مضمون 10: مُکاشفہ(مُکاشفہ دی کتاب اُتے تفسیر)
[1-2باب] سانوں ستّاں زمانیاں داپتہ ھونا چاھی دا اے (مُکاشفہ ۱:۱۔۲۰)
(مُکاشفہ ۱:۱۔۲۰)
میَں خُداوند دا شکر ادا کردا ہاں جیہڑاسانوں ای س ہنیرےدےزمانے وچ تسلی دیندا اے ۔ ساڈی ایہہ اُمید اے پئی مکاشفہ دی کتاب وچ لکھیا ہویا سارا کجھ پورا ہو جاوے گا ،تے ایس ایمان نال اڈیکاں گے پئی نبوّت دا سارا کلام پورا ہووے گا ۔
مکاشفہ دی کتاب وچ بوہت کجھ لکھیا ہویا اے ۔ بھاویں وڈے اُستاداں دے خیال تے وضاحتاں بوہت چوکھیاں نیں ، ہُن وی کسے ایہو جیہی وضاحت نوں سمجھنا اوکھا اے جیہڑی بالکل پاک کتاب دے عہد دے مطابق ہووے ۔ ایہہ صرف خُدا دا فضل اے پئی ،میَں مکاشفہ دی کتاب نوں پڑھن تے کھوج کرن وچ بوہت چوکھا چِر بسرکرن دے بعد ، ایس کتاب نوں لکھن دے لائق ہویا ۔ ایتھوں تیک پئی جویں میَں ہُن بولدا ہاں، میرا جی مکاشفہ دی سچیائی نال بھرگیا اے ۔ ایس کتاب بارے تبصرے تے پیغام بناؤن دے وچکار وی پا ک رُوح نے مینوں بھریا اے ۔
فیر ایہہ حیرانی دی گل اے پئی ، میرا جی اسمان دے چاء تے ہزار ورہیاں دے جلال نال بوہت چوکھا بھر جاوے گا ۔مَیں ایہہ وی محسوس کیتاپئی ساڈے خُداوند لئی پاک لوکاں دیاں شہادتاں بوہت جلالی نیں ۔ ہُن میَں تہاڈے نال دانائی دا کلام جیہڑا خُدا نے میرے اُتے کھولیا اے ، تے تہانوں ایہنوں سمجھاؤن وچ مدد کرن لئی راضی آں ۔
جدوں میَں مکاشفہ بارےایہہ کتاب لکھدا ہاں ، خُدا دا جلال میرے دل نوں سدا بھردااے ۔ بالکل سچ بولدیاں ہویاں ، میَں اصل وچ ایہہ سوچیا نئیں سی پئی مکاشفہ دا کلام بوہت وڈا اے ۔
خُدا نے یوحنا نوں یسوع مسیح دا جگ وکھایا ۔ مُڈھلے اکھر ، ”یسوع مسیح دا مکاشفہ“ دا کیہ مطلب اے؟ اکھر مکاشفہ دے اکھری مطلب ہیگا اے پئی خُدائی سچیائیاں نوں وکھاؤن یاں دسن دا اک کم اے ۔ یسوع مسیح دے مکاشفے دا مطلب ایہہ ہیگا اے پئی یسوع مسیح دے راہیں آؤن والے دناں وچ کیہ وکھالی دیوے گا ۔ خُدا نے یسوع مسیح دے خادم یوحنا اُتے سارا کجھ وکھ ظاہر کر دتا ، جیہڑا اخیری دناں وچ ہووے گا ۔
مکاشفہ دے کلام بارے پُن چھن کرن توں پہلوں ، اک شے ہیگی اے جیہدے بارے وچ سانوں پہلوں ای یقین کر لینا چاہی دا اے —مطلب اے ، سانوں ایہہ پتہ ہونا چاہی دا اے پئی مکاشفہ وچ لکھیا ہویا نبوت دا کلام اشارے نیں یاں اصلی ۔ مکاشفہ دی کتاب وچ جو کجھ وی لکھیا ہویا اے اوہ سچ مُچ سچیائی اے ۔ جویں پئی رویاواں دے راہیں جیہڑیاں یوحنا نیں ویکھیاں خُدا نے ساڈے اُتے کھول کے وکھایا پئی ایس جگ وچ کیہ ہووے گا ۔
ایہہ سچیائی ہیگی اے پئی بوہت سارے استاداں نیں مکاشفہ دیاں نبوّتاں نوں وکھ وکھ خُدائی خیالاں تے وضاحتاں دے راہیں دسیا اے ۔ ایہہ وہ سچیائی ہیگی اے پئی ایہناں استاداں نیں اپنے وڈیاں گُناں نال مکاشفہ دی سچیائیاں نوں کھول کے دسن دی کوشش کیتی ۔ پر ایس طرحاں دے ریاکاری دیاں مشوریاں نیں مسیحیت دا بوہتا نقصان کیتا اے ، ایس لئی پئی ایہہ بائبل دی سچیائی دے مطابق نئیں سن تے صرف اڑاؤنیاں دا سبب بن دےنیں ۔ مثال طور اُتے ، بوہت سارے گھٹ دل والے استاداں نیں صرف نام دی ، ’ہزار ورہیاں دی بادشاہی دی مخالفت ‘ (amillennialism) دی حمایت کیتی اے — مطلب اے ایہناں دا دعویٰ اے پئی کوئی ہزار ورہیاں دی بادشاہی نئیں ہووے گی ۔ پر ایہو جیہے مشورے بائبل دی سچیائیاں توں بوہت ہٹویں نیں ۔
ہزار ورہیاں دی بادشاہی اصل وچ مُکاشفہ دے باب ۲۰ وچ لکھی ہوئی اے ،جتھے ایہہ لکھیا ہویا اے پئی پاک لوک نہ صرف ایس بادشاہی وچ راج کرن گے سگوں ، اک ہزار ورہے تیک مسیح دے نال وی رہن گے ۔ دوجے پاسے ، باب ۲۱ ، سانوں دسدا اے پئی ہزار ورہیاں دی بادشاہی دے بعدوں ، پاک لوک نویں اسمان تے نویں دھرتی دے وارث بنن گے تے مسیح نال سدا لئی حیاتی بسر کرن گے تے راج کرن گے ۔ ایہہ سارے سچ نیں ۔ بائبل سانوں دسدی اے پئی ایہہ سارے سچ پاک لوکاں دے دلاں وچ اک نشان وانگر پورے ہون اُتے نئیں ،سگوں تاریخ دے حقیقی پورے ہون وانگر محسوس ہون گے ۔
پر اج دے مسیحیاں نوں ویکھدیاں ہویاں ، سانوں لگدا اے پئی ایہناں وچوں بوہتیاں لوکاں کول ہزار ورہیاں دی بادشاہی لئی بوہت گھٹ آس ہیگی اے ۔ جے اوہناں دے مکرن دے دعوے سچے سن تاں ، کیہ ایہدا مطلب ایہہ نئیں ہووے گا پئی خُدا دے پاک لوکاں نال کیتے گئے وعدے صرف پھوکے بول ای ہون گے ؟ جے ایتھے کوئی ہزار ورہیاں دی بادشاہی پاک لوکاں دی اُڈیک وچ نئیں سی ، تے نہ ای نواں اسمان تے دھرتی ، تاں فیر اوہناں لوکاں دا ایمان گیا گواتا ہو جاوے گا جیہڑے یسوع نوں اپنا مکتی داتا من کے اوہدے اُتے ریمان رکھ کے مکتی پا چُکے نیں ۔
اک نال دے ،مضمون اُتے ، اج بوہت سارے خُدائی تعلیم دے ماہر تے خادم دعویٰ کردے نیں پئی مکاشفہ وچ ۶۶۶ دے نشان دی نبوّت صرف نشانی اے۔ پرکوئی غلطی نہ کرو: جدوں ایس نبوت دے پورے ہون دا دیہاڑا آوے گا، تاں اوہناں بے نصیب رُوحاں دا ایمان جیہڑیاں ایس طرحاں دے جھوٹے دعویاں اُتے ایمان رکھدیاں نیں اوہ اکو ای ویلےریت اُتے بنے ہوئے مکان وانگر ڈگ پوے گا ۔
اوہ جیہڑے صرف یسوع دے نام اُتے ایمان رکھدے نیں تے بائبل وچ اوہناں اُتے ظاہر کیتیاں سچیائیاں اُتے یقین نئیں کردے تاں، خُدا اوہناں نال بے دیناں وانگر رویہ رکھے گا ۔ ایہدا صرف ایہو مطلب ہو سکدا اے پئی اوہ نہ صرف خُدا ولوں دتی گئی پانی تے رُوح دی خوشخبری نوں جان دے نیں ، سگوں ایہہ پئی پاک رُوح وی اوہناں دے دلا ں وچ نئیں وسدا ۔ ایہو ای سبب ہیگا اے پئی اوہناں دے دل ہزار ورہیاں دی بادشاہی یاں نویں اسمان تے نویں دھرتی دی کوئی آس نئیں رکھدے جیہدا خُدا نے ساڈے نال وعدہ کیتا اے ۔ ایتھوں تیک پئی جے اوہ یسوع اُتے ایمان رکھدے سن، فیر وی اوہناں دا ایمان خُدا دے لکھے ہوئے کلام دی سچیائی دے مطابق نئیں سی ۔ مکاشفہ وچ جو کجھ لکھیا ہویا اے اوہ خُدا دا کلام اے جیہڑا ساڈے اُتے ظاہرکردااے پئی بالکل تے بوہتی چھیتی ایس جگ وچ کیہ ہون والا اے ۔
مکاشفہ دے باب ۲ تے ۳ وچ آسیہ دیاں سَتّ کلیسیاواں نوں نصیحت دا اکھر لکھیا اے ۔ اوہناں ست کلیسیاواں لئی خُدا دی وڈیائی تے جھڑکاں دونویں ہیگیاں نیں ۔ خاص کر کے ، خُدا نے وعدہ کیتا پئی حیاتی دا تاج اوہناں لوکاں نوں دتا جاوے گا جیہڑے اپنی وفاداری اُتے قائم رہن گے تے اپنے دُکھاں اُتے فتح پاؤن گے ۔ ایہدا مطلب یہہ ہیگا اے پئی پکی شہادت اخیری ویلے دے سارےپاک لوکاں نوں اُڈیکے گی ۔
مکاشفہ دا کلام پاک لوکاں دی شہادت ،اوہناں دے جیوں اُٹھن تے اُٹھائے جان تے ہزار ورہیاں دی بادشاہی تے نویں اسمان تے نویں دھرتی دے وعدے بارے ہیگا اے جیہڑا خُدا نے اوہناں نال کیتا سی ۔
مکاشفہ دا کلام اوہناں لوکا ں لئی وڈا سکون تے انعام ہو سکدا اے جیہڑے اپنی پکی شہادت اُتے یقین رکھدے نیں، پرایہدے کول اوہناں لوکاں نوں دین لئی بوہت تھوڑا اے جیہڑے ایہدے اُتے ایمان نیئں رکھدے ۔ ایس لئی اسیں اخیری ویلے اُتے مکاشفہ تے ایہدے سچیائی دے کلام وچ لکھے ہوئے وعدے دے کلام اُتے اپنے پکے ایمان اُتے بوہت ڈٹ کے رہ سکدے آں ۔
مکاشفہ دے کلام دے بوہت خاص سمجھے جان والے مضمون ، پاک لوکاں دی شہادت ، جیوں اُٹھنا تے اُٹھایاجاناتے ہزار ورہیاں دی بادشاہی تے نواں اسمان تے نویں دھرتی نیں ۔ مڈھلی کلیسیا لئی خُدا دا اراہ تے آس ایہو ای سی پئی پاک لوک اپنی شہادت نال اپنےایمان دی اخیر تیک راکھی کرن ۔ ایہہ ایسے لئی اے پئی خُدا نے اوہناں ساریاں شیواں دا ارادہ بنایا سی پئی اوہنے سارے پاک لوکاں نال شہادت دی گل کیتی سی ۔ خُدا نے دوجے اکھراں وچ سانوں دسیا پئی ، سارے پاک لوک اخیری ویلے اپنی شہاد ت دے راہیں مخالفِ مسیح اُتے فتح پاؤن گے ۔
مکاشفہ دی پوری کتاب نوں سمجھن لئی باباں ۱-۶ دی ساری دی ساری سوچ سمجھ لوڑی دی اے ۔ باب ۱ نوں تعارف وانگر دسیا جاسکدا اے ، جد پئی باب ۲ تے ۳ مُڈھلی کلیسیا دے پاک لوکاں دی شہادت دی گل کردے نیں ۔ باب ۴ خُدا دے تخت اُتے مسیح دےبیٹھن دے بارے دسدااے ۔ باب ۵ سانوں یسوع مسیح دا اوس کتاب نوں کھولن دے باپ دے ارادے تے اوہدے پورے ہون بارے دسدااے ، تے باب ۶ وچ اوہناں ست زمانیاں دا ذکر کیتا گیا اے جیہڑے خُدا نے سارے لوکاں لئی بنائے نیں ۔ باب ۶ نوں سمجھنا خاص کر کے بوہت لوڑی دا اے ، ایس لئی پئی ایہہ تہاڈے لئی سارے مکاشفے نوں سمجھن دا بوہا کھول دیوے گا ۔
باب ۶ نوں ایناں ستا ں زمانیاں دے پکے نقشے وانگر دسیا جا سکدا اے جنہاں دا خُدا باپ نے یسوع مسیح وچ لوکاں لئی ارادہ بنایا اے ۔ خُدا دی ایس پکے نقشے وچ ستا ں زمانیاں لئی خُدائی دانائی ملدی اے جیہڑی خُدا انسانی پیڑھی اُتے لیاؤن والا اے ۔ جدوں اسیں جان دے تے سمجھدے آں پئی ایہہ ست زمانے کیہ نیں ، تاں اسیں ایہہ سمجھن دے لائق ہوواں گے پئی ہُن اسیں ایہناں وچوں کیہڑے زمانے وچ رہندے پئے آں ۔ سانوں ایہہ وی پتہ لگے گا پئی پیلے رنگ دے گھوڑے دا زمانہ ، مخالف ِ مسیح دے آؤن والے زمانے دے خلاف ہتھ پیر مارن تے اوہدے اُتے فتح پاؤن لئی سانوں کس طرحاں دے ایمان دی لوڑاے ۔
جویں پئی مکاشفہ ۶ وچ دسیا گیا اے ، جدوں پہلی مہر کھو لی گئی تاں اک چٹے رنگ دا گھوڑا نکلیا ۔ اوہدے سوار دے ہتھ کمان ہیگی اے ، اوہنوں اک تاج دتا گیا اے ، تے اوہ فتح کرداہویا نکلیا تاں پئی ہور وی فتح کرے ۔ ایتھے چٹے گھوڑے اُتے سوار دا مطلب یسوع مسیح اے ، جد پئی ایس سچیائی دا پئی اوہدے ہتھ کمان سی دا مطلب اے، ایہہ ہیگا اے پئی اوہ شیطان نال مقابلہ کردا رہوے گا تے فتح پاؤند ا رہوے گا ۔ دوجےلفظاں وچ ،چٹے رنگ دے گھوڑے دازمانہ پانی تے رُوح دی خوشخبری دی فتح دا زمانی اے جیہدی خُدا نے دھرتی اُتے اجازت دتی اے ، تے ایہہ زمانہ اوس ویلے تیک جاری رہوے گا جدوں تیک پئی خُدا دے سارے ارادے پورے نئیں ہو جان گے ۔
دوجا زمانہ لال رنگ دے گھوڑے دا زمانہ اے ۔ایہد مطلب شیطان دے زمانےدا آؤنا اے ۔ جیہدے وچ شیطان لوکاں دے دلاں نوں فریب دیوے گا پئی اوہ جنگ کرن ، دھرتی اُتوں سکون چُک لوے گا تے پاک لوکاں نوں ستاوےگا ۔
لال رنگ دے گھوڑے دے ویلے دے بعد کالے گھوڑے دا ویلا آوے گا ، جدوں کال لوکاں دیاں رُوحاں تے بدناں اُتے حملہ کرےگا ۔ ہُن تُسیں تے میَں رُوحانی تے بدنی کال دے ایس زمانےوچ جیوندے پئے آں ۔ جدوں چھیتی آؤن والے دناں وچ پیلے رنگ دے گھوڑے دے زمانےدے نال ایہہ مک جاوے گا تاں فیر مخالف ِ مسیح اُٹھے گا تے اوہدے آؤن دے نال ای سارا جگ مرن والیاں آفتاں وچ پھس جاوے گا ۔
پیلے رنگ دے گھوڑے دا زمانہ چوتھا زمانہ اے ۔ ایس زمانے وچ ، جگ ست نرسنگیاں دیاں آفتاں وچ پھس جاوے گا ، جتھے جنگل دا اک تہائی حصہ سڑ جاوے گا ، سمندر دا اک تہائی حصہ لہو بن جاوے گا ، ستھرے پانی دا اک تہائی حصہ وی لہو بن جاوےگا ، تے سورج تے چن دا اک تہائی حصہ ، آفتاں دے سبب ، ہنیراہو جاوے گا ۔
پنجواں زمانہ پاک لوکاں دے جیوں اُٹھن داتے چُکے جان دا زمانہ اے ۔ جویں پئی مُکاشفہ ۶: ۹-۱۰ وچ لکھیا اے ، ” تے جد اوس پنجیویں مُہر توڑی تے مَیں قُربان گاہ دے ہیٹھ اوہناں دِیاں رُوحاں ویکھیاں جیہڑے خُدا دے کلام تے گواہی اُتّے قیم رہن دے سببّوں مارے گئے سن۔ تے اوہ اُچّی اُچّی آکھن لگِیاں پئی اَے مالک قُدُّوس تے سچے تُوں کد تِیکر انصاف نا کریں گا تے زمین دے رہن والیاں توں ساڈے خُون دا بدلہ نا لَویں گا؟ “
چھیواں زمانہ پہلے جگ دی بربادی اے ۔ مکاشفہ ۶: ۱۲۔۱۷ دے مطابق ، ” تے جد اوس چھیویں مُہر توڑی تے مَیں ویکھیا پئی اِک وَڈا سارا بھنچال آیا اے۔ تے سُورج بورے وانگر کالا تے سارا چَنّ لہو وانگر ہوگیا۔ تے اسمان دے تارے اینج زمین اُتّے ڈِگّ پئے۔ جیویں زور دی ہنیری نال ہنجیر دے بُوٹے نالوں کچّے پَھل ڈِگّ پَیندے نیں۔ تے اسمان اینج کھِسک گیا جیویں لِکھیا ہویا مُٹّھا وھلیٹن نال کھِسک جاندا اے۔ تے ہر اِک پہاڑ تے ٹاپُو اپنے اپنے تھاں توں ٹل گئے۔ تے زمین دے بادشاہ تے امیر تے فوجی سردار تے مالدار تے زوراور تے سارے غلام تے اَزاد پہاڑاں دِیاں کُھندڑاں تے چٹاناں دے وِچ جا لُکے۔ تے پہاڑاں تے چٹاناں نُوں آکھن لگّے پئی ساڈے اُتّے ڈِگّ پَوو تے سانُوں اوہدی نظر توں جیہڑا تخت اُتّے بَیٹھا ہویا اے تے لیلے دے غضب توں لُکا لوؤ۔ کیوں جو اوہناں دے غضب دا وَڈا دِن آگیا اے۔ ہُن کون کھلو سکدا اے؟ “
فیر ،ستویں زمانے وچ کیہ ہووے گا جیہڑا خُدا نے ساڈے لئی بنایا اے ؟ اوس اخیری زمانے وچ، خُدا پاک لوکاں نوں اپنی ہزار ورہیاں دی بادشاہی تے نواں اسمان تے نویں دھرتی دیوے گا ۔
تاں ، ہُن اسیں ایہناں ستاں زمانیاں وچوں کیہڑے زمانے وچ رہندے پئے آں ؟ لال گھوڑے دا زمانہ لنگھ گیا اے ،جیہدے وچکار جگ نوں بوہت ساریاں جنگاں نیں برباد کر دتا سی ، اسیں کالے گھوڑے دے زمانےوچ جیوندے پئے آں ۔
مکاشفہ دا سارا کلام منفی طور تےنئیں ،سگوں پاک لوکاں لئی اک مثبت رُوح وچ لکھیا گیا اے ۔ خُدا نے فرمایا پئی اوہ نہ صرف ایہہ چاؤہندا اے پئی اوہ اخیری ویلے دے منن والیاں نوں اپنی ہزار ورہیاں دی بادشاہی دی آس دیوے ، سگوں ایہہ وی پئی اوہ اوہناں نوں جگ وچ یتیم نئیں چھڈے گا ۔
پر،مکاشفے وچ وکھائی گئی سچیائی نوں سمجھن لئی ،سانوں پہلوں ایہو جیہاں جھوٹیاں تعلیماں نوں ردّ کرنا چاہی دا اے جویں پئی دکھ جرن توں پہلوں چُکے جان ، ہزار ورہیاں دی بادشاہی دی مخالفت کرن والے ، تے دکھ جرن دے بعد چُکے جان دے خیال ، تے پاک کتاب ول دھیان کرنا چاہی دا اے ۔
خُدانے یسوع مسیح وچ ساڈے لئی سات زمانے تیار کیتے نیں ۔ ایہہ ست زمانے خُدا دے جگ نوں بناؤن دے شروع وچ ای یسوع مسیح وچ پاک لوکاں لئی بنائے گئے سن ۔ فیر وی پئی بوہتے استاد خُدا ولوں بنائے گئے ایہناں ستاں زمانیاں نوں نئیں سمجھدے ، اوہناں نیں مکاشفہ دے کلام اُتے صرف اپنیاں ای وضاحتاں تے بے بنیادگلاں سنائیاں نیں ، لوک ایہدے توں وی بوہتااڑاؤنی وچ پھس گئے نیں ۔ پر سانوں ساریاں نوں خُدا دے بنائے ہوئے ستاں زمانیاں نوں پچھاننا چاہی دا اے ، تے ایس سچیائی بارے تعلیم تے ایمان رکھ کے ، اوہنے جیہڑے کم ساڈے لئی کیتے نیں اوہدا شکر ادا کرنا تے جلال دینا چاہی دا اے ۔ پاک لوکاں لئی خُدا دے سارے ارادے ایناں ستاں زمانیاں وچ تیار تے پورے ہوئے نیں ۔
میَں یقین رکھدا ہاں پئی ہُن تیک میری گل بات نے تہانوں مکاشفے دے تعارفی حوالے دی کجھ خاص سُدھ بدھ دتی اے ۔ مکاشفہ دی کتاب دے راہیں ، اسیں ایہہ ویکھدےآں پئی خُدا دی مخلوق نیں ایہناں ستاں زمانیاں نوں شروع کیتا جیہڑے اوہنے یسوع مسیح وچ پانی تے رُوح دی خوشخبری نال بنائے سن ۔ ایہناں ستا ں زمانیاں نوں سمجھن نال، ساڈا ایمان ہور پکا ہووے گا ۔ تے ایہناں نوں سمجھ کے ،سانوں پتہ لگے گا پئی کالے گھوڑے دےزمانے وچ رہندیاں ہویاں کس طرحاں دیاں اکھیائیاں سانوں اُڈیکدیاں نیں ،تے ایہہ سوچ کے ای ، اسیں ایمان دے راہیں حیاتی بسر کرن دے لائق ہوواں گے ۔
پاک لوک — مطلب اے مَیں تے تُسیں —خُدا دے راہیں تیار کیتے گئے ستاں زمانیاں وچوں اک جدوں پیلے رنگ دے گھوڑے دا زمانہ آوے گا تاں شہید ہوواں گے ۔ جدوں پاک لوکاں نوں ایہدی سمجھ آوے گی تاں ، اوہناں دے دل اُمیدنال بھرجان گے تے اوہناں دیاں اکھاں اوہ ویکھن گئیاں جیہڑا کجھ اوہناں نیں پہلوں نئیں ویکھیا ۔ جدوں خُدا دیاں بندیاں تے پاک لوکاں نوں شہادت دےزمانے دے چھیتی آؤن دا احساس ہووےگا ، تاں اوہناں دیاں حیاتیاں سارے گند توں پاک ہو جان گئیاں ، ایس لئی پئی جویں ای اوہناں نوں پتہ لگے گا پئی اوہ پیلے رنگ دے گھوڑے دے دناں وچ شہید ہو جان گے ، اوہناں دے دل تیار ہو جان گے بھاویں جد اوہناں نوں ایس ویلے ایہدا احساس نئیں ہوندا اے ۔
اسیں سارے ایسے طرحاں شہید ہوواں گے جویں مڈھلی کلیسیا دے پاک لوکاں نوں شہید کیتا گیا سی ۔ تہانوں ایہہ چیتا رکھنا چاہی دا اے پئی جدوں پیلے رنگ دے گھوڑے دا زمانہ آوے گا ، شہادت کھرے پاک لوکاں لئی اٹل سچیائی بن جاوے گی ، اوہناں دی شہادت دے فوری بعدوں ای اوہناں دا جیوں اُٹھنا ہووے گا ۔
شہادت دے بعدوں جیوں اُٹھنا ہووے گا ،تے جیوں اُٹھن دے بعدوں چُکیا جانا، تے چُکے جان دے نال اسمان اُتے خُداوند دے نال ساڈا میل جول ہووےگا ۔ پاک لوکاں دی شہادت دے بعدوں ، ساڈا خُداوند پاک لوکاں نوں موت توں جیونداکرےگا تے اوہناں نوں چُک کے اسمان وچ ویاہ دے جشن وچ شامل کرے گا ۔
جدوں پاک لوکاں دے چُکے جان دا زمانہ آوے گا تاں ، دھرتی ساری دی ساری برباد ہو چُکی
ہووے گی ایہہ لوکاں دے رہن دے لائق نئیں ہووےگی ۔ جنگلاں دا اک تہائی حصہ سڑ گیا ہووے گا ۔ سمندر ، ندیاں تے ایتھوں تیک پئی سوتے لہو ہو جان گے ۔ کیہ تُسیں ایہو جیہے جگ وچ ہور رہنا چاہؤ گے جیہو جیہی تہانوں بالکل لوڑسی ؟ پاک لوکاں کول شہادت وچ رَلن دا ہو ر وی سبب ہووے گا ، جویں پئی جگ لئی کوئی آس باقی نئیں رہوے گی۔
کیہ تُسیں ڈر نال کمبدے ہوئے ایہو جیہے برباد جگ وچ رہنا پسند کردے او ؟ بالکل نئیں !اخیری ویلا پاک لوکاں دی شہادت اے ، تے ایہدے بعدوں ایہناں دا جیوں اُٹھنا تے چُکیا جانا ، تے اوہناں دےجیوں اُٹھن تے چُکے جان نال ہزارورہیاں دی بادشاہی تے نویں اسمان تے نویں دھرتی اُتے خُدا دے نال سدا رہن دا جلال اے ۔
بائبل سانوں گل کھول کے دسدی اے پئی وڈے دکھاں نوں جرن دے وچکار دے بعدوں—مطلب اے ، ست ورہیاں دے زمانے دے ساڈھے تِن سال—پاک لوک اپنے ایمان نال مخالفِ مسیح دے خلاف کھلون اُتے شہید کیتے جان گے ،تے ایہدے بعدوں اوہناں دا جیوں اُٹھنا تے چُکیا جانا تے مسیح دا دوبارہ آؤنا ہووے گا ۔ دوجے اکھراں وچ ، مسیح دی واپسی تے پاک لوکاں دا جیوں اُٹھنا تے چُکیا جانا وڈے دکھ جرن دے وچکار اوہناں دی شہادت دے بعدوں ہون والے نیں ۔ ہُن ویلا آگیا اے پئی تُسیں ایہو جیہے سرناویاں بارے بوہتی خاص سوچ رکھو ۔
کیہ اسیں اوس ویلے وی شہید ہو سکدے آں ایتھوں تیک پئی جدوں خُدا دے تیار کیتے گئے پیلے رنگ دے گھوڑے دا زمانہ اجے نئیں آیا ؟ بالکل نئیں ۔ پر ”دکھ جرن توں پہلوں چُکے جان دا نظریہ“ایہہ سکھاؤندا اے پئی سارے پاک لوکاں نوں وڈے دکھ جرن دے شروع ہون توں پہلوں ای خُدا ولوں چُک لیا جاوے گا، تے اوہ ایس طرحاں ست ورہیاں دے دکھ جرن وچوں کسے اک وچوں وی لنگھ نئیں سکن دے ۔ ایہہ خیال دعویٰ کردا اے پئی کوئی شہادت نئیں ہیگی اے،تے ایہہ بھروسہ نئیں رکھدا پئی پیلے رنگ دے گھوڑے دا زمانہ پاک لوکاں وچ آوے گا ۔
جے ایہہ ”دکھ جرن توں پہلوں چُکے جان دا نظریہ“ سچا اے تاں ، فیر ، مُکاشفہ دے باب ۱۳ وچ دسی جان والی پاک لوکاں دی شہادت دا کیہ مطلب اے ؟ ایتھے ایہہ گل بالکل کھول کے دسی گئی اے پئی پاک لوکاں نوں شہید کیتا جاوے گا ایس لئی پئی اوہ ، جنہاں دے نام خُدا دی حیاتی دی کتاب وچ لکھے ہوئے نیں ،اوہ شیطان دے اگے نیویں نئیں ہون گے ۔
جیہڑے لوک ”دکھ جرن دے بعدوں چُکے جان دا نظریہ “ پڑھاؤندے نیں اوہناں وچ وی پیلے رنگ دے گھوڑے دے زمانے،تے پاک لوکاں دی شہادت ، جیوں اُٹھن تے چُکے جان دے بارے وچ ٹھیک سمجھ دا گھاٹا اے ۔ ایس خیال دے مطابق ، پاک لوک ستاں آفتاں دے نرسنگے وجن تیک ایس دھرتی اُتے اوس ویلے تیک جیوندے رہن گے ۔ پر مکاشفہ سانوں گل کھو ل کے دسدااے پئی پاک لوک دا جیوں اُٹھنا تے چُکیا جانا اوس ویلے ہووے گا جدوں اخیری فرشتہ نرسنگا پھوکے گا—ایس توں پہلوں ، دوجے اکھراں وچ ، خُدا دے غصے دے ست پیا لے لُدے جان۔ ایہو ای سبب ہیگا اے پئی مکاشفہ پانی تے رُوح دی خوشخبری اُتے ایمان رکھن والیاں لئی وڈا سکون تے برکت دا کلام اے ۔
”ہزار ورہیاں دی بادشاہی دی مخالفت کرن والے “ لوکاں نوں صرف پریشانیاں تے اڑاؤنیاں سناؤندے نیں ،تے ایہہ سچیائی نئیں اے ۔ ساڈے خُداوند نے اپنے چیلیاں نال جیہڑا وعدہ کیتا سی—پئی پاک لوکاں نوں پنج یاں دس شہراں اُتے راج کرن دا حق دتا جاوے گا — ایہہ ہزار ورہیاں دی بادشاہی وچ ہووے گا ۔
تہانوں چیتا رکھنا چاہی دااے پئی دکھ جرن توں پہلوں چُکے جان، دکھ جرن دے بعدوں چُکے جان ، تے ہزار ورہیاں دی بادشاہی دی مخالفت کرن والے خیالی نظریے بے بنیاد دعوے نیں جیہڑے صرف ایمانداراں لئی شک تےاڑاؤنی دا سبب بن دے نیں ۔
فیر خُدا نے سانوں مکاشفہ دی کتاب کاہدے لئی دتی ؟ اوہنے ستاں زمانیاں دے راہیں سانوں اپنی سیانف وکھاؤن تے یسوع دے چیلے بنن والیاں نوں اسمان دا اصل یقین دلاؤن لئی مکاشفہ دا کلام دتا ۔
ایتھوں تیک پئی حالے وی ، سارا کجھ خُدا دے ارادے مطابق ہوندا پیا اے۔اسیں جیہڑےزمانے وچ ہُن رہندے پئے آں اوہ کالے گھوڑے دا زمانہ اے۔ چھیتی آؤن والے دناں وچ ، کالے گھوڑے دا ایہہ زمانہ بوہت چھیتی لنگھ جاوے گا تے پیلے رنگ دے گھوڑے دا زمانہ آجاوے گا ۔ تے پیلے رنگ دے گھوڑے دے زمانے دے نال ای مخالفِ مسیح دے ودھن دے نال پاک لوکاں دی شہادت شروع ہوجاوے گی ۔ ایہہ زمانہ اوہ زمانہ اے جیہدے وچ سارا جگ مخالفِ مسیح دے اِکو راج دے ہیٹھاں اک مُٹھ تے اکٹھا ہو جاوے گا ۔ یسوع دے چیلیاں نوں لازمی طور اُتے ہُنے تیاری کرنی چاہی دی اے تے اپنے ایمان نال پیلے رنگ دے گھوڑے دےزمانےدے چھیتی آؤن نال مقابلہ کرن لئی تیاررہنا چاہی دا اے ۔
Copyright © 2021 by The New Life Mission