Search
Español
Español
Debido a COVID-19 y la interrupción del servicio de correo internacional,
hemos suspendido temporalmente nuestro "Servicio de Libros Impresos Gratis".
A la luz de esta situación no podemos enviarle los libros por correo en este momento.
Oren para que esta pandemia termine pronto y por la reanudación del servicio postal.

Sermones

مضمون 10: مُکاشفہ(مُکاشفہ دی کتاب اُتے تفسیر)

[2-6باب] پِرگُمن دی کلِیسیادے ناں خط (مُکاشفہ۲: ۱۲-۱۷)

پِرگُمن دی کلِیسیادے ناں خط
)مُکاشفہ۲: ۱۲-۱۷(
”تے پرگُمن دی کلِیسیا دے فرِشتے نُوں ایہہ لِکھ پئی جِہدے کول دو مُونہی تِکھی تلوار اے اوہ ایہہ آکھدا اے پئی۔مَیں ایہہ تے جاننا آں پئی تُوں شیطان دے تخت دے تھاں وِچ رہنا ایں۔ تے میرے ناں اُتّے قیم رہنا ایں۔ تے جِنہاں دِناں وِچ میرا وفادار گواہ اِنتپاس تُہاڈے وِچ اوس تھاں قتل ہویا سی جِتّھے شیطان رہندا اے اوہناں دِناں وِچ وی تُوں میرے اُتّے اِیمان رکھن توں اِنکار نا کِیتا۔پر مَینُوں کُجھ گلّاں دی تیرے اُتّے شکایت اے ایس لئی پئی تیرے اوتھے کُجھ لوک بِلعام دی تعلِیم مَنّن والے نیں جِس بلق نُوں بنی اِسرائیل اگّے ٹھوکر رکھن دی تعلِیم دِتّی یعنی ایہہ پئی اوہ بُتاں دِیاں قُربانِیاں کھان تے حرامکاری کرن۔اِنجے ایتھے وی تیرے کُجھ لوک ایسے طرح نِیکُلیوں دی تعلِیم نُوں مَن دے نیں۔ تَد تَوبہ کر نئیں تے مَیں تیرے کول چھیتی آ کے اپنے مُنھ دی تلوار نال اوہناں دے نال لڑاں گا۔جِہدے کنّ ہَین اوہ سُن لَئے پئی رُوح کلِیسیاواں نُوں کِیہ آکھدا اے۔ جیہڑا جتے مَیں اوہنوں لُکے ہوئے مَن وِچوں دیاں گا۔ تے اِک چِٹّا پتّھر دیاں گا اوس پتّھر اُتّے اِک نواں ناں لِکھیا ہویا ہوئے گا جِہنُوں اوہدے لین والے دے سِوا کوئی نا جانے گا۔“
 


تشریح

 
آیت۱۲:”تے پرگُمن دی کلِیسیا دے فرِشتے نُوں ایہہ لِکھ پئی جِہدے کول دو مُونہی تِکھی تلوار اے اوہ ایہہ آکھدا اے پئی۔“
پرگمن ایشیاء کوچک دا اک انتظامی دارالحکومت شہر سی ،جتھے رہن والے بوہتے کافر دیوتیاں نوں پوجدے سن ، خاص کر کے ، ایہہ راجے دی بھگتی دی تھاں سی ۔ ” جِہدے کول دو مُونہی تِکھی تلوار اے “دے راہیں ایہدا مطلب ایہہ ہیگا اے پئی خُداوند خُدا دے ویریاں نال لڑدا اے ۔
آیت ۱۳:”مَیں ایہہ تے جاننا آں پئی تُوں شیطان دے تخت دے تھاں وِچ رہنا ایں۔ تے میرے ناں اُتّے قیم رہنا ایں۔ تے جِنہاں دِناں وِچ میرا وفادار گواہ اِنتپاس تُہاڈے وِچ اوس تھاں قتل ہویا سی جِتّھے شیطان رہندا اے اوہناں دِناں وِچ وی تُوں میرے اُتّے اِیمان رکھن توں اِنکار نا کِیتا۔“
جدپئی پرگمن راجے دی بھگتی دا اک پکا گڑھ سی ، ایہہ اوہ تھاں وی سی جتھے خُدا دے اِنتپاس ناں دے اک خاد م نوں خُداوند اُتے ایمان عقیدے دی راکھی لئی راجے دی پوجا کرن توں انکار کرن اُتے شہید کر دتا گیا ۔ اوہ ویلا اک واری فیر آوے گا جد لوکاں نوں مخالفِ مسیح دی بھگتی کرن لئی مجبور کیتا جاوے گا ، پر خُدا دے پاک لوک تےخادم اخیر تیک اپنے ایمان دی راکھی کرن گے ، جویں اِنتپاس نے اپنی جان دے کے اپنے ایمان دی راکھی کیتی سی ۔ ایہو جیہا دلیر ایمان رکھن لئی ، سانوں ہُن اپنے عمل اُتے اپنا ایمان شروع کر دینا چاہی دا اے ، بھاویں اسیں نکیاں نکیاں لانگھاں نال ای شروع کرئیے ۔ جد کُٹ مار دا ویلا آؤندااے ، خُدا دے پاک لوکاں تے خادماں نوں خاص کر کے پاک رُوح اُتے بھروسہ کرنا چاہی دا اے ۔ اوہناں نوں خُدا اُتے بھروسہ کرنا چاہی دا اے تے اپنی مرضی نال اپنی شہادت نوں آس رکھ کے سینے لاؤنا چاہی دا ، تاں پئی اوہ خُدا نوں جلال دے سکن تے اوہدے کولوں نواں اسمان تے دھرتی لے سکن ۔
 
آیت ۱۴:”پر مَینُوں کُجھ گلّاں دی تیرے اُتّے شکایت اے ایس لئی پئی تیرے اوتھے کُجھ لوک بِلعام دی تعلِیم مَنّن والے نیں جِس بلق نُوں بنی اِسرائیل اگّے ٹھوکر رکھن دی تعلِیم دِتّی یعنی ایہہ پئی اوہ بُتاں دِیاں قُربانِیاں کھان تے حرامکاری کرن۔“
خُدا نے پرگمن دی کلیسیا نوں جھڑکیا ایس لئی پئی اوہدے کجھ لوک بلعام دے عقیدے دے جال وچ سن ۔ بلعام اک جھوٹا نبی سی جنہے بنی اسرائیل نوں خُدا توں وکھ کر دتا تے بُتاں دی پوجا کرن والی غیر یہودی آگُو زنانیاں نال میل جول دا فریب دے کے اوہناں نوں بھیڑیاں کماں وچ پھسایا ۔ خُداوند نے اوہناں لوکاں نوں جھڑکیا جنہاں دے ایمان نے خُدا نوں چھڈ دتا سی ۔ لوکاں دے دلاں نیں اوہنوں چھڈ دتا سی تے ایہدی بجائے جھوٹے بُتاں دی پوجا کیتی سی ۔ تے بُتاں دی پوجا دا پاپ خُدا دے اگے بوہت وڈا پاپ اے ۔
 
 آیت ۱۵:”اِنجے ایتھے وی تیرے کُجھ لوک ایسے طرح نِیکُلیوں دی تعلِیم نُوں مَن دے نیں۔“
بائبل وچ ، ”نِیکُلیوں“تے”بلعام“دے اکھر خاص کر کے اِکو جیہے نیں ، جیہدا مطلب ہیگا اے ، ”اوہ جیہڑے لوکاں اُتے فتح پاؤندے نیں ۔“جد خُدانے آکھیا پئی ”اوہ لوک جنہاں نیں نِکُلیوں دیاں تعلیماں نوں پھڑیا ہویا اے ،“تاں ایہہ آکھن دا اک ہو ر طریقہ سی پئی خُدادی کلیسیا نوں اوہناں لوکاں نوں ردّکرنا چاہی دا اے ” جنہاں نیں نِکُلیوں دیاں تعلیماں نوں پھڑیا ہویا اے ۔“اوہ لوک جیہڑے نِکُلیوں تے بلعام دیاں ایہناں تعلیماں پچھے چلدے سن اوہو ای لوک سن جنہاں نیں مادی فائدے لین تے بھیڑیاں کم کرن نوں جاری رکھیا۔ ایہو جیہے لوکاں نوں لازمی خُدا دی کلیسیا وچوں کڈھنا ہووے گا ۔
 
آیت ۱۶:” تَد تَوبہ کر نئیں تے مَیں تیرے کول چھیتی آ کے اپنے مُنھ دی تلوار نال اوہناں دے نال لڑاں گا۔“
ایس لئی خُدا نے پرگمن دی کلیسیا نوں آکھیا پئی اوہ اپنے جھوٹیاں بُتاں دی بھگتی تے پیسے دھیلے دے فائدے پاؤن توں منع ہو جان تے کھرے ایمان ول پرت آؤن ،مطلب اے اوہناں نوں خبردارکیتا پئی جد تیک اوہ توبہ نا کرن ، اوہ اپنے مونہہ دی تلوار نال اوہناں نال لڑے گا ۔ ایہہ دوجے اکھراں وچ ، اک بوہت سختی اے جیہدے وچ خُدانے خبردار کیتا اے پئی اوہ اوہناں لوکاں نوں سزا دیوے گا جیہڑے بلعام دے عقیدیاں پچھے چلن توں توبہ نئیں کردے ، بھاویں اوہ ایماندار ای کیوں نا سن ۔ جنہاں لوکاں نیں خُدادی ایہہ جھڑک سُنی تے اوس ول پرت آئے اوہناں نوں بدنی تے رُوحانی طور نال زندہ رہنا سی ، پر جنہاں نیں اِنج نئیں کیتا ، اوہناں لوکاں نوں اپنی بدنی تے رُوحانی بربادی لئی اپنے آپ نوں تیار رکھنا سی ۔ خُدادے پاک لوکاں تے خادماں نوں ایس دھرتی تے ایس توں اگے وی برکتاں پاؤن لئی ، اوہناں نوں لازمی طور اُتے خُدا دا کلام سُننا تے اپنے ایمان نال خُداوند پچھے چلنا چاہی دا اے ۔
 
آیت ۱۷:”جِہدے کنّ ہَین اوہ سُن لَئے پئی رُوح کلِیسیاواں نُوں کِیہ آکھدا اے۔ جیہڑا جتے مَیں اوہنوں لُکے ہوئے مَن وِچوں دیاں گا۔ تے اِک چِٹّا پتّھر دیاں گا اوس پتّھر اُتّے اِک نواں ناں لِکھیا ہویا ہوئے گا جِہنُوں اوہدے لین والے دے سِوا کوئی نا جانے گا۔“
سچے پاک لوک ایتھوں تیک پئی اوہ اپنی شہادت نوں وی سینے لاؤن گے ۔ خُداسانوں دسدا اے پئی جیہڑے لوک اوہدے ناں پچھے شہید ہوگئے نیں ، اوہ اوہناں نوں اسمانی کھانے دیوے گا تے اوہناں دے ناں اپنی بادشاہی وچ لکھے گا ۔ بدنی تے رُوحانی طریقے نال زندگی بسر کرن لئی ،سانوں لازمی سُننا چاہی دا اے پئی پاک رُوح خُدا دی کلیسیا نوں کیہ فرماندا اے ۔ جِتن والیاں لئی — مطلب اے ، جیہڑے لوک شیطان پچھے چلن والیاں دے خلاف اپنی لڑائی جِت لیندے نیں— خُداایمان دی راستبازی دیوے گا جیہڑا اوہناں نوں پاپ توں مکتی دیندا اے ، تے اوہناں دے ایمان لئی ،اوہ اوہناں دے ناں زندگی دی کتاب وچ لکھ دیوے گا ۔
بائبل سانوں بوہت چوکھے وکھ وکھ حوالیاں وچ بوہت وار دسدی اے پئی اخیر تیک جرن والیاں نوں مکتی ملے گی ۔ پاک لوکاں نوں ، دوجے اکھراں وچ ، اخیری دناں وچ صبر کرن دی لوڑ اے ، تاں پئی اوہ پانی تے رُوح دی خوشخبری اُتے اپنے ایمان دی راکھی کر سکن ۔ نویں سریوں جمن والیاں دے ناں زندگی دی کتاب وچ لکھے گئے نیں ۔ ایس لئی ،پاک لوکاں نوں لازمی طور اُتے پیسے دھیلے تے جگ دے فائدے پاؤن پچھے نئیں چلنا چاہی دا سگوں ایمان دے راہیں اوہناں اُتے فتح پاؤنی چاہی دی اے ، اوس دیہاڑے تیک جداوہ اخیریں خُدا دے اگے کھلون گے ۔