- All e-books and audiobooks on The New Life Mission website are free
- Explore multilingual sermons in global languages
- Two new revised editions in English have been released
- Check out our website translated into 27 languages
A konglam 8: Thiang Thlarau
[8-12] Thiang Thlarau In A Khat Mi Nun (Titas 3:1-8)
“Bawi le nawlngetu pawl kha, an nawl nan ngaih hna lai i thil tha tuah kha nan i zuam lai, tiah na mi pawl kha chim than hna. Ahohmanh i congoih hlah u, pakhat le pakhat i rem le i daw le lungnem cio tu innan um lai, tiah na chimh hna lai. Zeitintiah kanmah hrimhrim zong kha kan rak hrut, nawl ngai loin khua kan rak sa i kan rak palh. Pumsa duhnak le nuamhnak sal kha kan rak si. Mi kha kan rak nahchuah hna i ziar kan rak ngeih hna, mi nih an rak kan huat i kannih zong nih kan rak huat hna. Sihmanhsehlaw kan Khamhtu Pathian dawtnak le zaangfahnak cu vawlei cung ah a hung langh tikah, thil tha kan tuah mi ruang ah hi si loin amah nih a kan zaangfah ca lawnglawng ah kannih cu a kan khamh i cu a kan khamhnak cu hrinthannak ti thawng le Thiang Thlarau nih mi a tharter khawhnak a ngeih mi thawnnak thawngin a si. Jesuh Khrih kan khamhtu thawng in Pathian nih Thiang Thlarau cu tampi in a kan toih i cucaah a vel ruang ah Pathian he cun kan i rem i kan i ruahchan mi zungzal nunnak kha kan hmuh. Hi bia hi biatak a si. Hi bia hi biapi in na rak lak hna awkah ka duh. Pathian a bia mi nih cun hmaizah awktlak a si mi rian kha tuan hna sehlaw, cu rian cu anmah caah hmaizah awk tlak mi rian a si ti lawng si loin an minung hawi ca zong i a thahnem mi rian a si mi kha si hna seh.”
Thiang Thlarau in a khat mi nun zeitindah kan nun khawh lai?
Pathian duhnak kan hngalh i amah duh ning in thawngtha bia kan chim ding a si.
Jesuh Khrih a zum mi Thiang Thlarau umpinak a co cang mi hna nih Thiang Thlarau khah nun in an nun awk a si. Khrihfa caah cun Thiang Thlarau in a khat mi nun hi Pathian nih a duh mi a si. A duhnak cu kan zulh awk a si. Cuti si ah zeitindah Thiang Thlarau in kan khah khawh lai? Paul nih a chim mi ah hin kan ruahnak kan pek awk a si.
Thiang Thlarau Khahnak Ding Ah Zeidah A Herh?
Titas 3:1 ah Paul nih ““Bawi le nawlngetu pawl kha, an nawl nan ngaih hna lai i thil tha tuah kha nan i zuam lai, tiah na mi pawl kha chim than hna” tiah a ti. A pakhatnak ah nawlngeitu le uktu hna nawlngaih ding le thil tuah ding ah timhcia tein um u tiah a kan ti. A chim duh mi hi vawlei nawlngeitu bia kan ngaih lo ahcun Thiang Thlarau in a khat mi nun kan nung kho lo tinak a si. Asinain vawlei nawlbia le phunglam nih Pathian bia a kalh ahcun an nawl kan ngaih awk a si lo. Asinain Pathian bia he ai kalh lo ahcun thawngtha bia chimphuannak caah kan hman awk a si.
Kannih cu Thiang Thlarau umpinak a cotu kan si. Vawlei nawlbia kan buar ahcun zeitindah Thiang Thlarau in a khat mi nun kan nun khawh lai? Cucaah Thiang Thlarau in kan khah khawh nakhnga vawlei nawlbia zong kan ngaih ding a si. Thiang Thlarau umpinak a co mi hna nih zatlang phung zong an zulh ding a si. Vawlei nawlbia kan zulh lawng ah Pathian he kan kalti ko lai.
Tahchunhnak ah biakinn kan kal pah ah mi pakhat nih sualnak a tuah. Cu bu cun lunglawm tein Bawipa rian a tuan kho hnga maw? Zeitindah nawlbia leng ah nung buin hi vawlei ah Bawipa duh ning in cun a nun khawh lai? Thlarau in kar kan hlan lio ah zatlang phung leng in nun a hau lo. Nawlbuar nak nih zeihmanh thatnak a chuahpi lo. Nawlbia zulhnak thawng in daihnak chuahpi kan i zuam lai. Thawngtha bia chimphuan pah in ding fel tein nun kan i zuam lai. Thiang Thlarau in a khat mi nun kan nun tikah zatlang bu nawlbia zong nih mithiang hna nih cun kan zulh ding a si.
Kan Thinlung Ah Tongdornak Kan Ngei Lai
Paul nih “Ahohmanh i congoih hlah u, pakhat le pakhat i rem le i daw le lungnem cio tu in nan um lai” tiah a ti. Thiang Thlarau in a khat mi nun kan nun khawh nakhnga pakhat le pakhat kan i congoih lai lo, daihnak le tongdornak tein kan nung lai.
Hrinthannak a co mi hna thinlung ah tangdornak, mah le mah uk khawhnak le nunnemnak a um. Hi a si khawhnak cu Thiang Thlarau kan chung ah a um caah a si. Paul nih pakhat le pakhat i dohnak in thawngtha bia kha a mui chiatter hlah tiah a ti. Asinain zatlang nawlbia nih thawngtha bia a dohkalh ahcun kan i doh ding cu a si ko. Asinain cuti asi lo ahcun daihnak he kan nun awk a si. Midang nih “a caan ahcun cakei bantuk in tih a nung nain, a caan ahcun thuro bantuk in a nun a nem. Khrihfa biaknak a zumhnak nih a nun a nemter i a nun sullam a ngeihter” tian an kan ti awk a si.
Taksa duhnak ahcun nunnemnak le tangdornak a um lo. Asinain Thiang Thlarau umpinak le kan sualnak in a kan khamhtu Bawipa thawng in kan chung ah nunmennak a um. Ka cung ah thil tha lo taktak a tuah mi “ngaihthiam” kha ngaihthiamnak taktak a si i tangdornak te he pehtlaih khawh kha “tangdornak” taktak cu a si. Mi pakhat kha ka huat ziar ko nain a hua loin bantuk in i titer kha ka caah cun tangdornak a si lo. A dik mi tangdornak le ngaihthiamnak taktak ngeih kha a hrinthan mi Khrihfa hna chunglei ziaza a si.
Cun midang nih kan cung ah that lonak an tuah tik zong ah nunnemnak kan ngeih ding a si. Thawngtha bia chimphuannak an kham dah ti lo ahcun mi zeibantuk cung paoh ah kan nun a nem awk a si. Asinain lam an kan kham ahcun nunnemnak kha biatak tanh in kan thlen a hau. Nunnemnak cu Pathian biatak chung ah a um mi a si caah, biatak dohkalh in a nung mi cu nunemnak hmuhsak awk an i tlak lo tinak a si caah kan doh hna ding a si.
Pathian nih amah a dotu hna cu a ngaithiam hna lo i an sualnak a pek ter hna. Pathian nih Abraham sin ah, “Nangmah thluachuah an petu kha thluachuah ka pek ve hna lai i chiat an serhtu kha chiat ka serh ve hna lai” (Genesis 12:3) tiah a ti. Pathian biatak a dohtu hna caah khamhanklam a um lo. Anmah nunnak lawng si loin an tefa chant hum tiang rawhralnak lam kha an hrial khawhnak ding a um lo.
Zeiruang ah dah kan lung a sau i kan i tangdor ding a si? Titas 3:3 ah ai tial bantuk in, “Zeitintiah kanmah hrimhrim zong kha kan rak hrut, nawl ngai loin khua kan rak sa i kan rak palh. Pumsa duhnak le nuamhnak sal kha kan rak si. Mi kha kan rak nahchuah hna i ziar kan rak ngeih hna, mi nih an rak kan huat i kannih zong nih kan rak huat hna” tiah a ti. Kanmah zong kan hrinthan hlan ahcun anmah bantuk hi kan rak si ve. Anmah bantuk kan rak si ve caah kannih zong nih lungsau le tangdor tein kan um piak hna ding a si.
Titas 3:4-8 ah, “Sihmanhsehlaw kan Khamhtu Pathian dawtnak le zaangfahnak cu vawlei cung ah a hung langh tikah, thil tha kan tuah mi ruang ah hi si loin amah nih a kan zaangfah ca lawnglawng ah kannih cu a kan khamh i cu a kan khamhnak cu hrinthannak ti thawng le Thiang Thlarau nih mi a tharter khawhnak a ngeih mi thawnnak thawngin a si. Jesuh Khrih kan khamhtu thawng in Pathian nih Thiang Thlarau cu tampi in a kan toih i cucaah a vel ruang ah Pathian he cun kan i rem i kan i ruahchan mi zungzal nunnak kha kan hmuh. Hi bia hi biatak a si. Hi bia hi biapi in na rak lak hna awkah ka duh. Pathian a bia mi nih cun hmaizah awktlak a si mi rian kha tuan hna sehlaw, cu rian cu anmah caah hmaizah awk tlak mi rian a si ti lawng si loin an minung hawi ca zong i a thahnem mi rian a si mi kha si hna seh” tiah a ti.
Baibal ning tein Pathian nih thil tha kan tuah ruang ah a kan khamh lo. A zaang a kan fah caah hrinthannak thluachuah a kan pek. Phundang in cun, Jesuh cu hi vawlei ah a ra, tipilnak a in, vailam cung a thi, thihnak in a thothan i kan sualnak vialte a kan tawlpiak. Jesuh cu thihnak in a thothan cang i Pathian orhlei kam ah a thu. Thihnak in a thawhthannak nih thil a tling lo mi vialte kha a tlinter dih.
Jesuh Khrih kan khamhtu thawng in Pathian nih a Thiang Thlarau thluachuah a kan pek. Jesuh Khrih cu vawlei sualnak vialte kalpi ding ah Johan nih tipilnak a pek, vailam cung ah a thi i kan sualnak vialte a kan ngaihthiam. Khamh kan si cang i miding kan si cang.
Baibal nih “zungzal nunnak ruahchannak he rocotu kan si” tiah a ti. A sullam cu Pathian rocotu kan si bantuk in a rumnak le a sunparnak vialte zong kan co dih. Hibantuk nun kan nun khawhnak ding ah Thiang Thlarau in kan khah a herh. Ti le Thlarau thawngtha bia kha na zumh i sual ngaihthiamnak na co hnu ah midang sin ah thawngtha bia na phuan a herh.
Cucaah sual ngaihthiam a co cang mi kan si caah midang thatnak caah rian kan taun i vawlei nawlbia zulh buin Pathian a kawl mi sin ah thawngtha bia kan chimphuan awk a si. Cun that lonak a tuahtu hna kha kan ngaihthiam hna i thawngtha bia chim an kan donhnak hnga lo tangdor tein kan pehtlaih hna ding a si. “Hi thil hna hi a tha i minung caah thathnemnak a chuahpi.” Thiang Thlaraun in khah na duh ahcun Paul nih a chim mi hi na hngalh peng ding a si. Hi thil hna khuaruahhar cu a si lo nain a biapi tuk mi an si.
Hi vawlei cung ah a um mi kan si caah vawlei nawlbia zulh lo ruang ah midang he kan buai ahcun Thiang Thlarau in kan khat kho lai lo. Cucaah vawlei nawlbia hi Pathian nawlbia he ai kalh lo poah ahcun kan zulh ding a si. Zumhnak kan ngeih ko zong ah Thiang Thlarau in khah kan duh ahcun nawlbia kan zulh ding a si. Kan caah thil tha tuah cu vawlei nawlbia ngaih i kan innpa he kan i rem ding a si.
Thiang Thlarau He Khah Na Duh Maw?
Efesa 5:8-11 ah, “Nanmah hrimhrim zong kha muihnak chung ah khua nan rak sa, sihmanhsehlaw Bawipa mi nan si cang caah ceunak chung ah nan um. Cucaah ceunak mi a si mi bantuk in nan um awk a si. Zeicahtiah thatnak a phunphun le dinnak a phunphun le biatak aphunphun a chuahtertu cu, ceunak cu a si. Bawipa a lawmhtertu thil kha kawl i zuam u. Santlai lo mi thil, khuamui thil, mi nih an tuah tawn mi kha tuah ve hlah u. Ceunak tu khan chuahpi hna u.” Hi Baibal cang nih ceunak fa bantuk in nung ding le Thlarau thei tlai ding a kan fial.
Efesa 5:12-13 ah, “(A thli in an tuah mi thil cu a chim hmanh chim ngam ding an si lo). Zeizong vialte kha ceunak ah chuahpi an si tikah an sining taktak te kha a lang lai.” Paul nih zeizong vialte kha ceunak tang ah chuahpi an si lai tiah a ti. Miding nih ding fel tein a nun khawh lo ahcun Pathian nih asiloah amah tein ai phozar ko lai. Mi pakhat nih muihnak thil a tuah i ceunak tang ah chimhhrin a si tik ah zeidah a cang? A sualnak kha a phuan lai i Pathian hmai ah a thinlung cu a zaang than lai. “Fiang tein langhter mi cu ceunak ahcun an i cang.” Ceunak tang ah chuahpi kha thil tha a si. Cutikah kan sualnak kha kan phuan lai i Pathian sin ah kan kir than lai.
Thiang Thlarau in khah kan duh ahcun kan thinlung ah zaangfahnak kan ngeih a herh. Mi pakhat nih a thinlung ah sualnak a ngeih lo zong ah, zaangfahnak ngeih a hau lo tinak a si lo. Kan thinlung ah thatnak le zaangfahnak he kan nun awk a si. Thawngtha bia a hngal lo mi hna sin ah fimnak le thlacamnak he thawngtha bia kan chim i sual ngaihthiamnak an co ve ding a si. Cun midang zong fahnak kan pek hna ding a si lo. Kan ei kan din, kan ih mi kha thawngtha bia caah le midang caah a si awk a si.
Thiang Thlarau in khah kan duh ahcun caan tha kha tha tein kan hman i fim hring tein thawngtha bia kan phuan awk a si. Vawlei kan duh tik ah muihnak hlennak chung ah kan tla tawn i Pathian rian kan daithlanh tawn. Cucaah, kan mit kha Bawipa ah kan chiah i a duhnak kha kan tuah awk a si. Pathian nih a kan pek mi thawngtha bia zumh buin ralring tein kan um awk a si. Fimnak in akhat mi nih cun vawlei hi muihnak nih a khuh hlan ah a nunnak kha thawngtha bia chimnak ah a hman awk a si.
Bawipa Duhnak Hngalhfian
Zei nih dah Pathian a lawmhter ti kha kan kawl awk a si. A Khrihfabu le a bia hmang in zeidah tuah hna seh ti a kan duh ti kha kan cawn awk a si. Pathian lungton ding ah zeidah kan tuah khawh ti le kan caah zeidah a kan duh piak ti kha kan kawl awk a si.
Sual ngaihthiamnak a co mi cu a hrinthan mi an si i, a hrinthan mi cu Thiang Thlarau umpinak a co mi an si. Thiang Thlarau umpinak a co mi paoh cu mithiang taktak an si i Pathian fa an si. Thiang Thlarau in a khat mi nun in an nun awk a si. Hihi mithiang mi vialte nun ding mi lam a si. Kan thil ti khawhnak le kan thazaang kha kanmah caah hmang loin, midang herhbaunak caah kan hman ding a si. Caan sin ah duh paoh tuah in Pathian rian kha kan donhkham ding a si lo.
Pathian dawtnak hmang in khamhnak le thianhlimnak kan co cang ahcun, a rian pehzulh tuannak caah mitha le miding kan si ding a si. A mah zumhnak thawng in Pathian fa kan si ahcun mitha zong kan si awk a si.
Pathian mifa hna kan taksa cu a tlamtling mi cu a si lo nain Pathian duhnak kan tuah caah Pathian lung kan ton i thil tha kan tuah. Asinain hrinthannak a co cang mi hna zong nih anmah ca lawng an nun ahcun midang cung ah thil tha lo an tuah tawn. “Zu ri hlah u, zu cu nanmah hrawk tu lawnglawng a si ko, Thlarau tu khan khat deuh” (Efesa 5:18) ti sullam cu taksa duhnak zu kha kan rit awka si lo i thil tha kha kan tuah awk a si tinak a si.
Paul nih Efesa 5:19-21 ah, “Hla dawh in pakhat lek pakhat i chawn u, Bawipa cu hla le aw dawh in nan lung tak in thangthat u. Kan Bawipa Jesuh Khrih min in zeizong kip caah Pathian culawm u. Khrih nan upat ruang ah pakhat le pakhat i nawl thiam u.” Thiang Thlarau in khah kan duh ahcun khamhnak thawngtha bia kha kan chimphuan i Pathian duhnak kha kan langhter awk a si.
Thla kan cam tik le a thluachuahnak kha hmun khat te ah hla in thlarau hla in kan thangthat tikah Pathian nih thluachua a kan pek. Pathian cu kan lawmh i kan thangthat awk a si. Khamhnak a co rih lo mi le pakhat le pakhat ca thla kan camt tikah Thiang Thlarau in kan khat. Kan thinlung dihlak in Pathian le a kan Khamhtu Jesuh Khrih cu kan thangthat awk a si. Hi ruahnak hna kan thinlung ah chia buin, kan sualpalhnak kha kan phuan khawh i, kan sual a kan thianhnak kha kan thangthat khawh i a nawl kan ngaih khawh. Hihi Thiang Thlarau in khah nun cu a si.
Kan Nunnak Dihlak In Thawngtha Bia Dawh Rian Kan Tuan Ding A Si
Thil tha kha kan i hmaithlak i thawngtha bia dawh sunparnak caah thil tha deuh kan banh awk a si. Pathian Khrihfabu ah i peh in khamhnak a co rih lo mi hna caah thla kan cam ti awk a si. Pathian a kawl ko nain thawngtha bia dawh theih lo ruang ah khamhnak a co rih lo mi an tamtuk rih. Cubantuk mi hna caah cun, “Pathian, anmah zong khamh ko hna” tiah thla kan cam ding a si. Kanmah duhnak kha dawi loin thlarau tlau tlaihnak ding ah thil tha kha kan tuah awk a si. Midang thlarau khamhnak caah le Pathian pennak caah nun hi thil tha tuah a si.
Hi thil hna tuah cu Thiang Thlarau in khah nun cu a si. Thiang Thlarau in khah cu holh theih lo holh le khuaruahhar thil tuah kha a si lo, Pathian lungton tu kha a si deuh. Pathian nih a kan khamhnak thawngtha bia zumh i hla le Salm in Pathian sunparnak pek kha a si. Kan thinlung dihlak in Pathian lawmhnak le thangthat i a riantuan cu Pathian duhnak a si. A nawlpeknak zulh cu Thiang Thlarau in khah nun a si.
Thiang Thlarau in a khat mi nun cu pakhat le pakhat nawl i ngaihpiak a si. Mi pakhat nih ruahnak a kan cheuh ahcun tha tein kan ngaihpiak ding a si. Cubantuk in keimah nih ruahnak ka cheuh tik zong ah a lung tlin lo zong ah ka bia tha tein a ngaih ding a si. Cubantuk in, pakhat le pakhat nawl i ngaihpiaknak in le Pathian riantuan pah in Thiang Thlarau in kan khah awk a si.
Thiang Thlarau In Khah Ti Cu Jesuh Khrih Sunparnak Pek A Si
Thiang Thlarau in khah nun cu Jesuh nawlpeknak vialte zulh a si. Efesa 6:10-13 relnak in cucu zeidah a si ti zoh tuah hna u sih. “A donghnak ah Bawipa he nan i pehtlaihnak thawng le a thawnnak a ngan mi thawng in nan thazaang cu thawnter chin ko u. Khuachia hlennak kha nan doh khawh nakhnga Pathian nih an pek mi hna ralthuam vialte kha i hruk u. Zeicahtiah kan doh mi hna cu minung kha si loin, vancung khua i a um mi thlarau tha lo sual thawnnak hna le uktu hna le nawlngeitu hna le hi a mui mi chan lianngannak hna hi an si. Cucaah atu hin Pathian ralthuam kha i hruk u. Cun ni tha lo kha a phanh tikah nan ral cu nan rak doh kawh lai i a dongh tiang nan i tuk hnu zong ah nan hmun ahcun fek tein nan dir kho lai.”
Thiang Thlarau khah nun sullam cu zeidah a si? Bawipa fek tein zumh le a thawnnak zumh kha a si. Kan chung ah a um Thiang Thlarau thawnnak in nun i kanmah thawnnak in nun lo kha a si. Cun thlacam nun ngeih zong a si. Thlacamnak in Pathian nih a kan pek mi thluachuahnak phun kip le thil ti khawhnak phun kip kan co. Hibantuk nun cu Pathian ralthuam i hruk kha a si. Kan nih cu a derthawm tuk mi kan si caah a riantuan kan duh i a nawlngaih kan duh zong ah Pathian bia kan i tlaih lo ahcun kanmah nih kan tuah khawh mi a um lo.
Kan thlarau thawnnak langdternak ding ah Pathian bia zumh hi a biapi tuk mi a si. Zumhnak kan ngeih ko zong ah “Pathian bia ah ai tial ning tein a si hrimhrim lai” tiah Pathian ralthuam kha kan i hruk awk a si. Hi zumhnak nih Thiang Thlarau in a khat mi nun in a kan nunter khawh.
Hibantuk nun in nung ding ah harsatnak a tong mi nan um maw? Cuti a si ahcun Pathian bia kha hngal law Pathian ralthuam tling kha i hruk. Pathian nih a ralthuam tling hruk ding a kan fial. Pathian bia na thinlung dihlak in nai lak ahcun Pathian ralthuam tling hruk cu zeidah a si ti kha na hngalh ko lai. Kan pawngkam le midang chim mi kha biapi ah chia loin, Pathian thawnnak kha kan i tlaih ding a si. Cuticun Thiang Thlarau khah nun in kan nung kho lai.
Hi zumhnak cu khuazei ah dah kan hmuh khawh lai? Biathlam 3:22 nih “Hna nan ngeih ahcun Thlarau nih Khrihfabu hna sin ah a chim mi bia cu ngai tuah u” tiah a ti. Thlarau nih Khrihfabu sin ah a chim mi bia hi kan ngaih ding a si. Phundang in cun, Pathian sal a si lo mi hna nih cun Pathian bia kha an thei kho lo i Thiang Thlarau in an khat kho lo. Thiang Thlarau nih aho sin in dah bia a chim? Pathian nih mithiang sin ah bia a chim i vawlei cung mi vialte sin ah a Khrihfabu i a sal hna hmang in bia a chim.
Cu sullam cu Pathian Khrihfabu nih a chim phuan mi bia cu Pathian bia taktak a si ti khan a zumh awk a si. Hi zumhnak he Khrihfabu cawnpiaknak na cohlan awk a si. Thiang Thlarau nih thawngtha chimtu a um pi lo ahcun amah ruahnak cawnpiak cu a si kho lo mi a si. Thiang Thlarau umpinak a co mi thawngtha chimtu nih cun Thiang Thlarau uknak tang ah Pathian bia a chim. Cuti a chim lo ahcun Pathian Thiang Thlarau nih a thawngtha chim a makter lai.
Thiang Thlarau cu Pathian a si. Pathian sal le hna nawlngeihnak hi khuaruahhar in a ngan, zeicahtiah Pathian nih a umpi hna. Biakam Thar ah, Jesuh nih Peter sin ah, “Vancung Pennak hunnak tawhfung cu kan pek lai” (Matthai 16:19) tiah a ti. Vancung Pennak hunnak tawhfung cu ti le Thlarau thawngtha bia hi a si. Phundang in cun, hi thawngtha bia hi vancung luhnak kutka a si. Hi bantuk nawlngeihnak hi Pathian nih Peter lawng a pek mi a si lo, ti le Thlarau thawngtha in hrinthannak a co i Thiang Thlarau umpinak a co mi mithiang vialte a pek dih hna.
Thiang Thlarau in khahnak ding ah Pathian ralthuam tling kan i hruk ding a si. Zumhnak kan ngeih lo zong ah Khrihfabu cawnpiaknak le Pathian sal hna cawnpiaknak kha kan thinlung in nawlngeitu a si tiah kan zumh ding a si. Tuchun i na ngaih thawngtha bia khan a nunnak le na caah santlaihnak zong a ngei lo men lai nain na thinlung dihlak in na ngaih a herh. Na nunnak ah na herh mi kha Pathian bia ah kawl. I tlaih peng. Cuticun zumhnak minung na si lai. Cuticun Thiang Thlarau in a khat mi nun in na nung kho lai, Pathian he na kar na hlang kho lai i hi vawlei muihnak thawnnak kha na tei khawh lai.
Midang nih vawlei cung uktu hna nawl nan ngaih awk a si tiah an in cawnpiak hna i kei nih vawlei cung muihnak uktu hna cu nan doh hna awk a si tiah kan cawpiaknak hna tikah na buai kho men. Rom chan lio ahcun Siangpahrang nih Pathian ka si a ti caah an nawlbia zong ah siangpahrang kha Pathian bantuk in zoh ding ti kha a dirpi. Asinain cucu Khrihfa hna nih an tuah kho lo, zeicahtiah Pathian bia he ai kalh caah a si. Cutikah culio Khrihfa nih duhthimnak dang an ngeih ti lo caah Rom cozah, an siangpahrang hmai ah a kuntertu kha an doh.
Khuachia he doh tik ah teinak kan conak ding ahcun Pathian biatak kha kan zumh i kan i tlaih ding a si. Pathian bia ning in kan nun ahcun a thluachuahnak kan co lai i khuachia kha kan tei khaw lai. Hrinthannak a co mi kan si zong ah Pathian bia kan i tlaih lo ahcun Satan kan tei kho lai lo. Pathian nih, “Nan ral khuachia cu, seh awk kawl ah, chiandeih bang in a vak cuahmah ko” (1 Peter 5:8) tiah a ti. Pathian bia a zum lo mi cu fawi tein Satan nih a tei khawh.
Jesuh zong nih khan Pathian bia i tlaih hlah sehlaw Satan kha a tei kho lai lo. “Cathiang nih pei, minung hi rawl lawng in a nung kho lo, sihmanhsehlaw Pathian nih a chim mi bia paoh cu a nunnak a si lai” (Matthai 4:4) tiah a ti. Pathian bia ai tial mi zumhnak thawng in Satan a tei. Kannih teh? Fimnak ah kan chambau i Jesuh he cun tahchunh awk kan tha lo. Cucaah, Pathian bia kha fak deuh in kan zumh i kan i tlaih awk a si.
“Pathian bia hi a dik ko nain a dihlak cun ka zumh kho lo” tiah kan ti awk a si lo. Pathian bia kha kan i tlaih ding a si. “Pathian bia ai tial mi paoh cu a tling lai tiah ka zumh.” Hihi a dik mi zumhnak a si i Pathian ralthuam tling a kan hruktertu a si. “Zeizong vialte hi kan Bawipa nih a chim bantuk in a si ko lai” tiah a ti mi hna cu thluachuahnak an hmu lai. Pathian bia kan i tlaih i kan zumh ahcun kan zumh bang in thil a cang taktak lai. Satan nih tukforh a kan timh i, “Pathian bia ka zumh. Pathian bia hi bialehnak dik a si” tiah na rak ti ahcun an zam tak ko lai. Hihi khuachia dohnak lam cu a si.
Pathian Bia Kan I Tlaih Ding A Si
“Cucaah atu hih Pathian ralthuam kha i hruk u. Cun ni tha lo a hung phanh tikah ann ral cu nan rak doh khawh lai i a donghnak tiang nan i tuk hnu zong ah nan hmun ahcun fek tein nan dir kho lai. Cucaah timhcia tein dir u: nan taisawm caah biatak kha fek tein i sawm u, nan tangphaw caah dinnak kha i benh u, nan kedan caah daihnak thawngtha chim thathawhnak kha i dan u. Zumhnak kha phaw caah i ken zungzal u law, cu phaw cu khuachia nih mei bantuk a si mi thal in an kah hna tikah nan rak hmih khawh hna lai. Cun luchin caah khamhnak kha i chinh u law Thlarau nih an pek mi hna vainam caah Pathian bia kha i lak u” (Efesa 6:13-17).
Hika zawn ah, “nan taisawm caah biatak kha fek tein i sawmh u” tiah a ti i Pathian bia kha kan tai fek tein a temtu taisawm he a tahchunh. A sullam cu kan ruahnak kha Pathian bia kan kilven ding a si. Pathian bia kha kan zulh i Pathian he thinlung ruahnak khat kan ngeih ding kha a kan chimh mi a si. Taisawm nih kan pum fek tein a tem bantuk in Pathian bia in kan pum kha kan tem ding a si. Pathian he ruahnak khat kan ngeih tikah, “zeizong vialte a tha dih ko lai tiah ka zumh. Zeizong vialte hi Pathian nih a chim bantuk in a tling ko lai tiah ka zumh” tiah kan chim khawh ve.
Cun kan tangphaw caah dinfelnak kha kan i benh lai. Pathian nih a kan khamh cang tiah a kan chimtu ti le Thlarau thawngtha bia kha kan tangphaw ah kan hman lai. Kan tai kha biatak kan sawmh lai i kan tangphaw kha dinfelnak kan benh lai. A man a sunglawi tuk mi tangphaw kha kan i benh lai. Pathian nih kan sualnak vialte a kan ngaihthiam cang ti kha kan zumh lai. Kan thinlung dihlak in Pathian bia kan zumh lai. Cun daihnak a kan pektu thawngtha bia zong kan chim lai.
A cunglei bia pawl hna kan i tlaih dih hnu ah kan ke caah daihnak thawngtha chim thathawhnak le Pathian daihnak minung vialte cung ah a petu hna thawngtha bia kan chim lai. Kan thinlung in kan zumh hnu ah kan hmurka in kan chimphuan. Cun kan sualnak le kan that lonak a langh tik paoh ah Pathian nih kan sualnak vialte a kan ngaihthiam cang ti kha kan phuan lai. Hi vialte hi Jesuh tipil innak le vailam cung a thihnak in a tuah mi a si. Pathian sunparnak a pe mi nunnak in kan nung lai. Sual ngaihthiamnak a co rih lo mi hna sin ah daihnak a petu ti le Thlarau thawngtha bia kha kan phuan lai.
Cun, that lonak kha zumhnak phaw in kan doh lai. Satan nih a kan doh tikah kan kut khat lei in zumhnak phaw in kan doh lai i khat lei in Pathian biatak in kan doh lai.
Cun khamhnak luchin kha kan i chinh lai. “Ka sualnak vialte cu ti le Thlarau thawngtha bia in khamh ka si. Cuticun Pathian nih ka sualnak vialte a ka ngaihthiam” ti khamhnak thawngtha bia kha kan cohlan a hau. Kan thluak in hi biatak hi kan hngalhfian a hau. Pathian bia kha khamhnak luchin ah kan hman i khuachia dohnak ah Thlarau vainam kha kan hman awk a si.
Satan nih a kan doh tikah vainam kha kan chuah i kan tuk awk a si. “Pathian nih hitihin a chim! Cucu ka zumh!” Pathian zumhnak thawng in Satan cu lam hlapi ah kan dawi. Pathian bia kan zumh i thlarau vainam kan i chuah ahcun, Satan nih “Ouch! A fak tuk” a ti lai i a zam colh ko lai. Pathian bia kan zumh ahcun zeibantuk in Satan dohnak hmanh kan tei khawh lai.
“Ka taksa cu a tlamtling lo nain keimah hi Pathian khamhnak tling a co mi ka si. Pathian bia zumhnak hmang in ka nung” tiah kan ti i biaknak nun in kan nun awk a si. Hibantuk zumhnak kan ngeih ahcun kan nunnak hrawk ding ah Satan a rat fate thlarau vainam in kan rak doh khawh lai. Vawlei biafang le biatluan thatha in Satan kan doh tikah a mit hmanh a thep lo. Cucaah, “Hihi Pathian nih a chim mi a si” tiah Satan kha kan doh awk a si. Cuticun Satan nih Pathian bia thawnnak hmai ah a sung apek ko lai.
Thiang Thlarau in khah kan duh ahcun Khrihfabu, mithiang hna le Pathian sal vialte nih thawngtha bia dawh chimnak ah an i pek khawh nakhng thla kan cam ding a si. “Thawngtha bia thli raltha tein ka chimter ko” tiah thla kan cam i thawngtha bia chim hmaithlak in kan nun awk a si. Cucu Thiang Thlarau in a khat mi nun a si. Thiang Thlarau in a khat mi nun hi mithiang vialte caah a biapi tuk mi a si. Mithiang taktak sinak ding ahcun Thiang Thlarau in kan khah a herh. Thlarau kip nih sual ngaihthiamnak co a biapit bantuk in mithiang vialte nih Thiang Thlarau in khah ding kha a biapi ve. Cucu Pathian nawlpeknak a si.
Sual ngaihthiamnak a co cang mi, zeitindah zumhawktlak tein ka nun lai ti a hngal lo mi nih Thiang Thlarau khah nun in kan nun a herh ti kha an hngalh awk a si. Cucu Pathian duh mi a si. Mithiang vialte nih Pathian duhnak a si mi Thiang Thlarau in an khah awk a si. Thiang Thlarau in a khat mi nun nih mithiang kha thawngtha bia chimphuang ding in thazaang a pek hna. Thawngtha bia chim, Pathian sin thlacam le Pathian bia zumh le i tlaih kha an duh. Khamhnak luchin le dinfelnak tangphaw kha kan i chinh i, “keimah cu a zungzal in miding kan si” tiah kan chim i Satan kha kan doh awk a si.
Mithiang mi hna nih Thiang Thlarau umpinak an co caah, Thlarau in kar an hlang i Thiang Thlarau thawnnak kha an co khawh. Zumhnak thlacamnak in an co mi Pathian thluachuahnak hmang in Pathian rian an tuan. Cun Satan an tei hlan lo le Pathian hmai an dir hlan lo Thlarau in kar an hlang. Pathian ralthuam tling ai hruk kho mi cu hrinthannak a co i Thiang Thlarau in a khat mi lawng an si.
“Zeicahtiah kan doh mi hna cu minung kha si loin vancung khua i a um mi thlarau sual thawnnak le uktu hna le nawl ngeitu hna le hi a mui mi chan liangannak hna hi an si” (Efesa 6:12). A hrinthan mi hna ral dohnak cu taksa le thisen raldohnak a si lo. Thiang Thlarau umpinak a co mi hna raldohnak cu khuachia tha lo riantuannak, kan nunnak hrawk a timtu thlarau tha lo riantuannak hi a si.
Bawipa thawngtha bia ruang ah raldohnak kan kal tikah lukhuh le Thlarau ralthuam kha kan i hruk ding a si. Raldohnak ah thuam sawhsawh kan i hruk ahcun fawi tein hliam kan tuar lai. Cucaah ralthuam kan i hruk a hau. Vainam, tangphaw le lukhuh kan herh. Raldohnak ah teinak hmuh ding ah cun tha tein kan i timhlamh a hau. Tangphaw kan i hruk i, kan taisawm kan i sawmh le kedan kan i danh a hau. Cun kan kut khat lei veve ah vainam le tangphaw i ken bu in kan ralpa kha kan tei ding a si. Hihi Thiang Thlarau in a khat mi nun a si.
Thawngtha Bia Dawh Kan Kilven Ding A Si
Paul nih, “Cun kan Bawipa nih cun a tam ngaingai mi a vel kha a toih in a ka toih i Khrih Jesuh he kan i pehtlaihnak thawng in zumhnak le dawtnak kha a ka pek i cu hna cu kanmah ta an si cang” (2 Timote 1:14). Zeidah a hramphun ah a tha bik mi a si? Kan sualnak vialte a kan khamhtu tile Thlarau thawngtha hi a si. Titas 3:5 ah, “Cu a kan khamhnak cu hrinthannak ti thawng le Thiang Thlarau nih mitharter khawhnak a ngeih mi thawnnak thawngin a si” tiah a ti. Kan Bawipa nih hi vawlei ah kan tuah mi sualnak vialte cu a lak dih i, vailam cung ah a thi i thihnak in a thothan. Hi thawngtha bia dawh hi kan kilven ding a si. Khamhnak luchin kha kan i chinh i dinfelnak tangphaw kan i benh hnu ah kan tai kha biatak in kan sawmh awk a si. Ti le Thlarau thawngtha bia hi kan zumh ding a si.
Hiti kan i thuam hnu lawng ah Satan raldohnak ah teinak kan hmuh lai. Cu hnu lawng ah teinak kan hmuh mi midang kan hrawmh khawh hna lai. Satan raldohnak tampi kan doh ding a um i kan ro co ding a si mi Pathian Pennak chung kan luh hlan lo teinak thantar lak ding tampi kan ngei rih. Kan ralpa kan tei deuhdeuh i raldoh a ra ding mi cu a fawi deuhdeuh ve. A Pennak a karhnak ding le a thanchonak ding ah thla kan cam ding a si. Cuticun Thiang Thlarau in a khat mi nun in kan nung kho lai.
Sual ngaihthiamnak kan co mi lawng in kan i lungsak ding a si lo, Thiang Thlarau in kan khawh awk a si. Thawngtha bia le kan riantuannak ding caah Pathian bia kan zumh a herh. Thiang Thlarau nih a kan hruai i Pathian bia zumhnak in kan nun i Satan raldohnak ah daithlag in kan i rawk ding a si lo.
Ka chim duh mi nan fiang maw? Cu hnu lawng ah Thiang Thlarau in kan khat lai. Ti le Thlarau thawngtha bia rian an tuan i Pathian bia nai bochan i na zulh ve ding ah kan duhpiak. Satan nih a tlaih mi thlarau tlau khamhnak caah riantuan hna u sih. Bawipa a rat than hlan tiang Thiang Thlarau in khat ko hna u sih. Thiang Thlarau in khah ding hi Pathian nih a kan pek mi nawlpeknak pahnihnak a si. Amah cu lawm ko. Thinlung sual ngaihthiamnak co hnu ah Thaing Thlarau umpinak kan co khawh. Thiang Thlarau umpinak co loin Thiang Thlarau in khah khawh a si lo. Thiang Thlarau in a kan khahter caah Bawipa cu thangthat si ko seh.
Thiang Thlarau umpinak na co khawh ti hi na zum maw? Sual ngaihthiamnak a co cang mi hna nih cun Thiang Thlarau umpinak kan co khawh. Asinain a sualnak hnawhpiak a si rih lomi nih cun Thiang Thlarau umpinak an co kho lo. Ti le Thlarau thawngtha bia a zum lo mi nih cun Thiang Thlarau umpinak an co kho lo. Vawlei cung minung vialte hi Thiang Thlarau umpinak an co lo ahcun hell kal ding lawng te an si.
Kan thinlung ah sualnak kan ngeih ti lo caah Thiang Thlarau umpinak kan co. Cun Thiang Thlarau umpinak kan co caah Thiang Thlarau in kan khat kho. Thiang Thlarau umpinak a co cang mi hna nih Thiang Thlarau in kan khah khawh nakhnga Thlarau duhnak kha a nawl kan ngaih ding a si. Thiang Thlarau duhnak nawl kan ngaih deuhdeuh i kan zumhnak cu a thawng deuhdeuh ve. Asinain Thlarau nawl kan ngaih lo ahcun ralthuam i phawih bantuk khi a si.
Thiang Thlarau bia ah thang hna u sihlaw zumhnak minung si ko hna u sih. Thiang Thlarau bia kan theih tik ah, kan zumhnak zong a thang ve, zeicahtiah Pathian nih, “Zumhnak cu theihnak in a ra, Pathian bia theihnak thawng in a ra” (Rom 10:17) tiah a ti. Cucaah, Satan nih a kan doh tik zong ah Pathian bia kan zumhnak in a kan kilven. Ti le Thlarau thawngtha bia zumhnak in zumhnak tangphaw ai benh mi hna cu Satan nih a doh kho hna lo. Zumhawktlak mi hna nih Satan thawnnak kha an zumhnak in tei khawhnak an ngei.
Zumhnak in Thiang Thlarau in a khat mi nun in nung ko hna u sih. Thiang Thlarau in a khat mi hna nun cu vawlei cung khuazakip ah ti le Thlarau thawngtha bia a chim mi kha a si. Cubantuk cu Thiang Thlarau in a khat mi nun cu a si.
Copyright © 2021 by The New Life Mission
