Search
پنجابی
پنجابی
کورونا وائرس تے عالمگیر ڈاک سروس وچ رکاوٹ دے سببوں، اَسیں اپنی ’مُلوں بغیر چھاپی ہوئی کتاب دی سروس‘ نوں تھوڑے چِر لئی بند کر دے پئے آں۔
ایس صورتحال دے چانن وچ اسیں ایس ویلے تہانوں کتاباں گھلن دے قابل نئیں ہیگے آں۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔

خطبے

مضمون 9: رومیوں (رومیوں دی کتاب اُتے تفسیر)

[2-3 باب] ختنہ اوہو ای اے جیہڑا دل دا <رومیوں ۲:۱۷ ۔ ۲۹>

 >رومیوں ۲:۱۷ ۔ ۲۹>
” ایس لئی جے تُوں یہودی اکھواؤنداتے شریعت اُتے بھروسہ تے خُدا اُتے گھمنڈ کردا ایں۔ تے اوہدی مرضی جان داتے شریعت سکھ کے چنگیاں گلاں پسند کردا ایں۔تے جے تینوں ایس گل اُتے وی بھروسہ ہیگااے پئی میَں انھیاں نوں راہ وکھاؤن والا تے ہنیریاں وچ پئے ہوئیاں لئی نُور ۔تے کم عقلیا ں نوں سکھاؤن والا تے بچیاں دا اُستاد تے علم تے حق دا جیہڑا نمونہ شریعت وچ ہیگا اے ،اوہ میرے کول ہیگا اے ۔ ایس لئی تُوں جیہڑا ہوراں نوں سکھاؤنداایں اپنے آپ نوں کیوں نئیں سکھاؤندا؟ تُوں جیہڑاپیغام دیندا اے پئی چوری ناں کریں آپ خو د کیوں چوری کردا ایں؟ تُوں جیہڑا آکھدا ایں پئی زنا ناں کریں ،آپ خود کیوں زناکردا ایں ؟ تُوں جیہڑا بُتاں نو ں بُریاں سمجھدا ایں ،آپ خود کیوں مندراں نوں لُٹ دا ایں؟ تُوں جیہڑا شریعت اُتے گھمنڈ کردا ایں ،شریعت دی نافرمانی کر کے ،خُدا دی کیوں بے عزتی کردا ایں ؟ کیوں جے تہاڈے سبب توں اوپریاں قوماں وچ خُدا دے ناں بارے کفر بولیا جاندااے ۔ ایس لئی ایہہ لکھیا وی اے ۔ختنے دا فائدہ تاں ہوندااے ،پر شرط اایہہ ہیگی اے پئی تُوں شریعت نوں منیں پرجدوں توں شریعت دا آکھا ناں منیا تاں تیرا ختنہ بے ختنہ بنیا۔ ایس لئی جے بے ختنہ بندہ شریعت دا آکھا منے تاں کیہ اوہدا بے ختنہ ہونا ختنے وانگر ناں سمجھیا جاوے گا ؟ تے اوہ جیہڑا بندہ قوم دے سبب بے ختنہ رہیا ،جے اوہ شریعت نوں پورا کرے ،تاں کیہ تینوں جیہڑا کلام تے ختنے دے ہوندیاں شریعت دی نافرمانی کرداایں ،قصوروار ناں بناوے گا ؟ کیوں جے اوہ یہودی نئیں جیہڑا وکھالے دا اے ،تے ناں اوہ ختنہ ایں جیہڑا وکھالے دا تے بدنی ہیگااے ۔ سگوں یہودی اوہو ای اے جیہڑا دلوں ہیگا اے تے ختنہ اوہو ای اے جیہڑا دل دا تے رُوحانی ہیگااے نہ پئی بولیا گیا ۔ ایہو جیہاں دی وڈیائی بندیاں ولوں نئیں سگوں خُدا  ولوں ہوندی اے ۔ “
 
 

لازمی ہیگا اے پئی اسیں اپنے دلاں دا ختنہ کرئیے

 
” ختنہ اوہو ای اے جیہڑا دل دا ۔“ جدوں اسیں دلوں ایمان لیاؤندےآں تاں اسیں
مکتی  پاؤندے آں ۔سانوں اپنے دلوں مکتی پاؤنی چاہی دی اے ۔خُدا آکھدا اے ، ” ختنہ اوہو ای اے جیہڑا دل دا تے رُوحانی ہیگااے نہ پئی بولیا گیا  ۔ایہو جیہاں دی وڈیائی بندیاں ولوں نئیں سگوں خُدا  ولوں ہوندی اے ۔ “ (رومیوں ۲:۲۹)۔سانوں پاپاں توں معافی نوں اپنے دل وچ رکھنا چاہی دا اے۔جے اسیں پاپاں توں معافی نوں اپنے دل وچ نئیں رکھدے ،تاں ایہدا کوئی اثر نئیں ہیگا ۔ بندے کول  ” وکھالا تے دل “ ہیگااے ۔تے ہر کسےنوں سچے دلوں پاپاں توں معافی پاؤنی چاہی دی اے ۔
پولُس رسول یہودیاں نوں آکھدااے ،” ختنہ اوہو ای اے جیہڑا دل دا ۔“ فیر یہودیاں دا ختنہ کیہ ہویا ؟ اوہ بدن دے باہر والے حصے دا ختنہ کردے سَن ۔ پر پولُس رسول آکھدااے ، ”ختنہ اوہو ای اے جیہڑا دل دا ۔“ یہودی وکھالے دے ختنے دا یقین کردے سَن ،پرپولُس آکھدا اے ، ختنہ اوہو ای اے جیہڑا دل دا ۔جدوں اسیں خُدا دے پُتر بن دے آں ،تاں اوہ سانوں ساڈے دلاں وچ دَسدا اے۔
پولُس وکھالے دے ختنے دی گل نئیں کردا ،سگوں دلی ختنہ تے پاپاں دی معافی دے بارے گل کردااے ۔ایس لئی جدوں اوہ آکھدااے ،  ” جے کئی بے وفا نکلے تاں کیہ ہویا ؟  “ (رومیوں ۳:  ۳)۔ایہدا مطلب ہیگا اے ،   ” کئی دلوں ایمان نئیں لیاؤندے۔ “ اوہ وکھالے دا ایمان لیاؤن والیاں بارے گل نئیں کردا سگوں آکھدا اے ، ”  دلوں ایمان لیاوو۔ “ سانوں پتہ ہونا چاہی دا اے پئی پولُس دا مطلب تے پاپاں دی معافی کیہ ہیگی اے ۔ سانوں ایہہ وی پتہ ہونا چاہی دا اے پئی خُدا دے کلام دے راہیں کویں اپنے دلاں وچ پاپاں دی معافی نوں پاؤنا ایں ۔
” جے کئی بے وفا نکلے تاں کیہ ہویا ؟  “ دا مطلب ہیگا اے  ”  کیہ ہویا جے یہودی یسوع مسیح اُتے مکتی داتا وانگر ایمان نئیں لیائے ،بھاویں اوہ بدنی طور اُتے ابرہام دی اولاد ہیگے نیں ؟  “  کیہ اوہناں دی بے وفائی خُدا دی وفاداری نوں جھوٹیاں کر سکدی اے ؟ کیہ ایہہ سچ ہیگا اے پئی خُدا ساڈے پاپ مکادیوے گا تے ابرہام دی اولاد دے پاپ وی بے اثر ہوجان گے ۔ پولُس آکھدا اے پئی ،یہودی جیہڑی بدنی طور اُتے ابرہام دی اولاد ہیگے نیں ،اوس ویلے مکتی پا ؤندے نیں ،جدوں اوہ یسوع نوں اپنا مکتی داتا تے خُدا دا پُتر ہون اُتے ایمان لیاؤندے نیں ،جنہے جگ دے پاپاں نوں اپنے بپتسمے تے صلیبی موت دےراہیں مکادتا اے ۔ اوہ ایہہ وی آکھدا اے پئی خُدا دا فضل تے مکتی جیہڑی یسوع مسیح دے راہیں ہیگی اے ،کدی بے اثر نئیں ہو سکدی ۔
رومیوں ۳ : ۳۔۴دَسدا اے ۔” جے کئی بے وفا نکلے تاں کیہ ہویا ؟ کیہ اوہناں  دی
بے وفائی خُدا دی وفاداری نوں جھوٹیاں کر سکدی اے ؟ بالکل نئیں ۔ سگوں خُدا سچا رہوے تے ہر اک بندہ جھوٹا ۔ایس لئی لکھیا اے پئی ،تُوں اپنی گلاں وچ راستباز بنےتے اپنے مقدمہ اُتے فتح پاویں۔“  خُداوند نے اپنے کلام وچ وعدہ  کیتا ،تے اپنا وعدہ اپنے راہیں ای پورا کرکے ایمانداراں نوں پاک کیتا ۔خُدا اوہناں نوں اپنی راستبازی وکھاؤنا چاؤہندا تے سچے بناؤنا چاؤہندااے جیہڑے اوہدے کلام دے راہیں جیہڑا اوہنے اوس ویلے پورا کیتا جدوں اوہنے دُکھ جرے ، یسوع اُتے ایمان لیا چُکے نیں ۔ ایتھوں تیک پئی اسیں ،جیہڑے اپنے دلاں وچ  پاپاں دی معافی پا چُکے آں اوہدے کلام دے راہیں ساڈا انصاف کیتا جاوے گا تے جدوں ساڈا انصاف ہووے گا تاں اوہدے کلام نال فتح پاواں گے ۔
 
 
پولُس رسول وکھالے دی تے دلی خودی بارے دَسدااے
 
 پولُس اپنے  ” وکھالے دی تے دلی خودی بارے گل کردااے ۔ “ اسیں اک وکھالا تے اندر رکھدے آں جیہڑا پئی بدن تے رُوح ہیگے نیں ۔ اسیں بالکل اوہدے وانگر ہیگے آں ۔ ہُن پولُس ایس مسئلے بارے گل کردااے ۔
رومیوں ۳:۵دسدا اے ،  ” جے ساڈی بدی خُدا دی چنگیائی وکھاؤندی اے تاں اسیں کیہ آکھیے “ پولُس دا ایہہ مطلب نئیں ہیگا پئی اوہدا ظاہری بدن صاف ہیگااے ۔جدوں تیک اوہ مر نئیں جاندا پاپ اوہدے کولوں ہو جاندااے تے اوہدا بدن گندہ ہیگااے ۔  جگ دے سارے لوک ایہدے وچ شامل ہیگے نیں۔پر ،جے خُدا اوہناں لوکاں نوں مکتی دے چُکیا سی ،تاں کیہ ایہہ خُدا دی راستبازی دی چنگیائی نوں نئیں وکھاوے گا ؟ بھاویں بندہ ماڑا نظرآؤندا اے تاں وی جے خُدا اوہنوں مکتی دیوے تاں کیہ اوہ راستباز ناں بنے گا؟ ایسے طرحاں پولُس فرماؤندااے ، ” کیہ ایہہ پئی خُدا بے انصاف ہیگا اے جنہوں غصہ آؤندااے ؟(میَں ایہہ گل بندیاں وانگر کردا ہاں ) بالکل نئیں۔فیر  خُدا کویں جگ دا انصاف کرے گا ۔“ (رومیوں ۳:۵ ۔ ۶)۔  پولُس کھول کے گل کردا اے پئی اسیں ایس سبب توں مکتی نئیں پاؤندے پئی اسیں صرف باہروں ای پاک ہیگے آں ۔
اسیں باہر(وکھالا) تے اندر(دل) رکھدے آں ۔ فیر، پولُس دل وچ آکھدا اے ،  ” جے کئی بے وفا نکلے تاں کیہ ہویا ؟ کیہ اوہناں دی بے  وفائی  خُدا   دی   وفاداری   نوں جھوٹیاں کر سکدی   اے ؟ ختنہ اوہو
ای اے جیہڑا دل دا۔ “جے اسیں اک واری راستباز بندہ بن دے آں تے فیر اگلے ای دن ظاہری خودی اُتے بنے ایمان دے راہیں جیہڑا ماڑا ہیگا اے تے پاپ کردا اے ،اسیں فیر اک پاپی بن جاندے آں ۔ تاں فیر ایہہ سچا ایمان نئیں ہیگااے ۔
 
 

وکھالے  والا بندہ اپنے مرن دیہاڑے تیک سدا پاپ کردارہندااے

 
پولُس رسول اپنیاں آساں نوں اپنی وکھالے دی خودی وچ نئیں لکھدا اے ۔اوہ جنہاں دے پاپ مکائے گئے نیں ،اوہ وی وکھالا تے دل رکھدے نیں ۔ جدوں اوہ اپنے وکھالے نوں ویکھدے نیں تاں اوہ کویں دا محسوس کردے نیں ؟ اوہ پریشان ہو جاندے نیں ۔ آؤ اپنے وکھالے اُتے دھیان کریے ۔ کئی واری اسیں چنگے ہوندے آں تے کئی واری اسیں صرف گندے ہوندے آں ۔ پر پاک بائبل دسدی اے پئی ساڈے وکھالے دے بدنی کم یسوع مسیح نال سولی اُتے مر گئے سَن ۔اسیں بدنی طور اُتے مر گئے ساں تے یسوع نے ساڈے سارے بدنی پاپاں نوں معاف کر دتا اے ۔
اسیں جیہڑے مکتی یافتہ ہیگے آں ، بوہتی وار جدوں اسیں اپنے وکھالے اُتے دھیان کردے آں تاں اسیں اپنی وکھالے دی جندڑی توں پریشان ہو جاندے آں ۔ جدوں ساڈا ظاہری بدن چنگے کم کردا اے تاں اسیں آس بھرے نظر آؤندے آں ، پر جدوں اوہ ساڈی آس مطابق نئیں ہوندے تاں اسیں پریشان ہو جاندے آں ۔ اسیں اپنے ظاہر ولوں پریشان ہوندے آں ۔ جدوں اسیں  اپنی ظاہری جندڑی توں پریشان ہو جاندے آں ۔جدوں اسیں اپنے ظاہری بدن توں پریشان ہو جاندے آں ،تاں اسیں اپنی سوچ دا جھکا ایس پاسے کر لیندے آں پئی ساڈا ایمان مک گیا اے ۔ پر ،اِنج کرنا ٹھیک نئیں ہیگااے ۔ ساڈی ظاہری جندڑی شروع توں ای مسیح نال سولی اُتے مر گئی سی ۔اوہ جنہاں نیں پاپاں توں معافی پا لئی اے اوہ وی اپنے بدنی کماں دے راہیں پاپ وچ ڈِگ پیندے نیں ۔ پر کیہ ایہہ اک پاپ نئیں ہیگا ؟ آہو ایہہ ہیگا اے ، پر ایہہ اک مویا پاپ ہیگا اے ۔ایہہ مویا ایس لئی ہیگااے کیوں جے خُداوند نے ایہہ پاپ اپنے نال سولی اُتے مار دتے سَن ۔پاپ جیہڑے باہر والی جنڈری دے راہیں ارادہ کیتوں اَڈ ہو جان ،کوئی ڈاہڈا مسئلہ نئیں ہیگا اے ۔ پرڈاہڈا مسئلہ ایہہ ہیگا اے پئی ساڈے دل خُداوند دے اگے کھرے نئیں ہیگے ۔
 
 
سانوں دلوں خُدا اُتے ایمان رکھنا چاہی دا اے
 
پاپاں توں معافی پاؤن دے بعدچھیتی نال راستباز دے اگے بدیاں آجاندیاں نیں ۔ ایس لئی ،جے اسیں اپنی مکتی دی بنیاد وکھالے دے بندے اُتے رکھی اے جیہڑی ہر ویلے پاپ کردی تے پاپ روک نئیں سکدی تاں فیر خُدا دی مکتی ایہو جیہے بندے لئی بے اثر ہو جاوے گی ۔ جے اسیں اپنے ایمان دی بنیاد وکھالے دی جندڑی اُتے رکھدے آں ،تاں جویں دا ایمان ابرہام دا خُدا اُتے سی ،اسیں اوس ایمان توں بھٹک جاواں گے ۔
پولُس رسول فرماؤندا اے ، ” ختنہ اوہو ای اے جیہڑا دل دا۔ “ اسیں دلوں ایمان لیاؤن دے راہیں راستباز تے پاک بنائے جاندے آں ،ناں پئی اپنے وکھالے دے کماں دے مطابق ۔ ساڈی پاکیزگی دا اقرار ایس گل اُتے نئیں ہیگا پئی کیہ ساڈے کم خُدا دی شریعت مطابق ہیگے نیں یاں نئیں ۔ کیہ تسیں اینوں سمجھدے پئے او ؟ مسئلہ ایہہ ہیگا اے پئی اسیں ظاہر تے باطن دونویں رکھدے آں تے ایہہ دونویں آپس وچ جُڑے ہوئے نیں ۔ ایس لئی ، کئی واری اسیں اپنا جھکا وکھالے دے جندڑی ول بوہتا موڑ لیندے آں ۔جے ساڈی وکھالے دی جندڑی چنگی ہیگی اے تاں اسیں یقین نال بھرے ہوندے آں ،پر جے ایس طرحاں نئیں ہیگا تاں اسیں پریشان ہو جاندے آں ۔پولُس آکھدا اے پئی ایہہ غلط ایمان ہیگا اے ۔  
” ختنہ اوہو ای اے جیہڑا دل دا۔ “ اصل سچیائی کیہ ہیگی اے؟ کویں سانوں پتہ لگدا تے دلوں ایمان لیاؤندے آں ؟ متی  ۱۶ باب وچ یسوع نے پطرس نوں پُچھیا ،  ” تسیں مینوں کویں سددے او ؟  “ فیر پطرس نے اپنےایمان دا اقرار ،ایہہ آکھدے ہوئیاں کیتا ، ” تُوں  جیوندے خُدا دا پُتر مسیح ہیگا ایں ۔ “ پطرس دلوں ایہہ ایمان لیا یا سی ۔ یسوع نے آکھیا ،  ” مبارک ایں تُوں شمعون بَریوناہ کیوں جے ایہہ گل لہو تے ماس نال نئیں سگوں میرے باپ نے جیہڑااَسمان اُتے ہیگااے تینوں وکھائی اے۔ “ یسوع نے فرمایا پئی پطرس دا ایمان ٹھیک ہیگااے ۔
ابرہام دا کوئی پُتر نئیں ہیگا سی ۔ خُدا نے اوہنوں اپنے کلام توں خبر دتی تے وعدہ کیتا پئی اوہ اوہنوں پُتر دیوے گا تے اوہ بوہت ساریاں قوماں دا باپ ہووے گا ۔ اوہنے ایہہ وی آکھیا پئی اوہ اوہدا خُدا تے اوہدے بعد اوہدی اولاد دا خُدا ہووے گا  ۔ خُدا نے ابرہام دے خنوادے تے اوہدی اولاد وچکار تے ابرہام تے خُدا دے وچکار ختنے نوں اک ہمیشگی دا وعدہ بنایا ۔ خُدا نے فرمایا پئی ،  ” ختنے دا نشان ایس گل دا وعدہ ہیگا اے پئی میَں تہاڈا خُدا ہیگا واں ۔ “ ابرہام دلوں ایس وعدے اُتے ایمان لیایا ۔اوہ ایمان لیایا پئی خُدا ضرور اوہدا خُدا ہووے گا تے اوہدی اولاد نوں برکت دیوے گا ۔ اوہ ایہہ وی ایمان لیایا پئی خُدا اوہدے بعد اوہدی اولاد دا خُدا ہووے گا ۔ اوہ خُدا اُتے ایمان لیایا سی ۔
 
 
اسیں پانی تے رُوح دی خوشخبری اُتے دلوں ایمان لیاؤن دے  راہیں راستباز بنائے جاندے آں
 
اسیں دلوں ایہہ ایمان لیا کے پئی  خُدا ساڈا خُدا تے مکتی داتا ہیگا اے ، راستباز بنائے جاندے آں ۔ اسیں اپنے دلاں نال ایمان لیاؤن دے راہیں مکتی پاؤندے آں ۔ ایہدے توں  ہٹ کے اسیں کسے ہور شے دے راہیں مکتی نئیں پا سکدے ۔ اسیں دلوں ایمان لیاؤن دے راہیں راستباز بنائے گئے آں پئی خُدا ساڈا خُدا ہیگا اے تے اوہنے یسوع دے بپتسمے تے صلیبی موت دے سبب ساڈے پاپاں نوں مکا دتا اے ۔ دلوں ایمان لیاؤنا ای سانوں مکتی دے سکدا اے ۔ ایس لئی پاک بائبل فرماؤندی اے ،” کیوں جے راستبازی لئی ایمان لیاؤنا دلوں ہوندا اے تے مکتی لئی اقرار مونہوں کیتا جاندا اے ۔ “ (رومیوں ۱۰:  ۱۰)۔
ایس ویلے سانوں گل نوں کھول دینا چاہی دااے پئی اسیں دلوں ایمان لیاؤن دے سبب راستباز بنائے جاندے آں ، ناں پئی اپنے بدن دے نیک کماں دے سبب ۔ اسیں راستباز نئیں بن سکاں گے جے یسوع ساڈی وکھالے دی راستبازی دی شرط ایہہ آکھدے ہوئیاں ایہدے نال جوڑ دیندا اے  پئی ،  ” میَں تہاڈے سارے پاپ مکا دیواں گا ، پر اک شرط نال جے تسیں پاپ کرن توں باز آوو،تاں تسیں میرے پُتر بن سکدے او ۔ تے جے تسیں اِنج نئیں کردے او تاں تسیں میرے پُتر نئیں بن سکدے ۔ “
اسیں دلوں ایمان لیاؤن دے سبب راستباز بنائے جاندے آں ۔ جے خُدا ساڈی وکھالے دی ہستی دی شرط نوں ساڈی مکتی نال جوڑ چُکیا ہوندا تاں کیہ اسیں راستباز بنائے جاسکدے ساں ؟ کیہ تہاڈا ایمان ہیگااے پئی خُدا نے یردن دے دریااُتے پاؤن تے سولی اُتے مرن تے تہاڈی تھاں اُتے سزا سہن دے سبب تہاڈے سارے پاپاں نوں مکا کے تہانوں مکتی دتی اے ؟تسیں ایہدے اُتے کویں ایمان  رکھدے او ؟  کیہ تسیں اپنے  دلوں  ایمان نئیں لیاؤندے ؟ کیہ تسیں کامل مکتی پا چُکے ہوندے  جے  خُدا  نے
فرمایا ہوندا پئی ، ” میَں تہاڈی نکیاں غلطیاں نوں معاف کراں گا پر وڈیاں غلطیاں نوں معاف نئیں کراں گا ۔ جے تسیں ایس شرط اُتے قائم نئیں رہندے تاں میَں تہاڈی مکتی  نوں مکا دیواں گا“ ؟
 
 

سانوں وکھالے  دے آدم نوں دلی آدم توں وکھ کرنا چاہی دااے

 
ساڈا بدن ،وکھالے دا آدم ،ہمیش لئی ماڑا ہیگا اے تے اپنے آپ خُدا دی راستبازی تیک نئیں اپڑ سکدا ۔ اسیں خُدا دے اگے دلوں ایمان لیاؤن دے سبب ای راستباز بنائے جاندے آں  کیوں جے اوہنے اوہناں نوں بچاؤن دا وعدہ کیتا اے جیہڑے اپنے دلوں ایمان لیاؤندے نیں ۔اپنے ایمان نوں ویکھدے آں پئی اسیں من دے آں جو کُجھ خُدا نے کیتا تے ایہہ پئی یسوع نے ساڈے پاپاں نوں مکادتا تے ساڈے دلاں وچوں پاپاں نوں مکا دتا ، تے خُدا سانوں اپنے راستباز پُتر بناؤندااے ۔ ایہہ خُداوند دا وعدہ ہیگااے ،تے اوہ اپنے وعدے نوں پورا کرکے سانوں مکتی دے چُکیا اے ۔
خُدا فرماؤندااے پئی جدوں اوہ ساڈے دلاں وچ ایمان نوں ویکھدا اے ، تاں سانوں اپنے لوکاں وچ رلا لیندا اے ۔لازمی ہیگا اے پئی اسیں اپنی وکھالے دی جندڑی توں دلی جندڑی نوں وکھ کرئیے ۔ جے اسیں اپنی مکتی اپنے بدنی کماں نال جوڑئیے تاں ایس جگ وچ کوئی وی پاپاں توں معافی نئیں پا سکے گا ۔ ” ختنہ اوہو ای اے جیہڑا دل دا ۔“ اسیں یسوع مسیح اُتے اپنے دلاں توں ایمان لیاؤن دے سبب مکتی پاؤندے آں ۔ کیہ تسیں سمجھدے او؟   ” کیوں جے راستبازی لئی ایمان لیاؤنا دلوں ہوندا اے تے مکتی لئی اقرار مونہوں کیتا جاندا اے ۔ “(رومیوں ۱۰:۱۰)۔پولُس رسول واضح طور اُتے وکھالےدے آدم نوں دلی آدم توں وکھ کردااے ۔
ساڈا وکھالےدا آدم  کُتے دی اُلٹی توں وی  گندہ ہیگااے ۔ ایہہ نکماہیگا اے ۔ سانوں ابرہام دی مثال نوں ورتن دی لوڑی نئیں ہیگی ۔تسیں اپنے آپ اُتے دھیاں کرو ۔ اپنے نکمے بدن نوں ویکھو۔ بدن لوکاں وچ بوہتی عزت پاؤن تے دولت بھری حیاتی بسر کرن دی ہمت کردیاں ہوئیاں فریب ول ٹُر پیندااے ۔ کیہ بدن سدا اپنا فائدہ دا لالچ کردااے ؟جے بدن دا ایہہ انصاف کیتا جاوے پئی ایہہ کیہ سوچدا تے کیہ کردااے تاں فیر بدن نوں اِکو ای دیہاڑے ۱۲ وار توں وی بوہتی سزا ملے گی ۔ بدن خُدا دے خلاف ہیگااے ۔
خوش نصیبی نال ساڈا خُدا ساڈی باہر والی جندڑی دی پروا ہ نئیں کردا ،سگوں اوہ صرف ساڈے اندر ول ای دھیان دیندا اے ۔جدوں اوہ سانوں ویکھدا اے پئی اسیں سچ مُچ اپنے دلوں یسوع اُتے اپنے مکتی داتا ہون دا ایمان رکھدے آں ، تاں اوہ سانوں مکتی دیندااے ۔ وہ سانوں دسدااے پئی اوہنے سانوں ساڈے سارے پاپاں توں مکتی دتی اے ۔
 
 
اسیں اپنیاں سوچا ں نال کدی وی مکتی نئیں پا سکدے
 
آؤ اپنے خیالاں ول دھیان کرئیے ۔ ساڈی سوچ مطابق اسیں صرف اپنے خیالاں دے راہیں ای ایمان لیاسکدے آں ۔اسیں بدنی سوچاں نال ایہہ خیال کردے ہوئیاں ایمان لیا سکدے آں ، ’  میَں ایس لئی مکتی پائی کیوں جے خُدا نے مینوں مکتی دتی ۔‘ پر اسیں اپنے خیالاں دے راہیں مکتی نئیں پا سکدے ۔ بندے دی عقل ہر ویلے بدل دی رہندی اے تے سدا بدی کردی اے ۔ کیہ ایہہ سچ ہیگا اے ؟ بندے دی عقل دے خیال سدا ایہہ بدی کرنا چاؤہندے نیں تے ایہہ اوہدی آس مطابق ہیگااے ۔
فرض کروپئی  جے کوئی اپنے ایمان دی بنیاد اپنے خیالاں اُتے  رکھدااے ۔ اوہ اپنی مکتی اُتے یقین رکھ سکدااے جد پئی اوہدے ہُن والے خیال اوہدے پہلاں دے خیالاں نال رَلدے نیں ،مطلب اے پئی ،  ’ یسوع نے یردن دے دریااُتے ساڈے سارے پاپاں  نوں معاف کر دتا اے ۔ ‘ فیر،ایس لئی پئی بدن دے خیال پکے نئیں ہیگے ، اوہ ہور اپنے خیالاں ناں اپنی مکتی اُتے یقین نئیں رکھ سکدا ۔تھوڑا جیہا شک وی اوہدی  کچی مکتی دے خیال نوں برباد کر دیندااے ۔بدنی خیال نال بنیا غلط ایمان شک دے اِکو ای وار نال تباہ برباد ہو جاوےگا ۔
جے سا ڈا ایمان ساڈیاں سوچا ں مطابق ہیگااے تاں اسیں سچ مُچ اوہدے اُتے تے سچیائی اُتے ایمان نئیں لیا سکدے ۔ ایس طرحاں دا ایمان ریت اُتے بنائے ہوئے گھروانگر ہیگااے ، ” تے مینہ ورہیا تے پانی چڑھیا تے ہنیریاں چلیاں تے اوس گھر نوں نقصان پوہنچایا تے اوہ ڈِگ پیا تے بالکل برباد ہوگیا ۔“ (متی ۷:۲۷)۔
ایس لئی، اک بندے دا ایمان جیہڑاخیالاں اُتے یقین رکھدااے ، خُدا دے کلام اُتے بنے ایمان توں بوہت اَڈ ہیگااے ۔ خُدا نے فرمایا، ”  تُوں اپنیاں گلاں وچ راستباز بنے تے اپنےمقدمہ اُتے فتح پاویں ۔“ (رومیوں ۳:۴)۔ساڈی مکتی اوہدے کلام مطابق ہونی چاہی دی اے ۔ کلام نے بدن لیا تے ساڈے وچکار رہیا تے خُدا کلام ہیگااے ۔ کلام  بدن لَے کے دھرتی اُتے بندیاں وانگر آیا ۔ یسوع نے  سانوں مکتی دتی تے اپنی حیاتی دے ۳۳ ورہے ایس دھرتی اُتے بسرکرن دے بعد اَسمان اُتے چُک لیا گیا ، تے وعدہ کیتے ہوئے کلام نوں لکھن وچ اپنے چیلیاں دی اَگوائی کیتی ،جیہڑا پئی پرانے عہدنامے دا کامل ہونا ایں جیہڑا شروع توں اوہنے اپنے بندیاں دے راہیں وی دسیا سی ۔ یسوع نے بائبل وچ جو کُجھ فرمایا اوہنوں اَکھروں اَکھر پوراکیتا ۔ خُدا کلام دے نال تے کلام وچ ظاہر ہویا ، سانوں سکھایا تے کلام دے راہیں سانوں مکتی دتی ۔
اسیں اپنے خیالاں دے سبب اوس ویلے تیک پاپاں توں معافی پا نئیں سکدے جدوں اسیں بے ایمان ہوکے ایہہ خیال کردے آں پئی ،  ’  کئی واری اِنج لگدا اے پئی میَں مکتی یافتہ ہیگا واں ،پر کئی واری میَں خُداوند دی مکتی اُتے ایمان نئیں لیا سکدا ۔‘  اسیں اپنے بدنی خیالاں دے سبب مکتی نئیں پا سکدے ،ایس لئی پئی ساڈے خیالاں وچ تاں سدا  تبدیلی  آؤندی رہندی اے تے ایہہ خیال سدا سچے نئیں ہوندے ۔
ایس لئی ، پولُس رسول نے فرمایا پئی ، ختنہ اوہو ای اے جیہڑا دل دا تے اسیں اوہدی راستبازی اُتے سچے دلوں ایمان لیاؤندے آں ۔ جدوں اسیں اوہدے کلام اُتے  ایمان لیاؤندے آں ، تاں دل وکھالے طوراُتے گواہی دیندااے پئی خُدا نے پُرانے عہد نامے وچ ایہہ وعدہ کیتا سی،تے ایس وعدے نوں پورا کیتا ۔ نویں عہد نامے وچ اوہنے اپنے کلام دے راہیں بالکل اوسے طرحاں مکتی دتی جویں پئی اوہنے پُرانے عہد نامے وچ دسیا سی ۔ اسیں اوہدے کلام اُتے سچے دلوں ایمان لیاؤن دے راہیں مکتی پاؤندے آں ۔
 
 
اسیں پانی تے رُوح دی خوشخبری اُتے سچے دلوں ایمان  لیاؤن دے راہیں مکتی پائی اے
 
اسیں ایمان لیاؤن دے راہیں مکتی پائی اے ایس لئی پئی ساڈ ا دل تاں خُدانوں قبول کر سکدااے ،پر خورے ساڈے بدنی خیال اوہدا اقرار نئیں کر سکدے ۔اسیں سچے دلوں ایمان لیاؤن دے راہیں خُدا دے پُتر بنے آں ، ناں پئی اپنے کماں یاں وکھالے دے آدم دے خیالاں راہیں ۔ ایہہ گل کھُل جاندی اے پئی اسیں سچے دلوں اوہدے اُتے ایمان لیاؤن دے سبب خُدا دے پُتر بنے آں ۔ کیہ تسیں سچے دلوں ایمان لیائے او ؟ کیہ تسیں اپنے دلاں دا ختنہ کیتا اے ؟ کیہ تسیں سچے دلوں ایمان لیائے او پئی یسوع تہاڈا مکتی داتا ہیگااے ؟ جیہڑا وی خُدا دے پُتر اُتے ایمان لیاؤندا اے اوہ اپنے دل وچ گواہی رکھدااے ۔ کیہ تسیں اپنے دل وچ خُدا دے پُتر دی گواہی رکھدے او پئی یسوع نے تہانوں کامل مکتی دتی اے ، ناں پئی تہاڈے اپنے دلی تجربے دی گواہی نے ؟ کیہ تہاڈے دل وچ خُدا دا کلام ہیگا اے ؟ کیہ تہاڈے کول اوہ کلام ہیگا اے جنہے تہانوں پاپاں دی معافی دتی اے ؟ سچے ایمان نوں پاؤن لئی ایمان دے راہیں مکتی پاؤنی چاہی دی اے ۔
اسیں سچے دلوں خُدا دے کلام اُتے ایمان لیاؤن دے راہیں پاپاں توں مکتی پاؤندےآں ۔ پر ، جدوں اسیں ظاہری آدم دی کمزوریاں ول ویکھدے آں تاں بوہتے اسیں پریشان ہو جاندے آں ۔ تے فیر اسیں خُدا اُتے ایمان توں ہٹ کے بربادی ول ڈِگ پیندے آں ۔ ہر بندہ جیہڑا ایس سچ نوں مکمل طور اُتے نئیں سمجھدا اوہ ایسے اڑاؤنی وچ پیا اے ۔ بوہتے مسیحیاں نیں اپنے ایمان دی نگاہ دے نقطے نوں اپنے کماں اُتے رکھیا ہویا اے ۔ایہہ اک بوہت وڈی غلطی ہیگی اے ۔ لازمی ہیگااے پئی اسیں اپنے ایمان دا پورا ہونا ،اپنے خیالاں اُتے ناں رکھیے۔سانوں اپنے ایمان دی بنیاد نوں اپنے وکھالے اُتے جاری نئیں رکھنا چاہیداایس لئی پئی بدن بالکل نکما ہیگااے ۔ جدوں کوئی سچے دلوں خُدا دے کلام اُتے ایمان لیاؤندااے تاں پُرانا عہد نامہ تے نواں عہد نامہ سانوں دسدے نیں پئی اوہ راستباز بن جاندااے ۔اسیں اپنے کماں یاں خیالاں دے راہیں مکتی نئیں پاؤندے ،سگوں اپنے ایمان دے سبب توں۔ اسیں بدن دے کماں دے سبب کدی مکتی نئیں پا سکدے ،بھاویں اسیں نیکی دے کم کردے آں یاں پاپ کردے آں ،ایس گل دا خُدا تے اوہدے جلال نال کوئی تعلق نئیں ہیگا اے ۔
ایس لئی سچے ایمان دا مطلب ، دلوں خُدا دی سچی مکتی اُتے ایمان لیاؤن دے راہیں مکتی پاؤنا ایں۔جدوں ساڈے دل ای پاک نئیں تاں ساڈا ایمان وی ٹھیک نئیں تے جے ساڈا دل ٹھیک ہیگااے تاں ساڈا ایمان وی ٹھیک ہیگااے ۔ ٹھیک کم کرن دا ول ٹھیک ایمان دے راہیں آؤندااے ۔ بھیڑے کم اسیں ایس لئی کردے آں ،ایس لئی پئی دل ماڑا ہیگااے ۔ پر سب توں بوہتی خاص گل ایہہ ہیگی اے پئی خُدا دلاں اُتے ای نظر رکھدااے ۔خُدا دل اُتے نظر رکھدا تے ایہنوں تول دا اے ۔ خُدا دل نوں تول دا اے ،بھاویں ایہہ ٹھیک ہیگا اے یاں غلط ۔ خُدا تول دا اے پئی کیہ اسیں سچ مُچ دلوں ایمان رکھدے آں یاں نئیں۔کیہ تہانوں سمجھ آؤندی اے ؟ کیہ تہانوں پتہ ہیگا اے پئی خُدا ساڈے دلاں اُتے نظر رکھدا تے ایہناں نوں تول دا اے ؟ جدوں اوہ ساڈے دلاں نوں تول دا اے تاں اوہ ویکھ دا اے پئی کیہ اسیں یسوع اُتے سچے دل نال ایمان لیاؤندے آں یاں نئیں ۔ کیہ تسیں سچے دلوں ایمان لیائے او ؟
جدوں خُدا ساڈے دلاں نوں تول دااے تاں اوہ غور نال ویکھدا اے پئی کیہ اسیں دلوں ایمان رکھدے آں یاں نئیں ۔ اوہ ساڈے دلاں نوں اَزماؤندااے ۔ سانوں خُدا دے اگے اپنے دلاں نوں تولنا چاہی دا اے ۔ ختنہ اوہو ای جیہڑا دل دا اے ۔ کیہ تسیں دلوں ایمان لیاؤندے او ؟ پئی خُدا دلاں اُتے نظر رکھدااے ۔ اوہ ویکھدا اے پئی کیہ اسیں  سچ مُچ دلوں ایمان لیاؤندے آں یاں نئیں ۔ اوہ ایہہ وی ویکھدا اے پئی کیہ اسیں سچ مُچ سچیائی نوں جان دے آں یاں نئیں تے اسیں ایہنوں قبول کیتا اے یاں نئیں ۔اوہ ایس گل اُتے دھیان کردااے پئی کیہ اسیں دلوں ایمان لیاؤندے آں یاں نئیں تے ایہہ پئی اسیں اوہد ے کلام اُتے ایمان لیا کے اوہدے پِچھے چلنا چاؤہندے آں یاں نئیں ۔
 
 
ایتھے اک دینی ٹولی  ہیگی اے جیہڑی نویں سریوں جمن دے بالکل ٹھیک  ویلے نوں ای چنگیاں سمجھ دی اے
 
یسوع مسیح دے فرمان دے متعلق ، ٹھیک ٹھیک تعلیم ہونی ،تے ایہدے اُتے دلوں ایمان لیاؤنا بوہت اہم گل ہیگی اے ۔ایتھے اک دینی ٹولی ہیگی اے جیہڑے ساڈے گرجے دے بھراواں تے بھیناں نوں دسدے نیں پئی اوہ مکتی یافتہ نئیں ہیگے ۔ مینوں ایس دینی ٹولی دے سارے لوکاں اُتے بوہت ترس آؤندااے۔ میَں اوہناں نوں دسنا چاؤہنداساں پئی اوہ مینوں سمجھن تے اوہناں نوں پانی تے رُوح دی خوشخبری دین ۔ کیہ تہاڈے پاپ مک گئے نیں ؟—  آمین —  کیہ تسیں دلوں ایہدے اُتے ایمان رکھدے او ؟
پر ایتھے کئی لوک ایہو جیہے نیں جیہڑے آکھدے نیں پئی ساڈا ایمان ٹھیک نئیں ہیگا ۔اوہ آکھدے نیں پئی سانو ں کلام اُتے ایمان دی تھاں اُتے صرف سائنس دے اوہناں اولے کماں اُتے جنہاں نوں اوہ ثابت کردی اے ، ایمان رکھنا چاہی دا اے ۔ اوہ آکھدے نیں پئی ایہو ای کامل مکتی تے کامل ایمان ہیگااے ۔ اوہ آکھدے نیں پئی جدوں اک بندہ نویں سریوں جم دا اے تاں اوہدے لئی بالکل اوسے ویلے (گھنٹہ ، تاریخ ، مہینہ )نوں جاننا بوہت لوڑی دا اے ۔ جدوں بھرا ہیونگ اوہناں وچوں اک بندے نوں ملے ،تا ں اوس بندے نیں بھرا ہیونگ توں پُچھیا ۔ کدوں تسیں نویں سریوں جمے سو۔ ایس طرحاں بھرا ہیونگ نے جواب دتا پئی اوہناں نوں تاریخ تے گھنٹہ  تاں ٹھیک طرحاں یاد نئیں ،پر اوہ پانی تے رُوح دی خوشخبری اُتے ایمان لیاؤن دے راہیں ،پِچھلے ورہے گھٹوگھٹ ایس ویلے جمے سَن ۔فیر اوہنے آکھیا پئی بھرا ہیونگ نے حالے تیک مکتی نئیں پائی سی ۔  
بے شک اسیں بالکل ٹھیک گھڑی ،مہینہ تے دن بارے دس سکدے آں ۔ جے اسیں واپس جھاتی مارئیے پئی کدوں اسیں نویں سریوں جمے ساں ۔ایتھوں تیک پئی ایہہ وی دس سکدے آں پئی ایہہ صبح ، یا دوپہر یا شام دا یا ں کوئی وی ویلا سی ۔ پر ، مکتی دلوں ایمان لیاؤن اُتے پوری اُتردی اے ۔ ایہدا ایس گل نال کوئی تعلق نئیں پئی تہانوں ٹھیک ویلایاد ہیگا یاں نئیں یاں تسیں ایہنوں یاد رکھدے او یاں نئیں ۔
 
 
ختنہ اوہو ای جیہڑا دل دا اے
 
خُداوند نے ساڈے سارے پاپاں نوں یردن دے دریا اُتے اپنے اُتے چُک لیا سی تے ساڈے پاپاں لئی اوہدے اُتے سیاست کیتی گئی سی تے او ہ ساڈے لئی سولی اُتے مرگیا سی ۔ ساڈی غلطیاں دے سبب اوہ پھٹڑ ہویا تے ساڈی بدکاریاں لئی اوہنوں پھیہ دتا گیا سی ۔ اوہنے ساڈے ظاہرہون والے تے دل دے آدم دے سارے پاپاں نوں مکادتا اے ۔ساڈیاں رُوحاں فیر موت وچوں جیوں پئیاں نیں تے ہُن اسیں خُداونددے  پِچھے چل سکدے آں ،ایس لئی پئی اوہنوں ایس توں خوشی ہوندی اے تے فیر وی کئی لوک آکھدے نیں پئی اسیں مکتی یافتہ نئیں ہیگے ۔
پاک بائبل ظاہری آدم بارے کیہ آکھدی اے ؟پاپاں توں معافی پاؤن دے بعد چھیتی نال ،ساڈے اگے ہور بوہتیاں بدیاں تے کمزوریاں آجاندیاں نیں ۔ ساڈیاں اوہ ساریاں کمزوریاں جیہڑیاں حالے تیک لُکیا ں ہوئیاں نیں : اوہ ظاہر ہو جاندیاں نیں ۔پر، جے اسیں دلوں ایمان لیائیے پئی خُدا ساڈا خُدا ہیگااے تے ایہہ پئی یسوع نے یردن دے دریااُتے اپنے بپتسمے راہیں ساڈے سارے پاپاں نوں مکا دتا اے تےاوہدے سولی اُتے مرن نال اسیں مکتی پائی اے تاں فیر اسیں مکتی یافتہ ہیگے آں ۔
اسیں اوہناں لوکاں نال مقابلہ نئیں کر سکدے جیہڑے صرف اوس تاریخ  نوں ای خاص سمجھدے نیں جدوں اوہ نویں سریوں جمے سَن تے صرف او س گل اُتے ایمان رکھدے نیں  جنہوں  سائنس  ثابت  کر دی
اے ۔ یاد رکھو پئی ، اوہ مکتی یافتہ نئیں ہیگے ۔ اسیں راستباز بنن لئی دلوں ایمان لیاؤندے آں۔ کیہ تسیں ایمان رکھدے او پئی یسوع مسیح ساڈا مکتی داتا ہیگااے — آمین — ایمان ایسے نقطے توں شروع ہوندااے تے خُداوند اوسے ویلے توں ساڈے دلاں دی اگوائی کردا اے ۔خُداوند فرماؤنداے پئی ساڈے ایمان سچے ہیگے نیں تے اسیں اوہدےراستباز پُتر ہیگے آں ۔ اوہ سانوں برکتاں دیندا تے ساڈے توں چاؤہندااے پئی ایمان دے راہیں دلوں اوہدے اُتے ایمان لیائیے ۔ جدوں اسیں دلوں ایمان لیاؤن دے راہیں اوہدے نال چل دے آں تاں اوہ سانوں برکت اُتے برکت دیندااے ۔
” ختنہ اوہو ای جیہڑا دل دا اے۔ “ اسیں دلوں ایمان لیاؤن دے راہیں مکتی پائی اے ۔ بوہتے لوک ایس دھرتی اُتے ایہہ آکھدے نیں پئی اسیں خوشخبری اُتے ایمان لیاؤن دے راہیں مکتی پائی اے ۔ پر، اصل وچ او ہ اپنے ایمان وچ اپنے کماں نوں وی رلاؤندے نیں۔اوہ ظاہری آدم دے کماں نوں اپنے ایمان دی لازمی شرط سمجھدے نیں ۔اوہ آکھدے نیں پئی پانی تے رُوح دی خوش خبری اُتے ایمان تہانوں مکتی ول نئیں لَے کے جا سکدا ۔ایس لئی پئی اوہ اپنے نیکی دے کماں نوں تے ایمان نوں آپس وچ رَلا دیندے نیں ۔
نتیجہ طور اُتے ، اوہناں دا دھیان ایس گل اُتے بوہتا ہو جاندااے پئی ظاہری آدم نوں کویں پا ک کیتا جانا چاہی دااے تے ایس لئی اوہ بوہتے توبہ دیاں دعاواں ای کردے رہندے نیں ۔ بھاویں اوہناں دا خیال ہیگااے پئی اوہ مکتی یافتہ ہو گئے نیں تاں وی اوہ مکتی توں بوہت دُور ہیگے نیں۔
 
 
خُدا دلاں اُتے نظر رکھدااے
 
اسیں اپنے دلاں وچ راستباز بنن اُتے یقین رکھدے آں ۔ایہہ پکا پکا ظاہری جندڑی توں وکھ ایمان ہیگااے تے ساڈے کماں دا ایہدے وچ حصہ نئیں ہیگا ۔ مکتی دا ساڈے کماں نال کوئی رشتہ نئیں ہیگا اے ۔ کیہ ایہہ جانن دے بعدوں تسیں دلوں خوش ہیگے او پئی تہاڈے سارے پاپ مکا دتے گئے نیں ؟ کیہ تسیں خوش ہو کے خُداوند دی خدمت کرنا چاؤہندے او ؟ کیہ تسیں خوشخبری دی منادی خوشی نال کردے او؟ کیہ تسیں اپنے آپ نوں  اوہدے سوہنے کم   (مشن)  وچ  مصروف کرنا   چاؤہندے   او؟  جدوں اسیں اپنے دلوں ایمان لیاؤندے آں تاں ساڈے دل شکرگزاری نال بھر جاندے نیں ،ایس لئی پئی خُدا ساڈے دل دے ایمان نوں منظور کردااے ۔ ایس لئی ،خُدا دے اَگے دل بوہت خاص ہیگااے ۔