[11-8] ពណ៌ទ្វារចូលទីលាន រោងឧបោសថ (និក្ខមនំ ២៧:៩-១៩)

មានភាពខុសគ្នាច្បាស់លាស់ រវាងសេចក្តីជំនឿរបស់អ្នកដែលបានកើតជាថ្មី និងសេចក្តីជំនឿរបស់គ្រីស្ទបរិស័ទតែឈ្មោះ៖ សេចក្តីជំនឿទីមួយដឹង និងជឿថា ព្រះបានដោះអំពើបាបទាំងអស់របស់ខ្លួនចេញហើយ ហើយសេចក្តីជំនឿទីពីរជឿដល់ព្រះយេស៊ូវ ដោយផ្អែកលើគំនិតផ្ទាល់ខ្លួន ដែលគ្រាន់តែជាការអនុវត្តបែបសាសនាប៉ុណ្ណោះ។ ប៉ុន្តែអ្នកដែលជឿព្រះតាមបែបសាសនា កំពុងតែចម្រុងចម្រើនយ៉ាងខ្លាំង ខណៈដែលអ្នកដែលកំពុងតែអធិប្បាយសេចក្តីពិតអន់ចិត្ត ដែលមើលឃើញអ្នកដែលមាន សេចក្តីជំនឿខុស កំពុងតែប្រកាសសេចក្តីបង្រៀនខុសឆ្គងរបស់ពួកគេ ហើយកំពុងតែចម្រុងចម្រើន។ ពួកគេអន់ចិត្ត ពីព្រោះពួកគេដឹងយ៉ាងច្បាស់ថា គ្រីស្ទបរិស័ទយ៉ាងច្រើនបានធ្លាក់ចូលទៅក្នុងសាសនានៃការបោកបញ្ឆោត និងការកេងបន្លំនេះ។ 
ខ្ញុំក៏មានការអន់ចិត្តចំពោះការនេះ មួយរយៈពេលដែរ។ ដោយសារខ្ញុំពិតជាបានកើតជាថ្មី ដោយការជួបនឹងសេចក្តីពិត ហើយពិតជាអរព្រះគុណដល់ព្រះ សម្រាប់ការប្រើខ្ញុំជាឧបករណ៍មួយសម្រាប់ព្រះរាជកិច្ចរបស់ទ្រង់ ហើយដោយសារចិត្តរបស់ខ្ញុំមានភាពឆេះឆួលសម្រាប់ការប្រកាសសេចក្តីពិតនៃព្រះទៅកាន់ពិភពលោកទាំងមូល នៅពេលខ្ញុំបានមើលឃើញមនុស្សយ៉ាងច្រើន ដែលកំពុងតែរស់នៅក្នុងជីវិតបែបសាសនា ត្រូវបានបោកបញ្ឆោត ដោយសេចក្តីកុហក ខ្ញុំពិតជាមានសេចក្តីពិបាកចិត្តខ្លាំងណាស់។ 
ទោះបីជាយ៉ាងណា អ្វីដែលច្បាស់លាស់គឺធា ព្រះវិញ្ញាណបរិសុទ្ធគង់នៅចិត្តរបស់ខ្ញុំ ហើយថា ទោះបីជាខ្ញុំមានភាពខ្សោយក៏ដោយ ក៏ចិត្ត របស់ខ្ញុំឥតមានបាបដែរ។ ដូច្នេះ នៅក្នុងចិត្តរបស់ខ្ញុំមានការអរព្រះគុណ ហើយខ្ញុំគ្មានសេចក្តីខ្មាស់ចំពោះដំណឹងល្អដែលខ្ញុំតាមឡើយ។ នៅពេលខ្ញុំប្រកាសដំណឹងល្អនេះទៅកាន់មនុស្សនៅទូទាំងពិភពលោក បើសិនពួកគេស្តាប់តាមព្រះបន្ទូលនៃសេចក្តីពិតនេះ ហើយជឿតាម ពួកគេក៏អាចគ្មានសេចក្តីខ្មាស់ទាំងនៅចំពោះទាំងព្រះ និងទាំងនៅចំពោះមនុស្សផងដែរ ពួកគេនៅពេលពួកគេជឿតាមសេចក្តីពិតនេះ ពួកគេទាំងអស់គ្នាបានធ្វើជាកូនរបស់ព្រះ។ 
ដោយសារសេចក្តីជំនឿ អ្នកក៏ពិតជាអាចទទួលបានព្រះពរដូចគ្នាផងដែរ។ ទោះបីជាអ្នកមិនបានសិក្សាទេវសាស្ត្រក៏ដោយ បើសិអ្នកគ្រាន់តែជឿតាមសេចក្តីពិតនៃដំណឹងល្អអំពីទឹក និងព្រះវិញ្ញាណនេះ ក៏អ្នកនឹងទទួលបានការអត់ទោសអំពើបាប បានធ្វើជាកូនរបស់ព្រះ ហើយទទួលបានព្រះវិញ្ញាណបរិសុទ្ធនៅក្នុងចិត្តរបស់អ្នកផងដែរ។ ហើយតាមរយៈព្រះវិញ្ញាណបរិសុទ្ធ អ្នកក៏អាចដើរជាមួយពួកអ្នកបម្រើរបស់ព្រះបានផងដែរ។ ដូច្នេះ នេះគឺជាសេចក្តីពិតដ៏ច្បាសលាស់ ហើយការជឿតាមសេចក្តីពិតនេះគឺជាសេចក្តីជំនឿត្រឹមត្រូវហើយ។ 
ទោះបីជាខ្ញុំកំពុងតែរស់នៅក្នុងលោកិយមួយ ដែលពោរពេញទៅដោយសេចក្តីកុហកក៏ដោយ ដោយសារនៅក្នុងចិត្តរបស់ខ្ញុំ មានសេចក្តីជំនឿត្រឹមត្រូវ ក៏ខ្ញុំអាចបន្តការប្រកាសដំណឹងល្អនៃសេចក្តីពិតនេះ រហូតមកដល់វេលានេះដែរ។ ចាប់តាំងពីខ្ញុំបានចាប់ផ្តើមអធិប្បាយព្រះបន្ទូល ក្រោមប្រធានបទ រោងឧបោសថ ខ្ញុំបានដឹងកាន់តែច្បាស់លាស់អំពីគម្រោងការរបស់ពួកកុហក ហើយខ្ញុំបានស្គាល់សេចក្តីពិតចេញពីសេចក្តីមិនពិត។ នេះគឺជាមូលហេតុដែលខ្ញុំបាន និងកំពុងធ្វើបន្ទាល់ពីសេចក្តីពិតនៃរោងឧបោសថនេះ។ ការធ្វើបន្ទាល់ពីសេចក្តីពិតនៃរោងឧបោសថនេះនាំឲ្យខ្ញុំមានអំណរដ៏ធំ ដែលបានជួយឲ្យមនុស្សអាចស្គាល់សេចក្តីពិតចេញពីសេចក្តីមិនពិត។ 
នៅក្នុងការសរសេរសៀវភៅអំពីរោងឧបោសថនេះ កាតព្វកិច្ចដ៏លំបាកបំផុតសម្រាប់ខ្ញុំ គឺការព្យាយាមដោះស្រាយវាក្យស័ព្ទរបស់វា។ ខ្ញុំបានចំណាយការយកចិត្តទុកដាក់យ៉ាងខ្លាំងចំពោះបញ្ហានេះ ដោយពិនិត្យមើលអត្ថន័យដើមទាំងឡាយ ដើម្បីធ្វើឲ្យប្រាកដថា វាក្យស័ព្ទពិបាកៗដែលទាក់ទងនឹងរោងឧបោសថ នឹងមិនធ្វើឲ្យខ្ញុំផ្ទេរព័ត៌មានខុសទៅអ្នកអាន ឬអ្នកអានទទួលបានព័ត៌មានខុសពីខ្ញុំឡើយ។ ក្រៅពីការយល់ដឹង និងចំណេះដឹងរបស់ខ្ញុំផ្ទាល់ អំពីរោងឧបោសថ ខ្ញុំបានបារម្ភអំពីកាតព្វកិច្ចនេះ ដោយមិនប្រាកដថា ខ្ញុំអាចពន្យល់ពីសារៈសំខាន់នៃរោងឧបោសថបានយ៉ាងច្បាស់លាស់ប៉ុណ្ណា ពីព្រោះខ្ញុំត្រូវពន្យល់ពីបែបបទនៃរោងឧបោសថ និងអត្ថន័យខាងវិញ្ញាណដែលត្រូវបានលាក់កំបាំង ទៅកាន់មនុស្សដែលមានចំណេះដឹងដែលមានកម្រិត។ 
វាពិតជាការប្រសើរ បើសិនមនស្សអាចយល់ និងជឿភ្លាមៗ បន្ទាប់ពីពួកគេបានស្តាប់ឮសេចក្តីពិត។ ប៉ុន្តែទីក្រុងរ៉ូមមិនត្រូវបានសាងសង់ឡើងនៅក្នងរយៈពេលតែមួយថ្ងៃទេ។ ដូចគ្នាដែរ ហើយដូចជានៅក្នុងបញ្ហាទាំងអស់ដែរ ការប្រកាសសេចក្តីពិត និងសេចក្តីជំនឿត្រឹមត្រូវមិនអាចសម្រេចបានក្នុងរយៈពេលតែមួយថ្ងៃទេ ប៉ុន្តែបន្តិចម្តងៗ ខណៈដែលយើងជីកកាន់តែជ្រៅៗទៅដល់ស្នូលបន្តិចម្តងៗ។ ដូច្នេះ ខ្ញុំបានបារម្ភចំពោះការជីកយ៉ាងជ្រៅពេកតាំងពីដើមដំបូង ពីព្រោះមិនមែនគ្រប់គ្នា ដែលនឹងអាចយល់សេចក្តីពិតបានទេ ហើយនេះគឺជាឧបសគ្គដ៏ធំបំផុតសម្រាប់ខ្ញុំ ក្នុងការសរសេរសៀវភៅនេះ។ 
ទោះបីជាយ៉ាងណា តាមរយៈជំនួយរបស់ព្រះ ទីបំផុត ខ្ញុំបានសម្រេចបានសៀវភៅនេះ ដោយមិនសូវមានឧបសគ្គច្រើនប៉ុន្មានទេ។ ខ្ញុំពិតជាមានអំណរ និងការអរព្រះគុណ សម្រាប់សៀវភៅនេះ។ តាមរយៈសៀវភៅនេះ ហើយដោយការស្គាល់សេចក្តីពិតចេញពីសេចក្តីកុហក ខ្ញុំនឹងបើកសម្តែងយ៉ាងច្បាស់លាស់ អំពីរបៀបដែលមនុស្សសព្វថ្ងៃនេះដែលជឿតាមដំណឹងល្អអំពីទឹក និងព្រះវិញ្ញាណ បានសង្រ្គោះ ហើយផ្ទុយទៅវិញ អំពីភាពបែបសាសនា និងភាពឥតប្រយោជន៍នៃសេចក្តីជំនឿរបស់អ្នកដែលជឿតាមដំណឹងល្អផ្សេងៗទៀត ក្រៅពីដំណឹងល្អអំពីទឹក និងព្រះវិញ្ញាណនេះ។ ដូច្នេះ ខ្ញុំអរព្រះគុណដល់ព្រះយ៉ាងខ្លាំង សម្រាប់ការសង្រ្គោះខ្ញុំចេញពីអំពើបាបរបស់ខ្ញុំ។ 
នៅសព្វថ្ងៃនេះ មានអ្នកដំណឹងល្អនិយមជាច្រើន ដែលអះអាងយ៉ាងឥតលក្ខខណ្ឌថា ពួកគេឥតមានបាប ដោយសារពួកគេគ្រាន់តែជឿដល់ព្រះយេស៊ូវប៉ុណ្ណោះ។ ចិត្តរបស់ពួកគេមានពេញទៅដោយសេចក្តីជំនឿខុសឆ្គង និងគ្មានមូលដ្ឋានគ្រឹះត្រឹមត្រូវ។ ខណៈដែលកំពុងតែសិក្សាអំពីរោងឧបោសថ ខ្ញុំបានយល់កាន់តែច្បាស់លាស់អំពីភាពក្លែងក្លាយ និងភាពឥតប្រយោជន៍នៃសេចក្តីជំនឿរបស់ពួកគេ ហើយដោយសារការយល់នេះ ខ្ញុំអរព្រះគុណកាន់តែខ្លាំង និងអស់ពីចិត្តដល់ព្រះ សម្រាប់សេចក្តីសង្រ្គោះរបស់ខ្ញុំ។ 

ចេញពីបទគម្ពីរមេ យើងអាចស្វែងរកឃើញការពិតថា បណ្តោយនៃទីលានចតុកោណនៃរោងឧបោសថមានប្រវែង ៤៥ ម៉ែត្រ ហើយទទឹងរបស់វាមានប្រវែង ២២.៥ ម៉ែត្រ ពីព្រោះ១ហត្ថស្មើនឹង ០.៤៥ ម៉ែត្រ។ នៅគ្រប់ជ្រុងទាំងអស់នៃទីលានរោងឧបោសថ មានសសរចំនួន៦០ ដែលសសរនីមួយៗមានកម្ពស់ ២.២៥ ម៉ែត្រ ហើយនៅខាងកើត មានទ្វារដែលមានទទឹងប្រវែង ៩ ម៉ែត្រ ហើយមានរនាំងសំពត់ខ្លូតទេសពណ៌នៅលើផ្នែកទាំងអស់ទៀតនៃរបងទាំងមូល (ប្រហែល ១២៦ ម៉ែត្រ ចេញពី ១៣៥ ម៉ែត្រ)។ 
ទ្វារចូលទីលានរោងឧបោសថត្រូវបានត្បាញ ដោយអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់ ហើយវាមានបណ្តោយប្រវែង ៩ ម៉ែត្រ និងកម្ពស់ ២.២៥ ម៉ែត្រ។ នៅក្នុងន័យផ្សេង អំបោះបួនខុសៗគ្នាទាំងនេះត្រូវបានត្បាញ ដើម្បីធ្វើជាផ្ទាំងសំពត់ប្រវែង ៩ ម៉ែត្រ និងកម្ពស់ ២.២៥ ម៉ែត្រ។ អំបោះផ្ទៃមេឃត្រូវបានត្បាញជាមុនតាមបណ្តោយ និងទទឹងទៅក្នុងសំពត់ខ្លូតទេសវេញយ៉ាងខ្មាញ់ ហើយបន្ទាប់មក អំបោះពណ៌ស្វាយត្រូវបានត្បាញក្នុងកម្ពស់ ២.២៥ ម៉ែត្រ ហើយបន្ទាប់មក អំបោះពណ៌ក្រហមត្រូវបានត្បាញក្នុងកម្ពស់ ២.២៥ ម៉ែត្រ ហើយជាចុងក្រោយ អំបោះពណ៌សត្រូវបានត្បាញ ទៅជាផ្ទាំងសំពត់ក្រាស់ និងណែនមួយ ដូចជាកម្រាលព្រំ ដែលមានកម្ពស់ ២.២៥ ម៉ែត្រ។ តាមរបៀបនេះ ផ្ទាំងសំពត់មួយដែលត្រូវបានត្បាញឲ្យមានកម្ពស់ ២.២៥ ម៉ែត្រ និងទទឹង ៩ ម៉ែត្រ ត្រូវបានព្យួរនៅលើសសរទាំងបួននៃទីលានរោងឧបោសថខាងកើត។ 
ដូច្នេះ ដើម្បីចូលទៅក្នុងទីលានរោងឧបោសថ មនុស្សត្រូវតែទាញសំពត់ដែលដូចជាកម្រាលព្រំឡើង។ មិនដូចជាទ្វារជាច្រើនទៀត ទ្វាររោងឧបោសថមិនត្រូវបានធ្វើពីឈើឡើយ។ ទោះបីជាសសររបស់វាត្រូវបានធ្វើពីឈើក៏ដោយ ក៏ទ្វារដែលនៅជាប់នឹងសសរទាំងនេះ ត្រូវបានត្បាញ ដោយអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់ដែរ។ 
អ្នកអាចធ្វើដំណើរកំសាន្ត និងទស្សនាការសម្តែងសៀកពីមុន ហើយបានមើលឃើញពីរបៀបគេធ្វើរោងតង់សម្តែងសៀកហើយ។ ទ្វារចូលទីលានរោងឧបោសថមានលក្ខណៈស្រដៀងគ្នានឹងទ្វារប្រភេទនេះដែរ។ ដោយសារទ្វារនេះត្រូវបានធ្វើពីសំពត់ក្រាស់ គេមិនអាចបើកវា ដោយទាញ ឬរុញបានឡើយ ប៉ុន្តែគេទាញវាឡើង ដើម្បីចូលវិញ។ លក្ខណៈនេះមិនសម្រាប់តែទ្វារចូលទីលានប៉ុណ្ណោះទេ ប៉ុន្តែក៏សម្រាប់ទ្វារចូលទីបរិសុទ្ធ និងទ្វារចូលទីបរិសុទ្ធបំផុតនៅក្នុងរោងឧបោសថផងដែរ។ 
ហេតុអ្វីព្រះបានបង្គាប់ឲ្យសាសន៍អ៊ីស្រាអែលធ្វើទ្វារចូលទីលានរោងឧបោសថ ទ្វារចូលទីបរិសុទ្ធ និងទ្វារចូលទីបរិសុទ្ធបំផុត ដោយត្បាញជាមួយអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់ដូច្នេះ? យើត្រូវតែស្វែងយល់យ៉ាងច្បាស់លាស់អំពីបំណងព្រះហឫទ័យព្រះ ដែលនៅពីខាងក្រោយការបង្គាប់នេះ។ កណ្ឌគម្ពីរហេព្រើរប្រាប់យើងថា គ្រប់ការល្អនៅក្នុងព្រះគម្ពីរសញ្ញាចាស់គឺជាស្រមោលនៃខ្លឹមសារពិតប្រាកដដែលនឹងត្រូវមកដល់ គឺព្រះយេស៊ូវគ្រីស្ទនេះឯង (ហេព្រើរ ១០:១)។ 
ដូចគ្នាដែរ ទ្វារចូលទីលានរោងឧបោសថទាក់ទងគ្នាយ៉ាងជិតស្និទ្ធជាមួយបុណ្យជ្រមុជរបស់ព្រះយេស៊ូវគ្រីស្ទ ការសុគតរបស់ទ្រង់នៅលើឈើឆ្កាង និងអត្តសញ្ញាណរបស់ទ្រង់ផ្ទាល់។ ដូច្នេះ នៅពេលយើងមិនយល់ព្រះគម្ពីរសញ្ញាចាស់ យើងអាចទទួលបានការយល់ដឹងនេះ ដោយការពិនិត្យមើលព្រះគម្ពីរសញ្ញាថ្មីបាន។ បើសិនមិនពិនិត្យមើលខ្លឹមសារពិតប្រាកដ យើងនឹងពិបាកយល់ពីស្រមោលរបស់វាណាស់ ប៉ុន្តែនៅពេលយើងមើលឃើញអ្វី ឬអ្នកណាដែលកំពុងតែបញ្ចេញស្រមោលនោះ យើងអាចដឹងថា វាគឺជាអ្វីហើយ។ យើងទាំងអស់គ្នាត្រូវតែបានស្គាល់យ៉ាងច្បាស់លាស់ថា ព្រះអង្គសង្គ្រោះដែលព្រះបានរៀបចំពីព្រះគម្ពីរសញ្ញាចាស់ គឺពិតជាអ្នកណា ស្គាល់ថា ទ្រង់គឺជាខ្លឹមសារពិតប្រាកដនៃរោងឧបោសថ ហើយជឿថា ព្រះរាជកិច្ចរបស់ទ្រង់បានសង្រ្គោះយើងចេញពីអំពើបាបទាំងអស់របស់យើង។ 
ដូច្នេះ តើអ្នកណាគឺជាខ្លឹមសារពិតប្រាកដនៃរោងឧបោសថ? តើអ្នកណាបានធ្វើយាងមកធ្វើជាព្រះអង្គសង្រ្គោះដល់មនុស្សមានបាប? គ្មានណាក្រៅពីព្រះយេស៊ូវគ្រីស្ទឡើយ។ នៅពេលយើងពិនិត្យមើលរបៀបដែលព្រះយេស៊ូវគ្រីស្ទដែលជាព្រះអង្គសង្រ្គោះរបស់យើង បានយាងមកផែនដីនេះ និងរបៀបដែលទ្រង់បានសង្រ្គោះយើងចេញពីអំពើបាបរបស់យើង យើងអាចស្វែងរកឃើញសេចក្តីពិតថា ទ្រង់បានសង្រ្គោះមនុស្សមានបាប តាមរយៈអំបោះពណ៌ផ្ទៃមេឃ ពណ៌ស្វាយ និងពណ៌ក្រហម។ 
នៅក្នុងការយល់ពីសេចក្តីសង្រ្គោះរបស់ព្រះយេស៊ូវ សម្រាប់មនុស្សមានបាប ការយល់ និងការជឿតាមសេចក្តីពិតដែលមាននៅក្នុងពណ៌នៃទ្វារចូលទីលានរោងឧបោសថ គឺសំខាន់បំផុត។ នៅពេលស្វែងយល់ពីរោងឧបោសថ ចំណុចទីមួយ ដែលយើងត្រូវតែយល់គឺថា ទ្វារចូលទីលានត្រូវបានធ្វើដោយអំបោះចំនួនបួន។ ហើយនៅពេលយើងដោះស្រាយ អាថ៌កំបាំងនៃទ្វារនេះ យើងអាចទទួលបានការយល់ដឹងយ៉ាងច្បាស់លាស់អំពីព្រះរាជកិច្ចទាំងអស់របស់ព្រះយេស៊ូវគ្រីស្ទបាន។ ដោយការសម្លឹងមើលទ្វារសំពត់ ដែលត្រូវបានត្បាញដោយអំបោះទាំងបួននេះ យើងក៏អាចយល់យ៉ាងច្បាស់លាស់ថា យើងត្រូវតែស្គាល់ និងជឿដល់ព្រះយេស៊ូវ និងសេចក្តីជំនឿប្រភេទណា ដែលពិតជាសេចក្តីជំនឿខុសបានផងដែរ។ 
ទីលានខាងក្រៅនៃរោងឧបោសថ ពិតជារំឮកយើងអំពីក្រោលចៀម មួយ។ ព្រះយេស៊ូវដ៏ជាព្រះមែស៊ីគឺពិតជាទ្វារនៃក្រោលចៀមនៃព្រះ ហើយទ្រង់ក៏បានធ្វើជាអ្នកគង្វាលល្អផងដែរ (យ៉ូហាន ១០:១-៥)។ នៅពេលយើងគិតអំពីសរសរនៅជុំវិញទីលាន យើងពិតជាត្រូវបានរំឮកអំពីព្រះ មែស៊ី ដែលបានធ្វើជាទ្វារ និងអ្នកគង្វាលល្អដល់ចៀមរបស់ទ្រង់ ដែលជាពួកបរិសុទ្ធដែលបានកើតជាថ្មី។ 
តាមធម្មតា អ្នកគង្វាលបោះបង្គោលនៅជុំវិញទ្រង់ចៀម ដើម្បីការពារចៀមរបស់គាត់ ហើយធ្វើទ្វារមួយនៅទីនោះ ហើយតាមរយៈទ្វារនេះ គាត់យាមការពារចៀមរបស់គាត់។ តាមរយៈទ្វារនេះ អ្នកគង្វាលមានទំនាក់ទំនងជិតស្និទ្ធជាមួយចៀមរបស់គាត់ ហើយការពារពួកគេ។ ជាការពិតណាស់ គាត់មិនអនុញ្ញាត្តឲ្យអ្វីដែលមិនមែនជាចៀមរបស់គាត់ ចូលតាមទ្វារនេះឡើយ។ អ្នកគង្វាលស្គាល់ថា ចៀមរបស់គាត់ខុសពីសត្វចចក។ ដូច្នេះហើយបានជាយើងត្រូវការអ្នកគង្វាល។ 
ប៉ុន្តែនៅតែអាចមានចៀមមួយចំនួន ក្នុងចំណោមចៀមនៅក្នុងទ្រុង ដែលកំពុងតែបដិសេធការដឹកនាំរបស់អ្នកគង្វាលដែរ។ ចៀមបែបនេះអាចចូលទៅតាមផ្លូវនៃសេចក្តីស្លាប់ ដោយគិតថា វាគឺជាផ្លូវស្អាតល្អមួយ ខណៈដែលតាមការពិត វាគឺជាផ្លូវដ៏គ្រោះថ្នាក់បំផុតមួយ ពីព្រោះពួកគេបានមិនស្តាប់តាមសម្លេងរបស់អ្នកគង្វាល ហើយបានបដិសេធការដឹកនាំរបស់គាត់។ ចៀមទាំងនេះពិតជាអាចបានរស់នៅ និងមានចំណីគ្រប់គ្រាន់ និងជីវិតល្អប្រសើរពីអ្នកគង្វាលបាន។ តាមការពិត អ្នកគង្វាលរបស់យើងគឺជាព្រះយេស៊ូវគ្រីស្ទ ដែលបានយាងមកធ្វើជាព្រះមែស៊ីរបស់យើង។ 

ព្រះយេស៊ូវគ្រីស្ទដ៏ជាព្រះអង្គសង្រ្គោះ ដែលបានសង្រ្គោះយើង តាមរយៈអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់របស់ទ្រង់

ព្រះយេស៊ូវដែលបានយាងមក ដោយទឹក ព្រះលោហិត និងព្រះវិញ្ញាណ

អំពើបាបទាំងអស់របស់យើងត្រូវបានដោះចេញ ដោយការជឿតាមដំណឹងល្អអំពីទឹក និងព្រះវិញ្ញាណ

បុណ្យជ្រមុជដែលព្រះយេស៊ូវបានទទួល ផ្ទេរអំពើបាបរបស់លោកិយនេះទៅលើទ្រង់

តើអ្វីគឺជាសេចក្តីជំនឿដ៏គ្រប់លក្ខណ៍?

ចូរយើងត្រឡប់ទៅកាន់ ម៉ាថាយ ៣:១៣-១៧ ម្តងទៀត៖ «នោះព្រះយេស៊ូវទ្រង់យាងពីស្រុកកាលីឡេ មកឯយ៉ូហានត្រង់ទន្លេ យ័រដាន់ ដើម្បីនឹងទទួលបុណ្យជ្រមុជពីគាត់ តែយ៉ូហានប្រកែកថា ដូចម្តេចបានជាទ្រង់យាងមកឯទូលបង្គំ គឺទូលបង្គំដែលត្រូវទទួលបុណ្យជ្រមុជពីទ្រង់វិញទេតើ ព្រះយេស៊ូវមានព្រះបន្ទូលថា ចូរធ្វើម្តងនេះចុះ ដ្បិតគួរឲ្យយើងធ្វើសំរេចតាមគ្រប់ទាំងសេចក្តីសុចរិតយ៉ាងដូច្នេះ រួចគាត់ក៏ព្រមធ្វើ កាលព្រះយេស៊ូវបានទទួលបុណ្យជ្រមុជហើយ នោះទ្រង់យាងឡើងពីទឹកភ្លាម ស្រាប់តែមេឃក៏របើកឡើង ឲ្យទ្រង់ឃើញព្រះវិញ្ញាណនៃព្រះ យាងចុះមកដូចជាសត្វព្រាប ក៏សណ្ឋិតលើទ្រង់ នោះមានឮសំឡេងចេញពីមេឃថា នោះជាកូនស្ងួនភ្ងារបស់អញ ជាទីពេញចិត្តអញណាស់»។ កាលព្រះយេស៊ូវទទួលបុណ្យជ្រមុជ គឺមានរយៈពេល៣០ឆ្នាំ បន្ទាប់ពីទ្រង់បានប្រសូតពីនាងក្រមុំព្រហ្មចារីម៉ារាមក។ ពាក្យថា «នោះ» នៅទីនេះ សំដៅទៅលើពេលវេលាដែលទាំងលោកយ៉ូហាន និងទាំងព្រះយេស៊ូវមានព្រះជន្ម៣០ឆ្នាំ។ 
លោកយ៉ូហាន-បាទ្ទីស ដែលបានកើតមករយៈពេល៦ខែ មុនព្រះយេស៊ូវ គឺជាតំណងនៃមនុស្សជាតិនៅលើផែនដីនេះ ដែលកំពុងតែធ្វើបុណ្យជ្រមុជនៃការប្រែចិត្តឲ្យពួកគេ (ម៉ាថាយ ៣:១១; ១១:១១)។ នៅពេលព្រះយេស៊ូវមានព្រះជន្ម៣០ព្រះវស្សា ទ្រង់បានយាងមកឯលោក យ៉ូហាននេះ ដែលកំពុងតែថ្វើបុណ្យជ្រមុជឲ្យមនុស្ស នៅឯទន្លេយ័រដាន់ ដើម្បីទទួលបុណ្យជ្រមុជ។ ប៉ុន្តែលោកយ៉ូហានបានព្យាយាមឃាត់ទ្រង់ថា «គឺទូលបង្គំដែលត្រូវទទួលបុណ្យជ្រមុជពីទ្រង់វិញទេតើ » បន្ទាប់មក ព្រះយេស៊ូវបានឆ្លើយតបថា «ចូរធ្វើម្តងនេះចុះ ដ្បិតគួរឲ្យយើងធ្វើសំរេចតាមគ្រប់ទាំងសេចក្តីសុចរិតយ៉ាង»។ បន្ទាប់មក លោកយ៉ូហានក៏បនាធ្វើតាមទ្រង់ ហើយព្រះយេស៊ូវក៏បានទទួលបុណ្យជ្រមុជពីគាត់។ ព្រះគម្ពីរក៏កត់ត្រាផងដែរថា កាលព្រះយេស៊ូវបានទទួលបុណ្យជ្រមុជរួចហើយ មេឃក៏បានរបើក ហើយមានសម្លេងចេញមកថា «នោះជាកូនស្ងួនភ្ងារបស់អញ ជាទីពេញចិត្តអញណាស់»។ 
នៅក្នុង ម៉ាថាយ ៣:១៥ ព្រះយេស៊ូវប្រាប់យើងអំពីមូលហេតុដែលទ្រង់បានទទួលបុណ្យជ្រមុជពីលោកយ៉ូហាន។ សេចក្តីពិតនេះសំដៅទៅលើអំបោះពណ៌ផ្ទៃមេឃនៅទីលានរោងឧបោសថ៖ «ចូរធ្វើម្តងនេះចុះ ដ្បិតគួរឲ្យយើងធ្វើសំរេចតាមគ្រប់ទាំងសេចក្តីសុចរិតយ៉ាង»។ គោលបំណងនៃបុណ្យជ្រមុជ ដែលព្រះយេស៊ូវបានទទួលពីលោកយ៉ូហាន- បាទ្ទីស គឺដើម្បីអត់ទោសដល់អំពើរំលងរបស់មនុស្សមានបាប តាមរយ់ព្រះរាជកិច្ចរបស់ទ្រង់ ដែលត្រូវតែបើកសម្តែងនៅក្នុងអំបោះពណ៌ផ្ទៃ ពណ៌ស្វាយ និងពណ៌ក្រហម «ដ្បិតគួរឲ្យយើងធ្វើសំរេចតាមគ្រប់ទាំង សេចក្តីសុចរិតយ៉ាង»។ 
ការដែលព្រះយេស៊ូវគ្រីស្ទទទួលយកអំពើបាបរបស់មនុស្សគ្រប់រូបដាក់លើអង្គអ្រង់ តាមរយៈការទទួលបុណ្យជ្រមុជពីលោកយ៉ូហាន-បាទ្ទីស គឺជាសេចក្តីស្រឡាញ់ដ៏សុចរិតរបស់ព្រះ និងការបំពេញសម្រេចព្រះរាជកិច្ចនៃសេចក្តីសង្រ្គោះសម្រាប់មនុស្សមានបាបទាំងអស់។ យ៉ូហាន ៣:១៦ និយាយថា «ដ្បិតព្រះទ្រង់ស្រឡាញ់មនុស្សលោក ដល់ម៉្លេះបានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ»។ ព្រះយេស៊ូវបានទទួលបុណ្យជ្រមុជ ដើម្បីសង្រ្គោះយើងចេញពីអំពើបាបរបស់លោកិយនេះ ដើម្បីកុំឲ្យយើងត្រូវទទួលទោសសម្រាប់អំពើបាបរបស់យើង។ ដោយហេតុនេះ ព្រះយេស៊ូវបានទទួលយកគ្រប់ទាំងសេចក្តីសុចរិតរបស់ព្រះ និងអំពើបាបទាំងអស់របស់មនុស្សជាតិដាក់លើអង្គទ្រង់ តាមរយៈការទទួលបុណ្យជ្រមុជពីលោកយ៉ូហាន ដ្បិតគួរឲ្យទ្រង់ធ្វើសំរេចតាមគ្រប់ទាំងសេចក្តីសុចរិតយ៉ាង។
តើអ្វីគឺជា «គ្រប់ទាំងសេចក្តីសុចរិតរបស់ព្រះ»? បទគម្ពីរខាងលើប្រាប់យើងយ៉ាងច្បាស់លាស់ថា មូលហេតុដែលព្រះយេស៊ូវទទួលបុណ្យជ្រមុជពីលោកយ៉ូហាន-បាទ្ទីស គឺដើម្បីបំពេញសម្រេចគ្រប់ទាំងសេចក្តីសុចរិតរបស់ព្រះវរបិតា។ 
នៅទីនេះ យើងត្រូវស្វែងយល់យ៉ាងច្បាស់លាស់ពីអត្ថន័យនៃគ្រប់ទាំងសេចក្តីសុចរិតរបស់ព្រះ។ «គ្រប់ទាំងសេចក្តីសុចរិត» សំដៅទៅលើការពិតថា តាមរយៈបុណ្យជ្រមុជរបស់ទ្រង់ ព្រះយេស៊ូវគ្រីស្ទបានទទួលយកអំពើបាបទាំងអស់របស់មនុស្សជាតិដាក់លើអង្គទ្រង់។ តាមរយៈបុណ្យជ្រមុជរបស់ទ្រង់ ទ្រង់បានទទួលយកអំពើបាបទាំងអស់របស់លោកិយនេះដាក់លើទ្រង់ តែម្តងជាសម្រេច។ ដោយសារគោលបំណងនៃកំណើតរបស់ទ្រង់ គឺដើម្បីដោះអំពើបាបទាំងអស់របស់លោកិយនេះចេញ បុណ្យជ្រមុជដែលទ្រង់បានទទួលពីលោកយ៉ូហាន គឺពិតជាព្រះរាជកិច្ចដ៏សុចរិតហើយ។ ដើម្បីបំពេញសម្រេចគ្រប់ទាំងសេចក្តីសុចរិតរបស់ព្រះ ទ្រង់ត្រូវតែបំពេញសម្រេចព្រះរាជកិច្ចដ៏សុចរិត ដែលដោះអំពើបាបទាំងអស់របស់លោកិយនេះចេញ គឺត្រូវតែបំពេញសម្រេចសេចក្តីសង្រ្គោះសម្រាប់មនុស្សជាតិ។
បុណ្យជ្រមុជរបស់ព្រះយេស៊ូវគឺជាវិធីសាស្ត្រចាំបាច់ ដោយព្រះប្រើ ដើម្បីសង្រ្គោះយើងចេញពីអំពើបាបរបស់យើង។ ព្រះបានកំណត់នៅក្នុងព្រះគម្ពីរសញ្ញាចាស់ថា ដើម្បីដោះអំពើបាបរបស់យើងចេញ ទ្រង់នឹងលើកលោកយ៉ូហាន-បាទ្ទីសឡើងជាតំណាងនៃមនុស្សជាតិ បង្គាប់ឲ្យគាត់ធ្វើបុណ្យជ្រមុជថ្វាយព្រះរាជបុត្រាទ្រង់ ហើយដូច្នេះ ផ្ទេរអំពើបាបទាំងអស់របស់យើងទៅលើព្រះរាជបុត្រាទ្រង់។ នេះគឺជាពិតជាព្រះរាជកិច្ចនៃសេចក្តីមេត្តាករុណារបស់ព្រះ។ ដោយសារព្រះបានស្រឡាញ់យើងយ៉ាងខ្លាំង ទ្រង់បានបង្គាប់ឲ្យព្រះយេស៊ូវទទួលបុណ្យជ្រមុជពីលោកយ៉ូហាន ដើម្បីយកយើងធ្វើជាកូនរបស់ទ្រង់ផ្ទាល់ ហើយដើម្បីបំពេញសម្រេចព្រះរាជកិច្ចដ៏សុចរិតនៃការដោះអំពើបាបរបស់យើងចេញ។ ដោយហេតុនេះ កាលព្រះបានទទួលបុណ្យជ្រមុជ ហើយយាងឡើងពីទឹកចិញ ព្រះបានមានបន្ទូលថា «នោះជាកូនស្ងួនភ្ងារបស់អញ ជាទីពេញចិត្តអញណាស់»។ នៅក្នុងន័យផ្សេង ព្រះវរបិតាបានមានបន្ទូលថា «តាមរយៈបុណ្យជ្រមុជរបស់ទ្រង់ ព្រះរាជបុត្រារបស់អញបានទទួលយកអំពើបាបទាំងអស់របស់ឯងរាល់គ្នាដាក់លើអង្គទ្រង់»។ 
នៅក្នុងន័យផ្សេង ព្រះយេស៊ូវគ្រីស្ទបានយងាមកផែនដីនេះ ហើយតាមរយៈវិធីសាស្ត្រនៃការទទួលបុណ្យជ្រមុជពីលោកយ៉ូហាន ទ្រង់បានផ្ទុកអំពើបាបទាំងអស់របស់យើងទៅក្នុងអង្គទ្រង់តែម្តងជាសម្រេច តាមរបៀបដ៏ត្រឹមត្រូវបំផុត ហើយដូច្នេះ បានធ្វើជាតង្វាយយញ្ញបូជា ដើម្បីដោះអំពើបាបរបស់យើងចេញ។ 
ដោយសារព្រះរាជបុត្រានៃព្រះបានទទួលបុណ្យជ្រមុជ សម្រាប់យើង ហើយដោយសារទ្រង់បានទទួលយកអំពើបាបទាំងអស់របស់យើង ដាក់លើអង្គទ្រង់ ទើបទ្រង់បាននាំអំពើបាបទាំងនេះទៅឯឈើឆ្កាង បានបង្ហូរព្រះលោហិត និងសុគតនៅលើឈើឆ្កាង ហើយដូច្នេះ បានធ្វើជាព្រះអង្គសង្រ្គោះដល់យើងទាំងអស់គ្នា។ នៅក្នុងន័យផ្សេង ព្រះបានសង្រ្គោះយើងដែលជឿ ដោយការទទួលបុណ្យជ្រមុជសម្រាប់អំពើបាបរបស់យើង ការលះបង់ព្រះជន្មទ្រង់ដោយព្រះលោហិតនៅលើឈើឆ្កាង និងការមានព្រះជន្មរស់ពីសុគតឡើងវិញ។ ហើយបន្ទាប់ពីបានមានព្រះជន្មរស់ពីសុគតឡើងវិញ និងបានបំពេញសម្រេចព្រះរាជកិច្ចនៃសេចក្តីសង្រ្គោះរបស់ទ្រង់ ឥឡូវនេះ ទ្រង់គង់នៅខាងស្តាំបល្ល័ង្កនៃព្រះវរបិតា ហើយកាលណាពេលវេលារបស់ទ្រង់មកដល់ ទ្រង់ប្រាកដជានឹងយាងត្រឡប់មកវិញជាមិនខាន។ សេចក្តីពិតនេះហើយគឺជាដំណឹងល្អអំពីទឹក និងព្រះវិញ្ញាណ និងស្នូលនៃសេចក្តីសង្រ្គោះ។ 
និក្ខមនំ ២៧:១៦ កត់ត្រាអំពីទ្វារចូលទីលានរោងឧបោសថថា «ឯនៅមាត់ទ្វារទីលាន ត្រូវមានរនាំងប្រវែង២០ហត្ថ ពណ៌ផ្ទៃមេឃ ពណ៌ស្វាយ ពណ៌ក្រហម ធ្វើពីអំបោះខ្លូតទេសវេញយ៉ាងខ្មាញ់ ហើយប៉ាក់ផង ព្រមទាំងសសរ៤ និងជើង៤ដែរ»។ ដូច្នេះ ទ្វារចូលទីលានរោងឧបោសថត្រូវបានត្បាញ ដោយអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់។ នេះប្រាប់យើងអំពីសេចក្តីពិតថា យើងអាចចូលទៅក្នុងនគរស្ថានសួគ៌បាន ដោយការជឿលើអំណោយទាននៃសេចក្តីសង្រ្គោះ។
អំបោះពណ៌ផ្ទៃមេឃ ដែលត្រូវបានត្បាញទៅក្នុងទ្វារចូលទីលានរោងឧបោសថ សំដៅទៅលើការពិតថា អំពើបាបទាំងអស់របស់យើងត្រូវបានផ្ទេរទៅលើព្រះយេស៊ូវ នៅពេលទ្រង់បានយាងមកផែនដីនេះ ហើយបានទទួលបុណ្យជ្រមុជ។ 
អំបោះពណ៌ស្វាយ ប្រាប់យើងថា ព្រះយេស៊ូវគ្រីស្ទដែលបានទទួលបុណ្យជ្រមុជសម្រាប់អំពើបាបរបស់យើង គឺជាព្រះអាទិករទ្រង់ផ្ទាល់ ដែលបានបង្កើតចក្រវាឡនេះ និងគ្រប់យ៉ាងនៅក្នុងវា ហើយជាព្រះអម្ចាស់របស់អ្នក និងខ្ញុំ។ ពណ៌ស្វាយគឺជាពណ៌របស់ស្តេច (យ៉ូហាន ១៩:២-៣) ហើយដូច្នេះ វាប្រាប់យើងថា ព្រះយេស៊ូវគឺជាស្តេចលើសអស់ទាំងស្តេច និងជាព្រះអម្ចាស់លើគ្រប់ទាំងអស់។ ចំណែកពាក្យថា «ព្រះគ្រីស្ទ» មានន័យថា «អ្នកដែលទទួលបានការចាក់ប្រេងតាំង» ហើយមានតែស្តេច សង្ឃ និងហោរាតែប៉ុណ្ណោះ ដែលអាចទទួលបានការចាក់ប្រេងតាំងនេះ។ ដូច្នេះ ទោះបីជាព្រះយេស៊ូវគ្រីស្ទបានយាងមកផែនដីនេះ ក្នុងនាមជាមនុស្សម្នាក់ក៏ដោយ ក៏អត្តសញ្ញាណពិតប្រាកដរបស់ទ្រង់គឺជាស្តេចលើសអស់ទាំងស្តេចដែរ។ នៅក្នុងន័យផ្សេង ព្រះយេស៊ូវគឺជាព្រះអម្ចាស់ និងព្រះអាទិករ ដែលបានបង្កើតចក្រវាឡនេះ។ ព្រះយេស៊ូវគឺជាព្រះដ៏មានគ្រប់ព្រះចេស្តាដោយទ្រង់ផ្ទាល់ ហើយជាព្រះរាជបុត្រាស្ងួនភ្ងាតែមួយរបស់ព្រះវរបិតា។ 
អំបោះពណ៌ក្រហម ដែលត្រូវបានត្បាញទៅក្នុងទ្វារចូលទីលានរោងឧបោសថ សំដៅទៅលើយញ្ញបូជាដែលស្តេចលើសអស់ទាំងស្តេចនេះបានថ្វាយទៅកាន់ព្រះ បន្ទាប់ពីទ្រង់បានយាងមកផែនដីនេះ ក្នុងនាមជាមនុស្សម្នាក់ និងបានទទួលយកអំពើបាបរបស់យើង ដាក់លើអង្គទ្រង់ តាមរយៈបុណ្យជ្រមុជរបស់ទ្រង់ បានបង្ហូរព្រះលោហិតទ្រង់ និងបានសុគតនៅលើឈើឆ្កាង។ ព្រះយេស៊ូវគ្រីស្ទបានសងថ្លៃឈ្នួលនៃអំពើបាបជំនួសយើង ដោយការទទួលបុណ្យជ្រមុជ ការបង្ហូរព្រះលោហិតទ្រង់ និងការថ្វាយអង្គទ្រង់ជាតង្វាយយញ្ញបូជាសម្រាប់យើង។ ដូច្នេះ អំបោះពណ៌ក្រហមបង្ហាញពីតង្វាយយញ្ញបូជានៃព្រះលោហិតរបស់ព្រះយេស៊ូវគ្រីស្ទ។
ជាចុងក្រោយ សំពត់ខ្លូតទេសវេញយ៉ាងខ្មាញ់ សំដៅទៅលើព្រះបន្ទូលជិតស្និទ្ធរបស់ព្រះនៅក្នុងព្រះគម្ពីរសញ្ញាចាស់ និងសញ្ញាថ្មី។ ព្រះគម្ពីរប្រាប់យើងអំពីសេចក្តីសង្រ្គោះរបស់យើង តាមរយៈព្រះបន្ទូលនៅក្នុងព្រះគម្ពីរសញ្ញាចាស់ និងសញ្ញាថ្មី។ ចេញពីព្រះគម្ពីរសញ្ញាចាស់ ព្រះបានសន្យាថា ទ្រង់នឹងយាងមកឯយើង ដើម្បីធ្វើជាព្រះអង្គសង្រ្គោះដល់មនុស្សមានបាប ហើយនៅក្នុងព្រះគម្ពីរសញ្ញាថ្មី ដូចដែលទ្រង់បានសន្យា ព្រះយេស៊ូវគ្រីស្ទដែលជាព្រះទ្រង់ផ្ទាល់ ពិតជាបានយាងមកផែនដីនេះ បានទទួលបុណ្យជ្រមុជ និងបានបង្ហូរព្រះលោហិតទ្រង់នៅលើឈើឆ្កាង ដើម្បីថ្វាយអង្គទ្រង់ជាតង្វាយយញ្ញបូជា សម្រាប់អំពើបាបរបស់យើងប្រាកដមែន។ 
តាមរយៈអំបោះផ្ទៃមេឃ ព្រះបានបើកសម្តែងព្រះបន្ទូលថា ព្រះយេស៊ូវគ្រីស្ទបានយាងមកផែនដីនេះ ដើម្បីសង្រ្គោះយើងចេញពីអំពើបាបរបស់យើង ហើយបានទទួលយកអំពើបាបទាំងនេះដាក់លើអង្គទ្រង់ តាម រយៈបុណ្យជ្រមុជរបស់ទ្រង់។ ហើយតាមរយៈអំបោះពណ៌ស្វាយ ទ្រង់បានបើកសម្តែងថា ព្រះអង្គដែលបានទទួលបុណ្យជ្រមុជនេះគឺពិតជាព្រះទ្រង់ផ្ទាល់។ ហើយតាមរយៈអំបោះពណ៌ក្រហម ព្រះបានបើកសម្តែងថា ទ្រង់បានសង្រ្គោះអ្នក និងខ្ញុំចេញពីអំពើបាបរបស់យើង ដោយការយាងមកផែនដីនេះ ដើម្បីធ្វើជាព្រះអង្គសង្រ្គោះ ទទួលបុណ្យជ្រមុជ នាំអំពើបាបរបស់លោកិយនេះទៅឯឈើឆ្កាង និងការបង្ហូរព្រះលោហិតដ៏មានតម្លៃរបស់ទ្រង់។ 
ម៉្យាងវិញទៀត ដោយសារសេចក្តីសង្រ្គោះនេះបានមក ដោយសារព្រះបន្ទូលសេចក្តីសន្យារបស់ព្រះចេញពីព្រះគម្ពីរសញ្ញាចាស់ ទើបត្រូវបានបើកសម្តែង តាមរយៈសំពត់ខ្លូតទេសវេញយ៉ាងខ្មាញ់។ ដោយហេតុនេះ ទ្វារចូលទីលានរោងឧបោសថត្រូវបានត្បាញជាមួយអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់។ នៅពេលយើងសម្លឹងមើលទ្វារចូលទីលានរោងឧបោសថ ទ្វារនេះបើក សម្តែង និងបង្ហាញប្រាប់យើងយ៉ាងច្បាស់លាស់ អំពីរបៀបដែលព្រះបានសង្រ្គោះយើងចេញពីអំពើបាបរបស់យើង ហើយបានយកយើងធ្វើជារាស្ត្ររបស់ទ្រង់។ ដូច្នេះ យើងទាំងអស់គ្នាត្រូវតែជឿលើអត្ថន័យខាងវិញ្ញាណនៃអំបោះទាំងបួន ដែលគេបានប្រើសម្រាប់ទ្វារចូលទីលានរោងឧបោសថ។
នៅពេលនិយាយអំពីពណ៌នៃទ្វារចូលទីលានរោងឧបោសថ ជាដំបូង ព្រះគម្ពីរនិយាយអំពីអំបោះពណ៌ផ្ទៃមេឃ។ ជាទូទៅ យើងគិតអំពីលំដាប់លំដោយនៃអំបោះពណ៌ស្វាយ ពណ៌ផ្ទៃមេឃ និងពណ៌ក្រហម ប៉ុន្តែព្រះគម្ពីរពិតជាបានចុះបញ្ជីតាមលំដាប់លំដោយនៃអំបោះពណ៌ផ្ទៃមេឃ ពណ៌ស្វាយ និងពណ៌ក្រហម។ នេះបង្ហាញប្រាប់យើងអំពីសារៈសំខាន់នៃអំបោះពណ៌ផ្ទៃមេឃ។ នៅពេលព្រះយេស៊ូវគ្រីស្ទពិតជាបានយាងមកផែនដីនេះ ដើម្បីធ្វើជាព្រះអង្គសង្រ្គោះរបស់យើង បើសិនទ្រង់មិនបានទទួលបុណ្យជ្រមុជពីលោកយ៉ូហានទេ នោះយើងមិនបានស្អាតចេញពីអំពើបាបរបស់យើងបានឡើយ។ ដោយហេតុនេះ ដើម្បីសង្រ្គោះយើងចេញពីអំពើបាបរបស់លោកិយទាំងមូលនេះ ព្រះយេស៊ូវបានទទួលបុណ្យជ្រមុជពីលោកយ៉ូហាន-បាទ្ទីស និងបានសុគតនៅលើឈើឆ្កាង ដែលស្របតាមបំណងព្រះហឫទ័យរបស់ព្រះវរបិតា។ 
ព្រះយេស៊ូវគឺជាព្រះអម្ចាស់នៃចក្រវាឡនេះ ដែលបានបង្កើតរបស់សព្វសារពើ ហើយទ្រង់គឺជាព្រះរបស់យើង។ ទ្រង់គឺជាព្រះទ្រង់ផ្ទាល់ ដែលបានបង្កើតយើងឲ្យមានជីវិតនៅលើផែនដីនេះ ដែលបានប្រទានជីវិតថ្មីដល់យើង និងដែលគ្រប់គ្រងលើជីវិតរបស់យើង។ ដើម្បីឲ្យទ្រង់សង្រ្គោះយើងចេញពីអំពើបាបរបស់យើង ទ្រង់ត្រូវតែទទួលបុណ្យជ្រមុជពីតំណាងនៃមនុស្សជាតិ ដើម្បីទទួលអំពើបាបទាំងអស់របស់យើងដាក់លើអង្គ ទ្រង់។ នៅក្នុងន័យផ្សេង ដោយសារទ្រង់បានទទួលបុណ្យជ្រមុជពីលោកយ៉ូហាន ទើបព្រះយេស៊ូវគ្រីស្ទបានធ្វើជាព្រះអង្គសង្រ្គោះដ៏ពិតប្រាកដរបស់យើង។ 
ដើម្បីសង្រ្គោះយើងចេញពីអំពើបាបរបស់យើង ព្រះយេស៊ូវគ្រីស្ទបានយាងមកផែនដីនេះ ហើយដើម្បីទទួលយកអំពើបាបទាំងអស់របស់យើងដាក់លើទ្រង់ ទ្រង់បានទទួលបុណ្យជ្រមុជ។ បើសិនទ្រង់មិនបានទទួលបុណ្យជ្រមុជជាមុនទេ ព្រះគ្រីស្ទនឹងមិនអាចសុគតនៅលើឈើឆ្កាងបានឡើយ។ ដោយហេតុនេះ ទ្វារចូលទីលានរោងឧបោសថកំពុងតែបង្ហាញប្រាប់យើងយ៉ាងច្បាស់លាស់ អំពីរបៀបដែលព្រះយេស៊ូវគ្រីស្ទបានសង្រ្គោះយើងចេញពីអំពើបាបរបស់យើង គឺវិធីសាស្ត្រច្បាស់លាស់នៃ សេចក្តីសង្រ្គោះរបស់ទ្រង់
ពណ៌នៃទ្វារចូលទីលានរោងឧបោសថប្រាប់យើងថា ព្រះយេស៊ូវ គ្រីស្ទនឹងយាងមកផែនដីនេះ ទទួលយកអំពើបាបរបស់មនុស្សជាតិដាក់លើអង្គទ្រង់ តាមរយៈបុណ្យជ្រមុជរបស់ទ្រង់ពីលោកយ៉ូហាន និងសុគតនៅលើឈើឆ្កាង។ នៅក្នុងន័យផ្សេង ទ្រង់នឹងដោះស្រាយអំពើបាបទាំងអស់របស់យើង ដោយអង្គទ្រង់ផ្ទាល់។ នៅពេលទ្រង់ទទួលបានបុណ្យជ្រមុជ ទ្វារស្ថានសួគ៌របើក ហើយព្រះវរបិតាមានបន្ទូលថា «នោះជាកូនស្ងួនភ្ងារបស់អញ ជាទីពេញចិត្តអញណាស់»។ ព្រះយេស៊ូវគ្រីស្ទគឺជាព្រះមែស៊ី និងព្រះអង្គសង្រ្គោះរបស់យើង ប៉ុន្តែទ្រង់ក៏ជាព្រះរាជបុត្រានៃព្រះ ដែលជាព្រះអាទិករបង្កើតសកលលោកនេះ ដោយព្រះបន្ទូលទ្រង់ផង ដែរ។ ក្នុងនាមជាព្រះដ៏បរិសុទ្ធ ព្រះយេស៊ូវអាចផ្ទុកអំពើបាបទាំងអស់របស់យើងនៅក្នុងអង្គទ្រង់ ដើម្បីឲ្យទ្រង់បានធ្វើជាព្រះអង្គសង្រ្គោះដ៏ពិតប្រាកដរបស់យើង។
ព្រះយេស៊ូវគ្រីស្ទ ដែលបានបង្កើតចក្រវាឡទាំងមូល ហើយគ្រប់គ្រងលើវា បានបង្ហាញប្រាប់យើងអំពីសេចក្តីសង្រ្គោះចេញពីអំពើបាបច្បាស់លាស់របស់យើង។ ដោយសារព្រះយេស៊ូវបានយាងមកផែនដីនេះ បានទទួលយកអំពើបាបទាំងអស់ដាក់លើអង្គទ្រង់ តាមរយៈបុណ្យជ្រមុជ និងបានសុគតនៅលើឈើឆ្កាង ដើម្បីដោះអំពើបាបរបស់យើងចេញ ទើបអ្នក និងខ្ញុំបានសង្រ្គោះយ៉ាងពិតប្រាកដ។ ព្រះយេស៊ូវគ្រីស្ទគឺជាព្រះអាទិករ ដែលគ្រប់គ្រងលើជីវិត និងសេចក្តីស្លាប់របស់យើង ដែលបានបង្កើតចក្រវាឡទាំងមូលនេះ និងដែលបានធ្វើឲ្យពួគព្ធយុកោរបស់យើង និងមនុស្សជាតិទាំងមូលមានជីវិតនៅលើផែនដីនេះ។ ទ្រង់គឺជាខ្លឹមសារពិតប្រាកដនៃអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់។ 
ព្រះទ្រង់ផ្ទាល់បានយាងមកផែនដីនេះ ដើម្បីធ្វើជាតង្វាយយញ្ញបូជាសម្រាប់មនុស្សមានបាប។ ព្រះយេស៊ូវដែលបានសង្រ្គោះយើងនេះ គឺជាព្រះ ព្រះដ៏មានគ្រប់ទាំងព្រះចេស្តា និងព្រះដ៏ពេញដោយសេចក្តីមេត្តា ករុណា។ ដោយសារព្រះយេស៊ូវគ្រីស្ទបានទទួលយកអំពើបាបទាំងអស់ដាក់លើអង្គទ្រង់ តាមរយៈបុណ្យជ្រមុជរបស់ទ្រង់ ទើបទ្រង់បានបំពេញសម្រេចគ្រប់ទាំងសេចក្តីសុចរិតរបស់ព្រះ ហើយដូច្នេះ ទ្រង់បាននាំអំពើបាបរបស់លោកិយនេះទៅឯឈើឆ្កាង បានសម្រក់ព្រះលោហិតដ៏មានតម្លៃរបស់ទ្រង់ និងបានសុគត។ ដូចដែលបានបើកសម្តែងនៅក្នុងទ្វារចូលទីលានរោងឧបោសថ ព្រះយេស៊ូវគ្រីស្ទបានធ្វើជាតង្វាយយញ្ញបូជារបស់យើងផ្ទាល់ ដើម្បីដោះអំពើបាបទាំងអស់របស់យើងចេញ។ 
ដោយហេតុនេះ មិនត្រឹមតែទ្វារចូលទីលានរោងឧបោសថប៉ុណ្ណោះទេ ប៉ុន្តែក៏ទ្វារចូលទីបរិសុទ្ធ ទ្វារចូលទីបរិសុទ្ធបំផុត និងដំបូលតំណាក់នៃព្រះផងដែរ សុទ្ធតែត្រូវបានត្បាញជាមួយអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់ទាំងអស់។  ដោយសារព្រះយេស៊ូវគ្រីស្ទបានទទួលបុណ្យជ្រមុជសម្រាប់អ្នក ទើបអ្នក និងខ្ញុំបានស្អាតពីអំពើបាបទាំងអស់របស់យើង ដោយការជឿតាមបុណ្យជ្រមុជរបស់ទ្រង់។ ព្រះយេស៊ូវបានទទួលបុណ្យជ្រមុជ ដើម្បីបំពេញសម្រេចគ្រប់ទាំងសេចក្តីសុចរិត ហើយសេចក្តីសុចរិតនេះត្រូវបានសម្រេចបាន ដោយការទទួលយកអំពើបាបរបស់មនុស្សទាំងអស់ដាក់លើអង្គទ្រង់ តាមរយៈបុណ្យជ្រមុជរបស់ទ្រង់។ ដូច្នេះ អ្វីដែលយើងត្រូវតែធ្វើ គឺដឹង និងជឿថា អំពើបាបទាំងអស់របស់យើងក៏ត្រូវបានផ្ទេរទៅលើព្រះយេស៊ូវនៅគ្រានោះផងដែរ។ 
ទោះបីជាយ៉ាងណា មានគ្រីស្ទបរិស័ទយ៉ាងច្រើន ដែលជឿដល់ទ្រង់យ៉ាងខុស និងតាមតែចិត្តរបស់ពួកគេ។ ពួកគេមានភាពមានះខ្លាំងពេក ដែលមិនព្រមបោះបង់សេចក្តីជំនឿតាមសាសនាដែលទទឹងច្បាប់របស់ពួកគេ និងការទាស់ប្រឆាំងរបស់ពួកគេចំពោះព្រះតាំងពីដំបូងមក។ យើងត្រូវតែជឿដល់ទ្រង់ តាមរបៀបនៃសេចក្តីសង្រ្គោះ ដែលទ្រង់បានប្រទានឲ្យយើង។ ព្រះយេស៊ូវបានមានបន្ទូលថា «ខ្ញុំជាផ្លូវ ជាសេចក្តីពិត និងជាជីវិត» (យ៉ូហាន ១៤:៦)។ ទ្រង់កំពុងតែប្រាប់យើងថា «ខ្ញុំគឺជាផ្លូវ ដែលនាំអ្នកទៅឯស្ថានសួគ៌។ ខ្ញុំគឺជាអ្នកគង្វាល ផ្លូវ និងសេចក្តីពិត។ ហើយខ្ញុំពិតជាជីវិតដែលសង្រ្គោះអ្នក»។ តាមរយៈការសង្រ្គោះយើងចេញពីអំពើបាបរបស់យើង ព្រះយេស៊ូវគ្រីស្ទបានធ្វើជាព្រះអម្ចាស់នៃជីវិតថ្មីរបស់យើង។