Search
English
English
Due to COVID-19 and disruption to international mail service
we have temporally suspended our ‘Free Print Book service’.
In the light of this situation we are not able to mail you the books at this time.
Pray that this pandemic will end soon and the resumption of the postal service.

Sermons

مضمون 9: رومیوں (رومیوں دی کتاب اُتے تفسیر)

[1-1باب] رومیوں ۱ باب دا تعارف

” پولُس رسول دےرومیوں دے ناں خط “ نوں پاک کتاب دا خزانہ آکھیا جاسکدااے ۔ایہہ ایس گل نوں بڑاکھول کے دَسدااے پئی کویں کوئی بندہ پانی تے رُوح دی خوشخبری اُتے ایمان رکھ کے خُدا دی راستبازی پاسکدااے ۔ رومیوں دے خط دا مقابلہ جے یعقوب دے خط نال کریے ،تاں اک بندہ پہلے نوں ،  ’  کلام دا خزانہ  ‘  تے دوجے نوں  ’   گھٹیا کلام  ‘  وانگر دَسدااے ۔فیر وی، یعقوب دا خط اوسے طرحاں خُداداکلام ہیگا اے جویں پئی رومیوں ہیگااے ۔ اینہاں وچ فرق صرف ایناں ایں پئی رومیوں دی ایس لئی  بوہتی قدر ہیگی اے پئی ایہہ بائبل دا عام نقطہ نگاہ دَسدااے ،جد پئی یعقوب ایس لئی بوہتے مُل والا اے پئی ایہہ اوہ کلام ہیگااے جیہڑا راستبازدی حیاتی نوں خُدا دی مرضی مطابق جیون دے لائق بناؤندااے ۔
 
 
پولُس کون سی ؟
 
آؤ پہلاں رومیوں ۱:۱ ۔ ۷ نوں پڑھیے ، ” پولُس ولوں جیہڑا یسوع مسیح دا بندہ اے تےرسول ہون لئی سدیا گیا تے خُدادی اوس خوشخبری لئی چُنیا گیا اے ۔ جیہدا اوہنے پہلوں ای اپنے نبیاں دے راہیں پاک کتاب وچ ۔اپنے پُتر ساڈے خُداوندیسوع مسیح بارے وعدہ کیتا سی جیہڑا بدن ولوں تاں داؤد دی اولاد وچوں جمیا سی ۔پر پاکیزگی دی رُوح دے سبب مویاں وچوں جیون دے راہیں طاقت نال خُدا دا پُتر ہویا ۔ جیہدے راہیں سانوں فضل تے رسالت ملی تاں پئی اوہدے ناں دے وسیلے ساریاں لوکاں وچوں لوک ایمان دا آکھا منن ۔ جنہاں وچوں تسیں وی یسوع مسیح دے ہون لئی سدے گئے او۔ اوہناں ساریاں نوں جیہڑے رومہ وچ خُدا دے سوہنے نیں تے پاک ہون لئی سدے گئے نیں —  ساڈے باپ تے خُداوند یسوع مسیح ولوں تہانوں فضل تے تسلی ملدی رہوے ۔  “
ایہہ جملے،   ”  رومہ دے مسیحیاں نوں پولُس  دے  سلام  “  وانگر سمجھے  جاندے نیں۔پولُس
جیہڑا اوس مسیح دا بندہ اے جیہڑا خُدادی راستبازی گنیا گیا ،اوہناں نوں سلام لکھدااے ۔
پہلی آیت اُتے ایہہ سوال اُٹھدااے  ’ پولُس کون اے؟ ‘ اوہ اک یہودی سی جیہڑا مویاں وچوں جیوں والے خُداوند نال دمشق ول جاندے ہویاں ملیا تے اوپریاں قوماں تیک خُد ادی خوشخبری ودھاؤن والا خُدا وند خُدا دا خاص وسیلہ سی (اعمال ۹: ۱۵)۔
 
 

پولُس نے اوس سچی خوشخبری دی منادی کیتی جیہڑی پُرانے عہد نامے  دی پیشن گوئیاں تے چڑھاویاں دی رسم نال قائم سی

 
دوجی آیت وچ ، پولُس رسول خوشخبری دی  منادی پُرانے عہد نامے دے کلام دی نیہ اُتےکردا پیا سی ۔ اوہنے بیان کیتا ،  ” خُدا دی خوشخبری “  جیہدا   ” اوہنے پہلوں ای اپنے نبیاں دے راہیں پاک کتاب وچ ، اپنے پُتر ساڈے خُداوندیسوع مسیح بارے وعدہ کیتا سی “ ایس آیت دے راہیں ، سانوں دِسدا اے پئی پولُس نے پانی تے رُوح دی خوشخبری دی منادی کیتی  جیہڑی پُرانے عہد نامے دی چڑھاوے دی رسم وانگر سی ۔ اگانہہ ہور ، دوجی آیت وچ ایہہ اشارہ ملدا اے پئی پولُس نوں  خوشخبری دے کم لئی چُنیا گیا سی ۔
ایہہ جملہ   ’ اپنے نبیاں دے راہیں پاک کتاب وچ  ‘  خُدا دے یسوع نوں بھیجن دے اوہناں وعدیا ں دا ثبوت اے جیہڑے پُرانے عہد نامے دی چڑھاویاں دی رسم یاں پیشن گوئیاں وانگر ویکھے گئے ۔پُرانے عہد نامے دے سارے نبی ،جنہاں وچوں موسیٰ ،یسعیاہ ، حزقی ایل ،یرمیاہ تے دانی ایل ہیگے نیں ، ایناں ایس سچ دی گواہی دتی پئی یسوع مسیح ایس جگ وچ آوے گا تے ساڈے سارے پاپاں نوں چُک لین دے بعد سولی اُتے اپنی جان دیوے گا ۔
اوہ کیہڑی خوشخبری اے جیہدی پولُس نے ایس طرحاں منادی کیتی ؟ اوہنے پانی تے رُوح دی اوس خوشخبری دی منادی کیتی  جیہڑی خُدا دے پُتر ، یسوع مسیح دے بارے دسی گئی سی ۔
کئی لوک آکھدے نیں پئی پُرانے عہد نامے دا کلام تاں پہلوں ای پورا ہو گیا سی ، تے بوہتے متی ۱۱ : ۱۳ دے بول ثبوت اُتے پیش کردے ہوئے ایسے گل اُتے زور دیندے نیں ۔ کئی مشہور مناد ایتھوں تیک پئی پُرانے عہد نامے دے سارے حصے نوں رد کردیندے نیں۔
فیر وی ، خُدا نے پُرانے عہد نامے دے راہیں ساڈے نال وعدہ کیتا تے نویں عہدنامہ وچ یسوع مسیح دے راہیں ایس وعدے نوں پورا کیتا ۔ ایس لئی ، ایماندار لوکاں وچ،نواں عہد نامہ  ،پُرانے عہد نامے توں ہٹ کے پوریاں نئیں ہوسکدا،ایسے طرحاں ،  پُرانے عہد نامے دا کلام  نویں عہد نامہ    دے کلام توں ہٹ کے پورا نئیں ہو سکدا ۔
پولُس رسول خُد ادی خوشخبری ودھاؤن لئی وکھ کیتا گیا رسول ہیگاسی ۔  فیر ،سوال ایہہ بن دا اے پئی ،  ”  کیس طرحاں دی خوشخبری دی اوہنے منادی کیتی سی ؟  “ اوہنے پُرانے عہد نامےاُتے بنے ایس سچ دی منادی کیتی پئی یسوع ایس جگ وچ   آیا تے پانی تے رُوح دی خوشخبری دے راہیں سانوں ساڈے سارے پاپاں توں اوسے طرحاں مکتی دتی جویں پئی پُرانے عہد نامے وچ لکھیا ہویا سی ۔ایس لئی ، جدوں وی اسیں پانی تے رُوح دی خوشخبری دی منادی کردے آں ، تے سانوں وی اِنج ای کرنا چاہی دااے تے پُرانے عہد نامے دیاں پیشن گوئیاں تے چڑھاوے دی رسم دا حوالہ دینا چاہی دااے ۔صرف اِنج ای لوک پانی تے رُوح دی خوشخبری دی سچیائی اُتے یقین رکھن گے تے جانن گے پئی نواں عہدنامہ پُرانے عہد نامے وچ کیتے گئے وعدیاں نوں پوریاں کردااے ۔
نویں عہدنامے دے شروع ہوندیاں ای ، سانوں دِسدااے پئی یسوع دے بپتسمے جیہڑا اوہنے یوحنا کولوں لیا سی تے اوہدے صلیبی لہو اُتے بوہت زور دتا گیا اے ۔ بھاویں پرانے عہدنامے دیاں بڑیاں خاص گلاں وچ ،چڑھاوے دی رسم ہیگی سی ،جیہڑی پئی اک پاپی دی مکتی دا سبب ہیگی سی ۔ اوہ اپنے ہتھ چڑھاوے دے پسُو دے سر اُتے رکھ کے اپنے پاپاں نوں اوہدے اُتے لددے سَن تے اپنے پاپاں توں معافی پاؤن لئی اینوں پاپ دے چڑھاوے وانگر چڑھاؤندے سَن ۔
فیر ،جے ہتھ رکھن تے چڑھاوے دے پسُو دا لہو پاپاں توں معافی لئی وگاؤن دی رسم پُرانے عہد نامے وچ سی تاں فیر نویں عہدنامے وچ کیہ ہیگا سی ؟ ایہدے وچ یسوع دا بپتسمہ جیہڑ ا اوہنے یوحنا کولوں لیا سی تے اوہدا صلیبی لہو ہیگااے ۔ ہور ، پُرانے عہد نامے وچ جیہڑے وڈے کاہن دا ذکر کیتا گیا اے (احبار ۱۶ : ۲۱)۔ نویں عہدنامے وچ یوحنا بپتسمہ دین والا اوہو ای اے ۔
تیجی تے چوتھی آیت ، ایس سوال بارے گل کردی اے پئی ، ”  یسوع دی ہستی کیہ ہیگی سی ؟  “ ایہہ آیتاں اوہدے بدنی کم بارے کھول کے دسدیاں نیں ۔ یسوع مسیح بدن ولوں داؤد دے خنوادے وچ جمیا سی تے پاکیزگی دے رُوح ولوں مویاں وچوں جیون دے سبب ، طاقت نال خُدا تعالیٰ دا پُتر ہویا ۔ ایس لئی ، اوہ پانی تے رُوح ولوں اوہناں دا جنہاں اوہدے اُتےایمان لیاندا، مکتی داتا بنیا ۔ یسوع مسیح اوہناں ساریاں لئی جیہڑے اوہدے اُتے ایمان رکھدے نیں مکتی دا خُدا ، بادشاہواں دا بادشاہ ، تے اَسمان اُتے ہمیشگی دا وڈا کاہن بن گیا ۔
کئی ناں دے مسیحیاں دی  دینی تعلیم وچ یسوع دے خُدا ہون نوں رد کیتا گیا اے ۔ایہہ تعلیماں آکھدیاں نیں پئی  ”پئی اوہدے جوانی دیہاڑے ای چنگے سَن ۔ “ ہور اَگانہہ، نویں خُدائی تعلیم دے مطابق ، ” سارے دیناں وچ مکتی ہیگی اے  “ ایس لئی ،آوارہ بائبل سکولاں وچ ،لوک ضد کردے نیں پئی اوہناں جادو ، بُدھ اِزم ،کیتھولک اِزم تے جگ دے دوجے دیناں نوں  منیا ایں ۔  ایہہ صرف ناں دی آوارہ خُدائی تعلیم یاں نویں خُدائی تعلیم آکھدی اے پئی سارے لوکاں نوں اکٹھیاں کرن لئی ایناں ساریاں گلاں نوں ودھاکے دَسنا بوہت لوڑی دااے ۔
جد پئی پاک بائبل وچ  کھول کے دَسیا گیا اے پئی شروع وچ خُدا نے اَسمان تے دھرتی بنائی ۔فیر ، ایہہ کیہڑا خُدا ہیگااے ؟ ایہہ یسوع مسیح ہیگااے ۔   ’مسیح ‘  دا مطلب ہیگا اے پئی تیل نال مسح کیتا گیا ۔ پُرانے عہد نامے وچ ،اک راجے یاں نبی دے سر نوں وڈاکاہن مسح کردا ہونداسی ۔ ایس لئی ،یسوع مسیح نوں بادشاہواں دا بادشاہ آکھیا گیا اے ۔ جے کوئی بندہ یسوع نوں خُدا منن توں مُکر دااے تے اوہدا خُدا اُتے یقین ای نئیں ہیگا اے ۔
اَج کل ،سارے جگ دےلوکاں دا ایمان ساریاں کلیسیاواں نوں دینی طور اُتے اکٹھیاں کرن ول ودھدا پیااے ۔ بھاویں اوہ سارے مسیحی راہوں بھٹکے ہوئے دین جویں پئی بُدھ اِزم تے کنفیوشس اِزم نال رلے ہوئے نیں ،فیر وی اوہ خُدا دی وڈیائی تے عبادت کردے نیں ۔ تے بوہتیاں ، ایناں عبادتاں وچ پہلاں بُدھ مت وانگر عبادت ہوندی اے ،تے دوجے ویلے مسیحیاں وانگر عبادت ہوندی اے ۔ ہو سکدا اے اوتھے  بوہت چنگی طرحاں رلیا ملیا بھِجیا ہویا کھانا وی ہووے ۔ فیر وی ، جدوں ایہہ ایمان دی گل کردے نیں ، تے اینوں ملاوٹ توں پاک تے چنگیاں کرن نوں آکھدے نیں ۔
ایس لئی تیجی تے چوتھی آیت دے ایس سوال دا پئی ، ’ یسوع کون ہیگااے؟ ‘   ایہہ جواب ہیگا اے پئی اوہ اِکلا ای اے جیہڑا مویاں وچوں جیون دی طاقت راہیں خُدا تعالیٰ دا پُتر ہویا۔ مسیح ساڈا خُداوند تے مکتی داتا بن گیا ۔
پنجویں تے چھیویں آیت ایہدے بارے وچ ہیگیاں نئیں پئی ،کاہدے توں پولُس خُدا دا رسُول بنایا گیا سی ۔اوہ اوپریاں قوماں نوں خوشخبری سناؤن لئی رسُول بنایا گیا سی تاں پئی اوہ وی یسوع مسیح اُتے ایمان لیا کے مکتی پاؤن ۔
 
 

پولُس کول کیہڑی قِسم دی طاقت ہیگی سی ؟

 
جویں ستویں آیت وچ لکھیا ہویا اے ، پولُس ایمانداراں نوں خُدا دے راہیں یسوع مسیح دے ناں وچ برکت تے نعمت دین دی طاقت رکھداسی ۔اک رسول دی طاقت دا مطلب ہیگا اے روحانی طاقت جیہڑی اوہناں نوں ایس لائق بناؤندی اے پئی یسوع مسیح دے ناں دے راہیں سارے لوکاں نوں نعمت دیوے۔
ایس لئی پولُس آکھ سکدا سی پئی ، ” ساڈے باپ خُدا تے خُداوند یسوع مسیح  ولوں تہانوں فضل تے تسلی ملدی رہوے ۔ “
ایتھے، میَں ایس برکت بارے کُجھ ہور دَسنا چاہواں گا ۔اِنج لگدااے پئی پولُس جیہڑی برکت لوکاں نوں دینداسی ،اسی وی جدوں اتواردی عبادت مکاؤندےآں ،تاں بالکل اوہو ای برکت لوکاں نوں دیندے آں ۔  ” خُدا اپنے پاک لوکاں نوں ایہو جیہی برکت ونڈن دی آس رکھدااے  “ برکت دا اصل کلام ہیٹھاں دسیا گیا اے ۔
آؤ گنتی دی کتاب ۶:۲۲ توں شروع کریے ۔  ” تے خُداوند نے موسیٰ نوں آکھیا پئی ہارون تے اوہدے پُتراں نوں آکھ پئی  تسیں بنی اسرائیل نوں ایس طرحاں دعا دینا ۔ تسیں اوہناں نوں آکھنا۔خُداوند تینوں برکت دیوے تے تیرا راکھا ہووے ۔خُداونداپنے چہرے دا نُور تیرے اُتے پاوے تے تیرے اُتے مہربانی کرے ۔ خُداوند اپنا چہرہ تیرے ول موڑکے دھیان کرے تے تینوں سلامت رکھے ۔ “
وڈے کاہن ہارون تے اوہدے پُتراں نوں دسیا گیا  پئی ، ” تسیں بنی اسرائیل نوں ایس طرحاں دعا دینا ۔ “ جے اوہ اِنج اسرائیل نوں برکت دین گے ، تاں خُدااوہناں نوں ساری دی ساری برکت دیوے گا جویں پاک کلام وچ آکھیا گیا اے ۔ جدوں اسیں پولُس دے سارے خطاں ول ویکھدے آں ، تاں سانوں دِسدا اے پئی بوہتا اوہنے اِنج آکھیا ،  ” خُداوند ولوں تہانوں فضل تے تسلی ملدی رہوے ۔ “ ایہہ آیت ایس گل ول اشارہ کردی اے پئی ایہہ اوہ آپ نئیں ہیگا سی جیہڑا ایس برکت نوں ونڈداپیا سی سگوں ایہہ خُدا ہیگا سی جیہڑا اِنج کردا پیا سی ۔ ایس لئی ، پولُس جدوں اپنے خط لکھدا ، اپنے خط نوں بند کرن توں پہلاں سدا پاک لوکاں نوں برکت دیندا سی ۔
 پولُس نوں آکھیا  گیا  سی پئی خُدا دے لوکاں نوں  برکت ونڈے ۔ ایہہ حکم سارے مسیحی خادماں
نوں نئیں دتا گیا ۔ ایہدی تھاں اُتے ، ایہہ صرف خُدا دے خادماں نوں ای دتا گیا سی ۔ جدوں خُدا دے خادم ایہہ آکھدے ہوئے برکت چاؤہندے نیں پئی اپنی اصل برکت نوں گھل تاں فیر ، ای خُدا اوہناں نوں ایہہ برکتاں اک انعام وانگر دیندا اے ۔
خُدا اَسمانی طاقت اپنے خادماں نوں ای نئیں سگوں نویں سریوں جمن والے پاک لوکاں نوں وی دیندا اے ۔ خُدا آکھدااے ،  ”  جنہاں دے پاپ تسیں معاف کرو ، اوہناں دے معاف کیتے گئے نیں ،جنہاں دے پاپ تسیں قائم رکھو اوہناں دے قائم رکھے گئے نیں ۔ “  (یوحنا ۲۰: ۲۳)۔اوہ اِنج دی طاقت سارے راستبازاں نوں دیندااے ۔ایس لئی ہر کسے نوں دھیان دینا چاہی دااے تے اوہدے خادماں تے نویں سریوں جمن والے پاک لوکاں دا مقابلہ نئیں کرنا چاہی دا، کیوں جے ایہہ بالکل اِنج ہیگا اے جویں پئی اسیں خُدا دا مقابلہ کردے آں  ۔خُدا نے برکت تے لعنت دین دی طاقت اپنے رسولاں نوں تے خادماں تے راستبازاں نوں وی دتی اے ۔
 
 
پولُس رسول آس رکھدا سی پئی پاک لوکاں  نوں کوئی روحانی نعمت دیوے
 
رومیوں ۱ : ۸ ۔ ۱۲، ”  پہلاں تاں میَں تہاڈے ساریاں دے بارے وچ یسوع مسیح دے راہیں اپنے خُدادا شکر اداکرداہاں پئی تہاڈے ایمان دی سارے جگ وچ مشہوری ہوندی پئی اے ۔ایس لئی خُدا جیہدی عبادت میَں اپنی روح وچ اوہدے پُتر دی خوشخبری دے کے کرداہاں ،میرا گواہ ہیگااے پئی میَں باقاعدگی نال تہانوں یاد کرداہاں ۔تے اپنی دعاواں وچ سدا ایہہ منت کردا ہاں پئی ہُن اخیریں خُدا دی مرضی نال مینوں تہاڈے کول آؤن وچ کسے طرحاں کامیابی ملے ۔کیوں جے میَں تہانوں ملن دی آس رکھدا ہاں تاں پئی  تہانوں کوئی رُوحانی نعمت دیواں ،جیہدے نال تسیں تگڑے ہوجاوو ۔ تاں پئی میَں وی تہاڈے وچوں ہو کے تہاڈے نال اوس ایمان دے سبب سکون پاواں جیہڑا تہاڈے وچ تے میرے وچ ،دونواں وچ ہیگاااے ۔ “
سب توں پہلاں، پولُس نے کاہدے لئی خُدا دا شکر اداکیتا سی ؟ اوہنے رومہ دے مسیحیاں لئی خُدا دا شکر اداکیتا سی،کیوں جے اوہناں ایمان رکھیا سی تے اوہناں دے راہیں خوشخبری دوجے لوکاں تیک اپڑدی پئی سی ۔
نوویں تے دسویں آیتاں وچ ، کوئی ایہہ سوال پُچھ سکدا اے پئی ،”  کاہدے لئی پولُس اپنے منادی دے سفر وچ روم جانا چاؤہنداسی ؟  “ ایہدا سبب ایہہ ہیگا سی پئی جے پانی تے رُوح دی خوشخبری اوس ویلے روم وچ سنائی جاندی تاں ایہہ  سارے جگ وچ ودھ جانی سی ۔ جویں پئی سارا جگ اَج کل  امریکہ ول ویکھدا اے ، اگیترے ویلیاں وچ ، روم سارے جگ دی وچکار تھاں ہیگی سی ،جویں پئی ایتھے کہاوت ہیگی اے پئی ، ”  سارے رستے روم نوں جاندے نیں  “
اسیں خوشخبری نوں امریکہ وچ ودھاؤن لئی بوہت کم کردے پئے آں۔جے اسیں پانی تے رُوح دی خوشخبری نوں امریکہ وچ ودھاؤندے آں ،تاں اوتھے ایہو جیہے بوہتے پادری بن جان گے تے سارے جگ وچ جا کے ایس سوہنی خوشخبری نوں دوجیاں تیک ودھاؤن گے ۔ ایس لئی ،پولُس  دی ایہہ بوہت آس ہیگی سی پئی اوہ روم جاوے  ۔
 
 

رُوحانی نعمت  جیہدے بارے پولُس گل کردااے

 
یارہویں آیت وچ لکھیا اے ، ”  کیوں جے میَں تہاڈے نال ملن دی ریجھ رکھدا ہاں تاں پئی تہانوں کوئی رُوحانی نعمت دیواں  جیہدے نال تسیں تگڑے ہو جاوو۔ “
 پولُس دا ایہدے توں کیہ مطلب اے پئی تہانوں کوئی رُوحانی نعمت دیواں تاں پئی تسیں تگڑے ہو جاوو ؟  رُوحانی نعمت  جیہدے بارے پولُس گل کردااے ، پانی تے رُوح دی اوہ خوشخبری ہیگی اے جیہدی اسیں منادی کردے پئے آں  ۔ بارہویں آیت وچ اِنج لکھیا ہویا اے،  ”  تاں پئی میَں وی تہاڈے وچوں ہو کے تہاڈے نال اوس ایمان دے سبب سکون پاواں جیہڑا تہاڈے وچ تے میرے وچ ،دونواں وچ ہیگاااے ۔  “ پولُس آکھدااے پئی تہانوں کوئی رُوحانی نعمت دیواں تاں پئی تسیں  تگڑے ہو جاووتے لوکاں دے اوس ایمان دے راہیں جیہڑااوہناں تے پولُس وچ ، دونواں وچ ہیگا سی سکون پاوے تے اوہ پانی تے رُوح دی خوشخبری دے راہیں لوکاں نوں سکون دینا چاؤہندا سی تا ں پئی لوک فضل ،تسلی تے رُوحانی نعمت پاؤن تے اوسے ایمان وچ رَل جان جیہدے وچ پولُس ہیگا سی ۔  
پولُس رسول دَسداپیا اے پئی اوہنوں بوہت چاء ہیگا اے پئی اوہناں نال اوس ایمان دے راہیں سکون پاوے ، ایہدے توں ایہہ وکھالی دیندااے پئی اوہ بوہت چِر توں پانی تے پاک رُوح دی خوشخبری دی منادی کرداپیا سی تے پاک رُوح اک واری فیر رومن کلیسیاواں وچ ایہہ منادی کراؤناچاؤہندا سی ۔ ہُن ساڈی کلیسیا وچ کم کرن والے بندے پانی تے رُوح دی خوشخبری نوں چنگی طرحاں جان دے نیں تے ایہدے اُتے پکا ایمان رکھدے نیں ، پر کئی ایتھے صرف ناں دے مسیحی ہیگے نیں ایہو جیہے لوک جویں جویں ویلہ لنگھدااے ایس سچی خوشخبری توں ہوردُور ہوندے جاندے نیں ۔ ایسے طرحاں ،رومہ وچ کلیسیا نوں ایس سکون دین والی خوشخبری دی لوڑ پے سکدی سی ۔
ایس لئی، پولُس نے آکھیا پئی اوہ اوس رَلویں ایمان دے راہیں جیہڑا اوہدے وچ سی ،سکون پاوے ۔ اصل وچ اسیں خُدا دے لاگے ای سکون پاؤندے تے ایسے وچ ساڈے دلاں نوں آرام ملدا اے ۔ اسیں پانی تے رُوح دی خوشخبری اُتے ایمان رکھن لئی شکر ادا کردے آں ۔ اسیں پانی تے رُوح دی خوشخبری اُتے ایمان لیاؤن توں اَڈ ہمیشگی دے ایمان نوں پاؤن دے لائق نئیں ہو سکاں گے ۔
ہور اَگے ، ایہہ لکھیا ہویا اے ،  ” میَں تہانوں کوئی رُوحانی نعمت دیواں  جیہدے نال تسیں تگڑے ہو جاوو۔ “ ایہہ رُوحانی نعمت پانی تے رُوح دی خوشخبری ای ہیگی اے ۔ ہر کوئی پانی تے رُوح دی خوشخبری اُتے ایمان لیا کے خُدا دا پُتر بن سکدا تے برکتاں پاسکدااے ۔
فیر وی ، ایہدا اوہناں لوکاں نوں ،جیہڑے سارے بھیڑے کم ،سگریٹ پینا ، شراب پینا تے دوجے پُٹھے کم چھڈ کے پاک بن کے ایمان نال بھری حیاتی تاں  بسرکردے نیں تے بھاویں او ہ یسوع اُتے ایمان رکھدے نیں ،پر جے اوہ پانی تے رُوح دی خوشخبری نوں اجے نئیں جان دے ،تاں کیہ فائدہ اے ؟ اوہناں کماں دی خُدا دی راستبازی وچ کوئی  قدر نہیں ہیگی اے ۔ خُدا دی راست بازی بندیاں دی راستبازی توں بوہت اُچی ہیگی اے ۔ لوکاں نوں گرجے وچ لیاؤنا سوکھا ہیگا اے ۔ پر ایناں ایمانداراں نوں پانی تے رُوح دی خوشخبری بارے دَسنا بوہت لوڑی دا اے تاں پئی اوہ اپنے پاپاں توں مکتی پاؤن تے اَسمانی رُوحانی نعمتاں نال بھر جان نال خُدا دے پُتر اَکھواؤن ۔
پولُس رسول چاؤہنداسی پئی  روم دے مسیحیاں نوں اپنے ایمان نال تسلی دیوے ۔ ایس لئی اوہنے فرمایا ، ”  تاں پئی میَں وی تہاڈے وچوں ہو کے تہاڈے نال اوس ایمان دے سبب سکون پاواں جیہڑا تہاڈے وچ تے میرے وچ ،دونواں وچ ہیگاااے ۔  “ ایس لئی ،پولُس رسول نے کلیسیا دے سارے لوکاں نوں اصل خوشخبری پوہنچائی پئی اوہ ایس اُتے ایمان رکھن ، تاں پئی  پانی تے رُوح دی خوشخبری وچ اوہدے نال ایمان وچ پکے ہون ۔ اوہنے رومہ دے کلیسیائی ایمانداراں نوں پانی تے رُوح دی خوشخبری دتی تے اوہناں نوں سکھایا پئی اصل وچ ایہہ خوشخبری کیہ ہیگی سی ۔
ایہو ای سبب اے جنہے پولُس نوں جگ وچ، اَج دے مناداں توں وکھ بنایااے ۔رومی کلیسیا نوں پولُس نے خط وچ آکھیا پئی اوہ چاؤہندااے پئی لوکاں نوں کوئی رُوحانی نعمت دیوے تاں پئی اوہ تگڑے ہو جان ،تے رَلویں ایمان دے راہیں اوہناں نوں تسلی دیندااے جیہڑا کلیسیا تے اوہدے وچ ہیگا اے ۔ ایہو ای اوہ سب کجھ ہیگا اے جیہڑا اَج دی کلیسیاواں دے سارے مناداں نوں پولُس توں سکھنا چاہی دااے ۔پولُس رسول  پانی تے رُوح دی منادی کردا سی ،ایسے گل توں کوئی جھوٹے تے سچے خادماں وچ فرق کرسکداسی ۔
اَج کل ، گرجیاں وچ جیہڑے نویں لوک آؤندے نیں ،اوہناں نوں ۶ مہینیاں تیک یاں اک ورہے لئی دینی تعلیم سکھائی جاندی اے ،اخیریں اوہناں نوں بپتسمہ دے دتا جاندااے ۔ اوہ بپتسمہ لیندے نیں بھاویں اوہ پانی تے رُوح دی خوشخبری بارے جنہوں یسوع نے پورا کیتاسی ، جان دے ہون یاں نہ جان دے ہون ۔ دوجے اَکھراں وچ ، بھاویں اوہ کلیسیا دے ممبر تےبن گئے ، پر خُدا دے پُتر ہون دے لائق نئیں ہوئے ،جیہڑا اپنی راستبازی نال بھریا ہویا اے ۔ اَج دے خادم اپنےنویں چیلیاں کولوں  دس حکماں بارے پُچھدے تے رسولا ں دا عقیدہ ای یاد کراؤندے نیں ۔جے نویں چیلے ایس یاد کرکے سناؤن دے امتحان نوں پاس کر لین تاں فیر اوہناں نوں آکھیا جاندااے ،  ”  کیہ تسیں شراب پینا چھڈ دے پئے او ؟ کیہ سگریٹ پینا چھڈدے پئے او؟ کیہ تسیں اپنی دہ یکی ہر مہینے دین جاندے او ؟ کیہ تسیں چنگی جنڈری گزاروگے ؟ “
ایہو ای سبب ہیگااے پئی یورپ ، ایشیاتے سارے جگ دیاں کلیسیاواں خُدا دی راستبازی توں دُور ہوندیاں جاندیاں نیں کیوں جے اوہ بندیاں وچوں راستبازی بھال دے نیں ۔ ایتھوں تیک پئی اَج کل کوریا وچ وی جیہڑا  ’ایشیا دا ناں داای یروشلیم  ‘  اَکھواندااے مسیحیاں دی گنتی گرجیاں وچ گھٹ دی پئی اے ۔ ہُن ایہو جیہا ویلا آگیا اے پئی کوئی وی گرجے جانا اوس ویلے تیک پسند نئیں کردا ،جدوں تیک گرجے وچ کوئی خاص پروگرام نہ ہووے ، جویں پئی گیت پرستش دا دیہار یاں اک پوپ سُر دا دن وغیرہ ۔ جے لوک آؤندے نیں تاں اوہناں نوں عام پیغام دتے جاندے نیں جیہڑے بوہتی وار اوہناں دی  جوانی دی جندڑی بارے ہوندے نیں جویں پئی  ’ سگریٹ نہ پیو ،نیکیاں کرن والی جندڑی بسر کرو،پاک اتواراں نوں منو تے اِنج ای ہو ر بوہت سارے رضاکار کماں بارے دَسیا جاندااے ‘  ایناں سارے کماں دا جیہڑے دَسے جاندے نیں خُدا دی راستبازی نال کوئی تعلق نئیں ہیگااے ۔
اک بندہ پاپ کرن لئی سدا تیار رہندا تے پاپ توں بچدیاں ہویاں وی پاپ وچ پھس جاندا اے ،ایس لئی  اوہنوں خُدا دی راستبازی اُتے توکل کرنا چاہی دااے ۔ ایسے لئی ، جدوں لوک خُدا دی کلیسیا وچ آؤندے نیں ،تاں سانوں اوہناں نوں پانی تے روح دی خوشخبری دینی چاہی دی اے تاں پئی اوہ خُدا دی راستبازی پاسکن ۔ سانوں چاہی دااے پئی ایہہ آکھدیاں ہویاں اوہناں نوں خُدا دی راستبازی پوہنچائیے پئی بھاویں اسیں ماڑے ہیگے آں تاں فیر وی تسیں تے میَں پاپ توں اَڈ ہیگے آں۔
یقین منو پئی ایہنوں ذہن وچ رکھنا چاہی دااے ۔ہر بندہ خُدا دی راستبازی دے راہیں پاپ توں پاک ہون دے بعد وں ای خُدا دی مرضی مطابق جیوندارہ سکدااے ۔ا وہ بندہ ای خوشخبری  ودھاسکدا اے جنہے اپنے پاپاں دا مسئلہ حل کر لیا ہووے  ۔ ساڈا دوجیاں نوں خوشخبری دین والا کم اپنے پاپاں توں مکتی پاؤن دے مسئلے توں پہلاں نئیں ہونا چاہی دا۔ کوئی بندہ وی جدوں تیک  پئی اوہ اپنے پاپ دا مسئلہ حل نہ کر لوے دوجیاں نوں کدی وی اصل خوشخبری دی منادی نئیں کر سکدا ۔
ایہہ دسیا گیا اے پئی پولُس رسول نے اصل وچ دوجیاں نوں رُوحانی نعمت دتی ۔ پولُس جیہڑی نعمت دا ذکر کردااے اوہ اوپریاں بولیاں یاں معجزے نئیں ، جویں پئی اَج کل دے دناں وچ پینتی کاسٹل تحریک دا خیال اے ۔بوہتے مسیحی کئی اولیاں گلاں نوں جویں پئی رویا ویکھنا ، نبوت کرن،اوپریاں بولیا بولن یاں  روگیاں نوں چنگیاں کرن نوں ای روحانی نعمت آکھدے نیں۔
فیر وی ، ایہہ شیواں اَسمان ولوں رُوحانی نعمت نئیں ہیگیاں ۔ دعاکردیاں ہویاں رویا ویکھنا لازمی طور اُتے اک رُوحانی نعمت نئیں ہیگی اے ۔اک بندہ انھے وا رولا پاؤندااے یاں غار وچ رہن والا بندہ جدوں وی اولی آواز سُن دااے ،جد پئی اوہ ۳ راتاں نئیں سُتا اے ، خُدا دا انعام نئیں ہیگااے ۔ اوہ جیہڑا دعویٰ کردااے پئی اوہ ایس لائق ہیگااے پئی دوجیاں نال اوپری بولی بولدااے تے چھت اُتے جان دے بعد اولے بول  ’ لا۔لا۔لا۔لا ‘ جیبھ نوں ولانواں دے کے رولا پاؤندا اے،ایہہ اوہ نظارہ نئیں پئی اوہ پاک رُوح پاؤنداپیا اے ۔ایہدی تھاں اُتے ، ایہہ اک ذہن دے روگیاں وانگر اے ،جیہڑا ذہنی روگیاں دے ہسپتالاں وچ برباد ہونداپیا اے ۔ فیر وی ،بوہتے صرف ناں دے ای ،  ’  برکت دین والے - دین نوں جیوندارکھن والے ‘ ہیگے نیں ،جیہڑے ایس گل اُتے زور دیندے نیں پئی اوہ مسیحیاں نوں ایہہ تعلیم سکھاسکدے نیں پئی کویں اوپریاں بولیا ں بولنیاں چاہی دیاں نیں یاں فیر کویں  پاک رُوح پاؤنا ایں ۔ اوہ اصل وچ بوہت پُٹھا کم کردے پئے نیں تے جیہڑا ایمان اوہ رکھدے نیں ، لازمی طور اُتے ٹھیک نئیں ہیگااے۔
جدوں اسیں ایمان نال بھر کے خُدا دے کم کردے تے خُداوند دے پچھے چلدے آں تاں پاک رُوح دا حیاتی دا چشمہ ساڈے دلاں وچوں وگدااے ۔ پاک رُوح دا چشمہ ساڈے دلاں وچوں اوس ویلے وگے گا جدوں اسیں بدنی کم چھڈ کے ایہدی تھاں اُتے رُوحانی کماں پچھے ٹُردے آں ۔ مسیحیاں نوں پاپاں توں معافی دی رُوحانی نعمت نوں پانی تے رُوح دی خوشخبری اُتے ایمان لیا کے پاؤنا چاہی دااے ۔ کسے نے آکھیااے پئی بوہتے مسیحی حالے تیک اج کل گرجیاں دے راہیں دوزخ ول جاندے پئے نیں ۔ ایہہ ایس گل ول اشارہ کردااے پئی اج دے گرجے خُدا دی راستبازی دی منادی کرن دی تھاں اُتے ،انسانی راستبازی ول دھیان دیندے پئے نیں۔
سُنو بھراوو، جے کوئی گرجے جان توں بعدوں انسانی راستبازی دے بوہتے ڈھیر ای کیوں نہ لا دیوے ،ایہدا مطلب ایہہ نئیں ہیگا پئی اوہ ایناں کماں نال روحانی نعمت پا سکدے نیں ۔ سانویں  پانی تے رُوح دی خوشخبری اُتے ایمان لیا کے خُدا دی راستبازی نال اپنے دلاں نوں بھرنا چاہی دااے تاں پئی اسیں رُوحانی نعمت پا سکیے ۔
آؤ، ۱۳ ۔ ۱۷ آیتاں نوں پڑھیے ، ” تے سُنو بھراوو !میَں نئیں چاؤہنداپئی تسیں اینوں نہ جانو پئی میَں گھڑی مُڑی تہاڈے کول آؤن دا ارادہ کیتا تاں پئی جویں مینوں ہو ر غیر قوماں وچ پھل ملیا ،اُنج ای تہاڈے وچ وی ملے ،پر ہُن تیک رُکیا رہیا ۔ میَں یونانیاں تے غیر یونانیاں ،دانیاں تے کم عقلاں دا قرض دار ہیگا واں ۔ سو میَں تہانوں وی جیہڑے رومہ وچ ہیگے او،خوشخبری سناؤن لئی توفیق ملن مطابق تیار ہیگا واں ۔کیوں جے میَں انجیل توں شرماؤندا نئیں ۔ایس لئی پئی اوہ ہر اک ایمان رکھن والے لئی ،پہلوں یہودی فیر یونانی واسطے مکتی لئی خُدا دی قُدرت ہیگی اے ۔ ایس لئی پئی اوہدے وچ خُدا دی راستبازی ایمان نال تے ایمان لئی وکھالی دیندی اے جویں پئی لکھیا ہویا اے پئی راستباز ایمان رکھن نال جیوندارہوےگا۔ “
پولُس رسول روم جانا چاؤہنداسی۔فیر وی اوہ اِنج نہ کر سکیا کیوں جے اوہ بوہتیاں تنگیاں دے سبب رُکیا رہیاسی ۔ ایس لئی ،اوہنے ایہہ آکھدیاں ہویاں دعا کیتی پئی اوہدے منادی کرن دے بوہے کُھل جان۔
جدوں اسیں کتاباں دے راہیں خوشخبری دی منادی کردے آں ،تاں سانوں وی اوہدے وانگر ایہو جیہاں دعاواں کرنیاں چاہی دیاں نیں ۔ صرف جدو ں اسیں دعاکراں گے،تاں خُدا دے  دل اُتے اثر ہووے گاتے صرف فیرای خُدا ساڈیاں راہواں نوں کھول کے ایس لائق بناوے گا پئی پانی تے رُوح دی خوشخبری نوں سارے جگ وچ ودھا سکیے ۔
 
 
پولُس جیہڑا سارے جگ دا قرض دار ہیگا سی
 
کا ہدے لئی پولُس نے آکھیا پئی اوہ او ہناں دا قرض دار ہیگااے تے آیتاں ۱۴ تے ۱۵ وچ اوہ قرض کس طرحاں دا اے ؟ اوہنے آکھیا پئی اوہ یونانیاں تے غیر یونانیاں دونواں دا قرض دار ہیگااے ،تے اوہ پانی تے رُوح دی خوشخبری لئی اوہناں ساریاں دا قرض دار ہیگاسی ۔ اوہنے منیا پئی اوہ دانیاں تے کم عقلاں دونواں دا قرض دار ہیگا سی ۔ ایس لئی ، کیوں جے اوہ دلوں چاؤہنداسی پئی رومہ دے لوکاں نوں بوہت چھیتی خوشخبری پوہنچائے ۔
ایس لئی ،پولُس رسول دا کلیسیا نوں خط لکھن دا ایہہ مقصد  سی پئی اوہ اوہناں تیک اصل خوشخبری  پوہنچائے ۔ اوہنے روم دے لوکاں دے دلاں وچ  ایتھوں تیک پئی رومی کلیسیا دے اندر  پانی تے رُوح دی خوشخبری نوں ایمان دے راہیں پکیاں ہوندیاں نہ ویکھیا ،تے ایس لئی اوہنے خوشخبری نوں روحانی نعمت وانگر  دسیا اے ۔ایس لئی، اوہنے اوہناں نوں  پانی تے رُوح دی خوشخبری دتی ایتھوں تیک پئی جیہڑے پہلوں ای کلیسیا وچ ہیگے سَن ،تے بالکل اِنج ای جگ دے سارے لوکاں نوں وی پوہنچائی ۔ اوہنے آکھیا پئی اوہ دانیاں دا تے کم عقلاں دا ،یونانیاں دا تے سارے غیر یونانیاں دا قرضدار ہیگاسی ۔
پولُس  کویں دا قرضدار ہیگا سی ؟ اوہ سارے جگ دے لوکاں تیک  پانی تے رُوح دی خوشخبری پوہنچاؤن دا قرضدار ہیگا سی ۔ا وہ سارے جگ دے لوکاں نوں ایہنوں قرض وانگر  اوہنوں پوہنچاؤن لئی ضدکرداسی ۔ ایسے طرحاں اوہ لوک جنہاں کول پانی تے رُوح دی خوشخبری ہیگی اے  ایس خوشخبری دی چھپائی دے قرض دار ہیگے نیں ۔ تے جیہڑا قرض اوہناں نے لاؤہنا اے اوہ خوشخبری ودھاؤن دا کم ہیگااے ۔ایہو ای سبب ہیگا اے پئی ،کیوں  سانوں ایس ویلے سارے جگ وچ پانی تے رُوح دی خوشخبری دی منادی کرنی اے ۔ 
لوک پُٹھی گل سوچدے نیں پئی سولی اُتے صرف یسوع دا لہو ہی کامل مکتی ہیگااے ۔ پر، اَسمانی خوش خبری جیہدی بائبل مقدس گواہی دیندی اے پانی تے رُوح دی خوشخبری ہیگی اے جیہدی پولُس نے وی گواہی دتی اے ۔ایس لئی، رومیوں ۶ باب وچ، پولُس نے آکھیا پئی اوہنے جیہڑا یسوع مسیح وچ بپتسمہ لیا تاں اوہدی موت وچ اکٹھیاں ہون دا بپتسمہ لیا سی ۔ کیوں جے رومہ دی کلیسیا وچ صرف ناں دے مسیحی ہیگے سَن جیہڑے یسوع دے صلیبی لہو اُتے ایمان رکھدے سَن ،پولُس اوہناں نوں اوس بپتسمے دا جیہڑا یسوع نے لیا سی ، بھیت دسنا چاؤہنداسی ۔ بالکل ایسے طرحاں سانوں پانی تے رُوح دی خوشخبری نوں اوہناں تیک پوہنچاؤنا چاہی دااے جنہاں نیں ایہہ نئیں سُنی ، بھاویں اوہ لمے چِر توں کلیسیا دے بندے ای کیوں نہ ہون ۔
جدوں مسیحیاں کولوں پُچھیا جاندااے پئی کیہ اوہ پاپی ہیگے نیں یاں نئیں ،تاں اوہ آپ ایہہ سوال سُن کے سوچ وچ پَے جاندے نیں تے جدوں اوہناں نوں کوئی جواب نئیں آؤندا تاں فیر اپنے آپ نوں قصوروار دسدے نیں ۔ پر، اصل وچ ایہہ سوال بوہت وڈا تے بوہت خاص ہیگا اے ۔ جے بندہ اپنے پاپاں دے سبب دوزخ وچ جان دا نصیب رکھدااے ،تاں ایتھے کیہڑا ہیگااے جیہڑا اوہناں کولوں ایس طرحاں دا سوال پُچھ کے اوہناں نوں مکتی دے سکدا اے ؟ صرف اوہو ای بندہ اے جیہڑا پانی تے رُوح دے راہیں نویں سریوں جمیا اے ،اپنے دل وچ کوئی پاپ نئیں رکھدا ، اوہو ای ایس طرحاں دا سوال پُچھ سکدا تے لوکاں نوں صحیح جواب وی دے سکدااے ۔صرف نویں سریوں جمن والے پاک لوک ای پاپیاں نوں پانی تے پاک رُوح دی پکی خوشخبری دے راہیں جیہڑی پاپیاں نیں پہلوں کدی نئیں سُنی ،ایہہ خوشخبر ی سنا کے اوہناں نوں نویں سریوں پیدا کر سکدے نیں ۔
سُنو بھراوو، جے کوئی یسوع اُتے ایمان رکھدا اے،پر حالے تیک پانی تے پاک رُوح نال نویں سریوں نئیں جمیا ، تاں فیر اوہ نہ تاں خُدا دی بادشاہی ویکھ سکدا ،نہ ایہدے وچ جاسکدااے ۔ ایس لئی ،جدوں تسیں ایہو جیہے لوکاں نوں ملدے او جیہڑے پاپیاں نوں پانی تے رُوح دی خوشخبری دے راہیں پاپاں توں مکتی پاؤن بارے سکھاؤندے نیں ،تاں خُداوند دا شکر ادا کرو۔ فیر تسیں اک وڈی نعمت پاووگے ۔
 
 
پولُس ایس خوشخبری توں شرماؤندا نئیں سی
 
۱۶ آیت وچ ،اوہ کیہڑی خوشخبری ہیگی سی ،جیہدے توں پولُس نئیں شرماؤنداسی؟ ایہہ پانی تے رُوح دی خوشخبری سی ۔کیوں جے ہر اک ایمان لیاؤن والے لئی ایہہ خوشخبری خُدا دی قدرت ہیگی اے ۔ ایس سبب توں اوہ پانی تے رُوح دی خوشخبری توں شرماؤندا نئیں سی کیوں جے ایہہ خوشخبری لوکاں نوں کامل طور اُتے پاپاں توں پاک کردی تے پاپاں دی اوس عدالت نوں مکا دیندی اے ، جیہڑی سارے لوکاں نوں خُدا توں وکھ کر دیندی اے ۔
جے لوک صرف صلیبی لہو د ی خوشخبری  اُتے  ایمان  رکھن  تاں کیہ  اوہناں  دے  پاپ  دُھل
سکدے نیں ؟ اِنج ہوسکدا اے پئی ہُن تیک جیہڑے پاپ اوہناں نیں کیتے نیں ، ایس طرحاں دے ایمان نال دُھل جان ، پر آؤن والے ویلے دے پاپاں دا دُھلنا اوکھااے ۔ ایس لئی ، ایہو جیہاایمان رکھن والے لوک ہر روز توبہ دیاں دعاواں کرکے ، اپنے پاپاں نوں مکاؤن لئی ہتھ پیر ماردے نیں ۔ اوہ من دے نیں پئی اوہناں دے دل صرف پاپ نال بھرے ہوئے نیں تے اوہ پکے پاپی ہیگے نیں ۔ ایہہ پاپی مسیحی جیہڑے پاپاں نال بھرے ہوئے نیں ،دوجیاں نوں خالص خوشخبری نئیں دے سکدے ،کیوں جے جیہڑی خوشخبری اوہناں کول ہیگی اے ، اوہدے وچ اوہناں لئی ہور کوئی   ’ چنگی خبر نئیں ہیگی اے ۔ ‘
خوشخبری لئی یونانی اَکھر  ’ ایواجیلین  ‘ (euaggelion) ورتیا گیا اے ، دوجے اَکھراں وچ ،خوشخبری اوہ ہیگی اے جیہدے وچ ایس جگ  دے سارے پاپاں نوں  مکاؤن دی طاقت ہوندی اے ۔ صرف اصل خوشخبری ای بارود وانگر ہیگی اے ۔ ایہو ای سچی خوشخبری ہیگی اے جیہڑی ایس جگ دے سارے پاپاں نوں مکا دیندی اے ۔ ایس لئی، پولُس وانگر اک بندہ جیہڑا پانی تے رُوح دی خوشخبری اُتے ایمان رکھدا اے جیہڑی پاپاں نوں مکاؤن دی طاقت رکھدی اے ، اوہ اوہدے کولوں شرماؤندا نئیں ۔اج کل، دے مسیحی ایتھوں تیک پئی خوشخبری دی منادی کرن توں شرمندیاں ہوندے دِسدے نیں ۔ فیر وی ،جنہاں وچ خُدا دی راستبازی ہیگی اے ،جدوں اوہ خوشخبری دی منادی کردے نیں ،تاں اوہ ایہو جیہے لوک ہیگے نیں جیہڑے بوہتے جلال تے ٹہکے نال منادی کردے نیں۔
 پولُس رسول جدوں خوشخبری دی منادی کرداسی تاں بھورا جناں نئیں شرماؤندا سی ۔ایس لئی کیوں جے جیہڑی خوشخبری دی منادی اوہ کرداسی ،اوہ پانی تے رُوح دی خوشخبری سی ۔ ایس لئی کیوں جے ایہہ سوہنی خوشخبری ہر ایماندار لئی خُدا دی مکتی دی طاقت سی ۔
ایہہ خوشخبری اک قدرت والی خوشخبری ہیگی اے جیہڑی ہر اک ایمان لیاؤن والے دے پاپاں نوں مکاؤندی اے ،کوئی فرق نئیں پیندا پئی ایہہ اوہدے تیک کویں اپڑی سی ۔جے سُنن والے اپنے دلاں وچ ایس خوشخبری نوں لیندے نیں ،تاں ایس جگ دے پاپ سارے دے سارے دُھل جان گے ۔ فیر وی ، صلیبی لہو دی خوشخبری ای لوکاں نوں کامل مکتی نئیں دے سکدی ، ایس لئی اِنج آکھنا مندانئیں ہووےگا  پئی ایہہ صرف لوکاں نوں دسدی اے پئی اوہناں دے صرف وڈے وڈے پاپ ای معاف ہوئے سَن تے اوہناں دیاں باقی بدکاریاں ،اوہناں دیاں روزانہ دیاں توبہ دیاں دعاواں دے راہیں دُھلدیاں نیں ۔ ایہہ سُنن والے نوں پاپ دا مزہ چکھن دے بعدوں چھڈاؤن گئیاں ۔
کیہ یسوع نے بوہتے پاپاں وچوں  صرف تھوڑے  جیہے  ای  پاپ  مکائے سَن کیوں جے  اوہدے
کول بوہتی طاقت نئیں ہیگی سی ؟ یسوع انسانی پیڑھی نوں چنگی طرحاں جان دا سی ،ایس لئی اوہنے کسے طرحاں دا وی پاپ پِچھے نئیں چھڈیاسی ۔اوہنے  پانی،لہو تے پاک رُوح دے راہیں سارے پاپ چُک لَےسَن ۔ میَں ایمان رکھداہاں پئی ایہہ سوہنی خوشخبری، ہر کسے نوں جیہڑا اینوں سُن دا تے یسوع دے بپتسمے تے صلیبی لہو دی خوشخبری اُتے ایمان رکھدااے، کامل مکتی دیندی اے ۔
ایس لئی ، خوشخبری ہر اک لئی جیہدے وچ یہودیاں تے یونانیاں نوں رلایا گیا اے ،اکو جیہی طاقت رکھدی اے ۔ جدوں اوہناں وچ خوشخبری دی منادی  کیتی جاندی اے تاں پانی تے رُوح دی خوشخبری اُتے ہر اک ایمان لیاؤن والے نوں کامل مکتی پاؤن دی اجازت مل جاندی اے ۔ ایس توں ہٹ کے ، جے کِسے نوں پانی تے رُوح دی خوشخبری توں ہٹ کے کُجھ ہور پوہنچایا جاوے تاں وہ خُدا دے غصے دے پیالے نوں پیوےگا ۔ سو پولُس آکھدااے ، ”  پر جے اسیں یاں اَسمان دا کوئی فرشتہ وی ایس خوشخبری توں ہٹ کے جیہڑی اسیں تہانوں سنائی کوئی ہور خوشخبری تہانوں سناوے تاں اوہ لعنتی ہووے۔  “ (گلتیوں ۱:۸)۔ پولُس رسول نے کھول کے گل کیتی پئی ایتھے دوجیاں ساریاں خوشخبریاں وچو ں صرف پانی تے رُوح دی خوشخبری اصلی ہیگی اے ۔
ایس توں ہٹ کے پئی بھاویں اوہ یہودی نیں یاں اوپری قوم ، یاں بھاویں کوئی اسلام ،کنفیوشس اِزم ،بُدمت ،تاؤازم ،سورج دیوتا یاں کسے اُتے وی ایمان رکھداہووے ، ہر اک بندے کول ایس سوہنی خوشخبری نوں سُنن دا ویلا ہیگااے ۔ اگانہہ ہور ، پانی تے رُوح دی ایہہ خوشخبری اوہناں نوں اوہناں دے پاپاں توں مکتی پاؤن دا ویلا دیندی اے ۔ سو سانوں دوجیاں نوں ایہہ خوشخبری پوہنچاؤنی چاہی دی اے پئی یسوع مسیح خُدا ہیگااے ،پئی اوہنے سارے جگ نوں بنایا ،اوہ ایس جگ وچ انسانی بدن لے کے ،بندے دے شکل وچ سانوں مکتی دین لئی آیا ، اوہنے یوحنا کولوں بپتسمہ لےَ کے ساڈے سارے پاپ اپنے اُتے چُک لَے تے اوہنے ساڈی خاطر سولی اُتے جان دے کے ،ساڈی سزا نوں جریا ۔
ایس لئی، پولُس رسول پانی تے رُوح دی خوشخبری کولوں شرماؤندانئیں سی ۔ بھاویں صرف سولی دی خوشخبری کولوں شرم آسکدی اے ،پر پانی تے رُوح دی خوشخبری توں کدی وی شرم نئیں آسکدی ۔ سگوں ایہہ اک پکی تے تگڑی خوشخبری ہیگی اے جیہڑی وڈے رُتبے والی تے مان نال بھری ہوئی اے ۔ہر کوئی جیہڑا ایس خوشخبری اُتے ایمان رکھدااے ،ایمان دے راہیں ایس سچ وچ خُدا دے دھیئاں پُتر بن جاندا تے پاک رُوح دی بھرپوری پاؤندااے ۔ اک وار ی فیر میَں تہانوں آکھدا ہاں پئی پانی تے رُوح دی خوشخبری کدی وی شرمندیاں کرن والی خوشخبری نئیں ہو سکدی ۔  فیر  وی ،  صرف صلیبی  لہو  اُتے ایمان
لیاؤن والی خوشخبری شرمندیاں کر سکدی اے ۔
مسیحیو ،کیہ  تسیں جدوں کدی وی  صلیبی لہو دی منادی کیتی شرمندیاں ہوئے سی؟جدوں صرف تسیں لہو دی خوشخبری اُتے ایمان رکھو گے تے اوہدی منادی کروگے ،جیہدے وچ یسوع دا بپتسمہ نئیں ہیگااے ، تاں تہانوں شرم آوے گی ۔ تسیں ایس طرحاں دی بے فائدہ خوشخبری دی منادی کرن توں ایس لئی شرماؤندے سو ،کیوں جے تسیں ہمیشہ خُداوند لئی پکار دے ہوندے سو ،یاں اوپریاں بولیاں وچ جوش بھریاں دعاواں نال اپنے خیالاں نال بھرن توں پہلاں گلیاں وچ اِنج پکاردے سو پئی ،  ”  یسوع اُتے ایمان لیاوو  ۔ یسوع اُتے ایمان لیاوو! “
ایہہ سب کُجھ کوئی صرف اپنے دلی خیالاں نال بھر کے کرسکدااے ۔پرکوئی وی اپنی سیانی عقل نال اِنج کرن دے لائق کدی وی نئیں ہوسکے گا ۔ ایہو ای سبب ہیگا اے پئی جیہڑے صرف یسوع دے صلیبی لہو اُتے ایمان رکھدے نیں ، جدوں کدی وی اوہ گلیاں وچ منادی کرن لئی پکاردے نیں ، تاں اوہ لڑائی جھگڑے دیاں رکاوٹاں دا سبب بن دے نیں ۔ اوہ مائیک نوں اپنے مونہہ کول لیا کے رولا پاؤندے نیں،   ”یسوع ، اَسمان اُتے ہیگااے ،دوزخ ،اُتے یقین نہ رکھو۔“ فیر وی ، پانی تے رُوح دی خوشخبری اُتے ایمان رکھن والا ایمان دار خوشخبری دی منادی بوہت چنگے طریقے نال کردااے : اوہ اپنی بائبل نوں کھولدااے ،اوہ دوجیاں نال بہہ کے چاء پیندا تے دوجیاں نال گل بات کردااے۔  
 
 
خُدا دی راستبازی دی خوشخبری دے بارے کیہ آکھیا گیا اے ؟
 
 آیت ۱۷ وچ،مسیح دی خوشخبری وکھاؤن لئی کیہ آکھیا گیا اے ؟ ایہہ آکھیا گیا اے پئی ،  ” خُدا دی راستبازی  “ خُدا دی خوشخبری وچ نظر آئی اے ۔ خُدا دی  کامل راستبازی اصل خوشخبری وچ نظر آئی اے ۔ ایس لئی ، ایہہ دسیا گیا اے پئی خُدا دی راستبازی ایمان لیاؤن والیاں لئی ایمان نال نظر آئی اے ،تاں پئی راستباز ایمان نال جیوندارہوے ۔صرف صلیبی لہو والی خوشخبری خُدا دی راستبازی توں سکھنی ایں ۔
سُنو بھراوو،جے ایہہ آکھیا گیا اے پئی ہر بندہ ہرروز توبہ دیاں دعاواں نوں اپنے ہر دیہاڑے دے پاپاں لئی کرے ، بھاویں اوہدے سارے پاپ شروع توں ای معاف ہو گئے نیں تے اک کامل راستباز بندہ بنن لئی لازمی ہیگااے پئی اوہ ہولی ہولی پاک کیتا جاوے ، تاں فیر کیہ ایس طرحاں دے ایمان وچ خُدا دی راستبازی ہیگی اے ؟ خُدا دی راستبازی نظر آؤن وچ ایہدا کوئی حصہ نئیں ہیگااے ۔ جو کُجھ خُدا دی راستبازی وچ وکھالی دیندااے ،وہ کامل شیواں دے بارے گل کردااے ۔ پانی تے رُوح دی خوشخبری شروع توں لَے کے اخیر تیک کامل خوشخبری بارے گل کردی اے ۔
کیوں جے تسیں سارے ہر روز توبہ دیاں دعاواں کردے تے ہر روز پاپ کردے او ، ایس لئی تسیں ایہو جیہے او ، جیہڑے اپنے آپ نوں ہر روز یاں ہر ہفتے یاں ہو سکدا اے پئی ہر مہینے انجیر دے پتیاں نال اپنے ننگ نوں ڈھکدے پئے او ۔ ہر بندہ جیہڑا روزانہ گھڑی مُڑی توبہ دے بولاں نوں دُہراؤندااے ،اوس بندے وانگر ہیگااے جیہڑا انجیردے رُکھ دے پتیاں نال اپنے بدن دے ننگ نوں ڈھکدااے ۔ایہہ اوہناں لوکاں دی دینی حالت ہیگی اے جیہڑے صرف لہو دی خوشخبری اُتے ایمان رکھدے نیں۔ اوہ اینے عقلوں انھے نیں جیہڑے خُدادے دتے ہوئے چمڑے دے اوہناں لیڑیاں نوں پاؤنا ای نئیں چاؤہندے ،جیہڑے اوہنے اوہناں نوں بے مُلے دتے سَن سگوں ایہدی تھاں اُتے اوہ انجیر دے پتیاں نال اپنے ننگ نوں کج دے ہوئیاں مزے لیندے نیں ۔
یسوع دا صلیبی لہو بپتسمے دا پھل ہیگاسی ، تے ایہہ صرف سولی اُتے لہو روڑھنا ای نئیں سی ،جیہدے راہیں یسوع ساڈے پاپاں نوں اپنے اُتے چُکن دے لائق ہویا سی ۔ جدوں اوہنے بپتسمہ  لیا سی ،اوہنے اوس ویلے اِکو ای وار ساڈے سارے پاپاں نوں چُک لیا ،فیر اوہ سارے پاپاں نوں چُک کے سولی ول ٹُر پیا تے جگ دے پاپاں دا  فدیہ دین لئی ،اپنی جان دے دتی ۔ جدوں یسوع نےبپتسمہ  دے راہیں ساڈے سارے پاپاں نوں چُک لیا ،تاں سولی اُتے لہو روڑھنا ساڈے فدیے دا اخیری کم ہیگاسی ۔ یسوع نے پاپ دی ساریاں لعنتاں نوں اپنے اُتے لَے لیا کیوں جے اوہنے بپتسمہ لیا سی ۔
فیر کویں اسیں خُدا دی راستبازی پا سکدے آں ؟ اسیں اینوں پانی تے رُوح دی خوشخبری اُتے ایمان لیا کے تے اینوں جانن دے راہیں پا سکدے آں ۔ تسیں مینوں پُچھو گے ، ”  کیہ فیر تسیں پانی تے رُوح دی خوشخبری اُتے ایمان رکھدے او ؟  “  فیر میَں کھُل کھلا کے تے بوہت چھیتی ایس سوال دا جواب دے سکدا ہاں ،  ’آہو۔ ‘  خُدا دی راستبازی نوں پاؤن دا بھیت  ایہہ ہیگا اے پئی تسیں پانی تے رُوح دی خوشخبری اُتے ایمان رکھو۔
ایہدا سبب ایہہ ہیگا  پئی کیوں جے پانی تے رُوح دی خوشخبری خُدا دی سچیائی ہیگی اے تے ایہہ خُدا دی محبت تے اوہدی راستبازی وکھاؤندی اے ۔ ایہہ ایس لئی وی ہیگی اے پئی پانی تے رُوح دی خوشخبری پاپاں توں معافی وی دیندی اے ،جیہڑی خُدا نے انسانی پیڑھی نوں بے مُلی دتی سی ، تاں پئی اوہ ایس راہیں اوہدے پُتر بن جان ، تے ایس راستبازی دے راہیں ہر کوئی ہمیش دی حیاتی دیاں نعمتاں تے پاک رُوح پا سکدا اے تے دھرتی اُتے وی بدنی تے رُوحانی برکتاں پا سکدا اے ۔
 پولُس رسول نے آکھیا پئی خُدا دی راستبازی کامل طور اُتے پانی تے رُوح دی خوشخبری وچ نظر آئی تے اوہ ایسے خوشخبری دی منادی کردا سی ۔ ایس لئی ، خُدا دی راستبازی نوں جانیوں اَڈ انسانی راستبازی نوں قائم کرنا ،خُدا دے اَگے پاپ کرن دے برابر ہیگا اے ۔ اگانہہ ہور ، اوہ خوشخبری جیہڑی صرف صلیبی لہو والی تے خُدا دی راستبازی والی نئیں ہیگی ، اوہ جھوٹی ہیگی اے ۔
خُدا دی راستبازی جیہڑی اوہنے سانوں دتی اے پانی تے رُوح دی پکی  خوشخبری ول اشارہ کردی اے ۔ نواں تے پُرانا عہدنامہ دونویں رَل کے سانوں ساڈے پاپاں توں بچاؤندے نیں ۔پُرانا عہد نامہ نویں عہد نامے لئی بنایا گیا تے نواں عہد نامہ ،پُرانے عہد نامے وچ کیتے گئے وعدیاں نوں پوریاں کردااے ۔ خُدا نے سانوں اصل خوشخبری دے راہیں ، جیہدے وچ اوہدی راستبازی دِسدی اے ،جگ دے پاپاں توں مکتی دتی اے ۔ ایسے طرحاں اوہنے انسان نوں اوہدے پاپاں توں مکتی دتی اے ۔
ایسے ویلے ،سارے جگ نوں پانی تے رُوح دی خوشخبری ول پرت آؤنا چاہی دااے ، اوہ اِکو خوشخبری جیہڑے لوکاں نوں اوہناں دے پاپاں توں مکتی دیندی اے ،اوہ پانی تے رُوح دی اصل خوشخبری ہیگی اے ۔بھراوو، لازمی ہیگا اے پئی سارا جگ  پانی تے رُوح دی خوشخبری ول پرت آوے ۔ اوہناں نوں پانی تے رُوح دی خوشخبری ول ،جیہدے وچ خُدا دی راستبازی ہیگی اے ۔ آؤنا ای پوے گا ۔
ایہدا سبب ایہہ ہیگا اے پئی پانی تے رُوح دی خوشخبری ای صرف اوہ سچیائی ہیگی اے ،جیہڑی سانوں پاپاں توں چھڈا سکدی اے ۔ صرف خُدا دی راستبازی نال بنھی ہوئی خوشخبری ای ساڈی مکتی دا سبب بن سکدی اے ،سانوں پاپ توں اَڈ اوہدے بچیاں وچ  بدل سکدی اے ۔ ہور، ساڈے دلاں وچ پاک رُوح ، خُدا دے لوکاں دی راکھی کردا تے ایہہ پاک رُوح ساڈے لئی دعا کردا ، سانوں برکت دیندا ،سدا ساڈے نال رہندا تے سانوں ہمیش دیاں حیاتیاں دا انعام دیندااے ۔
ایہہ ویکھ کے میَں دلوں پریشان ہوندا ہاں پئی ایتھے بوہتے لوک ہیگے نیں جیہڑے ایس خوشخبری اُتے بھورا دھیان نئیں دیندے ۔ میَں تہاڈےساریاں  اُتے آس رکھدا ہاں پئی تسیں یسوع دے بپتسمے نوں چنگی طرحاں سمجھ کے پانی تے رُوح دی خوشخبری اُتے ایمان رکھو گے ۔ یسوع نے یوحنا کولوں بپتسمہ ایس لئی نئیں لیا سی کیوں جے اوہ اپنے آپ نوں نِکا سمجھداسی ۔ اوہدا بپتسمہ لین دا سبب جگ دے سارے پاپاں دا بھار سہنا سی ۔یوحنا ،جیہڑا زنانیاں وچوں جمن والیاں وچوں ساریاں توں وڈا ہیگااے ،جدوں اوہنے یسوع نوں  بپتسمہ دتا ، تاں اوہنے اپنے ہتھ یسوع اُتے رکھے ۔ ایہہ رسم پُرانے عہد نامے وچ وڈے کاہن لئی بے پاپ چڑھاوے دے پسُو اُتے ہتھ رکھن وانگر ہیگی اے (احبار۱۶:۲۱)۔یسوع دی صلیبی موت ،اوہدا اپنے بدن اُتے پاپاں نوں چُک لین دا پھل ہیگا سی ، تے ایہہ پاپ لئی لہو وگاؤن والے اوس چڑھاوے وانگر اے ،جیہدے وچ ہتھ رکھن دے بعد قربان ہوکے لہو وگاؤنا ، رسم سی ۔
کیوں جے پانی تےپاک  رُوح دی ایہہ خوشخبری نویں تے پُرانے عہدنامے دونواں وچ ملدی اے ،جیہڑا کوئی ایس اصل  خوشخبری دے کسے حصے نوں چھڈ کے دوجی خوشخبری اُتے یقین رکھدا اے ،اوہدا ایمان اک پُٹھا ایمان ہیگااے ۔ ایس جگ وچ آؤن دے بعد سب توں پہلاں تے سب توں خاص کم جیہڑا یسو ع نے کیتا ، اوہ یوحنا کولوں بپتسمہ  لینا سی ۔ تہاڈے لئی ایہہ ایمان لیاؤنا بوہت غلط ہیگا اے پئی اوہدا بپتسمہ صرف اک نشان ہیگااے تے ایہہ سوچنا پئی یسوع دا بپتسمہ لینا اوہدی راستبازی توں باہر ہیگااے۔
کویں دا بندہ اک چنگی راہوں بھٹکیا ہوندااے ؟طِطُس ۳:۱۰ ، وچ اِنج لکھیا اے ،  ”  اک دو واری نصیحت کرکے چنگی راہوں بھٹکے راہی توں اک پاسے رہ ، ایہہ جان کے پئی ایہہ بندہ راہوں بھٹک گیا اے تے اپنے آپ نوں قصوروار بنا کے پاپ کردا رہندااے ۔“ اک راہوں بھٹکیا بندہ اک ایہو جیہا بندہ ہیگااے جیہڑا اپنے آپ نوں قصور وار بناؤندااے  ۔اک راہوں بھٹکے ہوئے بندے دا ایہہ مطلب ہیگااے ، جیہڑے اپنے پاپاں نوں منن تے اوہناں دا اقرار کرن توں اڑیا رہندا اے پئی اوہدے وچ پاپ ہیگا اے ۔ ایس لئی ،اک مسیحی جیہڑا آکھدا اے پئی ،  ” میَں اک پاپی آں “ اک راہوں بھٹکیا بندہ ہیگااے ، مطلب اے اک چنگی راہوں بھٹکیا بندہ ۔پاک کلام وچ لکھیا ہویا اے پئی ،  ” اک یاں دو واری نصیحت کرکے چنگی راہوں بھٹکے راہی توں اک پاسے رہ ۔“ 
اک پاک تے راستباز بندے نوں ایہو جیہے چنگی راہوں بھٹکے بندے کول نئیں جانا چاہی دا ،کیوں جے ایس طرحاں دا مسیحی پُٹھی راہوں بھٹکیا تے قصوروار ہیگااے ۔ اوہ اوہناں وچوں اک ہیگااے جیہڑااپنے آپ نوں قصوروار بناؤندااے ،کیوں جے ایہو جیہاں دا ایمان تے دینی جندڑی جڑوں اُکھاڑکے سُٹی گئی اے ۔اک بندہ پانی تے رُوح دی خوشخبری نوں منن دے راہیں خُدا دے نیڑے اپنے آپ نوں پاک کرنا نئیں چاؤہندا ،ایہو جیہا بندہ اے جیہڑا معاف نہ ہون والا پاپ کردا پیا اے ،سگوں ایہدی تھاں اُتے خُدا دے نیڑے اوہدی کامل مکتی نوں ایہہ آکھ کے پئی اوہ  اک پاپی اے ، رد کرداپیا اے ۔ اک بندہ جیہڑا اپنےآپ نوں قصوروار بناؤندااے ، ایہہ سوچدااے پئی اوہ مسیح وچ ایماندار ہیگااے تاں اوہدے وچ پاپ ہوندااے ، ایسے لئی اوہ اپنے آپ نوں پاپی آکھدااے ،تے خُدا دی راہوں بھٹکیا اے جیہڑا دوزخ ول  ودھداجاندااے ۔
کئی مسیحی اپنیاں کاراں پِچھے اشتہار لاؤندے نیں ،جنہاں اُتے لکھیا ہوندااےپئی ،  ’ایہہ میرا اپنا قصور ہیگااے۔‘ جدوں ایک انسانی دل نال سوچیا جاوے تاں ایہہ کُجھ رحم تے بوہتی ہمدردی والا جملہ لگدااے ، پر اصل وچ ایہدا مطلب ہیگااے پئی ایہہ کسےدا اپنا قصور ہیگااے پئی اوہ ایناں معاملیاں وچ ،جویں پئی دوزخ وچ جانا ، اک خُدائی راہوں بھٹکیا بندہ بننا تے لعنتی بننا ایہہ ساری دی ساری کسے دی اپنی غلطی ہیگی اے ۔’ایہہ میرا اپنا قصور ہیگااے۔‘  اک سمجھو باہر گل ہیگی اے پئی جیہڑی کہندی اے پئی کوئی بندہ اپنے آپ وچ پاک بنن دی جندڑی بسرکرن لگا اے ۔ فیروی ، ایہہ سوچدیاں ہویاں نعرہ لاؤنا پئی اوہ نیکی دے کماں دے راہیں پاک جندڑی  بسرکرن جان لگااے ،ایہہ بالکل سدھا خُدا دے اوس کلام دی برابری کرن وانگر ہیگااے ،جیہڑا انسانی پیڑھی نوں پاپ دی پیڑھی آکھ کے سددااے ۔ اوہ جیہڑے ایہو جیہاں انسانی گلاں سوچدے نیں ،لازمی طور اُتے ہر طرحاں دی لعنت پاؤن گے ۔
کیہ فیر اپنے آپ نوں قصور وار بناؤن والے لوکاں لئی کوئی ویلا ہیگااے ؟ تاں فیر تہانوں میرے رومیوں ۳ باب دے پیغام نوں اک واری فیر بڑے دھیان نال سُننا چاہی دااے ،جیہدے وچ دسیا گیا اے پئی پاپاں دی مکتی دینی پاکیزگی دی تعلیم راہیں نئیں ملدی اے ۔ رومیوں دا خط ایہدے بارے وچ بوہت کھُل کھلا کے گل کردااے ۔پولُس رسول نوں پہلاں ای پتہ سی پئی لوک اک نہ اک دن کیہ آکھن گے تےایس لئی اوہنے پہلاں ای ایہہ سب کُجھ آکھ دتا سی پئی پاک بننا سچ مُچ پاپ توں اَڈ ہوئیاں ای ہو سکدااے تے ایہہ اک پاپی دا صرف اپنے آپ نوں راستباز سدنا نئیں ہیگا اے  ۔اوہنے ایہہ وی کھُل کھلا کے گواہی دتی پئی پانی تے رُوح دی خوشخبری ای اِکو سچ ہیگا اے ۔ ایس لئی ، ایہہ قدرتی گل ہیگی اے پئی اوہ جیہڑےصرف صلیبی لہو اُتے ایمان رکھدے نیں ،جھوٹے ہون گے تے رومیوں دا خط پڑھ کے اوہناں دیاں جیبھاں بند ہوجان گئیاں ۔
پولُس رسول دا رومیوں دے ناں خط ،سچ مُچ اک وڈی خُدائی کتاب ہیگی اے ،کیوں جے ایہہ پانی تے رُوح دی خوشخبری دی گواہی  دیندااے ۔ بھاویں کوئی ایمان لیاؤن توں پہلاں کِناں ای پاپی کیوں نہ ہووے ، تاں وی یسوع اُتے سچے دلوں ایمان لیاؤن دے بعد اوہ راستباز بن سکدا اے ۔ اصل وچ راستبازبندہ اوہو ای اے ،جیہدے دل وچ پاپ نئیں ہیگا ۔ ایہو سچاایمان ہیگااے جیہدے نال ہر کوئی اپنے آپ نوں شنگار سکدااے ۔
میَں آس رکھدا ہاں پئی جے ایس ویلے وی ، لوکاں دا ایمان پکا نئیں ہویا ،تاں ،اوہناں دا ایمان اخیریں کامل ہووے گا ،جدوں اوہ نویں سریوں جمن والی کلیسیا دے راہیں پانی تے رُوح دے کلام ول کَن لاؤن گے ۔ مہربانی کرکے ، ایناں پیغاماں دے راہیں پانی تے رُوح دی خوشخبری دے بارے وچ ہور سکھو تے سچیائی دے کلام دی سچ بارے جانو ۔
میرا ایمان ہیگا اے پئی خُدا سانوں اَسمانی نعمتاں دی دولت دیوے گا ۔