- All e-books and audiobooks on The New Life Mission website are free
- Explore multilingual sermons in global languages
- Two new revised editions in English have been released
- Check out our website translated into 27 languages
A konglam 8: Thiang Thlarau
[8-7] Na Thinlung Ah Thiang Thlarau An Cotertu Thawngtha Bia Dawh (Isaiah 9:6-7)
“Kan caah ngakchia pakhat a chuak! Fapa pakhat pek kan si! Amah cu kan uktu bawi a si lai. Amah cu Khuaruahhar Fim Chimtu, A thawng mi Pathian, Zungzal Hmun mi Pa, Daihnak Bawi, ti a si lai. A lianngannak cu a than chin lengmang lai; a ram cu a dai zungzal lai. Siangpahrang David tefa pakhat bantuk in a ram cu a uk lai i a tut hawk in caan donghnak tiang, hmaante le ding tein a uk lai. Ralkapbu Bawipa cu hi vialte hi tuah hrimhrim awk ah aa tim.”
Zei nih dah zumtu thinlung ah Thiang Thlarau khua a sakter?
Ti le Thlarau thawngtha bia dawh nih.
Thiang Thlarau conak ding ah ti le Thlarau thawngtha bia ah zumhnak kan ngeih ding a si. Kan Bawipa cu, Khuaruahhar, Fim chimtu, a Thawng mi Pathian tiah min bunh a si. Kan Bawipa nih vancung kainak lam ka si tiah a kan chimh. Jesuh Khrih nih kan dihlak tein thawngtha bia dawh laksawng a kan pek.
Asinain, hi vawlei ah an nunnak muihnak chung ah a hmang mi an tamtuk rih. Muihnak chung in luat an duh nain thawngtha bia dawh an hngalh lo caah zeitik hmanh ah an luat kho lo. Zumhnak dik lo ah an nunnak a rocar. Cun biatak a kawl mi hna nih cun thawngtha bia dawh an hmuh lai i an nun chung dih lak Bawipa thluachuah he caan an hman lai. Bawipa thluachuahnak hleice ka co mi nih midang kha sual ngaihthiamnak co ding le thawngtha bia dawh co ding ah a ka bawmh tiah ka ruah.
Cucaah sual chung luatnak hi a thluachuahnak caah a si lo ahcun kan co kho hnga lo. Bawipa kan ton cang i Thiang Thalrau kan co cang ah Pathian nih thluachuahnak a kan pek tinak a si. Asinain ngaihchia ngai a si mi cu, minung tampi nih Pathian thluachuahnak hi thawngtha bia dawh zumhnak in a ra ti hi an hngal lo.
Pathian thluachuahnak cu Pathian nih a fapa ngeihchun Jesuh Khrih hmang in a kan pek mi thawngtha bia dawh hmang kan co mi a si. Jesuh cu hi vawlei sualnak in a kan khamhtu le a zaangfahnak vel thluachuah a kan petu a si. Ahohmanh in sualnak chung in a kan khamh kho lo i kan thinlung sualnak a kan thianhpiak kho lo. Aho nih dah amah sualnak cu ai khamh khawh lai i zungzal thihnak in a luat khawh lai?
Pathian nih “Na ruahnak i lam ding a si na ti mi kha thihnak lei kalpitu lam a si ko hnga” (Phungthlukbia 16:25) tiah a ti. Minung nih anmah tein biaknak an i ser i rawhralnak lam kha an panh. Biaknak tampi nih dinfelnak kan tanh tiah an i porhlaw i an lam kha sualnak in khamhnak lam a si tiah midang kha an hmuhsak hna, asinain kan sualnak in a kan khamh khotu thawngtha bia cu Jesuh nih a kan pek mi thawngtha bia dawh lawng hi a si. Jesuh lawng hi misual an sualnak in a khamh khotu hna a si.
Johan 14:6 ah, “Keimah cu lam le biatak le nunnak ka si” tiah a ti. Thihnak lam a zul mi hna caah a taksa le a thisen kha a pek. Cun nunnak dik taktak lam ka si tiah a kan chimh. Pathian nih Jesuh nih a kan pek mi thawngtha biadawh na zumh lo ahcun Pathian pennak chung ah na lut kho lai lo tiah a ti.
Vancung Pennak chung kan luhnak ding ah ti le Thlarau thawngtha bia kha kan zumh i Jesuh cu sualnak chung in a kan khamhtu a si tiah kan zumh a herh.
Hlanlio Israel Chan Ah Voi Khat Cu!
“Siangpahrang Ahaz nih Judah ram a uk lioah khan raldohnak pakhat a chuak (Ahaz cu Jotham fapa a si i Jotham cu Uzziah fapa a si). Siria siangpahrang Rezin le Israel siangpahrang Pekah nih Jerusalem kha an tuk, sihmanhsehlaw an la kho lo. (Pekah cu Remaliah fapa a si).
Israel cu a hramthawk ahcun ram khat a si. Asinain a hnu ah chak le thlang tiin ai then. Pathian biakinn cu thlanglei pennak, Jeroboam nih a uknak ah khan a um. A hnu ah, Solomon sal pakhat a si mi Jeroboam nih chaklei ah pennak pakhat a dirh ve i cuticun pennak cu ai cheu. Cu thawk cun Pathian an zumhnak zong a zorchuk ve. Zumhnak zorchuk hi tuchan zong ah biaknak dik lo pawl hrampi a hung si. Cuticun Jeroboam cu zumhnak kalsualnak hrampi le thawktu a hung si. Pathian nawlbia kha amah duh ning a remh i a pennak kha a kilven caah amah cu zumhnak dik lo hrampi a hung a si. Chaklei pennak Israel ah biaknak dang a dir i Thlanglei Pennak Judah zong kha lak ai zuam. Kum 200 deng a rauh hnu zong ah cu pennak pahnih an i dohnak cu ai thleng hlei lo.
Cutikah Pathian nih Isaiah hmang in, “Siria ram nih hin Israel ram le a siangpahrang he thurual tlu in Judah ram dohnak khua kha an khan. Judah ram cu vung chim i ru ram chung mi hna cu vung lauter i amah lei i tanter i Tabeel fapa kha bawithutdan cung i thutter kha an i tim, nan va ti lai. Sihmanhsehlaw Bawipa keimah hrimhrim nih, hihi cu a si bal lai lo ka ti kha nan va chimh lai. Zeicahdah a si bal lai lo? Siria cu Damaskas nakin a thawng deuh lo i Damaskas cu Saingpahrang Rezin nakin a thawng deuh fawn lo. Israel tu cu, kum 65 chung ah hin a rawk tuk lai caah miphun pakhat ti awktlak hmanh in a dirk ho lai lo. Israel cu Samaria khua nakin a thawng deuh lo i Samaria cu Siangpahrang Pekah nakin a thawng deuh fawn lo. Na z umhnak a thawn lo ahcun, na hmun hrimhrim lai lo, a ti, tiah hung chim,” a ti (Isaiah 7:5-9).
Cu lio caan ah Pathain nih Isaiah hmang profet bia kha siangpahrang Ahaz sin ah a phuan nain Ahaz nih Pathian ah zumhnak a ngei lo. Ahaz nih a thin a phan mi cu Sira nih an dohnak kha ka kham kho lai lo ti kha a si, cun Siria le Israel kha hmun khat an tang ti lai ti kha a theih tik ah tihnak in a khat. Asinain Pathian salpa Isaiah a ra i, “kum 65 a tlin hlan ah chaklei Israel cu a rawk lai. Cun siangpahrang pahnih nih that lonak khua an khan mi cu zeitik hmanh a tling lai lo” tiah a ti.
Pathian salpa nih Siangpahrang Ahaz kha Pathain sin in hmelchunhnak kawl tiah a ti.
“Bawipa na Pathian cu hmelchunhnak pakhat in hal tuah, a thuk lei ah mithi khua in a hung chuak mi hmelchunhnak tluk zong thuk ko seh, a sanlei ah vancung in a rung tum mi tluk zong in sang ko seh, a ti” (Isaiah 7:11). “Cu tikah Isaiah nih cun aa thawh i, “Siangpahrang David tefa a si mi pa, ka bia hi ngai tuah. Hi tluk in minung in na puanter cang pin ah hin maw Pathian ing cu na puanter rih lai? Atu cu Bawipa hrimhirm nih hmelchunhnak an pek lai. Ngaknu pakhat a um i fapa a hrin lai i a min ah Immanuel sak a si lai” (Isaiah 7:13-14). Profet bia a phuan mi cu: Ami hna kha an sualnak in ka khamh hna lai ti a si.
Aho Dah Pathian Ral A Si?
Minung ral cu sualnak a si i sualnak cu Satan sin a chuak mi a si. Cun ahodah
Sualnak in a khamhtu a si? Mi khamhtu cu Pathian Fapa, Jesuh Khrih a si. Minung cu kan taksa sinak hrimhrim in a derthawm mi kan si caah sualnak dah lo kan tuah khawh mi a um lo. Satan thawnnak tang ah a um. Mi lianngan tampi nih kuttial zohthiam le hmailei kong chim thiam kha an fuh hna i profet deu nih a chimh hna ning in nun khawh an i zuam. Hihi Satan thawnnak tang ah an um ko ti a langhnak a si.
Bawipa nih Isaiah kha khamhnak kong a phuanter i ngaknu thiang nih fapa a hrin lai i a min ah Immanuel ti a si lai tiah a phuan. Pathian nih a fapa Jesuh kha minung taksa bantuk in vun thlah i Satan thawnnak in khamh ding kha a timhlamh mi a si. Cu biaphuan ning bantuk tein Jesuh cu ngaknu thiang hmang in hi vawlei cung ah a ra.
Jesuh hi rak ra hlah sehlaw Satan thawnnak tang ah kan um peng rih ko hnga. Asinain Jesuh cu hi vawlei ah a ra, Johan nih vawlei sualnak vialte kalpi ding ah tipilnak a pek i sual leiba cham ding ah vailam cung ah a nunnak a pek. Cucaah, minung tampi nih thawngtha bia dawh an zumh i sual ngaihthiamnak an co caah Pathian fa an si.
Tuchan zong ah, Baibal thiamsang tampi nih Jesuh hi Pathian maw a si minung dah tiah an hal lengmang. Conservative Baibal Thiamsang hna nih “Jesuh cu Pathian a si” tiah an ti, asinain New Theologian hna nih Jesuh cu Joseph fa ei a si tiah an ti. Zeitluk ngaihchia dah a si!
Cun cheu kha New Theologian pawl nih Jesuh ticung a kal mi hi kan zum kho lo tiah an ti. “Jesuh cu tiva tlangkam te in a kal i a zultu hna nih lam hla piin an hmuh caah ti cung kal mi ah an ruah” tiah an ti. Tuchan New Theology in doctor pawl hi hna theology lei ah mi lianngan lawng te an si lo. A tam u nih cun an hngalhfian khawh mi lawng zumh ding an i tim.
A dang tahchunhnak pakhat pek ahcun, Baibal nih Jesuh nih minung 5,000 kha nga pahnih le changreu panga in rawl a dangh hna tiah a kan chimh. Hi khuaruahharnak hi an lunghrinh peng. A tanglei bantuk in an fianter. “Minung nih Jesuh kha an zulh i an rawltam tuknak ah an thi deng. Cu tikah Jesuh nih a zultu kha rawl a hlei mi vialte kha khawm u tiah a ti hna. Ngakchia pa nih ai ken mi rawl kha lungtho tein a pek caah a dang zong an lung a tho ve i, an rawl cio an vun chuah ve. Cuticun an rawl vialte cu an van khawmhsuat i an ei tik ah sei hlei hnih a hlei” tiah an ti. Hibantuk Theologian nih Pathian bia kha anmah ruah khawhnak he ai tlak ding in an mersan piak.
Pathian biatak zumh ti cu Pathian nih a kan pek mi thawngtha bia dawh zumh kha a si ko. Zumhnak kan ti mi cu thil pakhat nih sullam a ngei caah a siloah sullam lo a ngeih lo caah zumh lo ti kha a si bal lo. Kan hngalhfian khawh zong khawh lo zong ah Pathian bia cu ai tial ning tein kan zumh i kan i bochan ding a si.
Jesuh cu minung fa siding ah thla a sinak cu kan sualnak vialte in khamh ding ah a si. Pathian a si mi Jesuh cu kanmah khawh awk ah hi vawlei ah a ra. Profet Isaiah nih cun minung fapa in a ra i ngaknu thiang in hrin a si tiah a kan chimh.
Genesis 3:15 ah Pathian Bawipa nih rulpi sin ah, “Nangmah le minu kar ah ral ka ser lai i na tefa le a tefa cu ral an si lai; Nang nih a kedil kha cuk nai zuam lai i, anih nih na lu kha rial an zuam ve lai” tiah a ti. A sullam cu Pathian nih Jesuh kha minung muisam in van thlah i minung sualnak khamh ding ah a timhlamh cang tinak a si.
Kan Baibal ah “Thihnak na mi teinak cu khuazei ah dah a um? Thihnak, mi fahnak na pek khawhnak hmual cu khuazei ah dah a um? Thihnak nih fahnak pek khawhnak hmual a ngeih mi cu sualnak in aa lak mi a si i sualnak nih a thawnnak cu Nawlbia in aa lak mi a si” (1 Korin 15:55-56). Thihnak in a thil ti khawhnak cu sualnak a si. Minung nih sualnak a tuah titk ah thihnak nih sal ah a tlaih. Asinian kan Bawipa nih, “Minu tefa nih na lu an rial lai” tiah a ti. A sullam cu Jesuh nih Satan thil ti khawh thawnnak kha a hrawh tinak a si.
Jesuh cu hi vawlei ah a ra i vawlei sualnak vialte kalpi ding ah tipilnak a in dih hnu ah sual leiba champiak ding ah vailam cung thihnak a tuar. Thawngtha bia dawh a zum mi vialte kha an sualnak in a khamh hna. Adam le Evi nih sualnak an tuah tik ah Pathian nih Satan thawnnak chung in khamh ding ah bia a kamh hna. Chanthar vawlei ahcun, Pathian ral cu thawngtha bia dawh a zum lo mi hi an si.
Zeiruang Ah Dah Jesuh Vawlei Ah Hrin A Si?
Pathian nih kan sualnak chung in khamh ding ah nawlbia le thawngtha bia dawh a kan pek. Nawlbia tang ahcun minung hi Pathian hmai ah misual an si. Cubantuk in, nawlbia pek kan sinak cu minung nih kan sualnak kan hngalh khawh nakhnga caah a si. Minung cu nawlbia le sualnak sal ah a tan tikah, kan Bawipa cu nawlbia tlamtlinter ding ah a ra.
Jesuh cu nawlbia tang ah a chuak. Nawlbia chan ah a chuak. Minung n ih nawlbia a herhnak cu an sualnak kha an hngalh i sual ngaihthiamnak an co khawk nakhnga caah a si. Kan takpum a hnawm ti kan hngalh lawng ah a thianh awk kan hngalh lai. Cubantuk in, sualnak hngalhnak ding ah cun Pathian nawlbia hngalh a hau. Nawlbia um lo ahcun sual hngalhnak a um lai lo, sual hngalhnak a um lo ahcun Jesuh hi vawlei rat a herh hnga lo.
Pathian nawlbia na hngalh ahcun amah hngalhnak caan tha zong na ngei tinak a si. Nawlbia kan hngalh caah sual hngalhnak zong kan ngei. Kan sualnak kan hngalh hnu lawng ah Jesuh nih thawngtha bia dawh a kan pek mi kan zumh khawh. Pathian nih nawlbia kan pe hlah sehlaw misualfa kan si hnga lo i dantatnak zong a um hnga lo. Cucaah Pathian nih nawlbia a kan pek i kan sualnak vialte in khamh awkah thawngtha bia dawh kha laksawng ah a kan pek.
Sertu le ser mi kar ah a um ding mi nawlbia cu khamhnak nawlbia hi a si. Cucu dawtnak nawlbia a si. Pathian nih, “Asinain a chia le a tha hngalh khawhnak thingthei cu nan ei lai lo” (Genesis 2:7) tiah a ti. Hihi Pathian nih a kan pek mi nawlbia a si i, nawlbia hi Pathian nih a dawtnak in kan sualnak vialte in a kan khamhnak hrampi a hung si. Khamhnak nawlbia a hrampi cu kan sualnak ngaihthiamnak hi a si. Pathian nih keimah cu an sertu hna ka si i zeizong te hi keimah tining in an hung um tiah a kan chimh. A sullam cu Pathian cu zeizong vialte cung ah nawlngeitu sang bik a si i, minung nih thawngtha bia dawh in a kan khamhnak hi kan zumh a herh.
Zeizong te cung ah nawlngeitu Pathian hi zeizong te cung ah a tha mi a si. Pathian nih vawlei a dawtnak nih a fapa ngeihchun kha misual hna khamhtu si ding ah raithawinak tiang a phakter. Pathian nih thawngtha bia dawh hi kan pe hlah sehlaw kan vuivai hnawh hnga. Cucaah Pathian nih rawhralnak chung khan khamh a kan duh i khamhank nawlbia kha a ser. Nawlbia nih kan sualnak a kan hngalter i nawlbia kan zoh tik ah Jesuh nih a kan khamhnak thawngtha bia dawh kan zumh khawh. Pathian bia kan buar tikah, nawlbia hmai ah cun misual kan si ti kha a lang i, a hmai ah kan sualnak ngaithiam ding ah khukbik in kan nawl.
Jesuh cu hi vawlei ah nu pawchung in hrin a si i kan sualnak in khamh ding ah hi vawlei ah a ra. Jesuh cu hi vawlei ah minung mui in a ra i Pathian duhnak kha a tlinter. A thawngtha bia dawh kha kan zumh. Cucaah, Bawipa kan thangthat.
Mi pakhat nih “Zeiruang ah dah Pathian nih fawi zaang tuk in kiak kho ding in sualnak tuah kho ding a ka tuah i ka palhnak ruang ah lung nuam loin ka um peng?” tiah a vuivai kho men. Asinain kan temtuar hi Pathian duh mi a si hrimhrim lo. Jesuh thawngtha bia kan lunghrinh ruang ah temtuarnak a kan phakter mi a si. Pathian nih temtuarnak le thawngtha bia dawh a pahnih in a kan pek i a fa kan si caah amah bantuk in thawnnak kan ngeih khawh kha a duh mi a si. Cucu aa tinh mi a si.
Asinain khuachian nih, “A si lo! A si lo! Pathian cu hramhram uktu a si! Kal law, na duh ning paoh nung ko. Nangmah tein i uk! Nangmah tein hmailei na lam ser” tian an ti. Khuachia nih Pathian kan zumh khawh lonak ding ah lam a kawl peng. Asinain Pathian tinh mi leng in a nung paoh cu Pathian nih a timh mi khamhnak lam ah dawnkhantu an si. Jesuh cu hi vawlei ah a ra i Satan thawnnak tang ah a um mi vialte kha an sualnak kaltak ding ah a sawm hna. Pathian loin kan nun ding a si lo.
Minung Cu Hell Kal Ding Ah Misualfa In Hrin A Si
Hi vawlei ah ai thleng lo mi biatak a um hrimhirm lo. Cucaah, Asinain Jesuh thawngtha bia dawh cu ai rawk kho lo mi biatak a si. Cucaah minung nih hi biatak hi bochan in Satan thawnnak chung in luat khawh a si. Minung nih Adam le Evi sualnak ro kan i Jesuh tel loin cun hell kal ding kan si ko. Jesuh raithawinak ruang ah Pathian fa sinak thluachuah kan co caah Bawipa ah i lawm ko hna u sih. “Zebulun le Naftali phun umnak ram nih hin hlan ah cun ningzahnak a rak phan nain hi ram nih hin hmalei ah cun upatnak a hmuh lai, cu ram cu Mediterranean rili in aa thawk lai i nichuahlei ah Jordan tiva ral tiang, miphun dang an umnak Galilee ram hrimhrim tiang a phan lai” (Isaiah 9:1). Pathian nih a fapa cu hi vawlei ah a thlah i a thawngtha bia dawh a zum mi paoh kha a sunparnak a hrawmh hna.
“Mui lak i a rak i chawk mi hna nih khan ceunak nganpi an hmuh cang! Thihnak thladem tang ah an rak um, sihmanhsehlaw atu cu ceuhnak nih a ceuh cang hna” (Isaiah 9:2) tiah a ti. Tuchun ah, hi bia hi nangmah le keimah ca a hung tling. Thawngtha bia dawh zumhnak thawng in nangmah le keimah nih vawlei nih a ngeih khawh lo mi zungzal nunnak kan ngei. Jesuh nih vawlei cung minung vialte cu thawngtha bia dawh in a kan khamh i cu thawntha bia dawh a zum mi vialte cu zungzal nunnak le Vancung Pennak chung luhnak nawl a pek hna.
Ruahchannak A Ngei Lo Mi Hna Sin Ah Ceunak Thawngtha Bia Dawh A Tlanter
Minung cu hi vawlei ah tichum bantuk kan hung um i caan rau lo te ah kan lo than. Minung nunnak cu ramkung le hramh bantuk men a si. Hramh cu caan khat ca te lawng nunnak a ngei i Pathian tinh mi piak ning bantuk tein caan rau lo teh a lo than. Kan nunnak hi hramh pakpalawng a si bantuk in pakpalawng a si ve. Asinain Pathian nih a derthawm mi kan thlarau cu thawngtha bia dawh a pek i a dinfelnak in a fa ah a kan ser. Zeitluk khuaruahhar vel dah a si! Pakpalawng a si mi kan nunnak cu zungzal nunnak ah ai cang, cu tluk a lianngan mi a dawtnak le fa ah a kan sertu a dawtnak cu lawm ko hna u sih.
Thawngtha bia dawh zumhnak ruang ah Pathian thluachuah le vel a co mi thlarau nih a phuan mi cu hihi a si.
“Pathian a zum lo mi chungkhar in ka chuak. Cucaah, zingchiarte ka nu nih a hmaika cawk in ti ai chiah i vawlei le vawlei sertu pathian hmai ah kan chungkhar caah thla a cam khaw ai dawh tiah ka rak ruah. Ka vun upa deuh i zeiruang ah dah hi vawlei ah ka um, ka nun man hi zeidah a si ti, ka nun zong ka thih zong ah zeidah a hlawknak a um tiah khua zaza ka ruat. Man ka ngeihnak kai theih lo caah lungdong ngai in ka um.
Hibantuk nunnak nih a ka buai caah chungkhar dirh kha kai nam. Ka chungkhar dirh mi zong a tha ko. Zeihmanh duh mi dang ka ngeih lo caah ka nunnak cu daite le nuam tein ka hman. Fa ka van ngei i cu thawk cun ka chug ah dawtnak ti mi ai sem. Keimah tinak vialte kha thlau hram kai thawk i cun ka dawt mi hna zong ka thlau sual hna lai ti ka phang.
Cucaah Pathian kawl hram ka thawk. Keimah cu a kekkuai fawi tuk mi, zeihmanh tuah kho lo mi ka si caah ka dawt mi vialte hna zohkhenhtu ding ah Zeizong te ti khotu nih a ka ven piak a hau. Cu tikah biakinn kal hram kai thawk i a sinain ka nu nih a hmaika ticawk in ti ai hunh i thla a cam bantuk zumhnak he khan cun ka zumhnak cu ai dang-ka thlacamnak cu pakpalawng le ruahchannak um lonak bantuk khi a si ko.
Voi khat cu khrihfabu hmete ah pumhnak ah ka va kal ve i thla ka cam lio ah, ka mitthli tlak hram ai thawk. Ka khuaruahhar a har i ka ngo lai ka tinain ka mithli cu a tla peng. Ka pawng minung hna nih ka cung ah an kut an chuan i Thiang Thlarau na co cang tiah an ka conglawmhnak. Asinain ka li a leng. Pathian bia zong ka hngal lo i ka zumhnak zong pakpalawng a si rih caah cubantuk ka um cu Thiang Thlarau a si lai tiah ka zum kho lo.
Kai pumhnak Khrihfabu cu Pentecostal-Charismatic Movement a si i mi tampi nih keimah bantuk hmuhtonnak an ngeih cio i an zapi ti awk in holh theih loin an holh. Ni khat cu mi nih Thiang Thlarau a khat tiah an ruah mi Pastor pakhat cawnpiaknak ngai ding in an ka sawm ve. Pastor nih Khrihfabu ah minung tampi a pumh hna i Thiang Thlarau thawnnak in hnar lei damlonak a ngei mi kan damter hna lai tiah a ti. Asinain hnarlei damlonak cu siizung nih fawi tein a damh khawh mi a si ko tiah ka ruah caah zeitindah Thiang Thlarau a co ti kha hngalh ka duh deuh. Pastor pa nih hnalei damlonak cu a damter khawh caah a vun i porhlaw pah i sianglai run a kai mi siangngakchia nih sainghleirun a awng lai maw awng lo ti ka phuan khawh tiah a vun ti than. A thil ti khawhnak kha minung tampi nih Pathian thawnnak in a si tiah an zumh caah an thangthat.
Asinain kei cu ka lungfian kho loo. Cun pastor pa nih a tuah mi thil khawhnak vialte kha Thiang Thlarau thawng in a si tiah ka ti kho lo. Pastor pa nih damlo a damter khawh le midang an hlawhtling lai maw tling lo ti a chimphuan khawh mi a biapi ah ka ruat lo. Cucaah a tuahsernak kha Thiang Thlarau sin in a ra mi khuaruahharnak a si tiah ka ruat kho lo.
Keimah nih ka co mi Pathian thawnnak le dawtnak cu hibantuk a si lo. Cucaah an biakinn kal kha ka ngol i a minung hna zong ka hrial cang hna. Cu hnu ah Pathian bia biapi ah a chia mi an si tiah ka ruah mi Khrihfabu ah kai pum than. Nawlbia kong ka cawn i miding fel lo ka si kha kai hngal. Pathian kha tih ding bantuk ah ka ruah cang i a hmai zong tha tein zoh ngam lo ding le Thiang Thlarau zong nih a ka daithlanh rua tiin ka ruah.
Isaiah 59:1-2 ah, “Bawipa cu nanmah khamh awkah a kut a tawi lo, bawmhnak nan hal mi theihnak caah a hna a chet lo. An theih hna lo cu nan sualnak ruang ah a si. Biak nan timh tikah amah sin phanh an dawntu hna cu nan sualnak kha a si” tiah a ti. Hihi ka dirhmun a si tiah ka ruat. Ka tuah mi vialte hi sualnak lawng a si caah Pathian fa ka si in Thiang Thlarau ka co kho lai tiah ka ruat lo.
Pathian kha ka tih i sualchir thlacamnak ka ngei peng. Ahohmanh nih an ka chim lo nain Pathian hmai ah upat awktlak tein dir ka duh. Misual ka si caah sualchir thlacamnak kha tam khun ka tuah. Ka tuah mi vialte cu ka ruahnak kha Pathian hmuhter i ka chung ah sualnak a um ko ti kha a si. Cu caan thawk cun, Pathian sin vuivai hram kai thawk. Pathian hmai ah midang le mitling si ka duh nain ka si khawh lo caah ka vuivainak a tam chinchin.
Hiti biaknak lei ka buaibai lio ah ka pa kha a zeng. A thih hlan ah ni 40 chung siizung ah hlainak an tuah i caan a hmang. Asinain ka pa caah voi khat hmanh thla ka cam kho lo. Misual ka si caah ka pa caah thla ka cam ahcun a tuarnak lam a zual chin lai tiah ka ruah. Ka zumhnak a tlawm ruang ah ka lung re a thei i Pathian zulh ka duh nain ka zulh khawh lo caah ka vuivai peng i a donghnak ah ka pial tak. Biaknak lam ka zawhnak cu cuticun a dong. Pathian ka zumh ahcun a Thiang Thlarau nih a ka umpi lai i daihnak ka hmu lai tiah ka ruah nain cuticun a rak si lo. Cu hnu cun, ka nun kha a buai deuhdeuh i tihnak le lawmhnak lo in ka khat.
Asinain Bawipa nih a ka hlaw lo. A bia hmang in Thiang Thlarau a co taktak mi zumtu tha he tonnak caan tha a ka pek. Amah sin in Jesuh nih tipil innak in vawlei sualnak vialte a lakdih cang i vailam cung a thihnak in kan sual leiba a kan champiak cang ti kha ka hngalh. Cucaah keimah sualnak tel in, vawlei sualnak vialte cu ngaihthiam kan si. Hi biatak ka vun theih Bi ka vun pemh tikah ka sualnak vialte hnawhpiak ka si. Pathian nih sual ngaihthiamnak a ka coter, Thiang Thlarau laksawng a ka pek i nun duhdimnak a ka coter. Dai tein a ka hruai, thil tha le thil tha lo hngalh khawhnak a ka pek i vawlei tukforhnak tei kho ding in thawnnak a ka pek. Ka thlacamnak a ka ngaihpiak hna dingfel tein le sullam ngei tein nun khawhnak a ka pek. Pathian nih a Thiang Thlarau a ka coter caah kai lawm.
Kan dihlak tein Thiang Thlarau co kho ding in Pathian nih a vel thluachuah a kan pek. Pathian nih a thawngtha bia dawh a ka pek caah kai lawm. Bawipa nih a thawngtha bia dawh a kan pek ruang ah amah cu ka thangthat. Pathian nih miding mi cu lawmhnak thluachuah a pek hna. Miding mi hna thinlung cu ai lawm. Bawipa nih zungzal lawmhnak a kan pek. Zeitluk in Pathian khamhnak, dawtnak le vel a sunlawi ti kha kan hngalh caah kan ilawm. Bawipa nih vancung in a ra mi thawngtha bia dawh in thluachuannak a kan pek. Hihi chawva in cawk khawh a si lo. Kan dinfel khawhnak ding le kan i lawmh khawhnak ding ah Bawipa nih thawngtha bia dawh le Thiang Thlarau a kan pek. Thawngtha bia dawh hi kan nun thluachuah a petu a si. Bawipa nih thawngtha bia dawh a kan pek i miding mi hna nih nun nuam tein an nun a hmuh tikah ai lawm ve.
Luka nih a tial bantuk in, Mary nih, “Zeicahtiah Pathian nih a tuah khawh lo mi thil zeihmanh a um lo,” tiah a ti. Mary nih aa thawh i, “Kei cu Bawipa salnu ka si ko, na chim bang cun ka cung ah si ko seh,” tiah a ti i vancung mi nih cun a kaltak” (Luka 1:37-38). Mary nih vancung mi nih a chim mi Pathian bia dawh a zumh bak in, Jesuh cu a pawi. Cubantuk in, zumhnak thawng in, miding mi hna nih an thinlung ah thawngtha bia dawh an zumh.
“Zeicahtiah rit piin an phorh mi hngawngkual kha na khiahpiak hna i an liang i a tu lengmang tu hna fung khan a khiah dih. Hlan liopi ah Midian ralkapbu na rak tei hna bantuk khan, na mi a hremtu hna le a serhsatu hna cu Bawipa nangmah nih na tei cang hna” (Isaiah 9:4). Satan nih kan nunnak ah lungretheihnak, zawtfahnak, namnehnak hna a chuahter i kanmah tein kan tei kho lo. Asinain Pathian nih a kan dawt caah Satan cu a tuk i a tei.
“Kan caah ngakchia pakhat a chuak! Fapa pakhat pek kan si! Amah cu kan uktu Bawi a si lai. Amah cu khuaruahhar fimchimtu, a Thawng mi Pathian, zungzal hmun mi Pa, Daihnak Bawi ti a si lai. A lianhngannak cu a thang chin lengmang lai, a ram cua dai zungzal lai. Siangpahrang David tefa pakhat bantuk in a ram cu a uk lai i atu thawk in caan donghnak tiang, hmaan te le ding tein a uk lai. Ralkapbu Bawipa nih hi vialte hi tuah hrimhrim awk ah aa tim” (Isaiah 9:6-70).
Jesuh nih a kan phorh mi thawngtha bia dawh hmang in Pathian nih a fa ah cawithlir a kan timh. A bia ning tein Satan thawnnak a tei i Satan thawnnak in a kan khamh.
Bawipa cu hi vawlei ah a ra i a thawnnak in sual muihnak thawnnak ka tei lai tiah bia a kan kamh. Hi ruang ah kan Bawipa cu Khuaruahhar tiah kan ti. Kan caah khuaruahhar thil tampi a tuah. Pathian nih a Fapa hi vawlei ah minung muisam in a ratter mi zong hi kan caah khuaruahhar a si. Bawipa nih, “Atu cu hi bia hi tha tein ruat tuah hna u sih. Nan sualnak cu a sen in sen hna hmanhsehlaw, hawhra bantuk in an thiang hna lai, a dum in dum hna hmanhsehlaw tuuhmul bantuk in an vaar lai” (Isaiah 1:18) tiah a ti.
Bawipa nih kan sualnak chung in khamh i zungzal ngaihthiamnak pek ding kha bia a kan kamh. Jesuh cu Khuaruahhar tiah ti a si i cu he ai tlak in kan caah khuaruahhar thil tampi a tuah. “A min cu Khuaruahhar, Fim chimtu, a Thawng mi Pathian” tiah ti a si. Pathian cu Fim chimtu a si bantuk in kan khamhnak kha thawngtha bia dawh a timhlamh i kan sualnak vialte chung in a kan khamh.
Pathian hruhnak hi minung fimnak nakina fim deuh rih. Jesuh nih tipil innak in vawlei sualnak vialte kalpi ding le vailam cung thisen luanter ding kha a fimnak in a timhlamh mi a si. Hihi kan caah a tuah mi khuaruahhar thil a si i a dawtnak nawlbia in kan sualnak in a kan khamh. Dawtnak nawlbia cu a kan khamh i Thiang Thlarau a kan cotertu ti le Thisen thawngtha hi a si.
Bawipa nih Isaiah 53:10 ah, “Bawipa nih aa thawh i, Temhnak a in cu ka rak duh mi a si ko, thihnak cu ngaihthiamnak a umtertu raithawinak a si. Cucaah a tefa kha a hmuh hna lai i chan saupi a nung lai, cun amah thawng in khua ka khan mi cu a tlam a tling lai.” Jesuh nih Pathian duhnak tuah ding ah a thlarau kha raithawinak ah a pekchanh. A fapa cung ah vawlei sualnak vialte a chuan dih i sual beicaihnak ah vailam cung ah a thihter. Hihi misual vialte kan sualnak in voi khat ca zalak in a kan khamhtu thawngtha bia dawh a si. Jesuh Khrih nih a nunnak a kan pek, sual leiba a cham i khamhnak thluachuah a kan pek.
Pathian Raithawinak Phunglam
Jesuh nih Johan sin tipil a innak in sualnak zeizat dah a lak?
A hramthawk in a dongh tiang, a luancia, atu caan le hmailei caan sualnak vialte a lak dih.
Bawipa nih nikhat ca sualnak ngaihthiam ding ah sual thawihnak kong a chim. Sualnak a tuahtu nih thawinak saram a rak put mi cung a kut a chuan i a sualnak kha a chuan. Cun thawinak saram cu a thah i a thisen kha tlangbawi a pek. Tlangbawi nih saram thisen cu a lak i biaktheng ki pali ah khan a toih hnu ah a hlei mi kha biaktheng velchum ah a thlet.
Cuticun nikhat sualnak cu ngaihthiam a si. Kutcung chuan cu sualnak a tuahtu nih a sualnak kha thawinak saram cung chuannak caah a herh mi a si. Raithawinak phung ning tein thawinak an tuah tikah sual ngaihthiamnak an co. Jesuh nih kan sualnak a lak hlan ah raithawinak phunglam zulh in sual ngaihthiamnak kan rak co.
Cun Israel mi hna kum khat chung an sualnak thawinak caah Pathian nih Remdaihnak Ni a serpiak hna. Cu thawinak cu a thla sarih thla a ni hra ni ah khan tuah a si. Cu ni ahcun Pathian nih tlangbawi ngan Aaron kha Israel mi vailte sualnak kha meheh cung ah a chuanter. An tuah ningcang vialte h Pathian phung ning lawng tein a si. Pathian ngaihthiamnak cu a fimnak le a dawtnak in a rak luang. Cucu a thawnnak zong a si.
“Khangh thawinak biaktheng ki” cu “Biaceihnak Cauk” a si i (Biathlam 20:21), cuka ahcun minung sualnak vialte hi khumh dih a si. Tlangbawi nih thawinak saram thisen khangh thawinak biaktheng ki ah a thletnak a ruang cu Biaceihnak Cauk ah an min ai tial mi vialte hnawhpiaknak ding caah a si. Thisen hi taksa nunnak a si. Raithawinak nih Israel mi hna sualnak a lak dih Ii meheh kha an sual leiban champiak ding ah thah a si. An sual biaceihnak aiawh ah Pathian nih saram kha a thahter hna. Cucu a dawtnak le a fimnak hmelchunhnak a si.
Jesuh Khrih cu hi vawlei ah Pathian tinh mi sual thawinak tlinter ding ah a ra. Jesuh Khrih cu raithawinak in vawlei sualnak vialte a lak dih. Hi biakamnak hi kan zoh tik ah, “Bawipa nih aa thawh i, Temhnak a in cu ka rak duh mi a si ko, thihnak cu ngaihthiamnak a umtertu raithawinak a si” (Isaiah 53:10) tiah a ti. “Vawlei sualnak a kalpi” (Johan 1:29).
“Kan caah ngakchia pakhat a chuak! Fapa pakhat pek kan si! Amah cu kan uktu Bawi a si lai. Amah cu khuaruahhar fimchimtu, a Thawng mi Pathian, zungzal hmun mi Pa, Daihnak Bawi ti a si lai. A lianhngannak cu a thang chin lengmang lai, a ram cua dai zungzal lai. Siangpahrang David tefa pakhat bantuk in a ram cu a uk lai i atu thawk in caan donghnak tiang, hmaan te le ding tein a uk lai. Ralkapbu Bawipa nih hi vialte hi tuah hrimhrim awk ah aa tim” (Isaiah 9:6-70).
Khuaruahhar biakamnak a si mi cu Jesuh nih Pathian duhnak a tuah lai i minung sualnak vialte kha a pek hna lai i daihnak an co lai tiah a ti. Pathian biakamnak cu dawtnak biakamnak a si i cu nih cun minung sin ah daihnak a kan phurh. Hihi Pathian nih a kan pek mi biakamnak a si i, kan caah a tuah mi zong a si.
Matthai 1:18 ah, “Jesuh Khrih a chuah ning cu hitihin a si: A nu Mary cu Josep he khan an i ham i asinain an i umh hlan ah Thiang Thlarau in nau ka ngei lai ti kha a hngalh.” “Jesuh” sullam cu vawlei mi vialte an sualnak in a Khamhtu tinak a si. “Khrih” sullam cu Chiti thuh mi Siangpahrang tinak a si, Siangpahrang Jesuh cu sualnak a ngei lo, amah cu kan Siangpahrang a si le kan Khamhtu, kanmah khamh awk ah ngaknu thiang in hrin a si.
“Fapa a hrin lai i a min ah Jesuh na sak lai-zeicahtian a mi kha an sualnak chung in a khamh hna lai,” tiah a ti. Bawipa nih Profet ka in, ngaknu cu fa a pawi lai i fapa a hrin lai i a min cu Emmanuel a si lai,” tiah a chim mi a tlin nakhnga caah hi thil vialte an hung um hi a si” (Matthai 1:21-22).
Jesuh Nih Tipil Innak In Vawlei Sualnak Vialte A Lak Dih
Matthai 3:13-16 ah, “Cu caan ah cun Jesuh cu Galilee ram in Jordan tiva ah khan Johan sin i tipil in awkah a va kal. Sihmanhsehlaw Johan nih cun a rak al i, keimah pei nangmah nih tipil pek awk ka si cu, ka sin i nangmah lehtuk rat, tiah a rak ti. Sihmanhsehlaw Jesuh nih cun, Atu cu hitihin si ko seh. Pathian nih tuah awk a si a timi paoh cu i tuah ko seh, tiah a leh. Cucaah Johan cu a hna a tla ve. Tipilnak a in dih cangka cun Jesuh cu ti chung cun a chuak. Van kha aa hung i Pathian Thlarau cu thuro bantuk in a rung zuan i a cung i aa fut kha a hmuh.”
Hika zawn ah tipil petu Johan kan hmuh khawh. Zeiruang ah dah Johan nih Jesuh tipil pek hi a herh? Vawlei sualnak vialte kalpi ding ah Pathian tinh mi tlinter ding ah Johan nih Jesuh tipilnak pek a herh.
“A uknak cu liang cung ah aum lai” ((Isaiah 9:6). Hika i “Uknak” nih Jesuh cu Vancung lei in a ra mi Vawlei Siangpahrang bawi le uktu thawnnak a ngeihnak kha a chim duh mi a si. Hi nawlngeihnak hi Jesuh lawng pek a si. Jesuh nih vawlei sualnak kalpi ding ah thil khuaruahhar a tuah. Cu khuaruahhar thil a tuah mi cu Johan nih tipilnak a pek mi hi a si. Jesuh nih “atucu Pathian nih tuah u ti mi paoh cu i tuah ko seh” a ti mi cu vawlei sualnak kalpi ding ah kha a si.
Rom 1:17 ah, “Zumhnak thawng in Pathian he aa rem mi cu an nung lai” a ti bang khan Pathian he i remnak cu a hram in a dongh tiang zumhnak thawng in a si.” Pathian dinfelnak cu tahwngtha bia ah a lang. Ti le Thlarau thawngtha bia nih Pathian dinfelnak a langhter taktak maw? Si. Thawngtha bia dik cu Jesuh tipil innak nih vawlei sualnak a lak dih ti le vailam cung a thihnak hi a si. Ti le Thlarau thawngtha bia cu Pathian dinfelnak a langhtertu thawngtha bia dawh a si. Jesuh nih zeitindah vawlei sualnak cu a lak? Johan nih Jordan tiva ah tipilnak a peknak hmang in a lak.
“Dinfelnak” ti cu Greek holh in “pasan dikaiousune” ti a si. A sullam cu Jesuh nih vawlei sualnak kha ai dawhnak bik le ningcang bik in a lak tinak a si. Jesuh nih vawlei sualnak a thianh ning hi dinfelnak he a si tinak a si. Vawlei sualnak hnawhpiak ding ah Jesuh cu Johan nih tipilnak a pek.
Vawlei minung hna sin ah daihnak phurh ding ah Jesuh tipil innak hi a biapi tuk ti kha Pathian nih a hngalh. Johan nih tipilnak pe in vailam cung ah a thisen luanter hlah sehlawh, Jesuh hi kan Khamhtu a si kho hnga lo. Jesuh nih vawlei sualnak a kan lakpiak i raithawinak a kan tuahpiak.
Pathian nih Isaiah 53:6 ah, “Kannih cu kan dihlak in a tlau mi tuu bantuk kan si; kan duhnak cio paoh ah khan kan rak kal. Cucaah dantatnak cu Bawipa nih amah cung tu ah khan a tlunter i cu dantatnak cu kanmah tu nih kan in awk a rak si mi kha a si.” Jesuh nih Pathian duhnak tlinter ding ah kan sualnak kha a cohlan. Hi ruang ah Jesuh cu taksa in sualthawinak tuah ding a ra i Johan nih tipilnak a pek.
Jesuh nih Pathian duhnak tlinter ding ah minung sualnak kha acohlan i sual dantatnak kha a in hnu ah a thi lo mi dawtnak kha a langhter. Tipi a in dih in Jesuh cu tichung in a hung chuak i, “Hihi ka Dawt mi ka Fapa a si, a cung ah ka lung a tling” (Matthai 3:17) tiah a ti.
Kan Caah Ngakchia A Chuak
“Kan caah ngakchia pakhat a chuak! Fapa pakhat pek kan si! Amah cu kan Uktu Bawi a si lai. Amah Khuaruahhar, Fim chimtu, A Thawng mi Pathian, zungzal Hmun mi Pa, Daihnak Bawi, ti a si lai” (Isaiah 9:6). Jesuh cu Pathian fapa a si. Jesuh cu van le vawlei sertu Pathian a si. Pathian Fapa a si lawng si loin Sertu le daihnak Pathian zong a si. Jesuh cu minung daihnak a kan petu Pathian a si.
Jesuh cu Biatak Pathian a si. Vawlei sualnak vialte a lak dih, a kan khamh, i daihnak a kan pek. Vawlei ah sualnak a um ti maw? Um ti lo. Hiti kan chim khawhnak a ruang cu, Jesuh nih tipil innak in vawlei sualnak vialte a lak dih cang i vailam cung ah a thisen aluanter cang caah a si. Jesuh nih a kan hleng lo. Jesuh tipil innak le a thisen in sual leiba a cham. Hi a zum mi vialte a a fa sinak le daihnak a pek hna. Zungzal ca in thianter cang mi a fa a kan siter. Bawipa cu ka thangthat i a sin ah lawmh bi aka chim.
Zohhmanh U! Pathian Tuufa Vawlei Sualnak A Kalpitu Khi!
Johan 1:29 ah, “A thaizing ah Johan nih Jesuh a sin a rat kha a hmuh i, Zohhmanh u! Pathian tuufa, vawlei sualnak a kalpitu khi!” tiah a ti. Jesuh nih tipil innak in vawlei sualnak a phurh dih hnu a thaizing ah Johan sin ah a ra than. Tipil petu Johan nih tehte a khan i, “Zohhmanh u! Pathian tuufa, vawlei sualnak a kalpitu khi!” tiah a ti. Cun Johan 1:35-36 ah tehte a khan than, “Cun, a thaizing ah Johan nih a zultu hna he an dir lio ah khan, Jesuh a kal lio kha an zoh i, ‘Zohhmanh u, Pathian tuufa khi” tiah a ti.
Jesuh cu Biakam Hlun ah biakamnak a kan pek cang bantuk in, Messiah a si i Pathian tuufa dirhmun in a ra mi a si. Messiah Jesuh Khrih cu kan sin ah Khuaruahhar, Fim Chimtu, a Thawng mi Pathian dirhmun in a ra i kan sualnak vialte khamh ding ah tipilnak a in. Kan caah ngakchia pakhat a chuak. Johan sin tipil innak in vawlei sualnak kha cohlan i sual leiba a cham dih hnu ah, Daihnak Siangpahrang le sualnak vialte ngaithiamtu a hung si. “Zohhmanh u! Pathian tuufa, vawlei sualnak a kalpitu khi!”
Minung nih kan sualnak ah thih dah ti lo duhthimnak dang kan ngei ti lo. Minung cu sualnak he hrin a si bantuk in a nun chung sualnak tuah a thih tikah hell kal ding kha a dirhmun a si. An dihlak in an nun a rawk dih i, an derthawm ruang ah Pathian Pennak chung luh cu chim lo, an zanmang hmanh ah manh ngam lo mi a si. Kan Pathian, Jesuh Khrih nih Jordan tiva i Johan sin tipilnak a innak in vawlei sualnak vialte kha a cohlan i kan sual leiba kha a kan champiak. Vailam cung a thihnak ah khan, Jesuh nih “Aa lim cang” (Johan 19:30) tiah a ti. Hihi Jesuh nih minung sualnak caah a thihnak le thawngtha bia dawh in a kan khamhnak tehte khaannak a si.
“Zohhmanh u! Pathian tuufa, vawlei sualnak a kalpitu khi!” Khuazei ah dah vawlei sualnak a um na hngal maw? Khuazei ah dah kan nawlbuarnak le kan sualnak vialte cu a um? Jesuh Khrih cung ah chuan dih an si. Uktu a si mi pa Liancung ah le a Thawng mi Pathian taksa pum ah an um.
Kan Chuahka In Kan Thih Tiang Sualnak!
Kan nun chung dihlak sualnak kan tuah. Kan chuahka in kum 20 si tiang sualnak kan tuah. Kum 20 kan si tiang kan tuah mi sualnak vialte khuazei ah dah an um dih? Jesuh Khrih taksa pum ah khin dih an si. Kum 21 in kum 40 tiang kan tuah mi sualnak vialte zong Jesuh Khrih cung ah khin dih an si. Zeitluk sau kan nun zong ah kan chuahka in kan thih ni tiang kan tuah mi sualnak vialte cu Jesuh Khrih cung ah khin dih an si. Vawlei minung vialte, Adam in vawlei dongh hnu bik tiang a nung mi sualnak vialte Jesuh Khrih cung ah khin dih a si. Kan fale le kan tefa sualnak vialte zong ah Jesuh Khrih cung ah khin dih a si. Vawlei sualnak vialte cu Jesuh tipil innak ah khan a cung ah khin dih a si.
Vawlei ah sualnak a um maw? Um lo. Pakhat zong a um ti lo. Jesuh Khrih nih a kan pek mi thawngtha bia dawh kan zumh caah sualnak pakhat zong a um ti lo. Na thinlung ah sualnak na ngei maw? Um lo. Amen. Jesuh Khrih nih a kan khamhnak thawngtha bia dawh kha kan zumh. Kan caah hrang ah thil khuaruahhar a kan tuahpiak ruang ah Jesuh min Lianngan cu thangthat ko hna u sih.
Jesuh nih kan thlarau kha a nunter than. Atu cu thawngtha bia dawh kan zumh caah Pathian he kan um ti kho cang. Pathian ral a si le sualnak ruang ah muihnak chung ah ai thup peng mi hmanh kha, atu ahcun thawngtha bia dawh zumhnak hmang in khamhnak co khawh a si.
Thawngtha bia dawh nih a kan cawnpiak mi cu Jesuh nih Johan sin in tipil a innak in vawlei sualnak vialte a lak dih cang i vailam cung a thisen le a thawhthannak in kan sual leiba a kan chimh dih cang ti kha a si. Jesuh thawngtha bia zumhnak thawng in Pathian fa, thianter mi kan si. Jesuh nih a taksa pum kha thawinak ah a pek. Hi vawlei ah Pathian fa Jesuh nih sualnak pakhat te hmanh a tuah bal lo mi pa nih, vawlei sualnak vialte kha a lak dih i amah a zum mi paoh cu a khamh hna. Isaiah 53:5 ah, “hma a in cu kan sual ruang ah a si i tuknak a huah cu kan that lo ruang a si” tiah a ti.
Jesuh nih sualnak vialte, Adam sualnak in atu kan tuah mi sualnak vialte Jesuh nih a lak dih cang i pakhat te hmanh a ngan lo. Vailam cung a thihnak in sual leiba kha a cham i sualnak vialte chung in a kan khamh. Jesuh nih vawlei sualnak vialte kha thawngtha bia dawh in a tawl dih. Jesuh thawng in nun thar kan co. Hi thawngtha bia dawh a zum mi vailte cu thlarau ah an thi ti lo. Nunnak le zungzal nunnak kan ngei, zeicahtiah Jesuh nih sual leiba a cham dih. Jesuh Khrih nih a kan pek mi thawngtha bia dawh zumhnak thawng in Pathian fa kan si.
Jesuh cu Pathian Fapa asi tiah na zum maw? Cun na Khamhtu a si tiah teh na zum maw? Ka zumh. Jesuh cu kan caah nunnak a si. Amah thawng in nunnak thar kan co. Kan sualnak ruang ah le nawlbuar ruang ah a thi ding kan si. Asinain Jesuh nih tipil innak le vailam cung a thisen in kan sual leiba a cham dih. Sual saltannak in a kan khamh, thihnak thawnnak in a kan khamh, Satan thawnnak in a kan khamh cang.
Bawipa cu kan sualnak in a kan Khamhtu Pathian a si i amah a zum mi paoh caah mi khamhtu a si. Hebru 10:10-12 le 18 kan zoh tik ah, sual thawinak tuah herh ti lo ding in Bawipa nih a kan khamh cang ti kha kan hmuh. Jesuh zumhnak thawng in Pathian Pennak chung ah kan lut. Kan sualnak le nawlbuar ruang ah a thi ding kan si, asinan atu cu Jesuh tipil innak le thisen zumhnak thawng in Vancung ah kan lut kho.
“Tuukhal tha nih cun atu caah a nunnak a pek” (Johan 10:11). Kan Bawipa Jesuh Khrih nih tipil innak, vailam cung thisen luanternak le thawhthannak in kan sualnak vialte in a kan khamh cang. Hi biatak zumhnak thawng in sual ngaihthiamnak a co mi paoh hna kha a Thiang Thlarau a pek hna. Bawipa, kan i lawm. Na thawngtha bia cu Thiang Thlarau umpinak a kan cotertu thawngtha bia dawh a si. Halleluijah! Bawipa cu thangthat si ko seh.
Copyright © 2021 by The New Life Mission
