مضمون 8: پاک رُوح
[8-10] رُوح دے مطابق چلو ! <گلتیوں ۵: ۱۶ ۔ ۲۶ ، ۶: ۶ ۔ ۱۸>
>گلتیوں ۵: ۱۶ ۔ ۲۶ ، ۶: ۶ ۔ ۱۸>
” پر میَں ایہہ آکھدا ہاں پئی رُوح دے مطابق چلو تے بدن دی آس نوں کدی پوریاں نہ کرو گے ۔ایس لئی پئی بدن رُوح دے اُلٹ آس رکھدااے تے رُوح بدن دے اُلٹ تے ایہہ اک دوجے توں وکھرے نیں تاں پئی جوتسیں چاؤہندے او اوہ نہ کرو۔ تے جے تسیں رُوح دی ہدایت نال چلدے او ،تے شریعت دے تھلے نئیں رہے ۔ ہُن بدن دے کم اِنج نیں مطلب اے ، حرامی کم ۔ناپاکی ۔ جنسی کم ۔ بُتاں اَگے متھے ٹیکنا۔جادوگری ۔دُشمنیاں۔جھگڑے ۔سڑنا۔غصہ ۔تفرقے۔وکھ وکھ رہنا۔ بِدعتاں ۔بُغض ۔نشے کرنا، ناچ رنگ تے ہور ایناں وانگر۔ ایناں بارے تہانوں پہلاں ای آکھداہاں جویں پئی پہلوں دَس چُکیاں ہاں پئی ایہو جیہے کم کرن والے خُدا دی بادشاہی دے مالک نئیں ہون گے ۔ پر رُوح داپھل محبت ۔خوشی ۔ اطمینان ۔تحمل ۔ مہربانی ۔نیکی ۔ ایمانداری ۔ حلم۔پرہیزگاری اے۔ ایہو جیہے کماں توں کوئی شریعت منع نئیں کردی ۔ تے جیہڑے مسیح یسوع دے نیں اوہناں نے بدن نوں اوہدیاں ریجھاں تے آساں سمیت سولی اُتے چاہڑ دتا اے ۔جے اسیں رُوح دے سبب جیوندے آں تے رُوح مطابق چلنا وی چاہی دااے ۔ اسیں بے سبب فخر کرکے نہ اک دوجے نوں غصہ دِلوائیے نہ اک دوجے توں سڑیے۔“
”پاک کلام دی تعلیم لین والا تعلیم دین والے نوں ساریاں شیواں وچ نال رلائے۔ دھوکہ نہ کھاوو ۔خُدادا مذاق نئیں اُڈایا جاندا ایس لئی پئی بندہ جو کُجھ بیج دا اے اوہو ای وڈھے گا ۔ جیہڑا اپنے بدن لئی بیج دااے اوہ بدن توں موت دی فصل وڈھے گا تے جیہڑا رُوح لئی بیج دااے اوہ رُوح توں ہمیش دی حیاتی دی فصل وڈھے گا ۔اسیں نیکی دے کم کرن وچ ہمت نہ ہارئیے،ایس لئی پئی جے بے دل نہ ہوواں گے تے ویلے سِر وڈھاں گے ۔ایس لئی جتھے جتھے موقع مِلدااے ساریاں نال نیکی کرو ،خاص کر ایمانداراں نال ۔ ویکھو۔ میَں کویں وڈے وڈے اَکھراں وچ تہانوں اپنے ہتھ نال لکھیا اے ۔ جنے لوک بدنی وکھالا چاؤہندے نیں اوہ تہانوں ختنے کراؤن لئی مجبور کردے نیں ۔صرف ایس لئی پئی مسیح دی سولی دے سبب ستائے نہ جان ۔ایس لئی پئی ختنے کراؤن والے آپ وی شریعت اُتے عمل نئیں کردے ،پر تہاڈا ختنہ ایس لئی کرواؤنا چاؤہندے نیں پئی تہاڈی بدنی حالت اُتے فخر کرن ۔ پر خُدا نہ کرے پئی میَں کسے شے اُتے فخرکراں ، صرف اپنے خُداوند یسوع مسیح دی سولی اُتے ، جیہدے نال جگ میرے ولوں سولی اُتے مرگیا تے میَں جگ ولوں ۔ ایس لئی پئی نہ ختنہ کوئی شے ہیگا اے نہ بے ختنہ ہونا، سگوں نویں سریوں جمنا۔تے جنے ایس گل وانگر کردے نیں ،اوہناں نوں تے خُدا دے اِسرائیل نوں سکون تے رحم مِلدا رہوے ۔ اگانہہ تو کوئی مینوں تنگ نہ کرے ،ایس لئی پئی میَں اپنے بدن اُتے یسوع دے پھٹ لئی پھردا ہاں ۔ سُنو بھراوو! ساڈے خُداوند یسوع مسیح دا فضل تہاڈی رُوح نال رہوے۔ آمین۔ “
سانوں رُوح دے مطابق چلن لئی کیہ کرن دی لوڑ ہیگی اے ؟
سانوں سوہنی خوشخبری دی منادی تے اوہدے پِچھے چلن دی لوڑ ہیگی اے ؟
پولُس نے گلتیوں نوں اپنے خطاں وچ پاک رُوح دے بارے وچ لکھیا ۔گلتیوں ۵ : ۱۳ ۔ ۱۴ وچ اوہنے آکھیا ، ” سُنو بھراوو!تسیں آزاد ہون لئی بلائے تے گئے او ،پراِنج نہ ہووے پئی اوہ آزادی بدنی کماں داسبب بنے سگوں محبت وچ رہندے ہویاں اک دوجے دی خدمت کرو ۔ ایس لئی پئی ساری شریعت اُتے اکو ای گل نال کامل عمل ہوجاندااے مطلب اے ،ایہدے توں پئی تُوں اپنے گوانڈھی نال اپنے وانگر محبت رکھ ۔ “
چھوٹی گل ایہہ ہیگی اے پئی کیوں جے اسیں سوہنی خوشخبری اُتے ایمان رکھن نال پاپ توں مکتی یافتہ تے چھُڈائے گئے آں۔ سانوں لازمی طور اُتے ایس آزادی نوں بدن دی آس وچ اپنے آپ نوں رلاؤن لئی اک موقع نئیں سمجھنا چاہی دا، پر محبت نال سانوں لازمی طوراُتے اک دوجے دی خدمت تے سوہنی خوشخبری دے پِچھے چلنا چاہی دااے ۔ جویں خُدا نے سانوں ساڈے سارے پاپاں توں بچایا ،ساڈے لئی خوشخبری دی منادی کرنا چنگی گل اے ۔ پولُس نے وی اِنج آکھیا ، ” پرجے تسیں اک دوجے نوں کٹ ، وڈھ کردے او تے خبردار رہنا پئی اک دوجے نوں ہُونجا ای نہ پھیر دینا ۔ “ (گلتیوں ۵: ۱۵)۔
پاک رُوح نال بھرن لئی رُوح دے مطابق چلو
گلتیوں ۵: ۱۶ وچ پولُس نے آکھیا ، ” پر میَں ایہہ آکھدا ہاں پئی رُوح دے مطابق چلوتے بدن دی آس نوں کدی پوریاں نہ کروگے۔ “تے آیتاں ۲۲۔ ۲۶ وچ اوہنے آکھیا ، ” پر رُوح دا پھل محبت ۔خوشی ۔ اطمینان ۔تحمل ۔ مہربانی ۔نیکی ۔ ایمانداری ۔ حلم۔پرہیزگاری اے۔ ایہو جیہے کماں توں کوئی شریعت منع نئیں کردی ۔ تے جیہڑے مسیح یسوع دے نیں اوہناں نے بدن نوں اوہدیاں ریجھاں تے آساں سمیت سولی اُتے چاہڑ دتا اے ۔جے اسیں رُوح دے سبب جیوندے آں تے رُوح مطابق چلنا وی چاہی دااے ۔ اسیں بے سبب فخر کرکے نہ اک دوجے نوں غصہ دِلوائیے نہ اک دوجے توں سڑیے۔ “ایتھے پولُس سانوں دَسدااے پئی جے اسیں رُوح وچ چلدے آں ، اسیں پاک رُوح دےپھل پیدا کراں گے ۔ پاک رُوح سانوں رُوح وچ چلاؤنا چاؤہندااے ۔پر اسیں بدن وچ جیوندے آں ۔
اسیں انسانی پیڑھی بدن نال جم دے آں جیہڑا رُوح دے پھل پیدا نئیں کر سکدا ۔ ایتھوں تیک پئی جے اسیں رُوح دے مطابق چلن دی ہمت کردے آں ، ساڈی عادت بدل نئیں سکدی ۔ایس لئی صرف اوہ جیہڑے سوہنی خوشخبری اُتے ایمان رکھن نال پاک رُوح دی بھرپوری پاؤندے نیں رُوح دے مطابق چل سکدے تے رُوح دے پھل پیدا کر سکدے نیں ۔
جدوں پاک کتاب سانوں رُوح دے مطابق چلن لئی آکھدی اے،ایہدا مطلب اے پئی سانوں سوہنی خوشخبری دی منادی کرنی چاہی دی اے تاں پئی دوجے وی اپنے پاپاں توں معافی پاؤن ۔ جے اسیں ایس سوہنی خوشخبری لئی جیوندےآں ،اسیں رُوح دے پھل پیدا کراں گے ۔دوجے اَکھراں وچ ،ایہہ انسانی عادت نوں بدلن والی گل نئیں ہیگی اے ۔جدوں اسیں ایس سوہنی خوشخبری نال چلدے آں ، اسیں پاک رُوح دے پھل ،جنہاں دے ناں،محبت ،خوشی ۔ سلامتی ۔ مہربانی ۔بھلیائی۔ وفاداری ۔ ملائم رویّہ تے اپنے آپ اُتے حاوی ہون دے پھل پیدا کرسکدے آں ۔ رُوح دے پھل سانوں ،دوجیاں نوں ہمیش دیاں حیاتیاں پاؤن لئی ،اوہناں دے پاپاں توں بچن وچ مدد دیندے نیں۔
بدن دیاں آساں دا رُوح دیاں آساں نال مقابلہ
پولُس نے آکھیا، ” کیوں جے بدن رُوح توں وکھری آس رکھدا اے تے رُوح بدن توں وکھری تے ایہہ اک دوجےدے خلاف ہیگے نیں ،تاں پئی جویں تہانوں کرنا چاہی دااے ،اُنج نہ کرو۔ “ (گلتیوں ۵: ۱۷)۔ کیوں جے اسیں جیہڑے چُھڈائے گئے آں ،اکو ای ویلے اُتےبدن تے رُوح دی آس رکھدے آں ،ایہہ دو شیواں سدا اک دوجے نال اوّلی تھاں اُتے ہیگے نیں ۔ جیہداایہہ نتیجہ اے پئی اک مکمل طور اُتے ساڈے دلاں نوں بھر نئیں سکدااے ۔
رُوح ساڈی آس رکھن وچ،مطلب اے ساڈے دلاں دی گہرائیاں نال سوہنی خوشخبری دی کرن تے خُداوند دی خدمت کرن لئی اَگوائی کردااے ۔ایہہ سانوں رُوحانی کماں وچ آہرے لاؤن لئی گرم جوشی دیندا اے ۔ ایہہ ساڈی خُدا دی سوہنی خوشخبری دی منادی نال لوکاں نوں اوہناں دے پاپاں توں چھُڈاؤن وچ مدد کردااے ۔
پر دوجے پاسے ، ساڈیاں آساں بدنی آساں نوں ہلاؤندیاں نیں تاں پئی اسیں رُوح دے مطابق نہ چل سکیے ۔ ایہہ رُوح تے بدنی آساں دے وچکار ہمیش دی کھِچ دھرُو ہیگی اے ۔ جدوں اک بندہ بدنی آساں وچ برباد ہو جاندااے ،اوہ بدن لئی شیواں اکٹھیاں کردیاں ہویاں مُک جاندااے ۔بدن رُوح توں وکھریاں اپنی آس نوں چالو رکھدااے ۔اوہ اک دوجے توں وکھ وکھ ہیگے نیں ۔ تاں پئی اسیں اوہ کم نہ کر سکیے ،جیہڑے سانوں کرنے چاہی دے نیں ۔
فیر رُوح دے مطابق چلن لئی کاہدی لوڑ ہیگی اے ؟ تے کس طرحاں دیاں شیواں نال خُدا خوش ہوندا اے ؟ خُدا نے آکھیا پئی سوہنی خوشخبری دی منادی کرنا تے اوہدے پِچھے چلنا رُوح دے مطابق چلن دی حیاتی ہیگی اے ۔ اوہ اوہناں نوں رُوح دے مطابق چلن لئی دل دا تحفہ دیندا اے جیہڑے پاک رُوح دی بھرپوری رکھدے نیں ، تاں پئی اوہ اک رُوحانی حیاتی بسر کر سکن ۔ رُوح وچ چلن نال رُوح دے پھل پیدا کرن لئی خُدا نے سانوں جیہڑا حکم دتا اک اگاہی تے ساڈے لئی دوجیاں تیک سوہنی خوشخبری دی منادی کرن نال ،اوہناں دے پاپاں توں بچاؤن لئی ،اک حکم ہیگا سی ۔ پاک رُوح دے مطابق چلن دا مطلب ہیگا اے،اک حیاتی بسرکرنا ،جیہڑی خدانوں خوش کردی پئی اے۔
رُوح دے مطابق چلن دے بارے وچ ،سانوں سب توں پہلاں پاک رُوح دی بھرپوری پاؤن دی لوڑی ہیگی اے۔ سانوں پہلاں سوہنی خوشخبری اُتے ایمان رکھنا چاہی دااے ،جیہڑی خُدا نے سانوں دِتی جے اسیں پاک رُوح پاؤن دی آس رکھدے آں جیہڑا ساڈے وچ رہندااے ۔ جے اسیں اپنے دلاں دی ڈونگھیائی نال سوہنی خوشخبری اُتے ایمان نئیں رکھدے ،اسیں نہ پاک رُوح دی بھرپوری پانواں گے تے نہ ای پاپ توں مکتی پانواں گے ،جیہدا مطلب ایہہ ہیگااے ،اسیں رُوح دے مطابق چلن دے لائق نئیں ہیگے آں ۔
رُوح سانوں سوہنی خوشخبری دی منادی کرن ،خُداوند دی خدمت کرن تے خُدا نوں جلال دین دی آس دیندااے ۔ ایہہ آس اک دلوں مِلدی اے ، جیہڑا خُدالئی تے سارے جگ وچ سوہنی خوشخبری دی منادی کرن دے نانویں لایا اے ۔ ایہہ اک دل توں وی مِلدی اے ،جیہڑا کرن لئی تیار ہیگااے مطلب اے سوہنی خوشخبری دی منادی اُتے جو کُجھ وی ورتیا جاندااے ۔اوہ جیہڑے خوشخبری اُتے ایمان رکھدے نیں تے اپنے پاپاں توں معافی پاؤن دے بعد پاک رُوح پاؤندے نیں ، رُوح دے مطابق چلن تے اپنے آپ نوں خوشخبری دی منادی کرن دے نانویں لاؤن دے لائق ہیگے نیں ۔ ایہہ اُتوں اوہناں دا رُوحانی حق ہیگا اے ۔
اوہ جیہڑے پاک رُوح دی بھرپوری رکھدے نیں، پاک رُوح دا آکھا منن تے رُوح دے مطابق چلن لئی آؤندے نیں ، بھانویں او ہ حالے تیک بدنی آساں رکھدے نیں ،ایس لئی پئی پاک رُوح اوہناں وچ رہندااے ۔پولُس نے آکھیا ، ” پاک رُوح دے مطابق چلو “اِنج ایہدا مطلب ایہہ ہیگا اے پئی سانوں لازمی طور اُتے پانی تے پاک رُوح دی سوہنی خوشخبری دی منادی کرنی چاہی دی اے ،جیہڑی یسوع نے سانوں دتی تاں پئی اسیں دوجیاں دی ،اوہناں دے پاپاں توں معافی پاؤن وچ مدد کر سکیے ۔
کئی وار جدوں پئی رُوح دےمطابق چلدیاں ہویاں ،اسیں بدن دے مطابق چلدے آں ۔ بدن دی آس تے رُوح دی آس ساڈیاں حیاتیاں وچ اک دوجے دے خلاف لڑدیاں نیں، پر سانوں کیہ جانن تے پچھانن دی لوڑی ہیگی اے ،کھلی خاص ایہہ گل ہیگی اے پئی اوہ جیہڑے پاک رُوح دی بھرپوری وچ رہندے نیں ،اوہناں نوں رُوح دے مطابق چلن والی حیاتی بسرکرنی چاہی دی اے ۔ صرف ایس طریقے نال اسیں خُدا دیاں برکتاں نال بھریاں ہوئیاں حیاتیاں بسر کرن دے لائق ہوواں گے ۔ جے اوہ جیہڑے پاک رُوح دی بھرپوری وچ رہندے نیں ،رُوح دے پھل پیداکرن توں مُکردے نیں ،وہ بدن دے پھل پیداکرن نال برباد ہو جان گے ۔ اوہناں دا پھل موت تے وچاریاں وانگر اے ۔ ایس لحاظ نال رُوح دے مطابق چلن نال جیوندے رہن دا سبب موجود ہیگا اے ۔
اسیں سُنیا اے ، ” رُوح دے مطابق چلو “ پر ساڈے وچوں کئی خورے سوچ سکدے نیں ،”
میَں اِنج کویں کر سکدا ہاں ،جد پئی میَں اپنے اندر پاک رُوح نوں محسوس ای نئیں کرسکدا ؟ “ ساڈےوچوں کئی سوچدے نیں پئی اسیں صرف پاک رُوح دی بھرپوری نوں پچھان سکدے آں ،جے خُدا وکھالی دیندااے تے نالےساڈے نال سدھا آپ گل کردا ۔ پر ایہہ اک پُٹھی سوچ ہیگی اے ۔ رُوح سانوں پانی تے رُوح دی سوہنی خوشخبری لئی جیوندے رہن دی آس دیندااے ۔ خورے موقعے ہون پئی سانوں یقین ہیگااے ،اوہ ساڈے وچ رہندااے ،پر اوہنوں محسوس نئیں کر سکدے ، ایس لئی پئی اسیں بدن دے مطابق چلدے پئے آں ۔ کئی خورے بھانویں سوچ سکدے نیں ،پئی اوہ ساڈے اندر سُتا پیا اے ۔ اوہ اُنج دے لوک نیں جنہاں نوں پاک رُوح مِل گیا اے ،پر فیر وی بدن وچ رہندے نیں ۔
ایہہ لوک صرف اپنے بدن نوں سکون دیندے نیں تے کم کردے نیں ،جویں ایہہ اوہناں نوں آکھدااے ،پر اخیر وچ بدن دا بوہتا آکھا منن نال تنگ ہون گے ۔ بھاویں اوہ لوک جیہڑے پاک رُوح دی بھرپوری وچ رہندے نیں ،اپنے بدن دیاں آساں مطابق جیوندے رہن ول دھیان دیندے نیں ، ایس لئی پئی او ہ سوچدے نیں پئی اِنج کرنا اوہناں دی عادت ہیگی اے ۔پر اوہ جیہڑے بدن دا آکھا من دے نیں ، اخیریں بدن دے نوکر بن جاندے نیں ۔
خُداوند سانوں رُوح دے مطابق جیوندے رہن لئی آکھدااے ۔ ایہدا مطلب سوہنی خوشخبری دی خدمت کرنا اے ۔ ایہدا ایہہ وی مطلب ہیگا اے پئی سانوں لازمی طور اُتے اپنے آپ نوں رُوح دی سوہنی خوشخبری دے سارے دے سارے ناویں لاؤنا چاہی دااے ۔خوشخبری دا مزہ لینا تے ایہدے وچ جیوندے رہنا رُوح مطابق جیوندے رہنا اے ۔ سانوں سِکھ کے ایہدے مطابق جیوندے رہنا اے پئی رُوح دے مطابق چلن دا مطلب کیہ ہیگااے ۔ کیہ تسیں رُوح دے مطابق چلدے پئے او ؟
کیہ کوئی بندہ جیہڑا پاک رُوح نال بھریا نئیں ، رُوح دے مطابق چل سکدااے ؟
اوہ جیہڑے نویں سریوں جمے نئیں ہیگے ،اوہناں نوں نئیں پتہ پئی رُوح دے مطابق چلن دا کیہ مطلب اے ۔ ایس طرحاں ، بوہتے لوک پاک رُوح پاؤن تے اپنے دلی طریقے نال اوہدی آس رکھن دی ہمت کردے نیں ۔اوہ سوچدے نیں پئی پاک رُوح دی آس رکھن دا کم اُنج ای اے جویں پاک رُوح نال
بھرنا ہوندااے ۔
مثال طور اُتے ، جدوں لوک عبادت لئی لازمی طور اُتے گرجیاں وچ اکٹھے ہوندے نیں ، پادری اُچی آواز وچ دعا کردے نیں تے ہر کوئی خُداوند داناں لین لگ پیندااے ۔اوہناں وچوں کئی اوپریاں بولیاں بولدے نیں ،جویں اوہ پاک رُوح نال بھر گئے سَن ،پر کوئی وی ،ایتھوں تیک پئی اوہ آپ وی نئیں سمجھ سکدے پئی اوہ کیہ آکھدے پئے نیں ۔ اوسے ای ویلے ،اوہناں وچوں کئی دھرتی اُتے ڈِگدے نیں تے اوہناں دے بدن حدوں دونی خوشی نال کمبن لگ پیندے نیں ۔ اوہ لازمی طور اُتے بدرُوحاں نال بَنھے گئے سیں ،پر اوہ سوچدے نیں ، اوہناں پاک رُوح پالیا اے ۔ فیر بڑا رولا پیندااے جدوں لوک روندے نیں، ” یا خُداوند ا ، یا خُداوندا! “ اوہ خُداوند ا دا ناں لیندے نیں ، اپنے ہنجو وگاؤندے تے اپنے ہتھاں نال تاڑیاں ماردے نیں ۔ایہہ کم کئی واری ، ” پاک رُوح نال بھر جانا “ اکھواؤندااے ۔
پادری اوپریاں بولیاں وچ تے نالے پُلپٹ نوں زور نال کھڑکاؤندیاں ہویاں بولدااے ، تے لوک روندے نیں ، ” یاخُداوند ا ، یا خُداوندا! “ اوہ ایہو جیہے ماحول نوں بوہت پسندکردے نیں تے کئی ایتھوں تیک آکھدے نیں ،اوہناں نیں عدن دے باغ وچ نیکی تے بدی دی پچھان دے رُکھ دی تے اپنے گندے مست ہون وچکار یسوع دے مکھ دی اک رویا ویکھی ۔ اوہ اوہناں شیواں نوں پاک رُوح پاؤنا ، اوہدے نال بھرنا تے اوہدے نال چلن دے طریقے بارے غلط سمجھدے نیں ۔ اوہناں دے پُٹھے کم خُدا دے کلام تے پاک رُوح دے بارے وچ اوہناں دیاں پُٹھیاں سوچاں وچوں مِلدے نیں ۔
” رُوح دے مطابق چلو “ جیہڑے نویں سریوں جمے نیں ، خُدا اوہناں نوں ایہہ آکھدااے ۔ ایہدا مطلب ایہہ ہیگا اے پئی اوہ کم کرنے نیں جیہڑے اوہنوں خوش کردے نیں۔ پولُس نے بدن دے کماں نال پاک رُوح دے پھلاں دا مقابلہ کیتا ۔ اوہنے آکھیا ، ” پر رُوح داپھل محبت ۔خوشی ۔ اطمینان ۔تحمل ۔ مہربانی ۔نیکی ۔ ایمانداری ۔ حلم۔ پرہیز گاری اے۔“ (گلتیوں ۵:۲۲ ۔ ۲۳)۔
” رُوح دے مطابق چلن “ دا مطلب اے سوہنی خوشخبری دی منادی کرنا تے دوجیاں نوں اوہناں دے پاپاں توں بچاؤنا اے ۔ جے اسیں اِنج کردے آں ، اسیں رُوح دے پھل پیدا کرن دے لائق ہوواں گے ۔ رُوح دےپھل محبت ۔خوشی ۔ اطمینان ۔تحمل ۔ مہربانی ۔نیکی ۔ ایمان داری ۔ حلم تے پرہیز گاری نیں ، تے اسیں ایہہ پھل پیدا کرن دے لائق ہوواں گے ،صرف جدوں اسیں سوہنی خوشخبری نال جیوندے آں ۔ جے کوئی سوہنی خوشخبری دی ، اپنے آپ نوں ایس اُتوں وار دیاں ہویاں خدمت تے منادی کردااے ، فیر اوہ پاک رُوح نال بھری ہوئی اک رُوحانی حیاتی بسرکرسکدااے ۔
رُوح دے اک پھل وانگر ،”نیکی“ دا مطلب اے چنگے کم کرنا ۔ ایہدا مطلب بھلیائی وی اے ۔ سوہنی خوشخبری لئی بھلیائی کرنا تے دوجیاں دے فائدے لئی کُجھ کرنا ، نیکی اے ۔ خُدا دے اَگے بوہت وڈی نیکی دوجیاں دے فائدے لئی خوشخبری دی منادی کرنا اے ۔
تے ” مہربانی“ لوکاں لئی ترس محسوس کرنا اے ۔ اوہ جنہوں دوجیاں اُتے رحم آؤندااے ،تحمل تے مہربانی نال خوشخبری دی منادی کردااے ، سلامت رہوے گا ۔ اوہ جیہڑا رُوح دے مطابق چلدااے خُداوند دے کامل کم نوں ویکھ کے خوش ہوندااے ،اوہدا کم محبت نال کردااے ،دوجیاں نال محبت کردااے تے سارے کماں وچ کھرا اے ۔ جے کسے بندے نے وی اوہناں نوں اِنج کرن لئی اک لازمی ذمہ داری نئیں دتی ،اوہ جیہڑا پاک رُوح نال بھریا اے اوہدے کم وچ کھرا اے ،جدوں تیک ایہہ پورا نئیں ہو جاندا۔ اوہ دل دانرم اے تے اپنے آپ وچ قائم ہیگااے ۔اوہدے وچ رُوح دا پھل ہیگا اے ۔ اوہ جیہڑ ا اپنے اندر پاک رُوح رکھدااے ،اوہ رُوح دے مطابق چلدااے ۔صرف جے اوہ اِنج کردااے ،فیر اوہ رُوح دے پھل پیداکرن دے لائق ہووےگا ۔
تسیں وی رُوح دے پھل پیدا کر سکدے او ،جے تسیں رُوح دے مطابق چلدے او ۔جے تسیں اِنج نئیں کردے ،تسیں بدن دیاں آساں وچ رہندیاں ہویاں برباد ہوجاووگے ۔ گلتیوں ۵ : ۱۹ ۔ ۲۱ وچ خُداوند آکھدااے ، ” ہُن بدن دے کم اِنج نیں مطلب اے ، حرامی کم ۔ناپاکی ۔ جنسی کم ۔ بُتاں اَگے متھے ٹیکنا۔جادوگری ۔دُشمنیاں۔جھگڑے ۔سڑنا۔غصہ ۔تفرقے۔وکھ وکھ رہنا۔ بِدعتاں ۔بُغض ۔نشے کرنا، ناچ رنگ تے ہور ایناں وانگر۔ ایناں بارے تہانوں پہلاں ای آکھدا ہاں ،جویں پئی پہلوں دَس چُکیاں ہاں پئی ایہو جیہے کم کرن والے خُدا دی بادشاہی دے مالک نئیں ہون گے ۔ “
بدن دے کم ایہہ ہیگے نیں
بدن دے کم ایہہ ہیگے نیں ۔بدن دا پہلا کم ، ”حرامی کم “ نیں ، جیہدا مطلب اے ،اپنے توں وکھری جنس نال گندے کم کرن دا رشتہ رکھنا ۔ دوجا کم ،”زناکرنا“ہیگا اے ۔ تیجاکم ” ناپاکی “ ہیگااے ۔چوتھا کم ” جنسی کم “ ہیگا اے جیہدا مطلب اے بدن نوں خوش کرن دی آس رکھنا ۔ پنجواں کم ” بُتاں اَگے متھے ٹیکنا “اے جیہدا مطلب اے ،خُدا دی تھاں اُتے بُتاں اَگے جُھکنااے۔چھیواں کم،” جادوگری “ اے۔ستواں کم ” دُشمنیاں “ہیگا اے۔جے اک بندہ پاک رُوح دے اَڈ بدن مطابق چلدااے ،اوہ کدی بچ نئیں سکداسگوں دوجیاں لئی مطلب اے اپنی پاپی عادت دے مطابق اپنی نفرت وکھاؤندااے ۔اَٹھواں ، ” جھگڑا “ہیگا اے۔ایہدا مطلب اے ،ساڈا بیلیاں یاں خنوادے نال لڑائی جھگڑا ہیگااے ۔ دوجے ” سڑنا۔غصہ کرن دے نتیجے تے اپنی من مرضی دیاں آساں ہیگیاں نیں ۔ “ایہہ سارے اوہناں لوکاں دے کم ہیگے نیں ،جیہڑے بدن دے مطابق چلدے نیں ۔
دسواں” جدائیاں “نیں ۔ جدوں اک بندہ صرف بدن دے مطابق چلدااے ،تے اوہدے لئی گرجے دا کم کرنا اوکھا ہیگا اے تے اخیریں اوہ اپنی من مرضی دی کلیسیا چھڈدیاں ہویاں برباد ہو جاووے گا ۔ یارہواں ”چنگیاں راہواں چھڈ کے مندیاں راہواں وچ پینا“اے۔ اوہ جیہڑا بدن وچ چلدااے ،اپنے دل نوں خوش کرن لئی اِنج کردااے ۔پر اوہ حیاتی خُدا دی مرضی توں بالکل وکھ ہیگی اے ، مطلب اے اوہ اخیریں سوہنی خوشخبری توں ہٹ جاندااے ۔بدعت دا مطلب پاک کتاب سے سچ نوں چھڈ کے جھوٹی راہے پے جانا اے ۔ اوہ جیہڑا خُدا دے کلام اُتے ایمان رکھدا اے تےرُوح دے مطابق چلدااے ،خُدا دی مرضی توں پِچھا ں مُڑن لئی نئیں آؤندا۔” بُغض ، نشے کرنا ،ناچ رنگ تے ہور ایناں ورگے ۔“ وی بدن دے کم ہیگے نیں ۔ اوہ جیہڑے صرف بدن دے مطابق چلدے نیں ،اخیریں ایہو جیہیاں شیواں اُتے عمل کردے نیں ۔ ایس لئی خُداوند آکھدااے ،” رُوح دے مطابق چلو “ اسیں جیہڑے نویں سریوں جمے آں ، سانوں رُوح دے مطابق چلنا اے ۔
او ہ جیہڑے نویں سریوں نئیں جمے کُجھ نئیں سگوں اپنے دلاں وچ بدنی آساں رکھدے نیں ۔ ایس لئی اوہ ، ” حرامی کماں ، گندیاں حرکتاں ، جنسی کماں تے بُتاں اَگے متھا ٹیکن وچ “ آہرے لگن لئی آؤندے نیں ۔جھوٹے پادری جیہڑے نویں سریوں نئیں جمے ، اپنے پِچھے چلن والیاں توں ،اوہناں نوں بوہتی رقم دین لئی اوہناں نوں دھیانے لاؤن لئی ” جادوگری “ کردے نیں ۔ اوہ گرجے دی وڈی ذمہ داریاں تے بوہتی عزت اوہناں نوں دیندے نیں جیہڑے سب توں بوہتاچندہ دیندےنیں ۔ اوہ جیہڑے بدن وچ جیوندے نیں ، دوجیاں نال اپنیاں ” دشمنیاں “ وکھاؤندے نیں ۔ اوہ کلیسیا وچ بوہت ساری ونڈیاں پاؤندے نیں ،اپنے فرقے اُتے گھمنڈ کردے تے دوجیاں نوں پُٹھیا ں راہواں دے راہیاں وانگر شرمندیاں کر دے نیں ۔ ” جھگڑا ، سڑنا ، غصہ کرنا، ونڈیاں پاؤنا ، دُوریاں پاؤنا ، من مرضیاں کرنیاں ، ویر رکھنا “ ساریاں اوہناں دے دلاں وچ ہیگیاں نیں ، جیہڑے نویں سریوں جمے نئیں ہیگے ۔ ایہہ ساڈے پاک
لوکاں لئی وی اِنج ای ہووےگا جے اسیں بدن مطابق چلدے آں ۔
رُوح نویں سریوں جمے ہوئے مسیحیاں نوں پاک رُوح دے پھل پیدا کرن دے لائق بناؤندااے
اوہ جیہڑے نویں سریوں جمے نیں ، اوہناں نوں لازمی طور اُتے سوہنی خوشخبری دی منادی کرن لئی جیوندے رہنا چاہی دااے ۔جویں ایہہ ساڈے لئی کلیاں خُداوند دے پِچھے چلنا بوہت اوکھا اے ،سانوں لازمی طور اُتے خُدا دی کلیسیا وچ رل کے سوہنی خوشخبری دی خدمت کرنی چاہی دی اے ۔سانوں رل کے دعاکرنی تے اپنیاں طاقتاں نوں ایہو جیہا بندہ بنن وچ ورتنا چاہی دااے جیہڑارُوح دی سوہنی خوشخبری وچ چلدااے ۔ اوہ لوک جیہڑے رُوح دے مطابق چلدے نیں ،پانی تے رُوح دی خوشخبری دی منادی کرن لئی جیوندے نیں ۔ دوجے اَکھراں وچ ، بدن وچ چلن دا مطلب ، صرف اپنے آپ لئی جینا ہیگااے ،جد پئی رُوح دے مطابق چلن دا مطلب دوجیاں دیاں رُوحاں نوں بچاؤن لئی کم کرنا اے ۔ بوہتے نویں سریوں جمے مسیحی سوہنی حیاتی ایس طرحاں بسر کردے نیں ۔اوہ دوجیاں دی بھلیائی کرن لئی جیوندے نیں ۔
آلے دوالے جگ وچ بڑے لوک ہیگے نیں ،جنہاں کدی سوہنی خوشخبری نئیں سُنی ۔اسیں افریقہ تے ایشیا وچ لوکاں نال محبت رکھدے آں ، اسیں یورپ تے امریکہ وچ ،اِنج ای وکھرے وکھرے جزیریاں وچ ہر کسے نا ل محبت کردے آں ۔ سانوں اپنی محبت اوہناں نوں پانی تے رُوح دی خوشخبری بارے دس کےوکھا ؤنی چاہی دی اے ۔
سانوں لازمی طور اُتے رُوح دے مطابق چلنا چاہی دااے ۔ ایہدے خلاف کوئی شریعت نئیں ہیگی اے ۔ ” پر رُوح داپھل محبت ۔خوشی ۔ اطمینان ۔تحمل ۔ مہربانی ۔نیکی ۔ ایمانداری ۔ حلم۔ پرہیز گاری اے۔ ایہو جیہے کماں توں کوئی شریعت منع نئیں کردی۔ “ (گلتیوں ۵:۲۲ ۔ ۲۳)۔کیہ کوئی شریعت ہیگی اے جیہڑی ایہدے خلاف ہووے ؟ نئیں ۔ ایہہ رُوح دی شریعت ہیگی اے مطلب اے سانوں لازمی طور اُتے ایہدا آکھا مننا چاہی دااے ۔ پولُس نے سانوں رُوح دے مطابق چلن بارے آکھیا اے ۔ بالکل جویں ساڈے خُداوند نے ساڈے پاپیاں لئی اپنی جان دِتی ، سانوں لازمی طور اُتے دوجیاں تیک خوشخبری دی منادی کرنی چاہی دی اے ۔ دوجیاں نوں اوہناں دے پاپاں توں بچاؤنا رُوح
دے مطابق چلنا ہیگااے ۔ سانوں رُوح دے مطابق چلن دی لوڑی ہیگی اے ۔
پولُس نے گلتیوں ۵: ۲۴ ۔ ۲۶ وچ آکھیا ، ”تے جیہڑے مسیح یسوع دے نیں اوہناں نے بدن نوں اوہدیاں ریجھاں تے آساں سمیت سولی اُتے چاہڑ دتا اے ۔جے اسیں رُوح دے سبب جیوندے آں تے رُوح مطابق چلنا وی چاہی دااے ۔ اسیں بے سبب فخر کرکے نہ اک دوجے نوں غصہ دِلوائیے نہ اک دوجے توں سڑیے۔“سانوں لازمی طور اُتے گواچیاں رُوحاں نوں بچاؤن لئی جیونا چاہی دااے ،جے اسیں رُوح وچ جیوندے آں ۔سانوں رُوح دے کم کرنے چاہی دے نیں تے اوہدے وچ چلنا چاہی دااے ۔ پاک رُوح جیہڑا خُدا نے سانوں دِتا ساڈے دلاں وچ یسوع مسیح نال جیوندے رہن لئی اَگوائی کردااے ۔ پاک رُوح محبت دا بادشاہ ہیگا اے ۔ خُدا سانوں اپنی محبت لئی گڈیاں وانگر ورتدااے
پولُس نے آکھیا ، ”تے جیہڑے مسیح یسوع دے نیں اوہناں نے بدن نوں اوہدیاں ریجھاں تے آساں سمیت سولی اُتے چاہڑ دتا اے ۔ “(گلتیوں ۵:۲۴)۔ اوہنے ایہہ وی آکھیا پئی جیہڑے نویں سریوں جمے نیں ، یسوع مسیح نال مر گئے نیں ۔ اوہ جیہڑے سچ مُچ نویں سریوں جمے نیں پہلوں ای یسوع نال مرگئے نیں ۔ اسیں ایہدا احساس نئیں کردے ،پر اسیں یسوع مسیح نال مر گئے آں ،جدوں اوہ ساڈے پاپاں دا مُل اُتارن لئی سولی اُتے مرگیا سی ۔ دوجے اَکھراں وچ ، ایہہ سچ ہیگااے پئی یسوع مسیح سولی اُتے مریا سی تے تسیں تے میَں وی اوہدے نال سولی اُتے مرگئے ساں ۔ اوہدا مرنا ساڈا مرناسی تے اوہدا جی اُٹھنا ساڈے جی اُٹھن دا پک ہیگااے ۔ تسیں تے میَں اپنے ایمان نال یسوع مسیح وچ جیوندے آں تے مردے آں ۔ سانوں ایمان رکھنا چاہی دااے ۔ساڈا ایمان ساڈی رُوح دے مطابق چلن وچ اَگوائی کردااے ۔
خدا نےسانوں رُوح دے مطابق چلن دی طاقت دتی اے ۔ایس لئی اسیں جیہڑے اپنے سارے پاپاں توں معاف ہو گئے آں ،سانوں رُوح دے مطابق چلنا چاہی دااے ۔ اوہ جنہاں نے پاک رُوح پا لیا اے ،اوہناں نوں لازمی طور اُتے شکریہ ادا کرنا چاہی دااے ،ایس لئی پئی اوہناں دے پاپ معاف ہو گئے سَن تے اپنے آپ نوں گواچے لوکاں دی مکتی لئی سوہنی خوشخبری دی منادی کرن واسطے ناویں لاؤنا چاہی دااے ۔ بھانویں کوئی اپنے پاپاں توں معافی پاؤندااے تے نویں سریوں جم دااے ،اوہ خُداوند دی کلیسیا توں وکھ ہو جاوے گا ،تے اوہدی خدمت کرن دے لائق نئیں ہووے گا ،جے اوہ بدنی آساں دے مطابق جیوندااے ۔تہانوں تے مینوں پانی تے رُوح دی خوشخبری نال ساڈے خُداوند یسوع مسیح دے آؤن
دیہاڑے تیک جینا چاہی دااے ۔
کدی دھوکہ نہ کھاوو سگوں پاک رُوح دی بھرپوری نال جیوندے رہوو
پولُس نے آکھیا ، ” اسیں بے سبب فخر نہ کرئیے نہ اک دوجے نوں غصہ دلوائیے ،نہ اک دوجے توں سڑئیے ۔“بے سبب فخر کیہ ہیگااے ؟ ایہہ بدنی آساں مطابق چلنا اے ۔ ایس جگ وچ بوہت سارے لوک ہیگے نیں جیہڑے اپنے بے سبب فخر لئی جیوندے نیں ۔ بوہتے لوکیں پیسے اکٹھے کردے نیں ،دوجیاں توں اگانہہ ودھن لئی لڑدے نیں ،سوہنے لوکاں نال محبت کردے نیں تے ایہدے تےاوہدے لئی جیوندے نیں ۔اینا ں وچوں کوئی کھرا نئیں ہیگا ،تے ویلا لنگھن دے نال اوہ تباہ تے اُڈ جان گے ۔ایس لئی پئی اوہ بدن دے مطابق چلدے نیں ، بے سبب فخر کرن والے اکھواندے نیں ۔ بھاویں لوکیں دولت مند نیں ،کیہ اصل سُکھ تے چین اوہناں دے دلاں وچ ہیگااے ؟ بدنی پھل اخیریں برباد ہوجاندا اے ۔ دھرتی دیاں شیواں نال کسےدوجے بندیاں نوں کوئی فائدہ نئیں ہوندااے تے اوہ جیہدیاں ہین اوسے دیاں نیں ۔اوہ صرف کسے بندے دے اپنے بدن لئی چنگیاں ہوندیاں نیں ۔
پاک کتاب آکھدی اے ، ” کوئی تے ضائع کردااے پر فیر وی ترقی کردااے ۔تے کوئی جائز خرچہ کرن توں وی کنجوسی کردااے فیر وی کنگال ہیگااے ۔ “ (امثال ۱۱:۲۴)۔ اوہجیہڑے نویں سریوں نئیں جمے ،پیسیاں نوں بوہتا روکن دی ہمت کردے نیں ۔ایس لئی پئی جگ دیاں شیواں اوہناں لئی بڑا کُجھ نیں ، دوجیاں دی ویکھ بھال لئی اوہناں دے دل ویہلے نیں ۔ اوہ صرف اپنے آپ نوں پیار کردے تے اپنی ویکھ بھال کردے نیں ۔ پر پاک کتاب وچ ایہہ آکھیا گیا اے پئی کوئی جائز خرچہ کرن توں وی کنجوسی کردااے فیر وی کنگال ہیگااے۔ لوک بدنی آساں مطابق چلدے نیں ،پر نتیجہ اوہو ای اے ، جویں اک ڈاکو نال ٹکر لاؤنی تے مر مُک جانا ۔ ایہہ ساریاں شیواں بے سبب فخر دے نتیجے نیں ۔
اوہ جیہڑے رُوح دیاں آساں پِچھے چلنا چنگا سمجھدے نیں
پولُس رُوح وچ اک حیاتی بسر کرنا چاؤہنداسی ۔تے اوہنے اِنج ای کیتا ۔اوہنے سانوں خُدا دے کلام وچ چنگی طرحاں رہن دی تعلیم سکھائی ۔ اوہنے گلتیوں ۶ : ۶ ۔۱۰ وچ آکھیا ،”پاک کلام دی تعلیم لین والا تعلیم دین والے نوں ساریاں شیواں وچ نال رلائے۔ دھوکہ نہ کھاوو ۔خُدادا مذاق نئیں اُڈایا جاندا ایس لئی پئی بندہ جو کُجھ بیج دا اے اوہو ای وڈھے گا ۔ جیہڑا اپنے بدن لئی بیج دااے اوہ بدن توں موت دی فصل وڈھے گا تے جیہڑا رُوح لئی بیج دااے اوہ رُوح توں ہمیش دی حیاتی دی فصل وڈھے گا ۔اسیں نیکی دے کم کرن وچ ہمت نہ ہارئیے،ایس لئی پئی جے بے دل نہ ہوواں گے تے ویلے سِر وڈھاں گے ۔ایس لئی جتھے جتھے موقع مِلدااے ساریاں نال نیکی کرو ،خاص کر ایمانداراں نال۔“
پولُس نے اوہناں نوں جیہڑے خُدا دے کلام نوں جان دے نیں ،اپنے اُستاداں نال ساریاں چنگیاں شیواں ودھاؤن دی نصیحت دتی ۔ اوہدا، ” ساریاں چنگیاں شیواں “ نال کیہ مطلب ہیگا سی ،ایہہ سی پئی رُوح دے مطابق چلن تے خوشخبری دی منادی کرن دی حیاتی نال گواچیاں ہوئیاں روحاں نوں بچاکے خُداوند نوں خوش کرنا سی ۔ اوہ جیہڑے نویں سریوں جمے نیں ،اوہناں نوں ،اوہناں وچ رَلنا چاہی دااے جیہڑے اُنج دا ای دل ، محبت تے اوہو جیہا ای حُلیہ رکھدیاں ہویاں سکھاؤندے تے رُوح دے مطابق چلدے نیں ۔
”پاک کلام دی تعلیم لین والا تعلیم دین والے نوں ساریاں شیواں وچ نال رلائے۔“ چنگیاں شیواں دا مطلب دوجیاں نوں کلیسیا دے راہیں اوہناں دے پاپاں توں بچاؤنا اے ۔ پولُس نے سانوں ہر شے ،اوسے دل ، اوسے دعا تے اوسے جوش نال کرن لئی آکھیا ۔ سانوں لازمی طور اُتے رَل کے خُداوند دا کم کرنا چاہی دااے ۔
پولُس نے آکھیا، ” دھوکہ نہ کھاوو ۔خُدادا مذاق نئیں اُڈایا جاندا ایس لئی پئی بندہ جو کُجھ بیج دا اے اوہو ای وڈھے گا ۔ “ایتھے ، ” مذاق اُڈاؤن “ دا مطلب ،” چھیڈاں کرنیاں تے نکیاں جانن والی اَکھ نال ویکھنا “ ہیگااے ۔ ایس لئی ، ” دھوکہ نہ کھاوو ۔خُدادا مذاق نئیں اُڈایا جاندا“دا مطلب ہیگا اے خُدا نوں چھیڈاں نہ کرو تے نکیاں جانن والیاں اکھاں نال نہ ویکھو ۔مثال طور اُتے ،کسے بندے نوں لازمی طور اُتے خُدا دے کلام نوں ، اوہدا اپنے اکھراں وچ ترجمہ کر کے تے اوہدے اُتے ایمان رکھن وچ ناکام ہون نوں ، سوکھی گل نئیں سمجھنا چاہی دا۔ پولُس نے آکھیا ، ” بندہ جو کُجھ بیج دا اے اوہو ای وڈھے گا ۔ “ ایہدا مطلب ایہہ ہیگا اے پئی ،اوہ جیہڑا بدن وچوں بیج دا اے ، بدی وڈھے گا ، پر اوہ جیہڑا رُوح وچوں بیج دا اے ہمیش دی حیاتی وڈھے گا ۔
اسیں کیہ وڈھاں گے ،جے اسیں پانی تے رُوح دی خوشخبری نال جیوندے آں ؟ اسیں ہمیش دی حیاتی تے اپنے پاپاں توں مکتی پاواں گے۔ اسیں دوجیاں دیاں جاناں دی ،اوہناں دے پاپاں توں مکتی لئی ، اَگوائی کرکے رُوح دے پھل تے خُدا دیاں برکتاں نال ہمیش دی حیاتی پاواں گے ۔
پر اوہناں لوکاں دے بارے وچ کیہ خیال اے ،جیہڑے اپنے بدناں لئی جیوندے نیں ؟ اوہ بدی وڈھن گے ،پر ککھ نئیں ہیگا سگوں آخیریں موت ۔ اوہناں دی موت دے بعدوں اوہناں لئی ککھ نئیں ہیگا اے ۔ بندہ ہتھوں سکھنا جم دا اے تے ہتھوں سکھنا مرجاندااے ۔
جے اوہ دوجیاں نوں اوہناں دے پاپاں توں بچاؤن دا کم کردااے ،اوہ رُوح دے پھل وڈھے گا تے ہمیش دی حیاتی پاوے گا ۔ پر جے اوہ بدنی آساں دے مطابق چلدارہندا اے ،اوہ بدی وڈھدا وڈھدا مُک جاندااے ۔ فیر اوہ لعنتاں وڈھدااے تے لعنتاں دوجیاں تیک کھلاردا اے ۔ایس لئی ، پولُس نے ، جیہڑا ایمان نال جین بارے وچ ہر شے جان دا سی ،اوہنے سانوں بدن مطابق نہ چلن دی نصیحت کیتی ۔
” اسیں نیکی دے کم کرن وچ ہمت نہ ہارئیے،ایس لئی پئی جے بے دل نہ ہوواں گے تے ویلے سِر وڈھاں گے ۔ “ پولُس خُدا دا اک خادم سی جیہڑا رُوح دے مطابق چلیا سی ۔ جدوں لوک پاک کتاب وچ ویکھدے نیں پئی اوہ رُوح دے مطابق چلدا سی ، کئی خورے سوچدے ہون گے پئی پاک رُوح نے اوہنوں ایہو جیہے کم کرن لئی آپ حکم دتا ہووے گا، ” پولُس باقیاں کول جا تے کسے نوں مِل “ یاں ” تینوں اوس بندے توں بچنا چاہی دااے ۔ “ پر ایہہ سچ نئیں ہیگااے ۔
اوہ دوجیاں تیک مکتی دی خوشخبری دی منادی کرن تے اوہناں دیاں رُوحاں بچاؤن وچ مدد کرن لئی رُوح دے مطابق چلداسی ۔ پولُس نے اوہناں نال مِل کے وی خُداوند دی خدمت کیتی ،جیہڑے رُوح دے مطابق چلدے سَن ۔ مسیحیاں دے وچکار ، ایہو جیہے لوک ہیگے نیں جیہڑے رُوح دے مطابق نئیں چلدے سگوں بدنی آساں دے مطابق چلدے نیں ۔ اوہناں نیں پولُس نوں جی آیاں نئیں آکھیا ،سگوں مخالفت کیتی تے ایتھوں تیک اوہدے اُتے الزام لائے ۔ پولُس نے آکھیا ،اوہ اوہناں نال کوئی گل کرنا نئیں چاؤہندا جیہڑے یسوع مسیح دے چیلیاں نال لڑدے تے اوہناں اُتے الزام لاؤندے سَن ۔
جے تسیں رُوح دے مطابق چلنا چاؤہندے او، تہانوں خوشخبری راہیں جیوندے رہناا ے ۔ ختنے کیتے ہویاں نیں پولُس نوں ستایا ۔ گلتیوں ۵ :۱۱ وچ اوہ آکھدااے ، ” تے سُنو بھراوو!میَں جے حالے
تیک ختنہ دی منادی کرداہاں تے حالے تیک ستایا کیوں جاندا ہاں ؟ ایس لئی سولی دی ٹھوکر تے مُک گئی ۔ “ختنے کیتے ہوئے اوہ سَن جیہڑے ،ایہہ آکھدیاں ہویاں ، ختنے دی اوکھیائی دے پہلوان سَن ، ” بھاویں جے کوئی یسوع اُتے ایمان لیا کے نویں سریوں جم پیندااے ، اوہنوں ختنہ کراؤنا پیندااے ۔ جے اوہ اپنے بدن دی کھلڑی اُتے ختنہ نئیں کراؤندااے ،اوہ خُدا دا پُتر نئیں ہیگا اے ۔ “ اوہناں نیں اوہنوں کیوں ستایا سی؟ پولُس ایمان رکھداسی پئی مکتی تے ہمیش دی حیاتی دی برکت صرف یسوع دے بپتسمہ تے اوہدے صلیبی لہو اُتے ایمان لیاؤن نال مِلدی سی ۔ اوہنے ایہہ منادی کیتی سی ۔
جیہڑا ایمان لوکاں نوں راستباز بناؤندااے ،سچیائی نوں سکھیاں تے ایہدی منادی کریاں مِلدا اے ۔ پولُس نے پانی تے رُوح دی سچیائی نوں بوہت ضروری جانیا ۔ اوہنے ایمان رکھیا پئی اوہ جیہڑے سچیائی نوں جان دے سَن رُوح دے مطابق چل سکدے سَن تے ختنے دی کوئی لوڑ نئیں ہیگی سی ۔اوہنے ایہہ منادی کیتی سی ۔ پر ختنے والے ایمان رکھدے سَن پئی ختنہ مکتی پاؤن وچ اک بندے دے ایمان دا بڑا خاص حصہ سی ۔ فیروی ، خُدا ولوں دتی گئی خوشخبری توں اَڈ کوئی دوجی شے نئیں ہیگی اے تے ایس لئی سانوں لازمی طور اُتے ایہدے وچ کسے شے نوں نہ ودھاؤنا چاہی دا اے تے نہ ای گھٹاؤنا چاہی دااے ۔
جدوں پولُس رُوح دے مطابق چلیا ، اوہنوں اکھیوں اک پاسے سُٹ دتا گیا تے اپنے ساتھی یہودیاں ولوں ستایا گیا ، ” جنے لوک بدنی وکھالا چاؤہندے نیں اوہ تہانوں ختنے کراؤن لئی مجبور کردے نیں ۔صرف ایس لئی پئی مسیح دی سولی دے سبب ستائے نہ جان ۔ایس لئی پئی ختنے کراؤن والے آپ وی شریعت اُتے عمل نئیں کردے ،پر تہاڈا ختنہ ایس لئی کرواؤنا چاؤہندے نیں پئی تہاڈی بدنی حالت اُتے فخر کرن ۔ پر خُدا نہ کرے پئی میَں کسے شے اُتے فخرکراں ، صرف اپنے خُداوند یسوع مسیح دی سولی اُتے ، جیہدے نال جگ میرے ولوں سولی اُتے مرگیا تےمیں جگ ولوں ۔ ایس لئی پئی نہ ختنہ کوئی شے ہیگا اے نہ بے ختنہ، سگوں نویں سریوں جمنا۔ “ (گلتیوں۶:۱۲ ۔ ۱۵)۔تے پولُس نے ختنے والیاں نوں آکھیا ، ” جنے لوک بدنی وکھالا چاؤہندے نیں اوہ تہانوں ختنے کراؤن لئی مجبور کردے نیں ۔صرف ایس لئی پئی مسیح دی سولی دے سبب ستائے نہ جان ۔ “
پولُس نے اوہناں نوں جھڑکیا جیہڑے بدنی آساں دے مطابق چلدے سَن ۔اوہ بِنا شک بدنی آساں دے مطابق چلدے سَن تے اوہناں وانگر بوہت سارے لوکیں ہیگے سَن ۔پر پولُس نے اوہناں نال اپنا بول چال ختم کر لیا ۔پولُس نے آکھیا ، ” پر خُدا نہ کرے پئی میَں کسے شے اُتے فخرکراں ، صرف اپنے خُداوند یسوع مسیح دی سولی اُتے ۔ “ یسوع مسیح نے جگ دے سارے پاپاں نوں چُکن لئی یوحنا کولوں بپتسمہ لیا تے پولُس تے ساریاں لوکاں نوں مطلب اے جنیاں نوں ساڈا خُداوند خُدا بلاؤندااے ،بچاؤن لئی سولی اُتے مرگیا ۔ پولُس نے آکھیا، ” پر خُدا نہ کرے پئی میَں کسے شے اُتے فخرکراں صرف اپنے خُداوند یسوع مسیح دی سولی اُتے ۔ جیہدے نال جگ میرے ولوں سولی اُتے مرگیا تے میَں جگ ولوں ۔ ایس لئی پئی نہ ختنہ کوئی شے ہیگا اے نہ بے ختنہ ہونا، سگوں نویں سریوں جمنا۔ “پولُس نے جیہڑا جگ لئی مویا ہویا سی ، یسوع مسیح دے راہیں فیر جیوندارہیا ۔
اسیں اصل وچ یسوع مسیح وچ مرےہوئے آں ۔پر کئی واریں اسیں ایس سچ نوں بُھل جاندے آں ۔سانوں لازمی طور اُتے ایہدے اُتے ایمان رکھنا چاہی دااے ۔ جے اسیں ایس سچیائی اُتے ایمان نئیں رکھدے ،اسیں اپنی بدنی آساں نال تے اپنے خنوادیاں راہیں قید ہیگے آں ،تے ایہہ سانوں خُداوند نال چلن توں روک دااے ۔ ساڈا بدن ایناں ماڑا ہیگا اے پئی ایتھوں تیک پئی ساڈے خنوادے ایہدے پِچھے چلن وچ ساڈی مدد نئیں کرسکدے ۔ صرف خُداوند ساڈی مدد کر سکدااے ۔ پر ہُن اسیں جگ ولوں سولی اُتے مرگئے آں ۔ کویں اک مُردہ دھرتی دے لوکاں دی زمینی معاملیاں وچ مدد کر سکدااے ؟ جیہڑے لوک ایس جگ وچ مُردہ ہیگے نیں ،ایس جگ دیاں شیواں دے مالک نئیں ہوسکدے۔
یسوع جی اُٹھیا سی ۔ اوہدے جی اُٹھن نال سانوں نویں سریوں جمن دی نویں رُوحانی حیاتی دی اجازت ملی ۔ایتھے سانوں نواں کم ، نواں خنوادہ ، نویں آس مِلدی اے ۔ اسیں نویں سریوں جمے ہوئے ہیگے آں ۔سانوں ، اسمان دے سپاہیاں وانگر ،خُدا دے کلام دی منادی کرن دی ذمہ داری ملی اے ۔پولُس نے اقرار کیتا پئی اوہ دوجیاں نوں مکتی دین وچ بدنی طریقیاں نال نئیں سگوں رُوحانی طریقیاں نوں ورتدیاں ہویاں اک بندہ بن گیا ۔ اوہنے آکھیا ،اوہ پہلاں ای مرگیا سی تے یسوع مسیح دے راہیں نویں سریوں جمیا سی ۔ آؤ اسیں اوسے طرحاں دے لوک ہون لئی ہتھ پیر مارئیے ،جیہڑے ساڈیاں عقیدیاں دا اُنج ای اقرار کرن دی ہمت رکھدے نیں ۔
پولُس نے گلتیوں ۶:۱۷ ۔ ۱۸ وچ آکھیا ، ” اگانہہ تو کوئی مینوں تنگ نہ کرے ،ایس لئی پئی میَں اپنے بدن اُتے یسوع دے پھٹ لئی پھردا ہاں ۔ سُنو بھراوو! ساڈے خُداوند یسوع مسیح دا فضل تہاڈی رُوح نال رہوے۔ آمین۔ “ پولُس نے خُداوند یسوع دے پھٹ لَے لئے ۔ اوہ رُوح دے مطابق چلن دے بارے وچ خُداوند لئی اپنی صحت دی فکر نئیں کرداسی ۔ اوہ ایتھوں تیک پئی لکھ نہ سکیا ،جویں ای ہولی ہولی اوہدی نظر مُک گئی ۔ایس لئی اوہدے ساتھیاں ،مثال طور تے طِطس ولوں پولُس دے تھوڑے جیہے خط لکھے گئے سَن ،جدوں اوہ خُدا دا کلام بولدا سی ۔ بھاویں اوہ بدنی طور اُتے ماڑا سی ، اوہ رُوح دے مطابق چلن دے لائق ہون لئی خوش سی تے اوہنے آکھیا ، ” بھاویں ساڈی دِسد ی ہوئی انسانیت مُک دی جاندی اے فیر وی ساڈی رُوحانی انسانیت ہر دیہاڑے نویں ہوندی جاندی اے۔ “(۲ ۔ کرنتھیوں ۴:۱۶)۔
پولُس اوس طرحاں دے لوک بنن دی نصیحت کردااے جیہڑے رُوح دے مطابق چلدے نیں ۔اوہ ایہہ وی آکھدااے ، ” رُوح دے مطابق چلن دا مطلب ، خوشخبری لئی جیوندے رہنا اے ۔“ تہانوں تے مینوں لازمی طوراُتے اپنے دل وچ رکھنا چاہی دااے رُوح دے مطابق چلن دا کیہ مطلب ہیگا اے ۔ سانوں لازمی طوراُتے جھوٹیاں شیواں دے پِچھے نئیں چلنا چاہی دااے تے ایہدی تھاں اُتے خدمت کرنی چاہی دی اے تے خوشخبری لئی جیوندے رہنا چاہی دااے ۔ آؤ اسیں اپنی ساری زندگیاں وچ ایمان نال رُوح دے مطابق چلیے ۔
ہن پانی تے رُوح دی خوشخبری اُتے ایمان رکھن نال ، اصل رُوح ساڈے دلاں وچ ہیگا اے ۔ خُدا خوشی نال جواب دیوے گا ،جے اسیں خوشخبری دی حمایت وچ دعا منگدے آں ۔پاک رُوح دےپھل پیدا کرن دا مطلب اے ، رُوح وچ چلنا تے رُوحاں نوں چھڈاؤنا اے ۔ تسیں پاک رُوح دےپھل جناں دے ناں محبت ۔خوشی ۔ اطمینان ۔تحمل ۔ مہربانی ۔نیکی ۔ ایمانداری ۔ حلم تےپرہیزگاری پیدا کرسکدےاو، جدوں تسیں رُوح دے مطابق چلدے او تے خوشخبری لئی جیوندے رہندے او۔ پانی تے رُوح دی خوشخبری دی منادی کرن لئی ،سانوں لازمی طور اُتے دُکھ سہنا چاہی دااے ، برداشت کرنا چاہی دااے ، مہربان ہونا چاہی دی اے ،تے گواچیاں روحاں نوں لبھ کے بچاؤن دی نیکی کرنی چاہی دی اے ۔
رُوح دے پھل اوہناں توں پیدا ہوندے نیں جیہڑے نیکی کر کے تے خوشخبری دی منادی کرکے گواچیاں روحاں نوں لبھ کے بچاؤندے نیں ۔جیہڑی اوہناں لئی پاک رُوح دی بھرپوری پاؤن دا سبب بندی اے ۔ ایہہ وے رُوح دے پھل پیدا کرن تے رُوح دے مطابق چلن وچ کیہ خرچ ہوندا اے۔
Copyright © 2021 by The New Life Mission