IKAW BA TINUD-ANAY NGA NATAWO PAG-USAB SA TUBIG UG SA ESPIRITU? [Bag-ong Gibag-o nga Edisyon]

Ang pangunang hilisgutan niining libroha mao ang "pagkatawo pag-usab sa tubig ug sa Espiritu."

Kini nga libro adunay kaugalingong pagkaorihinal sa maong hilisgutan. Sa laing pagkasulti, kini nga libro tin-aw nga nagpasabot kanato kon unsa ang pagkatawo pag-usab ug kon unsaon pagkatawo pag-usab sa tubig ug sa Espiritu, nga hugot nga nagsunod sa Biblia.

Ang tubig nagsimbolo sa bautismo ni Jesus sa Suba sa Jordan, ug ang Biblia nag-ingon nga ang tanan natong mga sala gipasa ngadto kang Jesus sa dihang gibautismohan Siya ni Juan Bautista. Si Juan mao ang representante sa tibuok katawhan ug kaliwat ni Aaron, ang Labawng Pari. Gipandong ni Aaron ang iyang mga kamot sa ulo sa kanding nga ipadala ngadto sa kamingawan ug gipasa ngadto niini ang tanang sala nga nahimo sa mga Israelinhon sulod sa usa ka tuig sa Adlaw sa Pagtabon sa mga Sala. Kini usa ka landong sa maayong mga butang nga moabot.

Ang bautismo ni Jesus mao ang katumanan sa gisimbolohan sa pagpandong sa mga kamot. Gibautismohan si Jesus pinaagi sa pamaagi sa pagpandong sa mga kamot didto sa Jordan. Busa, pinaagi sa Iyang bautismo, gidala Niya ang tanang sala sa kalibotan ug gilansang Siya sa Krus aron bayran ang silot tungod sa mga sala.

Apan kadaghanan sa mga Kristohanon wala mahibalo kon nganong gibautismohan si Jesus ni Juan Bautista sa Suba sa Jordan. Ang bautismo ni Jesus mao ang labing mahinungdanong pulong niining libroha ug ang dili mahimong mawala nga bahin sa Ebanghelyo sa Tubig ug sa Espiritu. Mahimo lamang kitang matawo pag-usab pinaagi sa pagtuo sa bautismo ni Jesus ug sa Iyang Krus.