کورونا وائرس تے عالمگیر ڈاک سروس وچ رکاوٹ دے سببوں، اَسیں اپنی ’مُلوں بغیر چھاپی ہوئی کتاب دی سروس‘ نوں تھوڑے چِر لئی بند کر دے پئے آں۔
ایس صورتحال دے چانن وچ اسیں ایس ویلے تہانوں کتاباں گھلن دے قابل نئیں ہیگے آں۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔
مضمون 11: خیمۂ اِجتماع
[11-15] خیمۂ اِجتماع دے ہر تختے لئی چاندی دے دو دو خانے تے دو دو چُولاں <خروج ۲۶:۱۵۔۳۷>
> خروج ۲۶:۱۵۔۳۷ <
” تے تُو ں مسکن لئی کِکر دی لکڑ دے تختے بناویں پئی کھلارے جان ۔ ہر تختہ دی لمان دس ہتھ تے چوڑائی ڈیڑھ ہتھ ہوئے ۔ تے ہر تختے وچ دو دو چُولاں ہون جیہڑیاں اک دوجی نال مِلیاں ہون ۔ مسکن دے سارے تختے ایسے طرح بناویں ۔ تے مسکن لئی جیہڑے تختےتُوں بنائیں گے اوہناں وچوں ویہہ تختے جنوبی پاسے لئی ہون ۔تے ایہناں ویہاں تختیاں ہیٹھاں چاندی دے چالی خانے بناویں یعنی ہر اک تختے ہیٹھاں اوہدیاں دونویں چُولاں لئی دودو خانے ۔تے مسکن دے دوجے پاسے یعنی شمالی پاسے لئی ویہہ تختے ہون ۔ تے اوہناں لئی وی چاندی دے چالی ای خانے ہون یعنی اک اک تختے دے ہیٹھاں دو دو خانے ۔تے مسکن دے پِچھلے حصے لئی مغربی پاسے وچ چھے تختے بناویں ۔ تے اوسے پِچھلے حصے وچ مسکن دیاں کونیاں لئی دو تختے بناویں ۔ ایہہ ہیٹھوں دوہرے ہون تے ایسے طرح اُتلے سِرے تیکر آکے اک گھیرے وچ مِلائے جان ۔ دونویں تختے ایسے طریقے دے ہون ۔ ایہہ تختے دونواں کونیاں لئی ہون گے ۔ سو اَٹھ تختے تے چاندی دے سولاں خانے ہون گے یعنی اک اک تختے لئی دو دو خانے ۔ تے تُوں کِکر دی لکڑ دے بینڈے بناویں ۔ پنج بینڈے مسکن دے اک پاسے دیاں تختیاں لئی ۔ تے پنج بینڈے مسکن دے دوجے پاسے دیاں تختیاں لئی تے پنج بینڈے مسکن دے پِچھلے حصے یعنی مغربی سمت دیاں تختیاں لئی ۔ تے وچکارلا بینڈا جیہڑیاں تختیاں دے وچ ہوئے اوہ خیمے دی اِک نکر توں دوجی حد تیکر اَپڑے ۔ تے تُوں تختیاں نُوں سونے نال مَڑھیں تے بینڈیاں دیاں گھراں لئی سونے دے کَڑے بناویں تے بینڈیاں نوں وی سونے نال مَڑھیں ۔ تے تُوں مسکن نوں اوسے نمونے مطابق بناویں جیہڑاپہاڑ اُتے تینوں وکھایا گیا اے ۔ تے تُو ں اسمانی، ارغوانی تےلال رنگ دیاں کپڑیاں تے مہین وٹے ہُوئے کتان دا اِک پڑدا بناویں تے اوس وچ کِسے ماہر اُستاد توں کرُوبیاں داچہرہ کڈھوائیں۔تے اوہنوں سونے نال مڑھے ہُوئیاں کِکر دیاں چونہہ سُتُوناں اُتے لمکاویں۔ ایہناں دے کُنڈے سونے دے ہون تے چاندی دے چونہہ خانیاں اُتے کھلارے جان۔تے پڑدےنوں گُھنڈیاں دے ہیٹھاں لمکاویں تے شہادت دے صندُوق نوں اوتھےای پڑدے دے اندر لے جاویں تےا یہہ پڑدا تُہاڈے لئی پاک تھاں نوں بوہتی پاک تھاں توں وکھ کرے گا۔تے تُوں سرپوش نوں بوہتی پاک تھاں وچ شہادت دے صندُوق اُتے رکھیں۔تے میز نوں پڑدے دے باہر رکھ کےشمعدان نوں اوہدے برابر مسکن دے جنُوبی پاسے وچ رکھیں یعنی میز شِمالی پاسے وچ رکھیں۔ تےتُو ں اِک پڑدا خَیمہ دے پھاٹک لئی اسمانی ،ارغوانی تے لال رنگ دے کپڑیاں تےمہین وٹے ہوئے کتان دا بناویں تے اوس اُتے ول بُوٹے کڈھے ہوئے ہون ۔تےایس پڑدے لئی کِکر دی لکڑدے پنج ستُون بناویں تے اوہناں نوں سونے نال مڑھیں تے اوہناں دے کُنڈے سونے دے ہون جِنہاں لئی تُوں پِتل دے پنج خانے ڈھال کے بناویں۔“
خیمۂ اِجتماع آپ وی ۴۸ تختیا ں نال بنایا گیا سی؛ ویہہ ویہہ تختے شمالی تےجنوبی پاسیاں لئی، چھے تختے مغربی پاسے لئی، تے دو تختے پِچھلیاں دوکونیاں لئے سن۔ ہر تختے دی لمان۵.۴ میٹر(۱۵فٹ) تےچوڑائی لگ بھگ ۵.۶۷سینٹی میٹر(۲.۲فٹ) سی۔ہر تختے نوں سِدھا کھلارن لئی ، دو چاندی دے خانے تے دو چُولاں سن جیہڑے اِک دوجے نال ٹھیک طریقے نال جُڑے ہوئے سن ۔ ایہہ سانوں اک واری فیر وکھاؤندا اے پئی خُدا دی مکتی صرف اوہدے فضل نال مسیح اُتے ایمان رکھن نال مِلدی اے ۔
مسیح وچ ایمان رکھن نال فضل توں مکتی
بوہتےمسیحی جان دے نیں تے ایتھوں تیکر پئی اِفسیوں ۲:۸۔۹ دے مشہور حوالے نوں پڑھدے نیں، ” کیوں جو تُہانوں اِیمان دی راہِیں فضل نال ای نجات مِلی اے۔ تے ایہہ ساڈے ولّوں نئیں پر خُدا دی بخشِش اے۔ تے نا کمّاں دے سببّوں مِلی اے تاں جو کوئی فخر نا کرے۔ “ پر بے نصیبی نال ، اوہ نئیں جان دے پئی اوہدا فضل اصل وچ کیہ اے تے اوہناں نوں مکتی یافتہ ہون لئی کس قِسم دا ایمان رکھنا چاہی دا اے ۔ پر ، چاندی دے دوخانیاں تے دوچُولاں دا بھیت جیہڑے ٹھیک طریقے نال اکٹھے جُڑے ہوئے سن سانوں صاف طریقے نال خُدا دی مکتی دے بھیت نوں وکھاؤندا اے ۔
تختیا ں دی نِیہ اُتے رکھیاں گئیاں ”دودو چُولاں تے چاندی دے دودو خانیاں “دی سچیائی نوں سمجھن لئی ، سانوں پہلاں خوشخبری دی مُڈھلی سچیائی نوں جانن دی لوڑ اے ۔ خیمۂ اِجتماع دے سارے پھاٹک اسمانی، ارغوانی تےلال رنگ تے مہین وٹے ہُوئے کتان نال اُنے ہوئے سن ۔ ایہہ چاررنگ سانوں وکھاؤندے نیں پئی ساڈے واسطے اپنیاں پاپاں تےبربادی توں مکتی یافتہ ہون لئی ، بپتسمہ تے یِسُوعؔ دا لہو ضروری سی ۔ تے اوہ سانوں یِسُوعؔ دی مکتی دی سچیائی اُتے کسے وی شک توں ازاد ایمان رکھن دے لائق کردے نیں ۔ سانوں لازمی سچیائی دا صاف علم رکھنا چاہی دا اے جیہڑا سانوں بچا چُکیا اے ، جیہڑا اسمانی، ارغوانی تے لال دھاگےتے مہین وٹے ہُوئے کتان وچ ظاہر کیتا گیا اے تے ایس اُتے ایمان رکھنا چاہی دا اے ۔
یِسُوعؔ نے فرمایا، ” تے تُسی سچیائی نُوں جانو گے تے سچیائی تُہانوں اَزاد کرے گی۔“(یوحنا ۸:۳۲)۔ایس طرح ، سانوں ساریاں نوں ایس رُوحانی سچیائی نوں جان کے جیہڑی خیمۂ اِجتماع دے پڑدے دے پھاٹک تے بوہتی پاک تھاں دے پڑدے وچ ظاہر کیتے گئے چونہہ رنگاں وچ لُکی ہوئی اے اپنیاں پاپاں دی ساری معافی پاؤنی چاہی دی اے ۔ اسمانی، ارغوانی تے لال دھاگہ تے مہین وٹیا ہویا کتان خیمۂ اِجتماع دے پھاٹک دا سامان نیں ۔
دوجیاں اکھراں وچ ، یِسُوعؔ مسیح ساڈا مکتی داتا تے ایمان رکھن والیاں دا بادشاہ اے ، جیہڑا سانوں اِکو ای واری یوحنا کولوں بپتسمہ لین تے اِکو ای واری سدا لئی اپنے ذاتی بدن اُتے ساڈیاں ساریاں پاپاں نوں چُک کے ، تے جگ دیاں پاپاں نوں لے جان تے سُولی اُتے اپنا لہو وگان نال جگ دیاں ساریاں پاپاں توں سانوں مکتی دے چُکیا اے ۔ ایہہ پئی یِسُوعؔ مسیح ،جیہڑا بادشاہ اے ، لازمی طور نال سانوں ساڈیاں پاپاں توں بچا چُکیا سی ایس لئی پئی اوہنے بپتسمہ لیا سی تے سولی اُتے ماریا گیا سی ۔ ایس لئی ، اسمانی تے لال دھاگے سانوں صاف تے لازمی سچیائی دے بارے دسدے نیں جنہاں نوں اپنیاں پاپاں توں مکتی یافتہ ہون لئی اسی چھڈ نئیں سکدے ۔ ساڈیاں پاپاں نوں چُکن لئی ، یِسُوعؔ نے یوحنا کولوں بپتسمہ لیا تے جگ دیاں پاپاں نوں چُکن تے سولی اُتے اپنا لہو وگا کے ، اوہ سانوں اِکو ای واری سدا لئی ساڈیاں ساریاں پاپاں توں ، اِنج اپنا مکتی دا کم پورا کردیاں ہویاں بچا چُکیا اے ۔
ایتھے ، سانوں لازمی ایمان رکھنا چاہی دا اے پئی اسمانی دھاگہ (یِسُوعؔ دا بپتسمہ)، لال دھاگہ(اوہدا لہو وگاؤنا)ارغوانی دھاگہ(اوہ ساڈا بادشاہ اے)تے مہین وٹے ہُوئے کتان(اوہ لمےتےچوڑے کلام دا خُدا اے ،تے سانوں راستباز بنا چُکیا اے)ساڈی مکتی لئی ورتیاں جان والیاں ساریاں شیوا ں نیں ۔ سانوں ایہہ پتہ ہونا چاہی دا اے پئی جے ایہدے باوجوداسی ایہناں وچوں صرف اِک اُتے ایمان رکھ کے اپنیاں ساریاں پاپاں توں مکتی یافتہ ہون دی کوشش کردے آں ، فیر ایہو جیہی مکتی کامل نئیں ہوئے گی ۔ کیوں ؟ ایس لئی پئی خیمۂ اِجتماع دے ہر تختے دی نِیہ اُتے ، تختے نوں سہارا دین لئی دو دو چُولاں باہر نوں نکلدیاں ہویاں چاندی دیاں خانیاں وچ لگیاں ہویاں سن ۔
پاک کلام وچ چاندی خُدا دے فضل ،یعنی خُدا دےانعام نوں ظاہر کردی اے تے رومیوں ۵:۱۔۲ وچ اِنج لکھیا ہویا اے، ” سو جد اسی اِیمان توں راستباز ٹھہرائے گئے تے اسی اپنے خُداوند یِسُوع مسِیح دی راہِیں خُدا نال صُلح رکھیے۔ جِہدی راہِیں اِیمان نال ساڈی فضل تِیکر پہنچ اے۔ جِہدے وِچ اسی قیم آں۔ تے خُدا دے جلال دی آس اُتّے اسی فخر کریئے۔“ ساڈی مکتی دی ضمانت سانوں اودوں ای مل سکدی اے جد ساڈا ایمان خُدا دے فضل نوں ٹھیک طریقے نال پورا کردا اے ۔ بالکل جویں خیمۂ اِجتماع دے ہر تختے دی نیِہ اُتے دو دو چُولاں سن ، تے ایہہ چُولاں تختے نوں سہارا دین لئی چاندی دیاں خانیاں وچ لگیاں ہویاں سن ،خُدا سانوں دسدا پیا اے پئی ساڈی مکتی فیر پوری ہوندی اے صرف جد اسی ایسے طرح دونواں یِسُوعؔ دے بپتسمے تے صلیبی لہو اُتے ایمان رکھدے آں ۔
سانوں ساریاں نوں ایسے سببوں تے ٹھیک شے اُتے ایمان رکھنا اے پئی کیوں ہر تختے وچ باہر نوں نکلیاں ہویاں دو دو چُولاں سن ۔
ایہہ دو خانے تے تختے دیاں دو چولاں پانی تےرُوح دی خوشخبری دا پرچھاواں نیں ، یعنی نویں عہد نامے دے زمانے وچ یِسُوعؔ مسیح آئے گا ، یوحنا بپتسمہ دین والے کولوں بپتسمہ لوے گا ، سولی اُتے چڑھے گا ، اپنا لہو وگائے گا تے سولی اُتے مر جائے گا، تے اِنج ساڈی مکتی نوں کامل طریقے نال پورا کرے گا ۔
پاپ دی معافی دا فضل ، دوجیاں اکھراں وچ ، صرف اوہناں دلاں اُتے ورسایا جاندا اے جیہڑے اپنی سچی مکتی اُتے اصل وچ ایمان رکھدے نیں جیہڑی یِسُوعؔ نے یوحنا کولوں بپتسمہ لین تے اوہناں دیاں پاپاں نوں مکاؤن لئی سولی اُتے اپنا لہو وگا کے پوری کیتی ۔ ایس طرح ، اپنیاں پاپاں توں مکتی یافتہ ہون لئی ، سانوں ایمان دی لوڑ اے جیہڑا یِسُوعؔ دیاں ایہناں دو کماں اُتے بھروسہ رکھدا اے ۔ اصل وچ ، خیمۂ اِجتماع دی ہر شے یِسُوعؔ دا تفصیلی خاکہ دسدی اے جیہڑا سانوں ساڈیاں پاپاں توں بچا چُکیا اے ۔ ایہہ کسے سبب توں بغیر نئیں سی پئی خُداوند نے اسرائیلیاں نوں خیمۂ اِجتماع دے ہر تختے لئی دو دو چولاں تے چاندی دے دو دو خانے ورتن دا حکم دتا سی ۔
سانوں ساڈیاں ساریاں پاپاں تے پاپ دی ساری لعنت توں کامل طریقے نال بپتسمہ تے لہو وگن دیاں کماں نال بچایا تے ازاد کیتا گیا اے جیہڑا خُدا سانوں دے چُکیا اے ۔ دوجیاں اکھراں وچ ، پانی تےرُوح دی خوشخبری اُتے ایمان رکھ کے ای اسی خُدا دے پُتر بنن دا حق پا چُکے آں ۔ ساڈا ایما ن جیہڑا کھرے سونے وانگر اے خُدا دے ایس انعام نوں پا کے بن گیا اے ۔
کیہ تُسی حالےتیکر نئیں جاندےپئی تُسی سچ مُچ کون جےبھاویں تُسی یِسُوعؔ اُتے ایمان رکھدے او؟
کیہ تُسی اپنے آپ نوں چنگا سمجھدے او ؟ کیہ تُسی اپنے آپ وچ سوچدے او پئی تہاڈا چال چلن ٹھیک اے جیہڑا کسے وی حالت وچ تے کسے وی شکل وچ کسے وی طرح دی بدکاری نوں جر نئیں سکدا ؟ کیہ تہانوں لگدا اے پئی تُسی خُدا دے اگے کسے نا کسے طرح راستباز جے ، صرف ایس سببوں پئی تُسی خُدا دیاں حکماں نوں اپنیاں دلاں وچ ہردن قیم رکھدے تے اوہناں نوں منن تے اپنیاں زندگیاں وچ ایہناں اُتے عمل کرن دی کوشش کردے او ؟ سارا کُجھ جیہڑا اسی کردے پئے آں صرف راستباز بنن دا فریب کردے پئے آں ، جد پئی اسی لُک کے زناکاری تے حرامکاری کردے پئے آں ۔
اج کل ، سَئے چینل ،کیبل یا سیٹلائٹ ٹی وی توں ویکھن لئی ہیگے نیں ۔ دِنے چوی گھنٹے چلن والے ایہہ چینل اپنے خاص پروگرام چلاؤندے نیں تے اوہناں نوں چلاؤندے رہندے نیں ۔ ایہناں چینلاں وچ ، سب توں بوہتے کاروباری طریقے نال کامیاب خاص چینل ، سب توں ودھ کے ، جواناں دے چینل نیں ۔ ایہو جیہے بوہتے جواناں دے چینل ہیگے نیں جتھے ہر طرح دیاں ننگیاں فلماں ایہناں چینلاں نوں بدل کے ، ویکھن لئی موجود ہیگیاں نیں ۔ ننگیاں ویب سائٹاں دے بارے کیہ خیال اے ؟ ایہہ آکھن دی لوڑ نئیں پئی ، ننگیاں ای میلاں دا اِک سیلاب ہُن جگ نوں نُوح دے طوفان وانگر ڈبوندا پیا اے ۔ ہر کوئی ایہناں ننگیاں ویب سائٹاں دیاں بدکاریاں نوں بھیڑا سمجھدا اے ،پر جد اسی ”سپلائی تے ڈیمانڈدے قانون“دے بارے سوچدے آں ، تاں اوہناں دی کامیابی دا مطلب صرف ایہہ ہوسکدا اے پئی بے گنت لوک لُک چھُپ کے سچ مُچ ایہو جیہاں ویب سائٹاں دے سواد لیندے نیں ۔
ایہہ کم سانوں وکھاؤندا اے پئی اسی لوک بوہت چوکھے پاپاں بھرے تے گندے آں ۔ پاک کلام حرامکاری، زناکاری تے بھیڑیاں کرتُوتاں بارے دس کے لوکاں دیاں پاپی دلاں ول اشارہ کردا اے ۔ خُدا نے فرمایا پئی ایہہ گلاں لوکاں دیاں دلاں وچوں نکلدیاں نیں تے اوہناں نوں پلیت کردیاں نیں ، تے ایہہ صاف ای پاپ نیں ۔ تاں کیہ اسی سارے پاپ نال بھرے ہوئے نئیں ہیگے ؟ خُدا نے بوہتی وار فرمایا ساڈے اندر جیہڑیاں بھیڑیاں کرتُوتاں نیں اوہ پاپ نیں ۔
پر کیہ اسی سچ مُچ ایہنوں من دے آں ؟ ایہہ کویں اے ؟ کیہ اسی اپنیاں اکھاں بند کر کےتے کناں نوں کج کے پاپ دیاں اوہناں کرتُوتاں توں بچ سکدے آں جیہڑیاں ساڈے اندر نیں ؟ اسی بچ نئیں سکدے سگوں اپنیاں ذہناں تے خیالاں دیاں سوچاں نال ہر طرح دے پاپ کردے آں ۔کوئی معنی نئیں رکھدا اسی اپنے آپ بارے کناں ای دسدے آں پئی سانوں ایہو جیہیاں پاپاں توں دُور بھجنا اے ، تے ایس توں کوئی فرق نئیں پیندا پئی اسی اِنج کرن لئی کنی کوشش کردے آں ، اوہ سارے فضول نیں ۔ اصل وچ ، ساڈا بدن ایہو جیہا اے پئی نا صرف اسی کد وی کامل پاک لوک بن سکدے آں جیہڑے کوئی بدنی پاپ نئیں کردے ، سگوں اسی اصل وچ ایس توں دُراڈے ہون دی تمنا نا ہون دے سببوں پاپ کرن دا چاء رکھدے آں ۔ لوکاں دے بدن تے دل سدا اوہناں شیواں توں دُور نیں جیہڑیاں پاک نیں ،تے ایہہ اِک سچیائی اے ، ایس توں علاوہ ، اوہ نا صرف پاپ دے نیڑے ہونا چاوہندے نیں سگوں اوہ ایتھوں تیکر پئی بوہتے وڈے پاپ کرنا چاہندے نیں ۔
چڑھدے پاسے، بوہت سارے لوک اپنے جمن توں کنفیوشس دیاں تعلیماں سِکھدے نیں ، تے ایس لئی اوہ ایہناں تعلیماں اُتے عمل کرن دی بوہت کوشش کردے نیں ۔ دوجے پاسے ، مغرب وچ کیتھولک پرستی یا شرعی مسیحی کلیسیاواں نے اپنےدینی منظر نامے اُتے غلبہ پا لیا اے ، تے بوہت سارے مغربی لوک خُدا دی شریعت نوں قیم رکھن دی بوہت کوشش کرچُکے نیں ، ایہہ سوچدیاں ہویاں پئی اوہ پاک توں پاک ہوسکدے نیں جنہے چر تیکر بوہتی بوہتی چوکھی کوشش کردے رہندے نیں ۔ پر ایس گل نال کوئی فرق نئیں پیندا پئی اوہناں دی دینی زندگی کُجھ وی ہوئے ، جد اوہ اپنے آپ نوں خُدا دے اگے پیش کردے نیں تےاپنے اصلی حُلیے دی چھِلڑ لاؤہندے نیں ، تاں اوہ سارے صرف پاپ دے ڈھیر تے بدکاراں دے نیانیاں وانگر نیں ۔
سارےلوک ناراست، غلطیاں بھرے ، تے مٹی تے سواہ نال بنے ہوئے پاپ دے ڈھیرنیں ۔ بھاویں چنگے نظر آؤن والے لوک جیہڑے چنگے کم صفتاں کراؤن لئی نئیں سگوں اپنے سچے دلوں کردے نیں ، تے جیہڑے اصل وچ اپنیاں چنگیاں کماں دی کوئی تعریف کراؤن بارے بے چین ہوندے نیں ، سچیائی توں بچ نئیں سکدے پئی جد اوہناں دیاں بھیڑیاں کرتُوتاں خُدا دے اگے ظاہر ہوندیاں نیں ، تاں اوہ پاپ دے ڈھیر تے بدکاراں دے نیانے نیں ۔ ایس لئی پئی لوکاں دی راستبازی دی وکالت کرنا خُدا دے اگے وڈا پاپ اے ، لوک پاپ دی سزا توں بچ نئیں سکدے جد تیکر اوہ اپنی سزا نوں نئیں پچھان دے تے پانی تےرُوح دی خوشخبری یعنی خُدا دی محبت نوں قبول نئیں کردے ۔ خُدا دے اگے لوکاں دیاں کوششاں کوئی بھلیائی نئیں وکھا سکدیاں ، ایتھوں تیکر پئی مٹی دے بھورے جنی وی نئیں ، تے لوکاں دی مرضی اوہدےاگے صرف گندگی اے ۔
پاک کلام وچ ، لوکاں نوں بوہت واری لکڑوانگر سمجھیا گیا اے ۔ کِکر دی لکڑ دا ٹوٹا آپ ای خُدا دی ہیکل دے اندر وڑدیاں ای اک ستون وانگر چُکیا نئیں جاسکدا جد تیکر خُدا پہلاں اوہناں نوں سونے نال نا مَڑھدا ۔ تے خُدا ولوں دتے گئے مکتی دے فضل دے بغیر ، لوک مٹی توں بوہتے کُجھ نئیں ہیگے جیہڑے بچ نئیں سکدے سگوں اگ دی سزا نوں جردے ۔
پر ، خُدا نے ساڈیاں ساریاں پاپاں تے غلطیاں نوں یِسُوعؔ مسیح مسیحا نوں بپتسمہ دلواؤن تے مرن تیکر لہو وگاؤن دے راہیں دُور کر دتا ، بھاویں اسی صرف پاپیاں وانگر رہے ۔ ایس مکتی دی مسیحا دے آؤن توں تقریباً اک ہزار ورہے پہلاں داؤد بادشاہ دےمُنھوں صاف طریقے نال پیشین گوئی ہوئی سی : ” جِویں چڑھدیوں لہندا دُور اےاُنج ای اوہنے ساڈیاں غلطیاں ساڈےتوں دُریڈیاں کر دِیتیاں جِویں باپ اپنیاں پُتراں اُتے ترس کھاندا اے اُنج ای خُداوند اوہناں اُتے جیہڑے اوس توں ڈردے نیں ترس کھاندا اے۔ کیوں جو اوہ ساڈ ی عادت نُوں جان دااے۔اوہنوں یاد اے پئی اسی مٹی آں۔“ (زبور ۱۰۳:۱۲۔۱۴)۔
خُدا دی راستبازی نوں جانن توں پہلاں ، لوکاں دی راستبازی ساڈی زندگی دا معیار بن گئی سی ۔ مَیں ، وی ، اِنج ای ساں جدمَیں خُدا دی مکتی دے انعام نوں نئیں جان دا ساں تے اوہدے کلام اُتے ایمان نئیں رکھدا ساں۔ اصل وچ ، مَیں اپنی کوئی راستبازی نئیں رکھدا ساں ، پر مَیں فیر وی اپنے آپ نوں غلطیوں پاک سمجھدا ساں ۔ ایس لئی میرے مُنڈے ہون دی عمر توں لے کے ، حالے تیکر بوہت سارے ویلے ہیگے نیں جد مَیں بے انصافی جر نہ سکیا تے ایتھوں تیکر پئی لوکاں نال لڑ پیا جنہاں دے برابر دا مَیں نئیں ساں ۔ ”اِک بے پاپ زندگی بسرکرنا“میرا مقصد بن گیا سی ۔ ایس طرح ، ایس لئی پئی مَیں خُدا دے اگے اپنے آپ نوں ویکھن وچ ناکام ہو گیا ساں ، مَیں اپنی دلی راستبازی نال بھریا ہویا ساں ۔ سو مَیں اپنے آپ نوں دوجیاں توں بوہت چنگا سمجھیا تے راستبازی نال زندہ رہن دی بوہت کوشش کیتی ۔
پر میرے جیہا وجود خُدا دی راستبازی اگے صرف اک پاپ دے ڈھیر توں ودھ نئیں سی ۔ مَیں کوئی ایہو جیہا بندہ نئیں ساں جیہڑا دس حکماں یاں ۶۱۳ قانوناں وچوں اک نوں وی قیم رکھ سکدا ساں جیہدے اُتے عمل کرن دا خُدا نے حکم دتا سی ۔ سچیائی ایہہ ہیگی اے پئی مَیں اوہناں نوں قیم رکھن دا ارادہ رکھدا ساں آپ ای اک ناراست عمل ساں جنہے خُدا دے کلام دے خلاف چلدیاں ہویاں مینوں پاپ توں سوا کُجھ کرن توں کامل طریقے نال نکما قرار دتا ، تے ایہہ اوس پاک خُدادے خلاف سی ۔ لوکاں دی ساری راستبازی خُدا دے اگے صرف جھوٹھی اے ۔
ایہہ نسل، جنہے زناکاری تے بدکاری دے سیلاب وچ خُدا تے اوہدی شریعت نوں گوا لیا اے ، پاپ دی کوئی وی سیانف گوا چُکی اے ۔ پر ، سانوں ایہہ مننا پوے گا پئی اسی ایس جگ دے لوک بچ نئیں سکدے سگوں ہر دن پاپ کردے آں تے ایس لئی اسی بِنا روک ٹوک دوزخ وچ جان دے حقدار آں ۔
اسی ناراست تے پاپ بھرے ہوئے ساں ، پر ہُن خُداوند نے سانوں پانی تےرُوح دی خوشخبری نال ساڈیاں پاپاں توں بچا کے اپنے لوک بنا لیا اے
اسی سارے جھوٹھے ساں ، پر مکتی دے انعام نال ، خُداوند ساڈے ورگیاں لوکاں نوں ساڈیاں ساریاں پاپاں توں بچا چُکیا اے ۔ پاک تھاں دا ہر تختہ ، جیہدی اُچیائی ۵.۴ میٹر (۱۵ فٹ)تےچوڑائی۵.۶۷ سینٹی میٹر(۲.۲فٹ)سی ،کِکر دی لکڑ نال بنے ہوئے سن جیہڑے سونے نال مَڑھے ہوئے سن تے پاک تھاں دیاں کندھاں وانگر کھلوتے ہوئے سن ۔ ہر تختے ہیٹھاں ، تختے نوں سنبھالن لئی چاندی دے دو خانے رکھے گئے سن ۔ چاندی دے خانے ایتھے ظاہر کردے نیں پئی خُدا تہانوں تے مینوں کامل طریقے نال اپنے آپ راہیں بچا چُکیااے ۔
ایہہ سچیائی پئی خُدا سانوں پاپ توں بچا چُکیا اےاوہد ی محبت اے ، جیہدے وچ یِسُوعؔ مسیح ایس زمین اُتے آیا تےساڈیاں پاپاں نوں چُکن لئی بپتسمہ لیا ، سولی اُتے مر کے ساڈیاں پاپاں دی سزا جری ، اِنج سانوں جگ دیاں ساریاں پاپاں تے ساری سزا توں بچا چُکیا اے ۔ مکتی دے انعام اُتے ایمان رکھ کے جیہڑا اوہ سانوں دے چُکیا اے، اسی نویں سریوں جم پئے آں ، مکتی داایہہ انعام جیہڑا خُداوند سانوں دے چُکیا اے اوہ سونے وانگر خراب نا ہون والا اے ، تے ایس طرح ایہہ سدا تیکر تبدیل نا ہون والا اے ۔
مکتی جیہڑی خُداوند سانوں دے چُکیا اے اوہ یِسُوعؔ دے بپتسمے تے لہو نال بنی اے تے ایہہ کامل طریقے نال تے صاف طریقے نال ساڈیاں ساریاں پاپاں نوں مکا چُکی اے ۔ ایس لئی پئی خُداوند سانوں ساڈیاں ساریاں پاپاں توں بچا چُکیا اے یعنی تُسی تے مَیں سارے دے سارے ساریاں پاپاں توں ازاد ہو سکدے آں جیہڑے اسی اپنے دل نال ، اپنیاں سوچاں نال تے اپنیاں اصلی کماں نال کردے آں ۔ مکتی دے انعام اُتے ایمان رکھ کے جیہڑا خُدا سانوں ساڈ ے دل وچ دے چُکیا اے ، اسی اوہدےقیمتی پاک لوک بن گئے آں ۔ خیمۂ اِجتماع دے ہر تختے نوں سنبھالن والیاں دو خانیاں نال ، خُدا سانوں پانی تے رُوح دی مکتی بارے دسدا پیا اے ۔ خُدا سانوں دسدا پیا اے پئی ایہہ سوفیصد اوہدا فضل تے انعام اے پئی اسی اوہدے پُتربن گئے آں ۔
جے اسی یِسُوعؔ دے بپتسمے تے لہو اُتوں اپنا ایمان کڈھ دیندے آں ، فیر ساڈے اندر کُجھ وی باقی نئیں ہیگا اے ۔ اسی سارے ایہو جیہے لوک بن گئے ساں جیہڑے پاپ دے سببوں لعنتی ہون دے حقدارساں ۔ اسی صرف فناہ ہون والے ساں جیہڑے پاپ دی مزدوری موت دا اعلان کردی ہوئی خُدا دی شریعت وچ ہوندیاں ہویاں اپنی پکی موت دے اگے کمبن دے حقدار ساں ، جنہاں نوں احساس کرنا تے سانوں اُڈیکدی ہوئی اگ دے جائز انصاف اُتے رونا سی ۔ ایہو ای سبب اے جے اسی پانی تےرُوح دی خوشخبری اُتے اپنا ایمان رکھنا چھڈ دئیے تاں اسی کُجھ وی نئیں ہیگے ۔
اک ایہو جیہے زمانے وچ رہندیاں ہویاں جیہڑا ہُن پاپ دے سببوں چھا گیا اے ، سانوں ایہہ کدی نئیں بھُلنا چاہی دا پئی ساڈی قسمت صرف پاپ دی سزا نوں اُڈیکن والی بن گئی سی ۔ اسی ایہو جیہے فناہ ہون والے لوک ساں ۔ پر ،خُدا دا فضل ساڈے اُتے پکے طریقے نال ورسایا گیا اے ایس لئی پئی اوہ سانوں پانی تے رُوح دی مکتی دے چُکیا اے ۔ مسیحا ایس زمین اُتے آیا ، یوحنا کولوں بپتسمہ لیا ، اپنا لہو وگایا تے سولی اُتے مر گیا ، فیر مویاں وچوں جی اُٹھیا ، تے اِنج سانوں ساڈیاں ساریاں پاپاں ، ساڈی ساری بدکاری ، تے ساڈی ساری سز ا توں بچا چُکیا اے ۔ پانی تے لہو دی ایس کامل خوشخبری اُتے ایمان رکھ کے ، ہُن اسی ساریاں پاپاں توں بچ گئے آں ، تے اسی صرف اپنے ایمان نال خُدا دا شکر کر سکدے آں ۔
بھاویں اسی بدنوں ادھورے آں ، ساڈے کم کرن والے لوک ، خادم تے مَیں سارے جگ وچ پانی تےرُوح دی خوشخبری دی منادی کردے پئے آں۔ بھاویں ایہہ زمانہ ایہو جیہا پاپ بھریا اے ، ایس لئی پئی اسی پانی تےرُوح دی خوشخبری اُتے ایمان رکھدے آں ، اسی خاص کر کے ، کسے بدکاری توں پاک خُداوند دی خدمت کرن دے لائق ہو گئے آں ۔ یعنی اسی ایس دل نوں پا چُکے آں ساڈی اپنی طاقت دے سببوں نئیں ہیگا ، سگوں ایس لئی پئی خُداوند سانوں اپنی مکتی دے فضل دے کپڑے پوا کے پاکیزگی دے چُکیا اے ۔
ایہہ ایس لئی اے پئی خُداوند سانوں پاپ تے سزا توں کامل طریقے نال بچا چُکیا اے پئی اسی ایہدی مکتی دی قدرت والے کپڑے پا چُکے آں ، تے ایہہ سارے دا سارا ایس سببوں اے پئی اسی خاص کر کے خُداوند دی خدمت کرن دے لائق ہو گئے آں ۔ ایس لئی پئی خُداوندسانوں پانی تے رُوح نال ساڈیاں ساریاں پاپاں توں بچا چُکیا اے ، مَیں ایمان رکھدا ہاں پئی اسی اپنیاں کمیاں دے ہوندیاں ہویاں اوہدی خدمت کر سکدے آں، اسی ہور اپنیاں پاپاں ، کمیاں تے سزا دے قیدی نئیں ہیگے ۔
پئی مَیں جو ہیگا آں اوہ بالکل خُدا دے فضل نال آں
سچ مُچ ، جے ساڈے خُداونددافضل نا ہوندا تاں ایہہ سارے اوکھے کم نیں ۔ سارے جگ وچ پانی تےرُوح دی خوشخبری ودھاؤنا تے ایس خوشخبری دی خاص کر کے خدمت کرنا بالکل سوکھا نا ہوندا جے ایہہ خُداوند دا فضل نا ہوندا ۔ ایہہ سو فیصد مکتی دے فضل نال اے جیہڑا خُدا سانوں دے چُکیا اے پئی تُسی تے مَیں خوشخبری دی راکھی کرن تے ایہدی خدمت کرن لئی اپنیاں زندگیاں بسر کرن دے لائق آں ۔
اسی خُدا دی ہیکل دے ستون بن گئے آں (مکاشفہ ۳:۱۲)تے ایمان رکھ کے اوہدی بادشاہی دے لوک بن گئے آں ۔ ایس لئی پئی خُداوندسانوں سونے وانگر ایمان دے چُکیا اے ، ہُن اسی خُدا دے گھر وچ زندگی گزاردے آں ۔ ایس زمین وچ جد دُنیا پاپ دے سبب سیلاب وچ اے تے ڈُب دی پئی اے ، اِک ایہو جیہا زمانہ جد بوہتے لوک بھُل دے پئے نیں یا ایتھوں تیکر پئی خُدا بارے کفر بک دے پئے نیں ، پر اسی صاف پانی نال دُھل گئے آں تے پاک ہو گئے آں ، تے اسی پاک پانی پین تے خاص کر کے خُداوند دی خدمت کرن دے لائق ہو گئے آں—اکھر ایس گل نوں ظاہر نئیں کر سکدے پئی مَیں ایس برکت لئی کنے سچے دلوں شکر گزار ہاں ۔
بِنا شک ساڈا ایمان ایہو جیہا ای اے ۔ اسی کویں راستبازبن سکدے ساں ؟ اسی کویں اپنے آپ نوں راستباز آکھن دے لائق ہو گئے آں جد ساڈے وچ کوئی بھلیائی نئیں ہیگی ۔ میرے تے تہاڈے جیہے پاپی لوک کویں بے پاپ ہو سکدے آں ؟ کیہ تُسی اپنے بدن دی راستبازی نال بے پاپ تے راستباز بن سکدے سو ؟ بدنی خیال ، تہاڈیاں اپنیاں کوششاں ، تے تہاڈے اپنے چنگے کم — کیہ ایہناں وچوں کوئی وی تہانوں بے پاپ ، راستبازلوک بنا سکدا سی ؟ کیہ تُسی پانی تےرُوح دی خوشخبری اُتےایمان رکھ کے راستبازبن سکدے سو ؟ کیہ تُسی اسمانی، ارغوانی تے لال دھاگےتے مہین وٹے ہُوئے کتان وچ ظاہر ہوئی خُدا دی مکتی اُتے اپنے ایمان رکھ کے راستباز بن سکدے سو ؟ کیہ تُسی مسیحا ولوں پوری ہوئی تے خُدا دے کلام وچ ظاہر ہوئی پانی تےرُوح دی خوشخبری ولوں اپنی مکتی اُتے ایمان رکھیوں بغیر راستباز بن سکدے سو؟ تُسی کدی ایہو جیہے نئیں بن سکدے سو !اسی صرف لال دھاگے اُتے ایمان رکھ کے ، کدی راستباز نئیں بن سکدے ۔
ایس لئی پئی یِسُوعؔ مسیح ، ساڈے مکتی داتا تے مسیحا نے ، جگ دیاں ساریاں پاپاں نوں ، نال ای ساڈیاں ساریاں زندگیاں دیاں پاپاں نوں موہڈا دتا ، بپتسمے نال جیہڑا اوہنے ساڈے بدلے ساڈیاں ساریاں پاپاں نوں مکاؤن لئی یوحنا کولوں لیا ، اسی ایمان رکھ کے راستباز بن گئے آں ۔ جویں پُرانے عہد نامے دی قربانی دا پشُو پاپ چُکدا سی جد پاپی یا وڈاکاہن اوہدے سِر اُتے اپنے ہتھ رکھدے سن ، نویں عہد نامے دے زمانے وچ یِسُوعؔ نے یوحنا کولوں بپتسمہ لے کے اپنے اُتے لد ے ہوئے جگ دیا ں ساریاں پاپاں نوں قبول کیتا ۔ یسو ع نے اصل وچ اپنے بپتسمے نال ساڈیاں ساریاں پاپاں نوں چُک لیا (متی ۳:۱۵)۔ تے اوہدی یوحنانے اِنج گواہی دتی، ” ویکھو خُدا دا برّہ جیہڑا دُنیا دا گُناہ چُک لے جاندا اے۔ “(یوحنا ۱:۲۹)۔
اپنا بپتسمہ لین دے بعد ، یِسُوعؔ نے ساڈی مکتی لئی اپنی زندگی دے اگلے تِن ورہے گزارے ، ساڈے ساریاں پاپاں تے سزا نوں مکا کے یعنی سولی اُتے جان تےخُدا دے اگے اپنے آپ نوں قربان کر کے ، جویں بھیڑ اپنے وال کترن والے دے اگے چُپ کیتی رہندی اے ، اوہ سانوں نویں زندگی دے چُکیا اے ۔
ایہہ ایس لئی اے پئی یِسُوعؔ مسیح نے بپتسمہ لے کے ساڈیاں پاپا ں نوں چُک لیا جیہڑا اوہنے یوحنا کولوں لیا پئی اوہنے اپنے آپ نُوں چُپ کر کے حوالے کیتا تےاوہدیاں دونواں ہتھاں تے پیراں اُتے کِل ٹھوکے گئے جد اوہنوں رومی سپاہیاں نیں سولی اُتے چاہڑیا ۔ سولی اُتے ٹنگ کے ، یِسُوعؔ نے سارا لہو وگا دتا جیہڑا اوہدے بدن وچ سی ۔ تے اوہنے ساڈی مکتی لئی حتمی زمانہ رکھیا تے آکھیا ، ” پُورا ہویا“(یوحنا ۱۹:۳۰)۔
اِنج مرن پِچھوں ، اوہ تِناں دناں مگروں فیر مویاں وچوں جی اُٹھیا ، اسمانی بادشاہی اُتے چڑھ گیا تے سانوں سدا دی زندگی دے کے ساڈا مکتی داتا بن گیا اے ۔ بپتسمہ لے کے جیہڑا اوہنے یوحنا بپتسمہ دین والے کولوں لیا جگ دیاں پاپاں نوں موہڈے اُتے سُٹ کے تے اپنی سولی ،جی اُٹھن، تے اسمان اُتے جا کے ، یِسُوعؔ ساڈا کامل مکتی داتا بن گیا اے ۔ ایس لئی ، پاک کلام اعلان کردا اے ، ” تے جد اوہناں دی مُعافی ہوگئی اے۔ تے فیر گُناہ دی قُربانی دا تھاں نا رہیا۔“(عبرانیوں ۱۰:۱۸)۔
صرف سولی دے لہوتے ہو لی ہولی پاکیزگی دے نظریے اُتے ایمان نے تہانوں کدی وی تہاڈیاں پاپاں توں سارے دا سارا نئیں بچایا
مسیحیاں نوں جاننا چاہی دا اے پئی اوہ صرف یِسُوعؔ دےصلیبی لہو اُتے ایمان رکھ کے اپنیاں پاپاں توں کامل طریقے نال مکتی یافتہ نئیں ہو سکدے ۔ ایس لئی پئی لوک اپنیاں اکھاں تے کماں نال ہردن پاپ کردے نیں ، اوہ صرف صلیبی لہو اُتےایمان رکھ کے اپنیاں پاپاں نوں نئیں مکا سکدے ۔ اج کل لوکاں دیاں زندگیاں وچ سب توں بوہت ہون والیاں ، چھا جان والیاں بدکاریاں وچوں اِک جِنسی بھیڑی راہ اُتے پینا اے۔جویں پئی سرِ عام تے ننگی جِنس پرستی دی عادت ساری دُنیا وچ ودھ گئی اے ، ایہہ پاپ ساڈے دل وچ کھُب گیا اے ۔ پاک کلام سانوں زنا ،نا کرن دا حکم دیندا اے ، پر اج دی سچیائی ایہہ ہیگی اے پئی اپنے آلے دوالے دیاں حالاں دے سببوں بوہت سارے لوک نا چاؤہندیاں ہویاں وی ایہہ پاپ کردے نیں ۔
خُدا اعلان کردا اے پئی جیہڑا وی کسے زنانی نوں بھیڑی نظر نال ویکھدا اے اوہ پہلاں ای اپنے دل وچ اوہدے نال زنا کر چُکیا اے (متی ۵:۲۸)،تے فیر وی جو کُجھ ساڈیاں اکھاں ہر دن ویکھدیاں نیں اوہ ساریاں گندیاں شیواں نیں ۔ ایس لئی لوک ہر منٹ تے ہر سیکنڈ وچ ایہو جیہے بدکاری دے پاپ کردے پئے نیں۔ جد ایہہ صورت ِ حال اے ، تاں کویں اوہ اپنیاں توبہ دیاں دعاواں پیش کر کے پاک ہو سکدے تے خُدا دی بادشاہی وچ جا سکدے نیں ؟ کویں اوہ راستبازبن سکدے نیں ؟ کیہ اوہناں دے دل صاف ہو سکدے نیں جد اوہ لمے چر تیکر اپنے آپ نوں نظم و ضبط دے تابعدار کردے نیں تے کسے طرح پاک ہو جاندے نیں جد اوہ بُڈھےہو جاندے نیں ؟ کیہ اوہناں دے کم حلیم بن جاندے نیں ؟ کیہ اوہ بوہتے صبر کرن والے بن جاندے نیں ؟ بالکل نئیں ! جو کُجھ ہوندا اے ایہدے بالکل اُلٹ ہوندا اے ۔
بوہت مشہور ہون والے مسیحی نظریاں وچوں اِک ”ہولی ہولی پاکیزگی دا نظریہ “اے ۔ ایہہ نظریہ بوہت دسدا اے پئی جد مسیحی لمے چر تیکر یِسُوعؔ دی صلیبی موت اُتے ایمان رکھدے نیں ، ہر دن توبہ دیاں دعاواں منگدے نیں ،تے ہر دن خُداوند دی خدمت کردے نیں ، تاں اوہ ہولی ہولی پاک تے چنگیاں عادتاں والے بن جاندے نیں ۔ ایہہ دعویٰ کردا اے پئی جنہاں بوہتا ویلا لنگھدا اے جدوں توں اسی یِسُوعؔ اُتے ایمان رکھنا شروع کیتا ، اونا ای بوہتا اسی اک ایہو جیہا بندہ بن جاندے آں جیہدا پاپ نال کوئی میل جول نئیں تےجیہدے کم چنگے نیں ، تے ایہہ پئی جد موت ساڈے نیڑے آؤندی اے ، تاں اسی سارے دے سارے پاک تے اِنج کامل طریقے نال بے پاپ بن جاواں گے ۔
تے ایہہ وی سکھاندا اے پئی ایس لئی پئی اسی ہر ویلے توبہ دیاں دعاواں کیتیاں ہون گئیاں ، تاں اسی ہر دن اپنیاں پاپاں توں دُھل گئے ہوواں گے ، جویں ساڈے کپڑے دھوئے جاندے نیں ، تے ایس لئی جد اسی اخیریں مراں گے ، تاں اسی خُدا کول کسے ایہو جیہے بندے وانگر جاواں گے جیہڑا سارے دا سارا راستباز بن گیا اے ۔ بوہت سارے لوک نیں جیہڑے ایسے طرح ایمان رکھدے نیں ۔ پر ایہہ اک فرضی سوچ خیال اے جیہڑا بندے نے اپنے دلوں بنایا اے ۔
رومیوں ۵:۱۹ فرماندااے، ” کیوں جوجویں اِک بندے دے حُکم موڑن نال بتھیرے گُناہیں ٹھہرائے گئے۔ایسے طرح اِک بندے دے حُکم مَنّن نال بتھیرے راست باز ٹھہرائے جان گے۔“ ایہہ حوالہ سانوں دسدا اے پئی اسی سارے اک بندے دے حُکم مَنّن نال بے پاپ ٹھہردے آں ۔ تُسی تے مَیں جو کُجھ نئیں کرسکدے ساں ، یِسُوعؔ مسیح نے اوہ پوراکیتا جد اوہ بندیاں وانگر ایس زمین اُتے آیا ۔ ایہہ جاندیاں ہویاں پئی تُسی تے مَیں اپنے آپ پاپ توں چھُٹ نئیں سکدے ساں ، یِسُوعؔ نے ساڈے بدلے ساڈیاں پاپاں نوں مکایا ، ایہو جیہا کم جیہڑا نا تُسی نا ای مَیں کدی کر سکدا ساں ۔ ایس زمین اُتے آ کے ، بپتسمہ لین ، سولی اُتے مرن ،تے فیر مویاں وچوں جی اُٹھ کے ، اوہ تہانوں تے مینوں بچا چُکیا اے تے سانوں اِکو ای واری سدا لئی ساڈیاں ساریاں پاپاں توں پاک کر چُکیا اے ۔
ایہہ پئی یِسُوعؔ مسیح اپنیاں لوکاں نوں اوہناں دیاں پاپاں دی معافی دے کے مکتی دے سکدا سی ایس لئی پئی اوہنے خُدا دی مرضی نوں منیا۔ مسیحا بن کے خُدا دی مرضی پوری کر کے،یِسُوعؔ مسیح ساڈے اُتے اپنے بپتسمے ، سولی ، تے جی اُٹھن نال مکتی دا فضل گھل چُکیا اے ۔ اِنج سانوں مکتی دا انعام دے کے ، یِسُوعؔ نے کامل طریقے نال پاپ دی معافی پوری کیتی ۔ تے ہُن ، ایمان رکھ کے ، اسی ایس مکتی دے فضل دےکپڑے پا چُکے آں ، ایس لئی پئی خُداوندساڈی پاپ توں مکتی نوں پورا کر چُکیا اے ، جیہڑی کدی وی ساڈی اپنی ہمت نال حاصل نئیں ہوسکدی سی ۔
پر،بوہتے مسیحی بپتسمہ اُتے ایمان نئیں رکھدے جیہڑا یِسُوعؔ نے لیا سی ، سگوں ایہدی بجائے صرف لہو اُتے ایمان رکھدے نیں جیہڑا اوہنے سولی اُتے وگایا تے اپنیاں دلی چنگیاں کماں نال راستبازٹھہرن دی کوشش کردے نیں ۔ دوجیاں اکھراں وچ ، بھاویں جویں پئی یِسُوعؔ نے ساریاں لوکاں دیاں ساریاں پاپاں نوں چُک لیا جد اوہنے یوحنا کولوں بپتسمہ لیا ، پر لوک فیر وی ایس سچیائی اُتے ایمان نئیں رکھدے ۔ متی باب ۳ سانوں دسدااے پئی سب توں پہلا کم جیہڑا یِسُوعؔ نے اپنی عوامی زندگی وچ کیتا سی یوحنا کولوں بپتسمہ لیا سی ۔ ایہہ اوہ سچیائی اے جیہدی تصدیق انجیل دیاں چونہہ لکھاریاں نیں کیتی اے ۔
یِسُوعؔ نے یوحنا بپتسمہ دین والے ، ساریاں لوکاں دے نمائندے تے زنانیاں وچوں جمن والیاں وچوں سب توں وڈے کولوں بپتسمہ لے کے ساڈیاں پاپاں نوں چُک لیا ، تے فیر وی بوہت سارے لوک نیں جیہڑے ایس سچیائی نوں ردّ کردے تے ایس اُتے ایمان نئیں رکھدے ۔ ایہو جیہے لوک اوہدے بپتسمے اُتے ایمان رکھیوں بغیر یِسُوعؔ اُتے ایمان رکھدے نیں ، تے بوہت چوکھا صرف صلیبی مہنگے لہو دی جیہڑا اوہنے وگایا وڈیائی کردے نیں ۔ سولی اُتے ، یِسُوعؔ دی موت توں دُکھی ہوکے ، اوہ اپنیاں جذبیاں نوں بھڑکاؤندے نیں ، اپنی وڈیائی وچ ہر طرح دا رولا پاؤندے ، تے اِنج چانگراں ماردے نیں ، ” ♫ لہو وچ حیران کرن والی طاقت اے ۔♪ لیلے دے مہنگے لہو وچ طاقت ، حیرانی والے کم کرن والی طاقت اے ! ♫“دوجیاں اکھراں وچ ، اوہ اپنیاں جذبیاں ، جوش تے طاقت نال ودھ کے خُدا کول جان دی کوشش کردے نیں ۔ پر تہانوں ایہہ جان لینا چاہی دا اے پئی اوہ جناں بوہتا اِنج کردے نیں ،اونے ای بوہتے فریبی اوہ بن دے جاندے نیں ،جیہڑے پئی پاک ہون دا کھیڈ کردے نیں پر اصل وچ اپنیاں دلاں وچ لُک کے پاپاں نوں اکٹھیاں کردے پئے نیں ۔
اسی پانی تےرُوح دی خوشخبری نوں جانیے بغیر یِسُوعؔ اُتے اپنے مکتی داتا وانگر کویں ایمان رکھ سکدے آں ؟
جد اسی لوکاں نوں خیمۂ اِجتماع دے بارے گل کردیاں ہویاں سُن دے آں ، تاں اسی بوہتی واری ویکھدے آں پئی اوہناں نوں تھوڑا جیہا وی اندازہ نئیں ہوندا پئی اوہ سچ مُچ کِہدے بارے گل کر دے پئے نیں ۔ جدخیمۂ اِجتماع اُتے ایمان رکھن دی گل ہوندی اے ، تاں کویں اسی صرف ایمان رکھ سکدے آں جیہڑے وی طریقے نال اسی تسلی پاؤندے تے چنگا سمجھدے آں؟ ایس لئی پئی پاپ توں مکتی جیہڑی خُداوند پوری کر چُکیا اے بوہت وڈی اے ، خُدا سانوں ایہہ سمجھن دے لائق کر چُکیا اے پئی ساڈی مکتی کنے وڈے تے کنے پکے طریقے نال پوری ہو گئی اے ۔
خیمۂ اِجتماع دے راہیں ، اوہنے سانوں ایہہ احساس وی دلوایا اے پئی خُداوند اسمانی تے ارغوانی رنگ ، یعنی پانی تے لہو نال سانوں بچا چُکیا اے ۔ اسی احساس کردے آں پئی ساڈیاں پاپاں نوں مکاؤن لئی،خُداوند”نِرا پانی دے راہیں نئیں ۔سگوں پانی تےلہو دوآں دی راہیں۔“ آیا (۱۔یوحنا ۵:۶)۔ پانی ،لہو تے رُوح جیہدے اُتے اسی ایمان رکھدے آں اِک نیں ۔ ایہہ اِک بندے وانگر آؤن ، یوحنا بپتسمہ دین والے کولوں بپتسمہ لین،مرن ، تے فیر مویاں وچوں جی اُٹھن دے راہیں ہیگا اے پئی خُداوند سانوں بچا چُکیا اے ۔
خیمۂ اِجتماع دے راہیں ، اسی مکتی دے ایس تفصیلی خاکے نوں لبھن تے ایس اُتے ایمان رکھن دے لائق ہو گئے آں ۔ ہر تختیاں دیاں دو چُولاں تے چاندی دیاں دو خانیاں بارے پڑھ کے ، اسی اوس طریقے دا احساس کرن تیکر اَپڑدے آں جیہدے راہیں یِسُوعؔ سانوں ساڈیاں پاپاں توں بچا چُکیا اے ۔ تے اِنج اسی سچیائی پا چُکے آں پئی سانوں لازمی خاص کر کے اسمانی، ارغوانی تے لال دھاگے وچ ظاہر کیتیاں گئیاں یِسُوعؔ دیاں خدمتاں اُتے ایمان رکھنا چاہی دا اے ۔
پاک کلام توں علاوہ ،ایس مکتی دی جَڑ کدھرے وی نئیں مل سکدی ۔ سانوں مکتی دے انعام دی لوڑ اے جیہڑی بپتسمہ تے سولی دیاں ایہناں دو شیواں نال بنی ہوئی اے ۔ اوہ جیہڑے ایس سچیائی اُتے ایمان رکھدے نیں فیر اوہ لوک بن سکدے نیں جیہڑے خُدا وچ جمے نیں ۔ سانوں ساڈیاں پاپاں توں پانی تے لہو نال چھڈا کے ، خُدا ساڈی مکتی نوں کامل طریقے نال پورا کر چُکیا اے ۔
دوجیاں اکھراں وچ ، ہر تختے ہیٹھاں دو چُولاں بنائیاں گئیاں سن تے چاندی دیاں دو خانیان وچ ٹھوکیاں گئیاں سن ۔ ایہہ سچیائی ساڈے لئی تے ساڈیاں پاپاں دی معافی لئی بوہت ضروری تے بوہت خاص اے ۔ سب توں بوہت خاص ، سانوں لازمی اپنی مکتی اُتے ایمان رکھنا چاہی دا اے جیہڑی خُدا ساڈے لئی کامل کر چُکیا اے ، ایس لئی پئی جے اسی اسمانی، ارغوانی تے لال دھاگےدی سچیائی اُتے ایمان نئیں رکھدے ، اسی کدی مکتی یافتہ نئیں ہوسکدے ۔
جویں پاک خیمۂ اِجتماع دے ہر تختے نوں سِدھے کھلوتے رہن لئی چاندی دیاں دو خانیاں دی لوڑ سی ، جد یِسُوعؔ مسیح اُتے ایمان رکھن دی گل ہوندی اے ، تاں اوہدے فضل دیاں دو سچیائیاں خاص کر کے ضروری نیں ۔ اوہ سچیائیاں کیہ نیں ؟ اوہ سچیائیاں ایہہ نیں پئی یِسُوعؔ نے بپتسمہ لے کےساڈیاں پاپا ں نوں چُک لیا، تے ایہہ پئی اوہنے اوہناں نوں سُولی اُتے لے جان سُولی اُتے مر کے ساڈیاں پاپاں دی ساری سزا تے لعنتاں نوں جریا ۔ جیہڑا وی راستباز بن دا اے صرف ایہو جیہا بن سکدا اے جد اوہ سچے دلوں کامل مکتی دیاں ایہناں دو فضلاں اُتے ایمان رکھدا اے ۔ دوآں یِسُوعؔ دے بپتسمہ تے صلیبی لہو اُتے ساڈا ایمان ، اوہدے مکتی دے انعام دیاں دو خاص شیواں ، سانوں خُدا دے گھر وچ ڈٹ کے کھلاردے نیں ۔ جویں چاندی دے دو خانیاں وچ دو چُولاں لائیاں گئیاں سن ، تاں ہر تختہ سِدھا کھڑا رہ سکدا سی ۔
ایس طرح ، ایہہ ساڈے ٹھیک ایمان رکھن نال اے جیہڑا اوہدی مکتی دیاں دو خاص شیواں اُتے بھروسہ رکھدا اے پئی اسی سچ مُچ اوہدے بے پاپ لوک بن جاندے آں ۔ یِسُوعؔ ولوں دتی گئی پانی تےرُوح دی خوشخبری اُتے ایمان رکھ کے ، اسی سونے وانگر ایمان رکھدے آں جیہڑاسدا تیکر اِکو جیہا اے ۔ اسمانی، ارغوانی تے لال دھاگےتے مہین وٹے ہُوئے کتان وچ ظاہر کیتی گئی پانی تےرُوح دی ایس خوشخبری اُتے رکھن نال ،اسی راستباز بن جاندے آں جیہڑے پاپ دی معافی دی کامل مکتی پا چُکے آں ۔
ہُن تیکر دی الہٰیات تے پانی تے رُوح دی خوشخبری دا زمانہ
مُڈھلی کلیسیا دا زمانہ کڈھ کے، ۳۱۳ مسیح دے بعد دےمیلان دے فرمان توں لے کے ، اج دی مسیحیت نوں رلاؤندیاں ہویاں ، مسیحیت ، سولی دی خوشخبری نوں ودھاؤندی پئی اے جنہے یِسُوعؔ دے بپتسمے نوں کڈھ دتا اے ۔ مُڈھلی کلیسیا دے زمانے توں لے کے ۳۱۳ مسیح دے بعد تیکر ، جنہے مسیحیت نوں نویں رومی دین وانگرقانونی حیثیت دتی ، مسیحیت پانی تےرُوح دی خوشخبری دی منادی کر چُکی سی ، پر ایہدے مگروں رومی کیتھولک کلیسیا دینی روپ اُتے چھا گئی ۔ فیر چودھویں صدی دے شروع توں ، اک ایہو جیہی تہذیب جنہے ہر شے نوں بندے دے بنائے ہوئے خیالاں ول ٹوریا تے انسانیت دی بحالی بارے گل کیتی ، سب توں پہلاں شمالی اٹلی دے کئی امیر ریاستی شہراں وچ ودھنی شروع ہوئی ۔ ایہہ نشاۃ ثانیہ دا زمانہ سی ۔
سولہویں صدی تیکر ،اٹلی وچ شروع ہون والی ایس تہذیب دا ہیٹھلا اثر ساری مغربی دُنیا وچ ودھنا شروع ہو گیا ، تے انسانیت پسندی ، بندیاں دے بنائے ہوئے فلسفے نوں پڑھن والیاں عالماں نیں خُدائی تعلیم نوں پڑھنا شروع کردتا ۔ اپنے دماغ نال پاک کلام دی تشریح کردیاں ہویاں ، اوہناں نیں مسیحی خُدائی نظریے بناؤنے شروع کیتے ۔پر ایس لئی پئی اوہ سچیائی نوں نئیں جان دے سن ، ایس لئی اوہ پاک کلام نوں ٹھیک تے سارے دا سارا نا سمجھ سکے ۔ ایس لئی جیہڑا کُجھ اوہ اپنیاں ذہناں نال نا سمجھ سکے ، اوہ اوہناں نال اپنے دُنیاوی علم تے خیالاں نوں رَلا کے ہار گئے ، تے اِنج اپنے مسیحی نظریے بنا لَئے ۔
نتیجے طور اُتے ، مسیحی تاریخ وچ مسیحی نظریے تےبوہت چوکھیاں خُدائی تعلیماں جم پئیاں : مثال طور اُتے لُوتھر ن ازم ، کیلون ازم ، آرمینین ازم ، نویں تھیالوجی، پُرانیاں خیالاں نوں پسند کرن دا نظریہ ،ریشنل ازم ، نقطہ چینی والی خُدائی تعلیم ،صوفیاں والی خُدائی تعلیم، ازاد خیالاں والی خُدائی تعلیم، زنانیاں دے حق والی خُدائی تعلیم، بلیک خُدائی تعلیم، تے ایتھوں تیکر پئی کافر خُدائی تعلیم، وغیرہ ۔
مسیحیت دی تاریخ بوہت لمی لگدی اے ، پر اصل وچ ایہہ اینی لمی نئیں ہیگی ۔ مُدھلی کلیسیا دے زمانے تو ں لے کےتِن سو ورہیاں تیکر ، لوک پاک کلام دے بارے جان سکدے سن ، پر ایہدے بعدوں چھیتی نال قرونِ وسطیٰ ، یعنی مسیحیت دا ہنیرےوالا زمانہ شروع ہوگیا ۔ ایس زمانے وچ ، عام لوکاں لئی بائبل پڑھنا آپ اِک جُرم سی جیہدی سزا سِر لاہ دتا جانا سی ۔ ایہہ ۱۷۰۰ مسیح دے بعد دی دہائی تیکر نئیں سی جد خُدائی تعلیم دی وَا چلن لگ پئی تے مسیحیت اٹھارہویں تے اُنیویں صدی وچ ودھدی ہوئی نظر آئی جویں ای ایہدے خُدائی نظریے متحرک تے کم کر ن لگے ، پر ہُن ، بوہتے لوک صوفیاں والی خُدائی تعلیم وچ، اپنے دلی بندیاں والیاں تجربے کر کے خُدا اُتے ایمان رکھن وچ پھس گئے سن ۔ پر اپنے خُدائی نظریاں دے فرق دے باوجود ، مسیحیت دیاں ساریاں شاخاں دیاں دھاریاں وچ ایمان دا اک سانجھا نقطہ نظر اے ، تے ایہہ صرف یِسُوعؔ دے لہو اُتے ایمان رکھنا اے ۔
پر کیہ ایہہ سچ اے؟ جد تُسی ایس طریقے نال ایمان رکھدے سو ، تاں کیہ تہاڈے پاپ سچ مُچ غائب ہو گئے سن ؟ تُسی ہر دن پاپ کردے او ۔ تُسی اپنیاں دلاں ، سوچاں ، کماں تے کمیاں نال ہر دن پاپ کردے او ۔ فیر کیہ تُسی صرف لہو اُتے جیہڑا یِسُوعؔ نےسولی اُتے وگایا ایمان رکھ کے صرف ایہناں پاپاں توں معاف ہو سکدے او ؟ ایہہ پئی یِسُوعؔ نے بپتسمہ لے کے ساڈیاں پاپاں نوں موہڈا دتا تے سولی اُتے مرگیا پاک کلام دے مطابق سچ اے ۔ فیر وی بوہتے لوک نیں جیہڑے کہندے نیں پئی اوہناں دے پاپ صرف صلیبی لہو اُتے ایمان رکھن تے ہر دن توبہ دیاں دعاواں کر کے معا ف ہوگئے نیں ۔ کیہ تہاڈے دل تے ضمیر دے پاپ توبہ دیاں دعاواںمنگن نال پاک ہوئے نیں ؟ ایہہ نئیں ہو سکدا ۔
جے تُسی مسیحی جے ، تاں تہانوں لازمی ہُن جاننا تے ایس سچیائی دی مکتی اُتے ایمان رکھنا چاہی دا اے پئی یِسُوعؔ مسیح ایس زمین اُتے آیا تے یوحنا کولوں بپتسمہ لے کے ساڈیاں جگ دیاں پاپاں نوں چُک لیا ۔ ایہدے باوجود ، کیہ تُسی ایس سچیائی نوں ردّ کردے پئے او، ایہنوں جانن دی کوشش وی نئیں کردے ، تے نا ای ایہدے اُتے ایمان رکھن دی کوشش کردے او؟ جے اِنج اے ، تاں تُسی یِسُوعؔ نوں مخول کرن ، اوہدے ناں نوں نیواں کرن تے بے عزت کرن دا پاپ کردے پئے او ، تے تُسی ایہہ نئیں کہہ سکدے پئی تُسی سچ مُچ یِسُوعؔ اُتے اپنے مکتی داتا وانگر ایمان رکھدے او ۔ یِسُوعؔ مسیح دے راہیں پوری ہون والی ایس مکتی نال یِسُوعؔ دے بپتسمے نوں کڈھن تے ایس اُتے کسے وی طریقے نال جیہڑا تُسی چاؤہندے اے ایمان رکھن نال ، تُسی کدی وی مکتی دے فضل دے کپڑے نئیں پا سکدے ۔
فیر وی بوہتے مسیحی ایس سچیائی اُتے ایمان نئیں رکھدے جویں ایہہ ہیگی اے پئی یِسُوعؔ ساڈیاں پاپاں نوں مکا چُکیا اے ، سگوں ایہدی بجائے اپنیاں دلی سوچاں نوں من دے نیں تے سارے وِنگیاں چِبیاں سچیائیاں اُتے جنہاں نوں اوہ پسند کردے نیں ایمان رکھدے نیں ۔ اج کل ، اوہناں دے دل اوہناں دے غلط خُدا اُتے ایمان رکھن نال بوہت چوکھے پتھر ہو گئے نیں ، ایہہ ایمان رکھدیاں ہویاں پئی صرف صلیبی لہو اُتے ایمان رکھ کے اوہناں دے پاپ مُک سکدے نیں ۔
پر اوہناں ولوں منصوبہ بنائی مکتی دا جواب ہیٹھاں لکھیا ہویااے : اسی یِسُوعؔ دے بپتسمے ،اوہدی سولی اُتے موت ، تے اوہدے جی اُٹھن نال پاپ دی سدا دی معافی پاسکدے آں۔ ایہدے باوجود ایہو جیہے بوہت چوکھے لوک اُٹھ کھلوتے نیں جیہڑے مکتی دی ایس سچیائی وچوں بپتسمے نوں کڈھ کے یِسُوعؔ اُتے ایمان رکھدے نیں تے ہیٹھاں لکھی ہوئی مساوات نوں اک نا بدلن والے قانوں وانگر غلط سمجھدے تے غلط ایمان رکھدے نیں : ”یِسُوعؔ(سُولی تےاوہدا جی اُٹھنا) +توبہ دیاں دُعاواں + چنگے اعمال =ہولی ہولی پاکیزگی نال ملی ہوئی مکتی۔“ اوہ جیہڑے ایس طریقے نال ایمان رکھدے نیں صرف اپنے مُنھوں کہندے پئے نیں پئی اوہ پاپ د ی معافی پا چُکے نیں، پر ، سچیائی ایہہ ہیگی اے پئی اوہناں دے دل اصل وچ پاپ دے ڈھیر نال بھرے ہوئے نیں جیہڑے حالے تیکر حل ہوئیوں بغیر قیم نیں ۔
کیہ تُسی حالے تیکر اپنیاں دلاں وچ پاپ رکھدے او ؟ جے تُسی اپنیاں دلاں وچ پاپ رکھدے او بھاویں تُسی ہُن یِسُوعؔ اُتے ایمان رکھدے او ، تاں صاف طریقے نال ، تہاڈے ایمان نال ڈاہڈا مسئلہ اے ۔ ایہہ ایس لئی ہیگا اے ایس لئی پئی تُسی یِسُوعؔ اُتےصرف دینی معاملے لئی ایمان رکھدے او تہاڈے ضمیر صاف نئیں تے تُسی پاپ رکھدے او ۔ پر ، اصل سچیائی جیہدا تُسی احساس کر سکدے او پئی تُسی حالے تیکر اپنے دل وچ پاپ باقی رکھدے او اپنے آپ وچ بوہت خوشی نصیبی دی گل اے ۔ کیوں ؟ ایس لئی پئی اوہ جیہڑے سچ مُچ احساس کردے نیں پئی اوہ پاپ رکھدے نیں پچھانن گے پئی اوہ بچ نئیں سکدے سگوں ایس پاپ دے سببوں دوزخ دے لائق نیں ، تے جد اوہ اِنج کردے نیں تاں اوہ اخیریں رُوح ولوں ماڑے ہوسکدے نیں تے اِنج اصل مکتی دا کلام سُنن دے لائق ہو سکدے نیں ۔
جے تُسی خُدا کولوں پاپ دی معافی پاؤنا چاہندے او ، فیر تہاڈیاں دلاں نوں لازمی تیار ہونا چاہی دااے۔ اوہ جناں دے دل خُدا دے اگے تیار نیں اوہ من دے نیں ، ”اے خُدا،مَیں پاپ دی معافی پاؤنا چاہندا ہاں ۔مَیں بوہت چر توں یِسُوعؔ اُتے ایمان رکھیا اے ، پر مَیں حالے تیکر پاپ رکھدا ہاں ۔ ایس لئی پئی پاپ دی مزدُوری موت اے ، مَیں بچ نئیں سکدا سگوں دوزخ وچ سُٹیا جاواں گا۔ “ایس طرح اوہ اپنے آپ نوں کامل طریقے نال پاپی وانگر پچھان دے نیں ۔ اوہ جیہڑے خُدا دے کلام نوں پچھان دے نیں ، اوہ جیہڑے ایمان رکھدے نیں پئی خُدا دا کلام لازمی بالکل اوسے طرح پورا ہوندا اے جویں ایہہ فرماؤندا اے —اوہناں توں علاوہ کوئی دوجے نئیں ہیگے جنہاں دے دل تیار نیں ۔
خُدا ایہو جیہا ں لوکاں نال بِنا روک ٹوک ملد اے ۔ ایہو جیہے لوک اوہداکلام سُن دے نیں ، اپنیاں ایہناں اکھاں نال کلام نوں ویکھدے نیں تے ایہدی تصدیق کردے نیں ، تے اِنج کر کے اوہ احساس کردے نیں ، ”ہائے مَیں غلط ایمان رکھیا سی ۔ تے بوہت چوکھے لوک ہُن غلط ایمان رکھدے پئےنیں ۔“تے پانی تےرُوح دی خوشخبری اُتے ایمان رکھ کے،ایس توں ہٹ کے پئی دوجے کیہ کہندے نیں ، فیر اوہ اپنے پاپ د ی معافی پا سکدے نیں ۔
اوہ لوک جیہڑے اپنیاں ساریاں پاپاں توں مکتی یافتہ ہو گئے نیں اوہناں نوں لازمی پانی تےرُوح دی خوشخبری اُتے ایمان رکھ کے اپنے ایمان دی راکھی کرنی چاہی دی اے
پر ،ایہہ جگ بوہت چوکھیاں بھیڑیاں نظریاں نال بھریا ہویا اے جیہڑےایتھوں تیکر پئی نویں سریوں جمے ہوئے لوکاں دےدل نوں وی پریشان تے پلیت کر سکدے نیں ۔خُداوند یِسُوعؔ نے سانوں دسیا، ” خبردار فرِیسِیاں دے خمِیرتوں۔تے ہیرودیس دے خمِیرتوں ہُشیار رہو“ (مرقس ۸:۱۵)۔پر اسی بھاویں گِن نئیں سکدے پئی ایہو جیہاں کنیاں خمیری تعلیماں ہیگیاں نیں ، جیہڑیاں لوکاں دے دل نوں صرف اِکو واری سُنن دے سبب پلیت کردیاں پئیاں نیں ۔ سانوں ایہہ سمجھنا چاہی دا اے پئی ایہہ جگ کویں بدکاری وچ ڈُب دا پیا اے ۔
سانوں جیہڑے ایمان رکھدے آں لازمی بالکل ٹھیک جاننا چاہی دا اے اسی کِنج دے زمانے وچ ہُن زندگی گزاردے پئے آں تے اپنے ایمان دی راکھی کرنی چاہی دی اے ۔ فیر وی جد اسی ایہو جیہے پاپی جگ وچ رہندے آں ، ساڈیاں دلاں وچ اوہ پکی سچیائی اے یعنی خُداوند سانوں پاپ توں چھڈا چُکیا اے ۔ گواہی دا کلام جیہڑا ساڈی ہمیش رہن والی مکتی دی گواہی دیندا اے پانی تےرُوح دی خوشخبری اے ۔ سانوں لازمی سچیائی اُتے ایمان رکھنا چاہی دا جیہڑی نا جگ توں ڈردی اے نا ای ایہدے پِچھے چلدی اے ۔
ایس جگ دی ہر شے سچی نئیں ہیگی ۔ خُدا نے سانوں دسیا پئی راستباز جگ اُتے فتح پاؤندے نیں ۔ ایہہ نا بدلن والی سچی خوشخبری اُتے اوہناں دے ایمان رکھن نال اے پئی راستباز شیطان اُتے فتح پاؤندے نیں تے جگ اُتے فتح پاؤندے نیں ۔ بھاویں اسی ادھورے آں ، ساڈے دل ، ساڈیاں سوچاں ، تے ساڈے بدن فیر وی خُدا دا گھر نیں تے ایمان رکھن نال مکتی دی خوشخبری اُتے پکیاں ہو کے کھلوتے ہوئےنیں ۔ اسی پانی تےرُوح دی خوشخبری اُتے پکیاں ہو کے کھلوتے ہوئے آں جیہدے نال خُداوند سانوں بچا چُکیا اے ۔
ایس سببوں ،اسی خُدا دے بوہت شکرگزار آں ۔ کوئی معنی نئیں رکھدا ایس جگ وچ پاپ کناں چوکھا اے ، گھٹوگھٹ اسی راستباز سچ مُچ بے داغ ضمیر تے ایمان رکھدے آں جیہڑا ساڈیاں دلاں وچ سونے وانگر چمکدا اے ۔اسی سارے راستباز ایہو جیہی زندگی گزاراں گے جیہڑی ایہہ ایمان رکھ کے جگ اُتے فتح پاؤندی اے ۔ خُداوند دے دوبارہ آؤن دے دن تیکر،تے بھاویں جویں اسی اوہدی بادشاہی وچ آں ، ساڈے وچوں سارے ایس ایمان دی وڈیائی کرن گے ۔ اسی سدا تیکر خُداوند دی وڈیائی کراں گےجیہڑا سانوں بچا چُکیا اے تے اپنے خُدا دی وڈیائی کردے آں جیہڑا سانوں ایہہ ایمان دے چُکیا اے ۔
جویں پئی ایہہ سچا ایمان جیہڑا ساڈے کول اے خُدا دے اگے چٹان اُتے کھلوتا اے ، ایہہ کسے وی طریقے نال نئیں ہِلدا۔ ایسے طرح ، کوئی معنی نئیں رکھدا ساڈے نال کیہ ہوندا اے جد تیکر اسی ایس زمین اُتے خُداوند دے اگے کھلون دے دن تیکر زندگی گزاردے آں ، اسی ایمان رکھ کے اپنیاں دلاں دی راکھی کراں گے ۔ بھاویں جے ہر شے ایس جگ وچ برباد ہو جاندی اے ، بھاویں جے ایہہ جگ پاپ وچ ڈُب دا پیا اے ، تے بھاویں ایہہ جگ پُرا نے زمانے دے صدوم تے عمورہ توں وی بوہت بھیڑا ہو جاندا اے ، اسی ایس جگ پِچھے نئیں چلاں گے ، سگوں اسی سچے دلوں خُدا اُتے ایمان رکھاں گے ، اسی اوہدی راستبازی لبھاں گے تے اسی اوہ کم کردےرہواں گے جیہڑے مکتی دیاں ایہناں دوآں انعاماں نوں (یِسُوعؔ دے بپتسمےتے اوہدی صلیبی موت نوں)،یعنی خُدا دیاں اصل فضلاں نوں ودھاؤندے نیں ۔
اوہ جیہڑے اصل خوشخبری اُتے ایمان رکھن دا وکھالا کردے نیں
کئی لوک، بھاویں اوہ اصل وچ پانی تےرُوح دی خوشخبری اُتے ایمان نئیں رکھدے ، فیر وی اسمانی، ارغوانی تے لال دھاگےدی سچیائی اُتے ایمان رکھن دا وکھالا کردے نیں ۔پر اسی ویکھ سکدے آں پئی ایہو جیہے لوک سچے دلوں پانی تےرُوح دی خوشخبری اُتے ایمان نا رکھن دے سببوں اپنیاں دلاں وچ پاپ رکھدے نیں ۔ اوہ اوہناں وانگر نیں جیہڑے پانی وچ لوہے دی کہواڑی گوا لیندے نیں ، جیہڑی اوہناں نیں اپنیاں گوانڈھیاں کولوں اُدھار لئی سی (۲۔سلاطین ۶:۵)۔
ایہو جیہے ای رَلدے مِلدے طریقے نال ، جویں ای لوڑپیندی اے ،کئی لوکاں لئی تھوڑے چر تیکر پانی تےرُوح دی خوشخبری توں فائدہ لینا سوکھا اے ۔پر ایہہ ایمان رکھیوں بغیر پئی پانی تےرُوح دی ایہہ خوشخبری سچی اے ، اوہ منادی کرن ویلے یا میل جول کردیاں ہویاں اصل ایمان نال بولن دے لائق نئیں ہیگے ۔ تے اوہ جیہڑے سچیائی اُتے ایمان نئیں رکھدے دُکھی ہوندیاں ہویاں اپنی ایمان دی زندگی نوں جھڑکدیاں ہویاں مُک جاندے نیں ۔ پر پانی تےرُوح دی خوشخبری دی سچیائی نئیں بدل دی ، تے ایسے لئی اوہناں نوں لازمی پانی تےرُوح دی ایس خوشخبری اُتے ایمان رکھنا چاہی دا اے ۔
پر عبرانیوں ۷:۱۲ دا حوالہ دے کے، جیہڑا فرماؤندااے، ”تے جد کاہناں دا طریقہ بدل گیا۔ تاں شرِیعت دا وی بدلنا ں ضرُور اے۔“ کئی لوک دعویٰ کردے نیں ، ”شریعت وی بدل گئی اے ۔ سومکتی جیہڑی یِسُوعؔ نے پوری کیتی اصل وچ پُرانے عہدنامے دے اوسے طریقے مطابق کامل نئیں ہوئی سی ۔یِسُوعؔ مسیح آیا تے سانوں صرف سولی اُتے ، اک نویں طریقے نال مر کے بچا چُکیا اے ۔“ کئی دوجے لوک دعویٰ کردے نیں ،”اِنج لگدا اے پئی ایہہ اوس ویلے سی جد یِسُوعؔ سولی اُتے مرگیا سی فیر خُدا نے ساڈیاں پاپاں نوں اپنے پُتر اُتے لدیا سی ۔“
پر ایہو جیہے دعوے ساری فریبی تے بے تکے نیں ۔ اسی ایہہ آکھدیاں ہویا ں سوکھے جیہے اوہناں دیا ں دعویاں نوں غلط ثابت کر سکدے آں ، ”فیر کیہ ایہدا مطلب ہیگا اے پئی خُدا نے صرف یِسُوعؔ نوں سولی چاہڑیا جیہڑا بے پاپ سی تے فیر ای اوہدے اُتے جگ دیاں پاپاں نوں لد دتا ؟“جد اسی خُدا دے کلام اُتے ایمان رکھدے آں ، تاں سانوں لازمی ایس اُتے ایمان رکھنا چاہی دا اے جویں ایہہ ہیگا اے تے اپنیاں دلی سوچاں ول دھیان نئیں کرنا چاہی دا اے ۔ بھاویں جے اسی اپنے ذاتی جھگڑے رکھدے آں ، جے پاک کلام دسدا اے پئی ایہہ جھگڑے غلط نیں ، فیر سانوں اپنی ذاتی راستبازی نوں چھڈنا پوے گا تے خُدا د ے کلام اُتے ایمان رکھنا پوے گا ۔
جناں بوہتا ویلا لنگھدا اے ، اوہنی ای چوکھی شکرگزار تے مہنگی سچیائی اے پئی خُداوند سانوں پانی تےرُوح دی خوشخبری نال بچا چُکیا اے ۔ جد اسی اپنیاں دلی سوچاں دے مطابق ایمان رکھیا ، تاں ایہو جیہے ویلے وی آئے جد ساڈی ایمان والی زندگی خطرے وچ پے گئی تے اسی کلیسیا توں لگ بھگ دُور ہوگئے ۔ پر بالکل جویں دو چُولاں نےخیمۂ اِجتماع دے ہر تختے نوں پھڑیا یعنی چاندی دیاں دو خانیاں وچ لگ کے ، یِسُوعؔ دی سچیائی اُتے ساڈا ایمان پئی اوہنے بپتسمہ لین تے اپنا لہو وگا کے ساڈیاں پاپاں نوں چُک لیا ، سانوں پکیائی نال قیم رکھدا اے ۔ یوحنا کولوں بپتسمہ لین تے سولی اُتے چڑھن تے اپنا لہو وگا کے ساڈی سزا جر کے ، ساڈا خُداوند سانوں ساڈیاں ساریاں پاپاں توں بچا چُکیا اے ۔ ایس طرح ، ساڈا ایمان سدا تیکر ڈانواں ڈول نئیں ہوئے گا۔
امثال ۲۵:۴ فرماؤندی اے، ”چاندی دی مَیل مکاؤن نال سُنیارے لِئی بھانڈابن جاندااے۔“ ایس حوالے وانگر ، بھاویں جنیاں بوہتیاں گندیاں، بھیڑیاں تے شیطانی گلاں ساڈیاں بدنی سوچاں وچ اُبھردیاں نیں ، اپنے بپتسمے تے لہو نال ، یِسُوعؔ سانوں ایہناں گندیاں گلاں توں ، سارےلوکاں دیاں پاپاں توں پاک کر چُکیا اے ،تے سانوں خُدا دی راستبازی دے خادم بنا چُکیا اے ۔ خُداوند سانوں جگ دیاں پاپاں توں پاک کر چُکیا اے ۔ یوحنا کولوں بپتسمہ لے کے تے اِنج اِکو ای وار سدا تیکر ساڈیاں ساریاں پاپاں نوں قبول کرن تے سولی اُتے چڑھن تے اپنا لہو وگا کے تے اِنج ساڈیاں پاپاں دی ساری سزا چُک کے ، یِسُوعؔ صاف طریقے نال سانوں جگ دیاں پاپاں توں بچا چُکیا اے ۔
ایس طرح ، اوہ جیہڑے پانی تےرُوح دی خوشخبری اُتے ایمان رکھدے نیں اپنی سدا دی مکتی دی ضمانت پاؤندے نیں ۔ ساڈے کم کئی واری پریشان کرن والے نظر آسکدے نیں ، پرپانی تےرُوح دی خوشخبری ساڈے ایمان نوں پکے ہتھیں پھڑی رکھدی اے ، بالکل ایسے طرح جویں چاندی دے خانے اپنیاں دو چُولاں لگن دے سبب ہر تختے نوں پھڑ کے رکھدے سن ۔
مکتی دا سدا دا فضل جیہڑا سانوں پھڑکے رکھدا اے
ہُن آؤ اسی اپنا دھیان بینڈیاں وچ کرئیے جیہڑے خیمۂ اِجتماع دیاں تختیاں نوں رَل کے پھڑکے رکھدے سن۔ خروج ۲۶:۲۶۔۲۷ فرماندااے، ” تے تُوں کِکر دی لکڑ دے بینڈے بناویں ۔ پنج بینڈے مسکن دے اک پاسے دیاں تختیاں لئی ، تے پنج بینڈے مسکن دے دوجے پاسے دیاں تختیاں لئی تے پنج بینڈے مسکن دے پِچھلے حصے یعنی مغربی سمت دیاں تختیاں لئی ۔ “ خیمۂ اِجتماع دی ساری شکل مستطیل بنی ہوئی سی ۔خیمۂ اِجتماع دے پھاٹک اُتے تے بوہتی پاک تھاں دے پڑدے لئی ستون رکھے گئے سن ، تے ایہہ باقی تختیاں نال بنیا ہویا سی ۔ ایہہ تختےپنجاں بینڈیاں نال آلے دوالے لپیٹے ہوئے سن ۔
ایہناں بینڈیاں نوں پھڑن لئی ، پنج سونے دے کڑے ہر تختے اُتے پائے گئے سن، تے بینڈے آپ وی ، کِکر دی لکڑ دے بنے ہوئے سن تے سونے نال مَڑھے ہوئے وی سن ۔ پنج پنج بینڈے خیمۂ اِجتماع دیاں ساریاں تِناں ، شمالی ، جنوبی تے مغربی پاسیاں دے تختیاں اُتے لگے ہوئے سن ۔ جویں پئی تختے ایہناں بینڈیاں نال سونے دیاں کڑیاں وچوں لنگھدے ہویاں کھلوتے ہوئے سن ، اوہ پکیائی نال قیم رہندے سن۔ ایس طرح اپنی نیِہ وچ چاندی دیاں خانیاں نال سہارا لے کے ، تے سارے اپنیاں حصیاں نال پنجاں بینڈیاں دے راہیں پھڑےہوئے ، تختے مضبوط تے پکے کھلوتے رہندے سن ۔
تے جویں اڑتالی (۴۸)تختے آوالے دوالے پنجاں بینڈیاں نال لپیٹے ہوئے سن تے اِک دوجے نوں سہارا دیندے سن ، خُدا دے لوک وی پانی تےرُوح دی خوشخبری نال خُدا نال بنھے ہوئے نیں ۔ خُدا دی کلیسیا ایہو جیہی تھاں اے جتھے اوہ جیہڑے پانی تےرُوح دی مکتی دا انعام پا چُکے نیں سارے اکٹھے ہوندے نیں تے اپنی ایمان دیاں زندگیاں گزاردے نیں ۔ یِسُوعؔ نے پطرس نوں آکھیا پئی اوہ اپنی کلیسیا دی نیہ پتھر اُتے رکھے گا (متی ۱۶:۱۸۔۱۹)ایس طرح ، اوہ تھاں جتھے خُدا دی بادشاہی اوہناں دے اکٹھیاں ہون نال پوری ہوندی اے جیہڑے پاپ دی معافی پا چُکے نیں اوہ خُدا دی کلیسیا اے ۔ خُدا سانوں وکھاؤندا پیا اے پئی اوہ سانوں اسمانی، ارغوانی تے لال دھاگےوچ ظاہر کیتے گئے یِسُوعؔ دیاں کماں نال جگ دیاں پاپاں توں کامل طریقے نال بچا چُکیا اے ۔
خروج ۲۶:۲۸ فرماؤندا اے، ”تے وچکارلا بینڈا جیہڑیاں تختیاں دے وچ ہوئے اوہ خیمے دی اِک نکر توں دوجی حد تیکر اَپڑے ۔ “ ایہہ وچکارلا بینڈا اِکو ای واری اِک پاسیوں ساریاں تختیاں نوں بنھن لئی بوہت لما بنایا گیا سی ۔ فیر، ایسے وچکارلے بینڈے دا جیہڑا تختیاں دے وچکاروں اِک نکر توں لے کے دوجی حد تیکر پوہنچدا سی کیہ مطلب اے ؟ ایہدا مطلب ایہہ ہیگا اے پئی راستبازاِک دوجے نال اکٹھے ہوندے نیں ، تے ایہہ پئی اوہناں دا ایمان اک دوجے نال میل جول رکھدا اے ۔ دوجیاں اکھراں وچ ، خُداوند ولوں دتی گئی پانی تےرُوح دی خوشخبری نال پوری ہوئی مکتی اُتے ایمان رکھ کے ، اوہ ایمان وچ اِک دوجے نال گل بات کر سکدے نیں ۔ راستباز اپنے ایمان نال آمنے ساہمنے ملدے نیں ۔ ایس لئی پئی جد اسی اپنے نال دیاں پاک لوکاں یاخادماں نال مِلدے آں تے اوہناں نال یاری رکھدے آں ، تاں اسی اصل وچ دلاں دے ایس میل جول نوں محسوس کر سکدے آں ۔
” اِکّو ای خُداوند اے۔ اِکّو ای اِیمان۔ اِکّو ای بپتِسمہ۔ “
آؤاسی اِفسیوں ۴:۳۔۷ ول دھیان کرئیے: ” تے ایہو ای کوشش کر دے رہو۔ پئی رُوح دی اِکتائی صُلح دے بند نال بَدّھی رہے۔ اِکّو ای بدن اے تے اِکّو ای رُوح اے۔ جیویں تُہانوں وی جیہڑے سَدّے گئے سو تُہاڈے سَدّے جان توں آس وی اِکّو ای اے۔ اِکّو ای خُداوند اے۔ اِکّو ای اِیمان۔ اِکّو ای بپتِسمہ۔ تے ساریاں دا اِکّو ای خُدا تے باپ اے۔ جیہڑا ساریاں اُتّے تے ساریاں وِچ تے ساریاں دے اندر اے۔تے ساڈے وِچوں ہر اِک اُتّے مسِیح دی بخشِش دے اندازے دے سببّوں فضل ہویا اے۔“ پولُس رسول نے سانوں رُوح دی اِکتائی نوں صلح دے بند نال بنھ کے رکھن دی کوشش کرن لئی آکھیا ۔ یِسُوعؔ دے بپتسمے تے سولی توں — جد اسی ایہناں دوآں توں مکتی دے انعام نوں پاؤندے آں ، فیر صلح ساڈے دل وچ آؤندی اے ۔ جد اسی اپنیاں دلاں وچ پاپ دی معافی پاؤندے آں ، فیر اسی مسیح وچ اِک خنوادہ بن جاندے آں ، نِکی گل ، اسی اِک بدن بن جاندے آں ۔
”اِکّوای خُداوند اے۔“یِسُوعؔ مسیح جیہڑا سانوں بچا چُکیا اے اِکو ای اے۔”اِکّوای اِیمان۔“تُسی کیہدے اُتے ایمان رکھدے او ؟ تُسی یِسُوعؔ دے پانی تےلہو تے رُوح دی مکتی اُتے ایمان رکھدے او، جیہڑی اسمانی، ارغوانی تے لال دھاگےتے مہین وٹے ہُوئے کتان وچ ظاہر کیتی گئی اے۔”اِکّوای بپتسمہ۔“پولُس رسول نے اِک واری فیر یِسُوعؔ دے بپتسمے بارے گل کیتی ۔ اوہنے ایتھے سولی دا حوالہ نئیں دتا ، سگوں ایہدی بجائے اوہنے یِسُوعؔ دے بپتسمےبارے گل کیتی جنہے ساریاں ایمانداراں نوں کسے شرط توں اَڈ پاک کیتا ۔ ساڈے لئی اوہدے بپتسمے اُتے ایمان رکھن لئی مسیح وچ بپتسمہ لینااے تے اِنج مسیح نوں تن اُتے پاؤنا اے (گلتیوں ۳:۲۷)۔ ”اِکّوای خُداوند اے۔“خُدا اِک اے ۔ ایہو ای خُدا سانوں اپنے سکے پُتر نوں گھل کے بچا چُکیا اے ۔
ایہہ ساریاں شیواں پانی ،لہو تے رُوح اُتے اِک ایمان بارے دسدیاں نیں (۱۔یوحنا۵:۸)۔
ایس لئی پئی جد اسی پانی تےرُوح دی خوشخبری اُتے ایمان رکھدے آں پئی ساڈے دل اِک دوجے نال گل بات کر سکدے نیں ۔ اوہ جیہڑے پاپ دی معافی پا چُکے نیں اِک دوجے نال آمنے ساہمنے مل سکدے نیں ۔ کئی ویلے اِنج وی ہو سکدے نیں جد اسی اِک دوجے نوں سارے داسارا نئیں سمجھ سکدے ۔ پر جویں وچکارلا بینڈا اِک سرے توں اخیری حد تیکر تختیاں وچوں لنگھدا سی ، جے اوہ سچ مُچ اپنے دل دے خانے وچ پاپ دی معافی پا چُکے نیں ، فیر اوہ سارے اِک دوجے نال گل بات کر سکدے نیں ۔ ”ایہہ بھرا وی پاپ تو ں مکتی یافتہ ہو گیا اے ، پر اوہد ا بدن ماڑا اے تے اوہدے دل وچ بوہت ساریاں بدنی کمیاں نیں ۔ باقی ساریاں وانگر اوہ وی بدکار دی نسل اے ، پر خُداوند فیر وی پانی تےرُوح دی خوشخبری دے نال اوہدا پاپ مکا چُکیا اے ۔“ ایس طرح ، اوہ اِک دوجے نوں سمجھن تے خُداونددی بھگتی کرن لئی آؤندے نیں ۔
لوک بھاویں کنے ای ادھورے کیوں نا ہون ، جے اوہ پاپ دی معافی پاؤندے نیں تے کلیسیا وچ رہندے نیں ، فیر اوہناں دے چہرے روشن ہو جان گے ، اوہناں دیاں سوچاں جگمگ جگمگ کرن گئیاں تے اوہناں دے دل وی چمک جان گے تے اوہ اِک دوجے دی گل سُنن سناؤن دے لائق ہون گے ۔ راستبازاِک دوجے نوں آمنے ساہمنے ویکھ سکدے نیں ۔ ایہنوں کیہ سوکھا بناؤندا اے ؟ ایہنوں ایمان سوکھا بناؤندا اے ۔ اوہ اک دوجے نوں آمنے ساہمنے، کسے دوجی حالت دے سببوں نئیں ویکھدے سگوں ایمان دے سببوں ویکھدے نیں ۔ فیر ، کئی دوجیاں لوکاں نال گل سُنن سناؤن وچ ساڈے نکمے ہون دی کیہ وضاحت کردا اے ؟ اسی اپنیاں دل دیاں گلاں نوں اوہناں نال نئیں کر سکدے جیہڑے مسیح وچ نئیں ہیگے ، ایس لئی پئی اوہ ، اپنیاں دلاں وچ ،سچیائی ،یعنی پانی تےرُوح دی خوشخبری اُتے ایمان نئیں رکھدے ۔ اوہ جیہڑے پانی تے رُوح دی ایس خوشخبری اُتے ایمان نئیں رکھدے اوہ ساڈے نال بالکل یاری نئیں رکھ سکدے ۔
بھراؤ تے بھینو، خُدا دی کلیسیا اصل وچ کیہ اے ۔ ایہہ اوہناں لوکاں دی بھیِڑ اے جیہڑے یِسُوعؔ مسیح وچ پاک ہوئے ، مقدس اکھواؤندے نیں (۱۔کرنتھیوں ۱:۲)۔ایہہ اوہناں دی بھیِڑاے جیہڑے سچیائی اُتے ایمان رکھدے نیں پئی یِسُوعؔ مسیح بپتسمہ لے کے اوہناں دے پاپ دھو چُکیا اے ،پئی اوہ اوہناں نوں اوہناں دیاں پاپاں نوں چُکن تے سولی اُتے اوہناں دی ساری سزا جر کے بچا چُکیا اے ، تے یعنی اوہ فیر مویاں وچوں جی اُٹھیا تے اوہناں دا اپنا مکتی داتا بن گیا اے ۔ خُدا دی کلیسیا کوئی ہور نئیں سگوں اوہناں دی بھیِڑ اے جیہڑے پانی تےرُوح دی خوشخبری اُتے ایمان رکھ کے اِک بن گئے نیں ۔
ایہہ ایس لئی اے تاں پئی ایہہ ایمان دوآں میرے تے تہاڈے دل وچ اے یعنی اسی اِک دوجے نوں آمنے ساہمنے ویکھ سکدے آں جد اسی اوہدی کلیسیا وچ ہوندے آں ۔ جویں خُدا ساڈی نظر آؤن والے رنگ روپ نوں نئیں سگوں ساڈیاں دلاں دے خانے نوں ویکھدا اے جد اوہ سانوں ویکھدا اے ، ایسے طرح اسی جیہڑے پاپ دی معافی پا چُکے آں نظر آؤن والے رنگ روپ نوں نئیں ویکھدے ، سگوں اسی اِک دوجے دے ایمان دے خانے نوں ویکھ کے میل جول رکھدے آں ۔ ” کیہ ایہہ بندہ سچ مُچ دلوں سچیائی اُتے ایمان رکھدا اے ؟“— ایہہ اوہو ای اے جنہوں اسی لبھدے آں ۔ کوئی معنی نئیں رکھدا پئی اوہدی عادت وچ کیہ فرق ہوئے ، ایہہ بالکل معنی نئیں رکھدا جد تیکر پئی اوہ ” اِکوای خُدا وند،اِکوای ایمان، اِکوای بپتسمہ؛ساریاں دے خُدا تے اِکوای باپ اُتے “ ایمان نا رکھدا ہوئے ۔
ایس لئی پئی اسی ایمان رکھدے آں ، اسی ستون تے خیمۂ اِجتماع دے تختے بن گئے آں ، تے ایس لئی پئی اسی ایمان رکھدے آں ، اسی خُدا دا خنوادہ بن گئے آں ۔ کیہ تُسی پانی تےرُوح دی خوشخبری اُتے ایمان رکھدے او؟ ایہہ ایس لئی اے تاں پئی اسی ایمان رکھدے آں پئی اسی سارے جگ وچ مکتی دا چانن ودھاؤندے پئے آں ، جویں کھرا سونا(ایمان)خُدا دے گھر وچ چمکدا اے ۔ اسی اپنیاں دل دیاں گلاں اوہناں نال کر سکدے آں جیہڑے تھوڑا چر پہلاں ای پاپ دی معافی پا چُکے نیں ، ایس لئی پئی پاک رُوح اوہناں دیاں دلاں وچ وی وسدا اے ۔ جے صرف اسی پاپ دی معافی پا چُکے آں ، فیر اسی سارے اِک دوجے نال گل بات کر سکدے آں ، پر جے اسی پاپ دی معافی نئیں پائی اے ، فیر اسی اِک دوجے نال گل بات نئیں کرسکدے ۔ ظاہر ی رنگ روپ دے مطابق لوکاں وچ فرق کرن والے پاپی اِک دوجے نال ، شکل، دولت یا مشہوری ورگے سطحی حصیاں دی نیہ اُتے وکھرا سلوک کردے نیں ، پر اسی راستباز اپنیاں دلاں وچ اِنج نئیں کردے ۔ راستبازاں کول کوئی فرق نئیں ہیگا ۔
جد لوک پہلی واری پاپ د ی معافی پاؤندے نیں ، تاں مَیں کئی واری اوہناں کولوں پُچھدا ہاں ، ”کیہ تُسی سچ مُچ پاپ دی معافی پا چُکے او ؟ کیہ تُسی حالے تیکر پاپ رکھدے او ، یا کیہ تہاڈے پاپ غائب ہو گئے نیں؟ اُنج، تہاڈے ذہن وچ پاک کلام دے بارےوچ بوہت سارے سوال ہونے چاہی دے نیں ، کیہ تہاڈے دل وچ نئیں ہیگے ؟ اپنی ایمان دی زندگی دے نال نال ویلے سِر اوہناں کولوں پُچھو۔ ایس توں علاوہ ، تہاڈیاں غلطیاں ظاہر ہون گئیاں تے تُسی خورے راہ وچ کُجھ غلطیاں کروگے ۔ پر آگُو تے اوہ جیہڑے کلیسیا وچ تہاڈے توں پہلاں جا چُکے نیں تہاڈی مدد کرن گے ، تاں پئی ساراکُجھ ٹھیک ہو جائے۔“
بھراؤتے بھینو، سانوں راستبازاں نوں کلیسیا دی لوڑ اے ۔ خیمۂ اِجتماع دا مطلب خُدا دی کلیسیاوی اے۔ اوہ جیہڑے پانی تے لہو اُتے ایمان نئیں رکھدے خُدا دی کلیسیا وچ نئیں آ سکدے تے ایس وچ وسوں نئیں کر سکدے ۔ اوہ جیہڑےاسمانی، ارغوانی، تےلال دھاگے وچ ظاہر کیتی گئی پانی تےرُوح دی خوشخبری اُتے ایمان نئیں رکھدے نا آسکدے نیں نا ای اوہدی کلیسیا وچ وسوں کر سکدے نیں ۔ صرف اوہو ای جیہڑے سچیائی اُتے ایمان رکھدے نیں کلیسیاوچ وسوں کر سکدے نیں، تے خُدا دے لوک تے اوہدے کم کرن والے بن سکدے نیں، تے خُدا دے جلال نوں وی ویکھ سکدے نیں ۔ ایہہ صرف لہو یا اوہناں دے بدن دے کسے گُن نال نئیں اے پئی لوک خُدا دے نیانے بن سکدے نیں ۔ کوئی معنی نئیں رکھدا پئی کئی پادری کنے ای اختیار والے ہون ، جے اوہ پانی تےرُوح دی خوشخبری اُتے ایمان نئیں رکھدے ، فیر اوہ خُدا دے نیانے نئیں ہیگے ۔
یِسُوعؔ جیہڑاپانی تے لہو دے راہیں آیا سی سانوں کامل طریقے نال بچا چُکیا اے
جد خُداوند ایس زمین اُتے آیاتاں ایہدا خلاصہ اوہدی پیدائش ،بپتسمہ ،لہووگاؤن تے جی اُٹھن دے راہیں کیتا جا سکدا اے ۔ ایہہ ساریاں اوہدی پاپ دی معافی دیاں خدمتاں نیں ۔ یِسُوعؔ اسمانی، ارغوانی، اور لال دھاگےدیاں اپنیاں خدمتاں نال اپنا مقصد پورا کر چُکیا اے ۔ خیمۂ اِجتماع وچ ظاہر کیتے گئے اسمانی، ارغوانی، اور لال دھاگےپاپ توں ساڈی اپنی مکتی لئی سن ۔ خُدا دی مکتی اینی وڈی اے پئی سانوں اپنے دلی طریقے نال اوس اُتےایمان نئیں رکھنا چاہی دا ۔ سانوں اوہدی مکتی اُتے ایمان رکھنا اے جویں ایہہ ہیگی اے ۔
ساڈے ایمان نوں ٹھیک طریقے نال اوہدی مکتی دیاں دو سچیائیاں: اوہدے بپتسمے تے اوہدے صلیبی لہو دے بالکل مطابق ہونا چاہی دا اے ۔ ایس لئی پئی چاندی دیاں دو خانیاں دیاں سوراخاں لئی دو چُولاں ٹھیک طریقے نال لگدیاں سن ۔ اسی ایس سچیائی نوں جیہڑی یِسُوعؔ نے سانوں دتی اے صرف جگ دے علم وانگر سمجھ نئیں سکدے تے صرف ایسے طرح ایس اُتے ایمان نئیں رکھ سکدے ۔ تُسی تے مَیں اوہ لوک آں جیہڑے چاندی دیاں دو خانیاں وچ وکھائے گئے یِسُوعؔ دیاں مکتی دیاں کماں اُتے ایمان رکھ کے خُدا دے اگے پاپ توں مکتی یافتہ ہو گئے آں ۔
خیمۂ اِجتماع سانوں یِسُوعؔ دے تفصیلی مکتی دے طریقے دے بارے دسدا اے ، تے ایہہ مکتی اصل وچ ساڈے لئی پہلاں ای پوری ہو گئی اے ۔ مکتی دیاں دو انعاماں اُتے ایمان رکھو جیہڑےخُدا تہانوں دے چُکیا اے ۔ سونا جیہڑا خیمۂ اِجتماع وچ ورتیا گیا ایمان نوں عائد کردا اے ۔ جے تُسی سچیائی اُتے ایمان رکھدے او جویں ایہہ ہیگی اے ، فیر مکتی تے خُداونددا جلال تہاڈے ہوسکدے نیں ، پر ایہہ تہاڈے نئیں ہو سکدے جے تُسی ایمان نئیں رکھدے ۔ کیا تُسی ایمان رکھ کے خیمۂ اِجتماع وچ رہنا چاؤہندے او ، یعنی خُدا دے جلال دے کپڑے پا کے تے اوہدے راہیں راکھی پا کے ، یا کیہ تُسی ایمان نا رکھدیاں ہویاں سدا تیکر لعنتی ٹھہرنا چاؤہندے او ؟ جے تُسی صرف صلیبی لہو اُتے ایمان رکھدے او ، فیر تُسی مکتی یافتہ نئیں ہوسکدے ۔ تہانوں لازمی ایمان رکھنا چاہی دا اے پئی صلیبی لہو تے بپتسمہ اِکو ای نیں ۔ خُداونددا انعام ایہناں دوآں نال رَل کے بنیا اے ۔
خُدا دا رُوح ساڈیاں دلاں وچ وسدا اے صرف جد اسی ایہناں دو شیواں اُتے (یِسُوعؔ دے بپتسمے تے لہو اُتے) ایمان رکھدےآں ۔ پاک رُوح اوہناں دیاں دلاں وچ کدی وسوں نئیں رکھدا جیہڑے ایہناں اُتے ایمان نئیں رکھدے ۔جے تُسی صرف اپنے مُنھوں اپنے ایمان دا اقرار کردے او ،پر اپنیاں دلاں وچ ایمان نئیں رکھدے تے جے تہاڈی تعلیم صرف تعلیمی مشق اے ، فیر تُسی کدی مکتی یافتہ نئیں ہوسکدے ۔ مکتی یافتہ ہون لئی ، تہانوں پہلاں حد بندی دی اِک صاف لکیر کھِچ لینی چاہی دی اے جیہڑی تہاڈی مکتی دیاں حداں بناؤندی اے : ”حالے تیکر ، مَیں مکتی یافتہ نئیں ہویا ساں۔ مکتی جیہدے اُتے مَیں ایمان رکھدا ساں اصل مکتی نئیں سی ۔ پر یِسُوعؔ اُتے ایمان رکھ کے جیہڑا پانی تے لہو دے راہیں آیا ، ہُن مَیں مکتی یافتہ ہو گیا آں۔“ لوک اوسے ویلے راستباز بن سکدے نیں جد اوہ پہلاں گھٹوگھٹ اِک واری پاپی بن دے نیں ۔ اوہناں نوں مننا چاہی دا اے پئی غیر مکتی یافتہ وانگر ، اوہ اپنیاں پاپاں دے سببوں لعنتی ہون دے لائق نیں ،تے فیر پانی تےرُوح دی خوشخبری اُتے ایمان رکھ کے کامل طریقے نال مکتی یافتہ لوک بن جاندے نیں ۔
اسمانی تے ارغوانی دھاگے ،یِسُوعؔ دے بپتسمے تے لہو نال ، سانوں لازمی اپنی کامل مکتی پاؤنی چاہی دی اے ۔ اپنے بپتسمے تے لہو نال، خُداوند سانوں کامل مکتی دا انعام دے چُکیا اے ۔ سانوں اپنیاں دلی سوچاں والے ایمان رکھن توں روکن لئی ،خُداوند نے ایس مکتی نوں خیمۂ اِجتماع دے راہیں وی تفصیل نال ظاہر کیتا ۔ ایس لئی پئی ایہہ مکتی بوہت مہنگی تے کامل اے ، ایہہ ہر کسے لئی ایمان رکھن لئی سدا رہن والی اے ۔ اوہدی مکتی دے صرف اِک حصے ، صلیبی لہو اُتے ایمان نا رکھو ، سگوں یِسُوعؔ دے بپتسمے تے لہو دوآں اُتے اِکو جیہا ایمان رکھو ! جے ساڈے وچکار کوئی ہیگا اے جیہڑا حالے تیکر مکتی یافتہ نئیں اے ، فیر ایہہ میری سچے دلوں آس ہیگی اے پئی اوہ ایمان رکھ کے حالے وی ، ایس سچیائی دے راہیں مکتی یافتہ ہوئے گا ۔
کیہ ساڈے وچکار کوئی ہیگا اے جیہڑا حالے وی اِکلے یِسُوعؔ دے لہو اُتے ایمان رکھدا اے ؟ بوہت سارے مسیحی نیں جیہڑے حالے وی ایہو جیہی کچی خوشخبری اُتے ایمان رکھدے نیں ۔ پر مَیں آس رکھدا ہاں پئی ایہو جیہا غلط ایمان ساڈیاں دلاں اُتے فیر کدی چڑھائی نئیں کرے گا۔ ایس نال کوئی فرق نئیں پینداپئی کُجھ وی ہوئے ، مَیں غیر مکتی یافتہ لوکاں نال میل جول نئیں رکھ سکدا ۔ اسی اوہ لوک آں جیہڑے ایہناں دو شیواں (اسمانی تے لال دھاگے)—یعنی ، یِسُوعؔ دے بپتسمے تے لہو اُتے ایمان رکھ کے کامل طریقے نال مکتی یافتہ ہو گئے آں ۔ مَیں مکتی دیاں ایہناں دو انعاماں لئی خُدا دا شکر ادا کردا ہاں جیہدے نال خُداوند مینوں بچا چُکیا اے ۔ ایس لئی پئی خُدا میری مکتی نوں کامل طریقے نال پورا کر چُکیااے ، مَیں پہلاں ای لعنتاں تے سزا توں وی ازاد ہوگیا آں ۔
سچ مُچ ، ساڈی مکتی جیہڑی اسمانی تے لال دھاگے نال ملی اے ساریاں بولاں توں بوہت مہنگی اے ۔ یاد رکھو تے ایمان رکھو پئی تہاڈی مکتی نا صرف صلیبی لہو نال کامل ہوندی اے ، نا ای صرف یِسُوعؔ دے بپتسمے نال ، سگوں دوآں بپتسمے تےصلیبی لہو نال کامل ہوندی اے ،تے ایہہ ایہناں دوآں اُتے ایمان نال اے پئی تسی خُدا دے نیانے بن سکدے او ۔ اسی پانی تےرُوح دی خوشخبری دے کلام اُتے ، اوس بھیت نال جیہڑا خیمۂ اِجتماع دیاں تختیاں دِیاں دو چُولاں تے چاندی دیاں دو خانیاں وچ لُکیا اے ایمان رکھ کے سدادی زندگی پا چُکے آں ۔
مَیں اپنے خُداوندداسچےدلوں شکر ادا کرداہاں جیہڑاسانوں جگ دیاں پاپاں توں بچا چکیااے۔ ہیلیلویاہ !
- ایس توں پہلاں
- ایس توں بعدوں
Copyright © 2021 by The New Life Mission