- All e-books and audiobooks on The New Life Mission website are free
- Explore multilingual sermons in global languages
- Two new revised editions in English have been released
- Check out our website translated into 27 languages
Due to COVID-19 and disruption to international mail service
we have temporally suspended our ‘Free Print Book service’.
In the light of this situation we are not able to mail you the books at this time.
Pray that this pandemic will end soon and the resumption of the postal service.
Pray that this pandemic will end soon and the resumption of the postal service.
A konglam 8: Thiang Thlarau
[8-20] Thiang Thlarau Umpinak A Tep Mi Paoh Nih Midang Zong Kha Thiang Thlarau Co Ding Ah An Hruai Ve Hna (Johan 20:21-23)
“Cun Jesuh nih cun, “nan cung ah daihnak um ko seh, Ka Pa nih a ka thlah bantuk in kei zong nih kan thlah ve hna,” tiah a ti than hna. Cu bia cu a chim dih in a thaw a chuahhnawh hna i, “Thiang Thlarau kha hmu ko. Mi ha an sualnak nan ngaihthiam hna ahcun ngaihthiam an si ko, nan ngaihthiam hna lo ahcun ngaihthiam lo an si ko,” tiah a ti.”
Bawipa nih mithiang mi kha zeibantuk nawlngeihnak dah apek hna?
Ti le Thlarau thawngtha bia hmang in midang sual ngaihthiam khawnak nawl a pek hna.
Johan 20 ah hin Jesuh thawhthannak kong ai tel. Kan Bawipa cu thihnak in a tho than i a zultu hna kha “Thiang Thlarau co ko u” tiah a ti hna. Jesuh zultu hna nih Thiang Thlarau kha laksawng ah an co. Jesuh nih tipil a innak le vailam cung a thihnak nih sualnak vialte a hnawh dih ti a zum mi paoh kha zungzal nunnak le Thiang Thlarau a pek hna. Baibal nih Jesuh tipil cu kan khamhnak hmanthlak a rak si tiah a ti i a sullam cu tipil a innak nih minung vialte kan sualnak in a kan khamh tinak a si (1 Peter 3:21).
Zeiruang Ah Dah Jesuh Cu Tipil Pek A Si?
Zeiruang ah Johan nih Jesuh tipilnak apek? Hi biahalnak a lehnak cu fiang tein Jesuh nih Matthai 3:15 ah a chim mi, “Atu cu Pathian nih tuah u a ti mi paoh cu tuah si ko seh” a ti mi ah hmuh khawh a si. Hika “Atu cu” ti mi nih Jesuh nih tipil a innak in vawlei sualnak vialte a tawlnak kha a sawh. Tipil a innak cu Biakam Hlun raithawinak an tuah i saram cung an kut an chuan ning pungsan in tuah a si. Tipil a innak nih ai tinh mi cu vawlei sualnak vialte a cung chuan ding kha a si.
“Pathian nih tuah a ti mi vailte” ti sullam cu zeidah a si? “Tuah si ko seh” ti mi nih zeidah a langhter? “Tuah u a ti mi vialte” sullam cu Jesuh nih tipil a innak in vawlei sualnak vialte a tawl mi hi Pathian duhnak a si tinak a si. Cun “Tuah si ko seh” ti sullam cu an thil tuah mi hi Pathian hmai le mit hmuh ah ai tlak mi bik mi a si tinak a si.
Jesuh nih tipil a innak in vawlei sualnak vialte a lak dih i amah a zum mi vialte kha a thianter hna. Jesuh nih kan sualnak caah khan vailahtah le biaceih a si. Hihi sual ngaihthiamnak thawngtha a si. Pathian duhnak cu vawlei sualnak vialte hnawhpiak le sual ngaihthiamnak pek kha a si.
Minung nih Jesuh tipil innak hi Matthai 3:13-17 ah ai tial bantuk tein an zumh ahcun sual ngaihthiamnak le Thiang Thlarau an co lai. Jesuh nih vawlei a riantuan mi –tipil innak, vailamtahnak le thawhthannak-nih ai tinh mi cu Pathian nih a rak timhlamh mi khamhnak pek kha a si. Tipil a innak le vailam cung a thihnak cu kan sualnak vialte a tawltu kan khamhnak caah a rak si.
Minung nih Jesuh tipil innak le vailam cung a thisen a zumh lawng ah Thiang Thlarau a co khawh. Tipil a innak nih vawlei sualnak vialte a kalpi caah kan sualnak cu a cung ah khin dih a si. Minung aiawh in vailam cung a thihnak cu ka thihnak a si i a thawhthannak cu ka thawhthannak a si ve. Cubantuk in Jesuh tipil innak le vailam cung a thisen cu kan sual ngaihthiamnak ca le Thiang Thlarau conak caah a si.
Jesuh tipil innak kong na hngalh i thawngtha bia na zumh ding hi kaa ruahchan. Cutikah sual ngaihthiamnak le Thiang Thlarau na co lai. Zeiruang ah dah Jesuh nih tipilnak a in? Vawlei sualnak vialte kalpi ding ah. “Atu cu Pathian nih tuah u a ti mi paoh tuah si ko seh” (Matthai 3:15). Amen, Halleluijah!
Tuchan ah mi cheu khat nih holh theih lo holh kha Thiang Thlarau co hmelchunhnak a si tiah an ti. Asinain an thinlung ah Thiang Thlarau umpinak a co mi nih thawngtha bia dawh an zumhnak kha hmelchunhnak taktak cu a si.
Pathian Nih Miding Mi Hna Kha Sual Ngaihthiam Khawhnak Nawlngeihnak A Pek Hna
Bawipa nih a zultu pawl kha sual ngaihthiam khawhnak nawlngeihnak a pek hna i, “Mi kha an sualnak nan ngaihthiam hna ahcun ngaihthiam an si ko, nan ngaihthiam hna lo ahcun ngaihthiam lo an si ko” (Johan 20:23). A sullam cu zultu hna nih ti le Thlarau thawngtha bia an chim mi a thei i a zum mi paoh cu sual ngaihthiam an si tinak a si. Ti le Thlarau thawngtha bia a zum lo mi zong an duh paoh in an sualnak an ngaithiam khawh hna tinak a si lo.
Jesuh zultu hna nih ti le Thlarau thawngtha bia hmang in sual ngaihthiamnak nawl an ngei. Cucaah, ai tial ning tein an cawnpiak ahcun kan zumh ding a si. Na sual ngaihthiamnak ding ah Jesuh Khrih nih ti le Thlarau thawngtha bia an pek ti hi na zumh ding a si. Cu hnu lawng ah sual ngaihthiamnak le Thiang Thlarau na co lai. Cun Jesuh nih ti le Thlarau thawngtha bia chimphuannak in mi vialte sual ngaihthiam khawhnak nawlngeihnak a kan pek.
Hi Vawlei Uktu Hna Thawnnak
Tuan deuh ka umnak ahcun lam tha lo ngai mi cung ah mawtaw kan i cit tawn. A caan ahcun minung an tum i mawtaw an nam tawn. Voi khat cu Korea ram president kha cu ka lam ahcun mei tung an tuah mi zoh ah a ra. Cu thawngpang an theih cun mipi nih lam kha heh tiah an thianh i thinkung dawhdawh an phun hna i president cu an don. A ni caan a phak tikah mawtaw saikel nih lam a van hruai hna i a hnu in president mawtaw nih a vun zulh. Mipi nih ram thanthar an i ken i president cu an vun chawnhbiak. Cutik ah president nih a ti mi cu, “hi lam hi a chiah, tha tein phah a hau” tiah a ti. Ni tlawmpal hnu ah lam cu tha taktak in an phah.
Hika ah zeidah a cang? President bia kaa khat nih lam sining vialte a thlen dih ko. President nawlpeknak hi a thawng tuk hringhran. Asinain Jesuh Khrih nih a kan pek mi ti le Thlarau thawngtha cu cunak cun a thawng deuh mi a si. Cu thawngtha nih cun kan nun chung sualnak vialte ngaihthiam khawhnak hmual a ngei.
A Dik Mi Sual Ngaihthiam KhawhnakThawnnak
“An sualnak nan ngaihthiam hna ahcun ngaihthiam an si ko lai, nan ngaihthiam hna lo ahcun ngaihthiam lo an si ko lai.” Jesuh zultu hna nih sualnak vialte a ngaithiam khotu thawngtha kha an chim. Midang kha, “Jesuh nih tipil a innak le a thisen in vawlei sualnak vialte a hnawh dih cang. Lungretheih ding pakhat hmanh a um ti lo. Hmailei ah sualnak an tuah te ko lai, asinain kha ca zong ah Jesuh tipil a innak dih cang i vailam cung ah a thisen a luanter cang. Jesuh nih an khamh! Cucu na zumh a hau” tiah an chimh hna.
Jesuh zultu hna nih an chim mi ti le Thlarau thawngtha bia thawng in minung nih ngaihthiamnak an co. Jesuh nih a zultu kha ti le Thlarau thawngtha bia chimnak thawng in sual ngaihthiam khawhnak nawlngeihnak a pek hna. Jesuh zultu hna nih vawlei cung khuazakip ah ti le Thlarau thawngtha an chim ruang ah, minung nih sual ngaihthiamnak a co khawh. Hi laksawng hi Jesuh nih sual ngaihthiamnak nawlngeihnak he apek hna.
Minung tampi nih cauk ka tial cang mi kha an rel i an sualnak in ngaihthiam an si. Mi cheu khat nih Jesuh vailam cung a thihnak cu kan sualnak lakpiak ding ah tipil a innak ruang ah a si an ti i, “hma a in cu kan sual ruang ah a rak si i, tuknak a huah cu kan that lo ruang ah a rak si” (Isaiah 53:5) tiah an phuan khawh.
Thihnak in a thawhthan hnu ah Jesuh nih a zultu kha, “Thiang Thlarau kha hmu ko u. Mi kha an sualnak nan ngaihthiam hna ahcun ngaihthiam an si ko, nan ngaihthiam hna lo ahcun ngaihthiam lo an si ko” (Johan 20:22-23) tiah nawlngeihnak apek hna. Jesuh nih midang sual ngaihthiamnak nawl a pek hna.
Hi biatak kan zumh hlan ahcun sualnak, pakpalawng sinak le buaibainak nih a kan tlaih. Asinain atu ahcun ti le Thlarau thawngtha bia thawng in sual ngaihthiamnak a co mi kan si caah, cu thawng tha cu midang kan chimh ve hna ding a si. Cun kan Bawipa nih a zultu kha daihnak a pek hna. Kan Bawipa nih kannih zong daihnak le Thiang Thlarau a kan pek ve. Pathian sin in Thiang Thlarau lel sual ngaihthiamnak co ding ah Jesuh tipil innak le vailam cung a thihnak kan zumh a hau.
Sualnak chung in a kan luattertu cu ti le Thlarau thawngtha bia a si. Hihi vancung lei thluachuah a phurtu thlarau lei zumhnak a si. Asinain minung lei zumhnak nih cun rawhralnak a chuahpi. Ti le Thlarau thawngtha bia zumhnak thawng in khamhnak le Thiang Thlarau kan co ding a si. Cubantuk zumhnak ngeih ding ahcun vawlei ruahnak kha kan hlawt i ti le Thlarau zumhnak ah kan kir ding a si.
Thiang Thlarau conak ding ah a herh mi zumhnak ngeih ding ahcun Jesuh tipil innak le vailam cung a thihnak in kan sualnak a hnawh dih cang tikha kan zumh a herh. Ti le Thlarau thawngtha bia kan zumh caah kan Bawipa nih daihnak, sual ngaihthiamnak le Thiang Thlarau a kan pek. A zultu pawl kha ti le Thlarau thawngtha bia a zum mi vialte sual ngaihthiam khawhnak nawlngeihnak a pek hna.
Kannih zong hi thawngtha bia zumhnak thawng in Thiang Thlarau pek kan si. Ti le Thlarau thawngtha bia nih midang zong kha tampi a bawmh hna. Hi thawngtha bia kan innpa le vawlei cung ah kan chim mi a thei mi paoh Thiang Thlarau pek an si. Thawngtha bia kan chim mi nih midang kha Thiang Thlarau a coter hna lo a si ahcun cucu thawngtha bia dik a si lo tinak a si. Kam khat lei in cun, thawngtha bia kan chim mi nih Thiang Thlarau a coter hna ahcun cucu a dik mi thawngtha a si.
Hi thawngtha bia a cotu kan si caah zeitluk thluachuak le mi lunglawm dah kan si. Nangmah le keimah nih kan chim mi thawngtha bia cu a tlamtling mi le a sunglawi tuk mi a si. Asinain tuchun ah hi bantuk thawngtha a chim mi le a zumtu hi hmuh an har tuk. Cucaah, vawlei cung khuazakip ah thawngtha bia kan chim ding a si. Midang nih Thiang Thlarau an co venak ding ah kan bawmh hna ding a si.
Ti Le Thlarau Thawngtha Hlaw Ding In Satan Nih A Hlen Mi Hna
Jesuh a zum cang mi hna kha kan bawmh hna. Minung tampi nih Jesuh an zumh cang ko nain Thiang Thlarau an co rih lo. Cucaah an sin ah thawngtha bia kan chim i Thiang Thlarau co ding in kan bawmh hna.
Mi pakhat nih Jesuh a zumh hnu i Thiang Thlarau a co rih lo ahcun a zumhnak ah harsatnak a tong men lai. Jesuh zumh hnu ah Thiang Thlarau a co mi lawng ah zumhnak dik a ngei mi tiah ti khawh an si. Cucaah kan dihlak in Thiang Thlarau a cotu zumhnak kha kan ngeih ding a si. Ti le Thlarau thawngtha bia kan theih ding a si, zeicahtiah hi thawngtha bia lawng nih Thiang Thlarau a kan coter khawh.
Ti le Thlarau thawngtha bia kan chimnak cu midang nih Thiang Thlarau an conak ding caah a si. Asinain thawngtha bia a chim mi nih harsatnak tampi kan tong tawn. Mi cheu khat nih caan saupi chung kan i zuam ahcun Thiang Thlarau kan co lai tiah an ti. Thiang Thlarau conak si tung lo mi thil hmuhton mi tampi an ngei. Cubantuk minung nih ti le Thlarau in ceunak an hmuhnak ding ah caan tampi pek a hau.
Hi thawngtha bia lawng nih Thiang Thlarau a kan coter khawh ti thei cio hna sehlaw ahodah ti le Thlarau thawngtha bia zum loin a um hnga? Thawngtha biatak a rat hlan ah satan nih minung tampi kha a hlen hna. Cubantuk mi hna nih Jesuh kan zumh cang caah zeibantuk zumhnak dah a herh ti tiah an ti. Cucaah ti le Thlarau thawngtha bia kha an hlawt.
Tuchan minung tampi nih ti le Thlarau thawngtha bia an zum ti lo, zeicahtiah Satan nih an mit a cawtter cang hna. Cucaah Jesuh zumh kha a fawi te ko, a za ko an ti. Thawngtha bia tlamtling zumh hi a fawi mi a si lo. Ti le Thlarau thawngtha biatak kha thawngtha deu nih a tuam.
Minung nih Jesuh kan zumh i biakinn caan hman tein kan panh ahcun Vancung Pennak chung ah kan lut ko lai tiah an ruah. Minung tampi nih Thiang Thlarau cu anmah zuamnak a si mi, rawlulh le thlacamnak tehna in hmuh khawh a si tiah an ti. Asinain cu bantuk zumhnak cu Thiang Thlarau co he cun aa hlat tuk mi a si. Cun holh theih lo holh le khuaruahharnak tuah kha Thiang Thlarau co hmelchunhnak a si tiah an ruah.
Cucaah Thiang Thlarau conak ding ah ti le Thlarau thawngtha bia zumh hi a herh mi a si ti kha an hngal kho lo. Asinain Baibal nih Pathian bia ning lawng in Thiang Thlarau co khawh a si tiah a kan chimh. Thiang Thlarau co khawhnak biathli kha Pathian nih a bia ah a thuh.
Thiang Thlarau Umpinak A Duh Mi Paoh
Voi khat cu ka riantuan hawi cheu khat he Taiwan ah kan kal. Thiang Thlarau kong cauk an rak kan hal. Cubantuk cu Japan le Russia zong ah a cang ve. Minung tampi nih Thiang Thlarau umpinak kong cauk an kan halnak a ruang ah Thiang Thlarau umpinak co an duh caah a si. Minung tampi nih Jesuh an zumh ko nain Thiang Thlarau kan co maw co lo ti kha an hngal lo, zeicahtiah Thiang Thlarau umpinak an co lo.
Minung tampi nih Jesuh kan zumh caah Thiang Thlarau kan co tiah an ti. Asinain cubantuk Thiang Thlarau a co mi hna cu a zungzal in tihnak in an khat. Jesuh an zumhnak thawng in zeihmanh tuah khawh mi an ngeih lo caah thil ti khawhnak an duh.
Khrihfa vawlei zong ah minung tampi nih Thiang Thlarau kan co cang tiah an ruah. Mi cheu khat nih ka zanmang ah Thiang Thlarau kan ton an ti, a cheu khat nih khuachia ka thawl khawh caah Thaing Thlarua ka co cang tiah an ti ve. Cuticun minung tampi zumhnak cu hmuhtonnak cung ah ai hngat. Asinain minung tlawmte lawng nih ti le Thlarau thawngtha bia zumhnak in Thiang Thlarau an co.
Vawlei cung ah ti le Thlarau thawngtha bia hmang in Thiang Thlarau umpinak conak kong cauk a um lo mi hi ka khuaruah a har tuk. Minung tampi nih Thiang Thlarau an hmuhtonnak koong an phuan, asinain zeiruang ah Thiang Thlarau umpinak kong cauk a um kun hnga lo? Hibantuk cauk hi khuazei ka na kawl zong ah a hmuh a har tuk.
Cubantuk in ningcang loin Thiang Thlarau ka co tiah a ti mi hna nih Jesuh hrimhrim a mipum ka ton, vancung le hell zong ah ka tlawng tiah an ti tawn. An ti mi cu, Jesuh nih, “hawi hlan ah na ra. Vawlei ah tuah ding tamtuk na ngei rih caah va kir ko rih” tiah a kan ti tiah an ti. Cubantuk hmuhtonnak cu a si kho lo mi a si. An ton mi Jesuh kha Jesuh taktak a si hnga maw? An thinlung ah sualnak ngei buin Jesuh nih a tong hna hnga maw? Jesuh cu misual he pehtlaihnak a ngei hnga maw?
Tuchan minung tampi nih Jesuh an zumh ko nain Thiang Thlarau umpinak an co lo. Cucaah, kanmah Thiang Thlarau umpinak a co mi hna nih thawngthah bia kan karhter i midang zong nih Thiang Thlarau an co ve ding a si. Minung vialte nih Thiang Thlarau kan co ding a si i cuti co khawhnak ding ahcun ti le Thlarau thawngtha bia kan zumh a herh. Hi biatak kan hngalh mi hmang in Pathian sin in Thiang Thlarau kan co khawh lai.
Bawipa nih ti le Thlarau thawngtha bia a kan pek caah amah cu kan thangthat awk a si. Hi cauk ka tial lio ah Thiang Thlarau sin in a ra mi lawmhnak in ka khat. Hi cauk kan chuah tikah minung tampi nih ti le Thlarau thawngtha bia zumhnak in Thiang Thlarau an co te lai. “Nan zumh ah khan Thiang Thlarau nan co maw?” (Lamkaltu 19:2) tiah Paul ni Efesa khua zumtu pawl kha a hal hna.
Kan dihlak in Thiang Thlarau kan co ding a si. Vawlei cung Khrihfa tampi nih Thiang Thlarau co kha an duh tuk cang. Thiang Thlarau nih a ka hruai bantuk in Baibal ning in Thiang Thlarau conak kong thawngtha ka chim cuahmah. Nun duhdim nunnak ding ah Thiang Thlarau conak biatak na zumh a herh. Atu hi na thinlung dihlak in Thiang Thlarau co caan a hnu bik a si.
Bawipa Jesuh Khrih nih Thiang Thlarau laksawng le Thiang Thlarau umpinak a ka coter caah hi thawngtha bia hi vawleicung khuazakip karhter ding duhnak taktak ka ngei.
Jentail Mi Zong Nih Ti Le Thlarau Thawngtha An Zumh Ding A Si
Baibal nih zeitindah Jesuh zultu hna nih midang kha Thiang Thlarau an coter hna ti kong a chim. Thiang Thlarau conak ding ah Jentail mi hna zong nih zultu hna bantuk zumhnak an ngeih ve ding a si. Cun Pathian pennak vawlei an luhnak ding ah Jentail mi hna nih zultu pawl an ngeih mi bantuk zumhnak an ngeih ve a herh. Cucaah, Jentail a si mi kanmah zong nih Thiang Thlarau conak ding ah thawngtha bia dawh kan zumh ve a herh. Pathian nih Peter kha Jentail miphun a si mi Cornelius sin ah a thlah i Thiang Thlarau conak ah a herh mi ti le Thlarau thawngtha bia kha a phuanter.
Judah zumtu pawl kha Jentail mi zumtu hna Thiang Thlarau an co ve ti an hngalh tikah an khuaruah a har tuk. Peter cu Jerusalem a kir i ti le Thlarau thawngtha bia a chim tikah cuarpartan pawl nih an rak soisel. “Cuarpar tan lo mi Jentail mi hna inn ah na tlung i rawl na ei” (Lamkaltu 11:3) tiah an rak ti.
A fianternak cu Lamkaltu 11:5-17 ah a tling dih ko. Aa thawh i, “Joppa khua ah khan thla ka cam i langhnak ka hmuh. Puan nganpi pakhat, a kil pali in van in an run thlak mi he aa lo mi thil khi ka hmuh i ka pawng ah khan a rung dir. A chung kah tha tein ka vun zoh i inn zuat satil le ramsa le a lawn in alawn mi thilnung hna le va kha ka hmuh hna. Cun aw pakhat kha ka theih i, ‘Peter, tho law that hna law ei hna,’ tiah a ti. Sihmanhsehlaw kei nih khan kaa thawh i, ‘Sihlah, Bawipa. Thurhhnawmh mi rawl siseh, a thiang lo mi rawl siseh, ka kaa chung ah a lut bal lo,’ tiah ka ti. Cun aw nih cun vancung cun a run ka chawnh than i, ‘Pathian nih a thiang a ti mi paohpaoh cu a thiang lo ah rel hlah’ tiah a ti. Hi thil hi voi thum tiang a um i a donghnak ahcun a ningpi in vancung ah khan an run hnuh than. Cu lio caah thente ahcun Sisaria khua in ka sin ah an rak thlah mi pathum hna kha ka tlunnak inn cu an ra phan. Thlarau nih i thuahthah loin an sin i kal awk kha a ka fial. Hi kan unau paruk hna, Joppa khua mi hna zong hi kan sin ah cun Sisaria khua ah khan an kal ve i kan dihlak in Cornelius inn ah kan kan i thum. Amah nih cun a inn chung ah vancung mi pakhat a rung dir i, ‘Joppa khua ah mi hei thlah hna law a min tling Simon Peter a si mipa pakhat kha va au han seh. Amah nih cun bia an chimh hna lai i cu bia thawng cun khamhnak nan hmuh lai,’ tiah a chimtu a hmuhnak kha a kan chimh. Cun an sin ah bia ka chim tikah, a hramthawk i kan cung ah a rak tlun bantukte khan, an cung ah Thiang Thlarau kha a tlung ve. Khi tikah kan Bawipa nih, ‘Johan nih cun ti in tipilnak a pek hna, sihmanhsehlaw nan nih cu Thlarau in tipilnak pek nan si lai,’ tiah a rak ti mi kha ka lung ah a hung pem. Kannih nih Bawipa Jesuh Khrih kan zumh tikah Pathian nih laksawng a kan pek mi bantukte kha Jentail mi hna zong Pathian nih cun apek ve hna ti kha a fiang ko, cucaah, a hi kei nih hin maw, Pathian cu ka donh hnga?” tiah a ti.
Peter nih cuarpar tan lo mi hna sin ah ka va kal i ti le rawl lawng ka ei lo, Thiang Thlarau kong thawngtha zong ka chimh hna tiah a ti. Hi kong an theih tikah dai tein an um, Cornelius le a chungkhar sahlawh dihlak nunnak le sual ngaihchihnak an co caah Pathian an thangthat.
Thiang Thlarau Conak Ding Ah Lamkaltu Hna Cawnpiaknak
Lamkaltu hna mission nganbik cu zeidah a si?
Thiang Thlarau conak ding ah ti le Thlarau thawngtha bia chimphuan
Lamkaltu hna nih ti le Thlarau thawngtha bia an chim taktak maw? A pakhatnak ah Peter nih ti le Thlarau thawngtha a zum maw zum lo ti kha kan zohhmasa a hau. Baibal ah Peter nih, “Cucu atu i nanmah an khamhtu hna tipil innak a rak sawhtu hi a si” (1 Peter 3:21). Lamkaltu Peter nih Jesuh tipil innak le vailamcung a thihnak nih minung vialte kan sualnak in a kan khamh ti kha a zumh. Cun Jesuh tipil innak nih (Matthai 3:15) sualnak vialte a lak dih i vailam cung a thih hnu nithum hnu ah a tho than ti kha a zumh fawn.
Tuchun ni zong ah Peter bantuk zumhnak a ngei mi an um ko. Ti le Thlarau thawngtha bia a chim mi paoh cu Peter rian a tuan mi an si ve ko. Hi biatak nih biangaitu vialte Thiang Thlarau umpinak a kan coter.
Peter nih ti le Thlarau kong thawngtha a chim tikah a bia a thei mi paoh nih Thiang Thlarau umpinak an co bantuk in kanmah zong nih hi biatak kan chim tikah kan chim mi bia a thei mi paoh nih Thiang Thlarau umpinak an co ve. Mi pakhat nih Jesuh cu mi khamhtu a si ti zumhnak in vancung ah a kai lo, ti le Thlarau thawngtha biatak zumhnak lawng a kai lai.
Peter nih caan khat lio ah cun Jentail mi kha vawlei a vak mi cep bantuk men ah khin a rak ruah ve hna. Nawlbia hmai ah cun Jesuh nih tipil a in hlan le thihnak in a thawhthan hlah ahcun annih cu mithiang lo an si. Asinan Jentail mi hna zong ti le Thlarau thawngtha bia zumhnak thawng in Thiang Thlarau an co kho ve. Cucaah Peter nih, “Pathian nih a thiang a ti mi cu nangmah zeihmanh a thiang lo ah ruat hlah” (Lamkaltu 10:15) tiah a ti.
Kanmah, Jentail mi zeitik hmanh Thiang Thlarau a co kho bal lo mi nih ti le Thlarau thawngtha bia zumhnak thawng in Thiang Thlarau umpinak kan co khawh ve cang. Mah ruahnak lawng ai rinh mi hna sin ah lungsau tein thawngtha bia kan chim tikah a donghnak ahcun thawngtha bia dawh kha an zumh i Thiang Thlarau an co ve ko. Cun Jesuh tipil innak le vailam cung thisen an zumh hnu ah sualnak kan ngei ti lo tiah an phuan zong kan hmuh khawh. Cu hnu lawng ah Thiang Thlarau umpinak an co lai.
Hi thawngtha bia kan chimnak a ruang ah an hngalhnak kauhter ding ca lawng ah siloin Thiang Thlarau an conak ding caah a si. Hi thawngtha bia kan chim mi a zum mi paoh cu sual ngaihthiamnak an co taktak ko. Cun Thiang Thlarau uminak an co mi hi a biapi deuh mi cu a si. Vawlei mi hna sin ah thawngtha bia lawng kan chim lo, kan hruai hna i Thiang Thlarau an co.
A herhbau mi hna sin ah ti le Thlarua thawngtha bia kan chim lai. Thawngtha bia kan chim cang ko tiah kan mak ahcun kan riantuanank vialte cu pakpalawng a si hnga. Hi thawngtha bia nih midang kha Thiang Thlarau a coter hna ti kha kan hngalh awk asi. Hi hngal buin thawngtha bia kan chim tikah Thiang Thlarau mei alh cu ram kangh in a kang ko lai.
Thawngtha bia chimtu nih a chim mi thawngtha nih midang kha Thiang Thlarau co ding ah a hruai ti a zumh ahcun a riantuannak kha Jesuh zumh ding lawng ah si loin midang kha Thiang Thlarau co ding ah ka bawmh hna ti zong kha a hngalh chi hawk a si. Cucaah atu caan ah hin ti le Thlarau thawngtha bia kan chim ding hi a biapi tuk mi a si.
Thiang Thlarau conak ding ah kan chim mi thawngtha hi an ngaih i an zumh lawng a herh mi a si. Kan chim mi thawngtha bia nih midang nunnak ah rian fak pi a tuan khawh ti hi kan hngalh awk a si. Thawngtha bia thawnnak cu Pathian peknak le thluachuahnak le nawlngeihnak a si.
Peter cu Judah mi hna caah thawngtha chimtu a si i Paul cu Jentail mi hna caah a si ve. Peter cu inn cung i thla a cam lio ah vancung innka ai on i thil zeimaw an nung tlak kha a hmuh. Cu thil zeimaw cu Baibal nih ei a sianh lo mi saram thiang lo pawl an si.
Peter nih thil asiloah saram thiang lo a ei bal lo. Asinain Pathian nih that law ei hna tiah nawl a pek. Asinain Peter nih, “Ka ei lai lo Bawipa. Thurhhawmh mi thil le a thiang lo mi thil cu zeihmanh ka ei bal lo” tiah a ti. Cu tikah aw nih cun, “Pathian nih a thiang a ti mi cu zeihmanh nang nih a thiang lo ah ruat hlah” a ti. Cucu zei sullam dah a si? Pathian nih a chim duh mi Jesuh nih vawlei sualnak, Jentail mi hna sualnak telh in, tipil a innak ah a tawl dih cang i vailam cung ah a thihpi dih cang tinak a si.
Pathian nih Peter kha saram kha that law ei hna tiah a ti mi hi thlarau lei in a sullam kan fianter ahcun Pathian nih a fapa Jesuh cu hi vawlei sualnak vailte phur ding ah a vun thlah i tipilnak a in, cu hnu ah sual leiba cham awk ah vailam cung ah thihnak a tuar ti kha a si.
Peter nih Thiang Thlarau a co hnu zong ah thil kha zumhnak mit in si loin nawlbia mit in a zoh peng rih ko. Asinain Peter nih a sualnak ai chir i Pathian nih Jentail mi hna sualnak zong a tawlpiak dih cang hna ti kha a zumh. Peter nih thawngtha bia dawh a rumnak kha fiang tein a vun hngalh. Pathian bia a chim tikah a bia ngaitu hna cung ah Thiang Thlarau a tlun kha a hmuh.
Zeitindah tuchan thawngtha bia chimtu hna nih Thiang Thlarau an co maw co lo ti kan hngalh khawh lai? Ti le Thlarau thawngtha bia an cohlang maw cohlang lo ti mi ah ai hngat mi a si. Ti le Thlarua thawngtha bia a co mi hna thawngtha chimnak nih cun Thiang Thlarau conak a chuahpi. Thawngtha bia chimtu chung ah a um mi Thiang Thlarau kha biangaitu chung zong ah a hung ve. Thawngtha chimtu le biangaitu kha ngakchia hawikomh bantuk in hawikomhnak an hung ngei. Pathian dawtnak an cung ah a um ti kha an hmuh veve. Thawngtha chimtu nih a biangaitu kha ti le Thlarau thawngtha bia zumhnak in Pathian fa a si ve cang ti kha a hmuh.
Thawngtha bia kan chim tikah ti le Thlarau thawngtha bia an zumh bak in an cung ah Thiang Thlarau a phan ti kha kan hmuh. Cucu khamhnak he then khawh a si lo. Hi ruang ah hin ti le Thlarau thawngtha bia kan chim ding a si. Kan chim mi thawngtha nih midang kha Thiang Thlarau a coter hna.
Thiang Thlarau umpinak a co mi paoh cu Pathian fa an si. Ti le Thlarau thawngtha bia hi Khrihfabu pakhat zumhnak tlaihtleng a si lo caah kan duh paoh in kan chim khawh i cu thawng cun midang nih Thiang Thlarau an co i Pathian fa an si. Zeitluk thluachuahnak lianngan dah a si! Ti le Thlarau thawngtha bia a chim mi paoh nih Pathian Pennak an kauhter. Thawngtha bia kan chim i Thiang Thlarau an co.
Mi cheu nih Thiang Thlarau co le Jesuh zumh hi thil dang veve ah an ruah. Cucaah Khrihfa hna nih Thiang Thlarau caah thla an cam peng rih. Asinain Thiang Thlarau cu Pathian sal hna nih an chim mi thawngtha bia a thei i a zum mi hna cung lawng ah a phan tiah Baibal nih a kan chimh. Vawlei cung minung tampi nih Thiang Thlarau an kawl cuahmah. Kan chim mi thawngtha nih an di a riamter hna. Hi ruang ah vawlei cung khuazakip ah thawngtha bia karhter rian kan ngei. Kannih cu Pathian fa le rocotu, a nawlpek Lianngan ah zumhawk a tlak mi kan si.
Thawngtha bia hi zumhnak he kan chim i kan mission rian cu midang nih Thiang Thlarau an co khawh nakhnga bawmh ding asi ti kha kan hngalh ding asi. Ti le Thlarau thawngtha bia hi thawngtha chimtu hna nih thawngtha bia kan chim hlan ah kan zumh hmasa a herh. Cu hnu lawng ah an biangaitu hna nih thawngtha bia an zumh lai i Thiang Thlarau an co lai. Cuticun thawngtha bia a zumtu hna sin ah zungzal nunnak thaw kan chuah hnawh khawh hna lai. Kan i tinh mi cu muihnak pennak chung in chanhchuah i Pathian pennak chung ah luhter kha a si. Thawngtha chimtu nih muihnak pennak chung ah a rawk ding mi misual mi kha Pathian Pennak chung ah a luhpi hna. Misual mi kha Pathian fa canternak riantuan hi a biapi tuk mi a si.
Minung tampi nih Thiang Thlarau conak tawhfung an hngal lo i anmah zuam in an i zuam. Asinain cucu pakpalawng a si. Thawngtha bia zumhnak lawng nih sualnak chung in a kan luatter.
Zeitindah Thiang Thlarau na co? Thlacamnak in maw? Kut cung chuannak in maw? Asi lo. Cucu a lam a si lo. Ti le Thlarau thawngtha bia zumhnak lawng in Thiang Thlarau kan co khawh. Vawlei cung minung vialte nih thawngtha bia an zumh i Thiang Thlarau an co khawh nakhnga thla kan cam i thawngtha bia kan chim ding a si.
“Lamkaltu” ti sullam cu “Pathian thlah mi” tinak a si. Lamkaltu nih zeidah an tuah? Midang nih Thiang Thlarau an co khawhnak ding ah ti le Thlarau thawngtha bia an chim. Hi rian hi tuan na duh ve lo maw? Kan dihlak in Thiang Thlarau umpinak kan co i midang sin ah thawngtha bia kan chim ding a si. Halleluijah! Thiang Thlarau conak ding ah Bawipa nih a kan pek mi thawngtha biatak hi thangthat ko hna u sih.
