کورونا وائرس تے عالمگیر ڈاک سروس وچ رکاوٹ دے سببوں، اَسیں اپنی ’مُلوں بغیر چھاپی ہوئی کتاب دی سروس‘ نوں تھوڑے چِر لئی بند کر دے پئے آں۔
ایس صورتحال دے چانن وچ اسیں ایس ویلے تہانوں کتاباں گھلن دے قابل نئیں ہیگے آں۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔
مضمون 11: خیمۂ اِجتماع
[11-24] سوختنی قربانی دی قربانگاہ کِکردی لکڑ نال بنائی گئی سی،جیہڑی پِتل نال مَڑھی ہوئی سی <خروج ۳۸:۱-۷>
<خروج ۳۸:۱-۷>
”تےاوہنے سوختنی قُربانی دا مذبح کِکر دی لکڑدا بنایا۔ اوہدی لمان پنج ہتھ تے چَوڑائی پنج ہتھ سی۔ اوہ چَونہہ نُکرا سی تے اوہدی اُچیائی تِن ہتھ سی۔تے اوہنے اوہدیاں چونہہ نُکراں اُتے سِنگ بنائے۔ سِنگ تےاوہ مذبح دونویں اِکوای ٹوٹےدےسن تے اوہنے اوہنوں پِتل نال مَڑھیا۔تےاوہنے مذبح دے سارے بھانڈے یعنی دیگاں تے بیلچے تے کٹورے تے سیخاں تے انگیٹھیاں بنائیاں۔ اوہدے سارے بھانڈے پِتل دےسن۔تےاوہنے مذبح لئی اوہدے چونہاں پاسے کنارے دے ہیٹھاں پِتل دی جالی دی جھنجری ایس طرح لائی پئی اوہ اوہدے اَدھ دُور تیکر اَپڑدی سی۔تے اوہنے پِتل دی جھنجری دیاں چونہواں پاسیاں اُتے لاؤن لئی چار کڑے ڈھالے تاں پئی چوباں لئی خانیاں دا کم دین۔تےچوباں کِکر دی لکڑدیاں بنا کے اوہناں نوں پِتل نال مَڑھیا۔تےاوہنے اوہ چوباں مذبح دیاں دوآں پاسے دیاں کڑیاں وِچ اوہدے چُکن لئی پا دِتیاں۔ اوہ کھوکھلا تختیاں دا بنا ہویاسی۔“
ہر پاپی نوں سوختنی قربانی دی قربانگاہ اُتےقربانی دا پشُو لیاؤنا پینداسی
اسرائیلیاں وچوں کسے وی پاپی نوں اوہدیاں پاپاں توں معافی پاؤن لئی خیمۂ اِجتماع وچ قربانی دا پشُو لیاؤنا پیندا سی ، ایہدے سِر اُتے ہتھاں دے رکھے جان دے راہیں اپنیاں پاپاں نوں اوہدے اُتے لدنا پینداسی ، ایہدا لہو کڈھنا پیندا،تے فیر ایہدے لہو نوں کاہن دے ہتھیں دینا پیندا سی ۔ ایہدے بعد کاہن قربانی دا پشُودے لہو نوں سوختنی قربانی دی قربانگاہ دیاں سِنگاں اُتےلاؤندا تے ایہدی چربی تے گوشت نوں قربانگاہ اُتے رکھدا تے خُداوندخُدا لئی خوشبو وانگر ایہناں نوں اَگ وچ ساڑدا ۔ ایتھوں تیکر پئی وڈے کاہن نوں وی قربانی دے پشُو اُتے ہتھ رکھنے پیندے سن تے اپنیاں پاپاں دی معافی پاؤن لئی اپنیاں پاپاں نوں سوختنی قربانی دی قربانگاہ دے اگے پشُو اُتے لدنا پیندا سی ۔ ایہہ سوختنی قربانی دی قربانگاہ اُتے چاھڑی جان والی فدیہ دی قربانی سی جیہڑی کِکر دی لکڑ نال بنائی گئی سی تے پِتل نال مَڑھی ہوئی سی ،تے پاپاں دی معافی دی ایہہ قربانی صرف ہتھاں دے رکھے جان تے لہو وگا کے چاھڑی جاندی سی ۔
جگ بناؤن توں پہلوں ، خُدا نے مکتی دا راہ پہلوں ای مقرر کر لیا سی پئی ہر کسے نوں اوہدیاں ساریاں پاپاں توں ہتھاں دے رکھے جان تے لہو وگاؤن دے راہیں مکتی دیوے ۔ ساڈی مکتی دا منصوبہ بناؤن دے بعد ، خُدا نے اپنے اِکلے پُتر نوں ایس زمین اُتے گھلنا سی ، اوہنوں یوحنا بپتسمہ دین والے دے راہیں بپتسمہ دینا سی ، تے اوہنوں سولی اُتے اپنا لہو وگاؤن دینا سی ۔ ایہو ای سبب ہیگا اے پئی یِسُوعؔ مسیح نے اپنے بپتسمے دے راہیں ہر اِک پاپی دیاں ساریاں پاپاں نوں قبول کیتا ، جیہڑے پُرانے عہد نامے دے ہتھاں دے رکھے جان وانگر سی ۔تے جگ دیاں ساریاں پاپاں دی ساری سزا جرن لئی ، یِسُوعؔ نے اوہناں ساریاں پاپاں نوں موہڈا دتا تے ساڈے بدلے سولی اُتے اپنا لہو وگایا ۔
سوختنی قربانی دی قربانگاہ جیہڑی پِتل نال مَڑھی ہوئی اے سانوں سکھاؤندی اے پئی خُدا ہر اوس پاپ دی لازمی سزا دیوے گا جیہڑا ہر بندے دے دل دی تختی اُتے لکھیا ہویا اے ۔ ایس لئی ہر پاپی نوں قربانی دے پشُو دےسِر اُتے ہتھ رکھ کے اپنیاں پاپاں نوں لدنا پینداسی تے فیر ایہدا گل وڈھ کے ایہدا لہو کڈھنا پیندا سی تے کاہن نوں ایس پشُو دا لہو سوختنی قربانی دی قربانگاہ دِیاں سِنگاں اُتے لاؤنا پیندا سی ۔ ایس طرح ، سوختنی قربانی دی قربانگاہ جیہڑی پِتل نال مِڑھی ہوئی اے سانوں ساریاں نوں ایہہ دسدی اے پئی یِسُوعؔ نے ساڈیاں ساریاں پاپاں نوں چُک لیا ، تے ایہہ پئی اوہ سولی اُتے ساڈے بدلے ایہناں ساریاں پاپاں لئی قصور وار ٹھہرایا گیا ۔
سوختنی قربانی دی قربانگاہ دی لوڑ
جد وی قربانی دا پشُوخُدا اگے چاھڑیاجاندا سی تاں ایس گوشت نوں ٹوٹے ٹوٹے کر کےسوختنی قربانی
دی قربانگاہ اُتے رکھ دتا جاندا سی تاں پئی اگ نال ساڑیا جائے تے خُدا نوں خوشبو لئی چاھڑیا جائے ۔ خُدا باپ ایہہ ویکھ کے بوہت خوش ہویا پئی یِسُوعؔ نے یوحنا بپتسمہ دین والے کولوں بپتسمہ لیا تے ساڈیاں ساریاں پاپاں لئی ساڈے بدلے مرن تیکر سولی چڑھیا ۔ خُدا باپ خوش سی پئی ایس بے پاپ یِسُوعؔ نے اپنے آپ نوں ساریاں پاپیاں لئی سدا دے فدیے وانگر قربان کر دتا ۔
سوختنی قربانی دی قربانگاہ اُتے چاھڑیاں جان والیاں قربانیاں ایہہ ظاہر کردیاں نیں پئی کویں خُدا نے ہر پاپی نوں اوہدیاں ساریاں پاپاں توں بچایا اے ، تے نال ای ،اوہ ایہہ وی ظاہر کردیاں نیں پئی خُدا کویں ہر پاپ دی سز ا دیندا اے ۔ وکھریاں اکھراں وچ ، سوختنی قربانی دی قربانگاہ بندیاں دی اوہناں دیاں ساریاں پاپاں تے سزا توں مکتی نوں ظاہر کردی اے ۔ ایہہ سانوں وکھاؤندا اے پئی ہر پاپی نوں اگ دے دریا تےدوزخ وچ گندھک وچ سُٹیا جانا چاہی دا اے؛تے ایہہ سانوں ایہہ وی وکھاؤندا اے پئی کویں ہر پاپی نوں اوہدیاں ساریاں پاپاں توں مکتی مل سکدی اے ۔ ایس طرح ، جیہڑا وی بندہ کوئی وی پاپ رکھدا ہوئے اوہنوں دوزخ دی اگ وچ سُٹایا جانا چاہی دا اے ، تے ایس لئی ہر پاپی نوں خُدا دی رحمت نوں بغیر ناکام ہوئیوں لبھنا چاہی دا اے ۔
ہرقربانی دا پشُوجیہڑا سوختنی قربانی دی قربانگاہ اُتے رکھیا جاندا سی اِک پاپی دیاں بدکاریاں نوں جردا سی تے ایہناں لئی قصور وار ٹھہرایا جاندا سی ۔ دوجیاں اکھراں وچ ، قربانی دےپشُونے ہتھاں دے رکھے جان دے راہیں کسے دیاں پاپاں نوں قبول کیتا سی تے اوہناں بدلے اپنا لہو وگایا سی ۔ اوہنے پاپ دی سزا نوں جریا سی جنہوں پاپی نے جرنا سی ۔ خیمۂ اِجتماع وچ چاھڑی جان والی ایہہ سوختنی قربانی سانوں سکھاؤندی اے پئی یِسُوعؔ نے اپنے بپتسمے دے راہیں ایس جگ دیاں ساریاں پاپاں نوں قبول کیتا تے ساڈےبدلے اپنا لہو وگایا ۔
خیمۂ اِجتماع وچ ہر بھانڈا سانوں وکھاؤندا اے پئی خُدا نے ساڈیاں پاپاں دی معافی نوں کویں پورا کیتا اے ۔ سو، تہاڈے لئی اپنی مکتی دی صاف لکیر کھِچن لئی ، تہانوں خیمۂ اِجتماع دیاں بھانڈیاں وچ ظاہر ہون والی سچیائی اُتے ٹھیک ایمان رکھنا چاہی دا اے ۔ فیر تہانوں اپنی مکتی دی لکیر کویں کھِچنی چاہی دی اے ؟ تہانوں مکتی دی سچیائی اُتے ایمان رکھ کے مکتی دی صاف لکیر کھِچنی چاہی دی اے جیہڑی اسمانی، ارغوانی تےلال رنگ دے دھاگےتےمہین وٹےہوئے کتان وچ لُکی ہوئی اے ۔ صرف اوہو ای جیہڑے اِنج دا ایمان رکھدے نیں خُدادی راستبازی وچ آسکدے نیں تے اپنے ایمان نوں ٹھیک طریقے نال زندہ رکھ
سکدے نیں ۔
خُدا نے قربانی دااِک پشُوتیار کیتا سی جیہڑا پاپیاں دیاں پاپاں دا فدیہ دیوے گا تاں پئی اوہ ہیکل وچ آؤن دے لائق ہوسکن ۔ تے وڈے کاہن نے ساریاں پاپیاں ولوں فدیہ دی قربانی چاھڑی تاں پئی اوہناں نوں اوہناں دیاں ساریاں پاپاں توں بچایا جا سکے ۔ خُدا نےپانی تے رُوح دی خوشخبری وچ اپنے پُتر یِسُوعؔ مسیح دے راہیں مکتی دا اپنا وعدہ پورا کیتا اے ۔ ایس لئی سانوں پانی تے رُوح دی خوشخبری دی سچیائی اُتے ایمان رکھنا چاہی دا اے تے اپنے ایس ایمان نوں ودھاؤنا چاہی دا اے ۔ کیہ تہاڈا ایمان ہُن پانی تے رُوح دی خوشخبری وچ ہیگا اے؟ تہانوں اپنیاں ساریاں پاپاں توں مکتی پاؤن لئی ، پانی تے رُوح دی خوشخبری اُتے سچے دلوں ایمان رکھنا چاہی دا اے ۔ پاپاں دی سچی معافی صرف اوسے ویلے مل سکدی اے جد تُسی پانی تے رُوح دی خوشخبری دے کلام اُتے ایمان رکھدے او جویں پئی اسمانی، ارغوانی تےلال رنگ دےدھاگےوچ گواہی دتی گئی اے۔ اصل وچ ، پُرانے عہد نامے دے خیمۂ اِجتماع وچ وکھائے گئے اسمانی، ارغوانی تےلال رنگ دے دھاگے وچ ظاہر ہون والی مکتی دی سچیائی ساری نویں عہد نامے وچ گھلی جان والی پانی تے رُوح دی خوشخبری وچ ہیگی اے ۔ کیہ تُسی پانی تے رُوح دی خوشخبری لئی کھلوتے او ؟ یا کیہ تُسی اوہ خوشخبری دے حامی او جیہڑی صرف صلیبی لہو بارے گل کردی اے ؟ کیہ تُسی ایس خوشخبری اُتے ایمان رکھدے او پئی یِسُوعؔ مسیح نے بپتسمہ لیا تے ساڈے لئی اپنا لہو وگایا؟
پُرانے عہد نامے دے زمانے وچ، خیمۂ اِجتماع دا قربانی دا نظام خُدا دی مکتی دا عہد سی جنہے ساڈے نال وعدہ کیتا پئی اوہ سانوں جگ دیاں پاپاں توں بچاوے گا ۔ خُدا نے مکتی دے اپنے وڈے منصوبے نوں خیمۂ اِجتماع دے پھاٹک نوں اُنن لئی ورتے جان والےاسمانی، ارغوانی تےلال رنگ دے دھاگےتےمہین وٹےہوئے کتان دے راہیں ظاہر کیتا سی ۔ جیہڑا وی ایس پھاٹک وچوں لنگھنا چاؤہندا سی اوہنوں ایہناں شیواں وچ ظاہر ہون والی سچیائی اُتے ایمان رکھنا پیندا سی ۔ ایس طرح ، خُدا نے اسرائیلیاں نوں خیمۂ اِجتماع دی قربانی دے راہیں ، اوہناں دے قربانی دےپشُواُتے اوہناں دیاں ہتھاں دے رکھے جان تے ایس طرح اپنیاں پاپاں نوں ایمان نال اوس اُتے لدن دے راہیں ، تے اوہدا لہو خُدا اگے چاھڑن دے راہیں اوہناں دیاں ساریاں پاپاں توں مکتی دین دی اجازت دتی ۔ پانی تے رُوح دی خوشخبری اوہ معیار اے جیہدے راہیں پاپاں دی معافی مِلدی اے ، تے ایس لئی صرف اوہو ای لوک جیہڑے ایس خوشخبری نوں ٹھیک طریقے نال سمجھدے نیں تے ایس اُتے ایمان رکھدے نیں اوہ خُدا دے اپنے لوک نیں ،جد پئی باقی ساریاں نے حالی خُدا دے لوک بننا اے ۔ ایہدا سبب ایہہ ہیگا اے پئی اسمانی، ارغوانی تےلال رنگ دے دھاگے وچ ظاہر ہون والی سچیائی تے خیمۂ اِجتماع دے برانڈےدے پھاٹک وچ ورتیا جان والا مہین وٹیا ہویا کتان نویں عہد نامے دی پانی تے رُوح دی خوشخبری اے ۔
ساڈےخُداوندنےیوحنا۳باب وِچ نِیکُدِیمُس نوں آکھیا، ’’جدتیکر کوئی پانی تے رُوح نال نویں سِریوں نئیں جم دا ،ا وہ خُدادی بادشاہی وِچ جا نئیں سکدا۔‘‘ساڈے ساریاں لئی ایہہ سمجھنا بوہت ضروری اے پئی ایتھے پانی دا مطلب اوہ بپتسمہ اے جیہڑا یِسُوعؔ نے یوحنا بپتسمہ دین والے کولوں لیا سی ۔ صرف ایس طرح جد اسی پانی تے رُوح دی خوشخبری نوں سمجھاں گے تاں اسی ایمان دے راہیں خُدا دےسینے لگ سکدے آں ۔
ہر کسے نوں ایس گل دا احساس ہونا چاہی دا اے پئی اوہنوں اوہدیاں پاپاں لئی لازمی طریقے نال سزا دتی جائے گی
جویں پئی مرقس ۷ : ۲۱ وچ تے ایہدے بعد دسیا گیا اے ، ہر کوئی اوہو ای باراں پاپ رکھدا جیہڑے اوہدے دلوں نکلدے نیں ۔ سب توں پہلوں ، کسے دے بُرے خیال خُدادے اگے اِک پاپ نیں ۔ تے خُون ، زناکاریاں، چوریاں ، بدکاری ، شیخی تے بےعقلی سارے پاپ نیں ۔ لوکاں دیاں دلاں وچ بھیڑے خیال پاپ دے خاص سبب نیں جیہڑے خُدا دی پاکیزگی نوں رَدّ کردے نیں ۔ بھاویں خُدا نے آدم نوں اپنے روپ مطابق اِک سدا دے بندے وانگر بنایا ، آدم نے خُدا دے خلاف پاپ کیتا ، تے ایہدے نتیجے وچ ، اسی سارے آدم دے نیانے وی پاپی وانگر جمے ، تے خُدا دی سزا توں بچن دے لائق نئیں ساں ۔ ایس لئی پئی اسی سارے پہلے بندے آدم دے نیانیاں وانگر جمے ساں ، ایہہ ساڈی پیدائشی عادت وچ ہیگا اے پئی اسی پاپ توں علاوہ کُجھ نئیں کردے تے اپنیاں خیالاں تے کماں دوآں وچ خُدا دی پاکیزگی نوں رَدّ کردے آں ؛ تے ایس لئی اسی بچ نئیں سکدے سگوں مرن دیہاڑے تیکر پاپ کردے آں ۔ اصل وچ ، سارے بندے عادت ولوں اپنیاں خیالاں وچ مُڈھلےطوراُتے بھیڑے نیں ، تے اوہ شیطان دے راہیں سوکھے جیہے دھوکہ کھان والی بھولے لوک وی نیں جیہڑا خُدا دی پاکیزگی نوں للکاردا رہندا اے ۔
خُدا نے آکھیا پئی بندے دے دلوں بھیڑیاں خیالاں توں علاوہ کُجھ نئیں نکلدا۔ہر بندہ اصل وچ مرقس باب ۷ وچ لکھے ہوئے باراں قسماں دیاں پاپاں نال بھریا ہویا اِک راہوں بھٹکے پاپی وانگر اگے آؤندا اے،قتل کرن توں لَے کے زناکاری ، چوری، لالچ، حرامکاری، بےعقلی وغیرہ۔ہر کسے دی پیدائشی فطرت بھیڑیاں خیالاں نال بھری ہوئی اے ۔ تے بے گنت لوک اپنی دینی راستبازی نال خُدا دی پاکیزگی نوں للکاردے پئے نیں ۔ ایس لئی سانوں ساریاں نوں اپنیاں پاپاں لئی خُدا ولوں بغیر ناکامی سزا دِتی جانی سی ۔ ایہو ای سبب ہیگا پئی قربانی دیاں پشُوآں نوں خیمۂ اِجتماع وچ دنوں دن سوختنی قربانی دی قربانگاہ اُتے ساڑیا جاندا سی ۔خیمۂ اِجتماع دا برانڈہ اصل وچ سڑدے ہوئے گوشت دی بو تے لکڑدے دھوں نال بھر جانداسی ۔
سانوں اپنی گندگی نوں پِتل دے حوض وچ پانی نال دھونا چاہی دا اے
پرانے عہد نامے دیاں کاہناں نوں ہر دن سڑے ہوئے گوشت تے کالے دھو ں دی گندی بو نال اپنے آپ نوں گھیرنا پیندا سی ۔ ایس لئی اوہناں دا صاف ہونا اوکھا سی ، ایس لئی پئی اوہناں دے مکھڑے دھوں نال کالے ہو جاندے سن تے اوہناں دے بدن گندگی نال کجے جاندے سن ۔ ایس لئی اوہناں نو ں خیمۂ اِجتماع دے برانڈے وچ پِتل دے حوض دی لوڑ سی ، تاں پئی اوہ اپنے آپ نوں دھو سکن۔ کاہناں نوں ہر دن پِتل دے حوض دے پانی نال اپنی گندگی دھونی پیندی سی ۔
خیمۂ اِجتماع وچ پِتل دا ایہہ حوض ایس گل ول اشارہ کردا اے پئی نویں عہد نامے دیاں دناں وچ یِسُوعؔ نے یوحنا بپتسمہ دین والے دے راہیں بپتسمہ لے کے ایس جگ دیاں ساریاں پاپاں نوں دھو دِتا سی ۔ ایہہ سچ ہیگا اے پئی پرانے عہد نامے دیاں کاہناں نیں اپنے بدن نوں خیمۂ اِجتماع وچ پِتل دے حوض دے پانی نال دھویا ،یِسُو عؔ مسیح دے بپتسمے ول اشارہ کردا اے ، جیہڑا اوہدے مکتی دے کم لئی اونا ای خاص سی جِناں پئی اوہنے سولی اُتے لہو وگایا سی ۔ یِسُوعؔ نے یوحنا بپتسمہ دین والے کولوں جیہڑا بپتسمہ لیا اوہ ساڈیاں ساریاں پاپاں نوں دھون لئی اِک بوہت خاص کم سی ،جیہدے بغیر کوئی وی پاک نئیں ہو سکدا سی ۔ اصل وچ ، کاہن اپنی پاکیزگی قیم رکھ سکدے سن ایس لئی پئی اوہ خیمۂ اِجتماع دے پِتل دے حوض وچ جا سکدے سن تے خیمۂ اِجتماع وچ خدمت وچکار اکٹھی ہون والی ساری گندگی نوں دھو سکدے سن ۔
ایہہ پئی کاہناں نیں پِتل دے حوض اُتے اپنی گندگی نوں دھویا ایہدا مطلب ایہہ ہیگا اے پئی کسے نوں اپنی پاپ نال بھری زندگی نوں مننا چاہی دا اے تے ایہہ مننا چاہی دا اے پئی ہر کسے نوں اوہدیاں پاپاں دی خُدا ولوں سزا دتی جائے گی تے فنا کیتا جائے گا ۔ تہاڈے لئی مکتی دا راہ اوس ویلے کھُل جاندا اے جد تُسی خُدا دے اگے اقرار کردے او پئی تہانوں قصور وار ٹھہرایا جائے گا تے تہانوں تہاڈیاں پاپاں لئی سدا لئی دُکھ جرن لئی دوزخ دی اگ وچ سُٹ دِتا جائے گا ۔ خُدا دے اگے آؤن دا اِکو طریقہ ایہہ ہیگا اے پئی تُسی اپنیاں پاپاں دا اقرار کرو تے مکتی دی اصل سچیائی اُتے ایمان رکھو جیہڑی یِسُوعؔ نے تہاڈے لئی پوری کیتی ۔ مسیحا اصل وچ ایس زمین اُتے تہانوں تے مینوں جگ دیاں ساریاں پاپاں توں بچاؤن لئی آیا سی ؛ اوہنے اصل وچ یوحنا بپتسمہ دین والے دے راہیں بپتسمہ لے کے ساڈیاں ساریاں پاپاں نوں جریا ۔ تے اصل وچ ساڈے بدلے اوہنوں سزا دتی گئی سی ۔ ایہہ پانی تے رُوح دی خوشخبری دی سچیائی اے ، تے ایہہ مکتی دی بوہت خاص سچیائی اے جیہدے اُتے سانوں ایمان رکھنا چاہی دا اے۔
ہر بندہ بھیڑیاں خیالاں وچ پھس جاندا اے ، تے ایسے لئی ہر کوئی دوجیاں نوں تنگ کرن دیاں شرارتی تمناواں رکھدا اے پئی اوہ ، اوہناں نوں تنگ کرے، تے ایتھوں تیکر پئی اوہناں نوں قتل کردیوے ۔ تہانوں پچھاننا چاہی دا اے پئی بندے کِنے بھیڑے تے بد کار نیں ۔ فیر بندے اینے بھیڑے کیوں نیں ؟ ایہدا سبب ایہہ ہیگا اے پئی اوہ عادت ولوں بدکاراں دے نیانے نیں ، سدا بھیڑیاں خیالاں وچ پھس دے نیں تے سدا پاپ کردے نیں ۔ ایس لئی پئی انسان ہر ویلے باراں قِسماں دے پاپ کردا رہندا اے ، ایس لئی اوہ اِک بمب وانگر اے جیہڑا کسے ویلے وی پاٹ سکدا اے ، اصل وچ ، اوہ ہر ویلے بُریائی وکھاؤندے نیں ، اِک دوجے نال ہر ویلے جھوٹھ بولدے نیں ، اِک دوجے دی چوری کردے نیں، حرامکاری تے زناکردے نیں ، خُدا دی شان دی بے عزتی کردے نیں ، تے کم عقلی تے کملیاں وانگر محبت کردے نیں ۔ عادتوں بدکاراں دے نیانیاں وانگر ، بندے سدا بھیڑیاں خیالاں نوں پالدے نیں تے اپنی ساری زندگی خُدا دی پاکیزگی نوں للکاردے نیں ۔
خُدا دی نگاہ وچ اسی کِنے بھیڑے آں ؟
خود غرض ہونا ہر بندے دی پیدائشی عادت اے ۔ سائنس دان آکھدے نیں پئی اِک بندے وچ سو کھرب تو ں بوہتے خُلیے ہوندے نیں ، تے ایہناں بے گنت خُلیاں وچوں ہر اِک ایناں خود غرض ہوندا اے پئی اوہ کسے وی دوجے خُلیے نال کوئی نیکی نئیں کردا ۔ ایہو ای سبب ہیگا اے پئی بندہ پورے طور اُتے خود غرض ہستی اے ۔ تاں پئی ہر کسے نوں جینیاتی طریقے نال ایس طرح خود غرض ہون لئی ترتیب دتا گیا اے ، ایس لئی کوئی وی ایس جگ وچ زندہ نئیں رہ سکدجد تیکر پئی سماجی اصول تے قانون نا ہون جیہڑے کسے دے رویّے نوں سواردے ہون ۔ بندے اینے خود غرض ہیگے نیں پئی ایہو جیہاں قانوناں دے بغیر اوہ اِک دوجے نوں مار دین گے ۔ ایہہ اوہناں دے اپنے جیوندیاں رہن لئی ہیگا اے پئی اوہناں نیں رَل کے جیون دے قانون بنائے نیں ۔ ایس طرح معاشرے دے اصول تے ضابطے وجود وچ آئے ۔ سماجی اصول بندے دے فنا کرن والے دھیان نوں روکن تے بوہتے تعاون نال بنائے ماحول نوں ودھاؤن لئی بنائے گئے سن ۔ نِکی گل ، ایہدا سبب ایہہ ہیگا اے پئی بندے اینے بھیڑے تے بدکار نیں پئی اوہناں دے کم کرن دے طریقے اُتے قابوپاؤن تے اوہناں دے بھیڑیاں دھیاناں نوں روکن لئی سماجی اصولاں تے قانوناں نوں قیم کرنا ضروری سی ۔ ایس جگ وچ بدی جِنی چوکھی ودھدی گئی ، معاشرتی اصولاں تے قانوناں دا وجود وچ آؤنا اونا ای لازمی ہوندا گیا ۔
جے تُسی سچ مُچ یِسُوعؔ مسیح اُتے اپنے مکتی داتا وانگر ایمان رکھنا چاؤہندے او تے خُدا باپ دے اگے آؤنا چاؤہندے او ، تاں تہانوں ناکام ہوئیوں بغیر پہلوں ایہہ سمجھناچاہی دا اے پئی تُسی پیدائشی طور اُتے عادتوں بھیڑے او ، مننا چاہی دا اے پئی تُسی کامل طریقے نال دوزخ دے حقدار پاپی او ، تے فیر پانی تے رُوح دی خوشخبری اُتے ایمان رکھنا چاہی دا اے ۔ تُہانوں لازمی یِسُوعؔ مسیح دی راستبازی اُتے ایمان رکھنا چاہی دا اے تے ایس طرح اپنیاں ساریاں پاپاں دی معافی پاؤنی چاہی دی اے ۔ بھاویں خُدا پاک اے ، بندے بالکل بدکار نیں، تے ایس لئی اوہ ہر ویلے پاپ کرن توں علاوہ کُجھ نئیں کرسکدے ۔ بھاویں اوہ خُدا دے رُوپ وانگر بنائے گئے سن ، اوہ اوہدی پاکیزگی دی بے عزتی کرن والے نیں ۔ ایس لئی بندے صرف اوسے ویلے بچائےجا سکدے نیں جد اوہ یِسُوعؔ مسیح ولوں دتی گئی پانی تے رُوح دی خوشخبری اُتے سچے دلوں ایمان رکھدے نیں ۔ تُسی اپنی مکتی اودوں ای لے سکدے او جے تُسی یِسُوعؔ مسیح دی راستبازی نوں لبھدے او ، ایہنوں سمجھدے ، تے ایس اُتے ایمان رکھدے او ۔ تہانوں لازمی خُدا دی راستبازی نوں لبھنا چاہی دا اے تے اوہدے فضل اُتے ایمان رکھنا چاہی دا اے ، اوہنوں ایہہ آکھدیاں ہویاں ، ”خُداوند ، مَیں من دا ہاں پئی مَیں سدابدکار آں۔ مَیں ہر ویلے غلطیاں بھریارہندا ہاں ۔ مَیں ہر ویلے پاپ کرداہاں ، تے ایس لئی مَیں دوزخ دی سزا دا حقدار ہاں۔ ایس لئی جیہڑی مکتی تُسی پانی تے رُوح دی خوشخبری دے راہیں پیش کردے پئے او اوہ میرے لئی بوہت خاص اے ۔ مینوں یقین اے پئی تُسی مینوں پانی تے رُوح دی خوشخبری دے راہیں بچایا اے ۔ “ صرف اوہو ای لوک جیہڑے اپنیاں کمیاں تے بدیاں نوں من دے نیں یِسُوعؔ مسیح دی راستبازی اُتے ایمان رکھ سکدے نیں۔
لوک آکھدے نیں پئی سقراط اُتے اِ ک لکھائی نے اثر کیتا جیہڑی اوہنے واش روم دی کندھ اُتے اتفاقیہ ویکھی، جیہدے وچ لِکھیاگیا سی ، ”اپنے آپ نوں جانو !“ایس نِکی جیہی گل نے سقراط اُتے بوہت اثر کیتا ایس لئی پئی ایہنے، اوہدے ذہن وچ جو کُجھ سی ایہنوں وکھا دِتا ۔ تاں پئی ، سقراط نے جد وی کسے نوں اپنے آپ نوں راستباز تےعلم والا ہون دا فریب کردیاں ہویاں ویکھیا ، تاں اوہنے اوس بندے نوں ایہہ آکھ کے ہدایت کیتی ، ”پہلوں اپنےآپ نوں جانو!“ایہہ نِکی جیہی گل سقراط نوں اِک وڈا فلاسفر بناؤن لئی چوکھی سی جنہوں ایتھوں تیکر پئی اَج تیکر یاد رکھیا جاندا اے ۔
مَیں ایس گل بارے بوہتا زور نئیں دے سکدا پئی تہاڈے لئی ایہہ کناں لازمی ہیگا اے پئی تُسی اپنی پاپی زندگی نوں پچھانو، سمجھ لووو پئی تہانوں ایہناں پاپاں دی مزدوری لئی دوزخ وچ سُٹیا جائے گا ،تے دلوں ایہنوں مَل لووو۔ تُسی ٹھیک طریقے نال خُدا دی راستبازی نو ں نئیں سمجھ سکدے جد تیکر پئی تہانوں پہلوں ایہہ احساس نا ہوجائے پئی تُسی خُدا دے اگے کیہو جیہے بدکار پاپی جے تےتُسی کِنے بے ترسی نال سِدھے دوزخ پاسے جاندے پئے او ۔ ایس طرح ، ہر کسے نوں پہلوں اپنیاں پاپاں دی اخیر نوں مننا چاہی دا اے ۔سوختنی قربانی دی قربانگاہ کِکر دی لکڑ نال بنی سی ، تے ایہدے باہر والے حصے نوں پِتل نال مڑھیا ہویا سی ۔ ایہدا مطلب ایہہ ہیگا اے پئی ہر کسے نوں اوہدیاں پاپاں دی سزا ملنی اے ، تے ہر پاپی اپنے دوزخ دے راہ توں بچن لئی بے وس اے ۔ پر جیہڑے لوک جان دے نیں پئی اوہ اپنے آپ وچ کِنے بے وس نیں اوہ یِسُوعؔ دی راستبازی دی وڈیائی کر سکدے نیں تے اوہدی محبت اُتے ایمان رکھ سکدے نیں ۔
آؤایتھے لُوقا ۱۸:۱۰-۱۴ ول دھیان کرئیے: ” پئی دو بندے ہیکل وِچ دُعا منگن گئے۔ اِک فریسی سی تے دُوجا محصُولیا۔ فریسی کھلو کے اپنے جی وِچ ایویں دُعا منگن لگّا۔ اَے خُدا مَیں تیرا شُکر کرنا آں پئی مَیں ہورناں لوکاں وانگُوں لُٹیرا ظالم زانی یا ایس محصُولئے جِہیا نئیں آں۔ مَیں تے ہفتے وِچ دو واری روزہ رکھناں آں مَیں اپنی ساری کمائی دا دسواں حِصّہ دینا آں۔ پر محصُولئے دُوروں کھلو کے اینا وی نئیں چاہیا۔ پئی اسمان ولّ اَکھّیاں کرے۔ سگوں پِٹ پِٹ کے ایہہ آکھدا سی۔ پئی اَے خُدا مَیں جو گُناہیں ہاں میرے اُتّے رَحم کر۔ مَیں تُہانوں آکھنا آں۔ پئی ایہہ بندے دُوجے نالوں ودِھیک نیک ہو کے اپنے گھر گیا۔ کیوں جو جیہڑا کوئی اپنے آپ نُوں اُچیاں کر دا اے۔ نِیواں کِیتا جائے گا۔ پر جیہڑا اپنے آپ نُوں نِیواں کر دا اے اوہ اُچّا کِیتا جائے گا۔ “
یِسُوعؔ دے زمانے وچ فریسی اپنیاں ظاہری شکلاں وچ بوہت پرہیزگار سن ، باقی ساریاں نوں نیکی وچ زندگی گزارنا سکھاؤندے سن ۔ پر کیہ اوہناں نیں سچ مُچ کدی کوئی چوری یا زنا نئیں کیتا؟ نئیں بالکل نئیں! بھاویں فریسیاں نے وکھالے طور اُتے خُدا نوں منن دا فریب کیتا ، جد کوئی اوہناں ول نئیں ویکھدا ہوندا سی ، تاں اوہناں نیں کسے توں وی بوہتے تے بھیڑے پاپ کیتے سن ۔ فیر وی ایہدے باوجود، اوہناں نیں اپنے آپ نوں ایہہ منن لئی مست کیتا پئی اوہ بے پاپ سن ، تے اوہناں نیں اپنے آلے دوالے دے لوکاں لئی وی خُدا پرست ہون دا فریب کیتا ۔ ایہہ بالکل ایہو جیہے لوک نیں جیہڑے خُدا دی پاکیزگی نوں للکارن والے سب توں بوہتے ذلیل پاپی نیں ۔
محصُولیے دی دعا فریسی دی دعا توں فرق سی ۔ ایہہ سارے جان دے سن پئی محصُولیا پاپی سی۔ اصل وچ ، جد اوہ خُدا کول آیا ، تاں اوہ اپنا سِر چُک کے اسمان ول نئیں ویکھ سکدا سی ، سگوں ایہدی بجائے اوہنے اپنا سینا پِٹیا،تے اقرار کیتا ، ”خُدا ،میرے اُتے ترس کھا ، ایس لئی پئی مَیں پاپی آں !“فیر خُدا نے محصُولیے اُتے ترس دی مِنت سُن لئی ، تے اوہنے اوہنوں اوہدیاں ساریاں پاپاں توں بچایا ایس لئی پئی اوہ پانی تے رُوح دی سچیائی اُتے ایمان رکھدا سی ۔ ایہدے اُلٹ ، فریسی خُدا دے اگے اِک بدکاروانگر ننگا ہوگیا ۔ ایہہ محصُولیا سی جنہوں خُدا نے اپنی راستبازی لئی منظور کیتا سی ، نا پئی فریسی نوں ۔
اپنے دلوں خُدا دی راستبازی اُتے ایمان رکھ کے ای اسی پاپ دی معافی پائی اے ، نا پئی اپنیاں کماں اُتے بھروسہ کر کے ۔ ایس لئی پئی ساڈے کم سدا خُدا دی پاکیزگی توں گھٹ ہوندے نیں، اسی ہر ویلے پاپ کرن توں علاوہ کُجھ نئیں کرسکدے ، تے ایس لئی اسی سارے اپنیاں پاپاں دے سبب اگ دی سزا پاؤن دے حقدار آں ، جویں قربانی دیاں پشُوآں نوں ہر واری مار دتا جاندا سی تے اسرائیلیاں دیاں پاپاں بدلے سوختنی قربانی دی قربانگاہ اُتے ساڑیا جاندا سی ۔ ایس لئی سانوں خُدا دے اگے اقرار کرنا چاہی دا اے پئی اسی کِنے پاپی آں تے صرف یِسُوعؔ مسیح اُتے ایمان لیا کے اپنیاں ساریاں پاپاں تے سزا توں بچ جاواں گے ۔
جد اسی سوختنی قربانی دی قربانگاہ توں اُٹھدی ہوئی اگ تے دھوں نوں ویکھدے آں جیہڑی پِتل نال مڑھی ہوئی سی ، تاں اسی ویکھ سکدے آں پئی خُدا دے اگے، اسی آپ ای پاپی آں جیہڑے اپنیاں پاپاں دے سبب دوزخ دی اگ وچ سزا پاؤن دے حقدار آں ۔ تہاڈے وچوں ہر کسے نوں ایس سچیائی دا پتہ ہونا چاہی دا اے ۔ فیرای تُسی یِسُوعؔ مسیح دے بپتسمے تے قربانی دےلہو اُتے ایمان لیا کے اپنیاں ساریاں پاپاں تے اپنیاں پاپاں دی ساری سزا توں کامل طریقے مکتی پا سکدے او ۔ یِسُوعؔ مسیح تہانوں تہاڈیاں ساریاں پاپاں توں مکتی دی پیش کش کر دا پیا اے ، پر تُسی سچ مُچ ایس مکتی لئی سچے دلوں لگن نال نئیں ویکھ سکدے جد تیکر پئی تُسی پہلوں خُدا دے اگے ایہہ من نا لووو پئی تُسی بالکل بدکار او، تے تُسی اپنیاں پاپاں دی سزا پاؤن توں بچ نئیں سکدے ۔ تے ایہہ فیر ای اے جد تُسی مکتی دی ایس سچیائی اُتے سچے دلوں ایمان رکھدے او پئی تُسی اپنی مکتی تیکر اَپڑ سکدے او ، اپنیاں ساریاں پاپاں تے ایہناں دیاں ساریاں لعنتاں توں چھُٹ سکدے او ،تے خُدا دی محبت نوں قبول کر سکدے او ۔ پر جویں پئی گل کیتی گئی اے ، ایس توں پہلوں پئی تُسی مکتی دی سچیائی اُتے ایمان رکھو ، تہانوں پہلوں اپنی اصل زندگی دی سمجھ آؤنی چاہی دی اے تے ایمانداری نال خُدا دے اگے اپنی پاپ دی عادت تے غلطیاں نوں مننا چاہی دا اے ۔ صرف اوہو ای بندہ جیہڑا اپنی پاپی عادت نوں من دا اے اوہ ہیگا اے جیہڑا خُدا دی پاکیزگی تے اوہدے انصاف نوں ٹھیک طریقے نال پچھان دا اے ۔ دوجیاں اکھراں وچ ، تُسی یِسُوعؔ دے بپتسمے تے اوہدے لہو اُتے ایمان لیا کے پاپ دی معافی صرف اوسے ویلے پا سکدے او جد تُسی ساریاں توں پہلوں ایہہ من دے پئی جد پئی خُدا بالکل انصاف کرن والا ، دیانت دار تے سچا اے ، تُسی اوہدے اگے بالکل بے انصاف ، گندے تے بدکار ہیگے او ۔
جے تُسی ایہدی بجائے اپنےآپ نوں اوس فریسی وانگر راستباز سمجھدے او جیہڑا خُدا دے اگے اپنے آپ نوں اُچے درجے دا پاک بدن سمجھدا سی ، تاں تہانوں ایتھے ایہہ سمجھناچاہی دا اے پئی تُسی بوہت پتلی برف اُتے کھلوتے او ۔ خُدا دی رحمت لبھن توں بوہت دُریڈے، تہانوں خُدا ولوں چھڈ دِتا جائے گا ۔ ایہدے اُلٹ ، جے تُسی محصُولیے وانگر او ، تاں تُسی اقرار کر سکدے او پئی تُسی اِک پاپی او جیہڑے اپنیاں پاپاں لئی دوزخ وچ سزا پاؤن دے حقدار او ، تے ایس سچے اقرار دے سببوں تُسی خُدا ولوں ترس پا سکدے او ۔ اصل وچ ، اوہناں ساریاں لوکاں نوں جیہڑے محصُولیے وانگر عاجز نیں ، خُدا باپ نے پانی تے رُوح دی خوشخبری نال اوہناں دیاں ساریاں پاپاں نوں مکا دِتا اے تے اپنے اِکلے پُتر یِسُوعؔ مسیح نوں گھل کے اوہناں نوں بچایا اے ۔
بھاویں ایس جگ وچ بے گنت لوک نیں ، پر اوہناں ساریاں نوں دو خاص قِسماں وچ ونڈیا جا سکدا اے : اوہ لوک جنہاں نوں پاپاں دی معافی مل گئی اے تے اوہ جنہاں نوں حالے تیکر نئیں ملی اے ۔ پہلےاوہ لوک نیں جنہاں نیں اپنا سارا بھیڑا حال تے اپنے دوزخ دے حقداراخیر نوں من لیا تے ایہدے نتیجے وچ خُدا دی رحمت دی تمنا کیتی ۔ ایہو جیہاں لوکاں نیں یِسُوعؔ مسیح دی مکتی اُتے ایمان رکھ کے پاپاں دی معافی پائی اے۔ اوہ سچے دلوں خُدا نوں من دے نیں تے اوہدی پاکیزگی ، انصاف تے وفاداری اُتے بھروسہ کردے نیں ۔ ایہدے اُلٹ ، اخیری بیان کیتےگئےنا صر ف اپنیاں پاپاں دی معافی پاؤن توں مُکردے پئے نیں سگوں اوہ خُدا دے خلاف وی کھلوتے نیں ، ایس لئی پئی اوہ نا تاں یِسُوعؔ مسیح نوں اپنا مکتی داتا من دے نیں تے نا ای ایہہ من دے نیں پئی اوہ آپ پاپی نیں۔ تہانوں ایمان رکھنا چاہی دا اے خُدا نےاسمانی، ارغوانی تےلال رنگ دےدھاگے دی سچیائی نال تہاڈیاں ساریاں پاپاں نوں کامل طریقے نال دھو دِتا اے ۔ صرف اوہو ای لوک جیہڑے ایہہ پکا ایمان رکھدے نیں ٹھیک طریقے نال اپنی مکتی تیکر اَپڑدے نیں ۔
سوختنی قربانی دی قربانگاہ جیہڑی پِتل نال مَڑھی ہوئی سی سانوں وکھاؤندی اے پئی بھاویں سانوں ساریاں نوں پاپاں لئی خُدا ولوں قصور وار ٹھہرایا جانا سی ، اسی اپنے خُداوند دے بپتسمے تے اوہدے سولی اُتے مرن اُتے ایمان رکھ کےاپنیاں ساریاں پاپاں توں دُھل گئے آں ۔ پر ایس توں پہلوں پئی تُسی یِسُوعؔ نوں اپنے مکتی داتا وانگر منن دا دعویٰ کرو تے اپنے ایمان دا اقرار کرو ، تہانوں ایہہ مننا چاہی دا اے پئی تُسی آپ ای بے گنت پاپاں دے سبب جیہڑے تُسی کیتے نیں خُدا ولوں سزا پاؤن دے حقدار او ، بالکل اوہناں قربانی دیاں پشُوآں وانگر جیہڑے سوختنی قربانی دی قربانگاہ اُتے ساڑے جاندے سن جیہڑی پِتل نال مَڑھی ہوئی سی ۔ صرف ایس ویلے جد تُسی پہلوں اپنی پاپی زندگی نوں من دے او تُسی سچ مُچ یِسُوعؔ مسیح دے بپتسمے تے سولی اُتے اوہدے لہو نوں اپنی مکتی لئی سمجھ سکدے او تے ایس اُتے ایمان رکھ سکدےاو، تے فیر ای تُسی خُدا دیاں لوکاں وچوں اک بن سکدے او ۔
صرف یِسُوعؔ دے لہو اُتے ای ایمان رکھنا بوہت نئیں ہیگا
تہاڈےوچوں کُجھ سوچ دے ہون گے ، ”ریورنڈ۔ جونگ کیوں ایہہ آکھدے رہندے نیں پئی مینوں اپنی پاپی عادت نوں مننا چاہی دا اے ، جدمَیں پہلوں ای یِسُوعؔ دے لہو اُتے ایمان رکھدا ہاں ؟ ایہہ سچ ہیگا اے پئی میرے وچ کُجھ غلطیاں نیں ، پر مَیں ایناں پاپی نئیں ہیگاپئی مَیں اپنیاں پاپاں دےسببوں خُدا ولوں سزا دا حقدار ہوواں ۔مَیں نئیں سمجھدا پئی میرا ہر خیال ، ہر ارادہ تے ہر کم اینا پاپی اے پئی مَیں سزادا حقدار ہوواں ۔“جے تُسی حالے ایہو ای سوچدے پئے او تاں تہانوں سمجھ لینا چاہی دا اے پئی تُسی او س فریسی وانگر بوہت وڈی غلطی کردے پئے او ۔ تُسی اپنے آپ نوں ایناں دلوں وڈا خیال دے کے بوہت وڈی غلطی کردے پئے او ۔
خُدا دا کلام صاف طریقے نال دسدا اے پئی پاپ دی مزدوری موت اے ۔ خُدا دی نگاہ وچ ، ہر پاپ اِکو جیہا اے، بھاویں اوہ نکا ہوئے یا وڈا۔ کوئی وی بندہ جیہڑا خُدا دی نگاہ وچ کوئی وی پاپ رکھدا ہوئے ، بھاویں اوہ ساریاں پاپاں وچوں سب توں نکا ای کیوں نا ہوئے ، اوہنوں ایس پاپ دی سزا دتی جاوے گی تے اوہنوں دوزخ دی اگ وچ سُٹیا جائے گا ۔ ایس توں کوئی فرق نئیں پیندا پئی تہاڈے پاپ کِنے وڈے یانِکے نیں؛ جد تیکر تُسی کوئی وی پاپ رکھدے او ، تُسی پاک خُدا دی نگاہ وچ کسے دوجے پاپی وانگر ای او ۔
اِنج کیوں اے ؟ ایہہ ایس لئی ہیگا اے پئی خُدا آپ پاک اے ، تے ایس لئی اوہ کسے وی پاپ نوں جر نئیں سکدا بھاویں تُسی اپنیاں پاپاں نوں کِنے ای ڈاہڈے یا معمولی سمجھو ۔ ایہہ ایس لئی ہیگا اے پئی خُدا نوں بغیر کسے رُکاوٹ دے ہر پاپ دی سزا دینی چاہی دی اے ۔
جد اسی سارے ایمانداری نال اپنیاں زندگیاں نوں خُدا دے اگے بے پڑدہ کردے آں ، تاں ساڈے وچوں کوئی وی ایہہ دعویٰ نئیں کر سکدا پئی اوہنے صرف کُجھ پاپ کیتے نیں ۔ جے تُسی آکھدے او پئی تُسی صرف کُجھ پاپ کیتے نیں تاں خورے تُسی اپنے آپ نوں گھٹوگھٹ جگ دے معیار دے مطابق نیک سمجھو ۔ پر تُسی ایہہ صرف ایس لئی آکھدےپئے او پئی تہاڈا خُدا دی کچہری تے پاپ دی سزا دے بارے خیال بالکل غلط اے ، جویں پئی تہانوں پتہ نئیں ہیگا پئی خُدا کِنا ں سخت اے ۔ دوجیاں اکھراں وچ ، تُسی اپنے آپ نوں خُدا دے معیار دی بجائے اپنے معیار تے اپنی مَشغُولِیَت دی نِیہ اُتے پرکھدے پئے آں ، تے ایسے سببوں تُسی ڈاہڈی غلطی کردےپئے او ۔ ایس لئی تہانو ں خُدا دی شریعت دے اگے اپنے آپ نوں غیر حمایتی طریقے نال پرکھنا چاہی دا اے ، اپنے آپ تو ں پُچھنا چاہی دا اے ، ”مَیں خُدا دی نگاہ وچ کِنج دا وکھالی دیندا ہاں؟جد خُدا میرے ول ویکھدا اے تاں کیہ مَیں ایہو جیہدے بندے وانگر ظاہر نئیں ہوندا جیہڑا سزا دا حقدار اے؟ کیہ مَیں اینے بے گنت پاپ نئیں کیتے جیہڑے لازمی مینوں ویلے کویلے دوزخ وچ گھل دین گے ؟ “ایس طرح ، تہانوں خُددے اگے اپنے آپ نوں غیرجانبداروانگر پرکھنا چاہی دااے تے صاف طریقے نال جاننا چاہی دا اے پئی تُسی آپ اِک پاپی او جیہڑا اپنیاں پاپاں دی مزدوری لئی دوزخ دی اگ وچ سُٹے جان دا حقداراے ۔
تہاڈے لئی ایہہ مننا بوہت لازمی اے ہیگا اے پئی جیہڑا کُجھ وی ایمان نال نئیں کیتا گیا اوہ خُدا دے اگے اِک پاپ اے (رومیوں ۱۴:۲۳)، پئی تُسی آپ ایہو جیہے پاپ ہر ویلے کردے رہندے او ، تے ایہہ پئی تہانوں ایہناں پاپاں دی سزا دتی جائے گی ۔ ایہدے بعدوں ای تُسی مکتی دی سچیائی دا احساس کر سکدے او تے سمجھ سکدے او پئی خُداوند نے تہاڈے ورگے بدکار پاپی نوں تہاڈیاں ساریاں پاپاں توں اسمانی ، ارغوانی تے لال رنگ دے دھاگےتےمہین وٹےہوئے کتان دے راہیں بچایا اے ،تے ایہہ ایسے ویلے ہیگا اے پئی تُسی پاپ دی معافی حاصل کر سکدے او ۔
جویں پئی اسی خُدا دے کلام نوں ویکھدے آں جیہڑا خیمۂ اِجتماع دی تفصیل نال وضاحت کردا اے ، اسی بچ نئیں سکدے سگوں ہیٹھاں لکھے ہوئے دا اقرار کر سکدے آں : ”خُداوند ، سچ مُچ سانوں ساریاں نوں ساڈیاں پاپاں لئی قصور وار ٹھہرایا جانا سی ، ایس لئی پئی اسی ہر ویلے پاپ کرن توں بچ نئیں سکدے ۔ ایہدے باوجود ،تُسی بپتسمہ لے کے تے سانوں بچاؤن لئی لہو وگا کے سانوں ساڈیاں ساریاں پاپاں تے سزا توں کامل طریقے نال مکتی دتی اے ۔ صرف پانی تے رُوح دی تہاڈی خوشخبری دی سچیائی اُتے ایمان رکھ کے ، اسی اپنیاں ساریاں پاپاں تے سزا توں بچ سکدے آں۔ اصل وچ ساڈا ساریاں دا نصیب دوزخ وچ سُٹیا جانا سی ۔ پر تہاڈا شکر اے پئی اسی قربانی دے نظام اُتے ایمان رکھ کے اپنیاں ساریاں پاپاں توں بچ گئے آں جیہڑا تُسی قیم کیتا سی ۔ سانوں یقین اے پئی ایہہ مکتی دا انعام اے جیہڑا تُسی سانوں دتا اے ۔ایس طرح دے حیران کرن والے فضل دے اگے اسی جیہڑا کُجھ کر سکدے آں اوہ صرف پانی تے رُوح دی خوشخبری اُتے ایمان رکھنا تے تہاڈا شکریہ ادا کرنااے۔“
ایس جگ وچ ہن وی بے گنت لوک نیں جیہڑے حالی تیکر مسیح دی راستبازی وچ نئیں آئے ۔بوہت سارے لوک ہُن وی مکتی دی سچیائی نوں نئیں جان دے ، ایہہ نئیں سمجھدے پئی خُداوند نے اسمانی ، ارغوانی تے لال رنگ دے دھاگے دی سچیائی دے راہیں ہراِک پاپی نوں جگ دیاں ساریاں پاپاں توں بچایا اے ۔ ایہناں لوکاں نوں پتہ نئیں ہیگا اےپئی اوہ کِنے بدکار نیں ، تے اوہ آپ اپنیاں پاپاں دی سزا دے حقدار نیں ، بھاویں اوہ ہر ویلے بے گنت پاپ کردے رہندے نیں تے اپنیاں پاپاں لئی سزا جرن والے ہون گے ، پر اوہ ایہہ احساس نئیں کردے پئی اوہ آپ بھٹکے ہوئے پاپی نیں ،تے اوہ صرف اپنے آپ نوں فریب دیندے پئے نیں ۔ ایہدے علاوہ ، اوہ غلطی نال سوچدے نیں پئی اوہ سچ مُچ خُدا دے اگے چنگے کم کردے پئے نیں ،تے اوہ اپنیاں نیکیاں دا وکھالا کرن دے بوہت شوقین نیں ۔ جد اوہ خُدا کول جاندے نیں، تاں اوہ خُدا دی راستبازی دی بجائے اپنی راستبازی نوں ظاہر کردیاں ہویاں جھکدے نئیں ۔ اپنے آپ وچ راستبازبنن دے گھمنڈ وچ ، اوہ سمجھدے نیں پئی اوہ دوزخ وچ نئیں جان گے بھاویں اوہ پاپ رکھدےہون۔ اوہ ایس گل اُتے پورا بھروسہ رکھدے نیں پئی اوہ کدی دوزخ وچ نئیں جان گے ، اپنے آپ ایہہ سوچدیاں ہویاں پئی اوہ صرف تھوڑےجیہے پاپ رکھدے نیں ، ایس لئی اوہناں نوں صرف ایہناں پاپاں دی ای معافی پاؤن دی لوڑ اے ۔
اصل وچ سارے جگ وچ بوہت سارے مسیحی ایہو جیہے نیں جیہڑے ایہہ سمجھدے نیں پئی بھاویں اوہ یِسُوعؔ اُتے ایمان رکھدےنیں، فیر وی اوہ اپنے نال کُجھ پاپ باقی رکھدے نیں ،تے ایہہ پئی صرف توبہ دیا ں دعاواں کر کے ایہناں پاپاں نوں سوکھے جیہے دھویا جا سکدا اے ؛ تے ایہہ پئی اوہ اخیریں کسے نا کسے طرح پاک لوک بن جان گے ؛ تے ایہہ پئی اخیریں اوہ سارے اسمانی بادشاہی وچ جان گے ۔ بوہت سارے مسیحی ایس گل دا بھروسہ رکھدے نیں پئی بھاویں اوہ پاپی رہن گے ، خُدا اوہناں دا انصاف نئیں کرے گا ایس لئی پئی اوہ یِسُوعؔ اُتے ایمان رکھدے نیں ۔ پر ایس گل توں بالکل کِنے ای لوک قائل کیوں نا ہون،اوہناں ساریاں دا نصیب دوزخ دی بلدی ہوئی اگ اے ۔ جے تُسی ایہہ سوچدے او پئی تُسی دوزخ وچ نئیں جاؤ گے بھاویں تُسی سچ مُچ مکتی دے ایس بھیت نوں نئیں جان دے جیہڑا خیمۂ اِجتماع دے اسمانی ، ارغوانی تے لال رنگ دے دھاگےتےمہین وٹےہوئے کتان وچ ظاہر ہوندا اے ، یا جے تُسی اوہدے بپتسمے اُتے ایمان رکھیوں بغیر صرف ایہہ ایمان رکھدے او پئی یِسُوعؔ مسیح تہاڈے بدلے سولی اُتے مرگیا سی ، تاں تہاڈا ایمان کچا تے ادھورااے ۔ ایسے طرح ،جے تُسی سوچدے او پئی تُسی دوزخ وچ نئیں جاؤ گے بھاویں تہاڈا دل پاپ نال بھریا رہندا اے ، ایہہ سارا کُجھ ایس لئی اے پئی تُسی کسے نا کسے طرح یِسُوعؔ مسیح نوں اپنا مکتی داتا من دے او ، تاں تُسی اصل وچ خُدا دی پاکیزگی نوں للکاردے پئے او ۔ دوزخ اوہ تھاں اے جیہڑی بالکل ایہو جیہے گھمنڈی لوکاں لئی تیار کیتی گئی اے جیہڑے ایہہ نئیں من دے پئی اوہناں نوں خُدا دی سزاجرنی پوے گی ۔
ایہہ اِک دُکھ والی گل اے پئی بوہت سارے پاپی اینے بے عقلے رہندے نیں پئی اوہناں نوں احساس تیکر نئیں ہوندا پئی اوہ سِدھے دوزخ ول جاندے پئے نیں ۔ پر جویں پئی پاک کلام دسدا اے ، ’’ ایس لئی پئی سبھناں گُناہ کِیتا تے خُدا دے جلال توں رَیہہ جاندے نیں‘‘(رومیوں ۳:۲۳)،ہر کسے نوں لازمی دوزخ وچ سُٹیا جانا چاہی دا اے ، ایس لئی پئی ہر کوئی پاپی اے ۔ خُدا دا جلال کوئی ہورنئیں سگوں آپ یِسُوعؔ مسیح اے جیہڑا پانی تے رُوح نال آیا ۔ بھاویں بوہت چوکھے مسیحی یِسُوعؔ اُتے ایمان لیاؤن دا دعویٰ کردے نیں ، پر اوہناں وچوں بوہتے ہُن وی غیر مکتی یافتہ نیں ایس لئی پئی اوہ سچ مُچ ایہہ نئیں سمجھدے پئی یِسُوعؔ پانی ، لہو تے رُوح دے راہیں آیا ۔ جے تُسی ایس یِسُوعؔ مسیح نوں نئیں جان دے تے نا ای ایس اُتے ایمان رکھدے او جیہڑا اسمانی ، ارغوانی تے لال رنگ دے دھاگےدے راہیں آیا، تاں تُسی حالے تیکر اپنیاں ساریاں پاپاں توں نئیں دُھلے ،تے ایس لئی تُسی خُدا دے ایس ودھیا گھر وچ جا نئیں سکدے ۔ تےجے تُسی خُدا دے گھر وچ نئیں آسکدے ، تاں ایہدا مطلب صرف ایہہ ہو سکدا اے پئی خُدا دی بادشاہی وچ جان توں بوہت دُریڈے ، تہانوں اخیریں دوزخ وچ سُٹیا جائے گا ۔
ایس لئی ، ایس گل توں ہٹ کے پئی تُسی مسیحی ہیگے او یا نئیں پئی تُسی یِسُوعؔ مسیح نوں اپنا مکتی داتا منن دااقرار کردے پئے او ، جے تُسی سچ مُچ نویں سریوں نئیں جمے ، تاں تہانوں ایہہ مننا چاہی دا اے پئی تُسی اپنیاں پاپاں دے سببوں دوزخ وچ پھسے ہوئےاو ،تےایس نقطے توں یِسُوعؔ مسیح اُتے ٹھیک طریقے نال ایمان رکھدے او ۔ خُدا دی شریعت صاف طریقے نال آکھدی اے پئی پاپ دی مزدوری موت اے ، تے تہانوں لازمی ایس خُدائی قانون نوں مننا چاہی دا اے ،تے بغیر کسے اَڑی دے ایس اُتے ایمان رکھنا چاہی دا اے ۔ صرف ایس ویلے جد تُسی من دے او پئی تُسی اپنیاں پاپاں لئی سِدھے دوزخ ول جاندے پئے او تُسی پانی تے رُوح دی خُدا دی دِتی ہوئی خوشخبری اُتے ایمان رکھ سکدے او ۔ خُدا دا مکتی دا انعام پاپاں دی معافی اے ، تے ایہہ انعام صرف اوہناں لوکاں نوں دِتا جاندا اے جیہڑے یِسُوعؔ مسیح دے بپتسمے ، سولی اُتے اوہدی موت ، تے اوہدے جی اُٹھن اُتے ایمان رکھدے نیں ۔
ساڈی مکتی تے ساڈیاں ساریاں پاپاں تو ں چھٹکارہ ساڈے ولوں نئیں مِلیا، سگوں ایہہ ساڈے لئی خُدا دا انعام اے ۔ ساڈے وچوں کوئی وی ایس جگ وچ اپنی مرضی نال نئیں جمیا ، سگوں ایہہ خُدا ای اے جنہے سانوں ایس زمین اُتے پیدا ہون دی اجازت دِتی تاں پئی اوہ سانوں اپنے نیانے بنا سکے ۔ ایہہ سمجھدیاں ہویاں پئی خُدا نے سانوں ساریاں نوں اپنی مکتی تیکر اَپڑن دے لائق بنایا اے جے اسی صرف یِسُوعؔ دے بپتسمے ، سولی اُتے اوہدی موت ، تے اوہدے جی اُٹھن اُتے ایمان رکھدے ہوئیے، ساڈے وچوں ہر کسے نوں لازمی ایس سچیائی اُتے ایمان رکھنا چاہی دا اے ۔
اپنی شریعت نوں قیم کرن دے بعد پئی پاپ دی مزدوری موت اے ، خُدا نے ساڈے خُداوند یِسُوعؔ مسیح وچ سانوں سدا دی زندگی دین دا منصوبہ و ی بنایا ۔ خُدا نے سوختنی قربانی دی قربانگاہ کِکر دی لکڑ نال بنان ، ایہنوں پِتل نال مَڑھن تے ایس اُتے اگ بالن دا حکم دتا ۔ ایہدا مطلب ایہہ ہیگا اے پئی پاپ دی مزدوری موت اے ، تے ایہہ پئی ہر اِک پاپ دی سدا لئی سزا دِتی جانی چاہی دی اے ۔ خُدا دی ایہو جیہی قیم کیتی ہوئی شریعت نا تاں ساڈے وچوں کوئی توڑ سکدا اے تے نا ای بدل سکدا اے ۔ ایس لئی سانوں ایہہ منناچاہی دا اے پئی اسی آپ وچارے پاپی آں تے مکتی دی سچیائی نوں ایمان دے راہیں اپنیاں دلاں وچ قبول کردے آں ۔ ایہہ ساڈے ساریاں لئی بوہت ضروری اے پئی اسی ہر ایس شریعت نوں منیے تے ایس اُتے ایمان رکھیے جیہڑی خُدا نے ساڈے لئی قیم کیتی تے پوری کیتی اے ۔
جے تُسی سچ مُچ خیمۂ اِجتماع دے بارے واضح سیانف تے ٹھیک ایمان رکھدے او ، تاں خُدا نا صرف تہانوں تہاڈیاں ساریاں پاپاں تے ایہناں پاپاں دی سزا توں بچائے گا ، سگوں اوہ تہانوں اپنیاں ساریاں نعمتاں وی دیوے گا ۔ پر ، جے ، تُسی اِک واری وی اپنیاں پاپاں توں سنجیدگی نال غور کرن توں مکردےاو ، سگوں ایہدی بجائے اپنی اَڑی نال ایہہ سوچدے او پئی تُسی خورے ای کوئی پاپ کیتا ہوئے ، پئی تُسی کدی کوئی معاف ناکیتا جان والا پاپ نئیں کیتا ، یا ایہہ پئی تُسی جیہڑے کُجھ پاپ کیتے نیں اوہ تہاڈیاں نیکیاں دے برابر کُجھ نئیں جیہڑیاں تُسی کیتیاں نیں ، تاں تہاڈی رُوح خُدا دے غصے دی شریعت وچ پھس جائے گی ۔
یِسُوعؔ مسیح آپ خُد اے ،تےتُسی اپنیاں ساریاں پاپاں توں چھُٹ سکدے او جے تُسی مسیح نوں اپنا مکتی داتا من دے او تے خُدا دی راستبازی اُتے بھروسہ رکھدے اوجیہڑی خُدا وند دے راہیں پوری ہوئی سی ؛ تے اِک واری جد تُسی پانی تے رُوح دی خوشخبری اُتے ایمان رکھ کے اپنیاں ساریاں پاپاں توں چھُٹ جاندے او ، تاں تُسی لازمی سدا لئی خُدا وچ وسوں کر ن لئی آ جاؤ گے ۔
مَیں یِسُوعؔ مسیح دا شکریہ ادا کردا ہاں پئی اوہنے سانوں ساڈیاں ساریاں پاپاں تے موت توں مکتی دی سچیائی دے راہیں مکتی دتی جیہڑی خیمۂ اِجتماع دے قربانی دے نظام وچ لُکی اے ۔
Copyright © 2021 by The New Life Mission