. Thlarau le ti khamhnak thawngtha in hrinthannak a co mi hna thlacamnak lawng Pathian nih ngaih a duh: an sualnak a phuang i a hrinthan taktak mi thlacamnak lawng a ngaih duh.
Augustine nih a nu hnuk a dinnak kai chir tiah a ti. Cubantuk chirnak nih vancung pennak chung ah a ka hruai lai tiah a ruah. Cubantuk cu nihchuak men a si. Sualnak pakhat phuan men in zeihmanh a thahnem lo.
Pathian nih, “dai tein um tuah law na sual ahcun ka chim tuah. Na sual ahcun, cu kong chim cu dai. Atu tiang na zumhnak nai palh peng caah biatak a chimnak biakinn ah va kal. Tlanhnak thawngtha kha a sining tein zum law khamhnak co tuah. Cuti a si lo ahcun, ka ra lai i bia kan ceih lai.”
Sualchir thlacamnak le khamhnak ding ah a dangdang tuah te pawl hi kalsual le zumhnak dik lo a si.
1 Johan 1:9 ah ai tial mi cu kan sualnak hna kan phuan tik ah, ti le thisen thawngtha nih kan sualnak in a kan khamh lai.

“KA SIN IN KAL KO U”

Phung ngei lo tuahsernak cu zeidah a si?
Thinlung chung sualnak he Jesuh zumh a si.

Khrihfa misual nih zumhnak dik lo le tuahsernak Jesuh hmai ah an ngeih. “Cu ni cu phak tikah, mi tampi nih keimah cu, ‘Bawipa, Bawpa! Na min in Pathian bia kha kan chim i, na min in khuachia kha tampi kan thawl hna i khuaruahharnak tampi kan tuah hna an ti lai. Khitik ah annih cu ka thawh hna lai i , ‘Nannih cu aho nan si kan hngal bal hna lo. Kal ko u, that lonak a tuahtu hna,” tiah ka ti hna lai” (Matthai 7:22-23) tiah a ti.
Mi pakhat nih biatak lo a zumh tik i Pathian hmai ah dir in, “Bawipa, zeidah na lawh? Na kong ka ruah ahhin nai dawh tuk lai tiah ka ruah, asinain cu ka ruahnak hmanh in in nai dawh deuh. Bawipa, kai lawm. Na ka khamh. Ka thinlung ah ka sual ko nain misual lo bantuk in na ka zoh tiah ka zumh. Vancung ah kan lak lai tiah bia na ka kamh caah na sin ah atu ka ra. Pangpar hna an parnak dum ah ka kal lai. Mangtha law, khika ah kan i tong te lai” tiah a ti.
Pangpar dum lei ah a kal i Jesuh nih a rak donh. “Hngak rih! Na thinlung ah sualnak a um maw um lo kan zoh tuah lai. Misualfa na si maw?”
“Aw, ka sual ko. Asinain nangmah cu kan zumh ko a si lo maw?”
“Na ka zumh hnu ah sualnak na ngei maw?”
“Aw, ka ngei ko.”
“Zeitin e? Ka sual e? Nunnak cauk kha ka pe tuah u. Cun tuahsernak cauk zong kha rak pu u. A min kha zoh u. Khuazei cauk ah dah a min ai tial.”
A min cu tuahsernak cauk ah ai tial.
“Atu cu, vawlei ah na tuah mi sualnak kha phuang tuah.”
Asinain mipa nih cun a kaa phih a timh nain Pathian nih hramhram in a onter i a sualnak a phuanter.
“Aw si, cubantuk khabantuk sualnak ka tuah…”
A buai dih i a kaa a phit kho ti lo.
“Aw, a za cang, hell kal ding tlak a si. Hell kal ding ah a za tuk hringhran. Mei alh lak ah khan hlonh tuah u.”
Pangpar dum ah kal loin mei alh in a khahnak ah an hlonh diam. Hell mei alh lakah a hacang ai rial len ko.
“Nangmah cu kan zumh, na min in bia ka phuan, na min in thawngtha ka chim, na riantuannak caah ka inn ka zuar, ngaktah ka bawmh hna, na min in harnak tampi ka tuar, zingka ah thla ka cam le mizaw ka zohkhenh hna….van kai ding tlak ka si ko.”
A hacang fak piin a rial i taklawng in a um. Hell a phak tikah, Jesuh tlanhnak thawngtha a hngal lo mi Khrihfa tampi a hmuh hna. Tlanhnak thawngtha a hngalfiang lo mi pawl kha a hlawt hna.

ZUMTU DEU PAWL SUALNAK CU TUAHSERNAK CAUK AH KHUMH A SI

Misual mi hna sualnak cu khuazei ah dah khumh a si?
An thinlung chung le tuahsernak cauk ah

Jesuh kan zumh zong zumh lo zong ah thinlung ah sualnak a ngei mi cu Pathian nih a hrawh hna. Mi pakhat thinlung ah sualnak hmete zong a hmuh dih i Biaceihnak Ni ah Pathian nih sual a phawt lai. Misual mi hna nih khamh an duh ahcun Pathian hmai ah khamh ka si rih lo tiah sualphuannak tuah hna seh ti a duh.
Misual mi hna sualnak cu an thinlung chung ah khumh a si. Thlarau le ti in hrinthannak a co mi hna nih an sualnak an hngalh peng ko men lai, asinain an thinlung in cun hnawhpiak an si cang. Miding fel an si.
Asinain hrinthannak a co lo mi nih cun an thinlung chung ah sualnak an ngeih. Cucaah Pathian hmai ah misual an si. Thlacam ding in an khuk an i bil tikah, an sualnak nih Pathian he a then hna i an thlacamnak a ngaihpiak hna lo. Cu ca kha ca ah tiah thla an cam nain an sualnak cu a tang peng. A luancia kum hra, kum hlei khat, kum kul i an sualnak caah sualchirnak thlacamnak an tuah peng.
An thlacamnak ah sual ngaihchihnak tuah peng a hau peng maw? Zeiruang ah cucu an tuah? Tuah cu an duh lo nain thlacam an vun thawk tikah, Pathian hmai ah phuhrunnak an ngei. Cucaah thla an cam hlan ah Pathian sin ah ngaihthiamnak hal ta a hau tiah an ti.
Pathian nih an sualnak cu thir cafung in an thinlung chung ah a tial i zeitik hmanh ah hnawh khawh a si ti lo. Cutikah Pathian hmai thlacam an i thawh tikah sual ngaihthiamnak caah thla an cam peng. Cucaah Jesuh khamhnak thawngtha biatak cheu chum lawng a zum mi hna cu an nun si a vang i hell ah an dong te lai.
Jeremiah 17:1 ah, “Judah sualnak cu thir cafung in tial a si, an lungthin lungtlap cung ah cun daimon zum in khenh a si i an biaktheng ki hna ah cun anmah sualnak phawtu ding ah suai an si” tiah a ti.
Judah cu Israel mi chung ah bawi phun min a ngei mi a si. Baibal nih Judah cu minung vialte aiawh tu bantuk in a chim caah Judah cu mi vialte aiawhtu tiah ti khawh a si.
Judah sualnak cu thir cafung in tial a si i daimon zum in khenh chih a si. Daimon cu vawlei cung ah a fek bik mi thir phun khat a si. Thir cafung le daimon zun in kan sualnak cu tial le khenh chih a si.
Voi khat tial a si hnu ahcun hnawh khawh a si ti lo. Thlarau le ti thawngtha kan zumh lo ahcun hnawh khawh a si ti lo.
An thinlung sualnak um bu cun zeitluk in zumhnak tlaihtleng le theology thiam i Khrihfabu ah i pek ko zong ah saitlai lo a si.
Jesuh tipil innak tel lo cun an sualnak hnawhpiak khawh a si ti lo bantuk in, misual mi hna nih “Bawipa, misual ka si,” tiah thla an cam fate an chim peng. Khrihfabu ah rian lianpi an tuan, Pathian he fellowship ngeih peng an i tim i theology le zumhnak tlaihtleng fek tein an i tlaih ko nain an thinlung ah sualnak an ngei peng.
Cu tikah tlang cung ah an kai i holh theih loin thla an cam, chunmang le zanmang an phuan nain cu vialte cu pakpalawng a si. An thinlung ah sualnak a tan peng ahcun zeitik hmanh hnangam daihnak na hmuh lai lo.
Kan sualnak cu Jeremiah 17:1 ah tial bantuk in, biaktheng ki ah khenh chih a si. Vancung ahcun, Nunak Cauk le Tuahsernak Cauk an um. Misual mi hna sualnak cu Tuahsernak Cauk ah khumh an si caah minung nih an sualnak in an luat kho lo. Pathian nih an sualnak cu Tuahsernak Cauk le an chiatha thleidannak ah a khumh i cucu a Nawlbia in a kan hmuhsak.
Cu sualnak khumh mi vialte cu Jesuh tipl innak le vailam cung a thisen zumhnak in hnawh i khamhnak co khawh a si. Cu hnu lawng ah zungzal nunnak kan ngei lai i kan min cu Nunnak Cauk ah tial a si lai.

NA MIN CU NUNNAK CAUK AH A UM MAW?

Aho min dah nunnak cauk ah khumh a si?
An thinlung ah sualnak a ngei lo mi hna min cu khumh a si.

An min Nunnak Cauk chung ah ai tial ding hi a biapi tuk mi a si. Na min tial a si lo ahcun, Jesuh zumh cu zeidah santlaihnak a ngei? Khamhnak dik conak ding ah Thlarau le ti hrinthannak thawngtha na zumh ah a herh.
Jesuh cu hi vawlei ah a ra i kum 30 a si ah tipilnak a i vawlei sualnak a lak dih hnu ah kan caah vailam cung ah a thi. Matthai 3:15 ah kan hmuh bantuk in, Jesuh cu “Pathain duhnak in” in tipilnak a in i vailam cung ah thah a si. Nunnak Cauk chung ah min tialnak ding ahcun hi biatak hi kan zumh a herh.
Minung an thih i Pathian hmai ah an dir tikah, Pathian nih, “a min kha Nunnak Cauk a um maw um lo zoh tuah u” tiah a ti hna.
“Aw, a um ko Bawipa”
“Aw si, vawlei ah keimah caah harnat na tuar i na mitthli a tla, atu cu na tuarnak vialte kan lakpiak cang i na tuar a herh ti lo.”
Pathian nih dinfelnak suiluchin kha laksawng ah pek.
“Bawipa, na cung ah kai lawm zungzal.”
“vancung mi hna, hi pa cung ah hin luchin kha chinh tuah u.”
“Bawipa, na ka khamh mi hi kawi lawm tuk cang. Suiluchin cu a tam tuk lo maw ka caah. Kai lawm. Na ka khamh caah kai lawm tuk. Na hmaika um khawhnak ka hmuh mi kai lawm tuk cang.”
“Vancung mi hna, ka fa pa, 10,000nak hi nan keng in pua tuah u.”
Vancung mi nih cun, “Aw si, saya” tiah a leh.
“Ke keng cung ah kai tuah.”
“Aw, tha a dam tuk hringhran. Kan puan ning a dik maw? Kal tuah u sih.”
Vancung mi cu duhsah tein ai thawn.
“Wow, hi hmun cu ai dawh tuk hringhran. Hi hmun hi zeitluk in dah a ngan?”
“Kum tampi chung hmun tampi ah ka kal cang nain zeitik hmanh ah a donghnak ka phan bal lo.”
“Cucu a dik maw? Ka rit tuk cang rua. Rak ka thum cang ko.”
“Hika ahcun kan tha a dih ti a um lo.”
“Kai lawm, asinain Vancung Pennak chung ah hin ka ke in dir ve ka duh. Khuazei ah dah ka hlan ah a phan mi miding pawl kha an um dih?”
“Khika khin an um ko.”
“Va kal tuah u sih.”
Halleluijah! Pakhat le pakhat an i kup i an nih buin nuam tein khua an sa hna.
Atu cu Jesuh a zum ve tung i a thinlung ah sualnak a ngei mi kha a thi ve i Pathian hmai ah a dir ve. Jesuh cu ka zumh nain misual ka si tiah a phuan.
Pathian nih, “Nunnak cauk a min a um maw zoh tuah?” tiah a ti hna.
“Bawipa, a min a um lo.”
“Tuahsernak Cauk chung ah teh zoh tuah u.”
“A min le a sualnak cu an um ko.”
“Cuti si ahcun zeitik hmanh datsi kong ah phan a umti lonak ding hmun mei alh ah khan hlonh ulaw cuka cun a zungzal in um cang seh.”
“Oh, Bawipa, cucu a dik lo tuk lo maw…”
A dik lo tiah a ti. Jesuh fak piin a zumh ko bu ah zeiruang ah dah hell ah thlak a si?
A ruang cu Satan nih a hlen i thawngtha biatak cheu chum lawng a zumh caah a si. Jesuh khamhnak thawngtha kan hngalhfian lo ahcun hell ah kan tla ve ko lai.
Hi mipa nih Jesuh cu a zumh nain Satan nih a hlen caah misual ah ai ruat peng. Thawngtha biatak rak hngal sehlaw, a zumhnak dik lo kha a hngalhfian ko hnga. Asinain amah duhnak papek tuk ruangah zumhnak dik lo a ngei i thawngtha biatak a hngal kho lo.
Vancung Pennak chung ah luh na duh ahcun, Thlarau le ti hrinthannak thawngtha na zumh a herh. Matthai 3:15 ah ai tial bantuk in, Jesuh nih “Pathian duhnak in” vawlei sualnak vialte cu tipil innak in a cung ah akhin dih i vailam cung ah a thisen a luanter. Hi thisen le ti khamhnak thawngtha hi na zumh a hau.

Aho min dah tuahsernak Cauk tial a si?
A thinlung ah sualnak a ngei mi pawl min

Mitha bantuk in midang hal mi paoh kha zumh na timh peng ahcun, hell ah na tla ko lai. Hell ah mitha tampi an um, asinain Vancung ahcun, an zumhnak fek tein a dirpi i zumhnak ral a dotu mi lawng an um.
Vancung i a kai mi vialte cu mi sual ka si tiah a hngal i an sualnak phuan hnu ah Jesuh ni tipil innak vawlei sualnak vailte a kalpi i vailam cung a thisen in kan sual leiba a kan champiak ti a zum mi hna an si.
Vancung ah khin hnakhaw le kaa lawng tampi an um ti a si, zeicahtiah cun an khamhnak kha an hna le an kaa lawng in an zumh caah an takpum dang cu Pathian nih hell mei alh ah athlak hna ti asi.
Jesuh a zum i a thinlung ah sualnak a ngei mi nih Pathian hmai ah, “Bawipa, ka thinlung ah sualnak ka ngeih peng bu ah Jesuh ka zumh caah midang nih midingfel an ka ti. Nangmah zong nih sualnak ngei lo bantuk in na ka zoh lai tiah ka zumh. Cucu ka hngalh mi le ka zumh mi a si. Minung tampi nih an zumh bantuk in ka zumh ve. Hihi kan umnak hmun ah a tam bik mi zumhnak a si” tiah a ti.
Bawipa nih, “an thinlung ah sualnak a ngei mi cu ka ngaithiam kho hna lo. Vawlei sualnak vialte kha Thlarau le ti hrinthannak thawngtha in ka tawl dih cang. Asinain na zum duh lo. Vancung mi, hi pa hi hell mei alh hlonh u” tiah a leh.
Jesuh a zum i misual ka si tiah ai ruat peng mi cu hell ah an dong te lai. A dik mi khamhnak thawngtha kha ngai law na sualnak in khamh na si lai. Cu lo ahcun hell ah khangh na si lai.
Na thinlung ah sualnak ngeih ko buin misual ka si lo na ti ahcun Pathian na hlen a si. Misual le miding zeitluk in dah an i dan ti kha a donghnak a lang. Khamh na hau kan tinak a ruang zong na hngalh te lai.
Vancung le hell mei kalnak lam karlak na dir tikah khamhnak tlamtling a zum mi (Jesuh tipil innak le vailam cung a thisen) le a zum lo mi an i dannak na hmuh te lai. Dannak nganpi a um te lai. Mi cheu khat cu vancung pennak chung ah an lut lai i a cheu khat cu hell ah an kal lai.
Jesuh zumh buin misual fa dirhmun in na um peng maw? Thlarau le ti in hrinthannak co a herh ti kha an hngalh awk a si. A thinlung ah sualnak a ngei peng mi cu Pathian nih hel ah a thlak hna lai. Sual ngaihthiamnak thawngtha tlamtling a zum mi lawng Vancung Pennak chung ah an lut lai.
A tu ah zum tuah, a caan na hngah ahcun a tlai tuk lai. A hlankan in timhcia tein um. Hell na kal hlan ah, Thlarau le ti khamhnak thawngtha zum law, thianter na si lai.
Kan Bawipa Jesuh nih sunparnak co ko seh! Misual mi hna miding ah a kan ser caah amah cu lawm ko u sih. Halleluijah!

JESUH: MIDING MI CA LAMKALTU

Sualchir thlacamnak nih sualnak a hnawt kho maw?
Hnawt kho lo. Hihi Satan hlennak lam a si.

1 Johan 2:1-2 rel hna u sih, “Ka fale hna, hi ca kan kuat han cu sualnak khan nan tuah nakhnga lo caah a si, sihmanhsehlaw pakhatkhat nih sualnak nan tuah ahcun, a ding mi Jesuh Khrih, Pa sin i bia a kan chimpiaktu, kan ngei ko. Cun kan sualnak ngaihthiam kan sinak cu Khrih thawng cun a si i kanmah sualnak lawng si loin mi vialte zong an sualnak kha ngaihthiam an si lai” tiah a ti.
Hika ai tial mi na hmu kho maw? Jesuh zumh hnu ah a thinlung ah sualnak a ngei peng mi nan um maw? Na thinlung ah sualnak na ngeih buin Pathian ka sual lo na ti ahcun, Pathian na hlen tinak a si. Cun nangmah le mah zong nai hleng ve.
Asinain Jesuh fiang tein na hngalh i Jordan tiva tipil a innak in vawlei sualnak a tawlnak na zumh ahcun sualnak in tlamtling tein na luat ko lai. “Bawipa, nangmah ah Thlarau le ti hrinthannak ka co i kan zumh. Sualnak ka ngei lo. Na hmai ah ningzaknak ngei loin ka dir ngam” tiah na ti khawh.
Cu tikah Bawipa nih, “Aw si, na dik. Abraham nih a ka zumh bantuk le amah le mah miding ah ai ruah bantuk in, nangmah zong na sualnak kan tawlpiak dih cang caah miding an si ve” an ti lai.
Asinain Jesuh zumh hnu zong ah a thinlung ah sualnak a ngei peng mi kong kha ruat hmanh. “Jesuh ka zumh caah ka thinlung ah sualnak tlawmte ka ngeih zong ah vancung ah ka kai ko lai” tiah a ti.
Vancung kai a duh tuk caah biaceihank hmai a dir tiang in Bawipa kha a al peng nain hell ah a kal thiam ko la. Zeiruang ah? Thlarau le ti hrinthanank thawngtha biatak kha a hngalh lo caah.
Mi vialte nih vawlei kan nun chung ah misual ka si tiah phuannak tuah a herh. “Kei cu misual ka si. Hell kal ding ka si. Zaangfahnak in ka khamh ko sawh” tiah kan ti awk a si. Misual mi kha sualchir thlacamnak in khamh a si lo. Cunakin a sualnak aphuan i Thlarau le ti hrinthannak thawngtha kha a zumh awk a si. Thlarau le ti hrinthannak thawngtha zumhnak lawng in miding si khawh a si.
Jesuh ah Adam sualnak lawng ngaihthiam kan si i nitinte sualnak cu sualchir thlacamnak in ngaihthiam hal a hau ti zumh cu a dik lo mi a si. Hi nih hell ah a kan hruai. Hi bantuk zumhnak hi atu chan ah a tam khun i anmah le mah kha hell ah an i thla thluahmah ko.
Thawngtha dik lo na zumh tikah nai hngal kho lai maw? Na leiba vialte na cham hnu ah leiba ngei na si ti maw? Hi kong hi ruat tuah. Jesuh zumh hnu ah misual ka si tiah na ruah peng ahcun, Jesuh ningcang tein na zumh tiah ti khawh a si lai maw? Zumtu maw na si misualfa dah asiloah zumtu le midingfel dah na si?
Na duh nai thim khawh. Ka sualnak vialte ngaihthiam le tawlpiak ka si cang tiah na zumh khawh bantuk in nitinte sualchir thlacamnak in sual ngaihthiamnak tuah a herh ti zong ah na zumh khawh. Nangmah duhthimnak nih hell ah maw na kal lai van ah dah ti kha lai a rel ko. Thawngtha biataka chimphuangtu sin ah na kal a hau.
Zumhnak dik lo a zum mi vialte nih sualchir thlacamnak cu Nithum zan pumh chiarte, Ninga zan zankhuadei thlacam chiarte le thlacam pumhnak kip an an tuah zungzal.
“Bawipa, ka sual cang. Tuzarh ah sualnak ka tuah,” tiah an ti. A luancia kum an sualnak kha an hngalh than i sual ngaihthiam halnak ca thla an cam. Hihi Thlarau le ti hrinthannak thawngtha hnawmhtamh a si.
Kan sualnak cu thisen luanh a hau. Hebru 9:22 ah, “thisen luanh lo cun sual ngaihthiamnak a um lo” tiah a ti. Sualnak ka ngei ko na ti ahcun Jesuh thisen chuahter than na timh tinak a si. Khamhnak tlamtling a zum lo mi paoh nih Jesuh khamhnak kha lih an canter. Jesuh nih voi khat ca zalak in a kan khamh lo tiah lih an chimter.
Jesuh ah khamh conak ding ah cun Thlarau le ti hrinthannak thawngtha zumh a herh. Voi zakhat, voi thong khat le voi ting khat thlacamnak nih na sual an ngaithiam kho maw? A dik mi thawngtha nih cun voi khat za lak in a kan khamh. Miding kan si, Vancung pennak chung ah kan lut i kan nun chung miding ah kan i cang.
“Jesuh ah nunnak thar in ka nung. Thil hlun cu an lo cang i serthar ka si. O, Jesuh cu ka nunnak a si. Jesuh ah nunnak thar in ka nung.”
Jeush ah nunnak thar in na nung. Zeitluk na niam zong ah, na thau zong ah, an der zong ah Thlarau le ti hrinthannak thawngtha na zum ahcun nun nuam tein na nung kho cang. Na hnar a ngan deuh zong ah na niam deuh zong ah zeidah a poinak a um? Kan tlamtlin lo caah Jesuh chung ah Thlarau le ti in hrinthannak kan co. Asinain hlen a si mi vialte cu hell ah an kal lai.
Bawipa, kai lawm. Bawipa sin ah lawmhnak ka chim zungzal. Thlaru le ti hrinthannak thawngtha kan zumh caah vancung ah don kan si te lai.

A DIK LO MI NIH HELL AH A KAN HRUAI

A donghnak ah aho nih dah dinfelnak luchin a co lai?
Lih a tei khotu nih

A dik lo mi cawnpiaknak nih cun nitinte sualchirnak kan ngeih a herh tiah a kan ti i Thlarau le ti hrinthannak thawngtha nih cun sual ngaihthiam kan si diam cang i kan tuah a herh mi cu zumh lawng a si tiah a kan ti ve.
Khuzeidah biatak a si? Nitinte ngaihchih kan herh maw? Asiloah Jesuh nih Pathian duh ning tein tipi a innak in sualnak vialte a tawl dih cang i a kan khamh cang ti dah kan zumh lai? Biatak cu Jesuh nih tipil a innak in vawlei sualnak vialte a tawl dih cang i khamhnak laksawng a kan pek cang ti kha a si.
Thlarau raldohnak ah lih kha kan tei khawh a herh. “Pergamun khua i a um mi Khrihfabu vancung mi sinah hithin va tial tuah: “Hi bia hi vainam kap hnih har a ngei m bia kah a si. Na umnak hmun kha ka hngalh, Satan nih a bawithutdan a chiahnak hmun a si kha ka hngalh” (Biathlam 2:12-13).
“Teitu a si mi hna cu thuh mi manna changreu kha tlawmpal in ka pek hna lai. Cun lung rang zong pakhat cio in ka pek hna lai i cu lung cung ah cun a cotu cio lawng nih a sullam an hngalh mi minthar kha an i tial cio lai” (Biathlam 2:17) tiah a ti.
Thlarau tha lo le lih kha biatak bantuk in an dir i Satan kah vancung mi bantuk in vancung mi bantuk in ai langh. Thlarau le ti hrinthannak thawngtha a thei i a zum duh lo mi cu Pathian nih a bawm hna lai lo. Cubantuk minung cu hell ah a dong te lai.
Mi zeipaoh nih anmah tein Jesuh khamhnak ka zum lai maw zum lai lo tiah biakhiahnak an tuah a herh. Ahohmanh nih na hmai ah kun in Jesuh zum law khamhnak co tuah tian an in ti lai lo.
Na sualnak in khamh co na duh ahcun Thlarau le ti khamhnak thawngtha kha zum. A dawtnak le a kan khamhnak vel ruang ah nai lawmh ahcun amah cu zum ko. Hell ah a kal ding mi misual na si ahcun Thlarau le ti hrinthannak thawngtha le Jesuh tipil innak le vailam cung thisen kha zum law khamhnak na co lai. Cu hnu ah miding na si lai.
Misual ka si lo tiah na ruah ahcun Jesuh khamhnak na herh lo. Misual mi lawng kha Thlarau le ti hrinthannak thawngtha in khamh an si. Jesuh cu misual mi vialte khamhtu le harnat tong vialte hnemtu a si. Amah cu sertu a si. Dawtnak Bawi a si.
Thlarau le ti hrinthannak thawng zum ding in lungthiang tein kan sawm. Zum tuah. Jesuh cu na Pathian, na Tuukhal, na Hawikom le na Khamhtu a si lai. Misual mi nih Jesuh zumh a herh. Hell kal na duh lo ahcun na zumh a herh. Pathian nih khamhnak thawngtha zum ding ah kan hmai ah a kun lai lo.
Vancung kai na duh maw? Thlarau le ti hrinthannak thawngtha zum tuah. Jesuh nih, “Keimah cu lam le biatak le nunnak ka si. Ka zum u” tiah a ti. Hell kal ka duh ko na ti maw? Cuti si ahcun zum duh hlah. Hell ah na caah timhcia hmunh a um ko.
Pathian nih zaangfah an nawl lo. Chawlet nih cun an thir zuar khawhnak ding ah mi zeipaoh kha thleidannak ngei loin a nawl hna, asinain Pathian nih cun vancung pennak cu a khamh mi kha a lak tein a pek hna. Pathian cu a ding.
Minung nih vawlei caan dongh caan a nai cang an ti. Keimah zong nih ka zumh ve. Cutikah Thlarau le ti hrinthannak thawngtha zumh lo cu hruh a si.
Thlarau le ti hrinthannak thawngtha thluachuah ka zum ve tuah. Vancung pennak chung ah kan dihlak in kalti hna u sih. Jesuh umnak ah keimah he na kal ve lai lo maw?

Misual maw na si miding dah?
Thinlung ah sualnak a ngei lo mi miding

Rom 8:1-2 rel hna u sih, “Atu cu Khrih Jesuh he i pehtlai in a nung mi hna caah cun sualphawtnak a um ti lo. Zeicahtiah Khrih Jesuh he aa pehtlai mi nunnak a kan petu Thlarau phung nih cun sualnak le thihnak phung chung khan a kan luatte cang.”
Jesuh nih tipil a innak le vailam cung a thisen in vawlei sualnak vialte a lak dih. An sualnak ruang ah biaceih ding a si mi misual vialte kha a khamh hna.
Pathian khamhnak ah thil pahnih ai tel: Pakhat cu Nawlbia a si i pakhat cu Dawtnak a si. Nawlbia nih cun misual kan si a kan hngalhter. Nawlbia ning ahcun, sualnak man cu thihnak a si. Nawlbia ning in cun khamh kan si kho lo. Misual kan sinak lawng a kan hngalhter khawh.
Sual leiba cham ding ah, Jesuh cu hi vawlei ah a ra i sualnak vialte a lak dih hnu ah biaceihnak chung in a kan khamh. Cucu Pathian dawtnak cu a si.
Lih hi kan tei khawh a hau. Pathian nih lih le a deu kan tei khawhnak ding ah Thlarau le ti hrinthannak thawngtha a kan pek.
Jesuh zumhnak thawng in khamh kan si. A bia zumhnak thawng in, dinfelnak kan co i biatak kan hngalfian. Na thinlung in Thlarau le ti hrinthannak thawngtha zum law khamh na si lai.

LIST Download FREE eBook & AudioBook