Search
پنجابی
پنجابی
کورونا وائرس تے عالمگیر ڈاک سروس وچ رکاوٹ دے سببوں، اَسیں اپنی ’مُلوں بغیر چھاپی ہوئی کتاب دی سروس‘ نوں تھوڑے چِر لئی بند کر دے پئے آں۔
ایس صورتحال دے چانن وچ اسیں ایس ویلے تہانوں کتاباں گھلن دے قابل نئیں ہیگے آں۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔

خطبے

مضمون 10: مُکاشفہ(مُکاشفہ دی کتاب اُتے تفسیر)

[5-2باب] برّہ جیہڑا تخت اُتےبیٹھا اے (مُکا شفہ ۵:۱۔ ۱۴)

برّہ جیہڑا تخت اُتےبیٹھا اے
)مُکا شفہ ۵:۱۔ ۱۴(
 
اسیں تھوڑی چر پہلوں ای مُکاشفہ ۵ باب وچوں لنگھے آں۔ ایتھے خُدا دا کلام سانوں دسدا اے پئی خُداوند اوہو ای اے جیہڑا اخیری ویلیاں وچ بندیاں نوں بچاوے گا تے اوہناں دا انصاف وی کرے گا۔ ایہہ خُداوند کیہڑا اے جیہدے اُتے اسیں ایمان رکھدے آں ؟ کلام سانوں دسدا ا ے پئی یسوع مسیح اوہناں لوکاں لئی مکتی داتا اےجیہڑے اوہدے اُتے ایمان رکھدے نیں ، سارے لوکاں داانصاف کرن والا ،تے بادشاہواں دا بادشاہ ۔
اسیں بوہتا یسو ع دے بارے وچ اک حد وچ رہن والے خُداوند وانگر سوچدے نیں ۔ پر ساڈا خُداوند سارے لوکاں دا انصاف کرن والا اے ۔
خُداوند نے سانوں پانی تے رُوح دی خوشخبری دے کے ساڈے سارے پاپاں ، سزا تے بربادی توں بچایا اے ۔ خُداوند ایس لئی ساڈا اصلی مکتی داتا تے سچا خُدا بن گیا ۔ ایہدے نال ای ، ساڈا خُداوند سارے لوکاں دا بادشاہ تے انصاف کرن والا اے ۔ اج ، اسیں اوس خُداوند لئی شکر کرن والے دلاں نوں جگائیے جیہدے اُتے اسیں ایمان رکھدے آں تے جیہدے اُتے اسیں بھروسہ رکھدے آں ۔
آیت نمبر۱ تے ایہدے بعدوں، اسیں ویکھدے آں پئی اوہدے سجے ہتھ جیہڑا تخت اُتے بیٹھا سی اوہدے کول اک کتاب سی ، تے ایہہ پئی برّے یعنی —یسوع مسیح نے ، چھیتی نال اوس کتاب نوں لےلیا ۔ اسیں اخیری آیت وچ ایہہ وی ویکھدے آں پئی خُداوند ایس تخت اُتے بیٹھا سی ۔ ایہہ کلام سانوں دسدا اے پئی خُداوندبوہت چھیتی ساریاں لوکاں دا ایمانداراں تے غیر ایمانداراں دونواں دا اکو جیہا انصاف کرن والا ہووے گا ۔ ایس لئی اسیں جان سکدے آں تے ایمان رکھ سکدے آں پئی یسوع ای خُدا اے جیہڑا ساریاں دا انصاف کرن والا بن گیا اے۔
ساڈا خُداوند اپنے انعام تے سزا نوں صرف ساڈے لئی ای تیار نئیں رکھدا جیہڑے نویں سریوں جمے آں ، سگوں اوہ سنسار دیاں ساریاں شیواں تے سارے لوکاں دا سچا انصاف کرن والا تے بادشاہواں دا بادشاہ اے ۔ لوک بوہتا آکھدے نیں پئی ہُن اسیں ۲۱ ویں صدی وچ وڑ گئے آں ۔ ایہہ ویلا خُداوند دے پرت کے آؤن دا ہو سکدا اے ۔ جدوں اسیں آکھدے آں پئی خُداوند دا پرت کے آؤنا نیڑے آگیا اے تاں ، ایہدا مطلب ایہہ وی ہیگا اے پئی جگ دی بربادی وی نیڑے ہیگی اے ۔
ایتھے اسیں کلا م وچوں جو کجھ لبھ سکدے آں اوہ ایہہ ہیگا اے پئی خُداوند کول ایہہ طاقت ہیگی اے پئی اوہ ساریاں دا انصاف کرن والا بنے ۔ ساڈا خُداوند بندیاں دے روپ وچ ایس دھرتی اُتے آیا سی ، تے ۳۰ ورہیاں دی عمر وچ ، اوہنے اپنے بپتسمے نال سارے لوکاں دے سارے پاپاں نوں اکو ای ویلے اپنے اُتے چُک لیا ۔ تے مرن تیکرسولی اُتے چڑھ کے ، اوہنے سارے لوکاں دے سارے پاپاں لئی سزا جری ۔
صرف خُدا باپ ای اسمان تے زمین دےہر بندے تے ساریاں شیواں توں عزت تے وڈیائی حاصل کر سکدا اے ۔پر خُدا دے پُتر ، یسوع مسیح ، نوں ایہہ حق دتا گیا سی پئی اوہ خُدا باپ دے مرضی نوں من دیاں ہوئیاں تے پوریاں کرن لئی باپ نال عزت تے وڈیائی پاوے ۔ ایس طرح مسیح باپ کولوں اپنی ساری طاقت دی حد میراث وچ لے سکدا اے ۔
یسوع مسیح نوں ایہہ حق دتاگیا سی پئی اوہ ہر کسے دا انصاف کرے ، تے صرف اوسے دے راہیں ہر بندہ مکتی پاؤندااے تے اوہناں دا انصاف کیتا جاندااے ۔ ساڈے لئی ایہہ جاننا بوہت فائد ہ مند اے پئی اوہو ای خُداوند اے جنہے سانوں بچایااے ۔ ایسے طرح ایہہ تعلیم ساڈے لئی لازمی ہیگی اے پئی اسیں اخیری ویلیاں وچ وی اپنے ایمان نوں پکا رکھیے ۔ جدوں اسیں خُداوند اُتے خاص تعلیم نا ل ایمان رکھدے آں ایہہ پئی اوہ کس طرح دی طاقت رکھدا اے تاں ، ایہہ تعلیم ساڈے لئی اک وڈی طاقت بن جاندی اے ۔
خُداوندجنہے سانوں بچایا اوہو ای اے جیہڑا ہر کسے دا بھلیائی تے بُریائی لئی انصاف کرن دی طاقت رکھدا اے ۔ سانوں ایہہ سمجھنا تے ایہدے اُتے ایمان رکھنا چاہی دا اے پئی خُداوند خُدا باپ وانگر وڈیائی کراؤن دے لائق اے ۔ حوالہ سانوں دسدا اے پئی ساڈا خُداوند ایس دھرتی اُتے آیا تے اوہنے قربانی دتی سی ، پئی اوہنے اپنے لہو نال ہر قبیلے ،بولی ، قوم تے لوکاں لئی خُدا نوں فدیہ دتا ، تے اوہنے ساڈے خُدا دے اگے اوہناں نوں دھرتی اُتے راج کرن لئی بادشاہ تے کاہن بنایا ۔
ایہدے بعدوں ایہہ حوالہ سانوں دسدااے پئی اسمان اُتے فرشتیاں دی اواز ، جنہاں دی گنتی لکھاں تے کروڑاں وچ سی ، اُچی آواز نال خُداوند دی وڈیائی تے اوہدی بھگتی کردے ہوئیاں آکھیا پئی : ” ذِبح کِیتا ہویا لیلا ای قُدرت دَولت تے حِکمت تے طاقت تے عِزّت تے جلال تے وڈیائی دے لائق اے۔ “یوحنا نے جویں سُنیا تے ویکھیا سی اوہ آیت ۱۳ نال اپنی گواہی دیندا رہندا اے : ” فیر مَیں اسمان تے زمین تے زمین دے ہیٹھلی تے سمُندر دی ساری مخلُوقات نُوں یعنی سارِیاں شیواں نُوں جیہڑیاں اوہناں دے وِچ نیں ایہہ آکھدیاں سُنیا۔ پئی جیہڑا تخت اُتّے بَیٹھا ہویا اے اوہدی تے لیلے دی وڈیائی تے عِزّت تے جلال تے سلطنت سدا تِیکر رہے۔ “ فیر ، کیہدی سارے لوکاں نوں بھگتی کرنی چاہی دی اے ؟ ایہہ تخت اُتے بیٹھا ہویا برّہ اے جنہوں ہمیش تیکر ساری حمد تے عزت تے وڈیائی تے راج دتا جاندااے ۔
سارے لوکاں دی وڈیائی ، تعریف تے بھگتی صرف خُدا ، یسوع مسیح دے باپ لئی خاص کیتی گئی اے ۔ پر ایس لئی پئی یسوع مسیح ایس دھرتی اُتے آؤن تے سارے لوکاں نوں اوہناں دے پاپاں ، بربادی تے سزا توں مکتی دین دے سبب ہن باپ وانگر اوہنی ای طاقت رکھد ااے ، ایس مکتی دے کفارے لئی اوہدی باپ نال ساری وڈیا ئی کیتی جاندی اے تے ساڈا مکتی داتا بنن لئی اوہ بھگتی دے لائق اے ۔
صرف ایہدے بارے وچ ایہہ سوچو، پئی خُداوند جیہڑا تخت اُتے بیٹھا اے ، جیہڑا خُداوند تے ساریاں دا انصاف کرن والا اے ، ساڈا مکتی داتا اے جیہڑا سانوں وڈی عزت دیندا اے جیہڑی ساڈے دلاں نوں بھردیندی اے ۔ ایہہ ٹھیک اے —خُداوندبادشاہواں دا بادشاہ ، بناؤن والا خُدا اے جیہدے راہیں سنسار دی ہر شے پیداہوئی اے ۔
ایس لئی پئی ساڈا خُداوند سارے لوکاں دا خُدا اے ، جیہڑا ایس دھرتی اُتے آیاتےاوہنے اپنے پانی تے لہو نال سانوں بچایا ، اوہ ایس لائق ہیگا اے پئی ہر بندہ تے ایس سنسار دی ہر شے اوہدے تخت دے اگے گوڈے موہدے مارے تے ساری بھگتی حمد تے عزت تے وڈیائی خُداوند نوں ای دیوے ۔ ساڈے ایمان نوں وڈی طاقت ملدی اے تے ساڈے دلاں نوں ایس تعلیم نال بوہت تسلی ملدی اے پئی ایہہ خُداوند اوہو ای اے جیہڑاساریاں دا انصاف کرن والا بن کے وڈیائی دے تخت اُتے بیٹھا اے۔
کجھ لوک یسوع نوں صرف چار وڈے نیک بندیاں وچوں اک وانگر سمجھدے نیں ، پر خُداوند کسے وی طرح بندہ نئیں ہیگا ۔ خُداوندساڈا خُدا ہیگا اے جنہے سانوں پیدا کیتا ، بنایا اے تے بچایا اے ۔ ایس لئی اسیں کدی وی سانوں بناؤن والے دی برابری صرف بندیاں نال نئیں کر سکدے ۔ نا تاں سقراط ، نا کنفیوشس ، نابُدّھا،نا ای کسے دوجے بندے دی ساڈے خُداوند نال برابری کیتی جا سکدی اے ۔ یسوع سانوں بچاؤن لئی صرف۳۳ ورہے صرف اک بندے وانگر جیوندا رہا ۔ پر اوہدا اثر اوہو ای اے جیہڑا خُدا دا اے ۔خورے ایہہ اینی جائز مثال نہ ہو سکے ، پر جویں بندہ بندیاں نوں جم دا اے ، اُنج ای یسوع مسیح خُدا اے ایس لئی پئی اوہ خُدا باپ دا پُتر اے۔
ایسے لئی یسوع آپ خُدا یعنی ، سانوں بناؤن والا خُدا اے ۔ پر خُداوندسانوں بچاؤن لئی ایس دھرتی اُتے آیا سی ۔ ایس لئی پئی اوہنے سانوں بچایا ، ایس لئی اوہ ساڈے توں ساری وڈیائی کراؤن دے لائق اے ، تے سانوں اپنے دلاں وچ پکا ایمان رکھنا چاہی دا اے پئی یسوع کوئی بندہ نئیں، سگوں خُدا اے ۔ اسیں بوہت خوشی نال بھرے تے شکر گزار آں !
 
 

ساڈا خُداوند جیہڑا خُدا دے ارادے نوں پورا کر سکدا اے

 
خُداوند توں ہٹ کے کوئی وی دوجا کتاب اُتے لگیاں ہوئیاں ستاں مہراں نوں نئیں کھول سکدا ۔ ایہہ کتاب جیہڑی ستاں مہراں نال بنداے خُدا دے وعدے دی کتاب اے ۔ خُدا نے ساڈے ساریاں سمیت یسوع مسیح وچ سنساردیاں ساریاں شیواں پیدا کیتیاں ۔ ایتھوں تیکر پئی جگ بناؤن توں پہلوں ای ، خُدا نے یسوع مسیح وچ سانوں اپنے پُتر بناؤن دا فیصلہ بنایا سی ۔ ساڈے خُداوندنے ایہہ مہراں لگی ہوئی کتاب خُدا دے جگ نوں بناؤن دے ارادے نوں تے سانوں بچاؤن تے لوکاں دا انصاف کرن دے اپنے ارادے نوں پورا کرن لئی حاصل کیتی سی ۔
خُدا دا کلام سانوں دسدا اے ،” تے کوئی جَنا اسمان اُتّے یا زمین اُتّے یا زمین دے ہیٹھاں اوس کتاب نُوں کھول نا سکیا تے نا اوہدے اُتّے نظر کر سکیا۔ “ کوئی وی نئیں سی ، دوجے اکھراں وچ ،جیہڑا اخیریں خُدا دے ارادے نوں پوراکرن دے لائق سی ۔ صرف یسوع مسیح ای ایہہ کم کر سکدا اے ۔ کیوں ؟ ایس لئی پئی خُدا نے اپنے پُتر دے راہیں ای سارا ارادہ بنایا اے ۔
ایہدا ایہہ وی مطلب ہیگا اے پئی خُداوند دے کول انصاف دی طاقت ہیگی اے پئی اوہ ستاں مہراں نال بند کتاب نوں ، خُدا باپ دے منصوبے نوں کھولے ۔ ایس طاقت نال ، یسوع نے اپنے بپتسمے نال ساڈے سارے پاپاں نوں اپنے اُتے چُک کے تے ساڈے بدلے سولی اُتے اوہناں پاپاں دی سزا اپنے اُتے لےکےسانوں بچاؤن دے راہیں تثلیث دے خُدا دے ارادے دی ہر گل نوں پورا کیتا ۔ خُداوند نے اپنی ای قربانی تے اپنی جان دا مُل اُتارن دے راہیں پاپ توں مکتی دیندیاں ہوئیاں خُدا دے اگے سانوں اپنے کاہن بنایا اے۔
یسوع مسیح نے اوہناں لوکاں نوں جیہڑے اوہدی مکتی اُتے ایمان رکھدے نیں اپنےنال راج کرن لئی وی بنایا اے۔ جویں پئی خُدا دا کلام سانوں فرماؤندا اے ، ”اسیں دھرتی اُتے راج کراں گے “جدوں خُداوند اصل وچ ایس دھرتی اُتے پر ت آوے گا ،او ہ فیر ساریاں شیواں نوں فتح کرے گا تے دھرتی اُتے ہزار ورہیاں دی بادشاہی نوں یقینی بناوےگا ۔