مضمون 11: خیمۂ اِجتماع
[11-31] اِنصاف دا سِینہ بنھ <خروج ۲۸:۱۵-۳۰>
>خروج ۲۸:۱۵-۳۰>
”تےانصاف دا سِینہ بنھ کِسےکاری گر اُستادتوں بنواویں تے افُود وانگر سونے تے اسمانی تے ارغوانی تےلال رنگ دیاں کپڑیاں تےمہین وٹے ہوئے کتان دا بنواویں۔اوہ چَونہہ نکراتے دوہرا ہوئے۔ اوہدی لمان اِک بالِشت تے چَوڑائی وی اِک ای بالِشت ہوئے۔تےچونہہ قطاراں وِچ اوس اُتے مہنگےپتھرجڑیں۔ پہلی قطار وِچ یاقوتِ سُرخ تے پُکھراج تے گوہرِ شب چراغ ہوئے۔دُوجی قطار وِچ زمُرّدتے نِیلم تے ہِیرا۔ترِیجی قطار وِچ لشم تے یشم تے یاقُوت۔چَوتھی قطاروِچ فِیروزہ تے سنگِ سُلیمانی تے زبرجد۔ایہہ سارے سونے دیاں خانیاں وِچ جڑے جان۔ایہہ مہنگےپتھر اِسرائیلؔ دیاں پُتراں دیاں ناواں مُطابِق گنتی وِچ باراں ہون تے انگشتری دی شکل وانگرایہہ ناں جیہڑے باراں قبیلیاں دے ناں ہون گے اوہناں اُتےچھاپےجان۔تے تُوں سِینہ بنھ اُتے ڈوری وانگر گُندیاں ہوئیاں کھرے سونے دیاں دو سنگلیاں لاویں۔تےسِینہ بنھ لئی سونےدےدو حصّے بناکےاوہناں نُوں سِینہ بنھ دیاں دوآں سِریاں اُتے لاویں۔تے سونے دیاں دوآں گُندیاں ہُوئیاں سنگلیاں نُوں اُوہناں دوآں حِصیاں وِچ جیہڑے سِینہ بنھ دیاں دوآں سِریاں اُتے ہون گے لا دیویں۔تے دوآں گُندیاں ہوئیاں سنگلیاں دیاں باقی دوآں سِریاں نُوں دوآں پتّھراں دیاں خانیاں وِچ جڑ کےاوہناں نُوں افُود دیاں دوآں موہڈیاں اُتےاَگلےپاسے لا دیویں۔تےسونے دے ہور دو حِصّے بنا کےاوہناں نُوں سِینہ بنھ دیاں دوآں سِریاں دے اوس حاشیے وِچ لاویں جیہڑاافُوددےاندرلےپاسےہیگااے۔فیر سونے دے دو حِصّے ہور بنا کے اوہناں نُوں افُود دیاں دوآں موہڈیاں دے ہیٹھاں اوہدے اگلے حِصّےوِچ لاویں جِتھے افُود جوڑیا جائے گا تاں پئی ا وہ افُوددے کارِیگری نال بنے ہوئے پٹکےدے اُتے رہوے۔تےا وہ سِینہ بنھ نُوں لے کے اوہدیاں حِصیاں نُوں اِک نِیلے فِیتےنال بنھ دین تاں پئی ایہہ سِینہ بنھ افُود دے کارِیگری نال بنے ہوئے پٹکے دے اُتےوی رہوے تےافُود توں وی وکھ نا ہوئے۔تے ہارُونؔ اِسرائیلؔ دیاں پُتراں دے ناں انصاف دے سِینہ بنھ اُتے اپنے سِینےاُتے پاک تھاں وِچ جان ویلے خُداوند دے اَگےلائی رکھن تاں پئی سدا اوہناں دی یادگاری ہویا کرے۔تے تُوں انصاف دے سِینہ بنھ وِچ اُورِیمؔ تے تُمیّمؔ نُوں رکھیں تے جد ہارُونؔ خُداونددے اَگےجائے تاں ایہہ اوہدے دِل دے اُتے ہون۔ایس طرح ہارُون ؔبنی اِسرائیل دے فَیصلے نُوں اپنے دِل دے اُتے خُداوند دےاَگےسدالائی رکھے گا۔“
آؤ ہن اسی اپنا دھیان ایس سِینہ بنھ ول لائیے جیہدے نال وڈا کاہن اسرائیلیاں لئی فیصلہ کردا سی ۔ اُتے لکھیا ہویا حوالہ سانوں دسدا اے پئی انصاف دا سِینہ بنھ اِک چونہہ نکرے تے دوہرے کپڑے نال بنایاگیا سی جیہدی لمان تے چوڑائی دوویں ای کاچھ وچ اِک بالِشت سی ۔ ایہہ کپڑاکسے کاری گر اُستاد کولوں سونے ،اسمانی، ارغوانی تےلال رنگ دے دھاگےتےمہین وٹے ہوئے کتان نال اُنّ کے بنوایا گیا سی ۔ ایس کپڑے اُتے ، باراں مہنگے پتھر جڑے گئے سن، کُل چونہہ قطاراں وچ ہراِک قطار اُتے تِن پتھر۔ خُدا نے مُوسیٰ نوں ایہہ وی آکھیا پئی انصاف دے سِینہ بنھ وچ اُورِیم تےتُمیّم نوں رکھے ۔ اُورِیم تےتُمیّم دا ایتھے ترتیب نال مطلب ”چانن تے کاملیت“اے ۔
وڈے کاہن دے انصاف دا معیار
جویں پئی اسی جان دے آں ، نال دیاں معیاراں تے قاعدیاں تے قانوناں نال معاملے اُتے غور تے فکر کرن دے بعد ہر انصاف کیتا جا سکدا اے ۔ فیر، وڈے کاہن نے اپنیاں لوکاں لئی کیہڑے معیار دی نِیہ اُتے انصاف کیتا ؟ اوہنوں اپنے سِینہ بنھ وچ موجود اُورِیم تےتُمیّم دے راہیں اپنیاں لوکاں دا انصاف کرنا سی ، یعنی ، ”چانن تے کاملیت“ نال ۔ مُڈھلا ایمان جنہے اوہنوں ٹھیک طریقے نال انصاف کرن دے لائق بنایا اوہ سچیائی اُتے ایمان سی جیہڑی ا یہناں پنج دھاگیاں وچ ظاہر ہوندی اے جنہاں نال انصاف دا سِینہ بنھ بنایا گیا سی ۔ دوجیاں اکھراں وِچ ، ایہہ اوس ایمان دی نِیہ اُتے سی جیہڑا سونے اسمانی، ارغوانی تےلال رنگ دے دھاگےتےمہین وٹے ہوئے کتان نال بنی سچیائی اُتے ایمان رکھدا سی جیہدے نال وڈا کاہن ساریاں اسرائیلیاں لئی انصاف کردا ہوندا سی ۔
وکھ وکھ اکھراں وچ ، وڈے کاہن دا انصاف کرن دا معیار سچیائی اے ، جیہڑی”چانن تے کاملیت“
اے ،جیہڑی سِینہ بنھ لئی ورتے جان والے اسمانی، ارغوانی تےلال رنگ دے دھاگےتےمہین وٹے ہوئے کتان توں ظاہر ہوندی اے ۔ ایس سچیائی اُتے ایمان رکھن نال جیہڑی پنج دھاگیاں وچ ظاہر ہوندی اے ، وڈا کاہن ساریاں اسرائیلیاں لئی اپنے مستند فیصلیاں تیکر اَپڑ سکدا سی ؛ کیہ اوہ رُوحانی طریقے نال ٹھیک سن یا غلط ۔
سِینہ بنھ ہر اِک وڈے کاہن دے دل اُتے رکھیا جاندا سی تے اُورِیم تےتُمیّم نوں اوہدے اندر رکھیا جاندا سی ۔ ایہدا مطلب ایہہ ہیگا اے پئی اِک وڈے کاہن دے دل وچ چانن تے کاملیت دی سچیائی اینی پکیائی نال قیم سی پئی اوہ سدا اسرائیلیاں دی اگوائی کر سکدا سی تے انصاف کر سکدا سی پئی کیہ اوہناں دا عقیدہ ٹھیک سی یا نئیں ، کیہ اوہناں نیں خُدا دے قربانی دے نظام مطابق قربانیاں چڑھایاں سن یا نئیں ، تے کیہ اوہناں نیں اوہدیاں حکماں اُتےعمل کیتا یا نئیں ۔
اَج اسی، خُدا دیاں شاہی کاہناں نوں وی ایسے معیار نوں قیم رکھنا اے تے ایس زمانے دیاں لوکاں دا انصاف کرنا اے ۔ سانوں لازمی ایسے نتیجے اُتے اَپڑنا چاہی دا اے پئی جے لوک سِینہ بنھ لئی ورتے جان والے پنج دھاگیاں وچ ظاہر ہون والی سچیائی اُتے ایمان رکھدےنیں تاں اوہ خُدا دے اگے جگ دا چانن بن سکدے نیں ، تے جے اوہ ایمان نئیں رکھدے تاں اوہناں نوں سزادِتی جائے گی ۔
کُجھ لوک ایس کلام دے خلاف چلدیاں ہویاں ایہہ دلیل دے سکدے نیں پئی پہاڑ دی چوٹی تیکر اَپڑن لئی بوہت سارے راہ ہو سکدے نیں ۔ پہاڑ نوں کچھن والے آکھ سکدے نیں ، ”تُسی پِچھلی واری سب توں سوکھا راہ ملیا سی ، پر مَیں پہاڑ دی چوٹی تیکر اَپڑن لئی سب توں اوکھی چٹان ، چڑھدے کنڈے دا راہ ملاں گا ۔ “لازمی جد پہاڑ کچھن دا معاملہ آؤندا اے ، تاں ایس طرح دا دوجا طریقہ بوہت ممکن اے ۔ پر ، جد ساڈے رُوحانی دائرے دی گل ہوندی اے ، تاں ایہہ کسے جھگڑے یا سمجھوتے نوں نئیں من دا ۔معیار صرف اوہو اے جیہڑا خُدا نے قیم کیتا اے ۔ ساڈے لئی خُدا دے اگےجگ دا چانن بنن لئی ،ساڈے کول کئی طریقے نئیں ہیگے ، سگوں صرف اِک ای طریقہ اے : ایہہ طریقہ مکتی دی چمکد ی ہوئی سچیائی نوں جاننا تے ایس اتے ایمان رکھنا اے جیہڑی سونے اسمانی، ارغوانی تےلال رنگ دے دھاگےتےمہین وٹے ہوئے کتان وچ ظاہر ہوندی اے ،جیہڑے سِینہ بنھ تے افود دے سامان نیں ، تے ایس طرح اپنیاں پاپاں دی معافی پائیے تے خُدا دے اپنے نیانے بن جائیے ۔
جگ دا چانن بنن دا کوئی دوجا راہ نئیں ہیگا سوائے ایس ایمان دے پئی خُدا نے ساڈیاں ساریاں پاپاں نوں مکا دِتا اے تے سانوں اسمانی، ارغوانی تےلال رنگ دے دھاگے نال راستباز بنا دِتا اے ۔ صرف وڈے کاہناں دے پائے ہوئے بانے لئی ورتے جان والے سامان دی سچیائی اُتے ایمان رکھن نال ای پاپی راستباز بن سکدے نیں تے ادھورے کامل بن سکدے نیں۔ ایسے طرح، جدساڈا انصاف کیتا جاندا اے پئی کیہ اسی خُدا دے اگے مکتی یافتہ ہیگے آں یا نئیں ، تاں ساڈا پانی تے رُوح دی خوشخبری دے کلام دی نِیہ اُتے انصاف کیتا جاندا اے جیہڑی سچیائی دا چمکدا ہویا چانن بن گئی اے ۔
جے اسی سچ مُچ خُدا دے اگے ٹھیک طریقے نال انصاف کرنا چاؤہندے آں پئی کیہ اسی اسمان اُتے جاواں گے یا دوزخ وچ ، تاں سانوں لازمی اوہ ایمان رکھنا چاہی دا اے جیہڑا انصاف دا سِینہ بنھ بناؤن لئی ورتے جان والے سامان نوں جان دا تے ایس اُتے ایمان رکھدا اے ۔ ساڈے لئی دوجیاں نوں ویکھن تے ایہہ جانن دے لائق ہون لئی پئی کیہ اوہ سچے دلوں پانی تے رُو ح دی سچیائی اُتے ایمان رکھدے نیں ، سب توں پہلوں سانوں پانی تے رُوح دی خوشخبری اُتے ایمان رکھناچاہی دا اے ۔ سانوں جیہڑی شے دا پتہ ہونا چاہی دا اے اوہ ایہہ ہیگی اے پئی سچیائی سونے ، اسمانی، ارغوانی تےلال رنگ دے دھاگےتےمہین وٹے ہوئے کتان وچ ظاہر ہوندی اے جیہڑی سانوں پاپاں توں معافی دے بارےسچاانصاف تیکر اَپڑن دے لائق بناؤندی اے ، تے ایہو ای سچیائی سچےانصاف دی گواہی دیندی اے ۔ کیہ تُسی ہُن ایہہ سمجھ سکدے او؟
تاں فیر کیہڑا پہلاں بندہ اے جیہڑا اَج پاپاں توں معافی دے بارے سچاانصاف کر سکدااے ۔ ایہہ یِسُوعؔ مسیح اے ، اسمانی سدا دا وڈاکاہن ۔ یِسُوعؔ مسیح نے اپنے بپتسمے نال ساریاں لوکاں دیاں پاپاں نوں اپنے پِنڈے اُتے لے کے ساڈیاں ساریاں پاپاں نوں اپنے اُتے چُک لیا ، تے سولی اُتے مر کے تے دوجی واری مویاں وچوں جیوں کے ، اوہ سانوں سدا لئی جگ دیاں پاپاں توں مکتی دے چُکیا اے ۔ سو ، جیہڑا کوئی وی ایس سچیائی دے مطابق یِسُوعؔ مسیح اُتے ایمان رکھدا اے اوہ شاہی کاہن بن سکدا اے تے لوکاں دا سچاانصاف کرن داحق رکھدا اے ۔ ہُن ، ساڈا نویں سریوں جمن والیاں دا کم ہیگا اے پئی خُدا دے دِتے گئے معیار ، پانی تے رُوح دی خوشخبری دے مطابق غیر مکتی یافتہ لوکاں دا انصاف کرئیے۔ تے سانوں ایہہ کم یِسُوعؔ مسیح ، اُچیرے جج دے اَگے وفاداری نال کرنا چاہی دا اے ۔
کُجھ لوک ایہو جیہے نیں جیہڑے ساڈے رُوحانی کاہناں دے انصاف نوں پسند نئیں کردے ۔ اوہ ساڈے خلاف کھلو کے آکھدے نیں ، ”تُسی خُدا نئیں جے !تُسی تاں بس میرے وانگر اِک ماڑے بندے او ، تُسی ایہہ کویں فیصلہ کر سکدے او پئی مینوں میریاں پاپاں دی معافی مل گئی اے یا نئیں ؟ پاپیاں دا سچاانصاف صرف خُدا ای کردا اے ! تُسی اپنے آپ نوں کیہ سمجھدے او ؟ تُہانوں ایہہ انصاف کرن دی ہمت کویں ہوئی پئی کیہ مَیں مکتی پا چُکیا ہاں یا نئیں ؟ ایہہ تاں خُدا ای جان دا اے ۔ کیہ تُسی خُدا او؟ کیہ تہانوں لگدا اے پئی تُسی سب توں چنگے او ؟ “
پر رُوحانی کاہناں دے فیصلے بے عیب ہون دا سبب ایہہ ہیگا اے پئی اوہناں نوں خُداوند ولوں اِنج کرن دا حق دتا گیا اے ۔ جد خُدادے کاہن ٹھیک تے غلط دا فیصلہ کردے نیں ، تاں سانوں لازمی ایس انصاف اُتے ایمان رکھنا چاہی دااے ، ایس لئی پئی ایہہ سچاانصاف اے ۔ جویں پئی ایہہ ڈاکٹر نیں جیہڑے اپنیاں روگیاں دیاں روگاں نوں لبھ سکدے نیں ، ایہہ رُوحانی کاہناں اُتے منحصر ہیگا اے پئی رُوحاں بوہت دھیان نال ویکھن تے ایہہ فیصلہ کرن پئی کیہ اوہ ہُن وی پاپی نیں یا اوہ راستباز بن گئے نیں ۔
ایہہ ایمان نال ای جیہڑا اسمانی، ارغوانی تےلال رنگ دے دھاگےتےمہین وٹے ہوئے کتان اُتے یقین رکھدا اے پئی اسی ایہو رُوحانی کاہن بن سکدے آں ۔ ایہہ رُوحانی کاہن اوہ نیں جنہاں نوں اوہناں دیاں ساریاں پاپاں توں معاف مل گئی اے تے جنہاں نیں سچیائی دی خوشخبر ی اُتے ایمان رکھ کے خُدا ولوں پاک رُوح پا یا اے ۔ جیہڑے لوک ایس طرح کاہن بنے نیں اوہ راستباز لوکاں وچوں پاپیاں نوں پچھان سکدے نیں ۔ ایس لئی پئی اسی اسمانی، ارغوانی تےلال رنگ دے دھاگے وچ ظاہر ہون والی خوشخبری نوں سُن کے تے ایس اُتے ایمان رکھ کے پاپاں دی معافی پائی اے ، ہُن اسی پاپیاں نوں شفا دین تے اوہناں نوں مسیح ول لَے جان دے لائق آں ۔
جد لوک تہاڈی کہانت نوں للکاردے نیں تاں تہانوں اوہناں دا نڈر ہوکے مقابلہ کرنا پوے گا
پاپی ، اپنیاں خیالاں وچ ، راستبازاں ولوں کیتے جان والے منصفانہ عدل دی طاقت نوں گھٹ کرن دی وی کوشش کردے نیں ۔پر ، ایس توں وی بھیڑی گل ایہہ ہیگی اے پئی خورے اسی اپنی کہانت دے قائل نا ہوئیےبھاویں اسی پہلوں ای نویں سریوں جم پئے آں ۔ جد اسی نویں سریوں جمن والے دوجیاں دا انصاف کردے آں ، تاں ساڈے لئی ایہہ سوچنا سوکھا اے ، ” کیہ مَیں کسے وی طرح گھمنڈ تاں نئیں کردیا پیاواں؟ کیہ مَیں ایتھے کوئی غلطی تاں نئیں کر دا پیا ؟ “پر ایتھے کُجھ وی غلط نئیں ہیگا ، ایس لئی پئی صرف اوہو ای لوک جیہڑے رُوحانی طریقے نال خُدا دے کاہن بن گئے نیں اوہ ایس رُوحانی انصاف نوں ٹھیک طریقے نال کر سکدے نیں ۔ سو ، سانوں نویں سریوں جمن والیاں نوں ایہدا نڈر ہو کے مقابلہ کرنا پوے گا جد پاپی اوہناں دا انصاف کر کے ساڈے اختیار نوں للکاردے نیں ۔ یِسُوعؔ اپنیاں چیلیان نوں اِنج کرن دا حق دے چُکیا اے ، ایہہ آکھدیاں ہویاں، ”جِنہاں دے گُناہاں نُوں تُسی بخشواوہناں دے بخشے گئے نیں تے جِنہاں دے تُسی قیم رکھو اوہناں دے قیم رکھّے گئے نیں“(یوحنا ۲۰ :۲۳)۔جیہڑے لوک رُوحانی کاہن بن گئے نیں اوہ دوجیاں دی خوشخبری دے نال اگوائی کر سکدے نیں جنہے اوہناں نوں پاپاں دی معافی پاؤن دے لائق بنایااے ۔
سارے جگ وچ ، بوہت سارے پاک لوک نیں جنہاں نیں ساڈیاں مسیحیاں کتاباں دی منسٹری راہیں پاپاں توں معافی پائی اے ۔ پاپاں دی ایس معافی دے نال نال ، خُدا نے اوہناں نوں پاک رُوح دی طاقت وی دِتی اے تاں پئی اوہ رُوحانی طریقے ایہہ وی پچھان سکن پئی کیہ دوجے پاپاں دی معافی پا چُکے نیں یا نئیں ۔ جیہڑے لوک جان دے نیں تے ایس اُتے ایمان رکھدے نیں پئی سونے،اسمانی، ارغوانی تےلال رنگ دے دھاگے تےمہین وٹے ہوئے کتان اوہناں نوں کیہ دسدے پئے نیں اوہ اوہو نیں جیہڑے ایمان نال دوجیاں دا انصاف کرن دی طاقت رکھدے نیں ۔ ایہناں کاہناں دے راہیں ، خُدا لوکاں نوں اوہناں دیاں پاپاں تے سزا توں بچا چُکیا اے ۔ پانی تے رُوح دی خوشخبری اُتے ایمان رکھن نال ای اسی رُوحانی طریقے نال خُدا دے پُتر بن گئے آں ۔
خُدا دے نیانے بنن دے بعدوں، اسی رُوحانی کاہن بن گئے آں ، تے ایس لئی سانوں ایہہ انصاف کرن دا حق ہیگا اے پئی کِنہے پاپاں دی معافی پائی اے تے کِنہے نئیں پائی ۔ سانوں پاپیاں نوں بِنا جھکیوں دسنا چاہی دا اے پئی اوہ اپنیاں پاپاں دے سببوں دوزخ ول جاندے پئے نیں تےپانی تے رُوح دی خوشخبری اُتے ایمان رکھ کے اوہناں نیں اپنیاں پاپاں دی معافی پاؤنی اے ۔ سانوں، اپنے نال دیاں ایمانداراں دا وی انصاف کرنا چاہی دا اے ، جیہڑے پہلوں ای پانی تے رُوح نال نویں سریوں جم پئے نیں ،تاں پئی اوہناں نوں ٹھیک راہ اُتے لَے جا سکیے۔
تہانوں لازمی ایہہ نئیں سوچنا چاہی دا پئی ساڈے لئی ، جیہڑے رُوحانی کاہن بن گئے آں ، ایہناں پاپیاں دا انصاف کرنا غلط اے جنہاں نیں حالے تیکر اپنیاں پاپاں دی معافی نئیں پائی اے ۔ دوجیاں اکھراں وچ تہانوں ایہہ نئیں سوچنا چاہی دا پئی ایہو جیہاں لوکاں نوں پاپیاں وانگر پچھاننا تہاڈے لئی گھمنڈ اے ۔ ایہدے اُلٹ ، ایس لئی پئی اسی رُوحانی کاہناں وانگر سدا اپنے سینے اُتے انصاف دا سِینہ بنھ بنھی رکھدے آں ، ایس لئی سانوں لازمی اپنیا ں کماں نوں ہور وی دل لا کے کرنا چاہی دا اے ۔ باقی ساریاں شیواں نوں اِک پاسے رکھدیاں ہویاں ، سانوں خُدا ولوں ، ایہناں پاپیاں نوں دوزخ وچ فنا ہون دی سزا دینی چاہی دی اے ۔ ایہہ پاپی فیر رُوحانی کاہناں دے انصاف نوں خُدا دے انصاف وانگر منن گے ، ایس انصاف نوں قبول کرن گے ، پاپ توں دُھل جان دے خُدا دے فضل اُتے ایمان رکھن گے جیہڑااسمانی، ارغوانی تے لال رنگ دے دھاگےتےمہین وٹے ہوئے کتان وچ ظاہر ہوندا اے ، تے ایس طرح اپنیاں ساریاں پاپاں توں بچ جان گے ۔ ایہو ای سبب ہیگا اے پئی جے کوئی انصاف ایمان نال کیتا جائے تاں ایہہ سچا انصاف اے ۔
فیر اسی کیہڑ ی کسوٹی نال ایہہ فیصلہ کر سکدے آں پئی کیہ دوجے پاپا ں دی معافی پا چُکے نیں یاں نئیں؟ اسی ایہدا فیصلہ اوسے ایمان دی نِیہ اُتے کرسکدے آں جیہڑا سونے ، اسمانی، ارغوانی تےلال رنگ تےمہین وٹے ہوئے کتان دیاں پنج دھاگیاں اُتے ایمان رکھدا اے ۔ وکھ وکھ اکھراں وچ ، اسی شاہی کاہن پانی تے رُوح دی خوشخبری دی نِیہ اُتے دوجیاں دا انصاف کر سکدے آں: یِسُوعؔ مسیح خُدا دے پُتر نے ساڈیاں ساریاں پاپاں نوں یوحنا بپتسمہ دین والے دے راہیں بپتسمہ لے کے اپنے اُتے چُک لیا ، سولی اُتے مرگیا ، دفن ہویا تے فیر مویاں وچوں جیوں پیا ، تے ایس طرح ساڈیاں ساریاں پاپاں نوں دھو دِتا تے اوہناں ساریاں پاپاں دی سزا دا بھار چُک لیا ۔ جیہڑے لوک ایس سچیائی اُتے ایمان رکھدے نیں اوہ اوہو ای نیں جیہڑے پاپاں دی معافی پا چُکے نیں تے جیہڑے لوک ایس طرح دا ایمان نئیں رکھدے اوہ پاپی ہون دی سزا دے حقدار نیں ۔
راستبازاں لئی انصاف دا معیار — یعنی ، کیہ اوہناں نیں رُوحانی طریقے نال عزت دے لائق زندگی گزاری اے یا نئیں —ایس گل نال وی ہیگا اے پئی اوہناں نیں پانی تےرُوح دی خوشخبری دی کِنے چنگے طریقے نال خدمت کیتی اے ۔ اُنج ، ساریاں فیصلیاں لئی ، ایہہ سوال پئی کیہ کوئی پانی تے رُوح دی خوشخبری اُتے ایمان رکھدا اے یا نئیں ، مُڈھلا معیار اے جیہڑا سب توں خاص اے ۔ جیہڑا کوئی وہ خُدا دے اگے ایس سچی خوشخبری اُتے ایمان نئیں رکھدا اوہ پاپی رہوے گا ۔ جیہڑا کوئی وی پرانے عہد نامے دیاں چونہہ دھاگیاں وچوں اِک نوں وی چھڈ دیندا اے — یعنی ، اسمانی، ارغوانی تے لال رنگ دے دھاگےتےمہین وٹے ہوئے کتان وچوں — اوہدا ایمان سدا لئی پاپ توں بِنا مکتی یافتہ ای رہوے گا، ایس لئی پئی خُدا دی مکتی ایہناں چونہہ دھاگیاں اُتے ایمان نال پوری ہوندی اے ۔
اَج دیاں مسیحیاں وچ ، بوہت سارے ایہو جیہے نیں جیہڑے آکھدے نیں پئی اوہ صرف سولی والے لہو اُتے ایمان رکھ کے نویں سریوں جمے نیں ۔ ایہناں مسیحیاں دےایمان دا انصاف کردیاں ہویاں جیہڑے صرف سولی والے لہو اُتے ایمان رکھدے نیں ، اسی ایہہ نتیجہ کڈھ سکدے آں پئی اوہناں دا ایمان ادھورا اے ، ایس لئی پئی اوہناں دا ایمان اسمانی دھاگے (یِسُوعؔ دے بپتسمے) نوں چھڈدیاں ہویاں اُنیا گیا سی ۔ کیہ یِسُوعؔ ساریاں لوکاں دیاں پاپاں نوں چُک سکدا سی جد اوہ سولی اُتے مرگیا ؟ یِسُوعؔ دا سولی اُتے چڑھنا ، اپنا لہو وگاؤنا ،تے سولی اُتے مرنا سوکھا سی ایہدا سبب ایہہ سی پئی اوہنے پہلوں ای یردن دے دریا اُتے یوحنا بپتسمہ دین والے دے راہیں بپتسمہ لے کے ساڈیاں ساریاں پاپاں نوں اپنے اُتے چُک لیا سی ۔ جے یِسُوعؔ نوں یوحنا نے بپتسمہ نا دِتا ہوندا تاں جگ دے پاپ اوس اُتے کویں لدے جا سکدے سن ؟ ایہہ ایس لئی سی پئی ساڈے پاپ اوہدے بپتسمے دے راہیں یِسُوعؔ مسیح دے بدن اُتے لدے گئے سن پئی مسیح ایس جگ دیاں ساریاں پاپاں نوں جر سکدا سی ، سولی اُتے چڑھ سکدا سی ، تے ساڈی مکتی نوں پورا کرن لئی مرن لئی اپنا لہو وگا سکدا سی ۔
یِسُوعؔ نوں سولی چاھڑیا گیا سی ایس لئی پئی اوہنے سارے جگ دیاں پاپاں نوں قبول کیتا سی جد اوہنے یوحنا بپتسمہ دین والے دے راہیں بپتسمہ لیا سی ۔ پر اوہدے بپتسمے لئی ، اوہ ساڈیاں پاپاں نوں کویں چُک سکدا سی ؟
خُدا باپ دی مرضی نوں پورا کرن لئی اوہ کنہوں سولی اُتے لمکا سکدا سی ؟ جے یِسُوعؔ مسیح نے پہلوں ای بپتسمہ لے کے ساڈیاں پاپاں نوں قبول نئیں کیتا سی ، دوجیاں اکھراں وچ ، او ہ فیر سولی اُتے کویں مر سکدا سی ؟ کیہ اِنج نئیں ہیگا؟جے یِسُوعؔ مسیح نوں یوحنا بپتسمہ دین والے نے بپتسمہ نا دِتا ہوندا ، تاں تہاڈے سارے پاپ ہُن وی تہاڈے دل وچ قیم رہندے ۔ جے یِسُوعؔ مسیح دے بدن نے جگ دیاں پاپاں نوں قبول نئیں کیتا سی تاں فیر ساڈے بدلے سولی اُتے اوہدے مرن دا کیہ سبب سی ؟
سوال جیہڑےپانی تےرُوح دی خوشخبری نوں نا جانن دے سبب اُٹھدے نیں
کُجھ لوک نیں جیہڑے پُچھدے نیں ، ”جے ایہہ سچ ہیگا اے پئی یِسُوعؔ نے بپتسمہ لے کے ساڈیاں ساریاں پاپاں نوں چُک لیا سی ، تاں ایہدا مطلب ہیگا اے پئی یِسُوعؔ اپنے بدن اُتے پاپ رکھدا سی ،تے جے اِنج اے ، تاں ایہہ پاپی یِسُوعؔ پاپیاں دامکتی داتا کویں بن سکدا اے ؟ “
ایہہ اِ ک مایوس کرن والا سوال اے جیہڑا پانی تےرُوح دی خوشخبری نوں بالکل نا جانن توں پیدا ہوندا اے ۔ ایہہ اوہدے بدن اُتے سی پئی یِسُوعؔ نے لوکاں دیاں پاپاں نوں چُک لیا جد اوہنے بپتسمہ لیا سی ۔ اوہنے ، دوجیاں اکھراں وچ، جگ دیاں پاپاں نوں اپنی رُوح اُتے نئیں چُکیا سی ۔ بپتسمہ یافتہ یِسُوعؔ دی خُدائی زندگی بالکل پا ک رہی ۔ اوہنے صرف اپنے بدن دا بپتسمہ لیا سی ، تے ایس لئی اوہنے جگ دیاں پاپاں نوں صرف اپنے بدن اُتے چُکیا سی ۔ ایہہ ایس لئی سی پئی یِسُوعؔ نوں یوحنا بپتسمہ دین والے نے بپتسمہ دِتا سی پئی اوہ سولی اُتے چڑھایا جا سکدا سی تےساریاں پاپاں لئی قصور وار ٹھہرایا جا سکدا سی ، اپنا لہو وگا سکدا سی تے سولی اُتے مر سکدا سی ۔ یِسُوعؔ آپ ایس جگ وچ کوئی پاپ نئیں کِیتا سی (۲- کرنتھیوں ۵: ۲۱)۔ پر کیوں جو یِسُوعؔ مسیح نے یوحنا بپتسمہ دین والے دے راہیں بپتسمہ لے کے جگ دیاں پاپاں نوں اپنے اُتے چُک لیا ، جگ دے ایہہ پاپ اوہدے اپنے بدن اُتے رکھے گئے سن ۔ جے اِنج نا ہوندا تاں یِسُوعؔ مسیح کدی ساڈا مکتی داتا نئیں بن سکدا سی ۔
مَیں اصل وچ ایہو جیہاں بےعقلے لوکاں نوں دسنا چاؤہندا ہاں پئی یِسُوعؔ نے سولی اُتے جگ دیاں پاپاں دا بھار نئیں چُکیا سی ۔ مَیں تہانوں فیر ایہہ آکھدا ہاں : ”ایہہ پئی یِسُوعؔ سولی اُتے مویا ایس لئی پئی اوہنے جگ دیاں پاپاں نوں اپنے اُتے چُک لیا سی جد اوہنے یردن دے دریا وچ یوحنا بپتسمہ دین والے کولوں بپتسمہ لیا سی ۔“جے ایہہ سچ نئیں ہیگا ، تاں فیر یِسُوعؔ لئی جگ دیاں پاپاں نوں اپنے اُتے چُکن دا کوئی دوجا ویلا نا ہوندا ۔ بھاویں یِسُوعؔ ساریاں پاپیاں دا قربانی دا برّہ بن گیا ، مُڈھلے طور اُتے ، اوہ اپنے دل وچ کوئی پاپ نئیں رکھدا سی ۔ اِنج نئیں ہیگا پئی یِسُوعؔ اپنے جمن ویلے توں ای پاپ رکھدا سی ، سگوں ، یوحنا بپتسمہ دین والے دے راہیں بپتسمہ لے کے ، اوہنے جگ دیاں پاپاں نوں قبول کیتا جیہڑے اوہدے بدن اُتے لدے گئے سن ۔ ایس لئی یِسُوعؔ جگ دیاں ساریاں پاپاں لئی شریعی قربانی بن گیا ۔ دوجیاں اکھراں وچ ، ایس لئی پئی یِسُوعؔ نے بپتسمہ لے کے لوکاں دیاں پاپاں نوں چُک لیا سی ، ایہدے بعدوں اوہنوں اپنا لہو وگاؤنا پیا ، تے سولی اُتے مرنا پیا ۔ اخیریں ، اوہ فیر مویاں وچوں جیوں پیا ، تے ایس طرح ساڈا اصلی مکتی داتا بن گیا ۔ اِنج کر کے ، اوہنے پاپ دی ساری سزا جری ۔ سو ، پانی تےرُوح دی خوشخبری اُتے ایمان رکھن والے عقیدے نال ، جے تُسی اپنے دل وچ ہُن وی پاپ رکھدے او تاں تہانوں لازمی اپنے ساریاں پاپاں توں مکتی یافتہ ہونا چاہی دا اے ۔
بد عُنوان مسیحیت دی تاریخ
مُڈھلے کلیسیائی زمانے وچ ، ایہہ یِسُوعؔ دے بپتسمے تےاوہدے صلیبی لہو اُتے ایمان رکھن نال سی پئی پَولُس تے پطرس ورگےرسول تے مُڈھلے پاک لوک وی رُوحانی کاہن بن سکدے سن تے کم کر سکدے سن ۔ تاریخی طریقے نال ویکھیا جائے تاں ، مُڈھلے کلیسیائی زمانے تے کلیسیائی فادراں دےزمانے دے لنگھن دے بعدوں ، پانی تےرُوح دی خوشخبری دی سچیائی بد عُنوان ہونا شروع ہوگئی تے ۳۱۳ مسیحی ورہے وچ میلان دے فرمان نے ایس طرح دے زوال پذیر عمل نوں تیز کردِتا ۔ میرا یقین اے پئی اَج ایسے بدعُنوانی نال مسیحی پاپی ودھے نیں ۔ اودوں توں، صرف ناں دے مسیحیاں دی اِک وڈی بھیِڑ جمی ، تے اوہناں نیں صرف سولی والے لہو اُتے ای ایمان رکھدیاں ہویاں پاپاں دی معافی پاؤن دا دعویٰ کیتا ۔ اودوں توں لے کے ہُن تیکر ، اسمانی، ارغوانی تےلال رنگ دے دھاگے وچ ظاہر ہون والی خوشخبری دی گواہی نئیں دِتی گئی سگوں ایہہ لُکی رہی ۔ ایہہ اِک پریشان کرن والی سچیائی اے ، پئی بوہت سارے مسیحی پاپی ظاہر ہوئے جیہڑے مسیحیت نوں صرف ایس جگ دا دین سمجھدے نیں۔
جد اسی اَج دیاں مسیحیاں دا اوس عقیدے دے مطابق انصاف کردے آں جنہے سانوں رُوحانی کاہن بنن دے لائق بنایااے، تاں اسی ویکھ سکدے آں پئی اوہناں وچوں بوہت ساریاں لوکاں نیں ایس مکتی نوں غلط سمجھیا تے غلط ترجمہ کڈھیا جیہڑی اوہناں نوں پاپاں دی معافی پاؤن دی اجازت دیندی اے ۔ اسی ویکھ سکدے آں پئی اَج دی مسیحیت دیاں ساریاں فِرقیاں دے ایمان دا ہر بیان اِک دوجے نال بوہت رَلد مِلدا اے ۔ اوہ صرف اپنیاں فِرقیاں دے ناواں وچ ای فرق نیں ؛ جد اوہناں دیاں عقیدیاں دی گل ہوندی اے ، تاں اوہ سارے سوچدے نیں پئی اوہ صرف سولی والے لہو اُتے ایمان رکھ کے پاپ توں مکتی پا چُکے نیں ۔ پر اوہناں دے دل سچ مُچ پاپاں توں معاف نئیں ہوئے ۔ ایتھوں تیکر پئی جد اوہ پانی تےرُوح دے بارے خُدا دی خوشخبری نوں نئیں جان دے ، تاں وی اوہ اپنے آپ نوں چنگے مسیحی سمجھدے نیں۔ اسی ویکھ سکدے آں پئی بھاویں ایہہ لوک یِسُوعؔ نوں اپنے مکتی داتا وانگر من دے تے سولی دے لہو اُتے ایمان رکھدے نیں ، پر اوہ ہُن وی صرف اپنیاں توبہ دیاں دُعاواں کردے نیں ، ایس لئی پئی اوہ حالے تیکر ایس سچیائی نوں نئیں جان دے جیہڑی اوہناں نوں اوہناں دیاں ساریاں پاپاں نوں دھون دے لائق بناؤندی اے ۔ دوجیاں اکھراں وچ ، اوہ ایہو جیہے لوک نیں جیہڑے اپنیاں پاپاں نوں دھون دی کوشش کردے نیں بھاویں اوہ پانی تےرُوح دی خوشخبری دی طاقت نوں نئیں جان دے ۔
ایہو ای سبب اے پئی ہُن اسی پانی تےرُوح دی ایس سچی خوشخبری نوں اِک واری فیر سارے جگ دیاں ساریاں لوکاں تیکر ودھاؤندے پئے آں ۔ ایس لئی پئی سارے جگ وچ لوک بپتسمہ نوں نئیں جان دے جیہڑا یِسُوعؔ نے یوحنا بپتسمہ دین والے کولوں لیا سی ، اسی من دے آں پئی سانوں لازمی پانی تےرُوح دی خوشخبری دی منادی کرنی چاہی دی اے جیہڑی خیمۂ اِجتماع دیاں شیواں وانگر ورتے جان والے اسمانی ارغوانی تے لال رنگ دے دھاگےوچ ظاہر ہوندی اے ۔ اسی سارے ایس سار ے جگ دیاں لوکاں تیکر منادی کردے پئے آں ایس لئی پئی یِسُوعؔ نے یوحنا بپتسمہ دین والے دے راہیں بپتسمہ لے کے جگ دیاں پاپاں نوں چُکیا سی ، اوہنے سولی چڑھ کے تے مرن دے راہیں پاپ دی ساری سزا جری ۔ اسی اوہناں لوکاں دے قرضدار آں جیہڑے پانی تےرُوح دی خوشخبری نوں نئیں جان دے پئی ایس خوشخبری نوں اوہناں تیکر اَپڑا دیئیے۔ ایس لئی اسی اوہناں نوں ایہہ سچی خوشخبری سُناؤن دا موقع دین دی لوڑ نوں سمجھدے آں تاں پئی اوہ ایمان رکھ سکن ۔
کُجھ مُلکاں وچ ، مسیحی عقیدے دی تاریخ ۱,000 یا ایتھوں تیکر پئی ۲,000 سال پرانی اے ۔ پر ایہہ واضح ہیگا اے پئی بوہتے مسیحی حالے تیکر پانی تےرُوح دی خوشخبری دے بارے وچ خاص تعلیم نئیں رکھدے ۔ جد اسی خیمۂ اِجتماع وچ ظاہر ہون والی خوشخبری دی سچیائی دے مطابق اوہناں دا انصاف کردے آں ، تاں بوہت سارے لوک ایہو جیہے نیں جنہاں نوں یِسُوعؔ نوں دوبارہ مکتی داتا وانگر مننا چاہی دا اے ۔ مَیں ایتھے جیہڑی گل آکھن دی کوشش کر دا پیاہاں اوہ ایہہ ہیگی اے پئی بھاویں اوہ یِسُوعؔ اُتے کِنے ای چر توں ایمان رکھدے ہون، جےاوہ حالے تیکر پاپاں دی معافی پا نئیں چُکے ، تاں سانوں اوہناں دی دوبارہ یِسُوعؔ اُتے ٹھیک طریقے نال ایمان رکھن وچ اگوائی کرنی چاہی دی اے ۔ سانوں اوہناں نوں پانی تے رُوح دی خوشخبری بوہت چھیتی سکھاؤنی ہوئے گی ۔ پَولُس رسول دا وی ساڈے وانگر ای ذہن سی ، اوہ آکھدا اے ، ”جے خُوشخبری سُناواں تے میرا کوئی فخر نئیں کیوں جوایہہ تے میرے لئی ضرُوری گل اے ۔ سگوں میرےاُتے افسوس اے جے خُوشخبری نا سُناواں“(۱- کرنتھیوں ۹ :۱۶)۔
یِسُوعؔ خُدا اے جیہڑا ساریاں پاپیاں نوں بچاؤن لئی انسانی بدن وچ آیا
کُجھ لوک ، بھاویں اوہ ایمان رکھدے نیں پئی یِسُوعؔ خُدا دا پُتر تے اوہناں دا مکتی داتا اے ، پر ایہہ نئیں من دے پئی یِسُوعؔ خُدا اے ۔ اوہ ارغوانی رنگ دے دھاگے دی مسیح دے خدمت اُتے ایمان نئیں رکھدے ۔ ایہہ لوک اصل وچ فنا ہو جان گے ، ایس لئی پئی اوہناں دیاں دلاں وچ اوہ ایمان نئیں ہیگا جیہڑا اسمانی، ارغوانی تےلال رنگ دے دھاگےتےمہین وٹے ہوئے کتان وچ ظاہر ہون والی سچیائی اُتے ایمان رکھدا اے تے ایس سببوں پاپاں دی معافی نئیں پا چُکے ۔ جیہڑے لوک اپنیاں دلاں وچ ایہہ ایمان نئیں رکھدے پئی خُداوند نے اوہناں دے سارے پاپ مُکا دِتے نیں اوہناں دیاں دلاں وچ پاک رُوح نئیں ہیگا ایس لئی پئی اوہناں کول اوہ کلام نئیں ہیگا جیہڑا اوہناں دیاں پاپاں دے دھون دی گواہی دیندااے ۔
جد اسی یِسُوعؔ نوں اپنے ”خُداوند“وانگر پکاردے آں ، تاں ایتھے اکھر”خُداوند“دا مطلب اُستاد اے ، جیہڑا ایس گل دی نشانی اے پئی اسی ایمان رکھدے آں پئی یِسُوعؔ آپ خُدااے ۔ ایہہ خُدادا پُتر سچا خُداوی اے ۔ ایہدی وضاحت لئی ، مَیں بوہتی واری ہیٹھاں لکھی ہوئی مثال ورتدا ہاں۔ جد انسان حاملہ ہوندا اے تاں اوہ دوجے انسان نوں جمدا اے ۔جد کُتے جمدے نیں تاں اوہ کُتے نوں جمدے نیں ۔ پرندےپرندیاں نوں جم دے نیں ۔ دوجیاں اکھراں وچ، جویں وکھ وکھ قِسماں تے نسلاں نیں ، ایسے طرح خُداباپ نے اِکلے پُتر نوں پیدا کیتا اے ، تے اوہ خُدا وی اے (زبور ۲ :۷)۔ اوہ اصل وچ اپنی طاقت وچ آپ خُدا دے برابر اے (فلپیوں ۲:۶)، پر اوہنے اپنے آپ نوں خالی کر دتا تے ساڈے بندیاں وانگر بن گیا ۔ سانوں پاپ توں بچاؤن لئی ، اوہ ایس زمین اُتے آیا ، بپتسمہ لیا، سولی اُتے مرگیا ، دوبارہ مویاں وچوں جیوں پیا ، تے ،ساڈے سچے مکتی داتا وانگر ، ایس طرح سانوں مکتی دا سچا ایمان دِتا اے ۔
پر، بوہت سارے لوک نیں جیہڑے مکر دے نیں پئی یِسُوعؔ خُدا اے ۔ سکولاں وچ ، اوہ سرِ عام سکھاؤندے نیں پئی یِسُوعؔ اوہناں چار بزرگاں وچوں اِک اے جیہڑے پرانے زمانے وچ ظاہر ہوئے سن ۔ ایس طرح دے خیال دا شروع ہونا ایتھوں تیکر پئی کلیسیا دیاں فادراں توں ہوندا اے ۔ بھاویں اوہناں نیں سچی خوشخبری اپنیاں اگیترے ایمان والیاں توں سُنی ،سگوں اوہنا ں وچوں کئیاں دا ایمان ایناں پکا سی پئی اوہناں نیں شہادت قبول کر کے اپنے ایمان دا قرار کیتا ، پر دوجیاں نیں یِسُوعؔ دے خُدا ہون دا انکار کیتا ۔ کُجھ کلیسیا دیاں فادراں نیں ایتھوں تیکر پئی کتاباں وچ لکھیاں جنہاں وچ ایہہ دعویٰ کیتا گیا پئی یِسُوعؔ خُدا دا پُتر اے پر آپ خُدا نئیں ہیگا ۔
تھوڑا چرپہلوں ای، بوہت ساریاں خُدائی تعلیم دیاں اُستاداں نیں بوہتیاں دیناں دی حمایت شروع کر دتی اے ۔ اوہناں دے دعوے ایہہ نیں پئی لوک پاپ توں بچ سکدے نیں تے اسمان اُتے جا سکدے نیں بھاویں اوہ مسیحیت توں علاوہ وکھ وکھ دیناں نوں من دے ہون ۔ کیتھولک دین پہلا اے جنہے بندیاں نال رَل کے ایس طر ح دے عقیدے دا اعلان کیتا ۔ ایہناں صرف ناں دیاں مسیحیاں دے ایس طرح دے خیال دی حمایت کرن دا سبب ایہہ ہیگا اے پئی اوہ آپ ایہہ ایمان نئیں رکھدے پئی یِسُوعؔ آپ خُدا تے جگ دابناؤن والا اے ۔ اوہ اوس اُتے ایمان رکھنا چاؤہندے نیں جویں پئی کلام آکھدا اے ، پر اوہ ایس سچے ایمان نوں ایہو جیہی جھوٹی تعلیم اُتے پکا نئیں کر سکدے ۔ اوہ بے عقلےنیں جنہاں نیں اپنے گھر ریت اُتے بنائے نیں (متی ۷: ۲۶)۔ اوہ دوجیاں دیناں توں سارا کُجھ سِکھنا پسند کردے نیں ۔ مثال طور اُتے ، کُجھ باہر دے مُلکاں دے گرجے ہفتے وچ اِک واری بد ھ مت دے مراقبہ دیاں پروگراماں دی مشق کردے پئے نیں ۔ بندیاں دے خیال مطابق ، ایہو جیہا پروگرام سوہنا تے بوہت ترقی پسند لگدا اے ۔ پر جیہڑا کوئی ایہہ ایمان نئیں رکھدا پئی یِسُوعؔ آپ خُدا اے اوہ پاپ توں نئیں بچ سکدا ۔
تُسی کیہو جیہے او؟ تُسی کِنج دا ایمان رکھدے او؟ پیدائش ۱: ۱-۳ دسدااے،”خُدا نے شروع وِچ دھرتی تے آسمان نوں پَیدا کیِتا۔تےدھرتی اُجاڑتےسُنجی سی تے ڈوہنگھیائی اُتےہنیرا سی تےخُدا دی رُوح پانی دی سطح اُتے ہِل دی سی۔تےخُدا نے آکھیا پئیی چانن ہو جا تے چانن ہو گیا۔“خُدا نے شروع وچ اپنے کلام دے راہیں اسماناں تے دھرتی نوں بنایا ، کلام شروع توں ہیگا اے تے ایہہ کلام آپ خُدا اے۔ سو، جگ یِسُوعؔ مسیح ، کلام دے بدن لین دے راہیں بنیا سی ۔ (۱- یوحنا ۱:۱، یوحنا ۱: ۱۰)۔ایہدا مطلب اےپئی یِسُوعؔ مسیح کوئی ہور نئیں سگوں آپ خُدا ، کلام دا خُدا اے ۔ یِسُوعؔ مسیح بناؤن والا اےجنہے ایس جگ نوں بنایا تے مکتی داتا جیہڑا سانوں بچاؤن لئی ایس زمین اُتے آیا سی ۔ ساڈے لئی صرف ایہہ ایمان رکھنا ٹھیک ہیگا اے پئی ایہہ یِسُوعؔ مسیح ای خُدا اے جیہڑا اسمان دے جلال دے تخت نوں چھڈ کے آپ ای اِک بندے دے بدن وچ ایس زمین اُتے آیا ۔
اپنیاں خادماں دے راہیں ، خُدا نے آپ مسیحا دے آؤن بارے پیشین گوئی کیتی سی ، تے ایہناں پیشین گوئیاں دے مطابق مکتی داتا کواری مریم دے بدن وچوں جمیا تے اِک بندے دے بدن وچ جمیا ۔ یعنی، جیہڑااِک انسانی بدن دے ٹِہڈھ وِچ پیا تے جمیا سی اوہ آپ خُدا اے ۔ تے جد اوہ ۳۰ ورہیاں دا ہویا ۔ اسمانی وڈے کاہن دے وانگر ، اوہنے بپتسمہ لے کے ساڈیاں ساریاں پاپاں تے ساریاں لوکاں دیاں پاپاں نوں اپنے بدن اُتے چُک لیا ۔ ایہدے بعدوں اوہ سولی اُتے مرگیا ، مویاں وچوں جیوں پیا ، تے ایس طرح اوہنے سانوں ساڈیاں ساریاں پاپاں توں کامل طریقے نال بچایا ۔ یِسُوعؔ ، دوجیاں اکھراں وِچ ، ساڈا سچا تے سدا دا مکتی داتا بن گیا اے ۔
اپنی مُڈھلی طاقت وچ ، یِسُوعؔ آپ خُدا اے جیہڑا خُدا باپ دے برابر اے ۔ ساڈے لئی ، ایہہ یِسُوعؔ جیہڑا مُڈھلےطوراُتے خُدا باپ دے برابر اے اوہو ای خُدا اے ۔ یِسُوعؔ مسیح داباپ وی ساڈے لئی خُدا اے ، تے آپ یِسُوعؔ مسیح و ی اے ۔ کیوں ؟ ایس لئی پئی جگ اوہدے راہیں بنایا گیا سی ، تے اوہدے راہیں ای اسی بندیاں وانگر جمے ساں ۔خُدا نے پیدائش ۱ :۲۶ وچ آ کھیا، ’’اسی انسان نُوں اپنےروپ وانگر اپنی شکل وانگر بنائیے۔“جد خُدا نے بندے نوں اپنے روپ وانگر بنایا تاں یِسُوعؔ مسیح اوتھے ہیگا سی ۔ اوہو ای اےجنہے سانوں بنایا۔ اوہو ای اے جنہے سانوں بنایا تے اوہو ای اے جنہے سانوں پاپ توں بچایا ۔ یِسُوعؔ مسیح جیہڑا سانوں بچاؤن لئی آیا اوہ ساڈا سچا مکتی داتا اے ۔ ایس لئی پئی یِسُوعؔ مسیح نے سانوں مکتی دتی اے ، تے ایس پئی اوہ آپ خُدا وی اے ، اسی اوہنوں اپنی مکتی دا خُداوند من دے آں ۔ ایس طرح ، تہانوں تے مینوں ہُن اپنیاں گُنجلاں وچ نئیں گواچنا چاہی دا اے ، سگوں اپنیاں دلاں وچ سانوں لازمی خُداوند خُدا اُتے ایمان رکھنا چاہی دا اے جیہڑا پانی تے رُوح دی خوشخبری دے راہیں مکتی داتا بن کےآیا ۔
ایہو جیہے لوک و ی نیں جیہڑے ایس گل بارے بحث کردے رہندے نیں پئی اوہ خُدا دے نیانے نیں ایتھوں تیکر اوہناں دے دل پاپ نا ل بھرے رہندے نیں ۔ کیہ اوہ سچ مُچ خُدا دے لوک ہو سکدے نیں ایتھوں تیکر پئی جد اوہناں دیاں دلاں وچ پاپ ہوئے ؟ کیہ اوہ اسمان اُتے جاسکدے نیں فیر وی جد اوہناں دے دل پاپی رہن ؟ بالکل نئیں ! ایس توں کوئی فرق نئیں پیندا پئی اوہ مسیحی نیں یا نئیں ؛ جے اوہناں نیں پانی تے رُوح دی خوشخبری نوں نا جانن دے سبب پاپاں دی معافی نئیں پائی اے ، تاں اوہناں وچوں کوئی وی اسمان اُتے جانئیں سکدا ۔ فیر وی ایس سارے جگ وچ مسیحیاں بھراواں وچ ، بوہت سارے لوک نیں جیہڑے ایس طرح دا ایمان رکھدے نیں ۔
فیر ایہو جیہے لوکاں تیکر پانی تے رُوح دی ٹھیک تے سچی خوشخبری کِنہوں اَپڑاؤنی چاہی دی اے ؟ سانوں — یعنی ، تہانوں تے مینوں —اوہناں لئی سچا انصاف کرنا چاہی دا اے تے اوہناں تیکر پانی تے رُوح دی خوشخبری دی سچیائی دی منادی کرنی چاہی دی اے ۔ خیمۂ اِجتماع وچ ظاہر ہون والی خوشخبری ایس طرح دی سچیائی نئیں ہیگی جیہدی صرف اِک یا دو واری منادی کیتی جائے تے فیر ساری دی ساری ردّکر دِتی جائے ۔ ایہہ اصل مکتی دی سچیائی اے جنہوں ساڈے خُداوند دے واپس آؤن تیکر ودھاندے رہنا چاہی دا اے ۔
کیہ تُسی پانی تے رُوح دی ایس خوشخبری نوں جان دے او جیہڑی تہانوں پاپاں دی معافی پاؤن دے لائق بناؤندی اے ؟ جے لوک پاپ رکھدے نیں تاں اوہ خُدا دے پُتر نئیں ہیگے ۔ اوہناں نوں لازمی ایمان رکھنا چاہی دا اے جیہڑا مکتی دی خوشخبری دی سچیائی اُتے یقین رکھدا اے جیہڑی اسمانی، ارغوانی تےلال رنگ دے دھاگے وچ ظاہر ہوندی اے جیہڑے خیمۂ اِجتماع لئی ایہدیاں شیواں وانگر ورتے جاندے نیں ۔ سانوں لازمی پانی تے رُوح دی خوشخبری نوں جگ دیاں حداں تیکر ودھاؤنا چاہی دا اے ۔ کیہ اسی پانی تے رُوح دی خوشخبری سُناؤن توں بوہت شرماؤندے آں؟ پرانیاں زمانیاں وچ ، جد خُدا نے اپنیاں خادماں نوں آکھیا ، ”باہر جاؤ تے نبوّت کردے رہوو“ فیر اوہ اِنج کردے رہے ، تے جد خُدا نے یسعیاہ نوں آکھیا ، ”ننگا ہو کے نبوّت کرے“، تاں اوہ پِھریا تےننگا ہو کے نبوّت کیتی (یسعیاہ ۲۰ : ۲۔۵)۔صرف جد اسی پانی تے رُوح دی خوشخبری دی منادی ساریاں لوکاں دے اگے کردے آں جویں پئی ایہہ خیمۂ اِجتماع وچ ظاہر ہوندی اے فیر ای اوہ خُدا دے غصے توں بچ سکدے نیں ۔ ایس لئی سانوں لازمی خوشخبری ودھاؤندے رہنا چاہی دا اے ۔
تُسی کویں او ؟ کیہ تُسی اپنے دل وچ سچ مُچ ایمان دا کلام رکھدے او جیہڑا تہانوں سچی مکتی دِلواؤندا اے؟ جد سارے جگ دیاں لوکاں کول پاپاں دی معافی دا کلام نئیں ہیگا تے فیر وی اوہ شیطان نال میل جول رکھدے نیں ، تاں تُسی کویں چُپ کر کے بہہ سکدے او تے کُجھ نئیں کر سکدے ؟ تُسی صرف نکمے نئیں بہہ سکدے۔ سارے جگ وچ ساڈے بوہت سارے حصے دار نیں ۔ اوہ صاف طریقے نال پاپاں دی معافی دی خوشخبری ، پانی تے رُوح دی خوشخبری اُتے ایمان رکھدے نیں ۔ اوہناں وچوں کئیاں نیں ساڈے اگے منیا اے پئی جد اوہناں نیں اپنیاں نال دیاں نوں پانی تے رُوح دی خوشخبری سُنائی تاں اوہناں نوں ستایا گیا ۔ اوہناں نیں پانی تے رُوح دی خوشخبری دے مخالفاں دے خلاف ایہہ آکھدیاں ہویاں بہادری دا مظاہرہ کیتا ، ”تُسی خُدا دے لوک نئیں ہیگے ایس لئی پئی تہاڈیاں دلاں وچ ہُن وی پاپ اے ۔ تُسی پانی تے رُوح دی خوشخبری اُتے اپنے گھٹ ایمان تے اپنیاں گندیاں پاپاں دے سببوں دوزخ ول جاندے پئے او ۔ ہُن مَیں تہانوں ’بھرا‘ نئیں آکھ سکدا ، بھاویں تُسی مینوں ’بھرا‘آکھدے او ، ایس لئی پئی مَیں ہُن تہاڈے ورگا پاپی نئیں ہیگا۔“
اسی کدی وی اوہناں دی اگوائی نئیں کیتی پئی ایس طرح کم کرن ، سگوں پاک رُوح اوہناں دی اگوائی کردا اے پئی اوہ کیہ کرن ۔ تہانوں ڈرن دی لوڑ نئیں ہیگی ، ایس لئی پئی تہاڈیاں دلاں وچ پانی تے رُوح دی خوشخبری ہیگی اے جیہڑی اوہ معیاربناؤندی اے جیہدے مطابق تُسی دوجیاں دا انصاف کرن دے لائق ہوندے او ۔ دوجیاں دیاں پاپاں دی معافی نوں ٹھیک طریقے نال سمجھن دا ایہہ گُن تہانوں مِلیا اے ایس لئی پئی تُسی سچیائی دی خوشخبری اُتے ایمان رکھدے او جیہڑی خاص کر کے خیمۂ اِجتماع وچ ظاہر ہوندی اے ۔ سانوں لازمی سچیائی اُتے ایمان نال خُدا دے اگے کھلونا چاہی دا اے پئی اسمانی، ارغوانی تےلال رنگ دیاں ایہناں تِناں دھاگیاں نال ، خُداوند نے سانوں ساڈیاں ساریاں پاپاں توں بچایا اے تے سانوں راستباز بنایا اے ۔
آؤ مکتی دی ٹھیک کاچھ کرن والی سوٹی نوں ورتئے
اسی خُدا دے کلام نوں ’کینن‘آکھدے آں ۔ اکھر’کینن‘ عبرانی مطلب وچ qaneh تے یونانی مطلب وچ kanon توں لیا گیا اے، ایہہ دوویں اِک کچھن والی سوٹی بارے دسدے نیں ۔ جد سانوں کسے شے دی کاچھ کرن دی لوڑ ہوندی اے ، تاں سانوں ایہنوں ٹھیک طریقے نال کچھن لئی اِک فیتا یا کچھن والی سوٹی نوں ورتنا پیندا اے ۔ ایس طرح ، جد سانوں کسے دی رُوحانی حیثیت داپتہ کرن دی لوڑ ہوندی اے ، یعنی ، ایہہ پئی کوئی بندہ نویں سریوں جمیا اے یا نئیں ، تاں سانوں اسمانی، ارغوانی تےلال رنگ دے دھاگے تےمہین وٹے ہوئے کتان دی کچھن والی سوٹی نال ایس بندے دی پرکھ کرنی ہوئے گی ۔ جویں اِک درزی اپنے فیتے نوں اپنیاں گاہکاں دے سائز دی کاچھ کرن لئی ورتدا اے ، سانوں لازمی ایہہ پرکھ کرنی چاہی دی اے پئی کیہ اوہ بندہ سچ مُچ پاپ توں مکتی یافتہ ہیگا اے یا نئیں ۔ اِنج کرن دا طریقہ اسمانی، ارغوانی تےلال رنگ دے دھاگےتےمہین وٹے ہوئے کتان توں ظاہر ہون والی سچیائی دے نال اے ۔ خُدا دے ایس کلام دے مطابق ، دوجیاں اکھراں وچ ، سانوں اوس بندے دے ایمان دے ہر حصے نوں چُننا چاہی دا اے تے صاف طریقے نال ایہہ فرق کرنا چاہی دا اے پئی کیہ ایہدے معیار توں ہیٹھاں اے یا کیہ ایس توں بوہتا اے ۔
خاص کر کے ، سانوں اسمانی، ارغوانی تےلال رنگ دے دھاگے، یعنی پانی تے رُوح دی خوشخبری دی کاچھ کرن والی سوٹی نال اپنے ایمان دا چنگی طرح جانچ کرن دی ضرورت اے ۔ جے کوئی صرف ارغوانی تے لال رنگ دے دھاگے دے یِسُوعؔ اُتے ایمان رکھدا اے ، تاں اوہناں دی مکتی اوہدی کلیسیا دے شاہی کاہناں وانگر خُدا توں منظور نئیں ہو سکدی ۔ جیہڑا وی اپنیاں پاپاں توں معافی پاؤنا چاؤہندا اے اوہنوں اسمانی، ارغوانی تےلال رنگ دے دھاگے وچ ظاہر ہون والی مکتی دی ساری سچیائی اُتے ایمان رکھنا چاہی دا اے ۔ سانوں ساریاں نوں ایمان رکھنا چاہی دا اے پئی یِسُوعؔ سارے جگ نوں پاپ توں بچاؤن لئی ایس زمین اُتے آیا ، بپتسمہ لے کے ساڈے سارے پاپ چُک لَئے ، سولی اُتے مرگیا ، دوجی واری مویاں وچوں جیوں پیا، تے ایس طرح ساڈا سچا مکتی داتا بن گیا اے ۔ ساڈے ساریاں کول سچے انصاف دا ایہہ معیار ہونا چاہی دا اے ۔ ایہہ خُدا دے کلام نال اے تاں پئی اسی فیصلہ کر سکیے پئی لوک پاپی نیں یا راستباز ۔ اسی اپنی تعلیم تے جذبیاں مطابق بے ارادہ طریقے نال اِنج نئیں کرسکدے ۔ ایہہ کم رُوحانی کاہناں لئی ضروری اے پئی اوہ اپنیاں لوکاں لئی خطا دی قربانی دین دے اپنے کم نوں پورا کرن ۔
ہُن ایس زمانے وچ ، تہانوں تے مینوں جگ دیاں ساریاں لوکاں داایہو جیہے ٹھیک معیار نال انصاف کرنا چاہی دا اے۔ اِکو ای معیار ساریاں لئی ، ساڈیاں نیانیاں ، زنانیاں ، گھروالیاں ،ماپیاں ، سوہریاں تے نیانیاں دیاں نیانیاں اُتے اِکو جیہا لاگُو ہوندا اے ۔ سانوں لازمی خُدا دے کلام نال دوجیاں دے ایمان نوں پچھاننا چاہی دا اے ۔ جیہڑے لوک کاہن بن گئے نیں اوہناں نوں لازمی ہر کسے دے دل وچ انصاف دی کاچھ دی سوٹی رکھنی چاہی دی اے ۔ ”کیہ تُسی یِسُوعؔ دے اسمانی، ارغوانی تےلال رنگ دے دھاگےتےمہین وٹے ہوئے کتان دی سچیائی نوں جان دے تے من دے او ؟ جے تُسی ایس طرح ایمان رکھدے او ، فیر تُسی مکتی یافتہ او ، پر جے نئیں ، تاں تُسی مکتی یافتہ نئیں ہیگے۔“ ایس طرح اِک صاف انصاف پیش کرنا ساڈے لئی ٹھیک کم اے ۔
جے ایس توں پہلوں وڈے کاہن نے ایہو ای کیتا سی ، تاں فیر تُسی تے مَیں جیہڑے اَج دےرُوحانی کاہن بن گئے آں ، سانوں وی ایہہ کم بِنا کسے ناکامی دے کرنا چاہی دااے ۔ جے اسی اوہ نئیں کردے جیہڑا سانوں اوہدیاں کاہناں وانگر کرنا اے ، تاں اسی کدی وی خُدا ولوں جھِڑکاں پین توں بچ نئیں سکدے ۔ کُجھ لوک آکھدے نیں ، ”ایہہ کسے اگے منادی کرن دا طریقہ نئیں ہیگا ۔ ایس طرح تُسی منادی کردے او ! جے اسی سارے تہاڈے وانگر لوکاں اگے منادی کردے تاں کیہڑا کدی یِسُوعؔ اُتے ایمان لیائےگا ؟“
تھیالوجی وچ ، اِک تربیتی کورس اے جنہوں ’دی آرٹ آف ایوینجیلزم‘ آکھیا جاندا اے ۔ ایہہ منادی کرن لئی اگوائی کرن دا طریقہ دسدا اے ۔ اِک واری ، ایس ادارے وچ ہر مناد دیاں بُلاں اُتے مطلب ’بیلیا ں والی بشارت ‘ دا جملہ سی ۔ ایہدے پِچھے چلن والے ہُن وی سکھاؤندے نیں پئی جد اسی لوکاں اگے منادی کرن دی کوشش کردے آں ، تاں سانوں پہلوں اوہناں نوں بیلی بناؤنا چاہی دا اے تے فیر ہولی ہولی اوہناں نوں گرجے ول لَے جانا چاہی دا اے ۔ اوہ ٹھیک آکھدے نیں ۔ اوہ ایہہ وی آکھدے نیں پئی جد اوہ بندہ اوہناں دیاں منادی کرن دیاں کوششاں نال نال یِسُوعؔ اُتے ایمان رکھن دا فیصلہ کردا اے ، تاں اوہ اوس بندے نوں یِسُوعؔ نوں پاؤن دی صرف ناں دی دُعا کرن بارے مجبور کردےنیں ، تاں پئی مسیح اوس بندے دے دل وچ آجائے تے اوہ مکتی پا جائے ۔
پر ایس دلی خیال دا اخیری نتیجہ کیہ اے ؟ کیہ فیر ایس طرح دے نویں دین تبدیل کرن والیاں دے دلوں پاپ مُک جاندے نیں ؟ ایہو جیہی گل نئیں ہیگی ۔اوہ گرجے جاندے نیں ، پر اوہ فیر وی پاپ رکھدے نیں — دوجیاں اکھراں وچ ، نویں دین تبدیل کرن والے صرف مسیحیت دے دوجے دینی پیشہ ور بن گئے نیں ۔ ایس طرح ایہو جیہاں لوکاں نوں یِسُوعؔ اُتے ایمان رکھواؤن دے بعد ، اوہ فیر اوہناں توں دسواں حصہ یا شکر گزاری دیاں قربانیاں دین بارے مجبور کردے نیں ۔ اخیروچ ، بھاویں اوہ مسیحی بن گئے نیں، پر اوہ خُدا دےانصاف توں نئیں نس سکدے ، ایس لئی پئی اوہ ہُن وی پاپ رکھدے نیں ۔
اوہ سانوں دسدے نیں پئی خوشخبری ودھاؤن دا ساڈا طریقہ غلط اے ، ایہہ آکھدیاں ہویاں ، ”تُسی لوکاں توں کِنج پُچھ سکدے او پئی اوہ پاپ رکھدے نیں یا نئیں جد تُسی ہُنے اوہناں نوں ملے ای او ؟ تُسی مکتی دے مسئلے نوں اینی چھیتی کویں چُک سکدے او ، جد پئی تُسی اوہناں نوں مشکل نال جان دے ای او، ایس بارے اپنا انصاف کردیاں ہویاں پئی کیہ اوہ مکتی یافتہ نیں یا نئیں؟ “ لازمی ، سانوں ایہناں گلاں بارے کُجھ دھیان کرن دی ضرورت اے ، ایس لئی پئی جیہڑے بندے نوں اسی بچاؤنا چاؤہندے آں اوہ اِک ایہو جیہا بندہ اے جیہڑے ساڈی بولی توں سوکھے جیہے تنگ ہو سکدے نیں ۔ پر چھیتی نال یا دیربعدوں ، سانوں لازمی مکتی دی خوشخبری ایہناں گھٹ ایمان والیاں نوں سناؤنی چاہی دی اے جنہاں نال ساڈا میل جول اے ۔ ایس توں کوئی فرق نئیں پیندا پئی اسی اوہناں دے کِنے ای نیڑے دے بیلی آں ، ایس لئی پئی سانوں چھیتی یا بعدوں اوہناں نوں خوشخبری سناؤنی چاہی دی اے ، اسی ایمان نال خوشخبری دی منادی کرن دا موقع دین وچ ناکام نئیں ہوسکدے ۔ کیوں؟ ایہدا سبب ایہہ ہیگا اے پئی جے اسی اوہناں نوں ایس سچیائی دے بارے وچ اخیر تیکر نئیں دساں گے ، تاں اسی خوشخبری نوں ٹھیک طریقے نال نئیں ودھاؤندے ہوواں گے ۔
سو، سانوں ساریاں لوکاں توں پُچھنا چاہی دا اے ، بھاویں بشارت لئی ساڈی گل بات دے شروع وچ یا اخیر وچ، ”کیہ تُسی اپنے دل وچ پاپ رکھدے او؟ “جے جواب ہاں وچ اے ، تاں سانوں اوہناں نوں پانی تے رُوح دی خوشخبری سناؤنی چاہی دی اے ۔ بِنا شک ، ساڈے ظالم نظر آؤن دے سبب سانوں اوہناں ولوں بھیڑا چنگا آکھیا جا سکدا اے۔ پر ایس لئی پئی اسی اخیریں رُوحانی کاہن آں ، سانوں یاد رکھنا چاہی دا اے پئی ایہہ ساڈا خاص کم ہیگا اے پئی اسی پانی تے رُوح دی خوشخبری دا نرسنگا ساریاں لوکاں لئی صاف طریقے نال وجائیے ۔
اِ ک خُداوند ، اِک بپتسمہ، تے اِک خُدا
اسی اپنیاں ساریاں پاپاں توں معافی پاچُکے آں ، تے ساڈی زندگی دا مقصد سارے جگ وچ خوشخبری ودھاؤنا اے ۔ جویں پئی سانوں مناداں دے اوہو ای کم دِتے گئے نیں جیہڑے پانی تے رُوح دی خوشخبری دی منادی کردے نیں ، اسی رَل کے کم کردے آں ۔ اسی اِنج کیوں کردے پئے آں ؟ ایس لئی پئی اسی اِکو ای خُدا اُتے ایمان رکھدے آں ، اسی اِکو جیہی سدا دی زندگی پا چُکے آں ، تے اسی اِکو جیہی شان دا سواد لواں گے ۔ اسی سارے اِک دوجے توں فرق آں ، ہر اِک اپنی اپنی زندگیاں تے کماں دے نال اے ، پر جس سببوں اسی اپنے آپ نوں اِک دوجے توں وکھ کر لیندے آں تے اِک دوجے نال اکٹھے ہو جاندے آں ، اوہ ایہہ ہیگا اے پئی اسی اپنی زندگی صرف خُدا لئی گزارئیے ۔
خُدا نےاوہناں لوکاں دیاں دلاں اُتے انصاف دا سِینہ بنھ بنھیا اے جیہڑے اَج دے کاہن بن گئے نیں ۔تے سِینہ بنھ نوں” تےا وہ سِینہ بنھ نُوں لے کے اوہدیاں حِصیاں نُوں اِک نِیلے فِیتےنال بنھ دین تاں پئی ایہہ سِینہ بنھ افُود دے کارِیگری نال بنے ہوئے پٹکے دے اُتےوی رہوے تےافُود توں وی وکھ نا ہوئے “ (خروج ۲۸:۲۸)۔ایہہ جملہ اِک واری فیر ایس گل اُتے زور دیندا اے پئی یِسُوعؔ دا بپتسمہ ساڈے ہر انصاف کرن وچ کناں ضروری اے ۔ سو، پَولُس رسول نے وی یِسُوعؔ دے بپتسمے دی لوڑ دا اعلان کردیاں ہویاں آکھیا، ”اِکّوای بدن اے تےاِکّوای رُوح اے۔جیویں تُہانوں وی جیہڑےسدّے گئےسوتُہاڈے سدّےجان توں آس وی اِکّوای اے ۔اِکّوای خُداونداے ۔ اِکّوای اِیمان۔ اِکّوای بپتِسمہ“(افسیوں ۴:۴-۵)۔
ساڈے اُتے ایہہ انصاف کرن دی ذمہ داری اے پئی کیہ لوکاں دیاں رُوحاں مکتی یافتہ نیں یا نئیں ایس سببوں پئی کیہ اوہ پانی تے رُوح دی خوشخبری اُتے ایمان رکھدے نیں ۔تے جیہڑیاں لوکاں نیں حالے پاپاں دی معافی پاؤنی اے ، سانوں لازمی اوہنا ں نوں خوشخبری سناؤنی چاہی دی اے تے جیہڑیاں لوکاں نیں پاپاں دی معافی پا لئی اے ، سانوں لازمی اوہناں نوں پچھان دینی چاہی دی اے تے اوہناں دے ایمان وچ ودھن وچ اوہناں دی مدد کرنی چاہی دی اے ۔جد اسی پاپاں توں معافی پا چُکے آں ، تاں کیہ ساڈے لئی رُوحانی طریقے نال انصاف دا سِینہ بنھ بنھنا ٹھیک اے یا نئیں؟ وکھریاں اکھراں وچ ، کیہ ساڈے لئی کسے اُتے مکتی دا سچا انصاف کرن توں نسنا ٹھیک اے ؟ ایہہ ٹھیک نئیں اے ۔ سانوں لازمی پانی تے رُوح دی خوشخبری نوں سارے جگ وچ ہر اوس بندے تیکر ودھاؤنا چاہی دا اے جیہڑا حالے تیکر مکتی یافتہ نئیں ہویا اے ۔
فیر ، کیہ اسی اپنے بدن وچ کامل آں ؟
جد اسی پاپیاں دا انصاف کردے آں ، تاں ایہہ ایہناں دے چنگے کم نئیں ہیگے جنہاں دا اسی انصاف کردے پئے آں۔ سگوں ، ایہہ ایس سچی خوشخبری تے خُدا دی راستبازی دے چانن نال اےپئی اسی اوہناں نوں پچھان دے آں ۔اوہناں لئی سچا چانن کیہ اے ؟ پانی تے رُوح دی خوشخبری اُتے ایمان رکھ کے خُدا دے پُتر بننا اوہناں لئی چانن اے ۔ خُدا دے نیانے ایس جگ لئی چانن نیں ۔ کیہ فیر ایہدا مطلب ایہہ ہیگا اے پئی جیہڑے لوک پاپ توں سارے دے سارے معا ف ہو گئے نیں اوہ اپنیاں چنگیاں کماں وچ کامل نیں ؟ اوہناں دیاں دلاں وچ ، بِنا شک ، اوہ کامل نیں ۔ پر اوہناں دے بدن وچ ، اوہ بالکل ادھورے نیں ۔
اپنے بدن وچ ، اسی سارے خود غرض ، بدکار ، ادھورے تے ماڑے آں ، پر خُدا دے نیڑے اسی اوہدے کامل لوک آں ۔ کیہ اوہ لوک جنہاں دے کم ادھورے نیں پر جیہڑے پانی تے رُوح دی خوشخبری اُتے ایمان رکھدے نیں خُدا دے پُتر ہیگے نیں یا نئیں؟ اسی جیہڑےپانی تے رُوح دی خوشخبری اُتے ایمان رکھدے آں خُدا دے پُتر آں جنہاں دی مکتی رُوحانی طریقے نال کامل اے ۔ دوجیاں اکھراں وچ ، ایہہ اوہناں لوکاں دے چنگے کم نئیں جنہاں نیں اسمانی، ارغوانی تےلال رنگ دے دھاگے اُتے ایمان رکھ کے پاپاں دی معافی پائی اے ، سگوں ایہہ اوہناں دی مکتی اے جیہڑی کامل اے ۔ ایس لئی پئی ساڈا ایمان جنہے سانوں بچایا اے کامل اے ، اسی خُدا دے فضل نال اِک دوجے نال گل بات کر سکدے آں۔ تے ایس لئی پئی اسی اسمانی، ارغوانی تےلال رنگ دے دھاگے دی ٹھیک سچیائی نال اپنے فیصلے اُتے اَپڑدے آں ، ایس لئی ساڈا ایمان تے ساڈا انصاف کدی کچے نئیں ہوندے ۔
خُدا نے سانوں دسیا اے پئی انصاف دے ایس معیار نوں سدا کاہناں دے دلاں اُتے رکھیے ۔ سانوں لازمی ایس جگ دیاں ساریاں لوکاں نوں اپنیاں دلاں وچ قبول کرنا چاہی دا اے ۔ سانوں اوہناں دیاں رُوحاں نوں سینے لاؤنا چاہی دا اے، اوہناں لئی دُعا کرنی چاہی دی اے ، تے سچ مُچ پانی تے رُوح دی خوشخبری اوہناں تیکر ودھاؤنی چاہی دی اے ۔ ایس لئی سانوں سدا اپنیاں دلاں وچ انصاف دا سِینہ بنھ رکھنا چاہی دا اے ۔ تے اَج تے کل ، سانوں سداساریاں پاپیاں نوں پاپی سمجھنا چاہی دا اے تاں پئی اوہناں اَگے پانی تے رُوح دی خوشخبری دی منادی کیتی جا سکے ۔
میری دلی تمنا ہیگی اے پئی ایمان دی ایہہ سچیائی تہاڈیاں دلاں وچ موجود رہوے ۔ جے ایہہ سچیائی تہاڈیاں دلاں وچ اے ، تاں ایہدا مطلب ایہہ ہیگا اے پئی تہانوں ساریاں دا انصاف کرن دا حق دِتا گیا اے ۔ ایس خُدا دے کلام اُتے ایمان رکھو ۔ اپنے فیصلے نوں سدا خُدا دے کلام دی نِیہ اُتے ایس طریقے نال بناؤ ، تے ہر ویلے پانی تے رُوح دی خوشخبری اُتے ایمان رکھو تے ایہنوں اپنے سچے دلوں ودھاؤ ۔
ہر دیہاڑے ، مَیں اپنے دل وچ ایس انصاف دے سِینہ بنھ نوں یاد رکھداہاں ، خُدا دے اگے ہر شے دا انصاف کردا ہاں ، تےخوشخبری نوں ودھاؤندا رہندا ہاں ۔ بحث ، اصل وچ ، خوشخبری نوں ودھاؤن دا اِک بوہت اثر کرن والا سبب اے ۔ کِنے بُھلن والے آں اسی !تعلیم دے اُستاد ایس گل بارے بحث کردے نیں پئی رویّے دے مطابق تعلیم تعلیم داسب توں رسمی تے اثر والا طریقہ اے ۔ اِک بولیاں دے اُستاد نے اِک واری زور دے کے آکھیا سی پئی اِک نیانا اِک اکھر نوں اِک ہزار توں بوہتی واری دوہرا ن نال اِک اکھر نوں ٹھیک طریقے نال بو ل سکدا اے ۔ ایسے طرح جد اسی پانی تے رُوح دی سچیائی دا کلام ہر ویلے بوہتی واری ودھاؤندے آں تاں ایہہ ساڈیاں دلاں وچ پک جاندا اے ۔مَیں ایس خوشخبری دی سچیائی نوں بوہتی واری لکھیا تاں پئی جد لوک ساڈیاں کتاباں پڑھن تاں اوہ اسمانی، ارغوانی تےلال رنگ دے دھاگے تےمہین وٹے ہوئے کتان دی سچیائی نوں سمجھ سکن ، تے ایس اُتے ایمان رکھن ۔ ایس لئی اسی ایس خوش خبری دی سچیائی دی منادی کرد ے رہندے آں ۔
بھراؤ تے بھینو، سانوں پاک لوکاں نوں اِک دوجے دے اگے اپنے ایمان دا اقرار کرنا چاہی دا اے ۔ جد اسی اپنے ایمان دا اقرار کردے آں تے خُدا دے فضل نوں اِک دوجے نال ونڈدے آں ، تاں ساڈے دل اِک دوجے نال ٹھیک طریقے نال میل جول کرسکدے نیں ، تے کوئی وی غلط علم یا غلط سمجھ جیہڑی سانوں ہوئی ہوئے ، ایہنوں ٹھیک تے چنگا کیتا جا سکدا اے ۔ تے ایسے د ے راہیں اسی رُوحانی طریقے نال ترقی کر سکدے آں ۔ جویں جویں ساڈا ایمان ودھدا اے ، ساڈیاں ایمانی زندگیاں وی اگانہہ ودھدیاں نیں ۔ اسی صرف کِنی واری غلط سوچیا اے ؟ ساڈی پچھلی تعلیم صرف کِنی کچی سی ؟ تے اصل وچ ایہدا کِناں حصہ صرف خیالی سی ؟پانی تے رُوح دی خوشخبری نوں جانن توں پہلوں ساڈے کول جنے وی عقیدے سن اوہ صرف خیالی سن ۔
پَولُس رسول نے آکھیا پئی جیہڑا وی ایس خوشخبری توں علاوہ کسے دوجی خوشخبری دی منادی کرے جیہڑی اوہدے کول سی اوہ لعنتی ہوئے گا(گلتیوں ۱: ۹)۔ پَولُس نے ایہہ وی آکھیا پئی اوہ خُدا دی سچیائی توں علاوہ جو کُجھ جان دا سی ایہنوں کباڑ وانگر دسدااے ۔ پر، اَج دی مسیحیت وچ ، اوہ لوک جیہڑے صرف اپنے ای فضول دینی علم اُتے فخر کردے نیں ، تگڑے ہو جاندے نیں ۔
ایس لئی پئی اسی جیہڑے اسمانی، ارغوانی تےلال رنگ دے دھاگےتےمہین وٹے ہوئے کتان دے راہیں بچائے گئے آں ، اسی اپنیاں دلاں نال اکٹھے رَل سکدے آں ۔ تے اسی پانی تے رُوح دی ایس خوشخبری توں شرماؤندے نئیں آں ، ایس لئی پئی ایس سچیائی نے سانوں دوزخ دے سدا دے عذاب توں بچایا اے۔ سگوں ، اسی بِنا کسے جھاکے دے جگ دے اخیر تیکر ایس خوشخبری دی سچیائی دی منادی کیتیوں بغیرنئیں رہ سکدے جیہڑی اسمانی، ارغوانی تےلال رنگ دیاں دھاگیاں وچ لُکی اے ۔ایہہ مشن اے جیہڑا اسی چھیتی نال پورا کرنا اے ۔
جد مینوں پہلی واری احساس ہویا پئی پانی تے رُوح دی ایہہ خوشخبری ای اِکو سچیائی اے ، تاں مَیں بوہت دکھی ہویا ۔”ہائے ، ایہہ اے ! ایہہ اے تے فیر وی مَیں ہُن تیکر ایہنوں نئیں جان دا ساں ۔ کیہ سارے جگ دے مسیحی ایہہ جان دے نیں ؟ کیہ دینی اُستاد ایہدے بارے وچ گل کردے نیں ؟“ کاش پئی خُدائی تعلیم دیاں اُستاداں وچوں کوئی اِنج دا ہوندا جیہڑا ایس سچیائی نوں جان دا تے بولدا ۔ سو مَیں مسیحیت دیاں ساریاں خُدائی تعلیم دیاں شاخاں دی اوس ویلے تیکر جانچ کیتی جد تیکر مَیں ایہہ پتہ کر سکاں پئی کیہ ایہناں وچ پانی تے رُوح دی خوشخبری دا تھوڑا جیہا وی نشان اے ، پر ایہہ سارا کُجھ ضائع گیا ۔
ایس لئی مَیں ایس خوشخبری دی سچیائی نوں سمجھن دے بعد پہلی دُعا ایہہ کیتی : ”خُداوند ، مَیں پانی تے رُوح دی ایس خوشخبری اُتے ایمان رکھدا ہاں ۔ مَیں ایمان رکھدا ہاں پئی تُوں بپتسمہ لے کے میریاں ساریاں پاپاں نوں چُک لیا ، سولی اُتے مویا ، دوجی واری مویاں وچوں جیوں پیا ،تے ایہہ پئی تُوں ہُن مینوں بچا لیا اے ۔ پر خُداوند ، ایس سارے جگ دے سارے لوک ہُن تیکر ایس سچیائی نوں نئیں جان دے ۔ مینوں ایس سچیائی نوں سارے جگ وچ ودھاؤن دے ۔ مینوں تیری اصل خوشخبری دی منادی کرن دی اجازت دے جویں پئی ایہہ ہیگی اے ۔ “
ایہہ اِک حیران کرن والی نعمت اے پئی مَیں تہاڈے نال ملاقات کیتی اے ، میرے نال رَل کے کم کرن والیو ۔ کُجھ سچیائی نوں لبھن والیاں نال مِلنا جیہڑے خُدا نوں لبھدے نیں ، اوہناں دااسمانی، ارغوانی تےلال رنگ دے دھاگےتےمہین وٹے ہوئے کتان دی سچیائی دی منادی کرنا ، تے ایس اُتے ایمان رکھ کے ایہناں نال رَ ل کے ایس طرح خدمت کرنا ، اوہناں ہزار لوکاں نال ملن تے سکھاؤن توں بوہتا چنگا اے جیہڑے نا تاں خُدا دے کلام نوں سُن دے تے نا ای ایس اُتے ایمان رکھدے نیں ۔ مَیں خُدا دا بوہت شکرگزار ہاں ایس لئی پئی تُسی سارے اوہدےکلام اُتے ایمان رکھدے او !
سچ مُچ جگ وچ بوہت گھٹ لوک تہاڈے تے میرے وانگر خوش نیں ۔ ایس جگ وچ ساڈے جنے سکے بھرا تے بھیناں کیہدے کول نیں ؟ ایہہ ساریاں شیواں سچ مُچ سچیائی دے خُدا ولوں آئیاں نیں ۔ جد خُدا نے سانوں اینیاں مہنگیاں نعمتاں دِتیاں نیں، جد خُدا نے سانوں اینی مہنگی مکتی دتی اے تے جد خُدا نے سانوں اینی مہنگی کہانت ساڈے حوالے کیتی اے ، تاں اسی اوہدی خوشخبری لئی کویں کم نئیں کر سکدے ، اسی پاپیاں دا انصاف کویں نئیں کر سکدے ، تے اسی پانی تے رُوح دی خوشخبری کویں نئیں ودھا سکدے ؟ جد اسی خوشخبری ودھاؤندے پئے آں ، تاں اسی اوہناں لوکاں نوں کویں وکھ نئیں کر سکدے جنہاں نیں پاپاں دی معافی پائی اے تے جنہاں نیں نئیں پائی اے ؟ جویں خُدا نے اسماناں دے دھرتی نوں بناؤن ویلے چانن نوں ہنیرے توں وکھ کیتا ، اوسے طرح اسی وی پاپیاں نوں راستباز لوکاں توں صاف طریقے نال وکھ کردے آں ۔ جد اسی سچیائی نوں جھوٹھ نال رَلا دیندے آں تاں خُدا خوش نئیں ہوندا ۔ تے ایس لئی اوہ آکھدا اے ، ’’ تُوں اپنے تاکِستان وچ دو قِسماں دے بِیج نہ بیجیں تاں پئی نا ہوئے پئی سارا پَھل یعنی جیہڑا بِیج تُوں بیجیا تے تاکِستان دی پَیداوار دوویں ضبط کر لِئے جان۔تُوں بَلدتے کھوتے دوآں نُوں اِکوویلے جوکے ہل نہ چلاویں۔تُوں اُنّ تےسَن دوآں نوں رَلا کے اُنیا ہویا کپڑا نا پاویں“(استثنا ۲۲ :۹-۱۱)۔ایس طرح سانوں پاپیاں نوں وکھ کرنا اے ،تے اوہناں لئی صاف طور نال انصاف کرنا اے ۔
ہُن ویلا آگیا اے پئی اوہ لوک جنہاں نیں خُدا دا کلام سُنیا اے ایہنوں سچ منن بھاویں ایہہ اوہناں دیاں تمناواں دے مطابق نا ہوئے ۔ جیہڑے لوک خُدا دے کلام اُتے ایمان رکھدے نیں اوہ اوہدے فضل نال جگ دا چانن بن جاندے نیں پر جیہڑے ایمان نئیں رکھدے اوہ ہنیریاں توں نئیں بچ سکدے ۔ ایہہ ایس لئی اے پئی اسی پانی تے رُوح دی خوشخبری اُتے ایمان رکھدےآں پئی اسی اُورِیم تےتُمیّم بن گئے آں ، یعنی ’چانن تے کاملیت۔ ‘اسی اوہ بن گئے آں جیہڑے خُدا وچ پاپ توں سارے دے سارے مکتی پا چُکے نیں ۔
کیہ تُسی پانی تے رُوح دی خوشخبری اُتے ایمان رکھ کے کامل طریقے نال خُدا دے پُتر بن گئے او ؟ ہُن اسی اپنیاں زندگیاں شاہی کہانت دیاں کماں وچ گزاردے پئے آں ، ایہہ سارا یِسُوعؔ مسیح دے راہیں اے جیہڑا ایس جگ لئی بادشاہواں دا بادشاہ بن گیا اے ۔ مَیں خُدا دا شکر ادا کردا ہاں پئی اوہنے سانوں مکتی دی ایہہ خوشخبری دتی ۔ مَیں دُعا کردا ہاں پئی خُدا سانوں ایس زمین اُتے رہندیاں ہویاں شاہی کہانت دیاں اپنیاں کماں نوں کامیابی نال کرن دے لائق بنائے ۔
ہیلیلویاہ! مَیں سدا اپنے خُدادی وڈیائی کردا ہا ں۔
Copyright © 2021 by The New Life Mission