Search
ภาษาไทย
ภาษาไทย
เนื่องจากสถานการณ์ของ โควิด-19 และการหยุึดชะงักของบริการไปรษรีย์ระหว่างประเทศ
ราจึงได้ระงับ 'บริการหนังสือฟรี' ป็นการชั่วคราว ในสถานการณ์เช่นนี้ราไม่สามารถส่งหนังสือทางไปรษณีย์ถึงคุณได้ในตอนนี้
ขอให้โรคระบาดนี้หมดไปในร็ววัน และปิดบริการไปรษณีย์อีกครั้ง

คำสอน

مضمون 9: رومیوں (رومیوں دی کتاب اُتے تفسیر)

[7-4 باب] ساڈا بدن جیہڑا صرف بدن  دی سیوا کردااے <رومیوں ۷:۱۴۔۲۵>

>رومیوں ۷:۱۴۔۲۵<
”ایس لئی پئی سانوں پتہ ہیگا اے پئی شریعت تاں رُوحانی  ہیگی اے پر میَں بدنی تے پاپ دے ہتھیں وکیا ہویا ہاں ۔ تے جو کُجھ میَں کردا ہاں اوہنوں نئیں جان دا ایس لئی پئی جیہدا میَں ارادہ کردا ہاں اوہ نئیں کردا سگوں جنہوں میَں بھیڑا سمجھدا ہاں اوہو ای کردا ہاں ۔ تے جے میَں اوہدے اُتے عمل کردا ہاں جیہدا ارادہ نئیں کردا تاں میَں من دا ہاں پئی شریعت خوب ہیگی اے ۔ ایس لئی ایس سبب توں اوہدا کرن والا میَں نہ رہیا سگو ں پاپ ہیگا اے جیہڑا میرے اندر وسیا ہویا اے ۔ایس لئی پئی مینوں پتہ ہیگا اے پئی میرے اندر مطلب اے میرے بدن وچ کوئی نیکی وسی ہوئی نئیں سگوں ارادہ تاں میرے اندر ہیگا اے پر نیکی دے کم میرے کولوں نئیں ہوندے ۔ ایس لئی جیہڑی نیکی دا ارادہ کردا ہاں اوہ تاں نئیں کردا پر جیہڑی  بدی دا ارادہ نئیں کردا اوہنوں کر لیندا ہاں ۔ ایس لئی جے میَں اوہ کردا ہاں جیہدا ارادہ نئیں کردا تاں اوہدا کر ن والا میَں نہ رہیا سگوں پاپ ہیگا اے جیہڑا میرے اندر وسیا ہویا اے ۔ ایس لئی مینوں ایہو جیہی شریعت ملی اے پئی جدوں نیکی کرن دا ارادہ کردا  ہاں تاں بدی میرے کول آن پوہنچدی اے ۔ ایس لئی پئی اپنے اندر دی اِنسانیت دے سبب تاں میَں خُدا دی شریعت نوں بوہت چنگیاں سمجھدا ہاں ۔ پر مینوں اپنے ہڈا ں پیراں وچ اک ہور طرحاں دی شریعت نظر آؤندی اے جیہڑی میری عقل دی شریعت نال لڑ کے مینوں اوس پاپ دی شریعت دی قید وچ لَے آؤندی اے جیہڑی میرے ہڈاں پیراں وچ ہیگی اے ۔ ہائے میَں بوہت لیکھاں ماریابندہ ہیگا واں!ایس موت دے بدن توں مینوں کیہڑا چھڈاوے گا ؟ اپنے خُداوند یسوع مسیح دے راہیں خُدا دا شکر کردا ہاں ۔ ایس لئی میَں اپنی عقل نال تاں خُدا دی شریعت دا پر بدن نال پاپ دی شریعت دے حکم ہیٹھا ں ہیگا واں ۔  “
 
 

اوہدا فضل بوہت اوّلا ہیگا اے !

 
اسیں اپنے  خُدا دا شکر اداکردے آں جنہے سانوں ایناں گرمیا ں وچ بائبل میٹنگ دی اجازت دتی اے تے موسم اُتے حکم چلاؤندااے تے سانوں ایہہ سوہنا دن دین لئی سمندری ہواواں نوں روکیا ۔ اوہنے لوکاں نوں گھلیا اے تے سانوں اپنا کلام دین لئی اپنے لوکاں نوں اکٹھاکیتا تے سانوں اک دوجے نال تے پاک رُوح نال میل جول وچ خوشی مناؤن دی اجازت دتی ۔
خُداجیوندااے ! اوہدافضل بوہت اوّلا ہیگا اے ! لوک ہُن سوچدے نیں پئی سمندری طوفان     ” ڈگ “ لازمی طور اُتے ساڈے ملک وچ آوے گا ،ایس لئی سرکاری بندے ، اِن ۔ جا ، کالونی دے علاقے وچ سارے تنبُو لاؤن والیاں نوں کڈھن لئی تھاں تھاں پھرن گے۔ اج دوپہر دے بعدوں میَں اِن ۔ جا پِنڈ وچ گیا ۔میَں لوکاں نوں اک دوجے نال گل کردیاں سُنیا۔ سمندری طوفان توں دُکھی ہو کے ،اندازہ لاؤندیاں ہویاں پئی ایہہ طوفان بوہت زور والا تے برباد کرن والا ہون والا سی ۔
پر کیہ ہر شے ایسے طریقے نال ہووے گی جیہدی اوہناں نیں آس لائی ہوئی اے ، ایتھوں تیک پئی جویں اسیں ، خُدا دے پُتر ، ایتھے گرمیاں دی پناہ لئی اکٹھے ہوئے آں ؟ جے اسیں دعا منگدے آں ،ایہہ خُدا دے فضل نال نئیں وسے گا ، کیہ خُدا اپنے لوکاں نوں جانوں مار دیوے گا؟خُدا موسم اُتے حکم چلاؤندااے ، پر اوہ اِنج ساڈے ایمان دی نیہ اُتے کردااے ۔ اوہ دانائی نال کم کردا اے ، تے ایہدا مطلب ہیگا اے پئی اوہ ساڈے وچوں اوہناں نوں نئیں پرکھے گا جنہاں دا ایمان حالے اوہناں نوں حیران کرن دے راہیں شروع ہو گیا اے ۔  ” کیوں خُداسانوں ایہہ سمندری طوفان دیوے گا جدوں اسیں ایس گرمی دی پناہ نوں پا چُکے آں؟  “
میَرےوچ سمندری طوفان  ” ڈگ “ نوں روکن دی طاقت نئیں ہیگی اے ،جدوں میَں ایہدے بارے خبراں وچ سُن دا ہاں ۔سب کُجھ جیہڑا میَں کر سکدا ساں ، اوہ دعا منگنا سی ۔ گرمیاں دی ایہہ بائبل میٹنگ پہلوں ای ترتیب دتی گئی سی ، اسیں پہلا ں ای اکٹھے ہو گئے ساں ، تے کُجھ ہور نئیں ہیگا سی جیہڑا میَں اوہدے بارے کر سکدا ساں ۔ تے میَں دکھی ساں پئی ایہہ عبادت والی تھاں خورے سمندری طوفان دے اَگے کھلوتی رہن لئی  بوہت تگڑی نئیں ہیگی سی ، اصل وچ پئی ایہہ عمارت پہلاں توں بنے ہوئے مکان دے سامان نال بنائی گئی سی ۔ ایس لئی میَں رہ نہ سکیا سگوں خُدا اُتے بھروسہ کیتا ۔ میَں دعا منگی ،  ” یا خُدا ساڈی مدد کر ۔ساڈی راکھی کر ۔ یسوع دے نام وچ ،میَں منگدا ہاں ، آمین ۔ “ تے ایمان تگڑا ہیگا اے ، خُدا نے سمندری طوفان ڈگ نوں روک دتا ! میرا ایمان ہیگا اے پئی خُدا  ہر شے  نوں جان دا اے ۔ اوہ سانوں راکھی ول لَے جاندا اے ایس لئی پئی اوہ ساڈے حالاں بارے ساڈے توں بوہت چنگا سمجھدا اے ۔
موسم بوہت باریکی نال سانوں دسدا اے پئی خُدا جیوندااے ۔ میَں اپنے تنبُو وچ بندوقاں دیاں گولیاں دے چلن وانگر اَسمانی بجلی داکھڑاک سُنیا ۔ ایس لئی ، میَں اپنے تنبُو وچوں باہر آگیا تے اَسمان ول ویکھیا ۔ اَسمان گھُپ ہنیر سی تے کالے بدل کالونی اُتے آؤندے پئے سَن ۔ ایس لئی میَں پوچھیا ، ” اے خُداوند ، کیہ بدل آؤندے پئےنیں ؟ “میراایمان ماڑا پین لگیا ،  ” اے خُداوند ، کیہ ہوندا پیا اے ؟ کیہ طوفان ایتھے اپڑ گیااے ؟ کیہ ایہہ سچ مُچ ایتھے ہیگا اے ؟  “ پر میَں دعا منگی تے خُدا اُتے ایمان رکھیا سی تے ایس ایمان اُتے خُدا نوں ایہہ آکھدیاں ہویاں ، قائم رہیا ، ” اے خُداوند،میَں ایمان رکھدا ہاں پئی تُوں ساڈی راکھی کریں گا ۔ میَں تیرے اُتے ایمان رکھدا ہاں ۔ میَں پہلاں ای  ایمان رکھدا ساں پئی تُوں ساڈے لئی کم کریں گا ۔ “خُدا نے سچ مُچ سانوں برکت دتی ،جویں اسیں ایمان رکھیا سی ، اسیں اپنے دلاں نال اوہدی وڈیائی کردے آں ۔
 
 

بدن خُود غرض تے بدکار ہیگا اے

 
اسیں کُجھ نہیں کر سکدے جے خُدا ساڈے لئی کم نہ کردا ۔ ساڈا خُدا سانوں قائم رکھدا تے ساڈی مدد کر دااے ۔ آؤ ، اسیں خُدا دے کلام اُتے اک نظر مارئیے ۔ رومیوں ۷ : ۱۴ ۔ ۲۵سانوں دسدا اے پئی پولُس رسول نے اپنے آپ نوں بدن وچ قید تے پاپ ہیٹھاں وکن دے طور اُتے ویکھیا ۔  اوہنوں ایہہ وی پتہ لگیا پئی ایہہ اک قانون ہیگا سی پئی بدن بچ نئیں سکدا سی سگوں پاپ کردا سی جدوں اوہ جیوندا سی ۔
اسیں جیہڑے نویں سریوں جمے آں ، اسیں وی پاپ کردے آں ، بھاویں اسیں بدن نال نیکی کرنا چاؤہندے آں ۔ رومیوں ۷ : ۱۹ دسدا اے ،  ” ایس لئی جیہڑی نیکی دا ارادہ کردا ہاں اوہ تاں نئیں کردا پر جیہڑی  بدی دا ارادہ نئیں کردا اوہنوں کر لیندا ہاں ۔ “ اسیں ویکھدے آں پئی ساڈے اندر کوئی نیکی نئیں وسدی اے ۔ جیہدے سبب توں اسیں ایہہ سوچدے ہوئیاں دکھی ساہ لیندے آں ،   ”  کیہ میَں اپنے ایمان نوں قائم رکھن دے لائق ہوواں گا ۔ “ اسیں اپنے بے آس تے بدکار بدن دے راہیں بھیڑے طریقے نال دکھی ہوندے آں ۔ کیہ تہانوں پتہ ہیگا اے ،بدن کناں خود غرض ہیگا اے ؟ رومیوں ۷ : ۱۸ دسدا اے ، ” ایس لئی پئی مینوں پتہ ہیگا اے پئی میرے اندر مطلب اے میرے بدن وچ کوئی نیکی وسی ہوئی نئیں سگوں ارادہ تاں میرے اندر ہیگا اے پر نیکی دے کم میرے کولوں نئیں ہوندے ۔ “
اسیں ہمیشہ اپنے آپ بارے سوچد ے آں ، ایتھوں تیک پئی جویں اسیں بدکاراں دی نسل وچوں ہیگے آں ۔ کیہ تہانوں پتہ ہیگا اے پئی اسیں سارے لوک کنے خود غرض ہیگے آں ؟ سانوں لازمی طور اُتے پتہ ہیگا پئی اسیں پاپی ہیگے آں ، پر اسیں خُداوند  ول نئیں جاندے ،اسیں اپنے ول ای جاندے آں ۔ لازمی طور اُتے خُداوندنیک ہیگا اے تے اوہدی مرضی وی نیک ہیگی اے ۔ سانوں پتہ ہیگا اے پئی اسیں پاپی ہیگے آں ، پر فیر وی اپنے آ پ نال اینی محبت کردے آں ۔ خُدا سانوں حکم دیندااے ، اسیں اوہدے برابر دوجے دیوتیاں نوں نہ رکھیے ۔ خُدا نے سانوں ایہہ تعلیم دین لئی دسیا اے ۔
اسیں اپنے آپ نال محبت کردے آں تے سارے کم اپنے آپ لئی کردے آں ، بھاویں سانوں پتہ ہیگا اے پئی اسیں کنے خود غرض تے کنے خود راستباز ہیگے آں ۔اسیں ڈکو ڈولے کھاندے آں جدوں کوئی  شے سانوں  فائدہ دیندی اے ، پر اسیں بوہت گھٹ دل والے تے خُداوند لئی کمینے ہیگے آں ! ایس لئی پئی سانوں کوئی عقل نئیں ہیگی اے ۔ بچے کدی اپنے بسکٹ نئیں دیندے ۔ اوہ پکے ہتھاں نال پھڑدے نیں اوہناں دے ہتھاں وچ کیہ ہیگااے جدوں تیک ایہہ سارا ٹُٹ نئیں جاندا، تے اوہ اوہنوں کدی نئیں ونڈدے ،ایس لئی پئی نکے ہیگے نیں  تے اوہناں نوں کوئی عقل نئیں ہیگی اے ۔ اوہناں نوں نئیں پتہ ہیگا پئی جگ وچ بسکٹاں توں وی بوہتیاں مہنگیاں شیواں ہیگیاں نیں ۔ بچے ایہو جیہے ای ہوندے نیں ؛ اسیں وی ایہو جیہے ای ہیگے آں ۔
ساڈے پاپ دھوتے گئے سَن ، پراسیں فیر وی خود غرض ہیگے آں ۔ اسیں خُداوند دا سانوں بے پاپ بناؤن لئی تے اپنی طاقت دے راہیں سانوں پاک رُوح دین لئی شکر ادا کردے آں ۔ پر ساڈے اندر پاپاں توں معافی پاؤن تے نویں سریوں جمن دے بعدوں جنگ شروع ہو جاندی اے ۔ ایہہ جنگ بدن تے رُوح دے وچکار ہیگی اے ۔ اسیں نویں سریوں جمن دے بعد خوش ہوندے آں ، پر اسیں چھیتی نال ایس جنگ دے سبب دُکھی ہوندے آں ۔ پر خُداوندہُن چاؤہندااے پئی اسیں اوہدی بادشاہی لئی کم کرئیے ۔ 
ساڈے خُداوند نے ساڈے لئی اپنا جلال چھڈ دتا ۔ اوہ بدن وانگر گھلیا گیا ۔ اوہ جگ لئی سوہنے بندے وانگر نئیں گھلیا گیا سی ۔ اوہ جگ وچ حلیم بندے وانگر آیا ، خورے نکیا ں لتاں تے بے صورت بندے وانگر ۔ اصل وچ ، ایہہ آکھیا گیا اے پئی یسوع بالکل سوہنا نئیں ہیگا سی ۔ یسعیاہ نے آکھیا ،  ” پر اوہ اوہدے اگے گُلی وانگر تے سُکی دھرتی وچوں جڑ وانگر پھُٹ پیا ۔ نہ اوہدی کوئی شکل تے صورت ہیگی اے نہ سوہنا تے جدوں اسیں اوہنوں غور نال ویکھیے تاں کوئی حسن تے جمال نئیں پئی اسیں اوہدی تمنا کرئیے۔ “ (یسعیاہ ۵۳ : ۲)۔فیر وی خُداوند نے ساڈے سارے پاپ چُک لَے نیں ۔
ساڈابدن صرف پاپ دی سیوا کردا اے ۔ پولُس نوں پتہ ہیگا سی پئی اوہدا بدن پاپ دا چشمہ سی، اسی لئی اوہنے آکھیا ،  ” ایس لئی پئی جیہدا میَں ارادہ کردا ہاں اوہ نئیں کردا سگوں جنہوں میَں بھیڑا سمجھدا ہاں اوہو ای کردا ہاں ۔ “ پر اوہنے کھول کے نئیں دسیا ایس لئی پئی اوہنوں اپنے پاپاں توں شرم آؤندی سی ۔
اسیں گندگی دے ڈبیاں وانگر ہیگے آں ۔ اسیں پاپ دے ڈھیر ہیگے آں ۔ اسیں اپنےآپ نوں اپنے پچھے گند دی ٹرالی چھڈدیاں ہویاں ویکھ کے بوہت دکھی ہوواں گے ۔ پر اپنے اندر نال چمبڑ کے ، اسیں خُدا نوں آکھدے آں ،  ”  اے خُداوند مینوں ایہہ نئیں کرنا چاہی دا تے میَں تیری مرضی مطابق جیوندا رہنا چاؤہندا ہاں ،پر میَں اینوں فیر کیتا ۔ اے خُداوند ، میَں اینوں کویں روک سکدا ہاں ؟  “
 
 

اسیں خُدا دا شکر ادا کر سکدے آں جدوں سانوں ساڈی بدکاری دا پتہ لگدااے

 
سانوں لازمی طور اُتے فضل بارے سوچنا چاہی دا جیہڑا یسوع مسیح ،ساڈے خُدا نے سانوں دتا ۔ سانوں لازمی طور اُتے سوچنا چاہی دااے پئی خُدا نے ساڈے دلاں نال کیہ کیتا اے ۔ صرف اوس ویلے ای سانوں پتہ لگ سکدا اے پئی کیہ ٹھیک ہیگا اے، تے صرف فیر ای اسیں خُداوند د ی خدمت شروع کر سکدے آں ۔ا یہہ خُدا دے فضل تے اوہدے اُتے ایمان دے راہیں ہیگا اے پئی اسیں خُدانوں لبھدے آں، اپنا آپ نوں اوہنوں دیندے آں ، تے کسے وی اوکھے ویلے اُتے فتح پاؤندے آں جیہڑا سانوں اڈیکدا اے ۔ جیہڑے ویلے ای اپنے دلاں نال خُدا پچھے چلدے آں تے اوہدے نال چلدے آں ۔
اسیں اپنے آپ دا انکار شروع کردے آں جدوں سانوں پتہ لگدااے پئی اسیں خُدا دے اگے پاپی تے فضول ہیگے آں ۔ اسیں احساس کردے آں پئی اپنے بدن دے سبب خُداوند دی خدمت کرن توں اَڈ پاپ توں بچنا اوکھا ہیگا اے تے اسیں ککھ نئیں کر سکدے ، بھاویں اسیں بوہت برکتا ں پائیاں نیں ، اپنیاں کمیاں دے سبب ،میَں خُداداشکر ادا کردا ہاں جنہے مینوں اپنی خدمت لئی برکت دتی ۔ جے خُدا نےمینوں خوشخبری لئی  اپنی خدمت وچ نہ لیا ہوندا، میَں صرف پاپ داڈھیر رہندا جیہڑا حالے تیک بدن وچ ہیگا ساں تے کدی اوہدے اگے کوئی چنگے کم نئیں کرےگا ۔
میَں اوہدی خدمت لئی ، مینوں لائق بناؤن دے واسطے خُداداشکر ادا کردا ہاں ۔ ایس لئی میَں ایہو جیہی دعا منگدا ہاں ۔  ” اے خُداوند ، تیرا شکر ہووے ۔اے خُداوند، مینوں پیسیاں دی لوڑہیگی اے ، پر میرے کول کُجھ نئیں ہیگا ۔ میَں ایہہ سارے کم تیرے لئی کرنا چاؤہندا ہاں ، بھاویں میرے کول کُجھ نئیں ہیگا اے ۔مہربانی کر کے میری مدد کر ۔ میَں پیسیاں نوں اپنے لئی نئیں خرچاں گا ، سگوں خُداوندلئی خرچاں گا ۔ جے میَں اپنےآپ  اُتے پیسے لاؤندا ہاں،بدن سُکھ پاوے گا ۔پر میَں اینوں خُداوند تے چنگے کماں لئی خرچ کرنا چاؤہندا ہاں ۔ ایہہ پیسے میرے لئی خاص ہیگے نیں ،ایس لئی پئی میَں اینا ں لئی بوہت چوکھی محنت کیتی اے ۔ ایس لئی پئی ایہہ میرے لئی خاص ہیگے نیں ، میَں اوہناں نوں تیرے اگے لیاؤندا ہاں۔ مہربانی کر کے ایناں نوں اپنے چنگیاں کماں اُتے خرچ کر۔ “
اوہ جیہڑے اپنی بدکاری نوں جان دے نیں ، ایہہ جان دے نیں پئی اوہناں وچ کوئی نیکی نئیں وسدی اے ۔ میرے ایناں اکھراں دا کیہ مطلب ہیگااے ، ’ کوئی نیکی اوہناں وچ نئیں وسدی اے ؟ ‘ ایہدا مطلب ہیگا اے پئی اوہناں دے بدن وچ صرف بدکاری دے کم ہیگے نیں ۔ صرف اپنے آپ لئی جیونا پاپ ہیگا اے ۔
 
 
اسیں یسوع مسیح اپنے خُداوند دے راہیں خُدا دا شکر ادا کردے ہاں
 
پولُس نے اقرار کیتا ، ” ہائے میَں بوہت لیکھاں ماریابندہ ہیگا واں!ایس موت دے بدن توں مینوں کیہڑا چھڈاوے گا ؟ اپنے خُداوند یسوع مسیح دے راہیں خُدا دا شکر کردا ہاں ۔ ایس لئی میَں اپنی عقل نال تاں خُدا دی شریعت دا پر بدن نال پاپ دی شریعت دے حکم ہیٹھا ں ہیگا واں ۔ “(رومیوں ۷ : ۲۴ ۔ ۲۵)۔بدن کیہ خدمت کردا اے ؟ بدن ہمیشہ پاپ دی خدمت کردا اے ۔ پر ،اسیں اپنے دل نال خُدادی خدمت کردے آں ۔ کیہدے راہیں اسیں خُدا دا شکر ادا کردے آں ؟ اسیں یسوع مسیح ، اپنے خُداوند دے راہیں خُداداشکر ادا کردے آں ۔
پولُس نے آکھیا ، ” اپنے خُداوند یسوع مسیح دے راہیں خُدا دا شکر کردا ہاں ۔“  میَں وی اِنج ای آکھدا ہاں ۔ جے خُدا نے میرے سارے پاپاں نوں نئیں چُکیا سی ، میَں بچ نئیں سکدا ساں ایس لئی پئی بدن حالے تیک پاپ دی خدمت کردا اے ۔
” اپنے خُداوند یسوع مسیح دے راہیں خُدا دا شکر کردا ہاں ۔ “اسیں خُداوند دا شکر ادا کردے ہاں ایس لئی پئی اوہنے بدن دے سارے پاپاں نوں چُک لیا سی ۔ ساڈا بدن صرف ،ایتھوں تیک پئی اپنے پاپاں تو ں معافی پاؤن دے بعدوں وی پاپ دی خدمت کردا اے ۔پر دل خُدا دی خدمت کرنا چاؤہندا اے ۔ کیہڑے سبب توں اسیں خُدا دا شکر اداکردے آں تے کیوں دل راستباز بن دا اے ،ایہہ یسوع مسیح دے راہیں ہیگا اے ۔ کیہ تسیں ایس اُتے ایمان رکھدے او؟ اسیں خُدا دا شکر ادا کردے تے اوہدی خدمت کردے آں ایس لئی پئی اوہنے ساڈے پاپاں نوں چُک لیا اے ۔ جے خُداوند نے نئیں چُکے تے سانوں بدن دے پاپاں توں نئیں بچایا ،اسیں ہمیشہ لئی برباد ہوجاواں گے ۔ کیہ تسیں ایہدے اُتے ایمان رکھدے او؟
جے خُدا نے ساڈے سارے پاپاں نوں نئیں چُکیا سی ،کویں اسیں سلامتی پا سکدے ساں ، کویں اسیں خُداوند دا شکر ادا کرسکدے ساں  تے کیہ اسیں اوہدی خدمت کرسکدے ساں؟ کویں کوئی بندہ جیہڑا آپ پاپ ہیٹھاں ہیگا اے دوجے لوکاں دی مدد کر سکدا اے ؟ کویں اک بندہ جیہڑا آپ جیل وچ ہیگا اے جیل وچ دوجے لوکاں نوں بچا سکدا اے ؟ ” اپنے خُداوند یسوع مسیح دے راہیں خُدا دا شکر کردا ہاں ۔“ خُداوند نے اپنی خدمت لئی ساڈے واسطے ساڈے سارے پاپاں نوں پاک کردتا اے تے اوہ ساڈے دلاں وچ سانوں سلامتی دے چُکیا اے ۔
 
 
جگ وچ اسیں پہلاں ای موئے آں
 
کویں اسیں ، خُداوندتوں اَڈ خوشخبری دی منادی ، خُدا دی خدمت ، اوہدے کم تے اوہدی خدمت وچ  حصہ پا سکدے آں ؟ اسیں ایہہ سارے کم اپنے خُداوند دے راہیں کردے آں ۔ اسیں اج ، کل تے پرسوں تیک خُدا دے پچھے چلدے رہواں گے —   مطلب اے کدی نہ بدلاں گے ۔ ایہہ ٹھیک ایمان ہیگا اے ۔ اوہ جیہڑے خُداونددی خدمت کردے نیں اوس نیک تے سیانی بی بی وانگر ہیگے نیں جیہڑی اپنا گھر چنگی طرحاں رکھدی اے ۔ کسے فرائی پین وانگر ٹُٹی بھجی دینی حیاتی نہ بسرکرو۔جس طرحاں ایہہ جنی آسانی نال تھوڑے چِر وچ گرم ہو جاندااے اوسے طرحاں ایہہ ٹھنڈا وی ہو جاندا اے ۔ تہانوں ہر ویلے خُداوند دے پچھے چلنا چاہی دااے ۔ جدوں تیک اوہ دوبارہ نئیں آ جاندا ۔ اپنے آپ نوں نویں سریوں جمن دے بعد جگ توں وکھ کیتا ہویا تے مویا ہویا سمجھو ۔ میَں چاؤہندا ہاں پئی تسیں یاد رکھو پئی تسیں ہور جگ دے بندے نئیں ہیگے او ۔ اسیں پہلوں ای جگ لئی مرگئے آں ۔
ساڈے نام جگ دے خاندانی رُکھ نالوں وہڈے گئے نیں ۔ کیہ تسیں سمجھدے او ؟ ساڈے نام اوتھے نئیں ہیگے ۔
جگ خورے تہانوں آکھ سکدا اے ،  ” بوہت چِر ہو گیا اے تہانوں نئیں ویکھیا ۔ کیہ سبب ہیگا اے ؟ میَں سُنیا اے تسیں گرجے جاندے او ۔ میَں ایہہ وی سُنیا اے تہاڈے سارے پاپ معاف ہوگئے نیں ۔ ایس لئی تہاڈے وچ کوئی پاپ نئیں ہیگا اے ، ہہ؟ “
” نئیں میرے وچ کوئی پاپ نئیں ہیگا اے ۔ “
” ایہہ انوکھی گل ہیگی اے ۔ میَں سوچدا ہاں تسیں کسے غلط کلیسیا وچ پھس گئے او ۔“
” نئیں ، ایس طرحاں اینوں نہ ویکھو ۔ میری کلیسیا وچ آوو ۔ تسیں ویکھو گے ایہہ بوہت چنگی ہیگی اے ۔ “
” میَں فیر وی سوچدا ہاں تسیں جادو وچ پھس گئے او ۔ “
فیر اسیں سوچدے آں ، ”اوہ مینوں کیوں نئیں سمجھدے ؟ میَں چاؤہندا ہاں پئی اوہ مینوں سمجھ لین ۔“ پر کیہ اوہ جیہڑے جنہاں نوں نویں سریوں جمنا اے ، سانوں سمجھدے نیں؟ کویں اوہ جنہاں نوں نئیں پتہ پئی اوہ لوک بے پاپ بن سکدے نیں ، سانوں سمجھ سکدے نیں ؟ اوہ کویں سمجھ سکدے نیں پئی یسوع نے جگ دے سارے پاپاں نوں چُک لیا ؟ اوہ نئیں سمجھ سکدے ۔ ایس لئی اوہناں توں آس نہ رکھو پئی اوہ تہانوں سمجھن گے ۔ خُداوند نے ساڈے لئی جگ نوں رب راکھا آکھیا ۔ اوہنے سولی اُتے اک پیلا رومال ہلایا ۔ اوہنے آکھیا ، ” سارا کم پورا ہوگیا  “(یوحنا ۱۹ : ۳۰)۔ایس لئی اسیں ڈر جاندے آں پئی جگ نوں رب راکھا آکھن دے لائق نئیں ہوواں گے ،ایس سبب توں اسیں سوکھے طریقے نال ترس نال ہِل جاندے آں ۔ اوہنے ایہہ وی آکھیا ، ” میَں جگ دے خاندانی رُکھ نالوں تہاڈے نام مکا دتے نیں ۔ “
 
 
خُداوند نے سانوں ، جیہڑے کدی اوہدی خدمت نئیں کر سکدے ساں ،  ساڈے سارے پاپ چُکن دے ر اہیں اپنی خدمت دے لائق بنایا اے ۔
 
اسیں ،جیہڑے کدی خُداوند دی خدمت نئیں کر سکدے ساں ، اوہ بنن لئی جمے گئے آں جیہڑے یسوع مسیح دے راہیں اوہدی خدمت کر سکدے آں ۔ قدرتی طور اُتے ،اسیں اوہ ہیگے ساں جیہڑے خُداوند دی خدمت کدی نئیں کر سکدے ساں ۔ سانوں لازمی طور اُتے اپنی کلیسیا وچ لیاؤن تے سانوں اپنی خدمت دے لائق بناؤن لئی خُداوند دی وڈیائی کرنی چاہی دی اے ۔ خُداوند سانوں ورتدا اے ۔ ایہہ سچ نئیں ہیگا اے پئی اسیں اوہدے کم کردے آں ۔ کیہ تسیں سمجھدے او؟ دوجے اکھراں وچ ،راستباز خُداوند سانوں اپنے راستباز کماں وچ ورتدا اے ۔
مناد ، لی نے اک واری اپنے پیغام وچ گندگی دے ڈھیردا حوالہ دتا تے آکھیا پئی گندگی دے بدبو والے ڈھیر وانگر ،اوہ گندہ تے نفرت دے لائق سی ۔ پر ایتھوں تیک پئی ایہہ اک وڈا ا ظہارہیگا اے ۔ کسے وی دوجی  شے توں جیہدے بارے تسیں کدی سوچ سکدے او ، توں بوہتے اسیں حالے تیک گندے ہیگے آں۔ یرمیاہ ۱۷ : ۹ دسدااے ،  ” دل ساریاں شیواں توں بوہتا بہانے کرن والا تے بے علاج ہیگا اے ۔ “خُدا نے اوہناں نوں جنہاں دے دل ساریاں شیواں توں بوہتے بہانے کرن والے ہیگے نیں ،خُدا، خُداوند تے ساریاں توں اُچے تے اُچیرے دے جلال لئی جیوندے رہن دے لائق بنایا۔ اوہنے سانوں اپنا راستباز کم کرن لئی سدیا اے ۔ 
اسیں خُداوند دے پچھے چل سکدے آں تے اوہدے فضل وچ جیوندے رہ سکدے آں ایس لئی
پئی خُداوند نے ساڈے سارے پاپاں نوں دھودتااے ۔ اسیں اوہدے نال دُکھ جر سکدے آں تے اوہدے نال رَل کے جلال پا سکدے آں ۔اسیں پہلوں ای خُداوندلئی مر گئے ساں ۔ جے خُداوندنے ساڈے سارے پاپاں نوں نئیں چُکیا سی ،اسیں مکتی توں باہر رہ جاناں سی ۔ اسیں حالت تیک دنیادار لوک رہندے ، جے بدن دے مطابق حیاتی بسر کردے ۔
خُداوندنے سدا لئی سانوں اِکو ای وار تے ہمیش لئی بچایا ۔ اوہنے سانوں بچایاتے سانوں اپنی ہمیش دی خدمت دے ہتھیار بنایا ۔اسیں بوہت بدکار تے گندے ہیگے آں! خُداوندنال ملن دے بعد ، ویلا لنگھن دے نال نال سانوں بوہتا بوہتا پتہ لگدااے پئی اسیں بوہت چوکھے بدکار تے گندے ہیگے آں ۔ ایس لئی اسیں خوش ہوندے آں جدوں اسیں نُور نوں ویکھدے آں ۔ پرجدوں اسیں اپنے آپ ول ویکھدے آں ، اسیں دُکھ دے ساہ لیندے آں ، بالکل جویں پولُس نے اقرار کیتا اے ،” ہائے میَں بوہت لیکھاں ماریابندہ ہیگا واں!ایس موت دے بدن توں مینوں کیہڑا چھڈاوے گا ؟ “ (رومیوں ۷ : ۲۴)۔
پرپولُس نے اوسے ویلے خُداوند دی وڈیائی کیتی ،” اپنے خُداوند یسوع مسیح دے راہیں خُدا دا شکر کردا ہاں ۔“ خُداوند نے ساڈے سارے پاپاں نوں دھودتا اے ۔ اوہنے بدن دے سارے پاپاں نوں مکا دتا اے ۔ کنے بوہتے پاپ ساڈا بدن ہر دیہاڑے کردااے ؟ بہانہ نہ کرو جویں پئی تہاڈا بدن پاپ نئیں کردااے ۔
 
 
کیہ تسیں خُداوندداشکراداکردے او ؟
 
خُداوندنے ساڈے سارے پاپاں نوں مکا دتا اے جیہڑے اسیں بدن نال کردے آں ۔کیہ تسیں ایمان رکھدے او ؟ مطلب اے خُداوند نے جگ دے پاپاں نوں چُک لیا ، خورے تہانوں بوہتا نہ نظرآوے ،پر جدوں تسیں سوچدے او پئی اوہنے سارے پاپاں نوں چُک لیا جیہڑے تسیں اپنے بدن راہیں کیتے نیں ۔ تسیں رولا پاوو گے ، ” میَں اپنے خُداوندیسوع مسیح دے راہیں خُدا دا شکر ادا کردا ہاں! شکریہ ، خُداوند!میَں تیری وڈیائی کرداہاں ! “
پاپ اپنا ذاتی بھار رکھدااے ۔ خُداوندساڈے اخیری دیہاڑے تیک دے سارےپاپاں نوں مکا چُکیا اے جیہڑے اسیں اپنی ساری حیاتی وچ کردے آں۔ اسیں بوہت شکرگزار ہیگے آں!کیہ اسیں نکا جیہا پاپ کیتا سی ، اسیں خورے خُداوند توں اپنی توبہ دیاں دعاواں نال معافی منگ سکدے آں ۔ پر ساڈے پاپ ساڈے ساری حیاتی دے اخیر تیک بے گنت تے نہ مکن والے ہیگے نیں ۔ جدوں اسیں ایہدے بارے سوچدے آں ، اسیں کُجھ نہیں کر سکدے سگوں سانوں خُداونددی وڈیائی کرنی چاہی دی اے ،       ” اےخُداوندتیرا شکر ہووے ۔ تسیں میرے سارے پاپاں نوں مکایا اے !میَں تیری وڈیائی کرداہاں ! “ دوجے اکھراں وچ اسیں،  ” اپنے خُداوندیسوع مسیح دے راہیں “  خُدا دا شکر کردے آں ۔ کیہ تسیں خُدا دا شکر کردے او تے ایسے طرحاں اقرار کردے او ؟  ” اے خُداوندتیرا شکرہووے ۔ میَں تیری راستبازی دی خدمت لئی بلاؤن تے مینوں بچاؤن لئی تیراشکر کرداہاں ۔ میَں خُداونددا شکر کردا ہاں جنہے مینوں بدن دے سارے پاپاں توں بچایا ۔  “  کیہ  تسیں خُداوندداشکر کردے او ؟ پاپاں دی اصل مکتی ایسے طرحاں سوکھی نظر آؤندی اے ،پر اوسے ویلے ایہہ کوئی ایہو جیہی شے نئیں جنہوں سوکھا سمجھیا جاوے ۔ ایہہ بوہت ڈوہنگی ،وڈی ، کھلی ، خاص تے ہمیش لئی رہن والی ہیگی اے ۔
 
 
سانوں لازمی طور اُتے خُداوندپچھے چلنا چاہی دااے ایس لئی  پئی ساڈے وچ کوئی فائدہ پوہنچاؤن والی شے نئیں ہیگی اے
 
اسیں پاپ دا ڈھیر ہیگے آں سانوں لازمی طور اُتے جانن دی لوڑ ہیگی اے پئی اسیں آپ ہنیرے ہیگے آں ۔ ” میَں ہنیرا ہیگا واں ، پر تُوں نُور ہیگا ایں ۔ تُوں اصل نُور ہیگا ایں ،جد پئی میَں مکمل ہنیرا ہیگا واں ۔ تُو سورج ہیگا ایں ۔ میَں چن ہیگا واں ۔“ چن صرف سورج کولوں لو لین دے راہیں دھرتی نوں چمکا سکدا اے ۔
چن اپنے آپ روشنائی نئیں دے سکدا ۔ ایہہ لو دا عکس دے کے جیہڑی ایہہ سورج کولوں پاؤندا
اے ، روشنائی دیندا اے ۔ ہر شے ہنیرا ہیگی اے ۔ کیہ تسیں نُور ہیگے او یاں  ہنیراہیگے او ؟ اسیں خُداوندتوں اَڈ ہنیرے وچ ہیگے آں ۔ اسیں یسوع مسیح دے سبب خُدا دا شکر ، خدمت تے اوہدے پچھے چل سکدے آں ،ایس لئی پئی اوہدے وچ کوئی لعنت نئیں ہیگی اے ۔دوجے پاسے ، صرف اپنے بدن دی خدمت کرنا ، ہنیرے دی خدمت کرنا ہیگا اے ۔ اینوں جنی چھیتی ہووے چھڈ دیوو ۔ پرساڈا بدن نئیں بدلدا ،بھاویں جنی بوہتی ہمت خورے اسیں کر سکدے آں ۔ ساڈے وچ کوئی خاص شے نئیں ہیگی اے ۔ ساڈا بدن ہمیشگی والا نئیں ہیگا اے تے ایس طرحاں سا نوں لازمی طور اُتے ہمیشگی والیاں شیواں لئی جیوندے رہنا چاہی دا اے ۔ ایہو جیہا بندہ جیہڑاہمیشگی والیاں شیواں لئی جیوندا رہندااے ، سیانا ،بندہ ہیگااے ۔سانوں لازمی طور اُتے اپنے آپ نوں چھیتی نال چھڈدیناچاہی دا اے ۔سانوں لازمی طور اُتےجانناچاہی دا اے پئی اپنے آپ اُتے آس رکھن لئی کُجھ نئیں ہیگا اے مطلب اے ساڈے اندرکوئی نیکی نئیں ہیگی اے ۔اسیں پاپ دا ڈھیر ہیگے آں جیہڑے سدا تے صرف اپنے بدن دی خدمت کردے نیں ۔ بدن آکھدااے ، ” مینوں ہر شے دیوو جیہڑی میَں چاؤہنداہاں ۔“تے جوک وانگر جیہڑی لہو چوس دی اے ، بدن نال اپنے آپ  چمبڑ کے کم کردی (امثال ۳۰ : ۱۵)۔
اسیں کوئی شے کھان دے بعد جدوں طہارت خانے جاندے آں تاں اونی چھیتی سانوں بُھک لگ جاندی اے ۔ سانوں بدن ولوں سکون نئیں ملدا بھاویں ایہدی خدمت لئی اسیں بوہت ہمت کرئیے ۔ سانوں تھوڑے گھنٹیاں وچ بُھک لگ جاندی اے ۔ بھاویں اسیں بوہت چوکھا تے بوہت مزے والاکھانا تھوڑا چِر پہلوں کھاہداسی ۔پر جے اسیں خُداوند دا شکر کردے تے اوہدے پچھے چلدے آں،ساڈی خوشی بوہت وڈی ہو جاندی اے ۔
اسیں سکھنے محسوس نئیں کردے جدوں اسیں اپنےخُداوندپچھے چلدے آں۔کیہ تسیں اپنی مکتی دے بعد ہمیش دی خوشی پاؤنا چاؤہندے او ؟ فیر خُداونددےپچھے چلو۔ کیہ تسیں نُور وچ حیاتی بسر کرنا چاؤہندے او؟ خُداونددےپچھے چلو ۔ کیہ تسیں فضل والی حیاتی بسرکرنا چاؤہندے او ؟ خُداوند دےپچھے چلو ۔کیہ تسیں پھل دار حیاتی بسرکرناچاؤہندے او؟ جان لوو پئی تسیں ہنیرے وچ ہیگے او تے ایسے ویلے نُور دےپچھےچلو ۔
اسیں خُداونددےپچھے چلدے آں جتھے اوہ جاندااے تے اسیں رُک جاندے آں جتھے اوہ رُک دا اے ۔ اسیں کردے آں خُدا کیہ چاؤہندااے پئی اسیں کرئیے ،تے اسیں نئیں کردے خُدا کیہ چاؤہندااے پئی اسیں نہ کرئیے ۔ سانوں لازمی طور اُتے اوہدے نال ٹُرنا چاہی دا اے تے اوہدے پچھےٹُرنا چاہی دا اے۔ کیہ تسیں اپنے آپ توں کسے شے دی آس رکھدے او ؟ بے شک نئیں ! سانوں لازمی طور اُتے اوہدے پچھےٹُرنا چاہی دا اے ایس لئی پئی ساڈے کول اپنے آپ اُتے آس رکھن لئی کُجھ وی نئیں ہیگا اے ۔ کیہ تہاڈا بدن ہمیشگی والا ہیگا اے ؟ بے شک نئیں ! فیر کیوں تسیں کسے شے پچھے جاندے او جیہڑی کُجھ نئیں کر سکدی ، نہ ای ہمیشگی والی اے ؟
بوہت چِر پہلاں ، میَں اک گیت گاؤندا ہوندا ساں جیہدے بول ایس طرحاں ہیگے نیں ،         ” ♪مینوں میری جوانی واپس موڑ دیوو♪ “ پر ہُن ، میَں ٹھیک ہیگا واں ایتھوں تیک پئی جےخُدا مینوں میری جوانی نئیں دیندا  ۔ دوجی سوچ وچ ، مینوں پتہ لگیا پئی میَں اوہدے توں خوش نئیں ہوواں گا جے میَں اپنی جوانی وچ واپس پرت جاواں ۔ جے اسیں خُداونددے پچھے ٹُردے آں ، جیہڑا سادیاں حیاتیاں دا نُور ہیگا اے ،تاں جلال دا سہرا ساڈے لئی پیا ہویا اے ۔ تہانوں اپنے بچپن وچ فیر جان دی لوڑنئیں ہیگی اے ۔ ایہدی تھاں اُتے اسیں گاؤندے آں ،  ” ♪ میَں خُداونددا انکار نئیں کراں گا تے اپنے باقی دیہاڑیاں وچ اوہدے پچھے ہر دیہاڑے چلاں گا ♪ “ ایہہ سچے ایمان نوں ظاہر کردااے جیہدے نال اسیں اپنے حیاتیاں وچ خُداونددا انکار نئیں کردے تے جیہدے نال اسیں ہمیشہ خُدا دا شکر کردے آں ۔ آؤ اسیں خوشخبری دا ایہہ گیت گائیے!
” ♪میَں خُداوندخُدانال محبت کردا ہاں جنہے آدم نوں دھرتی دی مٹی نال بنایا؛جنہے اوہدیاں ناساں وچ حیاتی دا دم پھوکیا ؛ ♬تے جنہے ساڈے لئی اپنے پُتر نوں گھلیا ۔ میَں اوہدے وانگر پیدا ہویاہاں ، ایس لئی میَں اپنا بدن خُداونددے ناویں لاواں گا ۔ ♬  میَں خُداونددا انکار نئیں کراں گا تے میَں اپنے باقی دیہاڑیاں وچ ہر دیہاڑے اوہدے پچھے چلاں گا ۔ ♪ “
 
 
میَں خُداوند دا سچ مُچ شکر اداکردا ہاں
 
میَں خُداوند دا سچ مُچ شکر اداکردا ہاں۔خُداوندنے ساڈے پاپاں نوں چُک لیا تےسانوں اوہدی خدمت،اوہدے پچھے چلنا تےاوہدا راستباز کم کرن دے لائق بنایا ۔ جے خُداوند نے سارے پاپاں نوں نہ مکایا ہوندا جیہڑےاسیں اپنے بدن راہیں کردے آں تے اوہناں ساریاں نوں نہ لَے کے گیا ہونداتاں اسیں کویں اوہدا راستباز کم کر سکدے ساں؟ ایتھوں تیک پئی ٪1 .0فیصد وی نئیں ! اک پاپی حالے تیک بدکار ہیگااے کوئی مطلب نہیں رکھدا ، اوہ بھاویں کنی چنگی عادت دا نظر آؤندا ہووے ۔ ایہہ کنی حیرانی والی گل ہیگی اے پئی خُداوندنے ساڈے پاپ دھو دتے نیں تے سانوں اپنی خدمت کرن دے لائق بناؤندااے ؟ ایہہ کناں ودھیا ہیگا اے پئی خُداوندساڈے سارے پاپاں نوں مکائے گا تے سانوں برکت دیوے گا ، جیہڑے اپنی ساریاں حیاتیاں وچ گندگی وچ پھسے ہوئے سَن ، جیہڑے لوبھیاں وانگر جیوندے سَن ،دوزخ دے قیدی سَن تے خُداوند توں اَڈ فضول حیاتی بسر کردے سَن ؟
مطلب اے خُداوند نے ساڈے سارے پاپاں نوں لین دے راہیں سانوں اپنی خدمت لئی چُن لیا اے تے ایمان دے راہیں اپنی مکتی دے نال سانوں برکت دیندے ہوئیاں ظاہر کردا اے پئی خُدا دا فضل بوہت وڈا ہیگا اے ۔ کویں اسیں اپنے دلاں وچ پاپ نال راستباز بن سکدے آں ؟ اصل وچ ساڈے وچ کوئی پاپ نئیں ہیگا اےایہہ لازمی طور اُتے بوہت وڈا فضل ہیگا اے ۔ خُدا دی وڈیائی ہووے ! بدن لازمی طور اُتے فیر پاپ کرے گا ۔ ایتھوں تیک پئی اسیں ہُن خُدا دا کلام سُن دے آں ، اسیں فیر پاپ کراں گے ، خورے اینی چھیتی جنی چھیتی اسیں ایس عبادت والی تھاں توں باہر نکلدے آں ۔ ایسے سبب توں ، میَں اپنے سارے پاپاں نوں دھون لئی خُداونددی وڈیائی کردا ہاں ۔ کوئی شک نہ کرو—  ساڈےخُداوندیسوع مسیح نے  یردن دے دریااُتے اپنے بپتسمے دے راہیں ساڈے سارے پاپاں نوں چُک لیا تے سولی اُتے پاپ دی سزا نوں مکا دتا ! میَں ایمان رکھدا تے خُدا دی وڈیائی کردا ہاں ! فیر ،کویں اسیں خُدا دی وڈیائی کر سکدے آں ؟ اسیں یسوع مسیح دے راہیں خُدا دی وڈیائی کرسکدے آں !
سوہنے پاک لوکو!اسیں خُدا دے فضل دا بدلہ نئیں دے سکدے بھاویں اسیں باقی حیاتیاں وچ بوہت چوکھی محنت کریے ۔ایہہ بوہت نئیں ہیگا ایتھوں تیک پئی جے اسیں خُداونددا ہمیش لئی شکرادا کردے آں ، جنہے سانوں اپنا  راستباز کم کرن تے پھلدار کم کرن دے لائق بنایا مطلب اے ساڈے سارے پاپاں نوں چُکن دے راہیں ، پر خورے اسیں ماڑے ہو سکدے آں ۔ اسیں اوہدی بوہتی وڈیائی نئیں کرسکدے ایتھوں تیک پئی اسیں اپنی باقی حیاتیاں وچ اوہدی وڈیائی کردے رہندے آں ۔
اسیں اپنے ذہناں دی ڈوہنگھیائی نال جان دے آں پئی ساڈے اندرکوئی نیکی نئیں وسدی اے،ایس ول دھیان کرو ۔ کیہ تسیں پاپ کروگے جناں چِرتسیں جیوندے او ؟ لازمی طور اُتے تسیں پاپ کرو گے ،پر خُداوندنے پہلوں ای تہاڈے پاپاں نوں چُک لیا اے ۔ خُداوندنے سانوں اپنا کم کرن دی برکت دتی اے ۔ خُداوندنے سانوں اپنی خدمت دے لائق بنایااے ۔ اسیں رہ نئیں سکدے سگوں اپنے خُداونددا شکر ادا کردے آں ۔ میَں چاؤہندا ہاں پئی تسیں خُداونددی وڈیائی کرو تے اپنی ساری حیاتی لئی یسوع مسیح دے راہیں اوہدی شکر گزاری دی حیاتی بسرکرئیے ۔
ساڈے خُداوندنے سانوں خُدا لئی اک شکرگزار حیاتی بسر کرن دے لائق بنایااے ۔ خُدا نے سانوں سارے پاپاں توں بچایا جیہڑے اسیں بدن دے راہیں کردے آں ۔ اوہنے سانوں اپنے دلاں نال اوہدی خدمت لئی سانوں ساڈےسارے پاپاں توں بچایا اے ۔ ایس لئی پئی ساڈے خُداونددافضل بوہت وڈا ہیگاا ے ،اسیں اوہدے پچھے چلنا تے خدمت کرنا چاؤہندے آں ۔ آؤ اسیں اپنے دلاں نال اوہدا شکر اداکرئیے ۔
 خُداوندیسوع مسیح دے راہیں سانوں دتا گیا خُدا دا فضل بوہت انوکھا ہیگا اے ! میَں سچ مُچ چاؤہندا ہاں پئی تہانوں پتہ لگے پئی تہاڈا بدن بوہت بدکار تے ماڑا ہیگا اے ،ویکھو تسیں کیہ کردے پئے او ، سوچو ، کیہ خُدا نے سچ مُچ تہاڈے پاپ چُک لَے نیں یاں نئیں ، خُداوندداشکر اداکرو تے ایمان دے راہیں جیوندے رہوو۔ میَں خُداوندداشکر ادا کردا ہاں جنہے سانوں خاص حیاتیاں بسر کرن دے لائق بنایا ۔ ” اپنے خُداوند یسوع مسیح دے راہیں خُدا دا شکر کردا ہاں ۔ ایس لئی میَں اپنی عقل نال تاں خُدا دی شریعت دا پر بدن نال پاپ دی شریعت دے حکم ہیٹھا ں ہیگا واں ۔  “ (رومیوں ۷ : ۲۵)۔اسیں اپنے دلاں نال خُدا نال محبت کردے آں ، پرا پنے بدن نال اسیں پاپ نال محبت کردے آں ۔ پر ساڈاخُداوند بوہت محبت کرن والا ہیگا اے ۔ پاپ نئیں ہووے گا جدوں تیک اسیں اپنے بدن نال قانون توں اَڈعمل نہیں کردے آں ، پر خُداوندنے پہلوں ای پاپاں نوں مکا دتا اے جیہڑے اسیں آؤن والے دناں وچ کراں گے ۔ایس لئی پئی ساڈا خُداوندبوہتی محبت کرن والا ہیگا اے تے ایس لئی سانوں اوہدا شکر ادا کرنا چاہی دا اے ۔
اےخُداوند،تیراشکر ہووے ۔میَں تیری خدمت لئی سانوں دل دین واسطے تے سانوں اپنے بدن دے سارے پاپاں توں جیہڑے اسیں اپنی ساریاں حیاتیاں وچ کیتے نیں ،مکمل طور اُتے بچاؤن لئی تیری وڈیائی کردا ہاں ۔