[11-10] ជំនឿដែលត្រូវបានបើកសម្តែងនៅក្នុងចានក្លាំ (និក្ខមនំ ៣០:១៧-២១)

សម្ភារៈ៖ ធ្វើពីលង្ហិន ហើយតែងតែមានទឹកពេញ។
អត្ថន័យខាងវិញ្ញាណ៖ លង្ហិនមានន័យថា ការជំនុំជម្រះអំពើបាបទាំងអស់របស់មនុស្សជាតិ។ ដើម្បីទទួលយកទោសនៃអំពើបាបទាំងអស់របស់មនុស្សជាតិ ព្រះយេស៊ូវបានទទួលអំពើបាបរបស់លោកិយនេះដាក់លើអង្គទ្រង់ តាមរយៈការទទួលបុណ្យជ្រមុជពីលោកយ៉ូហាន។ ដូច្នេះ អត្ថន័យនៃចានក្លាំគឺថា យើងអាចបានស្អាតពីអំពើបាបទាំងអស់របស់យើង ដោយការជឿថា អំពើបាបទាំងអស់របស់យើងត្រូវបានផ្ទេរទៅលើព្រះយេស៊ូវ តាមរយៈបុណ្យជ្រមុជរបស់ទ្រង់រួចហើយ។ 
ពួកសង្ឃដែលធ្វើការនៅក្នុងរោងឧបោសថ ក៏បានលាងសម្អាតដៃជើងរបស់ពួកគេនៅឯចានក្លាំផងដែរ មុនពេលចូលទៅក្នុងរោងឧបោសថ ដើម្បីគេចពីសេចក្តីស្លាប់របស់ពួកគេ។ លង្ហិនសំដៅទៅលើការជំនុំជម្រះអំពើបាបទាំងអស់ ហើយទឹកនៅក្នុងចានក្លាំសំដៅទៅលើបុណ្យជ្រមុជដែលព្រះយេស៊ូវបានទទួលពីលោកយ៉ូហាន ដើម្បីទទួលយកអំពើបាបរបស់លោកិយនេះដាក់លើអង្គទ្រង់។ នៅក្នុងន័យផ្សេង ចានក្លាំប្រាប់យើងថា ព្រះយេស៊ូវបានទទួលយកអំពើបាបទាំងអស់ដាក់លើអង្គទ្រង់ ហើយបានទទួលទោសសម្រាប់អំពើបាបទាំងនេះ។ នៅក្នុងព្រះគម្ពីរសញ្ញាចាស់ ទឹកក្នុងចានក្លាំមានន័យថា អំបោះពណ៌ផ្ទៃមេឃនៃរោងឧបោសថ ហើយនៅក្នុងព្រះគម្ពីរសញ្ញាថ្មី មានន័យថា បុណ្យជ្រមុជដែលព្រះយេស៊ូវបានទទួលពីលោកយ៉ូហាន (ម៉ាថាយ ៣:១៥; ១ពេត្រុស ៣:២១)។ 
ដូច្នេះ ចានក្លាំសំដៅទៅលើបុណ្យជ្រមុជរបស់ព្រះយេស៊ូវ ហើយវាគឺជាកន្លែងដែលយើងបញ្ជាក់ជំនឿតាមការពិតថា ព្រះយេស៊ូវបានទទួលយកអំពើបាបទាំងអស់របស់យើង រួមទាំងអំពើបាបជាក់ស្តែងរបស់យើង ហើយបានលាងសម្អាតវាតែម្តងជាសម្រេច តាមរយៈបុណ្យជ្រមុជដែលទ្រង់បានទទួលពីលោកយ៉ូហាន-បាទ្ទីស កាលពីជាង២០០០ឆ្នាំមុន។ 
មានមនុស្សុសុចរិតនៅក្នុងលោកិយនេះ ដែលបានកើតជាថ្មី ដោយការជឿតាមដំណឹងល្អអំពីទឹក និងព្រះវិញ្ញាណ។ ពួកគេគឺជាមនុស្សដែលបានទទួលការអត់ទោសអំពើបាប ដោយការជឿថា អំពើបាបទាំងអស់របស់ពួកគេត្រូវបានអត់ទោស ដោយព្រះរាជកិច្ចរបស់ព្រះយេស៊ូវ ដែលត្រូវបានបើកសម្តែងនៅក្នុងអំបោះពណ៌ផ្ទៃមេឃ ពណ៌ស្វាយ និងពណ៌ក្រហម និងសំពត់ខ្លូតទេសវេញយ៉ាងខ្មាញ់។ ប៉ុន្តែដោយសារសូម្បីតែមនុស្សសុចរិតដែលបានទទួលការអត់ទោសបាបក៏ដោយ ក៏មានភាពមិនពេញលេញនៅក្នុងសាច់ឈាមរបស់ពួកគេដែរ គឺពួកគេធ្វើបាបជារៀងរាល់ថ្ងៃ ហើយអំពើបាបបែបនេះត្រូវបានហៅថា អំពើបាបជាក់ស្តែង។ កន្លែងដែលមនុស្សសុចរិតដែលបានទទួលការអត់ទោសបាប ចូលមកដោះស្រាយបញ្ហាអំពើបាបជាក់ស្តែងរបស់ខ្លួន គឺពិតជាចានក្លាំនេះ ហើយ។ កាលណាមនុស្សសុចរិតប្រព្រឹត្តអំពើបាបជាក់ស្តែង ពួកគេមកឯចានក្លាំនៅក្នុងទីលានរោងឧបោសថ ហើយលាងសម្អាតដៃជើងរបស់ពួកគេ ហើយដូច្នេះ ពួកគេអាចបញ្ជាក់ពីការពិតថា ព្រះយេស៊ូវបានអត់ទោសដល់អំពើបាបជាក់ស្តែងទាំងអស់របស់ពួកគេរួចរាល់ហើយ ដោយការជឿតាមព្រះបន្ទូលព្រះដែលត្រូវបានកត់ត្រាទុក។
នៅក្នុងព្រះគម្ពីរ ជាច្រើនដង ទឹកក៏ត្រូវបានប្រើ ដើម្បីសំដៅទៅលើព្រះបន្ទូលព្រះផងដែរ ប៉ុន្តែអត្ថន័យសំខាន់បំផុតនៃទឹកគឺជាបុណ្យជ្រមុជរបស់ព្រះយេស៊ូវ។ អេភេសូរ ៥:២៦ និយាយថា «ដើម្បីឲ្យទ្រង់បានញែកពួកជំនុំចេញជាបរិសុទ្ធ ដោយបានលាងសំអាតនឹងទឹក គឺជាព្រះបន្ទូល» ហើយ យ៉ូហាន ១៥:៣ និយាយថា «ឯអ្នករាល់គ្នា បានស្អាតហើយ ដោយសារពាក្យដែលខ្ញុំបានប្រាប់»។ ចានក្លាំជួយឲ្យពួកបរិសុទ្ធដែលបានទទួលការអត់ទោសអំពើបាប មានភស្តុតាងថា ព្រះអម្ចាស់បានអត់ទោសដល់អំពើបាបទាំងអស់របស់ពួកគេ តាមរយៈទឹក ទោះបើពួកគេមានសាច់ឈាមមិនពេញលេញក៏ដោយ។ 
១ពេត្រុស ៣:២១-២២ និយាយថា «ដែលទឹកនោះហើយ ជាគំរូពីបុណ្យជ្រមុជ ដែលជួយសង្គ្រោះអ្នករាល់គ្នាសព្វថ្ងៃនេះ មិនមែនជាការសំអាតក្អែលរបស់រូបសាច់ចេញទេ គឺជាសេចក្តីសន្មតិរបស់បញ្ញាចិត្តដ៏ជ្រះថ្លាចំពោះព្រះវិញ ដោយសារព្រះយេស៊ូវគ្រីស្ទទ្រង់មានព្រះជន្មរស់ឡើងវិញ ដែលទ្រង់បានយាងចូលទៅក្នុងស្ថានសួគ៌ គង់នៅខាងស្តាំនៃព្រះ ទាំងមានពួកទេវតា ពួកមានអំណាច និងពួកមានឥទ្ធិឫទ្ធិទាំងប៉ុន្មាន ចុះចូលនឹងទ្រង់ដែរ»។ នៅមុនខទាំងនេះ សាវកពេត្រុសពន្យល់ពីអត្ថន័យខាងវិញ្ញាណនៃទឹកនៅសម័យលោកណូអេ។ ទោះបីជាលោកណូអេបានព្រមានមនុស្សមានបាបអំពីទឹកជំនន់ ដែលនឹងលាងសម្អាតភាពស្មោគគ្រោកនៃផែនដីនេះក៏ដោយ ក៏មានតែមនុស្សប្រាំបីនាក់ប៉ុណ្ណោះ ដែលបានសង្រ្គោះ តាមរយៈទឹក។ ទឹកជំនន់នៅពេលនោះបានសម្លាប់អស់អ្នកដែលមិនបានជឿតាមព្រះបន្ទូលព្រះ។ ហើយនៅពេលនេះ សាវកពេត្រុសបានដកស្រង់ពីគ្រោះមហន្តរាយទឹកជំនន់មកពន្យល់ថា បុណ្យជ្រមុជរបស់ព្រះយេស៊ូវគឺជាគំរូនៃទឹកជំនន់នេះ។ ដូច្នេះ ចានក្លាំគឺជាកន្លែងដែលយើងបញ្ជាក់សេចក្តីសង្រ្គោះរបស់យើងនៅចំពោះព្រះម្តងទៀត ទាំងនៅពេល និងទាំងបន្ទាប់ពីយើងបានសង្រ្គោះ។ 
ពួកបរិសុទ្ធដែលបានសង្រ្គោះចេញពីអំពើបាបរបស់ខ្លួន ដោយសារជំនឿ បានពាក់ព្រះគុណព្រះ ដោយការជឿលើទឹកនៃចានក្លាំ (បុណ្យជ្រមុជរបស់ព្រះយេស៊ូវ) លង្ហិន (ការជំនុំជម្រះរបស់ព្រះចំពោះអំពើបាបទាំងអស់) និងការដែលព្រះយេស៊ូវបានរំដោះពួកគេចេញពីអំពើបាបទាំងអស់របស់ពួកគេ។ ទោះបីជាយើងមានពេញដោយកំហុស និងភាពខ្សោយ ដែលយើងពិបាកទទួលស្គាល់ខ្លួនឯងជាមនុស្សសុចរិតក៏ដោយ ក៏យើងពិតជាអាចបញ្ជាក់ដែឬថា យើងបានសុចរិតទាំងស្រុង ដោយការមានជំនឿលើបុណ្យជ្រមុជរបស់ព្រះយេស៊ូវ (ការទទួលយកអំពើបាប ទឹក) និងការបង្ហូរព្រះលោហិតទ្រង់នៅលើឈើឆ្កាង (ទោសនៃអំពើបាប លង្ហិន)។ ដោយសារយើងជឿតាមព្រះបន្ទូលព្រះ ដែលបានសង្រ្គោះយើងចេញពីអំពើបាបទាំងអស់របស់យើង និងទោសនៃអំពើបាបទាំងនេះរួចហើយ យើងតែងតែអាចធ្វើជាមនុស្សុសុចរិតដែលឥតមានបាបជានិច្ចបាន។ 
ព្រះបន្ទូលព្រះដែលយើងជឿតាម ប្រាប់យើងថា ព្រះយេស៊ូវបានទទួលយកអំពើបាបរបស់យើងដាក់លើអង្គទ្រង់ តាមរយៈបុណ្យជ្រមុជដែលទ្រង់បានទទួលពីលោកយ៉ូហាន បានបង្ហូរព្រះលោហិតទ្រង់នៅលើឈើឆ្កាង ដើម្បីទទួលទោសនៃអំពើបាបទាំងអស់ជំនួសយើង ហើយដូច្នេះ បានសង្រ្គោះយើងទាំងស្រុងចេញពីអំពើបាបរបស់យើង។ ព្រះបានដាក់ចានក្លាំនៅក្នុងទីលាននៃរោងឧបោសថ ដើម្បីឲ្យយើងនឹងបញ្ជាក់ជំនឿរបស់យើងថា យើងគឺជាមនុស្សដែលបានសង្រ្គោះយ៉ាងគ្រប់លក្ខណ៍ចេញពីអំពើបាបទាំងអស់របស់យើង ទោះបើយើងស្ថិតនៅក្នុងស្ថានភាពបែបណាក៏ដោយ។ 

ចានក្លាំជាការបញ្ជាក់ពីសេចក្តីសង្រ្គោះដែលបានអត់ទោសដល់អំពើបាបរបស់យើង

ចានក្លាំត្រូវបានគេប្រើ ដើម្បីលាងសម្អាតភាពកខ្វក់របស់ពួកសង្ឃ នៅពេលពួកគេធ្វើការងារថ្វាយតង្វាយទៅកាន់ព្រះ នៅរោងឧបោសថ។ គេត្រូវការចានក្លាំ ដើម្បីលាងសម្អាតភាពកខ្វក់ដែលពួកសង្ឃប្រឡាក់ពីការសម្លាប់តង្វាយយញ្ញបូជា ការសម្រក់ឈាមវា និងការកាត់វាជា ចំណែកៗ ដើម្បីថ្វាយទៅកាន់ព្រះ នូវតង្វាយដែលនឹងធួននឹងអំពើបាបរបស់ជនជាតិអ៊ីស្រាអែល។ នៅពេលពួកសង្ឃប្រឡាក់ ខណៈដែលកំពុងតែថ្វាយតង្វាយ ពួកគេត្រូវតែលាងនឹងទឹក ហើយចានក្លាំនេះគឺជាកន្លែងដែលលាងសម្អាតភាពកខ្វក់ទាំងអស់នេះ។ 
កាលណាយើងធ្វើបាប ទោះបើខាងវិញ្ញាណ ឬនៅក្នុងសាច់ឈាមក៏ដោយ ហើយកាលណាយើងកខ្វក់ដោយការបំពានបញ្ញត្តរបស់ព្រះ យើងត្រូវតែលាងសម្អាតភាពកខ្វក់ទាំងអស់របស់យើងចេញ ដោយទឹកនៃចានក្លាំ។ កាលណាខ្លួនប្រាណរបស់ពួកសង្ឃប៉ះពាល់នឹងអ្វីមួយដែលកខ្វក់ និងមិនស្អាត ពួកគេត្រូវតែលាងសម្អាតផ្នែកកខ្វក់នៃខ្លួនប្រាណដោយទឹក ទោះបើពួកគេចង់ ឬមិនចង់ក៏ដោយ។ 
ដូច្នេះ កាលណាអស់អ្នកដែលជឿលើទ្រង់ ប៉ះពាល់អ្វីមួយដែលកខ្វក់ និងមិនស្អាត គេប្រើទឹកនៃចានក្លាំ ដើម្បីលាងសម្អាតភាពកខ្វក់នោះ។ សរុបមក ព្រះប្រទានទឹកនៃចានក្លាំ ដើម្បីលាងសម្អាតភាពកខ្វក់របស់អ្នកដែលបានកើតជាថ្មី។ ដូច្នេះ ចានក្លាំមានផ្ទុកនូវសេចក្តីមេត្តាករុណារបស់ព្រះ។ អត្ថន័យនៃចានក្លាំមិនមែនជាប្រដាប់ប្រដាដែលយើងអាចជ្រើសរើសជឿ ឬមិនជឿនោះឡើយ ប៉ុន្តែវាគឺជាប្រដាប់ប្រដាចាំបាច់សម្រាប់អ្នកដែលជឿលើព្រះយេស៊ូវ។ 
ព្រះបានកំណត់ទំហំសម្រាប់ប្រដាប់ប្រដាទាំងអស់ នៅក្នុងរោងឧបោសថ ដែលបញ្ជាក់ពីកម្ពស់ បណ្តោយ និងទទឹងរបស់វា។ ប៉ុន្តែទ្រង់មិនបានបញ្ជាក់ពីទំហំនៃចានក្លាំឡើយ។ នេះគឺជាចរិកលក្ខណៈពិសេសសម្រាប់ចានក្លាំនេះ។ នេះបើកសម្តែងពីសេចក្តីស្រឡាញ់ដ៏មិនចេះប្រួលប្រែ ដែលព្រះមែស៊ីបានប្រទានឲ្យយើង ដែលតែងតែធ្វើបាបជារៀងរាល់ថ្ងៃ។ នៅក្នុងសេចក្តីស្រឡាញ់របស់ព្រះមែស៊ីនេះ មានបុណ្យជ្រមុជរបស់ទ្រង់ ដែលជាទម្រង់នៃការដាក់ដៃលើ ដែលលាងសម្អាតអំពើបាបទាំងអស់របស់យើង។ ដោយសារគេត្រូវប្រើទឹកយ៉ាងច្រើន នៅពេលពួកសង្ឃកខ្វក់ខ្លួន កំឡុងពេលបំពេញតួនាទី ចានក្លាំតែងតែមានទឹកពេញ ជានិច្ច។ ដូច្នេះ ទំហំនៃចានក្លាំអាស្រ័យលើសេចក្តីត្រូវការនេះ។ ដោយសារគេធ្វើចានក្លាំនេះពីលង្ហិន កាលណាពួកសង្ឃលាងដៃជើងនឹងទឹកនេះ ពួកគេគិតអំពីការជំនុំជម្រះបាប។ 
ពួកសង្ឃដែលធ្វើការងារនៅក្នុងរោងឧបោសថ ត្រូវតែលាងសម្អាតភាពកខ្វក់ចេញពីដៃជើងរបស់ខ្លួន ជាមួយនឹងទឹកនៅក្នុងចានក្លាំនេះ។ បើសិនលង្ហិនសំដៅទៅលើការជំនុំជម្រះរបស់ព្រះ នោះទឹកសំដៅទៅលើការលាងសម្អាតបាប។ ហេព្រើរ ១០:២២ និយាយថា «ហើយបានលាងរូបកាយនឹងទឹកដ៏ស្អាតដែរ» ហើយ ទីតុស ៣:៥ និយាយថា «ដោយសារការសំអាតនៃសេចក្តីកើតជាថ្មី ហើយការប្រោសជាថ្មីឡើងវិញ នៃព្រះវិញ្ញាណបរិសុទ្ធ»។ តាមរយៈបទគម្ពីរទាំងនេះ យើងមើលឃើញថា ព្រះបន្ទូលនៅក្នុងព្រះគម្ពីរសញ្ញាថ្មីក៏ប្រាប់យើងអំពីការលាងសម្អាតភាពកខ្វក់នឹងទឹកនៃបុណ្យជ្រមុជផងដែរ។ 
បើសិនពួកសង្ឃលាងសម្អាតភាពកខ្វក់ នៅក្នុងជីវិតរបស់ពួកគេ ដោយទឹកនៃចានក្លាំ នោះយើងដែលជាគ្រីស្ទបរិស័ទដែលបានកើតជាថ្មីនៅសព្វថ្ងៃនេះ ក៏អាចលាងសម្អាតអំពើបាបជាក់ស្តែងទាំងអស់នៅក្នុងរបស់យើង ដោយការជឿលើបុណ្យជ្រមុជរបស់ព្រះយេស៊ូវបានផងដែរ។ ទឹកនៅក្នុងចានក្លាំនៅក្នុងព្រះគម្ពីរសញ្ញាចាស់បង្ហាញប្រាប់យើថា ព្រះ មែស៊ីបានយាងមកផែនដីនេះ ហើយបានលាងសម្អាតអំពើបាបទាំងអស់របស់លោកិយនេះ ដោយបុណ្យជ្រមុជរបស់ទ្រង់ពីលោកយ៉ូហាន។ 
តាមរយៈព្រះគម្ពីរ ព្រះប្រាប់យើងថា មិនត្រឹមតែអំពើបាបរបស់ពួក អ៊ីស្រាអែលប៉ុណ្ណោះទេ ប៉ុន្តែក៏អំពើបាបរបស់មនុស្សទាំងអស់ នៅក្នុងប្រវត្តិសាស្ត្រផងដែរ ដែលត្រូវបានផ្ទេរទៅលើព្រះយេស៊ូវ តាមរយៈបុណ្យជ្រមុជរបស់ទ្រង់។ នៅពេលព្រះយេស៊ូវទទួលបុណ្យជ្រមុជពីលោក យ៉ូហាន ទ្រង់មានបន្ទូលនៅក្នុង ម៉ាថាយ ៣:១៥ ថា «ចូរធ្វើម្តងនេះចុះ ដ្បិតគួរឲ្យយើងធ្វើសំរេចតាមគ្រប់ទាំងសេចក្តីសុចរិតយ៉ាងដូច្នេះ»។ តាម រយៈការទទួលបុណ្យជ្រមុជរបស់ទ្រង់ ដែលជាទម្រង់ដូចគ្នានឹងការដាក់ដៃលើ ពីលោកយ៉ូហានដែលជាតំណាងមនុស្សជាតិ ព្រះយេស៊ូវបានទទួលយកអំពើបាបទាំងអស់របស់មនុស្សជាតិដាក់លើអង្គទ្រង់។ 
ដូច្នេះ ដោយការជឿតាមសេចក្តីពិតថា អំពើបាបទាំងអស់របស់យើងត្រូវបានផ្ទេរទៅលើព្រះយេស៊ូវដ៏ជាព្រះមែស៊ី តាមរយៈបុណ្យជ្រមុជរបស់ទ្រង់ យើងអាចបានស្អាតពីអំពើបាបដ៏កខ្វក់ទាំងអស់នៅក្នុងចិត្តរបស់យើងបាន។ ដោយសារយើងបានផ្ទេរអំពើបាបទាំងអស់របស់យើងទៅលើព្រះយេស៊ូវ ដោយការជឿតាមសេចក្តីពិតនេះ អ្វីដែលយើងត្រូវធ្វើ គឺគ្រាន់តែជឿថា ព្រះរាជបុត្រានៃព្រះបាននាំអំពើបាបរបស់លោកិយនេះទៅឯឈើឆ្កាង បានសម្រក់ព្រះលោហិត និងសុគតនៅលើឈើឆ្កាង បានធ្វើជាតង្វាយយញ្ញបូជាំដ៏គ្រប់លក្ខណ៍សម្រាប់មនុស្សជាតិទាំងមូល ហើយដូច្នេះ បានសង្រ្គោះយើងចេញពីអំពើបាបទាំងអស់របស់យើង។ តើអ្នកជឿតាមសេចក្តីពិតនេះនៅក្នុងចិត្តដែរទេ? អ្នកដែលពិតជាជឿថា ព្រះមែស៊ីបានធ្វើជាតង្វាយយញ្ញបូជារបស់ខ្លួនផ្ទាល់ បានសង្រ្គោះជារៀងរហូតហើយ។ 

បញ្ហាអំពើបាបជាក់ស្តែងក៏អាចត្រូវបានដោះស្រាយ ដោយការជឿលើបុណ្យជ្រមុជរបស់ព្រះដែរ

អ្នកត្រូវតែជឿថា ព្រះអម្ចាស់បានយាងមកឯយើង តាមរយៈអំបោះខ្លូតទេសវេញយ៉ាងខ្មាញ់ ពណ៌ផ្ទៃមេឃ ពណ៌ស្វាយ និងពណ៌ក្រហម

ទឹកនៃចានក្លាំលាងសម្អាតអំពើបាបរបស់យើង

ព្រះបានសង្រ្គោះអ្នក និងខ្ញុំចេញពីអំពើបាប ទាំងអស់របស់យើង