مضمون 10: مُکاشفہ(مُکاشفہ دی کتاب اُتے تفسیر)
[3-4باب] خُدا دے خادم تے پاک لوک جیہڑے اوہدے دل نو ں خوش کردےنیں (مُکاشفہ۳:۷-۱۳)
)مُکاشفہ۳:۷-۱۳)
اج وی فِلدِلفیہ دی کلِیسیاوانگر بوہت ساریاں کلِیسیاواں ہیگیاں نیں
خُدا سانوں ایتھے دسدا اے پئی آسیہ دیاں ست کلِیسیاواں وچوں ، فِلدِلفیہ دی کلِیسیا دی سب توں بوہتی تعریف کیتی گئی تے خُداوند ولوں محبت کیتی گئی سی ۔ اج دے دناں وچ وی ،اسیں ویکھ سکدے آں پئی خُدا ،جوکجھ آسیہ دیاں ست کلِیسیاواں نوں فرماؤندا اے، چاہندااے پئی اوہدیاں کلِیسیاواں فِلدِلفیہ دی کلِیسیا وانگر بنن، اوہ اوہناں دے راہیں کم کرنا تے اوہناں توں خوش ہونا چاہندااے ۔ ایتھوں تیک پئی اج دے دناں وچ وی کلِیسیاواں جنہاں دی خُدا تعریف کردااے اوہ پانی تے رُوح دی خوشخبری دی منادی کردیاں پئیاں نیں ۔
ہُن تیک ، پا ک لوک جیہڑے خُدا نال وفادار نیں ، ایتھوں تیک پئی جے اوہناں دے گُن بوہت گھٹ نیں ، اوہناں کلِیسیاواں نال تعلق رکھدے نیں جیہڑیاں پانی تے رُوح دی خوشخبری دی منادی کردیاں نیں ۔ خُدا ایہو جیہے بندیاں توں خوش ہوندا اے۔ ہو سکدا اے اوہناں وچوں کوئی وی اپنے ہتھاں دے رکھے جان نال بدرُوحاں نوں کڈھن یاں نبوت کرن دے لائق نئیں ہو سکدا اے۔ خورے اوہناں وچوں کسے نوں وی اوہناں دے اوپریاں بولیاں وچ بولن دا خاص تحفہ نئیں مل سکدا ، تے نہ ای اوہناں نوں قائل کرن دی طاقت دتی جا سکدی اے ۔ صرف اکو کم جیہڑا او ہ کردے نیں پئی اوہ ایمان لیاؤندے تے ایہہ منادی کردے نیں پئی یسوع نے ای ساڈے سارے پاپاں نوں اکو ای واری پاک کر دتا اے تے ایس سب کجھ لئی اوہنے یوحنا کولوں بپتسمہ لے کے سارے لوکاں دے سارے پاپاں نوں اپنے اُتے چُک لیا ، تے ایہہ پئی ساڈے سارے پاپ دی سزا سولی اُتے اوہدے لہو نال مسیح اُتے لدی گئی سی ۔
ایہہ کم کرن والے اوہناں پاک لوکاں توں ہٹ کے دوجے نئیں ہیگے جیہڑے خُداوند دے پچھے چلدے نیں ، اوسے دی بھگتی کردے نیں ، تے پانی تے رُوح دی خوشخبری اُتے اپنے ایمان نال اوہدے مرضی پچھے چلدے نیں ۔ اوہ جیہڑے پانی تے رُوح دی خوشخبری دی منادی کردے نیں اوہ پیسے دھیلے نال دولت من نئیں ہیگے ۔ نہ ای اوہناں کول کوئی ہور تحفہ اے ۔ پانی تے رُوح دی خوشخبری دی منادی کرن لئی اوہناں کول جو کجھ ہیگا اے اوہ اوہناں دا ایمان تے جوش اے ۔ اوہ ایمان رکھدے نیں پئی خوشخبری ودھان داایہہ کم کرنا خُداوند دے دل نوں خوش کرنا اے ، ایس لئی پئی سچ مُچ خُداوند نے یوحنا دے راہیں بپتسمہ لیا سی ، سولی اُتے ماریا گیا ، تے ساڈے سارے پاپاں نوں مکاؤن لئی مویا ں وچوں جیوں اُٹھیا ۔ اوہ جیہڑے پانی تے رُوح دی خوشخبری اُتے ایمان رکھدے نیں اوہ صرف خُداوند دا شکر ادا کردے نیں تے اوسے دے پچھے چلدے نیں ۔
اسیں جو کجھ چاہندے آں اوہ ایہہ ہیگاا ے پئی پانی تے رُوح دی ایہہ خوشخبری ہر اک بندے تیکر اپڑ جاوے،تے ہر کسے نوں اپنے سارے پاپاں توں مکتی مل جاوے ۔ خُدا نے حیران کرن والے طریقے نال سانوں سارے جگ وچ پانی تے رُوح دی خوشخبری دی منادی کرن دی اجازت دتی اے ، تے اوہنے سانوں برکت دتی اے پئی بوہتا پھل لیا سکیے ۔ تے اوہنے سانوں ایہہ ایمان وی دتا اے جیہدے نال اسیں اخیری ویلیاں وچ اپنی شہادت نوں قبول کرسکدے آں ، تے ہزار ورہیاں دی بادشاہی دی زندگی تے ساڈے چُکے جان دی برکت دتی اے ۔ خُدا نے سانوں خُداوند لئی شہید ہون دی اجازت دتی اے ، تے اوہنے سانوں پہلےجیوں اُٹھن وچ شامل ہون تے اسمان دے جلال دے لیڑے پاؤن دی اجازت دتی اے ۔
ساڈے وچوں جیہڑے ہُن پانی تے رُوح دی خوشخبری دی منادی کرن لئی پکے ہو گئے نیں خُدا دی سوہنی کلِیسیا نال تعلق رکھدے نیں۔
آؤ اسیں ایس بارے وچ سوچئے پئی اسیں سارے جگ وچ پانی تے رُوح دی خوشخبری کِیویں ودھا سکدے آں ۔ خُدا اپنیاں کلِیسیاواں نوں دسدا اے پئی خوشخبری دی منادی دا بوہا پہلوں ای کھولیا گیا اے ۔ ایس لئی پئی خُدا نے جو کجھ تیار کیتا اے اوہنوں کوئی نئیں روک سکدا ، اوہ لازمی طور اُتے سارے دا سارا پورا کرے گا ۔
خُدا نے ساڈے وچوں جیہڑے پانی تے رُوح دی خوشخبری اُتے ایمان رکھدے آں اوہدے بپتسمے دی ایس خوشخبری نوں سارے جگ وچ ودھاؤن دی اجازت دتی اے ۔ ایتھوں تیکر پئی ہُن وی
اوہدیاں کلِیسیاواں برکت والیاں نیں پئی اوہ ایس دھرتی اُتے پانی تے رُوح دی خوشخبری نوں ودھاؤن لئی کم کردیاں پئیاں نیں ۔ جدوں اوہناں دے وکھ وکھ گُنا ں نوں ویکھیا جاوے تاں ، اوہ کمیاں نال بھرے ہو سکدے نیں ۔ پر ایس لئی پئی اوہناں دے دلاں وچ پانی تے رُوح دی خوشخبری نال اوہناں دی محبت نظر آؤندی اے ، ایس لئی خُدا اوہناں نوں پکیاں کرکے کھلاردا تے اوہناں دے راہیں کم کردا اے ۔ایس جگ وچ حالے وی ایہو جیہیاں کلِیسیاواں ہیگیاں نیں جیہڑیاں جگ لئی اک بوہت وڈی آس نیں ۔ خُدا نے اوہناں نوں پانی تے رُوح دی خوشخبری ودھاؤن دا کم دتا اے ، تے اوہنے ایہہ وی پکا بنایا اے پئی کوئی وی اوہناں دے کماں نوں روک نئیں سکدا ۔اوہ پانی تے رُوح دی خوشخبری دی منادی جگ دے چارے پاسے کردے پئے نیں ، تے ایس طرح ایہہ خوشخبری سارے جگ وچ ودھدی پئی اے ۔ خُدا اوہناں نوں طاقت دیندااے ، اوہناں دی رکھی کردااے ، تے اوہناں نال کم کردا اے ۔ ہُن اسیں ویکھاں گے پئی خُدا اوہناں لوکاں نوں برکت دیندا اے جیہڑے اپنے آپ نوں ایس کم وچ اکٹھے کردے نیں تے رُوحانی تے بدنی طور اُتے جگ دیاں ساریاں قوماں وچ پانی تے رُوح دی خوشخبری نوں ودھاؤندے نیں ۔
اسیں اپنیاں کاغذ والیاں تے برقی کتاباں دے راہیں ایس جگ دے چارے پاسے پانی تے رُوح دی خوشخبری دی منادی کردے پئے آں ۔ اسیں ایہہ کم جگ دےاخیر تیکر کردے رہواں گے ،تے خُداوند وی ساڈے راہیں کم کردا رہوے گا جدوں تیکرمسیح دی بادشاہی ایس دھرتی اُتے پوری نئیں ہو جاندی ۔ خُدا سانوں ساڈیاں کتاباں دے راہیں جگ دے۶.۷ ارب لوکاں تیکر پانی تے رُوح دی خوشخبری دی منادی کرن دی توفیق دیوے گا ۔ خُدا سانوں ساریاں نوں برکت دیوے !
اوہ کم کرن لئی جیہڑے خُدا نوں خوش کردے نیں ، سانوں سدا رُوحانی لڑائی لئی تیار رہنا چاہی دا اے ۔ ایسےطرح ، میَں خُدا دے اگےدعا کردا ہاں پئی اوہ اپنے سارے خادماں نوں طاقت دیوے تے برکت دیوے ۔ ساڈے خُداوند ورگا کوئی وفادار نئیں ہیگا ۔ میَں بھروسہ کردا ہاں پئی ایس جگ وچ کوئی ہور سچیائی نئیں ہیگی ، ایتھوں تیکرپئی اک وی نئیں ہیگی ، جیہڑی سانوں خاص تے کامل مکتی دے سکدی ہووے ، سچی خوشخبری جیہدے اُتے اسیں ایمان رکھدے آں ، پانی تے رُوح دی خوشخبری ساڈے کول لیا ئی اے ۔
مُکاشفہ دی کتاب خُدا دا برکت والا کلام اے جیہڑا جِتن والیاں نوں دتا گیا اے
خُدا سانوں دسدااے ، ” جیہڑا جتے مَیں اوہنوں اوس زِندگی دے بُوٹے نالوں جیہڑا خُدا دی بہشت وِچ اے۔ پَھل کھان نُوں دیاں گا۔ “ ایس سچیائی دا مطلب ہیگا اے پئی خُدا ایہو جیہے لوکاں نوں اپنی ہزار ورہیاں دی بادشاہی وچ رہن دی اجازت دیوے گا ۔ ایتھے” جیہڑا جتے “دا مطلب اوہ لوک نیں جیہڑے اخیری ویلے وچ مخالفِ مسیح دے خلاف سچیائی نال لڑ کے اپنے ایمان دی راکھی کردے نیں ، تے ، اج دے دناں وچ ، اوہ لوک جیہڑے سچیائی دے کلام اُتے اپنے ایمان نال جھوٹی خوشخبری پچھے چلن والیاں دے خلاف لڑدے تے اوہناں توں جِت جاندے نیں ۔ سانوں سارے جگ وچ پانی تے رُوح دی خوشخبری دی منادی کر کے بھلیائی نال بُریائی اُتے فتح پاؤنی چاہی دی اے ۔ سانوں پانی تے رُوح دے کلا م اُتے اپنے ایمان دے راہیں سارے جھوٹیاں تے جھوٹیاں نظریاتی سوچاں دے خلاف لڑائی کرنی تے اوہناں اُتے فتح پاؤنی چاہی دی اے ۔
جھوٹیاں دے خلاف لڑن تے اوہناں اُتے فتح پاؤن لئی ، سانوں سدا پانی تے رُوح دی خوشخبری دے کلام دی جُگالی کرنی چاہی دی اے ۔ جے اسیں ہُن پانی تے رُوح دی خوشخبری اُتے ایمان رکھدے آں تے اپنے سارے پاپاں توں پاک ہو جاندے آں ، ایس طرح جھوٹیاں دے خلاف ساڈی لڑائی اوسے ویلے توں شروع ہو جاندی اے ۔ اوہ جیہڑے کھری خوشخبری اُتے ایمان رکھدے نیں اوہناں دے خلاف لڑدے نیں تے اوہناں اُتے فتح پاؤندے نیں جنہاں دے کول جھوٹی خوشخبری اے ۔
سانوں سدا جھوٹی خوشخبری دے ایہو جیہے پچھے چلن والیاں اگے پانی تے رُوح دی خوشخبری دی منادی کرنی چاہی دی اے ۔ کاہدے لئی ؟ ایس لئی پئی پانی تے رُوح دی خوشخبری دی طاقت اوہناں دے جھوٹے ایمان نوں مکا سکدی اے تے اوہناں نوں نویں زندگی دے سکدی اے ۔ بائبل بھلیائی نال بُریائی اُتے فتح پاؤن لئی سانوں دسدی اے ۔ ایس طرح ، سانوں کدی وی رُوحانیت دی اپنی چنگی لڑائی نوں چھڈنا نئیں چاہی دا جیہڑی اوہناں لوکاں نوں اوہناں دے پاپاں توں بچاؤندی اے ۔
ساڈی رُوحانی لڑائی وچ لوکاں دی مکتی دی برکت ہیگی اے ۔ پانی تے رُوح دی خوشخبری اُتے اپنے ایمان نال سدا جھوٹیاں دے خلاف لڑن تے اوہناں اُتے فتح پاؤن دے راہیں ، اسیں خُدا نوں ہمیش دے زندگی دے سارے پھل دے سکدے آں ۔
خُداوند نے سانوں انجیر دےبُوٹے دی مثال توں سکھن لیے آکھیا
انجیر دا بُوٹا بنی اِسرائیل دی نسل دی نشانی اے ۔ ایس لئی پئی ہر نسل اپنا نسلی پھُل یاں بُوٹا رکھدی اے ، بنی اِسرائیل لئی ایہہ انجیر دا بُوٹااے جیہڑا ایہدی نشانی اے ۔ تہانوں ایہہ سوچنا چاہی دا اے پئی جدوں بنی اِسرائیل پتیاں نال سنگھنا ہووے گا تاں ، اخیری ویلے جگ دے بوہت نیڑے آجاوے گا ۔ بائبل سانوں دسدی اے پئی جدوں بنی اِسرائیل دی نسل ایس دھرتی اُتے دوبارہ بنے گی تے تگڑی ہووے گی فیر خُداوند واپس آوے گا ۔
اَج کل اخبار اِسرائیلیاں تے فلسطینیاں وچکار جھگڑے نوں کجن والیاں کہانیاں نال بھرے ہوئے نیں ۔ بنی اِسرائیل نے ہُن اپنے پُرانے علاقے اُتے قبضہ کیتا اے تے اک بوہت وڈ ی طاقت بن گیا اے ۔ بنی اِسرائیل دا آؤن والا ویلا ہُن سارا خُدا اُتے بھروسہ اے ۔آؤن والے ویلے وچ بنی اِسرائیل ترقی کرے گا یاں فناہ ہووے گا ، ایہہ سارا خُدا دے کلام دے مطابق پورا ہووے گا ۔ تے جدوں بنی اِسرائیل اِس دھرتی توں مُک جاوے گا، تہانوں ایہہ پتہ ہونا چاہی دا اے پئی اوس ویلےایس دھرتی اُتے خُداوند دا دوبارہ آؤنا پورا ہووے گا ۔ جویں پئی بائبل آکھدی اے پئی خُداوند پر ت آوے گا جدوں انجیر دے بُوٹے دے پتے سنگھنے ہون گے ، اوہ بنی اِسرائیل دی بحالی تے ترقی دے راہیں ایس جگ دے مُکن دی پیشین گوئی کردا اے ۔ ایہہ وی پیشین گوئی کردا اے پئی اخیری ویلیاں وچ بربادیاں ہون گئیاں جیہڑیاں جگ دے قدرتی ماحول نوں دُکھاں بھریا کردین گئیاں ۔
خُدا نے ساریاں نوں پانی تے رُوح دی خوشخبری اُتے ایمان رکھن لئی آکھیا اے ۔ خُدا دے سارے ارادے پانی تے رُوح دی خوشخبری اُتے ایمان اُتے مکدے نیں ۔ اِنج ای ، جیہڑے پانی تے رُوح دی خوشخبری اُتے ایمان رکھدے نیں اوہ اپنے سارے پاپاں توں مکتی پا چُکے نیں ۔ خُداوند نے سانوں دسیا ، ” پر ہر ویلے جاگدے رہو تے دُعا منگو پئی تُسی ایہناں سارِیاں شیواں توں جیہڑیاں ہون والِیاں نیں بچ سکو۔ تے اِبنِ آدم دے اگّے کھلو سکو۔ “(لوقا ۲۱: ۳۶)۔اپنی طاقت نال ، اسیں آؤن والے دکھ جرن توں نئیں بچ سکدے ۔ سگوں خُدا دے کلام اُتے ایمان رکھ کے ، اسیں ایہدے اُتے فتح پاسکدے آں۔ ہُن اسیں اپنے آپ نوں اک ایہو جیہے حال وچ سمجھدے آں جتھے سانوں ساڈے نیڑے آؤن والے دکھ جرن دے ویلے لئی اپنی شہادت دے ایمان نوں تیار کرنا پوے گا ۔
جےمسیحی سمجھدے نیں پئی اخیری ویلے آؤن اُتےاوہ اپنے آپ وڈے دکھ جرن دے ویلے وچ موجود نئیں ہون گے تاں ، اوہناں دا ایمان بوہت غلط اے ۔ سانوں دکھ جرن توں پہلوں چُکے جان دے خیال اُتے ایمان نئیں رکھنا چاہی دا ۔ ایہہ نظریہ بائبل دی سچیائی توں باہر اے ، بائبل ، خاص کر کے مُکاشفہ دی کتاب ، سانوں دسدی اے پئی پاک لوکاں دی شہادت اوس ویلے ہووے گی جدوں دکھ جرن دے ست ورہیاں دے زمانےدے پہلے ساڈھے تِن ورہے لنگھ گئے ہون گے ۔ پاک لوکاں لئی ، ایہہ سوچنا پئی اوہ وڈے دکھ جرن دے ست ورہیاں دے زمانے وچ نئیں وڑن گے ایہہ اوہناں نوں اک بوہت خطرے بھرے تے پُٹھی سوچ والے ایمان ول لے جاوے گا ۔ تہانوں ایہہ پتہ ہونا چاہی دا اے پئی اوہ لوک جیہڑے یسوع اُتے ایمان رکھدے نیں اوہ وڈے دکھ جرن دے وچکار ہون گے ۔
خُدا دے سارے کلام اُتے غور تے فکر کردیاں ہوئیاں ، پاک لوک کدوں تیکر ایس جگ وچ رہن گے ؟ اوہ ایس دھرتی اُتے اوس ویلے تیکر موجود رہن گے جدوں تیکر شیطان پاپیاں نوں اپنا نشان لین بارے نہ آکھے تے پاک لوک مخالفِ مسیح دی فوج ہتھوں شہید نہ کر دتے جان ۔ ایہہ خُدا ولوں وکھائی گئی سچیائی ، تے ٹھیک ایمان اے ۔
اخیری ویلیاں وچ ہون والی وڈی رُوحانی لڑائی
راستباز ایمان داانجام خُدا ولوں ٹھہرائے گئے وڈے دکھ جرن دے ویلیاں وچ بوہت کھول کے وکھایا گیا اے ۔تہانوں ایہہ پتہ ہونا چاہی دااے پئی پانی تے رُوح دی خوشخبری اُتے تہاڈے ایمان توں اڈ ، تُسیں اخیری ویلیاں وچ شیطان دے خلاف لڑائی وچ اصل جِت نئیں پا سکو گے ۔ پر ایہدے نال ای ، تہانوں ایہہ وی خاص کر کے سمجھنا پوے گا پئی اخیری جِت راستباز لوکاں دی ای ہووے گی ۔ جویں پئی پانی تے رُوح دی خوشخبری اُتے اپنے ایمان نال اوہ اصل فتح پاؤن گے ، ایتھوں تیکر پئی جگ دی اخیر نیڑے ہیگی اے ۔ ایسے طرح ، سانوں اخیری ویلے دے آؤن توں پہلوں ای سارے جگ وچ پانی تے رُوح دی خوش خبری دی منادی دا کم پورا کرنا پوے گا ۔
سانوں پانی تے رُوح دی خوشخبری اُتے ایمان رکھ کے اپنے خُداوند نوں خوش کرنا چاہی دااے ۔
ساڈے کول پانی تے رُوح دی خوشخبری اے ، ایمان دا اوہ کلام جیہڑا سانوں کامل جِت دے سکدا اے ۔ خُدا ایس جگ دے مکن دی خاص کر کے نشانی وکھاؤندا پیا اے ۔ سانوں ایہہ وی سمجھنا چاہی دا اے پئی خُداوند اوس ویلے پرت آوے گا ، پئی اوہ پاک لوکاں نوں اسمان اُتے چُک لوے گا ، تے اوہ اوہناں لوکاں نوں بوہت دکھ دیوے گا جیہڑے اوس ویلے تیکر ایس جگ وچ باقی ہون گے ۔ ایسے طرح ، سانوں پانی تے رُوح دی خوش خبری اُتے ایمان رکھ کے ، اخیری ویلیاں نوں بسر کرنا چاہی دا اے ، جیہڑا کھرے ایمان نال بھریا ہویا اے ۔ خُدا نے پانی تے رُوح دی خوشخبری اُتے ایمان رکھن والیاں نوں ایمان نال ہزار ورہیاں دی بادشاہی دی اُڈیک کرن لئی آکھیا اے ، بالکل اوسے طرح جویں اوہنے نوح دے ویلے وچ آکھیا سی پئی جگ دی اخیر اوس ویلے ہوئی سی جدوں لوک کھاندے تے پیندے سن ۔
پانی تے رُوح دی خوشخبری اُتے ایمان رکھیوں اڈ ، لوک جگ دے اخیری ویلیاں دے ساریا ں مسئلیاں نوں حل نئیں کر سکدے ۔ ہر طریقے نال ، سانوں پانی تے رُوح دی خوشخبری اُتے ایمان رکھنا چاہی دا اے ۔ اوہ جیہڑے پانی تے رُوح دی خوشخبری اُتے ایمان نئیں رکھدے ،اوہ خُدا ولوں بالکل سوکھے طریقے نال پیار محبت نئیں پا سکدے ۔ خُدا خاص موقعیاں دے اخیری ویلے وچ ایس جگ اُتے سب توں بوہتیاں ڈراؤنیاں آفتاں لیاوے گا ۔ ایس لئی پئی اوہ لوک جیہڑے پانی تے رُوح دی خوشخبری اُتے ایمان نئیں رکھدے اوہ خُدا دی جائز سزا توں نئیں بچ سکدے ، اوہناں نوں ہُن خاص کر کے ایس خوشخبری اُتے ایمان رکھنا چاہی دا اے ۔
خُدا دی سزا توں بچن لئی ، ایس لئی ، ہر کسے لئی پانی تے رُوح دی خوشخبری دے بارے وچ جاننا تے سچے دلوں ایہدے اُتے ایمان رکھنا بوہت ضروری ہیگا اے ۔ مکتی دی سچیائی جیہڑی ساریاں لئی بوہت لوڑی دی اے پانی تے رُوح دی خوشخبری اے ۔ خُدا دے اگے کوئی دوجی کھری خوشخبری نئیں ہیگی سگوں ایہہ پانی تے رُوح دی خوشخبری اے ۔پہلوں توں بوہتی چوکھی ، ہُن ایس جگ نوں پانی تے رُوح دی خوشخبری دی بوہت خاص لوڑ اے ، ایس لئی پئی ایہہ اپنے پاپ دی عادت نال ڈوہنگھے پاپ وچ رہندی اے ۔
ایس لئی پئی ایس اخیری دناں وچ ہُن آؤن والے ویلے دا کوئی بھروسہ نئیں ، لوک ہر دیہاڑے پاپ کردے نیں تے صرف دلی خوشی لبھدے نیں ۔ ساریاں لوکاں لئی کھری آس پانی تے رُوح دی خوشخبری دے کلام وچ ہیگی اے ،تے صرف ایہو ای کلام سانوں ساڈی کھری آس دے سکدا اے ۔ فیر وی جگ ایہو جیہا جگ بن گیا اے جیہڑا خُدا نوں نئیں لبھدا۔ ایس لئی پئی تُسیں پاپی ہیگے تے بوہت چھیتی تہاڈے پاپاں دی خُدا ولوں سزا دتی جاوے گی ، تہانوں یسوع ولوں دتی گئی پانی تے رُوح دی خوشخبری اُتےسچے دلوں ایمان رکھنا چاہی دا اے ۔ فیر ای تُسیں خُدا دی ڈاہڈی سزا توں مکتی پاؤن دے لائق ہو سکو گے ۔ بائبل ہر کسے نوں اپنے پاپاں توں توبہ کرن ، خُدا ول پرتن ، تےپانی تے رُوح دی خوشخبری پاؤن دی ہدایت کردی پئی اے ۔
جگ د ی اخیر اک ایہو جیہا ویلا اے جدوں لوک کھاندیاں تے سوندیاں ہوئیاں پاپ وچ ، ایتھوں تیکرپئی ایہدے بارے سوچیوں اڈ ، اگ تے گندھک دے دریاوچ وڑ جان گے ۔
لوکاں نوں خُداولوں دتی گئی اپنے پاپاں توں مکتی لازمی پاؤنی چاہی دی اے ، پر پانی تے رُوح دی خوشخبری نوں جانیوں اڈ ، کِیویں اوہ اپنے پاپاں توں مکتی پاسکدے نیں ؟ ہر کسے نوں ایہہ پتہ ہونا چاہی دا اے پئی اوہنے اپنے پاپاں دے سبب خُدا دی ڈاہڈی سزا نوں پاؤنا اے ، تے ایہہ جاننا چاہی دا اے پئی پانی تے رُوح دی خوشخبری ای مکتی دی سچیائی اے تے برکت والا کلام اے ۔
بائبل سانوں جگ دے اخیر دے ٹھیک دن تے گھنٹے بارے نئیں دسدی ۔ جگ دے اخیر دا ویلا لُکاؤنا خُدا دی دانائی اے ۔ جے خُدا ایس مکن والے ویلے نوں وکھاؤندا ، تاں ایس توں بوہت بے نصیبی جمنی سی ۔ ایس لئی خُدا نے سزا دے دیہاڑے نوں لوکاں توں لُکایا ۔ پر جدوں خُدا دا تیار کیتا ہویا ویلا آجاوے گا تاں ، سارا کجھ اوسے دے راہیں پورا ہووے گا ، تے اک کامل نویں جگ دا شروع ہووے گا ۔
خُدا ایس خاص حوالے وچ فرماؤندااے ، ” ایس کر کے پئی تُوں میرے صبر دے کلام اُتّے عمل کِیتا ایس لئی مَیں وی ازمایش دے اوس ویلے تیری حفاظت کراں گا۔ جیہڑا زمین دے رہن والیاں دے ازمان لئی ساری دُنیا اُتّے آؤن والا ہے۔ “ایہہ کلام خُدا دا وعدہ اے پئی اوہ پاک لوکاں نوں اوہناں ستاں مصیبتاں تو ں بچاوے گا جیہڑیاں اوہناں دی شہادت دے بعدوں ایس جگ اُتے آؤن گئیاں۔پر، ایہدا مطلب ایہہ نئیں ہیگا پئی اوہ اخیری ویلیاں وچ پاک لوکاں نوں مخالفِ مسیح دے ہتھوں شہید ہون اوہناں اُتے کُٹ مار کرن توں چھڈاوے گا ۔ بوہت ساریاں لوکاں نوں خُدا دی ڈاہڈی سزا جرنی پوے گی ایس لئی پئی اوہناں نیں پانی تے رُوح دی خوشخبری اُتے ایمان نئیں رکھیا سی تے اپنے پاپاں توں معافی نئیں پائی سی ۔ ایہدے نتیجے وچ ، اوہناں دیاں پاپی رُوحاں نوں دوزخ وچ سُٹ دتا جاوے گا ۔ پر خُدا پہلوں پاک لوکاں دی شہادت دی اجازت دیوے گا ، ایس لئی پئی ایہہ شہادت ای اے جیہڑی اوہناں نوں ڈاہڈیاں مصیبتاں توں بچاوے گی۔
اخیری ویلیاں دے دکھاں وچ لوک کس طرح دا نشان پاؤن گے ؟
بائبل سانوں دسدی اے پئی لوک مخالفِ مسیح دے ناں دا نشان پاؤن گے ۔ سگوں مُکاشفہ دا کلام ایہہ وی دسدااے پئی جیہڑے لوک اپنے متھے اُتے یاں سجی بانہہ اُتے مخالفِ مسیح دے ناں دا نشان لیندے نیں اوہ اگ تے گندھک دے دریا وچ سُٹے جان گے ۔ مخالفِ مسیح دے ناں دا ایہہ نشان پا کے ، اوہ سدا لئی شیطان دے قیدی ہو جان گے ۔ پاپ کرن والیاں لئی اگ تے گندھک دا دریا خاص رکھیا گیا اے ۔
فضل دے زمانہ، جدوں لوکاں نوں ایمان دے راہیں اوہناں دے پاپاں توں بچایا جا سکدا اے ، ہُن ایہہ زمانہ لنگھدا پیا اے۔ بائبل وچ لکھیا اے اخیری ویلیاں وچ شہیدبوہت چوکھے ہون گے ۔ ایس لئی پئی اوہناں شہیداں دے ناں حیاتی دی کتاب وچ لکھے گئے نیں ، ایس لئی اوہ مخالفِ مسیح دے ناں دے نشان نوں اپنے آپ ردّ کر دین گے ۔
خُدا سانوں دسدا اے پئی جیہڑے لوک پانی تے رُوح دی خوشخبری اُتے ایمان رکھدے نیں اوہ سارے اوس ویلے شہید ہوجان گے ۔ اوہ شیطان دا نشان لین توں مکرن اُتے شہید ہو جان گے ۔ جیہڑے لوک راستباز بن گئے نیں اوہناں نوں اخیری ویلیاں دی شہادت توں ڈرنا نئیں چاہی دا ، سگوں ایہدی تھاں اُتے ، اوہناں نوں ہزار ورہیاں دی بادشاہی لئی خُدا دا شکر ادا کرنا چاہی دا اے جیہڑی اوہناں دی شہاد ت دے بعدوں اوہناں نوں اُڈیکدی اے ۔
ایس لئی پئی مخالفِ مسیح دے ناں دا نشان لینا بوہت بے وفائی دا کم اے جیہڑا ساڈے خُداوند نال غداری کرنا اے ، ایس لئی سانوں ایہنوں ردّ کرنا چاہی دا اے ۔ اسیں سارے اپنی شہادت پا سکدے آں ، ایس لئی پئی اوس ویلے خُدااُتے ایمان رکھنا خُدانوں جلال دینا اے ۔ساڈاخُداوند سانوں دسدا اے پئی اوہ پاک لوکاں نوں ساریاں مشکلاں اُتے فتح پاؤن دی طاقت دیوے گا۔
خُدا دی کلیسیا نوں کِیویں تے کِدوں تیکر پانی تے رُوح دی خوشخبری دی منادی کرنی چاہی دی اے ؟
کدوں تیکر ساڈے خُداوند نے سانوں پانی تے رُوح دی خوشخبری ودھاؤن دی اجازت دتی اے ؟ ایہدا جواب اے وڈے دکھ جرن وچ ساڈی شہادت دے ویلے تیکر۔ خُدا نے راستبازاں لئی خوشخبری دی منادی دا بوہا کُھلا رکھیا اے ، تاں پئی اوہ اوس ویلے تیکرپانی تے رُوح دی خوشخبری دی منادی کر سکن۔ اوہناں دی شہادت دے اوس ویلے تیکر ،راستباز لوک پانی تے رُوح دی خوشخبری دی منادی کردے رہن گے ۔ ایہدے بعدوں ایس دھرتی اُتے ڈاہڈے دکھ آؤن گے ۔
حالے ، راستباز تے پاپی لوک خُداوند ولوں دتی گئی سوہنی فطرت وچ اکو جیہے نیں ۔ وڈے دکھ جرن دے ویلے تیکر ، راستبازاں نوں پانی تے رُوح دی خوشخبری دی منادی کرن دے بعدوں ، اپنے ایمان نوں کھرا رکھنا چاہی دا اے تے خُداوند نوں اُڈیکنا چاہی دا اے ۔ راستباز لوکاں نوں خوشخبری دی واہی بیجی نوں ودھاؤن دی لوڑ اے۔
اخیری ویلیاں وچ ،جدوں سانوں حیوان دا نشان لین لئی مجبور کیتا جاوےگا ، سانوں اپنے خُداوند ولوں دتی گئی پانی تے رُوح دی خوشخبری اُتے ایمان رکھ کے جگ دے لوکاں دے خلاف لڑنا تے اوہناں اُتے فتح پاؤنی پوے گی ۔ جدوں اسیں اخیری ویلیاں وچ مخالفِ مسیح دے ہتھوں شہید ہو جاواں گے تاں ساڈا ایمان جِت جاوے گا ۔ راستبازلوکاں دی ساری زندگی خُداوند اُتے بھروسہ کردی اے ۔ جے اوہ خُداوند دے کلام اُتے ایمان رکھدے نیں تاں ، اوہ اوہناں نوں دکھاں دے ویلے توں بچاوے گا ، تے جے اوہ جگ دے اخیر تیکر خوشخبری دی منادی کرن گے تاں ، خُدا اوہناں نوں جِتن والی زندگی دیوے گا ۔ راستباز لوکاں نوں لازمی اج تے کل ہر تھاں اُتے،کھری مکتی دی خوشخبری دی منادی کرنی چاہی دی اے ۔
سانوں ساریاں نوں اپنے خُداوند دے پرت کے آؤن دی اُڈیک رکھی چاہی دی اے تے اوس انعام لئی جیہڑا سانوں اُڈیکدا اے اوہدے وفادار رہنا چاہی دا اے جدوں ہزار ورہیاں دی بادشاہی سانوں دتی جاوے گی ۔ جدوں خُداوند ایس دھرتی اُتے پرت کے آوے گا تاں ، راستباز لوکاں نوں ہزار ورہیاں دی بادشاہی دتی جاوے گی ۔ راستباز فیر رَل کے خُدا دے جلال دے لیڑے پاؤن گے ۔
پر ہُن لئی ، ایس دھرتی اُتے رہندیاں ہوئیاں سانوں لازمی طور اُتے پانی تے رُوح دی خوشخبری
دی منادی کردیاں رہنا چاہی دا اے ، اخیری ویلیاں تیک ، جدوں اسیں ہور ایس کم نوں کرن دے لائق نئیں ہوواں گے ۔ خوشخبری جیہڑی پاپیاں نوں اوہناں دے پاپاں توں مکتی دیندی اے ، پانی تے رُوح دی خوشخبری اے ، جیہڑی پاپ دے اصل فدیے دی خوشخبری اے ۔
ایس دھرتی اُتے پانی تے رُوح دی خوشخبری دی منادی کردے ہوئیاں جگ دے اخیر تیکرجیوندے رہن دے بعدوں ، راستباز خُداوند نال ملن گے ، اک ہزار ورہے تیکرراج کرن گے ،تے جدوں ہزار ورہیاں دی بادشاہی مُک جاوے گی ، خُدا دی ہمیش دی بادشاہی وچ وڑن گے تے سدا خُداوند دے نال رہن گے ۔ میَں ایمان نال خُداوند دا شکر ادا کردا ہاں ۔ سانوں ایہہ آس دین لئی خُداوند دا ہو ر وی شکریہ ادا کرنا چاہی دا اے ۔
فِلدِلفیہ دی کلِیسیاخُدادی خاص سوہنی کلیسیاسی جیہڑی ، بھاویں تھوڑی جیہا زوررکھدی سی تاں وی، خُدا دی مرضی اُتے چلدی تےیسوع دےناں دا انکار نئیں کیتا
خُدا نے ایس فِلدِلفیہ دی کلیسیا نوں دکھاں دے ویلے توں بچاؤن دی اپنی خاص برکت دتی سی ۔ ایہہ برکت پاپ توں معافی دی برکت اے ، ہزار ورہیاں دی بادشاہی وچ زندگی بسر کرن دی ، تے خُدا دی ہمیش دی بادشاہی دے وارث بنن دی برکت اے ۔ اوہ مسیحی جیہڑے حالے وی پاپیاں وانگر باقی رہن گے اوہناں اُتے خُدا دیاں برکتاں بند ہو جان گئیاں ۔ پر راستباز اک ہزار ورہے تیکر راج کرن گے ۔
خُداوند پاک لوکاں نوں اوہناں دی شہادت دے راہیں ایس دھرتی اُتوں چُک لوے گا ، تے فیر ایس جگ اُتے دکھ جرن دیاں بوہت چوکھیاں مصیبتاں گھلے گا ۔ خُدا بھلیائی نوں بُریائی توں وکھ کرے گا تے پاپیاں نوں سزا دیوے گا تے اوہناں نوں فناہ کرے گا ۔ خُدا راستباز لوکاں نال پیا رکردا اے ، خاص کر کے اوہناں لوکاں نال ، جیہڑےصرف تھوڑے جیہے زور نال ای ، اوہدے کلام اُتے قیم رہندے نیں تے جگ دے اخیرتیکرخوشخبری دی منادی کردے نیں ۔ پاک لوک جنہاں دا ایہو جیہا ایمان سی تے جیہڑے ایس طرح دیاں کلیسیاواں نال میل جول رکھدے سن سچ مُچ مبارک سن ۔ خُدا ایہو جیہے راستباز پاک لوکاں توں خوش سی ۔
خُدافرماؤندا اے پئی اوہ اوہناں لوکاں نوں انعام دیوے گا جیہڑے شیطان دے خلاف لڑدے نیں تے اپنے سچے دلوں پانی تے رُوح دی خوشخبری اُتے ایمان رکھ کے شیطان اُتے فتح پاؤندے نیں ۔
ایس دھرتی اُتے بوہت سارے مسیحی ہیگے نیں جیہڑے یسوع اُتے ایمان رکھن دا دعویٰ کردے نیں تے فیر وی شیطان دے دھوکے وچ نیں ۔ مکتی دے کم ، جنہاں نیں سارے پاپیاں نوں ایس دھرتی اُتے یسوع دے آؤن نال اوہناں دے پاپاں توں مکتی دتی اے ، اوہدے دو راستباز کماں دے راہیں ملی اے ۔ مکتی دے ایہناں کماں اُتے ایمان ایہہ مننا اے پئی یردن دے دریاوچ اپنے بپتسمے نال جگ دے سارے پاپا ں نوں اپنے اُتے چُک لیا سی ، تے ایہہ پئی اوہنے جگ دے ایہناں پاپاں نوں سولی تیکر لَے جا کے اپنے ای لہو نال ایہناں سارے پاپاں لئی اپنی سزا نال مکتی دا ایہہ کم پورا کیتا ۔ ایہہ مکتی دی خوشخبری اے ، پاپ دی معافی دی خوشخبری جنہے پاپیاں نوں بچایا اے ۔
پر اوہ لوک جیہڑے ایمان دا گھا ٹا رکھدے نیں ،”اوہ لوک نیں جیہڑے یسوع دے بپتسمے اُتے ایمان رکھیوں اڈ ای بے پا پ ہون دا دعویٰ کردے نیں ۔ “ایہو جیہا ایمان جھوٹا اے ۔ دوجے پاسے ، کجھ لوک ایہہ دعویٰ کردے نیں پئی کوئی وی یسوع نال اونی محبت نئیں کردا جنی اوہ کردے نیں ، پر ایہدے نال ای اوہ اپنے آپ نوں پاپی وی دسدے نیں ۔پر ساڈا خُداوند اوہناں توں ہٹ کے جیہڑے پانی تے رُوح دی خوشخبری اُتے ایمان رکھدے نیں کسے نوں وی اسمان وچ وڑن دی اجازت نئیں دیندا ۔ اوہ اپنی حیاتی دی کتاب وچ پاپیاں دے ناں نئیں لکھدا ۔ صرف اوہناں دے ناں جیہڑےپانی تے رُوح دی خوشخبری اُتے ایمان رکھدے نیں خُداوند دی حیاتی دی کتاب وچ لکھے گئے نیں ۔
خُدا دے راہیں دتی گئی پاپ توں مکتی ، ”کوئی کیہ کردا اے “دے سبب نئیں ملدی ، سگوں ایہدی تھاں اُتے ایہہ صرف ”کوئی کیہ ایمان رکھدا اے “دے سبب مل سکدی اے ۔ ایس ایمان وچ ، پہلا غور تے فکر ایہہ ہیگا اے پئی یسوع خُدا دا پُتر اے تے ساڈا مکتی داتا اے ، تے دوجا ، یسوع دا بپتسمہ تے اوہدا صلیبی لہو ساڈی مکتی لئی پورے دے اٹل مکتی دے کم نیں ۔ تے سانوں مسیح دے جیوں اُٹھن تے اوہدی دوجی واری آؤن اُتے وی ایمان رکھنا چاہی دا۔
متّی ۷: ۲۱-۲۳”نا ہر کوئی جیہڑا مینوں خُداوند خُداوند آکھدا اے اسمان دی بادشاہی وچ وڑے گا پر اوہ جیہڑا میرے باپ دی جو اسما ن اُتے اے مرضی پوری کردااے ۔اوس دیہاڑے بتھیرے مینوں آکھن گے خُداوندا خُداونداتیرا ناں لے کے نبُوّتاں اساں نئیں سن کیتیاں ؟ تے تیرا ناں لے کے بدرُوحاں نئیں کڈھیاں ؟ تےتیرا ناں لے کےڈھیر ساریاں کراماتا ں نئیں وکھائیاں ؟ تے میَں اوہناں نوں تد صاف آکھاں گا پئی میَں کدی تہانوں نیئں جانیاں ۔اے شریعت توڑن والیو میتھوں دُراڈے ہو جاؤ ۔ “یسوع کاہدے لئی ایہناں لوکاں دا انکار کرے گا ؟ ایس لئی پئی پاپیاں دے ناں خُداوند دی حیاتی دی کتاب وچ نئیں لکھے جا سکدے ۔ اج کل بوہت سارے لوک یسوع اُتے اپنے مکتی داتا وانگر ایمان رکھن دا اقرار کردے نیں ، پر اوہناں وچوں بوہتے لوک یسوع دے بپتسمے اُتے ایمان نئیں رکھدے جیہڑا یسوع نے یوحنا کولوں لیا سی ۔
ایس طرح ، اوہناں دے ناں زندگی دی کتاب وچ نئیں لکھے گئے نیں ۔ فیر وی ایہہ پاپی خُداوند دی بادشاہی وچ جان دی کوشش کردے نیں ایتھوں تیکر پئی اوہ اپنے سارے پاپاں نوں چُکی پھر دے نیں ۔ پر ، اوہ، ایہدے وچ وڑ نئیں سکدے ۔ کئی لوک ایہنے دلیر نیں پئی اوہناں نوں پک اے پئی اوہ اسمان وچ وڑ سکدے نیں ایتھوں تیکر پئی بھاویں اوہناں وچ پاپ وی نیں۔ ایہوجیہے لوک خُدا دی دتی ہوئی مکتی اُتے ایمان نئیں رکھدے ،سگوں اپنے گھمنڈنال اپنے بنائے ہوئے طریقے اُتے قیم رہندے نیں ۔او ہ جنہاں دا ایمان جھوٹا اے اوہ ایہہ ایمان نئیں رکھدے پئی یسوع ای خُدا اے تے نہ ایس سچیائی اُتے پئی یسوع نے اپنے بپتسمے دے راہیں جگ دے پاپاں نوں اپنے اُتے چُک لیا سی ، تے نہ ای ایہدے اُتے پئی اوہ ایہناں سارے پاپاں نوں سولی اُتے لے گیا اے ۔ ایہہ لوک یسوع نوں صرف جگ دے چار وڈے سیانیاں وانگر سمجھدے تے ایمان رکھدےنیں ۔ ایہو جیہے لوک پاپی نیں ایتھوں تیکر پئی جے اوہ یسوع نوں اپنا مکتی داتا من دے نیں ۔ پر ،خُداوند ، دے کول اوہناں پاپیاں نوں دین لئی کجھ ہیگا اے۔ ”پر کیہ اے ؟ “تُسیں پچھ سکدے او ، ٹھیک اے، دوزخ توں ہٹ کے کوئی وی اوہناں دی اُڈیک نئیں رکھدا !
اسیں راستباز لوکاں نوں ، جنہاں دے پاپ معاف ہوگئے نیں ، پانی تے رُوح دی خوشخبری اُتے ساڈے ایمان نال ، جگ دے مکن تیکر جھوٹیاں نال لڑنا تے اوہناں اُتے فتح پاؤنی ہووے گی ۔ راستباز لوک جیہدے اُتے ایمان رکھدے نیں اک اصل غلطی نئیں ہیگی ۔ خُداوند دے پرت آؤن دے دیہاڑے تیکر ، اسیں کدی وی خوشخبری اُتے اپنے ایمان لیاؤن نوں نئیں چھڈ سکدے ۔ جیہدے نال اسیں اپنے خُداوند اُتے بھروسہ رکھدے آں ، بھاویں کوئی وی کجھ وی آکھے ۔ کھراکلام جیہدے اُتے راستباز لوکاں دا ایمان اے اوہ خاص کر کے خُدا ولوں ملدا اے ۔ایہدی گواہی خُدا دے کلام وچ دتی گئی اے ۔ خُدا نے ایہنوں آپنے آپ ایہدے بارے خاص کر کے فرمایا اے ۔ خُدا نے آپنے آپ ساڈے پاپ نوں معاف کرن دا وعدہ کیتا اے ۔ راستباز لوکاں نیں اپنے سارے پاپاں توں مکتی پائی اے تے یسوع دے بپتسمے تے اوہدی سولی اُتے ایمان رکھ کے کامل بن گئے نیں ۔ کیہ ایہدے وچ کوئی خاص یاں تعریف دے لائق گل ہیگی اے جیہڑی ساڈے بارے وچ پاپی آکھدے پئے نیں ؟ بالکل وی نئیں ! راستباز لوکاں نوں خُدا دے کلام اُتے ایمان رکھ کے پانی تے رُوح دی خوشخبری اُتے اپنا ایمان قیم رکھنا چاہی دا اے ۔
ہن قدرتی آفتاں دا ویلا آگیا اے تے آؤن والے دناں وچ ، ایس زمین اُتے ایٹمی جنگ وی ہووے گی ۔ تے قدرتی آفتاں بوہت وڈیاں فناہ کرن والیاں تیار کیتیاں گئیاں نیں ۔ خُدا دے خادماں نوں خاص کر کے ویکھنا چاہی دا اے پئی ایس جگ وچ کیہ ہون والا ا ے تے ایہدی منادی کرنی چاہی دی اے ۔ تہانوں ایہہ سوچنا چاہی دا اے پئی جگ دی اخیر اچانک ہو سکدی اے ۔ جدوں جگ وچ ایٹمی جنگ دا شروع ہوندااے تاں ، قدرتی آفتاں بوہت چوکھیاں ودھ جاندیاں نیں تے حیوان دا نشان ساڈے اُتے زور پاؤندااے — مطلب اے ، جدوں ساڈی شہادت تے جیوں اُٹھن ،تے ہزار ورہیاں دی بادشاہی دے بنن دا ویلا آوے گا — ایہہ ایس دھرتی اُتے مسیح دے پرت آؤن دا ویلا اے ۔ ساریاں شیواں خُداوند دے سبب واقع ہوندیاں نیں تے پوریاں ہوندیاں نیں ۔
ایہدے توں کوئی فرق نئیں پیندا پئی کوئی کیہ آکھدا اے ، سانوں جگ دے اخیر تیکر خُدا دے کلام اُتے ایمان رکھنا چاہی دا اے تے ایس ایمان نوں قیم رکھنا چاہی دا اے ۔ خُداونددے پچھے چلدے ہوئیاں ، مشکلات توں دھیان ہٹاکے ، سانوں پکے یقین نال پانی تے رُوح دی خوشخبری اُتے اپنے ایمان نوں قیم رکھنا تے ودھاؤنا چاہی دا اے ۔
آؤ اسیں اپنیاں زندگیاں بسر کرئیے جیہڑیاں خُداوند دی آس رکھدیاں نیں ۔ آؤ اسیں پاپیاں نوں پانی تے رُوح دی خوشخبری نال اوہناں دے پاپاں دی معافی لئی تیار کرئیے ! میرا ایمان ہیگا اے پئی ساڈے خُداوند نے پہلوں ای اسمان دیاں ساریاں برکتاں راستباز لوکا ں لئی بچا کے رکھیاں نیں تے ایہہ سانوں اڈیکدیاں پئیا ں نیں ۔ سانوں مویاں وچوں جیوں اُٹھن تے پاک لوکاں دے بدل جان دے ویلے دے آؤن توں پہلوں ایس دن دی تیاری کرنی چاہی دی اے۔ تہاڈی زندگی بوہت خالی اے ایہدا گِلہ کرنا چھڈ دیوو، تے ایہدی تھاں اُتے پانی تے رُوح دی خوشخبری اُتے ایمان رکھو ۔
جدوں تُسیں سچیائی دی خوشخبری نوں پہلو ں ای جان دے او ، تاں تُسیں ایہدے اُتے ایمان رکھن توں انکار کر کے دوزخ وچ رہن دا انتخاب کِیویں کر سکدے او ؟ زندگی دے خالی ہونے اُتے پریشان ہون دی بجائے ، سانوں پانی تے رُوح دی خوشخبری اُتے ایمان دےراہیں اپنے سارے پاپاں توں مکتی پاؤندے ہوئیاں ہزار ورہیاں دی بادشاہی لئی تیار ی کرنی چاہی دی اے ۔ ایس طرح دے ایمان نال اپنی زندگی بسر کرن دے بعدوں ،جویں فِلدِلفیہ دی کلیسیا دی ، خُداولوں تعریف کیتی گئی اے ، اسیں پکے یقین نال اپنے خُداوند نال ہَوا وچ ملاں گے ! ہیلیلویاہ!.
Copyright © 2021 by The New Life Mission