Search
پنجابی
پنجابی
کورونا وائرس تے عالمگیر ڈاک سروس وچ رکاوٹ دے سببوں، اَسیں اپنی ’مُلوں بغیر چھاپی ہوئی کتاب دی سروس‘ نوں تھوڑے چِر لئی بند کر دے پئے آں۔
ایس صورتحال دے چانن وچ اسیں ایس ویلے تہانوں کتاباں گھلن دے قابل نئیں ہیگے آں۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔

خطبے

مضمون 10: مُکاشفہ(مُکاشفہ دی کتاب اُتے تفسیر)

[6-2باب] سَتّ مُہراں دےزمانے (مُکا شفہ۶: ۱۔۱۷)

سَتّ مُہراں دےزمانے
)مُکا شفہ۶: ۱۔۱۷)
 
مُکاشفہ دے ہر باب دے سرنانویں دا خاص خیال دے مطابق نِکاکر کے ہیٹھاں لکھیا ہویا خلاصہ کیتا جاسکداے۔
باب۱ –مُکاشفہ دے کلام دا شروع دا تبصرہ
باب ۲تے۳– ایشیاء وچ ست کلیسیاواں نوں خط
باب ۴– یسوع جیہڑا خُدا دے تخت اُتے بیٹھا اے
باب ۵–یسوع جیہڑا خُدا باپ دے نمائندے وانگر تخت اُتے بیٹھا اے
باب ۶–خُدا دے مقرر کیتے ہوئے ست زمانے
باب ۷– اوہ جیہڑے وڈے دکھ جرن دے وچکار مکتی پاؤن گے
باب۸–نرسنگے جیہڑے ست آفتاں دا اعلان کردے نیں
باب ۹–ڈوہنگھے ٹوئے دیاں آفتا ں
باب ۱۰– چُکیاجانا کدوں ہووےگا؟
باب ۱۱– زیتون دے دو بُوٹےتے دو نبی کیہڑے نیں؟
باب ۱۲– خُدا دی کلیسیا جنہوں وڈے دکھ جرنے پین گے
باب ۱۳–مخالفِ مسیح دا نکلنا تے پاک لوکاں دیاں شہادتاں
باب ۱۴– پاک لوکاں دا جیوں اُٹھنا تے چُکیاجانا ، تےاوہناں دا ہوا وچ خُدا دی وڈیائی کرنا
باب ۱۵تے۱۶–ست پیالیاں دیاں آفتا ں داشروع ہونا
باب ۱۷–وڈّی کنَجری دی سزاجیہڑی وڈّے پانیاں اُتّے بَیٹھی ہوئی اے
باب ۱۸– بابل دی بربادی
باب ۱۹– بادشاہی جیہدے اُتے قدرت والا خُدا بادشاہ اے
باب ۲۰– ہزارورہیاں دی بادشاہی
باب ۲۱–آسمان توں پاک شہر
باب ۲۲– نواں اسمان تے دھرتی ، جتھے زندگی دا پانی وگدا اے
 
پہلے باب توں شروع کردیاں ہوئیاں ، مُکاشفہ دے کلام دا ہر باب اک سرنانواں رکھدا اے ، تے جدوں بھیت کھُل جاندا اے تاں ایہہ سارے باب اخیری باب تیکر اک دوجے نال رَل جاندے نیں ۔ ایسے طرح ای جویں رومیوں وچ ، جتھے باب ۱ تعارفی باب اے ، باب ۲ یہودیاں لئی خُدا دا کلام اے ، تے باب ۳ اوپریاں قوماں لئی اوہدا کلام اے ،مُکاشفہ دا کلام وی ہر باب دے اک سرنانویں نال اگانہہ ودھدا اے ۔
میَں کاہدے لئی سارے کلام دی نیہ اُتے مُکاشفہ دی وضاحت کردا پیا آں ایہدا سبب ایہہ ہیگا اے پئی بوہتیاں لوکاں نیں مُکاشفہ اُتے ہر طرح دے دلی خیالاں نال بحث کیتی اے ، تے جے تُسیں ایناں دلی خیالاں دی روشنی وچ مُکاشفہ دے کلام نوں پڑھدے او تاں، تُسیں ڈاہڈیاں غلطیاں کروگے ۔
ایس لئی پئی بائبل خُدا دے لوکاں دے راہیں پاک رُوح دی حوصلہ افزائی وچ لکھی گئی سی ، ایہدے وچ بالکل کجھ نئیں ہیگا جیہدے وچ تبدیلی دی لوڑ ہووے ۔ ایہدے توں ہٹ کے ، جگ دیاں کتاباں وچ غلطیاں ہوندیاں نیں تے ایہناں وچوں بوہت ساریاں غلطیاں سوارن دی لوڑ اے ، ایس توں ہٹ کے پئی کتاباں لکھن والیاں دیاں کتاباں تے علم کناں ای بوہتاکیوں نہ ہووے ۔ پر خُدا دا کلام بالکل ای نئیں بدلیا ، ایتھوں تیکر پئی ایہنوں ہزار ورہے ہو گئے نیں ۔ ایہنوں کئی ورہے لنگھن دے باوجود وی ، خُدا دا کلام غلطیاں توں پاک اے ، ایس لئی پئی ایہہ خُدادے خادماں دے راہیں لکھیا گیا سی جنہاں دے دل پا ک روح ولوں وڈے حوصلے پا چُکے سن ۔
ایس لئی پئی خُدا جو کجھ سانوں دسنا چاہندااے اوہ بائبل وچ لُکیا اے ، ایس لئی ساڈے وچوں بوہت سارے لوک ایہدی تھاں اُتے پاک کتاب نوں نئیں جان دے ۔ پر مُڈھوں ای ، بائبل کدی وی نئیں بدلی ، ایتھوں تیکر پئی اک واری وی نئیں ۔ فیر وی کیوں جو بوہتیاں لوکاں نوں خُدا دے کلام تے اوہدے ارادے بارے غلط سمجھ سی ، ایس لئی اوہناں نیں اپنے ای خیالاں نال پاک کلام دا ترجمہ کرنا شروع کر دتا ۔
ایس لئی پئی خُدا اپنے بھیت صرف ہر کسے اُتے ظاہر نئیں کردا ، ایس لئی اوہ لوک جیہڑے اوہدی بھگتی نئیں کردے تے کلام دے مطابق ایمان نئیں رکھدے ، جیہڑے صرف اپنے لالچ نوں پورا کرن لئی بے فائدہ خُدا دا ناں لین دی کوشش کردے نیں ، سچیائی نوں کدی نئیں ویکھ سکدے ۔ اوہ لوک جیہڑے پاپ رکھدے نیں ، دوجے اکھراں وچ، مُکاشفہ دے کلام نوں کدی وی سمجھ نئیں سکدے بھاویں اوہ کنی ای محنت نال کوشش کیوں نہ کر لین ۔ کلام نوں سمجھن وچ ایہناں دے نکمے ہون دے سبب ای اِنج ہیگا اے پئی ہر طرح دیا ں غلطیاں ہوندیاں نیں — کُجھ اخیری ویلیاں دے بارے وچ فضول غلطیاں اُتے ایمان رکھدے نیں ، اوہناں نوں پڑھدے نیں ، تے ایتھوں تیکرپئی یسوع دے پرت کے آؤن دے ویلے دا اعلان کرد ے نیں ، جد پئی دوجے اپنی خواہش نال ایس کم وچ ہر طرح دیاں بائبلی غلطیاں کردے ہوئیاں بائبل دا ترجمہ کردے نیں ۔
اوہناں دے نمائندے ، جیہڑے خُدا ئی تعلیم دے ماہراں دے بارے وچ اسیں جان دے آں ، اوہناں وچوں ابرہام کائپر تے لوئس برخف نیں ، جیہڑے ہزار ورہیاں دی بادشاہی دی مخالفت پاسے نیں ۔ ایسے طرح سی ۔ آئی ۔سکو فیلڈ ،جنہے دکھ جرن توں پہلوں چُکے جان دے نظریے دی حمایت کیتی ۔ پر اوہناں اُستاداں دے راہیں جیہڑے دلی خیال پیش کیتے گئے نیں اوہ ساریاں غلط تعلیماں صرف اوہناں دے خیالاں والیاں نیں ۔
سب توں پہلوں ، پُرا نے خیال دے ہزار ورہیاں دی بادشاہی دی مخالفت دے نظریےدی حمایت کرن والیاں دی دلیل ایہہ ہیگی اے پئی وکھری کوئی ہزار ورہیاں دی بادشاہی نئیں ہیگی ، تے ایہہ پئی ایہدے توں ہٹ کے ہُن ایس دھرتی اُتے وسن والے پاک لوکاں دے دلاں وچ ایہہ بادشاہی پوری ہوندی اے ۔ ہزار ورہیاں دی بادشاہی دی مخالفت دا نظریہ آؤن والے دناں وچ ہزار ورہیاں دی بادشاہی دے اصل قیم ہون توں مکردا اے ۔ ایہہ ”خیال“ہزار ورہیاں دی بادشاہی دا ترجمہ اشاریاں والیاں گلاں وچ کردا اے ، اوہ ایس زمانے وچکار جیہدے وچ پا ک لوک یسوع مسیح دے پرت کے آؤن تیکرجیوندے رہندے نیں ، ایہنوں ہزار ورہیاں دی بادشاہی وانگر سمجھدے نیں ۔ پر ہزار ورہیاں دی بادشاہی دی مخالفت دے نظریے دی ایہہ وضاحت ، پئی ہزار ورہیاں دی بادشاہی پہلوں ای وڈے دکھ جرن توں اڈ ہُن پاک لوکاں دے دلاں وچ حقیقت بن گئی اے ، ایہہ اوہناں دی بوہت وڈی غلطی اے ۔
ہزار ورہیاں دی بادشاہی دی مخالفت دے نظریے دے مقابلے وچ ، پر ، سارے جگ وچ ایس
توں وی بوہت چوکھا ، سکو فیلڈ دے راہیں وڈے دکھ جرن توں پہلوں چُکے جان دا نظریہ ودھیا ۔ پر ایس ” ڈسپنسشنل ازم “ نے اپنے آپ خُدا دے منصوبے نوں بدل دتا ۔ خُدا نے سنسار نوں اپنے بنان توں ایتھوں تیکر پئی پہلوں ای ستاں زمانیاں دا ارادہ بنایا سی ، تے ویلا لنگھن نال اوہنے اپنے ارادے مطابق سارا کجھ پورا کردتا ۔ پر جیہڑے لوک مُکاشفہ ۶ باب وچ وکھائے گئے خُدا دے ارادے نوں نئیں جان دے اوہناں نیں دکھ جرن توں پہلوں چُکے جان دے ایس غلط خیا ل بارے دسیا اے ۔ اوہ بحث کردے نیں پئی وڈے دکھ جرن دے شروع ہون توں پہلوں ای اوپریاں قوماں وچ نویں سریوں جمن والیاں نوں چُک لیا جاوے گا ، تے ایہہ پئی وڈے دکھ جرن دے ستاں ورہیاں دے زمانے وچکار بنی اسرائیل دے کجھ لوک ای مکتی پاؤن گے ۔
ایہہ نظریہ اک ایہو جیہی تعلیم وانگر باقی اے جنہے بوہتیاں لوکاں نوں بوہت شش و پنج وچ پا دتا اے ۔ جے پاک لوکاں دے چُکے جان نوں دکھ جرن توں پہلوں واقع ہونا سی ، جویں پئی دکھ جرن توں پہلوں چُکے جان دا نظریہ دعویٰ کردا اے تاں فیر ، نا تاں پاک لوکاں اُتے کُٹ مار ہووے گی تے نہ ای اوہناں دی شہادت ہووے گی جویں پئی مُکاشفہ۱۳ باب وچ لکھیا اے ۔ ایس لئی یسوع دے منن والیاں نوں لازمی طور دُکھ جرن توں پہلوں چُکے جان دے ایس نظریے توں باہر نکلنا چاہی دا اے تے اپنے ایمان نوں ایس سچیائی اُتے ایمان رکھدے ہوئیاں تیار کرنا چاہی دااے پئی اوہناں دا چُکیا جانا وڈے دکھ جرن وچکار ہووےگا ۔
مُکاشفہ داکلام ساڈے اُتے ظاہر کردا اے پئی خُدا اپنے ستاں زمانیاں دی تقسیم دے مطابق کِیویں جگ دی اگوائی کرے گا ۔ سانوں خُدا دے تیار کیتے ہوئے ستاں زمانیاں دے منصوبے دی روشنی وچ ویکھنا چاہی دا اے جویں پئی مُکاشفہ۶باب وچ دسیا گیا اے ۔ لوک شش و پنج وچ نیں تے اوہناں دا ایمان ڈولدا اے ایس لئی پئی اوہ پاک کلام دے ایہناں ستاں زمانیاں دی سچیائی نوں نئیں جان دے ۔ ایس لئی ، سانوں مُکاشفہ۶باب وچ جو لکھیا اے ، تے ظاہر ہوندااے ایہدے اُتے ایمان رکھنا چاہی دا اے ۔ اِنج کرن لئی ، سانوں پاک کلام دے صرف نکے ، بے جوڑ حصیاں نوں ویکھ کے ا ک اک کر کے ایہدے بارے وچ سوچن دی تھاں اُتے ، ساری بائبل دے سبب ثابت کیتے گئے ستاں زمانیاں دے بھیت دے کلام اُتے ایمان رکھنا چاہی دا اے ۔
جویں پانی تے رُو ح دی خوشخبری لوکاں توں لُکی ہوئی سی ، ایسے طرح خُدا دے ست زمانے وی
لُکے ہوئے نیں ۔ بھاویں بائبل دے وڈے اُستاداں نیں مُکاشفہ دے کلام نوں سمجھن دی کوشش کیتی اے تے اپنے خیالاں ول دھیان موڑ کے بوہت سارے نظریے لبھے نیں، پر اوہناں لئی مُکاشفہ دے کلام نوں سمجھنا ہُن وی بوہت اوکھا اے ۔ ایہہ ایس سچیائی دے برابر ہیگااے پئی پانی تے رُو ح دی خوشخبری ہُن تیکر لُکی ہوئی سی ۔ پر مسیح دا پرت کے آؤنا ، پاک لوکاں دے چُکے جان ، یاں ہزار ورہیاں دی بادشاہی دے خیال جیہڑے حالے تیکر وڈے اُستاد لیائے نیں ،اوہناں نیں یسوع اُتے ایمان رکھن والیاں نوں کوئی فائدہ نئیں پوہنچایا اے ۔
ساڈے لئی مُکاشفہ دے کلام نوں سمجھن لئی ، ایہہ بوہت ضروری ہیگا اے پئی اسیں مُکاشفہ ۶ باب نوں سمجھیے ۔ ایہہ باب مُکاشفہ دےسارے کلام نوں حل کرن تے سمجھن دی کُنجی اے ۔ پر ایس توں پہلوں پئی اسیں مُکاشفہ دے سارے کلام نوں سمجھن دی کوشش کرئیے ، اک شے ایہو جیہی ہیگی اے جیہڑی سانوں اپنے آپ نوں یاد کراؤنی چاہی دی اے : پانی تے رُو ح دی خوشخبری نوں سمجھیوں تے ایہدے اُتے ایمان رکھیوں اڈ مُکاشفہ دے کلام نوں سمجھنا اوکھا اے ۔ تہانوں ایہہ سوچنا چاہی دا اے پئی خُدا دی سچیائی صرف اوسے ویلے سمجھی جا سکدی اے جدوں تُسیں پہلوں پانی تے رُو ح دی خوشخبری نوں جان دے تے ایہدے اُتے ایمان رکھدے او ۔
اِنج اے ”جداوس ستویں مہُر توڑی “جویں پئی مُکاشفہ۸ باب وچ لکھیا اے ، پئی ست نرسنگیاں دیاں مصیبتاں جگ اُتے ڈوہلیاں جان گئیاں ۔ ایہہ اوہناں واقعیاں دی وضاحت کردا اے جیہڑے پیلے گھوڑے دے زمانے ، مُکاشفہ ۶ باب وچ لکھے چوتھے زمانےوچکار جگ اُتے آؤن گے ۔ پہلوں خُدا دے تیار کیتے ہوئے ستاں زمانیاں نوں سمجھیوں اڈ ، ایس لئی ، تُسیں ستاں نرسنگیاں دی آفتاں نوں وی نئیں سمجھ سکدے ۔ مُکاشفہ دے کلام نوں پوری طرح سمجھن لئی ، سانوں پہلوں پانی تے رُو ح دی خوشخبری نوں سمجھنا تے ایہدے اُتے ایمان رکھنا چاہی دا اے جیہڑی خُدا نے سانوں دتی اے ۔
مُکاشفہ داکلام ۶ باب وچ سانوں اکٹھے نقشے دا خاکہ پیش کردا اے جنہوں خُدا نے بنایا جدوں اوہنے بندے نوں پیدا کیتا ۔ خُدا نے بندے دے شروع تے مکن نوں ستاں وکھ وکھ زمانیاں وچ ونڈیا اے ۔
ایہہ نیں اوہ زمانے:پہلاں ، چٹے گھوڑے دا زمانہ؛دوجا ، لال گھوڑے دا زمانہ ؛ تیجا ، کالے گھوڑے دا زمانہ ؛چوتھا ،پیلے گھوڑے دا زمانہ ؛ پنجواں ، پاک لوکاں دی شہادت تے چُکے جان دا زمانہ ؛ چھیواں ، جگ دے بربادی دا زمانہ ؛ تے ستواں، ہزار ورہیاں دی بادشاہی تے نویں اسمان تے دھرتی دا زمانہ۔ اسیں ایمان رکھدے تے آکھا من دے آں پئی خُدا نے ایس طرح سارے لوکاں لئی اپنے ارادے نوں ایناں ستاں زمانیاں وچ ونڈیا اے ۔ ایس ویلے ، جگ کالے گھوڑے دے زمانے وچ ہیگا اے ، اوہ چٹے تے لال گھوڑے دے زمانے وچوں لنگھ چُکیا اے ۔
پاک کلام سانوں دسدا اے پئی اسیں جیہڑے ویلے وچ ہُن رہندے پئے آں اوہ کال دا زمانہ اے ۔ پر پیلے گھوڑے دا زمانہ وی ساڈے نیڑے ہیگا اے ۔ پیلے گھوڑے دے زمانے دے آؤن نال ای وڈے دکھ جرن دے ستاں ورہیاں دےزمانے وچ وڑدیاں ہوئیاں ، پاک لوکاں دی شہادت دا زمانہ شروع ہو جاوے گا ۔ دکھ جرن تے شہادتاں دا ایہہ زمانہ پیلے گھوڑے دا زمانہ اے ۔
” تے جد اوس چَوتھی مُہر توڑی تے مَیں چوتھے جاندار نُوں ایہہ آکھدیاں سُنیاں پئی آ۔ تے مَیں دھیان کِیتا تے کِیہ ویکھنا آں پئی اِک پِیلا جیہا گھوڑا اے تے اوہدے سوار دا ناں مَوت اے تے پاتال اوہدے پِچّھے پِچّھے اے تے اوہناں نُوں زمین دی چوتھائی اُتّے ایہہ اختیار دِتّا گیا۔ پئی تلوار تے کال تے ڈاکی تے زمین دے پشُوآں نال لوکاں نُوں مارن۔ “ ایتھے حوالہ ، ”اوہناں نُوں زمین دی چوتھائی اُتّے ایہہ اختیار دِتّا گیا۔ پئی تلوار تے کال تے ڈاکی تے زمین دے پشُوآں نال لوکاں نُوں مارن۔“ایس گل ول اشارہ کردا اے پئی مخالفِ مسیح پیلے گھوڑے دے دناں وچ نکلے گا تے پاک لوکاں نوں شہید کرے گا ۔
پیلے گھوڑے دے زمانے وچکار وکھالی دین والے واقعے مُکاشفہ ۸:۱۔۷ وچ لکھے ہوئے نیں ۔ جویں پئی لکھیا ہو یا اے : ”تے جد اوس ستویں مہر توڑی تے ادھے گھنٹے تیکر اسمان وچ چُپ لگی رہی ۔تے میَں اوہناں ستاں فرشتیاں نوں ویکھیا ۔جیہڑے خُدا دے سامھنے کھلوتے رہندے نیں ۔تے اوہناں نُوں ست تُرہیاں دتیاں گئیاں ۔ فیر اک ہو ر فرشتہ سونے دا دُھوف دان لے کے آیا۔ تے قربان گاہ دے اُتے کھلو گیا تے اوہنوں بہت ساری دُھوف دتی گئی پئی سارے پاک لوکاں دی دُعاواں نال اوس سونے دی قربان گاہ اُتے چاہڑے جیہڑی تخت دے سامھنے اے ۔تے اوس دُھوف دا دُھواں فرشتے دے ہتھوں پاک لوکاں دی دُعاواں دے نال خُدا دے اگے اپڑ گیا ۔تے فرشتے دُھوف دان نُوں لے کے اوہدے وچ قربان گاہ دی اگ بھری تے زمین اُتے لُد دتی تے بدل گجن تے چمکن لگے تے اوازاں تے بھنچال آئے ۔تے اوہ ستے فرشتے جنہاں دے کول اوہ ست تُرہیاں سن پُھوکن نوں تیار ہوگئے ۔ تے جد پہلی تُرہی وجی تے گڑے تے اگ جنہاں وچ لہو رلیا ہویا سی جمے تے زمین اُتے سُٹے گئے ۔ تے زمین دا تریجا حصہ سڑ گیا تے تریجا حصہ بُوٹے تے سارا ہرا گھاہ سڑ گیا “
مُکاشفہ ۸ باب وچ ستاں نرسنگیاں دیاں آفتاں دی اُتے دسی گئی بحث مُکاشفہ۶باب وچ لکھے ہوئے پیلے گھوڑے دے ویلے دی سچیائی دی اک وضاحت والی یاد دہانی دیندی اے ۔ ایس کلام وچ مخالفِ مسیح دے نکلن تے ستاں نرسنگیاں تے ستاں پیالیاں دیاں آفتاں جیہڑیاں پیلے گھوڑے دے زمانے وچکار ظاہر ہون گئیاں ، وضاحت نال لکھیاں نیں ۔
دوجے پاسے ، باب ۴ تے ۵،سانوں دسدے نیں پئی یسوع مسیح کُل جگ اُتے تے آؤن والیاں ساریاں شیواں اُتے خُدا وانگر راج کرے گا ، تے ایہہ پئی باپ دا ساراارادہ یسوع مسیح دے راہیں خُداوانگر پورا ہووے گا ۔ ایس طرح اسیں مُکاشفہ ۴ تا ۵ باب دے راہیں لبھدے آں پئی ، خُداوند یسوع مسیح سچ مُچ بوہت تگڑا تے بوہت ای قدرت والا خُدا اے ۔
مُکاشفہ ،۸ باب سانوں دسدااے : ” تے اوہ ستے فرشتے جنہاں دے کول اوہ ست تُرہیاں سن پُھوکن نوں تیار ہوگئے ۔ تے جد پہلی تُرہی وجی تے گڑے تے اگ جنہاں وچ لہو رلیا ہویا سی جمے تے زمین اُتے سُٹے گئے ۔ تے زمین دا تریجا حصہ سڑ گیا تے تریجا حصہ بُوٹے تے سارا ہرا گھاہ سڑ گیا “ جد پیلے گھوڑے دا زمانہ آوے گا ، جگ دا تریجا حصہ جنگل سڑ کے سواہ ہو جان گے ، تے ایس بربادی دے بعدوں ہو ر وی مصیبتاں آؤن گئیاں ۔
پہلے نرسنگے دی آفت اک بربادی اے جیہڑی تریجا حصہ رُکھاں تے سارے گھاہ ساڑ دیوے گی ۔ جدوں ایہہ مصیبت جگ اُتے حملہ کرے گی تاں ، جگ دے تریجے حصے وچ باقی جنگل وی بوہتی اگ دی سموگ دے اثر نال برباد ہو جان گے ، ایہدے دُھوئیں نال دھرتی اُتے سورج دی روشنی مک جاوے گی ، فصلاں اُجڑ جان گئیاں ،تے سارا سنسار بوہت کال تے فاقے وچ پھس جاوے گا ۔
کال دے ایہناں دناں وچ ، اک دیہاڑے دے کم دی دیہاڑی صرف کنک دینار دے سیر بھر تے جَو دینار دے تِن سیر خرید سکے گی ۔ جگ اُتے ہُن ایس بوہتے چوکھے کال تے فاقے کرن دا ویلا آؤن والا اے ۔ ایس جگ اُتے کال بدنی تے رُوحانی دونویں آؤن گے ۔اج دے دناں وچ رُوحانی کال پہلوں ای ہیگا اے ۔
اج کل دے گرجے صرف ناں دے مسیحیاں نال بھرے ہوئے نیں ، جیہڑے جگ نال رُوحانی رُوٹی تے پانی تے رُوح دی خوشخبری دی زندگی نوں ونڈن دے لائق نئیں ہیگے ۔ سارے جگ دے لوک ، براعظم یورپ توں لے کے براعظم ایشیاء تیکر ، براعظم ایشیاء توں لے کے براعظم امریکہ تیکر ، سارے ہُن اپنی بربادی دے زمانے وچ جیوندے پئے نیں ۔ اج کل مسیحیت وچ تھوڑے ای بُھکے لوکاں دا ٹہِڈ بھرن لئی رُوحانی روٹی دیندے نیں ۔
اسیں پیلے گھوڑے دے زمانے نوں مخالفِ مسیح دے نکلن والے زمانے وانگر دسدے آں ۔ ایس زمانے وچکار ، قدرتی آفتاں روٹی تے پانی دا گھاٹا کرن گئیاں ،جیہدے نال ہر بندہ وڈے کال توں بوہت اوکھا ای جیوندا رہوے گا ۔ بھاویں سنسار اپنیاں سائنسی ایجاداں نال چلدا رہوے گا ، پر ایہدے ہوندیاں ہویاں زندگی دا معیار بوہت غریبی وچ ڈِگ پوے گا ، مطلب اےایس طرح دا ایس توں پہلوں کدی نئیں ویکھیا گیا سی ۔ کیہ ایس جگ وچ وسن والیاں لوکاں وچ اپنیاں زندگیاں بسر کرن دی کوئی آس باقی رہوے گی ؟
دکھ جرن دے ایس دناں وچ ، سانوں ساریاں نوں اپنی شہادت قبول کرنی چاہی دی اے تے پانی تے رُوح دی خوشخبری دے کلام اُتے ایمان رکھ کے خُدا دی وڈیائی کرنی چاہی دی اے ۔ پاک لوک جیہڑے ایس طرح پانی تے رُو ح دی خوشخبری اُتے ایمان رکھدے نیں اوہ اپنی شہادت نال خُدا نوں سارا جلال دین گے ۔ خُدا ، ایہدے بدلے ، اوہناں لوکاں نوں اسمان اُتے چُک لوے گا جیہڑے اپنے ایمان دی راکھی لئی شہید ہوئے سن تے اوہناں نوں برّے دے ویاہ وچ آؤن دا سدا دیوے گا ۔
پولُس رسول نے آکھیا پئی اوہ خُدا دی بادشاہی لئی اوہدا خادم بن گیا سی ۔ رسولاں نیں پانی تے رُو ح دی خوشخبری دی منادی کیتی تاں پئی بوہتے لوک ہزار ورہیاں دی بادشاہی وچ وڑ سکن ۔
وڈے دکھ جرن دے ویلے ، بنی اسرائیل وچ وی ایہو جیہے لوک ہون گے جیہڑے یسوع اُتے ایمان لیا کے شہیدہون گے تے چُک لَے جان گے ۔ پاک لوکاں دا تعلق ایس طرح پیلے گھوڑے دے زمانے وچکار وڈے دکھ جرن دے زمانےتوں ہووے گا ۔ جدوں وڈے دکھ آؤن گے ، ایس جگ وچ ہر کوئی ایہو جیہے بندے نوں لبھے گا جیہڑا بربادی وچ پھسے ہوئے سنسار نوں سوار سکے ۔ اوہ ایہو جیہے بندے لئی ترس جان گے جیہڑا بربادی والیاں مصیبتاں توں بنے ہوئے مسئلیاں نوں حل کر سکدا ہووے ، تے جیہڑا اوہناں نوں اوہناں دے بوہتیاں سیاسی ،معاشی تے دینی مسئلیاں نوں حل کر سکدا ہووے ۔ اوس ویلے
مخالفِ مسیح نکلے گا ۔
تھوڑا چر ہویا اے اک جاپانی لکھاری نے رومیوں دی کہانی ، دے سرنانویں دیاں کتاباں لکھیاں ، جیہدے وچ رومی راجیاں دی تعریف توں ہٹ کے کجھ نئیں سی ۔ لکھاری دی اصل دلیل ایہہ سی پئی جگ نوں بوہت چھیتی ایہو جیہے لیڈر دی لوڑ پوے گی جیہڑا اپنے پوری طاقت نال ہر کسے نوں نواں سکدا ہووے ۔ بوہتیاں لوکاں نیں وی اوہنوں پسند کیتا ۔ وڈے دکھ جرن وچکار ، لوک اک تگڑا راجہ چاہن گے جیہڑا پکیاں ہتھاں نال سارے جگ اُتے راج کر سکدا ہووے —بوہت سارے راجے نئیں جیہڑے ، ہر اک اپنے اپنے راج کرن دی تھاں اُتے راج کردے نیں ، سگوں سارے جگ دا اکو ای اکلا ، تگڑا راجہ ۔
ایس ویلے ، جگ بوہت ساریاں قومی ریاستاں وچ ونڈیا ہویا اے ، تے ہر کسے دا اپنا آگُو اے ۔ پر اخیری دناں وچ ، لوک اکو ای کراماتی سارے جگ دا آگُو چاہن گے جیہڑا اوہناں دے ساریاں مسئلیاں نوں کامل طریقے نال حل کرسکے ۔ جگ ہُن اوس آگُو مخالفِ مسیح نوں اُڈیکدی اے جیہڑا سارےجگ اُتے راج کرے گا۔
بائبل سانوں دسدی اے پئی جد پیلے گھوڑے دا زمانہ آجاوے گا تاںِ مخالفِ مسیح وڈی طاقت نال نکلے گا تے جگ وچ ہر کسے نوں اپنے راج ہیٹھاں نوکربنائے گا ۔ بائبل سانوں ایہہ وی دسدی اے پئی جد پیلے گھوڑے دا ایہہ زمانہ آوے گاتاں ، دھرتی اُتے اگ ورسے گی تے جگ دے تریجے حصے دے جنگلاں نوں ساڑ دیوے گی ۔ تے جدوں ایہہ زمانہ آوے گا ، مخالفِ مسیح جگ اُتے راج کرے گا ، تے کوئی وی اوہدے ناں دے نشان نوں پاؤن توں اڈ کجھ وی خرید یاں ویچ نئیں سکے گا ۔ اوس ویلے ، پاک لوکاں نوں اوہدے ناں دا نشان لین تے بُت نوں پوجن توں مکرن اُتے شہید کیتا جاوے گا ، تے فیر اوہ جیوں اُٹھن گے تے اوہناں نوں چُک لیا جاوے گا ۔ جد ایس طرح پیلے گھوڑے دا زمانہ مک جاوے گا تاں ، ہزار ورہیاں دی بادشاہی دا زمانہ شروع ہو جاوے گا ۔
خُداوند سانوں دسدا اے پئی ایس جگ دی بربادی تے وڈے دکھ چور وانگر آؤن گے ۔ ایس لئی ، سانوں ہُن ایس ایمان نوں تیار کرنا چاہی دا اے جیہڑا وڈے دکھ جرن تے بربادی دیاں ساریاں ازمائشاں اُتے فتح پاسکے ۔ ایہہ تیاری صرف پانی تے رُوح دی خوشخبری اُتے ایمان رکھیاں ای ہو سکدی اے ۔ پراوہناں لوکاں لئی ، جیہڑے ایس طرح تیاری نئیں کردے ، ساریاں مصیبتاں تے بربادی اوہناں نوں برباد کرے گی جیہڑے پانی تے رُوح دی خوشخبری اُتے ایمان نئیں رکھدے ۔
ایس طرح ، سانوں خاص کر کے سمجھنا تے ایمان رکھنا چاہی دا اے پئی اج دا زمانہ کالے گھوڑے دا زمانہ اے ۔ اوس اخیری دیہاڑے دے آؤن توں پہلوں ، سانوں پانی تے رُوح دی خوشخبری اُتے ایمان رکھنا چاہی دا اے تے آؤن والے دناں لئی تیار رہنا چاہی دا اے ۔
اوہ لوک جیہڑے ہُن پانی تے رُوح دی خوشخبری اُتے ایمان رکھدے نیں اوہناں د ی شہادت نال اوہناں دااُٹھایا جانا ہووے گا ۔ اوہ جیہڑے امیر نیں اوہ سوکھی زندگی نئیں گزارن گے ، تے نہ ای غریب لوک اپنی غریبی وچ زندگی بسر کرن گے ۔ ایس لئی ، سانوں ایہناں شیواں بارے نا تاں دکھی ہونا چاہی دا اے تے نا ای گھمنڈ وچ پینا چاہی چاہی دا اے ، ایس لئی پئی ساڈا ایمان ہیگا اے پئی پیلے گھوڑے دا ویلا نیڑے آگیا اے ، تے ایہہ پئی فیر سارے پاک لوکاں نوں سوکھے طریقے نال شہید کر دتا جاوے گا ۔
کدی کدائیں ، اسیں اپنے آلے دوالے کجھ لوکاں نوں ویکھدے آں جیہڑے مسیح دے آؤن دے ویلے دا اپنے آپ ای حساب لاؤندے نیں ، اوہ خُداوند دے پرت کے آؤن دا اپنے تیار کیتے ہوئے دناں تے گھنٹیاں دے مطابق اعلان کردیاں ہوئیاں تے بوہتیاں لوکاں نوں ایہو جیہے دعویاں نال بھٹکاؤندے ہوئیاں وڈے شش و پنج دا سبب بن دے نیں ۔ پر بائبل دے مطابق ، مسیح دی واپسی اوس ویلے تیکر نئیں ہووے گی جد تیک پئی ستواں نرسنگا نا پھوکیا جاوے ۔ ایس لئی سانوں کدی وی بائبل دے کلام دا حساب لاؤن تے خُداوند دی واپسی لئی اپنی بنائی ہوئی تاریخ دی غلطی نئیں کرنی چاہی دی ۔
سانوں اوہناں لوکاں توں وی خبردار رہنا چاہی دا اے جیہڑے دعویٰ کردے نیں پئی اوہناں نیں اپنے سُفنیاں یاں رویاوچ ،مسیح دی واپسی دی تاریخ ویکھی اے ۔اوہناں دے سُفنے صرف سُفنیاں توں ودھ نئیں ہیگے ۔ پر خُداوند سانوں دسدا اے پئی اوہدے کلام دے راہیں چُکے جان دا ٹھیک ویلا کدوں اے تاں ، سانوں اوہناں دی تھاں اُتے کلام اُتے ایمان رکھنا چاہی دا اے ۔
جدپیلے گھوڑے دازمانہ ، مُکاشفہ ۶ باب وچ چوتھا زمانہ، آوے گا تاں ، شہید ست نرسنگیاں دی مصیبتاں نال اُٹھ کھلون گے ، تے پاک لوکاں دا جیوں اُٹھنا تے چُکیا جاناہووے گا ۔
ساڈے لئی ایہہ سمجھنا خاص ہیگا اے پئی ہُن اسیں خُدا دے تیار کیتے گئے ستاں زمانیاں دے تیجے زمانے وچ جیوندے پئے آں ۔ سانوں ایہہ سمجھنا چاہی دا اے پئی موجودہ زمانہ کالےگھوڑے دا زمانہ اے ۔ جدوں اسیں اِنج کردے آں تاں ،اسیں ہُن پانی تے رُوح دی خوشخبری دا بیج بو سکدے آں ، تے ہُن بیج بو کے اسیں فصل وڈن دے لائق ہوواں گے جدوں پیلے گھوڑے دازمانہ آوے گا ۔
خُدا دی بنائی ہوئی قدرت دے جگ وچ ، کجھ بوٹے ایہو جیہے نیں جیہڑے صرف اک ہفتے وچ پھُٹ ، پھُل تے پھل لیا سکدے نیں ۔ صحرادے ایہناں بوٹیاں وانگر ،جد پیلے گھوڑے دا زمانہ آجاوے گا ، جیہڑے پانی تے رُوح دی خوشخبری اُتے ایمان رکھ کے مکتی پاؤندے نیں جیہدی منادی اسیں ہُن کردے پئے آں، اوہ وی شہید ہون گے ، تے جیوں اُٹھن تے چُکے جان وچ ساڈے نال رَل جان گے جیہدی خُداوند نے سانوں اجازت دتی اے ۔ دکھاں دے جرن دے زمانے وچ ،ہُن توں بوہت چوکھے لوک پانی تے رُو ح دی خوشخبری اُتے ایمان رکھن گے ۔ دوجے اکھراں وچ ، ہوروی بوہتے لوک ہون گے ، جیہڑے پانی تے رُو ح دی خوشخبری اُتے اپنے ایمان لئی شہید ہوجان گے ۔
مُکاشفہ دا کلام اپنی بحث نوں بنی اسرائیل دی مکتی تیکر دی حد وچ ای نئیں رکھدا ۔ جے کسے دا ایمان ہیگا اے پئی مُکاشفہ دا زمانہ صرف بنی اسرائیل لئی خاص ہیگا اے ، تاں اوہ وڈی غلطی کردا پیا اے ۔کاہدے لئی ؟ ایس لئی پئی جد مُکاشفہ دا زمانہ آوے گا تاں ، بوہتیاں اوپریاں قوماں پانی تے رُو ح دی خوشخبری اُتے ایمان رکھ کے مکتی پاؤن گئیاں تے اپنے ایمان دی راکھی لئی شہید ہو جان گئیاں ۔ کیہ مُکاشفہ دے کلام لئی تعلیم ٹھیک ہیگی اے یاں نئیں ، ایس توں ، تہاڈے ایمان وچ بوہت وڈا فرق پے سکدا اے ۔
ایس لئی ، تہانوں ایہہ سوچنا چاہی دا اے پئی ، اج دے مسیحیاں لئی دکھ جرن توں پہلوں چُکے جان دے نظریے اُتے ایمان رکھنا سوکھے طریقے نال غلط اے ۔ بائبل سانوں دسدی اے پئی پاک لوکاں دی شہادت وڈے دکھ جرن دے ست ورہیاں دے زمانے دے وچکار توں تھوڑا چر بعدوں ہووے گی ، تے ایہہ پئی اوہناں دا چُکیا جانا ایہدے ٹھیک بعد وں ہووے گا ۔ سانوں مُکاشفہ دے کلام نوں پانی تے رُو ح دی خوشخبری وچ ، جویں پئی ایہہ لکھیا ہویا اے ، باب توں باب تیکر تے آیت توں آیت تیکر حل کرنا چاہی دا اے ۔ اِنج کر کے ، اسیں مُکاشفہ دے کلام دی ٹھیک تعلیم رکھ سکدے آں ۔
مُکاشفہ ۷ باب سانوں دسدا اے پئی اوپریاں قوماں وچوں وی بے گنت لوک اپنے ایمان دے راہیں مکتی پاؤن گے تے اپنے ایمان لئی شہید ہو جان گے ۔ سانوں بائبل اُتے ایمان رکھنا چاہی دا اے جویں پئی ایہدے وچ لکھیا ہویا اے —نا دکھ جرن توں پہلوں چُکے جان دے نظریے اُتے، نا دُکھ جرن توں بعدوں چُکے جان دے نظریے اُتے ، تے نا ای ہزار ورہیاں دی بادشاہی دی مخالفت دےنظریے اُتے ، سگوں خُدا دے تیار کیتے ہوئے ستاں زمانیاں اُتے ایمان رکھنا چاہی دا اے ۔
مُکاشفہ دا پہلا باب تعارف اے ، باب ۲ تے ۳ پاک لوکاں دی شہادتاں بارے دسدے نیں ، تے
باب ۴ سانوں دسدا اے پئی یسوع مسیح خُدا اے تے ایہہ پئی اوہ خُدا دے تخت اُتے بیٹھا ہویا اے ۔ باب ۵ سانوں دسدا اے پئی یسوع خُدا باپ دے سارے ارادے نوں کِیویں پورا کرے گا ، تے باب ۶ خُدا ولوں بنائے ہوئے ستاں زمانیاں دا اکٹھا نقشہ دیندا اے ۔ ایہہ سارے منصوبے مُکاشفہ دے کلام وچ حل ہوندے نیں ۔
جویں پئی مُکاشفہ دا کلام سانوں دسدااے ، ” دھنّ نیں اوہ مُردے جیہڑے ہُن توں خُداوند وِچ مر دے نیں،“ ہُن توں ، پاک لوک جیوں اُٹھن تے ہزار ورہیاں دی بادشاہی دی آس وچ جیوندے رہندے نیں ۔
مُکاشفہ ۸:۱۰۔۱۱ اک ہور آفت دی وضاحت کردا اے : ” تے جد ترِیجے فرِشتے تُرہی نُوں پُھوک ماری تے اِک وَڈا سارا تارہ مشال وانگر بلدا ہویا اسمانوں ٹُٹ پیا تے ترِیجے حِصّے دریاواں تے پانی دے چشمیاں اُتّے آ پیا۔اوس تارے دا ناں ناگ دُونا اکھواؤندا اے تے پانی دا ترِیجا حِصّہ ناگ دونے وانگر کَوڑا ہوگیا تے پانی دے کَوڑے ہو جان توں بتھیرے بندے مر گئے۔ “ایہہ دسدااے پئی ایس واری مشال وانگر بلدا ہویا اک وڈا تارہ دریاواں تے چشمیاں اُتے آ پیا ۔ مشال وانگر بلدے ہوئے ایس وڈےتارے دا مطلب پوچھل والا تارہ اے ۔ جویں ای اسمان کمبے گا ، دوجے اکھراں وچ ، جدوں تارے اک دوجے نال ٹکراؤن گے تے ایہناں دے ٹُٹے ہوئے ٹوٹے دھرتی اُتے ڈِگن گے ۔
مُکاشفہ ۸:۱۲۔۱۳ اک ہو دوجی مصیبت نال جاری رہندااے : ”تے جد چوتھے فرشتے تُرہی نوں پھوک ماری تے سورج دا تریجاحصہ تے چن دا تریجاحصہ تے تاریاں دا تریجاحصہ ماریا گیا ۔ ایتھوں تیکر پئی اوہناں دا تریجاحصہ ہنیرا ہو گیا تے دن دے تریجے حصے وچ دُھپ نا رہی تے ایسے طرح رات دے تریجے حصے وچ وی ۔ تے جد میَں فیر دھیان کیتا تے اسمان دے وچ اک عقاب نوں اُڈدیاں تے اُچی اُچی ایہہ آکھدیاں سُنیاں پئی اوہناں تریہوں فرشتیاں دیاں تُرہیاں دیاں اوازاں دے سبب جیہڑیاں اجے پھوکن والیاں نیں زمین دے رہن والیاں اُتے افسوس افسوس افسوس ۔ “ایہہ سانوں دسدا اے پئی جگ دا تریجاحصہ ہنیرا ہو جاوے گا جویں دن راتاں وچ بدل جاندے نیں ۔
جد ست نرسنگیاں دیاں آفتاں ایس طرح شروع ہون گئیاں تاں تُسیں تے میَں لازمی ایہناں
وچ جیوندے ہوواں گے ۔ پر جیوندے رہن والے پاک لوکاں نوں چھیتی نال شہید کر دتا جاوے گا ، تے اوہ اپنے ایمان نال شیطان اُتے فتح پاؤن گے ۔
 جے تُسیں مُکاشفہ ۶ باب وچ ظاہر ہون والے ستاں زمانیاں نوں واضح طورتے جان دے او تاں ، تہانوں ایہدے بارے وچ وی واضح طور اُتے پتہ ہووے گا پئی تہانوں کیہ کرنا چاہی داتے اج د ےدناں وچ تہانوں کس طرح دے ایمان دی لوڑ اے۔ایس لئی پئی جیہڑے لوک پانی تے رُو ح دی خوشخبری اُتے ایمان رکھدے نیں اوہناں نوں مُکاشفہ دےزمانےوچ شہید کر دتا جاوے گا ، اوہناں نوں لازمی خُدا دی بادشاہی دی آس نال ایس زمانے وچ پوہنچناچاہی دا اے ۔ ایس جگ وچ رہندے ہوئیاں ، پاک لوکاں نوں اپنے ایمان نال اخیری ویلے وچ اپنی شہادت دی تیاری کرنی چاہی دی اے ،تے اوہناں نوں ایس ایمان نوں ودھاؤندے ہوئیاں خُدا دی بادشاہی نوں ودھاؤن لئی بوہت محنت کرنی چاہی دی اے ۔
کیہ تُسیں خُدا دے تیار کیتے گئے ستاں زمانیاں نوں جان تے ایمان رکھدے او ؟ کیہ تُسیں سمجھدے او پئی اسیں ہُن کالے گھوڑے دے زمانے وچ جیوندے پئے آں ؟ جے تُسیں ہُن پانی تے رُو ح دی خوشخبری نوں نئیں جان دے تے نا ای ایہدے اُتے ایمان رکھدے او تاں ، تُسیں دھرتی اُتے آؤن والے دکھ جرن توں بچن دے لائق نئیں ہو سکو گے ۔ ایس لئی تہانوں اجے تیاری کرنی ہووے گی۔ دکھ جرن اُتے فتح پاؤن والے ایمان لئی ، تہانوں سب توں پہلوں پانی تے رُو ح دی خوشخبری اُتے ایمان رکھ کے اپنے سارے پاپاں دا فدیہ دینا چاہی دا اے تے پاک رُوح نوں انعام وانگر لے کے ہزار ورہیاں دی بادشاہی وچ وڑن تے ایہدے وچ رہن لئی تیار رہنا چاہی دا اے ۔
ہُنے تیاری کرو۔ جے تُسیں پانی تے رُو ح دی خوشخبری اُتے ایمان رکھن نوں چھڈن داارادہ رکھدے او صرف فیر تہانوں ست نرسنگیاں دیاں آفتاں آؤن دے ویلے ، بوہت چوکھے دکھ جرنے پین گے ۔ایہہ میری آس تے دعا ہیگی اے پئی تُسیں ایسے ویلے پانی تے رُو ح دی خوشخبری اُتے ایمان رکھو گے ، نویں سریوں جمو گے تے خُدا دے لوکاں وانگر اپنے آؤن والے ویلے دی تیاری کروگے ۔
 
خُدا دے تیار کیتے گئے ست زمانے :
۱۔چٹا گھوڑا: پانی تے رُوح دی خوشخبری دے شروع تے اِیہدےجاری رہن دا زمانہ۔
۲۔لال گھوڑا: شیطان دے آؤن نال امن دے ٹوٹے ٹوٹےہوجان دا زمانہ۔
۳۔کالا گھوڑا: بدنی تے رُوحانی کال دا زمانہ۔ موجودہ زمانہ۔
۴۔پیلاگھوڑا: مخالفِ مسیح دے ظاہر ہون نال پاک لوکاں دی شہادت دا زمانہ۔
۵۔پاک لوکاں دےجیوں اُٹھن تے چُکے جان ،تےبرّےدے ویاہ دے جشن دا زمانہ۔
۶۔ پہلی دُنیادی بربادی دا زمانہ۔
۷۔خُداتے اوہدے پاک لوکاں داہزارورہیاں دی بادشاہی تےنویں اسمان تے دھرتی اُتے راج کرن دا زمانہ۔
 
 ایہہ خُدا دے تیارکیتے گئے ست زمانے نیں ۔ اوہ لوک جیہڑے ایہناں زمانیاں نوں چنگے طریقے نال جان دے نیں تے پانی تے رُو ح دی خوشخبری اُتے ایمان رکھدے نیں اوہو ای نیں جنہاں نیں اخیری زمانیاں وچ جیوندے رہن لئی اپنے ایمان نوں تیار کیتا اے ۔ میَں آس رکھدا ہاں تے دعا کردا ہاں پئی تُسیں ،وی ، خُدادے تیار کیتے گئےزمانیاں دے سچے عقیدے نوں سمجھن دے لائق ہوووگے ۔