مضمون 10: مُکاشفہ(مُکاشفہ دی کتاب اُتے تفسیر)
[17-1باب] اوس کنجری دی سزا جیہڑی وڈے پانیاں اُتےبیٹھی ہوئی اے (مُکاشفہ ۱۷:۱۔۱۸)
)مُکاشفہ ۱۷:۱۔۱۸)
” تے اوہناں ستّاں فرِشتیاں وِچوں جِنہاں کول سَتّ پیالے سن اِک آ کے مَینُوں ایہہ آکھیا۔ پئی ایدھر آ مَیں تینُوں اوس وڈّی کنَجری دی سزا وکھاواں جیہڑی وڈّے پانیاں اُتّے بَیٹھی ہوئی اے۔تے جِہدے نال دھرتی دیاں بادشاہاں حرامکاری کِیتی تے دھرتی دے رہن والے اوہدی حرامکاری دی مَے پی کے مست ہوگئے سن۔سو اوہ مَینُوں رُوح وِچ بیابان ولّ لے گیا۔ تے مَیں سُوہے رنگ دے پشُو اُتّے جیہڑا کُفر دے نانواں نال بھریا ہویا سی تے جِہدے سَتّ سِر تے دَس سِنگ سن۔ اِک زنانی نُوں بَیٹھے ہویاں ویکھیا۔تے ایس زنانی جامنو تے سُوہے رنگ دے کپڑے پائے ہوئے سن تے سونے تے جواہر تے موتِیاں نال سَجی ہوئی سی۔ تے اِک سونے دا پیالہ مکرُوہات یعنی اوہدی حرامکاری دِیاں پلِیتیاں نال بھریا ہویا اوہدے ہتّھ وِچ سی۔تے اوہدے مَتّھے اُتّے ایہہ ناں لِکھیا ہویا سی۔ بھیت۔ وَڈا بابل۔ کنجریاں تے دھرتی دِیاں پلِیتیاں دی ماں۔تے مَیں اوس زنانی نُوں پاک لوکاں دے لہو تے یِسُوع دیاں شہیداں دے لہو پِین توں مست ویکھیا تے اوہنوں ویکھ کے بڑا حَیران ہویا۔اوس فرِشتے مَینُوں آکھیا تُوں کاہدے توں حَیران ہویا ایں؟ اوس زنانی تے اوس پشُو دا جِہدے اُتّے اوہ سوار اے۔ تے جِہدے سَتّ سِر تے دَس سِنگ نیں تینُوں بھیت دسنا آں۔ایہہ جیہڑا تُوں پشُو ویکھیا اے۔ ایہہ پہلاں تے ہے سی پر ہُن نئیں اے تے اگّوں نُوں اتھاہ کھڈے وِچوں نِکل کے ہلاکت وِچ پَوے گا تے زمین دے رہن والے جِنہاں دے ناں دُنیا دے مُڈھ توں پہلاں حیاتی دی کتاب وِچ لِکھے نئیں گئے ایس پشُو دا ایہہ حال ویکھ کے پئی پہلاں ہے سی تے ہُن نئیں اے تے فیر ہوئے گا۔ تعجُّب کرن گے۔ایتھے ای بودھا والے دی سیانپ اے۔ اوہ سَتّے سِر سَتّ پہاڑ نیں جِنہاں اُتّے اوہ زنانی بَیٹھی ہوئی اے۔تے اوہ سَتّ بادشاہ وی نیں پنج تے ڈِگّ پئے نیں تے اِک ہُن اے تے اِک اجے آیا نئیں تے جدوں آوے گا تے کُجھ چِر تیکر اوہدا رہنا ضرُوری اے۔تے جیہڑا پشُو پہلاں ہے سی۔ تے ہُن نئیں اوہ آپے اَٹھواں اے تے ایہناں ستّاں وِچوں پَیدا ہویا تے ہلاکت وِچ پَوے گا۔تے اوہ دَس سِنگ جیہڑے تُوں ویکھے نیں دَس بادشاہ نیں اجے تیکراوہناں نُوں بادشاہی نئیں مِلی۔ پر اوس پشُو نال اِک گھڑی لئی بادشاہاں وانگر اوہناں نُوں اختیار دِتّا جاوے گا۔ایہناں سبھناں دی اِکّو ای رائے ہوئے گی تے اوہ اپنی قُدرت تے اختیار اوس پشُو نُوں دے دین گے۔اوہ لیلے نال لڑن گے تے لیلا اوہناں نُوں جِت لے گا۔ کیوں جو اوہ خُداونداں دا خُداوند تے بادشاہاں دا بادشاہ اے۔ تے جیہڑے سَدّے ہوئے تے چُنے ہوئے تے وفادار اوہدے نال نیں اوہ وی جتن گے۔فیر اوس مَینُوں آکھیا پئی جیہڑے پانی توں ویکھے نیں جِنہاں اُتّے کنجری بَیٹھی ہوئی اے۔ اوہ اُمّتاں تے بِھیڑاں تے قوماں تے اہلِ زبان نیں۔تے جیہڑے دَس سِنگ تُوں ویکھے نیں اوہ وی تے پشُو وی اوس کنجری نال وَیر رکھن گے اوہ اوہنوں اُجاڑن گے تے ننگا کر دین گے۔ تے اوہدا گوشت کھا جان گے۔ تے اوہنوں اَگ وِچ ساڑ چھڈن گے۔کیوں جو خُدا اوہناں دیاں دِلاں وِچ ایہہ پایا۔ پئی اوہ اوسے دی رائے اُتّے ٹُرن تے جدوں تیکر خُدا دِیاں گلّاں پُوریاں نا ہو جان اوہ اِک رائے ہو کے بادشاہی اوس پشُو نُوں دے دین۔تے اوہ زنانی جیہڑی تُوں ویکھی اے اوہ وَڈا شہر اے جیہڑا زمین دیاں بادشاہاں اُتّے حکُومت کر دا اے۔ “
تفسیر
آیت ۱: تے اوہناں ستّاں فرِشتیاں وِچوں جِنہاں کول سَتّ پیالے سن اِک آ کے مَینُوں ایہہ آکھیا۔ پئی ایدھر آ مَیں تینُوں اوس وڈّی کنَجری دی سزا وکھاواں جیہڑی وڈّے پانیاں اُتّے بَیٹھی ہوئی اے۔
ایہہ جاننا پئی کنجری ، زنانی ،تے خاص حوالے وچ پشُو کیہڑا اے تشریح کرن تے باب ۱۷ نوں سمجھن لئی بوہت ضروری اے ۔ آیت ۱ وچ ”کنجری “دنیا دے دیناں دے بارے دسدی اے ، جد پئی ”زنانی “دنیا بارے دسدی اے ۔ دوجے پاسے ، ”پشُو “مخالفِ مسیح بارے دسدا اے ۔ ”وڈّے پانی “ ابلیسی تعلیماں بارے دسدے نیں ۔ جملہ ، ” ایدھر آ مَیں تینُوں اوس وڈّی کنَجری دی سزا وکھاواں جیہڑی وڈّے پانیاں اُتّے بَیٹھی ہوئی اے۔ “ سانوں دسدااے پئی خُدا دنیا دے دیناں دا انصاف کرے گا جیہڑے شیطان دی بوہت ساریاں تعلیماں اُتے بھروسہ رکھدے نیں ۔
آیت ۲: تے جِہدے نال دھرتی دیاں بادشاہاں حرامکاری کِیتی تے دھرتی دے رہن والے اوہدی حرامکاری دی مَے پی کے مست ہوگئے سن۔
”حرامکاری“ ایس دنیا نال محبت کرن تے ایہدیاں شیواں نال خُدا دی ذات توں بوہتی محبت کرن بارے دسدی اے ۔ دنیا دیاں شیواں دے بُت بنانا ، تے اوہناں دی پوجا کرنا تے خُدا وانگر محبت کرنا اصل وچ سارے حرامکاری دے کم نیں ۔
اُتلا جملہ ، ” جِہدے نال دھرتی دیاں بادشاہاں حرامکاری کِیتی “ دا مطلب ہیگا اے پئی ایس دنیا دے آگُو ، دنیا دے دیناں وچ متوالے ہو کے اپنیاں زندگیاں گزار چُکے نیں ، تے یعنی سارے دنیادے لوک ایہو جیہے پاپاں نال متوالے ہو کے زندگی وی بسر چُکے نیں جیہڑے دنیا دے دین دیندے نیں ۔
آیت ۳: سو اوہ مَینُوں رُوح وِچ بیابان ولّ لے گیا۔ تے مَیں سُوہے رنگ دے پشُو اُتّے جیہڑا کُفر دے نانواں نال بھریا ہویا سی تے جِہدے سَتّ سِر تے دَس سِنگ سن۔ اِک زنانی نُوں بَیٹھے ہویاں ویکھیا۔
جملہ ، ” سُوہے رنگ دے پشُو اُتّے ۔۔۔ اِک زنانی نُوں بَیٹھے ہویاں ویکھیا۔ “ سانوں دسدا اے پئی ایس دنیا دے لوک پاک لوکاں نوں ستان تے قتل کرن لئی یعنی مُخالفِ مسیح نال اپنے دلاں نوں اِک مُٹھ کرن گے ۔ ایہہ ساڈے اُتے ظاہر کردا اے پئی دنیا دے لوک خُدا دے ویری دے نوکر بن دے ہویاں ، اوہدے حکم اُتے مُخالفِ مسیح دے کم کرد ے ہویاں مک جان گے ۔ پشُو مُخالفِ مسیح اے جیہڑا خُدا دے خلاف کھلوندا اے ۔ مُخالفِ مسیح بوہت ساریاں بادشاہاں اُتے راج کردا اے ، تے اوہ دنیا دیاں بوہت ساریاں قوماں اُتے وی بادشاہی کردا اے ۔
پر خود پسند بن کے ، مُخالفِ مسیح خُدا دے خلاف کفربکن تےگھمنڈی بول بولن توں نئیں شرمائے گا ۔ اوہ گھمنڈی بول بولن دے سبب خُدا دے خلاف کفر بولے گا ، ایہہ دعویٰ کردے ہویاں پئی اوہ آپ خُدا یا یسوع مسیح اے ، تے اوہ اپنے آپ نوں خُدا وانگر بوہت اُچا کرے گا ۔ ایس لئی اوہدی طاقت دنیا دے سارے بادشاہاں تے ایہدیاں ساریاں قوماں تیکر پوہنچے گی تے بادشاہی کرے گی ۔
ایس جملے توں ، ” جِہدے سَتّ سِر تے دَس سِنگ سن“ ،”سَتّ“ سِر ایتھے دنیا دے سَتّ
بادشاہاں بارے دسدے نیں ، تے ”دَس سِنگ“ دنیا دیاں قوماں بارے دسدے نیں ۔
آیت ۴: تے ایس زنانی جامنو تے سُوہے رنگ دے کپڑے پائے ہوئے سن تے سونے تے جواہر تے موتِیاں نال سَجی ہوئی سی۔ تے اِک سونے دا پیالہ مکرُوہات یعنی اوہدی حرامکاری دِیاں پلِیتیاں نال بھریا ہویا اوہدے ہتّھ وِچ سی۔
ایس جملے وچ ، ” ایس زنانی جامنو تے سُوہے رنگ دے کپڑے پائے ہوئے سن تے سونے تے جواہر تے موتِیاں نال سَجی ہوئی سی، “ ایہہ حوالہ سانوں دسدا اے پئی دنیا دے دین ، مُخالفِ مسیح دے نال میل جول رکھدے ہویاں ، اوہنوں اپنے بادشاہ وانگر سمجھن گے ۔ایسے طرح ، اوہ ایہنوں صرف جائز سمجھن گے پئی اوہناں ساریاں نوں جیہڑے اوہناں دے خلاف کھلوندے نیں ،موت دی سزا سنائی جانی چاہی دی اے ، تے اصل وچ پاک لوکاں دے خلاف اپنے خیالاں نوں اپنے کماں دے سبب عائد کرن گے ۔
تے ایس دنیا نوں خوشی دی سدا دی بادشاہی وانگر سجان لئی ، اوہ اپنے آپ نوں دنیا دے سونے ، مہنگیاں پتھراں تے موتیاں نال سوہنے طریقے نال سجان گے ۔ پر اوہناں دا ایمان سارے دا سارا بوہت چوکھی دلچسپی رکھدا اےبھاویں بدنی کنی بوہتیاں خوشیاں اوہ جد پئی ایس زمین اُتے زندہ رہندے ہویاں پا سکدے نیں ۔ ایس لئی پئی جد خُدا ایس دنیا دےلوکاں اُتے نگاہ کرے گا اوہ اوہناں دے گندے پاپاں نال بھری ہوئی دنیا نوں ویکھے گا ، اوہ سارے اوہدے اگے مکروہات وانگر ظاہر ہون گے ۔
آیت ۵: تے اوہدے مَتّھے اُتّے ایہہ ناں لِکھیا ہویا سی۔ بھیت۔ وَڈا بابل۔ کنجریاں تے دھرتی دِیاں پلِیتیاں دی ماں۔
بھاویں دنیا دے دینی لوک اپنے آپ نوں اک ملکہ وانگر سجان دی کوشش کرن گے ، اصل وچ اوہ اک کنجری وانگر ظاہر ہون گے ۔ دوجے پاسے ، اوہدا ناں ، ”وَڈابابل “ سانوں کنجری دے کماں دے گھمنڈ ، حرامکاری تے ظالم پن بارے دسدا اے ،جد پئی دوجے پاسے اکھر، ”ماں “ساڈے اُتے ظاہر کردا اے پئی تاریخ دیاں مُخالفِ مسیح دیاں طاقتاں اپنے آپ دنیا توں علاوہ کدھرے ہور توں شروع نئیں ہو چُکیاں ، تے یعنی دنیا ہر طرح دی بُت پرستی تے بدکاری دی جڑ اے ۔
بھاویں ایہہ دنیا چمکدار تے سوہنے جواہراں نال سجی ہوئی اے ، مُخالفِ مسیح جیہڑا خُدا دے خلاف کھلوندا تے دنیا دے ایہناں لوکاں دے دلاں وچ کم کردا اے اوہناں دی ماں وانگر کم کرے گا ۔ ایسے طرح ، ساڈا خُداوند خُدا اوہناں ساریاں نوں اپنیاں سَتّ پیالیاں دی وڈیاں آفتاں نال تباہ تے ویران کرن دا ارادہ کر چُکیا اے ۔
آیت ۶: تے مَیں اوس زنانی نُوں پاک لوکاں دے لہو تے یِسُوع دیاں شہیداں دے لہو پِین توں مست ویکھیا تے اوہنوں ویکھ کے بڑا حَیران ہویا۔
ساری کلیسیائی تاریخ وچ ، ”پاک لوک“ ایماندار لوکاں بارے دسدے نیں جیہڑے یسوع مسیح دے راہیں دتی گئی پانی تے رُوح دی خوشخبری اُتے ایمان رکھ چُکے نیں ۔ جملہ ، ” یِسُوع دیاں شہیداں “ پاک لوکاں وچکار اوہناں بارے دسدا اے جیہڑے سچیائی دی گواہی دے چُکے نیں پئی یسوع خُدا دا پُتر تے اوہناں دا مکتی داتا اے ،تے جیہڑے خاص کر کے اپنے ایمان دی راکھی کردے ہویاں شہید ہو گئے نیں ۔
ایہہ آیت زور دیندی اے پئی اوہ لوک جیہڑے پاک لوکاں نوں ستاندے تے قتل کردے نیں ایس دنیا دے دینی لوکاں توں علاوہ کوئی دوجے نئیں ہیگے ۔ اوہ مُخالفِ مسیح دی فوج دے اگلے دستے وانگر ایہو جیہی بدکاری کرن گے ۔
یوحنا ایتھے فرماندااے پئی جد اوہنے اوس زنانی نوں ویکھیا ، تاں اوہ ”بڑا حیران ہویا“ ایہہ دنیا بنا ں شک حیرانی بھری دنیا اے ۔ پاک لوکاں نے ایہنوں نقصان دین بارے کُجھ نئیں کیتا،تے فیر وی ایہہ دنیا مُخالفِ مسیح نال میل جول رکھے گی تے بوہت سارے پاک لوکاں نوں قتل کرے گی ۔ کویں ایہہ دنیا عجیب غریب توں علاوہ کُجھ ہور نئیں ہو سکدی اے؟ ایہہ گلاں ایس دنیا دے لوکاں ہتھوں یقینی طور اُتے پاک لوکاں دے صبر لئی لیایاں جان گِیاں ۔ ایس لئی پئی ایہہ دنیا مُخالفِ مسیح دے راج ہیٹھاں اے ، ایہدے لوک اوہدے نوکراں وانگر ،پاک لوکاں نوں پھڑن گے تے اوہناں نوں قتل کرن گے ۔
ایس لئی اوہ بناں شک ساڈے توں بوہت وکھرے ظاہر ہون گے ۔ جد اسیں دنیا دے لوکاں ول دھیان کردے آں ، کیہ اوہ اصل وچ کسے اچرج شے وانگر نظر نئیں آؤندے؟ جد لوک خُدا دے رُوپ وانگر بنائے گئے ، کویں اوہ مُخالفِ مسیح دے نوکر بن سکدے نیں تے لوکاں نوں قتل کر سکدے نیں — ناصرف تھوڑے لوک ، سگوں لوک بوہت چوکھے نیں جیہڑے خُدا اُتے ایمان رکھدے نیں ؟ ایہہ اِنج
ای اے ایس لئی پئی ایہہ دنیا شیطان دی نوکر اے ۔
آیت ۷: اوس فرِشتے مَینُوں آکھیا تُوں کاہدے توں حَیران ہویا ایں؟ اوس زنانی تے اوس پشُو دا جِہدے اُتّے اوہ سوار اے۔ تے جِہدے سَتّ سِر تے دَس سِنگ نیں تینُوں بھیت دسنا آں۔
”زنانی “ ایتھے ایس دنیا دے لوکاں بارے دسدی اے ۔ ایہہ آیت سانوں دسدی اے پئی پشُو ، جیہڑامُخالفِ مسیح اکھواؤندااے ، دنیا دے ساریاں بادشاہاں تے ایہدیاں قوماں اُتے بادشاہی کرے گا تے اوہناں دے راہیں اوہ خُدا دے خلاف کھلون ، پاک لوکاں نوں ستان ، تے او ہناں نوں قتل دا اپنا کم پورا کرے گا ۔ ”پشُو دا بھیت“ مُخالفِ مسیح دی پچھان نوں ، یعنی شیطان دے حکم مطابق کم کرن بارے دسدا اے ۔ تے اوہ ایس دنیا دیاں قوماں نوں اپنیاں قوماں بنائے گا ۔
ایس دنیا دے لوک ، مُخالفِ مسیح نال میل جول رکھ کے ، خُداوند دےلوکاں دی بوہت وڈی گنتری دا قتل ِ عام کردے ہویاں شیطان دے ہتھیاراں وانگر مک جان گے ۔ ایہہ دنیا تے مُخالفِ مسیح، ہُن ساڈی اکھیوں اوہلے، شیطان دے ہتھیار نیں ۔ پر جد وڈے دکھ جرن دے پہلے ساڈھے تِن ورہے لنگھ جان گے ، اوہ نکلے گا تے پاک لوکاں نوں قتل کرے گا۔
فیر کوئی بندہ حیران ہو سکدا اے ایہہ کویں ممکن ہوئے گا، جد پئی ایہہ دنیا بوہت سارے دیانتدار ، پڑھے لکھے تے چنگیاں لوکاں ،سیاست داناں توں لے کے تعلیم داناں تیکر فلاسفراں تے ڈاکٹراں اُتے مشتمل اے ۔ پر ایس لئی پئی دنیا مُخالفِ مسیح نال سازش کرے گی ، ایہہ ساریاں شیواں ، پاک لوکاں دا قتلِ عام رَلا کے، قابلِ عمل بن جائے گا ۔ ایسے طرح ، یعنی ایہہ دنیا مُخالفِ مسیح دے اگے جھکے گی تے پاک لوکاں نوں قتل کرنا مُخالفِ مسیح دے بھیت نوں حل کرن دی چابی اے ۔
آیت ۸:ایہہ جیہڑا تُوں پشُو ویکھیا اے۔ ایہہ پہلاں تے ہے سی پر ہُن نئیں اے تے اگّوں نُوں اتھاہ کھڈے وِچوں نِکل کے ہلاکت وِچ پَوے گا تے زمین دے رہن والے جِنہاں دے ناں دُنیا دے مُڈھ توں پہلاں حیاتی دی کتاب وِچ لِکھے نئیں گئے ایس پشُو دا ایہہ حال ویکھ کے پئی پہلاں ہے سی تے ہُن نئیں اے تے فیر ہوئے گا۔ تعجُّب کرن گے۔
ایہہ آیت سانوں دسدی اے پئی مُخالفِ مسیح پرانے زمانے دے بادشاہاں وچکار پایا جاندا سی ،تے یعنی بھاویں اوہ ہُن ایس دنیا وچ نئیں ہیگا ، اوہ آؤن والے دناں وچ دنیا وچ ظاہر ہوجائے گا ۔ ایہہ آیت سانوں دسدی اے پئی ایس دنیا دے لوک بوہت چوکھے حیران ہون گے جد اوہ مُخالفِ مسیح نوں نکلدیاں ہویاں تے پاک لوکاں نوں قتل کردیاں ویکھن گے ۔
مُخالفِ مسیح ایس دنیا دی نویں سیاست وچ شامل ہون دے سبب اپنے ارادے پورے کرے گا ۔ اوہ ایس دنیا دے لوکاں لئی بھیت ای رہوے گا تے فیر وی حیرانی نال ظاہر ہوجائے گا ۔ ایس لئی پئی اوہ بوہت سارے سیاسی ، معاشی ، نظریاتی تے ایس دنیا دے دینی مسئلیاں دی ذمہ داری لوے گا تے اپنے گُن نال اوہناں نوں حل کرے گا ، بوہت سارےلوک اوہنوں یسوع مسیح وانگر سوچن گے تے اوہدے پچھے چلن گے جیہڑا اخیری زمانے وچ فیر آئے گا ۔ ایس لئی اوہ ایس دنیا دے لوکاں دیاں اکھاں اگے حیرانگی دے طور اُتے باقی رہوے گا ۔
آیت ۹: ایتھے ای بودھا والے دی سیانپ اے۔ اوہ سَتّے سِر سَتّ پہاڑ نیں جِنہاں اُتّے اوہ زنانی بَیٹھی ہوئی اے۔
ایہہ آیت سانوں دسدی اے پئی مُخالفِ مسیح دنیا دے لوکاں اُتے راج کرن لئی اپنے دلی قانون بنائے گا تے ایہناں قانوناں نوں اپنے ارادے پورے کرن لئی اپنے حکومتی نظام وچ بدلے گا ۔ ایس سببوں دنیا دے لوک اکٹھے شامل ہون گے مُخالفِ مسیح دا نشان پاؤن دے سبب شیطان دی غلامی وچ آنا ،تے خُدا تے اوہدے پاک لوکاں دے خلاف کھلونا ، مُخالفِ مسیح ولوں بنائے گئے قانوناں دی طاقت اُتے اپنے بھروسے نوں رکھنا اے ۔
آیت ۱۰: تے اوہ سَتّ بادشاہ وی نیں پنج تے ڈِگّ پئے نیں تے اِک ہُن اے تے اِک اجے آیا نئیں تے جدوں آوے گا تے کُجھ چِر تیکر اوہدا رہنا ضرُوری اے۔
ایہہ آیت سانوں دسدی اے پئی بادشاہ جیہڑے خُدا دے خلاف کھلوندے نیں ایس دنیا وچوں نکلدے رہن گے ،بالکل جویں ایہو جیہے بادشاہ پہلوں نکلے سن ۔جد اخیری وڈے دکھ جرن دا زمانہ آئے گا ، ایس دنیا دا اک راجہ مُخالفِ مسیح وانگر نکلے گا تے پاک لوکاں دا قتلِ عام کرےگا ۔ پر ایس دنیا دے راجے دا دکھ دینا ،جیہڑا مُخالفِ مسیح بن جائے گا ، صرف تھوڑے چر لئی یعنی خُدا دی اجازت دے مطابق باقی رہوے گا ۔
آیت ۱۱: تے جیہڑا پشُو پہلاں ہے سی۔ تے ہُن نئیں اوہ آپے اَٹھواں اے تے ایہناں ستّاں وِچوں پَیدا ہویا تے ہلاکت وِچ پَوے گا۔
ایہہ آیت سانوں دسدی اے پئی مُخالفِ مسیح ایس دنیا وچ آؤندے ہویاں دنیا دے بادشاہاں وچوں اخیری دے طور اُتے نال نکلے گا ۔ جد مُخالفِ مسیح دنیا دے بادشاہاں وچوں نکلے گا ، دنیا دےبوہت سارے لوک ، جویں ای اوہ ، ناگ دی رُوح پاؤن دے بعدوں ، خُدا وانگر قدرت دی مشق کرے گا تے نشانیاں تے معجزے وکھاوے گا اوہدے پچھے چلن گے ۔ خُدا دے خادم تے پاک لوک مُخالفِ مسیح دے ہتھوں قتل ہون گے ، پر ایہہ ساریاں گلاں صرف تھوڑے چر لئی خُدا دی جد پئی اجازت دے مطابق باقی رہن گِیاں ۔ ایہو جیہاں گلاں دے ہوجان دے بعدوں ، مُخالفِ مسیح اتھاہ کھڈے دی قید وچ پوے گا ،تے فیر دوزخی اگ وچ سُٹیا جائے گا ، یعنی کدی ایس توں نئیں چُھٹے گا ۔
آیت ۱۲: تے اوہ دَس سِنگ جیہڑے تُوں ویکھے نیں دَس بادشاہ نیں اجے تیکر اوہناں نُوں بادشاہی نئیں مِلی۔ پر اوس پشُو نال اِک گھڑی لئی بادشاہاں وانگر اوہناں نُوں اختیار دِتّا جاوے گا۔
ایہہ آیت سانوں دسدی اے پئی دس قوماں دنیا اُتے راج کرن لئی اپنی طاقت نوں اکٹھا کرن گِیاں ۔ ایہہ دس قوماں ،اِنج اکٹھیاں ہون دے بعدوں ، مُخالفِ مسیح نال تھوڑے چر لئی دنیا اُتے اپنی طاقت لاؤندیاں رہن گِیاں ۔ پر ایہو ای آیت سانوں ایہہ وی دسدی اے پئی دنیا دے ایہہ بادشاہ مُخالفِ مسیح دے راج وچ بادشاہی نئیں پاچُکے ۔ پر ، بوہت چھیتی آؤن والے دناں وچ ،دنیا دے ایہہ بادشاہ تھوڑے چر لئی ہنیرے دے بادشاہاں وانگر پشُو نال بادشاہی کرن گے ۔ پر اوہناں دی بادشاہی صرف تھوڑے چر لئی ہوئے گی ، تے ایسے طرح ، اوہ صرف ایس تھوڑے چر لئی ہنیرے دی حکومت اُتے بادشاہی کرن گے ۔
آیت ۱۳: ایہناں سبھناں دی اِکّو ای رائے ہوئے گی تے اوہ اپنی قُدرت تے اختیار اوس
پشُو نُوں دے دین گے۔
جدویلا آئے گا ، ایس دنیا دے بادشاہ اپنی ساری طاقت تے اختیار نوں مُخالفِ مسیح دے حوالے کر دین گے ۔ ایس ویلے، خُدا دی کلیسیا ، اوہدے پاک لوک تے اوہدے خادم مُخالفِ مسیح دے ہتھوں بھیڑی طرح ستائے جان گے تے شہید کیتے جان گے ۔ پر مُخالفِ مسیح اپنے آپ یسوع مسیح دی قدرت تے اختیار تے اوہدے مُنھ دے کلام دی تلوار سببوں تباہ تے ویران ہو جائے گا۔
آیت ۱۴: اوہ لیلے نال لڑن گے تے لیلا اوہناں نُوں جِت لے گا۔ کیوں جو اوہ خُداونداں دا خُداوند تے بادشاہاں دا بادشاہ اے۔ تے جیہڑے سَدّے ہوئے تے چُنے ہوئے تے وفادار اوہدے نال نیں اوہ وی جتن گے۔
بھاویں شیطان یسوع مسیح دے خلاف لڑائی کرن دی آس رکھے گا ، اوہ اوہدے کسے مقابلے دا نئیں ہوئے گا۔ پاک لوک ، وی، اوہدے خلاف اپنی کوشش وچ اوہدے اُتے فتح پاؤن گے ۔ خُداوند پاک لوکاں نوں اپنے ایمان نال مُخالفِ مسیح دے خلاف لڑن تے فتح پاؤن دی طاقت دیوے گا ۔ ایسے طرح ، پاک لوک مُخالفِ مسیح دے خلاف اپنی کوشش توں نئیں ڈرن گے ، سگوں اپنے خُداوند خُدا اُتے اپنے رکھن دے سبب سلامتی تے سکون نال اخیری زمانے وچ زندہ رہن گے ۔ فیر اوہ خُداوند اُتے اپنے ایمان نال اپنے ویریاں اُتے فتح پاؤن گے ۔
پاک لوکاں دی ایس فتح دا مطلب ہیگا اے پئی اوہ اپنے ایمان دی راکھی کرن گے تے شہید ہون گے ۔ جد ایہہ ویلا آئے گا، پاک لوک شیطان تے مُخالفِ مسیح اُتے یعنی یسوع مسیح اُتے اپنے ایمان رکھدے ہویاں اپنی شہادت نوں منن دے سبب فتح پاؤن گے تے اسمانی بادشاہی لئی اپنی آس نال ، اپنے جیوں اُٹھن تے چُکےجان وچ شامل ہون گے ، مسیح دی نویں بادشاہی پاؤن گے،تے ایہدے بعد وں سدا تیکر جلال وچ زندہ رہن گے ۔
آیت ۱۵: فیر اوس مَینُوں آکھیا پئی جیہڑے پانی توں ویکھے نیں جِنہاں اُتّے کنجری بَیٹھی ہوئی اے۔ اوہ اُمّتاں تے بِھیڑاں تے قوماں تے اہلِ زبان نیں۔
دنیا دےدین شیطانی تعلیماں نال ساریاں قوماں دے لوکاں نوں دھوکہ دے چُکے نیں تے
اوہناں اُتے راج کر چُکے نیں۔ ایہہ آیت سانوں دسدی اے پئی دنیادے دیناں وچکار کم کردیاں ہویاں شیطانی تعلیماں ساریاں قوماں تے دنیا دیاں زباناں وچ وڑھ گِیاں نیں تے یعنی اوہناں دا اثر اینا ں چوکھا ہو گیا اے جویں پئی لوکاں دیاں جاناں نوں بربادی تیکر لیانا اے۔
آیت ۱۶: تے جیہڑے دَس سِنگ تُوں ویکھے نیں اوہ وی تے پشُو وی اوس کنجری نال وَیر رکھن گے اوہ اوہنوں اُجاڑن گے تے ننگا کر دین گے۔ تے اوہدا گوشت کھا جان گے۔ تے اوہنوں اَگ وِچ ساڑ چھڈن گے۔
ایتھے ایہہ آیت سانوں دسدی اے پئی ایس دنیا دیاں قوماں اپنے دینی لوکاں نوں قتل کرن تے برباد کرن لئی مُخالفِ مسیح نال اکٹھیاں ہون گِیاں ۔دوجے اکھراں وچ ، ایہہ آیت سانوں دسدی اے پئی ایس دنیا دے لوک تے مُخالفِ مسیح دینی لوکاں توں نفرت کرن گے تے اوہناں اُتے ظلم کرن گے ،تے اوہدے چہرے توں دنیا دے سارے دیناں نوں مکا دین گے ۔ بھاویں دنیا دے دینی لوک پہلوں ای مُخالفِ مسیح دی مدد نال پاک لوکاں نوں قتل کر چُکے سن ، ہُن اوہ اپنے آپ شیطان تے دنیا دے لوکاں دے ہتھوں ویران تے برباد ہون گے ۔ اخیریں ، شیطان صرف دنیا دے دیناں نوں صرف اپنے آپ نوں خُداوانگر منوان لئی ورت چُکیا سی ۔
آیت ۱۷: کیوں جو خُدا اوہناں دیاں دِلاں وِچ ایہہ پایا۔ پئی اوہ اوسے دی رائے اُتّے ٹُرن تے جدوں تیکر خُدا دِیاں گلّاں پُوریاں نا ہو جان اوہ اِک رائے ہو کے بادشاہی اوس پشُو نُوں دے دین۔
ایہہ آیت سانوں دسدی اے پئی ایس دنیا دے لوک اپنی بادشاہی تے اختیار شیطان دے حوالے کرن گے۔ ایسے طرح ، اوہ مُخالفِ مسیح دے لوک بن جان گے جویں اوہ اوہدا نشان دلوں خوش ہو کے لیندے نیں ، اوہدے نوکر بنن بارے گھمنڈ کردے نیں ، تے اوہناں نوں قتل وی کردے نیں جیہڑے ایس ٹھپے نوں پاؤن توں انکارکردے نیں ۔پر ، اوہناں دا پاک لوکاں نوں دکھ دینا صرف خاص زمانے لئی اجازت پائے گا جِہدی خُدا دا کلام اجازت دے چُکیا اے ۔ ایس اجازت ملے زمانے وچکار ، مُخالفِ مسیح اپنے دل دی ساری بدکاری ڈوہلے گا تے آزادی نال خُدا تے اوہدے پاک لوکاں دے خلاف کھلووے گا ۔
آیت ۱۸: تے اوہ زنانی جیہڑی تُوں ویکھی اے اوہ وَڈا شہر اے جیہڑا زمین دیاں بادشاہاں اُتّے حکُومت کر دا اے۔
ایتھے خُدا سانوں دسدا اے پئی ایہہ دنیا اپنے راجیاں اُتے راج کرن تے اختیار رکھن لئی بوہتے چوکھے نویں قانون بنائے گی ،تے یعنی دنیا دے راجے ایہناں نویں قانوناں دیاں حداں تے کندھا ں دے اندر راج ہیٹھ ہون گے ۔ ایس دنیا دی وڈی طاقت دنیا دے سارے راجیاں اُتے اِنج راج کرے گی ، جویں بھاویں اک بندہ اپنے آپ خُدا سی ۔ دوجے اکھراں وچ ، دنیا ایہو جیہے قانون بنائے گی جیہڑے سارے راجیاں نوں پکیاں کر کے بنھن گے، تے اوہناں اُتے راج کرن والے خُداوانگر بن جان گے ۔
”وڈا شہر“ اوس سیاسی ادارے بارے دسدااے جِہدے راہیں مُخالفِ مسیح راج کرے گا ۔ ایس دنیا دا ہر اک بندہ دنیا دے راج دی طاقت دی سیوا کردے ہویاں مک جائے گا ، جیہڑا خُدا اوہنوں دے چُکیا سی ، جویں اوہ بھاویں اپنے آپ خُدا سی ، تے ایہدے ہیٹھ راج کرے گا ۔ ایس لئی پئی بندے شیطان دے قیدی بن چُکے سن، اوہ اِنج ویران برباد ہو جان گے ۔
زبور ۴۹: ۲۰ سانوں دسدا اے ، ”بندہ جیہڑا عزت دی حالت وچ رہندا اے ، پر دانائی نئیں رکھدا ، پشُواں وانگر اے جیہڑے برباد ہو جاندے نیں۔“ ایسےطرح، ایس دنیا دے لوکاں نوں لازمی پہلوں ای جاننا چاہی دا اے شیطان دی کرتُوت کیہ اے ، تے ہُن ایس زمانے دے پاک لوکاں دے سبب منادی کیتی جان والی پانی تے رُوح دی خوشخبری اُتے ایمان رکھنا چاہی دا اے ، تے اِنج شیطان دے قیدی بنن دی لعنت توں بچنا چاہی دا اے تے ایہدی بجائے اوہدے لوکاں وانگر خُدا دی سدا دی بادشاہی دی برکت دے کپڑے پا کےزندہ رہنا چاہی دا اے ۔
Copyright © 2021 by The New Life Mission