- All e-books and audiobooks on The New Life Mission website are free
- Explore multilingual sermons in global languages
- Two new revised editions in English have been released
- Check out our website translated into 27 languages
A konglam 3: Thlarau le Ti thawngtha bia
[3-8] Tlanhnak Caah Umlo Khawh Silo Jesuh Tipil Innak (Matthai 3:13-17)
“Cu caan ahcun Jesuh cu Galilee ram in Jordan tiva ah khan Johan sin i tipil in awkah a va kal. Sihmanhsehlaw Johan nih cun a rak al i, keimah pei nangmah nih tipil pek awk ka si cu, ka sin i nangmah lehtuk na rat, tiah a ti. Sihmanhsehlaw Jesuh nih cun, Atu cu hitihin si ko seh. Pathian nih tuah awk a si a timi paoh cu i tuah ko seh, tiah a leh. Cucaah Johan cu a hna a tla ve. Tipilnak a in dih cangka cun Jesuh cu ti chung cun a chuak. Van kha aa hung i Pathian Thlarau cu thuro bantin a rung zuan i a cung i aa fut kha a hmuh. Cun vancung in aw pakhat a rung thang i, Amah hi ka dawt mi ka Fapa a si, Amah cung ah hin ka lung a tling, tiah a ti.
TIPIL PETU JOHAN TIPIL PEKNAK
Ngaihchihnak cu zeidah a si?
Sualnak mer tak i thiannak caah Jesuh zumh a si.
Hi vawlei minung tampi nih zeiruang ah dah Jesuh hi vawlei cung ah a rat i Johan nih tipilnak a pek ti hi an hngal lo. Cucaah Jesuh tipil innak le Jesuh tipil a petu Johan tipilnak kong nih ai tinh mi ruat tuah u sih.
A pakhatnak ah zei nih Johan kha Jodan tiva ah tipil pe ding in a hruai ti kha ruat tuah hna u sih. Hi kong hi Matthai 3:1-12 ah a lang i minung nih an sualnak an i chir i Pathian sin an kirnak ding caah a si ti kha kan hmuh.
“Nan sualnak nan i ngaihchihnak ti hngalh caah kei nih ti in tipilnak kan pek hna” (caang 11) nak. “Bawipa cu a lam kha rak sialpiak u, a kalnak ding lam kha ding tein rak tuah piak u” (caang 3) tiah a ti. Tipil petu Johan Kalauk hmul in ai thuam i khaubawk kha a ei pah cun ramcar chung ah cun sual ngaihthiamnak caah nan sualnak i ngaichih u tiah thawngtha bia a chim.
Mipi sin ah khan, “Nan sual i ngaichih u, minung vialte khamhtu a ra lio, a lam kha sialpiak u, ding tein a lam kha remhpiak u. Jentail pathian biak kha ngol cang u law Bawipa kha nan thinlung in cohlang u” tiah a au.
Zei in dah an kir lai? Siasal biaknak le sulnak in a khat mi tuahsernak tha loin an kir lai. Thiannak ding caah Jesuh chung ah tipilnak kan in a herh. Ramcar chung in tipil petu Johan cu, “ka sin tipilnak ing u. Nan sualnak in i thianh u. Messiah nan khamhtu cu hi vawlei ah a ra lio. Biakam Hlun raithawinak tuufa bantuk in nan sualnak vialte kha an tawlpiak dih hna lai” tiah a au.
Biakam Hlun ahcun nitinte an sualnak cu thawinak saram cung ah an khin i cuticun sual tlanhnak an rak tuah. Asinain kum khat chung Israel mi hna sualnak cu a thla sarih thla a ni hra ni Remdaihnak ni ah meheh cung sualchuannak in an rak tuah tawn (Leviticus 16:29-31).
Cubantuk cun, minung sualnak vialte Jesuh cung ah chuan dih a si i tipil a innak in voi khat ca za lak in a kan tawlpiak dih. Cucaah Johan nih mipi kha Jesuh sin ah kir u law amah nih tipilnak in pe hna seh tiah a fial hna.
Tipil petu Johan nih a tuah mi tipil peknak nih a pakhatnak bik ah ai tinh mi cu ngaihchihnak caah a si i cu nih cun a donghnak ah Israel mi kha Jesuh lei ah a hruai hna. Ngaichihnak cu sualnak lam khan kir i sual ngaihthiamnak caah Jesuh Messiah zumh kha a si.
Israel mi hna nih Jesuh messiah a ra lai i vawlei sualnak vialte a tawl dih te lai ti ruahchannak in khamhnak an rak co khawh. Cubantuk in kannih zong a luancia mi kum 2000 reng lo ah h vawlei ah a ra i vawlei sualnak vialte a tawl dihtu Jesuh zumhnak thawng in khamhnak kan co khawh ve. Asinain Biakam Hlun Israel mi hna nih Pathian nawlbia kha an hlawt i a dik lo mi raithawinak an tuah i Messiah kha an philh.
Johan nih an philh cia mi Pathian nawlbia kha a cawnpiak than hna i a hnu ah a ra te ding mi Messiah kha a chimh hna hnu a tipilnak a pek hna, cuticun a donghnak ah Jesuh zong kha tipilnak a pek ve.
Minung tampi cu Johan sin ah an ra i siasal an biaknak le Pathian nawlbia an hlawtnak khan an i chir caah Johan nih ngaihchihnak tipilnak a pek hna. Raithawinak ah ai tel hrimhrim ding mi thil pathum an um-saram nung, kut cung chuannak, le a thisen an si. Vawlei cung minung vialte hi Jesuh zumhnak thawng in khamh kan si.
Farasi le Sadducee pawl tipil ing din ah an rat tikah Johan nih, “Rul ci hna! A ra ding mi dantatnak in zeidah nan luat khawh lai? Nan sualnak nan i ngaihchihnak cu a theitlai in langhter u, Abraham cu a kan hringsor tu a si i kan luat lai tiah ruat hlah u” (Matthai 3:7-9) tiah a ti hna.
Hi Farasi le Saduci pawl, ramkhel le siasal biatu phu pawl nih Pathian bia an zum na loin Pathian fa kan si tiah an ti. Pathian dang le anmah ruahnak kha an zumh.
Johan sin ah tipil ing ding ah an rat tikah a rak thawh hna i, “raithawinak dik lo kha nan pek awk a si lo, nan sualnak kha mertak u law Messiah a ra ding mi kan sualnak vialte a tawl dih lai ti kha zum u. Hihi nan thinlung in nan zumh awk a si” tiah a ti hna.
Ngaichih ti cu lam dik loin kir tinak a si. A dik mi sual ngaihchihnak cu zumhnak dik lo le sualnak in kir i Jesuh panh a si. Tipil a innak le vailam cung biaceihnak a tuarnak zumh kha a si.
Cucaah Pathian nawlbia a hlaw i raithawinak phung a buar mi Israel mi hna sin ah khan Johan nih Pathian sin ah kir u tiah a tah hnawh hna. Misual hna sinah rat pi i an sualnak in khamhnak an co ding kha Johan rian tu a si.
JESUH TIPIL INNAK IN KHAMHNAK HI NA ZUM MAW?
Minung nih Jesuh hmai ah zeidah an tuah a herh?
An sualnak in luatnak ding ah Jesuh an zumh a herh.
Jesuh nih Pathian riantuan ai thawk i a hmasa bik a tuah mi cu Johan sin ah tipil in kha a si. Cuticun vawlei sualnak vialte kha a cung ah a khin dih.
Cucaah Jesuh tipil innak cu Pathian nih minung a khamhnak rian ah a hmasa bik a si i vawlei sualnak kalpi ding ah Jesuh nih Pathian duhnak a tuahnak zong a si. Jesuh nih tipi a innak in vawlei sualnak vialte a lak dih cang ti a zum mi paoh cu Pathian nih a khamh hna.
Jesuh hi vawlei a rat i Johan nih tipilnak a pek tikah, Vancung Pennak thawngtha ai thawk. Tipil a in ah khan van innka an i ong i Matthai 3:15 ah a lang mi hi Leviticus 1:1-5, 4:27-31 ah a lang mi hi ai khat bak mi a si.
Biakam Hlun thil vialte hi Biakam Thar ah kawp an ngei dih. “Thilnung kong tialnak Bawipa Cauk chung ah khan kawl tuah u law zeidah a chim ti kha rel tuah u. Hi thilnung vialte hna hi pakhat hmanh a bau mi an um lai lo i pakhat hmanh keptu ngei lo zong an um lai lo” (Isaiah 34:16).
BIAKAM HLUN HE BIAKAM THAR HE MI VIALTE SUAL TLANHNAK KONG A CHIM
Nichiarte sual ngaihchihnak tuah a hau maw?
Hau lo. a dik mi ngaichihnak cu sualnak hngalh i khamhnak ding caah Jesuh tipil innak ah thinlung pek kha a si.
Biakam Hlun ahcun nitinte an sualnak kha thawinak saram cung ah an chuan i cuticun ngaihthiam an si. Cu dih cun thawinak saram cu thah i misual aiawh ah a thisen luanter a si. Cubantuk in kum khat chung an sualnak zong kha thawinak saram cung kut chuannak in raithawinak tuah a si i an sualnak kha ngaihthiam an si.
Biakam Thar zong ah cubantuk cun, vawlei sualnak tawl ding ah Jesuh cu a ra i Jodan tiva ah tipilnak a in. Cuticun Biakam Hlun ah rak phuan mi Pathian bia cu a tlamtling.
Jesuh tipilnak a petu Johan cu Pathian saltha, Jesuh chuah hlan thla 6 ah Pathian nih a van thlah chung mi a si. Jesuh nih vawlei sualnak vialte a kalpi dih cang ti kha tehte a khaan i Johan 1:29 ah, “Zohhmanh u! Pathian tuufa, vawlei sualnak a kalpitu khi” tiah a ti.
Tipil petu Johan nih vawlei sualnak vialte kha Jesuh cung ah tipil peknak in a chuan dih. Cuticun Bawipa nih minung vialte kha khamhnak kha a ser. Kan tuah ding a tang mi cu zumh lawng a si.
Vawlei sualnak vialte cu Jesuh cung ah khin dih a si. Jesuh lamkaltu hna nih Lamkaltu 3:19 ah, “Cucaah nan sualnak cu an hnawhpiaknak hnahnga, i ngaichih u law Pathian lei ah khan i mer tuah u” tiah a ti.
Johan nih zeiruang ah dah Jesuh tipilnak a pek ti le zeiruang ah dah a Jesuh hnu zul u tiah a forh hna ti kha kan fiang ding a si. “Nan sual i chir u law hrinthannak co u. Jesuh tipil innak in tlanhnak kha zum u. Nan sualnak kha tawl u” tiah a ti hna.
Messiah cu a ra i voi khat ca za lak in tipil a innak in vawlei sualnak a tawl. Cuticun vawlei sualnak vialte cu Jesuh cung ah chuan a si. Matthai 3:13-17 ah ai tial bantuk Pathian biakamnak cu Jesuh nih tipil innak in a tlinter.
“Cu caan ahcun Jesuh cu Galilee ram in Jordan tiva ah khan Johan sin i tipil in awkah a va kal. Sihmanhsehlaw Johan nih cun a rak al i, keimah pei nangmah nih tipil pek awk ka si cu, ka sin i nangmah lehtuk na rat, tiah a ti. Sihmanhsehlaw Jesuh nih cun, Atu cu hitihin si ko seh. Pathian nih tuah awk a si a timi paoh cu i tuah ko seh, tiah a leh. Cucaah Johan cu a hna a tla ve. Tipilnak a in dih cangka cun Jesuh cu ti chung cun a chuak. Van kha aa hung i Pathian Thlarau cu thuro bantin a rung zuan i a cung i aa fut kha a hmuh. Cun vancung in aw pakhat a rung thang i, Amah hi ka dawt mi ka Fapa a si, Amah cung ah hin ka lung a tling, tiah a ti.”
Pathian khamhnak tlamtlinter ding ah Jesuh cu tipil ing ding ah Johan sin ah a ra. Tipil petu Johan cu Pathian saltha a si. Luka 1 nih Johan cu Aaron hrinsor le a pakhatnak tlangbawi ngan a si tiah a ti. Pathian nih Aaron hrinsor Johan cu a thim, zeicahtiah minung vialt aiawhtu ding ah Pathian duhnak tlinter khotu kha a herh.
Pathian nih Jesuh chuah hlan thla 6 ah Johan cu tlangbawi ngan chungkhar in a chuahter. Johan nih Jesuh caah ramcar chung ah tah buin lam kha a sial piak i, “Rul ci hna, nan sualnak i chir u! I ngaichih u law i thleng u. Messiah a ra lai. Amah lei ah i thleng u asiloah cun an tan hna lai i hell mei ah an paih hna lai. Tipil a innak le vailam cung a thihnak kha zum u. Nan sual i ngaichih ulaw amah nih tipilnak in pe hna seh, cuticun khamh nan si lai” tiah a ti hna.
Khamhnak thawngtha cu Lamkaltu 3:19 ah fiang tein a lang. Johan nih minung sualnak kong he pehtlaih in a au tikah mi tampi nih hrinthannak an co.
Johan nih vawlei sualnak vialte Jesuh cung a khin caah voi khat ca za lak in kan sual cu hnawhpiak kan si. Johan nih Jesuh nih vawlei sualnak vialte a lak tiah tehte a khaan caah, khamhnak thawngtha a si mi, Thlarau le ti hmang in khamhnak kan co khawh.
TIPIL PETU JOHAN JESUH HLAN A RATNAK A RUANG
“Atu cu” ti sullam zeidah a si?
(1)Ningcang bik
(2)Ai tlak bik
(3)A herh bik lam (lam dang a um lo)
Mi khamtu Jesuh nih an sualnak a tawlpiaknak a zum mi nih cun Matthai nih Jesuh tipil innak tehte a khaan mi hmang in an khamhnak ah hnangamnak an ngeih khawh. Matthai 3:15-16, Jesuh cu Johan sin ah a ra i, “Tipil ka pe tuah” tiah a ti. Johan nih a leh i, “Nangmah tu nih pei pek ding ka si cu, nangmah tu keimah sin rat cu” tiah a ti.
Tipil petu Johan nih Jesuh cu ahodah a si ti hngal buin tipilnak a pek. Johan cu Pathian saltha vawlei sualnak vialte Jesuh cung khing ding ah thlah mi pa a si. Jesuh cu Biakam Hlun biaphuan tlinter awk ah a ra i, vawlei sualnak vialte kalpi ding ah tipil petu Johan kha tipilnak ka pe tuah tiah nawl a pek.
Zeiruang? Jesuh cu a Lianngan mi Pathian Fapa, Sertu le Mikhamhtu a si caah. Kan sinah kan sualnak tawlpiak ding ah a ra. Cucaah minung vialte khamhnak ding ah tipilnak a ing.
“Atu cu” Jesuh cu Johan nih tipilnak apek i kan sualnak vialte a tawl dih. Kanmah aiawh ah vailam cung ah biaceihnak a tuar. Jesuh tipil innak cu kan khamhnak tehte khaannak a si. Biakam Hlun ah Pathian nih sualnak vialte cu thawinak tuufa cung chuan a si lai tiah bia a rak kamh bantuk in, Pathian fapa cu tuu a hung si i kan sualnak vialte cu a cung ah a khin dih.
Cucaah Biakam Hlun kut cung chuan le Biakam Thar Jesuh tipil innak cu sualnak khinnak caah a si i Thlarau le ti thawngtha a zum mi vialte cu zungzal nunnak le khamhnak pek an si.
JESUH TIPIL INNAK NIH KAN SUALNAK A TAWL DIH
Khrih cu zeitindah kan I thuamh khawh lai?
Khrih cung ah tipil innak thawng in
Jesuh nih tipil in ai timh tikah Johan nih thlauh a timh i, “nangmah tu nih tipil na ka pek awk a si, nangmah tu keimah sin rat cu?” tiah a ti.
Asinain Jesuh nih “Atu cu hitihin si ko seh, zeicahtiah Pathian nih tuah u a ti mi paoh tuah in um ko seh” tiah a ti. Atu cu hitihin si ko seh. Jesuh nih Johan kha “vawlei sualnak vialte ka cung ah na khin a hau zeicahtiah Thlarau le ti in hrinthannak a co mi paoh ka sin ah ka hruai khawhnak hna hnga. Vailam cung ah biaceih ka si lai zeicahtiah ka tipil innak a zum mi paoh an sualnak tawlpiak an sinak lai. Vawlei sualnak vialte hi ka cung ah khing tuah zeicahtiah a hnu ah van zum te ding mi zong nih a zungzal ca in khamhnak an hmuh nakhnga. Cucaah atu hitihin si ko seh” tiah a ti.
Johan nih Jesuh cu tipilnak a pek i a tipil innak cu a dingfel mi Pathian nawlbia ning in a si. Jesuh tipil a innak ah vawlei sualnak vialte a cung ah chuan a si caah Jesuh kan zumh i tipil kan in tikah a zungzal ca in khamhnak kan co. Kut cung chuannak in kan sualnak vialte a cung ah a chuan caah, vailam cung a thih caah le atu ah Pathain orhlei kam ah a thut caah Thlarau le ti khamhnak thawngtha kan zumh ahcun khamhnak kan co lai.
Vawlei sualnak vialte in a kan khamhtu cu Jesuh a si. Jesuh nih kan sualnak vialte a lak dih cang i vailam cung ah biaceihnak a in ti zumhnak thawng in khamh kan si. Jesuh tipil innak cu khamhnak thawngtha hramthawk a si.
Tipil innak in tlanhnak hi Baibal ah atu le tu a lang i Kalati cakuat ah lamkaltu Paul nih Khrih ah tipilnak a in caah amah vailam tah a sinak kong a phuan. Lamkaltu Paul nih Jesuh tipil innak le vailam cung a thihnak a zumhnak kong a chimphuan.
“ATU CU HITIHIN SI KO SEH”
Tipil petu Johan rian cu zeidah a si?
Minung vialte aiawh tlangbawi ngan a si bantuk in vawlei sualnak vialte Jesuh cung khin kha a rian a si.
Jeush nih “atu cu Pathian nih tuah u a ti mi paoh tuah si ko seh” tiah a ti. Pathian duhnak ti sullam cu tipil a innak in vawlei sualnak vialte hnawh dih i minung thinlung kha sualnak ngei lo ah ser kha a si. “Cu tik ah a hna a tla ve.” Jesuh cu Jordan tiva ah tipil a ing.
Tlangbawi ngan nih meheh cung ah a kut a chuan bantuk in, tipil petu Johan nih a kut a chuan i vawlei sualnak vialte kha Jesuh cung ah chuan ve. Tipil petu Johan cu minung vialte aiawh tlangbawi ngan a si bantuk in a rian cu vawlei sualnak vialt Jesuh cung khin kha a si. “Pathian, vawlei sualnak vialte cu Tuufa, Jesuh cung ah ka chuan” tiah a ti. Cuticun vawlei sualnak vialte cu Jesuh cung ah chuan a si.
Tipil petu Johan nih Jesuh cung ah a kut a chuan, ti chung ah a hnim i Jesuh ti chung a hung chuah tikah a kut kha a lak than. Jesuh tipil innak nih a ding mi khamhnak a ser. Cuticun Jesuh nih a tipil innak a zum mi minung vialte a khamh hna.
VAN INNKA AN I KONG I VANCUNG IN AW A RA
Zeitik in dah Vancung Pennak on a si?
Tipil petu Johan thawk in (Matthai 11:12)
“Tipilnak a in dih cangka cun Jesuh cu ti chung cun a chuak. Van kha aa hung i Pathian thlarau cu thuro bantuk in a rung zuan i a cung i aa fut kha a hmuh. Cun vancung in aw pakhat a rung thang i, “Amah hi ka dawt mi ka Fapa a si, Amah cung ah hin ka lung a tling” (Matthai 3:16-17) tiah a ti.
Jesuh nih tipil innak in vawlei sualnak vialte a tawl tikah, van cung innka an i hung. Cuticun kum tampi a luancia mi ah Pathian nih biakamnak a rak tuah mi kha Jesuh nih Jodan tiva tipil a innak in a tlinter.
Cuticun Pathian tuufa Jesuh nih minung vialt cu vawlei sualnak in a khamh hna. Vawlei sualnak vialte cu Jesuh cung ah a khin i Pathian duhnak kha a tlinter.
Johan 1:29 nih “Zohhmanh u! Pathian tuufa, vawlei sualnak a kalpitu khi” tiah a ti. Vawlei sualnak vialte Pathian tuufa Jesuh cung ah khin a si caah, a hnu kum thum a rauh ah Golgatha lei ah valaitah ai phurh i a kal. Tipil innak in vawlei sualnak a lak dih hnu ah, a kalnak paoh ah, amah a zum mi paoh kha nan sualnak ngaihthiam nan si cang tiah a chimh hna.
Johan 8:1 ah, a sual lio ah an tlaih mi nu kha, “kei zong nih sual kan phaw ve lo” tiah a ti. Sual a phawt khawh lonak cu amah hrimhrim nih a sualnak kha a phurh i biaceihnak a tuar caah a si. Cuticun mi vialte kha keimah cu mi khamhtu ka si tiah a chimh hna.
Pathian Fapa nih kan sualnak vialt a lak dih caah, hi vawlei ah zumtu vialte cu thianter kan si cang. Tipilnak a in lio ah van innka ai hung. Vancung pennak innka cu an i hung i Jesuh tipil innak a zum mi paoh man lo tein luh khawh a si.
JESUH NIH TIPIL INNAK IN VAWLEI SUALNAK VIALTE A LAK DIH HNU AH VAILAMTAH A SI
Jesuh nih zeitindah Satan lu a rial?
Kan sualnak ruang ah biaceihnak a in thihnak in a thawhthan hnu ah
Sualnak vialte cu Jesuh lucung ah chuan a si caah Jesuh cu vailam cung biaceih a herh.Vailam cung ah tuar ding biaceihnak a ruah tikah a thinlung a kekkuai i tihnak in a khat. A thlan hripi cu thisen a can tiang thla a cam. A zultu hna he Gethsemane dum an kal tikah, “Ka pa, a si khawh ahcun hi hrai in ka luatter ko” (Matthai 26:39) tiah thla a cam. “Tipil ka ing i vawlei sualnak vialte ka cung ah khin a si, asinain thihnak cun ka luatter ko sawh” tiah a ti. Asinain Pathian nih a let lo.
Biakam Hlun i Remdaihnak Ni ahcun thawinak saram cu thah a si i a thisen cu tlangbawi ngan nih velngeihnak thutdan velchum ah voi sarih a toih. Cubantuk in, Jesuh cu vailam ah tah a si i cu lo lamdang a um ti lo.
Biatheng cu Pathain biaceihnak a si i thawinak saram thisen cu nunnak a si. Velngeihnak thutdan velchum ah thisen voi sarih theh sullam cu sualnak cung chuan a si (Leviticus 16:1-22).
Jesuh nih hi hrai hin ka luatter ko tiah Pathian sin ah thla a cam. Asinain a Pa nih a sianh lo i a donghnak ah Jesuh nih, “Keimah duh bang si loin, nangmah duh bang in si ko seh” (Matthai 26:39) tiah a ti. Thla a cam dih in a Pa duhnak cu a zulh.
Jesuh nih amah duhnak kha a hlawt i a Pa duhnak kha a zulh. Zeiruang ah? Vawlei sualnak a lak dih hnu i vailam cung biaceih a si lo ahcun khamhnak a tlamtling kho lai lo. Vailam tah a sinak cu tipil innak in vawlei sualnak a cung ah khin caah a si. “Sualnak man cu thihnak a si, asinain Pathian laksawng cu Khrih Jesuh kan Bawipa chung ah zungzal nunnak a si” (Rom 6:23) tiah a ti.
Pathian nih mi khamhtu ka run thlah lai i minung vialte an sualnak in a khamh hna lai tiah a rak kamh mi biakamnak kha a tlinter. Jesuh nih Pathian duhnak kha a zulh i kan caah biaceihnak a in.
Mah hihi Genesis 3:15 i, “Cun nangmah le minu kar ah ral ka ser lai, a tefa le na tefa cu ral an si lai, na lu kha an rial lai i nang nih a kedil kha na cuk ve lai” tiah a ti. Pathian nih Adam sinah Evi ci in Messiah ka thlah lai i minung vialte hell ah a kaltertu Satan thawnnak a tei lai tiah a ti.
Jesuh tipil innak le vailam cung thihnak kan hngalh i kan zumh tikah kan sualnak vialte tawlpiak kan si i biaceihnak in khamh kan si.
Jesuh tipil innak le vailam cung a thisen kan thinlung in kan zumh tikah a dik mi zumhnak kan ngeih a herh. Na thinlung in zum law khamh na si lai.
JESUH TIPIL INNAK CU VANCUNG LEI THAWNGTHA HRAMTHAWKNAK A SI
Jesuh vancung a kai hlan ah a hnu bik nawl a pek mi hna zeidah a si?
Zultu ser i a zum mi vialte kha Pa, Fapa le Thiang Thlarau min in tipilnak va pe hna u tiah a ti.
Jesuh tipil innak cu thawngtha bia hramthawknak a si i, tipil a innak le a thisen in misual a kan khamh. Matthai 28:19 ah, “Cucaah miphun zakip kha ka zultu ah va ser hna u law, a zum mi paoh kha Pa, Fapa le Thiang Thlarau min in tipilnak va pe hna u” tiah a ti. Jesuh nih a zultu pawl kha ka tipil innak le thinsen a zum mi paoh cu Pa, Fapa le Thiang Thlarau nih a khamh hna ti kha va chim hna u tiah a fial hna.
Jesuh nih miphun kip kha zultu va ser le tipil a innak kong cawnpiak kong le a khamhnak kong chim i an sualnak vialte ngaihthiam an si cang ti chim ding ah thawnnak a pek hna.
Kum 2000 a luan cang mi ah khan Jesuh cu hi vawlei ah a ra i tipil petu Johan nih tipilnak a pek. Jesuh tipil innak nih kan sualnak vialte telh in, vawlei sualnak vialte kha a cung ah a khin dih.
Zeitluk sualnak tam dah Jesuh cung ah khin a si? Thaizing sualnak teh? Thaizing sualnak zong Jesuh cung ah chuan a si tiah a kan ti. Kan fale sualnak zong, kan tefa sualnak le a luancia, atu caan le hmailei caan sualnak le Adam sualnak zong Jesuh cung ah chuan a si.
Zeitindah sualnak lo in um khawh a si? Jesuh nih kan sualnak vialte a lak dih i vawlei sualnak vialte zong tipil a innak in alak dih caah, zumtu vialte cu sualnak chung in kan luat kho i Vancung Pennak chung ah kan lut kho cang.
“Sihmanhsehlaw thil hmaan a tuah mi cu ceunak ah khan a ra i a tuah mi kha Pathian duhnak zulh in a si ti cu ceunak nih cun a langhter” (Johan 3:21) tiah a ti.
Jeush nih vawlei sualnak vialte tipil innak, vailam cung thihnak le a thawhthannak in a tawl dih. Cucaah tipil a innak le vailam cung a thisen zumh cu sualnak chung in khamhnak a si. Cucu khamh zumhnak cu a si.
Jesuh tipil innak le a thisen kan zumh tikah khamh kan si. Jesuh hman tein kan zumh tikah, miding maw kan si misual dah? Miding kan si. Mi tlamtling lo kan sin zong ah sualnak ngei lo kan si ko lo maw? Si ko, sualnak kan ngei ti lo. Jesuh tipil innak le vailam cung biaceihnak zumh cu a dik mi zumhnak ngeihnak a si.
TIPIL PEK LE JESUH MIN IN TIPIL IN
Vancung lei thawngtha hramthawknak cu zeidah a si?
Jesuh tipil innak
Jesuh tipil innak
Minung cu a tlamtling lo mi kan si caah, an zumhnak fehternak caah minister pawl nih Jesuh tipil innak le a thisen a zum mi kha tipilnak an pek hna. Hrinthan mi nih an zumhnak fehternak caah tiah Jesuh tipil a in bantuk in tipilnak an ing ve.
A hrinthan mi hna lucung ah kut chuan in minister nih thla a cam i, a nunnak dih tiangh Pathian a biak khawh nakhnga Pathian thluachuah hal in thla a campiak. Cu hnu ah Pa, Fapa le Thiang Thlarau min in tipilnak a pek.
Jesuh tipil innak le a thisen kan zumhnak ah hrambunh in tipil kan ing. Tipil innak nih kan sualnak vialte Jesuh cung ah khin a si i tipil a ing mi a hrinthan mi nih Jesuh thihnak ah kan thi ve i a thawhthannak ah kan thothan ve ti kha an langhter.
Tipil in ti cu Jesuh tipil innak, vailam cung a thisen le a thawhthannak ah kan thothan ve ti kan zumhnak langhternak a si. Tipil in cu Pa, Fapa, le Thiang Thlarau hmai ah kan zumhnak kan langhternak a si. Thlarau le ti in hrinthannak kan co tinak phuannak a si.
Jesuh tipil innak le vailam cung a thisen a hngal fiang i Jesuh a zum mi paoh cu vawlei sualnak vialte in khamh an si. Cucaah Pa, Fapa le Thiang Thlarau min in tipilnak kan ing.
“Thil hlun an lo i thil thar ah an hung cang” (2 Korin 5:17) tiah a ti. Kan nun ning hlun cu a lo cang i zumhnak ah mithar kan hung si. Kan thinlung ah fehternak caah tipilnak kan ing. Jesuh tipil innak kan zumh caah Jesuh chung ah tipilnak kan ing.
JESUH TIPIL INNAK LE VAILAM CUNG A THISEN IN HRINTHANNAK CO HNU NUNNAK
Hrinthan mi cu zei caah dah an nun?
Pathian pennak le a dinfelnak caah a nung i vawlei khuazakip ah thawngtha an phuang.
Hrinthannak le khamhnak co hnu nunnak ah Pathian bia ai tel peng ding a si. Nichiarte sual chirnak in sual ngaihthiamnak hal khaw a si awk a si lo. Jesuh nih tipil a innak in kan sualnak vailte a lak dih cang ti hngalhfian nun kha a si awk a si.
Jesuh tipilnak a innak ah khan kan sualnak vialte cu a cung ah khin a si. Cu hnu ah kan sualnak thilrit he kum thum chung a Pa rian a tuan hnu ah vailam cung ah kan caah biaceihnak a tuar.
Cucaah, zumtu nih cun kanmah lungthawhnak ah si loin Pathian bia ah kan zumhnak kan bunh ding a si. Cuti kan tuah lo ahcun, hrinthannak le khamhnak kan co hnu zong ah nitinte kan sualnak kong ah lungrethei in kan um ko lai.
Sualnak kong ah buai ti loin thisen le ti khamhnak thawngtha kha kan zumh ding a si. Cucu hrinthannak a co mi hna an nun ning ding cu a si.
Tipil petu Johan nih Jesuh kong ah zeidah a chim? “Zohhmanh u! Pathian tuufa, vawlei sualnak a kalpitu khi” (Johan 1:29) tiah a ti. Jesuh nih nihin sualnak, thaizing sualnak, nizan sualnak le Adam sualnak tiang in a lak dih tiah tehte a khaan.
Cu vialte sualnak cu a lak dih a si lo maw? Cu sualnak vialte cu Jesuh cung ah khin dih a si lo maw? Vawlei sualnak ah a luancia kan sualnak, atu caan kan sualnak le hmailei kan sualnak zong ai tel dih. Jesuh tipil innak in khamhnak thawngtha hi kan fehter awk a si.
Jesuh tipil innak le a thisen biatak a zum mi vialte cu khamh an si lai. Jesuh tipil innak a zum mi vialte cu an thinlung ah sualnak a um ti lo.
Minung tampi nih Jesuh nih tipil a innak in vawlei sualnak vialte a lak dih cang ti kha an hngalh lo caah sualnak kan ngei peng tiah an ruah. Satan nih a hlen hna. Satan nih an minung sinak khuaruahnak ah khan biathli a chimh hna. “Nitinte na sual. Sualnak loin zeitindah na um khawh lai?” tiah a ti hna.
Sualnak loin umnak ding ah Pathian an zumh a herh. Asinain Satan nih sualnak nan ngei peng tiah a hlen hna. Ahohmanh Jesuh tipil innak le vailam cung a thisen a zum mi cu sualnak an ngei lo.
Hi vawlei ah tling lo le derthawm in kan um caah kan tuahsernak le kanmah zuam in zeitik hmanh ah kan dingfel kan ti kho lo. Asinain Jesuh tipil innak le vailam cung a thisen zumhank thawng in sualnak ka ngei lo tiah kan ti khawh. Jesuh tipil innak le vailam cung thisen kan hngalhfian tik ah, kan thinlung cu thianh a si i sualnak kan ngei ti lo kha kan hngalh.
“Khamh kan si cang. Khamh na si cang. Kan dihlak in khamh kan si cang” ti in mivialte sin ah thawngtha chim le Thlarau hruai mi si cu zeitluk in dah a nuamh.
Zumtu hi nitinte kan sual ko nain sualnak kan ngei lo. Kan thilung ah Jesuh tipil innak le thisen kan ngei. Kan thinlung cu sualnak in a rak khat ko, asinain Jesuh tipil innak kan zumh ahcun zeitindah sualnak he cun kan um khawh ti lai.
“Hmailei caan annih he ka tuah lai mi biakamnak cu hihi a si, ‘an lungchung ah ka nawlbia kha ka chiah hna lai i an ruahnak chung ah ka tial hna lai” (Hebru 10:16) tiah a ti.
Kan thinlung cu sualnak in a luat. Jesuh nih tipil a innak le vailam cung a thisen in khamhnak tling a kan serpiak. Sualnak in khamhnak cu Pathian bia in hram ai thawk mi a si.
JESUH TIPIL INNAK LE VAILAM CUNG A THISEN A ZUM MI PAOH CU MISUALFA AN SI KHO TI LO
Sualnak kan tuah tikah misualfa kan si than maw?
Misualfa kan si than ti lo.
Jesuh tipil innak le vailam cunga thisen kan zumh lo ahcun zeitluk fak in sualchirnak caah thlacam ko hmanh u sihlaw kan thinlung ah sualnak a um peng. Asinain a dik mi thawngtha kan zumh tikah kan sualnak vialte tawlpiak kan si.
“Hey, ziah atu hrawng hi na ceuvau ko e?”
“Ka thinlung ah sualnak ka ngei ti lo hi na hmu maw?”
“Aw, a si maw? Cuti si ahcu na duh awk in na sual kho cang tiah ka ruah?”
“Minung nih a tuah khawh mi cu sualnak lawng a si hi na hngal maw. Minung cu khakha a si ko. Asinain Jesuh nih vawlei sualnak vailte a lak dih i vailam cung ah biaceihnak a tuar. Hi ruang ah Khrihfabu ah thawngtha bia karhternak caah kai pe. Rom 6 nih hiti nung ding in a kan fial. Kan thinlung ah sualnak a um ti lo cah a dingfel mi thil lawng tuah ka duh. Jesuh tipil innak le vailam cung a thisen kan zumh i vawlei cung khuazakip ah thawngtha bia kan chim ding a si. Kan khamhnak hrampi le Bawi a si mi Jesuh kan zumh tikah, misualfa kan si kho ti lo. Jesuh tipil innak le vailam cung thisen nih zungzal a kan khamhnak kan zumh a herh. Lunglawmhnak in ka khat.”
AHODAH THLARAU A CO?
Tipil petu Johan nih Jesuh kong ah zeidah tehte a khan?
Jesuh cu Pathian tuufa, vawlei sualnak, a luancia, atu caan le hmailei sualnak vialte a kalpitu tiah
Jesuh tipil innak le vailam cung a thisen a zum mi paoh nih khamhnak an co. Zeitindah Thlarau kan co? Lamkaltu 2:38-39 ah, “Peter nih annih cu a thawh hna i, “Nan dihlak in pakhat hmanh bau loin, nan sualnak khan i mer tuah u, nan sualnak kha ngaithiam nan si nakhnga, nan sualnak khan i mer u law Jesuh Khrih min in tipilnak ing tuah u, cun Pathian laksawng Thiang Thlarau kha nan hmuh lai. Zeicahtiah Pathian nih bia a kamh mi hna cu nanmah hi le nan fale hna hi le lam hlat pipi i a um mi hna zong nan si-Bawipa nan Pathian nih an kawh mi hna paoh caah hin a si,” tiah a ti.
Jesuh Khrih min in tipil in ti cu Jesuh tipil innak le thisen zumhnak thawng in thianter tinak a si. Cu hnu ah Thlarau laksawng cu Pathian laksawng ah pek kan si. Hi zumhnak kan i tlaih tikah khamh kan si i miding kan si. Zumtu cu Jesuh tipil innak le vailam cung a thisen nih hawhra bantuk in a kan ranter.
“Cun Thiang Thlarau kha laksawng ah nan hmuh lai.” Kan sualnak vialte Jesuh tipil innak in a cung ah khin dih a si i kan sualnak caah biaceihnak a in ti fek tein kan zumh tikah kan thinlung cu thianter a si. Jesuh tipil innak le vailam cung a thisen kan zumh i Pathian Thiang Thlarau kha laksawng ah kan co tikah Pathian fa kan si i nunnak thar ai thawk.
“Cun biatak kha nan hngalh lai i biatak nih cun an luatter hna lai” (Johan 8:32) tiah a ti. Jesuh vailam cung biaceihnak sullam taktak hi kan hngalh ding a si. Jesuh nih tipil a innak le vailam cung a thihnak in vawlei sualnak vialte a hnawh dih ti biatak a si. Biatak kan zumh tikah khamh kan si.
JESUH TIPIL INNAK NIH A KAN KHAMH
Ahodah Thlarau a co?
Jesuh tipil innak le vailam cung thisen in khamhnak a co mi nih
Biakam Hlun raithawinak phunglam hna nih Biakam Thar Jesuh tipil innak an langhter. Biakam Hlun profet biaphuan hna muru cu Jesuh tipil innak hi a si. Biakam Hlun thawinak saram cung kut cung chuan cu Biakam Thar Jesuh tipil innak hi a si.
Biakam Hlun Israel mi sualnak cu meheh cung ah an kut an chuan i an khin dih bantuk in vawlei sualnak vialte cu Jesuh tipil a innak in a cung ah khin dih a si ve.
Kan sualnak in khamhnak ding ah Jesuh tipil innak hi kan zum maw? Aw, kan zumh! Jesuh nih tipil a innak in vawlei sualnak vialte a lak dih cang ti biatak hi kan zumh ding a si. Jesuh tipil innak kan zumh lo ahcun, kan sualnak zong a cung ah khin khawh a si lo. Kan khamhnak a tlinnak ding ah kan zumh a herh. Cu lo ahcun miding kan si kho lai lo.
Jesuh nih vawlei misual mi vialte a dik bik mi lam tipil a innak in a kan khamh. Cunak lam tha cu a um ti lo. Jesuh tipil innak cu vawlei sualnak vialte a cung khinnak lam a si caah, kan thinlung sualnak chung in a zungzal a luatnak ding caah kan zumh a herh.
Vancung pennak chung luhnak ding ah Jesuh tipil innak kan zumh a herh. Hi lam lawng hi sualnak chung in luatnak lam le biaceihnak in luatnak lam a si.
Biakam Thar Jesuh tipil innak le Biakam Hlun kut cung chuanka hi thlalang bantuk an si. Biakam Thar le Biaka Hlun a pehtlaihtertu an si.
Biakam Thar ah Jesuh chuah hlan thla 6 ah tipil petu Johan a ra. Jesuh tipilnak a in kha, “Pathian Fapa Jesuh kong thawngtha ai thawknak a si” (Mark 1:1). Thawngtha cu Jesuh nih tipilnak a in i vawlei sualnak vialte a cung ah a khin ah khan ai thawk.
Minung khamhnak rian cu cikcin bantuk in ai tlai dih mi a si: Jesuh chuahnak, Tipil a innak, Vailam cung a thihnak, a thawhthannak le Vancung a kainak tiin. Hi cikcin bantuk a si mi khamhnak tling kan zumh tikah kan sualnak vialte in khamh kan si. Jesuh tipil innak cu khamhnak thawngtha hramthawk a si i vailam cung a thisen cu khamhnak a tlinnak a si.
“Pathian Fapa, Jesuh Khrih kong thawgtha cu hitihin a si” (Mark 1:1). A tuahsernak a dingfel mi hi pakhat hmanh nganh ta awk an tha lo-tipil a innak, vailam cung a thisen, a thawhthannak, vancung a kainak le a rat than lainak hna hi Pathian Fapa thawngtha ah ai tel dih mi an si.
Jesuh cu hi vawlei ah minung taksa in a ra i tipil a innak in kan sualnak vialte a hnawh dih. Cucu vancunglei thawngtha bia hramthawknak a si. Hi thawngtha chungtel ah pakhatkhat kan nganhta a si ahcun vancung lei khamhnak thawngtha hi a tling ti lai lo.
Cucaah, mi pakhat a hrinthan a si ahcun, Jesuh tipil innak le thisen a zumh a herh. Tuchan ah minung tampi nih Jesuh tipil innak le vailam cung a thisen an zum lo. Jesuh tipil innak cu phungphai pakhat men ah an ruah. Hihi a palh mi ruahnak a si. Jesuh a zum mi vialte nih tipil a innak le a thisen an zumh a herh.
Zeitindah ngaihthiam hal thlacamnak men in kan sualnak cu hnawhpiak kan si lai? Kan sualnak vialte cu Johan nih Jesuh tipilnak a pek ah khan a cung ah chuan dih a si. Sualnak hnawhpiaknak ding lam dang a um ti lo.
Vancung pennak chung luhnak ding ah Thlarau le ti in hrinthannak kan co a herh. Thlarau le ti le vailam cung thisen loin khamhnak lam dang a um ti lo. Hrinthannak a co mi lawng nih Jesuh nih Johan 3:5 ah Nikodemu sin ah a chim bantuk in, Pathian an hmuh khawh. A dik mi khamhnak cu Jesuh tipil innak le vailam cung a thisen kan zumh tikah kan co.
JESUH TIPIL INNAK TEL LOIN KHAMH KAN SI KHO MAW?
Jesuh cu zeitindah kan khamhtu a hung si?
Tipil innak in kan sualnak vialte a cung chuannak thawng in
Jesuh vawlei cung rian a tuannak ah tipil a innak in vawlei sualnak vialte a hnawh dihnak, a thianhlimnak, Ngaknu thiang in hrin a sinak le vailamtah zumhnak hna kan hrelh a si ahcun Khrihfa biaknak hi khuahrum biaknak le Buddist biaknak bantuk in, “ka ngaithiam, ka ngaithiam, ka ngaithiamnak” ti biaknak ah ai cang ko lai.
Jesuh tipil innak hrelh cu kan sualnak Jesuh cung ah khin a si lo ti he ai khat. Kan zumhnak cu man ngei lo, leiba a ngei mi pa nih a leiba pakhat hmanh cham loin leiba ka ngei ti lo a ti bantuk men khi a si ko hnga. Lihchim ah a kan canter hnga. Leiba ngei mi nih a leiba pakhat hmanh cham loin leiba ka ngei ti lo a ti zong ah leiba ngei a si peng ko lai.
Jesuh nih zumtu vialte cu tipil a innak in a kan tawl dih i Pathian fa ah a kan ser. Jesuh nih tipil petu Johan hmang in vawlei sualnak vialte a hnawh dih i zumtu kha a kan thianter. Hihi kan hngalh i kan zumh tikah, kan thinlung cu a zungzal in thianter a si.
Pathian hi a vel ruang ah lawm ko u sih. Luka 2:14 nih, “A sang bik van ah khin Pathian cu thangthat si ko seh, a dawt mi hna umnak vawlei ah hin daihnak um ko seh” tiah a ti. Jesuh tipil innak le a thisen kan zumhnak nih khamhnak tling a kan pek i Pathian fa ah a kan ser. Jesuh tipil innak le a thisen a zum mi paoh cu khamh an si i hi pahnih a zum mi paoh nih khamhnak an co.
A riantuannak hi pakhat hmanh nganhta awk a tha lo. Cheu khat nih cun lamkaltu Paul zong nih a vailamtah lawng ai porhlawt pi ko an ti i a thisen lawng an zumh. Asinain vailam cung a thihnak ah tipil a innak zong hi ai tel mi a si.
Rom 6 ah Paul cu Khrih chung ah tipilnak a ing i Khrih he an thiti ti kha kan hmuh. Cun Kalati 2:20 ah, “Cucaah a nung mi cu keimah kha ka si ti lo, ka chung i a um mi Khrih tu hi a si deuh. Atu i ka nun mi minung hi a ka daw i ka ca i a nunnak a pe mi Pathian Fapa zumhnak thawng in ka nung.”
Kalati 3:27-29 ah, “Khrih chung ah tipil nan ing i Khrih nunnak in nan i thuam. Cucaah Judah mi le Jentail mi, sal le luat mi, nu le pa kar ah zeihmanh thleidannak a um ti lo, Khrih Jesuh he nan i pehtlaihnak thawngin pakhat nan si dih cang. Cucaah Khrih ta nan si ahcun Abraham tefa nan si i Pathian biakam ning in rocotu nan si” tiah a ti.
Jesuh Khrih chung ah tipil in ti cu a tuahsernak vialte zumh le tipil a innak le a thisen zumh kha a si. Jesuh tipil innak le a thisen zumh cu Jesuh nih a luancia kum 2000 ah vawlei sualnak vialte a hnawh dih cang ti zumh kha a si. Khamhnak a kan petu lam dang a um ti lo.
JESUH TIPIL INNAK LE THISEN KAN ZUMH TIKAH PATHIAN NIH A KAN KHAMH
Ngaihthiam hal thlacamnak nih kan sualnak a hnawt kho maw?
Hnawt kho lo. Sual ngaihthiamnak cu Johan nih Jesuh tipil apeknak ah vawlei sualnak vialte a cung ah a chuan dih zumhnak thawngin kan hmuh
“Zeicahtiah kan lung in kan zumh i Pathian he i remnak kan hmuh, kan kaa in kan chim i khamh kan si” (Rom 10:10) tiah a ti.
“Khrih chung ah tipil nan ing i Khrih nunnak in nan i thuam” (Kalati 3:10) tiah a ti. Kan zumhnak nih Khrih chung ah tipil a kan inter, Khrih in a kan thuamter i Pathian fa kan si. Jesuh hi vawlei a rat i tipilnak a in tikah, kan sualnak le vawlei sualnak vialte a cung ah chuan a si.
Kan zumhnak nih Khrih he pum khat a kan siter. A thihnak ah kan thi ve. A thawhthannak ah kan tho ve. Atu cu Jesuh Khrih tipil innak, a thisen, a thawhthannak, van a kainak le a rat thannak kan zumh caah, vancung pennak chung ah a zungzal in kan lut kho.
Jesuh thisen lawng kan zumh tikah, kan thinlug ah a tang mi sualnak nih harsatnak a kan pek zungzal. Zeiruang ah? Kan sualnak vialte a kan thianpiak i a zungzal in hawra bantuk in a kan rantertu Jesuh tipil innak kan zumh lo caah a si.
Na sualnak vialte an khamhtu Jesuh tipil innak le vailam cung a thisen na zum maw? Hi ai rawk kho lo mi biatak hi zum tuah. Jesuh tipil innak zumh lo cun na zumhnak cu pakpalawng a si. Jesuh tipil innak zumh lo cun na sualnak in khamh na si kho lo.
Jesuh vailamtah lawng a zum mi nih, “Jesuh cu ka Bawipa a si, ka Khamhtu a si i ka caah vailam cung ah a thi. Thihnak in a thothan i vancung a kai hlan ni 40 chung a thawhthannak kong tehte a khan hnu ah van ah a kai i Pathian orhlei kam ah a thu. Kan dihlak biaceih awk ah a ra than lai i Jesuh ka ton khawh nakhnga rak ka thleng dih cikcek ko tiah thla ka cam. Jesuh ka khamtu kan dawt tuk” tiah an ti.
An sual ngaihthiamnak caah thla an cam i sualnak ngei lo ding in an i ruahchan, asinain an thinlung ah sualnak a tang peng. “Jesuh cu ka zumh asinain ka thinlung ah sualnak a um peng. Jesuh cu ka dawt asinain ka thinlung ah sualnak a um peng. Ka sualnak ruang ah nupi thi tlangval pa ka sin ah ra ko cang ka tikho lo i ka khamhnak kong ah fiannak ka ngei lo. Cucaah fak piin thla ka cam hnu le kai timhlamh dih hnu lawng ah Jesuh a ra te lai tiah ka zumh. Ka thinlung dihlak in Jesuh ka dawt asinain ka thilung sualnak ruang ah hmaitonh te hmuh ding cu ka ngamh lo” tiah an ti.
Jesuh nih “Zeiruang ah dah ka tling lo tiah nai ruah?” tiah biahal hna sehlaw.
An lehnak ding cu, “Bawipa, nitinte ka sual caah kan ding kho lo. Cucaah misual mi hna na auh tikah kei zong rak ka au ve” an ti lai.
Pathian, Sertu le Biaceihtu a si mi nih misual mi a cohlang hna lo i a fa ah a ser hna lo ti kha an hngal lo.
Nupi thi tlangval pa nih a nupi thit ding mi sualnak vialte kha a hnawhpiak dih, asinain ngaknu cucu a hngal lo i a sualnak kha harnak ai pekter. Kan taksa nih sualnak a tuah ruang ah misualfa ka si tiah kan ruah ahcun Pathian ah zumhnak kan ngei lo tinak a si. Pathian biatak kan hngalh lo i kan fian lo tikah sualnak kha kan thinlung ah a karh.
Zeiruang ah dah mi cheu khat an thinlung ah a tang mi sualnak ruang ah harnat n tuar?
An sualnak vialte a hnawt dihtu Jesuh tipil innak kha an thinlung in an hngal lo i an cohlan lo caah
Nupi thi tlangval pa nih vawlei sualnak vialte a hnawh dih cang. Khuazei ah? Jordan tiva tipil a innak ah. Hi biatak a zum lo mi paoh cu misualfa an si. A hnawmtam mi ngaknu an si.
Nupi thi tlangval pa nih “Ka nupi na si lo ahcun zeitindah na ka dawt khawh lai? Ka pasal na si na ka ti hlan ah, na sualnak vialte hnawh ta a hau” tiah an ti.
Jesuh tipil innak tel loin khamh kan sikho maw? Kan si kho lo! Pathian muisam keng in ser kan si caah kan thinlung le kan chiatha thleidannak in dinfelnak kan kawl. Asinain kan thinlung a thian lo ahcun misualfa ka silo ti cu a si kho lo mi a si. Jesuh tipil innak kan zumh i kan cohlan lawng ah sualnak ka ngei lo i miding ka si tiah kan ti khawh.
Kan thinlung ah sualnak kan ngeih ko bu ah miding kan si kan ti zong ah kan chiatha thleidannak nih a hngalh peng. Cubantuk dirhmun um bu cun Pathian zong nih a kan cohlang kho lo. Pathian cu lih a chim bal lo.
Pathian nih Moses cu Israel mi lu rel hna law an nun man ka pe hna seh tiah a ti. Mirum nih Shekel cheu nak tam an pe lai lo i misifak zong nih tlawm an pe hlei lai lo tiah a ti. Mi zeipoah nih nunnak an pek la.
Cucaah Jesuh nih a nunnak a kan pek mi a zum duh lo mi cu zeitindah thianter a si khawh lai? Cubantuk minung cu a thilung ah sualnak a ngei peng tinak a si.
Jesuh thisen lawng kan zumh tikah kan thinlung ah sualnak a caam peng i misualfa ka si tiah kan phuan a herh. Asinain tipil a innak le a thisen hmun khat ah kan zumh ahcun sualnak ka ngei lo tiah kan ti khawh. Khamhnak le zungzal nunnak cu kan ta a si.
THLARAU VOLHPAMH
Zeibantuk sualnak nih dah minung hi hell ah a thlak?
Thalrau dohkalh, phun dang in cun, Jesuh tipil innak zumh lo
Rom 1:17 ah, “Zumhnak thawng in Pathian he aa rem mi cu an nung lai a tibantuk khan Pathian he i remnak cu a hramthawk in a dongh tiang zumhnak thawng in a si” tiah a ti. Pathian dinfelnak cu a thawngtha bia ah a lang. Jesuh cu hi vawlei ah a ra i tipil innak le vailam cung a thisen in vawlei sualnak vialte a tawl dih. Jesuh tipil innak le thisen cu thawngtha bia thawnnak a si. Jesuh nih kan sualnak cu voi khat ca za lak in a hnawh dih.
Zumh cu khamhnak a si i zumh lo cu hell tlaknak a si. Vancung khua kan Pathian nih a fapa ngeihchun hi vawlei ah a run thlah i kan sualnak caah tipilnak a inter. Cu a zum mi paoh cu an sualnak in thianh an si.
Hi vawlei ah a tang mi sualnak cu Jesuh tipil innak le a thisen zumh lonak sual lawng a si cang. Zumh lo cu Thlarau volhpamh a si i cucu Pathian nih bia a ceih lai i hell ah a thlak lai. Hihi a fak bik mi sualnak a si. Hi sualnak a tuah mi paoh nih an i chir i Jesuh tipil innak an zumh a herh. Cu lo ahcun, a zungzal in an rawk lai.
Jesuh tipil innak le thisen tehte khaannak in khamh na si maw? Johan 1:29 ah, “Zohmanh u! Pathian tuufa, vawlei sualnak a kalpitu khi” tiah a ti mi hi na cohlang maw? Hebru 10:18 ah, “Sual ngaihthiamnak a umnak ahcun sual thawinak a herh ti lo” a tibnatuk Jesuh tipil innak le a thisen na zum maw?
Jesuh tipil innak le a thisen a zum mi paoh cu Pathian nih a hngalh hna. Pathian nih a fa ah a ser hna. Jesuh tipil innak le a thisen a zum mi paoh cu a dingfel mi a dawtnak in a khamh hna.
Pathian nih a thlah mi paoh nih cun Pathian bia an chim i vawlei ta a si mi le Pathian nih a thlah lo mi paoh nih anmah ruahnak kha an chim. Hi vawlei ah Pathian bia a chim mi an tampi i Pathian nih Jesuh tipil innak le vailam a cung a thisen kong a chimter mi hna an tampi.
Anmah bia lawng a chim mi cu an ruahnak ai bochan mi an si. “Adam sualnak in khamh kan si, nitinte sualnak cu sualchir thlacamnak in ngaihthiam a herh” tiah an ti. Duhsah tein thianter kan si an ti.
Asinain mi pakhat cu amah tein ai thianter kho maw? Kanmah zuamna le tuahsernak in kan i thianter kho maw? Kan sualnak Pathian nih a kan hnawhpiak ruang ah maw thianter kan si asiloah kanmah tein kan i zuamnak nih dah a kan thianter?
A dik mi zumhnak nih a kan thianter. Meihol cu voi thong khat tawlnak in ranter khawh a si maw? Vun nak mi cu muici dang thuhnak in kan ranter kho maw? Sahpiat zeitluk tam hmanh nih kan sualnak a tawl kho lo. Jesuh tipil innak le vailam cung a thisen zumhnak thawng in thianter kan si maw?
A dik mi zumhnak cu Jesuh tipil innak le vailam cung a thisen zumhnak in a ra mi a si. Khamhnak cu kanmah tuahsernak theipar a si lo. Jesuh tipil innak le vailam cung a thisen zumhnak thawng lawng in sualnak chungin kan luat kho i miding kan si.
Pa Pathian nih a fapa kut a kan pek dih i a zum mi paoh nih zungzal nunnak an ngeih. Fapa zumh ti cu tipil a innak vailam cung a thisen zumhnak tinak a si. A zum mi paoh cu Pathian an si lai i zungzal nunnak an ngei lai. Khamh a si mi paoh cu Pathian orhlei kam ah a zungzal in an nung lai.
Jesuh tipil innak zumh le Pathian he pum khat si cu Thlarau ah pum khat kan si tinak zong a si. Biatak nih cun hrinthannak a kan pek. Jesuh tipil innak le a thisen zumhnak thawng in khamh kan si.
Zumhnak ngei. Jesuh tipil innak le a thisen zumh cu khamh hmuhnak a si. A dik mi thawngtha ah zumhnak ngei law sual ngaihthiamnak co ve cang.
Copyright © 2021 by The New Life Mission
