Devido ao COVID-19 e à interrupção do Serviço de Correio Internacional,
suspendemos temporariamente o nosso 'Serviço de Impressão Gratuita de Livros'.
suspendemos temporariamente o nosso 'Serviço de Impressão Gratuita de Livros'.
Diante dessa situação, não podemos enviar os livros para você neste momento.
Ore para que esta pandemia termine em breve e retorne o serviço postal.
Ore para que esta pandemia termine em breve e retorne o serviço postal.
مضمون 9: رومیوں (رومیوں دی کتاب اُتے تفسیر)
[8-6 باب] اوہ جیہڑے خُدا دی بادشاہی دے وارث نیں <رومیوں ۸: ۱۶۔۲۷>
>رومیوں ۸: ۱۶۔۲۷<
” رُوح آپ ساڈی رُوح نال رَل کے گواہی دیندا اے پئی اسیں خُدا دے پُتر ہیگے آں۔ تے پُتر آں تاں وارث وی آں مطلب اے خُدا دے وارث تے مسیح دی مالکی وچ رَلے ہوئے پر شرط ایہہ ہیگی اے پئی اسیں اوہدے نال دُکھڑے جریےتاں پئی اوہدے نال جلال وی پائیے ۔ ایس لئی پئی میری دانائی وچ ایس جگ دیاں دُکھ پیڑاں ایس لائق نئیں پئی اوہ جلال دے برابر ہو سکن جیہڑا ساڈے اُتے ہون والا اے ۔ ایس لئی پئی مخلوق بوھت آس رکھدے ہوئیاں خُدا دے پُتراں دے ظاہر ہون دی راہ ویکھدی اے ۔ ایس لئی پئی مخلوق جھوٹ دے حوالے کر دتی گئی سی ۔ نہ اپنی خوشی نال سگوں اوہدے سبب جنہے اوہناں نوں ۔ ایس آس اُتے جھوٹ دے حوالے کر دتا پئی مخلوقاں وی بربادی دے حوالیوں چھُٹ کے خُدا دے پُتراں دے جلال دی آزادی وچ جان گئیاں ۔ ایس لئی پئی سانوں پتہ ہیگا اے پئی ساری مخلوق اکٹھے ہوکے حالے تیک ہاڑے پاؤندی اےتے بچہ جمن دی پیڑ وچ پئے تڑفدے اے۔ تے نہ صرف اوہو ای سگوں اسیں وی جنہاں نوں رُوح دےپہلے پھل ملے نیں آپ اپنے دل وچ ہاڑے پاؤندے آں تے لَے کے پالے ہون مطلب اے اپنے بدن دی مکتی دی راہ ویکھدے آں۔ ایس لئی سانوں آس دے راہیں مکتی ملی پر جیہڑی شَے دی آس اے جدوں اوہ دِس پوے تاں فیر آس کاہدی ؟ ایس لئی پئی جیہڑی شے کوئی ویکھدا پیا اے اوہد ی آس کیہ کرے گا؟ پر جیہڑی شے نوں نئیں ویکھدے جے اسیں اوہدی آس رکھیے تاں صبر نال اوہدا راہ ویکھدے آں ۔ایسے طرحاں رُوح وی ساڈے ماڑے دناں وچ مدد کردا اے ایس لئی پئی جویں سانوں دعا کرنی چاہی دی اے سانوں نئیں پتہ پر رُوح آپ ایہو جیہے ہونکے بھر بھر کے ساڈی حمایت کردا اے جنہاں بارے نئیں دسیا جا سکدا ۔ تے دلاں نوں پرکھن والا جان دا اے پئی رُوح دی کیہ نیت اے ایس لئی پئی اوہ خُدا دی مرضی دے مطابق پاک لوکاں دی حمایت کردا اے ۔ “
سارے لوک جیہڑے اپنے پاپاں توں معاف ہوگئے نیں پانی تے رُوح دی خوشخبری اُتے ایمان رکھدے نیں تے اپنے دلاں وچ پاک رُوح رکھدے نیں ۔۱ ۔ یوحنا ۵ : ۱۰ وچ ایہہ آکھدا اے ، ” جیہڑا خُدا دے پُتر اُتے ایمان رکھدا اے اوہ اپنے آپ وچ گواہی رکھدااے۔ “ اوہ جیہڑا اپنےدل وچ خُدا دی راستبازی رکھدا اے ، اپنے وچ وسیا ہویا پاک رُوح رکھدا اے، تے ایہہ پانی تے رُوح دی خوشخبری اُتے ایمان ہیگا اے جیہڑی اوہدے دل وچ ہمیش دے بسیرے لئی پاک رُوح نوں ممکن بناؤندی اے ۔
اسیں پانی تے رُوح دی خوشخبری اُتے اپنے ایمان دے راہیں اپنےپاپاں توں معافی پاؤن دے بعدوں خُدا دے پُتر بن گئے آں ۔ پاک رُوح ساڈے دلاں وچ وس گیا اے تے ایہہ آکھدے ہوئیاں ،ساڈی گواہی بن گیا اے ،”تُسیں خُدا دے پُتر تے تے اوہدے لوک ہیگے او۔“اوہ جیہڑے اپنے دلاں وچ پاک رُوح نئیں رکھدے ، دوجے پاسے ، اوہناں بارے شریعت گواہی دیندی اے ، ” تُسیں خُدا دے پُتر نئیں ،سگوں پاپی ہیگے او ۔ “
اوہناں لئی جیہڑے پانی تے رُوح دی خوشخبری اُتے ایمان رکھدے نیں ، پاک رُوح گواہی دیندا اے ، ”تُسیں خُدادے پُتر ہیگے او ۔تُسیں خُدا دے بے پاپ لوک جے۔ “ خُدا نے ایہنوں بالکل کھولیا تاں پئی اسیں جانیے پئی خُدا دے پُتر بنن لئی ، سانوں لازمی طور اُتے پانی تے رُوح دی خوشخبری اُتے ایمان رکھنا چاہی دا اے ۔
تُسیں خورے پُچھ سکدے او ، ” میَں کُجھ محسوس نئیں کردا، تاں ایہدا مطلب ایہہ ہیگا اے پئی میَں خُدا دا پُتر نئیں ہیگا واں؟ “ کئی لوک اپنے ایمان وچ اینے بالاں وانگر ہوندے نیں تے احساس نئیں کردے پئی اوہ اپنے دلاں وچ پاک روح رکھدے نیں ۔ پر پاک رُوح ساڈا پک کردا اے پئی بھاویں اسیں اپنے شکی خیالاں وچ ہیگے آں ، رُوح سانوں ایہہ آکھدے ہویاں خوش کردا اے ، ”ہائے !تُسیں خُدا دے پُتر ہیگے او ! کیہ تُسیں پانی تے رُوح دی خوشخبری اُتے ایمان نئیں رکھدے او ؟ کیوں جے تُسیں ایمان رکھدے او، تُسیں خُدا دے لوک جے ۔“ بھاویں اسیں شک وچ ہیگے آں ، ایس لئی ، جے اسیں پانی تے رُوح دی خوشخبری اُتے ایمان رکھدے آں ، اسیں خُدا دے پُتر ہیگے آں ۔ پاک رُوح گواہی دیندا اے پئی اسیں خُدا دے پُتر ہیگے آں ۔ پاک رُوح ایہو جیہی شے نئیں ہیگی اے جیہڑا ساڈے خیالاں تے سوچاں راہیں ساڈے دلاں وچ وسدا اے ۔ اوہ جیہڑے پانی تے رُوح دی خوشخبری اُتے ایمان رکھدے نیں، اپنے دلاں وچ کوئی پاپ نئیں رکھدے ،تے ایس لئی پئی اوہ کوئی پاپ نئیں رکھدے، پاک رُوح اوہناں وچ
رہندا اے ۔ اوہ لازمی طور اُتے خُدا دے پُتر ہیگے نیں ۔
پاک رُوح ساڈےدلاں وچ سانوں دسدا اے ، ” تُسیں یسوع دے بپتسمے ، اوہدی سولی اُتے ایمان رکھدے او تے معاف کیتے گئے او؛ ایس لئی تسیں کوئی پاپ نئیں رکھدے تے خُدا دے پُتر ہیگے او۔“
پر، ایہدا ثبوت لوکاں دی آواز سُنن وانگر نئیں ہوندا۔ ایس لئی ، ایس لئی بوھتی اُچی آواز سُنن دی آس نہ رکھو ! جے تُسیں آوازسُنن دی آس رکھدے او، فیر شیطان اپنی آواز بندیاں وانگر بدل سکدا اے تے تہانوں دھیانے لاؤن دی کوشش کر سکدا اے ۔ شیطان لوکاں دے خیالاں وچ جھاتی پاؤن دے راہیں کم کردا اے جد پئی پاک رُوح خُدا دے کلام دے مطابق کم کردا اے ۔
اوہ جیہڑے خُدا دی راستبازی رکھدے نیں ، اوہدے پُتر تے وارث نیں
آؤ اسیں رَل کے آیت ۱۷ پڑھئیے ۔ ”تے پُتر آں تاں وارث وی آں مطلب اے خُدا دے وارث تے مسیح دی مالکی وچ رَلے ہوئے پر شرط ایہہ ہیگی اے پئی اسیں اوہدے نال دُکھڑے جریےتاں پئی اوہدے نال جلال وی پائیے ۔“
جے اسیں خُدا دے پُتر آں، اسیں اوہدے وارث وی آں، اک وارث ایہو جیہا ہوندااے جیہڑا اپنے ماپیاں توں ہر شے لیندااے ۔ دوجے اکھراں وچ ، اسیں ہر شے ونڈن دا حق رکھدے آں جیہڑی خُدا باپ کول اے ۔جے پُچھیا جاوے، ”کیہڑا خُدا باپ دا وارث اے؟ “اسیں جواب دے سکدے آں ،” اوہ لوک جیہڑے پانی تے رُوح دی خوشخبری اُتے ایمان رکھدے نیں تے اپنے پاپاں توں معافی پا چُکے نیں ، اوہدے وارث نیں ۔ “
ایس طرحاں دے ایمان نا ل لوک برکتاں والے نیں تے مسیح دے نال اوہدی بادشاہی وچ خُدا دا جلال مالکی وچ پاؤن گے ۔ ایتھے دسیا جاندا اے پئی ایس لئی پئی اسیں مسیح دے نال رَلویں وارث آں، رَل کے جلال پاؤن دے سلسلے وچ ، سانوں اوہدے نال دُکھ وی جرنا ایں ۔ مسیح دے نال رَلویں وارث ہون دا مطلب اپنے باپ دی بادشاہی وچ ہمیش لئی جیوندے رہنا اے ۔ جے تُسیں پانی تے رُوح دی خوشخبری اُتے ایمان رکھدے او ۔ فیر تُسیں مسیح دے نال رَلویں وارث جے ۔ اسیں وارث آں ایس لئی پئی اسیں ہر شے مالکی وچ پاواں گے جیہڑی ساڈے باپ کول اے ۔
ویلے کویلے ، میَں اپنے نیڑے آؤندی ہوئی خُدا دی بادشاہی محسوس کردا ہاں ۔ ہر شے اپنے آپ دے چنگے ویلے وچ واقع ہوندی اے ۔ پاک کتاب وچ خُدا دے وعدے اک اک کر کے پورے وی ہوندے پئے نیں ۔ ہُن سارا جیہڑا باقی اے اسرائیل دے لوکاں لئی توبہ کرنا ، یسوع نوں اپنے مکتی داتا وانگر مننا ، تے اپنے پاپاں توں مکتی یافتہ ہونا ، کُجھ دوجیاں شیواں نال رہندااے ۔ اسرائیل نوں ست ورہیاں دے دکھاں وچکار یسوع نوں اپنے مکتی واتا وانگر منن لئی سوچیا جاندا اے ۔
دھرتی تے اسمان اُتے خُدا دی بادشاہی دا آؤنا اسرائیلیاں دی توبہ نال جُڑیا اے ۔ مَیں ایمان رکھدا ہاں پئی اخیری دیہاڑا بوھت چھیتی آؤن والا اے ۔ مَیں ایمان رکھدا ہاں پئی اوہ دیہاڑا نیڑے ہیگااے جدوں اوہ جیہڑے پانی تے رُوح دی خوشخبری اُتے ایمان رکھدے نیں سدا خُدا نال رہن گے ۔ سارے جگ نے ورہا ۲۰۰۰ نوں اُڈیکیا تے سوچیا پئی ایہہ اوہو ای دیہاڑا ہووے گا ، پر ورہا ۲۰۰۰ پہلوں ای لنگھ گیا ۔ ہزار سالہ بگ دے بارے وچ رولا پاؤن والیاں فکراں مک گئیاں نیں تے اسیں پہلوں ای ۲۰۰۲دے شروع وچ اپڑ گئے آں ، جد پئی ، اصل وچ جگ وچ بوھت سارے لوکاں نیں سوچیا سی پئی دھرتی اُتے تبدیلیاں ۲۰۰۰ بعد از مسیح وچ آؤن گئیاں ۔
پر، ساڈی بوھت چِر توں اُڈیکی جان والی مسیح دی بادشاہی حالے تیک ساڈے وچوں ہر اک تے ہر کسے تیک اپڑ دی پئی اے ۔ پاک رُوح ساڈے وچوں اوہناں دی اگوائی وی کردا اے جیہڑے پاپاں توں معاف ہوگئے پئی خُدا دی بادشاہی دے نیڑے آؤن نوں پرکھن ۔ ہُن ، پہلوں وانگر ہر گل پوری ہووے گی جویں خُدا نے آکھیا ۔ آؤ اسیں ایمان نال اوس دیہاڑے نوں اُڈیکیے۔
آؤن والے دناں وچ ، اسرائیل جگ دی سلامتی لئی ٹھیڈا لاؤن والا پتھر تے روڑا بن جاوے گا، تے ایس لئی ایہہ بوھت سارے ملکاں نال ویر کماوے گا ۔ ایہہ پاک کتاب سانوں دسدی ای — مطلب اے بوھتیاں دا ویری بن جاوے گا تے فیر اسرائیلیاں وچوں کئی سوچن گے پئی مسیحا جنہوں اوہناں نیں بوھت چِر توں اُڈیکیا اے بنا شک یسوع سی ۔ اوہ پانی تے رُوح دی خوشخبری اُتے ایمان رکھن دے راہیں اپنے پاپاں توں معافی پاؤن گے ۔ خُدا نے جیہڑا ارادہ بنایا اے بوھت چھیتی پورا ہون والا اے ۔ پر ، ایہہ سارے کم تیار کیتے گئے ویلے اُتے واقع ہون گے ۔ ایس لئی سانوں لازمی طور اُتے کسے پکی تاریخ تے ویلے اُتے اوہناں دے پورے ہون دی اُڈیک نئیں کرنی چاہی دی ۔ جویں کئی بھٹکے ہوئے ایمان رکھن والے جزا تے سزا دے کاری گر پیشن گوئی کردے نیں ۔ اوہ جیہڑے پانی تے رُوح دی خوشخبری اُتے ایمان رکھدے نیں ، خُدا دیاں پیشن گوئیاں نوں سچیاں ہوندیاں اپنیاں اکھاں نال ویکھن نال ویکھن گے ۔ ایماندار آس رکھدے نیں پئی خُدا دی وعدہ کیتی ہوئی بادشاہی دھرتی اُتے ،تے اسمانی بادشاہی آؤندی پئی اے ۔ میَں آس رکھدا ہاں پئی اوہ دیہاڑے ساڈے نیڑے نیں ۔
ویلا چھیتی نال آؤے گا جدوں گلاں جنہاں دا خُدا نے وعدہ کیتا اے اک اک کر کے سچیاں ہو جان گئیاں ۔ مینوں پکا یقین اے پئی اوہ دیہاڑا جدوں ہزار ورھیاں دی بادشاہی تے خُدا دی بادشاہی خُدا ولوں وعدہ کیتی گئی محسوس ہووے گی ساڈے بوھت نیڑے ہیگی اے ۔ کیہ تُسیں وی پاک رُوح دے راہیں جوش نال بھر کے اِنج ای سوچدے او، جویں میَں سوچدا ہاں ؟ کیہ تُسیں ایمان رکھدے او پئی خُدا دی ہر اک پیشن گوئی پاک رُوح دے راہیں پوری ہو جاوے گی ؟ پاک رُوح ساڈے پورے دلاں نال خُدا دے وعدیاں اُتے سچا ایمان رکھن وچ ساڈی مدد کردا اے۔
پاک رُوح دے راہیں ،اسیں اپنے دلاں وچ پکا ایمان رکھدے آں پئی خُدا دے وعدے اخیری دیہاڑیاں وچ چھیتی نال پورے ہو جان گے ۔ اسیں پاک رُوح دے راہیں ایمان رکھدے آں پئی ساڈے دلاں وچ کیہ ہوندااے تے ساڈیاں آساں خُدا دی ساری پیشن گوئیاں دے نال نال پوریاں ہوجان گئیاں ۔ ایہہ کھرا ایمان اے ۔
تُسیں تے میَں خُدا دی وعدہ کیتیاں ہوئیاں ساریاں برکتاں دے وارث ہیگے آں ؛ ایس لئی سانوں پاک رُوح وچ اڈیکن دی لوڑ اے ۔خُدا دی بادشاہی چھیتی نال ساڈے کول آوے گی ۔ اسرائیلی چھیتی نال ایمان رکھن گے تے یسوع مسیح نوں اپنے مسیحا وانگر قبول کرن گے ۔
بوھتے لوک ہُن ایہہ آکھدے ہوئیاں اوہنوں اُڈیکدے پئے نیں ، ”اے خُداوند یسوع چھیتی آ۔“ پولُس نے آکھیا پئی ایس لئی پئی اوہ خُدا دا وارث سی ، دُکھ جیہڑے اوہنے جرےجلال دےبرابر نئیں ہو سکدے سن جیہڑا اوہ چھیتی حاصل کرے گا ۔ ایہدا مطلب سی پئی مسیح دے نال رَل کے جلال پاؤن دے بارے وچ ، سانوں وی اوہدے نال دکھ جرنا پوے گا۔ ایس لئی پئی اسیں ایمان رکھدے آں تے خُدا دی بادشاہی دے آؤن دی اُڈیک رکھدے آں ۔ مسیح دے نال جلال پاؤن دے بارے وچ ، سانوں اوہدے نال دُکھ وی جرنا اے ۔
پولُس دی آس ساری مخلوق لئی سی ، جیہدے وچ سارے پسو تے بوٹے اپنی بربادی توں بچن لئی اکٹھے سَن ۔ ایس لئی پئی ساری مخلوق بے سکونی نال خُدا دے پُتر دے آؤن دی اُڈیک رکھدی پئی اے ۔ خُدا دے پُتراں دی آس ایہہ ہیگی اے پئی اوہ دیہاڑا آوے گا جدوں سارے لوک ہمیش لئی جیوندے رہن دے لائق ہون گے ۔
ایس لئی ، سانوں لازمی طور اُتے احساس کرنا چاہی دا اے پئی اسیں ایماندار سدا دی حیاتیاں نال برکتاں پا چُکے آں ۔ کیہ اسیں اپنی حیاتی دے ویلے وچ اپنے خُدا دے آؤن دا دیہاڑا ویکھاں گے یاں کیہ ساڈا خُدا ساڈی نیند توں سانوں لے جان لئی جگاوے گا ، سانوں اوہدی اُڈیک کرنی ہووے گی ۔
کیہ خُدا دا جلال جیہڑا ساڈے وچ ظاہر ہووے گا سچ مُچ وڈا ہیگا اے ؟
جلال جیہڑا بوھت چھیتی نال راستبازاں وچ ظاہر ہووے گا ہمیشہ دا جلال اے — مطلب اےہمیش دی بادشاہی دے وارث بننا تے خُدا دے جلال وچ سدا جیوندے رہنا۔ کوئی ہور موت نہ ہووے گی ، نہ ای غم ، نہ ای رونا۔ بادشاہی وچ کوئی ہور پیڑ نہ ہووے گی ،تے ایہہ بادشاہی سورج یاں چن دے اوہدے اُتے چمکن دی لوڑ نئیں رکھدی ۔ایس لئی پئی خُدا دا جلال اوہنوں روشن کردااے ۔ میمنا اوہدا نُور اے ۔ ایہہ ایہو جیہی تھاں اے جتھے صرف یسوع تے نویں سریوں جمے ہوئے ، بے پاپ ایماندار ہوندے نیں ، تے ایہہ خُدا دے جلال دے نال بھری ہوئی اے ۔ بادشاہی سونے دیاں کرناں نال بھری ہوئی اے ۔ بادشاہی دا جلال جتھے اسیں سدا رہواں گے ایناں وڈا اے پئی اکھراں وچ دسدیانئیں جاسکدا ۔ ایس لئی پئی ایہہ جلال جیہدی اسیں آس رکھدے آں بوھت وڈا اے ، پولُس سانوں دسدا اے پئی ساڈے اج دے دُکھ پیڑ اوس جلال دے اگے ککھ دے نئیں جیہڑاساڈےاُتے ظاہر ہووے گا۔
کئی واری اسیں قدرتی طور اُتے خُدا دا جلال ویکھ سکدے آں جد پئی اسیں ایس جگ وچ خُدا لئی کم کردے پئے آں ۔ جدوں اسیں رنگ برنگے پھلاں نوں ، وچھی ہوئی گھاہ نوں ، چمکدے پتیاں وچ نظر آؤندی ہوئی قدرت نوں ، بہار دے گرم موسم ، جنگلاں دی تازگی ، صاف ہواواں ، تارے جیہڑے ٹھنڈیاں راتاں وچ پوری لو نال چمکدے نیں ویکھدے آں؛ جدوں اسیں چونہہ موسماں دے بارے وچ سوچدےآں ،اسیں بچ نئیں سکدے سگوں اسیں اسمان دے بارے وچ سوچدےآں۔ جدوں خُدا دی ایس حیران کرن والے سارے جگ نوں ویکھدے آں ، اسیں آس رکھدے آں پئی خُدا دی بادشاہی ایتھوں تیک پئی بوھت چھیتی آوے گی ۔
جدوں خُدا دی بادشاہی آوے گی ،ہور کوئی موت نہ ہووے گی تے اسیں جلال نال جیوندے رہواں گے ۔ اوتھے کوئی گھاٹا نہ ہووے گا ایس لئی اسیں چوکھے سارے چنگے حال وچ جیوندے رہواں گے ۔ جویں ایہہ سوچ ہیگی اے پئی میَں اک تھاں اُتے جلال دے نال جیوندارہواں گا جتھے ہر شے پوری اے تے چھیتی نال میرے دل نوں خُدا دے جلال نال بھردی اے ۔ سچ ہیگا اے پئی اوہ ساریاں شیواں ساڈیاں ،ایمانداراں دیاں ہو جان گئیا ں ، اک سفنے وانگر ، تے سانوں اک وار فیر شکرگزار بناؤندیاں نیں پئی اسیں نویں سریوں جم پئے آں۔ میَں خُدا دا شکر کردا ہاں جنہے میرے دل نوں ایس آس نال سارے دا سارا بھریا اے ۔
حالے تیک ، اسیں اپنے خیالاں دے راہیں صرف اسمان دی آس رکھ سکدے آں ، پر سانوں پتہ ہیگا اے پئی آؤن والے دناں وچ، خُدا دے سارے وعدے سچے ہوجان گے ۔ایس طرحاں ساڈی آس بوھت چوکھی ہو جاندی اے تے ساڈا خدا دے جلال دے نیڑے ہون دا احساس دیہاڑے بسر ہون دے نال نال پکا ہوندا جاندا اے ۔
ایس لئی ایماندار آؤن والے دناں دی آس رکھدے نیں ۔ خُدا اُتے ایمان تے آؤن والے دناں دی آس جلال تے اوہناں دا ایمان اے جیہڑے خُدا دی بادشاہی دے وارث ہون گے ۔ کیہ ایہہ جلال بھریا ایمان اے ، فیر ، برکت صرف اوہناں نوں دتی گئی اے جیہڑے پانی تے رُوح دی خوشخبری اُتے ایمان رکھدے نیں ؟ جواب اک بوھت اُچی ہاں اے ! صرف خُدا دے جلال دے اگے ویلا بسر کرن دی لوڑ اے جیہڑا راستبازاں نوں دتا گیا اے، اوہناں نوں جیہڑے پانی تے رُوح دی خوشخبری اُتے ایمان رکھدےنیں ۔ تیار کیتے گئے ویلے اُتے ، خُدا دے اپنے جلال دے سارے وعدے ساڈے لئی سچ ہو جان گے ۔ ایہہ ساریاں جلال بھریاں گلاں سچ مُچ ایمانداراں لئی پوریاں ہون گئیاں ۔ جلال جیہڑا سانوں اُڈیکدا اے فتح بھریا ، ودھیاتے سوہنا اے ۔
تُسیں تے میَں ، جیہڑے پانی تے رُوح دی خوشخبری اُتے اوہو ای ایمان رکھدے آں ، اوہ لوک آں جیہڑے خُدا دے جلال دی بادشاہی وچ جاواں گے ۔ پریشان تے بدکار دنیا کئی واری ساڈے دل ہنیرے کر سکدی اے ،تے اسیں ہمت ہارے تے بُجھے ہوئے ہو سکدے آں ۔ پر اوہ جیہڑے نویں سریوں جم پئے نیں ، ایمان رکھن دے راہیں ایناں اوکھلاں اُتےغالب آسکدے نیں پئی او خُدا دے وارث بن گئے نیں ۔ بھاویں بے پاپ ایمانداراں دے دلاں وچ دکھاں دیاں ساریاں قسماں ہو سکدیاں نیں ، اوہ طاقت پاؤن تے اپنے آپ نوں خُدا دے وعدے یاد دلواؤن دے راہیں جیوندے رہن دے لائق ہون گے ۔ میَں شکرگزار ہیگا واں پئی پاک رُوح ساڈے دلاں وچ رہندا اے ، سانوں تسلی دیندااے ،تے ساڈیاں رُوحاں نوں گواہی دیندااے ۔ پئی اسیں خُدا دے پُتر ہیگے آں۔
اوہ جیہڑے نویں نویں اپنے پاپاں توں چھڈائے گئے نیں ، اوہناں نوں وی اسمان دے جلال ول ویکھنا چاہی دا اے تے آس رکھ کے جیونا چاہی دا اے ۔ اسیں اکو جیہے خُدا دے لوک بن گئے آں ۔ جے تُسیں کلیسیا وچ لمے چِر تیک ایمان دی حیاتی بسر کیتی اے ، تُسیں پاک رُوح نوں اپنے دلاں وچ تہاڈی جلال بھری مالکی دی عمارت وچ خوش ہوندے ہویاں ویکھ سکدے او ۔
بھاویں راستبازاں دے دل ایس دھرتی اُتے ہاڑے پاؤندے نیں
آؤ اسیں رَل کے آیت ۲۳ پڑھئیے۔” تے نہ صرف اوہو ای سگوں اسیں وی جنہاں نوں رُوح دے پھل ملے نیں آپ اپنے دل وچ ہاڑے پاؤندے آں تے لَے کے پالے ہون مطلب اے اپنے بدن دی مکتی دی راہ ویکھدے آں۔ “ آؤ اسیں اپنے آپ کولوں پُچھیے ،”اسیں جیوندے ہوئیاں کیہ آس رکھدے آں؟ “ اسیں ، ایماندار ، جیوندے ہوئیاں اپنے بدناں دی مکتی دی آس رکھدے آں ۔ جدوں اسیں آکھدے آں پئی اسیں خُدا دے پُتر آں ، ایہدا مطلب اے پئی صرف ساڈیاں رُوحاں اوہدے پُتر نیں، ساڈے بدن حالے تیک جلال نئیں پا چُکے ، ایس لئی سارے ایماندار آس رکھدے نیں پئی اوہناں دے بدن وی بدل جان گے ۔
جدوں ایمانداراں دے بدن خُدا دا جلال پاؤن گے ، اوہ اگ وچوں لنگھن دے لائق ہون گے تے اوہ سڑن گے نئیں ، تے اوہ ہر طرحاں دیاں رکاوٹاں یاں کندھاں وچوں لنگھن دے لائق ہون گے ۔ ساڈے بدلے ہوئے بدن ویلے دیاں حداں تے خلا توں آزاد ہون گے ۔
پر ساڈے بدن حالے تیک نئیں بدلے ، ایس لئی اسیں جیہڑے رُوح دے پہلے پھل رکھدے آں دلوں ہاڑے پاؤندے آں۔ ایس لئی ، راستباز لوک جیہڑے پانی تے رُوح دی خوشخبری اُتے ایمان رکھن دے راہیں نویں سریوں جم پئے نیں ، اپنے بدن دی مکتی دی اُڈیک کردے نیں ۔
ہاڑے پاؤنا ! ایہہ لکھیاہویا اے پئی اسیں وی جنہاں نوں رُوح دے پہلے پھل ملے نیں ،ہاڑے پاؤندے آں ۔ کیہ تُسیں ، اپنے اندر ہاڑ ے پاؤندا ہویا پاک رُوح محسو س کیتا اے ؟ اوہنے کدوں ہاڑے پائے ؟ پاک رُوح ہاڑے پاؤندا اے جدوں اسیں بدنی آساں دا پچھا کرن دی کوشش کردے آں ۔
جدوں اسیں جگ ول ویکھدے آں تے محبت کردے آں ، جو اسیں ویکھدے آں ، پاک رُوح ساڈے اندر ہاڑے پاؤندا اے ۔ ساڈے بدن بدلے نئیں ، ایس لئی اوہ مزے لیندے تے جگ دیاں شیواں دا پچھا کرن دی کوشش کردے نیں ، پر ساڈیاں جاناں پہلوں ای بدلیاں گئیاں نیں ، پاک رُوح ساڈے اندرہاڑے پاؤندااے ۔ ایس لئی سانوں لازمی طور اُتے اپنے دلاں نوں واپس موڑنا چاہی دا اے جیہڑے جگ دیاں خوشیاں دا پچھا کرن دی کوشش کردے نیں تے پاک رُوح دے پچھے چلنا چاہی دا اے ۔
پاک رُوح ساڈے دلاں وچ ہاڑے پاؤندااے ، جیہڑے خُدا دے وارث آں ، ایس لئی پئی پاک رُوح ساڈے اندر اے ۔ ایس جگ وچ رہندے ہوئیاں اسیں ویکھ سکدے آں پئی آؤن والا ویلاکناں ہنیرا اے تے ساڈے بدن کنے ماڑے نیں ؛ ایہو جیہے ویلیاں وچ سانوں اُتے ویکھنا چاہی دا اے تے خُدا دے وارثاں دیاں برکتاں دی آس رکھنی چاہی دی اے ایس لئی پئی اوہ جان دے نیں پئی اوہناں دےبدن وی چھڈائے جان گے ۔ ایماندار اوس دیہاڑے نوں اُڈیک دے نیں پئی اوہ کامل بدن رکھن گے جیہڑے مکمل طور اُتے چھڈائے گئے نیں۔
جلالی آس رکھ کے جیوندے رہنا
آؤ اسیں آیتاں ۲۴ تے ۲۵ رَل کے پڑھئیے۔ ” ایس لئی سانوں آس دے راہیں مکتی ملی پر جیہڑی شَے دی آس اے جدوں اوہ دِس پوے تاں فیر آس کاہدی ؟ ایس لئی پئی جیہڑی شے کوئی ویکھدا پیا اے اوہد ی آس کیہ کرے گا؟ پر جیہڑی شے نوں نئیں ویکھدے جے اسیں
اوہدی آس رکھیے تاں صبر نال اوہدا راہ ویکھدے آں “
” کیہ اسیں خُدا دی بادشاہی دی آس رکھ کے اپنے سارے پاپاں دی معافی پائی اے ؟ “ آؤ اسیں ایہہ سوال پُچھیے ۔ اسیں آکھیا پئی اسیں پانی تے رُوح دی خوشخبری اُتے ایمان رکھن دے راہیں اپنے پاپاں توں معافی پائی اے ۔ ” پر جیہڑی شے نوں نئیں ویکھدے جے اسیں اوہدی آس رکھیے تاں صبر نال اوہدا راہ ویکھدے آں “ خُدا ایس طرحاں آکھدا اے ۔
اسمان اُتے جان دے بارے وچ تے اپنے پاپاں توں چھٹ جان دے بارے وچ ، سانوں لازمی طور اُتے پانی تے پاک رُوح دے کلا م اُتے ایمان رکھن دے راہیں مکتی یافتہ ہونا چاہی دا اے ۔ اپنے سارے پاپاں توں مکتی یافتہ ہون دے بعدوں ، جے اسیں اپنیاں اکھاں جگ ول موڑدے آں تے آس رکھدے آں پئی کیہ ویکھ سکدے آں ، فیر ایہدا مطلب اے پئی اسیں نہ خُدا دے جلال نوں جان دے آں نہ ای اوہدی اُڈیک رکھدے آں۔ جے اسیں آس رکھدے آں اسیں کیہ ویکھدے آں، فیر اوہدی آس نئیں کیتی جا سکدی ۔ ایس لئی پولُس نے آکھیا ، ”ایس لئی جیہڑی شے کوئی ویکھدا پیا اے اوہدی آس کیہ کرے گا ؟ “اسیں ہُن جیہڑے راستباز بن گئے آں نوں آس نئیں رکھنی چاہی دی دھرتی اُتے کیہ اے ، پر سانوں ، اوہدے وعدے دے مطابق ، نویں اسمان تے نویں دھرتی ول ویکھنا چاہی دا اے جیہدے وچ اوہدی راستبازی رہندی اے (۲ ۔ پطرس ۳ ۔ ۱۳)۔
ایہہ ایمان دی قِسم اے مطلب اے راستباز کیہ آس رکھدے نیں۔ راستباز نویں اسمان تے نویں دھرتی دی آس رکھ کے جیوندے نیں ۔ اسیں اپنی بدنی اکھاں نال کیہ ویکھ سکدے آں ایہہ نئیں اے اسیں سچ مُچ کیہ آس رکھدے آں ۔ اسیں اپنی بدنی اکھاں نال نئیں ویکھ سکدے ، ایس لئی اسیں اپنی رُوحانی اکھاں نال خُدا دے جلال دی وعدہ کیتی گئی بادشاہی دی اُڈیک کردے آں ۔ ایس لئی پئی اوہ جیہڑے سچ مُچ راستباز نیں اسمانی بادشاہی اُتے اپنی آس رکھدے نیں ۔ آس ایمان رکھنا اے پئی خُدا نے سانوں جو دسیا اے اوہ سچ مُچ پورا ہو جائے گا ۔
خُدا نے آکھیا ، ” حاصلِ کلام ایمان آس محبت ایہہ تِنے سدا لئی نیں ۔“(۱ ۔ کرنتھیوں ۱۳ :۱۳)اسیں اپنے ایمان تے اسمانی بادشاہی دی آس رکھن دے راہیں اپنے پاپاں دی معافی پا چُکے آں ۔ اوہدی بادشاہی دھرتی اُتے آوے گی تے اسمان اُتے ہووے گی ۔ تے اسیں آس رکھدے آں پئی اسیں اوہدی بادشاہی وچ ہمیش لئی جیوندے رہواں گے ۔ ایس لئی پئی اسیں خُدا دے وعدے دے
کلام اُتے ایمان رکھدے آں تے اپنے موجودہ دکھاں نوں جردے آں ۔
ایتھے ایہہ لکھیا ہویا اے ، ”پر جیہڑی شے نوں نئیں ویکھدے جے اسیں اوہدی آس رکھیے تاں صبر نال اوہدا راہ ویکھدے آں “ اسیں جیہدے لئی صبر کردے آں ، ایہو جیہی شے نئیں جیہڑی اسیں اپنیاں اکھیاں نال ویکھ سکدے آں ۔ اسیں خُدا دے وعدیاں د ی اُڈیک رکھدے آں جنہاں نوں اسیں بدنی طور اُتے نئیں ویکھ سکدے ۔ خُدا دے وعدے ساڈے ایمانداراں لئی سچ ہوجان گے ایس لئی پئی سانوں دسیا گیا سی پئی خُدا دا جلال ظاہر ہووے گا ، تے اسیں ایس وعدے اُتے ایمان رکھدے آں ۔ ایس لئی پئی اسیں ایمان رکھدے آں پئی ساڈا خُدا ایس دھرتی اُتے دوبارہ واپس آؤندا پیا اے ، اسیں اپنے موجودہ دکھاں نوں جر سکدے آں ۔
خُدا دی بادشاہی ایتھوں تیک پئی شک شُبے توں اَڈ ، ایس دھرتی اُتے آوے گی ۔ جدوں خوشخبری سارے جگ وچ ودھ جاوے گی ، خُدا دی بادشاہی لازمی طور اُتے آوے گی ۔ راستباز اوس دیہاڑے نوں صبر نال اُڈیکدے نیں ۔ ساڈا خُدا آوے گا جدوں اسیں اُڈیکدے پئے آں ۔ ایہہ میرے لئی تے تہاڈے لئی سچیائی اے جیہڑے ایناں دناں وچ جیوندے پئے آں ۔
اک یوکرائن دی بھین، نال رَل کےکم کرن والی اے جیہڑی ساڈیاں کتاباں یوکرائن دی بولی وچ ترجمہ کردی اے ۔ اوہنے تھوڑا چِر پہلوں ای ورلڈ ٹریڈ سنٹر دی عمارتاں نوں دہشت حملے نال ڈگدے ہوئیاں ویکھیا تے آکھیا پئی اوہنے پریشانی تے ڈر محسوس کیتا ۔ اوہنے پُچھیا پئی کیہ ایہہ مکاشفہ وچ ، ”پیلےرنگ دے گھوڑے دا دور“ آکھیا جا سکدا سی تے ایس پاک کتاب دے حصے بارے کسے وی کتاب لئی پُچھیا ۔
اسیں پک نال نئیں آکھ سکدے پئی ایہہ حادثہ پیلے رنگ دے گھوڑے دے دناں دا شگون اے ، پر اسیں مُکر نئیں سکدے پئی ایہہ ایس بارے ہو سکدا اے ۔ جے ایہو جیہیاں شیواں بوھتیاں ہوندیاں نیں ، فیر جنگاں ہون گئیاں ، تے ملک اک دوجے نال لڑن گے ۔جدوں جنگاں شروع ہو جاندیاں نیں ، لوک کالاں توں دکھ جرن گے تے ،” پیلے رنگ دے گھوڑے دا دور“ اچانک سچ ہو سکدااے۔
ایس لئی ، جدوں میَں ایہہ اَن ہونے واقعے ویکھدا ہاں جیہڑے پہلوں ای جگ دی تباہی دسدے نیں ، میَں اپنی مرضی نوں تازہ کردا ہاں پئی سانوں جگ دیاں کونیاں تیک خوشخبری ودھاؤنی چاہی دی اے ۔ ایہہ سچی گل ہیگی اے پئی اسیں ایس جگ لئی آس مکاؤندے پئے آں تے ساڈے دل ہاڑے پاؤندے نیں جدوں اَن ہونیاں سانوں ٹکردیاں نیں ۔ پر، جنہاں چِر تیک اسیں جیوندے آں ، سانوں خُدا دی بادشاہی دی اُڈیک رکھنی ایں ، جنہوں اسیں اپنیاں بدنی اکھا ں نال نئیں ویکھ سکدے سگوں صرف اپنی رُوحانی اکھاں نال ویکھ سکدے آں ۔
ایس لئی پئی اسیں پانی تے رُوح دی خوشخبری اُتے ایمان رکھدے آں، اسیں اسمانی بادشاہی دی آس رکھدے تے صبر نال اوہدی اُڈیک رکھدے آں۔ ایس لئی پئی اسیں ایمان رکھدے آں پئی خُدا دی بادشاہی ساڈے نیڑے آؤندی پئی اے ، اسیں اپنے سارے دُکھ جر سکدے آں۔ ایہہ سوکھا اے ایس لئی پئی پاک رُوح ساڈے دلاں وچ وسدااے ۔
کیہ تُسیں دکھ جردے پئے او ؟ چنگی طرحاں جرو تے صبرکرو۔ ایہہ صرف تُسیں نئیں جے جیہڑے دکھ جردے پئے او سگو ں ایسےطرحاں اسیں سارے آں ۔ اسیں سارے آس رکھاں گےپئی جدوں ایہہ مُک جاوے گا ، ہر شے ساری بالکل ٹھیک ہو جاوے گی ۔ کیہ تُسیں نئیں جان دے پئی تُسیں رُوحانی طور اُتے آس نئیں رکھ سکدے جدوں تُسیں بدنی طور اُتے دکھ نئیں جردے پئے ؟جدوں بدن بوہت آرام وچ اے ، اسیں خدا نوں نئیں لبھدے تے اوہدیاں برکتاں نئیں لبھدے۔ ایس طرحاں اسیں خُدا توں دور ہو جاندے آں۔ اسیں جیہڑے نویں سریوں جمے پئے آں ،سانوں آؤن والے جلال لئی آس رکھنی چاہی دی اے تے اج دے دکھڑے جرنے چاہی دے نیں۔
خُدا نے آکھیا پئی اوہ جیہڑے خُداوند لئی صبر کر کے دکھ جردے نیں برکتاں والے نیں ۔ اوہ دیہاڑا جدوں خُدا دی بادشاہی آوے گی آؤن والا اے ، تے اسیں اوہدی بادشاہی وچ جاواں گے ۔ سانوں جرنا چاہی دا اے ، صبر رکھنا چاہی دا اے تے اوس دیہاڑے لئی بے آسے نئیں ہونا چاہی دا۔ سانوں لازمی طور اُتے جرنا چاہی دا اے تے اوس دیہاڑے نوں اُڈیکنا چاہی دا اے ۔کوئی مطلب نئیں رکھدا پئی اسیں کنے دکھی تے ہور وی سخت ہو سکدے آں، سانوں اڈیکنا چاہی دا اے تے صبر کرنا چاہی دا اے جدوں تیک خُدا دی بادشاہی نویں اسمان تے نویں دھرتی وانگر نئیں آجاندی ۔
پاک رُوح اوہناں دی مدد کردا اے جنہاں وچ خُدا دی راستبازی اے
آؤ اسیں آیت ۲۶پڑھئیے۔ ” ایسے طرحاں رُوح وی ساڈے ماڑے دناں وچ مدد کردا اے ایس لئی پئی جویں سانوں دعا کرنی چاہی دی اے سانوں نئیں پتہ پر رُوح آپ ایہو جیہے ہونکے بھر بھر کے ساڈی حمایت کردا اے جنہاں بارے نئیں دسیا جا سکدا ۔“
کیہ پاک رُوح ساڈے لئی دعا منگدااے؟ آہو، اوہ دعا منگدا اے ! پاک رُوح ساڈیاں کمیاں جان دا اے تے ساڈے لئی دعا منگدا اے ۔
میَں پاک رُوح دے ہاڑے پاؤن بارے وچ بوھت گھٹ گل کیتی اے ۔ ایہدےتےدوبارہ جان لئی ، پاک رُوح ہاڑے پاؤندا اے جدوں اسیں ایہو جیہے پاسے جاندے آں جنہوں خُدا پسند نئیں کردا ، اسیں جائیے ۔ جدوں اسیں جگ دے حالاں نوں ویکھدے آں تے ایہدے نال ہاڑے پاؤندےآں ، جدوں اسیں ایہو جیہے پاسے جاندے آں جنہوں خُدا پسند نئیں کردا ، اسیں جائیے یاں جدوں اسیں اپنے باپ دے آکھے نوں نِند دے آں تے اوہدے آکھے توں بے پرواہ ہو کے رہندے آں ، پاک رُوح ہاڑے پاؤندا اے۔
جدوں پاک رُوح نویں سریوں جمے ہوئے ایماندار وچ رہندیاں ہویاں ہاڑے پاؤندا اے تاں دسیا نئیں جا سکدا ، اسیں اپنے دلاں دی طاقت گوا لیندے آں تے ماڑے ہو جاندے آں۔ فیر پاک رُوح ساڈے لئی دعا منگدا اے ۔ کئی واری پاک رُوح ساڈی حمایت کردا اے ، یاں سانوں سچیاں گلاں بارے دسدااے جیہدی سانوں دعا منگن دی لوڑ اے ۔
پاک رُوح ساڈے دلاں وچ ہاڑے پاؤندااے تے اوہدی مرضی مطابق ساڈے باپ دے اگے ساڈے توں دعا کراؤندااے ۔ ”اے خُداوندخُدا، تُوں ساڈے پاپاں نوں اپنے بپتسمے تے اپنے صلیبی لہو دے راہیں مکا دتا اے ،تے اِنج کامل طور اُتے اسیں تیرے پُتر بن گئے آں۔ اسیں آس رکھدے آں پئی تیری دوجی آمد دھرتی اُتے چھیتی نال پوری ہو جاوے گی ۔ اسیں دعا منگدے آں پئی تیری مرضی پوری ہو جاوے ۔ “ اسیں ایس طرحاں دعا منگد ے آں۔
اسیں رُوحانی ایمان لئی دعا منگدے آں ”اے خُدا ، اسیں غریب ہیگے آں تے تیرے اگے گئے گواتے آں، ایس لئی مہربانی کےسانوں اپنی مرضی پوری ہون تیک خاص ایمان دے ۔“ فیر خُداساڈی مدد کردا اے ایس لئی پئی اوہ ساڈیاں کمیاں نوں جان دا اے ۔ پاک رُوح سانوں اکلا نئیں چھڈدا سگوں ساڈے دلاں نوں تگڑیاں کردیاں ہویاں سانوں خُدا دی مرضی مطابق دعا منگن لئی تے اپنے لئی وی دعا منگن دے لائق کردااے ۔
پاک رُوح سانوں خُدا دی مرضی مطابق دعا منگن دے لائق کردا اے ، تے جدوں اسیں مدد لئی رولا پاؤندے آں ، اوہ سانوں جانن دی اجازت دیندا اے پئی ساڈے لئی خُدا دی مرضی کیہ اے ،تے سانوں نویں طاقت دیندا اے ۔
” ایس لئی پئی جویں سانوں دعا کرنی چاہی دی اے سانوں نئیں پتہ پر رُوح آپ ایہو جیہے ہونکے بھر بھر کے ساڈی حمایت کردا اے جنہاں بارے نئیں دسیا جا سکدا ۔“
کیہ تُسیں ایہہ شیواں محسوس کردے او؟ جدوں تُسیں سوچد ے او تے وکھ طریقے نال کم کردے او ۔ خُدا کیہ چاؤہندا اے پئی اسیں کریے ، کیہ پاک رُوح سانوں راستباز لوکاں نوں دسدیاں ہویاں تُسیں محسوس کردے او ، پئی کُجھ غلط اے؟ پاک رُوح آکھدا اے ، ”ہائے ، تُسیں غلط جے ! ، “ تے ساڈا دل ہاڑے پاؤن لگ پیندا اے ۔ کیہ تہانوں پتہ ہیگا اے پئی ایہہ پاک رُوح ہاڑے پاؤندا پیا اے ؟ تُسیں خورے تجربہ کیتا اے پئی جدوں ایک راستباز بندے دا دل خوش ہوندااے ، ایس لئی پئی پاک رُوح اوہدے اندر مزے لیندا پیا اے ۔ فیر تہانوں پتہ لگے گا پئی جدوں تہاڈا دل ہاڑے پاؤندااے ، ایہہ پاک رُوح ہاڑے پاؤندا پیا اے ۔
جدوں اسیں ماڑے آں تے پُٹھے کم کردے آں ، پاک رُوح ہاڑے پاؤندااے تے ساڈی حمایت کردااے ، تے خُدا ساڈا باپ سانوں طاقت دیندا اے۔ پاک رُوح سانوں نویں رُوحانی طاقت دیندے ہویاں ساریاں شیواں لئی سانوں دعا کرن دے لائق کر چُکیا اے ۔ ایس لئی پئی اوہ جیہڑےاپنے دلاں وچ پاک رُوح رکھدے نیں ، بوھت خوش نیں ۔ پاک رُوح سانوں خُدا دے کلام دے راہیں طاقت دیندا اے۔ دوجے اکھراں وچ، پاک رُوح سانوں نویں رُوحانی طاقت دین لئی ساڈے دلاں وچ اپنے کلام نال کم کردا اے۔
پاک رُوح دوجیاں طریقیاں نال گل کرن دی تمنا نئیں رکھدا ۔ اوہ سانوں خُدا دے کلام دے راہیں ، خُدا دی کلیسیا تےاپنے بھراواں تے بھیناں نال ساڈے اکھٹیاں ہون نال سانوں طاقت دیندااے ۔ ایہہ سبب ہیگا اے پئی خُدا دی کلیسیا بوھت خاص اے ، تے ایس لئی کلیسیا پاک رُوح دے کماں وچ بوھت خاص کم کردی اے ۔
کلیسیا وچ ایماندار ، اوہناں دامیل ، تعریفاں تے سندیسے موجود ہیگے نیں ۔ ایس توں ھٹ کے ، مناد کون نیں ، پاک رُوح موجود ہیگا اے تے اوہناں وچ کم کردا اے تاں پئی اوہ چنگا سندیس دین جیہڑا چنگیاں ویلیاں لئی خاص اے۔ پاک رُوح دونواں وچکار اوہ جیہڑے پیغام دیندے نیں تے اوہ جیہڑے اوہنوں سُن دے نیں ، اوہناں دے دلاں نوں جگاؤندیاں ہویاں تے اوہناں وچوں ہر کسے نوں برکتاں دیندیاں ہویاں کم کردا اے جنہاں دی اوہناں نوں لوڑ اے۔ پاک رُوح خُدا دی کلیسیا وچ ایہہ کم کردا اے جتھےراستباز لوک اکٹھے ہوندے نیں ۔ ایس لئی پئی کلیسیا ایمانداراں لئی بوھت خاص اے ۔ جدوں اک ایماندار اپنے دل وچ اوکھے ویلے وچوں لنگھدا پیا اے تے حالے تیک پیڑ دوجیاں نال نئیں ونڈ سکدا ، خُدا دے خادم پاک رُوح دے راہیں اوہنوں محسوس کرن دے لائق ہون گے ۔ جے ایماندار خُدا دی کلیسیا دے اکٹھ وچ نیں ، پاک رُوح اوہناں دے دلاں نوں چھون تے تسلی دین دے لائق ہووے گا ۔ پاک رُوح اوہناں دی خُدا دے کلام اُتے قائم رہن وچ مدد کرے گا تے اوہناں نوں شفا پاؤن لئی طاقت دیوےگا ۔
جدوں اپنیاں ایمان والیاں حیاتیاں بسرکردے ہویاں، اسیں پانی تے رُوح دی خوشخبری اُتے ایمان رکھدے آں ، اپنے پاپاں توں معافی پاؤندے آں ، خُدا دے پُتر بن جاندےآں ، تے ثبوت دے طور اُتے ، اسیں انعام وانگر پاک رُوح پاؤندے آں۔ فیر ، خُدا سانوں اپنی کلیسیا دیندا اے ۔ کلیسیا دین دے بعدوں ، خُدا کلیسیا دے راہیں اپنے خادماں نال بولدا اے تے اپنے خادماں توں اپنے پیغام دی منادی کراؤندااے ۔ اوہ اپنے کلام نال ساڈے زخماں اُتے مرہم لاؤندااے ، اوہناں نوں طاقت دیندا اے جیہڑے ماڑے نیں، برکت دیندا اے اوہناں نوں جیہڑے دل دے غریب نیں ، تے اوہناں نوں اپنا کم مکمل کرن دی ہمت دیندااے ۔ اوہ ساڈے راہیں اپنی مرضی پوری کردا اے ۔ ایس لئی ، ایماندار کدی اپنے آپ نوں کلیسیا توں وکھ نئیں کرسکدے ۔
ایماندار کدی دوجے راستباز لوکاں نال اپنے میل جول توں یاں خُدا دے کلام وچ اپنے ودھن پھُلن توں وکھ نئیں ہو سکدے ۔ حتمی سچیائی صرف خُدا دی کلیسیا دے وچ اے ۔ ایس لئی ، ایمانداراں نوں کلیسیا وچ اک دوجے نال اکٹھیاں ہون دی لوڑ اے ۔ اکٹھیاں ہون توں اڈ ایمان جھوٹا ایمان اے۔
کیہ تُسیں ایمان رکھد ے او پئی پاک رُوح تہاڈے وچ وسیا ہویا اے ؟ جدوں اسیں خُدا دی کلیسیا نال اکٹھے ہوندے آں ، جویں خُدا دا کلام آکھدا اے تے جویں اوہ اپنے پیغام وچ سانوں کلیسیا بارے دسدا اے ، پاک رُوح ساڈی مدد کرے گا تے سانوں برکتاں دیندیاں ہویاں سچیائی لئی ساڈیاں اکھیاں کھولے گا۔ ایس لئی ، ایہو جیہے ایمان نال کلیسیا نال اکٹھے ہووو۔ پاک رُوح فیر خوشی مناوے گا۔
اسیں حالے تیک اج دے ویلے تیک پاک رُوح دی مدد نال جیوندے رہ چُکے آں ۔ اسیں آؤن والے دناں وچ وی اوہدی مدد نال جیوندے رہواں گے ۔ ایس لئی پئی پاک رُوح ساڈے لئی بوہت خاص اے ، جیہڑے اپنے سارے پاپاں دی معافی پاچُکے آں ۔ سانوں جاننا تے ایمان رکھنا چاہی دا اے پئی پاک رُوح وجود رکھدااے ۔ سانوں لازمی طور اُتے جاننا چاہی دااے پئی سانوں پاک رُوح دے مطابق جیوندے رہنا تے اپنے دلاں وچ اوہدی اگوائی نوں پاؤن دی لوڑی اے ۔ اوہ جیہڑے اپنے دلاں وچ پاک رُوح رکھدے نیں ، اوہناں نوں اوہدی مرضی مطابق چلنا چاہی دا اے ۔جے تُسیں راستباز بندے جے ، فیر پاک رُوح تہاڈے وچ رہندا اے، تے ایس طرحاں تہانوں لازمی طور اُتے حیاتی دی شریعت پچھے چلنا چاہی دا اے جویں پاک رُوح تہاڈی اگوائی کردا اے۔
آؤ اسیں رَل کے آیت ۲۷ پڑھئیے ۔”تے دلاں نوں پرکھن والا جان دا اے پئی رُوح دی کیہ نیت اے ایس لئی پئی اوہ خُدا دی مرضی دے مطابق پاک لوکاں دی حمایت کردا اے ۔ “ساڈا خُدا باپ رُوح دی نیت جان دا اے جیہڑا ساڈے وچ وسیا ہویا اے ۔ پاک رُوح ساڈے دلاں وچ ہر شے نوں جان دا اے ؛ ایس لئی ، خُدا باپ ہر شے نوں جان دا اے جیہڑی ساڈے دلاں وچ اے ۔ ایسے طرحاں ، ” اوہ ، پاک رُوح خُدا دی مرضی دے مطابق پاک لوکاں دی حمایت کردا اے ۔ “
ایہدا مطلب اے پئی ساڈا باپ جان دا اے پئی پاک رُوح دی کیہ نیت اے، تے پاک رُوح ساڈے باپ دے مرضی دے مطابق دعا منگدا اے۔ ایس طرحاں ایمانداراں نوں خُدا دی مرضی دے مطابق جیوندے رہنا چاہی دا اے ۔ ایس لئی پئی اوہ اپنے پاپاں توں معاف نیں پاک رُوح دے راہیں اپنی ایمان دیاں حیاتیاں دے فائدے پاؤندے نیں ۔ راستبازاں دیاں نیتاں پاک رُوح دے سکھاؤن راہیں اگوائی پاؤندیاں نیں ۔
کلیسیا وچ دکھ آؤندے نیں جدوں اوہ جیہڑے اپنے دلاں وچ پاک رُوح نئیں رکھدے ، خُدا دی کلیسیا وچ پائے جاندے نیں ۔ اوہ جیہڑے پانی تے رُوح دی خوشخبری اُتے ایمان نئیں رکھدے اپنے دلاں وچ پاک رُوح نئیں رکھدے ، تے اِنج اوہ سچے ایمانداراں نال گل بات نئیں کر سکدے جیہڑے پاک رُوح رکھدے نیں ۔ اوہ کلیسیا وچ بوھت سارے مسئلے لیاؤندے نیں ۔ مقابلے وچ ، جدوں اوہ پاک رُوح نال خُدا دے خادم کولوں پیغام سُن دے نیں جیہڑا پاک رُوح نال بھریا ہویا اے ، ایناں دے دل سکون وچ نیں ایس لئی پئی اوہ سمجھ سکدے نیں پئی خُدا اوہناں نوں اپنے خادم دے راہیں کیہ آکھن دی کوشش کرداپیا اے ۔
ہر کوئی جیہڑا اپنے پاپاں توں معاف ہو گیا اے لازمی طور راُتےاپنے اندر وسیا ہویا پاک رُوح رکھدا اے ۔اسیں اپنے دلاں وچ پاک رُوح رکھدےآں تے خُدا دی مرضی دے مطابق تے پاک رُوح دی اگوائی دے راہیں جیوندے رہندے آں۔
پاک رُوح ایناں طریقیاں نال ساڈی اگوائی کردا اے: کئی واری کلیسیا دے راہیں ،کئی واری ایمانداراں نال میل جول رکھن نال ، تے دوجے ویلیاں اُتے خُدا دے کلام دے راہیں ۔ اوہ سانوں خُدا دی مرضی لبھن دے لائق کردا اے تے سانوں اوہدے راستباز راہ پچھے چلن دی اجازت دیندا اے۔ پاک رُوح خُدا ولوں جیوندے رہن لئی نویاں طاقتاں دیندا اے ، جدوں تیک اسیں اوہدی بادشاہی تیک نئیں اپڑ جاندے ۔
تہانوں ، تے مینوں ، ایس لئی ، لازمی طور اُتے احساس کرنا چاہی دا اے ساڈے ایمان دیاں حیاتیاں وچ پاک رُوح بوھت خاص ہیگا اے ۔ جدوں اسیں پانی تے رُوح دی خوشخبری اُتے ایمان رکھدے آں ، اسیں انعام وانگر پاک رُوح پاؤندے آں ، جویں پاک کتاب وچ اِنج لکھیا ہویااے ، ” توبہ کرو تے تہاڈے وچوں ہر کوئی اپنے پاپاں دی معافی لئی یسوع مسیح دے نام اُتے بپتسمہ لوے تاں تُسیں پاک رُوح دا انعام پاوو گے۔“ (اعمال ۲ : ۳۸)۔
خُدا نے سانوں انعام وانگر پاک رُوح دتا تاں پئی اوہ ساڈی اپنی مرضی دے مطابق جیوندے رہن لئی اگوائی کر سکے ۔ ایہہ ساڈے خُدا باپ دی مرضی اے ۔ اوہ سانوں دسدا اے پئی سانوں اوہدی بادشاہی وچ جان دے بارے وچ اوہدی مرضی دے مطابق لازمی طور اُتے جیوندے رہنا چاہی دا اے۔ سانوں خُدا دی مرضی دے مطابق رہن دے بارے وچ پاک رُوح رکھنا چاہی دا ا ے، تے صرف اوہ جیہڑے پانی تے رُوح دی خوشخبری اُتے ایمان رکھدے نیں پاک رُوح پاؤندے نیں ۔ ایس طرحاں سانو ں لازمی طور اُتے پانی تے رُوح دی خوشخبری اُتے ایمان رکھنا چاہی دا تاں پئی اسیں انعام وانگر پاک
رُوح پا سکیے تے خُدا دی مرضی مطابق جیوندے رہ سکیے تے اوہدی بادشاہی وچ جا سکیے ۔
اسیں پاک رُوح تے مکتی وکھ وکھ نئی پاؤندے ۔ اج لوک سوچدے نیں پئی ایہہ دو برکتاں وکھ وکھ شیواں نیں۔ اوہ سوچدے نیں پئی پاک رُوح اوہناں اُتے آوے گا جے اوہ جاندے تے پہاڑی غاراں وچ بوھتی دعا منگدے نیں ، مطلب اے اِنج آکھدے ہوئیاں اوپریاں بولیاں وچ دعا منگدے نیں۔ اوہ سوچدے نیں پئی پاک رُوح اوہناں اُتے اودوں اُترے گا تے سدھے راہیں اوہناں نوں اپنے پیغام دیوے گا تے اوہناں نال گل بات کرے گا ۔ پر ایہہ ، بے نصیبی ، نال صرف سچ نئیں ہیگا اے ۔
پاک رُوح تے پاک کلام وکھ نئیں ہو سکدے ، تے نہ ای پاک رُوح تے ایماندار وکھ ہوسکدے نیں۔ ایس لئی پئی ایماندار تے پاک رُوح کلیسیا تے خُدائے ثالُوث — باپ ، بیٹا تے پاک رُوح — اک دوجے دے بوھت نیڑے نیں۔
اسیں جیہڑے ایس اخیری دناں وچ جیوندے آں پاک رُوح دے راہیں جیوندے آں۔ اسیں خُدا اپنے باپ دے مرضی دے مطابق تے پاک رُوح دے راہیں جیوندے آں۔
پاک رُوح خُدا دی ساری مرضی جان دا اے ۔ ساڈا باپ ہر شے جان دا اے جیہڑی پاک رُوح دے دل وچ اے ۔ پاک رُوح ساڈے خیالاں دی اگوائی کردا اے تے خُدا نال گل بات کردا اے ۔ ایس طریقے نال پاک رُوح خُدا دی مرضی دے مطابق منگدا اے، تے ساڈا باپ اپنی مرضی دے مطابق جیوندے رکھن دے راہیں اوہناں دعاواں دا جواب دیندا اے۔
ایس لئی پولُس نے رومیوں باب ۸ دی آیتاں ۱۶ توں لے کے ۲۷ تیک پاک رُوح دے کماں دے بارے گل کیتی اے ۔
اسیں پاک رُوح دے راہیں خُدا د ی بادشاہی دی اُڈیک رکھن دے لائق آں ۔ اسیں اپنے اج دے دکھاں نوں جر سکدے آں تے اپنے خداوند دی مرضی دے مطابق ، اپنے دلاں وچ وسدے ہوئے پاک رُوح دی قدرت نال اوہد ی بادشاہی نوں اُڈیکدے ہویاں جیوندے رہ سکدے آں ۔ اسیں پاک رُوح دےراہیں جر سکدے آں ، پاک رُوح دے راہیں اپنے خُداوند دا آکھا من سکدے آں ، تے پاک رُوح دے راہیں اپنے خُداوند دی سیوا کرن دا گُن پا سکدے آں ۔ ایہہ ساریاں شیواں سانوں پاک رُوح دے راہیں دتیاں گئیاں نیں ۔ سانوں لازمی طور اُتے احساس کرنا چاہی دا اے پئی اسیں اوہ لوک آں جیہڑے پاک رُوح دے نال سدا خُدا داکلام پڑھدے ہویاں ، اپنے دلاں نوں کلام نال جوڑیاں ہویاں تے سُن دے ہویاں تے کلام دا آکھا من دے ہویاں چلدے آں۔ سانوں لازمی طور اُتے اپنیاں حیاتیاں بسرکرنیاں چاہی دیاں نیں تاں پئی ساڈا باپ تے پاک رُوح ساڈے نال خوشی منا سکن، بدنی حیاتیاں نئیں جیہڑیاں صرف ساڈے بدن نوں خوش کردیاں نیں ۔ ایس حوالے وچ پولُس ایہو آکھدا اے ۔
خُدا سدا ساڈیاں حیاتیاں وچ ساڈے نال اے ۔ اوہ ساڈے دلا ں نوں آباد کردا اے ، تے ساڈی مدد کرنا چاؤھندااے ۔ خُداوند سانوں برکت دیندا رہوے ۔ جدوں ساڈا خُداوند فیر آوے گا، ہر شے جلال لئی بدل جاوے ۔ اسیں ، جیہڑے ہُن خُدا دی راستبازی رکھدے آں، خُدا دی ساری بادشاہی تے جلال دے وارث ہوواں گے ۔ جیہڑا کوئی وی خُدا دی بادشاہی دا وارث بننا چاؤہندااے ، اوہنوں سنبھال کے سُننا چاہی دا اے تے پانی تے رُوح دی خُوشخبری اُتے ایمان رکھنا چاہی دا اے ۔
ہیلیلویاہ ! میَں دعا منگدا ہاں پئی خُدا دی راستبازی تہاڈے نال ہووے تے تہانوں برکت دیوے ۔
Copyright © 2021 by The New Life Mission