The New Life Mission

خوشخبری کیہ اے

بولی

پانی تے رُوح دی خوشخبری کیہ اے ؟

پولُس رسول نے فرمایا ، ” سو مَیں سبھناں توں پہلاں تُہانوں اوہو گلّ اپڑا دِتّی جیہڑی مَینُوں اَپڑی۔ پئی مسِیح پاک کتاب دے سببّوں ساڈیاں گُناہاں دے لئی مویا۔ تے دفن ہویا تے ترِیجے دِن پاک کتاب دے سببّوں جی اُٹھیا۔ “ (1۔ کرنتھیوں 15 : 3 ۔ 4)۔ فقرے وچ ، "پاک کتاب" دا اکھر ” مسِیح پاک کتاب دے سببّوں ساڈیاں گُناہاں دے لئی مویا“ دا کیہ مطلب اے؟ ایہدا مطلب پُرانا عہد نامہ اے۔ پولُس رسول نے فرمایا ، یسوع ساڈے بدلے پُرانے عہد نامے وچ بھیت تے عہد دے ٹھیک مطابق مر گیا ۔ کویں اوھنے ساڈے پاپاں دا فدیہ دتا ؟ اوھنے ایہہ اپنے چنگیائی دے کماں : اپنے بپتسمے تے سولی اُتے اپنی موت دےراھیں دتا ۔

تہانوں پتہ اے ، مُڈھلی کلیسیا دے دناں وچ ،دوجی صدی دے اخیر تیک کوئی کرسمس نئیں سی ۔ مُدھلے مسیحیاں نیں رسولاں دے نال صرف 6 جنوری نوں ای "یسوع مسیح دے بپتسمے دے دیہاڑے"دی یاد وانگر منایا ، تے صرف ایہہ مُڈھلے چرچ دی یادگار سی ۔

کیوں رسولاں نیں یسوع دے بپتسمے اُتے بوھتا دھیان دتا ؟ ایہہ پانی تے رُوح دی خوشخبری دا بھیت اے، جیہڑا اوھناں نیں یسوع کولوں پایا تے سارے جگ تیک ایہدی منادی کیتی ۔ یسوع نے فرمایا، ” مَیں تینُوں سَچ سَچ آکھنا آں جے کوئی پانی تے رُوح تُھوں نا جمّے اوہ خُدا دی بادشاہی وِچ وڑ نئیں سکدا۔“(یوحنا 3: 5) ۔ بائبل فرماؤندی اے یسوع سانوں ساڈے سارے پاپاں توں بچاؤن لئی پانی تے لہو دے راھیں آیا (1۔ یوحںا 5: 6)۔ لہو دا مطلب سولی اے ، تاں فیر پانی دا کیہ مطلب اے ؟

(میَں تہاڈے اُتے آس رکھدا ھاں پئی تُسیں ایمانداراں دے پانی دے بپتسمے تے مسیح دے بپتسمے نال چکر وچ نئیں پووو گے ۔ مہربانی کرکے یسوع دے بپتسمے دے مطلب اُتے پورا دھیان دیوو۔ ھُن اسیں ایمانداراں دے پانی دے بپتسمے یاں نویں بپتسمے دے نظریے اُتے دھیان نئیں دیندے پئے آں۔ )

یسوع نے یوحنا بپتسمہ دین والے کولوں بپتسمہ کیوں لیا سی ؟ یسوع نے کیوں اپنے بپتسمے دی منادی ایہہ آکھدے ھوئیاں کیتی ” سانُوں چاہیدا ایہہ پئی ایسے طرح ساری راست بازی نُوں پُورا کریئے؟“(متی 3 : 15)

عبرانیوں 10 : 1 دسدااے ، ” کیوں جو شریعت (اوہ قربانیاں) جیہڑی آؤن والیاں چَنگیاں شیواں دا پرچھاواں اے۔۔۔۔“ آؤ اسیں خاص قربانی اُتے دھیان کردے آں جیہڑی خُدا نے پُرانے عہد نامے دے دناں وچ اپنے لوکاں نوں اوھناں دی مکتی لئی دتی ۔ جے کسے نے پاپ کیتا تے اوہ قصوروار سی تاں ، پاپی نوں اپنے پاپ دا فدیہ دین لئی پاپ دی قربانی دینی پیندی سی ۔ آؤ اسیں احبار 1 : 3 ۔ 5 اُتے دھیان کرئیے ۔ "جے اوھدا چڑھاوا گاں وچھے دی سوختنی قربانی ھووے تاں اوہ بے پاپ نَر نوں لیا کے اوھنوں خیمۂاِجتماع دے بوھے اُتے قربان کرے تاں پئی اوہ آپ خُداوند دے اگے قبول کیتا جاوے۔ تے اوہ سوختنی قربانی دے پسودے سر اُتے اپنا ھتھ رکھے فیر اوہ اوھدے ولوں قبول کیتا جاوے گا تاں پئی اوھدے لئی فدیہ ھووے۔ تے اوہ اوس وچھے نوں خُداوند دے اگے قربان کرے تے ھارون دے پُتر جیہڑے کاھن نیں لہو نوں لیا کے اوھنوں اوس قربان گاہ اُتے آلے دوالے چھڑکن جیہڑا خیمۂاِجتماع دے بوھے اُتے ھیگا اے " ایتھے اسیں ویکھ سکدے آں پئی سوختنی قربانی نوں خُدا دے اگے جائز بنن لئی ھیٹھاں دتیاں ھوئیاں تناں شرطاں توں تسلی دینی سی ۔

اوہ اِنج سَن
  • (1) بے پاپ قربانی دے پسو نوں تیار کرنا (آیت-3)۔
  • (2) سوختنی قربنانی دے سر اُتے اپنے ھتھ رکھنا(آیت-4)۔
  • (3) اپنے پاپ دا فدیہ دین لئی اوھنوں قربان کرنا (لہو وگاؤنا) (آیت-5)۔

ایہناں اُتے لکھیا ں ھوئیاں آیتاں وچ، سانوں خُدا دی شریعت دی پکیائی کرنی چاھی دے پئی قربانی دے پسو دے قربان ھون توں پہلوں ھتھاں دے رکھے جان نال پاپ قربانی دے پسو دے سر اُتے لدیا گیا سی ۔ ایہہ اک بوھت ای خاص سچیائی اے ۔ احبار دے ھیٹھاں لکھے ھوئے باباں وچ پاپ دی معافی لئی تہانوں ، " پاپ دی قربانی دے سر اُتے ھتھ رکھنا " وانگر بوھت ساریاں نشانیاں مل سکدیاں نین ۔ احبار 16 : 21 دسدااے ، "تے ھارون اپنے دونویں ھتھ اوس جیوندے بکرے دے سر اُتے رکھ کے اوھدے اُتے بنی اسرائیل دی ساریاں بدکاریاں تے اوھناں دے سارے پاپاں تے غلطیاں دااقرار کرے تے اوھناں نوں اوس بکرے دے سر اُتے رکھ کے اوھنوں کسے بندے دے ھتھ جیہڑا ایس کم لئی من جاوے جنگل وچ گھل دیوے۔ "

جدوں ھارون ، وڈے کاھن نے بکرے دے سر اُتے اپنے ھتھ رکھے تاں ، بنی اسرائیل دے سارے پاپاں نوں بکرے دے سر اُتے لد دتا گیا سی ۔ جدوں اک پاپی قربانی دے سر اُتے اپنے ھتھ رکھدا اے تاں، اوھدے پاپ ایہدے سر اُتے لدے جاندے نیں ۔ ایسے طرحاں ، جدوں کسے بندے نوں کاھن دے کم لئی مقرر کیتا جاندا اے ، تاں اک خادم ، کاھن وانگر اوھنوں قبول کرن لئی ایس بندے دے سر اُتے اپنے ھتھ رکھدا اے ۔ ایس لئی ، "ھتھاں دا رکھیا جانا "قربانی اُتے پاپ لدن دا کم سی ۔ ایہدا مطلب اے "اُتے لدنا۔"

تے فیر پسو دا لہو وگاکے جانوں مار دتا جانا چاھی دا اے ایس لئی پئی "بدن دی جان لہو وچ اے ، تے ۔۔۔۔۔ ایس لئی پئی جان رکھن دے سبب ای لہو فدیہ دیندا اے " (احبار 17 : 11)۔

پر ، بنی اسرائیل اپنے سارے پاپاں نوں سوارن وچ بوھت ماڑے سَن ، ایس لئی پئی اپنے مرن دیہاڑے تیک اوہ پاپ کرن توں بچ نئیں سکدے سَن ایتھوں تیک پئی جدوں اوہ پاپ کردے اوھناں نوں پاپ دیاں قربانیاں دینیاں پیندیاں سَن ۔ ایس لئی خُدا نے اوھناں لئی اک ھور موقع وکھایا پئی ورھے وچ اک واری اوھناں دے پورے ورھے دے پاپاں لئی معافی دتی جاوے۔ ایہہ فدیہ دیہاڑے دی رسم سی ۔ فدیہ دیہاڑے ، ھارون ، وڈے کاھن نے قربانی دے بکرے دے سر اُتے اپنے ھتھ رکھے تاں پئی سارے اسرائیلیاں دے پورے ورھے دے پاپاں نوں اکو ای وار ایہدے اُتے لد دیوے(احبار16 : 21)۔

ھارون اوس ویلے اسرائیلیاں دا نمائندہ سی ایس لئی پئی اوھنے سارے بنی اسرائیل دی تھاں بکرے دے سر اُتے اپنے ھتھ رکھے۔ جدوں اوھنے اپنے آپ بکرے دے سر اُتے اپنے ھتھ رکھے ، تاں بنی اسرائیل (اوس ویلے گھٹوگھٹ 20 ۔ 30 لکھ) دے سارے پورے ورھے دے پاپ اوھدے ایس جائز کم دے راھیں قربانی دے بکرے دے سر اُتے لدے گئے سَن ۔ ایہہ سارے لوکاں لئی ہمیش لئی اک قانون سی (احبار 16 : 29)۔

ایہو ای ، "آؤن والیاں چَنگیاں شیواں دا پرچھاواں" سی (عبرانیوں10 : 1)۔ ھُن، خُدا نے یسوع مسیح دے راھیں " آؤن والیاں چَنگیاں شیواں" نوں مکمل کیتا ۔ آؤ ویکھدے آں پئی یسوع مسیح نے اپنے عہد نوں کس طرحاں پورا کیتا ۔

پہلاں، خُدا باپ نے یسوع مسیح نوں بے پاپ بندے دے بدن وچ خُدا دے وعدہ کیتے ھوئے میمنے وانگر گھلیا ۔ اوہ خُدا دا اکلا پُتر اے ، تے اوہ پاک خُدا وی اے۔ ایس لئی ، اوہ کسے وی پاپ توں اَڈ سارے لوکاں دے بدلے پاپ دی قربانی بنن لئی ٹھیک سی ۔

دوجا ، یوحنا بپتسمہ دین والے نے اوھنوں یردن دے دریا وچ بپتسمہ دتا۔ ایتھے ، سانوں ایہہ جانن دی لوڑ اے پئی یوحنا بپتسمہ دین والا کون سی جنہے یسوع نوں بپتسمہ دتا ۔ یوحنا بپتسمہ دین والا ھارون دی نسل وچوں ، وڈاکاھن سی ۔ زکریاہ کاھن ، یوحنا بپتسمہ دین والے دا باپ ھارون دے پوترے ، ابیاہ دے خنوادے وچ جمیا سی (لوقا 1 : 5 ، 1 ۔ تواریخ 24 : 10)۔ ایہدا مطلب ھیگا اے پئی اوہ وڈا کاھن بنن دا حقدار سی ۔ھور ، یسوع نے یوحنا نوں سارے انساناں وچوں وڈیاں ھون دی منظوری دتی ۔ " مَیں تُہانوں سَچ آکھنا آں پئی اوہناں وِچوں جیہڑے عَورتاں توں جمّے نیں یُوحنّا بپتِسمہ دین والے نالوں وَڈا کوئی وی نئیں اُٹھیا۔ کیوں جو سارے نبی تے توریت وی یُوحنّا تِیکر نبُوّت کر دے آئے سن۔" (متی 11 : 11، 13)۔ ایہدا مطلب اے یوحنا دھرتی اُتے اخیری وڈا کاھن اے تے سارے انساناں دا خُدا دا وعدہ کیتا تے تیار کیتا ھویا شرعی نمائندہ اے ۔

پرانے عہد نامے نے اوھدی پیشین گوئی کیتی ۔"ویکھو میَں اپنے رسوُل نوں گھلاں گا تے اوہ میرے اگے رستہ ٹھیک کرے گا " (ملاکی 3 : 1)۔ "تُسیں میرے بندے موسیٰ دی شریعت مطلب اے اوھناں فرضاں تے حکماں نوں جیہڑے میَں حورب اُتے سارے بنی اسرائیل لئی فرمائے یاد رکھو ۔ ویکھو خُداوند دے وڈیرے تے ڈراؤن والے دیہاڑے دے آؤن توں پہلوں میَں ایلیاہ نبی نوں تہاڈے کول گھلاں گا ۔ تے اوہ باپ دا دل پُتر ول تے پُتر دا باپ ول پھیرے گا ۔ ایس توں پہلاں میَں آواں تے دھرتی نوں لعنتی کراں "(ملاکی 4 : 4 ۔6)۔ یسوع نے فرمایا " تے ایلیّاہ جیہڑا آؤن والا سی ایہو اے۔ چاہو تے مَنّو۔"(متی 11 : 14)۔

یوحنا بپتسمہ دین والا آؤن والا ایلیاہ سی تے سارے لوکاں نوں یسوع مسیح ول پھیرن ، اوھنوں قبول کرن لئی اوھناں نوں تیار کرن والا سی ۔ اوہ یسوع توں چھ مہینے پہلوں جمیا سی۔ اوھنے خُداوند دی راہ نوں تیار کرن لئی جنگل وچ لوکاں نوں توبہ دا بپتسمہ دتا ۔ اوھنوں لوکاں نوں اوھناں دے مکتی داتا یسوع مسیح لئی تیار کرن لئی پُرانے عہد نامے دے قربانی دے بندوبست تے شریعت نوں یاد رکھن دی اگوائی کرن دی لوڑ سی ۔ ایس لئی اوھنے لوکاں نوں بپتسمہ دے کے اوھناں نوں ایہہ احساس دوایا پئی مکتی داتا بوھت چھیتی آوے گا تے اوھدے اُتے ھتھاں دے رکھے جان دی شکل وچ اوہ جگ دے سارے پاپاں نوں مکاوے گا ۔ یوحنا دے بپتسمے نے پاپیاں نوں خُدا ول مُڑن دی گل کیتی ۔ بوھتیاں لوکاں نیں یوحنا دے راھیں خُدا دے کلام نوں سُنیا تے اپنے بُتاں نوں چھڈ دتا تے اپنے پاپاں دا اقرار کردے ھوئیاں خُدا دی ول پرت آئے۔

فیر یسوع گلیل توں یوحنا بپتسمہ دین والے کول یردن وچ بپتسمہ لین لئی آیا ۔ یسوع نے آکھیا، " حالی تے ہون دے کیوں جو سانُوں چاہیدا ایہہ پئی ایسے طرح ساری راست بازی نُوں پُورا کریئے۔"(متی 3 : 15)۔ ایتھے ، یونانی وچ ساری راستبازی "ڈیکایوسون" اے، تے ایہدا مطلب ” راستی، انصاف “ اے ۔ ایہدا مطلب ایہہ ھیگا اے پئی یسوع نے سارے پاپیاں نوں ایناں دے پاپاں توں بالکل انصاف کردے ھوئیاں تے ٹھیک طریقے نال بچایا ۔ بالکل انصاف کر کے تے ٹھیک طریقے نال سارے پاپیاں نوں اوھناں دے پاپاں توں مکتی دین لئی ، یسوع نوں عہد دے مطابق ، "ھتھاں دے رکھے جان " دے راھیں اوھناں دے سارے پاپاں نوں مکاؤنا سی ، جیہڑا خُدا نے پُرانے عہد نامے وچ کیتا سی ۔ یوحنا کولوں بپتسمہ لیندے ھوئیاں سارے لوکاں دے سارے پاپاں نوں مکاؤنا اوھدے لئی اک بوھت چنگا طریقہ سی ۔ ایس لئی پئی یسوع نے اپنے بپتسمے دے راھیں جگ دے سارے پاپاں نوں قبول کیتا، دوجے ای دیہاڑے ، یوحنا بپتسمہ دین والے نے گواھی دتی ، "ویکھو خُدا دا برّہ جیہڑا دُنیا دا گُناہ چُک لے جاندا اے۔ "(یوحنا 1 : 29)۔ یوحنا بالکل یسوع اُتے ھتھاں دے رکھے جان دے راھیں بپتسمہ دین لئی آیا سی ۔ جیہڑے ویلے یوحنا نے یسوع مسیح دے سر اُتے اپنے ھتھ رکھے ، خُدا دی شریعت دے مطابق جگ دے سارا پاپ اوھدے اُتے لدے گئے سَن ۔

تیجا، اوھنوں ساڈے پاپاں دی معافی لئی سولی اُتا چاڑھیا گیا سی ۔ اپنے اخیری ساہ توں پہلوں اوھنے آکھیا ، " پُورا ہویا!"(یوحنا 19 : 30) اوھنے ساڈے پاپ دا مُل اُتارن لئی اپنا سارا لہو وگایا ۔ تے اوہ تیجے دیہاڑے مویاں وچوں جیوں اُٹھیا، تے اسمان اُتے چڑھ گیا ۔ اوھنے اپنے بپتسمے تے سولی اُتے اپنے لہو نال مکمل طور اُتے سارے جگ دے سارے پاپ مکا دتے ۔

پولُس نے فرمایا ،" مسِیح پاک کتاب دے سببّوں ساڈیاں گُناہاں دے لئی مویا۔"(1۔ کرنتھیوں 15: 3)۔ ھُن، کیہ تُسیں سمجھدے او پئی پُرانے عہد نامے وچ پاپ دی معافی لئی کویں قربانی دے پسو قربان کیتا گیا سی ، تے کیوں ایہہ آؤن والے دناں دی چنگیاں شیواں دی تصویر اے ؟

قربانی دے پسو نوں قربان کرن توں پہلوں "اُتےھتھاں دا رکھیا جانا" سی ۔ جے کسے نے پاپ دی قربانی چڑھاؤن ویلے ، "قربانی اُتے ھتھاں دا رکھیا جانا" چھڈ دتا سی تاں ، ایہدی بے انصافی دے سبب ایہنوں اوھدے پاپ توں معاف نئیں کیتا جا سکدا سی ۔ خُدا نے کدی ایہو جیہیاں غیر شرعی قربانیاں قبول نئیں کیتیاں۔ ھتھاں دے رکھے جان نوں کڈھدے ھوئیاں قربانی چڑھاؤنا ایہہ خُدا دی شریعت دے خلاف سی ۔

یسوع ساڈے سارے پاپاں نوں مکاؤن لئی اپنے راستباز عمل دے راھیں ایس جگ وچ آیا (رومیوں 5 : 18)۔ ایہدا راستباز عمل ایہہ سی پئی اوھنے جگ دے سارے پاپاں نوں مکاؤن لئی یوحنا بپتسمہ دین والے کولوں بپتسمہ لیا تے اوس پاپ دا مُل اُتارن لئی اوھنوں سولی اُتے مرنا پیا ۔ اوہ اپنے بپتسمے تے لہو دے راھیں آیا سی ۔ پر بے نصیبی نال ، بوھتے مسیحی اوھدے راستباز عمل دا صرف ادھا حصہ جاندے نیں ۔ سانوں پانی تے رُوح دی خوشخبری دا پورا حصہ جاننا چاھی دا اے ۔ اوھدی خوشخبری دے ایس خاص حصے نوں چھڈ کے اوھدے اُتے ایمان رکھنا غیر شرعی تے جھوٹ اے ۔

یوحنا رسول نے اپنے پہلے خط وچ اوھدی خوشخبری دے مکمل حصے نوں واضح کیتا اے ۔ "ایہہ اوہ اے جیہڑا پانی تے لہو دوہاں دی راہِیں آیا سی یعنی یِسُوع مسِیح نِرا پانی دے راہِیں نئیں۔ سگوں پانی تے لہو دو آں دی راہِیں۔"(1۔ یوحنا 5 : 6) ۔

اسیں پاپی عادت نال جمے آں ، تے اپنی اخیری ساہ تیک پاپ کردے آں ۔ اسیں پاپ توں ھٹ کے کُجھ نیئں کر سکدے تے اسیں خُدا دی سزا توں بچ نیئں سکدے ۔ اسیں سارے انسان دوزخ وچ جان دا نصیب رکھدے آں ، " کیوں جو گُناہ دی مزدُوری مَوت اے۔"(رومیوں 6 : 23)۔ "پر جِتّھے گُناہ بُہتا ہویا۔ اوتھے فضل حدّوں باہر وَدّھ ہویا۔ کیوں جو خُدا دُنیا نُوں اجیہا پیار کِیتا پئی اوس اپنا اِکلَوتا پُتر بخشیا تاں جو جیہڑا اوہدے اُتّے اِیمان لیاوے اوہ ہلاک نا ہوئے سگوں اوہنوں سدا دی زِندگی مِلے۔"(رومیوں 5 : 20، یوحنا 3 : 16)۔

یسوع مسیح خُدا دا پُتر خُدا دا میمنا بن کے ایس جگ وچ آیا سی ۔ جدوں اوھنے یردن دے دریا وچ یوحنا بپتسمہ دین والے دے راھیں بپتسمہ لیا تاں اوھنے جگ دے سارے پاپاں نوں چُک لیا ۔ سارے انساناں دے نمائندے وانگر ، یوحنا نے یسوع دے سر اُتے اپنے ھتھ رکھے ،تے اوس ویلے ، جگ دا سارا پاپ یسوع اُتے لدیا گیا سی ۔ ایس طرحاں یسوع نے ساڈے سارے پاپاں نوں اپنے بپتسمے دے راھیں چُک لیا تے اوھناں نوں سولی اُتے لے گیا ۔ اوھنے اپنے سارے پاک لہو نوں ساڈے پاپ دے مُل وانگر وگا دتا ، تے جگ دے سارے پاپ دا مکمل طور اُتے فدیہ دتا ۔

ایس لئی اوہ سولی اُتے اپنی آخری ساہ توں پہلوں بوھت اُچی بولیا، " پورا ھوگیا! " یسوع نے کیہ پورا کیتا سی ؟ سارا پاپ تے اوھدی سزا اوھدے راستباز عمل نال پوری ھوئی سی ، دوجے اکھراں وچ ، اسیں اوھدے بپتسمے تے سولی اُتے اوھدی موت دے راھیں اسیں اپنے سارے پاپاں توں معافی پائی سی ۔ یسوع مسیح نے گھٹوگھٹ 2000ء ورھے پہلوں جگ دے سارے پاپ نوں مکادتا ، تے اک نواں تے زندہ رستہ مقرر کیتا (عبرانیوں10 : 20)۔ ھُن اوھدے فضل دا ویلا اے ۔ جیہڑا کوئی وی اوھدے بپتسمے تے سولی اُتے اوھدی موت اُتے ایمان رکھدا اے اوہ اپنے سارے پاپاں توں معاف کیتا جاندااے ، تے پاک رُوح اوھدے وچ رھندا اے (اعمال 2 : 38)۔ ھیلیلویاہ !

تے اسیں ھور کیہ آکھیے! بائبل وچ ایہو جیہاں بوھت ساریاں آیتاں نیں جیہڑیاں اوھدے بپتسمے بارے آکھدیاں نیں پئی اوہ ساڈی مکتی لئی یسوع دا بوھت لازمی راستباز عمل اے (متی 3 : 13 ۔ 17، 1۔ پطرس3 : 21 ، یوحنا 6 : 53 ۔ 55، افسیوں 4 : 5 ، گلتیوں 3 : 27 ، اعمال 10 : 37 ، وغیرہ )

کیہ تُسیں ایس سچیائی اُتے ایمان رکھدے او؟ کیہ تہاڈے وچ کوئی پاپ نئیں ھیگا اے؟ کیہ یسوع نے تہاڈے پیدا ھون توں لے کے ھُن تیک تہاڈا سارا پاپ لیا اے ؟ کیہ اوھنے ھُن توں لے کے تہاڈی آخری ساہ تیک تہاڈے سارے پاپ 2000ء ورھے پہلوں اپنے بپتسمے دے راھیں چُک لے؟ فیر کیہ تُسیں اوھدے بپتسمے تے اوھدے لہو اُتے ایمان رکھن دے راھیں مکمل طور اُتے پاک ھوگئے او ؟

مسیحیت نوں اج پانی تے رُوح دی خوشخبری نوں لبھنا چاھی دا اے ۔ جیہڑا وی پانی تے رُوح دی خوشخبری دے بارے وچ بوھتی تفصیل نال جاننا چاؤھندا اے تاں ، The New Life Mission دے نال گل بات کرن توں نہ جھکے ۔ تُسیں ریورنڈ پول سی جونگ دیاں کتاباں / برقی کتاباں مفت لے سکدے او ۔