کورونا وائرس تے عالمگیر ڈاک سروس وچ رکاوٹ دے سببوں، اَسیں اپنی ’مُلوں بغیر چھاپی ہوئی کتاب دی سروس‘ نوں تھوڑے چِر لئی بند کر دے پئے آں۔
ایس صورتحال دے چانن وچ اسیں ایس ویلے تہانوں کتاباں گھلن دے قابل نئیں ہیگے آں۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔
مضمون 10: مُکاشفہ(مُکاشفہ دی کتاب اُتے تفسیر)
[2-2باب] اوہ ایمان جیہڑا شہادت نُوں قبول کرسکدا اے (مُکاشفہ ۲:۱-۷)
)مُکاشفہ ۲:۱-۷(
ساڈے وچوں بوہتیاں لئی ،شہادت اک اوپرا اکھر اے ، پر اوہناں لوکاں لئی جیہڑے غیر مسیحی دین وچ جمے پلے نیں ، اوہناں لئی تاں ایہہ ہور وی اوپرااے ۔ خاص کر کے اکھر” شہادت “ اک ایہو جیہا اکھر نئیں ہیگا جنہوں اسیں اپنی ہردیہاڑے دی حیاتی وچ بوہتا ویکھدے آں ؛ اسیں ایس اکھر نوں وکھرا تے فرق محسوس کردے آں ،ایس لئی پئی ایہہ ساڈی اصل شہادت بارے سوچن وچ بوہت حد تیک نقلی اے ۔ ایس لئی ، مُکاشفہ دی کتاب دے باب ۲ تے ۳ وچ ایس شہادت بارے گل بات کیتی گئی اے ، تے ایہدے کلام توں سانوں اپنے دلاں وچ شہادت والا ایمان قائم کرنا چاہی دا اے—مطلب اے، جیہڑے ایمان نال اسیں شہیدہو سکدے آں ۔
رومی راجے اپنے لوکاں اُتے راج کرن دے من مرضی دےراجے سن ۔اپنے علاقے اُتے من مرضی دی طاقت نوں ورتدیاں ہویاں ،اوہ کجھ وی کر سکدے سن جیہدے اُتے اوہناں دے دل خوش ہوندے سن ۔ بوہت ساریاں جنگیاں کیتیاں تے جِتیاں ،رومی راج نے اپنے راج ہیٹھاں بے گنت قوماں نوں اپنے ہیٹھاں رکھیا ، جِتیاں گئیاں قوماں ولوں دتی جان والے چونگی نال اپنے آپ نوں مالا مال کیتا ۔ اک جنگ وی نہ ہارن دے بعدوں ،نکی جیہی قوم جگ دیاں وڈیاں بادشاہیاں وچ رَل گئی ۔ صرف اسمان ای اوہناں دی طاقت نال جتیاں گئیاں حداں توں باہر سی ۔ ایہہ طاقت اینی وڈی سی پئی اخیریں اوہ لوکاں دے راہیں جیوندے دیوتیاں وانگر پوجے جان لگے ۔
مثال دے طور اُتے ، راجیاں لئی اوہناں دی شکل وانگر بُت بناؤنے تے لوکاں نوں اوہناں دے اگے سر نواؤن لئی آکھنا کوئی عام گل نئیں سی ۔ راجیاں لئی جنہاں نے اپنے آپ نوں خُدا سمجھن دا اعلان کیتا سی ، یسوع وچ ایمانداراں دا ودھنا اوہناں دی اپنی من مرضی دی طاقت لئی ڈاہڈا خطر ہ ہو سکدا سی ۔ مسیحیاں دے جھُنڈ اُتے پابندیاں لاؤندیاں ہویاں ، اوہناں نیں ایمانداراں نوں ستاؤن ، گرفتار کرن ، جیل گھلن تے اخیریں اوہناں دے ایمان دے سبب پھاہے لاؤن لئی ظالم قانوناں دا سہارا لیا ۔ ایہہ ایس پُرانے پسِ منظر دے خلاف اے پئی پہلے مسیحی دکھ جرن توں بچن لئی تہہ خانیاں ورگیاں تھاواں وچ غاراں وچ چلے گئے ، تے ایہہ دکھ جرنا ای اے جیہڑا اوہناں دے اصل ایمان دے بچاؤن لئی شہادت نوں من لین دا خاص کم سی۔
ایہو ای سبب ہیگا اے پئی مُڈھلی کلیسیا دے دناں وچ شہید اُٹھے ۔ پکی گل اے پئی اوس ویلے دے پاک لوکاں نوں ، صرف راجیاں دے راج نوں منن توں مُکرن اُتے شہید نئیں کیتا گیا سی ۔ اوہناں نیں اپنے جگ دے اختیار نوں پچھان لیا ، پر اوہناں نیں ایس اختیار نوں منیا نئیں جد وں اوہنے ایہناں نوں مجبور کیتا پئی اوہ بندے نوں خُدا وانگر سجدہ کرن تے یسوع نوں اپنے دلاں وچوں کڈھ دین، ایتھوں تیک پئی اپنی جان دے مُل اُتے وی ۔ رومی راجیاں نیں مسیحیاں نوں حکم دتا پئی اوہ یسوع دا انکار کرن تے اوہناں نوں نہ صرف راجیاں سگوں دیوتیاں وانگر وی پوجن ۔ ایس طرحاں دے گھٹیا تے گئے گواتے مطالبیاں دے اگے سر نہ نواؤندے ہوئیاں ، شروع دے مسیحیاں نوں چتے پیر دکھ جرنے پئے تے اپنے ایمان نوں بچاؤن لئی شہید کردتے گئے ،اخیریں ۳۱۳ء وچ میلان ایڈکٹ (Edict of Milan)اوہناں لئی دینی آزادی لیایا ۔ ساڈے اگے ایمان دے ایہناں وڈ وڈیریاں وانگر ، سانوں وی اپنے ایمان نوں ردّ کرن دی تھاں اُتے راستبازی دی موت مرنا پوے گا ۔
ایشیا کوچک وچ ست کلیسیاواں دے بارے وچ عبارت نہ صر ف اوس ویلے دے حالاں تے خبراں دی وضاحت اے ،سگوں آؤن والےجگ دے بارے وچ وی مُکاشفہ اے ۔ایہدے وچ ایہہ مُکاشفہ ہیگا اے پئی خُدا دے خادم تے اوہدے پاک لوک اپنے ایمان نوں بچاؤن لئی شہیدہو جان گے ۔ بالکل اوسے طرحاں جویں رومی راج دے دناں وچ ،اک ویلا آوے گا جدوں اک اپنی مرضی دا راجہ نکلے گا جویں رومی راج دا نواں زمانہ ہر کسے نوں اپنے ظالم راج ہیٹھاں کردا اے ، اوہدی شکل دے بُت بناؤندے ہویاں ،ساریاں نوں اوہدے اگے سر نواؤن دی لوڑ ہووے گی ، تے اوہ مطالبہ کرے گا پئی خُداوانگراوہدی بھگتی کیتی جاوے ۔ ایہہ ساڈے ہُن دے ویلے توں بوہتا دُور نئیں اے ، تے جدوں ایہہ ویلا آوےگا، بوہت سارے پاک لوک مُڈھلی کلیسیا دے پاک لوکاں وانگر شہاد ت دی موت مرن گے ۔
ایس لئی سانوں نصیحت دے کلام نوں اپنے دلاں وچ رکھنا چاہی دا اے جیہڑا ساڈے خُداوند نے
آسیہ دیاں ست کلیسیاواں نوں دتا سی ۔ آسیہ دیاں ست کلیسیاواں نوں سلام ، شاباش دیندیاں ہویاں تے نصیحت کردے ہویاں ، خُدا نے اوہناں نال وعدہ کیتا سی پئی ”جیہڑا جیتے“ اوہ ” حیاتی دے بُوٹے وچوں کھاوے گا ، جیہڑا خُدا دی بہشت دے وچ ہیگا اے، “ تے ”زِندگی دا تاج پاوے گا، “ ”کھان لئی لُکیا ہویامن، “ ”سویر دا تارہ ،“ ہو روی بوہت کجھ ! ایہہ خُدا دا وفادار وعدہ اے پئی اوہناں لوکاں نوں جیہڑے اپنی شہادت دے راہیں فتح پاؤن گے ، اوہ اسمانی ساریاں ہمیش دیاں نعمتاں دیوے گا ۔
فیر ، مڈھلی کلیسیا دے پاک لوکاں نوں کویں اوہناں دی شہادت ویکھنی پئی ؟ پہلی گل جیہڑی سانوں چیتے رکھنی چاہی دی اے اوہ ایہہ ہیگی اے پئی جیہڑے لوک شہید ہو سکدے سن اوہ خُدا دے خادم تے پاک لوک سن ۔ ہر کسے نوں شہید نئیں کیتا جا سکدا ۔ صرف اوہو ای لوک جیہڑے یسوع نوں اپنا مکتی داتا من دے ، دکھ جرن ویلے قائم رہندے نیں ، تے اپنے ایمان اُتے ڈٹے رہندے تے خُداوند اُتے بھروسہ رکھدے نیں اوہ شہاد ت سہہ سکدے نیں ۔
یوحنا رسول ، جنہوں اسیں ویکھدے آں پئی پتمس دے جزیرے وچ اپنے ملکو ں باہر کڈھے جان وچ افسس دی کلیسیا نوں جھڑکدا اے ،اوہ یسوع دے بارہ چیلیاں وچوں اخیری جیوندا سی ۔ دوجے سارے رسول پہلوں ای شہید ہوگئے سن ، ایسے طرحاں دوجے پاک لوک وی ۔ پرانیاں گلاں کردیاں ہویاں، آسیہ دی ست کلیسیاواں دے پاک لوک بے گنت مسیحیاں وچوں صرف تھوڑے جیہے سن جیہڑے ۳۱۳ ء تیک شہید ہو گئے سن ۔ رومی راجیاں دیاں کُٹاں ماراں توں بھجدے ہویاں ،اوہ دسیاں ہویاں غاراں وچ چلے گئے ،اوہناں دے اپڑن توں بچن لئی غاراں کڈھیاں تے دعا کرن لئی تہہ خانیاں وانگر سمجھے جان والے دھرتی ہیٹھ قبرستاناں وچ اکٹھے ہوگئے — ایہناں ساریاں نیں تے کدی وی ، اپنے ایمان نال دھوکے بازی نئیں کیتی تے خوشی خوشی اپنی شہادت نوں پسند کر لیا ۔
ایتھے خُدا ولوں جھڑکاں دے ہوندیاں ہویاں ، افسس دی کلیسیا سمیت ، آسیہ دی ست کلیسیاواں دے خادم تے پاک لوک وی ، ساریاں نوں شہید کردتا گیا سی ۔ کس نے اوہناں نوں شہید ہونے دے لائق کیتا ایہہ خُداوند اُتے اوہناں دا ایمان سی ۔ اوہناں ساریاں دا ایمان سی پئی خُداوند ای خُدا سی ، پئی اوہنے اوہناں دے سارے پاپاں نوں مکادتا ، تے اوہ ایّالی سی جیہڑا اوہناں ساریاں نوں ہزار ورہیاں دی بادشاہی تے نویں اسمان تے دھرتی ول لَے جاوےگا ۔ ایہو ای ایمان تے آس دا ثبوت اے جنہے اوہناں نوں شہادت دے راہیں اپنے سارے ڈرتے مرن دی پیڑ اُتے فتح پاؤن دے لائق کیتا ۔
ہُن اسیں اخیری ویلے وچ جیوندے پئے آں ۔ ایہہ بوہتا دُور نئیں پئی جگ اک راج دے ہیٹھاں اکٹھاہوجاوے گاتے من مرضی دی طاقت رکھن والا راجہ نکلے گا ۔ ایہہ ڈاہڈا راجہ ، جویں پئی مُکاشفہ ۱۳ وچ لکھیا ہویااے ، پاک لوکاں دی حیاتیاں نوں دھمکی دیوے گا تے اوہناں توں چاہوے گا پئی اوہ اپنے ایمان نوں چھڈ دین ۔ پر اسیں ، اخیری ویلیاں دے پا ک لوک،اوہدیاں دھمکیاں تے ظلم اُتے فتح پاؤن تے اپنی شہادت دے راہیں اپنے ایمان دی راکھی کرن دے لائق ہوواں گے ، ایس لئی پئی ساڈا اوہو ای ایمان اے جویں مڈھلی کلیسیا دے پاک لوکاں دا سی ۔
آیتاں ۴ تا ۵ وچ ، خُدا نے افسس دی کلیسیا نوں جھڑکدے ہویاں آکھیا ،” پر مَینُوں تیرے اُتّے ایہہ شکایت اے۔ پئی تُوں اپنی پہلی مُحبّت نُوں چھڈ دِتّا۔ایس لئی تُوں چیتا کر پئی تُوں کِتّھوں ڈِگّا ایں۔ تے تَوبہ کر کے پہلے وانگر کمّ کر۔ تے جے تُوں تَوبہ نا کریں گا۔ تے تیرے کول مَیں آ کے تیرا دِیوا اوہدی تھاں توں ہٹا دیاں گا۔“ ایہدا کیہ مطلب اے ؟ ایہدا مطلب اے پئی افسس دی کلیسیا نے پانی تے رُوح دی خوشخبری چھڈ دتی سی ۔ ابتدائی کلیسیا دے سارے پاک لوک ، افسیوں دی کلیسیا سمیت ، پانی تے رُوح دی خوشخبری اُتے ایمان رکھدے سن۔ ایہہ ایس لئی سی پئی یسوع دے چیلیاں نیں پانی تے رُوح دی خوشخبری ساریاں وچ کھلار دتی سی تے منادی کیتی سی۔ ایس طرحاں ایہہ خوشخبری جیہڑی اوس ویلے دے پاک لوکاں نیں رسولاں توں پائی اوہ کھری خوشخبری سی ، جھوٹی نئیں ، بندیاں دی بنائی ہوئی خوشخبری نئیں جیہڑی صرف صلیبی لہو اُتے بھروسہ رکھدی اے ۔
پر ایتھے ایہہ آکھیا گیا اے پئی افسس دی کلیسیا دے خادم نے اپنی پہلوں والی محبت چھڈ دتی سی ۔ ایہدا مطلب ایہہ ہیگا اے پئی افسیوں دی کلیسیا دے خادم نے اپنی کلیسیا دی سیوا کرن وچ پانی تے رُوح دی خوشخبری چھڈ دتی سی ۔ ایس لئی خُدا نے آکھیا پئی اوہ دِیوے نوں اوہدی تھاں توں ہٹا دیوے گا جدوں تیک پئی اوہ توبہ نہ کرن ۔دِیوے نوں اوہدے کولوں ہٹاؤن دا مطلب کلیسیا نوں ہٹاؤنا سی ، جیہدا مطلب ایہہ سی پئی ، پاک رُوح ہُن افسس دی کلیسیا وچ کم نئیں کر سکدا سی ۔
افسس دی کلیسیا دے خادم لئی ، پانی تے رُوح دی خوشخبری ول پرتنا اصل وچ کوئی ایناں اوکھا کم نئیں سی ۔ سگوں ایہہ اوہدا سب توں نکا مسئلہ سی ۔ جیہڑی شے نے اوہنوں اکھیائی وچ پھسا دتا اوہ ایہہ سی پئی اوہ اپنے دل وچ پانی تے رُوح دی خوشخبری اُتے ایمان رکھدے ہویاں ، اپنی گل اُتے کھل کے منادی کرن وچ ناکام رہیا سی ۔ اوہنے اپنی کلیسیا وچ اوہناں ساریا ں لوکاں نوں پسند کیتا جنہاں نے صرف یسوع دا اپنے مکتی داتا وانگر اقرار کیتا ، ایتھوں تیک پئی جے اوہ پانی تے رُوح دی خوشخبری اُتے ایمان نئیں رکھدے سن ، جدوں اصل وچ ایمانداراں لئی پانی تے رُوح دی خوشخبری اُتے اپنے ایمان دے اقرار دا مطلب شہادت لئی تیار رہنا اے ۔
ایس لئی ، اوہنے دوجے اکھراں وچ ، اوہناں ساریاں لوکاں نوں جی آیاں نوں آکھیا جیہڑے اوہدی کلیسیا وچ آئے سن ایس توں نظر ہٹاکے پئی اوہناں دا خُدا تے اوہدی پانی تے رُوح دی خوشخبری اُتے اوہو ای ایمان ہیگا سی یاں نئیں ۔ ایس لئی پئی خُدا دی کلیسیا وچ رَلن لئی بوہت چوکھیاں قربانیاں دی لوڑ سی ، تے ایس لئی پئی افسس دی کلیسیادا خادم ڈردا سی پئی ایہہ قربانیاں بوہتیاں لوکاں نوں کلیسیا وچ رَلن توں روکن گئیاں ، ایس لئی اوہ بالکل سچیائی دیاں بوہت خاص شرطاں مطابق چلدیا ں ہویاں منادی کرن وچ ناکام رہیا سی ۔
پر ایس لئی پئی جتھے سچیائی نئیں ہیگی اوتھے پاک رُوح نئیں رہ سکدا ، خُدا نے فرمایا پئی اوہ دِیوے نوں اوہدی تھاں توں ہٹادیوے گا ۔ ایہہ افسس دی کلیسیا دے خادم تے پاک لوکاں دے کماں دے گھاٹے دے سبب نئیں ہیگا پئی خُدا نے آکھیا پئی اوہ کلیسیا نوں مکا دیوے گا ؛ سگوں ، ایہدا مطلب ایہہ سی پئی اوہ ہُن کلیسیا وچ نئیں رہ سکدا ایس لئی پئی ہُن ایہدے وچ سچیائی نئیں ہیگی اے ۔
ایہہ اک خاص لوڑ ہیگی اے پئی خُدا دی کلیسیاپانی تے رُوح دی خوشخبری پچھے چلے ۔ خُدا دے خادماں تے پاک لوکاں نوں نہ صرف ایس خوشخبری اُتے ایمان رکھنا چاہی دا اے سگوں ایہدی ٹھیک تے خاص شرطاں وچ منادی تے تعلیم وی سکھاؤنی چاہی دی اے ، ایس لئی پئی صرف ایس خوشخبری وچ ای اسیں خُدا دی محبت ،اوہدا فضل تے اپنے لئی اوہدی ساریاں نعمتاں پا سکدے آں ۔
ایس خوشخبری دی منادی کرن دے تھاں اُتے ، افسس دی کلیسیا دے خادم نے اپنے لوکاں وچوں اوہناں لوکاں نوں پسند کیتا جیہڑے صرف صلیبی لہو اُتے ایمان رکھدے سن ۔ پر ایتھوں تیک پئی اک نویں سریوں جمے ہوئے خادم ،مقدس ،یاں کلیسیا لئی وی جے اوہ پانی تے رُوح دی خوشخبری جنہے یسوع دے بپتسمے تے اوہدی صلیبی لہو نال اوہناں دے سارے پاپاں نوں مکایا ، اُتے ایمان رکھدے ہویاں حالے ایہدی منادی نئیں کردے تاں ساڈے خُداوند دے سارے کماں نوں فضول سمجھدے نیں ۔
بھاویں اسیں خُداوند دیاں اکھاں اگے ککھ وی نئیں ،جے اسیں ایس خوشخبری اُتے ایمان رکھدے آں تے ایہدی منادی کردے آں تاں ، خُداوند ساڈے وچ پاک رُوح وانگر رہ سکدا تے کم کر سکدا اے ۔ ایتھوں تیک پئی جے خُدا دے خادم یاں پاک لوک غلطیاں نال بھرے ہوئے نیں، تاں خُداوند اوہناں دی اگوائی اپنے کلام تے تعلیم دے راہیں کر سکدا اے ۔پانی تے رُوح دی خوشخبری دی کلیسیا وچ پاک رُوح ہوندااے ، تے ایس وچ پاک رُوح دے ہون دا مطلب ایہہ ہیگا اے پئی کلیسیا پاک اے ۔
خُدا دے خادم یاں پاک لوکاں لئی کوئی پاکیزگی نئیں ہوسکدی جے اوہ پانی تے رُوح دی خوشخبری دی منادی نئیں کردے ۔ اوہ ایہہ آکھن دےلائق ہو سکدے نیں پئی اوہناں کول ہُن کوئی پاپ نئیں ہیگا ، پر جتھے پانی تے رُوح دی خوشخبری دی منادی نئیں کیتی جاندی اوتھے پاکیزگی نئیں نظرآؤندی ۔
پانی تے رُوح دی خوشخبری او ہ خوشخبری اے جیہدے اُتے مُڈھلی کلیسیا دے پاک لوک ایمان رکھدے سن ، اوہ خوشخبری جیہڑی سندیسہ دیندی اے پئی خُداوند بپتسمے نال جگ دے سارے پاپاں نوں چُکن تے سولی اُتے اپنی موت نال ایہناں ساریاں نوں مکاؤن لئی لوکاں نوں بچاؤن ایس دھرتی اُتے آیا سی ۔ اوہنے اپنے بپتسمے نال ساڈیاں ساریاں کمیاں تے غلطیاں نوں مکا دتا اے ۔ خُدا نے ساڈیاں کمیاں تے غلطیاں نال ہون والے سارے پاپاں نوں مکا دتا اے ، تے اوہ ساڈا سدا دا ایّالی بن گیا اے ۔
اینے بوہتے برکت والے ہون دے بعدوں ، کوئی کویں رومی راجے نوں خُداوند سمجھ سکدا اے تے اپنے دیوتا وانگر کسے بندے دی بھگتی کر سکدا اے ؟ ایس لئی پئی خُدا دا فضل ایناں وڈا تے چوکھا سی ، کسے رومی راجے دے لالچ تے دھمکیاں پاک لوکاں نوں اوہدی محبت توں مکرن بارے مجبور نئیں کر سکدیاں سن ، تے اوہناں نیں اپنے ایمان نوں بچاؤن لئی اپنی مرضی تے خوشی نال شہادت پسند کیتی ۔ اوہناں نیں اوہناں دونواں دھمکیاں نوں پسند نہ کیتا جنہاں دے سبب اوہناں نوں اوہناں دے ایمان نوں چھڈن بارے مجبور کرن دی کوشش کیتی گئی سی تے اوہناں نوں جگ دے فائدیاں لئی اپنا ایمان چھڈن بارے تیان کرن لئی سرکاری عہدیاں اُتے اوہناں نوں لاؤن بارے آکھیا گیا ۔ کوئی شے اوہناں نوں اوہناں دے ایمان توں ہٹن تے اوہناں دے خُدا نوں چھڈن دے لائق نئیں بنا سکدی سی ، تے ایہہ ہمیشہ رہن والی وفاداری ای اے جنہے اوہناں نوں شہید ہون دے لائق بنایا ۔
شہیدا ں دے دل خُدا دے فضل تے محبت دی شکرگزاری نال بھر گئے جنہے اوہناں نوں پانی تے رُوح دی خوشخبری دے راہیں اوہناں دے پاپاں توں مکتی دلوائی ۔ اوہ لوک جنہاں دا ایمان خُدا دی محبت توں بھٹک نئیں سکدا جنہے اوہناں نوں سدا لئی اوہناں دے پاپاں توں چھڈایا سی اوہ ہٹ جان دی تھاں اُتے شہادت نوں سینے لالیندے نیں ۔ اوہ ویلا آوے گا جدوں، رومی راجیاں نیں مڈھلی کلیسیا دے پاک لوکاں توں چاہیا سی پئی اوہ اوہناں دے خُدا ہون نوں من لین تے اوہناں نوں دیوتیاں وانگر پوجن ، سانوں ، وی ، اپنے ایمان نوں چھڈ دین بارے مجبور کیتا جاوے گا ۔ جدوں اِنج ہووے گا تاں ، سانوں ایمان دے وڈ وڈیریاں دے پیراں دے نشاناں اُتے ٹُرنا چاہی دا اے تے شہادت نال اپنے ایمان دی راکھی کرنی چاہی دی اے ۔
بھاویں اسیں غطلیاں نال بھرے ہوئے آں ، خُدا نے ساڈے نال محبت رکھی پئی اوہنے ساڈیاں ساریاں غلطیاں تے پاپاں نوں اپنے اُتے چُک لیا اے ۔ ایس توں نظر ہٹا کے پئی اسیں اوہدے فضل دے اگے بوہتے ای گھٹ آں ، اوہنے سانوں اپنیاں بانہواں وچ قبول کر لیا اے ۔ اوہنے نہ صرف سانوں اپنے سینے لایا ، سگوں اوہنے پاپ تے بربادی دے سارے مسئلے حل کر دتے تے سانوں ہمیش لئی اپنے نیانے تے اپنی ووہٹی بنا لیا ۔ ایہو ای سبب ہیگا اے پئی اسیں کدی وی اوہدے اُتے اپنے ایمان نوں چھڈ نئیں سکدے ،تے اسیں اپنی مرضی تے خوشی نال اوہدے نام لئی شہاد ت نوں پسندکردے آں ۔ شہادت پہلی محبت دی راکھی کرناایں جیہڑی خُدا نے سانوں دتی اے ۔ ایہہ ساڈے بدنی خیالاں دی پیداوار نئیں ہیگی اے ،سگوں ایہدی تھاں اُتے سچیائی اُتے ایمان ہیگا اے پئی خُدا نے ساڈیاں کمیاں تے غلطیاں دے ہوندے ہویاں سانوں اپنیاں ساریاں نعمتاں دتیاں نیں ۔ ایہہ ساڈی تمنا دی طاقت نئیں ہیگی پئی اسیں شہید ہوسکیے ، سگوں ایہہ اپنے خُدا دی وڈیائی اُتے ساڈے ایمان نال اے ۔
لازمی طور اُتے ، ایہو جیہے لوک نیں جیہڑے اپنے مُلک یاں نظریے لئی شہید ہو جاندے نیں ۔ ایہہ لوک اپنے پکے عقیدے اُتے نہ ڈولن والے ایمان نوں ٹھیک سمجھدے نیں تے ایتھوں تیک پئی ایہدی خاطر اپنیاں جاناں دین لئی تیار نیں ۔ پر ساڈے بارے کیہ خیال اے ؟ خُدا دے اوہ نیانے جیہڑے پانی تے رُوح دے راہیں یسوع مسیح اُتے اپنےایمان دےراہیں نویں سریوں جمے آں اسیں کویں شہید ہو سکدے آں ؟ اسیں شہید ہو سکدے آں ایس لئی پئی اسیں خوشخبری لئی بوہت شکرگزار ہاں جیہدے نال ساڈے خُداوند نے سانوں پیا ر کیتا تے بچایا اے ۔ ایس لئی پئی خُدا نے ساڈی حدوں ودھ غلطیاں دے ہوندیاں ہویاں سانوں پسند کیتا اے ، ایس لئی پئی اوہنے سانوں پاک رُوح دتا اے ، تے ایس لئی پئی اوہنے سانوں اپنے لوک بنایا اے تے سانوں اوہدےموجودگی وچ ہمیش رہن لئی برکت دتی اے ، اسیں اوہنوں کدی وی چھڈ نئیں سکدے ۔
خُدا نے ساڈے نال نویں اسمان تے دھرتی دا وعدہ وی کیتا اے ، تے ایسے آس لئی ای اسیں اپنے ایمان نوں چھڈ نئیں سکدے ۔ ایہدے نال کوئی فرق نئیں پینداپئی کیہ ہوندااے — بھاویں جے مخالفِ مسیح اخیری ویلے وچ سانوں دھمکیاں دیندا تے مرن تیک دکھڑے دیندا اے — اسیں اپنےخُداوند تے اوہدی پانی تے رُوح دی خوشخبری توں کدی مکر نئیں سکدے ۔ بھاویں جے سانوں مخالفِ مسیح دے پیراں وچ گھسیٹیا تے مار دتا جاوے تاں وی ، اسیں خُدا دے فضل تے محبت توں کدی وی پچھاں ہٹ نئیں سکدے جنہے سانوں بچایا اے ۔ جویں پئی کہاوت اے ، بھاویں ”ساڈیاں لاشاں اُتے وی نئیں “اسیں خُداوند نال دھوکہ بازی کراں گے ۔ اسیں دوجے کم کرن اُتے مجبورہوسکدے آں ، پر اک ایہو جیہی شے ہیگی اے جیہدے نال ہوندیاں اسیں کدی وی ہار نئیں مناں گے: اسیں مسیح دی محبت نوں نہ تاں چھڈیے تے نہ ای غدار بنیے جنہے سانوں بچایا اے ۔
کیہ تہانوں لگدا اے پئی مخالفِ مسیح ساڈے اُتےترس کھاوے گا ایس لئی پئی اسیں غلطیاں کردے آں ؟ بالکل نئیں ! اوہ بے پرواہی نئیں کر سکدا! پر ساڈے خُداوند نے ساڈیاں ساریاں مشکلاں نوں اپنے اُتے چُک کے سانوں پوریاں تے کامل بنایا تے ساڈی تھاں اُتے اوہنے سزا جری ۔ ایس توں نظر ہٹا کے پئی اسیں بوہتے ای ماڑے تے ککھ وی نئیں آں ۔ ایہو ای سبب ہیگا اے پئی اسیں خُدا وند دی مکتی دی محبت نوں نئیں چھڈ سکدے جنہے سانوں پانی تے رُوح دی خوشخبری دے راہیں مکتی دتی اے ، تے ایس لئی اسیں پہلی محبت وچ اپنے ایمان نوں نئیں چھڈ سکدے آں ۔ کسے وی شے نوں چھڈیا نئیں جا سکدا جدوں تیک پئی اسیں ایہنوں پہلوں اپنے دلوں نہ کڈھیے ۔
ایسے طرحاں ، جے اسیں اپنے ایمان نوں اپنےدل دیاں ڈوہنگھیائیاں وچ رکھدے آں تاں ، اسیں اپنے ایمان دی بوہت چوکھی راکھی کر سکدے آں ، بھاویں سانوں کنیاں ای دھمکیاں ، لالچ یاں دکھاں نوں سہنا پوے ۔ جے اسیں اپنے دلاں وچ اپنے لئی خُدا دی بے مُلی محبت نوں جان دے آں ، تے جے اسیں ایس محبت اُتے اخیری ساہنواں تیکر قیم رہندے آں تاں ، اسیں اخیری دیہاڑے تیک خوشخبری دی راکھی کر سکدے آں ۔ اوہناں لوکاں لئی جیہڑے ایمان وچ چلدے نیں ، شہاد ت نوں سینے لاؤنا کدی اوکھا کم نئیں ہیگا اے ۔
سانوں ساریاں نوں اپنی شہاد ت دے آؤن اُتے کجھ خاص سوچ رکھنی چاہی دی اے ۔ شہاد ت صر ف پیڑ تے دکھ جرنا نئیں اے ۔ ساڈا بدن ایہو جیہا اے پئی سوئی دا تھوڑا جیہا وی چبھونا نہ سہن والی پیڑ دے سکدا اے ۔ ایہو جیہاں بدنی پیڑاں نوں سہنا شہاد ت دے بارے نئیں اے ۔ سگوں شہاد ت دی گل تہاڈی اپنی جان دین دے بارے ہیگی اے ۔ صرف بدنی دکھڑے سہنا نئیں ، سگوں اصل وچ اپنی حیاتی گواؤنا ای شہادت دے گل اے ۔ جدوں مخالفِ مسیح ایہہ چاہوے گا پئی اسیں اوہنوں سدئیے تے خُدا وانگر اوہدی بھگتی کریے تاں ، اسیں اپنی موت تیک مکراں گے ۔ ایس لئی پئی صرف خُداوند ساڈا خُدا اے تے اوہ اکلا ساڈی بھگتی دا حقدار اے ۔ ایہہ صرف ایناں ای مناسب اے پئی اسیں اوہدے نام دی راکھی لئی شہیدہو جاواں گے ۔ اسیں ایس ایمان نوں کسے وی شے نال بدل نئیں سکدے آں ۔
کیہ مخالفِ مسیح ،جیہڑا خُدا دا مُنکر اے تے خُدا دے دیوتا وانگر بھگتی کراؤنا چاؤہندااے ، کیہ اوہ اصل وچ اوہدی بھگتی دا حقدار ہیگا اے ؟ بالکل نئیں ! جگ تے سارے لوکاں نوں پیدا کرن دا حق صرف خُدا ای دے کول اے ۔ حیاتی تے موت اُتے اکلے اوسے دے ہتھ وس اے ، اوہ اکلابے عیب ، بے پاپ ،تے سارے لوکاں توں پہلوں کامل طریقے نال راستباز اے ، تے اوہ اکلا حق رکھدا اے پئی جگ دے سارے پاپاں نوں مکادیوے ۔ فیر مخالفِ مسیح دا کیہ بنے گا ؟ مخالفِ مسیح دے کول صرف اک شے ہیگی اے جگ دی طاقت ۔ ایہو ای سبب ہیگا اے پئی اسیں اوہدے لئی اپنے خُداوند نوں نئیں بدل سکدے ،تے ایہو ای سبب ہیگا اے پئی اسیں کدی وی خُدا تعالیٰ اُتوں اپنے ایمان ولوں پچھاں نئیں ہٹ سکدے ۔
خُدا ای اوہ ہیگا اے جیہڑاسانوں لازمی طور اُتے سدا لئی خوش رکھے گا ۔ اوہ اوہناں نوں جلالی بدناں نال جیوندے کرے گا جیہڑے یسوع اُتے ایمان رکھ کے بے پاپ بنائے گئے نیں تے اوہناں لئی ہزار ورہیاں دی بادشاہی تے نویں اسماں تے دھرتی دے بوہے کھول دیوے گا ۔ پر مخالفِ مسیح دے اگے نیویں ہون والیاں نوں ہمیش دی سزا جرنی پوے گی تے شیطان دے نال دوزخ وچ سُٹ دتا جاوے گا ۔ اِنج کرنا بوہت عقل دا گھاٹا ہووے گا جے اسیں وقتی پیڑ تے دکھ جرن دے ڈر توں مخالفِ مسیح نال کھلو کے اپنی سدا دیاں خوشیاں نوں اک پاسے سُٹ دیندے آں ۔ ایس سچیائی نوں جان دے ہویاں ،جیہڑے لوک اپنے دلاں وچ پانی تے رُوح دی خوشخبری اُتے ایمان رکھدے نیں اوہ بہادری نال مخالفِ مسیح دے خلاف کھلون گے ، شہید ہوجان گے ، تےاوہناں دیاں قربانیاں دے انعام وانگر سدا دیاں خوشیاں پاؤن گے ۔
تُسیں تے میَں ، سانوں ساریاں نوں شہیدہونا اے ۔ کوئی غلطی نہ کرو: جدوں کالے گھوڑے دا زمانہ مُک جاوے گا ، پیلے رنگ دے گھوڑے دا زمانہ آجاوے گا ، تے فیر ، مخالفِ مسیح داآؤنا ہووے گا تے ستاں نرسنگیاں دیاں آفتاں شروع ہون گئیاں ۔ مخالفِ مسیح لازمی طور اُتے نکلے گا ، اسیں پاک لوک لازمی طور اُتے شہیدکر دتے جانواں گے ،تے ساڈے جیوں اُٹھن دے نا ل ای اسیں لازمی طور اُتے چُک لَے جاواں گے ۔ تے اسیں لازمی طور اُتے اک ہزار ورہے دی بادشاہی وچ جاواں گے ۔ ایہو ای سبب ہیگا اے پئی اسیں سارےخوشی نال شہید ہوجاواں گے جدوں مخالفِ مسیح سانوں دُکھ دیوے گا تے ساڈا مرجانا چاہوے گا ۔
کلاسک فلموں وچوں اک ، کیو وادِس (Quo Vadis ) نے بوہتیاں مسیحیاں دی فوٹو وکھائی اے جنہاں نیں اپنے ایمان نوں بچاؤن لئی اپنیاں جاناں پیش کیتیاں تے وڈیائی دے گیت گائے تے بھاویں اوہناں نوں موت دی سزا دتی گئی سی ۔ ایہہ فلم اپنے آپ اک کہانی اے ،پر ایہدا تاریخی پسِ منظر سارا سچ اے — مطلب اے ،بوہتے مسیحیاں نے اپنے ایمان نوں بچاؤن لئی اپنیاں جاناں دتیاں ۔ اوہناں نیں اِنج کیوں کیتا ؟ ایس لئی پئی رومی راجیاں نیں اوہناں کولوں جو کجھ منگیا—خُدا دا انکار کرو ، اوہدی تھاں اُتے دوجیاں دیوتیاں دی بھگتی کرو، تے اپنے ایمان نوں چھڈ دیووو—ایہو جیہی شے نئیں سی جنہوں اوہ من سکدے سن ۔
جے اوہناں نیں رومی راجیاں دے مطالبے مطابق اپنے خُدا نوں بدلیاں ہونداتاں ، اوہناں سارا کجھ بدلیا ہونا سی ۔ راجہ اوہناں دا دیوتا بن جاندا ، اوہناں نوں اپنے ظالم راج دے ہیٹھاں کر لیندا ،تے اوہ جنگ وچ اوہدے سپاہیاں وانگر مر جاندے ۔ نہ تاں اوہ پاپ توں مکتی پاؤن گے ،تے نہ ای اوہ نویں اسمان تے دھرتی وچ جان دے لائق ہو سکن گے ۔ایہو ای سبب ہیگا اے پئی اوہ اپنے ایمان توں پچھاں نئیں ہٹ سکے تے ایہدی تھاں اُتے خوشی تے وڈیائی نال اپنی پکی موت نوں سہن دا چناؤ کیتا ۔ ایتھوں تیک پئی اوہ مردے ہویاں وی خُداوند دی وڈیائی دے گیت گا سکدے سن ایس لئی پئی اوہناں دی آس اوہناں دی مرن دی پیڑ توں بوہت وڈی سی ۔
پانی تے رُوح دی خوشخبری دی راکھی کرنا ساڈے لئی بوہت لوڑی دا اے ۔ ایہہ وی لوڑی دا اے پئی اسیں آس بھری حیاتی بسر کرئیے ، ایہہ ایمان رکھدے ہویاں پئی ساڈی موت خوشی تے جلال نال بھری اک نویں جگ وچ ہمیش دی حیاتی دی اڈیک رکھدی اے ۔
کیہ تُسیں کدی خُداوند لئی دُکھ جرے نیں ؟ کیہ تُسیں کدی اپنی غلطیاں یاں کمیاں دے سبب نئیں سگوں خُداوند لئی سچ مُچ دُکھ جرے نیں ؟جے ساڈے دُکھ خُداوند لئی نیں تاں ، ساڈیاں ساریاں پیڑاں ایتھوں تیک پئی بوہت خوشی وچ بدل جان گئیاں ۔ جویں پئی پولُس رسول نے ایہو ای خوشی بارےدسیا ، ” کیوں جو میری سمجھ وِچ ایس ویلے دے دُکھ دَرد اوس جلال دے اگّے کُجھ وی نئیں جیہڑا ساڈے اُتّے ظاہر ہوئے گا۔ “ (رومیوں ۸: ۱۸)۔ایس لئی پئی جلال دی خوشی جیہڑی ساڈے دل وچ ظاہر ہووے گی اوہ خُداوند لئی ساڈے دُکھ پیڑ توں بوہت چوکھی اے ، ساڈے سارے اج دے دُکھ ساڈے ایمان دی وڈی خوشی تے شادمانی دے ہیٹھاں دفنائے جان گے ۔
دوجے اکھراں وچ ، مڈھلی کلیسیا دے پاک لوک تے شہید اپنیاں پیڑاں نوں مکا سکے تے خُداوند لئی اپنیاں جاناں دے سکے ایس لئی پئی اوہناں نوں پتہ سی پئی جیہڑی خوشی اوہناں نوں اڈیکدی پئی اے اوہ اوہناں دے اج دے دُکھاں توں بوہت چوکھی اے ۔ اوہناں دی شہادت دُکھاں نوں جرنا تے پیڑاں نوں سہنا اوہناں دے گُن دا پھل نئیں سی ، سگوں اوہناں دی اوس جلال لئی آس سی جیہڑا اوہناں دی تانگ رکھدا سی۔
بوہتی وار ، لوک ایس دُکھ نوں ایہہ سوچ کے سہندے نیں پئی اوہناں نیں صرف ایسے وچ بسر کرنی اے ۔ ایہہ اک اوکھی تے تھکاؤن والی جنگ اے ۔ جدوں اوہناں دا سہناں پریشانی بھرے پھل لیاؤندا اے تاں ، اوہناں دی مایوسی ہو ر وی ودھ جاندی اے —اوہ سارے دُکھ کجھ وی نئیں ہیگے ! پر ساڈے مسیحیاں لئی ، ساڈے صبر دیاں خوشیاں تے شادمانی وڈیاں بن جاندیاں نیں، ایس لئی پئی اسیں اپنی آس تے انعام دا یقین کراؤن وچ نڈ ر آں ۔ جے اسیں اوہدے وفادار خادماں وانگر اپنے سچے دل نال خُداوند دی سیوالئی اپنے ذہناں نوں ٹھیک کردے آں تاں ، سانوں پتہ اے پئی جیہڑی خوشی تے سکوں سانوں اڈیکدی اے اوہ ساڈیاں اج دیاں قربانیاں دیاں پیڑاں توں بوہت چوکھی اے ۔ ایس لئی پئی سارے دُکھ ایس خوشی وچ دفن نیں ، ایس لئی اسیں سارے اپنیاں حیاتیاں خُداوند لئی جیوں سکدے آں تے ایتھوں تیک پئی اوہدے بدلے اپنی شہاد ت نوں سینے لا سکدے آں ۔
لوکاں وچ رُوح ، جوش ، خیال تے ایمان ہوندااے ۔ نویں سریوں جمن والے لوکاں لئی ،ایس لئی پئی ساڈے خُداوند دی رُوح اوہناں وچ وسدی اے ، اوہناں دا راستبازی لئی دُکھ جرنا ای اوہناں نوں جلال لئی دسنوں اوکھی خوشی تے شادمانی دے سکدا اے جیہڑی اوہناں نوں اڈیکدی اے ۔ پر جے اوہ پہلی محبت چھڈ دیندے نیں تاں ، خُداوند دِیوے دان نوں ہٹاؤن توں پرہیز نئیں کرے گا ۔
جے اوہ لوک جیہڑے دلوں خوش ہوکے پانی تے رُوح دی خوشخبری اُتے اپنے سارے دلاں تے جاناں نال سیوا کردے پیے نیں ، اِنج کرنا چھڈ دین تاں ، ایہدا مطلب صرف ایہہ ہو سکدا اے پئی اوہناں نیں خوش خبری دی سیوا دی خوشی نوں ہولی ہولی چھڈ دتا سی ، اپنی پہلوں والی محبت نوں ،بھاویں اوہ ایس خوشخبری نوں پوری طرحاں نئیں چھڈدے ۔ اوہ ہُن وی اپنے دلی ایمان اُتے قائم رہ سکدے نیں ، پر جے اوہ ہُن خوشخبری دی منادی کرن وچ خوشی محسوس نئیں کردے تے ہُن ایہدے بارے وچ کھلی سمجھ نئیں رکھدے پئی مکتی پاؤن لئی کاہدی لوڑ اے — کیہ سولی اُتے لہو مکتی لئی بوہتا نئیں ہیگا تاں— فیر اوہناں دا ایمان ماڑا ہو جاوے گا ، تے اوہناں دی شہادت اوہناں تیکر اپڑن لئی اوکھی ہو جاوے گی۔ خُدا اوس ویلے اوہناں دے دِیوے دان نوں اوہدی تھاں توں ہٹا دیوے گا ۔
خوشی تے ڈٹ کے خوشخبری دی سیوا کرن والے خوشی نال شہادت پسند کر سکن گے ایس لئی پئی اوہناں نیں اپنی پہلوں والی محبت کدی نئیں چھڈی ہووے گی ۔ ایس لئی پئی ایہہ لوک خُداولوں مسیح دی محبت اُتے ایمان رکھن تے اوہدی منادی کرن وچ برکت والے سن ، ایہناں نوں شہیدکیتا جا سکدا اے ۔ایہدے نال کوئی فرق نئیں پیندا پئی تُسیں کنے سیانے یاں ذہن والے او ؛ جے تُسیں پانی تے رُوح دی خوشخبری نئیں ودھاؤندے تاں، کلیسیاں نوں اوہدی تھاں توں ہٹا دتا جاوے گا ۔ ایہہ اک خاص پیغام ہیگا اے پئی خُدا چاؤہندا اے پئی اسیں ایہنوں سمجھیے ۔ جے سانوں ایس سچیائی دی سمجھ تے ایہدے اُتے یقین ہیگا اے تاں ، اسیں اخیری ویلیاں وچ اپنے دلاں نوں نواں کر سکدے آں تے خُداوند دے نام لئی شہید ہون دے لائق ہو سکدے آں ۔
اوہ خاص شے کیہڑی اے جیہڑی ساڈے ایمان نوں سنبھالدی اے ؟ ایہہ پانی تے رُوح دی خوشخبری اے ۔ جے ایہہ پانی تے رُوح دی خوشخبری نئیں سی تاں ، ساڈے ایمان دے کماں دا کیہ فائدہ ہووے گا ؟ ساڈے اپنے ایمان نوں قائم رکھن دا سبب ایہہ ہیگا اے پئی خُدا نے ساڈے نال پیار کیتا اے تے اپنی پانی تے رُوح دی خوشخبری نال سانوں اپنے بانہواں نال سینے لا لیا اے ۔ ایس لئی پئی ایہہ محبت بے بدل محبت اے جیہڑی سانوں جلال دیندی اے ، اسیں اپنے ایمان نوں قائم رکھن تے ایہدی منادی کرن تے ایہنوں ودھاؤن دے لائق آں ۔
ساڈیاں کمیاں دے ہوندیاں ہویاں ، اسیں خُدا ول اخیر تیک بھج سکدے آں ، ایس لئی پئی پانی تے رُوح دی خوشخبری نے سانوں بچایا اے ، تے ایس لئی پئی ایس خوشخبری وچ مسیح دی محبت ہیگی اے ۔ اسیں خطاواں نال بھرے ہوئے آں ، پر ایس لئی پئی اسیں پانی تے رُوح دی خوشخبری جیہڑی ساڈے خُداوند دی محبت نال بھری ہوئی اے ، اسیں اوہدے لیڑے پائے نیں ، اسیں اپنے بھراواں ، بھیناں ، خُدا دے خادماں تے جگ دے سارے لوکاں ناں محبت کر سکدے آں ۔ خاص کر کے ، کامل محبت بندے دے پوہنچ توں باہر اے ۔ ایس لئی پئی ساڈے وچکار کوئی پیار نئیں ہیگا،اسیں کسے ہور نال محبت کرن دے لائق نئیں ہیگے سگوں اپنے کم سوارن وچ صرف اپنےآپ نال ۔ بوہت سارے لوک ایس دھرتی اُتے نظر آؤن والیاں شیواں توں دھوکہ کھا ندے پئے نیں، لشکارے ماردی ہوئی ظاہری صورت ولے للچاؤندے لویاں جیہڑی صرف عارضی اے ،اوہ لوکاں نوں اوہناں دے کول کیہ مالی تے نظر آؤن والیاں جائیداداں نیں ، دے مطابق جانچدے نیں ۔ پر کھریاں ایمانداراں وچ خُدا دی محبت ہیگی اے ۔ ایہہ اوہو ای شے ہیگی اے جیہڑی سانوں ساڈے خُداوند دی کامل محبت ، خوشخبری ودھاؤن دے لائق بناؤندی اے ۔
ساڈا خُداوند ایس دھرتی اُتے آیا ، ساڈیاں ساریاں کمیاں نوں قبول کرن لئی بپتسمہ لیا ، تے سانوں بچاؤن لئی سانوں سارے پاپاں توں پاک کیتا ۔ فیر ، اسیں کدی وی اوہدی پہلی محبت نوں کویں چھڈ سکدے آں جنہے سانوں خُدا دے پُتر بنادتا اے ؟ اسیں بوہت سارے کماں وچ گھٹ پَے سکدے آں ، پر سانوں کدی وی ایس سچیائی اُتے اپنے ایمان وچ گھاٹا نئیں آؤن دینا چاہی دا ۔ سانوں ایس خوشخبری دی منادی اپنے سچے ایمان نال کرنی چاہی دی اے ۔دُکھ جرن دے ویلے جیہڑی شے دی سب توں بوہتی لوڑ ہووے گی اوہ پانی تے رُوح دی خوشخبری اُتے ایہو ای ایمان اے ۔ جدوں اسیں ازمائشاں تے پریشانیاں نوں ویکھدے آں تاں ، اپنے ایمان دی راکھی کرن تے دُکھاں اُتے فتح پاؤن دی طاقت صرف پانی تے رُوح دی خوشخبری اُتے ایمان نال آوے گی ۔ ایس خوشخبری دی طاقت نال ای ساڈے چہرے خوشی نال چمک سکدے نیں ایتھوں تیک پئی اسیں اپنی ہر دیہاڑے دی حیاتی وچ جیہڑے بوہت اوکھے کم کردے آں ،ایناں نال تھک جاندے آں ۔ ایہہ ساڈے خُداوند دی محبت اے ۔
کئی واری لوک شریعت پچھے چلن دے جال وچ پھس جاندے نیں ۔اوہ سمجھدے نیں پئی خُدا نے اوہناں دے کیتے ہوئے کماں دی اوہناں نوں برکت دتی اے ۔ میَں ،پکے یقین نال، ایہہ فیصلہ نئیں کراں گا پئی ایہہ بالکل غلط اے ، ایس لئی خُداوند نے آکھیا پئی اوہ اوہناں لوکاں نال محبت کرے گا جیہڑے اوہدے نال محبت کردے نیں ۔ پر ایہدا سبب ایہہ نئیں ہیگا پئی اسیں کیہ کیتا اے سگوں خُدا نے ساڈے نال ایہو جیہی محبت رکھی اے پئی سانوں بے پاپ کردتا اے ۔ کیوں جے خدا ساریاں وعدیاں نوں جان دا اے جیہڑے اوہنے ساڈے نال کیتے نیں ،تے ایس لئی پئی اوہ ساڈے سارے پاپاں نوں جان دا اے ، ایس لئی ، اوہ اپنی خاص مرضی تے محبت نال ، سانوں سینے لا کے کامل بناؤندا اے ۔ صرف اوہدیاں برکتاں دے سبب ای اسیں خوشی نال رہ سکدے آں ۔ ایس لئی پئی خُدا نے سانوں اپنے لوک تے اپنے خادم بنایا اے پئی اسیں خُداوند لئی کم کرسکدے آں ، اوہدے جلال دے لیڑے پا سکدے آں ، دوجیاں نوں خوشخبری دی منادی سنا سکدے آں تے جدوں ویلا آؤندا تاں اوہدے نام لئی شہید ہو جاندے آں ۔ اوہ اکلا اے جیہڑا سانوں ایہناں سارے کماں دے لائق بناؤندا اے ۔
کیووادِس(Quo Vadis) وچ شہید ہون والیاں زنانیاں نوں وڈیائی دے گیت گاؤن لئی ایہو جیہی طاقت کتھوں ملی ایتھوں تیک پئی اوہناں نوں موت دی سزا دتی جاندی سی ۔ اوہناں نے ساڈے خُداوند دی محبت وچوں طاقت پائی سی۔ ایس لئی پئی مسیح دی محبت بوہت وڈی سی ، اوہ شہاد ت نوں گیت گاکے سینے لا سکے ۔
ایہو ای اصول ساڈیاں اپنیاں حیاتیاں اُتے وی لاگُو ہوندا اے ۔ اسیں اپنی حیاتی بسر کردے آں ایس لئی پئی خُداوند نے سانوں اِنج کرن دے لائق بنایا اے ؛ ایہہ ساڈے اپنے کماں دے سبب نئیں اے پئی اسیں خُدا دے پُتراں تے خادماں وانگر جیوندے رہندے آں ۔ اسیں ایہدے حق دار ہون لئی کجھ نئیں کیتا ۔ایہہ خُدا دی ساڈے لئی بے بدل تے خاص محبت اے تے ایس محبت اُتے ساڈے ایمان دے راہیں ای اسیں اخیرتیک اوہدے پچھے چل سکدے آں ، بھاویں اسیں کدی کدی ٹھیڈا کھاندے آں ۔ ایہہ طاقت خُدا دی طاقت اے ، ساڈی نئیں ۔ شہادت صرف اوسے خُدادی محبت وچ ہو سکدی اے جنہے سانوں کامل کیتا اے—صرف خُدا دے فضل نال ای اسیں شہاد ت نوں قبول کر سکدے آں ۔ ایس سچیائی دا چیتا رکھنا ، پئی ایہہ خُدا ای اے جیہڑا تہانوں شہیدہون دےلائق بناؤندا اے تے اپنے آپ نوں شہادت لئی تیار کرن دی کوشش وچ اپنا ویلا برباد نہ کرو ، بھاویں ایس بارے وچ تُسیں کجھ وی کر لووو۔ پانی تے رُوح دی خوشخبری اُتے صرف ساڈا ایمان ای سانوں اخیری ساہ تیک خُداوند دی وڈیائی دے لائق بناوے گا ۔
خُداوند نے آسیہ دیاں ست کلیسیاواں نوں فرمایا : ” جیہڑا جتے مَیں اوہنوں اوس زِندگی دے بُوٹے نالوں جیہڑا خُدا دی بہشت وِچ اے۔ پَھل کھان نُوں دیاں گا۔“ زندگی دا بُوٹا نویں اسمان تے دھرتی وچ ہیگا اے ۔ اوتھے خُدا دا تخت ہیگا اے، مہنگے پتھراں نال بنےہوئے گھر ، تے حیاتی دے وگدے ہوئے پانی ۔ جِتن والیاں لئی ،خُدا نے اپنے بہشت دا وعدہ کیتا اے ، جتھے اوہ خاص کر کے اوہدے نال سدا رہن گے ۔
جیہڑے فتح پاؤندے نیں اوہ پانی تے رُوح دی خوشخبری اُتے اپنے ایمان رکھن نال اِنج کردے نیں ۔ ایس خوشخبری توں ہٹ کے کوئی وی دوجی شے فتح پاؤنااوکھا بناوےگی ،جیہڑی بندیاں دی طاقت نال نئیں صرف خُدا دی طاقت نال مل سکدی اے ۔ اوہ طاقت جیہڑی سانوں فتح پاؤن دے لائق بناؤندی اے اوہ صرف خُدا ولوں اے ۔ سانوں ایہدی سمجھ تے قدر کرنی چاہی دی اے پئی پانی تے رُوح دی خوشخبری بوہت وڈی اے تے خُدا دی محبت تے اوہدی مکتی بوہت وڈیاں نیں ، ایس لئی پئی ایہو ای خوشخبری سانوں شہادت قبول کرن دا ایمان دیوے گی ۔ اسیں سارے ماڑے ، جاہل ، بے دینے ،نکمے، بےعقلے تے ان پڑھ ہوسکدے آں ،پر ساڈے کول ہُن وی طاقت اے ، ایس لئی پئی ساڈے دلاں وچ پانی تے رُوح دی خوشخبری ہیگی اے ۔
پانی تے رُوح دی خوشخبری اُتے ایمان رکھن والیاں دے نام حیاتی دی کتاب وچ لکھے گئے نیں ۔ دوجے پاسے ، جیہدا نام حیاتی دی کتاب وچ لکھیا ہویا نئیں اے ، اوہ شیطان دے اگے ڈِگ پوے گا تے اوہدے اگے ہتھیار سُٹ دیوے گا ۔ صرف اوہو ای جنہاں دے نام پانی تے رُوح دی خوشخبری اُتے ایمان رکھن دے راہیں حیاتی دی کتاب وچ لکھے گئے نیں شیطان دے اگے نئیں جھکن گے ۔ تہانوں ایہنوں پکیاں بناؤنا ہووے گا پئی تہاڈا نام ستھرے طریقے نال تے لازمی طور اُتے ایس حیاتی دی کتاب وچ لکھیا ہویا اے ۔
جدوں اسیں شہید ہو جاواں گے ، ایہہ ساڈے ایمان نال ہووے گا ، مسیح دی پہلی محبت جیہڑی ساڈے خُداوند نے سانوں دتی اے ۔ اسیں کسے پریشانی یاں ڈر توں اڈ اپنی شہادت نوں اڈیک سکدے آں ایس لئی پئی ساڈا بھروسہ ہیگا اےپئی ساڈے وچ رہن والا پاک روح سانوں ساڈی شہادت قبول کرن دی طاقت دیوے گا ۔ ایس لئی پئی شہادت دے دُکھاں دا مقابلہ اسمانی جلال نال نئیں کیتا جا سکدا جیہڑا سانوں اڈیک دا اے ، اسیں اپنی موت توں ڈردے نئیں تے ایہدی تھاں اُتے بہادری نال مہنگی خوشخبری دی راکھی کرن لئی اپنی شہادت نوں سینے لاؤندےآں ۔ سانوں ہُن ساری حیرانی چھڈنی چاہی دی اے پئی اسیں کویں شہید ہو سکدے آں ، ایس لئی پئی ایہہ ساڈی ہمت نال نئیں سگوں خُدا ولوں ہیگا اے پئی اسیں شہید ہوواں گے ۔
مینوں پک اے پئی کسے دیہاڑے وڈے سپیکر دے راہیں ہیٹھاں لکھیا گیا اعلان کیتا جاوے گا : ”سوہنے شہریو، نشان لین دا ایہہ اخیری دیہاڑا اے ۔ اج صرف تھوڑے جیہے شہری ایس نشان نوں لین گے ۔ اسیں ہُن تیک تہاڈے تعاون دابوہت شکر کردے آں ۔ نشان لینا تہاڈے لئی بوہت چنگا تے ضروری اے ،ایس لئی پئی ایہہ ساڈے ملک دے حکم نوں قائم کردا اے ۔ ایس لئی ، مہربانی کر کے ،سٹی ہال وچ آووتے چھیتی توں چھیتی نشان لووو ۔ اک واری فیر میَں تہانوں آکھدا ہاں ، تہاڈے نشان لین دا ایہہ اخیری دیہاڑا اے ۔ اج دے مقرر ویلے تیک جیہڑے نشان نئیں لین گے اوہناں نوں ڈاہڈی سزا دتی جاوے گی ۔ ہُن ، ایہہ واضح کرن لئی ، میَں اوہناں لوکاں دے نام لواں گا جنہاں نیں حالے تیک نشان نئیں لیا اے ۔ “ لازمی طور اُتے ، ایہہ اک کہانی اے ، پر ایہو جیہے کم چھیتی آؤن والے دناں وچ لازمی ہون گے ۔
مڈھلی کلیسیا دے ایمانداراں نے مچھی دے نشان توں اک دوجے دی پچھان کیتی ۔ اوہناں وچ ایہہ پچھانن دا نشان سی ۔ اسیں ، وی ، سگوں اک نشان بناواں گے جیہڑا سانوں اپنے بھراواں تے بھیناں نوں پچھانن دے لائق بناوے گا ، تاں پئی اسیں اک دوجے دے ایمان دی اینی حوصلہ افزائی کرسکیے پئی اوہ شہادت نوں قبول کر سکن۔
ایس لئی پئی شہادت کوئی ایہو جیہی شے نئیں ہیگی جنہوں اسیں اپنی ہمت نال پا سکیے ، اسیں اپنی پریشانیاں نوں اک پاسے سُٹ سکدے آں تے ڈھیٹ ہو کے ایہدا مقابلہ کرسکدے آں ۔ساڈی راستبازی دی موت دے اگے کسے طرحاں دے ڈر دی کوئی لوڑ نئیں ہیگی اے ۔ سانوں اوہ سارا کجھ کرنا اے ایس دھرتی اُتے رہندے ہویاں خُداوند لئی جیوندے رہنا اے ۔ اسیں اپنے آپ نوں خُداوند دے حوالے کرسکدے آں ایس لئی پئی سانوں پتہ ہیگا اے ساڈے خُدا دے نام لئی شہید ہونا ساڈا نصیب اے ۔ تہانوں ایہہ سوچنا چاہی دا اے پئی جے تُسیں اپنا مال برباد ہون دے ڈر توں شہادت توں بچن دی کوشش کیتی تاں، تہانوں ایس توں وی بوہتے دُکھ تے بربادیاں ویکھنیاں پین گئیاں ۔ تہانوں لازمی طور اُتے ایمان والے لوک بننا چاہی دا اے ، جنہاں نوں پتہ اے پئی اوہ مسیح لئی شہید ہوجان گے تے، خُداوند لئی اپنیاں حیاتیاں اپنے اخیری ویلے تیک بسر کرن گے ۔
جدوں سانوں ایہہ پتہ لگے گا پئی اسیں شہید ہو جاواں گے ، تاں اسیں اپنے ایمان ، ذہناں تے اپنیاں ساری حیاتیاں وچ بوہتے سیانے ہو جاواں گے ۔ ایہہ علم ساڈیاں کم عقلیاں دا علاج اے ، ساڈی سارے جگ دی سُستی تے لگن نوں پچھاں چھڈن دی اجازت دیندی اے ۔ ایہدا مطلب ایہہ نئیں ہیگا پئی سانوں اپنیاں حیاتیاں چھڈ دینیاں پین گئیاں ، سگوں ایہہ پئی اسیں خُداوند لئی جیوندے رہواں گے ۔ جدوں تیک پئی خُدا دی طاقت شیطان نوں ڈوہنگھے ٹوئے وچ نئیں سُٹ دیندی ، اسیں اوس خُداوند لئی جیوندے رہندے آں جنہے سانوں بچایا ، شیطان تے مخالفِِ مسیح دے خلاف لڑیا تے اوہناں اُتے فتح پائی ، تے فتح دا سارا جلال خُدا تے اوسے اکلے نوں ملے ۔ خُدا ساڈے کولوں جلال پاؤنا چاؤہندااے ۔ میَں خُداوند دا شکر ادا کرداہاں پئی اوہنے سانوں ساڈے ایمان دے نال دین دی اجازت دتی ، یعنی اوہنوں جلال دیندا ھاں جیہڑا سانوں ایناں کجھ دےچُکیااے ۔
ساڈا ایمان اے پئی خُداوند چھیتی نال سانوں لَے جان لئی واپس آوے گا ۔ جدوں بوہت سارے لوک اخیری ویلے وچ خُداول پرت جان گے ،خُدا اوہناں ساریاں نوں اپنیاں بانہواں وچ لَے کے اوہناں نوں لَے جاوے گا ۔جویں پئی خُدا نے مُکاشفہ ۳ :۱۰ وچ فِلدِلفیہ دے کلیسیا نوں آکھیا ، ” ایس کر کے پئی تُوں میرے صبر دے کلام اُتّے عمل کِیتا ایس لئی مَیں وی ازمایش دے اوس ویلے تیری حفاظت کراں گا۔ جیہڑا زمین دے رہن والیاں دے ازمان لئی ساری دُنیا اُتّے آؤن والا ہے۔“ خُدا لازمی طور اُتے اپنے وعدے دے کلام نوں پورا کرے گا ۔
” ایس کر کے پئی تُوں میرے صبر دے کلام اُتّے عمل کِیتا ،“ دے راہیں خُدا نے پاک لوکاں دی وفادار حیاتیاں دا ذکر کیتا اے ۔ ایہدا مطلب ایہہ ہیگا اے پئی اوہ اپنےایمان اُتے قائم رہندے نیں ایس توں نظر ہٹا کے پئی دوجے اوہناں نال کیہ کردے پئے نیں یاں کیہ آکھدے پئے نیں ۔ جدوں خُدا فرماؤندا اے پئی ” ازمایش دے اوس ویلے تیری حفاظت کراں گا،۔ “ اوہ آکھدا پیا اے پئی جیہڑے لوک اوہدے حکم اُتے ڈٹ کے چلے نیں اوہناں نوں ایمان دی ازمائش توں پاک کر دتا جاوے گا ۔
جدوں دُکھ جرن تے شہادت دا ویلا آجاوے گا ، دوجے اکھراں وچ ، خُدا سوکھی جیہی ساڈے نال سرگوشی کرے گا جدوں اسیں وفاداری نال اپنی ہر دیہاڑے دی حیاتی سیوا تے دعا وچ بسرکراں گے ۔ جدوں اسیں اپنے ذہناں وچ ایہہ ترتیب کراں گے پئی اسیں شہید ہونا اے ، تاں ساڈے دل گند توں ستھرے ہو جان گے ، تےایس دے بدلے ساڈا ایمان ہو ر وی پکا ہو جاوے گا ۔ سانوں اپنی اج دی حیاتی نوں خُدا دے اگے خُدا دے اوس وعدے نوں یاد کر کے بسر کرنا اے پئی ساڈی شہادت نال ، سانوں ساریاں نوں ازمائش دے ویلے توں بچا کے رکھیا جاوے گا ۔ سانوں اپنے ایمان وچ ،خاص کر کے ، جیوندے رہنا چاہی دا اے ۔
اج دا زمانہ مُکاشفہ دا زمانہ اے ۔ بوہت سارے بے عقلے مسیحی نیں ، جیہڑے خُدا دے کلام نوں
اک پاسے کردے ہویاں ، دُکھ جرن توں پہلوں چُکے جان دیاں تعلیماں نا ل چمبڑدیاں ہویاں اپنے جھوٹے ایمان اُتے رکاوٹ پاؤندے نیں ۔ جدوں اخیری دیہاڑا آوے گا ، اوہناں نوں پتہ لگ جاوے گا پئی اوہ کنے غلط سن ۔ اوہناں دے بھج نس تے طاقت والے دیہاڑے گنے گئے نیں ؛ سانوں جیہڑا کجھ وی کرنا اے اوہ صرف اپنی پکی آس نال رہنا اے پئی خُدا اپنے وعدے دے کلام نوں پورا کرے گا ۔
جدوں اسیں وڈے دُکھ جرنے دے ویلے وچکار اپڑاں گے تاں ، اسیں اپنے ایمان دی راکھی کرن لئی شہید ہو جاواں گے ، تے ستاں پیالیاں دیاں آفتاں شروع ہون توں تھوڑا جیہا پہلوں ، خُدا ولوں اسیں ہَوا وچ چُکے جاواں گے ہزار ورہیاں دی بادشاہی وچ وڑ جاواں گے ۔ جدوں ساڈی مسیح نال راج کرن دی آس پوری ہو جاوے گی تاں ، ایس دھرتی اُتے ساڈے سارے دُکھاں دا پھل اوہناں انعاماں و چ ملے گا جیہڑے سانوں اُڈیکدے نیں ، تے ساڈا سدا دے اسمان تے دھرتی اُتے جانا سانوں نہ دسیاں جان والیاں خوشیاں دیوے گا ۔ اج ، اسیں ایمان نال ، خُداوند لئی ،خُدا دے اوس وعدے دے پورے ہون دی آس وچ جیوندے پئے آں ۔ اوہدے وعدیاں نوں پورا کرن لئی اپنے خُداوند اُتے بھروسہ کردے ہویاں ،اسیں اوس دیہاڑے دی آس رکھ کے بے چینی نال رہندے آں ۔جدو ں اسیں اوہدے نال اپنے جلالی بدناں وچ سدا لئی جیوندے رہن دے لائق ہوواں گے ۔
میَں خُداوند دا شکر ادا کردا ہاں پئی اوہنے سانوں پاپ دی کامل معافی دی خوشخبری دتی ، تے سانوں اوہدی برکت وچ کھلارن لئی ،تے سانوں شہادت قبول کرن لئی اوہدے اُتے اپنے ایمان دی راکھی کرن دے لائق بنایا ۔
افسُس دی کلیسیا دا پس منظر
اِفسُس، روم دے راج دے ایشیا کوچک خطے دا اک وڈا بندرگاہی شہر ، کاروبار تے دینی سرگرمیاں دی اک تھاں سی ۔ مڈھلی کلیسیا دے ویلے ، ایہہ اک بوہت امیربین الاقوامی شہر سی ، ایہدے شمال وچ سمُرنا سی ،تے ایہدے جنوب وچ میِلیتُس سی ۔ فرضی کہانی مطابق ،لمی تڑنگی زنانی ، جنگ دی دلیردیوی ، نے ۱۲ ویں صدی مسیح توں پہلوں ایس شہر نوں سب توں پہلوں بنایا سی جدو ں اوہنے اتھینے دے ولی
عہد شہزادے اینڈروکلس نوں دتا سی ۔
اِفسُس، مادی طور اُتے بولدیاں ہویاں ، پیسے دھیلے ولوں تگڑا شہر سی ، جیہدا مطلب سی پئی ایہہ اک بوہتا ای دُنیادار شہر وی سی ۔ ایسے لئی خُدا نے اِفسُس دی کلیسیا نوں آکھیا پئی اوہ اخیر تیک لڑن تے شیطان اُتے فتح پاؤن تاں پئی اوہدی پانی تے رُوح دی خوشخبری توں وکھ نا رہ جان ۔ سانوں ایہہ سمجھنا چاہی دا اے پئی خُدا دا سچا کلام بوہت خاص ہیگا اے ، تے سانوں ہر طرحاں نال اپنے ایمان دی راکھی کرنی چاہی دی اے ۔
یوحنا رسول دے راہیں ، خُدا نے اِفسُس دی کلیسیا نوں لکھیا ؛ ” پئی جِس اپنے سَجے ہتّھ وِچ سَتّ تارے لَئے ہوئے نیں تے سونے دِیاں ستّاں دِیویاں وِچ پِھردا اے۔ اوہ ایہہ آکھدا اے پئی۔مَیں تیرے کمّ تے تیری محنت تے تیرے صبر نُوں تے جاننا آں تے ایہہ وی پئی تُوں بُریاں نُوں ویکھ نئیں سکدا۔ تے جیہڑے اپنے آپ نُوں رسُول آکھدے نیں تے ہَین نئیں۔ تُوں اوہناں نُوں ازما کے جُھوٹھیاں ویکھیا۔تے تُوں صبر کرنا ایں تے میرے ناں دی خاطر مُصِیبت سہہ سہہ کے تھکیا نئیں۔ “ اِفسُس دی کلیسیا دی خُدا نے اوہناں دے کم ، صبر ، بدی نوں ناسہن تے جھوٹیاں رسولاں دی ازمائش تے اوہناں نوں بے پردہ کرن دی تعریف کیتی ، یعنی ڈٹ کے چلن تے صبر نال اوہدے نام دی خاطربوہت چوکھی محنت کرن لئی ۔
پر اِفسُس دی کلیسیا نوں اوہناں دیاں بدیاں دے سبب جھڑکاں وی پئیاں ۔ جویں گل چلدی پئی اے : ” پر مَینُوں تیرے اُتّے ایہہ شکایت اے۔ پئی تُوں اپنی پہلی مُحبّت نُوں چھڈ دِتّا۔ایس لئی تُوں چیتا کر پئی تُوں کِتّھوں ڈِگّا ایں۔ تے تَوبہ کر کے پہلے وانگر کمّ کر۔ تے جے تُوں تَوبہ نا کریں گا۔ تے تیرے کول مَیں آ کے تیرا دِیوا اوہدی تھاں توں ہٹا دیاں گا۔بے شک تیرے وِچ ایہہ گلّ تے اے۔ پئی تُوں نِیکُلیوں دے کمّاں توں نفرت کرنا ایں جِنہاں توں مَیں وی نفرت کرنا آں۔جِہدے کنّ ہون اوہ سُن لَئے۔ پئی رُوح کلِیسیاواں نُوں کِیہ آکھدا اے۔ جیہڑا جتے مَیں اوہنوں اوس زِندگی دے بُوٹے نالوں جیہڑا خُدا دی بہشت وِچ اے۔ پَھل کھان نُوں دیاں گا۔ “
اُتلی لکھی ہوئی عبارت وچ ایہہ آکھیا گیا اے پئی خُدا نِیکُلیوں توں نفرت کردا اے ۔ ایتھے نِیکُلیوں ایمانداراں دے اک خاص جھنڈ دا حوالہ دیندا اے جیہڑا خُدا دے خلاف کھلوتا سی ،مطلب اے اوہدی کلیسیاتے اوہدی سچیائی دے خلاف ۔ بالکل ٹھیک نِیکُلیوں نے جیہڑا کجھ کیتا اوہدے بارے وچ
کھول کے پرگمن دی کلیسیا ول آؤن والے بعد دے حوالے وچ ہور کھول کے دسیا گیا اے ۔
نِیکُلیوں دے غلط کم
مُکاشفہ ۲ :۱۴ و چ آکھیا گیا اے ، ” پر مَینُوں کُجھ گلّاں دی تیرے اُتّے شکایت اے ایس لئی پئی تیرے اوتھے کُجھ لوک بِلعام دی تعلِیم مَنّن والے نیں جِس بلق نُوں بنی اِسرائیل اگّے ٹھوکر رکھن دی تعلِیم دِتّی یعنی ایہہ پئی اوہ بُتاں دِیاں قُربانِیاں کھان تے حرامکاری کرن“ایس عبارت نال رَلدا حوالا گنتی دی کتاب دے باب ۲۲ وچ ملدا اے ، جتھے موآبیوں دے راجے ،بلق دی کہانی لکھی اے ۔
اوس ویلے جدوں مصروں نکلن دے بعدوں اسرائیلی کنعان وچ موآب دے میداناں وچ اپڑ گئے سن ، اوہناں نیں ایس دھرتی دے ست قبیلیاں نوں فتح کر لیا سی ، ”جویں ڈھگا میدان داگھاہ چٹ کرجاندا اے ۔ “ایس فتح دے بارے سُن کے بلق اوہناں دےخُدا توں گھبرا گیا ، ایس لئی پئی اوہنوں ڈر سی پئی موآبیوں دے لیکھ وی کنعان دے پہلوں ای فتح کیتے ہوئے قبیلیاں دے وانگرہون گے ۔ بنی اسرائیل نوں فتح پاؤن توں روکن لئی کوئی چکر چلاؤن دی کوشش وچ ، بلق نے بلعام ، اک جھوٹا نبی نوں سدیا، تاں پئی اوہ اوہدے لئی بنی اسرائیل اُتے لعنت کرے ۔
بلعام اک جھوٹا نبی سی ، پر غیر یہودی ایہہ سوچدے سن پئی اوہ خُدا دا خادم اے ۔اوہ نہ تاں سردارکاہن ہارون دی پیڑھی وچوں سی تے نہ ای لاوی سی ۔ پر موآبیوں دے راجے ، بلق نوں یقین سی پئی اوہ جنہاں نوں بلعام برکت دیوے اوہناں نوں برکت ملے گی ، تے جنہاں اُتے اوہ لعنت کرے اوہ لعنتی ہون گے ۔ اوس ویلے ، بلعام ، بھاویں اک جھوٹا نبی سی ، اک نامی گرامی جادوگر وانگر سارے مُلک وچ مشہور سی۔
پر بلق راجے نے بلعام نوں جو کجھ کرن لئی آکھیا اوہنے اوس طرحاں نہ کیتا ۔ ایہدا سبب ایہہ سی پئی بنی اسرائیل خُدا دے لوک سن ،نہ صرف بلعام نوں خُداولوں اسرائیلیاں اُتے لعنت کرن دی کوئی اجازت نئیں ہووے گی ، سگوں اِنج کرن دی کوشش وی صر ف اپنے آپ اُتے اک لعنت کرن وانگر ہووے گی ۔ خُدا دی رُوحانی طاقت ہیٹھاں ، بلعام اصل وچ بنی اسرائیل نوں برکت دین دے سوا کجھ نئیں کر سکدا سی ۔ ایہدے توں ناراض ہوئے ،فیر بلق نے بلعام نوں آکھیا پئی اوہ اسرائیلیاں اُتے ،لعنت کرے جتھوں او ہ اوہناں نوں نئیں ویکھ سکدا سی ۔
بلعام نے بلق کولوں خزانے وچوں بوہت چوکھا حصہ لیا تے بدلے وچ اوہنوں بنی اسرائیل اُتے لعنت کرن دا اک ول سکھایا ۔ طریقہ ایہہ سی پئی اوہ اوہناں نوں بھیڑے کم کرن لئی موآبیوں دیاں قربانیاں وچ آؤن دی دعوت دیوے تے اوہناں نوں اپنیاں زنانیاں دیوے ،تاں پئی بنی اسرائیل نوں خُدا کولوں اوہناں دے پاپاں دی سزا ملے ۔ ایس طرحاں جھوٹے نبی بلعام نے بلق نوں بنی اسرائیل نوں برباد کرن دی تعلیم سکھائی ۔
خُدا نے آکھیا پئی اوہ بلعام توں نفرت کردا اے ایس لئی پئی بلعام پیسیاں نال محبت کرن والا بندہ سی ۔ اج دی مسیحی برادری وچ بوہت سارے لوک نیں جیہڑے بلعام وانگر نیں ۔ اوہ سارے اصل وچ جھوٹے نبی نیں ، پر ایہناں وچوں بوہتے ہُن وی احترام دے لائق تے عزت دے لائق نیں ۔ پربلعام نے جیہڑی شے نوں لبھیا اوہ جگ دا مال سی ۔ جدوں اوہنوں پیسہ کھوایا گیا تاں ؛ اوہنے برکت دتی ؛ جدوں اوہ نئیں سی ، اوہنے لعنت کیتی ۔ اج دی مسیحی برادری وچ ، دُکھ دی گل ایہہ ہیگی اے پئی ایناں وچوں بوہت سارے لوک جیہڑے خُدا دے خادم سمجھے جاندے نیں بالکل بلعام وانگر نیں ۔ جدوں خُدا اُتے ایمان رکھن والے صرف پیسے دھیلے دے فائدے پچھے ٹُردے نیں تاں ، اوہ جھوٹے نبیاں وانگر مُک جاندے نیں ۔ ایس لئی خُدا نیِکُلیوں توں نفرت کردا سی ۔
کیہ تہانوں پتہ ہیگا اے پئی خُدا دی کلیسیا تے اوہدے خادماں وچ کیہڑی شے بربادی لیاؤندی اے ؟ ایہہ پیسے نال محبت اے ۔ اوہ لوک جیہڑے اپنیاں اکھاں دے اگے صرف پیسے دھیلے دے فائدے رکھدے نیں اوہناں نوں خُدا دےاگے اپنی بربادی ویکھنی پوے گی ۔
کلیسیاواں جیہڑیاں بلعام پچھے چلدیاں نیں
اج جویں پئی رسولاں دے دناں وچ ، بوہت ساریاں دُنیا دار کلیسیاواں تے جھوٹے خادم بلعام
دی راہ اُتے چلدے پئے نیں ۔ اوہ اپنیاں موجاں لئی اپنے پچھے آؤن والیاں کولوں ہر طرحاں پیسے اکٹھے کرن لئی مُک جاندے نیں ۔ مثال طور اُتے ، جُھنڈ وچ اوہناں وچکار برابری کرن دی ایہہ انوکھی مہم اے پئی اوہناں دے ایمان دی تصدیق اوہناں دی روحانیت دے راہیں نئیں سگوں اوہناں دے دُنیادار ہدیاں دے راہیں کیتی جاوے، جِویں کسے ایماندار دا ہدیہ اوہدے ایمان نوں ناپن دا ہتھیار ہووے ۔ مطلب ایہہ ہیگا اے پئی کلیسیا وچ بوہتا ہدیہ دین والیاں دا ایمان اوہناں لوکاں دے ایمان توں بوہتا اے جیہڑے گھٹ ہدیہ دیندے نیں ، ایس لُٹ مار دی مہم نوں ودھاؤن دا اکو مقصد گرجے نوں مالامال کرنا اے ۔
جے ایماندار اپنے سچے دلوں خُدا تے اوہدی خوشخبری دی سیوا کرن دا فیصلہ کردے نیں تاں ایہہ سچ مُچ اک حیرانی والی گل اے ۔ پر بلعام ورگے جھوٹے نبی ایمانداراں دا اپنا ٹِہڈ بھرن لئی شکار کردے نیں ۔ اوہ اپنے پچھے آؤن والیاں نوں مادی گواہیاں دامقابلہ کرن لئی آکھدےنیں جویں ، ”میَں دسواں حصہ وفاداری نال دتا ، تے خُدا نے میرے کاروبار دے راہیں مینوں دس حصے برکتاں دتیاں ۔ “ بلعام کولوں دھوکہ کھا کے ، بے خیالے ایمانداراں دا خیال ہیگا اے پئی ایہہ کھرے ایمان والا راہ اے ، جد پئی اصل وچ ایہہ اوہناں دی غریبی ، رُوحانی تے پیسے دھیلے والی ، جھوٹے فخر تے اخیریں اوہناں دی اپنی بربادی دا راہ اے ۔
” نِیکُلیوں دے کم“بلعام دے کماں توں ہٹ کے کوئی ہور نئیں ہیگے ۔ جویں بلعام نے اپنے لالچ وچ بلق نوں بنی اسرائیل دے اگے ٹھیڈا کھان والا پتھر کھلارن دا سبق دتا ، بوہت سارےلوک جیہڑے اج دے مسیحی بھائی چارے وچ خُدا دے خادم ہون دا دعویٰ کردے نیں صرف اپنے لوکاں دی جیب وچ دھیان رکھدے نیں۔ جیہڑے لوک اوہناں جھوٹیاں نبیوں توں پُٹھے راہ پیندے نیں اوہ اپنا سارا پیسہ دھیلا اوہناں نقلی ایّالیاں دے حوالے کر کے خالی ہتھ ہوندے ہویاں مُک جاندے نیں ، تے ایتھوں تیک پئی ایہدے توں وی گھاٹے والی گل ایہہ ہیگی اے پئی پہلوں یاں بعدوں اوہ ہوش وچ آن گے تے اوہ سوچن گے پئی جیہڑی شے اُتے اوہناں نیں ایمان رکھیا سی اوہ بالکل غلط سی ۔ اخیریں ، اوہ جھوٹی کلیسیا نوں جرم وار بناؤن گے تے اپنے ایمان نوں چھڈ دین گے ۔ بے نصیبی نال ، دُکھ بھری سچیائی ایہہ ہیگی اے پئی معاملیاں دی ایہہ دُکھی صورتِ حال اینی نکی گل نئیں ہیگی اے، ایتھوں تیک پئی صرف نام دیاں بشارتی کلیسیاواں وچ وی ۔ بلعام کولوں دھوکہ کھا کے ، بوہت سارے ایماندار ایس فریب دے راہیں راہوں بھٹکے تے کلیسیا نوں چھڈ کے مُک گئے ۔
پاک کلام سانوں دسدا اے پئی خُدا نیکُلیوں دے کماں توں نفرت کردااے۔ جےاسیں نیکُلیوں دے پچھے چلدے آں تاں، اسیں خُدا اُتے اپنا ایمان کھوا لواں گے۔ ساڈے کول بوھت ساریاں گواہیاں نئیں جیہڑیاں خُدا نے سانوں دتیاں نیں ، تے ایہہ ساریاں روحانی طور تے مالامال کرن والے خزانےنیں ۔ پر گواہیاں نوں ورتدے ہویاں پیسے دھیلے لینا اک ایہو جیہی شے ہیگی جیہدے کولوں سانوں بالکل وکھ رہنا چاہی دا اے ،ایس لئی پئی ایہہ نیِکُلیوں دا طریقہ اے جیہدے توں آپ خُدا نے نفرت کیتی ۔
کماں دے نال ایمان
خُدا نے آسیہ دی ساریاں کلیسیاواں نوں نیِکُلیوں دے کماں دے خلاف خبردار کیتا ۔ ایس توں ہٹ کے ، اوہنے اوہناں نال ایہہ وی وعدہ کیتا پئی جیہڑے فتح پاؤن گے اوہ حیاتی دے بُوٹے وچوں کھان گے ۔ جدوں اسیں خُداوند دی سیوا کردے آں ، تاں اسیں اِنج ایمان دے راہیں کر سکدے آں ، ایس لئی پئی اوہدے چھڈاؤن لئی ساڈی شکر گزاری دے سبب ،تے ایس علم دے سبب پئی پانی تے رُوح دی خوشخبری ودھاؤنا صرف ٹھیک کم اے ۔ اسیں دوجیاں نوں وکھاؤن لئی ، یاں کسے وی طریقے نال چنگے نظر آؤن لئی خُدا دی سیوا نئیں کردے آں۔ اِنج کرنا نہ تاں اصل سیوا اے تے نہ ای اصل ایمان ۔ خُدا دی کلیسیا وچ ، سانوں نیِکُلیوں وانگر ایہناں کماں دے بارے وچ بوہت احتیاط کرنی چاہی دی اے ۔ ایس لئی پئی خُداوند نے آسیہ دیاں ساریاں ستاں کلیسیاواں نوں نیِکُلیوں دے بارے خبردار کیتا اے ۔
کیہ تہانو ں پتہ ہیگا اے پئی بوہتیاں کلیسیاواں ،جیہڑیاں نویں سریوں جمن والیاں کلیسیاواں نئیں ہیگیاں ، اینیاں بوھتیاں تے اینی چھیتی نال کیوں ودھیاں نیں ؟ اوہ ودھ گئے ایس لئی پئی اوہناں دیاں کلیسیاواں نوں جیہڑی شے نے بنایا اوہ جھوٹے ایمان تے جھوٹیاں گواہیاں سن ۔ خُدا دے خادماں نوں اپنے ٹِہڈ بھرن لئی اپنیاں بھیڈاں توں کدی وی فائدہ نئیں چُکنا چاہی دا ۔
سچا ایمان اوس مکتی اُتے بھروسہ کردا اے جیہڑی خُدا نے سانو ں یسوع دے پپتسمے ، سولی اُتے لہو ، تے ساڈے بدلے اوہدی سزا دے نال دتی اے ۔ پر بوہتیاں کلیسیاواں ، نویں سریوں جمیاں نیں یاں اوہناں وانگر نئیں ، اپنیاں لوکاں دیاں جیباں اُتے چھاپے مارن لئی گواہیاں نوں وردتدیاں نیں ۔ تہانوں اینی احتیاط کرنی تے سیانا ہونا چاہی دا اے پئی ایہہ پچھان لووو پئی جدوں تہاڈے ایمان نوں سچیاں گواہیاں سواردیاں نیں تے خُدا دی وڈیائی کردیاں نیں ، تاں جھوٹے ای تہاڈا اپنا جال بنن گے ۔
اج دے دناں دیاں ساریاں مال والیا ں کلیسیاواں دی اگوائی اوہناں خادماں دے راہیں ہوندی پئی اے جیہڑے بلعام وانگر نیں ۔ کلیسیا دے آگو جیہڑے بلعام دے راہ اُتے چلدے پئے نیں اوہ اپنیاں کلیسیاواں نوں صرف اپنے پیسہ دھیلا ودھاؤن لئی اپنے پچھے چلن والیاں نوں لُٹن لئی ورتدے نیں ۔ بلعام وانگر مسیحی آگو اپنے پچھے چلن والیاں کولوں مادی گواہیاں دا مقابلہ کر ن لئی آکھدے ہویاں پیسے کھوندے نیں ۔ مینوں اوہناں دے کماں توں بوہت نفرت ہیگی اے ۔
ایمان دی اصل حیاتی دا شروع ایمان توں ہٹ کے کسے ہور نال نئیں ہوندا اے ۔ سانوں نیکُلیوں دے جال توں بچن لئی جیہڑا شیطان نے لایا اے بوہت سیانے ہونا چاہی دا اے ۔ساریاں نوں ایہہ پتہ ہونا چاہی دا اے پئی نیکُلیوں دے کم کیہ نیں ، تے شیطان دے خادماں کولوں کدی وی دھوکہ نئیں کھانا چاہی دا جنہاں دا لالچ بوہت چوکھا اے ۔ خُدا دے بندیاں نوں خاص کر کے ایس سلسلے وچ بوہت احتیاط کرنی چاہی دی اے ۔ ایہدے وچ خادم وی رَلے نیں ۔ جدوں خادم اپنے پیسے دھیلے دے بارے وچ حدوں چوکھے فکر مند ہو جاندے نیں — اوہ کیہڑیاں کاراں چلاؤندے نیں ، اوہناں دے گھر کنے وڈے نیں ، اوہ کنی وڈی جائیداد دے مالک نیں ، اوہناں دے بینک اکاؤنٹس کنے وڈے نیں —اوہ اپنیاں کلیسیاواں نوں لُٹ دیاں ہویاں مُک جاندے نیں ، اوہناں نوں ہیٹھاں نیکُلیوں دے راہ اُتے پاؤندیاں ہویاں ۔
خُدا نے آسیہ دی ست کلیسیاواں نوں آکھیا پئی اوہ ایس مسئلے اُتے خاص دھیاں کرن ۔ بلعام دے ایمان والا بندہ صرف پیسے دھیلے دے فائدے ، اپنےآپ دی شان ودھاؤن دی فکر وچ رہندا اے ، تے اخیریں اوہدا ارادہ ہوندا اے پئی اوہ اک فرقےدا آگُو بن جاوے ۔ خُدا دی کلیسیا نوں اپنے آپ جگ دے پیسے دھیلے دی فکر نئیں کرنی چاہی دی اے ۔جویں پئی خُدا نے ساڈے نال وعدہ کیتا اے پئی اوہ اوہناں لوکاں نوں برکت دیوے گا جیہڑے پانی تے رُوح دی خوشخبری پچھے چلدے نیں ، سانوں اپنے جگ دے پیسے دھیلے نوں خوشخبری دی منادی کرن لئی ورتنا چاہی دا اے ، اوہنوں ایس دھرتی اُتے جوڑن لئی نئیں ۔
جھوٹے ایّالیاں نوں ردّ کردیوو
ایتھوں تیک پئی جے نویں سریوں جمن والے پاک لوک وی نیکُلیوں دے جال وچ جان تاں اوہ تباہ ہو جان گے ۔ شروع وچ او ہ ایہہ سوچ سکدے نیں پئی ایہو جیہے آگُوآں دا ایمان حیرانی والا تے پکا اے ، پر جھوٹے ایّالیاں دے فریب اوہناں نوں اخیریں اوہناں دی بربادی ول لَے جاون گے۔
خُدا نے اِفسُس دی کلیسیا دے فرشتے نوں آکھیا پئی اوہ نیکُلیوں دے کماں توں نفرت کردا اے ۔ ہر اوہ بندہ جیہڑا نیکُلیوں دے جال وچ پھس گیا اے اوہنوں اپنی ڈاہڈی بربادی ویکھنی پوے گی ۔ بھاویں اوہ نویں سریوں جمن والا ایماندار ، خُدا دا خادم ، یاں کوئی ہور ہووے ، نیکُلیوں دے راہیں جال وچ پھس جانا ڈاہڈی بربادی اے ۔ جویں اک گیا گواتا ایّالی بھیڈا ں نوں موت ول لَے جاندا اے ، جھوٹے نبی اپنے آپ اُتے لعنت لیاؤندے نیں ۔
ایہو ای سبب ہیگا اے پئی خُدا نے اپنے خادماں نوں آکھیا پئی ”میریاں بھیڈاں نوں چرا۔“خدا دے خادماں نوں ایمانداراں دی راکھی کرنی چاہی دی اے ایس لئی پئی ایّالی اپنیاں بھیڈاں بکریاں نوں پال دے نیں ، اوہناں نوں خطریاں توں بچاؤندے نیں تے اوہناں دیاں لوڑاں نوں پورا کردے نیں ۔ ایّالیاں وانگر ، اوہناں نوں ایس گل اُتے پکیا ں ہونا چاہی دا اے پئی اوہناں دیاں بھیڈاں بھٹک نہ جان ، پتہ کرن پئی اوہناں دے اگے کیہڑے خطرے لُک کے بیٹھے ہوئے نیں ،تے اوہناں نوں ایس طرحاں دے خطریاں دے نیڑے ہون توں بچاؤنا اے ۔
میَں اوہناں لوکاں کولوں سُنیا اے جیہڑے اصل وچ بھیڈاں پال دے نیں ، پئی اوہ بوہت اڑیل پسوُ نیں ۔ کیہ اسیں خُدا دے اگے اوہناں ڈھیٹ بھیڈاں وانگر نئیں ہیگے ؟ خُدا دے کول اک ودھیا سبب ہیگا سی جدوں اوہنے سانوں دسن لئی بھیڈاں دی مثال ورتی ،ایس لئی پئی اوہنوں خاص پتہ ہیگا سی پئی اسیں اپنے خاص کماں وچ بوہت ڈھیٹ ہیگے آں ۔
کیوں خُدا نے کئی واری آسیہ دیاں ست کلیسیاواں نال نیکُلیوں ، اِیزبِل تے بلعام د ے کماں دی گل کیتی ؟ اوہنے ایہہ وعدہ کیوں کیتا پئی فتح پاؤن والیاں نوں ،زِندگی دے بُوٹے وچوں کھان لئی دیوے گا ؟ اوہنے سانوں جھوٹے نبیاں دے فریب توں احتیاط کرن دی تعلیم سکھاؤن لئی اِنج کیتا ۔ سانوں خُدا دے کلام اُتے دھیان کرنا چاہی دا اے تے اپنے آپ کولوں پچھنا چاہی دا اے ، ” پانی تے رُوح دی اصل خوشخبری کیہ ہیگی اے ؟“ خُدا دے کلام نوں کجھ بندیاں دے سبقاں نال رلاؤنا تے احتیاط نال ایہنوں سوارن دا مطلب ایہہ نئیں ہیگا پئی ایہہ خوشخبری اے ۔ اج دی مسیحیت وچ بوہت سارے سوہنے کر کے بنائے گئے پیغام ہیگے نیں جنہاں دا پانی تے رُوح دی خوشخبری نال کوئی کم کار نئیں ہیگا ۔ بوہت سارے مشہور منادایتھوں تیک پئی اوہناں نیں اپنے پیسے دے کے پیغام لکھن لئی بندے رکھے ہوئے نیں جیہڑے اوہناں لئی اپنے ولوں پیغام لکھدے نیں ،تے جو کجھ اوہ کردے نیں اوہ کسے ہور دے تیارکیتے ہوئے پیغام وچوں پڑھیا جاندا اے ۔
سانوں کدی وی نیکُلیوں دے جال وچ نئیں پھسنا چاہی دا ۔ نویں سریوں جمن والی کلیسیا نوں پیسے دھیلے دے پچھے جان توں بوہت احتیاط کرنی چاہی دی اے ؛ خاص کر کے خادماں نوں پکے راکھے ہونا چاہی دا اے ، پر لوکاں وچوں ہر بندے نوں وی اِنج ای کرنا چاہی دا اے ۔ کلیسیا دے بندیاں کولوں پیسے کڈھن دی کوشش کرنا ، کلیسیا دے فضول پیسے لوا کے اوہنوں سجاؤنا ، تے کلیسیا دیاں عمارتاں نوں بناؤنا جیہڑیاں گرجیاں توں ودھ محلاں وانگر نظر آؤندیاں نیں — ایہہ سارے منادی کردے نیں پئی خُداوند دا پرت آؤنا نیڑے ہیگا اے ! —ایہہ سارے جھوٹے ایمان دے کم نیں ، بالکل جویں پئی نیِکُلیوں دے کم ۔
سانوں خاص کر کے جھوٹےایّالیاں ول دھیان کرنا چاہی دا اے ، تے ایس گل نوں خاص سمجھنا چاہی دا اے پئی اسیں اوہناں دے عقیدے اُتے چل کے کدی وی دھوکہ نہ کھائیے ۔ پاک لوکاں نوں صرف پیسے نال محبت نئیں کرنی چاہی دی ۔سگوں ،اوہ شے جنہوں سنبھالنا تے پیا رکرنا چاہی دا اے پانی تے رُوح دی خوش خبری اے ، خُدا دی پہلی محبت ۔ سانوں اپنیاں وفادار حیاتیاں نوں ایس سچیائی اُتے قائم رہ کے گزارنا چاہیداپئی خُدا نے سانوں مسیح دے پانی تے لہو دے راہیں بچایا اے ، اوس دیہاڑے تیک جدوں اسیں یسوع نال ملاں گے ۔ سانوں خُدا دے کلام اُتے بھروسہ کرنا چاہی دا اے پئی یسوع نے اپنے بپتسمے تے سولی اُتے اپنی موت نال ساڈے سارے پاپاں نوں مکایا اے ۔
اوہ لوک جیہڑے نیِکُلیوں پچھے چلدے نیں اوہ کدی وی پانی تے رُوح دی خوشخبری دی منادی نئیں کردے ۔ اوہ پانی تے رُوح دی خوشخبری دے کماں وچ دل نئیں لاؤندے ، سگوں صرف پیسے بناؤن وچ ۔ ایہہ اج دے بلعام نیں ، جنہے بنی اسرائیل دے اگے ٹھیڈا کھان والا پتھر رکھیا تے اوہناں نوں بربادی ول لَے گیا ۔ تہانوں چیتا رکھنا چاہی دا اے ۔
بلعام اخیریں یشوع ہتھوں ماریا گیا ۔ جویں پئی یشوع دی کتاب وچ لکھیا ہویا اے ، ایہہ جھوٹا نبی
یشوع دے تلوار نال اوس ویلے ماریا گیا جدوں اسرائیلیاں نیں کنعان فتح کیتا ۔ بلعام نوں ماریاگیا ایس لئی پئی اوہ خُدا دا اصلی خاد م نئیں سی ۔ اوہ سارے لوک جیہڑے مسیح دا نام بھولے ایمانداراں نوں لُٹن تے اپنے ٹِہڈ بھرن لئی ورتدے نیں اج دے بلعام نیں ۔ سانوں چیتا رکھنا چاہی دا اے پئی بلعام اپنے لالچ نوں پورا کرن لئی سارے ورتے جان والے طریقے ودتدا سی ۔
خُدا نے اِفسُس دی کلیسیا دے خادماں نوں آکھیا ، ” جیہڑا جتے مَیں اوہنوں اوس زِندگی دے بُوٹے نالوں جیہڑا خُدا دی بہشت وِچ اے۔ پَھل کھان نُوں دیاں گا۔ “ ایہنوں وکھ اکھراں وچ دسدیاں ہویاں ، ایس حوالے دا ایہہ وی مطلب اے پئی جیہڑے لوک ماڑے ہو جاندے نیں تے ہار جاندے نیں اوہ مر جان گے ۔ بلعام دے راہ اُتے چلنا ہارجانامطلب اے، بندے دی اپنی موت دا راہ اے ۔خُدا نے سانوں اپنا خبردار کرن والا کلام دتا تاں پئی اسیں نیِکُلیوں دے جال وچ نہ پھسیے ، تے میَں ایہدے لئی اوہدا شکر اداکردا ہاں ۔ ایہہ میری خالص آس تے دُعا ہیگی اے پئی تُسیں پیسے دھیلے دے لالچاں توں ہار نئیں منو گے تے خُدا دی مدد نال اپنے لالچ نوں چھڈ دیوے گے ۔
- ایس توں پہلاں
- ایس توں بعدوں
Copyright © 2021 by The New Life Mission