- All e-books and audiobooks on The New Life Mission website are free
- Explore multilingual sermons in global languages
- Two new revised editions in English have been released
- Check out our website translated into 27 languages
A konglam 8: Thiang Thlarau
[8-11] Thiang Thlarau In Nun Khahter (Efasa 5:6-18)
“Ahohmanh pakpalawng bia in i hlenter hna hlah u; hi thil ruang ah hin Pathian thinhunnak cu a nawl a ngai lo mihna cung ah khan a tlung lai. Cu bantuk mi cu a komh in komh hna hlah u. Nanmah hrimhrim zong kha muihnak chung ah khua nan rak sa, sihmanhsehlaw Bawipa mi nan si cang caah ceunak chung ah nan um. Cucaah ceunak mi a si mi bantuk in nan um awk a si. Zeicahtiah thatnak a phunphun le dinnak a phunphun le biatak a phunphun a chuahtertu cu, ceunak cu a si. Bawipa a lawmhtertu thil kha kawl i zuam u. Santlai lo mi thil, khuamui thil, mi nih an tuah tawn mi kha tuah ve hlah u. Ceunak tu khan chuahpi hna u. (A thli in an tuah mi thil cu a chim hmanh chim ngam ding an si lo). Zeizong vialte kha ceunak ah chuahpi an si tikah an sining taktak te kha a lang lai. Fiang tein langhter mi cu ceunak ah cun an i cang. Cucaah, “Aa hngilh mi i hlau tuah, thihnak in tho tuah, Cun Khrih cu na cung ah a ceu lai,” an ti kha a si taktak. Zeitindah kan nuncan a si ti kha tha tein i zoh u. Mihrut bantuk in um hlah u, mifim bantuk in um u. Atu kan nikhua hi caan chia a si caah, caan tha nan hmuh mi paohpaoh kha tha tein hman i zuam u. Mihrut si ti hlah u, Bawipa nih tuah hna seh ti an duh mi hna tu kha tuah i zuam u. Zu rih hlah u, zu cu nanmah hrawktu lawnglawng a si ko, Thlarau tu khan khat deuh u.”
Kan nunnak ah Thiang Thlarau in kan khah peng nak ding ah zeidah kan tuah lai?
Kan nunnak ah Thiang Thlarau in kan khah peng nak ding ah zeidah kan tuah lai?
“Thiang Thlarau in kan khah peng nak ding ah” thawngtha bia chim ah kan i pumpek awk a si. Kan nun ah Thiang Thlarau a khahnak ding ah kan thinlung ah Thiang Thlarau kha a saktertu thil kha kan tuah hmasa awk a si. Thiang Thlarau kan thinlung khua a saknak ding ahcun a pakhatnak ah ti le thlarau thawngtha bia kan zumh awk a si. Hi zumhnak kan ngeih ahcun Thiang Thlarau umpinak thluachuah kan co lai.
Thiang Thlarau umpinak a co cang mi nih Thiang Thlarau in khah an duh maw? An duh ko. Asinain zeiruang ah dah mi cheu khat nih cu nun cu an nun khawh lo? A ruang cu an nunnak ah Pathian nakin anmah duhnak kha hmunhma an pek deuh caah Pathian he kar an hlang kho ti kho lo. Thiang Thlarau in a khat mi nun kan nun khawhnak ding ah a pakhatnak ah Pathian bia kan zumh a herh. A pakhatnak ah, zeibantuk zumhnak le nunnak dah kan ngeih a herh ti kha Baibal ah zoh hna u sih.
Zeiruang Ah Dah Mi Cheu Khat Thiang Thlarau A Khat Mi Nun An Nun Khawh Lo?
A pakhatnak ah kan chim khaw mi, anmah le anmah an i hlaw lo. Baibal nih mah le mah ai hlaw mi lawng Bawipa he kar an hlang ti kho tiah a ti. Thiang Thlarau in a khat mi nun cu mah zuamnak in hmuh khawh a si lo caah mi zeipaoh nih Thiang Thlarau umpinak kha an zumhnak i anmah le anmah an i hlawt ding a si. Thiang Thlarau umpinak a co cang mi hna zong nih Pathian pennak kong an ruah lo ahcun Thiang Thlarau in a khat mi nun an nung kho tawn lo. Cucaah Thiang Thlarau in a khat mi nun kan nun khawh nakhnga, ti le Thlarau thawngtha bia rian kan tuan ding a si. Cu hnu lawng ah kanmah le kanmah kan i hlaw kho lai i dinfelnak sal kan si kho lai.
Matthai 16:24-26 ah, “Cun Jesuh nih a zultu cu a thawh hna i, ahohmanh nih zulh nan ka duh ahcun, nanmah le nanmah nan i philh i nan vailamtahnak nan i put i nan ka zulh a herh. Zeicahtiah ahohmanh, mah nunnak humhak a duh mi cu a nunnak kha a sung lai i keimah ruang ah a nunnak a sung mi cu a nunnak a hmu mi a si. Mi nih hin vawlei pumpi hi co hmanhsehlaw, a nunnak a sungh tung ahcun zeital a miak hnga maw? A miak lai lo. A nunnak kha zeihmanh in a caw than kho lai lo” tiah a ti.
Thiang Thlarau umpinak a co cang mi hna nih zeiruang ah Thiang Thlarau in an khah khawh lo tiah cun an taksa duhnak an hlawt khawh lo caah a si. Thiang Thlarau umpinak a co cang mi hna zong nih an taksa duhnak a hlaw mi lawng nih Thiang Thlarau hnu an zulh khawh. Bawipa hnu zulhnak ding ah taksa duhnak hlawt ding mi dot tampi in a um. Bawipa nih, “Amah le mah kha i hlaw sehlaw, vailamtah i put in ka zul seh” tiah a ti.
Taksa nunnak cu thihnak a si i Thlarau nunnak cu nunnak le daihnak a si. Thlarau in kar hlan a duh mi hna nih an taksa duhnak an hlawt a herh. Hibantuk pumpeknak a tuah ngam mi lawng nih Thiang Thlarau in khat mi nun an nung kho.
Bawipa maw zulh na duh vawlei dah? Na duhthimnak cung ah hngat in, Thiang Thlarau in maw na khah lai vawlei in dah na khah lai. Thiang Thlarau in a khat mi nun na duh ahcun nangmah duhthimnak a si ko. Pathian nih kan sualnka vialte in a kan khamh i Thiang Thlarau umpinak laksawng zong a kan pek cang. Asinain Thiang Thlarau in khah nun in ka nung maw nung lo ti cu nangmah duhthimnak cung ah ai hngat. Phundang in cun, Thiang Thlarau in khah nun hi Pathian nih a timhlamh cang mi le a khaukhih cang mi a si lo. Thiang Thlarau in a khat mi nun cu ti le Thlarau thawngtha bia a zum cang mi hna duhthimnak ah ai hngat mi a si.
Thiang Thlarau In A Khat Mi Nun In Nun Nai Timh Awk A Si
Thiang Thlarau in a khat mi nun na duh ahcun Pathian nih an pek ko lai. An bawmh lai i thluachuah an pek lai. Na duh lo a si ahcun Thiang Thlarau a khat mi nun cu na sung ko lai.
Thiang Thlarau umpinak cu nangmah zuamnak in si loin ti le Thlarau thawngtha bia zumhnak lawng in co khawh a si. Asinain Thiang Thlarau in a khat mi nun cu nangmah duhthimnak cung ah a dihlak in ai hngat mi a si.
Cucaah Thiang Thlarau in a khat mi nun na duh ahcun nangmah le nangmah nai zohfel i Pathian kha bawmhnak na hal awk a si. Thiang Thlarau in a khat mi nun kan duh taktak ahcun Pathian nih thluachuah a kan pek lai i kan duhnak a tlinter ko lai. Asinain kan duh mi tlinnak ding ahcun kan taksa duhnak kan hlawt a hau.
A pahnihnak ah, Thiang Thlarau in a khat mi nun kan duh ahcun vailamtah kan i put awk a si. Harnak caan zong ah Pathian duhnak in kan nun kar kan hlan awk a si. Hihi Thiang Thlarau in a khat mi nun dingfel cu a si.
A pathumnak ah Bawipa nih, “Zeicahtiah ahohmanh, mah nunnak humhak a duh mi cu a nunnak kha a sung lai i keimah ruang ah a nunnak a sung mi cu a nunnak a hmu mi a si. Mi nih hin vawlei pumpi hi co hmanhsehlaw, a nunnak a sungh tung ahcun zeital a miak hnga maw? A miak lai lo. A nunnak kha zeihmanh in a caw than kho lai lo.” A sullam cu Bawipa hnuzulh hi kan nunnak he ai tlak mi a si. Cun kan zulh ahcun kan taksa le kan thlarau a thangcho lai, kan zulh duh lo ahcun kan taksa le kan thlarau a rawk lai.
Zeiruang ah Thiang Thlarau in kan khah khawh lo? A ruang ah kanmah duhnak le ruahnak tha lo kan hlawh duh lo caah a si. Jesuh hnu kan zulh tikah kan chunglei nun cu a thawng i thawnnak cak deuh he a kan hruai khawh.
Efesa 5:11-13 ah, “Santlai lo mi thil, khuamui thil, mi nih an tuah tawn mi kha tuah ve hna hlah u. Ceunak tu khan chuahpi hna u. (A thli in an tuah mi thil cu a chim hmanh chim ngam ding an si lo). Zeizong vialte kha ceunak ah chuahpi an si tik ah an sining taktak te kha a lang lai” tiah a ti. Khrifa hna nih cun zeihmanh thathnemnak a chuahpi lo mi muihnak thil he hawikomhnak kan ngeih ding a si lo. Cun santlai lo muihnak thil he hawikomhnak kan ngeih tikah Pathian nih langhter u tiah a kan ti. Muihnak chung ah kan tuah mi thil tha lo nih sual a kan phawt te lai. Zeizong vialte kha ceunak chung ah chuahpi an si te lai.
Hi ningzak thil a si mi vialte kong hi aho dah a chim kho i a langhter kho? Na unau na chuahpi le Pathian sal hna nih an langhter khawh lo ahcun nangmah tein na langhter a herh. Zeizong vialte langhter mi hi ceunak chung ah chuahpi an si lai. Cucaah kan tuahsernak tha lo kha kan phuan ngam i santlaihnak a ngei lo mi kan tuahsernak kha kanmah tein kan hruaitu hna hmang in ma Thiang Thlarau hruainak in kan langhter ding a si.
Vawlei ah kan langhter mi thil vialte cu cawnpiaknak in a dih tawn, asinain Pathian hmai ahcun zeizong vialte hi ceunak tang ah chuahpi an si. Minung cu kan tlamtli dih khawh lo caah vawlei ah sualnak tampi kan hngalh lo kar hmanh kan tuah tawn. Asinain kan cung ah Pathian bia kan tlanter tikah kan sualnak kha kan hngalh hna i kan phuan khawh hna. Hi ruang ah a dong kho lo mi lawmh biachimnak Pathian sin ah kan ngei kho.
Jesuh nih kan sualnak le kan palhnak vialte kha a lak dih cang i Jordan tiva ah tipil a innak in Pathian duhnak kha a tlinter caah Pathian dinfelnak in kannih cu kan ceu kho. Johan nih Jesuh tipil a peknak ah khan vawlei cung minung vialte nih kan tuah mi sualnak rel cawk lo kha a cung ah chuan a si. Amah cu vawlei sualnak vialte a kalpitu Pathian tuufa no a si i sual biaceihnak ruangah vailam cung thihnak a tuar i thihnak in a thothan. Jesuh nih minung sualnak vialte kha a ngaihthiam i “Aa lim cang” (Joahn 19:30) a ti ah khan minung vialte a kan khamh. Jesuh Khrih nih a tuah mi zumhnak thawng in kannih cu thianter kan si. Kan sualnak cu ngaihthiam kan si caah ceunak chung ah kan lut kho than i dingfel tein Pathian hnu kan zulh khawh.
Pathian Nih Caan Tha Tein Hmang U A Kan Ti
Pau nih Thiang Thlarau in a khat mi nun kan duh ahcun caan tha tein hmang u a kan ti. Efesa 5:16-17 ah, “Atu kan nikhua hi caan chia a si caah, caan tha nan hmuh mi paohpaoh kha tha tein hman i zuam u. Mihrut si ti hlah u, Bawipa nih tuah hna seh ti an duh mi hna tu kha tuah i zuam u” tiah a ti. Thiang Thlarau in khah kan duh ahcun caan tha tein kan hman lai i mihrut bantuk in kan um lai lo. Bawipa duhnak kha zeidah a si ti kan hngalh i kan tuah awk a si. Zeidah a biapi deuh ti kha kan hngalh awk a si: taksa duhnak zumhawktlak si maw asiloah Pathian ah i pumpek dah.
Hrinthannak kan co khawh in kan chung ah Thiang Thlarau khua a sa. Thiang Thlarau umpinak kan co cang ahcun a uktu cu Bawipa a si i amah cu kan Siangpahrang a si. Amah lawng hi kan Bawi a si. Amah cu a ka sertu ka Bawipa, kan sualnak vialte a ka ngaithiamtu le thluachuan a ka petu a si. Amah cu ka thihnak le ka nunnak ah, thluachuahnak le chiatserhnak ah nawlngeitu bik a si. Bawipa cu Pathian a si i kan nunnak dihlak in a nawl kan ngaih ding a si ti kha kan hngalh awk a si.
Filipi 2:5-11 ah zeidah a chim ti kha zoh tuah hna u sih. “Nan lungput cu Khrih nih a rak ngeih mi lungput kha siseh, cuc hihi a si: Pathian sinak kha a ngeih zungzal mi a si ko nain hramhram in Pathian tluk si awk kha cu hawk ah a rel lo. Amah lungtho tein cu vialte cu a hlawt dih i sal sinak tu kha aa lak, Minung bantuk ah a cang i minung mui in a lang, Mi toi ah aa dor i nawlngaihnak lam kha thih tiang in a zulh-vailam cung thihnak kha. Hi ruang ah hin cunglei a sannak bik hmun ah khin Pathian nih a cawi i min vialte lak i min cungnung bik kha a pek, Cucaah Jesuh min upatnak caah cun vancung i a um mi vialt nih si hna seh, vawlei tang i a um mi vialte nih si hna seh, an khuk an i bil lai i Pathian kan Pa sunparnak caah cun lei vialte nih Jesuh cu Bawipa a si, an ti lai” tiah a ti.
Paul nih “hihi nan lungput siseh” tiah a ti. Hihi Jesuh lungput zong a si tiah a ti. Paul nih a chim mi cu “hihi nan lungput siseh” zeicahtiah hihi Jesuh lungput zong a si i amah Pathian duhnak in vawlei mi vialte an sualnak in khamh awk ah a ra mi Sertu Pathian a si tiah a ti. Bawipa cu hi vawlei ah a ra i Johan sin tipil innak vawlei sualnak vialte kha a cung ah a khin dih. Cun vailam cung a thih tikah vawlei sualnak vialte kha a hnawh dih. Cu nithum hnu ah thihnak in a thothan i kan khamhtu a hung si.
Sertu Jesuh Khrih hi vawlei a ratnak a ruang ah kan sualnak in khamh ding ah a si. Tipil innak le vailam cung a thisen in a dawtnak a langhter. Sertu a si ko nain ser mi bantuk in a rat i kan sualnak vialte in a kan khamhnak a dawtnak cu ser mi thil vialte nih khuk bil in upatnak an pek lai. Hi ruang ah ser mi thil vialte nih Jesuh cu Bawipa a si tiah an phuan lai. Amah lawnglawng hi Bawipa a si i dinfelnak hrampi a si ti kha a kan phuanter.
Pathian a zum i Thiang Thlarau umpinak a co cang mi hna nih cun “Pathian lawng hi ka nunnak Bawi” a si ti kha kan zumh i kan thinlung in Jesuh dawtnak kan co cawk a si. Kanmah kha kanmah Bawi si loin Jesuh Khrih kha kan Bawi le kan sualnak in a kan khamhtu a si ti kha kan zumh ding a si. Cun amah cu kan nunnak thluachuah a kan petu le nunnak thar ah lam a kan hruaitu a si ti kha kan zumh ding a si.
Minung tampi nih cun hrinthannak an co hnu zong ah an Bawi an i thleng duh lo. Thiang Thlarau umpinak a co cang mi tampi nih anmah le mah kha Bawi ah an i ser. Thiang Thlarau in a khat mi nun cu Pathian hnu a zul mi nun a si. Hi bantuk nunnak hi ni khat chung ah hmuh khawh mi a si lo i Jesuh cu kan Bawipa le hi vawlei cung ah a kan sertu a si ti kha kan zumh a herh. Vancung pennak chung ah a kan luh tu le kan sualnak vialte in a kan khamhtu Jesuh Khrih kha kan zumh i a rian kan tuan awk a si.
Kan thinlung in biatak kan ken awk a si. Minung tampi nih an nunnak kha anmah tein an uk. An nunnak kha anmah tein an kilven i an uk. Atu cu kan Bawi thlen caan a si cang. Atu cu Pathian a thei mi kan si cang caah, Bawipa kha kan uktu ah kan i ser awk a si cang.
Kan dihlak in kan thinlung ah sualnak kan ngei cio i sualpalhnak kan tuah ruang ah hell kal ding lawng te kan si. Asinain ti le Thiang Thlarau thawngtha bia ah Pathian kan hmuh. Pathian nih a kan dawt tuk caah hi vawlei ah a ra i Johan sin tipil innak in kan sualnak vialte a kan ngaihthiam, vailam cung thihnak a kan tuarpiak kan Khamhtu a hung si. Kan zumhnak thawng in sualnak chung in khamh kan si. Phundang in cun, Thiang Thlarau umpinak kan co.
Baibal nih “Pathian Thlarau a ngei lo mi cu Khrih ta an si lo” (Rom 8:9) tiah a ti. Pathian khamhnak le a Thiang Thlarau umpinak kan co tikah Pathian fa kan si. Thiang Thlarau cu kan caah Pathian a si i Thiang Thlarau hruainak tang ah dingfel tein kan nun awk a si. Cuti nunnak ding ah kanmah le mah kan i hlawt a hau. Jesuh kan ton i a khamhnak kan co hnu ah, kan Bawipa le kan Uktu ah kan ser awk a si.
Kan Thinlung Bawi Thutdan Cu Jesuh Kan Pek Awk A Si
Kan nunnak ah kanmah kan bawi peng ah Bawipa hnu kan zul kho lai lo. Kanmah kha bawi kan si lo ahcun Pathian nih ka riantuan u a kan ti tikah, “Aw” tiah kan ti khawh colh lai. Cu ti si lo ahcun, “zeiruang ah dah hihi cu kan tuah piak lai?” kan ti ko hnga. Amah le mah bawi ah aa ser mi nih Pathian nih rian a fial tik ah “a duh mi tuahpiak ding ah zaangfah a ka nawl ding a si” tiah Pathian duhnak tuah kha a hrial ko lai. Cubantuk mi hna caah Pathian cawnpiaknak kha thilrit men a si.
Asinain Thiang Thlarau in khah ding ahcun a nawlpeknak kan ngaih ding a si. Sathat pa nih a duh na loin a hruai mi caw bantuk kan si awk a si lo, Pathian hnu zulh kha pumpek in kan tuah awk a si. Kan Khamhtu le Kan Pathian, dinfelnak lam ah a kan hruaitu kha kan zulh ding a si. Pathian cu khamhnak thluachuah a kan petu Bawipa a si. Kan Bawipa ah kan pom i a rian kan tuan ahcun Thiang Thlarau in kan khat lai. Nangmah le na chungkhar nih Jesuh kha siangpahrang sinak nan pek i cungnung bik ah nan chiah ahcun na nunnak ah vel le thluachuahnak na co lai.
Rili tilet cung ah tilawng in khual a tlawng i a hnulei ah Jesuh a dir mi hmanthlak na hmuh bal ko men lai. Kan nunnak ah zuamcawhnak kan ton i Bawipa rian kan tuan lio ah khin, Jesuh Khrih nih a kut cak in a kan hruai i a kan dawmhtlaih zungzal. Kan nunnak a kilvengtu taktak cu a Thawng mi kan Pathian a si. A kan khamh. Satan kut in a kan kilven, a kan hruai i kan nun a kan uk.
Kan Bawipa a si caah kan nunnak a hruai khawh i thluachuah a pek khawh. Asinain kan Bawipa ah kan cohlan lo ahcun zei rian hmanh a tuan kho lo. Pumpak cio kan Pathian a si caah, a duhnak kha hramhram in a kan zulhter lo. A thawng mi Pathian a si ko nain kanmah nih bawmhnak kan hal lo i duhnak taktak he a rian kan tuan lo ahcun zeihmanh a tuah kho lo.
Zeizong Te Kha A Cung Ah Chia Ko
Zeizong vialte kha acung ah chia dih law amah nih kan cung ah Bawi rian tuan seh. A rian kha tuan law Bawi a si tiah cohlang. Kan nih cu a tlamtling lo mi kan si caah zeizong te kha amah cung ah kan khin i tuanvo kan pek ding a si. Kan chungkhar, nitinte kan nunnak le zeizong te a cung kan khin tikah Pathian fimnak kan co lai i amah duh ning in kan nung kho lai i Pathian nih a kan pek mi zumhnak le thawnnak in harsatnak vialte kan tei khawh lai.
Amah kan zulh ko a si ahcun kan zeizong kong ah amah nih tuanvo a lak lai i kan harsatnak zong amah harsatnak ah ai cang lai. Thiang Thlarau in a khat mi nun in kan nung kho lai i kan nunnak ah lawmhnak le daihnak in kan nung kho lai. Zumhawktlak mi Khrihfa kan si bantuk in amah ah khukbil in kan kun lai i kan Bawi a si tiah a rian kan tuan lai.
Thiang Thlarau in kan khah khawh nakhnga zeibantuk nun in dah kan ti lai tiah Filipi 3:3 nih a chim mi hi zoh tuah hna u sih. “Cuarpar tan taktak mi anmah kha si loin kanmah hi pei kan si cu, Pathian thlarau thawng in Pathian a bia i Khrih Jesuh he aa pehtlai mi nunnak ah aa lawm i lenglei phunglam aa bochan lo mi hi pei kan si cu” tiah a ti. Hi ka zawn ah cuarpar a ti mi hi Thlarau in Pathian a bia mi, Khrih Jesuh ah ai lawm mi le taksa pum ah hnangamnak a ngei lo mi hi kan si.
Cuarpartan in a nung mi hna cu thinlung chung sualnak vialte kha Jesuh nih Johan sin tipil a innak cung ah chuan dih kha a si. Thlarau nih a hruai mi hna a nunnak kha thlarau ah a um. Pathian rian kha an tuan i Jesuh Khrih kha, “Jesuh nih a sunglawi mi nunnak a ka pek. Miding ah a ka ser i thluachuah a ka pek. A riantuannak ah ka herh mi vel kha a pek” tiah an thangthat. Cubantuk in kan nun awk a si. Hihi Thiang Thlarau in a khat mi nun cu a si. Paul nih “Sihmanhsehla zei nan tuah hmanh ah, nan ei ah siseh, nan din ah siseh, nan tuah mi cu a dihlak in Pathian thangthatnak caah siter ko u” (1 Korin 10:31) tiah a ti.
Filipi 3:13-14 ah, “Ka u le ka nau hna, cu thil cu ka phan cang tiah ka ruat hrimhrim lo, sihmanhsehlaw thil pakhat ka tuah mi cu, hnulei thil kha philh i hmailei thil banh i zuam kha a si” tiah a ti. Pathian nih hnulei thil kha philh dih cang u law hmailei thil tu kha banh i zuam u tiah a kan ti. Tinh mi lei ah kan tlik awk a si. Kan palhnak le thatnak kha zoh loin hnulei thil kha philh in, hmailei thil kha banh in kan i tinh mi lei ah kan tlik awk a si. Cu tinh mi cu Jesuh Khrih zumh buin amah ca riantuan kha a si.
Kannih cu a tlamtling mi kan si lo caah kan taksa duhnak kan tuah ahcun fawite in a tluril kho mi kan si. Asinain Pathian zoh bu le zumh buin kan sualnak le palhnak vialte kan phuan khawh. Johan nih Jesuh tipilnak a pek i vailam cung a thihnak ah khan kan sualnak vialte cu a cung ah khin dih a si. Thihnak in a thawhthan hnu ah kan Khamhtu a hung si i amah a zum mi paoh nih nunnak thar a pek hna. Cucaah, hnulei thil vialte kha philh dih in hmailei thil le tinh mi tu kha kan banh awk a si.
Thiang Thlarau In A Khat Mi Nun Kilven Ning
Hmailei thil kha banh in tinh mi sang deuh kha kan banh awk a si. Hnulei thil nih harsatnak an pek peng ahcun a rianrannak in na philh khawh ding kha kan duhpiak. Kan derthawm ruang ah thil tampi kan tuah khawh lo mi a um, asinain cu hna cu a biapi mi an si lo, zeicahtiah a biaipi mi cu hmailei thil an si. Hmailei thil kha a biapi mi an si caah siangpahrang sinak kha Jesuh kan pek i amah nih a kan hruai ding a si. Hmailei ah zeitindah kan nun lai ti kong ah amah kha biakhiahnak kan tuahter i amah duhnak kha kan tuah awk a si.
Zultu Hna Bantuk In Kan Nun Awk A Si
Sual ngaihthiamnak thawngtha kan zumh lawng ah Thiang Thlarau in a khat mi nun kan nung kho lai. Hihi a biapi tuk mi a si. 2 Timote 2:10 zoh hna u sih. “Ka fapa, Khrih Jesuh he kan i pehtlaihnak thawng in kan hmuh mi Pathian vel nih thawnnak in pe ko seh. Tehte tampi hna theih ah ka chim mi bia kha i lak law, midang a cawnpiak kho ve ding mi, na zumh mi hna kha va kenter hna. Khrih Jesuh ralkap zumhawktlak bantuk in sifah innak ah khan ing ve ko. Ralkap a tuan lio mi nih cun a cung bawi lungton kha a duh caah ralkap a si lo mi hna rian ah khan aa sawhkalh len lo. Tlik zuamnak ah a tli mi pa nih tlik zuamnak phung kha a zulh lo ahcun laksawng kha a hmu kho lo. Rian a hran a thattu lothlopa nih khan, rawl cu tuan a cut tikah, a hmuh awk a si mi cu a hmuh hamsa bik awk a si. Bawipa nih zeizong vialte hngalh khawhnak an pek lai caah ka chim mi hi ruat hna hmanh. Thawngtha ka chim mi chung ah a um bang khan, thihnak in thawhter mi Jesuh Khrih, David tefa a si mi kha, philh hlah. Thawngtha ka chim ruang ah temhinnak ka huah i misual bantuk in thir cikcin in an ka khih. Sihmanhsehlaw Pathian bia cu thir cikcin in hren khaw a si lo. Cun hi vialte ka innak hi Pathian nih a thim mi hna zawn ka ruah caah a si i Khrih Jesuh thwang in hmuh mi a sunglawi mi le zungzal in a hmun mi khamhnak kha hmu hna seh ti ka duh caah a si. Hi a tanglei bia hi a hmaan mi bia a si: “Amah he kan thih ti ahcun amah he a nun zong kan nung ti lai.”
Paul nih Timote sin ah a chim i, Thiang Thlarau nih kan sin ah a chim mi cu, “Khrih Jesuh he kan i pehtlaihnak thawng in kan hmuh mi Pathian vel nih thawnnak in pe ko seh. Tehte tampi hna theih ah ka chim mi bia kha i lak law, midang a cawnpiak kho ve ding mi, na zumh mi hna kha va kenter hna.”
“Khrih Jesuh he kan i pehtlaihnak thawng in kan hmuh mi Pathian vel nih thawnnak in pe ko she.” Pathian vel ah thawn ti suallam cu Jesuh Khrih i tlaih le zumh buinh ti le Thlarau thawngtha bia kha zumhnak in kan zumhnak thawnter tinak a si. Jesuh cu kan sualnak vialte cohlang ding ah vawlei ah a ra, vailam cung thihnak a tuar i thihnak in a thothan i kan Khamhtu a hung si. A sullam cu Pathian vel ah kan thawn i a sin ah lawmhnak bia kan chim ding a si. Pathian nih a kan khamh i khamhnak hi Pathian laksawng ah kan cohlan awk a si. Hihi sual ngaihthiam khamhnak kan ti mi cu a si. Zingka te thlacamnak le biakinn saknak ah phaisa tampi pek he zeihmanh pehtlaihnak a ngei lo. Hi thil hna nih kan khamhnak caah thil tha chuahpi loin harnak tu an chuahpi.
Sual chung in khamhnak ti sullam cu kanmah tuahsernak zoh loin Jesuh nih kan sualnak vialte hnawh ding ah tipilnak a in i vailam cung ah kan sualnak vialte a kan hnawh dih tinak a si. Kan sualnak vialte in khamh awk ah thihnak in a thothan. Pastor hna zong member bantuk tein thawngtha biatak zumhnak in an sualnak ngaihthiam an si. Jesuh Khrih kha a thinlung dihlak in hibantuk in a zum mi paoh nih sual ngaihthiamnak an co. Cucaah Pathian khamhnak vel ah hnangamnak kan ngei kho i kan zumhnak kan thawnter khawh.
Thiang Thlarau in a khat mi nun kan duh ahcun ti le Thawngtha bia tak ah zumhnak fek kan bunh awk a si. Kan nunnak ah kan derthawmnak le kan tlamtlin lonak tete an um tawn. Hi ruang ah Pathian khamhnak vel ah kan thawn a herhnak cu a si. Kan tlamtlin lonak a langh tik paoh ah kan zumhnak kha, “Pathian nih ti le Thlarau thawngtha bia in a ka khamh. Jesuh nih ti le Thlarau hmang in ka sualnak vialte a ka ngaihthiam” tiah kan chimphuan i kan thawnter ding a si. Thawngtha bia zumhnak in miding kan si i Thiang Thlarau umpinak kan co mi thawng in kanmah le mah kan i thawnter. Ti le Thlarau thawngtha bia zumhnak thawng in kan sualnak vialte chung in khamh kan si i mithawng ah kan i cang. Kan zumhnak thawng in thluachuak mi kan si.
Paul nih, “Sihmanhsehlaw zei nan tuah hmanh ah, nan ei ah siseh, nan din ah siseh, nan tuah mi cu a dihlak in Pathian thangthatnak caah siter ko u” (1 Korin 10:31) tiah a ti. Hihi a biapi tuk mi a si. A sullam cu kan nunnak hi Pathian ah kan pek awk a si tinak a si. “Nan ei ah siseh, nan din ah siseh.” Kan ei kan din i Pathian riantuannak caah kan thawn awk a si. Thawngtha bia chimnak ding ah thil tha kha kan ei i kan ngamdam a herh.
“Ralkap a tuan lio mi nih cun a cung bawi lungton kha a duh caah ralkap si lo mi hna rian ah khan aa sawhkalh len lo” (2 Timote 2:4). Thawngtha bia chimnak ding ah Thiang Thlarau in na khah a herh. Thawngtha chim ding ah kan nun kan pek tikah zumhawktlak tein kan nung kho. Hi bantuk in zumhawktlak in a nung mi hna cu Thiang Thlarau in a khat mi an si. Thiang Thlarau in a khat mi nun kan i zuam cio awk a si. Rian na tuannak in na hmuh mi chawva zong ah thawngtha bia caah na hman ding a si.
Thiang Thlarau in a khat mi nun na duh ahcun na nunnak kha Bawipa ah pe, a riantuan, na chawva kha thawngtha bia caah hmang lawng na lawmhnak le na ngaihchiatnak kha Pathian chim. Hibantuk nun kan duh ahcun thawngtha bia ah fak piin kan nun kan pek awk a si.
Minung tampi nih tuni tiang an nun kha anmah caah an hman. An ngeihchiah khonnak caah vanpang an ser i anmah kha anmah bawi ah an i ser. Asinain atu cu Pathian caah kan nun ding a si cang. Pathian lawng hi kan Bawi le kan Uktu ah kan ser awk a si. Bawipa nih ““Ralkap a tuan lio mi nih cun a cung bawi lungton kha a duh caah ralkap si lo mi hna rian ah khan aa sawhkalh len lo” tiah a ti. Ralkap tha nun in nun cu phungphai tha zulh kha a si. Bawipa caah zumhawktlak ralkap tha in kan nun ahcun amah nih kan harsatank vialte a tawlrel, a kan hruai i a kan kilve. A pennak le a ram dinfelnak kha kawl hmasa u tiah a kan ti (Matthai 6:33).
Pathian bia ah palhnak pakhat hmanh a um lo. Kan zulh a si ahcun a bia a thawtnak le biatak a sinak kan hmuh lai. Asinain a pakhatnak ah na thinlung ah Thiang Tharau umpinak na co hmasa a herh. Thiang Thlarau umpinak a co lo mi nih cun a bawi thutdan kha Pathian a pe kho lo. Asinain Thiang Thlarau umpinak a co cang mi nih a bawi thutdan kha Pathian apek khawh, Thiang Thlarau khahnak nun kha a co khawh i a thinlung ah lawmhnak le daihnak a co khawh.
Ti le Thlarau thawngtha bia dawh na zumh ahcun Thiang Thlarau umpinak a tak in na hmuhton lai. Thiang Thlarau in khah i thluachuak mi nun na duh ahcun Pathian kha Siangpahrang ah na co i a Pennak caah na nun awk a si. Cu hnu ah Thiang Thlarau in na khat lai, na thinlung cu duhdim tein a um lai i na nun a thangcho mi cu Pathian pennak chunga h a lut chin lengmang lai.
Midang nih Thiang Thlarau umpinak an co i Thiang Thlarau in a khat mi nun an nun khawhnak ding ah thawngtha bia kan chim tawn. Thiang Thlarau khah nun cu zeidah a si i ti kha ka fianter i zeitindah kan co khawh lai ti zong ka chimh hna. Cun zumhnak in na thutdan cu Pathian na ap i zumhnak in a rian na tuan i Thiang Thlarau in na khah a herh.
Cun Thiang Thlarau a co cang mi hna caah hrinthan hi a donghnak a si lo. Thiang Thlarau in a khat mi nun kha a nun awk a si. Cu ti kan nun lawng ah kan taksa le kan thlarau nih thluachuahnak a co khawh lai.
Hibantuk nun hi chikkhat lo ah a cang mi a si lo. Bawipa kha kan Uktu ah kan co hlan i kan thinlung dihnak lak in hmunhma kan pek tik lawng ah hi thil hna cu an cang kho. Pathian nih a kan khamh cang i thawngtha bia chimphuannak ding ah Thiang Thlarau in a khat mi nun zong a kan pek cang. Cun a rian zong a kan pek i Thiang Thlarau in a khat mi nun kan kilven awk a si.
Na nunnak cu amah na pek i amah caah na nun awk a si. Thawngtha bia dawh chimphuannak in a rian na tuan awk a si. Cuticun na nunnak cu Thiang Thlarau in a khat lai i na chung in vel le lawmhnak a luang lai. Amah a rat than tikah a hmai ah lunglawm tein na dir lai i laksawng na hmuh lai. Nangmah le keimah Thiang Thlarau in a khat mi nun kan duh awk a si. Hi bantuk nunnak hi zumhnak in kan i zuam awk a si. Cuticun Thiang Thlarau in a khat mi nun kan kilven khawh lai.
Thiang Thlarau in a khat mi nunnak ding ah na thinlung bawi thutdan na hlaw cang maw? Na thinlung dihlak amah na ukter lai tiah ka zumh. Thiang Thlarau in a khat mi nun na duh awk a si. Cuticun amah nih thluachuahnak an pek lai i Thiang Thlarau in na khat lai.
Copyright © 2021 by The New Life Mission
