មានតែផ្លូវតែមួយគត់ ដើម្បីចូលស្ថានសួគ៌

ហេតុអ្វីព្រះយេស៊ូវបានយាងមកផែនដីនេះ?

តើទាំងបុណ្យជ្រមុជ និងទាំងព្រះលោហិតរបស់ព្រះយេស៊ូវមានភាពចាំបាច់សម្រាប់សេចក្តីសង្រ្គោះរបស់យើងឬ?

ហេតុអ្វីវាំងននព្រះវិហាររហែក នៅពេលព្រះយេស៊ូវសុគតនៅលើឈើឆ្កាង? ចូរយើងពិចារណាការពិតនេះម្តងទៀត

អំបោះពណ៌ផ្ទៃមេឃ ពណ៌ស្វាយ និងពណ៌ក្រហមនៅក្នុងព្រះគម្ពីរសញ្ញាចាស់ គឺជាដំណឹងល្អដែលនាំព្រះពរនៃការទទួលបានការអត់ទោសបាប និងការចូលទៅនគរស្ថានសួគ៌ដល់អ្នកដែលជឿ។ ដោយហេតុនេះ វាំងននព្រះវិហារបានរហែក នៅពេលព្រះសុគតនៅលើឈើឆ្កាង បន្ទាប់ពីទ្រង់បានទទួលបុណ្យជ្រមុជហើយ។ សម្រាប់អ្នកដែលជឿលើព្រះយេស៊ូវ នេះគឺជាសេចក្តីពិតនៃដំណឹងល្អអំពីទឹក និងព្រះវិញ្ញាណ ដែលព្រះទ្រង់ផ្ទាល់បានប្រទានឲ្យ។ «ដោយសារព្រះយេស៊ូវបានទទួលបុណ្យជ្រមុជពីលោកយ៉ូហានជំនួសខ្ញុំ ទើបទ្រង់បានសម្រក់ព្រះលោហិតរបស់ទ្រង់ និងបានសុគតនៅលើឈើឆ្កាង ហើយដូច្នេះ បានសងថ្លៃឈ្នួលនៃអំពើបាប ដែលជាការសុគតរបស់ទ្រង់។ កាលទ្រង់ហៀបនឹងសុគត ព្រះយេស៊ូវបានមានបន្ទូលថា «ការស្រេចហើយ!» ហើយនៅវេលានោះហើយ ដែលទ្រង់បានបើកផ្លូវឲ្យយើងចូលទៅនគរស្ថានសួគ៌។ 
ព្រះយេស៊ូវបានយាងមកផែនដីនេះ ដើម្បីសង្រ្គោះអ្នកដែលបានដាច់ចេញពីព្រះ ដោយសារជញ្ជាំងនៃអំពើបាប ដែលពួកគេបន្តសាងសង់។ នេះគឺជាបំណងព្រះហឫទ័យរបស់ព្រះយេស៊ូវ ប៉ុន្តែក្នុងពេលជាមួយគ្នា វាក៏ជាសេចក្តីបង្គាប់ និងសេចក្តីស្រឡាញ់របស់ព្រះវរបិតាសម្រាប់យើងផងដែរ។ ដោយបានស្តាប់តាមបំណងព្រះហឫទ័យរបស់ព្រះវរបិតា ព្រះយេស៊ូវបានទទួលបុណ្យជ្រមុជ ដែលផ្ទេរអំពើបាបរបស់លោកិយនេះទៅលើអង្គទ្រង់។ ដោយសារព្រះយេស៊ូវបានផ្ទុកអំពើបាបរបស់លោកិយនេះ តាមរយៈបុណ្យជ្រមុជរបស់ទ្រង់ ទើបទ្រង់បានយាងទៅសម្រក់ព្រះលោហិត និងសុគតនៅលើឈើឆ្កាង បានមានព្រះជន្មរស់ពីសុគតឡើងវិញនៅថ្ងៃទីបី ហើយដូច្នេះ បានបំពេញសម្រេចព្រះរាជកិច្ចសង្រ្គោះរបស់ទ្រង់។ ការទាំងនេះគឺជាព្រះរាជកិច្ចរបស់ទ្រង់ ដែលត្រូវបានបើកសម្តែងនៅក្នុងអំបោះពណ៌ផ្ទៃមេឃ ពណ៌ស្វាយ និងពណ៌ក្រហម ការអត់ទោសបាប ដែលសង្រ្គោះពួកមនុស្សមានបាបចេញពីអំពើបាបរបស់យើង និងការបំពេញសម្រេចនៃប្រព័ន្ធថ្វាយយញ្ញបូជា។ 
ដោយសារព្រះយេស៊ូវបានបំពេញសម្រេចសេចក្តីសង្រ្គោះ តាមរយៈព្រះរាជកិច្ចរបស់ទ្រង់ ទើបទ្វារចូលស្ថានសួគ៌ដែលគ្មានអ្នកណាអាចចូលបាន ត្រូវបានបើកហើយនៅពេលនេះ។ នេះបង្ហាញថា ទ្វារនៃសេចក្តីសង្រ្គោះលែងត្រូវបានបើក ដោយការដាក់ដៃលើ និងឈាមសត្វ ដែលត្រូវបានប្រើជាតង្វាយយញ្ញបូជានៅក្នុងព្រះគម្ពីរសញ្ញាចាស់ទៀតហើយ ប៉ុន្តែឥឡូវនេះ វាត្រូវបានបើក ដោយសេចក្តីជំនឿដែលជឿលើបុណ្យជ្រមុជដែលព្រះយេស៊ូវបានទទួល និងព្រះលោហិតដែលទ្រង់បានសម្រក់នៅលើឈើឆ្កាងវិញ។ ការដែលវាំងននបានរហែកបង្ហាញពីការបំពេញសម្រេចនៃសេចក្តីសង្រ្គោះ ដែលឥឡូវនេះ ព្រះបានជួយឲ្យគ្រប់គ្នាដែលយល់ និងជឿតាមដំណឹងល្អអំពីទឹក និងព្រះវិញ្ញាណ ដែលព្រះអម្ចាស់បានបំពេញសម្រេច អាចចូលទៅស្ថានសួគ៌បាន។ ដូច្នេះហើយបានជាវាំងននព្រះវិហារត្រូវតែរហែក។ 
អ្នកត្រូវតែចូលទៅនគរស្ថានសួគ៌ ដោយសេចក្តីជំនឿដែលជឿលើបុណ្យជ្រមុជរបស់ព្រះយេស៊ូវ និងព្រះលោហិតរបស់ទ្រង់នៅលើឈើឆ្កាង។ ព្រះ យេស៊ូវដែលឥមានបាបទាល់តែសោះ បានយាងមកផែនដីនេះនៅក្នុងសណ្ឋានសាច់ឈាម ហើយបានទទួលបុណ្យជ្រមុជពីលោកយ៉ូហាន ដើម្បីទទួលយកអំពើបាបទាំងអស់របស់យើង (ម៉ាថាយ ៣:១៥)។ លើសពីនេះ ព្រះអម្ចាស់បានលះបង់ព្រះជន្មរបស់ទ្រង់ផ្ទាល់ទុកជាថ្លៃឈ្នួលនៃអំពើបាប ហើយបានធ្វើជាតង្វាយធួននឹងបាបដ៏អស់កល្បជានិច្ច ដែលយើងត្រូវតែយកទៅជាមួយយើង នៅពេលយើងចូលទៅចំពោះព្រះ។ ដូច្នេះ យើងទាំងអស់គ្នាត្រូវតែជឿ និងទទួលយកព្រះលោហិតដែលទ្រង់បានសម្រក់ បន្ទាប់ពីទ្រង់បានទទួលបុណ្យជ្រមុជ ជាសេចក្តីសង្រ្គោះរបស់យើង។ ដើម្បីសង្រ្គោះមនុស្សជាំតិចេញពីបាប ហើយយកពួកគេធ្វើជារាស្ត្ររបស់ព្រះ ព្រះយេស៊ូវបានបើកទ្វារចូលស្ថានសួគ៌ ដោយការហែករូបកាយរបស់ទ្រង់ផ្ទាល់។ 
ទាក់ទងនឹងការដែលព្រះយេស៊ូវសង្រ្គោះយើង យើងត្រូវតែដឹងថា ទ្រង់មិនគ្រាន់តែសម្រក់ព្រះលោហិតនៅលើឈើឆ្កាងប៉ុណ្ណោះទេ។ រយៈពេលបីឆ្នាំមុនពេលទ្រង់សុគតនៅលើឈើឆ្កាង ទ្រង់បានទទួលយកអំពើបាបរបស់យើងរួចហើយ ដោយការទទួលបុណ្យជ្រមុជនៅក្នុងទន្លេយ័រដាន់។ ដូច្នេះ ព្រះយេស៊ូវបានទទួលបុណ្យជ្រមុជពីលោកយ៉ូហាន សម្រាប់មនុស្សជាតិទាំងមូល ហើយបន្ទាប់មក ទ្រង់ត្រូវបានឆ្កាង ដោយពួកទាហានរ៉ូម៉ាំង។ មុនពេលអ្នក និងខ្ញុំបានកើតមកនៅលើផែនដីនេះ ព្រះយេស៊ូវបានលាងសម្អាតអំពើបាបទាំងអស់របស់យើង ដោយបុណ្យជ្រមុជ និងការសម្រក់ព្រះលោហិតរបស់ទ្រង់រួចទៅហើយ។ 
ការដែលព្រះយេស៊ូវបានទទួលបុណ្យជ្រមុជពីលោកយ៉ូហាន គឺជាវិធី សាស្ត្រនៃសេចក្តីសង្រ្គោះ ដែលទ្រង់បានបំពេញសម្រេច ដើម្បីទទួលយកអំពើបាបរបស់យើងជាមុន។ ហើយព្រះលោហិតដែលព្រះយេស៊ូវបានសម្រក់ គឺជាការសងថ្លៃឈ្នួលនៃអំពើបាបទាំងអស់នោះ។ ដោយសារព្រះយេស៊ូវគឺជាព្រះទ្រង់ផ្ទាល់ បុណ្យជ្រមុជដែលទ្រង់បានទទួល និងព្រះលោហិតដែលទ្រង់បានសម្រក់នៅលើឈើឆ្កាង ពិតជាអាចបង្កើតជាសេចក្តីសង្រ្គោះចេញពីបាបរបស់យើងបាន។ នេះហើយគឺជាតង្វាយយញ្ញបូជាដ៏គ្រប់លក្ខណ៍របស់ព្រះអម្ចាស់ ដែលទ្រង់បានថ្វាយសម្រាប់សេចក្តីសង្រ្គោះដល់មនុស្សជាតិទាំងមូល។ តើអ្នកជឿថា ព្រះបន្ទូលដំណឹងល្អអំពីទឹក និងព្រះវិញ្ញាណបានលាងសម្អាតអំពើបាបរបស់យើង ហើយបានសង្រ្គោះយើងចេញពីអំពើបាប និងទោសទាំងអស់ទេ?

តាមរយៈបុណ្យជ្រមុជរបស់ព្រះយេស៊ូវ និងព្រះលោហិតទ្រង់នៅលើឈើឆ្កាង ឥឡូវនេះ អំពើបាបទាំងអស់របស់មនុស្សជាតិត្រូវបានលាងសម្អាត

ដំណឹងល្អអំពីទឹក និងព្រះវិញ្ញាណ ដែលបានធ្វើឲ្យសូម្បីតែអារក្សក៏ចុះចាញ់ដែរ