Kwa sababu ya Changamoto ya COVID-19 na usumbufu kwa huduma ya utumaji barua kimataifa, tumesimamisha kwa muda huduma yetu ya 'Utumaji wa Vitabu vya Bure viyilivyo chapishwa.
Kwa kuzingatia hali hii hatuwezi kukutumia vitabu hivi kwa wakati huu.
Omba kwamba janga hili litamalizika hivi karibuni na kuanza tena kwa huduma ya posta.
Omba kwamba janga hili litamalizika hivi karibuni na kuanza tena kwa huduma ya posta.
مضمون 9: رومیوں (رومیوں دی کتاب اُتے تفسیر)
[1-2باب] خُدا دی راستبازی جیہڑی خوشخبری وچ وکھالی دیندی اے <رومیوں ۱:۱۶ ۔ ۱۷>
>رومیوں ۱:۱۶ ۔ ۱۷>
” کیوں جے میَں انجیل توں نئیں شرماؤندا۔ایس لئی پئی اوہ ہر اک ایمان لیاؤن والے واسطے پہلاں یہودی فیر یونانی دے واسطے مکتی لئی خُدا دی قُدرت ہیگی اے۔ ایس واسطے پئی اوہدے وچ خُدا دی راستبازی ایمان نال تے ایمان لئی نظر آؤندی اے جویں لکھیا اے پئی راستبازایمان نال جیوندارہوے گا۔“
لازمی ہیگا اے پئی اسیں خُدا دی راستبازی پا لیِئے
پولُس رسول مسیح دی خوشخبری کولوں شرماؤندا نئیں سی ۔ اوہنے بوہت دلیری نال خوشخبری دی گواہی دتی ۔ فیروی ، یسو ع اُتے ایمان لیاؤندیاں ہویاں بوہتیاں لوکاں دے رون دے سبباں وچوں اک سبب ،اوہناں دے پاپ ہیگے نیں ۔ ایہہ اوہناں دے خُدا دی راستبازی نوں نہ منن دی تعلیم دے گھاٹے دے سبب توں وی اے ۔اسیں خُدا دی راستبازی اُتے ایمان لیاؤن تے اپنے آپ دی راستبازی دے ایمان نوں چھڈن دے سبب مکتی پا سکدے ہاں ۔
کاہدے لئی پولُس رسول خوشخبری کولوں نئیں شرماؤنداسی ؟ پہلی گل تے ایہہ ، کیوں جے خُدا دی راستبازی ایس خوشخبری وچ نظر آئی سی ۔
خوشخبری جنہوں یونانی وچ ، ’ ایواجیلین ‘ (euaggelion) آکھدے نیں دا مطلب ، ’ خوشی دی منادی ‘ ہیگی اے ۔ جدوں یسوع مسیح بیت الحم وچ جمیا سی تاں خُدا دا فرشتہ بھیڈاں دے چارُوآں نوں، جیہڑے اپنیاں بھیڈا ں دی ویکھ بھال کردے سَن ،وکھالی دتا تے اوہناں نوں دَسیا ۔ ” اَسمان اُتے خُدا دی وڈیائی ہووےتے دھرتی اُتے اوہناں بندیاں وچ جنہاں کولوں اوہ راضی ہیگا اے صلح۔ “ (لوقا۲:۱۴) ایہہ خوشی دی منادی ہیگی سی پئی ،— ’دھرتی اُتے اوہناں بندیاں وچ جنہاں کولوں اوہ راضی ہیگا اے ، صلح۔ ‘ خُداوند دی خوشخبری سانوں پاپاں توں مکتی دیندی اے تے جگ دے پاپاں نوں مکا دیندی اے ۔ یسوع نے ساڈے سارے پاپ دھودتے نیں ۔ اوہنے آپ ،اوہناں ساریاں دے پاپ جیہڑے بھیڑیاں کرتُوتاں دی گندگی نال لبڑے لیڑیاں وانگر گند وچ پئے ہوئے سَن تے اوہ جیہڑے پاپ دی دلدل دے چکڑ نال بھرے ہوئے سَن ،اوہناں دے پاپاں نوں دھو دتا ۔
پہلاں ، تاں پولُس نے آکھیا پئی ، خُدا دی راستبازی خوشخبری وچ وکھالی دتی سی ۔ خُدا دی راست بازی خوشخبری وچ وکھالی دتی سی ، جنہے ساڈے سارے پاپاں نوں مکایا اے ۔ خُدا دی راستبازی سانوں ایس لائق بناؤندی اے پئی اسیں پاک تے سچے بنیئے ۔ایہہ سانوں پاک بناؤندی تے ہمیش دے حیاتی پاؤن دے لائق وی بناؤندی اے ۔
بندیاں دی راستبازی کیہ ہیگی اے ؟جدوں ساڈے کول گھمنڈ کرن لئی کُجھ ہوندااے ،تاں اسیں خُدا دے نیڑے اپنے آپ نوں خاص بناؤنا چنگا سمجھدے آں ۔ جے کوئی بندہ اپنے نیکی دے کماں دے سبب اپنے آپ اُتے گھمنڈ کردااے ، تاں اوہ بندیاں دی راستبازی وکھالی دیندی اے ۔پر یسوع دا سچا کم جنہے سانوں ساڈے سارے پاپاں توں مکتی دتی اے ، خُدا دی راستبازی نوں خوشخبری وچ وکھالی دین دی اجازت دیندااے ۔ ایہو ای خُدا دی راستبازی ہیگی اے ۔
اج کل، بوہتے مسیحی خُدا دی راستبازی دی خوشخبری نوں جانیوں اَڈ ای انجیل دی منادی کردے پئے نیں ۔ اوہ آکھدے نیں پئی ، ” جے تسیں یسوع اُتے ایمان لیاوو تاں تسیں مکتی پاوو گے تے دولتاں پاوو گے ۔ “ پر، ایہو جیہے لوک خُدا دی راستبازی دی منادی نئیں کردے پئے ۔خوشخبری دوجیاں ساریاں شیواں توں بوہتی مشہور تے معروف وکھالی تاں دیندی اے ، پر بوہتے لوکاں وچ عقل دا گھاٹا ہیگااے تے خوشخبری نوں حالے تیک بالکل نئیں جان دے ۔ ایہہ بالکل ایس سچ وانگر ہیگی اے پئی بائبل اصل وچ سب توں بوہتی ویچی جان والی کتاب ہیگی اے ،پر لوک اصل وچ حالے تیک ایہدی ترتیب نوں وی نئیں جان دے ۔ایس جگ وچ سب توں بوہتی مہنگی تے فائدہ پوہنچاؤن والی شے خوشخبری ای اے ، جیہڑ ی سانوں خُدا کولوں ملی اے ۔
” ایس واسطے پئی اوہدے وچ خُدا دی راستبازی ایمان نال تے ایمان لئی نظر آؤندی اے ۔ “ خُدا دی خوشخبری جنگل وچ ٹھنڈے تے مِٹھے پانی دے کھوہ وانگر ہیگی اے ۔ یسوع اوہناں پاپیاں لئی جیہڑے پاپاں نال بھرے ہوئے نیں تے اوہناں نیں بے گنت پاپ کیتے نیں تے اوہناں دے سارے پاپاں نوں اِکو ای واری دھوکے ،اوہناں توں وکھ کر دتا اے ۔ فیر وی ، لوک اوہدی اوس راستبازی دے انعام نوں رد کردے پئے نیں ،جنہے جگ دے پاپاں نوں دھو دتا ،جیہڑے پئی اپنی بندیاں والی راستبازی نوں قائم رکھن دی ہمت کردے پئے نیں ۔اوہ بندے جیہڑے اپنی راستبازی نوں اُچیاں کرن لئی ہتھ پیر مارن وچ (خدمت ، اپنے آپ نوں حاضر رکھدے نیں ،دکھاں وچ جند پاؤنی ، قربانی ، توبہ دی دعا ، خُداوند دے دن نوں مننا،خُدادے کلام د ا ترجمہ کرنا ) تے ایس طرحاں دے ہور بوہت کم کردے نیں پر خُدا دے ایس انعام توں مُکر دے نیں ،تاں فیر اوہ وی ایہو جیہے ای لوک ہیگے نیں ، جیہڑی اوہدی راستبازی نوں رد کردے نیں ۔ کوئی وی بندہ خُدا دی راستبازی صرف اوس ویلے ای پا سکدااے جدوں اوہ اپنی بندیاں والی راستبازی دے راہیں مکتی پاؤن دے ایمان نوں چھڈ دیوے ۔
اوہناں نیں انجیر دے پتیاں نوں سیوں کے اپنے لئی بانا بنایا
پیدائش ۳:۲۱ وچ لکھیا ہویااے ، ”تے خُداوند خُدا نے آدم تے اوہدی گھروالی لئی چمڑے دے لیڑے بنا کے اوہناں نوں پوائے۔ “
پہلے آدمی ، آدم ،شیطان دے جال وچ پھسن دے سبب خُدا دے خلاف پاپ کیتا ۔ آدم تے حوا نے پاپ وچ ڈگن دے بعد چھیتی نال انجیر دے پتیاں نوں اکٹھیاں کر کے سیو ں لیا تے اپنے آپ نوں لکایا ۔ انجیر دے پتیاں نوں سیوں کے بنایا گیا بانا چمڑے نال بنائے گئے لیڑیاں توں وکھراسی ۔بالکل ایہو جیہا ای فرق ، ’بندیاں دی راستبازی ‘ تے ’ خُدا دی راستبازی ‘ وچ ہیگااے ۔ پیدائش ۳ : ۷ وچ لکھیا ہویا اے ، ” تے اوہناں نیں انجیر دے پتیاں نوں سیوں کے اپنے لئی لُنگیاں بنایاں۔ “ کیہ تسیں کدی مولی دے پتیاں نوں آپس وچ بنھیا اے ؟اسیں کورین لوک مولی دے پتیاں نوں مولی توں وڈدے تے اوہناں نوں سکاؤن لئی چاؤلاں دی مونجی دی توڑی نال بنھ کے رکھدے تے سیال وچ ایہدے نال اسیں پھلی دے پیسٹ دا سالن پکاؤندے آں ۔ ایہہ بوہت مزے والا ہوندااے !
آدم تے حوا نے پاپ وچ ڈگن دے بعد انجیر دے پتیاں نوں بنھ کے اپنے لئی لیڑے بنائے ۔ ایس طرحاں دے کم : چنگے کم ، اپنی آزمائش ، اپنی قربانی ، بندیاں دی راستبازی والے کم ہیگے نیں ۔ ایہہ اوہناں دی اپنی راستبازی ہیگی اے نہ پئی خُدا دی راستبازی۔ اصل گل ایہہ ہیگی اے پئی اوہناں دا انجیر دے پتیاں نال اپنے بانے نوں سیونا ، خُدا نوں نظر آؤندااے پئی اپنے چنگے کماں دے راہیں اپنے پاپاں نوں لُکاؤن دی ہمت کرکے خُدا دے اَگے گھمنڈ کردے نیں ۔ اپنی راستبازی — اپنے ہدیے ، اپنی قربانی ، اپنی آزمائش ، اپنی خدمتاں ، تے توبہ دیا دعاواں نوں اک بانے وچ بنھنا تے اپنے راہیں پاپاں نوں کجنا ،ایہو ای اوہ ’ بُت پرستی ‘ ہیگی اے جیہڑی خُدا دے اگے کسے نوں بندیاں دی راستبازی اُتے گھمنڈ کراؤندی اے ۔
کیہ اسیں اپنے دل دے پاپاں نوں انجیر دے پتیاں دا بانا سیوں کے خُدا دے اَگے لُکا سکدے آں ؟ کیہ اسیں اپنے چنگے کماں نال اپنے پاپاں نال لُکا سکدے آں ؟ کدی وی نئیں۔ پتے تاں اِکو ای دن وچ ڈگن لگ پین گے ،تے اخیریں ۳ دناں وچ سارے پتے ڈِگ پین گے ۔پتیاں دا بانا بوہتا چِر نئیں چلدا ۔ اوہ لوک جیہڑے انجیر دے پتیاں نوں سیوں کے اپنے لیڑے بناؤندے ، مطلب اے ، جیہڑے خُدا دی راستبازی نوں چھڈ کے ،اپنے چنگے کماں نال خُدا دی چنگی خدمت دے راہیں راستبازبنن دی ہمت کردے نیں ،اوہ اَسمان دی بادشاہی وچ جا نئیں سکدے ۔ اسیں اپنے کماں دی راستبازی دے سبب پاپاں توں مکتی پا نئیں سکدے ۔
جدوں آدم تے حوا نے انجیر دے پتیاں نال اپنے پاپ نوں لکاؤن دی ہمت کیتی تاں خُدا نے آدم نوں سدیا ، ” اے آدم تُوں کِتھے ہیگا ایں۔“ بھاویں آدم اپنے آپ نوں باغ دے رُکھاں دے وچکار لکاؤندا پیا سی ،اوہنے آکھیا ، ” میَں ڈریا ،کیوں جےمیَں ننگا ہیگا ساں :تے میَں اپنے آپ نو ں لُکایا ۔“اوہ بندہ جیہڑا پاپ وچ ہیگااے اپنے آپ نوں رُکھاں وچ لکاؤن دی ہمت کردااے ۔رُکھاں دا جھُنڈ بائبل وچ بندیاں ول اشارہ ہیگااے ۔ اوہ جیہڑا اپنے دل وچ پاپ رکھدااے اپنے آپ نوں لوکاں وچکار لکاؤن دی ہمت کردااے ۔ اوہ لوکاں وچکار والی تھاں اُتے بہنا پسند کردااے ،نہ تے اوہ بوہت پچھے بہوےگا تے نہ ای گرجے وچ اگے بہنا پسند کردااے ،جتھے بوہتے لوک اکٹھے ہوندے نیں ۔کیوں ؟ کیوں جے اوہ اپنے آپ نوں لوکاں وچکار لکاؤنا چاؤہندااے ۔
فیر وی ، اوہ خُدا دے اَگے اپنے پاپاں نوں لُکا نئیں سکدا ۔ اوہنوں مکتی پاؤن لئی ،لوڑ ہیگی اے پئی ،اوہدے پاپ اوہدی اپنی راستبازی نوں چھڈیاں تے خُداوند دی راستبازی اُتے ایمان رکھن دے سبب معاف ہون ۔ اوہ جیہڑے لُکیا ایمان رکھدے نیں تے سچیائی اُتے ایمان نئیں رکھدے تے اَسمانی بادشاہی وچ وی جا نا چاؤہندے نیں۔ اپنے آپ نوں ایس طرحاں دے لوکاں وچار لکاؤندے نیں ،پر اوہناں دی اخیروی اوہناں وانگر دوزخ ہووے گی ،جیہڑے اپنے چنگے کماں راہیں اپنے پاپاں نوں لکاؤن دی ہمت کر
دے نیں ۔ خُدا دے اَگے پاپیاں نوں پاپیاں وانگر نظر آؤنا تے اپنے آپ نوں خُدا دے حوالے کرنااے ۔
خُدا نے آدم نوں جنہے انجیر دے پتیاں دا بانا بنایا ، آکھیا ، ” کاہدے لئی تُوں پھل کھاہدا ؟ کِنہے تینوں ایہہ پھل کھوایا ؟ “ آدم نے جواب دتا ، ” اےخُدا ، جیہڑی زنانی نوں تُوں میرے لئی بنایا ،اوہنے مینوں اوس رُکھ دا پھل دتا تے میَں کھاہدا۔“ ” اے حواتُوں ایہہ کیہ کیتا؟ “ ” زنانی نے آکھیا سپ نے مینوں پلیکھا پایا ،تے میَں کھاہدا ۔“سو خُداوند خُدا نے سپ نوں آکھیا ، ” ایس لئی پئی تُوں اِنج کیتا ،تُوں سارے چَوکھریاں تے جنگلی جنوراں وچوں لعنتی بنیا ،تُوں اپنے ٹِڈھ بھار رِڑھیں گے تے ساری عمر مٹی چٹیں گا ۔ “ ایہو ای سبب ہیگا اے پئی سپاں دے ٹِڈھ دھرتی اُتے گھسدے نیں ۔فیر خُدا نے آدم تے حوا نوںㅁㅁㅁ دسیا ” تسیں وی پاپ کیتا اے ۔ تسیں فریب وچ آ کے پاپ کیتا ایس لئی تسیں بالکل پاپیاں وانگر پاپی سگوں پاپ دی راہ وکھاؤن والے بنے او۔“ اج کل ،جھوٹے نبی ، اپنی جھوٹیاں خوشخبریاں وی ایہہ آکھدیاں ہویاں ودھاؤندے پئے نیں۔ ” اَگ پایے! “ اوہ لوک جیہڑے اوہناں دیاں گلاں وچ پھسے نیں ، اوہناں نال وی اوہو ای رویہ رکھیا جاوے گا ،جویں جھوٹیاں نبیاں نال کیتا جاوےگا تے اوہ دوزخ وچ جان گے ۔
خُداوند نے آدم تے اوہدی گھر والی لئی چمڑے دے بانے بنائے
خُداوند نے سوچیا پئی ، ” میَں آدم تے حوا نوں ،جنہاں نیں شیطان دیاں گلاں وچ آکے پاپ کیتا ، پاپ وچ نہ چھڈاں گا ۔میَں بندیاں نوں اصل وچ اپنی صورت وانگر بنایا تے اوہناں نوں اپنے پُتر ہون دا حق دتا اے، ایس لئی میَں اپنے ارادے نوں پوریاں کرن لئی ایناں نوں مکتی دیواں گا ۔“ ایہہ خُدا دی مرضی سی ۔ ایس لئی ، خُدا نے اوہناں دے پاپاں نوں اک پسُو اُتے لدیا ، تے پسُو نوں قربان کیتا ،اوہدی کھل دیاں لُنگیاں بنائیاں تے آدم تے حوا نوں اوہ لُنگیاں پوائیاں ۔ اوہنے ساڈی مکتی لئی ایہو ای نشان بنایا ۔ اصل وچ ، رُکھاں دابانا جیہڑا انجیر دے پتیاں دا بنایا گیا سی ،اوہدے نال اک دن وی گزارا نئیں ہونداسی ، تے اینوں کئی واری مرمت کراؤنا پیندا۔ خُدا آدم تے حوا نوں ایہہ آکھدیاں ہویاں ہمیش دی حیاتی دے لیڑے پواؤندااے ، ” اے آدم تے حوا تسیں باہر آجاوو ، میَں تہاڈے لئی اک پسُو دی کھل دے لیڑے بنائےنیں پئی تہانوں ایہہ پواواں ۔ ایہہ او س پسُو دی کھل دے لیڑے نیں جیہڑا تہاڈے لئی قربان ہویا ۔ “خُداوند نے آدم تے حوا نوں چمڑے دے لیڑے پوائے جیہڑے آدم تے حوانوں نویں حیاتی دین لئی خُدا دی راستبازی دے راہیں مبارک بنائے گئے سَن ۔ خُداوند خُدا نے آدم تے اوہدی گھرا والی حوا لئی چمڑے دے لیڑے بنائے اور اوہناں نوں پوائے ، ایسے طرحاں خُدا ایمانداراں نوں راستبازی دی مکتی دے لیڑے پواندااے ۔
فیر وی، بندیاں دی مکتی جیہڑی خُدا دے دتے ہوئے چھٹکارے توں وکھ ہوگئی سی انجیردے پتیاں نال بنے ہوئے رُکھاں دے بانے سی ۔ خُدا نے سانوں چمڑے دے لیڑے پوائے نیں ، جیہڑی پئی خُدا دی راستبازی ہیگی اے ۔ خُداوند نے سانوں اپنے بدن تے لہو دے راہیں پاپاں دی معافی نال خُدا دی راستبازی دے لیڑے پوائے نیں ۔ اوہنے اپنے بپتسمے نال ساڈے سارے پاپ مکا دتے تے ساڈے پاپاں دے بدلے اوہدے اُتے سیاست ہوئی تے اوہ سولی اُتے مر گیا ۔ جدوں اسیں خُدا دی راستبازی اُتے یسوع دے بپتسمے تے لہو دے راہیں ایمان لیاؤندے آں تاں خُدا سانوں پاپاں توں معافی دے بانے پواندااے ۔ ایہو ای اوہ خوشخبری ہیگی اے جیہڑیاں پاپیاں نوں اوہناں دے پاپاں توں مکتی دیندی اے ۔
ایس جگ وچ ایہو جیہے بوہتے لوک ہیگے نیں جیہڑے خُدا دی راستبازی نوں نِنددے ،تے اپنی راستبازی نوں قائم کرن دی ہمت کردے پئےنیں ۔اوہناں نوں اپنی بندیاں والی راستبازی تے خُدا دی راستبازی وچ فرق نوں جاننا چاہی دااے۔رومیوں ۱۰:۱ ۔ ۴ وچ لکھیاہویااے ، ” اے بھراوو!میرے دل دی تمناتے اوہناں لئی خُدا اگے میری دعا ایہہ ہیگی اے پئی اوہ مکتی پاؤن ۔ کیوں جے میَں اوہناں دی گواہی دیندا ہاں پئی اوہ خُدا دے بارے وچ غیرت تاں رکھدے نیں پر بے سمجھی نال ۔ایس لئی پئی او ہ خُدا دی راستبازی نوں نہ جان دے ہوئیاں اپنی راستبازی نوں قائم کرن دی ہمت کر کے خُدا دی راستبازی دے آکھے نہ لگے ۔ کیوں جے ہر اک ایمان لیاؤن والے دی راستبازی لئی مسیح شریعت دی اخیر ہیگااے ۔ “
اسرائیلی اپنی راستبازی نوں قائم کرن لئی شریعت ول دھیان دیندے نیں ، جد پئی اوہ خُدا دی راستبازی نوں نئیں جان دے ۔خُدا نے بندیا ں نوں شریعت ایس لئی دتی پئی اوہ پاپ دی پچھان کرن ۔ لوکاں نے ۱۰ حکماں راہیں پاپ نوں پچھان لیا اے تے اوہدی مکتی دی راستبازی اُتے ایمان لیا کے پاپاں توں مکتی پا گئے نیں ،جیہڑی تنبُووالی تھاں دی چڑھاوے دی رسم راہیں اوہناں نوں پاپاں توں بچاؤندی اے ۔ ایس لئی، تنبُو والی تھاں دا چڑھاوا نویں عہد نامے وچ یسوع دے بالکل خُدا ہون دی نمائندگی دی حمایت کردا اے ۔فیروی ، اسرائیلی خُدا دی ایس راستبازی نوں نئیں پچھان دے ۔
کاہدے لئی یسوع نے بپتسمہ لیا سی ؟
یسوع نے کاہدے لئی بپتسمہ لیا سی ؟ یوحنا بپتسمہ دین والے نے یسوع نوں ایس لئی بپتسمہ دتا سی ، تاں پئی اوہ جگ دے سارےپاپاں نوں مکادیوے ۔ یسوع نے یوحنا بپتسمہ دین والے نوں ، بپتسمہ پاؤن توں کُجھ گھڑیاں پہلاں دسیا پئی ، ” ہُن تُوں ہون ای دے کیوں جے ساڈے لئی ایسے طرحاں ساری راستبازی نوں پوریاں کرنا ، چنگا اے ۔ “ (متی ۳:۱۵)۔ یسوع دے بپتسمہ لین دا ایہو ای سبب ہیگاسی ۔اوہنے بپتسمہ لیا ، تاں پئی اوہ انسانی پیڑھی دے پاپاں نوں دھو دیوے ۔ اوہنے بپتسمہ لین دے راہیں ایس جگ دے پاپاں نوں مکادتا ۔ ” ویکھو ایہہ خُدا دا میمنا ہیگااے جیہڑا جگ دا پاپ چُک کے لَے جاندااے۔ “ (یوحنا ۱:۲۹)۔ اوہنے پاپاں نوں اپنے اُتے چُک لیا تے پاپاں دا مُل اُتارن لئی سولی اُتے مرگیا ۔ فیروی ، اسرائیلی حالے تیک ایمان نئیں لیاؤندے پئی یسوع پاپیاں دا کامل مکتی داتا بن گیا اے ۔
اسرائیلیاں نے اپنے آپ نوں خُدا دی راستبازی دے ہیٹھاں نئیں کیتا،پر ہر اک ایمان لیاؤن والے لئی یسوع شریعت دی اخیر ہیگااے ۔ شریعت دی اخیر دا مطلب ہیگا اے پئی یسوع نے جگ دے سارے پاپاں نوں مکا دتا اے ۔ شریعت دی لعنت توں سارے ایمانداراں نوں پاک کرن لئی مسیح نے دُکھڑے سہے سَن ۔اوہنے شریعت دی لعنت نوں مکا دتا اے ۔ اوہنے سارے لوکاں نوں اوہناں دے پاپاں توں چھڈایا اے ۔ یسوع نے سارے لوکاں دے پاپاں نوں مکاؤن لئی بپتسمہ لیا سی ۔ اوہنے جگ دے سارے پاپاں نوں اپنے بدن اُتے لین لئی اینوں یوحنا بپتسمہ دین والے دے حوالے کیتا پئی اوہ اوہنوں بپتسمہ دیوے تے ایہدے راہیں جگ دے سارے پاپاں نوں اوہدے بدن اُتے لد دیوے ۔ایس طرحاں اوہنے سارے لوکاں نوں اوہناں دے پاپاں توں مکتی دتی ۔ اوہنے شریعت دی لعنت دی سزا نوں بپتسمہ تے سولی اُتے مرن دے راہیں مکادتا تے جگ دے پاپاں نوں مکادتا ۔ اوہنے سانوں شریعت دی لعنت تے سزاتوں کامل مکتی دتی اے ۔
ایہو ای شریعت دی اخیر تے خُدا دی راستبازی دے راہیں مکتی دا شروع سی ۔ یسوع نے یوحنا بپتسمہ دین والے کولوں بپتسمہ لین تے سولی اُتے جان دین دے راہیں جگ دے سارے پاپاں نوں مکا دتا اے ۔ کویں ہو سکدا اے پئی کوئی بندہ جیہڑا یسوع دی راستبازی اُتے سچے دلوں ایمان لیا چُکیا اے ، تاں فیر وی اوہدے دل وچ پاپ رہنداہووے ؟ ” ایس لئی پئی اوہدے وچ خُدا دی راستبازی ایمان نال تے ایمان لئی وکھالی دیندی اے ۔ “ یسوع دا بپتسمہ تے لہو خُدا دی راستبازی بن گیا اے ۔ خُدا دی
راستبازی اُتے ایمان لیاؤن لئی یسوع دے بپتسمے تے لہو اُتے ایمان لیاؤن دی لوڑ ہیگی اے ۔
خُدا دی راستبازی یسوع دے بپتسمے دے راہیں چنگی طرحاں پوری ہوئی سی ۔ میَں چاؤہنداہاں پئی تسیں ایہدے اُتے ایمان لیاوو۔ فیر ای تسیں اپنے سارے پاپاں توں مکتی پاوو گے ۔ پاپیاں نوں راستبازی ایس لئی دتی گئی سی ، تاں پئی یسوع دے بپتسمے راہیں پاک بنن ۔ اگانہہ ہور ، یسوع دا سولی اُتے مرنا خُدا دی راستبازی دا انصاف ہیگاسی ۔” مسیح شریعت دا اخیر ہیگا اے ۔“ خُدا ولوں سزا اوہناں ساریاں اُتے آوے گی ،جنہاں داشریعت ولوں حالے تیک انصاف نئیں ہویا اے ۔ خُدا دی شریعت پاپاں بارے دسدی اے تے ثابت کردی اے پئی پاپ دا اجر اپنےآپ موت تے دوزخ ہیگی اے ۔ایس لئی ، یسوع دے بپتسمے تے صلیبی لہو نے شریعت دی لعنت نوں مکا دتا اے ۔یسوع نے ساڈے سارے پاپاں نوں دھو کے مکا دتا تے ساری راستبازی نوں پوریاں کر کے شریعت نوں مکا دتا اے ۔
کم عقلاں نیں اپنے دیوے تاں لَے لئے پر اوہناں نال تیل نہ لیا
آؤ متی ۲۵:۱ ۔ ۱۳نوں ویکھیے ،ایتھے ۱۰ کواریاں دی اک مثال ہیگی اے ،جیہڑیاں اپنے لاڑے مطلب اے ، ساڈے خُداوند دی راہ ویکھدیاں پئیاں سَن ۔آؤ ایس کلام راہیں ویکھیے پئی خُدا دی راستبازی کیہ ہیگی اے ۔
” اوس ویلے اَسمانی بادشاہی اوہناں ۱۰ کواریاں وانگر ہووے گی ،جیہڑیاں اپنے دیوے لَے کے لاڑے نوں جی آیاں آکھن لئی ٹُریاں ۔ اوہناں وچ ۵ کم عقلاں تے ۵ سیانیاں سَن ۔ جیہڑیاں کم عقلاں سَن ،اوہناں نیں اپنے دیوے تاں لَے لئے پر تیل اپنے نال نہ لیا ۔پر سیانیاں نیں اپنے دیویاں نال اپنی کُپیاں وچ تیل وی لَے لیا ۔تے جدوں لاڑے ولوں دیر ہوئی تاں ساریاں انگھلاؤن لگیا ں تے سوں گئیاں ۔ ادھی رات ویلے رَؤلاپیا پئی ویکھو لاڑا آگیا اے ! اوہنے جی آیاں آکھن لئی نکلو۔ اوس ویلے اوہ ساریاں کواریاں جاگ کے اپنے اپنے دیوے سوارن لگیاں ۔تے کم عقلاں نیں سیانیاں نوں آکھیا پئی اپنے وچوں تھوڑا جیہا سانوں وی دیوو،کیوں جے ساڈے دیوے بجھن لگ پئے نیں ۔سیانیاں نیں جواب دتا پئی ،خورے ساڈے ،تہاڈے دونواں لئی بتھیرانہ ہووے ، چنگی گل ایہہ ہیگی اے پئی ویچن والیاں کول جا کے اپنے لئی خرید لوو ۔ جدوں اوہ خریدن لئی جاندیاں پئیاں سَن تاں لاڑا آن پوہنچیا تے جیہڑیاں تیار ہیگیاں سَن اوہ اوہدے نال ویاہ دے شگن وچ اندر چلیاں گئیاں تے بوہا بند ہوگیا ۔فیر اوہ باقی کواریاں وی آئیاں تے آکھن لگیاں اے خُداوند ! اے خُداوند ! ساڈے لئی بوہا کھول دے ۔ اوہنے جواب دے کے آکھیا میَں تہانوں سچ آکھدا ہاں پئی میَں تہانوں نئیں جان دا۔ سو جاگدے رہوو ،کیوں جے تسیں نہ اوس دیہاڑے نوں جان دے او نہ اوس ویلے نوں ۔ “ (متی ۲۵:۱ ۔ ۱۳)۔
ایہہ لکھیا ہویا اے پئی اَسمانی بادشاہی اوہناں ۱۰ کواریاں وانگر ہیگی اے ،جیہڑیاں اپنے دیوے لَے کے لاڑے نوں جی آیاں نوں آکھن لئی ٹُریاں ۔ پر اوہناں وچوں کیہڑیاں اَسمانی بادشاہی وچ گئیاں سَن ؟ اوہناں ۱۰ کواریاں وچوں کیہڑیاں اَسمانی بادشاہی وچ گئیاں سَن؟ بھاویں اوہ یسوع (لاڑے) اُتے ایمان رکھدیاں سَن تاں فیر وی اوہناں وچوں کُجھ کواریاں کیوں اَسمانی بادشاہی وچ جان دے لائق نہ ہوئیاں ؟ خُدا سانوں اُتے دسی گئی مثال راہیں ایہدے بارے وچ دسدااے ۔۱۰ وچوں ۵ کواریاں کم عقل ہیگیاں سَن تے دوجیاں ۵ سیانیاں سَن ۔ جیہڑیاں کم عقل ہیگیاں سَن ،اوہناں نیں اپنے دیوے تاں لَے لئے پر اوہناں نال تیل نہ لیا ۔دیوارکھن والی تھاں ’ گرجیاں‘ لئی ورتیا گیا اے ۔ سچ ایہہ ہیگا اے پئی اوہناں نیں اپنے دیوے تاں لَے لئے ،پر اوہناں نال تیل نہ لیا ایہہ اوہناں لوکاں بارے دسدااے جیہڑے پاک رُوح توں اَڈ گرجے جاندے نیں (تیل بائبل وچ پاک رُوح ول اشارہ کردا اے )۔
اوہ کیہڑا کم ہیگا اے جیہڑا کم عقلاں نیں کیتا ؟ اوہناں نیں اپنے دیوےتاں لَے لئے ،پر تیل نہ لیا ۔ اک بندہ نویں سریوں نئیں جمیا ،بھاویں اوہ یسوع اُتے ایمان رکھدااے ، بھاویں شوق نال گرجے وی جاندااے ۔ہر کوئی اِنج آکھدااے ، ” سچ مُچ میرے گرجے دا عقیدہ ٹھیک ہیگااے “ ہر مسیحی جیہڑا ایس جگ وچ رہندااے ،ایسے طرحاں آکھدااے ۔ اوہ اپنے فرقیاں وچ کئی بندیاں تے فادراں نوں مل کے بوہت گھمنڈ کردے پئے نیں ۔ اوہ جیہڑیاں کم عقلاں سَن ،اوہناں نے اپنے دیوے اپنے نال لَے لئے تے تیل اپنے نال نہ لیا ،پرسیانیاں نیں اپنے دیویاں نال اپنے بھانڈیاں وچ تیل وی لَے لیا سی ۔
بندہ کیہ ہیگااے؟ بندہ خُدا دے اگے اک بھانڈے وانگر ہیگااے ۔ اوہ مٹی ہیگااے ۔ بندہ مٹی نال بنایا گیا سی ۔ ایس لئی بندہ اک بھانڈا ہیگااے ،جیہڑا خُدا دے رُوح نال بھر سکدااے ۔پر سیانیاں نیں دیویاں نال اپنے بھانڈیاں وچ تیل وی لَے لیا ۔
کم عقل کواریاں جنہاں نیں اپنے دیویاں نال تیل نہ لیا ، اوہ صرف اپنے شوق نال بلدیاں نیں
بائبل سانوں دسدی اے پئی ایتھے لوکاں وچکار کم عقل کواریاں ہیگیاں نیں جیہڑیاں یسوع اُتے ایمان تاں رکھدیاں نیں ۔اوہ اپنے دیوے تاں لَے لیندیاں نیں ،پر تیل نئیں لیندیاں ۔ ایہدا مطلب ایہہ ہیگا اے پئی اوہ نویں سریوں نئیں جمے ، کیہ کوئی دیوا تیل دے بغیر بلے گا ؟ سانوں لازمی طور اُتے ایہہ جانن دی لوڑی ہیگی اے پئی اک دیوے دے اندر والی بتی بھاویں کنی ای چنگی ہووے تیل دے بغیر بوہت چھیتی سڑ کے سواہ ہو جاندی اے ۔ نویں سریوں نہ جمن والے ایمانداراں دے اندر شروع وچ خُداوند وچ ودھن دا شوق بوہت گرماگرم ہوندااے ۔پر ایہہ صرف ۴ یاں ۵ ورہیاں وچ ای مک جاندااے ۔ بعد وچ،خُداوند وچ بوہت چھیتی ودھن والی محبت ٹھنڈی پَے جاندی اے۔اوہناں نوں ایہہ جانن دی لوڑی ہیگی اے پئی اوہناں نیں حالے تیک پاپاں توں معافی نئیں پائی اے ۔
جیہڑے نویں سریوں نئیں جمے ،اوہ تیل مطلب اے (پاک رُوح )توں اَڈ ای ایہو جیہاں گلا ں کردے نیں ، ” بڑا چِر پہلاں میرا ایمان چنگا سی ،پہلوں پہلوں میَں بوہت چنگا ساں پر ہُن نئیں ۔ تسیں وی بوہت چھیتی میرے وانگر ہوجاووگے ۔“ اوہ جھوٹے نبی تے جھوٹے مناد ہیگے نیں جیہڑے نویں سریوں جمیوں اَڈ ای دینی لوکاں دی اَگوائی کردے نیں ۔ لازمی ہیگااے پئی اوہ مکتی اُتے ایمان رکھن کیوں جے اوہناں دا ایمان تیل (پاک رُوح ) اُتے نئیں ہیگا اے ۔ اوہناں دا ایمان صرف اوہناں دے شوق اُتے ہیگااے ۔ لازمی ہیگااے پئی اوہ یسوع مسیح دے پانی تے لہو اُتے ایمان لیاؤن دے راہیں مکتی پاؤن تے خُدا کولوں تیل (پاک رُوح )نوں اک انعام وانگر پاؤن ۔ دیوا بندے دے دل لئی ورتیا گیا اے ۔
اُتلی مثال وچ کواریاں لاڑے دا راہ ویکھدیاں نیں ۔ ایتھے ،لازمی ہیگااے پئی اسیں اسرائیلیاں دے رہن سہن دے طریقیاں نوں چنگی طرحاں سمجھیے ۔ اوہ ویاہ دیاں رسماں رات ویلے کردے تے ایہہ لاڑے دے آؤن اُتے ہوندیاں سَن ۔سو لازمی ہیگااے پئی ووہٹی اپنے لاڑے نوں اُڈیکے ۔اسرائیلیاں دیاں ویاہ دیاں رسماں اِنج ای ہوندیاں سَن ۔
”تے جدوں لاڑے ولوں دیر ہوئی تاں ساریاں انگھلاؤن لگیا ں تے سوں گئیاں ۔“ تےرَؤلاپیا پئی، ” ویکھو لاڑا آگیا اے ! “ فیر ووہٹی جاگ پئی تے اپنے آپ نوں سوارن لگی ۔ جدوں ۱۰ کواریاں لاڑے داراہ ویکھدیاں پئیاں سَن تاں رَؤلاپیا پئی ، ” ویکھو لاڑا آگیا اے ! “ ” اوس ویلے اوہ ساریاں
کواریاں جاگ کے اپنے اپنے دیوے سوارن لگیاں ۔تے کم عقلاں نیں سیانیاں نوں آکھیا پئی اپنےتیل وچوں تھوڑا جیہا سانوں وی دیوو،کیوں جے ساڈے دیوے بجھن لگ پئے نیں ۔“ کم عقلے سدا کم عقلیاں دے کم ای کردے سَن ۔ اوہناں نوں چاہی دا سی پئی لاڑے دے آؤن توں پہلاں تیل دی تیاری کر لیندے ۔ بھاویں دیوے دی بتی کنی ای ماڑی سی ۔ دیوے دی بتی تیل نال نئیں بُجھے گی ۔
کم عقل کواریاں جنہاں دے دیوے تیل توں بغیر سَن ،صرف اوہناں دے دیویاں دے اندروں بتیاں ای سڑیاں سَن ۔ ایہدا مطلب ایہہ ہیگا اے پئی صرف اوہناں دے شوق ای سڑدے سَن۔ ” میَں نویں سریوں جم پیا ہاں تے نویں سریوں جمن والےبندے وانگر حیاتی بسر کرداہاں تے پاک رُوح نال بھریاہویا ہاں “ اوہ ایس طرحاں آکھ کے حدوں دوناں اپنے شوق نوں ساڑ دے نیں۔نِکے ہوندیاں اسیں اپنے گھراں وچ چانن کر ن لئی مٹی دے تیل نال بلن والے دیوے ورتدے ہوندےساں ۔ جے اسیں کاغذ نال بتی نوں بالدے تاں ایہہ جھٹ پٹ سڑ جاندی سی ۔ اَگ بوہت ودھدی تے اک فٹ تیک اُچی ہو جاندی سی ،پر یکدم ای بجھ جاندی سی ۔
کم عقل کواریاں جیہڑیاں دوزخ وچ جاندیاں نیں ایہو جیہاں نیں جیہڑیاں اپنے دل دے (شوقاں)نوں تیل دے بغیر ساڑدیاں تے جدوں اوہ خُداوند دے اگے کھلون گئیاں ،تاں اوہناں دے ایمان دی اگ بجھ جاوے گی ۔کیوں جے پاک رُوح اوہناں وچ نئیں رہندااے ۔ بھاویں اوہناں وچ پاک رُوح نئیں ہیگا ،تاں فیر وی اوہ سوچدے نیں پئی اوہناں دا ایمان ٹھیک ہیگااے ۔ جویں پئی اک گیت دے بول ہیگے نیں ” ♫ آ ۔۔ تُوں اگ دے رُوح ۔۔آ۔♫ “ اوہ بوہت تنگی وچ ہیگے نیں ۔فیر اک زنانی بوہت نچدی اے (اوہ آکھدے نیں پئی پاک رُوح نچدا پیا اے )اپنا سینہ ہلاؤندیاں ہویاں آکھدی اے ۔” آ۔۔مہربانی نال آ۔ “ اوہ کم عقل تے کملے ہیگے نیں ۔جے اسیں اپنے مکتی داتا دے اگے حالے تیک پاک نئیں ہیگے تاں فیر لازمی طور اُتے اسیں کم عقل کواریاں وانگر ہیگے آں ۔جے اسیں یسوع اُتے ایمان رکھدے ہاں تاں فیر جے پاپ ساڈے دلاں وچ ہیگااے ، تاں اسیں وی اوہناں کم عقل کواریاں وانگر ای بناں گے ۔ کم عقل کواریاں وانگر نہ بنو۔
کویں خُدا ایہو جیہی ووہٹی نال جیہڑی پاپاں بھری اے ویاہ کر سکدااے ؟
خُداوند بوہت پاک خُدا ہیگااے ۔ لاڑا خُدا تے خُدادا پُتر ہیگااے جیہڑا بے پاپ ہیگااے ۔ خُدا ساڈا لاڑا ہیگااے ۔ فیروی ، کویں تسیں خُدا نال ملن دی ہمت کر سکدے او ،جد پئی تسیں پاک ای نئیں ہیگے ؟ کیہ تسیں بغیر پاک دل نال ای خُدا نوں ملنا چاؤہندے او ؟ جے تسیں ایس طرحاں کردے او تاں ایہہ اک کم عقلیاں والا کم ہووے گا ۔
ساڈا لاڑا یسوع ، ایس جگ وچ آیا تے ووہٹی نوں پاک کیتا ۔اوہنے اپنی ووہٹی نوں بپتسمہ دے راہیں ،اوہناں دے پاپ دھو کے پاک لوکاں وچ بدلیا اے ۔ اوہ اوہدے وچ اوہناں نوں اپنی ووہٹی وانگر وکھ کردا اے ۔ جدوں ویلا پورا ہوگیا ،تاں اوہناں وچوں ۵ نوں آکھیا گیا ، ”مہربانی کر کے میرے نال چلو “فیر وی ، اوہناں وچوں باقی ۵ حالے تیک ہنیرے وچ کھلوتیاں ہوئیاں سن ۔ کویں اوہ ویاہ دے شگناں وچ جا سکدیاں نیں ،جد پئی اوہناں دے چہریاں اُتے ہنیراہیگا اے ۔ لاڑا آگیا تے آکھیا ، ”اے میرے باپ دے مبارک لوکو آوو ۔ “ پچھے رہ جان والیاں ۵ ووہٹیاں دے چہرے اوہناں دے پاپاں دے سبب کالے سَن ۔ اوہ بوہت دُکھی سَن کیوں جے اوہناں دے پاپ اوہناں دے دلاں وچ سَن ۔
کویں خُدا اک ایہو جیہی ووہٹی نال ویاہ کر سکدااے جیہڑی اپنے پاپاں دے سبب روندی ہووے ؟ پر جیہڑے بندے دی آس خُداوند اُتے ہیگی اے تے اوہ آکھدااے ، ” خُداوند مینوں اِنج پاک کرن لئی میَں تیرا شکر ادا کردا ہاں ۔“ تاں ایس طرحاں دا بندہ ای اپنے رُوحانی لاڑے نال خوش رہوے گا ۔ بھاویں اوہ ماڑا ہیگااے ، فیر وی لاڑے نے اوہدے نال اپنی محبت دے سبب اوہدی ساریاں کمیاں تے پاپاں نوں مکا دتا اے ۔ لاڑا عام طور اُتے بناؤسنگھار دا سامان ،لیڑے لتے ، ساریاں چنگیاں خوشبُوواں تے ہا رسنگھار گھل کے اپنی ووہٹی دی اَگوائی کردااے ۔ فیر، ووہٹی اپنے آپ نوں اوہناں ساریاں شیواں نال تیار کردی اے تاں پئی اوہ لاڑے نوں جی آیاں نوں آکھن لئی تیار رہوے ۔
ساڈا خُداوندلاڑے وانگر ایس جگ وچ ساڈی اَگوائی لئی گھلیا گیا ،تاں پئی اسیں جیہڑے ووہٹی ہیگے آں اوہنوں مل سکیے ۔ اوہنے اپنا بدن یردن دے دریااُتے ساڈے پاپاں دی مکتی لئی دے دِتا ۔ ” تے کلام نے بدن لیا تے فضل تے سچیائی نال بھر کے ساڈے وچکار رہیا تے اسیں اوہدا اِنج جلال ویکھیا جویں باپ دے اِکلے پُتر داجلال۔ “(یوحنا ۱:۱۴)۔ خُداوند نے آپ ساڈے پاپاں نوں مکا دتا تاں پئی اسیں خُداوند اُتے ایمان لیا کے فضل اور سچیائی دی بھرپوری تے پاپاں توں معافی پائیے ۔لاڑا نے یردن اُتے اپنی ووہٹی دے پاپ مکا دتے ۔ خُداوند نے سولی اُتے اپنی ووہٹی لئی دُکھڑے جرن دے راہیں اوہنوں اوہدے سارے پاپاں توں مکتی دتی ۔
کیہ اسیں اپنے ہتھ پیر مارکے تے پیسیاں نال پاک رُوح نوں خرید سکدے آں ؟
فیر وی ، جدوں لاڑا نیڑے سی تاں کم عقل کواریاں نیں سیانیاں نوں آکھیا پئی سانوں وی تھوڑا جیہا تیل دے دیووکیوں جے ساڈے دیوے بُجھدے جاندے نیں ۔ کیہ اسیں پاک رُوح ونڈ سکدے آں ؟کیہ اسیں پاک رُوح نوں پیسیاں نال خرید سکدے آں ؟ کیہ اسیں پاپاں توں مکتی نوں چنگے کماں ، دُکھاں وچ پیاں یاں پیسے دھیلے نال خرید سکدے آں؟ سیانیاں نے دسیا پئی دینی وڈیریاں کولوں پاک رُوح مُل خریدو ۔کم عقلاں نیں سوچیا پئی اوہ تاں پہلاں ای اوہناں کولوں مُل لَے چُکیاں نیں ۔اوہناں نیں سوچیا پئی اوہ تیل(پاک رُوح)نوں پیسیاں نال خرید سکدیاں نیں ۔ اوہ شوق نال دینی جندڑیاں دے پچھے ایہہ سوچ کے ٹُردے نیں پئی اوہناں دیاں وڈیاں عبادتاں ،ہدیے تے اوہناں دے عقیدے پئی گرجے جانا تے گھڑی مُڑی دیاں دعاواں ای اوہناں نوں کُجھ دین گئیاں۔
پر ایس گل توں ہٹ کے کوئی وی بندہ پاپاں توں مکتی جیہڑی خُداوند نے دتی اے ،ایس جگ دی کسے وی شے نال خرید نئیں سکدا ۔ کم عقل جدوں تیک خُدا دے اگے کھلوتے رہندے نیں ،اپنے شوق نوں گرم کرن دی ہمت کردے رہندےنیں ۔اوہناں وچوں ۵ کم عقل کواریاں نیں اک دینی حیاتی اِنج آکھدیاں ہویاں شروع کیتی پئی ، ” میَں تیرے پچھے آواں گی ،میَں خدمت وچ جان لئی ، توبہ دی دعانوں پہاڑاں اُتے جاکے،تے دُور جاکے دعا پڑھاں کراں گی ۔ آؤاوہدی خدمت کریے ،آؤخوشخبری دی منادی کرن لئی باہر دے مُلکا ں نوں چلیے۔ “
اخیریں ،لاڑااک وڈے رولے نال آگیا ۔جدوں لاڑاآیا تاں کم عقل تیل خریدن لئی چلیاں گئیاں ،پر اوہ کواریاں جنہاں نیں پاپاں توں مکتی پائی تے تیل (پاک رُوح)نوں اپنے اندر وسایا سی ،ویاہ دے شگن وچ چلیاں گئیاں ۔لاڑا ساری تیاری دے بعد ووہٹی نوں ملیا ۔ فیر اوہنے بوہا بند کر دتا ۔یسوع نے سوچے سمجھوں اَڈ ۵ کواریاں نوں وکھ نہ کیتا سی ۔ بائبل وچ ۵ عدد دا مطلب ’ فضل ‘ ہیگااے ۔ ۵کواریاں اوہناں دی نشانی ہیگیاں نیں جیہڑیاں فضل دے راہیں اپنے پاپاں توں مکتی پا چُکیاں نیں تے اوہدے فضل تے چنگے کماں اُتے ایمان لیاؤن دے راہیں چھڈائیاں گئیاں نیں۔ اوہ اوہناں کماں نوں پچھاندیاں نیں جیہڑے لاڑے نے اوہناں لئی کیتے نیں، تے خُداوند دی راستبازی اُتے ایمان رکھدیاں نیں جیہڑی اوہناں نوں راستباز بناؤندی اے ۔ فیروی ،دوجیاں کواریاں آئیاں تے اوہناں نے آکھیا ، ” خُداوند ،خُداوند ساڈے لئی بوہا کھول دے ۔ “ پر اوہنے جواب دتا ، ” میَں تہانوں سچ آکھدا ہاں پئی میَں تہانوں جان دا نئیں۔ “
جدوں ساڈے پاپ مکائے جاندے نیں ،تاں فیر ای اسیں پاک رُوح دا انعام پا سکدے آں
جیہڑے تیل مطلب اے پاک رُوح نوں اپنے نال نئیں لین گے اوہ خُداوند نال نئیں مل سکدے ۔خُداوند صرف اوہناں نوں جیہڑے پاپاں دی اصل معافی تے اَسمانی بادشاہی نوں اپنے دلاں وچ پا چُکے ہون گے تے اوہناں نوں جیہڑے راستبازی اُتے ایمان لیا کے بوہت بے چینی نال اَسمانی بادشاہی دا راہ ویکھدے ہون گے ،اوہناں نوں اپنے نال لَے جاوے گا ۔خُداوند نے وعدہ کیتے ہوئے کلام دے راہیں دسیا ، ” توبہ کرو تے تہاڈے وچوں ہر کوئی اپنے پاپاں توں معافی لئی یسوع مسیح دے ناں وچ بپتسمہ لوے۔ “فیر ،پاپاں توں معافی دے بعد کیہ ہوندااے ؟ بائبل مقدس دسدی اے ، ” تاں تسیں پاک رُوح دا انعام پاووگے “ (اعمال ۲:۳۸)۔جے تسیں خُدا دی راستبازی دی خوشخبری نوں دلوں سُن دے او ، تاں پاک رُوح تہاڈے دل وچ آن وسے گا تے تہاڈے دل دے سارے پاپ مک جان گے ۔ اسیں بدنی طور اُتے پاک رُوح دا احساس نئیں کر سکدے ۔فیر وی، رُوح لازمی طوراُتےموجود ہوندااے ۔ اسیں آکھ سکدے آں پئی اسیں پاپ نئیں رکھدے ،کیوں جے پاک رُوح ،خُدا دا کلام ساڈے دلاں وچ وسیا ہویا اے ۔ ایہہ سچ مُچ موجود ہیگااے ۔ جیہڑا وی خُداوند دی راستبازی پاؤندااے ،بھاویں اوہ ماڑا ہیگااے ، فیر وی راستباز بنے گا ۔پر ، جیہدے کول خُدا دی راستبازی نئیں ہیگی ، اوہ پاپی ای رہوےگا ۔
اوس ویلے لئی خُدا دی راستبازی ظاہر ہوئی اے
خُداوند پانی تے رُوح دے راہیں آیا ۔اوہنے سانوں اپنے بپتسمے راہیں ساڈے سارے پاپاں توں مکتی دتی ۔ جدوں اوہنے بپتسمہ لیا تاں ساڈے سارے پاپاں لئی سولی اُتے لہو روڑھ کے آپ دُکھڑے سہہ کے ، اوہنے ساڈے سارے پاپ مکا دتے ۔ یوحنا ، پطرس تے پولُس ،ایناں ساریاں رسولاں نیں ایہدے بارے کیہ دسیا اے ؟ اوہ سارے رَل کے یسوع دے بدن تے لہو بارے دسدے نیں ۔ اوہ سارے یسوع دے بپتسمہ تے لہو بارے گل کردے نیں ۔ متی ۳:۱۳ ۔ ۱۷ کھول کے یسوع دے بپتسمے بارے دسدااے ۔ یسوع نے بپتسمہ ایس لئی لیا پئی پاپیاں نوں پاک بنائے تے جگ دے سارے پاپاں نوں یردن اُتے دھوکے اوہناں توں دُور کر دیوے ۔
آؤ ۱۔پطرس ۳:۲۱ اُتے اک نظر پاؤندے آں ۔ پطرس گواہی دیندااے پئی اوہدا بپتسمہ مکتی وانگر ہیگا اے ، ” تے اوسے پانی وانگر وی مطلب اے بپتسمہ یسوع مسیح دے جی اُٹھن دے راہیں ہُن تہانوں بچاؤندااے اوہدے توں بدن دی ناپاکی مکاؤن دا مطلب نئیں سگوں کھری نیت نال خُدا دی طلب رکھن دا مطلب اے ۔اوہ اَسمان اُتے جا کے خُدا دے سجے ہتھ جا بیٹھا اے تے فرشتے تے حکومتاں تے قدرتاں اوہدا آکھیاں من دیاں نیں ۔ “(۱۔پطرس ۳:۲۱۔۲۲)۔
ایہہ لکھیا گیا اے ، ”تے اوسے پانی وانگر وی مطلب اے ، بپتسمہ یسوع مسیح دے جی اُٹھن دے راہیں ہُن تہانوں بچاؤندااے ۔“ یسوع دا بپتسمہ ،جنہے ساڈے سارے پاپاں نوں اوہدے بدن اُتے لد دتا ،ساڈی مکتی نوں ثابت کر چُکیااے ۔سولی اُتے اوہدے لہو وگن دا سچ ،ایس سچیائی نوں ثابت کردااے پئی اوہنے ساڈےسارے پاپاں لئی دُکھڑے جرے نیں ۔ کیہ تسیں سمجھدے پئے او ، جو کُجھ میَں آکھداپیاہاں ۔ایس لئی ، پاک بائبل دسدی اے پئی یسوع اوہ ہیگااے جیہڑا پانی ، لہو تے رُوح دے راہیں آیا اے (۱ ۔یوحنا ۵ : ۶۔ ۹)۔یسوع نوں انسانی بدن وچ ایس لئی ایس جگ وچ گھلیا گیا ،تاں پئی ساڈےپاپاں نوں اوسے طرحاں چُک لوے جویں پئی وڈاکاہن ہارون اپنے لوکاں دے پاپ چڑھاوے دے پسُو دے سر اُتے ہتھ رکھ کے اوہدے اُتے لد دیندا سی ۔
پانی اوہدے وانگر ہے جیہڑا سانوں بچاؤندااے : بپتسمہ ۔ ایہہ لکھیا ہویا اے پئی ایہدے توں بدن دے گندگی مکاؤن دا مطلب نئیں ۔ایہہ مطلب ایہہ نئیں ہیگا پئی پاپاں توں معافی پاؤن دے بعد اسیں پاپ نئیں کردے ۔ اسیں یسوع د ے بپتسمے اُتے ایمان لیا کے پاپاں توں معافی پاؤندے آں ۔ فیر ، کیہ اسیں بدنی طور اُتے پاپ نئیں کردےآں؟آہو ایہہ ساڈے توں ہو جاندے نیں ۔بوہتے لوک پاپاں توں معافی بارے سمجھدے ای نئیں تے ایہو جیہیاں من گھڑت گلاں کردے نیں، ” جے تسیں اپنے دل وچ پاپ نئیں رکھدے ،تاں تسیں دوبارہ پاپ نئیں کرو گے ۔“ ایہہ اک غلط خیال اے ۔ پاک بائبل دسدی اے ، ” کیوں جے دھرتی اُتے کوئی ایہو جیہا راستباز نئیں ہیگا پئی نیکی ای کرے تے غلطی نہ کرے ۔ “ (واعظ ۷:۲۰)۔بدن حالے تیک ماڑا اے جدوں تیک ایہہ مر نئیں جاندا،ایہہ ماڑا ای رہندااے ۔جدوں تیک ایہہ مرنہ جاوے پاپ کردے رہنا ایہدی عادت ہیگی اے۔ ” اوہدے توں بدن دی ناپاکی مکاؤن دا مطلب نئیں سگوں کھری نیت نال خُدا دی طلب رکھن دا مطلب اے ۔“ یسوع دے بپتسمہ تے لہو اُتے ایمان لیاؤن دے راہیں کھری نیت نال خُدا دی طلب رکھنا ،مطلب اے ۔ ساڈی کھری نیت ای ایس سچ اُتے ایمان لیاؤن دے راہیں پئی خُداوند نے ساڈے سارے پاپاں نوں اپنے بپتسمہ دے راہیں مکا دتا تے ایہو کھری نیت ای خُداوند ساڈے خُدانوں مکتی داتا پکارسکدی اے ۔
یسوع دا بپتسمہ تے لہوساڈے دِلاں لئی روحانی خوراک ہیگے نیں
یسوع دا بپتسمہ تے لہو دل لئی خوراک ہیگی اے ۔ یسوع دابپتسمہ دل دا کھانا تے پاپاں نوں مکاؤن وانگر ہیگا اے ۔ ایس طرحاں ،پطرس رسول نے آکھیا پئی بپتسمہ اوہدے وانگر ہیگا اے جیہڑا سانوں بچاؤندااے ۔
آؤ ۱۔پطرس ۱ : ۲۲ ۔ ۲۳ نوں ویکھیے ۔ ” کیوں جے تسیں سچ دا آکھنا من دیاں ہویاں اپنے دلاں نوں پاک کیتا اے جیہدے نال بھراواں دی بے ریا محبت پیدا ہوئی ،ایس لئی دل تے جان نال آپس وچ بوہتی محبت رکھو کیوں جے تسیں برباد ہون والے تخم نال نئیں سگوں قائم رہن والے نال خُدا دے کلام دے راہیں جیہڑا جیونداتے قائم ہیگا اے نویں سریوں جمے او۔ “آمین۔
اسیں یسوع دے بپتسمے تے اوہدے لہو اُتے ایمان لیاؤن دے راہیں نویں سریوں جمے تے پاپاں توں معافی پا چُکے آں ۔ اسیں خُدا دے لکھے ہوئے کلام اُتے ایمان لیا کے نویں سریوں جمے آں ۔’ اسیں خُدادے کلام دے راہیں جیہڑا جیوندا تے قائم ہیگا اے ‘ نویں سریوں جمے آں ۔ ہیلیلویاہ ! نویں سریوں جمنا، کلام دے راہیں ہوندااے جیہڑا جیونداتے قائم ہیگااے ۔ خُدا دا کلام اک ایہو جیہا قانون ہیگااے جیہڑا پیمائش ناپن والے پیمانے وانگر ہیگااے ۔ ایہہ مکتی لئی بوہت خاص ہیگا اے ۔ خُدا دامکتی دی پیمائش کرن والا پیمانہ کدی بدل دا نئیں ۔
یوحنا بپتسمہ دین والے نے یوحنا ۱:۲۹وچ آکھیا ، ” ویکھو ! ایہہ خُدا دا میمنا ہیگااے جیہڑا جگ دا پاپ چُک کے لَے جاندااے ۔ “ خُدا دا میمنا جنہے یردن دے دریااُتے بپتسمہ لیا سی حیاتی دی اصل روٹی ہیگی اے ، جنہے سانوں اپنے ماس تے لہو دے راہیں مکتی دتی ۔
اسیں خُدا دے کلام اُتے ایمان لیاؤن دے راہیں پاک کیتے جاندے تے مکتی پاؤندے آں۔ پاک بائبل آکھدی اے ، ” سو ایمان سُنن نال پیدا ہوندااے تے سُننا مسیح دے کلام توں “ تے ” ایس لئی پئی اوہدے وچ خُدا دی راستبازی ایمان نال تے ایمان لئی ظاہر ہوندی اے جویں لکھیا اے پئی راستبازایمان نال جیوندا رہوے گا ۔ “ (رومیوں ۱۰:۷۱، ۱:۱۷)۔اسیں خوشخبری اُتے ایمان لیا کے سچے بن سکدے آں ۔
کیہ تسیں پاک ہوگئےاو ؟ جے اِنج ہویا تے آکھو —آمین — کیہ تہاڈے وچ کوئی پاپ نئیں ہیگا ؟ ایہو ای خوشخبری ، خوشی دی منادی ،تے یونانی وچ ” ایواجیلین “ (euaggelion) ہیگی اے ۔ خُدا دی راستبازی کیہ ہیگی اے ۔ایہہ سچی گل ہیگی اے پئی خُداوند نے اپنے لہو تے ماس راہیں ساڈے سارے پاپاں نوں مکا دتا اے۔ خُدا دی راستبازی سانوں آکھدی اے پئی پاک بنو۔ خُدا دی راستبازی ایہہ ہیگی اے پئی یسوع ، جیہڑا پاپ توں اَڈ سی اوہنے جگ دے پاپاں نوں چُک لیا تے پاپیاں لئی سولی اُتے مر گیا ۔ ایہہ یسوع دا پانی بپتسمہ ہیگا اے جیہڑا جگ دے سارے پاپاں نوں دھوندااے ۔خُدا دی راستبازی ایس سچ راہیں دتی گئی پئی یسوع نے بپتسمے دے راہیں ایس جگ دے سارے پاپاں نوں اپنے اُتے چُک لیا تے سولی اُتے مرگیا ۔ خُدا دی راستبازی اوہدے بپتسمہ تے موت تے سولی اُتے ہیگی اے ، جیہڑی ساڈی سزا وانگر ہیگی اے ۔ ایہہ خُدا دی راستبازی ہیگی اے جیہڑی خوشخبری وچ وکھالی دیندی اے ۔
Copyright © 2021 by The New Life Mission