Karena COVID-19 dan gangguan pada layanansuratinternasional,
untuksementara kami menangguhkan ‘LayananCetakBuku Gratis kami’.
untuksementara kami menangguhkan ‘LayananCetakBuku Gratis kami’.
Dalam situasi ini, kami tidak dapat mengirimkan buku-buku tersebut kepada Anda saat ini.
Berdoalah agar pandemi ini segera berakhir dan dimulainya kembali layanan pos.
Berdoalah agar pandemi ini segera berakhir dan dimulainya kembali layanan pos.
مضمون 11: خیمۂ اِجتماع
[11-16] عہد دے صندوق وِچ لُکیا رُوحانی بھیت <خروج ۲۵:۱۰۔۲۲>
> خروج ۲۵:۱۰۔۲۲<
”تےاوہ کِکردی لکڑادا اِک صندُوق بناؤن جِہدی لمان ڈھائی ہتھ تے چَوڑائی ڈیڑھ ہتھ تے اُوچیائی ڈیڑھ ہتھ ہوئے۔تے تُوں اوہدے اندر تے باہر کھراسونا مَڑھیں تے اوہدے اُتےآلے دوالے اِک سونےداتاج بناویں ۔تے اوہدے لئی سونے دے چار کڑے ڈھال کے اوہدیاں چونہہ پاویاں وِچ لاویں۔ دو کڑے اِک پاسے ہون تے دو ای دُوجےپاسے۔تے کِکر دی لکڑدیاں چوباں بنا کے اوہناں اُتے سونا مَڑھیں۔تے ایہناں چوباں نُوں صندُوق دیاں پاسیاں دےکڑیاں وِچ پاویں پئی اوہناں دے سہارے صندُوق اُٹھ جان۔چوباں صندُوق دیاں کڑیاں دے اندر لگیاں رہن تے اوس توں وَکھ نا کیتیاں جان۔تے تُو ں اوس شہادت نامے نُوں جیہڑا مَیں تینوں دیواں گا اوسے صندُوق وِچ رکھیں۔تے تُوں کفّارے دا سرپوش کھرے سونے دا بناویں جِہدی لمان ڈھائی ہتھ تےچَورائی ڈیڑھ ہتھ ہوئے۔تےسونے دے دو کرُّوبی سرپوش دیاں دوآں سریاں اُتے گھڑ کے بناویں۔اِک کرُّوبی نُوں اِک سرے اُتےتے دُوجے کرُّوبی نُوں دُوجے سِرے اُتے لاویں تےتُسی سرپوش نُوں تے دوآں سِریاں دے کرُّوبیاں نُوں اِکوای ٹوٹے نال بناویں۔تےا وہ کرُّوبی ایس طرح اُتاں نُوں اپنے پَر کھلارے ہوئے ہون پئی سرپوش نُوں اپنیاں پَراں نال کج لین تے اوہناں دے مُنھ آمنے ساہمنے سرپوش وَل ہون۔تے تُوں اوس سرپوش نُوں اوس صندُوق دے اُتے لاویں تےاوہ عہد نامہ جیہڑا مَیں تینوں دیواں گا اوہنوں اوس صندُوق دے اندر رکھیں۔ اوتھےمَیں تیرے نال مِلایا کراں گا تے اوس سرپوش دے اُتے تے کرُّوبیوں دے وِچوں جیہڑے عہد نامےدے صندُوق دے اُتے ہون گے اوہناں ساریاں حکُماں دے بارے جیہڑے مَیں بنی اِسرائیل لئی تینوں دیاں گا تیرے نال گل بات کریا کراں گا۔“
اج دا موضوع عہد دا صندوق اے۔ عہد دا صندوق، جِہدی لمان ۱۱۳ سینٹی میٹر(۷.۳فٹ)،چوڑائی ۶۸سینٹی میٹر(۲.۲فٹ)، تے ایہدی اُچیائی ۶۸سینٹی میٹر(۲.۲فٹ)سی ، کِکر دی لکڑ نال بنیا ہویا سی تے کھرے سونے نال مَڑھیا ہویاسی ۔ ایس صندوق دے اندر ، پتھر دیاں دو تختیاں سن جنہاں اُتے دس حُکم چھاپے سن تے مَنّ دا سونے دا مرتبان تے بعدوچ، ہارون دی پھُٹی سوٹی اوہناں وچ رلائی گئی سی ۔ فیر، عہد دے صندوق اندر رکھیاں گئیاں ایہہ تِن شیواں سانوں کیہ دسدیاں پئیاں نیں؟ ایہناں شیواں دے راہیں ، مَیں یِسُوعؔ مسیح دیاں تِن خدمتاں دی چوکھی وضاحت پوہنچاؤنا چاہواں گا ۔ آؤہُن اسی عہد دے صندوق اندر رکھیاں گئیاں ایہناں تِناں شیواں وچ وکھائی گئی رُوحانی سچیائی دا جائزہ لئیے ۔
شریعت نال چھاپیاں گئیاں پتھر دیاں دو تختیاں
شریعت نال چھاپیاں گئیاں پتھر دیاں دو تختیاں جیہڑیاں عہد دے صندوق اندر رکھیاں گئیاں سن سانوں دسدیاں نیں پئی خُدا شریعت نوں بناؤن والا اے جیہڑا سانوں اپنے قانون دے چُکیا اے ۔ رومیوں ۸:۱۔۲ دسدااے، ”سوہُن اوہناں اُتےکُجھ وی سزا دا حُکم نئیں۔جیہڑےمسیح یِسُوعؔ وِچ نیں۔کیوں جوجیہڑی زِندگی مسیح یِسُوعؔ وِچ اے ۔اوہدے رُوح دی شرِیعت مینوں گُناہ تے مَوت دی شرِیعت توں چھڈا دِتا۔“ ایس حوالے وچ اسی ویکھ سکدے آں پئی خُدا ساڈیاں دلاں وچ دو شریعتاں : زندگی دی شریعت تے موت دی شریعت قیم کر چُکیا اے ۔
ایہناں دو شریعتاں نال ، خُداوند ساریاں لوکاں لئی موت تے مکتی لیا چُکیا اے ۔ سب توں پہلاں ، اسی شریعت دے راہیں پچھان سکدے آں پئی اسی نا بچن دے لائق دوزخ دے حقدار پاپی آں ۔ پر ، اوہناں لئی جیہڑے اپنی پاپی عادت تے برباد ہون والے نصیب نوں جان دے نیں ، خُدا اپنی مکتی دی شریعت یعنی ، ” مسیح یِسُوعؔ وِچ زندگی دےرُوح دی شرِیعت “ دے چُکیا اے ۔ خُدا اوہناں نوں ایہہ دو شریعتاں دے کے ساریاں دا اصلی مکتی داتا بن گیا اے ۔
مَنّ نال بھریا سونے دا مرتبان
سونے دا مرتبان جیہڑا صندوق وچ ہیگا سی اوہدے وچ مَنّ سی ۔ جد اسرائیلیاں نے جنگل وچ ۴۰ ورہے گزارے، خُدا نے اوہناں لئی اسمانوں کھاناگھلیا ،تے اسرائیلی ایس مَنّ نوں وکھ وکھ طریقیاں نال پکا کے جیوندے رہے ۔ تے ایہہ چٹے دھنیے دے بیج وانگر سی ، تے ایہدا سواد شہد نال بنے ہوئے کڑکنے بسکٹ وانگر سی ۔ ایس مَنّ نے جیہڑا خُدا اسرائیلیاں نوں دے چُکیا سی اوہناں دی زندگیاں نوں برقراررکھیا جد تیکر اوہ کنعان د ی دھرتی اُتے نا گئے ۔ ایس طرح ، ایہہ ایس کھانے نوں یادگاری وانگر رکھنا سی جیہڑا ایس برتن وچ سانبھ کے رکھیا گیا سی ۔
ایہہ سانوں دسدا اے پئی اسی ، اج دیاں ایمانداراں نوں ، وی زندگی دی روٹی کھانی چاہی دی اے یعنی خُدا دیاں رُوحانی پُتراں نوں لازمی جد پئی ایس جگ وچ نیں جد تیکر اوہ اسمان اُتے نئیں جاندے پلنا چاہی دا اے ۔ پر ایہو جیہے ویلے وی آؤندے نیں جد اسی جگ دی روٹی نوں کھانا ، یعنی خُدا دے کلام دے بجائے ایس جگ دیاں تعلیماں اُتے چلنا چاؤہندے آں ۔فیر وی ، خُدا دیاں پُتراں نوں لازمی سچ مُچ تے اصل وچ کنعان دی دھرتی اُتے اَپڑن توں پہلاں جیہڑی شے نال زندہ رہنا چاہی دا اے اوہ خُدا دا کلام اے ، جیہڑا اصل زندگی دی رُوحانی روٹی اے جیہڑی اسمانوں اُتردی اے ۔
کوئی بندہ کدی سدا تیکر اصل زندگی دی روٹی کھا کے نئیں اَک دا ۔ جنی بوہتی اسی ایہہ رُوحانی روٹی کھاندے آں ، اونی بوہتی ایہہ ساڈیاں جاناں لئی اصل زندگی بن دی جاندی اے ۔ پر جے اسی خُدا دے کلام دی بجائے جگ دیاں تعلیماں دی روٹی کھاکے پل دے آں ، تاں اسی اخیریں مرجاواں گے ۔
خُدا نے اسرائیلیاں نوں مَنّ نوں اک بھانڈے وچ پاؤن تے ایہنوں سانبھ کے رکھن دا حکم دتا جیہڑا اسمانوں ڈِگ دا سی ۔ جویں خروج ۱۶ :۳۳ وچ وکھایا گیا اے پئی ، خُدا نے فرمایا ، ”اِک مرتبان لَےتے اِک اومر مَنّ اوس وچ بھر کے اوہنوں خُداوند دےاگے رکھ دے تاں پئی اوہ تُہاڈی اولاد لئی پیا رہوے۔“ مَنّ جیہڑااسمانوں ڈِگیا لوکاں دیاں جاناں لئی اصل زندگی دی روٹی سی ۔”تے اوہنے تینوں عاجز کِیتا وی تے تینوں بُھکیاں ہون دِتاتےاوہ مَنّ جِہدا نا تینوں نا تیرے باپ دادےنُوں پتہ سی تینوں کھوایا تاں پئی تینوں سکھاوےپئی بندہ صِرف روٹی کھاکےای نئیں جیوندارہندا سگوں ہر گل نال جیہڑی خُداوند دے مُنھوں نِکلدی اے اوہ جیوندا رہندا اے۔“(استثنا ۸:۳)۔
فیر ساڈے لئی زندگی دی اصلی روٹی کون اے ؟
اوہ بپتسمہ جیہڑا یِسُوعؔ مسیح نے ساڈیاں پاپاں نوں اپنے بدن اُتے لین لئی لیا تے اوہدا سولی اُتے چڑھنا تے لہو وگاؤنا ساڈی اصلی زندگی دی روٹی اے ۔ سانوں اپنا بدن تے لہو دے کے ، یِسُوعؔ مسیح سدادی زندگی دی روٹی بن گیا اے ۔ جویں یوحنا ۶ : ۴۸۔۵۸ سانوں دسدا اے : ” زِندگی دی روٹی مَیں آں۔تہاڈے وڈیاں بیابان وِچ مَنّ کھادا تے مَر گئے۔اوہ روٹی جیہڑی اسمانوں لہندی اے ایہہ اےپئی بندہ اوہدےوِچوں کھائے تے نا مَرے۔زِندگی دی روٹی مَیں آں جیہڑی اسمانوں لَتّھی اےجے کوئی ایس روٹی وِچوں کھائے سدا تیکرجئے گا۔سگوں جیہڑی روٹی مَیں دُنیادی زِندگی لئی دیاں گااوہ میرا گوشت اے۔ایس واسطے یہُودی آپووِچ جھگڑن لگّےپئی ایہہ اپنا گوشت کیویں سانوں کھان نُوں دے سکدا اے؟تدیِسُوعؔ اوہناں نُوں آ کھیا مَیں تُہانوں سچ سچ آکھنا آں ۔ جے تُسی اِبنِ آدم دا گوشت ناکھاؤ تے اوہدا لہو نا پِیو تُہاڈےاپنے وِچ زِندگی نئیں اے۔اوہ جیہڑا میرا گوشت کھاندا تے میرا لہو پِیندا اے سدادی زِندگی اوہدی اے۔ تےاخِیری دِن مَیں اوہنوں زِندہ کراں گا۔ایس لئی پئی میرا گوشت اصل کھان والی شے تےمیرا لہواصل پِین والی شے اے۔اوہ جیہڑامیرا گوشت کھانداتےمیرا لہو پِیندااے میرےوِچ رہندااے تے مَیں اوہدےوِچ۔جیویں باپ جیہڑاجیوندااے مینوں گھلیا تے مَیں باپ دے سبّب جیوناں آں۔ اوہ وی جیہڑا مینوں کھاندااے میرے سبّب سے جیوے گا۔روٹی جیہڑی اسمانوں لَتھی ایہہ اے۔اجیہی نئیں جیہڑی وڈّیاں کھادی تےمَر گئے۔ جیہڑاایس روٹی نُوں کھائے سدا جیوےگا۔ “
ساڈے خُداوند نے فرمایا، ” روٹی جیہڑی اسمانوں لَتھی ایہہ اے۔اجیہی نئیں جیہڑی وڈّیاں کھادی تےمَر گئے۔ جیہڑاایس روٹی نُوں کھائے سدا جیوےگا۔ “ ” روٹی جیہڑی اسمانوں لَتھی “کیہڑی سی ؟ ایہدا مطلب یِسُوعؔ دا بدن تے لہو سی ۔ پاک کلام وچ ، یِسُوعؔ دا گوشت سانوں دسدا اے پئی یِسُوعؔ مسیح نے یردن دے دریا اُتے یوحنا کولوں بپتسمہ لے کے جگ دیاں پاپاں نوں چُک لیا ۔تے یِسُوعؔ دا لہو سانوں دسدا اے ایس لئی پئی یِسُوعؔ نے بپتسمہ لیا سی ، ایس لئی اوہنے جگ دیاں پاپاں نوں چُکیا تے سولی اُتے چڑھ کے پاپ دی سزا جری ۔
مرتبان وچ اوہ مَنّ جیہڑا عہد دے صندوق دے اندر رکھیا گیا سی اسرائیلیاں لئی زندگی دی روٹی سی جد اوہ جنگل وچ سن ، تے نویں عہد نامے دے زمانے وچ ، ایہدا رُوحانی مطلب یِسُوعؔ مسیح دے گوشت بارے دسدا اے ۔ ایہہ سچیائی سانوں بپتسمے بارے دسدی اے جِنہوں لے کے یِسُوعؔ مسیح نے ساریاں پاپیاں دیاں بدکاریاں چُک لئیاں تے لہو جیہڑا اوہنے سولی اُتے وگایا ۔ ایس لئی پئی یِسُوعؔ مسیح نے اپنے بپتسمے نال اپنے بدن اُتے ایس جگ دیاں ساریاں پاپاں نوں چُک لیا تے اپنا لہو وگایا تے سولی اُتے مرگیا ، اوہدا بپتسمہ تے لہو وگاؤنا نویں زندگی دے سدادے سوتے دے مُنھ بن گئے نیں جیہڑے ایمانداراں نوں نویں سریوں جمن دے لائق کردے نیں ۔
گوشت جیہڑ ا یِسُوعؔ اپنے بپتسمے نال پاپیاں دیاں بدکاریاں نوں اپنے اُتے لین لئی دتا تے لہو جیہڑا اوہنے سولی اُتے وگایا زندگی دی روٹی نیں جیہڑے ساریاں پاپیاں نوں پاپ دی معافی پاؤن دے لائق کردے نیں ۔ ایس لئی سانوں ایس سبب نوں سمجھنا چاہی دا اے پئی یِسُوعؔ نے کیوں فرمایا ، ” جے تُسی اِبنِ آدم دا گوشت نا کھاؤ تے اوہدا لہو نا پِیو تُہاڈے اپنے وِچ زِندگی اے نئیں۔ “(یوحنا ۶ : ۵۳)۔
کیہڑا وڈا اے ؟
جد اسی یوحنا ۶ باب نوں ویکھدے آں ، تاں اسی ویکھ سکدے آں پئی اوس ویلے بوہتے یہودی موسیٰ نوں یِسُوعؔ توں وڈا سمجھدے سن ۔ جد یِسُوعؔ ایس زمین اُتے آیا ، تاں اوہناں نیں اوس توں پُچھیا ، ”کیہ تُوں ساڈے پئو مُوسیٰ توں وڈا ایں ؟“ اصل و چ ، اوہ موسیٰ نوں سب توں وڈا من دے سن ۔ تاں جو یہودی یِسُوعؔ نوں مسیحا وانگر پچھانن وچ ناکام ہوگئے سن ، اوہناں نیں اوہنوں بوہت بھیڑی شے وانگر ویکھیا ۔ سو اوہناں نیں اوہنوں ایہہ پُچھدیاں ہویاں للکاریا، ”کیہ تُوں مُوسیٰ توں وڈا ایں؟“ اسرائیلی یہوواہ خُدا اُتے ایمان رکھدے سن ، تے اوتھے صرف تیہ ورہیاں دی عمر دا اِک گبھرُو بندہ دعویٰ کردیاں ہویاں آیا ، ” اجیہی نئیں جیہڑی وڈّیاں کھادِی تے مر گئے۔ جیہڑا ایس روٹی نُوں کھائے سدا جیوے گا۔ “ایہو ای سبب اے پئی اوہ موسیٰ تےیِسُوعؔ، دوآں دی طاقت دا حساب لاؤن آئے سن ۔
جویں پئی یِسُوعؔ نے بعد وچ اعلان کیتا ، ”ایدوں پہلاں پئی ابرہام سی مَیں آں،“ اوہ ساری انسانی تاریخ وچ کسے وی بندے توں وڈا اے ، ایس لئی پئی اوہ آپ جگ نوں بناؤن والا اے ۔صرف لوک اپنے بناؤن والے نوں للکارن دی ہمت کویں کر سکدے نیں ؟ ایہدے باوجود، کُجھ لوک حالے وی کہندے نیں پئی یِسُوعؔ صرف اِک وڈا اُستاد ، انسانی تاریخ دا سب توں وڈا سیانا اے ۔ کناں کفر اے ! یِسُوعؔ خُدا ،بادشاہواں دا بادشاہ تے سارے جگ نوں بناؤن والا اے ۔ اوہ اپنی مرضی دا مالک تے ہر تھاں نظر آؤن والا خُدا اے ۔ پر اوہنے اپنے آپ نوں حلیم کیتاتےتہانوں تے مینوں ساڈیاں ساریاں پاپاں تے سدا دی موت توں بچاؤن لئی، ساڈا اصلی مکتی داتا بنن لئی اوہ اک بندے دے بدن وچ ایس زمین اُتے آیا ۔
یِسُوعؔ مسیح نے فرمایا ، ” نبیاں دِیاں کِتاباں وِچ ایہہ لِکھیا ہویا اے پئی اوہ سبھ خُدا دے سِکھائے ہوئے ہون گے ہر اِک جِس باپ کولوں سُنیا تے سِکھیا میرے کول آؤندا اے۔ ایہہ نا سمجھو پئی کِسے باپ نُوں ویکھیا اے۔ بِناں اوہدے جیہڑا خُدا ولّوں اے اوس باپ نُوں ویکھیا اے۔ “ اخیروچ ، یِسُوعؔ اخیریں کہندا پیا سی پئی اوہو ای مسیحا اے جنہوں یہودی اُڈیکدے پئے سن ۔ پر اوہ سمجھ نا سکے پئی یِسُوعؔ کیہ فرماؤندا پیا سی ، نا تاں ایس اُتے ایمان رکھن دے لائق ہوئے نا ای ایہنوں قبول کر سکدے ، تے ایہدا نتیجہ اِک خطرے والی غلط سوچ ہوئی ، جویں پئی اوہناں نیں سوچیا ،” کویں تُوں سانوں اپنا گوشت کھان لئی دیویں گا ؟کیہ تُسی کہندے پئے او پئی جے اسی سچ مُچ تہاڈا گوشت کھائیے تے تہاڈا لہو پیوئیے تاں اسی سدا دی زندگی پاواں گے ؟کیہ تہانوں لگدا اے پئی اسی ایتھے کسے قِسم دے بندیاں نوں کھان والے لوک آں؟“
پر اوہ جیہڑے یِسُوعؔ دا گوشت کھاندے تے اوہدا لہو پیندے نیں سدا تیکر زندہ رہن گے ۔ یِسُوعؔ دا گوشت زندگی دی روٹی اے ۔ مَنّ دی اصل طاقت جیہڑا اوس مرتبان وچ رکھیا گیا سی ، زندگی دی روٹی ، یِسُوعؔ مسیح دا گوشت تے لہو اے ۔ ایس زمین اُتے آؤن تے اپنا گوشت تے لہو دے کے ، یِسُوعؔ سانوں زندگی دی روٹی کھان تے سدا دی زندگی پاؤن دے لائق کر چُکیا اے ۔
فیر کویں کوئی یِسُوعؔ دا گوشت کھا ،تے اوہدا لہو پی سکدا اے ؟ یِسُوعؔ دا گوشت کھان تے اوہدا لہو پین دا اِکو طریقہ یِسُوعؔ دے بپتسمے تے اوہدی صلیبی لہو اُتے ایمان رکھنا اے ۔ سانوں لازمی ایمان رکھ کے یِسُوعؔ دا گوشت کھانا تے اوہدا لہو پینا چاہی دا اے ۔ تہانوں تے مینوں پاپ دی معافی دین تے سانوں سدا تیکر اسمانی بادشاہی وچ زندہ رہن دے لائق کرن لئی ، ساڈا خُداوند بپتسمہ لین تے اپنا لہو وگا کے اِکو وی واری سدا لئی ساڈیاں پاپاں نوں مکا چُکیا اے ،تے اِنج اوہ ساڈیاں بدناں لئی کھانا بن گیا اے ۔ ہُن خُدا دے پانی تے رُوح دے کلام اُتے ایمان رکھن دے راہیں ، سانوں لازمی رُوحانی کھانا ،کھانا چاہی دا اے تے سدا دی زندگی پاؤنی چاہی دی اے ۔
مینوں بوہتی تفصیل نال گواہی دین دی اجازت دیووپئی کویں اسی یِسُوعؔ دا گوشت کھا سکدے تے اوہدا لہو پی سکدے آں ۔جویں پئی تُسی تے مَیں چنگی طرح جان دے آں ، یِسُوعؔ مسیحاایس زمین اُتے آیا تے تیہاں ورہیاں دی عمر وچ یوحنا کولوں بپتسمہ لے کے لوکاں دیاں پاپاں نُوں چُک لیا ،تے فیر ، اوہنے سولی اُتے مرکے لہووگا کے ساڈیاں پاپاں دی ساری سزا جری ۔ ایس اصل سچیائی اُتے ایمان رکھ کے ای اسی اوہدا گوشت کھا سکدے آں تے اوہدا لہو پی سکدے آں ۔ پاپاں دا دھونا پورا ہویا سی ایس لئی پئی لوکاں دے پاپ یِسُوعؔ دے بدن اُتے بپتسمے دے راہیں جیہڑا اوہنے لیا، لدے گئے سن ۔ اوہدا لہو پین دا مطلب اے پئی جویں پئی یِسُوعؔ نے بپتسمہ تے سولی اُتے اپنا لہو وگایا ، ایہہ لہو جیہڑ ا اوہنے وگایا ایہنے ساڈیاں پاپاں دی سزا جری ۔
ایس طرح ،اوہ جیہڑے اپنیاں دلاں وچ یِسُوعؔ د ے لہو اُتے ایمان رکھدے نیں ، اوہناں دی تریہہ بُجھ جاندی اے ، ایس لئی پئی اوہناں دیاں ساریا ں پاپاں دی سزا سولی دی سزا نال کامل طریقے نال مک گئی جیہڑی یِسُوعؔ نے جری ۔ سانوں لازمی ایس سچیائی دا احساس کرنا چاہی دا اے ۔ تے سانوں لازمی ایس اُتے ایمان رکھنا چاہی دا اے ۔ ایس لئی پئی یِسُوعؔ مسیح ایس زمین اُتے آیا تے یوحنا کولوں بپتسمہ لے کے ساڈیاں پاپاں نوں قبول کیتا ، ایس سچیائی اُتے ایمان رکھ کے اسی اِکو ای وار سدا لئی ساریاں پاپاں توں پاک ہو گئے آں ۔
خُدا نے سانوں ایمان رکھن دے راہیں یِسُوعؔ دا گوشت کھان تے اوہدا لہو پین لئی آکھیا۔ ایس لئی پئی یِسُوعؔ نے بپتسمہ دے راہیں جیہڑا اوہنے یوحنا کولوں لیاساریاں پاپاں نوں ، کسے دی بدکاری نوں نا چھڈدیاں ہویاں چُک لیا ، تے ایس لئی پئی اوہنے اپنا بدن سولی دی سزا لئی دے دتا تے اپنا مہنگا لہووگایا ، اوہناں دے دل جیہڑے ایمان رکھدے نیں ہُن پاک تے تریہہ توں ازاد نیں ، جویں پئی اوہ اپنے سارے پاپ دھو چُکے نیں تے ایمان رکھ کے پاپ دی ساری سزا جر چُکے نیں ۔ ایہو ای سبب اے پئی یِسُوعؔ نے فرمایا ، ” ایس لئی پئی میرا گوشت اصل کھان والی شے تے میرا لہو اصل پِین والی شے اے “(یوحنا ۶ : ۵۵)۔
پک نال ، ایہو ای یِسُوعؔ سچ مُچ مکتی داتا، خُدا دا پُتر اے جیہڑا ساڈیاں پاپاں نوں دھو چُکیا اے تے ساڈیاں پاپاں دی سزا جر چُکیا اے ۔ سانوں شریعت توں جیہڑی پاپ دی مزدوری موت دا اعلان کردی اے چھڈاؤن، سانوں ساڈیاں ساریاں پاپاں توں دھون ، تے سانوں ساڈی ساری سزا توں چھڈاؤن لئی ، ایس اِکو ، مکتی داتا تے خُدا دے پُتر نے سولی اُتے اپنے آپ نوں دے دتا ، اپنا لہو وگایا ، تے اِنج اوہناں دیاں دلاں نوں پاک کر دتا جیہڑے ایمان رکھدے تے اپنی تریہہ بجھاؤندے نیں ۔ ایہہ یِسُوعؔ دے گوشت تے لہو دا اثر اے ۔
یِسُوعؔ مکتی داتا اے جنہے پاپاں تے لوکاں دی سزادی فکر کیتی ۔ یِسُوعؔ مکتی داتا اے جنہے بپتسمے دے راہیں جیہڑا اوہنے لیا لوکاں دیاں پاپاں نوں قبول کیتا ، اوہ سولی اُتے چڑھیا تے ایہناں پاپاں دی سزا جرن لئی اپنا لہو وگایا ۔ایہہ ایس لئی سے کیوں جو یِسُوعؔ ساڈے توں اوہدے اُتے لدے گئے جگ دیاں پاپاں نوں قبول کر چُکیا سی یعنی پاپ دی سزا جیہڑی اوہنے سولی اُتے چڑھ کے جری ساڈیاں اپنیاں پاپاں دی سزا بن سکدی سی ۔
پانی تے رُوح دی سچیائی اُتے ایمان رکھ کے ای اسی پاپ دی معافی پا سکدے آں ۔ تہانوں ساریاں نوں لازمی یِسُوعؔ دے بپتسمے تے اوہدے لہو وگاؤن اُتے ، اپنی ذاتی پاپ دی معافی پاؤن لئی ایمان رکھنا چاہی دا ۔ ایہہ ایس سچی خوشخبری اُتے ایمان رکھن دے راہیں اے پئی اسی رُوحانی طریقے نال یِسُوعؔ دا گوشت کھا تے اوہدا لہو پی سکدے آں ۔ دوجیاں اکھراں وچ، ایہہ ایمان دے راہیں ہیگا اے پئی یِسُوعؔ مسیح خُدا دا پُتر ایس زمین اُتے آیااپنے بپتسمے دے راہیں ساڈیاں پاپاں نوں چُک لیا تے سولی اُتے ساڈیاں پاپاں دی ساری سزا جری تاں پئی اسی اوہ لوک بن سکیے جیہڑےاوہدا گوشت کھان تے اوہدا لہو پین، تے اِنج سدا دی زندگی پاؤن دے لائق آں ۔ بپتسمے تے یِسُوعؔ دے لہو وگاؤن اُتے ایمان رکھ کے ، ہُن اسی اوہدا گوشت کھا سکدے آں تے اوہدا لہو پی سکدے آں ۔ یِسُوعؔ دے بپتسمے نال تے لہو پی کے جیہڑا اوہنے ساڈی اپنی پاپ دی معافی دے کھانے وانگر سولی اُتے وگایا ، اسی اپنیاں ساریاں پاپاں توں معاف ہو سکدے آں ۔ایہہ ایس ایمان دے راہیں ہیگا اے پئی اسی اپنیاں پاپاں دی معافی پاؤن ، خُدا دے پُتر بنن تے خُدا دی بادشاہی وچ سدا تیکر زندہ رہن دے لائق ہو گئے آں ۔
ہارون دی سوٹی جیہڑی پھُٹ پئی سی
عہد دے صندوق دے اندر رکھیاں گئیاں شیواں وچوں ، ہارون دی سوٹی جیہڑی پھُٹ پئی سی یِسُوعؔ مسیح نوں اسمانی بادشاہی دے سدا دے وڈے کاہن وانگر دسدی اے ۔ ایہہ سانوں ایہہ وی دسدی اے پئی سدا دی زندگی اوسے وچ ہیگی اے ۔ ایہدے بارے وچ سانوں سمجھن لئی سوکھا بناؤن لئی ، آؤ اسی گنتی ۱۶ : ۱ ۔ ۲ ول دھیان کرئیے: ”تےقورحؔ بِن اِضہارؔ بِن قہاتؔ بِن لاوؔی نے بنی رُوبنؔ وچوں الِیابؔ دیاں پُتراں داتنؔ تےاَبِیرامؔ تےپلتؔ دےپُتراونؔ نال رَل کےہوربندیاں نُوں نال لیا۔تےاوہ تےبنی اِسرائیل وچوں ڈھائی سَو ہوربندے جیہڑے لوکاں دےسردارتےخاص تےمشہوربندےسن مُوسیٰ دےمُقابلےلئی کھلوتے۔“
ایتھے ایہہ حوالہ سانوں دسدا اے پئی لاویاں وچوں ، دو سو بندے یعنی لوکاں وچوں مشہور آگُو سارے اکٹھے ہوئے تے موسیٰ دے خلاف کھلوگئے ۔ اوہناں نیں آکھیا ، ”تُسی، موسیٰ تے ہارون، مصر دی دھرتی اُتے باہر نکلن دی اگوائی لئی کیہ کیتا اے ؟ کیہ تُسی سانوں انگوراں دا باغ دتا اے ؟ کیہ تُسی ساڈی کھجوراں دے باغ تیکر اگوائی کیتی اے ؟تُسی ساڈے لئی کیہ کیتا اے؟ کیہ تُسی سانوں جنگل وچ صرف ریگستان دی ریت اُتے اخیریں مرن لئی نئیں لیا چکے او؟ تُسی کویں اپنے آپ نوں خُدا دے خادم کہہ سکدے او ؟ کیہ خُدا صرف تہاڈے راہیں کم کردا اے ؟“دوجیاں اکھراں وچ ، موسیٰ تے ہارون دے آگُو بنن دے خلاف روک ٹوک کرن والے لوک اُٹھ کھلوتے ۔
او س ویلے ، خُدا نے قورح، داتن ،اون، تے لوکاں دیاں دوجیاں آگُوآں وچوں جنہاں روک ٹوک کیتی ، آکھیا، ”اوہناں دیاں ساریاں سرداراں وچوں اوہناں دے پئودادیاں دے خنوادیاں مطابق اِک خنوادہ اِک سوٹی دے حساب نال باراں سوٹیاں لےتےہر سردار دا ناں اوسےدی سوٹی اُتے لکھ لَے۔ تے اوہناں نُوں لے کے خیمۂ اِجتماع وچ عہد دے صندوق دےاَگے جِتھے مَیں تہاڈےنال مِلداآں رکھ دیویں۔“ فیر خُدا نے آکھیا، ”تےجیہڑے بندےنُوں مَیں چُناں گا اوہدی سوٹی وِچوں کلِیاں پُھٹ پین گئیاں تےبنی اِسرائیل جیہڑے تہاڈے بارے بُڑبُڑکردےنیں اوہ بُڑبُڑاؤنا مَیں اپنےاگوں مکادیواں گا۔“(گنتی ۱۷:۵)۔ آیت ۸ وِچ، اسی ویکھدے آں پئی ”ہارُون دی سوٹی وِچوں جیہڑا لاوی دے خنوادےدے ناں دی سی کلِیاں پُھٹیاں ہوئیاں تے گُلیاں
کِھڑیاں ہویاں تے پکّے بادام لگے نیں۔ “
فیر آیت ۱۰وِچ اسی ویکھدےآں،”تےخُداوند نے مُوسیٰ نوں آ کھیاپئی ہارُون دی سوٹی شہادت دے صندُوق دے اگے رکھ دے تاں پئی اوہ جھگڑاکرن والیاں لئی اِک نشانی لئی پئی رہوے تےایس طرح تُوں اوہناں دیاں شکایتاں جیہڑیاں میرے خِلاف ہوندیاں رہندیاں نیں بند کر دیویں تاں پئی اوہ فناہ نا ہون،“ اِنج ہارون د ی سوٹی جیہڑی پھُٹ پئی سی عہد دے صندوق وِچ دھری تے رکھی گئی سی ۔
ایس توں ظاہر ہوندا اے پئی ہارون، لاوی دی اولاد وچوں ،اسرائیلیاں دے وڈے کاہن وانگر مسح کیتا گیا سی ۔ موسیٰ خُدادا نبی سی تے ہارون تےاوہدی اولاد اسرائیلیاں دے وڈے کاہن سن۔ خُدا آپ ای دھرتی اُتے وڈے کاہن دے سارے کم ہارون دے حوالے کر چکیا سی ۔ خُدا مُوسیٰ نُوں قربانی دا طریقہ وکھا چکیا سی، جِتھےاسرائیلی قربانی دے پشُولیاؤندےتےخُدا اگے قربان کردےسن جد کدی اوہ پاپ کردے، تےاوہ ہارون نُوں قربانی دے طریقے دیاں شرطاں دے بالکل مطابق ایہناں پشُوآں نوں قربان کرن دا راکھا بنا چکیا سی۔
بھاویں خُدا نے وڈے کاہن ہارون نوں سارے کاہناں والے کم اوہدےحوالے کیتے سن ، فیر وی ایہو جیہے لوک ہیگے سن جنہاں نیں اوہدی کہانت دے خلاف للکاریا ، تے ایہو ای سبب اے پئی خُدا ہارون دی سوٹی نوں ،ایہہ ثابت کردیاں ہویاں پھُٹن ویلے تیکر لیایا پئی اوہدی کہانت خُداولوں سی ۔ فیر اوہنے اسرائیلیاں نوں ایس سوٹی نوں ایس سبق دی یاد گاری وچ عہد دےصندوق دے اندر رکھن دا حکم دتا ۔ ایس طرح شریعت دیاں دو تختیاں ، مرتبان جِہدے وچ مَنّ سی، تے ہارون دی سوٹی جیہڑی پھُٹ پئی سی سارے عہد دے صندوق دے اندر رکھے گئے سن ۔ ایہہ تِناں شیواں رُوحانی طریقے نال کویں دسدیا نیں؟ اوہ ساڈے مکتی داتا یِسُوعؔ مسیح دیاں خدمتاں بارے دسدیاں نیں ۔
یِسُوعؔ مسیح نے ساڈے سارے پاپ مکاؤن لئی کیہڑیاں خدمتاں نوں پورا کیتا ؟
پہلا، اوہنے نبی دی خدمت پوری کیتی ۔ اوہ مُڈھ تے مکاء اے ۔ اوہ شروع تے اخیر نوں جان دا اے ، تے اوہ سانوں ساریاں نوں شروع تے اخیربارے سکھا چُکیا اے ۔ ساڈا خُداوندجان دا سی پئی جے اسی پاپی ای رہ جاندے تاں لوکاں دے ، یعنی تہاڈے دے میرے ،نال کیہ واقع ہوندا ۔
دوجا ، یِسُوعؔ اسمانی بادشاہی دا سدا دا وڈا کاہن بن گیا اے ۔اوہ ایس زمین اُتے آیا ایس لئی پئی اوہ آپ ای ساڈا مکتی داتا بن کے ، یعنی ساڈا کامل طریقے نال اسمانی بادشاہی دا اصلی وڈاکاہن بنن کے سانوں پاپ توں بچاؤنا چاؤہندا سی ۔
تریجا،یِسُوعؔ مسیح ساڈا بادشاہ اے ۔ پاک کلام اعلان کردا اے ، ” تے اوہدیاں کپڑیاں تے پٹّ اُتّے ایہہ ناں لِکھیا ہویا اے۔ بادشاہاں دا بادشاہ تے خُداونداں دا خُداوند“(مکاشفہ ۱۹:۱۶)۔اوہ سارے جگ دا اصل بناؤن والا اے ، تے اِنج ہر شے اُتے راج کرن دا اختیار رکھدا اے ۔
سانوں ساریاں نوں سمجھنا چاہی دا اے پئی یِسُوعؔ مسیح ، جیہڑا ساڈا اصلی بادشاہ ، نبی اے اوہ سانوں پاپ توں ساڈی مکتی دی سچیائی سکھا چُکیا اے تے اسمان دا سدا دا وڈا کاہن اے ، ہُن ساڈا اصلی مکتی داتا بن گیا اے ۔
ساڈا خُداوند تہانوں تے مینوں پاپ توں ازاد کر چُکیا اے ، سانوں خُدا دے لوک ، اوہدے پُتر تے اوہدے کم کرن والے بنا چُکیا اے ، تے اوہ سانوں چنگے کم کرن دے لائق کر چُکیا اے ۔ اوہ سانوں نویں سریوں جمن دے لائق کر چُکیا اے تاں پئی اسی ایس زمین اُتے وی نویاں زندگیاں گزار سکیے تے اوہ سانوں نویں زندگی دے چُکیا اے تاں پئی جد ویلا آئے ، اوہ ساڈیاں بدناں نوں زندہ کرے تے سانوں اسمان اُتے اپنے نال سدا تیکر زندہ رہن دے لائق کرے ۔ تہاڈے لئی تے میرے لئی یِسُوعؔ مسیح کون اے ؟ اوہ ساڈا اصلی مکتی داتا اے ۔ تے یِسُوعؔ مسیح ساڈا نبی ، ساڈا سدا دا وڈا کاہن تے ساڈا بادشاہ اے ۔
بھاویں اسی خُدا دی مرضی دی نافرمانی نئیں کرنا چاؤہندے ، اسی اینے ادھورے تے ماڑے آں پئی اسی بچ نئیں سکدے سگوں ہر ویلے پاپ کردے آں ۔ جے اسی اِنج جیوندے رہندے آں ، ایسے طرح مردے آں تے فیر خُدا دے اگے کھلوندے آں ، تاں ساڈے لئی جان دی جائز تھاں کیہڑی ہوئے گی ؟ کیہ اسمان ہوئے گا یا دوزخ ؟ جے سانوں ساریاں نیں شریعت دے مطابق دُکھ جرنے سن جیہڑی اعلان کردی اے ، ” گُناہ دی مزدُوری مَوت اے،“ تاں کیہ اسی سارے برباد نئیں ہوواں گے ؟اوہ جیہڑا ساڈے ورگیاں لوکاں نوں پاپ تے بربادی توں بچا چُکیا اے تے ساڈا مکتی داتا بن گیا اے یِسُوعؔ مسیح اے ۔ اوہ آپ ای ایس زمین اُتے آیا ، ساڈے نال محبت کیتی ، تے ساڈا مکتی داتا بن گیا اے جیہڑا، ایس طرح اپنے اِجڑ دا چنگا ایالی بن کے سانوں پاپ توں چھڈا چُکیا اے ۔
یوحنا ۳:۱۶ دسدااے، ” کیوں جو خُدا دُنیا نُوں اجیہا پیار کِیتا پئی اوس اپنا اِکلَوتا پُتر بخشیا تاں جو جیہڑا اوہدے اُتّے اِیمان لیاوے اوہ ہلاک نا ہوئے سگوں اوہنوں سدا دی زِندگی مِلے۔ “ خُدا نے تہانوں تے مینوں اینا پیار کیتا پئی اوہ آ پ ای ساڈے لئی ایس زمین اُتے آگیا ،جگ دے پاپ چُکن لئی بپتسمہ لیا ، سولی اُتے چڑھیا تے سولی اُتے مرگیا ، فیر مویاں وچوں جی اُٹھیا تے اِنج ساڈا اصل وچ مکتی داتا بن گیا اے ۔ ایس لئی یِسُوعؔ مسیح اُتے ایمان رکھ کے جیہڑا ساڈیاں دلاں وچ ساڈا مکتی داتا بن گیا اے ، اسی اوہ لوک بن گئے آں جیہڑے پاپ توں پاک آں ، جیہڑے مکتی دا انعام پا چُکے آں ،جیہڑا سانوں خُدا دے پُتر بنن تے سدا دی زندگی پاؤن دے لائق کر چُکیا اے ۔
اک شے اے جیہدے اُتے سانوں خُدا دے اگے ایمان رکھنا لازمی بناؤنا چاہی دا اے ۔ ایہہ ایس لئی ہیگا اے پئی خُدا نے ساڈے نال محبت کیتی ، تے ساڈیاں پاپاں نوں مکاؤن لئی ، اوہ ایس زمین اُتے اِک بندے دے بدن وچ جمیا، بپتسمہ لیا ، سولی اُتے مرگیا ، مویاں وچوں جی اُٹھیا،تے اِنج ساڈا اصلی مکتی داتا بن گیا اے ۔ ایہہ اپنیاں دلاں وچ ساڈے ایمان رکھن نال یِسُوعؔ دا گوشت کھان تے اوہدا لہو پی کے ہیگا اے پئی سانوں سدا دی زندگی مِل سکدی اے ۔ ایس لئی پئی ایس سچیائی توں بوہتی واضح کوئی شے نئیں ہوسکدی ، ایس لئی اسی ایہنوں منن تے ایس اُتے ایمان رکھن توں علاوہ کُجھ نئیں کرسکدے ۔
سانوں لازمی ایمان رکھن نال یِسُوعؔ دا گوشت کھانا تے اوہدا لہو پینا چاہی دا اے ۔ تے کوئی وی بندہ ایس اِکو ایمان نوں پا سکدا اے جیہڑا پچھان دا تے یِسُوعؔ ولوں پوری ہوئی پانی تے رُوح دی خوشخبری اُتے ایمان رکھدا اے جویں ایہہ ہیگی اے ۔ساڈے کرن لئی کُجھ ہور نئیں سگوں ایمان رکھنااے ؟ اسی خُدا دے خلاف کھلون توں علاوہ ہور کُجھ نئیں کر سکدے ۔ اسی خُدا دی نافرمانی تے پاپ کرن دی چھیتی کردے آں ۔ پر خُدا فیر وی تہانوں تے مینوں ساڈیاں ساریاں پاپاں توں اِکو ای وار سدا لئی بچا چُکیا اے ، ایس لئی پئی اوہ ساڈے ساریاں نال محبت کردا اے ۔
کویں خُدا نے پُرانے عہد نامے دے زمانے وچ اپنی مکتی بارے دسیا ؟
تاں فیر خُداوند نے سانوں کیہڑے طریقے نال بچایا اے ؟ پُرانے عہد نامے وچ ، اوہنے خیمۂ اِجتماع دے پھاٹک اُتے ظاہر ہون والیاں رنگاں تے وڈے کاہن دے پائے ہوئے کپڑیاں نال ایس مکتی دے بارے دسیا۔ خیمۂ اِجتماع دے پھاٹک وچ ظاہر کیتےگئےاسمانی، ارغوانی، تےلال دھاگےتےمہین وٹے ہوئے کتان دے رنگ بھیت نیں جیہڑے ساڈے اُتے اوہدی کامل مکتی نوں ظاہر کردے نیں ۔ تے وڈے کاہن دیاں کپڑیاں اُتے ، سونے دی تار نوں رَلایا گیا سی ۔
اسمانی دھاگہ سانوں دسدا اے پئی یِسُوعؔ مسیح ایس زمین اُتے ساڈے مکتی داتا وانگر آیا تے بپتسمہ لے کے ساڈیاں پاپاں نوں چُک لیا ۔ ارغوانی دھوگہ سانوں دسدا اے پئی یِسُوعؔ مسیح بادشاہواں دا بادشاہ تے سارا جگ بناؤن والا خُدا اے جنہے سارے جگ نوں بنایا ۔لال دھاگہ سانوں دسدا اے پئی ایس لئی پئی یِسُوعؔ مسیح نے اپنا بپتسمہ لے کے ساڈیاں پاپاں نوں چُک لیا ، اوہ جگ دیاں پاپاں نوں لے گیا تے اپنا لہو وگاؤن تے مر کے اوہناں لئی لعنتی ٹھہریا ، اِنج سانوں مکتی دتی ، جیہڑی سانوں ساڈیاں ساریاں پاپاں دی لعنت توں چھڈا چُکی اے ۔
مہین وٹے ہوئے کتان دا مطلب پُرانے تے نویں عہد نامے دا وڈا کلام اے جیہڑا سانوں دسدا اے پئی ساڈا خُداوند ایس زمین اُتے آیا ، بپتسمہ لیا ، سولی اُتے مرگیا ، فیر مویاں وچوں جی اُٹھیا ، تے اِنج اوہناں دیاں پاپاں نوں مکا چُکیا اے جیہڑے سچ مُچ ایمان رکھدے نیں ، تے اوہناں نوں برف وانگر چٹے پا ک کر چُکیا اے تے اوہناں نوں بچا چُکیا اے ۔ سونے دی تار ایس ایمان دی نشانی اے جیہڑا ایس گل اُتے ایمان رکھدا اے پئی یِسُوعؔ مسیح ساڈے لئی کیہ کر چُکیا اے ۔ ایہو ای سبب اے پئی سونے دی تار چمکدی اے ۔ تہاڈے تے میرے کول فخر کرن لئی کُجھ نئیں ہیگا ، پر جدوں اسی سچے دلوں ایس گل اُتے ایمان رکھدے آں جیہڑی یِسُوعؔ مسیح، آپ ای خُدا تے خُدا دا پُتر ساڈے لئی کر چُکیا اے ۔ اسی سچ مُچ خُدا دی محبت دے کپڑے پا سکدے آں ،اوہدیاں برکتاں لے سکدے آں ، تے صرف چنگیاں کماں اُتے ایمان رکھ کے جیہڑے اوہ کر چُکیا اے اوہدے راہیں ودھ پھُل سکدے آں۔ ایہہ اے خُدا سانوں خیمۂ اِجتماع دے راہیں کیہ دسدا پیا اے ۔
سانوں ایہہ سمجھنا چاہی دا اے پئی خیمۂ اِجتماع وچ رکھے گئے عہد دے صندوق دے راہیں خُدا سانوں کیہ دسدا پیا اے ۔ سانوں لازمی جاننا تے ایمان رکھنا چاہی دا اے پئی یِسُوعؔ مسیح ایس زمین اُتے آیا ، لوکاں دے تے ساڈیاں ساریاں پاپاں نوں یوحنا بپتسمہ دین والے کولوں بپتسمہ لے کے چُک لیا ، سولی اُتے مر کے ساڈی پاپ دی لعنت جری تے فیر مویاں وچوں جی اُٹھیا ۔ عہد دے صندوق دے راہیں ، خُدا ایہہ ظاہر کردا پیا اے پئی سانوں سچ مُچ اپنے خاص مکتی داتا وانگر ، تے اپنے سکے خُداوانگر یِسُوعؔ مسیح اُتے ایمان رکھنا چاہی دا اے ۔ اوہ جیہڑے یِسُوعؔ دے بپتسمے اُتے اوہناں دے اپنے ڈاہڈے پاپاں نوں چُکن دے طور اُتے ، یِسُوعؔ دے صلیبی لہو اُتے اپنیاں پاپاں دی موت دےطوراُتے ، یِسُوعؔ مسیح دی موت اُتے اپنی موت دےطوراُتے، اوہدے جی اُٹھن اُتے اپنے جی اُٹھن دےطوراُتے ایمان رکھدے نیں- اوہو ای لوک نیں جنہاں نوں خُدا مکتی دے چُکیا اے ۔
تاں فیر ایہہ خیمۂ اِجتماع کیہڑے پاسے اشارہ کردا اے ؟ ایہہ یِسُوعؔ مسیح ول اشارہ کردا اے ۔ ایہہ سانوں مکتی دے طریقے بارے دسدا اے جیہدے نال یِسُوعؔ مسیح تہانوں تے مینوں ساڈیاں پاپاں توں بچا چُکیا اے ۔ نویں عہد نامے وچ ، ایہہ یِسُوعؔ مسیح سی جنہے بپتسمہ لیا تے سولی اُتے مرگیا ، اِنج ساڈیاں ساریاں پاپاں نوں مکا دتا، اوہناں ساریاں نوں دھو دتا، ساڈیاں ساریاں بدکاریاں لئی لعنتی ٹھہریا ، تے سانوں اِکو ای واری سدا لئی ساریاں پاپاں توں بچالیا ۔
پُرانے عہد نامے وچ،ایہہ قربانی دا پشُو سی جیہڑا پاپیاں نوں اوہدے سِر اُتے اوہناں دے ہتھ رکھن نال ، تے اپنا لہو وگاؤن تے مرن نال اوہناں دیاں بدکاریاں نوں قبول کر کے بچاؤندا سی ۔ پُرانا عہد نامہ قربانی دے پشُو دی موت بارے دسدا اے جیہڑا ہتھاں دے رکھے جان نال اوہناں پاپیاں دے پاپاں نوں چُکدا سی تے اوہناں دے بدلے فدیے دی موت مردا سی ۔ پُرانے عہد نامے وچ ظاہر کیتا گیا فدیے دا قربانی دا نظام ، جد نویں عہد نامے نال جوڑ دتا جاندا اے ، تاں ایہدا مطلب یِسُوعؔ مسیح اے ، جیہڑا پانی تے رُوح دی خوشخبری نوں پورا کرن والا اے جیہڑا بپتسمے تے لہو دے راہیں آیا سی ۔
تاں فیر، کِہنے مکتی دی ایس شریعت نوں بنایا تے مقرر کیتا ؟ خُدا ساڈے مکتی داتا نے ایہنوں مقررکیتا ۔ خُدا نے مکتی دی شریعت نوں قیم کیتا جیہڑی پاپیاں نوں پاپ توں چھڈاؤندی اے ، تے اوہ ایہو ای شریعت سانوں دے چُکیا اے ۔ عہد دے صندوق وچ شریعت دیاں دوتختیاں ،مَنّ دا مرتبان تے ہارون دی سوٹی جیہڑی پھُٹ پئی ہیگے سن ۔ تے ایہہ ساریاں شیواں سانوں یِسُوعؔ مسیح دیاں گُناں تے خدمتاں
بارے دسدیاں نیں ۔
ہارون دی سوٹی جیہڑی پھُٹ پئی سانوں دسدی اے پئی خُدا سانوں بچاؤندا اے جد اسی یِسُوعؔ مسیح اُتے ایمان رکھدے آں جیہڑا رُوحانی طریقے نال اسمانی بادشاہی دا وڈا کاہن تے ساڈا چنگا ایالی بن گیا اے ۔ مَنّ دا مرتبان سانوں یِسُوعؔ مسیح دے گوشت تے لہو دے بارے وی دسدا اے جیہڑا ساڈی زندگی دی روٹی بن گیا اے ۔ شریعت دیاں پتھردیاں دو تختیاں سانوں ایہہ دسدیاں نیں پئی خُدا شریعت نوں بناؤن والا اے ۔ خُدا ولوں قیم کیتی گئی شریعت پا پ تے موت دی شریعت تے پاپ دی معافی تے مکتی دی شریعت اے ۔ ساڈے خُدا وانگر ،یِسُوعؔ ساڈے اُتے زندگی دی شریعت تے موت دی شریعت قیم کرچُکیا ا ے ۔
ایس طرح ،عہد دا صندوق تے ایس وچ موجود ہر شے سانوں یِسُوعؔ مسیح دے بارے کلام کردے نیں ۔ ایہہ یِسُوعؔ مسیح اُتے اپنے مکتی داتا وانگر ایمان رکھن دے راہیں ہیگا اے پئی اسی اپنے ساریاں پاپاں توں پاک ہو سکدے آں تے اپنی مکتی لے سکدے آں ۔ کوئی معنی نئیں رکھدا کنے ادھورے تے ماڑے اسی ہو سکدے آں ، جے اسی قبول کردے تے دوآں شریعتاں نوں من دے آں جیہڑیاں یِسُوعؔ قیم کر چُکیا اے،تد فیر اسی اِک واری پاپی بن سکدے، تے فیر اِک واری اپنیاں ساریاں پاپاں دی معافی لے کے راستباز بن سکدے آں تے اِنج خُدا دے اپنے لوک بن سکدے آں ۔ کیہ تُسی ایمان رکھدے او ؟
ہُن ایس موجودہ زمانے وچ ، سارے جگ وچوں لگ بھگ سارے مسیحی یِسُوعؔ اُتے بے فائدہ ایمان رکھن ول دھیان رکھدے نیں ، ایس لئی پئی اوہ خیمۂ اِجتماع وچ ظاہر ہون والی سچیائی نوں نئیں جان دے ۔ اوہ ایمان رکھدےنیں پئی اوہ صرف یِسُوعؔ دے صلیبی لہو اُتے ایمان رکھ کے پاپ دی معافی پا سکدے نیں ۔ دوجیاں اکھراں وچ ، اوہ ایمان رکھدے نیں پئی یِسُوعؔ اوہناں نوں صرف صلیبی لہو نال مکتی دے چُکیا اے ۔ پر کیہ یِسُوعؔ اصل وچ ساڈے مکتی لئی صرف سولی اُتے مر گیا سی ؟ کیہ ایہہ سارا کُجھ اے جیہڑااوہنے ساڈے چھٹکارے لئی کیتا؟ ایس دے اُلٹ ، کیہ اوہنے یوحنا کولوں بپتسمہ لےکے جگ دیاں ساریاں پاپاں نوں اِکو ای واری سدا لئی نئیں چُکیا(متی ۳:۱۳۔۱۵؛ ۱۔پطرس ۳:۲۱؛ ۱۔یوحنا ۵:۶)؟
فیر وی اَج دے مسیحی ، صرف ادھی پاپ دی معافی پاؤندیاں ہویاں ، صرف یِسُوعؔ دے صلیبی لہو اُتے ایمان رکھدے نیں۔ ایس لئی مکتی داتا وانگر یِسُوعؔ مسیح اُتے ایمان رکھ کے اپنے نسلی پاپ دی معافی پاؤن دے بعد ، اوہ اپنے ہر دن دے پاپ آپ ای دھون دی کوشش کردیاں ہویاں ہر دن توبہ دیاں دعاواں منگدے نیں ۔ ایہہ مکتی کنی اُلٹ پُلٹ اے ؟ ایہہ اِنج ای اے جویں ایمان نال صرف اپنیاں ادھیاں پاپاں نوں دھونا تے فیر اپنیاں ذاتی ہمتاں نال باقی پاپاں نوں دھون دی ہمت کرنا ۔
جد صورت ِ حال ایہو جیہی اے ، تاں کویں مَیں رہ نئیں سکدا سگوں بوہتی وار یِسُوعؔ دے بپتسمے تے لہو نوں رَلا کے سکھاؤندیاں ہویاں منادی کردا رہواں گا ؟ حالے تیکر ، ایس جگ دے بوہت سارے مسیحی ، مُڈھلی کلیسیائی زمانے دیاں مسیحیاں توں علاوہ ، ادھی سکھنی مکتی اُتے ایمان چُکے نیں ۔ جے اِنج نئیں ہیگا تاں کیوں لوک ہُن مسیحیت اُتے صرف اِک دین وانگر ایمان رکھدے نیں ؟
بوہتا چر نئیں لنگھیا پئی امریکہ توں والیریاجونز ناں دی اِک زنانی نے خیمۂ اِجتماع دیاں کتاباں وچوں پہلی کتاب پڑھن دے بعد پاپ توں معافی پائی ۔ ایس کتاب نوں پڑھن توں پہلاں ، اوہ ساڈیاں کئی دوجیاں کتاباں پڑھ چُکی سی ۔ بھاویں اوہ ساڈیاں کتاباں دیاں گلاں نال اتفاق کر دی سی ، اوہ حالے تیکر اپنے آپ نوں پانی تے رُوح دی خوشخبری توں ساری دی ساری سکون وچ نا کر سکی ۔اوہنے سانوں دسیا پئی اوہنے حالے وی کئی شک شُبے دل وچ رکھے سن ، سوچدیاں ہویاں ”ایہہ ٹھیک لگدا اے ، پر فیر کویں اینے سارے لوک ایہدی منادی نئیں کردے پئے؟“ پر اوہنے اقرار کیتا پئی جد اوہنے خیمۂ اِجتماع دیاں کتاباں وچوں پہلی کتاب پڑھ لئی ، اوہ مکتی دا سچا ایمان پاؤن تیکر اَپڑی ،ایہہ ایمان رکھدیاں ہویاں پئی پانی دی خوشخبری ٹھیک اے ، یعنی ایہہ خیمۂ اِجتماع وچ ظاہر ہون والی اصل سچیائی اے ۔
بینن توں ایسے کتاب نوں پڑھن والے اِک بندے نے وی سانوں لکھیا ، ”تہانوں ایہہ جان کے بوہت حیرانی ہوئے گی پئی تہاڈے کتاب پڑھن نال پا پ دی معافی پاؤن دے بعد ، مَیں ہُن اپنے گرجے جانا چھڈ دتا اے۔کیوں مَیں اوس گرجے نوں چھڈیا جِتھے مَیں جاندا ہوندا ساں ؟ ایس لئی پئی اوہ ہولی ہولی پاکیزگی دی خُدائی تعلیم دی منادی کردے سن ، ایہو جیہی شے جیہڑی پاک کلام وچوں نئیں سکھائی جاندی ۔ ہولی ہولی پاکیزگی دی ایہہ خُدائی تعلیم ساری دی ساری پاک کلام دے مطابق نئیں سی ۔ جویں اوہ سکھاؤندے رہے پئی مَیں لازمی ہور راستباز ٹھہر سکداہاں جد پئی اصل وچ میرا بدن کدی پاک نئیں ہو سکدا،میرے لئی ایہو جیہے پیغاماں وچ بیٹھنا تے سُننا بوہت اوکھا سی ۔
ایس لئی مَیں ایس کلیسیا وچوں نکل آیا تے اپنے آپ نوں ایس توں وکھریاں کر لیا ۔ ایس لئی پئی مَیں تہاڈی کتاب نوں پڑھ کے اپنیاں پاپاں دی معافی پا چُکیا آں ، مَیں کوئی چارہ نئیں رکھدا ساں سگوں اوس گرجے نوں چھڈ دینا جیہدے وچ مَیں جاندا پیا ساں تے ہُن اپنے آپ نوں ایس توں وکھریاں کر لواں ۔ جویں پئی اسی جیہڑے ایس سارے وچوں لنگھ چُکے آں ہُن ایمان دار بن گئے آں تے اپنے آپ نوں خُدا دی کلیسیا نال رَلا چُکے آں ،ایس جگ دے سارے لوک وی بدل سکدے نیں جے اوہ صرف سچیائی نوں جانن، جویں کلام دسدا اے ،’تے تُسی سچیائی نوں جانو گے تے سچیائی تہانوں اَزادکرے گی۔‘ “
خیمۂ اِجتماع دا عہد دا صندوق وی یِسُوعؔ مسیح نوں ظاہر کردا اے ۔ عہد دا ایہہ صندوق خیمۂ اِجتماع دے سب توں ڈوہنگھے حصے وچ رکھیا گیا سی ۔ کوئی ایہنوں صرف خیمۂ اِجتماع دے پڑدے نوں چُک کے تے ایس وچ جا کے ،تے فیر بوہتی پاک تھاں دا پڑدہ چُکن تے ایس وچ جا کے ایہنوں ویکھ سکدا سی ۔ دوجیاں اکھراں وچ ، خیمۂ اِجتماع دا پھاٹک چڑھدے پاسے سی ، تے صندوق خیمۂ اِجتماع دے بوہت لہندے کونے وچ رکھیا گیا سی ۔
چوباں صندوق توں وکھ نا کیتیاں جان
خروج ۲۵:۱۴۔۱۵فرماؤندااے، ”تے ایہناں چوباں نُوں صندُوق دیاں پاسیاں دیاں کڑیاں وِچ پاویں پئی اوہناں دے سہارے صندُوق چُکیاجائے۔ چوباں صندُوق دیاں کڑیاں اندر لگیاں رہن تےاوس توں وکھ نا کیتیاں جان۔“ ایہناں آیتاں دا کیہ مطلب اے ؟ ایہناں آیتاں نال ، خُدا سانوں دسدا پیا اے پئی سانوں اپنے آپ نوں اوہدےلئی وقف کرن دے راہیں پانی تے رُوح دی خوشخبری دی خدمت کرنی چاہی دی اے ۔ خوشخبری ودھدی اے صرف جد وں اسی اوہدے کم لئی اپنے آپ نوں وقف کر دے آں ۔ خوشخبری دے لئی اپنے آپ نوں وقف کرن نال خُداوند دی خدمت کرنا سولی دے راہ اُتے چلنا اے جیہدے اُتے ساڈا خُداوند ساڈے توں پہلاں چلیا سی ۔ ایسے لئی اوہنے اپنیاں چیلیاں نوں دسیا ، ” جے کوئی میرے پِچّھے آؤنا چاہے۔ اوہ اپنا اِنکار کرے تے اپنی صلِیب چُک کے میرے مگر ٹُر پئے۔ “(مرقس ۸:۳۴)۔
اصل خوشخبری نُوں سارے جگ وچ ودھاؤن لئی، وڈی قربانی، کوشش تے دُکھاں دی لوڑ اے۔سانوں ایہہ حوالہ ویکھ کے پتہ لگدا اے پئی پولُس رسول نے پانی تےرُوح دی خوشخبری لئی کنےدُکھ جرے: ” اوہ مسِیح دے خادم نیں؟ (میرا ایہہ آکھنا نادانی اے) مَیں وَدّھ آں۔ محِنتاں وِچ وَدّھ کے۔ قید وِچ وَدّھ کے کولڑے کھان وِچ حدّوں وَدّھ۔ کئی واری مَوت دے خطریاں وِچ رہیا آں۔ مَیں یہُودِیاں توں پنج واری اِک گھٹ چالی چالی کولڑے کھادے۔ تِنّ واری بیَنت کھادے اِک وار پتّھراں نال ماریا گیا۔ تِنّ واری جہاز ٹُٹن دی بلا وِچ پیا۔ اِک رات دِن سمُندر وِچ کَٹیا۔ مَیں کئی واری سفراں وِچ۔ دریاواں دے خطریاں وِچ۔ ڈاکُوؤاں دے خطریاں وِچ۔ اپنی قوم توں خطریاں وِچ۔ غیر قوماں توں خطریاں وِچ۔ شہر دیاں خطریاں وِچ۔ بیابان دیاں خطریاں وِچ۔ سمُندر دیاں خطریاں وِچ۔ جُھوٹھے بھراواں دے خطریاں وِچ۔ محنت تے مُشقّت وِچ۔ کئی واری جاگدیاں رہن۔ بُھکھ تے تَریہہ دی مُصِیبت وِچ۔ کئی واری فاقے وِچ۔ پالے تے ننگے رہن دی حالت وِچ رہیا آں۔ ہورناں گلّاں دے سِوا جِنہاں دا مَیں ذِکر نئیں کر دا۔ سارِیاں کلِیسیاواں دا فِکر مَینُوں روز دِہاڑے آ دبدا اے۔ “(۲۔کرنتھیوں ۱۱:۲۳۔۲۸)۔
پر ، اوہ لوک جیہڑے خُداوند توں بوہتی اپنے آپ نال محبت کردے نیں جنہے ساری سزا توں اوہناں نوں چھڈاؤن لئی اپنے آپ نوں دے دتا اوہ خُدا دی بادشاہی لئی اپنے آپ نوں قربان نئیں کرسکدے ۔ پانی تے رُوح دی خوشخبری دی خدمت کرنا کوئی سوکھا راہ نئیں ہیگا ۔ کویں کوئی کسان بغیرمُڑہکے دے چنگی فصل دی آس رکھ سکدا اے ؟
ایسے طرح ، عہد دا صندوق وی ساڈیاں قربانیاں دے سببوں چُکیا جانا چاہی دا اے ۔ اِک واری داؤد بادشاہ نے عہد دےصندوق نوں بلداں نال کھچن والی اِک نویں گڈی نال لیاؤن دی کوشش کیتی ، بجائے ایہدے پئی ایہدے بندے ایہنوں چوباں نال لے جان جویں ایہنوں لے جان لئی آکھیا گیا سی ۔ راہ وِچ ، بلد تھُڑک گئے، تے اِک عُزہ ناں بندے نے خُدا دے صندوق اُتے اپنے ہتھ لائے تے اوہنوں پھڑ لیا ۔فیر خُداونددا غصہ عُزہ دے خلاف ودھیا ، تے خُدا نے اوہدی غلطی دے سببوں اوہنوں اوتھے ای مار دتا ۔ عُزہ اوتھے اوہدے صندوق کول مر گیا (۲۔سموئیل ۶:۱۔۷)۔ انج داؤد،ایس توں کمبیا تے اوس دن خُداوند توں ڈریا، تےعہددے صندوق نوں جاتی عوبید ادوم دے گھر وچ لے گیا ۔ ایہہ صندوق اپنیاں بندیاں دیاں موہڈیاں اُتے چُکن دے راہیں ای سی پئی اوہ ایہنوں تِناں مہینیاں بعدوں اپنے قلعے وچ واپس لیا سکیا ۔ جویں ایہہ گل صاف دسدی اے ، سانوں لازمی عہد دا صندوق بالکل اوسے طرح چُکنا چاہی دا اے جویں خُدا سانوں ، اپنے مُڑہکے تے لہو نال ، اپنیاں قربانیاں نال ، اوہدی خوشخبری لئی اپنے نا مُکن والے دلی چاء نال چُکن لئی دے چُکیا اے ۔
اوہ جیہڑے سچ مُچ وڈی شکر گزاری نال پاپ توں معافی پا چُکے نیں اپنے آپ نوں خُداوند دے
ناویں لے کے بوہتے خوش نیں جیہڑا ساڈے لئی اپنے آپ نوں ناویں لا چکیااے ۔ اسی بوہتی واری خُداوند،اپنے مکتی داتا تے خُدا دا شکر اداکردے آں ۔ اسی سانوں ایس زمین اُتے خوشخبری دی خدمت کرن لئی اوہدے پِچھے چلن لئی ،اوہدا شکر ادا کردے آں ۔
اسی سارے ایس سُفنے وانگر سچیائی توں حیران تے بوہت خوش آں ، پئی خُداوندسانوں سچی خوشخبری دی خدمت کرن ، اوہدے پِچھے چلن تے زندگی دی اوہ قِسم گزارن لئی جیہڑی اوہنوں خوش کردی اے چُن چُکیا اے ۔ سانوں صرف مکتی دی سچیائی نوں جانن دی اجازت دینا ای سانوں خوشی نال جھلے کرن لئی وادھُو ہوئے گا ،تے فیر وی خُداوندنے سانوں ایس خوشخبری دی خدمت کرن دی اجازت وی دتی اے ۔ ایہو جیہاں وڈیاں برکتاں دین دے بعد ، کویں اسی سوکھے جیہے اوہدا شکر ادا نئیں کرسکدے ؟ اسی خُدا نوں اپنا ساراشکر پیش کردے آں ۔ ایسے لئی اسی سچی خوشخبری ودھاؤن لئی اپنے آپ نوں قربان کرن لئی تیار آں، اسی ایس سارے جگ وچ منادی دے پاک کم لئی کسے ویلے ، کوشش یا اپنے مال خزانے نوں بچاؤن دی فکر نئیں کردے ۔
پئی اسی پاپ دی معافی پا چُکے آں ، اصل وچ ، اپنے آپ وچ اِک ایہو جیہی شے اے جیہدے لئی اسی حدوں ودھ شکر گزار آں ۔ پر خُدا ایتھے روکیا نئیں ، سگوں ہور اوہ سانوں پانی تے رُوح دی سچی خوشخبری نال مِلن تے ودھاؤن دے لائق کر چُکیا اے — ایہہ ساڈے لئی اِک وڈی برکت توں علاوہ کیہ اے ؟
ہور کیہڑا اے جیہڑا پانی تے رُوح دی ایس خوشخبری دی خدمت کرن دی ہمت کر سکدا اے ؟ صرف کوئی وی ایس خوشخبری دی خدمت نئیں کر سکدا ۔ کیہ سیاست دان ایہدی خدمت کر سکدے نیں ؟ میئرز؟ صدر ؟ بادشاہ ؟کوئی معنی نئیں رکھدا پئی ایہوں جیہے لوکاں دے لوکاں وچ عہد ے کنے ای اُچے ہون ، جے اوہ پانی تے رُوح دی خوشخبری نوں نئیں جان دے تے ایس اُتےایمان نئیں رکھدے،تاں اوہ کدی وی سچی خوشخبری دی خدمت نئیں کر سکدے ۔پر خُدا سانوں ایہو جیہا موقع جیہدے اسی حقدار نئیں ساں دے چُکیا اے تے سچ مُچ سانوں ایس خوشخبری دی خدمت دے لائق کر چُکیا اے ۔ ایہہ کنی وڈی برکت اے ؟
مَیں ایس فضل لئی خُدا دا شکر ادا کرداآں جنہے سانوں بچایا اے ، ایس لئی پئی اوہ ساڈے نال محبت کر چُکیا اے ۔ بھراؤ تے بھینو، اسی ایمان رکھدے آں پئی یِسُوعؔ مسیح ساڈا خُدا تے مکتی داتا اے ۔ اسی خُدادے اوہ لوک آں جیہڑے یِسُوعؔ دا گوشت کھاندے تے اپنے رُوحانی ایمان دے راہیں اوہدا لہو پیندے آں ۔ پاک کلام دسدا ے پئی یِسُوعؔ مویاں دا خُدا نئیں ،سگوں جیوندیاں دا خُدا اے (لوقا ۲۰ :۳۸)،تے جیوندے ایتھے اوہناں توں علاوہ کوئی دوجے نئیں ہیگے جیہڑے پانی تے رُوح دی خوشخبری اُتے ایمان رکھ کے سدا دی زندگی پا چُکے نیں ۔جیہڑا وی ایس خوشخبری دی سچیائی اُتے ایمان نئیں رکھدا اوہ رُوحانی طریقے نال مویا اے ، تے جیہڑا وی ایس اُتے ایمان رکھدا اے اوہ رُوحانی طریقے نال جیوندا اے ۔ خُدا اصل وچ اوہناں دا خُدا اے جیہڑےپانی تے رُوح دی خوشخبری اُتے ایمان رکھدے نیں ۔
بھراؤ تے بھینو ، یِسُوعؔ آپ ای سانوں اپنےبدن تے لہو نال پاپ دی معافی دے چُکیا اے۔ تہانوں لازمی احساس کرنا چاہی دا اے پئی جے تُسی ایس سچیائی اُتے ایمان نئیں رکھدے ، تاں تہاڈا یِسُوعؔ نال کوئی میل جول نئیں ہوئے گا ۔ یِسُوعؔ مسیح تہانوں اسمانی برکتاں ،سدا دی زندگی تے تہاڈیاں پاپاں دی معافی دیندا اے ۔ اوہ کون اے جیہڑا چنگا ایالی بن گیا اے جیہڑا تہانوں سدا دیاں برکتا ں دیندا اے ، جیہڑا تہاڈی اگوائی کردا اےتے تہاڈی راکھی کردا اے ؟ ایہہ یِسُوعؔ مسیح اے جیہڑا پانی تے رُوح دی خوشخبری نوں پورا کرن والا اے ۔ ایہو ای یِسُوعؔ خُدا اے ۔ مَیں آس رکھدا تے دعا منگداہاں پئی تہاڈے وچوں ہراِک تے ہر کوئی ایس یِسُوعؔ اُتے اپنے خُداوانگر ایمان رکھے گا ۔
جتھوں تیکر میرا تعلق اے ، مَیں نا صرف ایس سچیائی اُتے ایمان رکھدا تے ہُن خُدا دی خدمت کردا آں ، سگوں مَیں آؤن والے زمانے وچ وی سدا اِنج ای کردا رہواں گا ۔ پر تُہاڈے بارے کیہ خیال اے ؟ کیہ تُسی پانی تے رُوح دی خوشخبری اُتے ایمان رکھدے او ؟ تے کیہ تُسی ایمان رکھدے او پئی تہانوں تہاڈے ایمان نال خُدا دی کلیسیا تے مسیح دی محبت وِچ وسنا چاہی دا اے ؟ آؤ اسی سارے پانی تے رُوح دی خوشخبری اُتے ایمان رکھدیاں ہویاں اوس دن تیکر اپنیاں زندگیاں گزارئیے جد تیکر اسی اپنے خُداوند نال نا مِل لِئی اے۔
Copyright © 2021 by The New Life Mission