Search
پنجابی
پنجابی
کورونا وائرس تے عالمگیر ڈاک سروس وچ رکاوٹ دے سببوں، اَسیں اپنی ’مُلوں بغیر چھاپی ہوئی کتاب دی سروس‘ نوں تھوڑے چِر لئی بند کر دے پئے آں۔
ایس صورتحال دے چانن وچ اسیں ایس ویلے تہانوں کتاباں گھلن دے قابل نئیں ہیگے آں۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔

خطبے

مضمون 11: خیمۂ اِجتماع

[11-32] وڈےکاہن نُوں مخصُوص کرن لئی خطا دی قربانی <خروج ۲۹:۱-۱۴>

وڈےکاہن نُوں مخصُوص کرن لئی خطا دی قربانی
>خروج ۲۹:۱-۱۴>
”تے اوہناں نُوں پاک کرن واسطےپئی ا وہ میرے لئی کاہِن دی خِدمت نُوں پوراکرن تُوں اوہناں واسطے ایہہ کریں پئی  اِک وچھا تے دو بے پاپ برّے لویں ۔تے بے خمِیری روٹی تے بے خمِیرے کُلچے جِنہاں نال  تیل مِلیا ہوئےتے تیل دی چوپڑی ہوئی بے خمِیریاں چپاتیاں لویں۔ا یہہ ساریاں کنک دے میدے دیاں بناویں۔تے ایہناں نُوں اِک ٹوکری وچ رکھ کے اوس ٹوکری نُوں وچھےتےدوآں برّیاں سمیت اَگے لے آویں۔فیر ہارُون تے اوہدیاں پُتراں نوں خَیمۂِ اِجتماع دے پھاٹک اُتے لیا کے اوہناں نُوں پانی نال  نُہاوِیں ۔تےا وہ بانا لے کے ہارُونؔ نُوں کُرتاتے افُود دا جُبّہ تے افُود تے سِینہ بنھ پواوِیں تے افود دا کارِیگری نال  بنیا ہویا کمر بنھ اوہنوں بنھ دیویں۔تےپگ نُوں اوہدے سراُتے رکھ کے اوس  پگ  اُتےپاک تاج لا دیویں۔تے مَسح کرن دا تیل لے کے اوہدے سر اُتےلُدیں تے اوہنوں مَسح کریں۔فیر اوہدے پُتراں نُوں اَگے لیا کے اوہناں نُوں کُرتے پواویں۔تے ہارُونؔ تے اوہدیاں پُتراں دے کمر بنھ لپیٹ کے اوہناں نُوں پگاں بنھیں تاں پئی  کہانت دے عہدےاُتے سدا لئی اوہناں دا حق رہوے تے ہارُونؔ تے اوہدیاں پُتراں نُوں مخصُوص کریں۔فیر تُوں اوس وچھے نُوں  خَیمۂِ اِجتماع دے اَگے لیاویں تےہارُونؔ تےاوہدے پُتر اپنے ہتھ اوس وچھے دے سِر اُتے رکھن۔فیر اوس وچھے نُوں خُداوند دے اَگے خَیمۂِ اِجتماع دےپھاٹک اُتے ذبح کریں۔تے اوس وچھے دے لہووِچوں کُجھ لے کے اوہنوں اپنی اُنگل نال قُربان گاہ دیاں  سِنگاں اُتے لاویں تے باقی سارا لہو قُربان گاہ دے پاوےاُتے ڈوہل دیویں۔فیر اوس چربی نُوں جِہدے نال آندراں کجیاں رہندیاں نیں تے جگر دی اُتلی  جِھلّی نُوں تے دوآں گُردیاں نُوں تے اوہناں دی اُتلی چربی نُوں لے کےسارا قُربان گاہ اُتےساڑیں۔پر اوس وچھے دے گوشت تےکھل تےگوبر نُوں خَیمہ گاہ دے باہر اَگ نال ساڑ دیویں ایس لئی پئی ایہہ خطا دی قربانی اے۔“
 
 
اَج اسی اپنا دھیان  وڈے کاہن دی مخصوصیت ول لاؤندے پئے آں ۔  ایتھے خُدا نے مُوسیٰ نوں حکم دِتا پئی ہارون تے اوہدیاں پُتر اں نوں تفصیل نال کویں مخصُوص کیتا جائے ۔ آیت ۹ وچ اکھر ”مخصُوص کرنا “دا مطلب اے پاک کرنا ، تیار کرنا ، ناویں لاؤنا ، عزت کرنا ، یاپاک لوکاں وانگر سمجھنا اے ۔ دوجیاں اکھراں وچ ، مخصُوص ہون دا مطلب اے خُدا ولوں پاک تے وقف ہونا ۔ سو، ”سربراہ کاہن وانگر مخصُوص کیتے جان “دا مطلب اے ”وڈے کاہن نوں اختیارات  فرائض دِتے جان لئی وکھ کیتا جانا ۔“خُدا نے ہارون تے اوہدیاں پُتراں نوں  وڈے کاہن دا تے کہانت دا حق دِتا ، جنہے اوہناں نوں اپنیاں لوکاں نوں پاپاں دی معافی دین  دے لائق بنایا ۔
خُدا نے مُوسیٰ نوں حکم دِتا پئی ہارون نوں وڈے کاہن دا بانا پوائے تے اوہدے سر اُتے پگ پوائے تےاوہدیاں پُتراں نوں کُرتے پوائے ۔ فیر ہارون نوں وڈے کاہن وانگر تے اوہدیاں پُتراں نوں کاہناں وانگر مخصُوص کرن لئی ، اوہناں نوں اوہناں دی مخصُوصیت لئی اِک وچھاتے دو بے پاپ برّے لیاؤنے پیندے سن ۔ وڈے کاہن دا  سب توں خاص فرض فدیہ دیہاڑے ساریاں اسرائیلیاں دیاں پاپاں دی معافی لئی غلطی دیاں قربانیاں چڑھاؤنا سی ۔ تے اِنج کرن لئی ، آپ ہارون تے اوہدیاں پُتراں نوں سب توں پہلوں اوہناں دیاں اپنیاں پاپاں توں پا ک ہونا پیندا سی ، تے ایسے لئی اوہناں نوں اوہناں دی مخصُوصیت دے دن پہلوں اپنے لئی خطا دی قربانی چڑھاؤنی پیندی سی ۔
سانوں ایتھے جیہڑی شے نوں سمجھنا چاہی دا اے اوہ ایہہ ہیگی اے پئی وڈے کاہن نوں وی قربانی دیاں پشُوآں دے سر اُتے ہتھ رکھنا پیندا سی ایس توں پہلوں پئی اوہ اوہناں نوں ذبح کرے  تاں پئی اوہ اوہناں دا لہو خُدا اگے پیش کر سکے ، ایہہ سارا کُجھ اوس قربانی دے نظام مطابق سی جیہڑا خُدا نے قیم کیتا سی ۔ ست دِناں تیکر ، وڈے کاہن نوں خطا دی قربانی نال سوختنی قربانیاں ، ہلاؤن دا ہدیہ تے چُکے جان دا ہدیہ ورگیاں قربانیاں اوہدی مخصُوصیت لئی دینیاں پیندیاں سن ۔
بالکل اوہناں  قربانیاں وانگر جیہڑیاں آپ وڈے کاہن لئی تے اوہدے خنوادے لئی دِتیاں جاندیاں سن ، اوہنوں اسرائیلیاں دیاں پاپاں نوں وی اوہناں نوں ذبح کرن توں پہلوں اپنیاں ہتھاں دے رکھے جان نال قربانی دیاں پشُوآں دیاں سراں اُتے لدنا پیندا تے ایہناں دا لہو کڈھنا پیندا سی ۔ وڈے کاہن وانگر خُدا دی خدمت کرن دے فرض لئی ، اوہنوں تفصیل نال سِکھنا پیندا سی پئی اوہدیاں لوکاں دیاں پاپاں دی معافی لئی قربانیاں کویں چڑھائیاں جان۔ ایہہ پئی وڈے کاہن نے  خطا دی قربانی پہلوں اپنیاں پاپاں نوں دھون لئی پیش کیتی ، ایہدا مطلب ایہہ ہیگا اے پئی اوہنوں سکھایا جاندا پیا سی پئی اوہ اپنیاں لوکاں لئی قربانیاں کویں پیش کرے — یعنی ، قربانیاں دیاں سراں اُتے اوہدیاں ہتھاں دے رکھے جان ، ایہناں دا لہو کڈھن تے ایس لہو نوں سوختنی قربانی دی قربان گاہ اُتے لاؤن ، تے باقی لہو نوں زمین اُتے ڈوہلن نال ۔
ایتھے ، وڈے کاہن نوں ایہہ یاد رکھنا پیندا سی پئی اپنیاں پاپاں تے اپنیاں لوکاں دیاں پاپاں  نوں لدن لئی ؛ اوہنوں  قربانی دے سر اُتے اپنے ہتھ رکھنے پیندے سن ۔ جویں پئی خروج ۲۹: ۱۰-۱۲ دسدا اے” فیر تُوں اوس وچھے نُوں  خَیمۂِ اِجتماع دے اَگے لیاویں تےہارُونؔ تےاوہدے پُتر اپنے ہتھ اوس وچھے دے سِر اُتے رکھن۔فیر اوس وچھے نُوں خُداوند دے اَگے خَیمۂِ اِجتماع دےپھاٹک اُتے ذبح کریں۔تے اوس وچھے دے لہووِچوں کُجھ لے کے اوہنوں اپنی اُنگل نال قُربان گاہ دیاں  سِنگاں اُتے لاویں تے باقی سارا لہو قُربان گاہ دے پاوےاُتے ڈوہل دیویں۔“
وڈے کاہن تے اوہدیاں پُتراں نوں حکم دتا گیا سی پئی اوہ اپنے ہتھ لازمی طریقے نال  وچھے دے سر اُتے رکھن ، یعنی اپنے قربانی دے پشُو اُتے ۔ ایس لئی پئی جد ہارون وڈا کاہن تے اوہدیاں پُتراں نیں قربانی دے پشُو دے سر اُتے اپنے ہتھ رکھے تاں اوہناں دے سارے پاپ اوس اُتے لد ے گئے سن ۔ تے ایس لئی پئی ایس قربانی نے ہتھاں دے رکھے جان نال وڈے کاہن تے اوہدیاں پُتراں دیاں پاپاں نوں قبول کیتا سی ، ایہنوں لہو وگاؤنا تے مرنا پینا سی ۔ ایہدے بعدوں ، وڈا کاہن اوہدا لہو کڈھدا ، اوہد ا لہو  سوختنی قربانی دی قربان گاہ دیاں سِنگاں اُتے لاؤندا تے باقی بچ جان والے لہو نوں زمین اُتے  ڈوہل دیندا سی ۔ فیر اوس چربی نوں جیہدے نال آندراں کجیاں رہندیاں نیں تے جگر دی اُتلی جھِلّی نوں تے دوآں گردیاں نوں تے اوہناں دی اُتلی چربی نوں لے کے سارا قُربانگاہ اُتے ساڑدا ۔
کسے دیاں پاپاں دے فدیے لئی خطا دی قربانی وانگر عام لوکاں وچوں جنہے نا جان دیاں ہویاں پاپ کیتا ہوندا، اوہ اپنی خطا دی قربانی لئی بکری دا اِک بچہ ، بے پاپ مادہ اپنے پاپاں لئی لیاؤندا  جیہڑے اوہنے کیتے سن ۔ ”تےاوہ اپنا ہتھ خطا دی قربانی دے پشُودے سر اُتے رکھّے تےخطا دی قربانی دے اوس پشُو نوں سوختنی قُربانی دے بدلے ذبح کرے۔تے کاہِن اوہدا کُجھ لہو اپنی اُنگل اُتے لے کے اوہنوں سوختنی قُربانی دے مذبحےدیاں سِنگاں اُتے لائےتےاوہدا باقی سارالہو مذبحےدے پاوےاُتےڈوہل دیوے۔تےاوہ اوہدی ساری چربی نُوں وکھ کرے جویں سلامتی دے ذبیحےدی چربی وکھ کیتی  جاندی اے تے کاہِن اوہنوں مذبحےاُتے راحت انگیز خُوشبُو لئی  خُداوند لئیساڑے۔ ایس طرح کاہِن اوہدے لئی فِدیہ دیوے تاں اوہنوں  مُعافی مِلے گی۔‘‘(احبار ۴: ۲۹-۳۱)۔
ایہہ ہتھاں دا رکھیا جانا تے قربانی دا لہو وگاؤنا خُدا ولوں مقرر کیتے گئے قربانی دے نظام لئی لازمی شیواں سن ۔ ایتھوں تیکر پئی جگ بناؤن توں پہلوں ، خُدا نے ایہہ ارادہ یِسُوعؔ مسیح وچ قیم کیتا سی تاں پئی ساڈیاں ساریاں پاپاں نوں اسمانی، ارغوانی تےلال رنگ دے دھاگےتےمہین وٹے ہوئے کتان وچ لُکی ہوئی سچیائی نال معاف کیتا جا سکے ۔ خُدا نے اسرائیلیاں نال وعدہ کیتا پئی جد وی اوہ اوہدے اگے سوختنی قربانی چڑھاؤن گے تاں اوہ اوہناں نال ملے گا ۔ خروج۲۹ : ۴۲ دسدااے،”ایہوجیہی ای سوختنی قُربانی تُہاڈی پیڑھیوں پیڑھی خَیمۂِ اِجتماع دے پھاٹک اُتے خُداوند دے اَگے سدا ہویا کرے۔ اوتھے مَیں تُہانوں مِلیاں کراں گا تے تیرے نال گلاں کراں گا۔“سوختنی قربانی جیہڑی کاہن ہر سویرے تے شامی چڑھاؤندے سن اوہ قربانی اے  جیہڑی  پیڑھیوں پیڑھی ایتھوں تیکر پئی ساڈے راہیں وی چڑھائی جاندی اے ، اسرائیل دے  رُوحانی لوک جیہڑے پانی تے رُوح دی خوشخبری اُتے ایمان رکھ کے  پاپ دی معافی پا چُکے نیں ۔ خُدا سانوں دسدا پیا اے پئی اوہ ایہناں قربانیاں دےراہیں سانوں مِلےگا ۔
 
 

وڈے کاہن ولوں چڑھائی جا ن والی سوختنی قربانی دا کیہ مطلب اے؟

 
ایس لئی پئی قربانی دے پشُو نے اوہناں پاپیاں دیاں ساریاں بدکاریاں نوں قبول کیتا سی جنہاں نیں  اوہدے سر اُتے اپنے ہتھ رکھے سن ، ایس لئی ایہنوں اوہناں بدلے مرنا سی تے اگ وچ سڑ کے سزا پاؤنی سی ۔ قربانی دےنظام دی خطا دی قربانی دے راہیں خُدا ساڈے توں جو چاؤہندا اے اوہ ایہہ ہیگا اے پئی اسی اقرار کرئیے ، ”ایس لئی پئی مَیں  خُدا دے اگے فلانا فلانا پاپ کیتا سی ، لازمی مینوں پاپ دی ایہو جیہی سزا ملنی چاہی دی اے۔“ساڈیاں پاپاں نوں دھون لئی ، خُدا دی مکتی دی شریعت دے مطابق ، سانوں لازمی اپنے ہتھ اپنی قربانی دے پشُو دے سر اُتے رکھنے چاہی دے نیں ، ایہدا لہو کڈھنا چاہی دا اے ، ایس لہو نوں سوختنی قربانی دی قربان گاہ دیاں سِنگاں   اُتے لاؤنا چاہی دا اے ، تے باقی لہو نوں زمین اُتے ڈوہل دینا ، ایہدا گوشت سوختنی قربانی دی قربانگاہ اُتے ساڑ دینا، تے ایس طرح خُدا دی راستبازی وچ فضل دے مطابق پاپاں دی معافی پاؤنی چاہی دی اے ۔
سب توں پہلوں ، سانوں لازمی خُدا دے اگے اوہناں ساریاں پاپاں نوں مننا چاہی دا اے جیہڑے اسی  اپنیاں دلاں تے کماں دوآں نال کیتے نیں ۔ سانوں ایہہ مننا چاہی دا اے پئی اسی اوہناں پاپاں دی سزا توں  بچ نئیں سکدے ۔ پر اسی خُدا دی کامل مکتی لئی بوہتا شکر ادا نئیں کرسکدے ۔ خُدا نے ساڈے نال اینی محبت کیتی پئی اوہنے اپنا اِکلا پُتر دے دِتا ۔ یِسُوعؔ مسیح نے اپنے بپتسمے دے راہیں ساڈیاں ساریاں پاپاں نوں  لے لیا تے سولی ُاتے اپنی موت نال ایہناں ساریاں پاپاں دا فدیہ دِتا تاں پئی جیہڑ اوی ایس اُتے ایمان لیائے فنا نا ہوئے سگوں سدا دی زندگی پائے ۔
قربانی دے نظام دا تقاضا ہیگا اے پئی قربانیاں ہتھاں دے رکھے جان تے  ایہناں دا لہو وگاؤن نال  چڑھائیاں جانیاں چاہیاں دی نیں ۔ ایہہ ایس ایمان دے ثبوت دی نشانی وکھاؤندا اے  جیہڑا ساڈیاں ساریاں پاپاں نوں معاف کردا اے ،تے ایس لئی سانوں لازمی ایس اُتے ایمان رکھنا چاہی دا اے ۔پئی ہر پاپی نے قربانی دے پشُو دے سر اُتے اپنے ہتھ رکھے یعنی ایس اُتے اوہدیاں پاپاں دا  لدیا جانا اے ۔ایتھوں تیکر پئی وڈےکاہن نوں وی اعتراف کرناپیندا، ”مَیں خُدا دے اَگے ایہو جیہے پاپ رکھدا ہاں ، تے ایس لئی مینوں لازمی موت دی سزا دِتی جانی  چاہی دی اے،“جداوہ خطا دی قربانی چڑھاؤندا ۔ پر ایہہ ایمان رکھن نال پئی خُدا سانوں پاپ توں مکتی  دین لئی فدیے دی قربانی دے چُکیا اے ، تے ایہہ پئی خُدا نے سانوں  ایس قربانی اُتے ایمان رکھ کے پاپ دی معافی پاؤن دے لائق بنایااے ، اسی مکتی پاسکدے آں ۔
خُدا نے آکھیا ، ”اوتھے مَیں تہانوں ملاں گا۔ “اوہنے ایہہ گل ناصرف وڈے کاہن سگوں ہر عام بندے نوں آکھی ، مطلب ایہہ ہیگا اے پئی خُدا ساڈے ساریاں دیاں پاپاں دی معافی دیوے گا تے ایس طرح  سانوں اپنے لوک بنائے گا ۔ فیر خُدا سانوں کویں مِلدا اے ؟ ایس لئی پئی خُدا کول ساڈے لئی مکتی دا منصوبہ اے ، اوہ لازمی صرف اوہناں لوکاں نوں مِلدا اے جیہڑے اوس قربانی دے نظام دے مطابق اپنے پاپ دیاں قربانیاں چڑھاؤندے نیں جیہڑا اوہنے قیم کیتا سی ۔ ایس لئی پئی خُدا چنگی طرح جان دا سی پئی انسان جماندرو پاپی نیں تے ایہہ پئی اوہ پاپ دے عادی وی نیں ، ایس لئی اوہ اپنی رحمت دے مطابق ساڈیاں ساریاں پاپاں نوں دھونا چاؤہندا سی جیہڑی اوہدے قربانی دے مکتی دے نظام وچ ظاہر ہوندی اے ، تے ایس طرح سانوں اپنی اولاد بناؤنا چاؤہندا سی ۔ ایہو ای سبب ہیگا اے پئی خُدا نے قربانی دا نظام قیم کیتا سی جیہدے راہیں اسرائیل دے بے گنت لوک اپنیاں پاپاں نوں اپنے قربانی دے پشُو اُتے لد سکدے سن جد اوہ اوہدے سِر اُتے اپنے ہتھ رکھدے سن ۔
اوہ طریقہ جیہدے نال اسرائیلی اپنیاں پاپاں نوں قربانی دیاں پشُوآں اُتے لددیندے سن اوہ ایس طرح ، ”ہتھاں دے رکھے جان“دے راہیں سی ۔ اسرائیلیاں نے بوہتی واری خُدا دی شریعت نوں توڑیا تے ہر طرح دے پاپ کیتے ۔ پر تاں پئی اوہ ”ہتھاں دے رکھےجان“ دے ایس طریقے نال اپنیاں ساریاں بدکاریاں نوں اپنیاں قربانیاں اُتےلد سکدے سن ، اوہ اپنیاں ساریاں پاپاں نوں دھون دے لائق سن ۔ ایسے دے راہیں خُدا اوہناں اسرائیلیاں نال وسدا سی جیہڑے اوس اُتے  ایمان لیاؤندے سن ،اوہ اوہناں دا خُدا بن سکدا سی ، اوہناں نوں اپنے لوک بنا سکدا سی ،اوہناں دی اگوائی کر سکدا سی تے اوہناں نوں اسمانی نعمتاں  دے نال نال ایس دھرتی دیاں ودھیا نعمتاں وی دے سکدا سی ۔ ایہہ ساریاں شیواں خیمۂ اِجتماع دے قربانی دے نظام اُتے اوہناں دے ایمان دے راہیں سچ ثابت ہو سکدیاں سن ۔
خیمۂ اِجتماع دے قربانی دے  نظام دے ایہو جیہے سارے حصے خُدانے پہلوں ای مقرر کر لَئے سن ، تے اسرائیلی خُدا ولوں مقرر کیتے گئے طریقے دے مطابق اپنی قربانی دے سر اُتے ہتھ رکھ کے اپنیاں ساریاں پاپاں نوں ایس اُتے لد سکدے سن تے اپنیاں ساریاں پاپاں توں دھل سکدے سن ۔ ایس لئی پئی خُدا نے اوہدے کول آؤن والیاں ساریاں لوکاں نوں  ایس لائق بنایا پئی اوہ اوہدے قیم کیتے ہوئے ہتھاں دے رکھے جان دی طاقت تے لہو وگاؤن اُتے ایمان رکھ کے اپنیاں پاپاں توں صاف ہو جان ، تے ایس سچیائی اُتے ایمان رکھن والے پاک خُدا نال چل سکدے سن ۔ ایس قربانی دے بِنا جیہڑی ہتھاں دے رکھے جان تے لہو وگاؤن دوآں نال  چڑھائی جاندی سی ، خُدا اسرائیلیاں نال نئیں رہ سکدا سی ۔ ایس توں ہٹ کے پئی اسرائیلی کِنے ای ادھورے سن تے اوہناں نیں کِنے ای پاپ کیتے سن، خُدا اوہناں نال فیر وی رہ سکدا سی ایس لئی پئی خُدا ولوں دتی گئی مکتی دی شریعت شریعی قربانی نال  بنائی گئی سی—پاپ دی قربانی دے سِر اُتے ہتھاں دا رکھیا جانا تے ایہدا لہو وگاؤنا۔ سو ، سانوں ساریاں نوں ایہہ سمجھنا تے ایمان رکھنا چاہی دا اے پئی خُدا ولوں سانوں اجازت دتی گئی پاپ توں مکتی ، قربانی دے پشُو دے سِر اُتے ہتھاں دے رکھے جان تے ایہدا لہو وگاؤن دوآں نال بنی اے ۔
کاہناں نوں ہر سویرے تے شامی سوختنی قربانیاں چڑھاؤنیاں پیندیاں سن ۔ اوہناں نوں انج کرنا پیندا سی ایس لئی پئی اپنیاں پاپاں لئی سویرے سوختنی قربانی چڑھاؤن دے بعدوں ، اوہ ساری دیہاڑی ہو ر وی  بوہت سارے پاپ کردے سن ، تے ایس لئی لازمی سی پئی اوہ شامی اِک ہور قربانی دے پشُو نوں چڑھا کے اپنیاں پاپاں نوں  ایس اُتے لد دے تے ایہناں نوں دوجی واری دھوندے ۔ ہر دن چڑھائیاں جان والیاں سوختنیاں قربانیاں نے اسرائیلیاں نوں  ایس عقیدے دی یاد دِلوائی جیہڑا چیتا رکھدا اے تے ایمان رکھدا اے پئی یِسُوعؔ ایس زمین اُتے آئے گا ، یوحنا بپتسمہ دین والے کولوں بپتسمہ لے کے جگ دیاں پاپاں نوں چُک لوے گا ، سولی اُتے مر جائے گا ،تے ایس طرح سارے جگ دیاں ساریاں پاپاں نوں مُکا دیوے گا ۔ ایسے طرح ، سانوں ساریاں نوں ہر سویرے تے شامی ایمان دی قربانی دینی چاہی دی اے ، ایس لئی پئی اسی ساری دیہاڑی ہر ویلے پاپ کردے رہندے آں ۔ ایمان دی ایہہ قربانی جیہڑی پرانے عہد نامے دے زمانے وچ دِتی جاندی سی اوہو ای اےجنہوں نویں عہد نامے دے زمانے وچ یِسُوعؔ دے یوحنا بپتسمہ دین والے کولوں لِئے جان والے بپتسمے تے اوہدے لہو وگاؤن اُتے ایمان رکھن نال دل دیاں ساریاں پلیتیاں نوں دھونا اے ۔
خُداباپ ساڈے نال اوس ویلے مِلدا اے جد اوہنوں ساڈیاں دلاں وچ  ایہہ ایمان دِسدا اے جیہڑا ایہہ من دا اے پئی ساڈے مکتی داتا یِسُوعؔ نے ساڈیاں ساریاں پاپاں نوں معاف کر دِتا اے ۔ پرانے عہد نامے دے قربانی  دے نظام مطابق ، یِسُوعؔ مسیح اپنے ویلے اُتے ایس زمین اُتے آیا تےنویں عہد نامے دے زمانے دے شروع وچ  یوحنا بپتسمہ دین والے دے راہیں بپتسمہ لے کے ساڈیاں ساریاں پاپاں نوں قبول کیتا (متی ۳ :۱۵)۔ ایہوای سبب اے پئی  یِسُوعؔ نے آکھیا، ’’تے یُوحنّا بپتِسمہ دین والےدیاں  دِناں توں لےکےہُن تیکراسمان دی بادشاہی اُتے زورازوری ہوندی اےتےزوراورلوک اوہنوں زبردستی مَل لیندے نیں‘‘(متی ۱۱: ۱۲)۔ایس خوشخبری دی سچیائی اُتے ایمان رکھن نال ، اسی اپنیاں ساریاں پاپاں توں ازاد ہو سکدے آں تے ایہناں توں کامل طریقے نال پاک صاف ہو سکدے آں ۔
ایس سچیائی توں ہٹ کے پئی یِسُوعؔ مسیح ایس زمین اُتےآیا سی ، لوک بے گنت پاپ کردےرہندے نیں تے اسی مسیحی ، یِسُوعؔ مسیح نوں جانن توں پہلوں تے بعد وچ وی بے گنت پاپ کردے رہندے آں ۔ پر یِسُوعؔ مسیح ایس زمین اُتے آیا ، تے اوہنے بپتسمے نال جیہڑا اوہنے یوحنا بپتسمہ دین والے کولوں لیا تے اپنی صلیبی لہو دے نال ، جگ دیاں ساریاں پاپاں نوں دھو دِتا ۔ سو ، جد خُدا نے آکھیا پئی اوہ سوختنی قربانی دے راہیں اسرائیلیاں نوں  مِلے گا ، تاں ایہدا مطلب ہیگا اے پئی خُدا اوہناں لوکاں  نوں مِلے گا جیہڑےپانی تے رُوح دی خوشخبری اُتے ایمان رکھدے نیں ۔ خُدا اوہناں لوکاں ناں محبت کردا اے جیہڑے ایس طرح ایمان رکھدے نیں پئی اوہ سچ مُچ اسمانی، ارغوانی تےلال رنگ دے دھاگےنال  اوہناں دیاں ساریاں پاپاں نوں مکا چُکیااے ۔ پراوہ لازمی  اوہناں لوکاں نال محبت نئیں کردا جیہڑے ایس  سچیائی نوں ردّ کردے نیں ۔
نویں عہد نامے دے ایس زمانے وچ ،پانی تے رُوح دی خوشخبری اُتے ایمان نال ای اسی خُدا نال مِل سکدے آں ۔ پرانے عہد نامے دے زمانے وچ ہر کسے نوں ، اسمانی، ارغوانی تےلال رنگ دے دھاگےتےمہین وٹے ہوئے کتان وچ ظاہر ہون والی سچیائی اُتے ایمان  نال ای پاپاں دی معافی مل سکدی سی ۔ ہتھاں دا رکھیا جانا تے لہو وگاؤنا —ایہناں دوآں خیالاں دا اکٹھیاں ہونا اِک کامل خوشخبری اے ۔  پرانے عہد نامے نے  خُدا دی کامل مکتی دی تفصیل نال پیشین گوئی کیتی ، تے نواں عہد نامہ  ایہناں پیشین گوئیاں دا پوراہونا تے وعدہ کیتی ہوئی خوشخبری دا پورا ہونا اے ۔ سو ، عبرانیوں ۱: ۱-۲ دسدااے، ”اَگّے خُدا نبیاں دی راہیں پئیو دادیاں نال کئیاں اٹکلاں تے کئیاں ونڈاں نال بول کے ۔ ایہناں  اخِیری دِناں وچ ساڈے نال پُتر دی راہیں بولیا ۔جِنہوں او س ساریاں شیواں دا وارِث بنایا۔تے اوہدی راہیں اوہنےجہان وی بنائے۔“
یِسُوعؔ بادشاہواں دا بادشاہ تے اپنی مرضی دا مالک خُدا اے ، پر ایہہ خُدا ایس زمین اُتے بندے دے بدن وچ آیا ، بپتسمہ لیا، سولی اُتے مویا ، مویاں وچوں دوجی واری جیوں پیا ، تے ایس طرح ساڈیاں ساریاں پاپاں  نوں دھو چُکیا تے سانوں پاپ دی ساری سزا توں بچا چُکیا اے ۔ ایس خوشخبری  اُتے ایمان رکھن نال جیہدے نال خُدا نے سانوں راستباز بنایا اے ، اسی  کامل ہوسکدے آں ۔ ہُن ساڈے لئی اپنیاں پاپاں دی معافی پاؤنا سوکھا ہو گیا اے جِنہوں اسی بوہت ہتھ پیر مار کے لبھیا سی ۔ اسی اپنیاں ساریاں پاپاں نوں  اینی جان مار کےدھونا چاؤہندے ساں، تے خُدا نے ایہناں نوں اِک ای واری سدا لئی ہتھاں دے رکھے جان نال  لہو وگاؤن دے قربانی دے نظام راہیں معاف کر دِتا اے — یعنی یِسُوعؔ  دے بپتسمے تے سولی اُتے اوہدے لہو وگاؤن دے راہیں ، جیہڑا پانی تے رُوح دی خوشخبری دی اصل طاقت اے (۱-یوحنا ۵: ۶-۸)۔ ایس لئی جد اسی ایمان رکھدے آں پئی خُدا نے ساڈیاں ساریاں پاپاں نوں کامل طریقے نال معاف کر دِتا اے پئی اوہ سانوں اپنے لوک بناؤندا اے تے سانوں مِلدا اے ۔
 
 

ہتھاں دے رکھے جان دی لوڑ

 
احبار ۱: ۱-۴ آکھدا اے،”تے خُداوند نے خَیمۂِ اِجتماع وچوں مُوسیٰ نُوں بُلاکےاوہنوں آکھیا۔ اِسرائیلیاں نوں آکھ پئی  جد تُہاڈےوچوں کوئی خُداوند لئی چڑھاوا چاھڑے۔ تاں تُسی چَونہہ کھُریاں یعنی گاں  بَلدتےبھیڈ بکری دا چڑھاوا چڑھاؤنا۔جے اوہدا چڑھاوا گاں بَلددی سوختنی قُربانی ہوئے تاں اوہ بے پاپ  نَر نُوں لیا کےاوہنوں خَیمۂِ اِجتماع دے پھاٹک اُتے چاھڑے تاں پئی اوہ آپ خُداونددےاَگے مقبُول ٹھہرے۔تےاوہ سوختنی قُربانی دے پشُودے سِر اُتے اپنا ہتھ رکھّے تاں اوہ اوہدے ولوں مقبُول ہو ئےگا تاں  پئی اوہدے لئی فدیہ ہوئے۔  ‘‘
ایتھے آیت ۴ اُتے دھیان کرو جیہڑی آکھدی اے ،”تےاوہ سوختنی قُربانی دے پشُودے سِر اُتے اپنا ہتھ رکھّے تاں اوہ اوہدے ولوں مقبُول ہو ئےگا تاں  پئی اوہدے لئی فدیہ ہوئے۔ ‘‘دوجیاں اکھراں وچ ،خُدا قربانی نوں خوشی نال قبول کرے گا جد اِک پاپی ایہدے سِر اُتے اپنے ہتھ رکھن دے بعدوں اپنی سوختنی قربانی چڑھاؤندا ۔ پاپی نوں ہتھ کیہدے سِر اُتے رکھنے پیندے سن ؟ ایہہ قربانی دے
پشُو دا سِر سی ۔ صرف ایسے طریقے نال ، خُدا نے اسرائیلیاں دیاں پاپاں نوں مکا دین دا وعدہ کیتا ۔ سو، پرانے عہد نامے وچ ایہہ قربانی دے پشُو دا سِر سی جیہدے اُتے ہتھ رکھے گئے سن ، پر نویں عہد نامے دے بارے کیہ خیال اے ؟ نویں عہد نامے دے زمانے وچ قربانی دا اصلی برّہ کیہڑا اے ؟ ایہہ کوئی ہور نئیں سگوں سارے جگ دا مکتی داتا یِسُوعؔ مسیح اے ۔ یِسُوعؔ مسیح ساریاں لوکاں دیاں پاپاں نوں مکاؤن لئی قربانی دا اِکو تے اِکلا برّہ اے ۔ ایہہ اِک بندے دے سببوں اے پئی سارے پاپی بن گئے ، تے ایہہ وی یِسُوعؔ مسیح دے سببوں ہیگا اے پئی سارے لوک اپنیاں ساریاں پاپاں توں پاک ہو کے سدا دی زندگی پا سکدے نیں ۔
ایمان دے راہیں، سانوں لازمی یِسُوعؔ دے سِر اُتے اپنے ہتھ رکھنے چاہی دے نیں تے اپنے سارے پاپ اوس اُتے لدنے چاہی دے نیں ۔ دوجیاں اکھراں وچ ، سانوں لازمی سچے ایمان  نال اوہدے سِر اُتے اپنے ہتھ رکھنے چاہی دے نیں تاں پئی خُدا ایس قربانی دے  برّے نوں خوشی نال قبول کرے ۔ یِسُوعؔ نے متی ۱۱ :۱۲ وچ آکھیا پئی صرف زوراور طاقت دے راہیں اوہدی بادشاہی نوں کھوہ سکدا اے ۔ ایس لئی پئی ہتھاں دا رکھیا جانا سانوں اپنیاں ساریاں پاپاں نوں قربانی دے پشُو اُتے لدن دے لائق بناؤندا اے ، ایس لئی خُدا ایس ایمان دی قربانی نوں خوشی نال قبول کردا اے ۔ ایس لئی یوحنا بپتسمہ دین والے نےاپنے ہتھ یِسُوعؔ مسیح دے سِر اُتے رکھے تے سارے جگ دیاں ساریاں پاپاں نوں اوس اُتے لد دِتا ، خُدا ہر کسے نوں پاپ  توں صاف ہون د ے لائق بنا چُکیااے تے اوہناں نوں پاپ دی سزا توں مکتی دیندا اے جد اوہ اوہدے بپتسمے تے ساڈے بدلے سولی اُتے اوہدی موت دوآں اُتے سچے دلوں ایمان رکھدے نیں ۔ ایہہ یِسُوعؔ مسیح دے لِئے ہوئے بپتسمے اُتے ایمان رکھن نال اے پئی اسی اپنے سارے پاپ اوس اُتے لد سکدے آں ۔
خُدا نے اسرائیلیاں نوں قربانی دا نظام دِتا سی ، تے ایہہ یِسُوعؔ مسیح ولوں اوہدے اپنے بدن نال پیش کیتی جان والی سدا دی قربانی دی پیشین گوئی سی۔ دوجیاں اکھراں وچ ، یِسُوعؔ مسیح اپنے بپتسمے تے سولی والے لہو نال ایس قربانی دے نظام وچ وعدہ کیتی ہوئی مکتی دی شریعت نوں کامل کر چُکیا اے ۔ ساڈے لئی اپنی مُڈھلی محبت نال ، خُدا سانوں اپنا اِکلا پُتر یِسُوعؔ مسیح دے کے بچا چُکیا اے ۔ ہُن ویلا آگیا اے پئی ہر کوئی یِسُوعؔ مسیح دے بپتسمے تے سولی اُتے اوہدے لہو وگاؤن اُتے ایمان رکھ کے مکتی پاجائے ۔
اپنی مرضی دے مالک خُدا نے جگ بناؤن توں پہلوں ای پاپیاں لئی  اپنی کامل مکتی دا منصوبہ بنایا ، تے ایہنوں اپنے طریقے دیاں ویلیاں مطابق ٹھیک طریقے نال پورا کیتا ۔ ایہہ مکتی دے ایس منصوبے دے مطابق سی پئی یوحنا بپتسمہ  دین والا یِسُوعؔ توں چھے مہینے پہلوں پیدا ہویا سی ۔ یوحنا بپتسمہ دین والا سارے جگ وچوں سب تو ں وڈا سی ۔ جویں پئی یِسُوعؔ نے آپ آکھیا ، ’’جیہڑے عَورتاں توں جمےنیں یُوحنّا بپتِسمہ دین والےنالوں  وَڈا کوئی وی نئیں اُٹھیا‘‘(متی ۱۱:۱۱)،یوحنا بپتسمہ دین والا ، دوجیاں اکھراں وچ،ساریاں لوکاں دا نمائندہ سی ۔ یوحنا بپتسمہ دین والا خُدا دا خادم سی جیہڑا مُوسیٰ ، ایلیاہ تے یسعیاہ نبی توں وی وڈا سی ۔ بوہت سارے لوک یوحنا بپتسمہ دین والے نوں صرف اِک ایہو جیہے بندے وانگر سمجھدے نیں جیہڑا جنگل وچ پرہیز گاری دی زندگی گزاردا سی ۔ پر اوہ اصل وچ خُدا ولوں سارے جگ دا نمائندہ بنا کے  گھلیا گیا سی ۔ یوحنا بپتسمہ دین والا سچ مُچ ایس جگ دیاں ساریاں لوکاں وچوں سب توں وڈا سی ۔ اوہ وڈے کاہن  ہارون دے خنوادے وچوں سی (لوقا ۱ :۵-۷)۔جویں پئی بادشاہ شاہی خنوادے وچوں جم دے سن ، یوحنا بپتسمہ دین والا، اخیری وڈا کاہن، وی ہارون پہلے وڈے کاہن دے خنوادے وچوں جمیا سی ، تے ساریاں لوکاں دے نمائندے وانگر ، اوہنے یِسُوعؔ نوں یردن دے دریا وچ  بپتسمہ دِتا تاں پئی ساریاں لوکاں دیاں  پاپاں نوں اوس اُتے لد سکے ۔ یوحنا بپتسمہ دین والاایس زمین اُتے سب توں وڈا اے ۔ پر کُجھ لوک ایہو جیہے نیں جیہڑے ایس اُتے سوال کردے نیں، جویں اپنے آپ اُتے یقین نا کرن  دا پابند کردیاں ہویاں ، پُچھدے نیں ،” پاک کلام
وچ ایہہ کِتھے آکھیا گیا اے پئی یوحنا بپتسمہ دین والاوڈا کاہن اے؟“
مَیں اوہناں نوں صاف طریقے نال ظاہر کردیاں ہویاں جواب دیندا ہاں پئی یوحنا بپتسمہ دین والا اصل وچ ساریاں لوکاں دا نمائندہ تے وڈا کاہن اے ، ایس لئی پئی ایہہ سارا کُجھ خُدا دے کلام وچ لکھیا اے : ” کیوں جو سارے  نبِی تے تَورَیت وی یُوحنّا تیکر نبُوّت کردے آئے سن ۔تے ایلیّاؔہ جیہڑا آؤن والا سی ایہو اے۔چاہو تے مَنّو۔‘‘(متی ۱۱: ۱۳-۱۴)۔ خُدا نے ملاکی  ۴ :۵  وچ  ایلیاہ نُوںگھلن دا وعدہ کیتا سی ۔ تے یِسُوعؔ نے آپ آکھیا پئی ایہہ ایلیاہ جیہڑا آؤن والا سی کوئی ہور نئیں سگوں یوحنا بپتسمہ دین والااے ۔ ایہہ ایس لئی سی پئی یوحنا بپتسمہ دین والا ہارون دی اولاد بن کے جمیا سی پئی اوہنے وڈے کاہن دا کم کیتا ۔
پرانے عہد نامے وچ ، جد اِک پاپی قربانی دے پشُو دے سِر اُتے اپنے ہتھ رکھ کے اپنیاں پاپاں نوں ایس اُتے لددیندا سی ، تاں ایس قربانی نوں لہو وگاؤن تے اگ نال ساڑن دے راہیں جانو مار دِتا جاندا سی ۔ جیہڑا کوئی وی اپنیاں پاپاں توں معافی چاؤہندا سی اوہنوں ناکامیوں بِنا قربانی دے پشُودے سِراُتے اپنے ہتھ رکھنے پیندے سن پئی اوہ اپنیاں پاپاں نوں ایس اتے لد دیوے ۔ جد لوک قربانی دے پشُودے سِر اُتے اپنے ہتھ رکھدے سن ، تاں ایہدا مطلب سی پئی اوہناں دے پاپ ایس اُتے لدے جاندے سن ۔ تے فدیہ  دیہاڑے ، ہارون وڈے کاہن نوں قربانی دے بکرے دے سِر اُتے اپنے ہتھ رکھنے پیندے سن تاں پئی اسرائیلیاں دیاں ساریاں پورے ورہے دیاں پاپاں نوں ایس اُتے لدیا جاسکے ۔ ایتھے وی ہتھاں دا رکھیا جانا ضروری سی ، تے ایہدا مطلب ، رُوحانی طریقے نال ، پاپ دا لدنا اے ۔ یوحنا بپتسمہ دین والے نے اوس بپتسمے دےراہیں ساڈے سارے پاپ یِسُوعؔ اُتے لد دِتے ، تے ایس بپتسمے دے راہیں یِسُوعؔ نے جگ دیاں ساریاں پاپاں نوں قبول کیتا تے فیر سولی اُتے اپنا لہو وگایا ۔ یوحنا بپتسمہ دین والے دے راہیں بپتسمہ لین تے اِنج ساڈیاں ساریاں پاپاں نوں چُکن ، تے سولی اُتے اپنا لہو وگاؤن تے مویاں وچوں دوجی واری  اُٹھن نال ، یِسُوعؔ مسیح ساڈا کامل مکتی داتا بن گیا اے ۔
اسرائیلیاں نیں وی ایسے طرح ایہدے سِر اُتے  اپنے ہتھ رکھ کے  خُدا اگے اپنی قربانی چاھڑی ۔ جد اسرائیلیاں نیں خُدا دے خلاف پاپ کیتا تے ایس طرح پاپی بن گئے ، تاں اوہناں نوں اپنیاں پاپاں نوں پشُوآں دیاں سِراں اُتے اپنے ہتھ رکھ کے اپنیاں قربانیاں  اُتے لدنا پیندا سی تاں پئی اوہ اپنیاں غلطیاں دیاں قربانیاں نوں ٹھیک طریقے نال خُدا اگے چاھڑ سکن ۔ خُدا ایس شریعی قربانی  نوں خوشی نال قبول کر لیندا جیہڑی ایہدے سر اُتےہتھاں دے رکھے جان دے بعدوں اَگ نال ساڑ دِتی جاندی سی تے ایہنوں مار دِتا جاندا سی ۔ ایہدا سبب ایہہ سی پئی اسرائیلیاں نیں اپنیاں پاپاں نوں ایہدے سِر اُتے اپنے ہتھ رکھ کے لدن دے راہیں اوہنوں ایہہ شریعی قربانی دے پشُو چاھڑے سن پئی خُدا اوہناں نوں مِلدا سی ۔ ایہہ ایس لئی سی پئی قربانی دے پشُونے ہتھاں دے رکھے جان دےراہیں اوہناں دیاں پاپاں نوں قبول کر لیا سی تے اوہناں دیاں پاپاں بدلے سزا جری سی پئی خُدا اوہناں لوکاں نوں مِلدا جیہڑے ایس قربانی وچ شامل خُدا دے فضل اُتے  ایمان رکھ کے اوہدے کول آؤندے سن ۔ ایس لئی خُدا ایس طرح دیاں قربانی دیاں پشُوآں نوں  قبول کر کے بوہت خوش ہوندا ۔ اوہ ایناں مہربان اے پئی کسے نوں دوزخ وچ گھلنا جر نئیں سکدا ۔
ایس طرح ، جیہڑی شے سانوں ساڈیاں ساریاں پاپاں توں پاک کردی اے اوہ دوویں بپتسمہ جیہڑا یِسُوعؔ مسیح نے لیا تے اوہدا صلیبی لہو اے ۔ ایہہ ایس لئی سی پئی یِسُوعؔ مسیح نے یوحنا بپتسمہ دین والے کولوں   بپتسمہ لے کے ساڈیاں ساریاں پاپاں نوں چُک لیا تاں پئی جگ دیاں پاپاں نوں مکایا جائے تاں پئی اوہ سولی اُتے مر سکےتے ساڈیاں پاپاں لئی جائز سزا نو ں جر سکے۔ ایہہ ایس لئی سی پئی یِسُوعؔ نے ساڈیاں ساریاں پاپاں نوں چُکن لئی بپتسمہ لیاسی تے سولی دی جائز سزا نوں جریا سی پئی اوہ مکتی دے سکدا سی تے سانوں پاپ توں چھڈا سکدا سی ۔ سو، اوہدے بپتسمے تے اوہدے لہو وگاؤن دی قربانی اُتے  ایمان رکھ کے ، ہُن اسی راستباز وانگر نویں سریوں جم سکدے آں تے یِسُوعؔ مسیح نال مل سکدے آں ۔ پانی تے رُوح دی خوشخبری اُتے ایمان رکھ کے ، یِسُوعؔ دیاں سچیاں کماں دے راہیں ، مختصر طریقے نال ، اسی سارے پاک خُدا نال مل سکدے آں ۔ یِسُوعؔ مسیح ساڈے وچوں اوہناں دا جیہڑے ایس سچیائی اُتے ایمان رکھدے نیں سدا لئی مکتی داتا بن گیا اے ۔
سانوں لازمی پاک خُدا نال ملنا چاہی دااے ۔ یِسُوعؔ مسیح مکتی داتا اُتے ایمان رکھ کے جیہڑااسمانی، ارغوانی تےلال رنگ دے دھاگے نال آیا سی ، اسی ایمان دے راہیں خُدانال مل سکدے آں ۔ جیہڑےلوک خدا نال  ملنا چاؤہندے نیں اوہناں نوں اوہدا کلام سُننا چاہی دا تے خُدا دے دِتے جان والے قربانی دے نظام اُتے ایمان رکھنا چاہی دا اے جیہڑا ہتھاں دے رکھے جان تے لہو وگاؤن دوآں اُتے مشتمل اے۔ جےاوہ اپنیاں بدنی خیالاں نال ایہنوں چنگی طرح نئیں سمجھ سکدے تے ایہدے بارے تھوڑا جیہا وی شک رکھدے نیں ، تاں اوہناں  نوں لازمی خُدا دے کلام نوں کھولنا چاہی دا تے آپ ایہدی تصدیق کرنی چاہی دی اے ۔ تے اوہناں نوں لازمی ایمان رکھنا چاہی دا اے پئی خُدا دا کلام جو آکھدا اے اوہ ٹھیک اے ۔
سانوں اپنیاں خیالاں نال خُدا اُتے ایمان نئیں رکھنا چاہی دا ۔ ایہدی بجائے ،سانوں خُدا دےسچیائی دے کلام  اُتے ڈٹ کے رہنا چاہی دا اے ، تے ایس کلام  دی نِیہ اُتے ،سانوں ایس سچی  خوشخبری  نال  دوجیاں
خوشخبریاں نوں پچھاننا چاہی دا اے ۔ سانوں اپنی سمجھ تےسیکھن اُتے بھروسہ کردیاں ہویاں صرف اپنیاں خیالاں  بارے اَڑی نئیں کرنی چاہی دی ۔ تہاڈا کوئی وی خیال کدی ٹھیک نئیں ہو سکدا۔بندہ خُدا دے اگے ایناں ماڑا ، ایناں اَڑیل تے ایناں سخت اے پئی اوہ اپنی راستبازی تے خیالاں نوں سب توں پہلوں اگے رکھدااےتے خُدا دے کلام نوں پِچھاں چھڈ دیندے اے ۔ خُدا دے اگے اپنیاں دلاں نوں کھولنا تے اوہدے کلام اُتے ایمان رکھنا ای زندگی تے برکتاں دا سچا راہ اے ۔
جد وڈے کاہن نے مخصُوص ہون لئی خطا دی قربانی لئی اِک وچھا چاھڑیا ، تاں خُدا نے اوہنوں آکھیا پئی اوس چربی نوں جِہدے نال آندراں کجیاں رہندیاں نیں ، تے جگر دی اُتلی جھِلّی نوں ، تے دوآں گُردیاں نوں تے اوہناں دی اُتلی چربی نوں لے کے سارے قربان گاہ اُتے ساڑ دے ، جد پئی وچھے دے گوشت نوں، ایہدی کھل تے گوئے نال خیمۂ گاہ دے باہر اَگ نال ساڑ دے ۔ وڈے کاہن نےقربانی چاھڑی جویں پئی خُدا نے مُوسیٰ نوں حکم دتا سی ۔ جد سوختنی قربانی دتی جاندی سی ، تاں وڈا کاہن قربانی لئی اِک بے پاپ برّہ وی لیاؤندا تے ایہدے سِر اُتے اپنے ہتھ رکھدا ۔ اپنے تے اپنے خنوادے لئی ، وڈا کاہن تے اوہدے پُتر سویرے تے شامی ایہو جیہاں قربانیاں دے سِر اُتے  اپنے ہتھ رکھدے ، ایہدا گل وڈھ کے ایہدا لہو کڈھدے تے ایس لہو نوں سوختنی قربانی دی قربان گاہ دیاں سِنگاں اُتے لاؤندے ۔فیر اوہ اوہدیاں ساریاں پلیت حصیاں نوں خیمۂ گاہ دے باہر ساڑ دیندے جویں ایہدا گویا تے ایہدا سِر ، پر وڈھیاں ہویاں ٹوٹیاں نوں سوختنی قربانی دی قربان گاہ اُتے ساڑ دتا جاندا سی ۔ سوختنی قربانی جیہڑی وڈے کاہن دی مخصُوصیت وچکاردتی جاندی سی اوہ وی ایسے طرح چاھڑی جاندی سی ۔
خاص کر کے ، وڈے کاہن دی مخصُوصیت وچکار ، قربانی دی ساری چربی نوں خُدا لئی ساڑنا پیندا سی ۔ ایہہ پئی خُدا قربانی دی چربی دی خوشبو نال خوش ہوندا آپ ظاہر کردا اے پئی ایہہ یقینی طور اُتے اوہدے کلام تے اوہدے ولوں قیم کیتےگئے قربانی دے نظام دے مطابق اے پئی خُدا سانوں نویں سریوں پیدا کردا اے   ۔ چربی ایتھے ،دوجیاں اکھراں وچ ، خُدا دے پاک رُوح نوں ظاہر کردی اے ۔ خُدا سانوں قربانی دا نظام دے چُکیا اے ، تے اوہنے سانوں ایس قربانی دے نظام  دے مطابق بنایا اے ؛ قربانی دے پشُودے سِر اُتے اپنے ہتھ رکھ کے ، ایہنوں ذبح کر کے ، تے ایہدا گوشت سوختنی قربانی دی قربان گاہ اُتے ساڑ کے پیش کرئیے۔ صرف جد قربانی دا پشُو خُدا دے مقرر کیتے گئے قربانی دے نظام مطابق ایس طرح تے اوس اُتے ایمان نال دتا جاندا تاں خُدا ایہنوں خوشی نال قبول کردا ۔
خروج ۲۹ :۱۰آ کھدا اے، ’’تے ہارُونؔ تے اوہدے پُتر اپنے ہتھ اوس وچھے دے سر اُتے رکھن۔“ ایہہ خُدا دا حکم سی ۔ ایس توں علاوہ ، وڈا کاہن اپنی مخصُوصیت وچکار جیہڑا بانا پاؤندا سی ، افُود نوں بِنا کسے ناکامی دے پنج دھاگیاں نال اُنیا جانا چاہی دا سی — یعنی ،ایہنوں سونے،اسمانی، ارغوانی تےلال رنگ دے دھاگےتےمہین کتان نال اُنیا جاندا سی ۔ ایتھے سونے دا دھاگہ ایمان دی گل کردا اے ۔ اسمانی رنگ دے دھاگے دا مطلب بپتسمہ اے جیہڑا یِسُوعؔ مسیح نے لیا سی ، جیہڑا پئی پرانے عہد نامے دے ہتھاں دے رکھے جان دے برابر اے ؛ ارغوانی رنگ دا دھاگہ سانوں دسدا اے پئی یِسُوعؔ خُدا دا پُتر اے ، آپ خُدا تے مکتی داتا ؛تے لال رنگ دےدھاگے دا مطلب قربانی اے جیہڑی یِسُوعؔ مسیح نے دتی سی ؛ تے مہین وٹے ہوئے کتان دا مطلب خُدا دا کلام اے جنہے سانوں بے پاپ بنا دِتا اے ۔سونے دا دھاگہ ایمان نوں ظاہر کردا اے جیہڑا ایس گل اُتے یقین رکھدا اے پئی خُدا نے ساڈیاں ساریاں پاپاں نوں  معاف کردتا اے تے ساڈیاں دلاں نوں برف  وانگر چٹا کر دتا اے  ۔ سانوں لازمی ایہہ ایمان رکھنا چاہی دا اے ، ایہہ یقین رکھدیاں ہویاں  پئی خُدا نے یِسُوعؔ دے بپتسمے تے صلیبی لہو نال ساڈیاں پاپاں نوں مکا دتا اے ۔ سانوں یِسُوعؔ مسیح اُتے بالکل اوسے طرح ایمان رکھنا چاہی دا اے جویں خُدا سانوں ساریاں نوں دس چُکیا اے ، ایہدے مطابق پئی اوہ ساڈیاں ساریاں پاپاں نوں کویں مکا چُکیا اے ۔ سانوں لازمی خُدا اُتے ایمان رکھنا چاہی دا اےپئی کویں خُدا نے مکتی دا قربانی دا نظام ترتیب دِتا ،تے کویں اوہنے ساڈیاں ساریاں پاپاں نوں یِسُوعؔ مسیح دے راہیں مکا دتا جیہڑا قربانی دے نظام نوں کامل کر چُکیا اے ۔
بوہت سارے لوک آکھدے نیں ، ”تُسی ایس اُتے ایسے طرح یقین کیوں نئیں کردے ؟“ تُسی اینے نکتہ چین کیوں او ؟ خورے ایہدا سبب ایہہ ہیگا اے پئی تُسی باریک بین بندے او تے تُسی ہر ویلے پُر اعتماد رہنا پسند کردےاو، پر میری زندگی ہمہ گیر اے ، تے ایس لئی مینوں پک اے پئی دوویں وکھ وکھ مشورے اِکو ای ویلے ٹھیک ہو سکدے نیں ۔ کیہ خُدا صرف اوہناں لوکاں نوں قبول کردا اے جیہڑا تہاڈے جیہا ایمان رکھدے نیں؟ جے مَیں ایہہ آکھاں پئی مَیں کسے نا کسے طرح خُدا اُتے ایمان رکھدا ہاں ، تاں کیہ ایہہ ایمان اپنے  آپ وچ کافی نئیں ہوئے گا ؟ “جے تُسی ایس طرح ایمان رکھو گے تاں خُدا تہاڈے توں خوش نئیں ہوئے گا ۔ اوہ سچیائی دا خُدا اے ۔ خُدا سانوں کسے ڈکو ڈولے کھاندے تے بِنا یقین دے طریقے نال نئیں بچا چُکیا اے ۔ خُدا اِک بوہت چمکیلا چانن اے جیہدا کلام اِک ، دو دھاراں والی تلوار وانگر تیز اے ۔اوہ اُورِیم تے تُمیّم نال انصاف کردا اے ، جیہدا مطلب ہیگا اے پئی اوہ سانوں چانن تے کاملیت نال بچا چُکیا اے ۔
خُدا ایتھوں تیکر پئی بوہت جدید خوردبین توں وی بوہتا درست اے جیہڑی ساریاں کاچھاں وچوں نِکی کاچھ نوں وی پچھان تےسمجھ سکدی اے ۔ اوہ ایہو جیہا نئیں اے جیہڑا ساڈی مکتی نوں منظور کردا اے جد اسی جیہڑے طریقے نال و ی چاؤہندے آں اوس اُتے ایمان رکھدے آں ۔ ایس لئی پئی خُدا ای سچیائی اے ، اوہ سارا کُجھ جان دا اے، ساڈے لُکے ہوئےخیالاں توں لے کے ساڈے عارضی احساساں تیکر  ، ساڈیاں دلاں وچ موجود پاپاں توں لے کے ساڈیاں چنگیاں کماں تیکر ، اوہناں پاپاں توں لے کے جیہڑے اسی پہلوں کیتے سن اوہناں پاپاں تیکرجیہڑے اسی ہُن کردے پئے آں تے اوہ پاپ جیہڑے اسی آؤن والیاں زمانیاں وچ کراں گے ۔ ایہو ای سبب اے پئی خُدا نے ایہہ ارادہ کیتا پئی اوہ ایہو جیہاں ساریاں پاپاں نوں ہتھاں د ے رکھے  جان تے قربانی دے لہو دوآں نال ضرور مکا دیوے گا ، تے ایس لئی سانوں پکے یقین نال خُدا ولوں مقرر کیتے گئے قربانی دے نظام دے مطابق خُدا دی مکتی اُتے ایمان رکھنا چاہی دا اے ۔
خُداوند نے آکھیا پئی سانوں قربانی دے پشُو دے سِر اُتے ہتھ رکھنا چاہی دا اے، تے فیر اوہ ایہنوں خوشی نال قبول کرے گا ۔ جد کوئی پاپی قربانی دے پشُو دے سِر اُتے اپنے ہتھ رکھدا اے ، تاں اوہنوں اوس قربانی نوں ذبح  کرنا چاہی دا اے تے اوہدا لہو سوختنی قربانی دی قربان گاہ دیاں سِنگاں اُتے لاؤنا چاہی دا اے ۔ ایتھے ، قربانی دے لہو نوں سِنگاں اُتے لاؤنا  ایہناں پاپاں دے مُک جان دے بارے گل کردا اے جیہڑے پئی عدالت دی کتاب وچ لکھے نیں (مکاشفہ ۲۰ :۱۲-۱۵)۔ ایہدے بعدوں ، باقی لہو زمین اُتے ڈوہل دتا جاندا ۔ ایہدا مطلب ایہہ ہیگا اے پئی اوہدا دل پاپ توں دُھل جاندا سی ۔
میرے تے تہاڈے لئی یِسُوعؔ مسیح نےبپتسمہ لیا، سولی اُتے مویا ، مویاں وچوں دوجی واری جیوں پیا ، تے ایس طرح سانوں ساریاں نوں بچا چُکیا اے ۔ وڈا کاہن وی ساڈے جیہا ای ایمان رکھدا سی ۔ ایس موجودہ زمانے وچ تہاڈا تے میرا جیہڑا ایمان اے اوہ ایس ایمان توں بالکل وکھرانئیں جیہڑا وڈا کاہن رکھدا سی ۔ وڈے کاہن لئی وی ، اسمانی، ارغوانی تےلال رنگ دے دھاگےوچ ظاہر ہون والی سچیائی اُتے اوہدے ایمان دے سببوں اوہ اپنے کہانت دیاں کماں نوں پورا کر سکدا سی ،تے ایسے ای ایمان نال مَیں تے تُسی وی راستباز بن گئے آں ۔ ایہہ ایس لئی اے پئی اسی اوس ایمان دے راہیں پاپاں دی  معافی پا چُکے آں جیہڑا خُدا ولوں دتی گئی مکتی اُتے یقین رکھدا اے پئی ہُن اسی اوس نال مِل سکدے آں ، اوس توں مددمنگ سکدے آں ، اوہدے اپنیاں لوکاں وانگر اپنی زندگی گزار سکدے آں ،تے پاپیاں تیکر خوشخبری ودھا سکدے آں جد اسی اپنے کہانت دیاں کماں نوں پورا کردے آں ۔
 
 
زمینی وڈے کاہن تے قربانی دا نظام  خُدا ولوں مقرر کیتے گئے سن
 
وڈے کاہن تے قربانی دا نظام خُدا ولوں مقرر کیتے گئے سن۔ سو ، زمینی وڈے کاہن نے اوہو ای کیتا جیہڑا خُدا نے اوہنوں کرن دا حکم دتا سی ، تے اِنج کر کے اوہنے اپنیاں لوکاں دیاں پاپاں نوں معاف کرن لئی اپنے کہانت دیاں کماں نوں پورا کیتا ۔ یِسُوعؔ مسیح خُدا دے پُتر نے فیر اسمانی وڈے کاہن وانگر ساڈیاں ساریاں پاپاں نوں کویں مکا دتا؟ زمینی قربانی دے پشُو نوں ورتن دی بجائے ، اوہنے اپنے ای بے پاپ بدن نوں قربانی دے پشُووانگر لیا تے ساڈے سارے پاپ ایس اُتے سُٹ دِتے ۔ یِسُوعؔ نے یوحنا بپتسمہ دین والے دے راہیں بپتسمہ لے کے ساریاں لوکاں دیاں پاپاں نوں چُک لیا ، اپنا لہو وگایا تے سولی اُتے مرگیا ، فیر مویاں وچوں جیوں پیا ،تے ایس طرح سانوں جگ دیاں ساریاں پاپاں توں بچایا ۔ ایہہ محبت کِنی حیران کرن والی اے ، تے ایہہ مکتی کِنی ودھیا اے !
کیہ تُسی ایہہ کر سکدے او ؟ کسے دوجے دے بدلے ، کیہ تُسی اوس بندے دیاں پاپاں نوں لے سکدے او تے اوہدے بدلے سولی چڑھ سکدے او ؟ ایہہ اوکھا کم اے ! ہور ایہہ پئی ، تہاڈا بدن شریعی قربانی لئی ایس لائق نئیں ہوسکدا ، ایس لئی پئی ایہہ بے پاپ نئیں ہیگا ۔ بِنا شک ، کُجھ لوک ایہو جیہے وی نیں جنہاں نیں اپنے توں وڈے مقصد لئی راستباز کم کیتے نیں — مثال طور اُتے اپنی قوم لئی ۔ پر بھاویں کُجھ لوک اِنج کر سکدے نیں، پر بندیاں ولوں جو کُجھ وی کیتا گیا اے اوہ سارا فضول اے ، ایس لئی پئی اوہ اپنیاں پاپاں دا مسئلہ وی حل نئیں کر سکدے  ، دوجیاں نوں پاپ توں بچاؤنا تےکِدھرے گھٹ اے ۔ کوئی دوجا نئیں جیہڑا ساریاں لوکاں نوں پاپ توں بچا سکدا اے پر یِسُوعؔ مسیح خُدا دا پاک پُتر۔ پاک کلام سانوں دسدا اے پئی اسمان دے ہیٹھاں سانوں کوئی دوجا ناں نئیں دتا گیا جیہدے توں اسی مکتی پا سکدے آں سوائے یِسُوعؔ مسیح دے (اعمال۴: ۱۲)۔
ویسے، کیہ تہاڈے وچوں کوئی پکا ارادہ رکھن والا بندہ ہوئے گا جیہڑا ایہہ سوچدا ہوئے پئی ،”مَیں ایہہ کرن دے لائق آں ۔ مَیں اپنے آپ نوں سارے دا سارا کسے ہور لئی ناویں لاؤن دے لائق آں ، تے ایس توں علاوہ ، مَیں اپنے آپ نوں کسے ہور لئی قربان کرن دے لائق آں؟“بندیاں وچ ایس طرح دی قربانی تے چڑھاوے نوں پسند کیتا جا سکدا اے ، پر ویلا لنگھن دے نال تے جویں جویں حال چنگے ہوندے جان گے ، ایہو جیہے نیکی دے کم نوں اخیریں سارے بھُل جان گے ۔ عبرانیوں۱۳ :۹ سانوں دسدی اے، ’’فضل نال دِل تگڑا رہےاوہناں خُوراکاں نال نئیں  جِنہاں دے ورتن والوں نوں  کُجھ فائِدہ نئیں ہویا۔“ساڈیاں دلاں نوں خُدا ولوں کیہڑا وادھا تے فائدے ملے نیں؟ ایہہ خُدا دی مکتی دی محبت اے جیہڑی ساڈیاں دلاں نوں اپنے فضل وچ ڈبوندی تے بھر دیندی اے۔ کسے دوجے بندے دی بدنی طریقے نال مدد کرنا ساڈیاں ابدی زندگیاں لئی کُجھ وی نئیں اے ۔ جد اسی اِک واری فیر سوکھے ہو جاندے آں ، تاں اسی سارے ایس طرح دی مدد نوں بھُل جاندے آں ۔
سقراط، کنفیوشس تے سدھارتھ نوں جگ دیاں بوہت وڈیاں سیانیاں وانگر پسند کیتا گیا اے ۔ پر ، کیہ ایہہ سیانے تہاڈے مکتی داتا بن سکدے نیں  ؟ کیہ سدھارتھ تہانوں پاپاں توں پاک کر سکدا اے ؟ اوہناں وچوں کوئی وی نئیں کر سکدا ۔ تاں فیر لوکاں دا مکتی داتا کون بن سکدا اے ، جد کوئی بندہ اپنیاں پاپاں وچوں اِک پاپ نوں وی دُور نئیں کر سکدا ؟ ایتھوں تیکر پئی وڈاکاہن وی اپنی مرضی نال  اپنیاں لوکاں دیاں پاپاں نوں مکا نئیں سکدا سی ۔ اسرائیلیاں دے پاپ اوسے ویلے دھُل سکدے سن جد اوہ خُدا دے دتے گئے  قربانی دے نظام اُتے  ایمان رکھدے سن تے ایس قربانی دے نظام دے مطابق اوہدے اگے اپنے پشُو قربان کرکے اپنیاں پاپاں دی معافی پاؤندے سن — یعنی ، اپنیاں پاپاں نوں ایہدے سِر اُتے ہتھاں دے رکھے جان نال اپنی قربانی دے سِر اُتے لد کے ، ایس قربانی دے لہو  نوں سوختنی قربانی دی قربانگاہ دیاں سِنگاں اُتے لاؤن تے باقی نوں زمین اُتے ڈوہل دین تے ایہدی چربی سوختنی قربانی دی قربانگاہ اُتے ساڑ دین نال ۔
اِ ک ورہے دیاں پاپاں دی معافی لئی ، ستویں مہینے دی ۱۰ویں تاریخ  نُوں ، وڈے کاہن نوں اپنے ہتھ خُدا دے اگے قربانی دے پشُودےسِراُتے رکھنے پیندے سن تے ایس طرح پاپاں نوں اوس اُتے لدنا پیندا سی ، اوہدے لہو نوں بوہتی پاک تھاں اُتے لَے جانا پیندا سی ،تے اوہ ایہنوں سرپوش  دے لہندے پاسے تراؤنکدا — یعنی ، اوس پاسے ول جتھوں اوہ اندر جاندا سی ۔ جد اوہ ست واری لہو تراؤنکدا تاں اوہدے اسمانی رنگ دے جُبّہ دے دامن دے گھیر وچ جیہڑیاں سونے دیاں ٹلیاں لمکدیاں پئیاں سن ، ایہہ  چھنکن لگدیاں ۔ (ایہہ سونے دیاں ٹلیاں اسمانی، ارغوانی تےلال رنگ دے دھاگے نال اُنے ہوئے اناراں وچکار لمکیاں ہویاں سن۔)جد اوہ ٹُردا یا لہو تراؤنکدا تاں ایہناں سونے دیاں ٹلیاں دی سوہنی اواز سُنائی دیندی سی ۔ ایہہ کُجھ ہور نئیں سگوں خوشخبری اے ۔ ایس اواز دا مطلب خوشی دی خبراے ، اِک تگڑی خوشخبری جنہے ساڈیاں ساریاں پاپاں نوں مکا دتا اے ۔ جویں وڈا کاہن اپنیاں لوکاں دیاں پاپاں دی معافی اپنی  مرضی نال کوئی قربانی چڑھا کے نئیں لیا سکدا سی سگوں صرف خُدا دے قیم کیتے ہوئے قانون دے مطابق قربانی چڑھا کے لیا سکدا سی ، نویں عہد نامے دے زمانے وچ ، یِسُوعؔ مسیح مینوں تے تہانوں ایس  زمیں اُتے آؤن ، بپتسمہ لین ، سولی اُتے مرن ، تے مویاں وچوں فیر جی اُٹھن نال، سارا اوہو ای قانون دے مطابق بچا چُکیا اے ۔ یِسُوعؔ مسیح وی سانوں اوسے ویلے راستباز بنا سکدا اے جد اوہنے اپنیاں کماں نوں مکتی دے قانون دے مطابق پورا کیتا جیہڑا اوہنے آپ مقرر کیتا سی ۔
جیہڑا وی ٹھیک طریقے نال نویں سریوں جمنا چاؤہندا اے اوہ اپنیاں پاپاں دی معافی  صرف اوس ویلے لے سکدا اے جد اوہ راضی ، خوشگوار تے نیک ذات نال خُدا دے کلام نوں شوق نال سُن دا اے ، یعنی’ بیرِیّہ‘ دیاں لوکاں وانگر ۔ جیہڑے لوک متفق نئیں ہیگے اوہ ایس سچیائی اُتے یقین نئیں کر سکدے تے اپنے پاپ دی معافی  پا نئیں پاسکدے بھاویں  اوہناں نوں خُدا داکلام کنی ای واری سنایا جائے ؛ اوہ ساریاں توں گھٹ عقل دے نیں ۔ کوئی کویں  کلام اُتے ایمان نئیں رکھ سکدا جویں پئی ایہہ خُدا ولوں بولیا گیا اے؟ بندیاں دا علم سچ مُچ کتھوں تیکر اَپڑ سکدا اے ؟ ایہہ خُدا دےکلام دی دانائی توں بوہت ای گھٹ اے ۔ ایہدے باوجود ، اوہ اپنیاں کامیابیاں اُتے فخرکردے رہندے نیں تے خُدا دےکلام نوں منن توں  مکر دے نیں ۔ ایہناں لوکاں ورگے گھٹ عقل والے لوک لبھنا اوکھا ہوئے گا ۔
بھراؤ تے بھینو ، جگ چھیتی نال بدلدا پیا اے ۔ ٹیکنالوجی وی اینی چھیتی نال  ترقی کردی پئی اے پئی بندیاں دی کلوننگ تکنیکی طریقے نال تقریباً سوکھی دسی جاندی اے ۔ بے دینی وی بوہت چوکھی ودھدی پئی اے ، تے دین دا زمانہ ہُن لنگھدا پیا اے ۔ پر ، بھاویں ایہہ جگ  ہور وی بوہتا گُنجلاں والا تے سخت ہو جائے گا ، اسی نویں سریوں جمن والے خُدا دیاں شاہی کاہناں وانگر وفاداری نال خدمت کرن توں علاوہ کُجھ نئیں کر سکدے ۔ ہُن پانی تے رُوح دی خوشخبری سارے جگ وچ بوہت چھیتی نال ودھدی پئی اے ، بھاویں بے دینی دیاں چھلاں بوہت چوکھیاں ہون ۔ اسی ای آں اوہ جیہڑے ویلے دیاں چھلاں دےخلاف کھلو سکدے آں ۔
میرا یقین اے پئی پانی تےرُوح دی خوشخبری، خُدا ولوں دتے گئے قربانی دے نظام دے مطابق مکتی ، ہور پھلے گی تے کھُلے گی تے چھیتی آؤن والے زمانے وچ سارے جگ وچ ودھ جائے گی ۔ اسی اَج دے کاہن اپنے لئی تے سارے جگ دیاں ساریاں رُوحاں لئی دُعا کراں گے تے ایس خوشخبری دی گواہی دے کے اپنی زندگی گزاردے رہواں گے ۔ میرا یقین اے پئی جد اسی ایمان نال زندگی گزاراں گے ، تاں اسی اوہ لوک بناں گے جیہڑے خُدا نال چلاں گے تے خوشخبری نوں ودھاؤن دے ہور وی وڈیاں کماں نوں پورا کراں گے ۔ جد اسی ایہناں اخیری ویلیاں وچ خُدا نوں خوش کرن والیاں کماں دی تلاش تے تکمیل کردے آں ، تاں میرا یقین اے پئی خوشخبری دے  کم ایس جگ دی ہر نکر وچ ہور ترقی کرن گے ، جویں پھُلاں دی مِٹھی خوشبو تھوڑی  وَا نال کھلر جاندی اے ۔
مَیں خُدا دا بوہت چوکھا شکر ادا کردا ہاں پئی اوہنے سانوں کاہناں وانگر اوہدی خدمت کرن لئی مخصُوص کیتا تے سانوں اوہدیاں خدمتاں وچ گِنیا ۔