کورونا وائرس تے عالمگیر ڈاک سروس وچ رکاوٹ دے سببوں، اَسیں اپنی ’مُلوں بغیر چھاپی ہوئی کتاب دی سروس‘ نوں تھوڑے چِر لئی بند کر دے پئے آں۔
ایس صورتحال دے چانن وچ اسیں ایس ویلے تہانوں کتاباں گھلن دے قابل نئیں ہیگے آں۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔
دُعا ہے پئی ایہہ وبائی بیماری چھیتی ای مُک جاوے تے ڈاک سروس کُھل جاوے۔
مضمون 10: مُکاشفہ(مُکاشفہ دی کتاب اُتے تفسیر)
[12-1باب] خُدا دی کلِیسیا جیہڑی آؤن والے دناں وچ بھیڑے طریقے نال گھاٹے وچ رہوے گی (مُکاشفہ۱۲: ۱۔۱۷)
(مُکاشفہ۱۲: ۱۔۱۷)
” فیر اسمان اُتّے اِک وَڈا سارا نِشان دِسّیا۔ یعنی اِک زنانی نظر آئی۔ جِس سُورج نُوں کپڑے وانگر اُتّے لیا ہویا سی تے چَنّ اوہدے پیراں ہیٹھ سی۔ تے باراں تاریاں دا تاج اوہدے سِر اُتّے سی۔اوہ جمّن والی سی۔ تے جنیپے دِیاں پِیڑاں نال چِیکدی سی۔ تے بچّہ جمّن دی تکلیف وِچ سی۔فیر اِک ہور نِشان اسمان اُتّے دِسّیا۔ یعنی اِک وَڈا سارا لال ناگ۔ اوہدے سَتّ سِر تے دَس سِنگ سن تے اوہدے سِراں اُتّے سَتّ تاج۔تے اوہدی پُوشل نے اسمان دے ترِیجے حِصّہ تاریاں نُوں کھِچّ کے زمین اُتّے سُٹ لیا تے اوہ ناگ اوس زنانی دے اگّے جا کھلوتا جیہڑی جمّن والی سی پئی جدوں اوہ جمّے اوہدے بچّے نُوں کھالَئے۔تے اوس پُتر جمّیا یعنی اوہ مُنڈا جیہڑا لوہے دے ڈنڈے نال سارِیاں قوماں اُتّے حکُومت کرے گا۔ تے اوہدا بچّہ جھٹ پَٹ خُدا تے اوہدے تخت کول اَپڑایا گیا۔تے اوہ زنانی اوس بیابان نُوں بھج گئی جِتّھے اوہدے لئی خُدا ولّوں اِک تھاں تیار کِیتی گئی سی۔ پئی اوتھے اِک ہزار دو سَو سَٹّھ دِن تیکر اوہنوں پالن۔فیر اسمان اُتّے لڑائی ہوئی۔ میکائیل تے اوہدے فرِشتے ناگ نال لڑن نِکلے۔ تے ناگ تے اوہدے فرِشتے اوہناں نال لڑے۔پر جِت نا سکے۔ تے ایہدے پِچّھوں اسمان اُتّے اوہناں دے لئی تھاں نا رہیا۔تے اوہ وَڈا ناگ یعنی اوہو ای پرانا سَپّ جیہڑا ابلیس تے شیطان اکھواؤندا اے تے سارے جہان نُوں بدراہ کر دیندا اے۔ زمین اُتّے ڈیگیا گیا تے اوہدے فرِشتے وی اوہدے نال ڈیگے گئے۔فیر مَیں اسمان توں ایہہ زور دی اواز آؤندی سُنی پئی ہُن ساڈے خُدا دی نجات تے قُدرت تے بادشاہی تے اوہدے مسِیح دا اختیار ظاہر ہویا۔ کیوں جو ساڈیاں بھراواں اُتّے الزام لان والا جیہڑا دِنے راتِیں ساڈے خُدا دے اگّے اوہناں اُتّے الزام لاندا رہندا سی ڈیگیا گیا۔تے اوہناں لیلے دے خُون تے اپنی گواہی دے کلام دے سبّب اوہنوں جِت لیا تے اوہناں اپنیاں جاناں نُوں پیارا نا رکھیا۔ ایتھوں تیکرپئی مَوت وی جَھل لئی۔ایس لئی اَے اسمانوں تے اوہناں دے رہن والیو خُوشیاں کرو۔ اَے زمین تے سمُندر تُہاڈے اُتّے افسوس اے کیوں جو ابلیس بڑے غُصّہ وِچ اُتر کے تُہاڈے کول آیا اے ایس لئی پئی اوہ جان دا اے پئی میرا تھوڑا جِہیا ویلا باقی اے۔تے جد ناگ ڈِٹّھا پئی مَیں زمین اُتّے ڈیگیا گیا آں تے اوس زنانی نُوں ستایا جِس پُتر جمّیا سی۔تے اوس زنانی نُوں وڈّے عُقاب دے دو پَر دِتّے گئے۔ پئی سَپّ دے اگّوں اُڈ کے بیابان وِچ اپنے اوس تھاں اَپڑ جائے جِتّھے اِک زمانے تے زمانیاں تے ادھے زمانے تیکر اوہدی پالنا ہوندی اے۔تے سَپّ نے اوس زنانی دے مگر اپنے مُنھ توں ندی وانگر پانی وگایا۔ پئی اوہنوں ایس ندی نال روہڑ دیوے۔پر زمین اوس زنانی دی مدد کِیتی تے اپنا مُنھ کھول کے اوس ندی دا گُھٹّ بھر گئی۔ جیہڑی ناگ اپنے مُونہو وگائی سی۔تے ناگ نُوں زنانی اُتّے غُصّہ آیا۔ تے اوہدی باقی اولاد نال جیہڑی خُدا دے حُکماں اُتّے عمل کر دی اے تے یِسُوع دی گواہی دین اُتّے قیم اے لڑن نِکلیا۔ “
تفسیر
آیت ۱: فیر اسمان اُتّے اِک وَڈا سارا نِشان دِسّیا۔ یعنی اِک زنانی نظر آئی۔ جِس سُورج نُوں کپڑے وانگر اُتّے لیا ہویا سی تے چَنّ اوہدے پیراں ہیٹھ سی۔ تے باراں تاریاں دا تاج اوہدے سِر اُتّے سی۔
ایہہ آیت سانوں خُدا دی کلِیسیابارے دسدی اے جیہڑی شہادت دے سبب اوہنوں جلال دیندی پئی اے ۔” زنانی جِس سُورج نُوں کپڑے وانگر اُتّے لیا ہویا سی “ ایس زمین اُتے خُدا دی کلِیسیابارے دسدی اے ، تے جُملہ ” چَنّ اوہدے پیراں ہیٹھ سی “ دا مطلب ہیگا اے پئی کلیسیا ہُن تیکر دنیا دے اختیار یعنی دنیا دی حکومت دے ہیٹھاں اے ۔ دوجے پاسے ، جملہ ” باراں تاریاں دا تاج اوہدے سِر اُتّے سی۔ “ دا مطلب ہیگااے پئی اوہدی کلیسیا شیطان دیاں دکھاں تے دھمکیاں اُتے اپنی شہادت نال فتح پاوے گی ۔
ایہہ آیت دکھ جرنے وچکار خُدا دی کلیسیا بارے دسدی اے ۔ اوہدی کلیسیا شیطان دے ہتھوں بوہت گھاٹے وچ رہوے گی تے اخیری زمانے وچ شہید ہووے گی ، پر ایہہ اوس ویلے اپنے ایمان نال شیطان اُتے فتح پاوےگی تے خُداولوں جلال پاوے گی ۔ ایتھوں تیکر پئی دکھ جرن دے زمانے وچ ، خدا دی کلیسیا دے پاک لوک مخالفِ مسیح اُتے فتح پاؤن گےتےپانی تے روح دی خوشخبری اُتے ایمان رکھن دے سبب شہادت نال فتح مند ہون گے ۔
خُدا دے پُتر جیہڑے پانی تے روح دے سبب نویں سریوں جم پئے نیں پکے یقین نال اخیری زمانے وچ شہید کیتے جان گے ۔ اوہ جیہڑے پہلوں ای ایمان رکھ چُکے نیں تے دکھاں دے جرن توں پہلوں خُدا دی سیوا کر چُکے نیں تے اوہ جیہڑے خوشخبری اُتے ایمان رکھن گے تے دکھ جرن وچ بوہت ساریاں کھُمباں وانگر نکلن گے ، دونویں شہادت داایمان رکھن گے جیہڑا اوہناں نوں مخالفِ مسیح دے خلاف کھلون تے فتح پاؤن دے لائق کر سکدا اے ۔
اوہ جیہڑےاوہنوں دھوکہ دین دے سبب شہادت توں کڈھے جاندے نیں اسمانوں وی کڈھے جان گے، تے شیطان دےنال اتھاہ کھڈے والے دوزخ وچ ڈِگ جان گے ۔تے سانوں دلیر ایمان نال ، اپنی شہادت نوں قبول کرن لئی تیار ہونا چاہی دا اےانج ناں ہووے پئی اسیں کدھرے ساڈے لئی بنائیاں گِیاں اپنیاں سدا دیاں برکتاں نا گوا لِئیے ۔تے سانوں جاننا اے پئی سارے نویں سریوں جمے ہوئے لوک شیطان دیاں دھمکیاں داسامناکرن گے ۔ شہادت صرف وقتی طور تے گی تے جد ایہہ تھوڑا چر مک جائے گا ،تاں ہزار ورہیاں دی بادشاہی تے اسمان ساڈا ای ہووے گا ۔
ایسے طرح ، سانوں لازمی ایس موجود زمانے وچ جان دے ہویاں زندہ رہنا چاہی دا اے پئی جد اخیری زمانہ آئے گا ،اسیں ایمان دے سبب تے پا ک رُوح دے راہیں شہید ہوجاواں گے ۔ فیر پا ک رُوح سانوں اکھر دیوے گا جنہاں نال سانوں شہادت دے ایس زمانے وچ ، دلیری نال اپنے دکھاں اُتے فتح پاؤن دے لائق ہون تے اپنے ایمان دا انکار کریوں اڈ اپنی شہادت نوں قبول کرن لئی تیار ہوندے ہویاں بولنا اے ۔
ایتھوں تیکر پئی ڈراؤنے دکھاں وچکار ، خُدا دی کلیسیا فیر وی شیطان دے خلاف لڑے گی تے شہید ہوکے اوس اُتے فتح پائے گی ۔ ایہہ گل بوہت واضح ہیگی اے پئی کلیسیا اپنے شہادت نال مخالفِ مسیح اُتے فتح پاؤن ،خُدا دے کلام اُتے ایتھو ں تیکر پئی شیطان دے ایس اخیری زمانے وچ ایمان رکھن دے سبب ، خُدا کولوں اپنا انعام پائے گی ۔
آیت ۲: اوہ جمّن والی سی۔ تے جنیپے دِیاں پِیڑاں نال چِیکدی سی۔ تے بچّہ جمّن دی تکلیف
وِچ سی۔
ایہہ آیت سانوں خُدا دی کلیسیا دے دکھاں وچ پین بارے دسدی اے ۔ ایہہ آیت سانوں شیطان ولوں گھلیاں گِیاں اخیری زمانے دیاں مصیبتاں تے دکھاں وچکار ساری کلیسیا دے ڈٹ کے رہن بارے دسدی اے ۔خُدا دی کلیسیا وڈے دکھاں وچوں ، یعنی مخالفِ مسیح دے خلاف اپنیاں کوششاں دے زمانے وچوں لنگھے گی ۔ پاک لوک ایس طرح صرف خُدا دے ناں نوں پکارن گے ۔ جد اوہ دکھاں وچوں لنگھن گے ۔ اوہ دعا منگن گے ، ”اَے خُدا ،سانوں اپنا فضل دے تاں پئی اسیں چھیتی نال ایہناں ساریاں دکھاں وچوں لنگھ جائیے ۔ ایہناں ساریاں دکھاں نوں گھٹ کرن دے سبب ساڈی مدد کر۔ سانوں ساڈیاں دکھاں اُتے فتح پاؤن دی جازت دے ۔ سانوں شیطان اُتے فتح پاؤن دے لائق بنا !“
آیت ۳: فیر اِک ہور نِشان اسمان اُتّے دِسّیا۔ یعنی اِک وَڈا سارا لال ناگ۔ اوہدے سَتّ سِر تے دَس سِنگ سن تے اوہدے سِراں اُتّے سَتّ تاج۔
آؤن والے دناں وچ جد شیطان ایس زمین اُتے اپنا رنگ روپ وکھائے گا ، اوہ ایس طرح کم کرے گا جویں پئی اوہ خُدا سی ، تے یعنی اوہ دنیا دیاں ساریاں قوماں نوں اِنج اکٹھا کرے گا تے اوہناں نوں اپنے ارادے پورے کرن لئی اپنیاں ہتھیاراں وانگر ورتے گا ۔ اوہ بالکل خاص کرکے پاک لوکاں نوں ، وی قتل کرے گا تے دنیا اُتے خُدا تے بادشاہ وانگر راج کرے گا ۔
جملہ ” یعنی اِک وَڈا سارا لال ناگ۔ اوہدے سَتّ سِر تے دَس سِنگ سن تے اوہدے سِراں اُتّے سَتّ تاج۔“ ظاہر کردا اے پئی شیطان ، سلامتی نوں برباد کرن والا ، اپنیاں کرتُوتاں نال ست بادشاواں تے دس قوماں نوں متحرک کرے گا ۔ ایہہ آیت سانوں دسدی اے پئی شیطان، اپنی خاص طاقت نال ، بوہت ڈٹ کے خُدا دے خلاف کھلوندا اے ۔
آیت ۴: تے اوہدی پُوشل نے اسمان دے ترِیجے حِصّہ تاریاں نُوں کھِچّ کے زمین اُتّے سُٹ لیا تے اوہ ناگ اوس زنانی دے اگّے جا کھلوتا جیہڑی جمّن والی سی پئی جدوں اوہ جمّے اوہدے بچّے نُوں کھالَئے۔
ایہہ آیت سانوں دسدی اے شیطان کیہ کردا اے۔ ناگ اسمان اُتے خُدا دے خلاف ہوگیا تے
اوتھوں ہیٹھاں سُٹ دتا گیا ۔ اوہنے اسمان دے تریجے حصے فرشتیاں نوں اپنے ول کھِچ لیا تے اپنے آپ دی بربادی نال اوہناں نوں بربادی ول لَے ٹُریا ۔ اِنج اوہ خُدا دی حضوری وچوں کڈھیا گیا سی ۔ پر ایتھوں تیکر پئی جد کہ ایس زمین اُتے، اوہ ہُن تیکر اوہناں نوں تنگ کرن دے راہیں خُدا دی خوشخبری دے کم نوں روکن دی کوشش کردا اےجیہڑے ایہدے اُتے ایمان رکھدے نیں ۔
آیت ۵: تے اوس پُتر جمّیا یعنی اوہ مُنڈا جیہڑا لوہے دے ڈنڈے نال سارِیاں قوماں اُتّے حکُومت کرے گا۔ تے اوہدا بچّہ جھٹ پَٹ خُدا تے اوہدے تخت کول اَپڑایا گیا۔
ایہہ آیت سانوں دسدی اے پئی خُدا دی کلیسیا ، ایس لئی پئی اوہ یسوع مسیح اُتے ایمان رکھن دے سبب شہید ہوندی اے ، مسیح دے نال جیوں اُٹھے گی تے اسمانی بادشاہی اُتے چُک لئی جاوے گی ۔
آیت ۶: تے اوہ زنانی اوس بیابان نُوں بھج گئی جِتّھے اوہدے لئی خُدا ولّوں اِک تھاں تیار کِیتی گئی سی۔ پئی اوتھے اِک ہزار دو سَو سَٹّھ دِن تیکراوہنوں پالن۔
ایہہ آیت سانوں دسدی اے پئی خُدا ایس دنیا وچ ساڈھے تِن ورہیاں تیکر اپنے لوکاں دی پالنا کرے گا ۔ خُدا دی کلیسیا ودھیا طریقے نال دکھاں دےشروع ہون توں پہلوں اک ہزار دو سو سٹھ دِناں تیکر خُدا دے ہتھوں ودھے پھُلے گی تے محفوظ رہوے گی ،تے جد ویلا آئے گا ، ایہہ مخالفِ مسیح نال لڑے گی تے شہید ہووے گی ۔
آیتاں ۷ ۔۸: فیر اسمان اُتّے لڑائی ہوئی۔ میکائیل تے اوہدے فرِشتے ناگ نال لڑن نِکلے۔ تے ناگ تے اوہدے فرِشتے اوہناں نال لڑے۔پر جِت نا سکے۔ تے ایہدے پِچّھوں اسمان اُتّے اوہناں دے لئی تھاں نا رہیا۔
ایہہ حوالہ شیطان دےاسمانوں مکمل طریقے نال باہرکڈھے جان بارے دسدا پیا اے ۔
ایس زمین اُتے آؤن توں پہلوں ، شیطان کامل طریقے نال اسمانوں سُٹیا جائے گا ۔ شیطان اگانہہ توں اسمان اُتے ٹھہرن دے لائق نئیں ہوئے گا ۔ شیطان جیہڑا وَا اُتے اختیار رکھدا اے ،دونویں وَا تے زمین اُتے بیٹھا اے تے ہُن اوہناں اُتے راج کردا اے ، تے ایس طرح اِنج اوہ سارے دا سارا اسمان اُتوں سُٹیا جائے گا ، ایس زمین اُتے اوہ پاک لوکاں نوں ایتھوں تیکر پئی بوہتا تنگ کرے گا جد اخیری دن آؤن گے ۔ پر شیطان اودوں کڈھ دتا جائے گا تے سارے دا سارا اتھاہ کڈھے تے دوزخ وچ جیہڑے خُدا ولوں بنائے گئے نیں بنھیا جائے گا ۔
آیت ۹: تے اوہ وَڈا ناگ یعنی اوہو ای پرانا سَپّ جیہڑا ابلیس تے شیطان اکھواؤندا اے تے سارے جہان نُوں بدراہ کر دیندا اے۔ زمین اُتّے ڈیگیا گیا تے اوہدے فرِشتے وی اوہدے نال ڈیگے گئے۔
اخیری زمانے وچ ، شیطان ،جویں ای اسمانوں کڈھیا جاندا اے تے ایس زمین اُتے سُٹیا جاندا اے ، اوہ اخیری زمانے تیکر پاک لوکاں نوں ستائے گا تے قتل کرے گا ۔ بوہت سارے پاک لوک فیر اوہدے ہتھوں شہید ہون گے ۔
آیت ۱۰: فیر مَیں اسمان توں ایہہ زور دی اواز آؤندی سُنی پئی ہُن ساڈے خُدا دی نجات تے قُدرت تے بادشاہی تے اوہدے مسِیح دا اختیار ظاہر ہویا۔ کیوں جو ساڈیاں بھراواں اُتّے الزام لان والا جیہڑا دِنے راتِیں ساڈے خُدا دے اگّے اوہناں اُتّے الزام لاندا رہندا سی ڈیگیا گیا۔
شیطان اگانہہ توں اسمانی بادشاہی وچ نئیں ہوئے گا ۔ جویں ای اخیری زمانہ لنگھے گا ،اوہ اگانہہ توں اسمان اُتے رہن دے لائق نئیں ہوئے گا ۔ ایس لئی پئی مُکاشفہ ۲۱:۲۷ سانوں دسدا اے پئی اسمان اُتے نا بدکار نا ای جھوٹے پائےجاندے نیں ۔
آیت ۱۱: تے اوہناں لیلے دے خُون تے اپنی گواہی دے کلام دے سبّب اوہنوں جِت لیا تے اوہناں اپنیاں جاناں نُوں پیارا نا رکھیا۔ ایتھوں تِیکر پئی مَوت وی جَھل لئی۔
جد اخیری زمانہ آئے گا ، پاک لوک اپنے ایمان دی راکھی لئی شہید کیتے جان گے ۔ جیہڑا وی پاک اے اخیری زمانے وچ اپنی شہادت دے ایمان دے راہیں ایمان دی فتح پاوے گا ۔دوجے اکھراں وچ ، شہید جیہڑے خُداوند اُتے ایمان رکھدے نیں اپنے آپ دے خلاف اپنی جنگ اُتے فتح پاؤن گے ۔
آیت ۱۲: ایس لئی اَے اسمانوں تے اوہناں دے رہن والیو خُوشیاں کرو۔ اَے زمین تے سمُندر تُہاڈے اُتّے افسوس اے کیوں جو ابلیس بڑے غُصّہ وِچ اُتر کے تُہاڈے کول آیا اے ایس لئی پئی اوہ جان دا اے پئی میرا تھوڑا جِہیا ویلا باقی اے۔
جویں ای شیطان اسمانوں سُٹیا جاندا اے ، او ہ عارضی طور نال دنیا اُتے اختیار رکھدا اے ، اوہ بھیڑے طریقے نال پاک لوکاں نوں دکھ دیوے گاتے تنگ کرے گا جد اوہ ایس زمین اُتے اُتر کے آئے گا ۔ پر پاک لوکاں لئی جیہڑے شہید ہون گے تے وَا وچ اُتاں اُٹھائے جان گے ،اوہناں نوں صرف خوشی اڈیکے گی ۔ اُٹھائے جان دے بعدوں ، خُدا ساری زمین تے سمندر اُتے ست پیالیاں دیاں آفتاں گھلے گا ۔
آیت ۱۳: تے جد ناگ ڈِٹّھا پئی مَیں زمین اُتّے ڈیگیا گیا آں تے اوس زنانی نُوں ستایا جِس پُتر جمّیا سی۔
ایہہ حوالہ وڈے دکھاں دے زمانے وچکار پاک لوکاں دے آؤن والے دکھاں بارے دسدا اے ۔ پاک لوک تے خُدا دے خادم اوس ویلے مرن گے جویں ای اوہ شہید ہوندے نیں ، پر ایہہ اصل وچ اوہناں دے ایمان دی فتح دا کارنامہ ہوئےگا ۔ ہور کوئی دکھ ہور کوئی موت ، دکھ یا لعنت اوہناں لئی نئیں ہوئے گی ۔ سارا جیہڑ ا اوہناں لئی باقی رہوے گا خُدا دی وڈیائی کرنا تے اسمان اُتے سدا تیکر جلال پاؤنا ہوئے گا ۔
آیت ۱۴: تے اوس زنانی نُوں وڈّے عُقاب دے دو پَر دِتّے گئے۔ پئی سَپّ دے اگّوں اُڈ کے بیابان وِچ اپنے اوس تھاں اَپڑ جائے جِتّھے اِک زمانے تے زمانیاں تے ادھے زمانے تِیکر اوہدی پالنا ہوندی اے۔
پاک کلام سانوں دسدا اے پئی چُکیاجانا وڈے دکھاں توں پہلوں ساڈھے تِن ورہے لنگھن دے بعدوں واقع ہوئے گا ۔ایہہ کلام سانوں آکھدا اے پئی خُدا پاک لوکاں نوں وڈے دکھاں دیاں قدرتی آفتاں دے وچکار اپنی خاص راکھی تے پرورش دیوے گا ۔ خُدا ساڈے وچوں او ہناں دی پرورش کرے گا جیہڑے اپنے ایمان نوں قیم رکھدے نیں تاں پئی اسیں ایس ایمان نال شیطان دے خلاف لڑ سکیے تے
فتح پا سکیے ۔
ایہہ پئی ہُن اسیں پانی تے رُوح دی خوشخبری لئی جیوندے پئے آں ایہہ ساڈا رُوحانی کھانا اے ، تے ایسے طرح ساڈی خوشخبری دی منادی اے ۔ ایتھوں تیکر پئی جد تیکر ایس زمین اُتے ست تُرہیاں دیاں آفتاں نازل نئیں ہو جاندیاں ، اسیں خوشخبری دی منادی کرن لئی اپنیاں زندگیاں بسر کردے رہاں گے ۔ کیوں ؟ ایس پئی جے اسیں ایس خوشخبری دی منادی اپنی شہادت دے بالکل اخیری ویلے تیکر نئیں کردے ، بوہت چوکھے لوک دوزخ وچ گواچ جان گے ۔ کوئی دوجا ویلا نئیں سگوں ایہو ای ویلا اے ۔
آیتاں ۱۵ ۔ ۱۷: تے سَپّ نے اوس زنانی دے مگر اپنے مُنھ توں ندی وانگر پانی وگایا۔ پئی اوہنوں ایس ندی نال روہڑ دیوے۔پر زمین اوس زنانی دی مدد کِیتی تے اپنا مُنھ کھول کے اوس ندی دا گُھٹّ بھر گئی۔ جیہڑی ناگ اپنے مُونہو وگائی سی۔تے ناگ نُوں زنانی اُتّے غُصّہ آیا۔ تے اوہدی باقی اولاد نال جیہڑی خُدا دے حُکماں اُتّے عمل کر دی اے تے یِسُوع دی گواہی دین اُتّے قیم اے لڑن نِکلیا۔
شیطان نے پہلوں اوہناں نوں ستاؤن تے اوہناں نوں خوشخبری توں دُور کرن دے سببوں پاک لوکاں نوں قتل کیتا ۔ پر اج کل جویں خوشخبری وکھ وکھ طریقیاں نال بوہت چوکھی ودھ گئی اے ، اوہ پاپ نوں ڈوہلن تے اوہناں نوں ایہدے روڑھ وچ ڈبون دے سببوں پاک لوکاں نوں قتل کرن دی کوشش کردا اے ۔ اِنج شیطان پاپ دے دریا نوں وگاؤن تے اوہناں نوں ایہدا پانی پیاؤن دے سبب بوہت سارے پاک لوکاں اُتے موت لیاؤن دی کوشش کر چُکیا اے ، پر اوہ جیہڑے نویں سریوں نئیں جم پئے ایہدی بجائے پاپ دے ایس دریا دا سارے دا سارا پانی پی چُکے نیں ۔ جویں پاک لوک بچ گئے نیں تے ایتھوں تیکر پئی ایس کوشش نال قتل نئیں ہوئے ، شیطان اک دوجے طریقے نال اوہناں نوں مکمل طریقے نال مارن لئی ، جویں باب ۱۳ وچ ظاہر کیتا گیا اے آئے گا ۔
Copyright © 2021 by The New Life Mission