- All e-books and audiobooks on The New Life Mission website are free
- Explore multilingual sermons in global languages
- Two new revised editions in English have been released
- Check out our website translated into 27 languages
A konglam 8: Thiang Thlarau
[8-10] Thlarau In Karhlang (Galati 5:16-26, 6:6-18)
“Ka chim duh mi cu hihi a si: Thlarau nih nan nun ning kha lam hruai sehlaw nan minung sinak duhning kha zul hlah u. Zeicahtiah kan minung sining nih a duh mi cu Thlarau nih a duh mi he khan aa ralchanh i Thlarau nih a duh mi cu kan minung sining nih a duh he khan aa ralchan. Annih pahnih cu ral an si, cu a sullam cu, tuah na duh mi kha na tuah kho lo, tinak a si. Thlarau nih an hruai a si ahcun Nawlbia tang ah na um lo. Minung sining nih a tuah tawn mi cu a fiang ko: nu le pa sualnak tehna, a thurhnawm mi thil tehna, aa dawhcah lo mi thil tehna, siasal biak tehna, le dawih le eih tehna hi an si. Pakhat le pakhat an i ral, an i do, an i nahchuah, an thin a hung anmah zawn cio lawng an ruat lawng an ruat, an i then, ziar an i ngeih, zu an ri, an au an khuang i cu bantuk thil dang a tampi kha an tuah lengmang hna. Hmasa ah ralrin bia ka rak in chimh cang hna bantuk khan atu ah kan chimh hna hna: cubantuk in thil tuah mi cu Pathian Pennak an hmu lai lo. Sihmanhsehlaw Thlarau nih a chuahter mi hna cu: dawtnak, lawmhnak, daihnak, lungsaunak, zaangfahnak, thatnak, zumhawktlak mi sinak, toidornak le mah le mah i tei khawhnak tehna hi an si. Cubantuk thil hna caah nawlbia zeihmanh a herh lo. Cun Khrih Jesuh ta a si mi nih cun a minung sinak kha tuah a duh tawn mi thil le pumsa duhnak he khan a thah. Thlarau nih nunnak a pek cang caah kan nunnak zong hi amah nih a uk awk a si. Kan ruam a kai awk a si lo, Pakhat le pakhat kan thin kan i hunter awk a si lo, pakhat le pakhat kan i nahchuah awk asi lo.
Khrihfa phung cawnpiak a si mi pa nih khan, thil tha a hmuh mi vialte cu a saya kha a hrawm awk a si. Nanmah le nanmah i hleng hlah u, ahohmanh nih Pathian cu an deh kho lo. Mi nih a tuh mi cu a zun ko lai. A pumsa duhnak lo ah a tuh ahcun thihnak kha a zun lai, Thlarau lo ah a tuh ahcun thihnak kha a zun lai, Thlarua lo ah a tuh ahcun Thlarua nih zungzal nunnak kha a pek lai. Cucaah a caan kan ngeih fate, mi cung ah thatnak tuah kha i zuam u sih law zumhnak lei i kan rualchan a si mi hna cung ah khan i zuam khun u sih. Hi ca kan kuat mi hna hi ka kut hrimhrim in ka tial i cafang lian pipi in ka tial hi rak zoh hmanh u. Lenglei thil aa porhlaw mi le aa uangthlar mi hna hi nanmah cuarpar tan hnek an duh mi hyna kha an si. Cu an duh cu Khrih vailamtahnak kong ah hremnak an innak hnga lo ca men ah a si. Cuarpar tannak phung a zul mi hna hmanh nih Nawlbia cu an zulh ve hlei tung lo, an cuarpar i tan hna seh ti an in duh hna cu, pumsa phung kan chimh mi hna hi a zul tiin i thangthat an duh caah pei a si ko cu. Kei tu cu Bawipa Jesuh Khrih vailam lawng hi kaa porhlawtpi ko lai, zeicahtiah Khrih vailam thawng hin vawlei hi ka caah a thi mi thil a si cang i kei zong hi vawlei caah cun a thi mi ka si ve cang. Cuarpartan le tan lo cu biapi a si lo, biapi a si mi cu, ser thar mi si hi a si. Hi phung an nun ning ah a zul mi hna cu daihnak le zaangfahnak kha an cung ah um ko seh-Pathian mi dihlak cung ah cun um ko seh. Ka bia donghnak ah: ahohmanh nh harnak ka pe ti hlah u. Ka pum cung i a um mi hmape nih hin Jesuh sal ka si cu a langhter ko. Ka u le ka nau hna, kan Bawipa Jesuh Khrih vel cu nan dihlak cung ah um ko seh. Amen.”
Thlarau kar hlan ding ah zeidah kan tuah lai?
Thawngtha bia dawh kan chim i kan zulh ding a si.
Lamkaltu Paul nih Galiti mi hna sin ca akuat hna ah khan Thiang Thlarau kong a tial. Galati 5:13-14 ah, “Ka ule ka nau hna, nannih cu luat ding in kawh mi nan si. Asinain cu luatnak cu nan pumsa duhnak ca i caan tha men ah khan hmang hlah u. Pakhat le pakhat kha dawtnak tu in na rian i bawm u. Zeicahtiah nawlbia cu a ning piin hi nawlbia pakhat, “na innpa cu nangmah bantuk in na dawt lai,” ti mi ah hin aa fun dih” tiah a ti.
A tawinak in cun, kannih cu thawngtha bia zumhnak in thawngin khamh kan si cang caah khamh kan sinak caan tha cu taksa duhnak tuahnak ah hmang loin dawtnak in pakhat le pakhat kha kan rian kan i tuanpiak ding tu a si tinak a si. Pathian nih kan sualnak a kan khamh cang caah cu thawngtha cu kan chimphuan ding a si. Paul nih, “asinain saram bantuk in nan um i pakhat le pakhat nan i seh i nan i kaoh ahcun, i ralring tuah, nan i ralrin lo ahcun pakhat le pakhat nan i hlo dih lo lai” (Galati 5:15).
Thiang Thlarau Khahnak Ding Ah Thlarau In Karhlang U
Galati 5:16 ah Paul nih, “Thlarau nih nan nun ning kha lam hruai sehlaw nan minung sinak duhning kha zul hlah u.” Cun caang 22:26 ah, “Sihmanhsehlaw Thlarau nih a chuahter mi hna cu: dawtnak, lawmhnak, daihnak, lungsaunak, zaangfahnak, thatnak, zumhawktlak mi sinak, toidornak le mah le mah i tei khawhnak tehna hi an si. Cubantuk thil hna caah nawlbia zeihmanh a herh lo. Cun Khrih Jesuh ta a si mi nih cun a minung sinak kha tuah a duh tawn mi thil le pumsa duhnak he khan a thah. Thlarau nih nunnak a pek cang caah kan nunnak zong hi amah nih a uk awk a si. Kan ruam a kai awk a si lo, Pakhat le pakhat kan thin kan i hunter awk a si lo, pakhat le pakhat kan i nahchuah awk asi lo.” Hika zawn ah Paul nih a kan chimh mi cu Thlarau in kar kan hlan ahcun Thlarau thei kan tlai lai ti kha a si. Thiang Thlarau nih Thlarau karhlang ding in a kan duh. Asinain taksa in kan nung.
Minung cu thlarau thei a tlai kho lo mi taksa in hrin kan si. Thlarau in nun kan i timh zong ah kan sinak kha ai thleng kho lo. Hi ruang ah thawngtha bia dawh zumhnak in Thiang Thlarau a co mi lawng nih Thlarau in kar an hlang kho i Thlarau thei an tlai khawh.
Baibal nih Thlarau karhlang u tiah a kan chimh tikah a chim duh mi thawngtha bia dawh kan phuan i midang zong nih sual ngaihthiamnak an co ve ding kha a si. Thawngtha bia dawh caah kan nun ahcun thlarau thei kan tlai lai. Phundang in cun, minung sinak thlen kha a chim duh mi a si lo. Thangtha bia dawh he kan nun ahcun thalrau thei tlai a si mi, dawtnak, lawmhnak, daihnak, zaangfahnak, thatnak, zumhawktlak mi sinak, nunnemnak le mah le mah uk khawhnak hna kha kan tlai ko lai. Thlarau thei tlai nih a kan bawmh i midang zong nih sual ngaihthiamnak le zungzal nunnak an co ve.
Minung Duhnak Le Thlarau Duhnak Ai Kalh
Paul nih “Zeicahtiah kan minung sining nih a duh mi cu Thlarau nih a duh mi he khan aa ralchanh i Thlarau nih a duh mi cu kan minung sining nih a duh he khan aa ralchan. Annih pahnih cu ral an si, cu a sullam cu, tuah na duh mi kha na tuah kho lo, tinak a si” (Galati 5:17). Khamh a co cang mi nih taksa le thlarau kha hmun khat ah kan ngeih caah, pakhat le pakhat an i do peng. Pakhat pakhat nih kan thinlung ah khat lak in hmunhma an lak khawh tinak a si.
Thlarau nih kan thinlung thuhnak bik hmun in duhnak le thawngtha bia dawh phuan duhnak a kan pek. Thlarau lei thilri he a kan pehtlaihter. Pathian thawngtha bia dawh chimphuannak nih midang kha an sualnak in khamhnak a coter hna.
Asinain kam khat lei ah cun, thlarau in karhlang kho lo ding in kan taksa duhnak kha rian a tuan ve. Hihi a zungzal in ai ralkah mi taksa le thlarau duhnak an si. Mi pakhat cu taksa duhnak nih a uk tik ah a donghnak taksa caah a nung. Taksa duhnak cu Thlarau duhnak he ai kalh. An duhnak kha pakhat le pakhat ai kalh caah kan tuah duh mi kha kan tuah kho tawn lo.
Cuti si ah Thlarau karhlannak ah zei hna dah an i tel? Cun zeibantuk thil nih dah Pathian a lawmhter? Pathian nih thawngtha bia zumh le chimphuan hi thalrau in karhlan a si tiah a kan chimh. Thiang Thlarau in a khat mi paoh kha Thlarau in karhlan duhnak thinlung a pek hna i thlarau nun ning in an nung. Pathian nih Thiang Thlarau in karhlan i Thlarau thei tlai ding in a kan fial mi cu midang nih an sualnak in khamhnak an co nakhnga caah le kanmah caah nun chimhnak caah a si. Thiang Thlarau in karhlan cu Pathian duh mi a si.
Thlarau in karhlannak ding ah a pakhatnak ah kan herh mi cu Thiang Thlarau umpinak co hi a si. Thiang Thlarau umpinak co ding ah a pakhatnak ah thawngtha bia dawh hi kan zumh a herh. Thawngtha bia dawh kan thinlung dihlak in kan zumh lo ahcun zeitik hmanh ah Thiang Thlarau umpinak kan co lai i sual khamhnak zong kan co lai lo, a sullam cu thlarau in kar kan hlang kho lai lo tinak a si ko.
Thlarau nih thawngtha bia dawh phuan duhnak le Pathian sunparnak a kan pekter. Hibantuk duhnak cu thinlung dihlak Pathian sin peknak le vawlei khuazakip ah thawngtha bia phuan duhnak in a ra mi a si. Cun thawngtha bia dawh chimphuannak ding ah a herh mi paoh tuah duhnak thinlung in a rak chuak mi a si. Thawngtha bia a zum i sual ngaihthiamnak co hnu ah Thiang Thlarau umpinak a co cang mi hna nih cun Thalrau in kar an hlang kho. Cucu cunglei an co mi thlarau ro a si.
Thiang Thlarau umpinak a co mi paoh nih Thiang Thlarau nawl kha an ngaih i thlarau in kar an hlang, an pum ah taksa duhnak cu um ko hmanh sehlaw an chung ah Thiang Thlarau a um. Paul nih “Thlarau in karhlang u” tiah a ti. A sullam cu Jesuh nih a kan pek mi thawngtha bia dawh kan chimpuannak nih midang zong kha sual ngaihthiamnak a coter hna tinak a si.
A caan ahcun thlarau in kar kan hlan lio ah taksa duhnak kan tuah tawn. Kan nunnak ah taksa duhnak le thlarau duhnak an i do, asinain Thiang Thlarau umpinak a co cang mi hna nih cun thlarau in kar kan hlan ding a si. Hiti lawng hin Pathian thluachuah kan co kho lai i a lung kan ton khawh lai. Thiang Thlarau umpinak a co cang mi hna nih Thlarau thei tlai an duh lo ahcun an nunnak cu taksa thei tlaihnak in a dih ko lai. An theipar cu ai rawk kho mi le tihnung a si. Hi ruang ah Thlarau he kar kan hlang peng ding a si.
“Thlarau in karhlang u” ti kan theih tikah, “zeitindah Thiang Thlarau umpinak ka chung ah a um ti hmanh ka hngalh kawh lo ah thlarau he cun kar ka hlan khawh lai?” kan ti men lai. Cheu khat nih Thiang Thlarau umpinak cu Pathian nih awka bak in kan sin ah i langh in chim sehlaw cu lang ah kan theih khawh lai tiah an ruah. Asinain hihi a dik lo mi a si. Thiang Thlarau nih ti le Thlarau thawngtha bia dawh in nung ding ah duhnak a kan pek.
A caan ahcun Thiang Thlarau umpinak kan co cang ko nain taksa in kan nun caah a umpinak kan tep kho lo. A cheu khat nih cun kan chung ah ai hngilh tiah an ruah. Cubantuk minung hna cu Thiang Thlarau umpinak a co ko tung i taksa duhnak in kar a hlang mi an si.
Cubantuk minung hna cu an taksa duhnak lawng kha biapi ah an chiah caah a donghnak ahcun an taksa duhnak nih harsatnak ah a hruai hna. Cun cheu khat Thiang Thlarau umpinak a co cang mi hna zong nih taksa duhnak in an nung, zeicahtiah hitihin thil sining a si ko tiah an ruah caah a si. Taksa duhnak ah ai pumpe mi hna cu taksa sal an si.
Bawipa nih thlarau duhnak in nung u tiah a kan ti. A sullam cu thawngtha bia dawh ca riantuan kha a si. Cun kan sining dihlak in ti le Thlarau thawngtha bia dawh kan i pumpek awk a si tinak a si. Thawngtha bia dawh ah nun nuam tein nun kha Thlarau in karhlan cu a si. Thlarau in karhlan nun cawn in kan nun ding a si. Thlarau in kar na hlang maw?
Thiang Thlarau Umpinak Co Loin Thlarau In Karhlan Khawh A Si Maw?
Hrinthannak a co lo mi nih cun Thlarau karhlan kha a sullam zong an hngal lo. Minung tampi Thiang Thlarau kha anmah tining lam in co ding ah an i zuam. Thiang Thlarau co ding in duhnak ngeih kha Thiang Thlarau in khah he ai khat tiah an ruah.
Tahchunhnak ah, minung tampi kha hmun khat ah an i pum i thawngtha chimtu nih awthang piin bia a vun chim tikah mizapi kha an tap. Cheu khat cu holh theih loin an holh i Thiang Thlarau in ka khat tiah an i ruah, asinain an holh mi cu anmah hmanh nih a sullam an hngal lo. Cun cheu khat cu vawlei ah an bawk i an taksa pum cu khuachia tlaih mi bantuk in a thir. Khuachia nih a tlaih mi hna kha Thiang Thlarau kan co tiah an ruah. Cun mizapi nih “Bawipa, Bawipa!” tiah awthang piin an au. Bawipa kha an mitthli he an auh i an kut fak piin an bengh. Cuti tuahnak cu, “Thiang Thlarau in khah” tiah an ruah.
Thawngtha chimtu pulpit a bengh pah in holh theih loin a holh i mipi nih “Bawipa! Bawipa!” tiah thang piin an au. Hibantuk thil an duh mi a si i cheu khat nih cun Edum i a chia le tha hngalhnak thinkung hna kha mang in kan hmuh i Jesuh nih a zoh ko tiah an ti. Kha thil hna kha Thiang Thlarau, Thiang Thlarau khahnak le Thlarau karhlannak ah an ruah sual. Pathian bia le Thiang Thlarau an hmuhpalhnak nih hi thil hna an chuahpi.
“Thlarau in Karhlang u.” Hihi a hrinthan mi hna sin ah Pathian nih a chim mi a si. A sullam cu Pathian duh mi thil tuah kha a si. Paul nih taksa duhnak le Thlarau duhnak kha a tahchunh. A ti mi cu, “Thlarau thei tlai cu, dawtnak, lawmhnak, daihnak, lungsaunak, zaangfahnak, thatnak, zumhawktlak mi sinak, nun nemnak, le mah le mah uk khawhnak” (Galati 5:22-23) tiah a ti.
“Thlarau in karhlan” ti cu thawngtha bia dawh chim i an sualnak chung in khamh kha a si. Cuti kan tuah ahcun thlarau thei kan tlai khawh lai. Thlarau thei tlai hna cu, dawtnak, lawmhnak, daihnak, lungsaunak, zaangfahnak, thatnak, zumhawktlak mi sinak, nun nemnak le mah le mah uk khawhnak hna an si i hi thei hna hi thawngtha bia dawh he kan nun tik lawng ah kan tlai khawh lai. Mi pakhat nih thawngtha bia dawh rian a tuan i a chimphuan tikah Thiang Thlarau in a khat mi nun in a nung kho lai.
Thlarau thei tlai i “thatnak” a ti mi cu thil tha tuah kha a si. Cun ziaza dawh thatnak zong a huap chih. Thawngtha bia dawh ziaza kha ken i midang ca thatnak tuah khaw thatnak nih a sawh duh mi a si. Pathian hmai ah a tha bik mi thatnak tuah cu midang ca thathnemnak a chuahpitu thawngtha bia dawh chim hi a si.
Cun “zaangfahnak” ti cu midang cung ah dawtnak, zaangfahnak ngeih kha a si. Midang cung ah zaangfahnak a ngei mi nih cun thawngtha bia dawh kha an chimphuan i daihnak in an khat. Thlarau in kar a hlang mi hna nih Bawipa riantuannak kha an hmuh i a riantuan an duh chinchin i midang cung ah zaangfahnak an ngeih pin ah zei thil paoh kha zumhawktlak tein an tuan. Ahohmanh nih an fial hna lo zong ah Thiang Thlarau umpinak a co mi hna nih cun rian kha a dihdonghnak tiang an tuan. Amah cu a nun a nem i amah le mah ai uk kho. Thlarau thei a tlai. A chung ah Thiang Thlarau a ngei mi cu Thlarau in kar a hlang. Cuti a tuah lawng ah Thlarau thei a tlai khawh.
Nangmah zong ah Thlarau in kar na hlan ahcun Thlarau thei na tlai khawh ve. Cuti na tuah lo ahcun taksa duhnak in na dong ko lai. Kan Baibal Galati 5:19-21 ah, “Minung sining nih a tuah tawn mi cu a fiang ko: nu le pa sualnak tehna, a thurhnawm mi thil tehna, aa dawhcah lo mi thil tehna, siasal biak tehna, le dawih le eih tehna hi an si. Pakhat le pakhat an i ral, an i do, an i nahchuah, an thin a hung anmah zawn cio lawng an ruat lawng an ruat, an i then, ziar an i ngeih, zu an ri, an au an khuang i cu bantuk thil dang a tampi kha an tuah lengmang hna. Hmasa ah ralrin bia ka rak in chimh cang hna bantuk khan atu ah kan chimh hna hna: cubantuk in thil tuah mi cu Pathian Pennak an hmu lai lo.”
Taksa Tuahsernak Cu A Lang Ko
Taksa tuahsernak cu a lang colh ko. A pakhatnak ah “nulepa sualnak” a si i nu le pa sinak kha ningcang loin hman tinak a si. A pahnihnak cu “athurhnawm mi thi tehna.” A pathumnak cu, “Aa dawhcah lo mi thil tehna.” A palinak cu “hurduhcuainak” a si i cucu taksa duhnak a si. A panganak ah “siasal biaknak” a si i Pathian nakin thil dang papek a si. A paruknak cu “dawih eih” a si. A pasarihnak cu, “huatnak” a si. Thiang Thlarau co loin a nung mi pa nih midang sin ah a huatnak lawng a langhter khawh. A pariatnak cu, “i ralnak” a si i chungkhar minung pakhat le pakhat i sikvelnak kha chim duh mi a si. Cun a dang hna cu, “nahchuahnak, thinhunnak le mah zawn lawng ruahnak” hna an si. Hi vialte hi taksa in a nung mi hna an ziaza a si.
A pahranak ah “lungkhahlonak” a si. Mi pakhat nih taksa duhnak he lawng a nun tikah Khrihfabu ca riantuan a si kho lo i a donghnak ah bu a chuah tak tawn. A pahlei khatnak cu “kal sualnak” a si. Taksa duhnak a kal mi hna cu anmah duhnak lawng kha an tuah tawn. Asinain cubantuk nunnak cu Pathian duhnak he ai ralkah tuk caah thawngtha bia dawh kha hnulei a chit. Kal sual ti cu Baibal biatak in pial kha a si. Pathian zumhnak ngei loin thlarau in kar a hlang mi nih biatak kha an pial tak tawn. “Nachuahnak, lainawnnak, zuritnak, i ralnak le a dangdang hna” zong hi taksa duhnak an si. Taksa duhnak in a kal mi hna nih a donghnak ah hibantuk thil hi an tuah tawn. Hi ruang ah Bawipa nih, “Thlarau in karhlang u” tiah a kan tinak a si. Kannih hrinthannak a co mi hna nih cun thlarau in kan nun awk a si.
Hrinthannak a co lo mi hna nih an thinlung le taksa duhnak ti lo, a dang an ngeih mi a um lo. Hi ruang ah, “nulepa sualna, thil dawhcah lo, a thurhnawm mi thil tehna, vacung paduh/nupi cung nu duh” te hna an tuahnak a si. Hrinthannak a co lo mi thawngtha chimtu deu nih an zultu pawl nih chawva tampi pe hna seh tiah “dawih eih” kha an hman tawn. Chawva tam cem a pe mi kha Khrihfabu ah rian sang le dirhmun tha an pek tawn hna. Taksa in a nung mi hna nih midang cung ah “huatnak” an langhter tawn. Khrihfabu kha tampi ah an theu cheu i anmah umnak kha a tha bik an ruah i a dang kha kal sual ah an rel hna. “Thurhnawmnak, nahchuahnak, thinhunnak, mah zawn lawng ruahnak, lung i khat lonak, kal sualnak le mithil hngarnak” vialte hna hi hrinthannak a co lo mi hna thinlung ah a um mi ziza a si. Kannih zong taksa duhnak lawng in kan kal ahcun anmah bantuk kan si ve lai.
Thlarau Nih Hrinthan Mi Khrihfa Cu Thiang Thlarau Thei A Tlaiter Hna
Hrinthannak a comi paoh nih thawngtha bia dawh caah an nun awk a si. Kanmah lawng in Bawipa hnuzulh a har tuk caah kan dihlak in Pathian Khrihfabu ah kan i fawn dih hna lai. Hmun khat ah thla kan cam i thlarau thawngtha bia dawh caah kan nung ko tinak caah kan thazaang kan chuahti hna lai. Thlarau in kar a hlang mi hna paoh nih ti le Thlarau thawngtha bia dawh kha an chimphuan. Phundang in cun, taksa duhnak lawng in a nung mi hna cu anmah ca lawng ah an nung i Thlarau in a nung mi hna cu midang nih khamhnak an hmuh nakhnga caah an nunnak an hman. Hrinthannak a co mi Khrihfa tampi nih an nun kha hibantuk in an hman. Midang ca thatnak ah an nun an hman.
Vawlei cung ah minung tampi nih thawngtha bia dawh an thei rih lo. Africa le Asia minung hih kan dawt hna. Cun Europe le America le ticung khuasa mi zong kan dawt dih hna. Kan dawtnak hna kha ti le thlarau thawntha bia dawh chimphuannak in kan langhter lai.
Thlarau in kar kan hlan ding a si. Hihi zei nawlbia hmanh nih a kham lo. “Thlarau nih a chuahter mi hna cu: dawtnak, lawmhnak, daihnak, lungsaunak, zaangfahnak, thatnak, zumhawktlak mi sinak, toidornak le mah le mah i tei khawhnak tehna hi an si. Cubantuk thil hna caah nawlbia zeihmanh a herh lo” (Galati 5:22-23). Hi thil a khamtu nawlbia a um maw? Um lo. Thlarau nawlbia a si caah kan zulh awk a si. Paul nih thlarau in kar hlang u tiah a kan ti. Kan Bawipa Jesuh nih a nunnak kanmah misual caah apek bantuk in, kannih zong midang caah kan nun ve awk a si. Midang thlarau khamhank ca riantuan kha thlarau in karhlan kha a si. Thlarau in kar kan hlan awk a si.
Paul nih Galati 5:24-26 ah, “Cun Khrih Jesuh ta a si mi nih cun a minung sinak kha tuah a duh tawn mi thil le pumsa duhnak he khan a thah. Thlarau nih nunnak a pek cang caah kan nunnak zong hi amah nih a uk awk a si. Kan ruam a kai awk a si lo, Pakhat le pakhat kan thin kan i hunter awk a si lo, pakhat le pakhat kan i nahchuah awk asi lo” tiah a ti. Thlarau in nun kan duh ahcun midang thlarau khamhnak caah kan nun awk a si. Pathian nih a kan pek mi Thiang Thlarau nih kan thinlung ah Jesuh a nunter. Thiang Thlarau cu dawtnak Siangpahrang a si. Pathian nih a dawtnak phuangtu hriamnam ah a kan hman.
Paul nih “Cun Khrih Jesuh ta a si mi nih cun a minung sinak kha tuah a duh tawn mi thil le pumsa duhnak he khan a thah” (Galati 5:24) tiah a ti. Cun hrinthannak a co mi paoh cu Jesuh Khrih he an thi ti tiah a ti. A hrinthan taktak cang mi hna cu Jesuh Khrih he an thi diam cang. Kan hngal lo nain Jesuh nih kan sualnak ruang ah vailam cung thihnak a tuar ah khan amah he kan thi ti diam cang. Phundang in cun, Jesuh vailam an tah ti cu, nangmah le keimah he vailam cung ah a thi tinak a si. A thihnak cu kan thihnaka si ve i a thawhthannak nih hmailei kan thawhthan te lainak a langhter. Nangmah le keimah Jesuh Khrih ah zumhnak in kan thi ti. Zumhnak kan ngeih a herh. Kan zumhnak in thlarau in karhlannak ah a kan hruai.
Pathian nih thlarau in karhlan khawnak thawnnak a kan pek. Cucaah, sual ngaihthiam a si cang mi nang le kei nih thlarau in kar kan hlan awk a si. Thiang Thlarau a co cang mi hna nih sual ngaihthiamnak an co mi le midang thlarau tlau mi caah an nun an hman khawh caah Bawipa an thangthat awk a si. Mi pakhat nih sual ngaihthiam coin hrinthannak co ko hmanh sehlaw, taksa duhnak in a nun peng ahcun Bawipa Khrihfabu in chuah a si lai i a rian a tuan kho lai lo. Kan Bawipa Jesuh Khrih a rat than ni tiang ti le thlarau thawngtha bia dawh in kan nun awk a si.
Zeitikhmanh Ah I Porhlaw Hlah Thiang Thlarau Tuin Khat Ko
Paul nih, “zeitikhmanh ah i porhlaw hlah u, pakaht le pakhat nan thin i hunter hlah u, nahchuahnak ngei hlah u” tiah a ti. Porhlawt cu zeidah a si? Midang taksa duhnak nun a si. Vawlei cung ah minung tampi cu anmah duhnak lawng in an nung. Minung tampi nih chawva an khon, sinak sang an i cuh, vawlei dawhnak an kawl i atu ca lawng ah an nung. Hi thil hna ih zungzal hmun ding an um lo i caan sin ah a lotlau ding lawng te an si. Hi ruang ah taksa duhnak in a nung mi hna cu ai porhlaw mi tiah ti an si. Zeitluk an rum hmanh ah an thinlung ah diriamnek le hnangamnak taktak a um maw? Taksa nih a chuahpi mi theitlai cu a zorchuk tawn. Vawlei thilri cu midang thlarau caah hman khawh a si lo, anmah ca lawng ah a thahnem. Anmah taksa duhnak ca lawng ah hman khawh a si.
Baibal nih “Mi pakhat nih siang tein a then lawngmang hna i a rum chin, a dang pakhat nih tinsih in a um i a herhbaunak lawng kha aa miak ko” (Phungthlukbia 11:24) tiah a ti. Hrinthannak a colo mi hna nih chawva tampi khon an timh. Vawlei thilri kha an zeizong te a si caah an khon mi kha a chiahnak hmanh an ngei lo. Hi ruang ah anmah zawn lang an i ruat. Baibal nih mi pakhat cu tinsih chih in a nung i a herh bauhnak a karh chinchin tiah a ti. Minung nih amah duhnak lawng in a nun tikah a donghnak ahcun thihnak a phan. Hi vialte hi porhlawtnak theipar an si.
Thlarau Duhnak A Zul Mi Hna
Paul cu Thlarau in nun a duh. Cun a nung taktak fawn. Pathian bia in nung u tiah a kan ti. Galati 6:6-10 ah, “Khrihfa phung cawnpiak a si mi pa nih khan, thil tha a hmuh mi vialte cu a saya kha a hrawm awk a si. Nanmah le nanmah i hleng hlah u, ahohmanh nih Pathian cu an deh kho lo. Mi nih a tuh mi cu a zun ko lai. A pumsa duhnak lo ah a tuh ahcun thihnak kha a zun lai, Thlarau lo ah a tuh ahcun thihnak kha a zun lai, Thlarua lo ah a tuh ahcun Thlarua nih zungzal nunnak kha a pek lai. Cucaah a caan kan ngeih fate, mi cung ah thatnak tuah kha i zuam u sih law zumhnak lei i kan rualchan a si mi hna cung ah khan i zuam khun u sih” tiah a ti.
Paul nih Pathian bia a hngal mi hna kha nan thil tha kha nan sayate kha hrawmh hna u tiah a ti. “Thil tha” a ti mi sullam cu thlarau karhlannak le thawngtha bia dawh phuannak in thlarau tlau tlaih kha a si. Hrinthannak a co mi hna nih thlarau in kar a hlang mi, a cawnpiak mi le dawtnak le ruahnak in mi a cawnpiak tu kha an tawmpi hna ding a si.
“Thil tha a tuah mi vialte a hrawmh ve awk a si.” “Thil tha” sullam cu Khrihfabu hmang in miding thlarau khamh a si. Paul nih zeizong vialte ah thlarau khat, thlacam tinak le pumpek khat in tuah u tiah a kan cawnpiak. Bawipa rian kha hmun khat ah kan tuan awk a si.
Paul nih “Nanmah le nanmah i hleng hlah u; ahohmanh nih Pathian cu a deh kho lo. Mi nih a tuh mi cu a zun ko lai” tiah a ti. Hika “deh” sullam cu “nehsawh le zawmhtaih” tinak a si. Cucaah “nanmah le nanmah i hleng hlah u, Pathian cu deh khawh a si lo” ti sullam cu Pathian kha zawmhtiah hlah u, nihsawh hlah tinak a si. Tahchunhnak ah mi pakhat nih Pathian bia kha amah duhnak in a fianter in zeirel loin a um awk a si lo. Paul nih, “Mi nih a tuh mi cu a zun ko lai” tiah a ti. A sullam cu taksa kan tuh ahcun thihnak kan zun lai, thlarau ah kan tuh ahcun zungzal nunnak kan zun lai tinak a si.
Ti le Thlarau thawngtha bia dawh in kan nun ahcun zeidah kan zun lai? Zungzal nunnak le kan sualnak in khamhnak kan co lai. Midang thlarau kha khamhnak ah kan hruai hna lai i Pathian thluachuahnak in zungzal nunnak le thlarau thei tlai kan zun hna lai.
Cuti si ahcun mah ca lawng ah a nung mi hna khi teh? Rawhralnak an zun lai i a donghnak ah thihnak an zun lai. An thih hnu ah an caah zeihmanh a tang ti lo. Minung cu kutro in kan chuak i kan thih tik zong ah kutro in kan thi.
Midang thlarau khamhnak ria a tuan ahcun thlarau thei tlai le zungzal nunnak kha a zun lai. Asinain taksa duhnak in a nun caan a hman ahcun rawhralnak a zun lai. Chiatserhnak kha a zun lai i midang cung ah chiatserhnak ro a chiah ta lai. Cucaah, zumhnak nun a hngal dih tu Paul nih, taksa duhnak in nung lo ding ah ruahnak a kan cheuh.
“Cucaah thatnak tuah kha baa hlah u sih, kan ngol lo ahcun, a thei tlai kan zun caan kha a phan ve ko lai.” Paul cu thlarau in kar a hlang mi, Pathian saltha a si. Cheu khat nih thlarau in kar a hlang mi hna an hmuh hna tik ah Paul bantuk in Pathian nih, “Paul, khika ah va kal law, cu pa cu va tong, asiloah hi minung hi cu na hrial lai” tiah a chimh rua tiah an ruah. Cucu a dik lo mi a si.
Thawngtha bia dawh chimphuannak in midang thlarau khamhnak rian a tuan i cuticun Thlarau in kar a hlang. Cun Paul nih Pathian rian kha midang Thlarau in kar a hlang ve mi hne i bawm in a tuan. Khrihfa lak zong ah thlarau in kar hlang loin taksa in kar a hlang mi an tampi. Cubantuk minung nih Paul kha an cohlang lo i an rak doh. Paul nih Jesuh Khrih zultu hna zei ah a rel lo mi hna he zeihmanh tuah ding ka ngei lo tiah a ti.
Thlarau in kar hlan na duh ahcun thawngtha bia in na nun a herh. Cuarpartan pawl nih Paul kha taza an cuai. Galati 5:11 ah, “Ka u le ka nau hna cuarpartan hi a herh ti ka chim rih a si ahcun, zeicahdah hremnak hi ka in lengmang hnga? Cuticun rak chim ning law cu, Khrih vailamtahnak kong ka chim mi nih hin harnak zeihmanh a chuahter hnga lo” tiah a ti. Cuarpartan mi pawl hna cu cuarpartan lei ah a thawng ngai mi an si i, “mi pakhat nih Jesuh zumhnak in hrinthannak a co tikah cuarpartan a herh tiah an ti. A taksa caurpar tan a si lo ahcun Pathian fa a si lo an ti.” Zeiruang ah dah Paul kha taza an cuai? Paul nih cun khamhnak le zungzal nunnak hi Jesuh tipil innak le vailam cung thisen zumhnak in kan co ti kha a zumh. Hihi a chim mi thawngtha a si.
Minung miding ah a sertu zumhnak cu biatak cawnnak le chimphuannak thawng in a si. Paul nih ti le Thlarau thawngtha biatak hi biapi tuk ah a chiah. Biatak a hngal mi paoh nih Thlarau in kar an hlang kho i caurpartan a herh ti lo ti kha a zumh. Cucu a chim mi a si. Asinain cuarpartan pawl nih an zumh mi cu khamhnak ding caah cuarpartannak hi a herh hrimhrim mi a si tiah an ti. Pathian nih a kan pek mi thawngtha dah ti lo, thawngtha dang a um ti lo caah, hi thawngtha bia hi a chap zong kan chap awk a si lo, a zuh zong kan zuh awk a si lo.
Paul cu thlarau in kar a hlan tikah a miphun hawi Judah mi nih an hrem i zei ah an rel lo. “Lenglei thil aa porhlaw mi le aa uangthlar mi hna hi nanmah cuarpartan hnek an duh mi hna kha an si. Cu an duh cu Khrih vailamtahnak kong ah hremnak an innak hnga lo ca men ah a si. Cuarpar tannak phung a zul mi hna hmanh nih Nawlbia cu an zulh ve hlei tung lo, an cuarpar i tan hna seh ti an in duh hna cu, pumsa phung kan chimh mi hna hi a zul tiin i thangthat an duh caah pei a si ko cu. Kei tu cu Bawipa Jesuh Khrih vailam lawng hi kaa porhlawtpi ko lai, zeicahtiah Khrih vailam thawng hin vawlei hi ka caah a thi mi thil a si cang i kei zong hi vawlei caah cun a thi mi ka si ve cang. Cuarpartan le tan lo cu biapi a si lo, biapi a si mi cu, ser thar mi si hi a si” (Galati 6:12-15). Cun Paul nih cuarpartan pawl sin ah, “Lenglei thil aa porhlaw mi le aa uangthlar mi hna hi nanmah cuarpartan hnek an duh mi hna kha an si. Cu an duh cu Khrih vailamtahnak kong ah hremnak an innak hnga lo ca men ah a si” tiah a ti.
Paul nih taksa duh in a nung mi hna kha sual a phawt hna. Taksa duhnak in an nung i anmah bantuk minung kha tampi an um rih. Asinain Paul nih anmah pawl he an i pehtlaihnak kha a chah. Paul nih, “Jesuh Khrih vailamtah dah ti lo, porhlawt ding kha Pathain nih a ka khamh” tiah a ti. Jesuh Khrih cu vawlei sualnak vialte tawl ding ah tipilnak a in i vailam cung a thihnak nih Paul le amah nih a thim mi vialte kha a khamh hna. Paul nih, “Jesuh Khrih thawng in vawlei cu ka caah a thi cang i kei zong vawlei caah ka thi cang. Jesuh Khrih chung ah cuarpartan le tan lo kha sullam a ngei ti lo, serthan kan si” tiah a ti. Vawlei caah a thi mi Paul kha Jesuh Khrih caah a nung.
Kannih zong hi Khrih chung ah a thi mi kan si ve. Asinain a caan ah cun hi biatak hi kan philh. Kan zumh a herh. Hi biatak kan zumh lo ahcun, kan taksa duhnak le kan chungkhar nih a kan tlaih tinak a si caah Bawipa he kar kan hlang ti kho lai lo. Kan taksa cu a derthawm tuk caah kan chungkhar zong nih a kan bawm kho lai lo. Bawipa lawng nih a kan bawmh khawh. Asinain atu cu vawlei caah kan thi cang. Zeitindah a thi cangmi nih cun vawlei thilri a bawmh khawh ti lai? Vawlei caah a thi cang mi nih vawlei thilri an ngei kho ti lo.
Jesuh cu thihnak in a thothan cang. A thawhthannak nih thlarau lei ah nunthar a kan ngeihter. Kannih cu a hrinthan mi kan si. Vancung lei ralkap kan si bantuk in Pathian thawngtha bia phuang ding tuanvo kan ngei. Paul nih kei cu taksa lei si loin thlarau lei in midang a bawmchantu hna ka si tiah a ti. Amah cu a thi cang i Jesuh Khrih ah hrinthan ka si cang tiah a ti. Kannih zong kan zumhnak a phuang ngamtu kan si ve awk a si.
Paul nih Galati 6:17-18 ah, “Ka bia donghnak ah: ahohmanh nh harnak ka pe ti hlah u. Ka pum cung i a um mi hmape nih hin Jesuh sal ka si cu a langhter ko. Ka u le ka nau hna, kan Bawipa Jesuh Khrih vel cu nan dihlak cung ah um ko seh. Amen.” Paul nih Bawi Jesuh sal a sinak hmelchunhnak a takpum in a ken. Thlarau in kar a hlannak ah Bawi Jesuh caah a taksa pum kha biapi ah a chia lo. A donghnak ah a mit hmanh a tha ti lo i ca zong a tial kho ti lo. Cucaah a cakuat tampi cu a riantuan hawi, Tertius tehna nih an tialpiak. Taksa pum in a derthawm ko nain Thlarau in kar a hlan khawh caah ai lawm peng i, “Kan mihring sinak cu duhsah tein zor chin lengmang hmanh sehlaw, kan thlarau sinak cu nikhat hnu nikhat a thar chin lengmang” (2 Korin 4:16) tiah a ti.
Paul nih thlarau in kar a hlang mi si ko u tiah a kan ti. “Thlarau in kar hlan cu thawngtha bia caah nun” a si tiah a kan chimh. Thlarau lei in karhlan cu zeidah a si ti kha kan hngalh awk a si. Pakpalawng a si mi thil kha kan dawi peng ding a si lo, thawngtha bia caah kan nun ding a si. Kan nunnak dih lakin zumhnak in thlarau he karhlang hna u sih.
Atu cu ti le Thalrau thawngtha bia zumhnak in kan thinlung ah thlarau taktak kan co. Thawngtha bia he ai tlak in thla kan cam tikah Pathian nih a kan leh lai. Thlarau thei tlai ti cu Thlarau he kar hlan i thlarau tlau tlaih kha a si. Thlarau he kar na hlan i thawngtha bia caan na nun tikah thlarau thei tlai a si mi, “dawtnak, lawmhnak, daihnak, lungsaunak, zaangfahnak, thatnak, zumhawktlak mi sinak, nunnemnak le mah le mah uk khawhnak kha na tlai khawh lai. Ti le Thlarau thawngtha bia chim ding ah kan temtuar lai, lungsau tein dawtnak le thatnak he thlarau tlau caah rian kan tuan lai.
Thlarau thei tlai cu thil tha tuahnak le thawngtha bia chimnak in thlarau tlau a tlai i Thiang Thlarau umpinak a co mi hna sin ah a lang tawn mi a si. Hihi Thlarau thei tlainak caah le Thlarau in karhlannak ding ah a herh mi a si.
Copyright © 2021 by The New Life Mission
