Search
پنجابی
پنجابی
کورونا وائرس تے عالمگیر ڈاک سروس وچ رکاوٹ دے سببوں، اَسیں اپنی ’مُلوں بغیر چھاپی ہوئی کتاب دی سروس‘ نوں تھوڑے چِر لئی بند کر دے پئے آں۔
ایس صورتحال دے چانن وچ اسیں ایس ویلے تہانوں کتاباں گھلن دے قابل نئیں ہیگے آں۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔

خطبے

مضمون 9: رومیوں (رومیوں دی کتاب اُتے تفسیر)

[6-2 باب] یسوع دے بپتسمے دا اصل مطلب <رومیوں ۶:۱ ۔ ۸>

>رومیوں ۶:۱ ۔ ۸>
” ایس  لئی اسیں کیہ آکھیے ؟ کیہ پاپ کردے رہیے تاں پئی فضل بوہتا ہووے ؟ بالکل نئیں ۔ اسیں جیہڑے پاپ ولوں مرگئے ،کویں اوہدے وچ آئندہ لئی حیاتی بسر کرئیے ؟ کیہ تہانوں نئیں پتہ پئی  اسیں جنیاں نیں مسیح یسوع وچ رَلن دا بپتسمہ لیا تاں اوہدی موت وچ رَلن دا بپتسمہ لیا ؟ ایس لئی موت وچ رَلن دے بپتسمے راہیں اسیں اوہدے نال دفن ہوئے ،تاں پئی جویں مسیح باپ دے جلال دے راہیں مویاں وچو ں جوایا گیا ،اوسے طرحاں اسیں وی نویں حیاتی وچ چلیے ۔ ایس لئی پئی جدوں اسیں اوہدی موت وانگر اوہدے نال جُڑ گئے تاں بے شک اوہدے زندہ ہون وانگر وی اوہدے نال جُڑاں گے ۔ ایس لئی سانوں پتہ ہیگا اے پئی ساڈی پرانی انسانیت اوہدے نال ایس لئی سولی اُتے مر گئی پئی پاپ والا بدن بیکار ہوجاوے تاں پئی اسیں اگانہہ توں پاپ دی غلامی وچ نہ رہیے ۔ایس لئی جیہڑا مریا اوہ پاپ ولوں چھُٹ گیا ۔ ایس لئی جدوں اسیں مسیح نال مر گئے تاں سانوں پک ہیگا اے پئی اوہدے نال جیواں گے وی ۔ “
 
 

بپتسمے دا کیہ مطلب ہیگا اے ؟

 
اسیں یوحنا نوں ، جنہے یسوع نوں بپتسمہ دتاسی ، یوحنا بپتسمہ دین والا آکھدے آں ۔ فیر بپتسمہ دا کیہ مطلب ہیگا اے ؟ ” بپتسمہ “ نوں یونانی وچ   “βάφτισμα” آکھدے نیں ۔ ایہدا مطلب ، ” ڈُبنا، غرق ہونا“ہیگا اے ۔ بپتسمے دا سب توں خاص مطلب    ” پاپ تے موت نوں مکاؤنا “ ہیگا اے ۔
اکھر  ” غرق ہونا “ موت دی گل کردااے ۔ جگ دے سارے پا پ یسوع اُتے لدے گئے سَن جدوں یوحنا بپتسمہ دین والے نے اوہنوں بپتسمہ دتا تے اِنج اوہنے اوہناں نوں مکایا تے ساڈے پاپاں دا مُل اُتارن لئی سولی اُتے مرگیا سی ۔ یسوع ساڈے بدلے مریا سی ۔ موت دا مطلب ہیگا اے پاپ  دا  پھل ایس
لئی پئی ، ” پاپ دی پھل موت ہیگی اے ۔“ (رومیوں ۶:۲۳)۔
بپتسمے دے مطلب ” دھودینا“ وی ہیگا اے ۔ ساڈے سارے پاپ چنگی طرحاں دُھل گئے سَن ،ایتھوں تیک پئی نکا جیہا پاپ وی نئیں چھڈیا، ایس لئی پئی یسوع نے بپتسمے راہیں ایس جگ دے سارے پاپ اپنے اُتے چُک لَے ۔ ایس لئی پئی لوکاں دے سارے دلی پاپ بپتسمے دے راہیں یسوع اُتے لد دتے گئے ،ایس لئی اوہ دُھل گئے نیں ۔
بپتسمے دا اِکوای  مطلب ایہہ ہیگا اے پئی ،  ” ہتھ رکھنا۔“  ہتھ رکھن دا مطلب ہیگا اے ” لد دینا ۔ “ یسوع دا یوحنا بپتسمہ دین والے کولوں بپتسمہ لین دا کم جگ دے سارے پاپاں دا بھار سہنا سی ۔ ایہہ خُدا دی مکتی دی ہمیشگی والی  شریعت ہیگی سی ،پئی کاہن  پاپ دی قربانی اُتے ہتھ رکھ کے  اِسرائیل دے سارے پاپاں نوں ستویں مہینے دی دس تاریخ نوں اوہدے اُتے لد دیندا سی ۔
احبار ۱۶ : ۲۱ ۔ ۲۲وچ لکھیا اے ۔  ” تے ہارون اپنے دونویں ہتھ اوس جیوندے بکرے دے سر اُتے رکھ کے اوہدے اُتے بنی اِسرائیلی دیاں ساریاں بدکاریاں تے اینا ں دے سارے پاپاں تے غلطیاں دا اقرار کرے تے ایناں نوں ایس بکرے دے سر اُتے رکھ کے اوہنوں کسے بندے دے ہتھ جیہڑا ایس کم لئی تیار ہووے جنگل وچ گھل دیوے ۔ تے اوہ بکرا اوہناں دیاں ساریاں بدکاریاں اپنے اُتے چُک کے کسے بے آباد تھاں اُتے لَے جاوے گا ۔ ایس لئی اوہ اوس بکرے نوں جنگل وچ چھڈ دیوے ۔“ جدوں ہارون ، وڈاکاہن ،اپنے ہتھ جیوندے بکرے دے سر اُتے رکھ دیندا تاں اوہ بکرا اِسرائیل دے سارے پاپاں نوں چُک لیندا تے اوہ لوکاں لئی قربان ہوندا سی ۔
 
 

 پُرانے عہد نامے وچ ، ”پاپاں دی قربانی اُتے ہتھ رکھنا “ نویں عہد نامے وچ   ” بپتسمہ “ وانگر ہیگا اے ۔

 
بپتسمے دا مطلب ،  ” غرق ہونا “ ہیگا اے ۔ایہدے وچ    ” دفن ہونا ، دھودینا یاں اُتے رکھنا ، لد دینا “ شامل ہیگا اے ۔ پُرانے عہد نامے وچ لوک پاک بکرا یاں میمنا لیاؤندے تے اپنے ہتھ اوہدے اُتے رکھ کے اپنے پاپ اوہدے اُتے لد دیندے سَن ۔ نویں عہد نامے وچ بالکل ایہو ای کم بپتسمے دا  ہیگا  اے ۔ بکرے اُتے ، ” ہتھ رکھن نال  “ اوہ اوہناں دے پاپ چُک لیندا سی تے قربان ہو جاندا سی ۔ یسوع نے یوحنا بپتسمہ دین والے کولوں ،جیہڑا سارے لوکاں دا نمائندہ ہیگا اے ،جگ دے سارے  پاپاں نوں مکاؤن لئی بپتسمہ لیا تے سولی اُتے مر گیا سی ۔
ہارون، جیہڑا وڈاکاہن تے اِسرائیل دا نمائندہ ہیگا سی ، اِسرائیل دے پاپاں نوں مکاؤن لئی اپنے ہتھ بکرے دے سراُتے رکھدا سی ، بکرے نوں قربان کردا تے اوہدے لہو وچ اُنگل ڈبو کے اگ والی قربانی وانگر قربان گاہ دے سنگاں اُتے لاؤنداسی ۔ ایس لئی ، لوقا نے آکھیا پئی یوحنا بپتسمہ دین والا ،جیہڑا ہارون دے خنوادے وچوں جمیا سی ، سارے لوکاں دا نمائندہ ہیگا سی ،اوسے طرحاں جویں پئی وڈاکاہن ہارون اِسرائیلیاں دا نمائندہ ہیگا سی ۔
بائبل دسد ی اے ، ” میَں تہانوں سچ دسداہاں پئی جیہڑے زنانیاں وچوں جمے نیں ،اوہناں وچوں یوحنا بپتسمہ دین والے توں وڈا کوئی نئیں ہویا ۔“(متی ۱۱:۱۱)۔یوحنا بپتسمہ دین والے کول طاقت ہیگی سی پئی اوہ جگ دے پاپاں نوں خُدا دے ہمیشگی دے قانون مطابق اِکو ای وار ہمیشہ ہمیشہ لئی جگ دا وڈا کاہن ہون دے سبب یسوع اُتے لد دیوے ۔ یوحنا بپتسمہ دین والا اخیری وڈاکاہن ہیگا سی ۔ جدوں میَں آکھدا ہاں پئی یوحنا بپتسمہ دین والا وڈا کاہن ہیگا سی ، تاں کئی لوک آکھدے نیں ، ” بائبل وچ کتھے لکھیا اے پئی یوحنا بپتسمہ دین والا وڈا کاہن ہیگا سی ؟ “ کیہ ایہہ نئیں لکھیا ؟ اوہ بندہ جیہڑا زکریاہ وچوں جمیا سی یوحنا بپتسمہ دین والا سی ۔ کاہن زکریاہ ابیاہ کاہن دے قبیلے وچوں ہیگا سی ،جیہڑا وڈے کاہن ہارون دا پوترا ہیگا سی ، اوہ کھلے طور اُتے ہارون دے خنوادے وچوں ہیگا سی ۔
بائبل ۱ ۔ تواریخ ۲۴ باب اوہناں کاہناں دے ونڈ بارے دسدی اے جیہڑے وڈے کاہن دے پُتر ہیگے سَن ۔داؤد دے اخیری دیہاڑیاں وچ ، بوہت سارے کاہن سَن تے اوہناں دا بندوبست کرن دی لوڑی ہیگی سی ۔اِنج اوہ پرچیاں پاؤن دے راہیں ۲۴ حصیاں وچ ہارون دے وڈے پُتراں دے ۲۴ خنوادیاں مطابق بنے ۔ اٹھویں پرچی ابیاہ دے نام دی ہیگی سی ۔ہر ٹولا ہیکل تے خُداوند دے گھر دی ۱۵ دناں تیک خدمت کرداسی ۔ تےزکریاہ ابیاہ دے خنوادے دا کاہن ہیگا سی تے جدوں اوہ اپنے حصے دا قرض لاؤہندا پیا سی تاں خُدا نے اوہنوں چُن لیا سی ۔
لوقا۱: ۹ فرماؤندااے  ” پئی کہانت دی رسم مطابق اوہدے نام دی پرچی نکلی پئی خُداوند دے گھر وچ جا کے خوشبو بالے ۔“ ایس طرحاں سانوں پتہ لگدااے پئی یوحنا بپتسمہ دین والا وڈے کاہن ہارون دے خنوادے وچ جمیا سی ، تےاخیری وڈاکاہن بنیا جیہڑا سارےلوکاں دی  اَگوائی کرے گا ۔ (۱۱:۱۱ ،۳ : ۱۳ ۔۱۷)۔شریعت دے مطابق صرف اوہو ای بندہ وڈا کاہن بن سکدا سی جیہڑا وڈے کاہن دے خنوادے وچ جمیا ہووے ۔ صرف شیر ای شیر دے بچے نوں جم سکدا اے ۔ یوحنا بپتسمہ دین والےنے وڈے کاہن ہارون دی کہانت لَے لئی ایس لئی اوہ ہارون دے خنوادے دا بندہ ہیگا سی ۔
 
 

یسوع دے رسولا ں نیں یسوع دے بپتسمے دے گواہی دتی

 
سارے  رسولاں نیں  خاص کر پولُس ،پطرس ، متی تے یوحنا نے یسوع دے بپتسمے دے گواہی دتی ۔ آؤ پولُس دی گواہی دے لکھے ہوئے اج دے خاص حوالیاں اُتے دھیان کرئیے ۔ ”ایس لئی اسیں کیہ آکھیے ؟ کیہ پاپ کردے رہیے تاں پئی فضل بوہتا ہووے ؟ بالکل نئیں ۔ اسیں جیہڑے پاپ ولوں مرگئے ،کویں اوہدے وچ آئندہ لئی حیاتی بسر کرئیے ؟ کیہ تہانوں نئیں پتہ پئی  اسیں جنیاں نیں مسیح یسوع وچ رَلن دا بپتسمہ لیا تاں اوہدی موت وچ رَلن دا بپتسمہ لیا ؟ ایس لئی موت وچ رَلن دے بپتسمے راہیں اسیں اوہدے نال دفن ہوئے ،تاں پئی جویں مسیح باپ دے جلال دے راہیں مویاں وچو ں جوایا گیا ،اوسے طرحاں اسیں وی نویں حیاتی وچ چلیے ۔ ایس لئی پئی جدوں اسیں اوہدی موت وانگر اوہدے نال جُڑ گئے تاں بے شک اوہدے زندہ ہون وانگر وی اوہدے نال جُڑاں گے ۔ ایس لئی سانوں پتہ ہیگا اے پئی ساڈی پرانی انسانیت اوہدے نال ایس لئی سولی اُتے مر گئی پئی پاپ والا بدن بیکار ہوجاوے تاں پئی اسیں اگانہہ توں پاپ دی غلامی وچ نہ رہیے ۔ایس لئی جیہڑا مریا اوہ پاپ ولوں چھُٹ گیا ۔ ایس لئی جدوں اسیں مسیح نال مر گئے تاں سانوں پک ہیگا اے پئی اوہدے نال جیواں گے وی “ (رومیوں ۶:۱۔۷)۔
گلتیوں ۳ : ۲۷ وی دسدااے ،   ” تے تسیں سارے جنیاں نیں مسیح وچ رَلن دا بپتسمہ لیا ،مسیح نوں لیڑیاں وانگر پا لیا ۔ “ آؤ پطرس رسول دی گواہی نوں ۔۱ پطرس ۳ : ۲۱ وچ ویکھدے آں ، ” تے اوسے پانی وانگر وی مطلب اے بپتسمہ یسوع مسیح دے جی اُٹھن دے راہیں ہُن تہانوں بچاؤندا اے ۔ اوہدے نال بدن دی پلیتی مکاؤنا مطلب نئیں سگوں خاص نیت نال خُدا دی طلب کرنا ،مطلب ہیگا اے ۔ “
یوحنا رسول ۱ ۔یوحنا ۵ : ۵ ۔ ۸ وچ  آکھدا  اے ،    ” جگ اُتے فتح پاؤن والا کیہڑا ہیگا اے ، صرف
اوہو بندہ ہیگا اے ،جیہدا ایہہ ایمان ہیگا اے پئی یسوع خُدا دا پُتر ہیگا اے ؟ ایہو ای اوہ ہیگا اے جیہڑا پانی تے لہو دے راہیں آیا سی مطلب اے یسوع مسیح ۔اوہ نہ صرف پانی دے راہیں سگوں پانی تے لہو دونواں دے راہیں آیا سی ۔تے جیہڑا گواہی دیندااے اوہ رُوح ہیگا اے ،ایس لئی رُوح سچیائی ہیگا اے ۔ تے گواہی دین والے تِن ہیگے نیں ۔ رُوح تے پانی تے لہو تے ایہہ تِنوں اِکو ای گل اُتے راضی ہیگے نیں ۔ “
متی دی گواہی متی ۳ : ۱۳ ۔ ۱۷ وچ لکھی ہوئی اے ، ” اوس ویلے یسوع گلیل توں یردن دے کنارے یوحنا کول اوہدے کولوں بپتسمہ  لین آیا ۔ پر یوحنا ایہہ آکھ کے اوہنوں روکن لگا پئی میَں آپ تیرے کولوں بپتسمہ لین دی آس رکھدا ہاں تے تُوں میرے کول آیا ایں ؟ یسوع نے جواب دیندیاں اوہنوں آکھیا ،ہُن تُوں ہون ای دے ایس لئی پئی ساڈے لئی ایسے طرحاں ساری راستبازی پوری کرنا ، چنگا ہیگا اے ۔ اِنج اوہنے ہون ای دِتا ۔ تے یسوع بپتسمہ لَے کے چھیتی نال پانی کولوں اُتے گیا تے ویکھو اوہدے لئی اَسمان کھُل گیا تے اوہنے خُدا دے رُوح نوں کبوتر وانگر اُتردیاں تے اپنے اُتے آؤندیاں ویکھیا ، تےویکھو اَسمان اُتوں ایہہ آواز آئی پئی ایہہ میرا سوہنا پُتر ہیگا اے جیہدے توں میَں خوش ہیگا واں ۔ “
یسوع نے یوحنا بپتسمہ دین والے  کولوں بپتسمہ لَے کے جگ دے سارے پاپاں نوں چُک لیا ۔” ایس لئی پئی ساڈے لئی ایسے طرحاں ساری راستبازی پوری کرنا ، چنگا ہیگا اے ۔ “ یسوع نے یوحنا بپتسمہ دین والے  کولوں بپتسمہ لین دے راہیں ایس جگ دے سارے پاپاں نوں اپنے اُتے چُک لیا ، جیہڑا پئی بوہت ودھیا طریقہ ہیگا سی ۔ خُدا نے آپ ایہہ گواہی دتی ،   ” تے یسوع بپتسمہ لَے کے چھیتی نال پانی کولوں اُتے گیا تے ویکھو اوہدے لئی اَسمان کھُل گیا تے اوہنے خُدا دے رُوح نوں کبوتر وانگر اُتردیاں تے اپنے اُتے آؤندیاں ویکھیا ، تےویکھو اَسمان اُتوں ایہہ آواز آئی پئی ایہہ میرا سوہنا پُتر ہیگا اے جیہدے توں میَں خوش ہیگا واں ۔ “ یسوع نے اپنے بپتسمے دے راہیں ساڈے سارے پاپ چُک لَے ،پانی تے رُوح دی خوشخبری دی ۳ ورہیاں تیک گواہی دتی تے سولی اُتے مرگیا تے تیجے دیہاڑے مویاں وچوں جیوں اُٹھیا ۔ ہُن اوہ خُدا دے سجے ہتھ بیٹھا ہویا اے ۔
یسوع فیر اوہناں نوں لین آوے گا جیہڑے بے پاپ اوہنوں اُڈیک دے نیں ۔ عبرانیوں ۹ : ۲۸ دسدااے ، ” اوسے طرحاں مسیح وی اِکو وار سارے لوکاں دے پاپ چُکن لئی قربان ہو کے دوجی وار بے پاپ مکتی لئی اوہناں نوں نظر آوے گا جیہڑے اوہدا راہ ویکھدے نیں ۔ “ خُدا نے آپ آکھیا ، ” ایہہ میرا سوہنا پُتر ہیگا اے جیہدے توں میَں خوش ہیگا واں ۔ “تے پا ک رُوح نے گواہی دتی اے پئی اوہ بندہ جنہے جگ دے سارے پاپ چُک لَے اوہ یسوع ، مکتی داتا ہیگا سی ۔ پر لوک خُدا دے  کلام نوں نئیں سمجھدے ،ایس لئی پئی اوہناں دیاں رُوحانی اکھیاں بند ہیگیاں نیں ۔ اوہناں دیاں رُوحانی اکھیاں کُھل جانیاں  چاہی دیاں نیں تے اوہناں نوں پانی تے رُوح دے راہیں نویں سریوں جمنا چاہی دا اے (یوحنا ۳ : ۵)۔
ایس لئی اوہ سوچدے نیں پئی صرف یسوع اکلے نیں لوکاں دی مکتی لئی خدمت کیتی اے ۔پر اصل وچ ،یسوع خُدا دا میمنا ہیگا سی تےاوہنوں یوحنا بپتسمہ دین والے دی لوڑ ہیگی سی ، جیہڑے سارے لوکاں دا آگُو ہیگا سی تے جنہے جگ دے سارے پاپاں نوں اوہدے اُتے لدیا ۔ ایس لئی پئی وڈاکاہن ہارون ایسے طرحاں پاپ دے قربانی اُتے ہتھ رکھ کے (جیوندے بکرےاُتے )سارے اِسرائیل دے پاپ ہتھ رکھن نال پاپ دی قربانی لئی اوہدے اُتے لد دینداسی ۔ ایس لئی خُدا نے یسوع توں پہلاں اپنے پیغمبر نوں گھلیا ۔
 
 
یوحنا بپتسمہ دین والا کون ہیگا اے ؟
 
یوحنا بپتسمہ دین والا خُداداپیغمبر ہیگا سی جیہدے بارے ملاکی ۳ : ۱ ۔۳ وچ پیشن گوئی کیتی گئی اے۔ خُداوند نوں اپنے خادم یوحنا بپتسمہ دین والے دی لوڑ ہیگی سی جیہڑا سارے لوکاں دی اگوائی کرے گا ۔ یسوع مسیح ، خُدا دے پُتر نے سارے جگ دےسارے پاپاں نوں ہمیشہ لئی یوحنا بپتسمہ دین والے دے راہیں دُور کیتا تے نویں عہد نامے وچ پاپاں دا مُل اُتارن لئی سولی اُتے مرگیا سی ۔ پر پُرانے عہد نامے وچ بھیڈ اُتے اک خاص ویلے دے پاپا ں نوں ای رکھیا جاندا سی تے اوہناں قربان کیتا جاندا سی ۔ ایس لئی ، یسوع نے سارے لوکاں نوں ہمیشگی دے پاپاں توں مکتی دتی اے ۔
یسوع دے جمن توں پہلاں دو وڈے کم ہوئے سَن ۔ اک ایہہ ہیگا سی پئی پاک مریم پاک رُوح دی طاقت نال حاملہ ہوئی تے دوجا ایہہ ہیگا سی پئی یوحنا بپتسمہ دین والا ابیاہ دے خنواد ے وچ جمیا سی ۔ ایہہ دو کم خُدادے فضل نال ہوئے سَن ۔ ایہہ اک مکمل کھیڈسی جیہڑی خُدا نے آپ لکھی سی ۔ خُدا نے یوحنا بپتسمہ دین والےنوں یسوع توں ۶ مہینے پہلاں جگ وچ گھلیا تے فیر اپنے اکلے پُتر نوں گھلیا پئی سانوں ایس جنگ تے پیڑ توں چھڈاوے ۔ کیہ تہانوں سمجھ آگئی اے ؟ آؤپاک بائبل وچوں ہور ڈونگھیاں گلاں ویکھدے
آں ۔
آؤ اسیں متی ۱۱ : ۷ ۔ ۱۴ وچ ویکھیے جیہدے وچ یوحنا بپتسمہ دین والے دے بارے گواہی ہیگی اے ۔  ” جدوں اوہ ٹُر پئے تاں یسوع نے یوحنا بارے لوکاں نوں دسنا شروع کیتا پئی تسیں جنگل وچ کیہ ویکھن گئے سو؟ کیہ ہوا نال ہِلدے ہوئے کانے نوں ؟ تاں فیر کیہ ویکھن گئے سو؟ کیہ باریک لیڑے پا ئے ہوئے بندے نوں ؟ ویکھو جیہڑے باریک لیڑے پاؤندے نیں اوہ بادشاہواں دے گھراں وچ ہوندے نیں ۔ تاں فیر کیوں گئے سو ؟ کیہ اک نبی ویکھن لئی ؟ آہو ،میَں تہانوں آکھداہاں سگوں نبی توں وڈے نوں ۔ ایہہ اوہو ای ہیگا اے جیہدے بارے لکھیا اے پئی ،ویکھ میَں اپنا پیغمبر تیرے اگے گھلدا ہاں جیہڑا تیراراہ تیرے اگے بناوے گا ۔ میں تہانوں سچ آکھدا ہاں پئی جیہڑے زنانیا ں وچوں جمے نیں اوہناں وچوں یوحنا بپتسمہ دین والے  توں وڈا کوئی نئیں ہویا پر جیہڑا اَسمانی بادشاہی وچ نکا ہیگا اے اوہ اوہدے توں وڈا ہیگا اے تے یوحنا بپتسمہ دین والے  دے دناں توں لَے کے ہُن تیک اَسمانی بادشاہی اُتے زور ہوندا رہیا اے تے طاقت والے اوہنوں کھوہ لیندے نیں ۔ایس لئی پئی ساریاں نبیاں تے توریت نے یوحنا تیک نبُوّت کیتی تے دل کرے تاں منو ۔ایلیاہ جیہڑا آؤن والا سی ، ایہو ای ہیگا اے ۔ “
لوک جنگل وچ یوحنا بپتسمہ دین والے نوں ویکھن گئے ، جیہڑا پکارداسی ،  ” توبہ کرو ایس لئی پئی اَسمانی بادشاہی نیڑے آگئی اے“ (متی ۳:۲)۔ یسوع نے اوہناں توں پچھیا ، ” پئی تسیں جنگل وچ کیہ ویکھن گئے سو؟ کیہ ہوا نال ہِلدے ہوئے کانے نوں ؟ تاں فیر کیہ ویکھن گئے سو؟ کیہ باریک لیڑے پا ئے ہوئے بندے نوں ؟ ویکھو جیہڑے باریک لیڑے پاؤندے نیں اوہ بادشاہواں دے گھراں وچ ہوندے نیں ۔ تاں فیر کیوں گئے سو ؟ کیہ اک نبی ویکھن لئی ؟ آہو ،میَں تہانوں آکھداہاں سگوں نبی توں وڈے نوں ۔ “
پُرانے عہد نامے وچ ، اک نبی کول بادشاہواں توں بوہتی طاقت ہوندی سی ۔بادشاہواں نیں جو کُجھ نبیاں نیں آکھیا ، اوہدا آکھیا منیا ۔ کیہڑا پُرانے عہد نامے وچ بادشاہواں تے نبیاں توں ودھ کے طاقت والا ہیگا سی ۔اوہ یوحنا بپتسمہ دین والا ہیگا سی ۔ یسوع نے آپ اوہدی گواہی دتی ۔ کیہڑا سارے لوکاں دا آگُو ہیگا سی ۔ یسوع توں ہٹ کے ، اوہ کیہڑا ہیگا سی جیہڑا بدن رکھدا تے سارے لوکاں دا آگُو ہیگا سی ؟ اوہ یوحنا بپتسمہ دین والا ہیگا سی ۔ یوحنا بپتسمہ دین والا سارے لوکاں دا دھرتی اُتے وڈاکاہن  ہیگا سی ۔خُداوند نے آپ اوہنوں مقرر کیتا تے جگ وچ گھلیا تے اوہنے اپنا کم کیتا سی ۔
” تاں فیر کیوں گئے سو ؟ کیہ اک نبی ویکھن لئی ؟ آہو ،میَں تہانوں آکھداہاں سگوں نبی توں وڈے نوں ۔ ایہہ اوہو ای ہیگا اے جیہدے بارے لکھیا اے پئی ،ویکھ میَں اپنا پیغمبر تیرے اگے گھلدا ہاں جیہڑا تیراراہ تیرے اگے بناوے گا ۔ “
یسعیاہ نے نبُوّت کیتی پئی یروشلیم وچوں جنگ مک جاوے گی ۔اسیں ویکھدے آں پئی ایہہ پیشین گوئی اوس ویلے پوری ہوئی جدوں یوحنا بپتسمہ دین والے نے آکھیا ، ” ویکھو ایہہ خُدا دا میمنا ہیگا اے جیہڑا جگ دا پاپ چُک کے لَے جاندا اے ۔“ (یوحنا ۱:۲۹)یوحنا بپتسمہ دین والے نے گواہی دتی پئی یسوع خُدا پُتر ہیگا سی تے اوہ جگ دے سارے پاپاں نوں چُک کے لَے گیا ۔
دوجے پاسے ، یسوع نے گواہی دتی پئی یوحنا بپتسمہ دین والا خُدا دا اوہ پیغمبر ہیگا سی جیہڑاآؤن والا ہیگا سی ۔ متی ۱۱ : ۱۱ وچ لکھیا اے ،”جیہڑے زنانیاں وچوں جمے نیں اوہناں وچوں یوحنا بپتسمہ دین والے  توں وڈا کوئی نئیں ہیگا اے۔ “ کیہ جیہڑے زنانیاں وچوں جمے اوہنا ں وچوں کوئی یوحنا بپتسمہ دین والے توں وڈا ہیگا اے ؟ نئیں ۔ فیر  ” جیہڑے زنانی وچوں جمے نیں ۔“دا کیہ مطلب ہیگا اے ؟ ایہدا مطلب ہیگا اے  ” جگ دے سارے لوک ۔“ ”جیہڑے زنانیاں وچوں جمے نیں اوہناں وچوں یوحنا بپتسمہ دین والے  توں وڈا کوئی نئیں ہیگا اے۔“ دے اکھراں دا مطلب ہیگا اے پئی یوحنا بپتسمہ دین والا ایس جگ دے سارے لوکاں دا آگُو ہیگا سی ۔ ایس لئی پئی اوہ ہارون دے خنوادے وچ جمیا سی ،ایس لئی اوہ وڈا کاہن ہیگا سی ۔
 
 
یوحنا بپتسمہ دین والا ایس جگ دے سارے لوکاں دا آگُو ہیگا سی
 
کیہ تہاڈا ایمان ہیگا اے پئی یوحنا بپتسمہ دین والا جگ دے سارے لوکاں دا آگُو تے وڈا کاہن ہیگا سی جنہے ساڈے پاپاں نوں ایہہ جاندے ہوئیاں یسوع اُتے لدیا پئی خُدا نے ہارون تے اوہدے خنوادے نوں پُرانے عہد نامے وچ ہمیشہ لئی کہانت دا کم کرن لئی مقرر کیتا سی ؟
کیہڑا سارے لوکاں دا آگُو ہیگا سی ؟ تے یسوع توں ہٹ کے ، سارے لوکاں دا جیہڑے بدن وچ ہیگے نیں ،آگُو کیہڑا ہیگا سی ؟ اوہ یوحنا بپتسمہ دین والاہیگا سی ،جنہے یسوع نوں بپتسمہ دتا سی ۔
” آہو ،میَں تہانوں آکھداہاں سگوں نبی توں وڈے نوں ۔ ایہہ اوہو ای ہیگا اے جیہدے بارے لکھیا اے پئی ،ویکھ میَں اپنا پیغمبر تیرے اگے گھلدا ہاں جیہڑا تیراراہ  تیرے  اگے
بناوے گا ۔ “
تے اوہو ای بندہ ہیگا اے جنہے گواہی دتی ، ” ویکھو ایہہ خُدا دا میمنا ہیگا اے جیہڑا جگ دا پاپ چُک کے لَے جاندا اے !“(یوحنا ۱:۲۹ )، یوحنا بپتسمہ دین والاہیگا سی ۔
یسوع نے آکھیا ، ” تے یوحنا بپتسمہ دین والے دے دناں توں لَے کے ہُن تیک اَسمانی بادشاہی اُتے زور ہوندا رہیا اے تے طاقت والے اوہناں کھوہ لیندے نیں ،ایس لئی پئی سارے نبیاں تے توریت نے یوحنا تیک نبُوّت کیتی اے ۔ “(متی  ۱۱ : ۱۲ ۔۱۳)۔ایہہ حوالہ وکھاؤندااے پئی یسوع نے یوحنا بپتسمہ دین والے کولوں بپتسمہ لین دے راہیں جگ دے سارے پاپاں نوں چُک لیا تے سارے لوکاں دا مکتی داتا بن گیا  ۔ ایہہ وی وکھاؤندا اے پئی یوحنا بپتسمہ دین والے نے جگ دے سارے پاپاں نوں یسوع اُتے لد دتا سی ۔ یسوع نے آپ بالکل ایسےطرحاں آکھیا ۔ ایہدا مطلب ہیگا اے پئی یوحنا بپتسمہ دین والے نے سارے جگ دے پاپ یسوع اُتے لد دتے تے جیہڑا وی اسی سچیائی اُتے ایمان لیاؤندااے اپنے سارے پاپاں توں مکتی پا گیا اے تے اَسمانی بادشاہی وچ جاوے گا ۔ کیہ ایہہ سچ ہیگا اے یاں جھوٹ؟ ایہہ خُدا دے کلام دے مطابق بالکل سچ ہیگا اے،تے ایس طرحاں اسیں جیہڑے بائبل دی سچیائی دے مناد ہیگے آں ،عزت نال ایہنوں دوجیاں تیک پوہنچا سکدے آں ۔ جیہڑا وی سچیائی اُتے ایمان لیاوے اوہ اَسمانی بادشاہی وچ جاوے گا ۔
 
 
یوحنا بپتسمہ دین والے نے پُرانے عہد نامے دے آخری وڈے کاہن وانگر جگ دے پاپاں نوں یسوع اُتے لد دتااے
 
زکریاہ ، یوحنا بپتسمہ دین والے دے باپ نے خُداوند دے اک فرشتے کولوں سُنیا۔ آؤ زکریاہ دی اپنے پُتر بارے گواہی نوں جانچدے آں ۔ کیہ اوہدے باپ دی گواہی دوجے لوکاں توں ودھ کے ٹھیک نئیں ہیگی ؟ آؤ اسیں اوہدی گواہی نوں جیہڑی اک زبور وانگر گائی گئی اے ، ویکھدے آں۔ ” تے اوہدا باپ زکریاہ پاک رُوح نال بھرگیا تے نبُوّت دے راہیں آکھن لگا پئی خُداوند اِسرائیل دے خُدا دی تعریف ہووے ،ایس لئی پئی اوہنے اپنی قوم ول دھیان کر کے اوہنوں مکتی دتی تے اپنے خادم داؤد دے خنوادے وچ ساڈے لئی مکتی دا سنگ کڈھیا (جویں اوہنے پاک نبیاں دی زبانی آکھیاسی جیہڑے پئی جگ دے شروع توں آؤندے پئے نیں)مطلب اے سانوں ساڈے ویریاں توں تے سارے سڑن والیاں دے ہتھوں ،چھڈایا اے ۔ تاں پئی ساڈے باپ دادے اُتے ترس کھاوے ۔ تے اپنے پاک وعدے نوں یاد کرے ۔ مطلب اے اوس قسم نوں جیہڑی اوہنے ساڈے باپ ابرہام نال کھاہدی سی ۔ پئی اوہ سانوں ایہہ دیوے گا اپنے ویریاں دے ہتھوں چھٹ کے ۔ اوہدے اگے پاکیزگی تے راستبازی نال ساری عمر نڈر ہوکے اوہدی بندگی کرئیے ۔ تے اَے لڑکے تُوں خُداتعالیٰ دا نبی اکھوائے گا ،ایس لئی پئی تُوں خُداوند دے راہ بناؤن لئی اوہدے اگے اگے ٹُریں گا تاں پئی اوہدی قوم نوں مکتی دی تعلیم دیویں جیہڑی اوہناں نوں پاپاں دی معافی نال ملے ۔ ایہہ ساڈے خُدا دی بالکل رحمت نال ہووے گا ،جیہدے سبب نال اَسمان دا سورج ساڈے اُتے چمکا وے گا۔ تاں پئی اوہناں نوں جیہڑے ہنیرے تے موت دے پرچھانویں ہیٹھ بیٹھے ہوئے نیں ،نُور دیوے تے ساڈے پیراں نوں چنگیائی دے راہ اُتے پاوے تے اوہ لڑکا ودھدا تے رُوح وچ طاقت ور ہوندا گیا تے اِسرائیل اُتے ظاہر ہونے والے دن تیک جنگلاں وچ رہیا ۔ “ (لوقا ۱:۶۷ ۔ ۸۰)۔
اوہدے باپ نے پیشن گوئی کیتی پئی یوحنا کس طرحاں دا نبی تے کاہن ہووے گا ۔ آؤ اوس پیشن گوئی نو ں ویکھیے جیہڑی اوہنے اپنے پُتر لئی کیتی سی ۔” اَے لڑکے تُوں خُداتعالیٰ دا نبی اکھوائے گا ،ایس لئی پئی تُوں خُداوند دے راہ بناؤن لئی اوہدے اگے اگے ٹُریں گا تاں پئی اوہدی قوم نوں مکتی دی تعلیم دیویں جیہڑی اوہناں نوں پاپاں دی معافی نال ملے ۔ ایہہ ساڈے خُدا دی بالکل رحمت نال ہووے گا ،جیہدے سبب نال اَسمان دا سورج ساڈے اُتے چمکا وے گا۔ تاں پئی اوہناں نوں جیہڑے ہنیرے تے موت دے پرچھانویں ہیٹھ بیٹھے ہوئے نیں ،نُور دیوے تے ساڈے پیراں نوں چنگیائی دے راہ اُتے پاوے۔“ (لوقا ۱: ۷۶ ۔ ۷۹)۔
ایتھے ، بائبل کھل کے گل کردی اے ” تاں پئی اوہدی قوم نوں مکتی دی تعلیم دیویں جیہڑی اوہناں نوں پاپاں دی معافی نال ملے ۔“ کون سانوں مکتی دی تعلیم دیوے گا ؟ لوقا ۱:۷۶ اشارہ کردا اے پئی یوحنا بپتسمہ دین والا ہیگا اے ۔ اسیں یسوع نوں جان گئے تے اوہدے اُتے ایمان رکھدے آں ایس لئی پئی یوحنا نے گواہی دتی پئی یسوع مسیح نے پاپیاں نوں اوہناں دے پاپاں توں ،اوہدے توں بپتسمہ لین دے راہیں مکتی دتی پئی اوہناں دے پاپاں نوں مکاوے، جیہڑا اوہنے بوہت عدل تے انصاف نال کیتا ۔ یوحنا بپتسمہ دین والا،   ” ایہہ گواہی دین لئی آیا پئی نُو ر دی گواہی دیوے ،تاں پئی سارے  اوہدے  راہیں
ایمان لیاؤن ۔ اوہ آپ تاں نُو ر نئیں ہیگا سی پر نُو ر دی گواہی دین لئی آیا سی ۔“ (یوحنا ۱ :۷ ۔ ۸)۔
 
 
لازمی ہیگا اے پئی اسیں مکتی پائیے
 
اسیں ایس ایمان دے راہیں مکتی پا چُکے آں پئی یسوع نے سارے جگ دے لوکاں نوں ودھیا انصاف  تے منصفانہ طریقے نال یوحنا بپتسمہ دین والے  کولوں بپتسمہ لین دے راہیں مکتی  تے چھٹکارا دتا اے ۔ خُدا دی راستبازی آکھدی اے پئی یسوع جگ وچ بندے دی شکل وچ آیا ،پاپیاں نوں اوہناں دے پاپاں توں بوہت سوہنے تے منصفانہ طریقے نال یوحنا بپتسمہ دین والے کولوں بپتسمہ لَے کے مکتی دتی تے سولی اُتے مر کے ہمیش دی حیاتی نوں لوکاں تیک فیر واپس لیایا ۔ خُدا دی راستبازی پانی تے رُوح دی خوشخبری وچ لُکی ہوئی اے ۔
خُدا دی راستبازی جیہڑی خوشخبری وچ نظر آئی ،سانوں سکھاؤندی اے پئی یسوع بندے دی شکل وچ آیا ، بپتسمہ لیا ،سولی اُتے مرگیا تے تیجے دیہاڑے مویاں وچوں جیوں اُٹھیا ۔اسیں یوحنا دی گواہی دے راہیں یسوع اُتے ایمان لیائے تے یسوع دی راستبازی اُتے ایمان لیاؤن دے راہیں اپنے سارے پاپاں توں مکتی پائی ۔ سارے لوکاں دے پاپ مکادتے گئے، تے اوہ ایمان دے راہیں یوحنا بپتسمہ دین والے  توں یسوع دے بپتسمہ لین دے راہیں ہمیش دی حیاتی پا چُکے نیں ۔ اوہناں پاک رُوح پا لیا اے ،جیہڑا سانوں انعام دی شکل وچ خُدا دے پُتر ہون دی گواہی دیندا اے ۔